੨. ਸਙ੍ਘਾਦਿਸੇਸਕਣ੍ਡਂ

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦ-ਅਤ੍ਥਯੋਜਨਾ

ਪਾਰਾਜਿਕਾਨਨ੍ਤਰਸ੍ਸਾਤਿ ਪਾਰਾਜਿਕਾਨਂ ਅਨਨ੍ਤਰੇ ਠਪਿਤਸ੍ਸ, ਸਙ੍ਗੀਤਸ੍ਸ ਵਾ, ਸਙ੍ਘਾਦਿਸੇਸਕਣ੍ਡਸ੍ਸਾਤਿ ਸਮ੍ਬਨ੍ਧੋ. ਅਯਂ ਈਦਿਸਾ ਅਨੁਤ੍ਤਾਨਤ੍ਥਵਣ੍ਣਨਾ ਅਨੁਤ੍ਤਾਨਾਨਂ ਪਦਾਨਂ ਅਤ੍ਥਸ੍ਸ ਵਣ੍ਣਨਾ ਦਾਨਿ ਇਮਸ੍ਮਿਂਕਾਲੇ ਭਵਿਸ੍ਸਤੀਤਿ ਯੋਜਨਾ.

੬੭੮. ਪਠਮੇ ਉਦਕਂ ਵਸਿਤਂ ਅਚ੍ਛਾਦਨਂ ਅਨੇਨ ਕਤਨ੍ਤਿ ਉਦੋਸਿਤੋਤਿ ਵਚਨਤ੍ਥੇਨ ਭਣ੍ਡਸਾਲਾ ਉਦੋਸਿਤਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਉਦੋਸਿਤਨ੍ਤਿ ਭਣ੍ਡਸਾਲਾ’’ਤਿ. ਏਤ੍ਥ ਹਿ ਉਦਸਦ੍ਦੋ ਉਦਕਪਰਿਯਾਯੋ. ਸਂਯੋਗੋ ਨ ਯੁਤ੍ਤੋਯੇਵ. ਭਣ੍ਡਸਾਲਾਤਿ ਯਾਨਾਦੀਨਂ ਭਣ੍ਡਾਨਂ ਠਪਨਸਾਲਾ. ਅਚ੍ਚਾਵਦਥਾਤਿ ਏਤ੍ਥ ਅਤੀਤ੍ਯੂਪਸਗ੍ਗੋ ਅਤਿਕ੍ਕਮਨਤ੍ਥੋ, ਆਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋਤਿ ਆਹ ‘‘ਅਤਿਕ੍ਕਮਿਤ੍ਵਾ ਵਦਥਾ’’ਤਿ.

੬੭੯. ਉਸ੍ਸਯਵਸੇਨ ਵਦਨਂ ਉਸ੍ਸਯਵਾਦੋ, ਸੋਯੇਵ ਉਸ੍ਸਯਵਾਦਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਸ੍ਸਯਵਾਦਿਕਾ’’ਤਿਆਦਿ. ‘‘ਮਾਨੁਸ੍ਸਯਵਸੇਨ ਕੋਧੁਸ੍ਸਯਵਸੇਨਾ’’ਤਿ ਇਮਿਨਾ ਉਸ੍ਸਯਭੇਦਂ ਦਸ੍ਸੇਤਿ. ਸਾਤਿ ਉਸ੍ਸਯਵਾਦਿਕਾ. ਅਤ੍ਥਤੋਤਿ ਸਰੂਪਤੋ. ਏਤ੍ਥਾਤਿ ਪਦਭਾਜਨੇ. ਅਡ੍ਡਨਂ ਅਭਿਯੁਞ੍ਜਨਂ ਅਡ੍ਡੋਤਿ ਕਤ੍ਵਾ ਦ੍ਵਿਨ੍ਨਂ ਜਨਾਨਂ ਅਡ੍ਡੋ ਵੋਹਾਰਿਕਾਨਂ ਵਿਨਿਚ੍ਛਯਕਾਰਣਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਅਡ੍ਡੋਤਿ ਵੋਹਾਰਿਕਵਿਨਿਚ੍ਛਯੋ ਵੁਚ੍ਚਤੀ’’ਤਿ, ਮੁਦ੍ਧਜਤਤਿਯਕ੍ਖਰੋਯੇਵ. ਯਨ੍ਤਿ ਅਡ੍ਡਂ. ਯਤ੍ਥਾਤਿ ਯਸ੍ਮਿਂ ਕਿਸ੍ਮਿਂਚਿ ਠਾਨੇ. ਦ੍ਵਿਨ੍ਨਂ ਅਡ੍ਡਕਾਰਕਾਨਂ ਵੋਹਾਰਂ ਜਾਨਨ੍ਤੀਤਿ ਵੋਹਾਰਿਕਾ, ਅਕ੍ਖਦਸ੍ਸਾ, ਤੇਸਂ. ਦ੍ਵੀਸੁ ਜਨੇਸੂਤਿ ਅਡ੍ਡਕਾਰਕੇਸੁ ਜਨੇਸੁ ਦ੍ਵੀਸੁ. ਯੋ ਕੋਚੀਤਿ ਅਡ੍ਡਕਾਰਕੋ ਵਾ ਅਞ੍ਞੋ ਵਾ ਯੋ ਕੋਚਿ.

ਏਤ੍ਥਾਤਿ ‘‘ਏਕਸ੍ਸ ਆਰੋਚੇਤੀ’’ਤਿਆਦਿਵਚਨੇ. ਯਤ੍ਥ ਕਤ੍ਥਚੀਤਿ ਯਂਕਿਞ੍ਚਿ ਠਾਨਂ ਆਗਤੇਪੀਤਿ ਸਮ੍ਬਨ੍ਧੋ. ਅਥਾਤਿ ਪਚ੍ਛਾ. ਸਾਤਿ ਭਿਕ੍ਖੁਨੀ. ਸੋਤਿ ਉਪਾਸਕੋ.

‘‘ਕਪ੍ਪਿਯਕਾਰਕੇਨਾ’’ਤਿਪਦਂ ‘‘ਕਥਾਪੇਤੀ’’ਤਿਪਦੇ ਕਾਰਿਤਕਮ੍ਮਂ. ਤਤ੍ਥਾਤਿ ਕਪ੍ਪਿਯਕਾਰਕਇਤਰੇਸੁ. ਵੋਹਾਰਿਕੇਹਿ ਕਤੇਤਿ ਸਮ੍ਬਨ੍ਧੋ. ਗਤਿਗਤਨ੍ਤਿ ਚਿਰਕਾਲਪਤ੍ਤਂ. ਸੁਤਪੁਬ੍ਬਨ੍ਤਿ ਪੁਬ੍ਬੇ ਸੁਤਂ. ਅਥਾਤਿ ਸੁਤਪੁਬ੍ਬਤ੍ਤਾ ਏਵ. ਤੇਤਿ ਵੋਹਾਰਿਕਾ, ਦੇਨ੍ਤੀਤਿ ਸਮ੍ਬਨ੍ਧੋ.

ਪਠਮਨ੍ਤਿ ਸਮਨੁਭਾਸਨਤੋ ਪੁਬ੍ਬਂ. ਆਪਤ੍ਤੀਤਿ ਆਪਜ੍ਜਨਂ. ਏਤਸ੍ਸਾਤਿ ਸਙ੍ਘਾਦਿਸੇਸਸ੍ਸ. ਅਯਂ ਹੀਤਿ ਅਯਂ ਏਵ, ਵਕ੍ਖਮਾਨੋ ਏਵਾਤਿ ਅਤ੍ਥੋ. ਏਤ੍ਥਾਤਿ ਪਦਭਾਜਨੇ. ਸਹ ਵਤ੍ਥੁਜ੍ਝਾਚਾਰਾਤਿ ਵਤ੍ਥੁਜ੍ਝਾਚਾਰੇਨ ਸਹ, ਵਾਕ੍ਯਮੇਵ, ਨ ਸਮਾਸੋ. ਵਤ੍ਥੁਜ੍ਝਾਚਾਰਾਤਿ ਕਰਣਤ੍ਥੇ ਨਿਸ੍ਸਕ੍ਕਵਚਨਂ ਦਟ੍ਠਬ੍ਬਂ. ਤੇਨ ਵੁਤ੍ਤਂ ‘‘ਸਹ ਵਤ੍ਥੁਜ੍ਝਾਚਾਰੇਨਾ’’ਤਿ. ਭਿਕ੍ਖੁਨਿਨ੍ਤਿ ਆਪਤ੍ਤਿਮਾਪਨ੍ਨਂ ਭਿਕ੍ਖੁਨਿਂ. ਸਙ੍ਘਤੋਤਿ ਭਿਕ੍ਖੁਨਿਸਙ੍ਘਮ੍ਹਾ. ਅਨੀਯਸਦ੍ਦੋ ਹੇਤੁਕਤ੍ਤਾਭਿਧਾਯਕੋਤਿ ਆਹ ‘‘ਨਿਸ੍ਸਾਰੇਤੀਤਿ ਨਿਸ੍ਸਾਰਣੀਯੋ’’ਤਿ. ਭਿਕ੍ਖੁਨਿਸਙ੍ਘਤੋ ਨਿਸ੍ਸਰਤਿ, ਨਿਸ੍ਸਾਰਿਯਤਿ ਵਾ ਅਨੇਨਾਤਿ ਨਿਸ੍ਸਾਰਣੀਯੋਤਿ ਕਰਣਤ੍ਥੋਪਿ ਯੁਤ੍ਤੋਯੇਵ. ਤਤ੍ਥਾਤਿ ਪਦਭਾਜਨੇ. ਯਨ੍ਤਿ ਸਙ੍ਘਾਦਿਸੇਸਂ. ਸੋਤਿ ਸਙ੍ਘਾਦਿਸੇਸੋ. ਪਦਭਾਜਨਸ੍ਸ ਅਤ੍ਥੋ ਕਾਰਣੋਪਚਾਰੇਨ ਦਟ੍ਠਬ੍ਬੋ. ਹੀਤਿ ਸਚ੍ਚਂ. ਕੇਨਚੀਤਿ ਪੁਗ੍ਗਲੇਨ, ਨ ਨਿਸ੍ਸਾਰੀਯਤੀਤਿ ਸਮ੍ਬਨ੍ਧੋ. ਤੇਨ ਧਮ੍ਮੇਨ ਕਰਣਭੂਤੇਨ, ਹੇਤੁਭੂਤੇਨ ਵਾ. ਸੋਤਿ ਧਮ੍ਮੋ.

ਅਡ੍ਡਕਾਰਕਮਨੁਸ੍ਸੇਹਿ ਵੁਚ੍ਚਮਾਨਾਤਿ ਯੋਜਨਾ. ਸਯਨ੍ਤਿ ਸਾਮਂ. ਤਤੋਤਿ ਗਮਨਤੋ, ਪਰਨ੍ਤਿ ਸਮ੍ਬਨ੍ਧੋ. ਭਿਕ੍ਖੁਨਿਯਾ ਵਾ ਕਤਂ ਆਰੋਚੇਤੂਤਿ ਯੋਜਨਾ.

ਧਮ੍ਮਿਕਨ੍ਤਿ ਧਮ੍ਮੇਨ ਸਭਾਵੇਨ ਯੁਤ੍ਤਂ. ਯਥਾਤਿ ਯੇਨਾਕਾਰੇਨ. ਤਨ੍ਤਿ ਆਕਾਰਂ. ਤਤ੍ਥਾਤਿ ‘‘ਅਨੋਦਿਸ੍ਸ ਆਚਿਕ੍ਖਤੀ’’ਤਿ ਵਚਨੇ.

ਧੁਤ੍ਤਾਦਯੋਤਿ ਆਦਿਸਦ੍ਦੇਨ ਚੋਰਾਦਯੋ ਸਙ੍ਗਣ੍ਹਾਤਿ. ਸਾਤਿ ਆਚਿਕ੍ਖਨਾ. ਤਨ੍ਤਿ ਆਚਿਕ੍ਖਨਂ. ਤੇਸਨ੍ਤਿ ਗਾਮਦਾਰਕਾਦੀਨਂ. ਦਣ੍ਡਨ੍ਤਿ ਧਨਦਣ੍ਡਂ. ਗੀਵਾ ਹੋਤੀਤਿ ਇਣਂ ਹੋਤਿ. ਅਧਿਪ੍ਪਾਯੇ ਸਤਿਪੀਤਿ ਯੋਜਨਾ. ਤਸ੍ਸਾਤਿ ਅਨਾਚਾਰਂ ਚਰਨ੍ਤਸ੍ਸ.

ਕੇਵਲਂ ਹੀਤਿ ਕੇਵਲਮੇਵ. ਤਨ੍ਤਿ ਰਕ੍ਖਂ. ਕਾਰਕੇਤਿ ਅਨਾਚਾਰਸ੍ਸ ਕਾਰਕੇ. ਤੇਸ+?ਨ੍ਤਿ ਕਾਰਕਾਨਂ.

ਤੇਸਨ੍ਤਿ ਹਰਨ੍ਤਾਨਂ. ‘‘ਅਨਤ੍ਥਕਾਮਤਾਯਾ’’ਤਿ ਇਮਿਨਾ ਭਯਾਦਿਨਾ ਵੁਤ੍ਤੇ ਨਤ੍ਥਿ ਦੋਸੋਤਿ ਦਸ੍ਸੇਤਿ. ਹੀਤਿ ਲਦ੍ਧਦੋਸਜੋਤਕੋ. ਅਤ੍ਤਨੋ ਵਚਨਕਰਂ…ਪੇ… ਵਤ੍ਤੁਂ ਵਟ੍ਟਤੀਤਿ ਅਤ੍ਤਨੋ ਵਚਨਂ ਆਦਿਯਿਸ੍ਸਤੀਤਿ ਵੁਤ੍ਤੇ ਵਚਨਂ ਅਨਾਦਿਯਿਤ੍ਵਾ ਦਣ੍ਡੇ ਗਹਿਤੇਪਿ ਨਤ੍ਥਿ ਦੋਸੋ ਦਣ੍ਡਗਹਣਸ੍ਸ ਪਟਿਕ੍ਖਿਤ੍ਤਤ੍ਤਾ. ਦਾਸਦਾਸੀਵਾਪਿਆਦੀਨਨ੍ਤਿ ਆਦਿਸਦ੍ਦੇਨ ਖੇਤ੍ਤਾਦਯੋ ਸਙ੍ਗਯ੍ਹਨ੍ਤਿ.

ਵੁਤ੍ਤਨਯੇਨੇਵਾਤਿ ਅਤੀਤਂ ਆਰਬ੍ਭ ਆਚਿਕ੍ਖਨੇ ਵੁਤ੍ਤਨਯੇਨ ਏਵ. ‘‘ਆਯਤਿਂ ਅਕਰਣਤ੍ਥਾਯਾ’’ਤਿ ਇਮਿਨਾ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਂ ਦਸ੍ਸੇਤਿ. ‘‘ਕੇਨ ਏਵਂ ਕਤ’’ਨ੍ਤਿ ਪੁਚ੍ਛਾਯ ਅਤੀਤੇ ਕਤਪੁਬ੍ਬਂ ਪੁਚ੍ਛਤਿ. ਸਾਪੀਤਿ ਪਿਸਦ੍ਦੋ ਵੁਤ੍ਤਸਮ੍ਪਿਣ੍ਡਨਤ੍ਥੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਵੋਹਾਰਿਕਾ ਦਣ੍ਡੇਨ੍ਤੀਤਿ ਸਮ੍ਬਨ੍ਧੋ. ਦਣ੍ਡੇਨ੍ਤੀਤਿ ਵਧਦਣ੍ਡੇਨ ਚ ਧਨਦਣ੍ਡੇਨ ਚ ਆਣਂ ਕਰੋਨ੍ਤਿ.

ਯੋ ਚਾਯਨ੍ਤਿ ਯੋ ਚ ਅਯਂ. ਭਿਕ੍ਖੁਨੀਨਂ ਯੋ ਅਯਂ ਨਯੋ ਵੁਤ੍ਤੋ, ਏਸੇਵ ਨਯੋ ਭਿਕ੍ਖੂਨਮ੍ਪਿ ਨਯੋਤਿ ਯੋਜਨਾ. ‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਮੇਵ ਵਿਤ੍ਥਾਰੇਨ੍ਤੋ ਆਹ ‘‘ਭਿਕ੍ਖੁਨੋਪਿ ਹੀ’’ਤਿਆਦਿ. ‘‘ਤਥਾ’’ਤਿਇਮਿਨਾ ‘‘ਓਦਿਸ੍ਸਾ’’ਤਿਪਦਂ ਅਤਿਦਿਸਤਿ. ਤੇ ਚਾਤਿ ਤੇ ਚ ਵੋਹਾਰਿਕਾ. ਹੀਤਿ ਸਚ੍ਚਂ, ਯਸ੍ਮਾ ਵਾਤਿ. ਪਠਮਂ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਂ

੬੮੨. ਦੁਤਿਯੇ ਵਰਿਤਬ੍ਬਂ ਇਚ੍ਛਿਤਬ੍ਬਨ੍ਤਿ ਵਰਂ, ਤਮੇਵ ਭਣ੍ਡਨ੍ਤਿ ਵਰਭਣ੍ਡਨ੍ਤਿ ਦਸ੍ਸੇਨ੍ਤੋ ਆਹ ‘‘ਮਹਗ੍ਘਭਣ੍ਡ’’ਨ੍ਤਿ. ‘‘ਮੁਤ੍ਤਾ’’ਤਿਆਦਿਨਾ ਤਸ੍ਸ ਸਰੂਪਂ ਦਸ੍ਸੇਤਿ.

੬੮੩. ਆਪੁਬ੍ਬੋ ਲੋਕਸਦ੍ਦੋ ਅਭਿਮੁਖਂ ਲੋਕਨਤ੍ਥੋ ਹੋਤਿ, ਉਪੁਬ੍ਬੋ ਉਦ੍ਧਂ ਲੋਕਨਤ੍ਥੋ, ਓਪੁਬ੍ਬੋ ਅਧੋ ਲੋਕਨਤ੍ਥੋ, ਵਿਪੁਬ੍ਬੋ ਇਤੋ ਚਿਤੋ ਚ ਵੀਤਿਹਰਣਲੋਕਨਤ੍ਥੋ, ਅਪਪੁਬ੍ਬੋ ਆਪੁਚ੍ਛਨਤ੍ਥੋ. ਇਧ ਪਨ ਅਪਪੁਬ੍ਬਤ੍ਤਾ ਆਪੁਚ੍ਛਨਤ੍ਥੋਤਿ ਆਹ ‘‘ਅਨਾਪੁਚ੍ਛਿਤ੍ਵਾ’’ਤਿ. ਮਲ੍ਲਗਣ ਭਟਿਪੁਤ੍ਤ ਗਣਾਦਿਕਨ੍ਤਿਆਦੀਸੁ ਮਲ੍ਲਗਣੋ ਨਾਮ ਨਾਰਾਯਨਭਤ੍ਤਿਕੋ ਗਣੋ. ਭਟਿਪੁਤ੍ਤਗਣੋ ਨਾਮ ਕੁਮਾਰਭਤ੍ਤਿਕੋ ਗਣੋ. ਆਦਿਸਦ੍ਦੇਨ ਅਞ੍ਞਮ੍ਪਿ ਗਾਮਨਿਗਮੇ ਅਨੁਸਾਸਿਤੁਂ ਸਮਤ੍ਥਂ ਗਣਂ ਸਙ੍ਗਣ੍ਹਾਤਿ. ਅਥ ਵਾ ਮਲ੍ਲਗਣੋਤਿ ਮਲ੍ਲਰਾਜੂਨਂ ਗਣੋ. ਤੇ ਹਿ ਗਣਂ ਕਤ੍ਵਾ ਕੁਸਿਨਾਰਾਯਂ ਰਜ੍ਜਂ ਅਨੁਸਾਸਨ੍ਤਿ, ਤੇ ਸਨ੍ਧਾਯ ਵੁਤ੍ਤਂ ‘‘ਮਲ੍ਲਗਣੋ’’ਤਿ. ਭਟਿਪੁਤ੍ਤਗਣੋਤਿ ਲਿਚ੍ਛਵਿਗਣੋ ਪਰਿਯਾਯਨ੍ਤਰੇਨ ਵੁਤ੍ਤੋ. ਲਿਚ੍ਛਵਿਰਾਜੂਨਞ੍ਹਿ ਪੁਬ੍ਬਰਾਜਾਨੋ ਭਟਿਨਾਮਕਸ੍ਸ ਜਟਿਲਸ੍ਸ ਪੁਤ੍ਤਾ ਹੋਨ੍ਤਿ, ਤੇਸਂ ਵਂਸੇ ਪਵਤ੍ਤਾ ਏਤਰਹਿ ਲਿਚ੍ਛਵਿਰਾਜਾਨੋਪਿ ਭਟਿਪੁਤ੍ਤਾਤਿ ਵੁਚ੍ਚਨ੍ਤਿ. ਜਟਿਲੋ ਪਨ ਬਾਰਾਣਸਿਰਞ੍ਞੋ ਪੁਤ੍ਤੇ ਨਦਿਸੋਤੇਨ ਵੁਯ੍ਹਮਾਨੇ ਨਦਿਤੋ ਉਦ੍ਧਰਿਤ੍ਵਾ ਅਤ੍ਤਨੋ ਅਸ੍ਸਮੇ ਪੁਤ੍ਤਂ ਕਤ੍ਵਾ ਭਰਣਤ੍ਤਾ ਪੋਸਨਤ੍ਤਾ ਭਟੀਤਿ ਵੁਚ੍ਚਤਿ, ਤਸ੍ਸ ਪੁਤ੍ਤਤ੍ਤਾ ਲਿਚ੍ਛਵਿਗਣੋ ਭਟਿਪੁਤ੍ਤੋਤਿ ਵੁਚ੍ਚਤਿ. ਤੇਪਿ ਗਣਂ ਕਤ੍ਵਾ ਵੇਸਾਲਿਯਂ ਰਜ੍ਜਂ ਅਨੁਸਾਸਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਭਟਿਪੁਤ੍ਤਗਣੋ’’ਤਿ. ਧਮ੍ਮਗਣੋ ਨਾਮ ਸਾਸਨਧਮ੍ਮਭਤ੍ਤਿਕੋ ਗਣੋ. ਗਨ੍ਧਿਕਸੇਣੀਤਿ ਗਨ੍ਧਕਾਰਾਨਂ ਸਮਜਾਤਿਕਾਨਂ ਸਿਪ੍ਪਿਕਾਨਂ ਗਣੋ. ਦੁਸ੍ਸਿਕਸੇਣੀਤਿ ਦੁਸ੍ਸਕਾਰਾਨਂ ਸਮਜਾਤਿਕਾਨਂ ਪੇਸਕਾਰਾਨਂ ਗਣੋ. ਆਦਿਸਦ੍ਦੇਨ ਤਚ੍ਛਕਸੇਣਿਰਜਕਸੇਣਿਆਦਯੋ ਸਙ੍ਗਯ੍ਹਨ੍ਤਿ. ਯਤ੍ਥ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਠਾਨੇ. ਹੀਤਿ ਸਚ੍ਚਂ. ਤੇ ਏਵਾਤਿ ਗਣਾਦਯੋ ਏਵ. ਪੁਨ ਤੇਤਿ ਗਣਾਦਯੋ. ਇਦਨ੍ਤਿ ‘‘ਗਣਂ ਵਾ’’ਤਿਆਦਿਵਚਨਂ. ਏਤ੍ਥਾਤਿ ਰਾਜਾਦੀਸੁ. ਸਙ੍ਘਾਪੁਚ੍ਛਨਮੇਵ ਪਧਾਨਕਾਰਣਨ੍ਤਿ ਆਹ ‘‘ਭਿਕ੍ਖੁਨਿਸਙ੍ਘੋ ਆਪੁਚ੍ਛਿਤਬ੍ਬੋਵਾ’’ਤਿ. ਕਪ੍ਪਗਤਿਕਨ੍ਤਿ ਕਪ੍ਪਂ ਗਚ੍ਛਤੀਤਿ ਕਪ੍ਪਗਤਾ, ਸਾ ਏਵ ਕਪ੍ਪਗਤਿਕਾ, ਤਂ.

ਕੇਨਚਿ ਕਰਣੀਯੇਨ ਖਣ੍ਡਸੀਮਂ ਅਗਨ੍ਤ੍ਵਾ ਕੇਨਚਿ ਕਰਣੀਯੇਨ ਭਿਕ੍ਖੁਨੀਸੁ ਪਕ੍ਕਨ੍ਤਾਸੂਤਿ ਯੋਜਨਾ. ਨਿਸ੍ਸਿਤਕਪਰਿਸਾਯਾਤਿ ਅਨ੍ਤੇਵਾਸਿਕਪਰਿਸਾਯ. ਵੁਟ੍ਠਾਪੇਨ੍ਤਿਯਾਤਿ ਉਪਸਮ੍ਪਾਦੇਨ੍ਤਿਯਾਤਿ. ਦੁਤਿਯਂ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਂ

੬੯੨. ਤਤਿਯੇ ਦੁਤਿਯੇਨ ਪਾਦੇਨ ਅਤਿਕ੍ਕਨ੍ਤਮਤ੍ਤੇਤਿ ਸਮ੍ਬਨ੍ਧੋ. ਪਰਿਕ੍ਖੇਪਾਰਹਟ੍ਠਾਨਂ ਨਾਮ ਘਰੂਪਚਾਰਤੋ ਪਠਮਲੇਡ੍ਡੁਪਾਤੋ. ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ਆਹ ‘‘ਅਪਿ ਚੇਤ੍ਥਾ’’ਤਿਆਦਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਉਪਚਾਰੇ ਵਾਤਿ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਾਰਹਟ੍ਠਾਨੇ ਵਾ. ਤਤੋਤਿ ਗਾਮਨ੍ਤਰਤੋ, ਖਣ੍ਡਪਾਕਾਰੇਨ ਵਾ ਵਤਿਛਿਦ੍ਦੇਨ ਵਾ ਪਵਿਸਿਤੁਨ੍ਤਿ ਸਮ੍ਬਨ੍ਧੋ.

ਸਮ੍ਬਦ੍ਧਾ ਵਤਿ ਏਤੇਸਨ੍ਤਿ ਸਮ੍ਬਦ੍ਧਵਤਿਕਾ, ਦ੍ਵੇ ਗਾਮਾ. ਵਿਹਾਰਨ੍ਤਿ ਭਿਕ੍ਖੁਨਿਵਿਹਾਰਂ. ਤਤੋ ਪਨ ਗਾਮਤੋਤਿ ਤਤੋ ਇਤਰਗਾਮਤੋ ਪਨ, ਨਿਕ੍ਖਨ੍ਤਾਯ ਭਿਕ੍ਖੁਨਿਯਾ ਠਾਤਬ੍ਬਨ੍ਤਿ ਸਮ੍ਬਨ੍ਧੋ. ਉਸ੍ਸਾਰਣਾ ਵਾਤਿ ਮਨੁਸ੍ਸਾਨਂ ਉਸ੍ਸਾਰਣਾ ਵਾ.

ਜਨਾਤਿ ਗਾਮਭੋਜਕਾ ਜਨਾ. ਏਕਂ ਗਾਮਨ੍ਤਿ ਯਂਕਿਞ੍ਚਿ ਇਚ੍ਛਿਤਂ ਏਕਂ ਗਾਮਂ. ਤਤੋਤਿ ਗਾਮਤੋ. ‘‘ਕਸ੍ਮਾ’’ਤਿ ਇਮਾਯ ਪੁਚ੍ਛਾਯ ‘‘ਵਿਹਰਤੋ ਏਕਂ ਗਾਮਂ ਗਨ੍ਤੁਂ ਵਟ੍ਟਤੀ’’ਤਿ ਵਚਨਸ੍ਸ ਕਾਰਣਂ ਪੁਚ੍ਛਤਿ. ‘‘ਵਿਹਾਰਸ੍ਸ ਚਤੁਗਾਮਸਾਧਾਰਣਤ੍ਤਾ’’ਤਿਇਮਿਨਾ ਵਿਸਜ੍ਜਨੇਨ ਤਂ ਪੁਚ੍ਛਂ ਵਿਸਜ੍ਜੇਤਿ.

ਯਤ੍ਥਾਤਿ ਯਸ੍ਸਂ ਨਦਿਯਂ. ਉਤ੍ਤਰਨ੍ਤਿਯਾ ਏਕਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ, ਸਾ ਨਦੀ ਨਾਮਾਤਿ ਯੋਜਨਾ. ਯਥਾ ਨਿਵਸਿਯਮਾਨਾਯ ਤਿਮਣ੍ਡਲਪਟਿਚ੍ਛਾਦਨਂ ਹੋਤਿ, ਏਵਂ ਨਿਵਤ੍ਥਾਯਾਤਿ ਯੋਜਨਾ. ਭਿਕ੍ਖੁਨਿਯਾ ਉਤ੍ਤਰਨ੍ਤਿਯਾ ਅਨ੍ਤਰਵਾਸਕੋਤਿ ਸਮ੍ਬਨ੍ਧੋ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਿਸ੍ਮਿਂਚਿ ਠਾਨੇ. ‘‘ਸੇਤੁਨਾ ਗਚ੍ਛਤਿ, ਅਨਾਪਤ੍ਤੀ’’ਤਿਇਮਿਨਾ ਪਦਸਾ ਉਤ੍ਤਰਨ੍ਤਿਯਾ ਏਵ ਆਪਤ੍ਤੀਤਿ ਦਸ੍ਸੇਤਿ. ਉਤ੍ਤਰਣਕਾਲੇਤਿ ਨਦਿਤੋ ਉਤ੍ਤਰਣਕਾਲੇ. ਆਕਾਸਗਮਨਨ੍ਤਿ ਇਦ੍ਧਿਯਾ ਗਮਨਂ. ਆਦਿਸਦ੍ਦੇਨ ਹਤ੍ਥਿਪਿਟ੍ਠਿਆਦਯੋ ਸਙ੍ਗਣ੍ਹਾਤਿ. ਅਕ੍ਕਮਨ੍ਤਿਯਾਤਿ ਅਤਿਕ੍ਕਮਨ੍ਤਿਯਾ. ਏਤ੍ਥਾਤਿ ਦ੍ਵੀਸੁ ਤੀਸੁ ਭਿਕ੍ਖੁਨੀਸੁ. ਓਰਿਮਤੀਰਮੇਵਾਤਿ ਅਪਾਰਤੀਰਮੇਵ. ਤਮੇਵ ਤੀਰਨ੍ਤਿ ਓਰਿਮਤੀਰਮੇਵ. ਪਚ੍ਚੁਤ੍ਤਰਤੀਤਿ ਪਟਿਨਿਵਤ੍ਤਿਤ੍ਵਾ ਉਤ੍ਤਰਤਿ.

ਕੁਰੁਮਾਨਾ ਭਿਕ੍ਖੁਨੀ ਕਰੋਤੀਤਿ ਯੋਜਨਾ. ਅਸ੍ਸਾਤਿ ਭਿਕ੍ਖੁਨਿਯਾ ਅਜਾਨਨ੍ਤਿਯਾ ਏਵ ਚਾਤਿ ਸਮ੍ਬਨ੍ਧੋ, ਅਨਾਦਰੇ ਚੇਤਂ ਸਾਮਿਵਚਨਂ. ਅਥ ਪਨਾਤਿ ਅਥਸਦ੍ਦੋ ਯਦਿਪਰਿਯਾਯੋ, ਕਿਰਿਯਾਪਦੇਨ ਯੋਜੇਤਬ੍ਬੋ. ਅਥ ਅਚ੍ਛਤਿ, ਅਥ ਨ ਓਤਰਤੀਤਿ ਅਤ੍ਥੋ. ਅਚ੍ਛਤੀਤਿ ਵਸਤਿ. ਹੀਤਿ ਸਚ੍ਚਂ. ਇਧਾਤਿ ‘‘ਏਕਾ ਵਾ ਰਤ੍ਤਿਂ ਵਿਪ੍ਪਵਸੇਯ੍ਯਾ’’ਤਿਪਦੇ.

ਏਵਂ ਵੁਤ੍ਤਲਕ੍ਖਣਮੇਵਾਤਿ ਏਵਂ ਅਭਿਧਮ੍ਮਪਰਿਯਾਯੇਨ ਵੁਤ੍ਤਲਕ੍ਖਣਮੇਵ. ਤਂ ਪਨੇਤਨ੍ਤਿ ਤਂ ਪਨ ਅਰਞ੍ਞਂ. ਤੇਨੇਵਾਤਿ ਆਪਨ੍ਨਹੇਤੁਨਾ ਏਵ. ਅਟ੍ਠਕਥਾਯਨ੍ਤਿ ਮਹਾਅਟ੍ਠਕਥਾਯਂ. ਭਿਕ੍ਖੁਨੀਸੁ ਪਵਿਸਨ੍ਤੀਸੂਤਿ ਸਮ੍ਬਨ੍ਧੋ, ਨਿਦ੍ਧਾਰਣਤ੍ਥੇ ਚੇਤਂ ਭੁਮ੍ਮਵਚਨਂ. ਏਤ੍ਥਾਤਿ ਦਸ੍ਸਨੂਪਚਾਰਸਵਨੂਪਚਾਰੇਸੁ. ਯਤ੍ਥ ਓਕਾਸੇ ਠਿਤਂ ਦੁਤਿਯਿਕਾ ਪਸ੍ਸਤਿ, ਸੋ ਓਕਾਸੋ ਦਸ੍ਸਨੂਪਚਾਰੋ ਨਾਮਾਤਿ ਯੋਜਨਾ. ਸਾਣਿਪਾਕਾਰਨ੍ਤਰਿਕਾਪੀਤਿ ਸਾਣਿਪਾਕਾਰੇਨ ਬ੍ਯਵਹਿਕਾਪਿ. ਯਤ੍ਥ ਓਕਾਸੇ ਠਿਤਾ…ਪੇ… ਸਦ੍ਦਂ ਸੁਣਾਤਿ, ਸੋ ਓਕਾਸੋ ਸਵਨੂਪਚਾਰੋ ਨਾਮਾਤਿ ਯੋਜਨਾ. ਮਗ੍ਗਮੂਲ਼੍ਹਸਦ੍ਦੇਨਾਤਿ ਮਗ੍ਗੇ ਮੂਲ਼੍ਹਾਨਂ ਸਦ੍ਦੇਨ. ਧਮ੍ਮਸ੍ਸਵਨਾਰੋਚਨਸਦ੍ਦੇਨਾਤਿ ਧਮ੍ਮਸ੍ਸਵਨਤ੍ਥਾਯ ਆਰੋਚਨਾਨਂ ਸਦ੍ਦੇਨ. ਮਗ੍ਗਮੂਲ਼੍ਹਸਦ੍ਦੇਨ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ ਵਿਯ ਚ ਧਮ੍ਮਸ੍ਸਵਨਾਰੋਚਨਸਦ੍ਦੇਨ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ ਵਿਯ ਚ ‘‘ਅਯ੍ਯੇ’’ਤਿ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤੀਤਿ ਯੋਜਨਾ. ਸਦ੍ਦਾਯਨ੍ਤਿਯਾਤਿ ਸਦ੍ਦਂ ਕਰੋਨ੍ਤਿਯਾ. ਨਾਮਧਾਤੁ ਹੇਸਾ. ਏਵਰੂਪੇਤਿ ‘‘ਮਗ੍ਗਮੂਲ਼੍ਹਸਦ੍ਦੇਨ ਵਿਯਾ’’ਤਿਆਦਿਨਾ ਵੁਤ੍ਤੇ ਏਵਰੂਪੇ.

ਤਿਤ੍ਥਾਯਤਨਂ ਸਙ੍ਕਨ੍ਤਾ ਵਾਤਿ ਤਿਤ੍ਥੀਨਂ ਵਾਸਟ੍ਠਾਨਂ ਸਙ੍ਕਨ੍ਤਾ ਵਾ. ਇਮਿਨਾ ‘‘ਪਕ੍ਖਸਙ੍ਕਨ੍ਤਾ’’ਤਿ ਏਤ੍ਥ ਪਕ੍ਖਸਦ੍ਦਸ੍ਸ ਪਟਿਪਕ੍ਖਵਾਚਕਤ੍ਤਾ ਤੇਨ ਸਾਸਨਪਟਿਪਕ੍ਖਾ ਤਿਤ੍ਥਿਯਾ ਏਵ ਗਹੇਤਬ੍ਬਾਤਿ ਦਸ੍ਸੇਤਿ. ਤਿਤ੍ਥਿਯਾ ਹਿ ਸਾਸਨਸ੍ਸ ਪਟਿਪਕ੍ਖਾ ਹੋਨ੍ਤੀਤਿ. ਤਤਿਯਂ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਂ

੬੯੪. ਚਤੁਤ੍ਥੇ ਪਾਦਸ੍ਸ ਠਪਨਕਂ ਪੀਠਂ ਪਾਦਪੀਠਂ. ਪਾਦਸ੍ਸ ਠਪਨਕਾ ਕਥਲਿਕਾ ਪਾਦਕਥਲਿਕਾਤਿ ਦਸ੍ਸੇਨ੍ਤੋ ਆਹ ‘‘ਪਾਦਪੀਠਂ ਨਾਮਾ’’ਤਿਆਦਿ. ਅਨਞ੍ਞਾਯਾਤਿ ਏਤ੍ਥ ਯਕਾਰੋ ਤ੍ਵਾਪਚ੍ਚਯਸ੍ਸ ਕਾਰਿਯੋਤਿ ਆਹ ‘‘ਅਜਾਨਿਤ੍ਵਾ’’ਤਿ. ਨੇਤ੍ਥਾਰਵਤ੍ਤੇਤਿ ਉਕ੍ਖੇਪਨੀਯਕਮ੍ਮਤੋ ਨਿਤ੍ਥਰਣਕਾਰਣੇ ਵਤ੍ਤੇ. ‘‘ਵਤ੍ਤਮਾਨ’’ਨ੍ਤਿਇਮਿਨਾ ‘‘ਵਤ੍ਤਨ੍ਤਿ’’ਨ੍ਤਿ ਏਤ੍ਥ ਅਨ੍ਤਪਚ੍ਚਯਂ ਨਯੇਨ ਦਸ੍ਸੇਤੀਤਿ. ਚਤੁਤ੍ਥਂ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਂ

੭੦੧. ਪਞ੍ਚਮੇ ‘‘ਏਕਤੋ ਅਵਸ੍ਸੁਤੇ’’ਤਿ ਏਤ੍ਥ ਹੇਟ੍ਠਾ ਵੁਤ੍ਤਨਯੇਨ ‘‘ਏਕਤੋ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਭਿਕ੍ਖੁਨਿਯਾ ਏਵ ਗਹੇਤਬ੍ਬਭਾਵਞ੍ਚ ਤੋਪਚ੍ਚਯਸ੍ਸ ਛਟ੍ਠੁਤ੍ਥੇ ਪਵਤ੍ਤਭਾਵਞ੍ਚ ਅਵਸ੍ਸੁਭਪਦੇ ਭਾਵਤ੍ਥਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋ’’ਤਿ. ਏਤਨ੍ਤਿ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ’’ਤਿ ਵਚਨਂ. ਤਨ੍ਤਿ ਅਵਚਨਂ. ਪਾਲ਼ਿਯਾਤਿ ਇਮਾਯ ਸਿਕ੍ਖਾਪਦਪਾਲ਼ਿਯਾਤਿ. ਪਞ੍ਚਮਂ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਂ

੭੦੫. ਛਟ੍ਠੇ ਯਤੋ ਤ੍ਵਨ੍ਤਿ ਏਤ੍ਥ ਕਾਰਣਤ੍ਥੇ ਤੋਪਚ੍ਚਯੋਤਿ ਆਹ ‘‘ਯਸ੍ਮਾ’’ਤਿ. ਕਸ੍ਸਾ ਹੋਨ੍ਤੀਤਿ ਉਯ੍ਯੋਜਿਕਾਉਯ੍ਯੋਜਿਤਾਸੁ ਕਸ੍ਸਾ ਭਿਕ੍ਖੁਨਿਯਾ ਹੋਨ੍ਤੀਤਿ ਯੋਜਨਾ. ਨ ਦੇਤੀਤਿ ਉਯ੍ਯੋਜਿਕਾ ਉਯ੍ਯੋਜਿਤਾਯ ਨ ਦੇਤਿ. ਨ ਪਟਿਗ੍ਗਣ੍ਹਾਤੀਤਿ ਉਯ੍ਯੋਜਿਤਾ ਉਯ੍ਯੋਜਿਕਾਯ ਹਤ੍ਥਤੋ ਨ ਪਟਿਗ੍ਗਣ੍ਹਾਤਿ. ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ਕਾਰਣੇਨ ਉਯ੍ਯੋਜਿਕਾਯ ਹਤ੍ਥਤੋ ਉਯ੍ਯੋਜਿਤਾਯ ਪਟਿਗ੍ਗਹੋ ਨ ਵਿਜ੍ਜਤਿ. ਆਪਜ੍ਜਤਿ ਗਰੁਕਂ, ਨ ਲਹੁਕਨ੍ਤਿ ਏਵਂ ਸਨ੍ਤੇਪਿ ਉਯ੍ਯੋਜਿਕਾ ਗਰੁਕਮੇਵ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਤਿ, ਨ ਲਹੁਕਂ. ਤਞ੍ਚਾਤਿ ਤਂ ਆਪਜ੍ਜਨਞ੍ਚ. ਪਰਿਭੋਗਪਚ੍ਚਯਾਤਿ ਉਯ੍ਯੋਜਿਕਾਯ ਪਰਿਭੋਗਸਙ੍ਖਾਤਾ ਕਾਰਣਾਤਿ ਅਯਂ ਗਾਥਾਯਤ੍ਥੋ.

ਇਤਰਿਸ੍ਸਾ ਪਨਾਤਿ ਉਯ੍ਯੋਜਿਤਾਯ ਪਨ ਭਿਕ੍ਖੁਨਿਯਾ. ਪਠਮਸਿਕ੍ਖਾਪਦੇਤਿ ਪਞ੍ਚਮਸਿਕ੍ਖਾਪਦੇ. ਪਞ੍ਚਮਸਿਕ੍ਖਾਪਦਞ੍ਹਿ ਇਮਿਨਾ ਸਿਕ੍ਖਾਪਦੇਨ ਯੁਗਲ਼ਭਾਵੇਨ ਸਦਿਸਤ੍ਤਾ ਇਮਂ ਉਪਾਦਾਯ ਪਠਮਨ੍ਤਿ ਵੁਤ੍ਤਨ੍ਤਿ. ਛਟ੍ਠਂ.

੭. ਸਤ੍ਤਮਸਙ੍ਘਾਦਿਸੇਸਸਿਕ੍ਖਾਪਦਂ

੭੦੯. ਸਤ੍ਤਮੇ ਯਾਵਤਤਿਯਕਪਦਤ੍ਥੋਤਿ ‘‘ਯਾਵਤਤਿਯਕ’’ਨ੍ਤਿ ਉਚ੍ਚਾਰਿਤਸ੍ਸ ਪਦਸ੍ਸ ਅਤ੍ਥੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਅਟ੍ਠਮਸਙ੍ਘਾਦਿਸੇਸਸਿਕ੍ਖਾਪਦਂ

੭੧੫. ਅਟ੍ਠਮੇ ਕਿਸ੍ਮਿਂਚਿਦੇਵ ਅਧਿਕਰਣੇਤਿ ਨਿਦ੍ਧਾਰਣੀਯਸ੍ਸ ਨਿਦ੍ਧਾਰਣਸਮੁਦਾਯੇਨ ਅਵਿਨਾਭਾਵਤੋ ਆਹ ‘‘ਚਤੁਨ੍ਨ’’ਨ੍ਤਿ. ਕਸ੍ਮਾ ਪਨ ਨਿਦ੍ਧਾਰਣਸਮੁਦਾਯਨਿਦ੍ਧਾਰਣੀਯਭਾਵੇਨ ਵੁਤ੍ਤਂ, ਨਨੁ ਪਦਭਾਜਨੇ ਚਤ੍ਤਾਰਿਪਿ ਅਧਿਕਰਣਾਨਿ ਵੁਤ੍ਤਾਨੀਤਿ ਆਹ ‘‘ਪਦਭਾਜਨੇ ਪਨਾ’’ਤਿਆਦੀਤਿ. ਅਟ੍ਠਮਂ.

੯. ਨਵਮਸਙ੍ਘਾਦਿਸੇਸਸਿਕ੍ਖਾਪਦਂ

੭੨੩. ਨਵਮੇ ਸਂਸਟ੍ਠਸਦ੍ਦੋ ਮਿਸ੍ਸਪਰਿਯਾਯੋਤਿ ਆਹ ‘‘ਮਿਸ੍ਸੀਭੂਤਾ’’ਤਿ. ‘‘ਅਨਨੁਲੋਮੇਨਾ’’ਤਿਇਮਿਨਾ ‘‘ਅਨਨੁਲੋਮਿਕੇਨਾ’’ਤਿ ਏਤ੍ਥ ਇਕਸਦ੍ਦੋ ਸ੍ਵਤ੍ਥੋਤਿ ਦਸ੍ਸੇਤਿ. ਕੋਟ੍ਟਨਞ੍ਚ ਪਚਨਞ੍ਚ ਗਨ੍ਧਪਿਸਨਞ੍ਚ ਮਾਲਾਗਨ੍ਥਨਞ੍ਚ. ਆਦਿਸਦ੍ਦੇਨ ਅਞ੍ਞੇਪਿ ਅਨਨੁਲੋਮਿਕੇ ਕਾਯਿਕੇ ਸਙ੍ਗਣ੍ਹਾਤਿ. ਸਾਸਨਾਹਰਣਞ੍ਚ ਪਟਿਸਾਸਨਹਰਣਞ੍ਚ ਸਞ੍ਚਰਿਤ੍ਤਞ੍ਚ. ਆਦਿਸਦ੍ਦੇਨ ਅਞ੍ਞੇਪਿ ਅਨਨੁਲੋਮਿਕੇ ਵਾਚਸਿਕੇ ਸਙ੍ਗਣ੍ਹਾਤਿ. ਏਤਾਸਨ੍ਤਿ ਭਿਕ੍ਖੁਨੀਨਂ. ਸਿਲੋਕੋਤਿ ਯਸੋਤਿ. ਨਵਮਂ.

੧੦. ਦਸਮਸਙ੍ਘਾਦਿਸੇਸਸਿਕ੍ਖਾਪਦਂ

੭੨੭. ਦਸਮੇ ਏਵਾਚਾਰਾਤਿ ਏਤ੍ਥ ਨਿਗ੍ਗਹਿਤਲੋਪਵਸੇਨ ਸਨ੍ਧੀਤਿ ਆਹ ‘‘ਏਵਂਆਚਾਰਾ’’ਤਿ. ‘‘ਯਾਦਿਸੋ’’ਤਿਆਦਿਨਾ ਏਵਂਸਦ੍ਦਸ੍ਸ ਨਿਦਸ੍ਸਨਾਦੀਸੁ (ਅਭਿਧਾਨਪ੍ਪਦੀਪਿਕਾਯਂ ੧੧੮੬ ਗਾਥਾਯਂ) ਏਕਾਦਸਸੁ ਅਤ੍ਥੇਸੁ ਉਪਮਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ‘‘ਏਵਂਸਦ੍ਦਾ ਏਵਂਸਿਲੋਕਾ’’ਤਿ ਸਬ੍ਬੇਸੁ ਪਦੇਸੁ. ਉਞ੍ਞਾਯਾਤਿ ਏਤ੍ਥ ਓਕਾਰਵਿਪਰੀਤੋ ਉਕਾਰੋਤਿ ਆਹ ‘‘ਅਵਞ੍ਞਾਯਾ’’ਤਿ. ‘‘ਨੀਚਂ ਕਤ੍ਵਾ ਜਾਨਨਾਯਾ’’ਤਿ ਇਮਿਨਾ ਅਵਸਦ੍ਦੋ ਨੀਚਤ੍ਥੋ, ਞਾਧਾਤੁ ਅਵਬੋਧਨਤ੍ਥੋਤਿ ਦਸ੍ਸੇਤਿ. ‘‘ਪਰਿਭਵਞ੍ਞਾਯਾ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪਵਸੇਨ ‘‘ਪਰਿਭਵੇਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਪਰਿਭਵਿਤ੍ਵਾ ਜਾਨਨੇਨਾ’’ਤਿ. ਅਕ੍ਖਨ੍ਤਿਯਾਤਿ ਏਤ੍ਥ ਸਹਨਖਨ੍ਤਿਯੇਵਾਧਿਪ੍ਪੇਤਾ, ਨੇਵ ਅਨੁਲੋਮਖਨ੍ਤਿ, ਨ ਦਿਟ੍ਠਿਨਿਜ੍ਝਾਨਕ੍ਖਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਅਸਹਨਤਾਯਾ’’ਤਿ. ਵੇਭਸ੍ਸਿਯਾਤਿ ਏਤ੍ਥ ਵਿਸੇਸੇਨ ਭਾਸੇਤਿ ਓਭਾਸੇਤੀਤਿ ਵਿਭਾਸੋ ਆਨੁਭਾਵੋ, ਵਿਭਾਸੋ ਇਮਸ੍ਸ ਸਙ੍ਘਸ੍ਸ ਅਤ੍ਥੀਤਿ ਵਿਭਸ੍ਸੋ ਸਙ੍ਘੋ, ਬਹ੍ਵਤ੍ਥੇ ਚ ਅਤਿਸਯਤ੍ਥੇ ਚ ਸਪਚ੍ਚਯੋ ਹੋਤਿ. ਕਸ੍ਮਾ? ਮਨ੍ਤੁਪਚ੍ਚਯਤ੍ਥਤ੍ਤਾ ‘‘ਲੋਮਸੋ’’ਤਿਆਦੀਸੁ (ਜਾ. ੧.੧੪.੫੭) ਵਿਯ, ਬਹੁਆਨੁਭਾਵੋ ਅਤਿਸਯਆਨੁਭਾਵੋ ਸਙ੍ਘੋਤਿ ਵੁਤ੍ਤਂ ਹੋਤਿ, ਸਂਯੋਗਪਰਤ੍ਤਾ ਆਕਾਰਸ੍ਸ ਰਸ੍ਸੋ. ਵਿਭਸ੍ਸਸ੍ਸ ਭਾਵੋ ਵੇਭਸ੍ਸਿਯਂ, ਬਹੁਆਨੁਭਾਵੋ ਅਤਿਸਯਆਨੁਭਾਵੋਯੇਵ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਬਲਵਭਸ੍ਸਭਾਵੇਨਾ’’ਤਿ. ਤਤ੍ਥ ਬਲਵਇਤਿ ਪਦੇਨ ਮਨ੍ਤੁਅਤ੍ਥੇ ਪਵਤ੍ਤਸ੍ਸ ਸਪ੍ਪਚ੍ਚਯਸ੍ਸ ਬਹ੍ਵਤ੍ਥਞ੍ਚ ਅਤਿਸਯਤ੍ਥਞ੍ਚ ਦਸ੍ਸੇਤਿ, ਭਾਵਇਤਿ ਪਦੇਨ ਣਿਯਪਚ੍ਚਯਸ੍ਸ ਭਾਵਤ੍ਥਂ, ਏਨਇਤਿ ਪਦੇਨ ਨਿਸ੍ਸਕ੍ਕਵਚਨਸ੍ਸ ਕਰਣਤ੍ਥੇ ਪਵਤ੍ਤਭਾਵਂ ਦਸ੍ਸੇਤਿ. ਤਮੇਵਤ੍ਥਮਾਵਿਕਰੋਨ੍ਤੋ ਆਹ ‘‘ਅਤ੍ਤਨੋ ਬਲਵਪ੍ਪਕਾਸਨੇਨਾ’’ਤਿ. ਤਤ੍ਥ ਅਤ੍ਤਨੋਤਿ ਅਤ੍ਤਸਙ੍ਖਾਤਸ੍ਸ ਸਙ੍ਘਸ੍ਸ. ਬਲਵਪ੍ਪਕਾਸਨੇਨਾਤਿ ਬਹੁਆਨੁਭਾਵਪ੍ਪਕਾਸਨੇਨ, ਅਤਿਸਯਆਨੁਭਾਵਪ੍ਪਕਾਸਨੇਨ ਵਾ. ਬਲਵਪ੍ਪਕਾਸਨਂ ਨਾਮ ਅਤ੍ਥਤੋ ਪਰੇਸਂ ਸਮੁਤ੍ਰਾਸਨਮੇਵਾਤਿ ਆਹ ‘‘ਸਮੁਤ੍ਰਾਸਨੇਨਾਤਿ ਅਤ੍ਥੋ’’ਤਿ. ਦੁਬ੍ਬਲਭਾਵੇਨਾਤਿ ਏਤ੍ਥ ਭਾਵਇਤਿਪਦੇਨ ਣ੍ਯਪਚ੍ਚਯਸ੍ਸ ਭਾਵਤ੍ਥਂ, ਏਨਇਤਿਪਦੇਨ ਨਿਸ੍ਸਕ੍ਕਵਚਨਸ੍ਸ ਕਰਣਤ੍ਥਂ ਦਸ੍ਸੇਤੀਤਿ ਦਟ੍ਠਬ੍ਬਂ. ਸਬ੍ਬਤ੍ਥਾਤਿ ‘‘ਉਞ੍ਞਾਯਾ’’ਤਿਆਦੀਸੁ ਸਬ੍ਬੇਸੁ ਪਦੇਸੁ. ਚਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਏਵਂ ਸਮੁਚ੍ਚਯਤ੍ਥੋ ਦਟ੍ਠਬ੍ਬੋ’’ਤਿ. ਵਿਵਿਚ੍ਚਥਾਤਿ ਏਤ੍ਥ ਵੀਤ੍ਯੂਪਸਗ੍ਗੋ ਵਿਨਾਸਦ੍ਦਤ੍ਥੋ, ਵਿਚਧਾਤੁ ਸਤ੍ਤਤ੍ਥੋਤਿ ਆਹ ‘‘ਵਿਨਾ ਹੋਥਾ’’ਤਿ. ਦਸਮਂ.

ਅਨਨ੍ਤਰਾ ਪਕ੍ਖਿਪਿਤ੍ਵਾਤਿ ਸਮ੍ਬਨ੍ਧੋ. ਮਹਾਵਿਭਙ੍ਗਤੋ ਆਹਰਿਤਾਨਿ ਇਮਾਨਿ ਤੀਣਿ ਸਿਕ੍ਖਾਪਦਾਨੀਤਿ ਯੋਜਨਾ. ਨਵ ਪਠਮਾਪਤ੍ਤਿਕਾ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਸਬ੍ਬੇਪਿ ਧਮ੍ਮਾਤਿ ਯੋਜਨਾ. ਏਤ੍ਥਾਤਿ ‘‘ਉਦ੍ਦਿਟ੍ਠਾ ਖੋ’’ਤਿਆਦਿਪਾਠੇ. ਤਂ ਪਨਾਤਿ ਪਕ੍ਖਮਾਨਤ੍ਤਂ ਪਨਾਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗੇ

ਸਤ੍ਤਰਸਕਵਣ੍ਣਨਾਯ ਯੋਜਨਾ ਸਮਤ੍ਤਾ.