੭. ਸਰਸੁਤ੍ਤਵਣ੍ਣਨਾ

੨੭. ਸਰਣਤੋ ਅਵਿਚ੍ਛੇਦਵਸੇਨ ਪਵਤ੍ਤਨਤੋ ਖਨ੍ਧਾਦੀਨਂ ਪਟਿਪਾਟਿ ਸਰਾ. ਤੇਨਾਹ ‘‘ਇਮੇ ਸਂਸਾਰਸਰਾ’’ਤਿ. ਕੁਤੋਤਿ ਕੇਨ ਕਾਰਣੇਨ, ਕਿਮ੍ਹਿ ਵਾ? ਤੇਨਾਹ ‘‘ਕਿਂ ਆਗਮ੍ਮਾ’’ਤਿ? ਨ ਪਤਿਟ੍ਠਾਤਿ ਪਚ੍ਚਯਾਭਾਵਤੋ. ਆਪੋਤਿਆਦਿਨਾ ਪਾਲ਼ਿਯਂ ਚਤੁਨ੍ਨਂ ਮਹਾਭੂਤਾਨਂ ਅਪ੍ਪਤਿਟ੍ਠਾਨਾਪਦੇਸੇਨ ਤਤ੍ਥ ਕਾਮਰੂਪਭਵਾਨਂ ਅਭਾਵੋ ਦਸ੍ਸਿਤੋ. ਤਦੁਭਯਾਭਾਵਦਸ੍ਸਨੇਨ ਹੇਟ੍ਠਾ ਵੁਤ੍ਤਨਯੇਨੇਵ ਅਰੂਪਭਵਸ੍ਸਪਿ ਅਭਾਵੋ ਦਸ੍ਸਿਤੋਵ ਹੋਤਿ, ਯਥਾਰੁਤਵਸੇਨ ਵਾ ਏਤ੍ਥ ਅਤ੍ਥੋ ਵੇਦਿਤਬ੍ਬੋ. ਯਸ੍ਮਾ ਪੁਰਿਮਾ ਦ੍ਵੇ ਗਹਿਤਾ, ਗਹਿਤਞ੍ਚ ਅਤ੍ਥਂ ਪਰਿਗ੍ਗਹੇਤ੍ਵਾਵ ਪਚ੍ਛਿਮਤ੍ਥੋ ਪਵਤ੍ਤੋਤਿ.

ਸਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.