੭. ਆਰਞ੍ਞਿਕਵਤ੍ਤਕਥਾ

੩੬੮. ਆਰਞ੍ਞਿਕਵਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਸੇਨਾਸਨਾ ਓਤਰਿਤਬ੍ਬਨ੍ਤਿ ਏਤ੍ਥ ਅਰਞ੍ਞੇ ਰੁਕ੍ਖਮੂਲਾਦੀਸੁ ਨਿਸਿਨ੍ਨਸ੍ਸ ਵਿਹਾਰਾਭਾਵਤੋ ਸੇਨਾਸਨਂ ਨਾਮ ਵਸਨਟ੍ਠਾਨਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਵਸਨਟ੍ਠਾਨਤੋ ਨਿਕ੍ਖਮਿਤਬ੍ਬ’’ਨ੍ਤਿ.

ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾਤਿ ਏਤ੍ਥ ਕਥਂ ਪਤ੍ਤੋ ਥਵਿਕਾਯ ਪਕ੍ਖਿਪਿਤਬ੍ਬੋਤਿ ਆਹ ‘‘ਸਚੇ ਬਹੀ’’ਤਿਆਦਿ. ਤਤ੍ਥ ਪਤ੍ਤੋ ਪਕ੍ਖਿਪਿਤਬ੍ਬੋਤਿ ਸਮ੍ਬਨ੍ਧੋ. ਧੋਵਿਤ੍ਵਾ ਕਤ੍ਵਾਤਿ ਪਦੇਸੁ ‘‘ਪਤ੍ਤਂ ਵੋਦਕ’’ਨ੍ਤਿ ਵਿਭਤ੍ਤਿਪਰਿਣਾਮਂ ਕਤ੍ਵਾ ਸਮ੍ਬਨ੍ਧਿਤਬ੍ਬਂ. ਤਮ੍ਪੀਤਿ ਵੇਲ਼ੁਨਾਲ਼ਿਕਮ੍ਪਿ. ਸਮੀਪੇਤਿ ਆਰਞ੍ਞਕਸ੍ਸ ਸੇਨਾਸਨਸ੍ਸ ਸਮੀਪੇ. ਯਥਾ ਚ ਆਰਞ੍ਞਕਸ੍ਸ ਅਰਣਿਸਹਿਤਂ ਇਚ੍ਛਿਤਬ੍ਬਂ, ਏਵਂ ਕਨ੍ਤਾਰਂ ਪਟਿਪਨ੍ਨਸ੍ਸਾਪਿ ਅਰਣਿਸਹਿਤਂ ਇਚ੍ਛਿਤਬ੍ਬਨ੍ਤਿ ਯੋਜਨਾ. ਗਣਵਾਸਿਨੋਤਿ ਗਣੇਨ ਸਹ ਵਾਸਿਨੋ, ਆਰਞ੍ਞਕਸ੍ਸਾਤਿ ਸਮ੍ਬਨ੍ਧੋ. ਤੇਨਾਤਿ ਅਰਣਿਸਹਿਤੇਨ. ‘‘ਨਕ੍ਖਤ੍ਤਾਨੇਵ ਨਕ੍ਖਤ੍ਤਪਦਾਨੀ’’ਤਿ ਇਮਿਨਾ ਅਸ੍ਸਯੁਜਾਦਿਨਕ੍ਖਤ੍ਤਾਨੇਵ (ਅਭਿਧਾਨਪ੍ਪਦੀਪਿਕਾਯਂ ੫੮-੬੦ ਗਾਥਾਸੁ) ਦਿਸਾਭਾਗਜਾਨਨਸ੍ਸ, ਚ ਸਮਯਜਾਨਨਸ੍ਸ ਚ ਕਾਰਣਤ੍ਤਾ ਨਕ੍ਖਤ੍ਤਪਦਾਨਿ ਨਾਮਾਤਿ ਦਸ੍ਸੇਤਿ.