੩. ਜਟਾਸੁਤ੍ਤਵਣ੍ਣਨਾ

੨੩. ਯੇਨ ਅਤ੍ਥੇਨ ਤਣ੍ਹਾ ‘‘ਜਟਾ’’ਤਿ ਵੁਤ੍ਤਾ, ਤਮੇਵਤ੍ਥਂ ਦਸ੍ਸੇਤੁਂ ‘‘ਜਾਲਿਨਿਯਾ’’ਤਿ ਵੁਤ੍ਤਂ. ਸਾ ਹਿ ਅਟ੍ਠਸਤਤਣ੍ਹਾਵਿਚਰਿਤਪਭੇਦਾ ਅਤ੍ਤਨੋ ਅਵਯਵਭੂਤਾ ਏਵ ਜਾਲਾ ਏਤਿਸ੍ਸਾ ਅਤ੍ਥੀਤਿ ਜਾਲਿਨੀਤਿ ਵੁਚ੍ਚਤਿ. ਇਦਾਨਿਸ੍ਸਾ ਜਟਾਕਾਰੇਨ ਪਵਤ੍ਤਿਂ ਦਸ੍ਸੇਤੁਂ ‘‘ਸਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਰੂਪਾਦੀਸੁ ਆਰਮ੍ਮਣੇਸੂਤਿ ਤਸ੍ਸਾ ਪਵਤ੍ਤਿਟ੍ਠਾਨਮਾਹ ਰੂਪਾਦਿਛਲ਼ਾਰਮ੍ਮਣਵਿਨਿਮੁਤ੍ਤਸ੍ਸ ਤਣ੍ਹਾਵਿਸਯਸ੍ਸ ਅਭਾਵਤੋ. ਹੇਟ੍ਠੁਪਰਿਯਵਸੇਨਾਤਿ ਕਦਾਚਿ ਰੂਪਾਰਮ੍ਮਣੇ ਕਦਾਚਿ ਯਾਵ ਧਮ੍ਮਾਰਮ੍ਮਣਾ, ਕਦਾਚਿ ਧਮ੍ਮਾਰਮ੍ਮਣੇ ਕਦਾਚਿ ਯਾਵ ਰੂਪਾਰਮ੍ਮਣਾਤਿ ਏਵਂ ਹੇਟ੍ਠਾ ਚ ਉਪਰਿ ਚ ਪਵਤ੍ਤਿਵਸੇਨ. ਦੇਸਨਾਕ੍ਕਮੇਨ ਚੇਤ੍ਥ ਹੇਟ੍ਠੁਪਰਿਯਤਾ ਵੇਦਿਤਬ੍ਬਾ, ਕਾਮਰਾਗਾਦਿਵਸੇਨਪਿ ਅਯਮਤ੍ਥੋ ਵੇਦਿਤਬ੍ਬੋ. ਸਙ੍ਖਾਰਾਨਂ ਖਣਿਕਭਾਵਤੋ ਅਪਰਾਪਰੁਪ੍ਪਤ੍ਤਿ ਏਤ੍ਥ ਸਂਸਿਬ੍ਬਨਨ੍ਤਿ ਆਹ ‘‘ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਂਸਿਬ੍ਬਨਟ੍ਠੇਨਾ’’ਤਿ. ਇਦਂ ਯੇਨ ਸਮ੍ਬਨ੍ਧੇਨ ਜਟਾ ਵਿਯਾਤਿ ਜਟਾਤਿ ਜਟਾਤਣ੍ਹਾਨਂ ਉਪਮੂਪਮੇਯ੍ਯਤਾ, ਤਂਦਸ੍ਸਨਂ. ਅਯਞ੍ਹੇਤ੍ਥ ਅਤ੍ਥੋ – ਯਥਾ ਜਾਲਿਨੀ ਵੇਲ਼ੁਗੁਮ੍ਬਸ੍ਸ ਸਾਖਾ, ਤਾਸਂ ਸਞ੍ਚਯਾਦਯੋ ਚ ਅਤ੍ਤਨੋ ਅਵਯਵੇਹਿ ਸਂਸਿਬ੍ਬਿਤਾ ਵਿਨਦ੍ਧਾ ‘‘ਜਟਾ’’ਤਿ ਵੁਚ੍ਚਨ੍ਤਿ, ਏਵਂ ਤਣ੍ਹਾਪਿ ਸਂਸਿਬ੍ਬਨਸਭਾਵੇਨਾਤਿ.

ਇਮੇ ਸਤ੍ਤਾ ‘‘ਮਮ ਇਦ’’ਨ੍ਤਿ ਪਰਿਗ੍ਗਹਿਤਂ ਅਤ੍ਤਨਿਬ੍ਬਿਸੇਸਂ ਮਞ੍ਞਮਾਨਾ ਅਬ੍ਭਨ੍ਤਰਿਮਂ ਕਰੋਨ੍ਤਿ. ਅਬ੍ਭਨ੍ਤਰਟ੍ਠੋ ਚ ਅਨ੍ਤੋ-ਸਦ੍ਦੋਤਿ ਸਕਪਰਿਕ੍ਖਾਰੇਸੁ ਉਪ੍ਪਜ੍ਜਨਮਾਨਾਪਿ ਤਣ੍ਹਾ ‘‘ਅਨ੍ਤੋਜਟਾ’’ਤਿ ਵੁਤ੍ਤਾ. ਪਬ੍ਬਜਿਤਸ੍ਸ ਪਤ੍ਤਾਦਿ, ਗਹਟ੍ਠਸ੍ਸ ਹਤ੍ਥਿਆਦਿ ਸਕਪਰਿਕ੍ਖਾਰੋ. ਅਤ੍ਤਾਤਿ ਭਵਤਿ ਏਤ੍ਥ ਅਭਿਮਾਨੋਤਿ ਅਤ੍ਤਭਾਵੋ, ਉਪਾਦਾਨਕ੍ਖਨ੍ਧਪਞ੍ਚਕਂ. ਸਰੀਰਨ੍ਤਿ ਕੇਚਿ. ‘‘ਮਮ ਅਤ੍ਤਭਾਵੋ ਸੁਨ੍ਦਰੋ, ਅਸੁਕਸ੍ਸ ਵਿਯ ਮਮ ਅਤ੍ਤਭਾਵੋ ਭਵੇਯ੍ਯਾ’’ਤਿਆਦਿਨਾ ਸਕਅਤ੍ਤਭਾਵਾਦੀਸੁ ਤਣ੍ਹਾਯ ਉਪ੍ਪਜ੍ਜਨਾਕਾਰੋ ਵੇਦਿਤਬ੍ਬੋ. ਅਤ੍ਤਨੋ ਚਕ੍ਖਾਦੀਨਿ ਅਜ੍ਝਤ੍ਤਿਕਾਯਤਨਾਨਿ, ਅਤ੍ਤਨੋ ਚ ਪਰੇਸਞ੍ਚ ਰੂਪਾਦੀਨਿ ਬਾਹਿਰਾਯਤਨਾਨਿ, ਪਰੇਸਂ ਸਬ੍ਬਾਨਿ ਵਾ. ਸਪਰਸਨ੍ਤਤਿਪਰਿਯਾਪਨ੍ਨਾਨਿ ਵਾ ਚਕ੍ਖਾਦੀਨਿ ਅਜ੍ਝਤ੍ਤਿਕਾਯਤਨਾਨਿ, ਤਥਾ ਰੂਪਾਦੀਨਿ ਬਾਹਿਰਾਯਤਨਾਨਿ. ਪਰਿਤ੍ਤਮਹਗ੍ਗਤਭਵੇਸੁ ਪਵਤ੍ਤਿਯਾਪਿ ਤਣ੍ਹਾਯ ਅਨ੍ਤੋਜਟਾਬਹਿਜਟਾਭਾਵੋ ਵੇਦਿਤਬ੍ਬੋ. ਕਾਮਭਵੋ ਹਿ ਕਸ੍ਸਚਿਪਿ ਕਿਲੇਸਸ੍ਸ ਅਵਿਕ੍ਖਮ੍ਭਿਤਤ੍ਤਾ ਕਤ੍ਥਚਿਪਿ ਅਵਿਮੁਤ੍ਤੋ ਅਜ੍ਝਤ੍ਤਗ੍ਗਹਣਸ੍ਸ ਵਿਸੇਸਪਚ੍ਚਯੋਤਿ ‘‘ਅਜ੍ਝਤ੍ਤਂ ਅਨ੍ਤੋ’’ਤਿ ਚ ਵੁਚ੍ਚਤਿ, ਤਬ੍ਬਿਪਰਿਯਾਯਤੋ ਰੂਪਾਰੂਪਭਵੋ ‘‘ਬਹਿਦ੍ਧਾ ਬਹੀ’’ਤਿ ਚ. ਤੇਨਾਹ ਭਗਵਾ – ‘‘ਅਜ੍ਝਤ੍ਤਸਂਯੋਜਨੋ ਪੁਗ੍ਗਲੋ, ਬਹਿਦ੍ਧਾਸਂਯੋਜਨੋ ਪੁਗ੍ਗਲੋ’’ਤਿ (ਅ. ਨਿ. ੨.੩੭).

ਵਿਸਯਭੇਦੇਨ ਪਵਤ੍ਤਿਆਕਾਰਭੇਦੇਨ ਅਨੇਕਭੇਦਭਿਨ੍ਨਮ੍ਪਿ ਤਣ੍ਹਂ ਜਟਾਭਾਵਸਾਮਞ੍ਞੇਨ ਏਕਨ੍ਤਿ ਗਹੇਤ੍ਵਾ ‘‘ਤਾਯ ਏਵਂ ਉਪ੍ਪਜ੍ਜਮਾਨਾਯ ਜਟਾਯਾ’’ਤਿ ਵੁਤ੍ਤਂ. ਸਾ ਪਨ ਪਜਾਤਿ ਵੁਤ੍ਤਸਤ੍ਤਸਨ੍ਤਾਨਪਰਿਯਾਪਨ੍ਨਾ ਏਵ ਹੁਤ੍ਵਾ ਪੁਨਪ੍ਪੁਨਂ ਤਂ ਜਟੇਨ੍ਤੀ ਵਿਨਨ੍ਧਨ੍ਤੀ ਪਵਤ੍ਤਤੀਤਿ ਆਹ ‘‘ਜਟਾਯ ਜਟਿਤਾ ਪਜਾ’’ਤਿ. ਤਥਾ ਹਿ ਪਰਮਤ੍ਥਤੋ ਯਦਿਪਿ ਅਵਯਵਬ੍ਯਤਿਰੇਕੇਨ ਸਮੁਦਾਯੋ ਨਤ੍ਥਿ, ਏਕਦੇਸੋ ਪਨ ਸਮੁਦਾਯੋ ਨਾਮ ਨ ਹੋਤੀਤਿ ਅਵਯਵਤੋ ਸਮੁਦਾਯਂ ਭਿਨ੍ਨਂ ਕਤ੍ਵਾ ਉਪਮੂਪਮੇਯ੍ਯਂ ਦਸ੍ਸੇਨ੍ਤੋ ‘‘ਯਥਾ ਨਾਮ ਵੇਲ਼ੁਜਟਾਦੀਹਿ…ਪੇ… ਸਂਸਿਬ੍ਬਿਤਾ’’ਤਿ ਆਹ. ਇਮਂ ਜਟਨ੍ਤਿ ਸਮ੍ਬਨ੍ਧੋ. ਤੀਸੁ ਧਾਤੂਸੁ ਏਕਮ੍ਪਿ ਅਸੇਸੇਤ੍ਵਾ ਸਂਸਿਬ੍ਬਨੇਨ ਤੇਧਾਤੁਕਂ ਜਟੇਤ੍ਵਾ ਠਿਤਂ. ਤੇਨਸ੍ਸਾ ਮਹਾਵਿਸਯਤਂ ਵਿਜਟਨਸ੍ਸ ਚ ਸੁਦੁਕ੍ਕਰਭਾਵਮਾਹ. ਵਿਜਟੇਤੁਂ ਕੋ ਸਮਤ੍ਥੋਤਿ ਇਮਿਨਾ ‘‘ਵਿਜਟਯੇ’’ਤਿ ਪਦਂ ਸਤ੍ਤਿਅਤ੍ਥਂ, ਨ ਵਿਧਿਅਤ੍ਥਨ੍ਤਿ ਦਸ੍ਸੇਤਿ.

ਏਵਂ ‘‘ਅਨ੍ਤੋਜਟਾ’’ਤਿਆਦਿਨਾ ਪੁਟ੍ਠੋ ਅਥਸ੍ਸ ਭਗਵਾ ਤਮਤ੍ਥਂ ਵਿਸ੍ਸਜ੍ਜੇਨ੍ਤੋ ‘‘ਸੀਲੇ ਪਤਿਟ੍ਠਾਯਾ’’ਤਿਆਦਿਮਾਹ. ਏਤ੍ਥ ਸੀਲੇਤਿ ਕੁਸਲਸੀਲੇ. ਤਂ ਪਨ ਪਾਤਿਮੋਕ੍ਖਸਂਵਰਾਦਿਭੇਦੇਸੁ ਪਰਿਸੁਦ੍ਧਮੇਵ ਇਚ੍ਛਿਤਬ੍ਬਨ੍ਤਿ ਆਹ ‘‘ਚਤੁਪਾਰਿਸੁਦ੍ਧਿਸੀਲੇ’’ਤਿ.

ਨਰਤਿ ਨੇਤੀਤਿ ਨਰੋ, ਪੁਰਿਸੋ. ਕਾਮਂ ਇਤ੍ਥੀਪਿ ਤਣ੍ਹਾਜਟਾਵਿਜਟਨੇ ਸਮਤ੍ਥਾ ਅਤ੍ਥਿ, ਪਧਾਨਮੇਵ ਪਨ ਸਤ੍ਤਂ ਦਸ੍ਸੇਨ੍ਤੋ ‘‘ਨਰੋ’’ਤਿ ਆਹ ਯਥਾ ‘‘ਸਤ੍ਥਾ ਦੇਵਮਨੁਸ੍ਸਾਨ’’ਨ੍ਤਿ, ਅਟ੍ਠਕਥਾਯਂ ਪਨ ਅਵਿਭਾਗੇਨ ਪੁਗ੍ਗਲਪਰਿਯਾਯੋ ਅਯਨ੍ਤਿ ਦਸ੍ਸੇਤੁਂ ‘‘ਨਰੋਤਿ ਸਤ੍ਤੋ’’ਤਿ ਵੁਤ੍ਤਂ. ਵਿਪਾਕਭੂਤਾਯ ਸਹ ਪਞ੍ਞਾਯ ਭਵਤੀਤਿ ਸਪਞ੍ਞੋ. ਤਾਯ ਹਿ ਆਦਿਤੋ ਪਟ੍ਠਾਯ ਸਨ੍ਤਾਨਵਸੇਨ ਬਹੁਲਂ ਪਵਤ੍ਤਮਾਨਾਯ ਅਯਂ ਸਤ੍ਤੋ ਸਵਿਸੇਸਂ ਸਪਞ੍ਞੋਤਿ ਵਤ੍ਤਬ੍ਬਤਂ ਅਰਹਤਿ. ਵਿਪਾਕਪਞ੍ਞਾਪਿ ਹਿ ਸਨ੍ਤਾਨਵਿਸੇਸੇਨ ਭਾਵਨਾਪਞ੍ਞੁਪ੍ਪਤ੍ਤਿਯਾ ਉਪਨਿਸ੍ਸਯਪਚ੍ਚਯੋ ਹੋਤਿ ਅਹੇਤੁਕਦ੍ਵਿਹੇਤੁਕਾਨਂ ਤਦਭਾਵਤੋ. ਕਮ੍ਮਜਤਿਹੇਤੁਕਪਟਿਸਨ੍ਧਿਪਞ੍ਞਾਯਾਤਿ ਕਮ੍ਮਜਾਯ ਤਿਹੇਤੁਕਪਟਿਸਨ੍ਧਿਯਂ ਪਞ੍ਞਾਯਾਤਿ ਏਵਂ ਤਿਹੇਤੁਕਸਦ੍ਦੋ ਪਟਿਸਨ੍ਧਿਸਦ੍ਦੇਨ ਸਮ੍ਬਨ੍ਧਿਤਬ੍ਬੋ, ਨ ਪਞ੍ਞਾਸਦ੍ਦੇਨ. ਨ ਹਿ ਪਞ੍ਞਾ ਤਿਹੇਤੁਕਾ ਅਤ੍ਥਿ. ਪਟਿਸਨ੍ਧਿਤੋ ਪਭੁਤਿ ਪਵਤ੍ਤਮਾਨਾ ਪਞ੍ਞਾ ‘‘ਪਟਿਸਨ੍ਧਿਯਂ ਪਞ੍ਞਾ’’ਤਿ ਵੁਤ੍ਤਾ ਤਂਮੂਲਕਤ੍ਤਾ, ਨ ਪਟਿਸਨ੍ਧਿਕ੍ਖਣੇ ਪਵਤ੍ਤਾ ਏਵ.

ਚਿਨ੍ਤੇਤਿ ਆਰਮ੍ਮਣਂ ਉਪਨਿਜ੍ਝਾਯਤੀਤਿ ਚਿਤ੍ਤਂ, ਸਮਾਧਿ. ਸੋ ਹਿ ਸਾਤਿਸਯਂ ਉਪਨਿਜ੍ਝਾਨਕਿਚ੍ਚੋ. ਨ ਹਿ ਵਿਤਕ੍ਕਾਦਯੋ ਵਿਨਾ ਸਮਾਧਿਨਾ ਤਮਤ੍ਥਂ ਸਾਧੇਨ੍ਤਿ, ਸਮਾਧਿ ਪਨ ਤੇਹਿ ਵਿਨਾਪਿ ਸਾਧੇਤੀਤਿ. ਪਗੁਣਬਲਵਭਾਵਾਪਾਦਨੇਨ ਪਚ੍ਚਯੇਹਿ ਚਿਤ੍ਤਂ, ਅਤ੍ਤਸਨ੍ਤਾਨਂ ਚਿਨੋਤੀਤਿਪਿ ਚਿਤ੍ਤਂ, ਸਮਾਧਿ. ਪਠਮਜ੍ਝਾਨਾਦਿਵਸੇਨ ਚਿਤ੍ਤਵਿਚਿਤ੍ਤਤਾਯ ਇਦ੍ਧਿਵਿਧਾਦਿਚਿਤ੍ਤਕਰਣੇਨ ਚ ਸਮਾਧਿ ਚਿਤ੍ਤਨ੍ਤਿ ਵਿਨਾਪਿ ਪਰੋਪਦੇਸੇਨਸ੍ਸ ਚਿਤ੍ਤਪਰਿਯਾਯੋ ਲਬ੍ਭਤੇਵ. ਅਟ੍ਠਕਥਾਯਂ ਪਨ ਚਿਤ੍ਤ-ਸਦ੍ਦੋ ਵਿਞ੍ਞਾਣੇ ਨਿਰੁਲ਼੍ਹੋਤਿ ਕਤ੍ਵਾ ਵੁਤ੍ਤਂ ‘‘ਚਿਤ੍ਤਸੀਸੇਨ ਹੇਤ੍ਥ ਅਟ੍ਠ ਸਮਾਪਤ੍ਤਿਯੋ ਕਥਿਤਾ’’ਤਿ. ਯਥਾਸਭਾਵਂ ਪਕਾਰੇਹਿ ਜਾਨਾਤੀਤਿ ਪਞ੍ਞਾ. ਸਾ ਯਦਿਪਿ ਕੁਸਲਾਦਿਭੇਦਤੋ ਬਹੁਵਿਧਾ, ‘‘ਭਾਵਯ’’ਨ੍ਤਿ ਪਨ ਵਚਨਤੋ ਭਾਵੇਤਬ੍ਬਾ ਇਧਾਧਿਪ੍ਪੇਤਾਤਿ ਤਂ ਦਸ੍ਸੇਨ੍ਤੋ ‘‘ਪਞ੍ਞਾਨਾਮੇਨ ਵਿਪਸ੍ਸਨਾ ਕਥਿਤਾ’’ਤਿ. ਯਦਿਪਿ ਕਿਲੇਸਾਨਂ ਪਹਾਨਂ ਆਤਾਪਨਂ, ਤਂ ਸਮ੍ਮਾਦਿਟ੍ਠਿਆਦੀਨਮ੍ਪਿ ਅਤ੍ਥੇਵ, ਆਤਪ੍ਪਸਦ੍ਦੋ ਵਿਯ ਪਨ ਆਤਾਪ-ਸਦ੍ਦੋ ਵੀਰਿਯੇ ਏਵ ਨਿਰੁਲ਼੍ਹੋਤਿ ਆਹ ‘‘ਆਤਾਪੀਤਿ ਵੀਰਿਯਵਾ’’ਤਿ. ਯਥਾ ਕਮ੍ਮਟ੍ਠਾਨਂ ਤਾਯ ਪਞ੍ਞਾਯ ਪਰਿਤੋ ਹਰੀਯਤਿ ਪਵਤ੍ਤੀਯਤਿ, ਏਵਂ ਸਾਪਿ ਤਦਤ੍ਥਂ ਯੋਗਿਨਾਤਿ ਆਹ ‘‘ਪਾਰਿਹਾਰਿਯਪਞ੍ਞਾ’’ਤਿ. ਅਭਿਕ੍ਕਮਾਦੀਨਿ ਸਬ੍ਬਕਿਚ੍ਚਾਨਿ ਸਾਤ੍ਥਕਸਮ੍ਪਜਞ੍ਞਾਦਿਵਸੇਨ ਪਰਿਚ੍ਛਿਜ੍ਜ ਨੇਤੀਤਿ ਸਬ੍ਬਕਿਚ੍ਚਪਰਿਣਾਯਿਕਾ.

ਯਸ੍ਮਾ ਪੁਗ੍ਗਲਾਧਿਟ੍ਠਾਨੇਨ ਗਾਥਾ ਭਾਸਿਤਾ, ਤਸ੍ਮਾ ਪੁਗ੍ਗਲਾਧਿਟ੍ਠਾਨਮੇਵ ਉਪਮਂ ਦਸ੍ਸੇਨ੍ਤੋ ‘‘ਯਥਾ ਨਾਮ ਪੁਰਿਸੋ’’ਤਿਆਦਿਮਾਹ. ਤਤ੍ਥ ਸੁਨਿਸਿਤਨ੍ਤਿ ਸੁਟ੍ਠੁ ਨਿਸਿਤਂ, ਅਤਿਵਿਯ ਤਿਖਿਣਨ੍ਤਿ ਅਤ੍ਥੋ. ਸਤ੍ਥਸ੍ਸ ਨਿਸਿਤਤਰਭਾਵਕਰਣਂ ਨਿਸਾਨਸਿਲਾਯਂ, ਬਾਹੁਬਲੇਨ ਚਸ੍ਸ ਉਕ੍ਖਿਪਨਨ੍ਤਿ ਉਭਯਮ੍ਪੇਤਂ ਅਤ੍ਥਾਪਨ੍ਨਂ ਕਤ੍ਵਾ ਉਪਮਾ ਵੁਤ੍ਤਾਤਿ ਤਦੁਭਯਂ ਉਪਮੇਯ੍ਯਂ ਦਸ੍ਸੇਨ੍ਤੋ ‘‘ਸਮਾਧਿਸਿਲਾਯਂ ਸੁਨਿਸਿਤਂ…ਪੇ… ਪਞ੍ਞਾਹਤ੍ਥੇਨ ਉਕ੍ਖਿਪਿਤ੍ਵਾ’’ਤਿ ਆਹ. ਸਮਾਧਿਗੁਣੇਨ ਹਿ ਪਞ੍ਞਾਯ ਤਿਕ੍ਖਭਾਵੋ. ਯਥਾਹ ‘‘ਸਮਾਹਿਤੋ ਯਥਾਭੂਤਂ ਪਜਾਨਾਤੀ’’ਤਿ (ਸਂ. ਨਿ. ੩.੫; ੪.੯੯; ੫.੧੦੭੧). ਵੀਰਿਯਞ੍ਚਸ੍ਸਾ ਉਪਤ੍ਥਮ੍ਭਕਂ ਪਗ੍ਗਣ੍ਹਨਤੋ. ਵਿਜਟੇਯ੍ਯਾਤਿ ਵਿਜਟੇਤੁਂ ਸਕ੍ਕੁਣੇਯ੍ਯ. ਵੁਟ੍ਠਾਨਗਾਮਿਨਿਵਿਪਸ੍ਸਨਾਯ ਹਿ ਵਤ੍ਤਮਾਨਾਯ ਯੋਗਾਵਚਰੋ ਤਣ੍ਹਾਜਟਂ ਵਿਜਟੇਤੁਂ ਸਮਤ੍ਥੋ ਨਾਮ. ਵਿਜਟਨਞ੍ਚੇਤ੍ਥ ਸਮੁਚ੍ਛੇਦਵਸੇਨ ਪਹਾਨਨ੍ਤਿ ਆਹ – ‘‘ਸਞ੍ਛਿਨ੍ਦੇਯ੍ਯ ਸਮ੍ਪਦਾਲੇਯ੍ਯਾ’’ਤਿ.

ਮਗ੍ਗਕ੍ਖਣੇ ਪਨੇਸ ਵਿਜਟੇਤਿ ਨਾਮ, ਅਗ੍ਗਫਲਕ੍ਖਣੇ ਸਬ੍ਬਸੋ ਵਿਜਟਿਤਜਟੋ ਨਾਮ. ਤੇਨਾਹ ‘‘ਇਦਾਨੀ’’ਤਿਆਦਿ. ਯਸ੍ਮਾ ਜਟਾਯ ਵਿਜਟਨਂ ਅਰਿਯਮਗ੍ਗੇਨ, ਤਞ੍ਚ ਖੋ ਨਿਬ੍ਬਾਨਂ ਆਗਮ੍ਮ, ਤਸ੍ਮਾ ਤਂ ਸਨ੍ਧਾਯਾਹ ‘‘ਜਟਾਯ ਵਿਜਟਨੋਕਾਸ’’ਨ੍ਤਿ. ਯਤ੍ਥ ਪਨ ਸਾ ਵਿਜਟੀਯਤਿ, ਤਂ ਦਸ੍ਸੇਤੁਂ ‘‘ਯਤ੍ਥ ਨਾਮਞ੍ਚਾ’’ਤਿਆਦਿ ਵੁਤ੍ਤਂ. ‘‘ਪਟਿਘਂ ਰੂਪਸਞ੍ਞਾ ਚਾ’’ਤਿ ਗਾਥਾਸੁਖਤ੍ਥਂ ਸਾਨੁਨਾਸਿਕਂ ਕਤ੍ਵਾ ਨਿਦ੍ਦੇਸੋ, ‘‘ਪਟਿਘਰੂਪਸਞ੍ਞਾ’’ਤਿ ਵੁਤ੍ਤਂ ਹੋਤਿ. ਪਟਿਘਸਞ੍ਞਾਵਸੇਨ ਕਾਮਭਵੋ ਗਹਿਤੋ ਕਾਮਭਵਪਰਿਯਾਪਨ੍ਨਤ੍ਤਾ ਤਾਯ. ਪਥਵੀਕਸਿਣਾਦਿਰੂਪੇ ਸਞ੍ਞਾ ਰੂਪਸਞ੍ਞਾ. ਉਭਯਤ੍ਥਾਪਿ ਸਞ੍ਞਾਸੀਸੇਨ ਚਿਤ੍ਤੁਪ੍ਪਾਦਸ੍ਸੇਵ ਗਹਣਂ. ਭਵਸਙ੍ਖੇਪੇਨਾਤਿ ਭਵਭਾਵੇਨ ਸਙ੍ਖਿਪਿਤਬ੍ਬਤਾਯ, ਭਵਲਕ੍ਖਣੇਨ ਏਕਲਕ੍ਖਣਤ੍ਤਾਤਿ ਅਤ੍ਥੋ. ਰੂਪੇ ਵਾ ਵਿਰਜ੍ਜਨਵਸੇਨ ਚ ਵਤ੍ਤੁਂ ਸਕ੍ਕੁਣੇਯ੍ਯਾ ਇਧ ਰੂਪਸਞ੍ਞਾਤਿ ਵੁਤ੍ਤਾ, ਏਵਮ੍ਪੇਤ੍ਥ ਅਰੂਪਭਵਸ੍ਸ ਚ ਗਹਿਤਤਾ ਵੇਦਿਤਬ੍ਬਾ. ‘‘ਨਾਮਞ੍ਚ ਰੂਪਞ੍ਚਾ’’ਤਿ ਅਨਵਸੇਸਤੋ ਨਾਮਰੂਪਂ ਗਹਿਤਨ੍ਤਿ ਅਰੂਪਭਵ-ਅਸਞ੍ਞਭਵਾਨਮ੍ਪੇਤ੍ਥ ਗਹਣਂ ਸਿਦ੍ਧਨ੍ਤਿ ਅਪਰੇ. ਪਰਿਯਾਦਿਯਨਟ੍ਠਾਨੇਤਿ ਪਰਿਯਾਦਿਯਨਕਾਰਣੇ ਸਬ੍ਬਸੋ ਖੇਪਨਨਿਮਿਤ੍ਤੇ ਨਿਬ੍ਬਾਨੇ. ਤੇਨਾਹ ‘‘ਨਿਬ੍ਬਾਨਂ…ਪੇ… ਦਸ੍ਸਿਤੋ ਹੋਤੀ’’ਤਿ.

ਜਟਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.