੮. ਅਰਿਟ੍ਠਸਿਕ੍ਖਾਪਦਂ

੪੧੭. ਅਟ੍ਠਮੇ ਗਨ੍ਧੇਤਿ ਗਿਜ੍ਝੇ. ਤੇ ਹਿ ਗਿਧਨ੍ਤਿ ਕੁਣਪਂ ਅਭਿਕਙ੍ਖਨ੍ਤੀਤਿ ‘‘ਗਨ੍ਧਾ’’ਤਿ ਵੁਚ੍ਚਨ੍ਤਿ. ਗਦ੍ਧੇਤਿਪਿ ਪਾਠੋ, ਸੋਪਿ ਯੁਜ੍ਜਤਿ ਯਥਾ ‘‘ਯੁਗਨਨ੍ਧੋ, ਯੁਗਨਦ੍ਧੋ’’ਤਿ ਚ ‘‘ਪਟਿਬਨ੍ਧੋ ਪਟਿਬਦ੍ਧੋ’’ਤਿ ਚ. ਬਾਧਯਿਂਸੂਤਿ ਹਨਿਂਸੁ. ਅਸ੍ਸਾਤਿ ਅਰਿਟ੍ਠਸ੍ਸ.

ਤਦ੍ਧਿਤੇਨ ਵੁਤ੍ਤਸ੍ਸ ਅਤ੍ਥਸ੍ਸ ਦਸ੍ਸੇਤੁਮਾਹ ‘‘ਤੇ’’ਤਿਆਦਿ. ਤੇਤਿ ਅਨ੍ਤਰਾਯਿਕਾ. ਤਤ੍ਥਾਤਿ ਪਞ੍ਚਵਿਧੇਸੁ ਅਨ੍ਤਰਾਯਿਕੇਸੁ. ‘‘ਤਥਾ’’ਤਿਪਦੇਨ ‘‘ਕਮ੍ਮਨ੍ਤਰਾਯਿਕਂ ਨਾਮਾ’’ਤਿ ਪਦਂ ਅਤਿਦਿਸਤਿ. ਤਂ ਪਨਾਤਿ ਭਿਕ੍ਖੁਨਿਦੂਸਕਕਮ੍ਮਂ ਪਨ. ਮੋਕ੍ਖਸ੍ਸੇਵਾਤਿ ਮਗ੍ਗਨਿਬ੍ਬਾਨਸ੍ਸੇਵ. ਮਗ੍ਗੋ ਹਿ ਕਿਲੇਸੇਹਿ ਮੁਚ੍ਚਤੀਤਿ ਅਤ੍ਥੇਨ ਮੋਕ੍ਖੋ ਨਾਮ. ਝਾਨਮ੍ਪੇਤ੍ਥ ਸਙ੍ਗਹਿਤਂ ਨੀਵਰਣੇਹਿ ਵਿਮੁਚ੍ਚਨਤ੍ਤਾ. ਨਿਬ੍ਬਾਨਂ ਵਿਮੁਚ੍ਚੀਤਿ ਅਤ੍ਥੇਨ ਮੋਕ੍ਖੋ ਨਾਮ. ਫਲਮ੍ਪੇਤ੍ਥ ਸਙ੍ਗਹਿਤਂ ਵਿਮੁਚ੍ਚਿਤਤ੍ਤਾ. ਨਿਯਤਮਿਚ੍ਛਾਦਿਟ੍ਠਿਧਮ੍ਮਾਤਿ ਨਿਯਤਭਾਵਂ ਪਤ੍ਤਾ, ਨਿਯਤਵਸੇਨ ਵਾ ਪਵਤ੍ਤਾ ਮਿਚ੍ਛਾਦਿਟ੍ਠਿਸਙ੍ਖਾਤਾ ਧਮ੍ਮਾ. ਤੇ ਪਨ ਨਤ੍ਥਿਕਅਹੇਤੁਕ ਅਕਿਰਿਯਵਸੇਨ ਤਿਵਿਧਾ. ਪਣ੍ਡਕਾਦਿਗਹਣਸ੍ਸ ਨਿਦਸ੍ਸਨਮਤ੍ਤਤ੍ਤਾ ‘ਪਟਿਸਨ੍ਧਿਧਮ੍ਮਾ’’ਤਿਪਦੇਨ ਅਹੇਤੁਕਦ੍ਵਿਹੇਤੁਕਪਟਿਸਨ੍ਧਿਧਮ੍ਮਾ ਗਹੇਤਬ੍ਬਾ ਸਬ੍ਬੇਸਮ੍ਪਿ ਵਿਪਾਕਨ੍ਤਰਾਯਿਕਭਾਵਤੋ. ਤੇਪਿ ਮੋਕ੍ਖਸ੍ਸੇਵ ਅਨ੍ਤਰਾਯਂ ਕਰੋਨ੍ਤਿ, ਨ ਸਗ੍ਗਸ੍ਸ. ਤੇ ਪਨਾਤਿ ਅਰਿਯੂਪਵਾਦਾ ਪਨ. ਤਾਵਦੇਵ ਉਪਵਾਦਨ੍ਤਰਾਯਿਕਾ ਨਾਮਾਤਿ ਯੋਜਨਾ. ਤਾਪੀਤਿ ਸਞ੍ਚਿਚ੍ਚ ਆਪਨ੍ਨਾ ਆਪਤ੍ਤਿਯੋਪਿ. ਪਾਰਾਜਿਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਭਿਕ੍ਖੁਭਾਵਂ ਵਾ ਪਟਿਜਾਨਾਤੀ’’ਤਿ. ਸਙ੍ਘਾਦਿਸੇਸਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਨ ਵੁਟ੍ਠਾਤਿ ਵਾ’’ਤਿ. ਲਹੁਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ ‘‘ਨ ਦੇਸੇਤਿ ਵਾ’’ਤਿ.

ਤਤ੍ਰਾਤਿ ਪਞ੍ਚਵਿਧੇਸੁ ਅਨ੍ਤਰਾਯਿਕੇਸੁ. ਅਯਂ ਭਿਕ੍ਖੂਤਿ ਅਰਿਟ੍ਠੋ ਗਨ੍ਧਬਾਧਿਪੁਬ੍ਬੋ ਭਿਕ੍ਖੁ. ਸੇਸਨ੍ਤਰਾਯਿਕੇਤਿ ਆਣਾਵੀਤਿਕ੍ਕਮਨ੍ਤਰਾਯਿਕਤੋ ਸੇਸੇ ਚਤੁਬ੍ਬਿਧੇ ਅਨ੍ਤਰਾਯਿਕੇ. ਇਮੇ ਆਗਾਰਿਕਾਤਿ ਅਗਾਰੇ ਵਸਨਸੀਲਾ ਇਮੇ ਮਨੁਸ੍ਸਾ. ਭਿਕ੍ਖੂਪਿ ਪਸ੍ਸਨ੍ਤਿ ਫੁਸਨ੍ਤਿ ਪਰਿਭੁਞ੍ਜਨ੍ਤੀਤਿ ਸਮ੍ਬਨ੍ਧੋ. ਕਸ੍ਮਾ ਨ ਵਟ੍ਟਨ੍ਤਿ, ਵਟ੍ਟਨ੍ਤਿਯੇਵਾਤਿ ਅਧਿਪ੍ਪਾਯੋ. ਰਸੇਨ ਰਸਂ ਸਂਸਨ੍ਦਿਤ੍ਵਾਤਿ ਉਪਾਦਿਣ੍ਣਕਰਸੇਨ ਅਨੁਪਾਦਿਣ੍ਣਕਰਸਂ, ਅਨੁਪਾਦਿਣ੍ਣਕਰਸੇਨ ਵਾ ਉਪਾਦਿਣ੍ਣਕਰਸਂ ਸਮਾਨੇਤ੍ਵਾ. ਯੋਨਿਸੋ ਪਚ੍ਚਵੇਕ੍ਖਣਸ੍ਸ ਅਭਾਵਤੋ ਸਂਵਿਜ੍ਜਤਿ ਛਨ੍ਦਰਾਗੋ ਏਤ੍ਥਾਤਿ ਸਚ੍ਛਨ੍ਦਰਾਗੋ, ਸੋਯੇਵ ਪਰਿਭੋਗੋ ਸਚ੍ਛਨ੍ਦਰਾਗਪਰਿਭੋਗੋ, ਤਂ. ਏਕਂ ਕਤ੍ਵਾਤਿ ਸਮਾਨਂ ਕਤ੍ਵਾ. ਘਟੇਨ੍ਤੋ ਵਿਯ ਪਾਪਕਂ ਦਿਟ੍ਠਿਗਤਂ ਉਪ੍ਪਾਦੇਤ੍ਵਾਤਿ ਯੋਜਨਾ. ਕਿਂਸਦ੍ਦੋ ਗਰਹਤ੍ਥੋ, ਕਸ੍ਮਾ ਭਗਵਤਾ ਪਠਮਪਾਰਾਜਿਕਂ ਪਞ੍ਞਤ੍ਤਂ, ਨ ਪਞ੍ਞਾਪੇਤਬ੍ਬਨ੍ਤਿ ਅਤ੍ਥੋ. ਮਹਾਸਮੁਦ੍ਦਂ ਬਨ੍ਧਨ੍ਤੋ ਯਥਾ ਅਕਤ੍ਤਬ੍ਬਂ ਕਰੋਤਿ, ਤਥਾ ਪਠਮਪਾਰਾਜਿਕਂ ਪਞ੍ਞਪੇਨ੍ਤੋ ਭਗਵਾ ਅਪਞ੍ਞਤ੍ਤਂ ਪਞ੍ਞਪੇਤੀਤਿ ਅਧਿਪ੍ਪਾਯੋ. ਏਤ੍ਥਾਤਿ ਪਠਮਪਾਰਾਜਿਕੇ. ਆਸਨ੍ਤਿ ਭਬ੍ਬਾਸਂ. ਆਣਾਚਕ੍ਕੇਤਿ ਆਣਾਸਙ੍ਖਾਤੇ ਚਕ੍ਕੇ.

ਅਟ੍ਠਿਯੇਵ ਅਟ੍ਠਿਕਂ ਕੁਚ੍ਛਿਤਤ੍ਥੇਨ, ਕੁਚ੍ਛਿਤਤ੍ਥੇ ਹਿ ਕੋ. ਅਟ੍ਠਿਕਮੇਵ ਖਲੋ ਨੀਚਟ੍ਠੇਨ ਲਾਮਕਟ੍ਠੇਨਾਤਿ ਅਟ੍ਠਿਕਙ੍ਖਲੋ ਨਿਗ੍ਗਹੀਤਾਗਮਂ ਕਤ੍ਵਾ. ਤੇਨ ਉਪਮਾ ਸਦਿਸਾਤਿ ਅਟ੍ਠਿਕਙ੍ਖਲੂਪਮਾ. ‘‘ਅਟ੍ਠੀ’’ਤਿ ਚ ‘‘ਕਙ੍ਖਲ’’ਨ੍ਤਿ ਚ ਪਦਂ ਗਹੇਤ੍ਵਾ ਵਣ੍ਣੇਨ੍ਤਿ ਆਚਰਿਯਾ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੪੧੭; ਵਿ. ਵਿ. ਟੀ. ਪਾਚਿਤ੍ਤਿਯ ੨.੪੧੭; ਮ. ਨਿ. ਅਟ੍ਠ. ੨.੪੨; ਮ. ਨਿ. ਟੀ. ੩.੪੨). ਅਙ੍ਗਾਰਕਾਸੂਪਮਾਤਿ ਅਙ੍ਗਾਰਰਾਸਿਸਦਿਸਾ, ਅਙ੍ਗਾਰੇਹਿ ਵਾ ਪਰਿਪੁਣ੍ਣਾ ਆਵਾਟਸਦਿਸਾ. ਅਸਿਸੂਨੂਪਮਾਤਿ ਏਤ੍ਥ ਅਸੀਤਿ ਖਗ੍ਗੋ. ਸੋ ਹਿ ਅਸਤੇ ਖਿਪਤੇ ਅਨੇਨਾਤਿ ‘‘ਅਸੀ’’ਤਿ ਵੁਚ੍ਚਤਿ. ਸੂਨਾਤਿ ਅਧਿਕੋਟ੍ਟਨਂ. ਤਞ੍ਹਿ ਸੁਨਤਿ ਸਞ੍ਚੁਣ੍ਣਭਾਵਂ ਗਚ੍ਛਤਿ ਏਤ੍ਥਾਤਿ ‘‘ਸੂਨਾ’’ਤਿ ਵੁਚ੍ਚਤਿ. ਅਸਿਨਾ ਸੂਨਾਤਿ ਅਸਿਸੂਨਾ, ਤਾਯ ਉਪਮਾ ਸਦਿਸਾਤਿ ਅਸਿਸੂਨੂਪਮਾ. ਸਤ੍ਤਿਸੂਲੂਪਮਾਤਿ ਸਤ੍ਤਿਯਾ ਚ ਸੂਲੇਨ ਚ ਸਦਿਸਾ. ਏਤ੍ਥਾਤਿ ਇਮਿਸ੍ਸਂ ਅਟ੍ਠਕਥਾਯਂ. ਮਜ੍ਝਿਮਟ੍ਠਕਥਾਯਂ ਅਲਗਦ੍ਦੂਪਮਸੁਤ੍ਤੇ (ਮ. ਨਿ. ਅਟ੍ਠ. ੧.੨੩੪ ਆਦਯੋ) ਗਹੇਤਬ੍ਬੋ. ਏਵਂਸਦ੍ਦਖੋਸਦ੍ਦਾਨਮਨ੍ਤਰੇ ਵਿਯਸਦ੍ਦਸ੍ਸ ਬ੍ਯਾਦੇਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਏਵਂ ਵਿਯ ਖੋ’’ਤਿ. ਅਟ੍ਠਮਂ.