੮. ਹਿਰੀਸੁਤ੍ਤਵਣ੍ਣਨਾ

੧੮. ਨਿਸੇਧੇਤੀਤਿ ਨਿਵਾਰੇਤਿ ਪਵਤ੍ਤਿਤੁਂ ਨ ਦੇਤਿ. ਪੁਚ੍ਛਤਿ ਦੇਵਤਾ. ਅਪਹਰਨ੍ਤੋਤਿ ਅਪਨੇਨ੍ਤੋ, ਯਥਾ ਸਬ੍ਬੇਨ ਸਬ੍ਬਂ ਅਕ੍ਕੋਸਵਤ੍ਥੁ ਨ ਹੋਤਿ, ਏਵਂ ਪਰਿਹਰਨ੍ਤੋਤਿ ਅਤ੍ਥੋ. ਬੁਜ੍ਝਤਿ ਸਾਰਥਿਵਿਧਂ. ਅਤ੍ਤਨਿ ਨਿਪਾਤਂ ਨ ਦੇਤਿ, ਆਜਾਨੀਯੋ ਹਿ ਯੁਤ੍ਤਂ ਪਜਾਨਾਤਿ. ਅਭੂਤੇਨ ਅਭੂਤਕ੍ਕੋਸੇਨ ਪਰਿਮੁਤ੍ਤੋ ਨਾਮ ਨਤ੍ਥਿ ਬਾਲਾਨਞ੍ਚ ਜਨਾਨਂ ਪਰਾਪਵਾਦੇ ਯੁਤ੍ਤਪਯੁਤ੍ਤਭਾਵਤੋ. ਤੇਨਾਹ ਭਗਵਾ –

‘‘ਨਿਨ੍ਦਨ੍ਤਿ ਤੁਣ੍ਹਿਮਾਸੀਨਂ, ਨਿਨ੍ਦਨ੍ਤਿ ਬਹੁਭਾਣਿਨਂ;

ਮਿਤਭਾਣਿਮ੍ਪਿ ਨਿਨ੍ਦਨ੍ਤਿ, ਨਤ੍ਥਿ ਲੋਕੇ ਅਨਿਨ੍ਦਿਤੋ’’ਤਿ. (ਧ. ਪ. ੨੨੭);

ਤਨੁਯਾਤਿ ਵਾ ਕਤਿਪਯਾ. ਤੇਨਾਹ ‘‘ਅਪ੍ਪਕਾ’’ਤਿ. ਸਦਾ ਸਤਾਤਿ ਹਿਰਿਨਿਸੇਧਭਾਵੇ ਕਾਰਣਵਚਨਂ. ਪਪ੍ਪੁਯ੍ਯਾਤਿ ਪਤ੍ਵਾ ਅਧਿਗਨ੍ਤ੍ਵਾ. ਵਾਨਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਂ, ਅਸਙ੍ਖਤਧਾਤੁ.

ਹਿਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.