੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਂ

੭੦੫. ਛਟ੍ਠੇ ਯਤੋ ਤ੍ਵਨ੍ਤਿ ਏਤ੍ਥ ਕਾਰਣਤ੍ਥੇ ਤੋਪਚ੍ਚਯੋਤਿ ਆਹ ‘‘ਯਸ੍ਮਾ’’ਤਿ. ਕਸ੍ਸਾ ਹੋਨ੍ਤੀਤਿ ਉਯ੍ਯੋਜਿਕਾਉਯ੍ਯੋਜਿਤਾਸੁ ਕਸ੍ਸਾ ਭਿਕ੍ਖੁਨਿਯਾ ਹੋਨ੍ਤੀਤਿ ਯੋਜਨਾ. ਨ ਦੇਤੀਤਿ ਉਯ੍ਯੋਜਿਕਾ ਉਯ੍ਯੋਜਿਤਾਯ ਨ ਦੇਤਿ. ਨ ਪਟਿਗ੍ਗਣ੍ਹਾਤੀਤਿ ਉਯ੍ਯੋਜਿਤਾ ਉਯ੍ਯੋਜਿਕਾਯ ਹਤ੍ਥਤੋ ਨ ਪਟਿਗ੍ਗਣ੍ਹਾਤਿ. ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ਕਾਰਣੇਨ ਉਯ੍ਯੋਜਿਕਾਯ ਹਤ੍ਥਤੋ ਉਯ੍ਯੋਜਿਤਾਯ ਪਟਿਗ੍ਗਹੋ ਨ ਵਿਜ੍ਜਤਿ. ਆਪਜ੍ਜਤਿ ਗਰੁਕਂ, ਨ ਲਹੁਕਨ੍ਤਿ ਏਵਂ ਸਨ੍ਤੇਪਿ ਉਯ੍ਯੋਜਿਕਾ ਗਰੁਕਮੇਵ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਤਿ, ਨ ਲਹੁਕਂ. ਤਞ੍ਚਾਤਿ ਤਂ ਆਪਜ੍ਜਨਞ੍ਚ. ਪਰਿਭੋਗਪਚ੍ਚਯਾਤਿ ਉਯ੍ਯੋਜਿਕਾਯ ਪਰਿਭੋਗਸਙ੍ਖਾਤਾ ਕਾਰਣਾਤਿ ਅਯਂ ਗਾਥਾਯਤ੍ਥੋ.

ਇਤਰਿਸ੍ਸਾ ਪਨਾਤਿ ਉਯ੍ਯੋਜਿਤਾਯ ਪਨ ਭਿਕ੍ਖੁਨਿਯਾ. ਪਠਮਸਿਕ੍ਖਾਪਦੇਤਿ ਪਞ੍ਚਮਸਿਕ੍ਖਾਪਦੇ. ਪਞ੍ਚਮਸਿਕ੍ਖਾਪਦਞ੍ਹਿ ਇਮਿਨਾ ਸਿਕ੍ਖਾਪਦੇਨ ਯੁਗਲ਼ਭਾਵੇਨ ਸਦਿਸਤ੍ਤਾ ਇਮਂ ਉਪਾਦਾਯ ਪਠਮਨ੍ਤਿ ਵੁਤ੍ਤਨ੍ਤਿ. ਛਟ੍ਠਂ.