੪. ਕਾਣਮਾਤਾਸਿਕ੍ਖਾਪਦਂ

੨੩੦. ਚਤੁਤ੍ਥੇ ‘‘ਨਕੁਲਮਾਤਾਤਿ’’ਆਦੀਸੁ (ਅ. ਨਿ. ੧.੨੬੬; ਅ. ਨਿ. ਅਟ੍ਠ. ੧.੧.੨੬੬) ਨਕੁਲਸ੍ਸ ਭਗਵਤੋ ਮਾਤਾ ਨਕੁਲਮਾਤਾਤਿ ਚ ਨਕੁਲਞ੍ਚ ਭਗਵਤੋ ਤਂ ਮਾਤਾ ਚਾਤਿ ਨਕੁਲਮਾਤਾਤਿ ਚ ਅਤ੍ਥੋ ਸਮ੍ਭਵਤਿ, ‘‘ਉਤ੍ਤਰਮਾਤਾਤਿ’’ਆਦੀਸੁ ਉਤ੍ਤਰਾਯ ਮਾਤਾ ਉਤ੍ਤਰਮਾਤਾਤਿ ਅਤ੍ਥੋਯੇਵ ਸਮ੍ਭਵਤਿ. ਤੇਸੁ ‘‘ਉਤ੍ਤਰਮਾਤਾ’’ਤਿਪਦਸ੍ਸੇਵ ‘‘ਕਾਣਮਾਤਾ’’ਤਿਪਦਸ੍ਸ ਕਾਣਾਯ ਮਾਤਾ ਕਾਣਮਾਤਾਤਿ ਅਤ੍ਥੋਯੇਵ ਸਮ੍ਭਵਤੀਤਿ ਆਹ ‘‘ਕਾਣਾਯ ਮਾਤਾ’’ਤਿ. ਤਸ੍ਸਾ ਧੀਤੁਯਾ ‘‘ਕਾਣਾ’’ਤਿਨਾਮੇਨ ਵਿਸ੍ਸੁਤਭਾਵਂ ਦਸ੍ਸੇਨ੍ਤੋ ਆਹ ‘‘ਸਾ ਕਿਰਾ’’ਤਿਆਦਿ. ਸਾਤਿ ਦਾਰਿਕਾ ਵਿਸ੍ਸੁਤਾ ਅਹੋਸੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਮਹਾਉਪਾਸਿਕਾਯ. ਯੇ ਯੇਤਿ ਪੁਰਿਸਾ. ‘‘ਰਾਗੇਨ ਕਾਣਾ ਹੋਨ੍ਤੀ’’ਤਿਇਮਿਨਾ ਕਣਨ੍ਤਿ ਨਿਮਿਲਨ੍ਤਿ ਰਾਗੇਨ ਪੁਰਿਸਾ ਏਤਾਯਾਤਿ ਕਾਣਾਤਿ ਅਤ੍ਥਂ ਦਸ੍ਸੇਤਿ. ਤਸ੍ਸਾਤਿ ਕਾਣਾਯ. ਆਗਤਨ੍ਤਿ ਏਤ੍ਥ ਭਾਵਤ੍ਥੇ ਤੋਤਿ ਆਹ ‘‘ਆਗਮਨ’’ਨ੍ਤਿ. ਅਧਿਪ੍ਪਾਯੋਤਿ ‘‘ਕਿਸ੍ਮਿਂ ਵਿਯਾ’’ਤਿਪਦਸ੍ਸ, ਕਾਣਮਾਤਾਯ ਵਾ ਅਧਿਪ੍ਪਾਯੋ. ਰਿਤ੍ਤਾਤਿ ਤੁਚ੍ਛਾ, ਸੁਞ੍ਞਾਤਿ ਅਤ੍ਥੋ. ‘‘ਅਸ੍ਮਿਂ ਗਮਨੇ’’ਤਿਇਮਿਨਾ ਬਾਹਿਰਤ੍ਥਸਮਾਸਂ ਦਸ੍ਸੇਤਿ. ‘‘ਅਰਿਯਸਾਵਿਕਾ’’ਤਿਆਦਿਨਾ ਅਰਿਯਾਨਂ ਭਿਕ੍ਖੂਹਿ ਅਪਟਿਵਿਭਤ੍ਤਭੋਗਂ ਦਸ੍ਸੇਤਿ. ਨ ਕੇਵਲਂ ਕਿਞ੍ਚਿ ਪਰਿਕ੍ਖਯਂ ਅਗਮਾਸਿ, ਅਥ ਖੋ ਸਬ੍ਬਨ੍ਤਿ ਆਹ ‘‘ਸਬ੍ਬਂ ਪਰਿਕ੍ਖਯਂ ਅਗਮਾਸੀ’’ਤਿ. ਕਾਣਾਪੀਤਿ ਪਿਸਦ੍ਦੋ ਨ ਕੇਵਲਂ ਮਾਤਾਯੇਵ ਮਗ੍ਗਫਲਭਾਗਿਨੀ ਅਹੋਸਿ, ਅਥ ਖੋ ਕਾਣਾਪਿ ਸੋਤਾਪਨ੍ਨਾ ਅਹੋਸੀਤਿ ਦਸ੍ਸੇਤਿ. ਸੋਪਿ ਪੁਰਿਸੋਤਿ ਕਾਣਾਯ ਪਤਿਭੂਤੋ ਸੋਪਿ ਪੁਰਿਸੋ. ਪਕਤਿਟ੍ਠਾਨੇਯੇਵਾਤਿ ਜੇਟ੍ਠਕਪਜਾਪਤਿਟ੍ਠਾਨੇਯੇਵ.

੨੩੧. ਇਮਸ੍ਮਿਂ ਪਨ ਵਤ੍ਥੁਸ੍ਮਿਨ੍ਤਿ ਇਮਸ੍ਮਿਂ ਪੂਵਵਤ੍ਥੁਸ੍ਮਿਂ. ਏਤਨ੍ਤਿ ਪਾਥੇਯ੍ਯਵਤ੍ਥੁਂ. ਅਰਿਯਸਾਵਕਤ੍ਤਾਤਿ ਅਰਿਯਭੂਤਸ੍ਸ ਸਾਵਕਸ੍ਸ ਭਾਵਤੋ, ਅਰਿਯਸ੍ਸ ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਕਭਾਵਤੋ.

੨੩੩. ਪਹੇਣਕਪਣ੍ਣਾਕਾਰਸਦ੍ਦਾਨਂ ਅਞ੍ਞਮਞ੍ਞਵੇਵਚਨਤ੍ਤਾ ਵੁਤ੍ਤਂ ‘‘ਪਹੇਣਕਤ੍ਥਾਯਾਤਿ ਪਣ੍ਣਾਕਾਰਤ੍ਥਾਯਾ’’ਤਿ. ਇਧਾਤਿ ‘‘ਪੂਵੇਹਿ ਵਾ’’ਤਿਪਦੇ, ਸਿਕ੍ਖਾਪਦੇ ਵਾ. ਬਦ੍ਧਸਤ੍ਤੂਤਿ ਮਧੁਸਕ੍ਖਰਾਦੀਹਿ ਮਿਸ੍ਸੇਤ੍ਵਾ ਬਦ੍ਧਸਤ੍ਤੁ. ਥੂਪੀਕਤਨ੍ਤਿ ਥੂਪੀਕਤਂ ਕਤ੍ਵਾ.

‘‘ਦ੍ਵਤ੍ਤਿਪਤ੍ਤਪੂਰੇ’’ਤਿਪਦਸ੍ਸ ਵਿਸੇਸਨੁਤ੍ਤਰਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪੂਰੇ ਪਤ੍ਤੇ’’ਤਿ. ਦ੍ਵੇ ਵਾ ਤਯੋ ਵਾ ਪਤ੍ਤਾਤਿ ਦ੍ਵਤ੍ਤਿਪਤ੍ਤਾ, ਵਾਸਦ੍ਦਤ੍ਥੇ ਸਙ੍ਖ੍ਯੋਭਯਬਾਹਿਰਤ੍ਥਸਮਾਸੋ, ਤਿਸਦ੍ਦਪਰਤ੍ਤਾ ਦ੍ਵਿਸ੍ਸ ਚ ਅਕਾਰੋ ਹੋਤਿ, ਦ੍ਵਤ੍ਤਿਪਤ੍ਤਾ ਚ ਤੇ ਪੂਰਾ ਚਾਤਿ ਦ੍ਵਤ੍ਤਿਪਤ੍ਤਪੂਰਾ, ਤੇ ਦ੍ਵਤ੍ਤਿਪਤ੍ਤਪੂਰੇ ਗਹੇਤ੍ਵਾਤਿ ਯੋਜਨਾ. ‘‘ਆਚਿਕ੍ਖਿਤਬ੍ਬ’’ਨ੍ਤਿ ਵੁਤ੍ਤਵਚਨਸ੍ਸ ਆਚਿਕ੍ਖਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਤ੍ਰ ਮਯਾ’’ਤਿਆਦਿ. ਤੇਨਾਪੀਤਿ ਦੁਤਿਯੇਨਾਪਿ. ਪਠਮਭਿਕ੍ਖੁ ਏਕਂ ਗਹੇਤ੍ਵਾ ਦੁਤਿਯਭਿਕ੍ਖੁਸ੍ਸ ਆਰੋਚਨਞ੍ਚ ਦੁਤਿਯਭਿਕ੍ਖੁ ਏਕਂ ਗਹੇਤ੍ਵਾ ਤਤਿਯਭਿਕ੍ਖੁਸ੍ਸ ਆਰੋਚਨਞ੍ਚ ਅਤਿਦਿਸਨ੍ਤੋ ਆਹ ‘‘ਯੇਨਾ’’ਤਿਆਦਿ. ਤਤ੍ਥ ਯੇਨਾਤਿ ਪਠਮਭਿਕ੍ਖੁਨਾ. ਪਟਿਕ੍ਕਮਨ੍ਤਿ ਭੁਞ੍ਜੀਤ੍ਵਾ ਏਤ੍ਥਾਤਿ ਪਟਿਕ੍ਕਮਨਨ੍ਤਿ ਵੁਤ੍ਤੇ ਅਸਨਸਾਲਾਵ ਗਹੇਤਬ੍ਬਾਤਿ ਆਹ ‘‘ਅਸਨਸਾਲ’’ਨ੍ਤਿ. ਯਤ੍ਥਾਤਿ ਯਸ੍ਸਂ ਅਸਨਸਾਲਾਯਂ. ਮੁਖੋਲੋਕਨਂ ਨ ਵਟ੍ਟਤੀਤਿ ਆਹ ‘‘ਅਤ੍ਤਨੋ’’ਤਿਆਦਿ. ਅਞ੍ਞਤ੍ਥਾਤਿ ਪਟਿਕ੍ਕਮਨਤੋ ਅਞ੍ਞਤ੍ਥ. ਅਸ੍ਸਾਤਿ ਭਿਕ੍ਖੁਸ੍ਸ.

‘‘ਸਂਵਿਭਜਿਤਬ੍ਬ’’ਨ੍ਤਿ ਵੁਤ੍ਤਵਚਨਸ੍ਸ ਸਂਵਿਭਜਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਸਚੇ ਤਯੋ’’ਤਿਆਦਿ. ਯਥਾਮਿਤ੍ਤਨ੍ਤਿ ਯਸ੍ਸ ਯਸ੍ਸ ਮਿਤ੍ਤਸ੍ਸ. ਅਕਾਮਾਤਿ ਨ ਕਾਮੇਨ. ਕਾਰਣਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ.

੨੩੫. ਅਨ੍ਤਰਾਮਗ੍ਗੇਤਿ ਮਗ੍ਗਸ੍ਸ ਅਨ੍ਤਰੋ ਅਨ੍ਤਰਾਮਗ੍ਗੋ, ਸੁਖੁਚ੍ਚਾਰਣਤ੍ਥਂ ਮਜ੍ਝੇ ਦੀਘੋ, ਤਸ੍ਮਿਂ. ਬਹੁਮ੍ਪਿ ਦੇਨ੍ਤਾਨਂ ਏਤੇਸਂ ਞਾਤਕਪਵਾਰਿਤਾਨਂ ਬਹੁਮ੍ਪਿ ਪਟਿਗ੍ਗਣ੍ਹਨ੍ਤਸ੍ਸਾਤਿ ਯੋਜਨਾ. ਅਟ੍ਠਕਥਾਸੁ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਟ੍ਠਕਥਾਨਂ ਵਚਨਂ ਪਾਲ਼ਿਯਾ ਨ ਸਮੇਤੀਤਿ. ਚਤੁਤ੍ਥਂ.