੧. ਸੁਕ੍ਕਵਿਸ੍ਸਟ੍ਠਿਕਥਾ

ਸਮੁਚ੍ਚਯਕ੍ਖਨ੍ਧਕੇ ਤਤ੍ਥਾਤਿ ਚਤੁਬ੍ਬਿਧੇਸੁ ਮਾਨਤ੍ਤੇਸੁ. ਯਂ ਮਾਨਤ੍ਤਂ ਦਿਯ੍ਯਤਿ, ਇਦਂ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਨਾਮਾਤਿ ਯੋਜਨਾ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਸੁਪਿ. ਪਟਿਚ੍ਛਨ੍ਨਾਯ ਆਪਤ੍ਤਿਯਾਤਿ ਹੇਤ੍ਵਤ੍ਥੇ ਕਰਣਵਚਨਂ, ਕਾਰਣਤ੍ਥੇ ਨਿਸ੍ਸਕ੍ਕਵਚਨਂ ਵਾ. ਅਦ੍ਧਮਾਸਨ੍ਤਿ ਪਨ੍ਨਰਸਦਿਵਸਕਾਲਂ. ਓਧਾਯਾਤਿ ਸਮੂਹਂ ਕਤ੍ਵਾ. ‘‘ਏਕਤੋ ਕਤ੍ਵਾ’’ਤਿ ਇਮਿਨਾ ‘‘ਓਧਾਯਾ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਤੇਸੂਤਿ ਚਤੁਬ੍ਬਿਧੇਸੁ ਮਾਨਤ੍ਤੇਸੁ. ਇਦਨ੍ਤਿ ਮਾਨਤ੍ਤਂ. ਅਪ੍ਪਟਿਚ੍ਛਨ੍ਨਾਯ…ਪੇ… ਵਚਨਤੋਤਿ ਞਾਪਕਹੇਤੁ. ਏਤੇਨ ਅਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬਂ ਮਾਨਤ੍ਤਂ ਅਪ੍ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤਨ੍ਤਿ ਅਪ੍ਪਟਿਚ੍ਛਨ੍ਨਮਾਨਤ੍ਤਂ. ਇਧਾਤਿ ਇਮਿਸ੍ਸਂ ਪਾਲ਼ਿਯਂ. ਤਤੁਤ੍ਤਰੀਤਿ ਤਤੋ ਤੀਹਿਪਿ ਉਤ੍ਤਰਿ. ਨਾਨਾਵਤ੍ਥੂਨਿ ਏਤਾਸਨ੍ਤਿ ਨਾਨਾਵਤ੍ਥੁਕਾਯੋ. ਤਾਸਨ੍ਤਿ ਨਾਨਾਵਤ੍ਥੁਕਾਨਂ.

ਮਾਲ਼ਕਸੀਮਾਯਮੇਵਾਤਿ ਸੀਮਮਾਲ਼ਕੇ ਏਵ, ਸੀਮਙ੍ਗਣੇ ਏਵਾਤਿ ਅਤ੍ਥੋ. ਤਤ੍ਥੇਵਾਤਿ ਮਾਲ਼ਕਸੀਮਾਯਮੇਵ.

ਵੇਦਯਾਮਹਨ੍ਤਿ ਵੇਦਯਾਮਿ ਅਹਂ. ਮਮ ਮਾਨਤ੍ਤਚਰਭਾਵਂ ਸਙ੍ਘਂ ਜਾਨਾਪੇਮੀਤਿ ਅਤ੍ਥੋ. ਵੇਦਯਤੀਤਿ ਮਨ੍ਤਿ ਜਾਨਾਪੇਤਿ, ਇਤਿ ਮਂ ਸਙ੍ਘੋ ਧਾਰੇਤੂਤਿ ਅਧਿਪ੍ਪਾਯੋ. ਵੁਤ੍ਤਨਯੇਨੇਵਾਤਿ ਪਾਰਿਵਾਸਿਕਕ੍ਖਨ੍ਧਕੇ ਵੁਤ੍ਤਨਯੇਨੇਵ. ਨਿਕ੍ਖਿਪਿਤਬ੍ਬਨ੍ਤਿ ‘‘ਮਾਨਤ੍ਤਂ ਨਿਕ੍ਖਿਪਾਮਿ, ਵਤ੍ਤਂ ਨਿਕ੍ਖਿਪਾਮੀ’’ਤਿ ਨਿਕ੍ਖਿਪਿਤਬ੍ਬਂ. ਮਾਲ਼ਕਤੋਤਿ ਸੀਮਙ੍ਗਣਤੋ. ਸੋਪੀਤਿ ਸਹ ਗਚ੍ਛਨ੍ਤੋਪਿ. ‘‘ਮਾਲ਼ਕੇ ਨਾਰੋਚਿਤ’’ਨ੍ਤਿ ਇਮਿਨਾ ਯਸ੍ਸ ਮਾਲ਼ਕੇ ਆਰੋਚਿਤਂ, ਤਸ੍ਸ ਅਨਾਰੋਚੇਤ੍ਵਾਪਿ ਨਿਕ੍ਖਿਪਿਤਬ੍ਬਨ੍ਤਿ ਦਸ੍ਸੇਤਿ. ਆਰੋਚੇਨ੍ਤੇਨ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ.

ਵਿਸਭਾਗੇਹਿ ਸਹ ਵਸਨ੍ਤਸ੍ਸ ਵਤ੍ਤਸ੍ਸ ਦੁਪ੍ਪੂਰਿਤਤ੍ਤਾ ਵੁਤ੍ਤਂ’’ਸਭਾਗਾ ਭਿਕ੍ਖੂ ਵਸਨ੍ਤੀ’’ਤਿ. ਚਤੂਹਿ, ਪਞ੍ਚਹਿ ਵਾਤਿ ਵਾਸਦ੍ਦੇਨ ਤਤੋ ਅਤਿਰੇਕਮ੍ਪਿ ਸਙ੍ਗਣ੍ਹਾਤਿ. ਪਰਿਕ੍ਖੇਪਾਰਹਟ੍ਠਾਨਤੋਤਿ ਚੀਵਰਕ੍ਖਨ੍ਧਕੇ (ਮਹਾਵ. ਅਟ੍ਠ. ੩੭੯) ਵੁਤ੍ਤਪਰਿਕ੍ਖੇਪਾਰਹਟ੍ਠਾਨਤੋ. ‘‘ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਪਹਾਨਤ੍ਥਂ ਵੁਤ੍ਤਂ. ਸਚੇ ਸਵਨੂਪਚਾਰਤੋ ਨ ਮੁਚ੍ਚਤਿ, ਤਤੋ ਅਤਿਰੇਕਮ੍ਪਿ ਅਤਿਕ੍ਕਮਿਤਬ੍ਬਂ. ਓਕ੍ਕਮ੍ਮਾਤਿ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਵਚਨਸਦ੍ਦਸਵਨੂਪਚਾਰਪਹਾਨਤ੍ਥਂ ਓਕ੍ਕਮਿਤ੍ਵਾ. ‘‘ਗੁਮ੍ਬੇਨ ਵਾ ਵਤਿਯਾ ਵਾ’’ਤਿ ਦਸ੍ਸਨੂਪਚਾਰਪਹਾਨਤ੍ਥਂ ਵੁਤ੍ਤਂ. ਇਧ ਉਪਚਾਰੋ ਨਾਮ ਯਤ੍ਥ ਠਤ੍ਵਾ ਪਸ੍ਸਤਿ ਸੁਣਾਤਿ, ਸੋਯੇਵ ਦੇਸੋ. ਅਞ੍ਞੋਤਿ ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਅਞ੍ਞੋ. ਏਸਾਤਿ ਏਸੋ ਮਾਨਤ੍ਤਚਾਰਿਕੋ.

‘‘ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ’’ਤਿ ਇਮਿਨਾ ਅਨੋਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਨਤ੍ਥਿ ਰਤ੍ਤਿਚ੍ਛੇਦੋਪੀਤਿ ਦਸ੍ਸੇਤਿ. ਏਤ੍ਥ ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਦ੍ਵਾਦਸਹਤ੍ਥੂਪਚਾਰਤੋ ਬਹਿ ਠਿਤਾਨਮ੍ਪਿ ਆਰੋਚੇਤਬ੍ਬਂ. ਅਦਿਟ੍ਠਾਸੁਤਾਨਮ੍ਪਿ ਅਨ੍ਤੋ ਦ੍ਵਾਦਸਹਤ੍ਥੂਪਚਾਰਗਤਾਨਂ ਆਰੋਚੇਤਬ੍ਬਨ੍ਤਿ ਦਟ੍ਠਬ੍ਬਂ. ਸਤਿ ਕਰਣੀਯੇਤਿ ਇਦਂ ਗਨ੍ਤੁਸ੍ਸ ਕਾਰਣਦਸ੍ਸਨਤ੍ਥਂ ਵੁਤ੍ਤਂ. ਅਸਤਿ ਕਰਣੀਯੇਪਿ ਗਨ੍ਤੁਂ ਵਟ੍ਟਤਿ. ਸੋਪੀਤਿ ਏਕੋ ਭਿਕ੍ਖੁਪਿ. ‘‘ਤਸ੍ਸ ਸਨ੍ਤਿਕੇ ਆਰੋਚੇਤ੍ਵਾ’’ਤਿ ਇਮਿਨਾ ਅਨਾਰੋਚਨੇ ਵਤ੍ਤਭੇਦਦੁਕ੍ਕਟਂ ਹੋਤੀਤਿ ਦਸ੍ਸੇਤਿ. ਏਕਸ੍ਸ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਯਮਾਨੇ ਕਿਂ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤੀਤਿ ਆਹ ‘‘ਅਯਞ੍ਚਾ’’ਤਿਆਦਿ. ਤਤ੍ਥ ਅਯਞ੍ਚਾਤਿ ਮਾਨਤ੍ਤਚਾਰਿਕੋ ਪਨ. ਯਸ੍ਮਾ ਕਾਰਣਾ ਵਸਿ, ਤੇਨ ਕਾਰਣੇਨਾਤਿ ਯੋਜਨਾ. ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਪਕਤਤ੍ਤਾਗਤਕਾਲੇ ਤਸ੍ਸ ਅਨਾਰੋਚੇਤ੍ਵਾਵ ਗਚ੍ਛਨ੍ਤਿ, ਤਸ੍ਮਾ ਭਿਕ੍ਖੂਨਞ੍ਚ ਦ੍ਵਾਦਸਹਤ੍ਥੂਪਚਾਰੇ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਏਤ੍ਥ ਚ ‘‘ਗਣਸ੍ਸ ਆਰੋਚੇਤ੍ਵਾ’’ਤਿ ਇਮਿਨਾ ਊਨੇ ਗਣੇ ਚਰਣਦੋਸਾਭਾਵਂ ਦਸ੍ਸੇਤਿ. ‘‘ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ’’ਤਿ ਇਮਿਨਾ ਵਿਪ੍ਪਵਾਸਦੋਸਾਭਾਵਂ ਦਸ੍ਸੇਤਿ. ਯਨ੍ਤਿ ਪੁਬ੍ਬੇ ਅਨਾਰੋਚਿਤਂ ਯਂ ਭਿਕ੍ਖੁਂ. ਅਯਨ੍ਤਿ ਪਠਮਂ ਪਸ੍ਸਿਤਬ੍ਬਸ੍ਸ ਆਰੋਚੇਤ੍ਵਾ ਨਿਕ੍ਖਿਪਨਂ. ‘‘ਨਿਕ੍ਖਿਤ੍ਤਵਤ੍ਤਸ੍ਸ ਪਰਿਹਾਰੋ’’ਤਿ ਇਮਿਨਾ ਅਨਿਕ੍ਖਿਤ੍ਤਵਤ੍ਤੇ ਅਨ੍ਤੋਉਪਚਾਰਗਤਾਨਂ ਸਬ੍ਬੇਸਂ ਆਰੋਚੇਤਬ੍ਬਨ੍ਤਿ ਦਸ੍ਸੇਤਿ.

ਅਯਨ੍ਤਿ ਮਾਨਤ੍ਤਚਾਰਿਕੋ, ਠਿਤੋਤਿ ਸਮ੍ਬਨ੍ਧੋ. ਤੇਨਾਪੀਤਿ ਮਾਨਤ੍ਤਚਾਰਿਕੇਨਪਿ, ਯਾਚਿਤਬ੍ਬਨ੍ਤਿ ਯੋਜਨਾ. ਸੋਤਿ ਅਨਿਕ੍ਖਿਤ੍ਤਵਤ੍ਤੋ ਭਿਕ੍ਖੁ. ਤਤ੍ਰਾਤਿ ‘‘ਸੋ ਅਬ੍ਭੇਤਬ੍ਬੋ’’ਤਿ ਵਚਨੇ. ਅਯਂ ਅਬ੍ਭਾਨਵਿਧਿ ਵੁਤ੍ਤੋਤਿ ਯੋਜਨਾ. ਅਯਞ੍ਚਾਤਿ ਅਬ੍ਭਾਨਵਿਧਿ ਚ. ਤਾਸਨ੍ਤਿ ਆਪਤ੍ਤੀਨਂ. ਏਵਨ੍ਤਿਆਦਿ ਨਿਗਮਨਂ. ਪਟਿਚ੍ਛਨ੍ਨਮਾਨਤ੍ਤਂ ਪਨ ਦਾਤਬ੍ਬਂ ਹੋਤੀਤਿ ਸਮ੍ਬਨ੍ਧੋ. ‘‘ਪਟਿਚ੍ਛਨ੍ਨਾਯਾ’’ਤਿਆਦਿਨਾ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬਂ ਮਾਨਤ੍ਤਂ ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਨਨ੍ਤਿ ਪਟਿਚ੍ਛਨ੍ਨਮਾਨਤ੍ਤਂ.