੨. ਨਨ੍ਦਨਵਗ੍ਗੋ
੧. ਨਨ੍ਦਨਸੁਤ੍ਤਵਣ੍ਣਨਾ
੧੧. ‘‘ਤਤ੍ਰ ਭਗਵਾ’’ਤਿ ਵੁਤ੍ਤੇ ਨ ਤਥਾ ਬ੍ਯਞ੍ਜਨਾਨਂ ਸਿਲਿਟ੍ਠਤਾ, ਯਥਾ ‘‘ਤਤ੍ਰ ਖੋ ਭਗਵਾ’’ਤਿ ਵੁਤ੍ਤੇਤਿ ਆਹ ‘‘ਬ੍ਯਞ੍ਜਨਸਿਲਿਟ੍ਠਤਾਵਸੇਨਾ’’ਤਿ. ਪਰਿਸਜੇਟ੍ਠਕੇਤਿ ਪਰਿਸਾਯ ਜੇਟ੍ਠਕੇ, ਯੇ ਤਸ੍ਸਾ ਦੇਸਨਾਯ ਵਿਸੇਸਤੋ ਭਾਜਨਭੂਤਾ. ਪਰਿਸਜੇਟ੍ਠਕੇ ਭਿਕ੍ਖੂਤਿ ਚਤੁਪਰਿਸਜੇਟ੍ਠਕੇ ਭਿਕ੍ਖੂ. ਚਤੁਨ੍ਨਂ ਹਿ ਪਰਿਸਾਨਂ ਜੇਟ੍ਠਾ ਭਿਕ੍ਖੁਪਰਿਸਾ ਪਠਮੁਪ੍ਪਨ੍ਨਤ੍ਤਾ. ਆਮਨ੍ਤੇਸੀਤਿ ਸਮ੍ਬੋਧੇਸਿ, ਸਮ੍ਬੋਧਨਞ੍ਚ ਜਾਨਾਪਨਨ੍ਤਿ ਆਹ ‘‘ਜਾਨਾਪੇਸੀ’’ਤਿ. ਭਦਨ੍ਤੇਤਿ ਗਰੁਗਾਰਵਸਪ੍ਪਤਿਸ੍ਸਵਵਚਨਮੇਤਂ, ਅਤ੍ਥਤੋ ਪਨ ਭਦਨ੍ਤੇਤਿ ਭਦ੍ਦਂ ਤਵ ਹੋਤੁ ਅਤ੍ਤਨੋ ਨਿਟ੍ਠਾਨਪਰਿਯੋਸਾਨਤ੍ਤਾ ਪਰੇਸਞ੍ਚ ਸਨ੍ਤਤਾਵਹਤ੍ਤਾ. ਭਗਵਤੋ ਪਚ੍ਚਸ੍ਸੋਸੁਨ੍ਤਿ ਏਤ੍ਥ ਭਗਵਤੋਤਿ ਸਾਮਿਵਚਨਂ ਆਮਨ੍ਤਨਮੇਵ ਸਮ੍ਬਨ੍ਧਿਅਤ੍ਥਪਦਂ ਅਪੇਕ੍ਖਤੀਤਿ ਅਧਿਪ੍ਪਾਯੇਨਾਹ ‘‘ਭਗਵਤੋ ਵਚਨਂ ਪਤਿਅਸ੍ਸੋਸੁ’’ਨ੍ਤਿ. ਭਗਵਤੋਤਿ ਪਨ ਇਦਂ ਪਤਿਸ੍ਸਵਨਸਮ੍ਬਨ੍ਧੇਨ ਸਮ੍ਪਦਾਨਵਚਨਂ ਯਥਾ ‘‘ਦੇਵਦਤ੍ਤਸ੍ਸ ਪਟਿਸ੍ਸੁਣਾਤੀ’’ਤਿ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਨਿਦਾਨਵਗ੍ਗਸ੍ਸ ਆਦਿਸੁਤ੍ਤਵਣ੍ਣਨਾਯਂ ਆਗਮਿਸ੍ਸਤਿ.
ਤਾਵਤਿਂਸਕਾਯੋਤਿ ਤਾਵਤਿਂਸਸਞ੍ਞਿਤੋ ਦੇਵਨਿਕਾਯੋ. ਦੁਤਿਯਦੇਵਲੋਕੋਤਿ ਛਸੁ ਕਾਮਲੋਕੇਸੁ ਦੁਤਿਯੋ ਦੇਵਲੋਕੋ. ਤੇਤ੍ਤਿਂਸ ਜਨਾ ਸਹਪੁਞ੍ਞਕਾਰਿਨੋ ਤਤ੍ਥ ਉਪ੍ਪਨ੍ਨਾ, ਤਂਸਹਚਰਿਤਟ੍ਠਾਨਂ ਤਾਵਤਿਂਸਂ, ਤਨ੍ਨਿਵਾਸਿਨੋਪਿ ਤਾਵਤਿਂਸਨਾਮਕਾ ਸਹਚਰਣਞਾਯੇਨਾਤਿ ਆਹ ‘‘ਮਘੇਨ ਮਾਣਵੇਨਾ’’ਤਿਆਦਿ. ਅਯਂ ਪਨ ਕੇਚਿਵਾਦੋ ਬ੍ਯਾਪਨ੍ਨੋ ਹੋਤੀਤਿ ਤਂ ਅਰੋਚੇਨ੍ਤੇਨ ‘‘ਵਦਨ੍ਤੀ’’ਤਿ ਵੁਤ੍ਤਂ. ਬ੍ਯਾਪਨ੍ਨਤਂ ਦਸ੍ਸੇਨ੍ਤੋ ‘‘ਯਸ੍ਮਾ ਪਨਾ’’ਤਿਆਦਿਮਾਹ. ਤਥਾ ਹਿ ਵਕ੍ਖਤਿ ‘‘ਏਵਂ ਹਿ ਨਿਦ੍ਦੋਸਂ ਪਦਂ ਹੋਤੀ’’ਤਿ. ਨਾਮਪਣ੍ਣਤ੍ਤਿਯੇਵਾਤਿ ਅਤ੍ਥਨਿਰਪੇਕ੍ਖਤ੍ਤਾ ਨਿਰੁਲ਼੍ਹਸਮਞ੍ਞਾ ਏਵ.
ਤਂ ਵਨਨ੍ਤਿ ਤਂ ਉਪਵਨਂ. ਪਵਿਟ੍ਠੇ ਪਵਿਟ੍ਠੇ ਦੁਕ੍ਖਪ੍ਪਤ੍ਤੇਪਿ ਅਤ੍ਤਨੋ ਸਮ੍ਪਤ੍ਤਿਯਾ ਨਨ੍ਦਯਤਿ, ਪਗੇਵ ਅਦੁਕ੍ਖਪ੍ਪਤ੍ਤੇਤਿ ਦਸ੍ਸੇਤੁਂ ‘‘ਪਞ੍ਚਸੁ ਹੀ’’ਤਿਆਦਿ ਵੁਤ੍ਤਂ. ਪਵੇਸਿਤਾਨਨ੍ਤਿ ਪਕੋਟ੍ਠਵਾਰੇਨ ਪਵੇਸਿਤਾਨਮ੍ਪੀਤਿ ਅਧਿਪ੍ਪਾਯੋ. ਚਵਨਕਾਲੇਯੇਵ ਥੋਕਂ ਦਿਸ੍ਸਮਾਨਵਿਕਾਰਾ ਹੁਤ੍ਵਾ ਚਵਨ੍ਤਿ, ਤੇ ਸਨ੍ਧਾਯ ‘‘ਹਿਮਪਿਣ੍ਡੋ ਵਿਯ ਵਿਲੀਯਨ੍ਤੀ’’ਤਿ ਵੁਤ੍ਤਂ. ਯੇ ਪਨ ਅਦਿਸ੍ਸਮਾਨਵਿਕਾਰਾ ਸਹਸਾ ਅਨ੍ਤਰਧਾਯਨ੍ਤਿ, ਤੇ ਸਨ੍ਧਾਯ ‘‘ਦੀਪਸਿਖਾ ਵਿਯ ਵਿਜ੍ਝਾਯਨ੍ਤੀ’’ਤਿ ਵੁਤ੍ਤਨ੍ਤਿ ਵਦਨ੍ਤਿ. ਨਨ੍ਦਯਤਿ ਪਕਤਿਯਾ ਸੋਮਨਸ੍ਸਿਤਂ ਦੋਮਨਸ੍ਸਿਤਞ੍ਚ. ਨਨ੍ਦਨੇਤਿ ਏਵਂਅਨ੍ਵਤ੍ਥਨਾਮਕੇ ਉਯ੍ਯਾਨੇ. ਪਰਿਵੁਤਾਤਿ ‘‘ਦੇਵਤਾ’’ਤਿ ਵਚਨਂ ਉਪਾਦਾਯ ਇਤ੍ਥਿਲਿਙ੍ਗਵਸੇਨ ਵੁਤ੍ਤਂ. ਦੇਵਪੁਤ੍ਤੋ ਹਿ ਸੋ.
ਦਿਵਿ ਭਵਤ੍ਤਾ ਦਿਬ੍ਬਾਤਿ ਆਹ ‘‘ਦੇਵਲੋਕੇ ਨਿਬ੍ਬਤ੍ਤੇਹੀ’’ਤਿ. ਕਾਮੇਤਬ੍ਬਤਾਯ ਕਾਮਬਨ੍ਧਨੇਹਿ, ਤਥਾ ਅਞ੍ਞਮਞ੍ਞਂ ਅਸਂਕਿਣ੍ਣਸਭਾਵਤਾਯ ਕਾਮਕੋਟ੍ਠਾਸੇਹਿ. ਉਪੇਤਾਤਿ ਉਪਗਤਾ ਸਮਨ੍ਨਾਗਤਾ. ਪਰਿਚਾਰਯਮਾਨਾਤਿ ਪਰਿਰਮਮਾਨਾ. ਇਦਞ੍ਹਿ ਪਦਂ ਅਪੇਕ੍ਖਿਤ੍ਵਾ ‘‘ਕਾਮਗੁਣੇਹੀ’’ਤਿ ਕਤ੍ਤਰਿ ਕਰਣਵਚਨਂ, ਪੁਰਿਮਾਨਿ ਅਪੇਕ੍ਖਿਤ੍ਵਾ ਸਹਯੋਗੇ. ਰਮਮਾਨਾ ਚਰਨ੍ਤੀਤਿ ਕਤ੍ਵਾ ਵੁਤ੍ਤਂ ‘‘ਰਮਮਾਨਾ’’ਤਿ. ਪਰਿਚਾਰਯਮਾਨਾਤਿ ਵਾ ਪਰਿਤੋ ਸਮਨ੍ਤਤੋ ਚਾਰਯਮਾਨਾਤਿ ਅਤ੍ਥੋਤਿ ਆਹ ‘‘ਇਨ੍ਦ੍ਰਿਯਾਨਿ ਸਞ੍ਚਾਰਯਮਾਨਾ’’ਤਿ. ਪਠਮਨਯੇ ਹਿ ਅਨੁਭਵਨਤ੍ਥੋ ਪਰਿਚਰਣਸਦ੍ਦੋ, ਦੁਤਿਯਨਯੇ ਪਰਿਵਤ੍ਤਨਤ੍ਥੋ. ਸੋ ਪਨਾਤਿ ‘‘ਤਾਯਂ ਵੇਲਾਯ’’ਨ੍ਤਿ ਵੁਤ੍ਤਕਾਲੋ. ਅਧੁਨਾਤਿ ਸਮ੍ਪਤਿ. ਸੋ ਵਿਚਰੀਤਿ ਸਮ੍ਬਨ੍ਧੋ. ਕਾਮਗੁਣੇਹੀਤਿ ਹੇਤੁਮ੍ਹਿ ਕਰਣਵਚਨਂ. ਓਵੁਤੋਤਿ ਯਥਾ ਤਂ ਨ ਞਾਯਤਿ, ਏਵਂ ਪਿਹਿਤਚਿਤ੍ਤੋ. ਨਿਵੁਤੋ ਪਰਿਯੋਨਦ੍ਧੋਤਿ ਤਸ੍ਸੇਵ ਵੇਵਚਨਂ. ਤੇਨਾਹ ‘‘ਲੋਕਾਭਿਭੂਤੋ’’ਤਿ. ਆਸਭਿਨ੍ਤਿ ਸੇਟ੍ਠਂ ‘‘ਅਗ੍ਗੋਹਮਸ੍ਮਿ ਲੋਕਸ੍ਸਾ’’ਤਿਆਦਿਨਾ (ਦੀ. ਨਿ. ੨.੩੧; ਮ. ਨਿ. ੩.੨੦੭) ਭਾਸਨ੍ਤੋ ਬੋਧਿਸਤ੍ਤੋ ਵਿਯ.
ਕੇਵਲਂ ਦਸ੍ਸਨਂ ਕਿਮਤ੍ਥਿਯਨ੍ਤਿ ਆਹ – ‘‘ਯੇ…ਪੇ… ਵਸੇਨਾ’’ਤਿ, ਤਸ੍ਮਿਂ ਨਨ੍ਦਨਵਨੇ ਅਵਟ੍ਠਿਤਕਾਮਭਾਗਾਨੁਭਵਨਵਸੇਨਾਤਿ ਅਤ੍ਥੋ. ਨਰਦੇਵਾਨਨ੍ਤਿ ਪੁਰਿਸਭੂਤਦੇਵਤਾਨਂ. ਤੇਨਾਹ ‘‘ਦੇਵਪੁਰਿਸਾਨ’’ਨ੍ਤਿ. ਅਪ੍ਪਕਂ ਅਧਿਕਂ ਊਨਂ ਵਾ ਗਣਨੂਪਗਂ ਨਾਮ ਨ ਹੋਤੀਤਿ ‘‘ਤਿਕ੍ਖਤ੍ਤੁਂ ਦਸਨ੍ਨ’’ਨ੍ਤਿ ਵੁਤ੍ਤਂ. ‘‘ਤੇਤ੍ਤਿਂਸਾਨ’’ਨ੍ਤਿ ਹਿ ਵਤ੍ਤਬ੍ਬੇ ਅਯਂ ਰੁਲ਼੍ਹੀ. ਪਰਿਵਾਰਸਙ੍ਖਾਤੇਨ, ਨ ਕਿਤ੍ਤਿਸਙ੍ਖਾਤੇਨਾਤਿ ਅਧਿਪ੍ਪਾਯੋ. ਸੀਲਾਚਾਰਾਦਿਗੁਣਨੇਮਿਤ੍ਤਿਕਾ ਹਿ ਕਿਤ੍ਤਿ. ‘‘ਤਾਵਤਿਂਸਾ ਦੇਵਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’’ਤਿ ਏਵਮਾਦਿਵਚਨੇਨ ਯਸੇ ਇਚ੍ਛਿਤੇ ਅਵਿਸੇਸੇਤ੍ਵਾਵ ‘‘ਯਸੇਨ ਸਮ੍ਪਨ੍ਨਾਨ’’ਨ੍ਤਿ ਸਕ੍ਕਾ ਵਤ੍ਤੁਂ.
ਅਰਿਯਸਾਵਿਕਾਤਿ ਸੋਤਾਪਨ੍ਨਾ. ‘‘ਸਕਦਾਗਾਮਿਨੀ’’ਤਿ ਕੇਚਿ. ਅਧਿਪ੍ਪਾਯਂ ਵਿਵਟ੍ਟੇਤ੍ਵਾਤਿ ਯਥਾ ਤ੍ਵਂ ਅਨ੍ਧਬਾਲੇ ਮਞ੍ਞਸਿ, ਧਮ੍ਮਸਭਾਵੋ ਏਵਂ ਨ ਹੋਤੀਤਿ ਤਸ੍ਸਾ ਦੇਵਤਾਯ ਅਧਿਪ੍ਪਾਯਂ ਵਿਪਰਿਵਤ੍ਤੇਤ੍ਵਾ. ਏਕਨ੍ਤਤੋ ਸੁਖਂ ਨਾਮ ਨਿਬ੍ਬਾਨਮੇਵ. ਕਾਮਾ ਹਿ ਦੁਕ੍ਖਾ ਵਿਪਰਿਣਾਮਧਮ੍ਮਾਤਿ ਇਮਿਨਾ ਅਧਿਪ੍ਪਾਯੇਨ ਤਸ੍ਸਾ ਅਧਿਪ੍ਪਾਯਂ ਪਟਿਕ੍ਖਿਪਿਤ੍ਵਾ. ਕਾਮਂ ਚਤੁਤ੍ਥਭੂਮਕਾਪਿ ਸਙ੍ਖਾਰਾ ਅਨਿਚ੍ਚਾ ਏਵ, ਤੇ ਪਨ ਸਮ੍ਮਸਨੂਪਗਾ ਨ ਹੋਨ੍ਤੀਤਿ ਤੇਭੂਮਕਗ੍ਗਹਣਂ ਸਮ੍ਮਸਨਯੋਗ੍ਗੇਨ. ਹੁਤ੍ਵਾਤਿ ਪੁਬ੍ਬੇ ਅਵਿਜ੍ਜਮਾਨਾ ਪਚ੍ਚਯਸਮਵਾਯੇਨ ਭਵਿਤ੍ਵਾ ਉਪ੍ਪਜ੍ਜਿਤ੍ਵਾ. ਏਤੇਨ ਨੇਸਂ ਭਾਵਭਾਗੋ ਦਸ੍ਸਿਤੋ. ਅਭਾਵਤ੍ਥੇਨਾਤਿ ਸਰਸਨਿਰੋਧਭੂਤੇਨ ਵਿਦ੍ਧਂਸਨਭਾਵੇਨ.
ਅਨਿਚ੍ਚਾ ਅਦ੍ਧੁਵਾ, ਤਤੋ ਏਵ ‘‘ਮਯ੍ਹਂ ਇਮੇ ਸੁਖਾ’’ਤਿ ਵਾ ਨ ਇਚ੍ਚਾਤਿ ਅਨਿਚ੍ਚਾ. ਉਪ੍ਪਾਦਵਯਸਭਾਵਾਤਿ ਖਣੇ ਖਣੇ ਉਪ੍ਪਜ੍ਜਨਨਿਰੁਜ੍ਝਨਸਭਾਵਾ. ਤੇਨਾਹ ‘‘ਉਪ੍ਪ…ਪੇ… ਵੇਵਚਨ’’ਨ੍ਤਿ. ਪੁਰਿਮਸ੍ਸ ਵਾ ਪਚ੍ਛਿਮਂ ਕਾਰਣਵੇਵਚਨਨ੍ਤਿ ਆਹ ‘‘ਯਸ੍ਮਾ ਵਾ’’ਤਿਆਦਿ. ਤਦਨਨ੍ਤਰਾਤਿ ਤੇਸਂ ਉਪ੍ਪਾਦਵਯਾਨਂ ਅਨ੍ਤਰੇ. ਵੇਮਜ੍ਝਟ੍ਠਾਨਨ੍ਤਿ ਠਿਤਿਕ੍ਖਣਂ ਵਦਤਿ. ਯੇ ਪਨ ‘‘ਸਙ੍ਖਾਰਾਨਂ ਠਿਤਿ ਨਤ੍ਥੀ’’ਤਿ ਵਦਨ੍ਤਿ, ਤੇਸਂ ਤਂ ਮਿਚ੍ਛਾ. ਯਥਾ ਹਿ ਤਸ੍ਸੇਵ ਧਮ੍ਮਸ੍ਸ ਉਪ੍ਪਾਦਾਵਤ੍ਥਾਯ ਭਿਨ੍ਨਾ ਭਙ੍ਗਾਵਤ੍ਥਾ ਇਚ੍ਛਿਤਾ, ਅਞ੍ਞਥਾ ਅਞ੍ਞਂ ਉਪ੍ਪਜ੍ਜਤਿ, ਅਞ੍ਞਂ ਨਿਰੁਜ੍ਝਤੀਤਿ ਆਪਜ੍ਜਤਿ, ਏਵਂ ਉਪ੍ਪਨ੍ਨਸ੍ਸ ਭਙ੍ਗਾਭਿਮੁਖਾਵਤ੍ਥਾ ਇਚ੍ਛਿਤਬ੍ਬਾ, ਸਾਵ ਠਿਤਿਕ੍ਖਣੋ. ਨ ਹਿ ਉਪ੍ਪਜ੍ਜਮਾਨੋ ਭਿਜ੍ਜਤੀਤਿ ਸਕ੍ਕਾ ਵਿਞ੍ਞਾਤੁਨ੍ਤਿ. ਵੂਪਸਮਸਙ੍ਖਾਤਨ੍ਤਿ ਅਚ੍ਚਨ੍ਤਂ ਵੂਪਸਮਸਙ੍ਖਾਤਂ ਨਿਬ੍ਬਾਨਮੇਵ ਸੁਖਂ, ਨ ਤਯਾ ਅਧਿਪ੍ਪੇਤਾ ਕਾਮਾਤਿ ਅਧਿਪ੍ਪਾਯੋ.
ਨਨ੍ਦਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਨਨ੍ਦਤਿਸੁਤ੍ਤਵਣ੍ਣਨਾ
੧੨. ਨਨ੍ਦਤੀਤਿ ਏਤ੍ਥ ਨਨ੍ਦਨਂ ਸਪ੍ਪੀਤਿਕਕਾਮਤਣ੍ਹਾਕਿਚ੍ਚਨ੍ਤਿ ਆਹ – ‘‘ਤੁਸ੍ਸਤੀ’’ਤਿ, ਤਸ੍ਮਾ ਕਾਮਪਰਿਤੋਸੇਨ ਹਟ੍ਠਤੁਟ੍ਠੋ ਹੋਤੀਤਿ ਅਤ੍ਥੋ. ਪੁਤ੍ਤਿਮਾਤਿ ਪੁਤ੍ਤਵਾ. ਪਹੂਤੇ ਚਾਯਂ ਮਾ-ਸਦ੍ਦੋਤਿ ਆਹ ‘‘ਬਹੁਪੁਤ੍ਤੋ’’ਤਿ. ਬਹੁਪੁਤ੍ਤਤਾਗਹਣੇਨ ਇਦਂ ਪਯੋਜਨਨ੍ਤਿ ਦਸ੍ਸੇਨ੍ਤੋ ‘‘ਤਸ੍ਸ ਹੀ’’ਤਿਆਦਿਮਾਹ. ਪੂਰੇਨ੍ਤੀਤਿ ਪਦਂ ਅਪੇਕ੍ਖਿਤ੍ਵਾ ਧਞ੍ਞਸ੍ਸਾਤਿ ਸਾਮਿਵਚਨਂ. ਇਤਿ ਆਹਾਤਿ ਇਮਮਤ੍ਥਂ ਸਨ੍ਧਾਯਾਹ, ਏਵਂਅਧਿਪ੍ਪਾਯੋ ਹੁਤ੍ਵਾਤਿ ਅਤ੍ਥੋ. ਗੋਸਾਮਿਕੋਤਿ ਗੋਮਾ. ਇਧਾਪਿ ਪਹੂਤੇ ਮਾ-ਸਦ੍ਦੋ. ਗੋਰਸਸਮ੍ਪਤ੍ਤਿਨ੍ਤਿ ਗੋਰਸੇਹਿ ਨਿਪ੍ਫਜ੍ਜਨਸਮ੍ਪਤ੍ਤਿਂ. ਉਪਧੀਤਿ ਪਚ੍ਚਤ੍ਤਬਹੁਵਚਨਂ. ਹੀਤਿ ਹੇਤੁਅਤ੍ਥੇ ਨਿਪਾਤੋ. ਨਨ੍ਦਯਨ੍ਤਿ ਪੀਤਿਸੋਮਨਸ੍ਸਂ ਜਨਯਨ੍ਤੀਤਿ ਨਨ੍ਦਨਾ. ਕਾਮਂ ਦੁਕ੍ਖਸ੍ਸ ਅਧਿਟ੍ਠਾਨਭਾਵਤੋ ਨਿਪ੍ਪਰਿਯਾਯਤੋ ਕਾਮਾ ‘‘ਉਪਧੀ’’ਤਿ ਵਤ੍ਤਬ੍ਬਤਂ ਅਰਹਨ੍ਤਿ, ਤਸ੍ਸਾ ਪਨ ਦੇਵਤਾਯ ਅਧਿਪ੍ਪਾਯਵਸੇਨਾਹ ‘‘ਸੁਖਸ੍ਸ ਅਧਿਟ੍ਠਾਨਭਾਵਤੋ’’ਤਿ. ਕਿਲੇਸਵਤ੍ਥੁਹੇਤੁਕਤ੍ਤਾ ਸੇਸਪਦਦ੍ਵਯਸ੍ਸ ਕਿਞ੍ਚਾਪਿ ਸਬ੍ਬਂ ਸਂਸਾਰਦੁਕ੍ਖਂ ਕਿਲੇਸਹੇਤੁਕਂ, ਵਿਸੇਸਤੋ ਪਨ ਪਾਪਧਮ੍ਮਾ ਅਪਾਯੂਪਪਤ੍ਤਿਂ ਨਿਬ੍ਬਤ੍ਤੇਨ੍ਤੀਤਿ ਆਹ – ‘‘ਕਿਲੇਸਾਪਿ ਅਪਾਯਦੁਕ੍ਖਸ੍ਸ ਅਧਿਟ੍ਠਾਨਭਾਵਤੋ’’ਤਿ. ਉਪਸਂਹਰਮਾਨਾਤਿ ਉਪਨੇਨ੍ਤਾ ਉਪ੍ਪਾਦੇਨ੍ਤਾ. ਮਨੁਸ੍ਸਜਾਤਿਕੋਪਿ ਦੁਲ੍ਲਭਘਾਸਚ੍ਛਾਦਨਤਾਯ ਦੁਕ੍ਖਬਹੁਲੋ ਪੇਤੋ ਵਿਯਾਤਿ ਮਨੁਸ੍ਸਪੇਤੋ. ਮਨੁਸ੍ਸਜਾਤਿਕੋਪਿ ਵੁਤ੍ਤਰੂਪੋ ਅਨਤ੍ਥਪਾਤਿਤੋ ਪਰੇਹਿ ਹਿਂਸਿਤੋ ਸਮਾਨੋ ਨੇਰਯਿਕੋ ਵਿਯਾਤਿ ਮਨੁਸ੍ਸਨੇਰਯਿਕੋ.
ਫਲੇਨ ਰੁਕ੍ਖਤੋ ਫਲਂ ਪਾਤੇਨ੍ਤੋ ਵਿਯ. ਤਥੇਵ ਨਵਹਾਕਾਰੇਹੀਤਿ ਯਥਾ ਤੀਸੁ ਕਾਲੇਸੁ ਨਾਸਮਰਣਭੇਦਨਵਸੇਨ ਪੁਤ੍ਤਿਮਾ ਪੁਤ੍ਤਨਿਮਿਤ੍ਤਂ, ਤਥੇਵ ਗੋਮਾ ਗੋਨਿਮਿਤ੍ਤਂ ਸੋਚਤਿ ਨਵਪ੍ਪਕਾਰੇਹਿ. ਪਞ੍ਚ ਕਾਮਗੁਣੋਪਧੀਪਿ ਨਰਂ ਸੋਚੇਨ੍ਤੀਤਿ ਯੋਜਨਾ. ਤਸ੍ਸਾਤਿ ਯੋ ਉਤ੍ਤਰਿ ਅਨੁਗਿਜ੍ਝਤਿ ਤਸ੍ਸ. ਕਾਮਯਾਨਸ੍ਸਾਤਿ ਜਾਤਕਾਮਚ੍ਛਨ੍ਦਸ੍ਸ. ਜਨ੍ਤੁਨੋਤਿ ਸਤ੍ਤਸ੍ਸ. ਪਰਿਹਾਯਨ੍ਤਿ ਚੇ ਵਿਨਸ੍ਸਨ੍ਤਿ ਚੇ. ਸਲ੍ਲਵਿਦ੍ਧੋਵਾਤਿ ਸਲ੍ਲੇਨ ਵਿਦ੍ਧੋ ਵਿਯ. ਰੁਪ੍ਪਤੀਤਿ ਵਿਕਾਰਂ ਆਪਜ੍ਜਤਿ, ਸੋਚਤੀਤਿ ਅਤ੍ਥੋ. ਨਰਸ੍ਸ ਸੋਚਨਾ ਸੋਕਘਟ੍ਟਨਪਚ੍ਚਯੋ. ਉਪਧਯੋ ਨਤ੍ਥੀਤਿ ਕਾਮਂ ਕਿਲੇਸਾਭਿਸਙ੍ਖਾਰੂਪਧਯੋ ਤਾਵ ਖੀਣਾਸਵਸ੍ਸ ਨਤ੍ਥੇਵ ਮਗ੍ਗਾਧਿਗਮੇਨ ਨਿਰੋਧਿਤਤ੍ਤਾ, ਖਨ੍ਧੂਪਧਯੋ ਪਨ ਕਥਨ੍ਤਿ? ਤੇਪਿ ਤਸ੍ਸ ਸਉਪਾਦਿਸੇਸਕਾਲੇਪਿ ਅਟ੍ਠੁਪ੍ਪਤ੍ਤਿਹੇਤੁਭੂਤਾ ਨ ਸਨ੍ਤੇਵ, ਅਯਞ੍ਚ ਅਨੁਪਾਦਿਸੇਸਕਾਲੇ. ਤੇਨਾਹ ‘‘ਸੋ ਨਿਰੁਪਧਿ ਮਹਾਖੀਣਾਸਵੋ’’ਤਿ.
ਨਨ੍ਦਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਨਤ੍ਥਿਪੁਤ੍ਤਸਮਸੁਤ੍ਤਵਣ੍ਣਨਾ
੧੩. ਪੁਤ੍ਤਪੇਮਂ ਪੁਤ੍ਤਗ੍ਗਹਣੇਨ ਗਹਿਤਂ ਉਤ੍ਤਰਪਦਲੋਪੇਨਾਤਿ ਆਹ ‘‘ਪੁਤ੍ਤਪੇਮਸਮ’’ਨ੍ਤਿ. ਗੋਸਮਿਤਨ੍ਤਿ ਗੋਹਿ ਸਮਂ ਕਤਂ. ਤੇਨਾਹ ‘‘ਗੋਹਿ ਸਮ’’ਨ੍ਤਿ. ਸੂਰਿਯਸ੍ਸ ਸਮਾਤਿ ਸੂਰਿਯਸਮਾ. ਅਵਯਵਸਮ੍ਬਨ੍ਧੇ ਚੇਤਂ ਸਾਮਿਵਚਨਂ. ਅਵਯਵੋ ਚੇਤ੍ਥ ਆਭਾ ਏਵਾਤਿ ਵਿਞ੍ਞਾਯਤਿ ‘‘ਅਨਨ੍ਤਰਂ ਆਭਾ’’ਤਿ ਵੁਚ੍ਚਮਾਨਤ੍ਤਾਤਿ ਆਹ ‘‘ਸੂਰਿਯਾਭਾਯ ਸਮਾ’’ਤਿਆਦਿ. ਮਹੋਘਭਾਵੇਨ ਸਰਨ੍ਤਿ ਸਵਨ੍ਤੀਤਿ ਸਰਾ, ਮਹਨ੍ਤਾ ਜਲਾਸਯਾ. ਸਬ੍ਬੇ ਤੇ ਸਮੁਦ੍ਦਪਰਮਾ ਓਰਿਮਜਨੇਹਿ ਅਦਿਟ੍ਠਪਰਤੀਰਤ੍ਤਾ ਤਸ੍ਸ.
ਨਤ੍ਥਿ ਅਤ੍ਤਸਮਂ ਪੇਮਨ੍ਤਿ ਗਾਥਾਯ ਪਠਮਗਾਥਾਯਂ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਤ੍ਤਪੇਮੇਨ ਸਮਂ ਪੇਮਂ ਨਾਮ ਨਤ੍ਥੀਤਿ ਅਯਮਤ੍ਥੋ. ਅਨੁਦਕਕਨ੍ਤਾਰੇ ਘਮ੍ਮਸਨ੍ਤਾਪਂ ਅਸਹਨ੍ਤਿਯਾ ਅਙ੍ਕੇ ਠਪਿਤਪੁਤ੍ਤਕਂ ਕਨ੍ਦਨ੍ਤਂ ਭੂਮਿਯਂ ਨਿਪਜ੍ਜਾਪੇਤ੍ਵਾ ਤਸ੍ਸ ਉਪਰਿ ਠਤ੍ਵਾ ਮਤਇਤ੍ਥਿਵਤ੍ਥੁਨਾ ਦੀਪੇਤਬ੍ਬਂ. ਤੇਨਾਹ – ‘‘ਮਾਤਾਪਿਤਾਦਯੋ ਹਿ ਛਡ੍ਡੇਤ੍ਵਾਪਿ ਪੁਤ੍ਤਧੀਤਾਦਯੋ’’ਤਿ. ਤਥਾ ਚਾਹ –
‘‘ਸਬ੍ਬਾ ਦਿਸਾ ਅਨੁਪਰਿਗਮ੍ਮ ਚੇਤਸਾ,
ਨੇਵਜ੍ਝਗਾ ਪਿਯਤਰਮਤ੍ਤਨਾ ਕ੍ਵਚਿ;
ਏਵਂ ਪਿਯੋ ਪੁਥੁ ਅਤ੍ਤਾ ਪਰੇਸਂ,
ਤਸ੍ਮਾ ਨ ਹਿਂਸੇ ਪਰਮਤ੍ਤਕਾਮੋ’’ਤਿ. (ਸਂ. ਨਿ. ੧.੧੧੯; ਉਦਾ. ੪੧; ਨੇਤ੍ਤਿ. ੧੧੩);
ਧਞ੍ਞੇਨ ਸਮਂ ਧਨਂ ਨਾਮ ਨਤ੍ਥਿ, ਯਸ੍ਮਾ ਤਪ੍ਪਟਿਬਦ੍ਧਾ ਆਹਾਰੂਪਜੀਵੀਨਂ ਸਤ੍ਤਾਨਂ ਜੀਵਿਤਵੁਤ੍ਤਿ. ਤਥਾਰੂਪੇ ਕਾਲੇਤਿ ਦੁਬ੍ਭਿਕ੍ਖਕਾਲੇ. ਏਕਦੇਸਂਯੇਵ ਓਭਾਸਨ੍ਤੀਤਿ ਏਕਸ੍ਮਿਂ ਖਣੇ ਚਤੂਸੁ ਮਹਾਦੀਪੇਸੁ ਓਭਾਸਂ ਫਰਿਤੁਂ ਅਸਮਤ੍ਥਤ੍ਤਾ ਸੂਰਿਯਸ੍ਸਪਿ, ਪਗੇਵ ਇਤਰੇਸਂ. ਬੋਧਿਸਤ੍ਤਸ੍ਸ ਉਦਯਬ੍ਬਯਸ੍ਸ ਞਾਣਾਨੁਭਾਵੇਨ ਸਕਲਜਾਤਿਖੇਤ੍ਤਂ ਏਕਾਲੋਕਂ ਅਹੋਸੀਤਿ ਆਹ ‘‘ਪਞ੍ਞਾ…ਪੇ… ਸਕ੍ਕੋਤੀ’’ਤਿ. ਤਮਂ ਵਿਧਮਤੀਤਿ ਪੁਬ੍ਬੇਨਿਵਾਸਞਾਣਾਦਯੋ ਪਞ੍ਞਾ ਯਤ੍ਥ ਪਵਤ੍ਤਨ੍ਤਿ, ਤਮਨਵਸੇਸਂ ਬ੍ਯਾਪੇਤ੍ਵਾ ਏਕਪ੍ਪਹਾਰੇਨ ਪਵਤ੍ਤਨਤੋ. ‘‘ਵੁਟ੍ਠਿਯਾ ਪਨ ਪਵਤ੍ਤਮਾਨਾਯ ਯਾਵ ਆਭਸ੍ਸਰਭਵਨਾ’’ਤਿ ਪਚੁਰਵਸੇਨ ਵੁਤ੍ਤਂ.
ਨਤ੍ਥਿਪੁਤ੍ਤਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਖਤ੍ਤਿਯਸੁਤ੍ਤਵਣ੍ਣਨਾ
੧੪. ਖੇਤ੍ਤਤੋ ਵਿਵਾਦਾ ਸਤ੍ਤੇ ਤਾਯਤੀਤਿ ਖਤ੍ਤਿਯੋ. ਵਦਤਿ ਦੇਵਤਾ ਅਤ੍ਤਨੋ ਅਜ੍ਝਾਸਯਵਸੇਨ. ਦ੍ਵਿਪਦਾਦੀਨਨ੍ਤਿ ਆਦਿ-ਸਦ੍ਦੇਨ ਚਤੁਪ੍ਪਦਭਰਿਯਪੁਤ੍ਤਾ ਗਹਿਤਾ. ਬੁਦ੍ਧਾਦਯੋਤਿ ਆਦਿ-ਸਦ੍ਦੇਨ ਆਜਾਨੀਯਸੁਸ੍ਸੂਸਭਰਿਯਸ੍ਸਵਪੁਤ੍ਤਾ. ਦ੍ਵਿਪਦਾਨਂ ਸੇਟ੍ਠੋਤਿ ਏਤ੍ਥ ਦ੍ਵਿਪਦਾਨਂ ਏਵ ਸੇਟ੍ਠੋਤਿ ਨਾਯਂ ਨਿਯਮੋ ਇਚ੍ਛਿਤੋ, ਸੇਟ੍ਠੋ ਏਵਾਤਿ ਪਨ ਇਚ੍ਛਿਤੋ, ਤਸ੍ਮਾ ਸਮ੍ਬੁਦ੍ਧੋ ਦ੍ਵਿਪਦੇਸੁ ਅਞ੍ਞੇਸੁ ਤਤ੍ਥ ਚ ਉਪ੍ਪਜ੍ਜਨਤੋ ਸੇਟ੍ਠੋ ਏਵ ਸਬ੍ਬੇਸਮ੍ਪਿ ਉਤ੍ਤਰਿਤਰਸ੍ਸ ਅਭਾਵਤੋਤਿ ਅਯਮੇਤ੍ਥ ਅਤ੍ਥੋ. ਤੇਨਾਹ ‘‘ਉਪ੍ਪਜ੍ਜਮਾਨੋ ਪਨੇਸਾ’’ਤਿਆਦਿ. ਕਾਰਣਾਕਾਰਣਂ ਆਜਾਨਾਤੀਤਿ ਆਜਾਨੀਯੋ. ਗਣ੍ਹਾਪੇਥਾਤਿ ਯਥਾ ਉਦਕੋ ਨ ਤੇਮਿਸ੍ਸਤਿ, ਏਵਂ ਵਾਲ਼ਂ ਗਣ੍ਹਾਪੇਥ. ‘‘ਅਸੁਸ੍ਸੂਸਾ’’ਤਿ ਕੇਚਿ ਪਠਨ੍ਤਿ. ਆਸੁਣਮਾਨੋਤਿ ਸਪ੍ਪਟਿਸ੍ਸਵੋ ਹੁਤ੍ਵਾ ਵਚਨਸਮ੍ਪਟਿਚ੍ਛਕੋ.
ਖਤ੍ਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਸਣਮਾਨਸੁਤ੍ਤਵਣ੍ਣਨਾ
੧੫. ਠਿਤੇ ਮਜ੍ਝਨ੍ਹਿਕੇਤਿ ਪੁਬ੍ਬਦ੍ਧਂ ਨਿਕ੍ਖਮਿਤ੍ਵਾ ਅਪਰਦ੍ਧਂ ਅਪ੍ਪਤ੍ਵਾ ਠਿਤਮਜ੍ਝਨ੍ਹੇ. ਸਨ੍ਨਿਸੀਵੇਸੂਤਿ ਪਰਿਸ੍ਸਮਵਿਨੋਦਨਤ੍ਥਂ ਸਬ੍ਬਸੋ ਸਨ੍ਨਿਸੀਦਨ੍ਤੇਸੁ. ਦ-ਕਾਰਸ੍ਸ ਹਿ ਵ-ਕਾਰਂ ਕਤ੍ਵਾ ਨਿਦ੍ਦੇਸੋ. ਤੇਨਾਹ ‘‘ਸਨ੍ਨਿਸਿਨ੍ਨੇਸੁ ਵਿਸ੍ਸਮਮਾਨੇਸੂ’’ਤਿ. ਸਬ੍ਬਸਤ੍ਤਾਨਨ੍ਤਿ ਸਬ੍ਬੇਸਞ੍ਚ ਆਹਾਰੂਪਜੀਵਿਤਸਤ੍ਤਾਨਂ ਘਮ੍ਮਤਾਪਨੇ ਸਨ੍ਤਤ੍ਤਕਾਯਾਨਂ ਇਰਿਯਾਪਥਦੁਬ੍ਬਲ੍ਯਕਾਲੋਤਿ ਠਾਨਾਦਿਇਰਿਯਾਪਥਸ੍ਸ ਅਸਮਤ੍ਥਕਾਲੋ. ਸਣਤਿ ਵਿਯਾਤਿ ਸਦ੍ਦਂ ਕਰੋਤਿ ਵਿਯ, ਯਥਾ ਤਂ ਅਞ੍ਞਮ੍ਪਿ ਮਹਾਵਨਂ ਵਕ੍ਖਮਾਨਨਯੇਨ. ਤੇਨਾਹ ‘‘ਤਪ੍ਪਟਿਭਾਗਂ ਨਾਮੇਤ’’ਨ੍ਤਿ ਛਿਦ੍ਦਵੇਣੁਪਬ੍ਬਾਨਨ੍ਤਿ ਰਨ੍ਧਜਾਤਕੀਚਕਮਹਾਵੇਲ਼ੁਪਬ੍ਬਾਨਂ. ਦੁਤਿਯਕਂ ਸਹਾਯਂ ਅਲਭਨ੍ਤੀ ਅਨਭਿਰਤਿਪਰਿਤਸ੍ਸਨਾਯ ਏਵਮਾਹ. ਅਨਪ੍ਪਕਂ ਸੁਖਨ੍ਤਿ ਵਿਪੁਲਂ ਉਲ਼ਾਰਂ ਵਿਵੇਕਸੁਖਂ.
ਏਕਵਿਹਾਰਤਾਯ ਸੁਞ੍ਞਾਗਾਰਂ ਪਵਿਟ੍ਠਸ੍ਸ. ਤੇਨ ਕਾਯਵਿਵੇਕਂ ਦਸ੍ਸੇਤਿ. ਅਨਿਚ੍ਚਾਨੁਪਸ੍ਸਨਾਦੀਹਿ ਨਿਚ੍ਚਸਞ੍ਞਾਦਿਪ੍ਪਹਾਨੇਨ ਸਨ੍ਤਚਿਤ੍ਤਸ੍ਸ. ਤੇਨ ਚਿਤ੍ਤਵਿਵੇਕਂ ਦਸ੍ਸੇਤਿ. ਸਂਸਾਰੇ ਭਯਂ ਇਕ੍ਖਨਤੋ ਭਿਕ੍ਖੁਨੋ ਉਭਯਵਿਵੇਕਸਮ੍ਪਨ੍ਨਸ੍ਸ, ਤਤੋ ਏਵ ਉਤ੍ਤਰਿਂ ਮਨੁਸ੍ਸਧਮ੍ਮਤੋ ਰਤਿਂ ਲਾਭਿਨੋ. ਅਮਾਨੁਸੀ ਰਤੀਤਿ ਭਾਵਨਾਰਤਿ. ਪੁਰਤੋਤਿ ਪੁਰਿਮਭਾਗੇ. ਪਚ੍ਛਤੋਤਿ ਪਚ੍ਛਿਮਭਾਗੇ. ਅਪਰੋਤਿ ਅਞ੍ਞੋ. ਪੁਰਤੋਤਿ ਵਾ ਅਨਾਗਤੇ, ਅਨਾਗਤਂ ਆਰਬ੍ਭਾਤਿ ਅਤ੍ਥੋ. ਪਚ੍ਛਤੋਤਿ ਅਤੀਤੇ ਅਤੀਤਂ ਆਰਬ੍ਭ ਪਟਿਪਤ੍ਤਿਯਾ ਵਿਬਾਧਨਤੋ. ਪਰੋਤਿ ਕੋਧੋ ਚਿਤ੍ਤਪਟਿਦੁਸ੍ਸਨਤਾਯ. ਨ ਪਰੋਤਿ ਅਪਰੋ, ਲੋਭੋ, ਸੋ ਚੇ ਨ ਵਿਜ੍ਜਤਿ. ਏਤੇਨ ਅਨਾਗਤਪ੍ਪਜਪ੍ਪਨਾਯ ਅਤੀਤਾਨੁਸੋਚਨਾਯ ਚ ਅਭਾਵਂ ਦਸ੍ਸੇਤਿ. ਅਤੀਵ ਫਾਸੁ ਭਵਤੀਤਿ ਨੀਵਰਣਜੇਟ੍ਠਕਸ੍ਸ ਕਾਮਚ੍ਛਨ੍ਦਸ੍ਸ ਵਿਗਮੇਨ ਵਿਕ੍ਖਮ੍ਭਿਤਨੀਵਰਣਸ੍ਸ ਝਾਨਸ੍ਸ ਵਸੇਨ ਅਤਿਵਿਯ ਫਾਸੁਵਿਹਾਰੋ ਹੋਤਿ. ਏਕਸ੍ਸ ਵਸਤੋ ਵਨੇਤਿ ਤਣ੍ਹਾਦੁਤਿਯਿਕਾਭਾਵੇਨ ਏਕਸ੍ਸ ਅਰਞ੍ਞੇ ਵਿਵੇਕਵਾਸਂ ਵਸਤੋ. ਸੇਸਂ ਤਾਦਿਸਮੇਵਾਤਿ ਸੇਸਮੇਤ੍ਥ ਯਂ ਵਤ੍ਤਬ੍ਬਂ, ਤਂ ਪਠਮਗਾਥਾਯਂ ਵੁਤ੍ਤਸਦਿਸਮੇਵ.
ਸਣਮਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਨਿਦ੍ਦਾਤਨ੍ਦੀਸੁਤ੍ਤਵਣ੍ਣਨਾ
੧੬. ਪਚ੍ਛਿਮੇ ਮਾਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋਤਿ ਏਤ੍ਤਕਂ ਪਾਠਂ ਸਙ੍ਖਿਪਿਤ੍ਵਾ ‘‘ਨਿਦ੍ਦਂ ਓਕ੍ਕਮਿਤਾ’’ਤਿ ਵੁਤ੍ਤਂ. ਕਿਰਿਯਾਮਯਚਿਤ੍ਤੇਹਿ ਅਵੋਮਿਸ੍ਸੋ ਭਵਙ੍ਗਸੋਤੋ ਅਬ੍ਯਾਕਤਨਿਦ੍ਦਾ. ਸਾ ਹਿ ਖੀਣਾਸਵਾਨਂ ਉਪ੍ਪਜ੍ਜਨਾਰਹਾ, ਤਸ੍ਸਾ ਪੁਬ੍ਬਭਾਗਾਪਰਭਾਗੇਸੁ…ਪੇ… ਉਪ੍ਪਨ੍ਨਂ ਥਿਨਮਿਦ੍ਧਂ ਇਧਾਧਿਪ੍ਪੇਤਾ ਨਿਦ੍ਦਾ, ਸਾ ਅਖੀਣਾਸਵਾਨਂ ਯੇਭੁਯ੍ਯੇਨ ਅਨਿਯਤਕਾਲਾ, ਤਬ੍ਬਿਧੁਰਨਿਯਤਸਬ੍ਭਾਵਂ ਦਸ੍ਸੇਨ੍ਤੋ ‘‘ਅਤਿਚ੍ਛਾਤ…ਪੇ… ਆਗਨ੍ਤੁਕਂ ਆਲਸਿਯ’’ਨ੍ਤਿ ਆਹ. ਕਾਯਾਲਸਿਯਪਚ੍ਚਯਾ ਵੀਰਿਯਸ੍ਸ ਪਟਿਪਕ੍ਖਭੂਤਾ ਚਤ੍ਤਾਰੋ ਅਕੁਸਲਕ੍ਖਨ੍ਧਾ ਤਨ੍ਦੀ ਨਾਮ. ਤਨ੍ਦੀਤਿ ਸਭਾਵਨਿਦ੍ਦੇਸੋ. ਤਨ੍ਦਿਯਨਾਤਿ ਆਕਾਰਨਿਂਦ੍ਦੇਸੋ. ਤਨ੍ਦੀਮਨਤਾਤਿ ਤਨ੍ਦੀਭੂਤਚਿਤ੍ਤਤਾ. ਆਲਸ੍ਯਨ੍ਤਿ ਅਲਸਭਾਵਾਹਰਣਂ. ਆਲਸ੍ਯਾਯਿਤਤ੍ਤਨ੍ਤਿ ਅਲਸਭਾਵਪ੍ਪਤ੍ਤਿ. ਕਾਯਵਿਜਮ੍ਭਨਾਤਿ ਕਾਯਸ੍ਸ ਵਿਨਾਮਨਾ. ਅਕੁਸਲਪਕ੍ਖਾ ਉਕ੍ਕਣ੍ਠਿਤਤਾਤਿ ਅਕੁਸਲਪਕ੍ਖਿਯਾ ਅਨਭਿਰਤਿ. ਭਤ੍ਤਕਿਲਮਥੋਤਿ ਯਥਾਵੁਤ੍ਤਸ੍ਸ ਭਤ੍ਤਵਤ੍ਥੁਕਸ੍ਸ ਆਹਾਰਸ੍ਸ ਵਸੇਨ ਸਰੀਰੇ ਉਪ੍ਪਜ੍ਜਨਕਖੇਦੋ. ਉਪਕ੍ਕਿਲਿਟ੍ਠੋਤਿ ਪਞ੍ਞਾਯ ਦੁਬ੍ਬਲੀਕਰਣੇਨ ਉਪਕ੍ਕਿਲਿਟ੍ਠਚਿਤ੍ਤੋ. ਚਿਤ੍ਤਸ੍ਸ ਅਸਮਾਹਿਤਤ੍ਤਾ ਨਿਵਾਰਿਤਪਾਤੁਭਾਵੋ. ਅਰਿਯਮਗ੍ਗਸ੍ਸ ਜੋਤਨਂ ਨਾਮ ਉਪ੍ਪਜ੍ਜਨਮੇਵਾਤਿ ਆਹ ‘‘ਨ ਜੋਤਤਿ, ਨ ਪਾਤੁਭਵਤੀਤਿ ਅਤ੍ਥੋ’’ਤਿ. ਨ ਹਿ ਅਰਿਯਮਗ੍ਗੋ ਜੋਤਿਅਜੋਤਿਨਾਮੋ ਪਵਤ੍ਤਤਿ.
ਮਗ੍ਗਸਹਜਾਤਵੀਰਿਯੇਨਾਤਿ ਲੋਕਿਯਲੋਕੁਤ੍ਤਰਮਗ੍ਗਸਹਜਾਤਵੀਰਿਯੇਨ. ਮਿਸ੍ਸਕਮਗ੍ਗੋ ਹਿ ਇਧ ਅਧਿਪ੍ਪੇਤੋ. ਨੀਹਰਿਤ੍ਵਾਤਿ ਨੀਹਰਣਹੇਤੁ. ਹੇਤੁਅਤ੍ਥੋ ਹਿ ਅਯਂ ਤ੍ਵਾ-ਸਦ੍ਦੋ ‘‘ਪਞ੍ਞਾਯ ਚਸ੍ਸ ਦਿਸ੍ਵਾ’’ਤਿਆਦੀਸੁ (ਮ. ਨਿ. ੧.੨੭੧) ਵਿਯ. ਤੇਨ ‘‘ਮਗ੍ਗੋ ਵਿਸੁਜ੍ਝਤੀ’’ਤਿ ਵਚਨਂ ਸਮਤ੍ਥਿਤਂ ਹੋਤਿ. ‘‘ਅਰਿਯਮਗ੍ਗਂ ਵਿਸੁਜ੍ਝਤੀ’’ਤਿ ਕੇਚਿ ਪਠਨ੍ਤਿ.
ਨਿਦ੍ਦਾਤਨ੍ਦੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਦੁਕ੍ਕਰਸੁਤ੍ਤਵਣ੍ਣਨਾ
੧੭. ਦੁਕ੍ਖਂ ਤਿਤਿਕ੍ਖਨ੍ਤਿ ਦੁਤ੍ਤਿਤਿਕ੍ਖਂ. ਤਞ੍ਚ ਦੁਕ੍ਖਮਂ ਦੁਸ੍ਸਹਨਂ ਆਰਮ੍ਭਵਸੇਨ ਦੁਕ੍ਕਰਂ, ਅਨੁਯੁਞ੍ਜਨਵਸੇਨ ਦੁਤ੍ਤਿਤਿਕ੍ਖਨ੍ਤਿ. ਅਬ੍ਯਤ੍ਤੇਨਾਤਿ ਸਾਮਞ੍ਞਸ੍ਸ ਉਪਕਾਰਾਨੁਪਕਾਰੇ ਧਮ੍ਮੇ ਜਾਨਨਸਮਤ੍ਥਾਯ ਵੇਯ੍ਯਤ੍ਤਿਯਸਙ੍ਖਾਤਾਯ ਪਞ੍ਞਾਯ ਅਭਾਵਤੋ ਨ ਬ੍ਯਤ੍ਤੇਨ. ਤੇਨਾਹ ‘‘ਬਾਲੇਨਾ’’ਤਿ. ਯਸ੍ਮਿਂ ਧਮ੍ਮੇ ਸਤਿ ਸਮਣੋਤਿ ਵੁਚ੍ਚਤਿ, ਤਂ ਸਾਮਞ੍ਞਨ੍ਤਿ ਆਹ ‘‘ਸਮਣਧਮ੍ਮੋ’’ਤਿ. ਇਮਿਨਾਤਿ ‘‘ਦੁਕ੍ਕਰਂ ਦੁਤ੍ਤਿਤਿਕ੍ਖਞ੍ਚ, ਅਬ੍ਯਤ੍ਤੇਨ ਚ ਸਾਮਞ੍ਞ’’ਨ੍ਤਿ ਇਮਿਨਾ ਗਾਥਦ੍ਧੇਨ ਇਦਂ ਦਸ੍ਸੇਤੀਤਿ ਇਦਂ ਇਦਾਨਿ ਵੁਚ੍ਚਮਾਨਂ ਅਤ੍ਥਜਾਤਂ ਦਸ੍ਸੇਤਿ. ਅਭਿਦਨ੍ਤਨ੍ਤਿ ਅਭਿਭਵਨਦਨ੍ਤਂ, ਉਪਰਿਦਨ੍ਤਨ੍ਤਿ ਅਤ੍ਥੋ. ਸੋ ਹਿ ਇਤਰਂ ਮੁਸਲਂ ਵਿਯ ਉਦੁਕ੍ਖਲਂ ਵਿਸੇਸਤੋ ਕਸ੍ਸਚਿ ਖਾਦਨਕਾਲੇ ਅਭਿਭੁਯ੍ਯ ਵਤ੍ਤਤਿ. ਆਧਾਯਾਤਿ ਨਿਪ੍ਪੀਲ਼ਨਵਸੇਨੇਵ ਠਪੇਤ੍ਵਾ. ਤਾਲੁਂ ਆਹਚ੍ਚਾਤਿ ਤਾਲੁਪਦੇਸਮਾਹਨਿਤ੍ਵਾ ਵਿਯ. ਚੇਤਸਾਤਿ ਕੁਸਲਚਿਤ੍ਤੇਨ. ਚਿਤ੍ਤਨ੍ਤਿ ਅਕੁਸਲਚਿਤ੍ਤਂ. ਅਭਿਨਿਗ੍ਗਣ੍ਹਿਤ੍ਵਾਤਿ ਯਥਾ ਅਤਿਸਮੁਦਾਚਾਰੋ ਨ ਹੋਤਿ, ਏਵਂ ਵਿਬਾਧਨਵਸੇਨ ਨਿਗ੍ਗਹੇਤ੍ਵਾ. ਆਪਾਣਕੋਟਿਕਨ੍ਤਿ ਪਾਣਕੋਟਿਪਰਿਯੋਸਾਨਂ, ਪਰਿਜੀਵਨ੍ਤਿ ਅਤ੍ਥੋ. ਸਮ੍ਬਾਧੇਤੀਤਿ ਸਮ੍ਬਾਧੋ, ਅਨ੍ਤਰਾਯਿਕੋ. ਬਹੂ ਪਰਿਸ੍ਸਯਾਤਿ ਅਯੋਨਿਸੋ ਕਾਮਵਿਤਕ੍ਕਾਦਿਵਸੇਨ.
ਪਜ੍ਜਤਿ ਚਿਤ੍ਤਮੇਤ੍ਥਾਤਿ ਪਦਂ, ਆਰਮ੍ਮਣਂ. ਇਰਿਯਾਪਥਂ ਏਵ ਪਦਂ ਇਰਿਯਾਪਥਪਦਂ.
ਗੀਵਾ ਚਤ੍ਤਾਰੋ ਪਾਦਾਤਿ ਗੀਵਪਞ੍ਚਮਾਨਿ. ਸਮੋਦਹਨ੍ਤਿ ਵਾ ਸਮੋਧਾਨਹੇਤੂਤਿ ਅਯਮੇਤ੍ਥ ਅਤ੍ਥੋਤਿ ਆਹ – ‘‘ਸਮੋਦਹਿਤ੍ਵਾ ਵਾ’’ਤਿ, ਸਮ੍ਮਾ ਓਧਾਯ ਅਨ੍ਤੋ ਪਵੇਸੇਤ੍ਵਾਤਿ ਅਤ੍ਥੋ. ਸਕੇ ਆਰਮ੍ਮਣਕਪਾਲੇਤਿ ਗੋਚਰਜ੍ਝਤ੍ਤਂ ਵਦਤਿ. ਸਮੋਦਹਨ੍ਤਿ ਸਮੋਦਹਨ੍ਤੋ. ਅਨਿਸ੍ਸਿਤੋਤਿ ਤੇਭੂਮਕਧਮ੍ਮੇਸੁ ਕਞ੍ਚਿਪਿ ਧਮ੍ਮਂ ਤਣ੍ਹਾਦਿਟ੍ਠਾਭਿਨਿਵੇਸਵਸੇਨ ਅਨਿਸ੍ਸਿਤੋ. ਅਵਿਹਿਂਸਮਾਨੋ ਵਿਹਿਂਸਾਨਿਮਿਤ੍ਤਾਨਂ ਪਜਹਨੇਨ. ਉਲ੍ਲੁਮ੍ਪਨਸਭਾਵਸਣ੍ਠਿਤੇਨਾਤਿ ਸੀਲਬ੍ਯਸਨਤੋ ਉਦ੍ਧਰਣਰੂਪੇ ਸਣ੍ਠਿਤੇਨ, ਕਰੁਣਾਯੁਤ੍ਤੇਨਾਤਿ ਅਤ੍ਥੋ. ਤੇਨਾਹ ‘‘ਕਾਰੁਞ੍ਞਤਂ ਪਟਿਚ੍ਚਾ’’ਤਿ.
ਦੁਕ੍ਕਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਹਿਰੀਸੁਤ੍ਤਵਣ੍ਣਨਾ
੧੮. ਨਿਸੇਧੇਤੀਤਿ ਨਿਵਾਰੇਤਿ ਪਵਤ੍ਤਿਤੁਂ ਨ ਦੇਤਿ. ਪੁਚ੍ਛਤਿ ਦੇਵਤਾ. ਅਪਹਰਨ੍ਤੋਤਿ ਅਪਨੇਨ੍ਤੋ, ਯਥਾ ਸਬ੍ਬੇਨ ਸਬ੍ਬਂ ਅਕ੍ਕੋਸਵਤ੍ਥੁ ਨ ਹੋਤਿ, ਏਵਂ ਪਰਿਹਰਨ੍ਤੋਤਿ ਅਤ੍ਥੋ. ਬੁਜ੍ਝਤਿ ਸਾਰਥਿਵਿਧਂ. ਅਤ੍ਤਨਿ ਨਿਪਾਤਂ ਨ ਦੇਤਿ, ਆਜਾਨੀਯੋ ਹਿ ਯੁਤ੍ਤਂ ਪਜਾਨਾਤਿ. ਅਭੂਤੇਨ ਅਭੂਤਕ੍ਕੋਸੇਨ ਪਰਿਮੁਤ੍ਤੋ ਨਾਮ ਨਤ੍ਥਿ ਬਾਲਾਨਞ੍ਚ ਜਨਾਨਂ ਪਰਾਪਵਾਦੇ ਯੁਤ੍ਤਪਯੁਤ੍ਤਭਾਵਤੋ. ਤੇਨਾਹ ਭਗਵਾ –
‘‘ਨਿਨ੍ਦਨ੍ਤਿ ਤੁਣ੍ਹਿਮਾਸੀਨਂ, ਨਿਨ੍ਦਨ੍ਤਿ ਬਹੁਭਾਣਿਨਂ;
ਮਿਤਭਾਣਿਮ੍ਪਿ ਨਿਨ੍ਦਨ੍ਤਿ, ਨਤ੍ਥਿ ਲੋਕੇ ਅਨਿਨ੍ਦਿਤੋ’’ਤਿ. (ਧ. ਪ. ੨੨੭);
ਤਨੁਯਾਤਿ ਵਾ ਕਤਿਪਯਾ. ਤੇਨਾਹ ‘‘ਅਪ੍ਪਕਾ’’ਤਿ. ਸਦਾ ਸਤਾਤਿ ਹਿਰਿਨਿਸੇਧਭਾਵੇ ਕਾਰਣਵਚਨਂ. ਪਪ੍ਪੁਯ੍ਯਾਤਿ ਪਤ੍ਵਾ ਅਧਿਗਨ੍ਤ੍ਵਾ. ਵਾਨਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਂ, ਅਸਙ੍ਖਤਧਾਤੁ.
ਹਿਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਕੁਟਿਕਾਸੁਤ੍ਤਵਣ੍ਣਨਾ
੧੯. ਅਨ੍ਤੋਤਿ ਕੁਚ੍ਛਿਅਬ੍ਭਨ੍ਤਰੇ. ਵਸਨਟ੍ਠਾਨਟ੍ਠੇਨਾਤਿ ਵਸਨਭਾਵੇਨ. ਕੁਲਪਵੇਣਿਨ੍ਤਿ ਕੁਲਾਚਾਰਂ ਕੁਲਤਨ੍ਤਿਂ. ਸਨ੍ਤਾਨਕਟ੍ਠੇਨਾਤਿ ਕੁਲਸਨ੍ਤਤਿਯਾ ਬਨ੍ਧਨਭਾਵੇਨ. ਏਵਂ ਸਬ੍ਬਪਦੇਹਿ ਪੁਚ੍ਛਿਤਤ੍ਥਸ੍ਸ ਅਨੁਜਾਨਨਵਸੇਨ ‘‘ਏਕਂਸਵਚਨੇ ਨਿਪਾਤੋ’’ਤਿ ਵੁਤ੍ਤਂ. ਆਪਾਦਿਕਾ ਪੋਸਿਕਾ ਮਾਤੁਚ੍ਛਾ ਮਹਾਪਜਾਪਤਿ ਮਾਤਾ ਏਵਾਤਿ ਕਤ੍ਵਾ ‘‘ਪਹਾਯ ਪਬ੍ਬਜਿਤਤ੍ਤਾ’’ਤਿ ਅਵਿਸੇਸਤੋ ਵੁਤ੍ਤਂ. ਪਹਾਯ ਪਬ੍ਬਜਿਤਤ੍ਤਾ ਨਤ੍ਥੀਤਿ ਆਨੇਤ੍ਵਾ ਸਮ੍ਬਨ੍ਧੋ. ਪੁਨ ਮਾਤੁਕੁਚ੍ਛਿਵਾਸਾਦੀਨਂ ਅਭਾਵਵਚਨੇਨੇਵ ਵਟ੍ਟਮ੍ਹਿ ਬਨ੍ਧਨਸ੍ਸ ਅਭਾਵੋ ਦੀਪਿਤੋ ਹੋਤੀਤਿ ਨ ਗਹਿਤੋ. ਅਯਂ ਕਿਰ ਦੇਵਤਾ ਯਥਾ ਪੁਥੁਜ੍ਜਨਾ ਬੁਦ੍ਧਾਨਂ ਗੁਣੇ ਨ ਜਾਨਨ੍ਤਿ, ਏਵਂ ਨ ਜਾਨਾਤਿ, ਤਸ੍ਮਾ ‘‘ਮਯਾ ਸਨ੍ਨਾਹਂ ਬਨ੍ਧਿਤ੍ਵਾ’’ਤਿਆਦਿਮਾਹ.
ਕੁਟਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਸਮਿਦ੍ਧਿਸੁਤ੍ਤਵਣ੍ਣਨਾ
੨੦. ਤਪਨਭਾਵੇਨ ਤਪਨੋਦਕਤ੍ਤਾ ਤਪੋਦਾਤਿ ਤਸ੍ਸ ਰਹਦਸ੍ਸ ਨਾਮਂ. ਤੇਨਾਹ ‘‘ਤਤ੍ਤੋਦਕਸ੍ਸ ਰਹਦਸ੍ਸਾ’’ਤਿ. ਤਤੋਤਿ ਨਾਗਭਵਨੇ ਉਦਕਰਹਦਤੋ ਤਪੋਦਾ ਨਾਮ ਨਦੀ ਸਨ੍ਦਤਿ. ਸਾ ਹਿ ਨਦੀ ਭੂਮਿਤਲਂ ਆਰੋਹਤਿ. ‘‘ਏਦਿਸਾ ਜਾਤਾ’’ਤਿ ਵਚਨਸੇਸੋ. ਪੇਤਲੋਕੋਤਿ ਲੋਹਕੁਮ੍ਭਿਨਿਰਯਾ ਇਧਾਧਿਪ੍ਪੇਤਾਤਿ ਵਦਨ੍ਤਿ. ਰਹਦਸ੍ਸ ਪਨ ਆਦਿਤੋ ਪਬ੍ਬਤਪਾਦਵਨਨ੍ਤਰੇਸੁ ਬਹੂ ਪੇਤਾ ਵਿਹਰਨ੍ਤਿ, ਸ੍ਵਾਯਮਤ੍ਥੋ ਪੇਤਵਤ੍ਥੁਪਾਲ਼ਿਯਾਲਕ੍ਖਣਸਂਯੁਤ੍ਤੇਨ ਚ ਦੀਪੇਤਬ੍ਬੋ. ਯਤਾਯਨ੍ਤਿ ਯਤੋ ਰਹਦਤੋ ਅਯਂ. ਸਾਤੋਦਕੋਤਿ ਮਧੁਰੋਦਕੋ. ਸੇਤੋਦਕੋਤਿ ਪਰਿਸੁਦ੍ਧੋਦਕੋ, ਅਨਾਵਿਲੋਦਕੋਤਿ ਅਤ੍ਥੋ. ਤਤੋਤਿ ਤਪੋਦਾਨਦਿਤੋ.
ਸਮਿਦ੍ਧੋਤਿ ਅਵਯਵਾਨਂ ਸਮ੍ਪੁਣ੍ਣਤਾਯ ਸਂਸਿਦ੍ਧਿਯਾਵ ਸਮ੍ਮਾ ਇਦ੍ਧੋ. ਤੇਨਾਹ ‘‘ਅਭਿਰੂਪੋ’’ਤਿਆਦਿ. ਪਧਾਨੇ ਸਮ੍ਮਸਨਧਮ੍ਮੇ ਨਿਯੁਤ੍ਤੋ, ਤਂ ਵਾ ਏਤ੍ਥ ਅਤ੍ਥੀਤਿ ਪਧਾਨਿਕੋ. ਸੇਨਾਸਨਂ ਸੁਟ੍ਠਪਿਤਦ੍ਵਾਰਵਾਤਪਾਨਂ, ਤੇਸਂ ਪਿਦਹਨੇਨ ਉਤੁਂ ਗਾਹਾਪੇਤ੍ਵਾ.
ਪੁਬ੍ਬਾਪਯਮਾਨੋਤਿ ਨ੍ਹਾਨਤੋ ਪੁਬ੍ਬਭਾਗੇ ਵਿਯ ਵੋਦਕਭਾਵਂ ਆਪਜ੍ਜਮਾਨੋ ਗਮੇਨ੍ਤੋ. ਅਵਤ੍ਤਂ ਪਟਿਕ੍ਖਿਪਿਤ੍ਵਾ ਵਤ੍ਤਂ ਦਸ੍ਸੇਤੁਂ ‘‘ਤਤ੍ਥ…ਪੇ… ਨ ਓਤਰਿਤਬ੍ਬ’’ਨ੍ਤਿ ਪਠਮਂ ਵੁਤ੍ਤਂ. ਸਬ੍ਬਦਿਸਾਪਲੋਕਨਂ ਯਥਾ ਨ੍ਹਾਯਨਟ੍ਠਾਨਸ੍ਸ ਮਨੁਸ੍ਸੇਹਿ ਵਿਵਿਤ੍ਤਭਾਵਜਾਨਨਤ੍ਥਂ. ਖਾਣੁਆਦਿਵਵਤ੍ਥਾਪਨਂ ਚੀਵਰਾਦੀਨਂ ਠਪਨਤ੍ਥਂ ਉਦਕਸਮੀਪੇਤਿ ਅਧਿਪ੍ਪਾਯੋ. ਉਕ੍ਕਾਸਨਂ ਅਮਨੁਸ੍ਸਾਨਂ ਅਪਗਮਨਤ੍ਥਂ. ਅਵਕੁਜ੍ਜਟ੍ਠਾਨਂ ਤਙ੍ਖਣੇਪਿ ਉਪਰਿਮਕਾਯਸ੍ਸ ਉਜੁਕਂ ਅਵਿਵਟਕਰਣਤ੍ਥਂ. ਚੀਵਰਪਿਟ੍ਠੇਯੇਵ ਠਪੇਤਬ੍ਬਂ ਯਤ੍ਥ ਵਾ ਤਤ੍ਥ ਵਾ ਅਟ੍ਠਪੇਤ੍ਵਾ. ਉਦਕਨ੍ਤੇਤਿ ਉਦਕਸਮੀਪੇ. ਸਿਨ੍ਨਟ੍ਠਾਨਨ੍ਤਿ ਸੇਦਗਤਪਦੇਸੋ. ਪਸਾਰੇਤਬ੍ਬਂ ਤਸ੍ਸ ਸੁਕ੍ਖਾਪਨਤ੍ਥਂ. ਸਂਹਰਿਤ੍ਵਾ ਠਪਨਂ ਪੁਨ ਸੁਖੇਨ ਗਹੇਤ੍ਵਾ ਨਿਵਾਸਨਤ੍ਥਂ. ਨਾਭਿਪ੍ਪਮਾਣਮਤ੍ਤਂਓਤਰਣਂ ਤਾਵਤਾ ਉਦਕਪਟਿਚ੍ਛਾਦਿਲਕ੍ਖਣਪ੍ਪਤ੍ਤਤੋ. ਵੀਚਿਂ ਅਨੁਟ੍ਠਾਪੇਨ੍ਤੇਨਾਤਿਆਦਿ ਸਂਯਤਕਾਰਿਤਾਦਸ੍ਸਨਂ. ਨਿਵਾਸਨਂ ਪਰਿਕ੍ਖਿਪਿਤ੍ਵਾਤਿ ਅਨ੍ਤਰਵਾਸਕਂ ਕਟਿਪ੍ਪਦੇਸਸ੍ਸ ਯਥਾ ਪਰਿਤੋ ਹੋਤਿ, ਏਵਂ ਖਿਪਿਤ੍ਵਾ ਪਰਿਵਸਿਤ੍ਵਾ.
ਸਰੀਰਵਣ੍ਣੋਪਿ ਵਿਪ੍ਪਸੀਦਿ ਸਮ੍ਮਦੇਵ ਭਾਵਨਾਨੁਸ੍ਸਤਿਮ੍ਪਿ ਵਿਨ੍ਦਨ੍ਤਸ੍ਸਾਤਿ ਅਧਿਪ੍ਪਾਯੋ. ਸਮਨਂ ਨਿਗ੍ਗਹੇਤੁਨ੍ਤਿ ਕਿਲੇਸਵਸਂ ਗਤਂ ਅਤ੍ਤਨੋ ਚਿਤ੍ਤਂ ਨਿਗ੍ਗਣ੍ਹਿਤੁਂ. ਕਾਮੂਪਨੀਤਾਤਿ ਕਾਮਂ ਉਪਗਤਚਿਤ੍ਤਾ. ਅਥ ਵਾ ਕਿਲੇਸਕਾਮੇਨ ਥੇਰੇ ਉਪਨੀਤਚਿਤ੍ਤਾ.
ਅਪਰਿਭੁਞ੍ਜਿਤ੍ਵਾਤਿ ਅਨਨੁਭੋਤ੍ਵਾ. ਅਨੁਭਵਿਤਬ੍ਬਨ੍ਤਿ ਅਤ੍ਥਤੋ ਆਪਨ੍ਨਮੇਵਾਤਿ ਆਹ ‘‘ਪਞ੍ਚਕਾਮਗੁਣੇ’’ਤਿ. ਭਿਕ੍ਖਸੀਤਿ ਯਾਚਸਿ. ਤਞ੍ਚ ਭਿਕ੍ਖਾਚਰਿਯਵਸੇਨਾਤਿ ਆਹ ‘‘ਪਿਣ੍ਡਾਯ ਚਰਸੀ’’ਤਿ. ਕਾਮਪਰਿਭੋਗਗਰੁਗਮਨਕਾਲੋ ਨਾਮ ਵਿਸੇਸਤੋ ਪਠਮਯੋਬ੍ਬਨਾਵਤ੍ਥਾਤਿ ਆਹ ‘‘ਦਹਰਯੋਬ੍ਬਨਕਾਲੋ’’ਤਿ. ਓਭਗ੍ਗੇਨਾਤਿ ਮਜ੍ਝੇ ਸਂਭਗ੍ਗਕਾਯੇਨ. ਜਿਣ੍ਣਕਾਲੇ ਹਿ ਸਤ੍ਤਾਨਂ ਕਟਿਯਂ ਕਾਯੋ ਓਭਗ੍ਗੋ ਹੋਤਿ.
ਵੋਤਿ ਨਿਪਾਤਮਤ੍ਤਂ ‘‘ਯੇ ਹਿ ਵੋ ਅਰਿਯਾ’’ਤਿਆਦੀਸੁ ਵਿਯ. ਸਤ੍ਤਾਨਨ੍ਤਿ ਸਾਮਞ੍ਞਵਚਨਂ, ਨ ਮਨੁਸ੍ਸਾਨਂ ਏਵ. ਦੇਹਨਿਕ੍ਖੇਪਨਨ੍ਤਿ ਕਲ਼ੇਵਰਟ੍ਠਪਿਤਟ੍ਠਾਨਂ. ਨਤ੍ਥਿ ਏਤੇਸਂ ਨਿਮਿਤ੍ਤਨ੍ਤਿ ਅਨਿਮਿਤ੍ਤਾ, ‘‘ਏਤ੍ਤਕਂ ਅਯਂ ਜੀਵਤੀ’’ਤਿਆਦਿਨਾ ਸਞ੍ਜਾਨਨਨਿਮਿਤ੍ਤਰਹਿਤਾਤਿ ਅਤ੍ਥੋ. ਨ ਨਾਯਰੇਤਿ ਨ ਞਾਯਨ੍ਤਿ. ਇਤੋ ਪਰਨ੍ਤਿ ਏਤ੍ਥ ਪਰਨ੍ਤਿ ਅਞ੍ਞਂ ਕਾਲਂ. ਤੇਨ ਓਰਕਾਲਸ੍ਸਪਿ ਸਙ੍ਗਹੋ ਸਿਦ੍ਧੋ ਹੋਤਿ. ਪਰਮਾਯੁਨੋ ਓਰਕਾਲੇ ਏਵ ਚੇਤ੍ਥ ਪਰਨ੍ਤਿ ਅਧਿਪ੍ਪੇਤਂ ਤਤੋ ਪਰਂ ਸਤ੍ਤਾਨਂ ਜੀਵਿਤਸ੍ਸ ਅਭਾਵਤੋ. ਵਵਤ੍ਥਾਨਾਭਾਵਤੋਤਿ ਕਾਲਵਸੇਨ ਵਵਤ੍ਥਾਨਾਭਾਵਤੋ. ਵਵਤ੍ਥਾਨਨ੍ਤਿ ਚੇਤ੍ਥ ਪਰਿਚ੍ਛੇਦੋ ਵੇਦਿਤਬ੍ਬੋ, ਨ ਅਸਙ੍ਕਰਤੋ ਵਵਤ੍ਥਾਨਂ, ਨਿਚ੍ਛਯੋ ਵਾ. ਅਬ੍ਬੁਦਪੇਸੀਤਿਆਦੀਸੁ ਅਬ੍ਬੁਦਕਾਲੋ ਪੇਸਿਕਾਲੋਤਿਆਦਿਨਾ ਕਾਲ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਕਾਲੋਤਿ ਇਧ ਪੁਬ੍ਬਣ੍ਹਾਦਿਵੇਲਾ ਅਧਿਪ੍ਪੇਤਾ. ਤੇਨਾਹ ਪੁਬ੍ਬਣ੍ਹੇਪਿ ਹੀਤਿਆਦਿ. ਇਧੇਵ ਦੇਹੇਨ ਪਤਿਤਬ੍ਬਨ੍ਤਿ ਸਮ੍ਬਨ੍ਧੋ. ਅਨੇਕਪ੍ਪਕਾਰਤੋਤਿ ਨਗਰੇ ਜਾਤਾਨਂ ਗਾਮੇ, ਗਾਮੇ ਜਾਤਾਨਂ ਨਗਰੇ, ਵਨੇ ਜਾਤਾਨਂ ਜਨਪਦੇ, ਜਨਪਦੇ ਜਾਤਾਨਂ ਵਨੇਤਿਆਦਿਨਾ ਅਨੇਕਪ੍ਪਕਾਰਤੋ. ਇਤੋ ਚੁਤੇਨਾਤਿ ਇਤੋ ਗਤਿਤੋ ਚੁਤੇਨ. ਇਧ ਇਮਿਸ੍ਸਂ ਗਤਿਯਂ. ਯਨ੍ਤੇ ਯੁਤ੍ਤਗੋਣੋ ਵਿਯਾਤਿ ਯਥਾ ਯਨ੍ਤੇ ਯੁਤ੍ਤਗੋਣੋ ਯਨ੍ਤਂ ਨਾਤਿਵਤ੍ਤਤਿ, ਏਵਂ ਕਾਲੋ ਗਤਿਪਞ੍ਚਕਨ੍ਤਿ ਏਵਂ ਉਪਮਾਸਂਸਨ੍ਦਨਂ ਵੇਦਿਤਬ੍ਬਂ.
ਅਯਂ ਕਾਲੋਤਿ ਅਯਂ ਮਰਣਕਾਲੋ. ਪਚ੍ਛਿਮੇ ਕਾਲੇਤਿ ਪਚ੍ਛਿਮੇ ਵਯੇ. ਤਿਸ੍ਸੋ ਵਯੋਸੀਮਾਤਿ. ਪਠਮਾਦਿਕਾ ਤਿਸ੍ਸੋ ਵਯਸ੍ਸ ਸੀਮਾ ਅਤਿਕ੍ਕਨ੍ਤੇਨ. ਪੁਰਿਮਾਨਂ ਹਿ ਦ੍ਵਿਨ੍ਨਂ ਵਯਾਨਂ ਸਬ੍ਬਸੋ ਸੀਮਾ ਅਤਿਕ੍ਕਮਿਤ੍ਵਾ ਪਚ੍ਛਿਮਸ੍ਸ ਆਦਿਸੀਮਂ ਅਤਿਕ੍ਕਨ੍ਤੋ ਤਥਾ ਵੁਤ੍ਤੋ. ‘‘ਅਯਞ੍ਹਿ ਸਮਣਧਮ੍ਮੋ…ਪੇ… ਨ ਸਕ੍ਕਾ ਕਾਤੁ’’ਨ੍ਤਿ ਵਤ੍ਵਾ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਤਦਾ ਹੀ’’ਤਿਆਦਿ ਵੁਤ੍ਤਂ. ਗਣ੍ਹਿਤੁਨ੍ਤਿ ਪਾਲ਼ਿਤੋ ਅਤ੍ਥਤੋ ਚ ਹਦਯੇ ਠਪਨਵਸੇਨ ਗਣ੍ਹਿਤੁਂ. ਪਰਿਭੁਞ੍ਜਿਤੁਨ੍ਤਿ ਵੁਤ੍ਤਧਮ੍ਮਪਰਿਹਰਣਸੁਖਂ ਅਨੁਭਵਿਤੁਂ. ਏਕਸ੍ਸ ਕਥਨਤੋ ਪਠਮਂ ਗਾਥਂ ਸੁਤ੍ਤਂ ਵਾ ਉਸ੍ਸਾਰੇਤਿ, ਤਸ੍ਮਿਂ ਨਿਟ੍ਠਿਤੇ ਇਤਰੋ ਧਮ੍ਮਕਥਿਕੋ ਤਂਯੇਵ ਵਿਤ੍ਥਾਰੇਨ੍ਤੋ ਧਮ੍ਮਂ ਕਥੇਤਿ, ਅਯਂ ਸਰਭਾਣਧਮ੍ਮਕਥਾ. ਸੁਤ੍ਤਗੇਯ੍ਯਾਨੁਸਾਰੇਨ ਯਾਵ ਪਰਿਯੋਸਾਨਾ ਉਸ੍ਸਾਰਣਂ ਸਰਭਞ੍ਞਧਮ੍ਮਕਥਾ. ‘‘ਮਾ ਮਂ ਕਾਲੋ ਉਪਚ੍ਚਗਾ’’ਤਿ ਵਦਨ੍ਤੋ ‘‘ਸਮਣਧਮ੍ਮਸ੍ਸ ਕਰਣਸ੍ਸ ਅਯਂ ਮੇ ਕਾਲੋ’’ਤਿ ਕਥੇਤਿ, ਤਤੋ ਪਰੋ ‘‘ਪਚ੍ਛਿਮਵਯੋ ਅਞ੍ਞੋ ਕਾਲੋ’’ਤਿ ਕਥੇਤਿ. ‘‘ਕਾਲਂ ਵੋਹਂ…ਪੇ… ਤਸ੍ਮਾ ਅਭੁਤ੍ਵਾ ਭਿਕ੍ਖਾਮੀ’’ਤਿ ਵਦਨ੍ਤੋ ਅਤ੍ਤਨਾ ਕਤਂ ਪਟਿਪਤ੍ਤਿਞ੍ਚ ਸਹੇਤੁਕਂ ਸਾਨਿਸਂਸਂ ਕਥੇਤਿ.
ਤਂ ਗਾਰਵਕਾਰਣਂ ਸਨ੍ਧਾਯ. ਏਤਨ੍ਤਿ ‘‘ਅਥ ਖੋ ਸਾ ਦੇਵਤਾ ਪਥਵਿਯਂ ਪਤਿਟ੍ਠਹਿਤ੍ਵਾ’’ਤਿ ਏਤਂ ਵੁਤ੍ਤਂ. ਦਹਰੋ ਤ੍ਵਨ੍ਤਿਆਦਿਮਾਹ ਲੋਭਾਭਿਭੂਤਤਾਯ ਅਧਿਗਤਤ੍ਤਾ. ਸਬ੍ਬਸਮ੍ਪਤ੍ਤਿਯੁਤ੍ਤੋਤਿ ਭੋਗਸਮ੍ਪਦਾ ਪਰਿਵਾਰਸਮ੍ਪਦਾਤਿ ਸਬ੍ਬਸਮ੍ਪਤ੍ਤੀਹਿ ਯੁਤ੍ਤੋ. ਅਲਙ੍ਕਾਰਪਰਿਹਾਰਨ੍ਤਿ ਅਲਙ੍ਕਾਰਕਰਣਂ. ਅਨਿਕ੍ਕੀਲ਼ਿਤਾਵੀਤਿ ਅਕੀਲ਼ਿਤਪੁਬ੍ਬੋ. ਕੀਲ਼ਨਞ੍ਚੇਤ੍ਥ ਕਾਮਾਨਂ ਪਰਿਭੋਗੋਤਿ ਆਹ ‘‘ਅਭੁਤ੍ਤਾਵੀ’’ਤਿ. ਅਕਤਕਾਮਕੀਲ਼ੋਤਿ ਅਕਤਕਾਮਾਨੁਭਵਨਪ੍ਪਯੋਗੋ. ਸਯਂ ਅਤ੍ਤਨਾ ਏਵ ਦਿਸ੍ਸਨ੍ਤੀਤਿ ਸਨ੍ਦਿਟ੍ਠਾ, ਸਨ੍ਦਿਟ੍ਠਾ ਏਵ ਸਨ੍ਦਿਟ੍ਠਿਕਾ, ਅਤ੍ਤਪਚ੍ਚਕ੍ਖਤੋ ਸਨ੍ਦਿਟ੍ਠਿਕਾ. ਪਕਟ੍ਠੋ ਕਾਲੋ ਪਤ੍ਤੋ ਏਤੇਸਨ੍ਤਿ ਕਾਲਿਕਾ, ਤੇ ਕਾਲਿਕੇ.
ਚਿਤ੍ਤਾਨਨ੍ਤਰਨ੍ਤਿ ਇਚ੍ਛਿਤਚਿਤ੍ਤਾਨਨ੍ਤਰਂ, ਇਚ੍ਛਿਤਿਚ੍ਛਿਤਾਰਮ੍ਮਣਾਕਾਰੇਤਿ ਅਤ੍ਥੋ. ਤੇਨੇਵਾਹ ‘‘ਚਿਤ੍ਤਾਨਨ੍ਤਰਂ ਇਚ੍ਛਿਤਿਚ੍ਛਿਤਾਰਮ੍ਮਣਾਨੁਭਵਨਂ ਨ ਸਮ੍ਪਜ੍ਜਤੀ’’ਤਿਆਦਿ. ਚਿਤ੍ਤਾਨਨ੍ਤਰਂ ਲਦ੍ਧਬ੍ਬਤਾਯਾਤਿ ਅਨਨ੍ਤਰਿਤਸਮਾਧਿਚਿਤ੍ਤਾਨਨ੍ਤਰਂ ਲਦ੍ਧਬ੍ਬਫਲਤਾਯ. ਸਮੋਹਿਤੇਸੁਪੀਤਿ ਸਮ੍ਭਤੇਸੁਪਿ. ਸਮ੍ਪਨ੍ਨਕਾਮਸ੍ਸਾਤਿ ਸਮਿਦ੍ਧਕਾਮਸ੍ਸ. ਚਿਤ੍ਤਕਾਰਾ ਰੂਪਲਾਭੇਨ, ਪੋਤ੍ਥਕਾਰਾ ਪਟਿਮਾਕਾਰਕਾ, ਰੂਪਕਾਰਾ ਦਨ੍ਤਰੂਪਕਟ੍ਠਰੂਪ-ਲੋਹਰੂਪਾਦਿਕਾਰਕਾ. ਆਦਿਸਦ੍ਦੇਨ ਨਾਨਾਰੂਪਵੇਸਧਾਰੀਨਂ ਨਟਾਦੀਨਂ ਸਙ੍ਗਹੋ. ਸੇਸਦ੍ਵਾਰੇਸੂਤਿ ਏਤ੍ਥ ਗਨ੍ਧਬ੍ਬਮਾਲਾਕਾਰਸੂਪਕਾਰਾਦਯੋ ਵਤ੍ਤਬ੍ਬਾ.
ਸੋਤਿ ਸਮਿਦ੍ਧਿਤ੍ਥੇਰੋ. ਸਮੋਹਿਤਸਮ੍ਪਤ੍ਤਿਨਾਤਿ ਸਙ੍ਗਾਹਭੋਗੂਪਕਰਣਸਮ੍ਪਤ੍ਤਿਨਾ. ਪਤ੍ਤਬ੍ਬਦੁਕ੍ਖਸ੍ਸਾਤਿ ਕਾਮਾਨਂ ਆਪਜ੍ਜਨਰਕ੍ਖਣਵਸੇਨ ਲਦ੍ਧਬ੍ਬਸ੍ਸ ਕਾਯਿਕਚੇਤਸਿਕਦੁਕ੍ਖਸ੍ਸ. ਉਪਾਯਾਸਸ੍ਸਾਤਿ ਦਲ਼੍ਹਪਰਿਸ੍ਸਮਸ੍ਸ ਵਿਰਤਸ੍ਸ. ‘‘ਵਿਸ੍ਸਾਤਸ੍ਸਾ’’ਤਿ ਕੇਚਿ. ‘‘ਪਚ੍ਚਵੇਕ੍ਖਣਞਾਣੇਨਾ’’ਤਿ ਕੇਚਿ ਪਠਨ੍ਤਿ. ਅਸੁਕਸ੍ਮਿਂ ਨਾਮ ਕਾਲੇ ਫਲਂ ਹੋਤੀਤਿ ਏਵਂ ਉਦਿਕ੍ਖਿਤਬ੍ਬੋ ਨਸ੍ਸ ਕਾਲੋਤਿ ਅਕਾਲੋ. ਏਤ੍ਥਾਤਿ ਏਤੇਸੁ ਨਵਸੁ ਲੋਕੁਤ੍ਤਰਧਮ੍ਮੇਸੁ. ਏਹਿਪਸ੍ਸਵਿਧਿਨ੍ਤਿ ‘‘ਏਹਿ ਪਸ੍ਸਾ’’ਤਿ ਏਵਂ ਪਵਤ੍ਤਵਿਧਿਵਚਨਂ. ਉਪਨੇਤਬ੍ਬੋਤਿ ਵਾ ਉਪਨੇਯ੍ਯੋ, ਸੋ ਏਵ ਓਪਨੇਯ੍ਯਿਕੋ. ਵਿਞ੍ਞੂਹੀਤਿ ਵਿਦੂਹਿ ਪਟਿਵਿਦ੍ਧਸਚ੍ਚੇਹਿ. ਤੇ ਏਕਂਸਤੋ ਉਗ੍ਘਟਿਤਞ੍ਞੂਆਦਯੋ ਹੋਨ੍ਤੀਤਿ ਆਹ ‘‘ਉਗ੍ਘਟਿਤਞ੍ਞੂਆਦੀਹੀ’’ਤਿ. ‘‘ਪਚ੍ਚਤ੍ਤ’’ਨ੍ਤਿ ਏਤਸ੍ਸ ਪਤਿਅਤ੍ਤਨੀਤਿ ਭੁਮ੍ਮਵਸੇਨ ਅਤ੍ਥੋ ਗਹੇਤਬ੍ਬੋਤਿ ਆਹ ‘‘ਅਤ੍ਤਨਿ ਅਤ੍ਤਨੀ’’ਤਿ.
ਸਬ੍ਬਪਦੇਹਿ ਸਮ੍ਬਨ੍ਧੋਤਿ ‘‘ਕਥਂ ਆਦੀਨਵੋ ਏਤ੍ਥ ਭਿਯ੍ਯੋ, ਕਥਂ ਅਕਾਲਿਕੋ’’ਤਿਆਦਿਨਾ ਸਬ੍ਬੇਹਿ ਪਚ੍ਚੇਕਂ ਸਮ੍ਬਨ੍ਧੋ ਵੇਦਿਤਬ੍ਬੋ.
ਨਵੋਤਿ ਤਰੁਣੋ ਨ ਚਿਰਵਸ੍ਸੋ. ਯੇ ਭਿਕ੍ਖੁਨੋਵਾਦਕਲਕ੍ਖਣਪ੍ਪਤ੍ਤਾ, ਤੇ ਸਨ੍ਧਾਯ ‘‘ਵੀਸਤਿਵਸ੍ਸਤੋ ਪਟ੍ਠਾਯ ਥੇਰੋ’’ਤਿ ਵੁਤ੍ਤਂ. ਇਧ ਸਾਸਨਂ ਨਾਮ ਸਿਕ੍ਖਤ੍ਤਯਸਙ੍ਗਹਂ ਪਿਟਕਤ੍ਤਯਨ੍ਤਿ ਆਹ ‘‘ਧਮ੍ਮੇਨ ਹੀ’’ਤਿਆਦਿ. ਤਤ੍ਥ ਧਮ੍ਮੇਨ ਵਿਨਯੋ ਏਤ੍ਥ ਵਿਨਾ ਦਣ੍ਡਸਤ੍ਥੇਹੀਤਿ ਧਮ੍ਮਵਿਨਯੋ. ਧਮ੍ਮਾਯ ਵਿਨਯੋ ਏਤ੍ਥ ਨ ਆਮਿਸਤ੍ਥਨ੍ਤਿ ਧਮ੍ਮਵਿਨਯੋ. ਧਮ੍ਮਤੋ ਵਿਨਯੋ ਨ ਅਧਮ੍ਮਤੋਤਿ ਧਮ੍ਮਵਿਨਯੋ. ਧਮ੍ਮੋ ਵਾ ਭਗਵਾ ਧਮ੍ਮਸ੍ਸਾਮੀ ਧਮ੍ਮਕਾਯਤ੍ਤਾ, ਤਸ੍ਸ ਧਮ੍ਮਸਞ੍ਞਿਤਸ੍ਸ ਸਤ੍ਥੁ ਵਿਨਯੋ, ਨ ਤਕ੍ਕਿਕਾਨਨ੍ਤਿ ਧਮ੍ਮਵਿਨਯੋ. ਧਮ੍ਮੇ ਵਿਨਯੋ ਨ ਅਧਮ੍ਮੇ ਵਿਨਯੋ. ਧਮ੍ਮੋ ਚ ਸੋ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਸਤ੍ਤੇ ਅਪਾਯੇਸੁ ਅਪਤਮਾਨੇ ਧਾਰੇਤੀਤਿ, ਸਬ੍ਬੇ ਸਂਕਿਲੇਸਤੋ ਵਿਨੇਤੀਤਿ ਵਿਨਯੋ ਚਾਤਿ ਧਮ੍ਮਵਿਨਯੋ. ਤੇਨਾਹ ‘‘ਉਭਯਮ੍ਪੇਤਂ ਸਾਸਨਸ੍ਸੇਵ ਨਾਮ’’ਨ੍ਤਿ.
ਧਮ੍ਮਵਿਨਯੋਤਿ ਧਮ੍ਮੇਨ ਯੁਤ੍ਤੋ ਵਿਨਯੋਤਿ ਧਮ੍ਮਵਿਨਯੋ ਆਜਞ੍ਞਰਥੋ ਵਿਯ. ਧਮ੍ਮੋ ਚ ਵਿਨਯੋ ਚਾਤਿ ਵਾ ਧਮ੍ਮਵਿਨਯੋ, ਤਂ ਧਮ੍ਮਵਿਨਯਂ. ਧਮ੍ਮਵਿਨਯਾਨਞ੍ਹਿ ਸਤ੍ਥੁਭਾਵਵਚਨਤੋ ਧਮ੍ਮਵਿਨਯਤ੍ਤਸਂਸਿਦ੍ਧਿ ਧਮ੍ਮਵਿਨਯਾਨਂ ਅਞ੍ਞਮਞ੍ਞਂ ਵਿਸੇਸਨਤੋ. ਅਭਿਧਮ੍ਮੇਪਿ ਵਿਨਯਵਚਨਨ੍ਤਿ ਧਮ੍ਮਵਿਨਯਦ੍ਵਯਸਿਦ੍ਧਿ, ਦੇਸਿਤਪਞ੍ਞਤ੍ਤਵਚਨਤੋ ਧਮ੍ਮਵਿਨਯਸਿਦ੍ਧਿ. ਧਮ੍ਮੋ ਚਤੁਧਾ ਦੇਸਿਤੋ ਸਨ੍ਦਸ੍ਸਨ-ਸਮਾਦਾਪਨ-ਸਮੁਤ੍ਤੇਜਨ-ਸਮ੍ਪਹਂਸਨਵਸੇਨ, ਵਿਨਯੋ ਚਤੁਧਾ ਪਞ੍ਞਤ੍ਤੋ ਸੀਲਾਚਾਰਤੋ ਪਰਾਜਿਤਵਸੇਨ. ਧਮ੍ਮਚਰਿਯਾ ਸਕਵਿਸਯੋ, ਵਿਨਯਪਞ੍ਞਤ੍ਤਿ ਬੁਦ੍ਧਵਿਸਯੋ. ਪਰਿਯਾਯੇਨ ਦੇਸਿਤੋ ਧਮ੍ਮੋ, ਨਿਪ੍ਪਰਿਯਾਯੇਨ ਪਞ੍ਞਤ੍ਤੋ ਵਿਨਯੋ. ਧਮ੍ਮਦੇਸਨਾ ਅਧਿਪ੍ਪਾਯਤ੍ਥਪ੍ਪਧਾਨਾ, ਵਿਨਯਪਞ੍ਞਤ੍ਤਿ ਵਚਨਤ੍ਥਪ੍ਪਧਾਨਾ. ਪਰਮਤ੍ਥਸਚ੍ਚਪ੍ਪਧਾਨੋ ਧਮ੍ਮੋ, ਸਮ੍ਮੁਤਿਸਚ੍ਚਪ੍ਪਧਾਨੋ ਵਿਨਯੋ. ਆਸਯਸੁਦ੍ਧਿਪਧਾਨੋ ਧਮ੍ਮੋ, ਪਯੋਗਸੁਦ੍ਧਿਪਧਾਨੋ ਵਿਨਯੋ.
ਕਿਰਿਯਦ੍ਵਯਸਿਦ੍ਧਿਯਾ ਧਮ੍ਮਵਿਨਯਸਿਦ੍ਧਿ. ਧਮ੍ਮੇਨ ਹਿ ਅਨੁਸਾਸਨਸਿਦ੍ਧਿ, ਵਿਨਯੇਨ ਓਵਾਦਸਿਦ੍ਧਿ. ਧਮ੍ਮੇਨ ਧਮ੍ਮਕਥਾਸਿਦ੍ਧਿ, ਵਿਨਯੇਨ ਅਰਿਯਤੁਣ੍ਹੀਭਾਵਸਿਦ੍ਧਿ. ਸਾਵਜ੍ਜਦ੍ਵਯਪਰਿਵਜ੍ਜਨਤੋ ਧਮ੍ਮਵਿਨਯਸਿਦ੍ਧਿ. ਧਮ੍ਮੇਨ ਹਿ ਵਿਸੇਸਤੋ ਪਕਤਿਸਾਵਜ੍ਜਪਰਿਚ੍ਚਾਗਸਿਦ੍ਧਿ, ਵਿਨਯੇਨ ਪਞ੍ਞਤ੍ਤਿਸਾਵਜ੍ਜਪਰਿਚ੍ਚਾਗਸਿਦ੍ਧਿ. ਗਹਟ੍ਠਪਬ੍ਬਜਿਤਾਨਂ ਸਾਧਾਰਣਾਸਾਧਾਰਣਗੁਣਦ੍ਵਯਸਿਦ੍ਧਿ. ਬਹੁਸ੍ਸੁਤਸੁਤਪਸਨ੍ਨਦ੍ਵਯਤੋ ਪਰਿਯਤ੍ਤਿ-ਪਰਿਯਾਪੁਣਨ-ਧਮ੍ਮਵਿਹਾਰ-ਵਿਭਾਗਤੋ ਧਮ੍ਮਧਰਵਿਨਯਧਰਵਿਭਾਗਤੋ ਚ ਧਮ੍ਮਵਿਨਯਦ੍ਵਯਸਿਦ੍ਧਿ, ਸਰਣਦ੍ਵਯਸਿਦ੍ਧਿਯਾ ਧਮ੍ਮਵਿਨਯਦ੍ਵਯਸਿਦ੍ਧਿ. ਇਧ ਸਤ੍ਤਾਨਂ ਦੁਵਿਧਂ ਸਰਣਂ ਧਮ੍ਮੋ ਅਤ੍ਤਾ ਚ. ਤਤ੍ਥ ਧਮ੍ਮੋ ਸੁਚਿਣ੍ਣੋ ਸਰਣਂ. ‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿ’’ਨ੍ਤਿ (ਥੇਰਗਾ. ੩੦੩; ਜਾ. ੧.੧੦.੧੦੨; ੧.੧੫.੩੮੫) ਹਿ ਵੁਤ੍ਤਂ. ਸੁਦਨ੍ਤੋ ਅਤ੍ਤਾਪਿ ਸਰਣਂ ‘‘ਅਤ੍ਤਾ ਹਿ ਅਤ੍ਤਨੋ ਨਾਥੋ’’ਤਿ (ਧ. ਪ. ੧੬੦, ੩੮੦) ਵਚਨਤੋ. ਤੇਨ ਵੁਤ੍ਤਂ ‘‘ਸਰਣਦ੍ਵਯਸਿਦ੍ਧਿਯਾ ਧਮ੍ਮਵਿਨਯਸਿਦ੍ਧੀ’’ਤਿ. ਤਤ੍ਥ ਯਤਸ੍ਸ ਧਮ੍ਮਸਿਦ੍ਧਿ, ਯਤੋ ਚ ਵਿਨਯਸਿਦ੍ਧਿ, ਤਦੁਭਯਂ ਦਸ੍ਸੇਨ੍ਤੋ ਆਹ – ‘‘ਧਮ੍ਮੇਨ ਹੇਤ੍ਥ ਦ੍ਵੇ ਪਿਟਕਾਨਿ ਵੁਤ੍ਤਾਨਿ, ਵਿਨਯੇਨ ਵਿਨਯਪਿਟਕ’’ਨ੍ਤਿ. ਅਧੁਨਾ ਆਗਤੋ ਇਦਾਨੇਵ ਨ ਚਿਰਸ੍ਸੇਵ ਉਪਗਤੋ.
ਮਹਨ੍ਤੇ ਠਾਨੇ ਠਪੇਤ੍ਵਾਤਿ ਮਹੇਸਕ੍ਖਤਾਦਸ੍ਸਨਤ੍ਥਂ ਅਤ੍ਤਨੋ ਪਰਿਵਾਰੇਨ ਮਹਨ੍ਤਟ੍ਠਾਨੇ ਠਪਿਤਭਾਵਂ ਪਵੇਦੇਤ੍ਵਾ. ਮਹਤਿਯਾਤਿ ਉਪਸਙ੍ਕਮਨਵਨ੍ਦਨਾਦਿਵਚਨਾਪਜ੍ਜਨਵਸੇਨ ਸਮਾਚਿਣ੍ਣਾਯ. ਸਬ੍ਬੇਪਿ ਕਿਰ ਨਿਸੀਦਨ੍ਤਾ ਤਂ ਠਾਨਂ ਠਪੇਤ੍ਵਾਵ ਨਿਸੀਦਨ੍ਤਿ. ਥਿਰਕਰਣਵਸੇਨਾਤਿ ਦਲ਼੍ਹੀਕਰਣਵਸੇਨ. ਅਯਂ ਕਿਰ ਦੇਵਤਾ ਞਾਣਸਮ੍ਪਨ੍ਨਾ ਮਾਨਜਾਤਿਕਾ, ਤਸ੍ਮਾ ਨਾਯਂ ਮਾਨਂ ਅਪ੍ਪਹਾਯ ਮਮ ਦੇਸਨਂ ਪਟਿਵਿਜ੍ਝਿਤੁਂ ਸਕ੍ਕੋਤੀਤਿ ਮਾਨਨਿਗ੍ਗਣ੍ਹਨਤ੍ਥਂ ਆਦਿਤੋ ਦੁਵਿਞ੍ਞੇਯ੍ਯਂ ਕਥੇਨ੍ਤੋ ਭਗਵਾ ‘‘ਅਕ੍ਖੇਯ੍ਯਸਞ੍ਞਿਨੋ’’ਤਿਆਦਿਨਾ ਤਾਯ ਞਾਤੁਮਿਚ੍ਛਿਤਕਾਮਾਨਂ ਕਾਲਿਕਾਦਿਭਾਵਂ, ਧਮ੍ਮਸ੍ਸ ਚ ਸਨ੍ਦਿਟ੍ਠਿਕਾਦਿਭਾਵਂ ਵਿਭਾਵੇਨ੍ਤੋ ਦ੍ਵੇ ਗਾਥਾ ਅਭਾਸਿ.
ਅਕ੍ਖੇਯ੍ਯਤੋਤਿ ਗਿਹਿਲਿਙ੍ਗਪਰਿਯਾਯਨਾਮਵਿਸੇਸਾਦਿਵਸੇਨ ਤਥਾ ਤਥਾ ਅਕ੍ਖਾਤਬ੍ਬਤੋ. ਤੇਨਾਹ ‘‘ਕਥਾਨਂ ਵਤ੍ਥੁਭੂਤਤੋ’’ਤਿ. ਏਤੇਸਨ੍ਤਿ ਸਤ੍ਤਾਨਂ. ਪਤਿਟ੍ਠਿਤਾਤਿ ਪਵਤ੍ਤਿਤਾ ਆਸਤ੍ਤਾ. ਪਞ੍ਚਨ੍ਨਂ ਕਾਮਸਙ੍ਗਾਦੀਨਂ ਵਸੇਨ ਆਸਤ੍ਤਾ ਹੋਨ੍ਤੁ, ਇਤਰੇਸਂ ਪਨ ਕਥਨ੍ਤਿ? ਅਨਿਟ੍ਠਙ੍ਗਤੋਪਿ ਹਿ ‘‘ਇਦਂ ਨੁ ਖੋ’’ਤਿਆਦਿਨਾ ਕਙ੍ਖਤੋ ਤਤ੍ਥ ਆਸਤ੍ਤੋ ਏਵ ਨਾਮ ਅਵਿਜਹਨਤੋ, ਤਥਾ ਵਿਕ੍ਖੇਪਗਤੋ ਵਿਕ੍ਖੇਪਵਤ੍ਥੁਸ੍ਮਿਂ, ਅਨੁਸਯਾਨਂ ਪਨ ਆਸਤ੍ਤਭਾਵੇ ਵਤ੍ਤਬ੍ਬਮੇਵ ਨਤ੍ਥਿ. ਮਚ੍ਚੁਨੋ ਯੋਗਨ੍ਤਿ, ਮਚ੍ਚੁਬਨ੍ਧਨਂ, ਮਰਣਧਮ੍ਮਤਨ੍ਤਿ ਅਤ੍ਥੋ. ਯਸ੍ਮਾ ਅਪਰਿਞ੍ਞਾਤਵਤ੍ਥੁਕਾ ਅਨਤੀਤਮਰਣਤ੍ਤਾ ਮਚ੍ਚੁਨਾ ਯਥਾਰੁਚਿ ਪਯੋਜੇਤਬ੍ਬਾ, ਤਤ੍ਥ ਤਤ੍ਥ ਉਪਰੂਪਰਿ ਚ ਖਿਪਿਤਾਯ ਆਣਾਯ ਅਬ੍ਭਨ੍ਤਰੇ ਏਵ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਪਯੋਗਂ…ਪੇ… ਆਗਚ੍ਛਨ੍ਤੀ’’ਤਿ. ਯਸ੍ਮਾ ਤੇਭੂਮਕਾ ਧਮ੍ਮਾ ਕਮਨੀਯਟ੍ਠੇਨ ਕਾਮਾ, ਨੇਸਮ੍ਪਿ ਕਾਲਸ੍ਸ ਲਦ੍ਧਬ੍ਬਤਾਯ ਕਾਲਿਕਤਾ ਇਧ ਅਕ੍ਖੇਯ੍ਯਵਚਨੇਨ ਪਵੇਦਿਤਾ. ਤੇਨਾਹ – ‘‘ਏਵਮਿਮਾਯ ਗਾਥਾਯ ਕਾਲਿਕਾ ਕਾਮਾ ਕਥਿਤਾ’’ਤਿ. ਸਬ੍ਬੇਪਿ ਤੇਭੂਮਕਾ ਧਮ੍ਮਾ ਕਮਨੀਯਾ, ਯਸ੍ਮਾ ਚ ਕਾਲਿਕਾਨਂ ਕਾਮਾਨਂ ਤਥਾਸਭਾਵਤਾ ਕਥਿਤਾ. ਅਯਮ੍ਪਿ ਗਾਥਾ ਤਦਤ੍ਥਮੇਵ ਦੀਪੇਤੀਤਿ ਇਮਾਯ ਤੇ ਕਥਿਤਾ ਏਵ ਹੋਨ੍ਤਿ. ਯੇ ਚ ਸਤ੍ਤਾ ਪਞ੍ਚਸੁ ਖਨ੍ਧੇਸੁ ਦਿਟ੍ਠਿਤਣ੍ਹਾਦਿਵਸੇਨ ਪਤਿਟ੍ਠਿਤਾ ‘‘ਇਤ੍ਥੀ, ਪੁਰਿਸੋ, ਅਹਂ, ਮਮਾ’’ਤਿ ਚ ਅਭਿਨਿਵਿਸਿਯ ਕਾਮੇ ਪਰਿਭੁਞ੍ਜਨ੍ਤਿ, ਤੇ ਮਰਣਂ ਨਾਤਿਵਤ੍ਤਨ੍ਤਿ. ਏਵਮ੍ਪੇਤ੍ਥ ਕਾਮਾਨਂ ਕਾਲਿਕਤ੍ਥੋ ਕਥਿਤੋਤਿ ਆਹ ‘‘ਕਾਲਿਕਾ ਕਾਮਾ ਕਥਿਤਾ’’ਤਿ.
ਅਯਂ ਞਾਤਪਰਿਞ੍ਞਾਤਿ ਰੂਪਾਰੂਪਧਮ੍ਮੇ ਲਕ੍ਖਣਾਦਿਤੋ ਞਾਤੇ ਕਤ੍ਵਾ ਪਰਿਚ੍ਛਿਨ੍ਦਨਪਞ੍ਞਾ. ਤੇਨਾਹ ‘‘ਏਵਂ ਞਾਤਂ ਕਤ੍ਵਾ’’ਤਿਆਦਿ. ਪਦਟ੍ਠਾਨਗ੍ਗਹਣੇਨੇਵ ਚੇਤ੍ਥ ਤੇਸਂ ਰੂਪਾਰੂਪਧਮ੍ਮਾਨਂ ਪਚ੍ਚਯੋ ਗਹਿਤੋਤਿ ਪਚ੍ਚਯਪਰਿਗ੍ਗਹਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ. ਤੀਰੇਤਿ ਤੁਲੇਤਿ ਵੀਮਂਸਤਿ. ਦ੍ਵਾਚਤ੍ਤਾਲੀਸਾਯ ਆਕਾਰੇਹੀਤਿ ਇਮਿਨਾ ਮਤ੍ਥਕਪ੍ਪਤ੍ਤਂ ਮਹਾਵਿਪਸ੍ਸਨਂ ਦਸ੍ਸੇਤਿ. ਤੇ ਪਨ ਆਕਾਰਾ ਵਿਸੁਦ੍ਧਿਮਗ੍ਗਸਂਵਣ੍ਣਨਾਯ ਵੁਤ੍ਤਨਯੇਨ ਵੇਦਿਤਬ੍ਬਾ. ‘‘ਅਨਿਚ੍ਚਾਨੁਪਸ੍ਸਨਾਯ ਨਿਚ੍ਚਸਞ੍ਞਂ ਪਜਹਤੀ’’ਤਿਆਦਿਨਾ ਵਿਪਸ੍ਸਨਾਕ੍ਖਣੇਪਿ ਏਕਦੇਸੇਨ ਪਹਾਨਂ ਲਬ੍ਭਤੇਵ, ਅਨਵਸੇਸਤੋ ਪਨ ਪਹਾਨਵਸੇਨ ਪਹਾਨਪਰਿਞ੍ਞਂ ਦਸ੍ਸੇਨ੍ਤੋ ਆਹ ‘‘ਅਗ੍ਗਮਗ੍ਗੇਨ …ਪੇ… ਅਯਂ ਪਹਾਨਪਰਿਞ੍ਞਾ’’ਤਿ. ਤਥਾ ਚ ਆਹ ‘‘ਏਵਂ ਤੀਹਿ ਪਰਿਞ੍ਞਾਹੀ’’ਤਿਆਦਿ.
ਅਕ੍ਖਾਤਾਰਨ੍ਤਿ ਅਕ੍ਖਾਤਬ੍ਬਂ, ਨ ਅਕ੍ਖੇਯ੍ਯਕਂ. ਤੇਨਾਹ ‘‘ਕਮ੍ਮਵਸੇਨ ਕਾਰਕ’’ਨ੍ਤਿਆਦਿ. ਕਾਰਕਨ੍ਤਿ ਚ ਸਾਧਨਮਾਹ. ਨ ਮਞ੍ਞਤੀਤਿ ਵਾ ਮਞ੍ਞਨਂ ਨਪ੍ਪਵਤ੍ਤੇਤਿ ਅਕ੍ਖਾਤਾਰਨ੍ਤਿ ਖੀਣਾਸਵਂ. ਅਥ ਵਾ ਤਞ੍ਹਿ ਤਸ੍ਸ ਨ ਹੋਤੀਤਿ ਤਂ ਕਾਰਣਂ ਤਸ੍ਸ ਖੀਣਾਸਵਸ੍ਸ ਨ ਹੋਤਿ ਨ ਵਿਜ੍ਜਤਿ, ਯੇਨ ਦਿਟ੍ਠਿਤਣ੍ਹਾਦਿਕਾਰਣੇਨ ਅਕ੍ਖੇਯ੍ਯਂ ਖਨ੍ਧਪਞ੍ਚਕਂ ‘‘ਤਿਸ੍ਸੋ’’ਤਿ ਵਾ ‘‘ਫੁਸ੍ਸੋ’’ਤਿ ਵਾ ‘‘ਇਤ੍ਥੀ’’ਤਿ ਵਾ ‘‘ਪੁਰਿਸੋ’’ਤਿ ਵਾ ਅਭਿਨਿਵਿਸ੍ਸ ਵਦੇਯ੍ਯਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਮਨੁਸ੍ਸਨਾਗਾਦੀਹਿ ਪੂਜਨੀਯਤ੍ਤਾ ‘‘ਯਕ੍ਖੋ’’ਤਿ ਸਬ੍ਬਦੇਵਾਨਂ ਸਾਧਾਰਣਵਚਨਨ੍ਤਿ ਦੇਵਧੀਤਾਪਿ ‘‘ਯਕ੍ਖੀ’’ਤਿ ਵੁਤ੍ਤਾ. ਅਕ੍ਖੇਯ੍ਯਨ੍ਤਿ ਪਹਾਨਪਰਿਞ੍ਞਾਯ ਪਹਾਨਮਗ੍ਗੋ, ਤਸ੍ਸ ਆਰਮ੍ਮਣਭੂਤਂ ਨਿਬ੍ਬਾਨਮ੍ਪਿ ਗਹਿਤਂ. ਨ ਮਞ੍ਞਤੀਤਿ ਖੀਣਾਸਵਸ੍ਸ ਅਸ੍ਸ ਫਲਪ੍ਪਤ੍ਤੀਤਿ ਆਹ ‘‘ਨਵਵਿਧੋ ਲੋਕੁਤ੍ਤਰਧਮ੍ਮੋ ਕਥਿਤੋ’’ਤਿ.
ਵਿਸੇਸੀਤਿ ਵਿਸੇਸਜਾਤਿਆਦਿਵਸੇਨ ਸੇਯ੍ਯੋਤਿ ਅਤ੍ਥੋ. ਤੇਸੁ ਗਹਿਤੇਸੂਤਿ ਤੇਸੁ ਸੇਯ੍ਯਮਾਨਾਦੀਸੁ ਤੀਸੁ ਮਾਨੇਸੁ ਗਹਿਤੇਸੁ. ਤਯੋ ਸੇਯ੍ਯਮਾਨਾ, ਤਯੋ ਸਦਿਸਮਾਨਾ, ਤਯੋ ਹੀਨਮਾਨਾ ਗਹਿਤਾਵ ਹੋਨ੍ਤਿ. ਸੋ ਪੁਗ੍ਗਲੋਤਿ ਸੋ ਅਪ੍ਪਹੀਨਮਞ੍ਞਨਪੁਗ੍ਗਲੋ. ਤੇਨੇਵ ਮਾਨੇਨ ਹੇਤੁਭੂਤੇਨ. ਉਪਡ੍ਢਗਾਥਾਯਾਤਿ ਪੁਰਿਮਦ੍ਧੇਨ ਪਨ ਵਤ੍ਥੁਕਾਮਾ ਵੁਤ੍ਤਾਤਿ ਆਹ ‘‘ਕਾਲਿਕਾ ਕਾਮਾ ਕਥਿਤਾ’’ਤਿ.
ਵਿਧੀਯਤਿ ਵਿਸਦਿਸਾਕਾਰੇਨ ਠਪੀਯਤੀਤਿ ਵਿਧਾ, ਕੋਟ੍ਠਾਸੋ. ਕਥਂਵਿਧਨ੍ਤਿ ਕਥਂ ਪਤਿਟ੍ਠਿਤਂ, ਕੇਨ ਪਕਾਰੇਨ ਪਵਤ੍ਤਿਤਨ੍ਤਿ ਅਤ੍ਥੋ. ਵਿਦਹਨਤੋ ਹੀਨਾਦਿਵਸੇਨ ਵਿਵਿਧੇਨਾਕਾਰੇਨ ਦਹਨਤੋ ਉਪਧਾਰਣਤੋ ਵਿਧਾ, ਮਾਨੋ. ਮਾਨੇਸੂਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਮਾਨਹੇਤੂਤਿ ਅਤ੍ਥੋ. ਨ ਚਲਤੀਤਿ ਨ ਵੇਧਤਿ ਅਤ੍ਤਨੋ ਪਰਿਸੁਦ੍ਧਪਕਤਿਂ ਅਵਿਜਹਨਤੋ.
ਪਞ੍ਞਾ ‘‘ਸਙ੍ਖਾ’’ਤਿ ਆਗਤਾ, ਪਞ੍ਞਾਤਿ ਯੋਨਿਸੋ ਪਟਿਸਙ੍ਖਾਨਂ. ਸਙ੍ਖਾਯਕੋਤਿ ਸਙ੍ਕਲਨਪਦੁਪ੍ਪਾਦਨਾਦਿ-ਪਿਣ੍ਡਗਣਨਾਵਸੇਨ ਗਣਕੋ ਪਪਞ੍ਚਸਙ੍ਖਾਤਿ ਮਾਨਾਦਿਪਪਞ੍ਚਭਾਗਾ. ਤੇ ਤੇ ਧਮ੍ਮਾ ਸਮ੍ਮਾ ਯਾਥਾਵਤੋ ਸਙ੍ਖਾਯਨ੍ਤਿ ਉਪਤਿਟ੍ਠਨ੍ਤਿ ਏਤਾਯਾਤਿ ਸਙ੍ਖਾ, ਪਞ੍ਞਾ. ਏਕਂ ਦ੍ਵੇਤਿਆਦਿਨਾ ਸਙ੍ਖਾਨਂ ਗਣਨਂ ਪਰਿਚ੍ਛਿਨ੍ਦਨਨ੍ਤਿ ਸਙ੍ਖਾ, ਗਣਨਾ. ਸਙ੍ਖਾਯਤਿ ਭਾਗਸੋ ਕਥੀਯਤੀਤਿ ਸਙ੍ਖਾ, ਕੋਟ੍ਠਾਸੋ. ਸਙ੍ਖਾਨਂ ਸਤ੍ਤੋ ਪੁਗ੍ਗਲੋਤਿਆਦਿਨਾ ਸਞ੍ਞਾਪਨਨ੍ਤਿ ਸਙ੍ਖਾ, ਰਤ੍ਤੋਤਿਆਦਿ ਪਣ੍ਣਤ੍ਤਿ. ਖੀਣਾਸਵੋ ਜਹਿ ਪਜਹਿ ਰਾਗਾਦੀਨਂ ਸੁਪ੍ਪਹੀਨਤ੍ਤਾ. ਨਵਭੇਦਂ ਪਭੇਦਤੋ, ਸਙ੍ਖੇਪਤੋ ਤਿਵਿਧਮਾਨਨ੍ਤਿ ਅਤ੍ਥੋ. ਨਵਵਿਧਨ੍ਤਿ ਵਾ ਪਾਠੇ ਨਵਭੇਦਤ੍ਤਾ ਅਨ੍ਤਰਭੇਦਵਸੇਨ ਨਵਵਿਧਨ੍ਤਿ ਅਤ੍ਥੋ. ਪਚ੍ਚਯਵਿਸੇਸੇਹਿ ਇਤ੍ਥਿਭਾਵਾਦਿਵਿਸੇਸੇਹਿ ਵਿਸੇਸੇਨ ਮਾਨੀਯਤਿ ਗਬ੍ਭੋ ਏਤ੍ਥਾਤਿ ਵਿਮਾਨਂ, ਗਬ੍ਭਾਸਯੋ. ਨ ਉਪਗਚ੍ਛੀਤਿ ਨ ਉਪਗਮਿਸ੍ਸਤਿ. ਤੇਨਾਹ ‘‘ਅਨਾਗਤਤ੍ਥੇ ਅਤੀਤਵਚਨ’’ਨ੍ਤਿ. ‘‘ਨਾਜ੍ਝਗਾ’’ਤਿ ਹਿ ਅਤੀਤਂ ‘‘ਨ ਗਮਿਸ੍ਸਤੀ’’ਤਿ ਏਤਸ੍ਮਿਂ ਅਤ੍ਥੇ. ਛਿਨ੍ਦਿ ਅਰਿਯਮਗ੍ਗਸਤ੍ਥੇਨ. ਓਲੋਕਯਮਾਨਾ ਉਪਪਤ੍ਤੀਸੁ. ਸਤ੍ਤਨਿਵੇਸਨੇਸੂਤਿ ਸਤ੍ਤਾਨਂ ਉਪਪਜ੍ਜਟ੍ਠਾਨੇਸੁ. ਲੋਕੁਤ੍ਤਰਧਮ੍ਮਮੇਵ ਕਥੇਸਿ ਅਰਹਤ੍ਤਸ੍ਸ ਪਵੇਦਿਤਤ੍ਤਾ.
‘‘ਗਾਥਾਯ ਅਤ੍ਥਂ ਕਥੇਤੁਂ ਵਟ੍ਟਤੀ’’ਤਿ ਅਤ੍ਥ-ਸਦ੍ਦੋ ਆਹਰਿਤ੍ਵਾ ਵਤ੍ਤਬ੍ਬੋ. ਅਟ੍ਠਙ੍ਗਿਕਮਗ੍ਗਵਸੇਨਪੀਤਿ ਏਤ੍ਥਾਪਿ ਏਸੇਵ ਨਯੋ. ਸਤਿਸਮ੍ਪਜਞ੍ਞਂ ਨਾਮ ਕੁਸਲਧਮ੍ਮਾਨੁਯੋਗੇ ਕਾਰਣਨ੍ਤਿ ਆਹ ‘‘ਦਸਕੁਸਲਕਮ੍ਮਪਥਕਾਰਣ’’ਨ੍ਤਿ.
ਅਟ੍ਠਙ੍ਗਿਕਮਗ੍ਗਵਸੇਨ ਚ ਗਾਥਾਅਤ੍ਥਵਚਨੇ ਅਯਂ ਇਦਾਨਿ ਵੁਚ੍ਚਮਾਨੋ ਵਿਤ੍ਥਾਰ-ਨਯੋ. ਤਸ੍ਮਿਂ ਕਿਰ ਠਾਨੇਤਿ ਤਸ੍ਮਿਂ ਕਿਰ ਦੇਵਤਾਯ ਪੁਚ੍ਛਿਤਂ ਪਞ੍ਹਂ ਵਿਸ੍ਸਜ੍ਜਨਟ੍ਠਾਨੇ. ਦੇਵਤਾਯ ਞਾਣਪਰਿਪਾਕਂ ਓਲੋਕੇਤ੍ਵਾ ਅਨੁਪੁਬ੍ਬਿਯਾ ਕਥਾਯ ਸਦ੍ਧਿਂ ਸਾਮੁਕ੍ਕਂਸਿਕਦੇਸਨਾ ਮਹਤੀ ਧਮ੍ਮਦੇਸਨਾ ਅਹੋਸਿ. ਞਾਣਂ ਪੇਸੇਤ੍ਵਾਤਿ ਸਤ੍ਥੁਦੇਸਨਾਯ ਅਨੁਸ੍ਸਰਣਵਸੇਨ ਪਤ੍ਤਵਿਸੁਦ੍ਧਿਪਟਿਪਾਟਿਪਵਤ੍ਤਂ ਭਾਵਨਾਞਾਣਂ ਬਨ੍ਧਿਤ੍ਵਾ. ਸੋਤਾਪਤ੍ਤਿਫਲੇ ਪਤਿਟ੍ਠਾਯਾਤਿ ਸਤ੍ਥੁਦੇਸਨਾਵਿਲਾਸੇਨ ਅਤ੍ਤਨੋ ਚ ਪਰਿਪਕ੍ਕਞਾਣਤ੍ਤਾ ਪਠਮਂ ਫਲਂ ਪਤ੍ਵਾ. ਏਵਮਾਹਾਤਿ ਏਵਂ ‘‘ਪਾਪਂ ਨ ਕਯਿਰਾ’’ਤਿਆਦਿਪ੍ਪਕਾਰੇਨ ਗਾਥਮਾਹ. ਅਙ੍ਗਂ ਨ ਹੋਤਿ, ਆਜੀਵੋ ਯਥਾ ਕੁਪ੍ਪਮਾਨੋ ਵਾਚਾਕਮ੍ਮਨ੍ਤਵਸੇਨ ਕੁਪ੍ਪਤਿ, ਤਥਾ ਸਮ੍ਪਜ੍ਜਮਾਨੋਪੀਤਿ. ਸੋ ਵਾਚਾਕਮ੍ਮਨ੍ਤਪਕ੍ਖਿਕੋ, ਤਸ੍ਮਾ ਤਗ੍ਗਹਣੇਨ ਗਹਿਤੋਵ ਹੋਤਿ. ਵਾਯਾਮਸਤਿਸਮਾਧਯੋ ਗਹਿਤਾ ਸਮਾਧਿਕ੍ਖਨ੍ਧਸਙ੍ਗਹਤੋ. ਸਮ੍ਮਾਦਿਟ੍ਠਿਸਮ੍ਮਾਸਙ੍ਕਪ੍ਪਾ ਗਹਿਤਾ ਪਞ੍ਞਾਕ੍ਖਨ੍ਧਸਙ੍ਗਹਤੋ. ਅਨ੍ਤਦ੍ਵਯਵਿਵਜ੍ਜਨਂ ਗਹਿਤਂ ਸਰੂਪੇਨੇਵਾਤਿ ਅਧਿਪ੍ਪਾਯੋ. ਇਤੀਤਿਆਦਿ ਨਿਗਮਨਂ.
ਸਮਿਦ੍ਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਨਨ੍ਦਨਵਗ੍ਗਵਣ੍ਣਨਾ ਨਿਟ੍ਠਿਤਾ.