੧. ਪਾਰਾਜਿਕਕਣ੍ਡਅਤ੍ਥਯੋਜਨਾ

ਏਵਂ ਭਿਕ੍ਖੁਵਿਭਙ੍ਗਸ੍ਸ, ਕਤ੍ਵਾਨ ਯੋਜਨਾਨਯਂ;

ਭਿਕ੍ਖੁਨੀਨਂ ਵਿਭਙ੍ਗਸ੍ਸ, ਕਰਿਸ੍ਸਂ ਯੋਜਨਾਨਯਂ.

ਯੋਤਿ ਵਿਭਙ੍ਗੋ. ਵਿਭਙ੍ਗਸ੍ਸਾਤਿ ਵਿਭਙ੍ਗੋ ਅਸ੍ਸ. ਅਸ੍ਸਾਤਿ ਹੋਤਿ. ਤਸ੍ਸਾਤਿ ਭਿਕ੍ਖੁਨੀਨਂ ਵਿਭਙ੍ਗਸ੍ਸ. ਯਤੋਤਿ ਯਸ੍ਮਾ. ਅਯਂ ਪਨੇਤ੍ਥ ਯੋਜਨਾ – ਭਿਕ੍ਖੂਨਂ ਵਿਭਙ੍ਗਸ੍ਸ ਅਨਨ੍ਤਰਂ ਭਿਕ੍ਖੁਨੀਨਂ ਯੋ ਵਿਭਙ੍ਗੋ ਸਙ੍ਗਹਿਤੋ ਅਸ੍ਸ, ਤਸ੍ਸ ਭਿਕ੍ਖੁਨੀਨਂ ਵਿਭਙ੍ਗਸ੍ਸ ਸਂਵਣ੍ਣਨਾਕ੍ਕਮੋ ਪਤ੍ਤੋ ਯਤੋ, ਤਤੋ ਤਸ੍ਸ ਭਿਕ੍ਖੁਨੀਨਂ ਵਿਭਙ੍ਗਸ੍ਸ ਅਪੁਬ੍ਬਪਦਵਣ੍ਣਨਂ ਕਾਤੁਂ ਤਾਵ ਪਾਰਾਜਿਕੇ ਅਯਂ ਸਂਵਣ੍ਣਨਾ ਹੋਤੀਤਿ. ਅਪੁਬ੍ਬਾਨਂ ਪਦਾਨਂ ਵਣ੍ਣਨਾ ਅਪੁਬ੍ਬਪਦਵਣ੍ਣਨਾ, ਤਂ.

੧. ਪਠਮਪਾਰਾਜਿਕਸਿਕ੍ਖਾਪਦਂ

੬੫੬. ‘‘ਤੇਨ…ਪੇ… ਸਾਲ਼੍ਹੋ’’ਤਿ ਏਤ੍ਥ ‘‘ਏਤ੍ਥਾ’’ਤਿ ਪਾਠਸੇਸੋ ਯੋਜੇਤਬ੍ਬੋ. ਦਬ੍ਬਗੁਣਕਿਰਿਯਾਜਾਤਿਨਾਮਸਙ੍ਖਾਤੇਸੁ ਪਞ੍ਚਸੁ ਸਦ੍ਦੇਸੁ ਸਾਲ਼੍ਹਸਦ੍ਦਸ੍ਸ ਨਾਮਸਦ੍ਦਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸਾਲ਼੍ਹੋਤਿ ਤਸ੍ਸ ਨਾਮ’’ਨ੍ਤਿ. ਮਿਗਾਰਮਾਤੁਯਾਤਿ ਵਿਸਾਖਾਯ. ਸਾ ਹਿ ਮਿਗਾਰਸੇਟ੍ਠਿਨਾ ਮਾਤੁਟ੍ਠਾਨੇ ਠਪਿਤਤ੍ਤਾ ਮਿਗਾਰਮਾਤਾ ਨਾਮ. ਨਵਕਮ੍ਮਂ ਅਧਿਟ੍ਠਾਤੀਤਿ ਨਵਕਮ੍ਮਿਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਨਵਕਮ੍ਮਾਧਿਟ੍ਠਾਯਿਕ’’ਨ੍ਤਿ. ‘‘ਪਣ੍ਡਿਚ੍ਚੇਨ ਸਮਨ੍ਨਾਗਤਾ’’ਤਿਇਮਿਨਾ ਪਣ੍ਡਾ ਵੁਚ੍ਚਤਿ ਪਞ੍ਞਾ, ਸਾ ਸਞ੍ਜਾਤਾ ਇਮਿਸ੍ਸਾਤਿ ਪਣ੍ਡਿਤਾਤਿ ਵਚਨਤ੍ਥਂ ਦਸ੍ਸੇਤਿ. ਵੇਯ੍ਯਤ੍ਤਿਕੇਨਾਤਿ ਵਿਸੇਸੇਨ ਅਞ੍ਜਤਿ ਪਾਕਟਂ ਗਚ੍ਛਤੀਤਿ ਵਿਯਤ੍ਤੋ, ਪੁਗ੍ਗਲੋ, ਤਸ੍ਸ ਇਦਂ ਵੇਯ੍ਯਤ੍ਤਿਕਂ, ਞਾਣਂ, ਤੇਨ. ‘‘ਪਣ੍ਡਾ’’ਤਿ ਵੁਤ੍ਤਪਞ੍ਞਾਯ ‘‘ਮੇਧਾ’’ਤਿ ਵੁਤ੍ਤਪਞ੍ਞਾਯ ਵਿਸੇਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਲ਼ਿਗਹਣੇ’’ਤਿਆਦਿ. ‘‘ਮੇਧਾ’’ਤਿ ਹਿ ਵੁਤ੍ਤਪਞ੍ਞਾ ‘‘ਪਣ੍ਡਾ’’ਤਿ ਵੁਤ੍ਤਪਞ੍ਞਾਯ ਵਿਸੇਸੋ ਹੋਤਿ ਸਤਿਸਹਾਯਤ੍ਤਾ. ਤਤ੍ਰੁਪਾਯਾਯਾਤਿ ਅਲੁਤ੍ਤਸਮਾਸੋ ‘‘ਤਤ੍ਰਮਜ੍ਝਤ੍ਤਤਾ’’ਤਿਆਦੀਸੁ (ਧ. ਸ. ਅਟ੍ਠ. ਯੇਵਾਪਨਕਵਣ੍ਣਨਾ) ਵਿਯ. ‘‘ਕਮ੍ਮੇਸੂ’’ਤਿ ਇਮਿਨਾ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਕਤ੍ਤਬ੍ਬਕਮ੍ਮੁਪਪਰਿਕ੍ਖਾਯਾਤਿ ਕਤ੍ਤਬ੍ਬਕਮ੍ਮੇਸੁ ਵਿਚਾਰਣਾਯ. ਚਸਦ੍ਦੇਨ ‘‘ਕਤਾਕਤ’’ਨ੍ਤਿ ਪਦਸ੍ਸ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਪਰਿਵੇਸਨਟ੍ਠਾਨੇਤਿ ਪਰਿਭੁਞ੍ਜਿਤੁਂ ਵਿਸਨ੍ਤਿ ਪਵਿਸਨ੍ਤਿ ਏਤ੍ਥਾਤਿ ਪਰਿਵੇਸਨਂ, ਤਮੇਵ ਠਾਨਂ ਪਰਿਵੇਸਨਟ੍ਠਾਨਂ, ਤਸ੍ਮਿਂ. ਨਿਕੂਟੇਤਿ ਏਤ੍ਥ ਕੂਟਸਙ੍ਖਾਤਸਿਖਰਵਿਰਹਿਤੇ ਓਕਾਸੇਤਿ ਦਸ੍ਸੇਨ੍ਤੋ ਆਹ ‘‘ਕੋਣਸਦਿਸਂ ਕਤ੍ਵਾ ਦਸ੍ਸਿਤੇ ਗਮ੍ਭੀਰੇ’’ਤਿ. ਵਿਤ੍ਯੂਪਸਗ੍ਗੋ ਵਿਕਾਰਵਾਚਕੋ, ਸਰਸਦ੍ਦੋ ਸਦ੍ਦਵਾਚਕੋਤਿ ਆਹ ‘‘ਵਿਪ੍ਪਕਾਰਸਦ੍ਦੋ’’ਤਿ. ਚਰਤਿ ਅਨੇਨਾਤਿ ਚਰਣਂ ਪਾਦੋ, ਤਸ੍ਮਿਂ ਉਟ੍ਠਿਤੋ ਗਿਲਾਨੋ ਏਤਿਸ੍ਸਾਤਿ ਚਰਣਗਿਲਾਨਾਤਿ ਦਸ੍ਸੇਨ੍ਤੋ ਆਹ ‘‘ਪਾਦਰੋਗੇਨ ਸਮਨ੍ਨਾਗਤਾ’’ਤਿ.

੬੫੭. ‘‘ਤਿਨ੍ਤਾ’’ਤਿ ਇਮਿਨਾ ਅਵਸ੍ਸੁਤਸਦ੍ਦੋ ਇਧ ਕਿਲਿਨ੍ਨਤ੍ਥੇ ਏਵ ਵਤ੍ਤਤਿ, ਨ ਅਞ੍ਞਤ੍ਥੇਤਿ ਦਸ੍ਸੇਤਿ. ਅਸ੍ਸਾਤਿ ‘‘ਅਵਸ੍ਸੁਤਾ’’ਤਿਪਦਸ੍ਸ. ਪਦਭਾਜਨੇ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਦਭਾਜਨੇ. ਵਤ੍ਥਂ ਰਙ੍ਗਜਾਤੇਨ ਰਤ੍ਤਂ ਵਿਯ, ਤਥਾ ਕਾਯਸਂਸਗ੍ਗਰਾਗੇਨ ਸੁਟ੍ਠੁ ਰਤ੍ਤਾਤਿ ਯੋਜਨਾ. ‘‘ਅਪੇਕ੍ਖਾਯ ਸਮਨ੍ਨਾਗਤਾ’’ਤਿ ਇਮਿਨਾ ਅਪੇਕ੍ਖਾ ਏਤਿਸ੍ਸਮਤ੍ਥੀਤਿ ਅਪੇਕ੍ਖਵਤੀਤਿ ਅਤ੍ਥਂ ਦਸ੍ਸੇਤਿ. ਪਟਿਬਦ੍ਧਂ ਚਿਤ੍ਤਂ ਇਮਿਸ੍ਸਨ੍ਤਿ ਪਟਿਬਦ੍ਧਚਿਤ੍ਤਾਤਿ ਦਸ੍ਸੇਨ੍ਤੋ ਆਹ ‘‘ਪਟਿਬਨ੍ਧਿਤ੍ਵਾ ਠਪਿਤਚਿਤ੍ਤਾ ਵਿਯਾ’’ਤਿ. ਦੁਤਿਯਪਦਵਿਭਙ੍ਗੇਪੀਤਿ ‘‘ਅਵਸ੍ਸੁਤੋ’’ਤਿ ਦੁਤਿਯਪਦਭਾਜਨੇਪਿ. ਪੁਗ੍ਗਲਸਦ੍ਦਸ੍ਸ ਸਤ੍ਤਸਾਮਞ੍ਞਵਾਚਕਤ੍ਤਾ ਪੁਰਿਸਸਦ੍ਦੇਨ ਵਿਸੇਸੇਤਿ. ਅਧੋਉਬ੍ਭਇਤਿ ਨਿਪਾਤਾਨਂ ਛਟ੍ਠਿਯਾ ਸਮਸਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਕ੍ਖਕਾਨਂ ਅਧੋ’’ਤਿਆਦਿ. ਨਨੁ ਯਥਾ ਇਧ ‘‘ਅਕ੍ਖਕਾਨਂ ਅਧੋ’’ਤਿ ਵੁਤ੍ਤਂ, ਏਵਂ ਪਦਭਾਜਨੇਪਿ ਵਤ੍ਤਬ੍ਬਂ, ਕਸ੍ਮਾ ਨ ਵੁਤ੍ਤਨ੍ਤਿ ਆਹ ‘‘ਪਦਭਾਜਨੇ’’ਤਿਆਦਿ. ਪਦਪਟਿਪਾਟਿਯਾਤਿ ‘‘ਅਧੋ’’ਤਿ ਚ ‘‘ਅਕ੍ਖਕ’’ਨ੍ਤਿ ਚ ਪਦਾਨਂ ਅਨੁਕ੍ਕਮੇਨ. ਏਤ੍ਥਾਤਿ ਅਧਕ੍ਖਕਉਬ੍ਭਜਾਣੁਮਣ੍ਡਲੇਸੁ. ਸਾਧਾਰਣਪਾਰਾਜਿਕੇਹੀਤਿ ਭਿਕ੍ਖੁਭਿਕ੍ਖੁਨੀਨਂ ਸਾਧਾਰਣੇਹਿ ਪਾਰਾਜਿਕੇਹਿ. ਨਾਮਮਤ੍ਤਨ੍ਤਿ ਨਾਮਮੇਵ.

੬੫੯. ਏਵਨ੍ਤਿ ਇਮਾਯ ਪਾਲ਼ਿਯਾ ਵਿਭਜਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਉਭਤੋਅਵਸ੍ਸੁਤੇ’’ਤਿਆਦਿਵਚਨੇ. ‘‘ਉਭਤੋਅਵਸ੍ਸੁਤੇ’’ਤਿ ਪਾਠੋ ਮੂਲਪਾਠੋਯੇਵ, ਨਾਞ੍ਞੋਤਿ ਦਸ੍ਸੇਨ੍ਤੇਨ ਵਿਸੇਸਮਕਤ੍ਵਾ ‘‘ਉਭਤੋਅਵਸ੍ਸੁਤੇਤਿ ਉਭਤੋ ਅਵਸ੍ਸੁਤੇ’’ਤਿ ਵੁਤ੍ਤਂ. ਉਭਤੋਤਿ ਏਤ੍ਥ ਉਭਸਰੂਪਞ੍ਚ ਤੋਸਦ੍ਦਸ੍ਸ ਛਟ੍ਠ੍ਯਤ੍ਥੇ ਪਵਤ੍ਤਿਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨਿਯਾ ਚੇਵ ਪੁਰਿਸਸ੍ਸ ਚਾ’’ਤਿ. ਤਤ੍ਥ ਭਿਕ੍ਖੁਨੀਪੁਰਿਸਸਦ੍ਦੇਹਿ ਉਭਸਰੂਪਂ ਦਸ੍ਸੇਤਿ. ‘‘ਯਾ’’ਤਿ ਚ ‘‘ਸ’’ਇਤਿ ਚ ਦ੍ਵੀਹਿ ਸਦ੍ਦੇਹਿ ਤੋਪਚ੍ਚਯਸ੍ਸ ਛਟ੍ਠ੍ਯਤ੍ਥਂ, ਉਭਿਨ੍ਨਂ ਅਵਸ੍ਸੁਤਭਾਵੇ ਸਤੀਤਿ ਅਤ੍ਥੋ. ਭਾਵਪਚ੍ਚਯੇਨ ਵਿਨਾ ਭਾਵਤ੍ਥੋ ਞਾਤਬ੍ਬੋਤਿ ਆਹ ‘‘ਅਵਸ੍ਸੁਤਭਾਵੇ’’ਤਿ. ਯਥਾਪਰਿਚ੍ਛਿਨ੍ਨੇਨਾਤਿ ‘‘ਅਧਕ੍ਖਕਂ, ਉਬ੍ਭਜਾਣੁਮਣ੍ਡਲ’’ਨ੍ਤਿ ਯੇਨ ਯੇਨ ਪਰਿਚ੍ਛਿਨ੍ਨੇਨ. ਅਤ੍ਤਨੋਤਿ ਭਿਕ੍ਖੁਨਿਯਾ. ਤਸ੍ਸ ਵਾਤਿ ਪੁਰਿਸਸ੍ਸ ਵਾ. ਇਧਾਪੀਤਿ ਕਾਯਪਟਿਬਦ੍ਧੇਨ ਕਾਯਾਮਸਨੇਪਿ.

ਤਤ੍ਰਾਤਿ ਤੇਸੁ ਭਿਕ੍ਖੁਭਿਕ੍ਖੁਨੀਸੁ. ਨ ਕਾਰੇਤਬ੍ਬੋ ‘‘ਕਾਯਸਂਸਗ੍ਗਂ ਸਾਦਿਯੇਯ੍ਯਾ’’ਤਿ ਅਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਅਚੋਪਯਮਾਨਾਪੀਤਿ ਅਚਾਲਯਮਾਨਾਪਿ, ਪਿਸਦ੍ਦੋ ਸਮ੍ਭਾਵਨਤ੍ਥੋ, ਤੇਨ ਚੋਪਯਮਾਨਾ ਪਗੇਵਾਤਿ ਦਸ੍ਸੇਤਿ. ਏਵਂ ਪਨ ਸਤੀਤਿ ਚਿਤ੍ਤੇਨੇਵ ਅਧਿਵਾਸਯਮਾਨਾਯ ਸਤਿ ਪਨ. ਕਿਰਿਯਸਮੁਟ੍ਠਾਨਤਾਤਿ ਇਮਸ੍ਸ ਸਿਕ੍ਖਾਪਦਸ੍ਸ ਕਿਰਿਯਸਮੁਟ੍ਠਾਨਭਾਵੋ. ਤਬ੍ਬਹੁਲਨਯੇਨਾਤਿ ‘‘ਵਨਚਰਕੋ (ਮ. ਨਿ. ਅਟ੍ਠ. ੨.੨੦੧; ੩.੧੩੩), ਸਙ੍ਗਾਮਾਵਚਰੋ’’ਤਿਆਦੀਸੁ (ਮ. ਨਿ. ੨.੧੦੮) ਵਿਯ ਤਸ੍ਸਂ ਕਿਰਿਯਾਯਂ ਬਹੁਲਤੋ ਸਮੁਟ੍ਠਾਨਨਯੇਨ. ਸਾਤਿ ਕਿਰਿਯਸਮੁਟ੍ਠਾਨਤਾ.

੬੬੦. ਏਤ੍ਥਾਤਿ ਉਬ੍ਭਕ੍ਖਕਅਧੋਜਾਣੁਮਣ੍ਡਲੇਸੁ.

੬੬੨. ‘‘ਏਕਤੋ ਅਵਸ੍ਸੁਤੇ’’ਤਿ ਏਤ੍ਥਾਪਿ ਤੋਪਚ੍ਚਯੋ ਛਟ੍ਠ੍ਯਤ੍ਥੇ ਹੋਤਿ. ਸਾਮਞ੍ਞਵਚਨਸ੍ਸਾਪਿ ਵਿਸੇਸੇ ਅਵਟ੍ਠਾਨਤੋ, ਵਿਸੇਸਤ੍ਥਿਨਾ ਚ ਵਿਸੇਸਸ੍ਸ ਅਨੁਪਯੋਜਿਤਬ੍ਬਤੋ ਆਹ ‘‘ਭਿਕ੍ਖੁਨਿਯਾ ਏਵਾ’’ਤਿ. ਤਤ੍ਰਾਤਿ ‘‘ਏਕਤੋ ਅਵਸ੍ਸੁਤੇ’’ਤਿਆਦਿਵਚਨੇ. ‘‘ਤਥੇਵਾ’’ਤਿਇਮਿਨਾ ਕਾਯਸਂਸਗ੍ਗਰਾਗੇਨ ਅਵਸ੍ਸੁਤੋਤਿ ਅਤ੍ਥਂ ਅਤਿਦਿਸਤਿ. ਚਤੂਸੂਤਿ ਮੇਥੁਨਰਾਗ ਕਾਯਸਂਸਗ੍ਗਰਾਗਗੇਹਸਿਤਪੇਮ ਸੁਦ੍ਧਚਿਤ੍ਤਸਙ੍ਖਾਤੇਸੁ ਚਤੂਸੁ. ਯਤ੍ਥਾਤਿ ਯਸ੍ਮਿਂ ਠਾਨੇ.

੬੬੩. ਅਯਂ ਪੁਰਿਸੋ ਇਤਿ ਵਾ ਇਤ੍ਥੀ ਇਤਿ ਵਾ ਅਜਾਨਨ੍ਤਿਯਾ ਵਾਤਿ ਯੋਜਨਾਤਿ. ਪਠਮਂ.

੨. ਦੁਤਿਯਪਾਰਾਜਿਕਸਿਕ੍ਖਾਪਦਂ

੬੬੪. ਦੁਤਿਯੇ ਕਚ੍ਚਿ ਨੋ ਸਾਤਿ ਏਤ੍ਥ ਨੋਸਦ੍ਦੋ ਨੁਸਦ੍ਦਤ੍ਥੋਤਿ ਆਹ ‘‘ਕਚ੍ਚਿ ਨੁ ਸਾ’’ਤਿ. ਪਰਿਵਾਰਵਿਪਤ੍ਤੀਤਿ ਪਰਿਜਨਸ੍ਸ ਵਿਨਾਸਨਂ. ‘‘ਅਕਿਤ੍ਤੀ’’ਤਿ ਏਤ੍ਥ ਸਮ੍ਮੁਖਾ ਨਿਨ੍ਦਂ ਗਹੇਤ੍ਵਾ ‘‘ਅਯਸੋ’’ਤਿਇਮਿਨਾ ਪਰਮ੍ਮੁਖਾ ਨਿਨ੍ਦਾ ਗਹੇਤਬ੍ਬਾਤਿ ਦਸ੍ਸੇਤੁਂ ਵੁਤ੍ਤਂ ‘‘ਪਰਮ੍ਮੁਖਗਰਹਾ ਵਾ’’ਤਿ.

੬੬੬. ‘‘ਯਾ ਪਾਰਾਜਿਕਂ ਆਪਨ੍ਨਾ’’ਤਿਇਮਿਨਾ ‘‘ਸਾ ਵਾ’’ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਚਤੁਨ੍ਨਨ੍ਤਿ ਨਿਦ੍ਧਾਰਣਤ੍ਥੇ ਚੇਤਂ ਸਾਮਿਵਚਨਂ, ਚਤੂਸੂਤਿ ਅਤ੍ਥੋ. ਪਚ੍ਛਾਤਿ ਸਬ੍ਬਪਾਰਾਜਿਕਾਨਂ ਪਚ੍ਛਾ. ਇਮਸ੍ਮਿਂ ਓਕਾਸੇਤਿ ਪਠਮਤਤਿਯਪਾਰਾਜਿਕਾਨਮਨ੍ਤਰੇ ਠਾਨੇ. ਠਪਿਤਨ੍ਤਿ ਸਙ੍ਗੀਤਿਕਾਰੇਹਿ ਨਿਕ੍ਖਿਤ੍ਤਂ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਤਤ੍ਰਾਤਿ ਦੁਟ੍ਠੁਲ੍ਲਸਿਕ੍ਖਾਪਦੇਤਿ. ਦੁਤਿਯਂ.

੩. ਤਤਿਯਪਾਰਾਜਿਕਸਿਕ੍ਖਾਪਦਂ

੬੬੯. ਤਤਿਯੇ ਅਸ੍ਸਾਤਿ ‘‘ਧਮ੍ਮੇਨ ਵਿਨਯੇਨਾ’’ਤਿ ਪਦਸ੍ਸ. ਪਦਭਾਜਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਞਤ੍ਤਿਸਮ੍ਪਦਾ ਚੇਵ ਅਨੁਸਾਵਨਸਮ੍ਪਦਾ ਚ ਸਤ੍ਥੁਸਾਸਨਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਞਤ੍ਤਿ…ਪੇ… ਸਮ੍ਪਦਾਯ ਚਾ’’ਤਿ. ਸਤ੍ਥੁਸਾਸਨੇਨਾਤਿ ਚ ਸਤ੍ਥੁ ਆਣਾਯ. ਕਮ੍ਮਨ੍ਤਿ ਉਕ੍ਖੇਪਨੀਯਕਮ੍ਮਂ. ਤਤ੍ਥਾਤਿ ਸਙ੍ਘੇ. ‘‘ਵਚਨਂ ਨਾਦਿਯਤੀ’’ਤਿਆਦੀਸੁ ਵਿਯ ਸਙ੍ਘਂ ਵਾ ਨਾਦਿਯਤੀਤਿ ਏਤ੍ਥ ਨਾਦਿਯਨਂ ਨਾਮ ਨਾਨੁਵਤ੍ਤਨਮੇਵਾਤਿ ਆਹ ‘‘ਨਾਨੁਵਤ੍ਤਤੀ’’ਤਿ. ਤਤ੍ਥਾਤਿ ਸਙ੍ਘਾਦੀਸੁ. ਅਯਂ ਤਾਵ ਸਂਵਾਸੋਤਿ ਸਹ ਭਿਕ੍ਖੂ ਵਸਨ੍ਤਿ ਏਤ੍ਥਾਤਿ ਸਂਵਾਸੋਤਿ ਅਤ੍ਥੇਨ ਅਯਂ ਏਕਕਮ੍ਮਾਦਿ ਸਂਵਾਸੋ ਨਾਮ. ‘‘ਸਹ ਅਯਨਭਾਵੇਨਾ’’ਤਿਇਮਿਨਾ ਸਹ ਅਯਨ੍ਤਿ ਪਵਤ੍ਤਨ੍ਤੀਤਿ ਸਹਾਯਾਤਿ ਵਚਨਤ੍ਥਂ ਦਸ੍ਸੇਤਿ. ਤੇਤਿ ਭਿਕ੍ਖੂ. ਯੇਹਿ ਚਾਤਿ ਭਿਕ੍ਖੂਹਿ ਚ. ਤਸ੍ਸਾਤਿ ਉਕ੍ਖਿਤ੍ਤਕਸ੍ਸ. ਤੇਨਾਤਿ ਉਕ੍ਖਿਤ੍ਤਕੇਨ. ਅਤ੍ਤਨੋਤਿ ਉਕ੍ਖਿਤ੍ਤਕਸ੍ਸਾਤਿ. ਤਤਿਯਂ.

੪. ਚਤੁਤ੍ਥਪਾਰਾਜਿਕਸਿਕ੍ਖਾਪਦਂ

੬੭੫. ਚਤੁਤ੍ਥੇ ਮੇਥੁਨਰਾਗੇਨ ਅਵਸ੍ਸੁਤਾ ਨਾਧਿਪ੍ਪੇਤਾ, ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਾਵਾਧਿਪ੍ਪੇਤਾਤਿ ਆਹ ‘‘ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਾ’’ਤਿ. ‘‘ਪੁਰਿਸਪੁਗ੍ਗਲਸ੍ਸਾ’’ਤਿਪਦਂ ਨ ਹਤ੍ਥਸਦ੍ਦੇਨ ਸਮ੍ਬਨ੍ਧਿਤਬ੍ਬਂ, ਗਹਣਸਦ੍ਦੇਨੇਵ ਸਮ੍ਬਨ੍ਧਿਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਂ ਪੁਰਿਸਪੁਗ੍ਗਲੇਨਾ’’ਤਿਆਦਿ. ਤਨ੍ਤਿ ਗਹਣਂ, ‘‘ਹਤ੍ਥਗ੍ਗਹਣ’’ਨ੍ਤਿ ਵੁਤ੍ਤਵਚਨਂ ਉਪਲਕ੍ਖਣਮਤ੍ਤਮੇਵਾਤਿ ਆਹ ‘‘ਅਞ੍ਞਮ੍ਪੀ’’ਤਿਆਦਿ. ਤਤ੍ਥ ‘‘ਅਞ੍ਞਮ੍ਪੀ’’ਤਿ ਹਤ੍ਥਗਹਣਤੋ ਇਤਰਮ੍ਪਿ. ਅਪਾਰਾਜਿਕਕ੍ਖੇਤ੍ਤੇਤਿ ਉਬ੍ਭਕ੍ਖਕੇ ਅਧੋਜਾਣੁਮਣ੍ਡਲੇ. ਅਸ੍ਸਾਤਿ ‘‘ਹਤ੍ਥਗ੍ਗਹਣ’’ਨ੍ਤਿਪਦਸ੍ਸ. ਏਤ੍ਥਾਤਿ ‘‘ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯਾ’’ਤਿਪਦੇ. ਕਾਯਸਂਸਗ੍ਗੋਤਿ ਕਾਯਸਂਸਗ੍ਗੋ ਏਵ. ਤੇਨ ਵੁਤ੍ਤਂ ‘‘ਨ ਮੇਥੁਨਧਮ੍ਮੋ’’ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਕਾਯਸਂਸਗ੍ਗਗਹਣੇ. ਸਾਧਕਨ੍ਤਿ ਞਾਪਕਂ.

ਤਿਸ੍ਸਿਤ੍ਥਿਯੋਤਿ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਤੀਸੁ ਇਤ੍ਥੀਸੂਤਿ ਹਿ ਅਤ੍ਥੋ, ਤਿਸ੍ਸੋ ਇਤ੍ਥਿਯੋ ਉਪਗਨ੍ਤ੍ਵਾਤਿ ਵਾ ਯੋਜੇਤਬ੍ਬੋ. ਏਸੇਵ ਨਯੋ ਪਰਤੋਪਿ. ਯਂ ਮੇਥੁਨਂ ਅਤ੍ਥਿ, ਤਂ ਨ ਸੇਵੇਤਿ ਯੋਜਨਾ. ਨ ਸੇਵੇਤਿ ਚ ਨ ਸੇਵਤਿ. ਤਿਕਾਰਸ੍ਸ ਹਿ ਏਕਾਰੋ. ਤਯੋ ਪੁਰਿਸੇਤਿ ਤੀਸੁ ਪੁਰਿਸੇਸੁ, ਤੇ ਵਾ ਉਪਗਨ੍ਤ੍ਵਾ. ਤਯੋ ਚ ਅਨਰਿਯਪਣ੍ਡਕੇਤਿ ਤੀਸੁ ਅਨਰਿਯਸਙ੍ਖਾਤੇਸੁ ਉਭਤੋਬ੍ਯਞ੍ਜਨਕੇਸੁ ਚ ਪਣ੍ਡਕੇਸੁ ਚ, ਤੇ ਵਾ ਉਪਗਨ੍ਤ੍ਵਾਤਿ ਯੋਜਨਾ. ਨ ਚਾਚਰੇ ਮੇਥੁਨਂ ਬ੍ਯਞ੍ਜਨਸ੍ਮਿਨ੍ਤਿ ਅਤ੍ਤਨੋ ਨਿਮਿਤ੍ਤਸ੍ਮਿਂ ਮੇਥੁਨਂ ਨ ਚ ਆਚਰਤਿ. ਇਦਂ ਅਨੁਲੋਮਪਾਰਾਜਿਕਂ ਸਨ੍ਧਾਯ ਵੁਤ੍ਤਂ. ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾਤਿ ਮੇਥੁਨਧਮ੍ਮਕਾਰਣਾ ਛੇਜ੍ਜਂ ਸਿਯਾ, ਪਾਰਾਜਿਕਂ ਭਵੇਯ੍ਯਾਤਿ ਅਤ੍ਥੋ. ਕੁਸਲੇਹੀਤਿ ਪਞ੍ਹਾਵਿਸਜ੍ਜਨੇ ਛੇਕੇਹਿ, ਛੇਕਕਾਮੇਹਿ ਵਾ. ਅਯਂ ਪਞ੍ਹੋ ਅਟ੍ਠਵਤ੍ਥੁਕਂ ਸਨ੍ਧਾਯ ਵੁਤ੍ਤੋ.

ਪਞ੍ਹਾਵਿਸਜ੍ਜਨਤ੍ਥਾਯ ਚਿਨ੍ਤੇਨ੍ਤਾਨਂ ਸੇਦਮੋਚਨਕਾਰਣਤ੍ਤਾ ‘‘ਸੇਦਮੋਚਨਗਾਥਾ’’ਤਿ ਵੁਤ੍ਤਾ. ਵਿਰੁਜ੍ਝਤੀਤਿ ‘‘ਨ ਮੇਥੁਨਧਮ੍ਮੋ’’ਤਿ ਵਚਨੇਨ ‘‘ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾ’’ਤਿ ਵਚਨਂ ਵਿਰੁਜ੍ਝਤਿ, ਨ ਸਮੇਤੀਤਿ ਅਤ੍ਥੋ. ਇਤਿ ਚੇ ਵਦੇਯ੍ਯ, ਨ ਵਿਰੁਜ੍ਝਤਿ. ਕਸ੍ਮਾ? ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਤ੍ਤਾਤਿ ਯੋਜਨਾ. ਇਮਿਨਾ ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਭੂਤੋ ਕਾਯਸਂਸਗ੍ਗੋਵ ਉਪਚਾਰੇਨ ਤਤ੍ਥ ਮੇਥੁਨਧਮ੍ਮਸਦ੍ਦੇਨ ਵੁਤ੍ਤੋ, ਨ ਦ੍ਵਯਂਦ੍ਵਯਸਮਾਪਤ੍ਤੀਤਿ ਦੀਪੇਤਿ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਪਰਿਵਾਰੇਯੇਵ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਵਣ੍ਣਾਵਣ੍ਣੋਤਿ ਸੁਕ੍ਕਵਿਸਟ੍ਠਿ. ਧਨਮਨੁਪ੍ਪਾਦਾਨਨ੍ਤਿ ਸਞ੍ਚਰਿਤ੍ਤਂ. ‘‘ਇਮਿਨਾ ਪਰਿਯਾਯੇਨਾ’’ਤਿ ਇਮਿਨਾ ਲੇਸੇਨ ਸਮੀਪੂਪਚਾਰੇਨਾਤਿ ਅਤ੍ਥੋ. ਏਤੇਨੁਪਾਯੇਨਾਤਿ ‘‘ਹਤ੍ਥਗ੍ਗਹਣਂ ਸਾਦਿਯੇਯ੍ਯਾ’’ਤਿਪਦੇ ਵੁਤ੍ਤਉਪਾਯੇਨ. ਸਬ੍ਬਪਦੇਸੂਤਿ ਸਬ੍ਬੇਸੁ ‘‘ਸਙ੍ਘਾਟਿਕਣ੍ਣਗ੍ਗਹਣਂ ਸਾਦਿਯੇਯ੍ਯਾ’’ਤਿਆਦੀਸੁ ਪਦੇਸੁ. ਅਪਿ ਚਾਤਿ ਏਕਂਸੇਨ, ਵਿਸੇਸਂ ਵਕ੍ਖਾਮੀਤਿ ਅਧਿਪ੍ਪਾਯੋ. ‘‘ਏਵਂਨਾਮਕਂ ਠਾਨ’’ਨ੍ਤਿ ਇਮਿਨਾ ‘‘ਇਤ੍ਥਂਨਾਮਂ ਇਮਸ੍ਸ ਠਾਨਸ੍ਸਾ’’ਤਿ ਵਚਨਤ੍ਥਂ ਦੀਪੇਤਿ.

੬੭੬. ਏਕਨ੍ਤਰਿਕਾਯ ਵਾਤਿ ਏਤ੍ਥ ਵਾਸਦ੍ਦੇਨ ਦ੍ਵਨ੍ਤਰਿਕਾਦੀਨਿਪਿ ਸਙ੍ਗਯ੍ਹਨ੍ਤਿ. ਯੇਨ ਤੇਨਾਤਿ ਯੇਨ ਵਾ ਤੇਨ ਵਾ. ਦ੍ਵਿਤਿਚਤੁਪ੍ਪਞ੍ਚਛਵਤ੍ਥੂਨਿ ਪੇਯ੍ਯਾਲਵਸੇਨ ਵਾ ਵਾਸਦ੍ਦੇਨ ਵਾ ਗਹੇਤਬ੍ਬਾਨਿ. ਅਪਿ ਚਾਤਿ ਕਿਞ੍ਚ ਭਿਯ੍ਯੋ, ਵਤ੍ਤਬ੍ਬਵਿਸੇਸਂ ਵਕ੍ਖਾਮੀਤਿ ਅਧਿਪ੍ਪਾਯੋ. ਏਤ੍ਥਾਤਿ ‘‘ਆਪਤ੍ਤਿਯੋ ਦੇਸੇਤ੍ਵਾ’’ਤਿ ਵਚਨੇ. ਹੀਤਿ ਸਚ੍ਚਂ. ਵੁਤ੍ਤਨ੍ਤਿ ਪਰਿਵਾਰੇ ਵੁਤ੍ਤਂ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ਦੇਸਿਤਾ ਆਪਤ੍ਤਿ ਗਣਨੂਪਿਕਾਤਿ ਯੋਜਨਾ. ਏਕਂ ਵਤ੍ਥੁਂ ਆਪਨ੍ਨਾ ਯਾ ਭਿਕ੍ਖੁਨੀਤਿ ਯੋਜਨਾ. ਧੁਰਨਿਕ੍ਖੇਪਂ ਕਤ੍ਵਾਤਿ ‘‘ਇਮਞ੍ਚ ਵਤ੍ਥੁਂ, ਅਞ੍ਞਮ੍ਪਿ ਚ ਵਤ੍ਥੁਂ ਨਾਪਜ੍ਜਿਸ੍ਸਾਮੀ’’ਤਿ ਧੁਰਨਿਕ੍ਖੇਪਂ ਕਤ੍ਵਾ. ਯਾ ਪਨ ਸਉਸ੍ਸਾਹਾਵ ਦੇਸੇਤੀਤਿ ਯੋਜਨਾਤਿ. ਚਤੁਤ੍ਥਂ.

ਸਾਧਾਰਣਾਤਿ ਭਿਕ੍ਖੁਨੀਹਿ ਸਾਧਾਰਣਾ. ਏਤ੍ਥਾਤਿ ‘‘ਉਦ੍ਦਿਟ੍ਠਾ ਖੋ ਅਯ੍ਯਾਯੋ’’ਤਿਆਦਿਵਚਨੇ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਨਿਵਿਭਙ੍ਗੇ ਪਾਰਾਜਿਕਕਣ੍ਡਵਣ੍ਣਨਾਯ ਯੋਜਨਾ ਸਮਤ੍ਤਾ.