੧. ਆਗਨ੍ਤੁਕਵਤ੍ਤਕਥਾ

੩੫੭. ਵਤ੍ਤਕ੍ਖਨ੍ਧਕੇ ਆਰਾਮਨ੍ਤਿ ਉਪਚਾਰਸੀਮਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਉਪਚਾਰਸੀਮਸਮੀਪ’’ਨ੍ਤਿ. ‘‘ਗਹੇਤ੍ਵਾ’’ਤਿ ਪਦਸ੍ਸ ‘‘ਉਪਾਹਨਾ’’ਤਿ ਕਮ੍ਮਂ ਪਾਕਟਂ, ਕਰਣਂ ਪਨ ਅਪਾਕਟਂ. ਤਸ੍ਮਾ ਕਰਣਂ ਦਸ੍ਸੇਨ੍ਤੋ ਆਹ ‘‘ਉਪਾਹਨਦਣ੍ਡਕੇਨ ਗਹੇਤ੍ਵਾ’’ਤਿ. ਇਮਿਨਾ ‘‘ਹਤ੍ਥੇਨਾ’’ਤਿ ਕਰਣਂ ਨਿਵਤ੍ਤੇਤਿ. ਪਟਿਕ੍ਕਮਨ੍ਤੀਤਿ ਏਤ੍ਥ ਪਵਿਸਨ੍ਤੀਤਿ ਚ ਅਪਕ੍ਕਮਨ੍ਤੀਤਿ ਚ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਸਨ੍ਨਿਪਤਨ੍ਤੀ’’ਤਿ. ਉਪਾਹਨਾ…ਪੇ… ਪੁਚ੍ਛਿਤਬ੍ਬਾਤਿ ਏਤ੍ਥ ‘‘ਪੁਚ੍ਛਿਤਬ੍ਬਾ’’ਤਿ ਪਦਸ੍ਸ ਸਹ ਕਮ੍ਮੇਨ ਪੁਚ੍ਛਿਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਕਤਰਸ੍ਮਿਂ ਠਾਨੇ’’ਤਿਆਦਿ. ਤਤ੍ਥ ‘‘ਕਤਰਸ੍ਮਿਂ…ਪੇ… ਚੋਲ਼ਕ’’ਨ੍ਤਿ ਇਮਿਨਾ ਪੁਚ੍ਛਿਤਬ੍ਬਾਕਾਰਂ ਦਸ੍ਸੇਤਿ. ‘‘ਆਵਾਸਿਕਾ ਭਿਕ੍ਖੂ’’ਤਿ ਇਮਿਨਾ ਕਮ੍ਮਂ ਦਸ੍ਸੇਤਿ. ‘‘ਪਤ੍ਥਰਿਤਬ੍ਬ’’ਨ੍ਤਿ ਇਮਿਨਾ ਵਿਸ੍ਸਜ੍ਜੇਤਬ੍ਬਨ੍ਤਿ ਏਤ੍ਥ ਸਜਧਾਤੁਯਾ ਚਜਨਤ੍ਥਂ ਪਟਿਕ੍ਖਿਪਤਿ. ਗੋਚਰੋ ਪੁਚ੍ਛਿਤਬ੍ਬੋਤਿ ਏਤ੍ਥ ਗੋਚਰਸਦ੍ਦੋ ਭਿਕ੍ਖਾਚਾਰਸਦ੍ਦੇਨ ਅਤ੍ਥਤੋ ਏਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਭਿਕ੍ਖਾਚਾਰੋ ਪੁਚ੍ਛਿਤਬ੍ਬੋ’’ਤਿ. ਭਿਕ੍ਖਾਯ ਚਰਨ੍ਤਿ ਏਤ੍ਥਾਤਿ ਭਿਕ੍ਖਾਚਾਰੋ, ਗੋਚਰਗਾਮੋ. ਯਤ੍ਥਾਤਿ ਯਸ੍ਮਿਂ ਗਾਮੇ. ‘‘ਕਿ’’ਨ੍ਤਿਆਦਿਨਾ ਪਾਨੀਯਂ ਪੁਚ੍ਛਿਤਬ੍ਬਨ੍ਤਿਆਦੀਸੁ ਪੁਚ੍ਛਿਤਬ੍ਬਾਕਾਰਂ ਦਸ੍ਸੇਤਿ. ਕਂ ਕਾਲਨ੍ਤਿ ਕਸ੍ਮਿਂ ਕਾਲੇ.

ਬਹਿ ਨਿਕ੍ਖਮਨ੍ਤਸ੍ਸਾਤਿ ਵਿਹਾਰਤੋ ਬਹਿ ਨਿਕ੍ਖਮਨ੍ਤਸ੍ਸ. ਨਿਲ੍ਲੋਕੇਤਬ੍ਬੋਤਿ ਓਲੋਕੇਤਬ੍ਬੋ. ‘‘ਯਦਿ ਸਕ੍ਕੋਤੀ’’ਤਿ ਇਮਿਨਾ ਸਚੇ ਉਸ੍ਸਹਤੀਤਿ ਏਤ੍ਥ ਸਚੇਸਦ੍ਦੋ ਯਦਿਪਰਿਯਾਯੋ, ਉਸ੍ਸਹਤਿਸਦ੍ਦੋ ਸਕ੍ਕੋਤਿ ਪਰਿਯਾਯੋਤਿ ਦਸ੍ਸੇਤਿ. ਸਕ੍ਕੋਨ੍ਤਸ੍ਸ ਵਿਹਾਰਸੋਧਨਵਤ੍ਤੇਤਿ ਸਮ੍ਬਨ੍ਧੋ.