੨. ਗਣਭੋਜਨਸਿਕ੍ਖਾਪਦਂ

੨੦੯. ਦੁਤਿਯੇ ਪਹੀਨਲਾਭਸਕ੍ਕਾਰਸ੍ਸ ਹੇਤੁਂ ਦਸ੍ਸੇਨ੍ਤੋ ਆਹ ‘‘ਸੋ ਕਿਰਾ’’ਤਿਆਦਿ. ਸੋਤਿ ਦੇਵਦਤ੍ਤੋ. ‘‘ਅਹੋਸੀ’’ਤਿ ਚ ‘‘ਪਾਕਟੋ ਜਾਤੋ’’ਤਿ ਚ ਯੋਜੇਤਬ੍ਬੋ. ਅਜਾਤਸਤ੍ਤੁਨਾਤਿ ਅਜਾਤਸ੍ਸੇਯੇਵ ਪਿਤੁਰਾਜਸ੍ਸ ਸਤ੍ਤੁਭਾਵਤੋ ਅਜਾਤਸਤ੍ਤੁਨਾ, ‘‘ਮਾਰਾਪੇਤ੍ਵਾ’’ਤਿਪਦੇ ਕਾਰਿਤਕਮ੍ਮਂ. ਰਾਜਾਨਨ੍ਤਿ ਬਿਮ੍ਬਿਸਾਰਰਾਜਂ, ‘‘ਮਾਰਾਪੇਤ੍ਵਾ’’ਤਿਪਦੇ ਧਾਤੁਕਮ੍ਮਂ. ਅਭਿਮਾਰੇਤਿ ਅਭਿਨਿਲੀਯਿਤ੍ਵਾ ਭਗਵਤੋ ਮਾਰਣਤ੍ਥਾਯ ਪੇਸਿਤੇ ਧਨੁਧਰੇ. ਗੂਲ਼੍ਹਪਟਿਚ੍ਛਨ੍ਨੋਤਿ ਗੁਹਿਤੋ ਹੁਤ੍ਵਾ ਪਟਿਚ੍ਛਨ੍ਨੋ. ਪਰਿਕਥਾਯਾਤਿ ਪਰਿਗੁਹਨਾਯ ਕਥਾਯ. ‘‘ਰਾਜਾਨਮ੍ਪੀ’’ਤਿਪਦਂ ‘‘ਮਾਰਾਪੇਸੀ’’ਤਿਪਦੇ ਧਾਤੁਕਮ੍ਮਂ. ਪਵਿਜ੍ਝੀਤਿ ਪਵਟ੍ਟੇਸਿ. ਤਤੋਤਿ ਤਤੋ ਵੁਤ੍ਤਤੋ ਪਰਂ ਉਟ੍ਠਹਿਂਸੂਤਿ ਸਮ੍ਬਨ੍ਧੋ. ਨਗਰੇ ਨਿਵਸਨ੍ਤੀਤਿ ਨਾਗਰਾ. ਰਾਜਾਤਿ ਅਜਾਤਸਤ੍ਤੁਰਾਜਾ. ਸਾਸਨਕਣ੍ਟਕਨ੍ਤਿਸਾਸਨਸ੍ਸ ਕਣ੍ਟਕਸਦਿਸਤ੍ਤਾ ਸਾਸਨਕਣ੍ਟਕਂ. ਤਤੋਤਿ ਨੀਹਰਤੋ. ਉਪਟ੍ਠਾਨਮ੍ਪੀਤਿ ਉਪਟ੍ਠਾਨਮ੍ਪਿ, ਉਪਟ੍ਠਾਨਤ੍ਥਾਯਪਿ ਵਾ. ਅਞ੍ਞੇਪੀਤਿ ਰਾਜਤੋ ਅਞ੍ਞੇਪਿ. ਅਸ੍ਸਾਤਿ ਦੇਵਦਤ੍ਤਸ੍ਸ. ਕਿਞ੍ਚਿ ਖਾਦਨੀਯਭੋਜਨੀਯਂ ‘‘ਦਾਤਬ੍ਬ’’ਨ੍ਤਿ ਇਮਿਨਾ ਯੋਜੇਤਬ੍ਬਂ. ਕਿਞ੍ਚਿ ਵਾ ਅਭਿਵਾਦਨਾਦਿ ‘‘ਕਾਤਬ੍ਬ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਕੁਲੇਸੁ ਵਿਞ੍ਞਾਪੇਤ੍ਵਾ ਭੁਞ੍ਜਨਸ੍ਸ ਹੇਤੁਂ ਦਸ੍ਸੇਨ੍ਤੋ ਆਹ ‘‘ਮਾ ਮੇ’’ਤਿਆਦਿ. ਪੋਸੇਨ੍ਤੋ ਹੁਤ੍ਵਾ ਭੁਞ੍ਜਤੀਤਿ ਸਮ੍ਬਨ੍ਧੋ.

੨੧੧. ਭਤ੍ਤਂ ਅਨਧਿਵਾਸੇਨ੍ਤਾਨਂ ਕਸ੍ਮਾ ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤੀਤਿ ਆਹ ‘‘ਭਤ੍ਤਂ ਅਗਣ੍ਹਨ੍ਤਾਨ’’ਨ੍ਤਿਆਦਿ.

੨੧੨. ਚੀਵਰਕਾਰਕੇ ਭਿਕ੍ਖੂ ਭਤ੍ਤੇਨ ਕਸ੍ਮਾ ਨਿਮਨ੍ਤੇਨ੍ਤੀਤਿ ਆਹ ‘‘ਗਾਮੇ’’ਤਿਆਦਿ.

੨੧੫. ਨਾਨਾਵੇਰਜ੍ਜਕੇਤਿ ਏਤ੍ਥ ਰਞ੍ਞੋ ਇਦਂ ਰਜ੍ਜਂ, ਵਿਸਦਿਸਂ ਰਜ੍ਜਂ ਵਿਰਜ੍ਜਂ, ਨਾਨਪ੍ਪਕਾਰਂ ਵਿਰਜ੍ਜਂ ਨਾਨਾਵਿਰਜ੍ਜਂ. ਨਾਨਾਵਿਰਜ੍ਜੇਹਿ ਆਗਤਾ ਨਾਨਾਵੇਰਜ੍ਜਕਾ. ਮਜ੍ਝੇ ਵੁਦ੍ਧਿ ਹੋਤੀਤਿ ਆਹ ‘‘ਨਾਨਾਵਿਧੇਹਿ ਅਞ੍ਞਰਜ੍ਜੇਹਿ ਆਗਤੇ’’ਤਿ. ਅਞ੍ਞਰਜ੍ਜੇਹੀਤਿ ਰਾਜਗਹਤੋ ਅਞ੍ਞੇਹਿ ਰਜ੍ਜੇਹਿ. ਰਞ੍ਜਿਤਬ੍ਬਨ੍ਤਿ ਰਞ੍ਜਨ੍ਤਿ ਵੁਤ੍ਤੇ ਨਿਗ੍ਗਹਿਤਸ੍ਸ ਅਨਾਸਨਂ ਸਨ੍ਧਾਯ ਵੁਤ੍ਤਂ ‘‘ਨਾਨਾਵੇਰਞ੍ਜਕੇਇਤਿਪਿ ਪਾਠੋ’’ਤਿ.

੨੧੮. ਗਣਭੋਜਨੇਤਿ ਗਣਸ੍ਸ ਭੋਜਨਂ ਗਣਭੋਜਨਂ, ਗਣਭੋਜਨਸ੍ਸ ਭੋਜਨਂ ਗਣਭੋਜਨਂ, ਤਸ੍ਮਿਂ ਗਣਭੋਜਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ. ‘‘ਰਤ੍ਤੂਪਰਤੋ’’ਤਿਆਦੀਸੁ (ਦੀ. ਨਿ. ੧.੧੦; ਮ. ਨਿ. ੧.੨੯੩) ਵਿਯ ਏਕਸ੍ਸ ਭੋਜਨਸਦ੍ਦਸ੍ਸ ਲੋਪੋ ਦਟ੍ਠਬ੍ਬੋ. ਨਨੁ ਉਪੋਸਥੇ ਵਿਯ ਦ੍ਵੇ ਤਯੋ ਗਣੋ ਨਾਮਾਤਿ ਆਹ ‘‘ਇਧ ਗਣੋ ਨਾਮ ਚਤ੍ਤਾਰੋ’’ਤਿਆਦਿ. ਤੇਨ ਦ੍ਵੇ ਤਯੋ ਗਣੋ ਨਾਮ ਨ ਹੋਨ੍ਤਿ, ਚਤ੍ਤਾਰੋ ਪਨ ਆਦਿਂ ਕਤ੍ਵਾ ਤਦੁਤ੍ਤਰਿ ਗਣੋ ਨਾਮਾਤਿ ਦਸ੍ਸੇਤਿ. ਤਂ ਪਨੇਤਨ੍ਤਿ ਏਤ੍ਥ ਏਤਸਦ੍ਦੋ ਵਚਨਾਲਙ੍ਕਾਰੋ ਦ੍ਵੀਸੁ ਸਬ੍ਬਨਾਮੇਸੁ ਪੁਬ੍ਬਸ੍ਸੇਵ ਯੇਭੁਯ੍ਯੇਨ ਪਧਾਨਤ੍ਤਾ. ਪਸਵਤੀਤਿ ਵਡ੍ਢਤਿ, ਜਾਯਤੀਤਿ ਅਤ੍ਥੋ. ਵੇਵਚਨੇਨ ਵਾਤਿ ‘‘ਭਤ੍ਤੇਨ ਨਿਮਨ੍ਤੇਮਿ, ਭੋਜਨੇਨ ਨਿਮਨ੍ਤੇਮੀ’’ਤਿ ਪਰਿਯਾਯੇਨ ਵਾ. ਭਾਸਨ੍ਤਰੇਨ ਵਾਤਿ ਮੂਲਭਾਸਾਤੋ ਅਞ੍ਞਾਯ ਭਾਸਾਯ ਵਾ. ਏਕਤੋ ਨਿਮਨ੍ਤਿਤਾ ਭਿਕ੍ਖੂਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਮਾਣਨ੍ਤਿ ਕਾਰਣਂ. ‘‘ਚਤ੍ਤਾਰੋ’’ਤਿ ਲਿਙ੍ਗਵਿਪਲ੍ਲਾਸਂ ਕਤ੍ਵਾ ‘‘ਵਿਹਾਰੇ’’ਤਿਪਦੇਨ ਯੋਜੇਤਬ੍ਬਂ. ਠਿਤੇਸੁਯੇਵਾਤਿ ਪਦਂ ਨਿਦ੍ਧਾਰਣਸਮੁਦਾਯੋ. ਏਕੋ ਨਿਮਨ੍ਤਿਤੋਤਿ ਸਮ੍ਬਨ੍ਧੋ.

ਚਤ੍ਤਾਰੋ ਭਿਕ੍ਖੂ ਵਿਞ੍ਞਾਪੇਯ੍ਯੁਨ੍ਤਿ ਸਮ੍ਬਨ੍ਧੋ. ਪਾਟੇਕ੍ਕਨ੍ਤਿ ਪਤਿਏਕਸ੍ਸ ਭਾਵੋ ਪਾਟੇਕ੍ਕਂ, ਵਿਸੁਨ੍ਤਿ ਅਤ੍ਥੋ. ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਯ੍ਯੁਨ੍ਤਿ ਸਮ੍ਬਨ੍ਧੋ.

ਛਵਿਸਙ੍ਖਾਤਤੋ ਬਾਹਿਰਚਮ੍ਮਤੋ ਅਬ੍ਭਨ੍ਤਰਚਮ੍ਮਸ੍ਸ ਥੂਲਤ੍ਤਾ ‘‘ਮਹਾਚਮ੍ਮਸ੍ਸਾ’’ਤਿ ਵੁਤ੍ਤਂ. ਫਾਲਂ ਏਤੇਸਂ ਪਾਦਾਨਂ ਸਞ੍ਜਾਤਨ੍ਤਿ ਫਾਲਿਤਾ, ਉਪ੍ਪਾਦੇਨ੍ਤੀਤਿ ਸਮ੍ਬਨ੍ਧੋ. ਪਹਟਮਤ੍ਤੇ ਸਤੀਤਿ ਯੋਜਨਾ. ਲੇਸੇਨ ਕਪ੍ਪਨ੍ਤਿ ਪਵਤ੍ਤਂ ਚਿਤ੍ਤਂ ਲੇਸਕਪ੍ਪਿਯਂ.

ਸੁਤ੍ਤਞ੍ਚਾਤਿ ਸੂਚਿਪਾਸਪਵੇਸਨਸੁਤ੍ਤਞ੍ਚ. ਨਨੁ ਵਿਸੁਂ ਚੀਵਰਦਾਨਸਮਯੋ ਵਿਯ ਚੀਵਰਕਾਰਸਮਯੋਪਿ ਅਤ੍ਥਿ, ਕਸ੍ਮਾ ‘‘ਯਦਾ ਤਦਾ’’ਤਿ ਵੁਤ੍ਤਨ੍ਤਿ ਆਹ ‘‘ਵਿਸੁਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਵਿਸੁਂ ਚੀਵਰਦਾਨਸਮਯੋ ਵਿਯ ਚੀਵਰਕਾਰਸਮਯੋ ਨਾਮ ਯਸ੍ਮਾ ਨਤ੍ਥਿ, ਤਸ੍ਮਾ ‘‘ਯਦਾ ਤਦਾ’’ਤਿ ਮਯਾ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਤਸ੍ਮਾ ਯੋ ਭਿਕ੍ਖੁ ਕਰੋਤਿ, ਤੇਨ ਭੁਞ੍ਜਿਤਬ੍ਬਨ੍ਤਿ ਯੋਜਨਾ. ਸੂਚਿਵੇਠਨਕੋਤਿ ਸਿਬ੍ਬਨਤ੍ਥਾਯ ਦ੍ਵੇ ਪਿਲੋਤਿਕਖਣ੍ਡੇ ਸਮ੍ਬਨ੍ਧਿਤ੍ਵਾ ਸੂਚਿਯਾ ਵਿਜ੍ਝਨਕੋ. ਵਿਚਾਰੇਤੀਤਿ ਪਞ੍ਚਖਣ੍ਡਸਤ੍ਤਖਣ੍ਡਾਦਿਵਸੇਨ ਸਂਵਿਦਹਤਿ. ਛਿਨ੍ਦਤੀਤਿ ਸਤ੍ਥਕੇਨ ਵਾ ਹਤ੍ਥੇਨ ਵਾ ਛਿਨ੍ਦਤਿ. ਮੋਘਸੁਤ੍ਤਨ੍ਤਿ ਮੁਯ੍ਹਨਂ ਮੋਘੋ, ਅਤ੍ਥਤੋ ਗਹੇਤਬ੍ਬਛਟ੍ਟੇਤਬ੍ਬਟ੍ਠਾਨੇ ਮੁਯ੍ਹਨਚਿਤ੍ਤਂ, ਤਸ੍ਸ ਛਿਨ੍ਦਨਂ ਸੁਤ੍ਤਨ੍ਤਿ ਮੋਘਸੁਤ੍ਤਂ. ਆਗਨ੍ਤੁਕਪਟ੍ਟਨ੍ਤਿ ਦੁਪਟ੍ਟਚੀਵਰੇ ਮੂਲਪਟ੍ਟਸ੍ਸ ਉਪਰਿ ਠਪਿਤਪਟ੍ਟਂ. ਪਚ੍ਚਾਗਤਨ੍ਤਿ ਪਟ੍ਟਚੀਵਰਾਦੀਸੁ ਲਬ੍ਭਤਿ. ਬਨ੍ਧਤੀਤਿ ਮੂਲਪਟ੍ਟੇਨ ਆਗਨ੍ਤੁਕਪਟ੍ਟਂ. ਬਨ੍ਧਤਿ. ਅਨੁਵਾਤਨ੍ਤਿ ਚੀਵਰਂ ਅਨੁਪਰਿਯਾਯਿਤ੍ਵਾ ਵੀਯਤਿ ਬਨ੍ਧੀਯਤੀਤਿ ਅਨੁਵਾਤਂ, ਤਂ ਛਿਨ੍ਦਤਿ. ਘਟ੍ਟੇਤੀਤਿ ਦ੍ਵੇ ਅਨੁਵਾਤਨ੍ਤੇ ਅਞ੍ਞਮਞ੍ਞਂ ਸਮ੍ਬਜ੍ਝਤਿ. ਆਰੋਪੇਤੀਤਿ ਚੀਵਰਸ੍ਸ ਉਪਰਿ ਆਰੋਪੇਤਿ. ਤਤ੍ਥਾਤਿ ਚੀਵਰੇ. ਸੁਤ੍ਤਂ ਕਰੋਤੀਤਿ ਸੂਚਿਪਾਸਪਵੇਸਨਸੁਤ੍ਤਂ ਵਟ੍ਟੇਤਿ. ਵਲੇਤੀਤਿ ਵਟ੍ਟਿਤ੍ਵਾ ਸੁਤ੍ਤਵੇਠਨਦਣ੍ਡਕੇ ਆਵਟ੍ਟੇਤਿ. ਪਿਪ੍ਫਲਿਕਨ੍ਤਿ ਸਤ੍ਥਕਂ. ਤਞ੍ਹਿ ਪਿਯਮ੍ਪਿ ਫਾਲੇਤੀਤਿ ਪਿਪ੍ਫਲਿ, ਸਾਯੇਵ ਪਿਪ੍ਫਲਿਕਨ੍ਤਿ ਕਤ੍ਵਾ ਪਿਪ੍ਫਲਿਕਨ੍ਤਿ ਵੁਚ੍ਚਤਿ, ਤਂ ਨਿਸੇਤਿ ਨਿਸਾਨਂ ਕਰੋਤੀਤਿ ਅਤ੍ਥੋ. ਯੋ ਪਨ ਕਥੇਤਿ, ਏਤਂ ਠਪੇਤ੍ਵਾਤਿ ਯੋਜਨਾ.

ਅਦ੍ਧਾਨਮਗ੍ਗਸ੍ਸ ਦ੍ਵਿਗਾਵੁਤਤ੍ਤਾ ‘‘ਅਦ੍ਧਯੋਜਨਬ੍ਭਨ੍ਤਰੇ ਗਾਵੁਤੇ’’ਤਿ ਵੁਤ੍ਤਂ. ਅਭਿਰੂਲ਼੍ਹੇਨ ਭੁਞ੍ਜਿਤਬ੍ਬਨ੍ਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਕਾਲੇ. ‘‘ਸਨ੍ਨਿਪਤਨ੍ਤੀ’’ਤਿ ਬਹੁਕਤ੍ਤੁਵਸੇਨ ਵੁਤ੍ਤਂ. ਅਕੁਸਲਂ ਪਰਿਵਜ੍ਜੇਤੀਤਿ ਪਰਿਬ੍ਬਾਜਕੋ, ਪਬ੍ਬਜ੍ਜਵੇਸਂ ਵਾ ਪਰਿਗ੍ਗਹੇਤ੍ਵਾ ਵਜਤਿ ਗਚ੍ਛਤਿ ਪਵਤ੍ਤਤੀਤਿ ਪਰਿਬ੍ਬਾਜਕੋ. ਵਿਨਾ ਭਾਵਪਚ੍ਚਯੇਨ ਭਾਵਤ੍ਥਸ੍ਸ ਞਾਤਬ੍ਬਤੋ ਪਰਿਬ੍ਬਾਜਕਭਾਵੋ ਪਰਿਬ੍ਬਾਜਕੋ, ਤਂ ਸਮਾਪਨ੍ਨੋਤਿ ਪਰਿਬ੍ਬਾਜਕਸਮਾਪਨ੍ਨੋ. ਅਥ ਵਾ ਪਰਿਬ੍ਬਾਜਕੇਸੁ ਸਮਾਪਨ੍ਨੋ ਪਰਿਯਾਪਨ੍ਨੋਤਿ ਪਰਿਬ੍ਬਾਜਕਸਮਾਪਨ੍ਨੋ. ‘‘ਏਤੇਸ’’ਨ੍ਤਿਪਦਂ ‘‘ਯੇਨ ਕੇਨਚੀ’’ਤਿਪਦੇ ਨਿਦ੍ਧਾਰਣਸਮੁਦਾਯੋ.

੨੨੦. ਯੇਪਿ ਭਿਕ੍ਖੂ ਭੁਞ੍ਜਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਦ੍ਵੇ ਤਯੋ ਏਕਤੋ’’ਤਿਵਚਨੇ. ਅਨਿਮਨ੍ਤਿਤੋ ਚਤੁਤ੍ਥੋ ਯਸ੍ਸ ਚਤੁਕ੍ਕਸ੍ਸਾਤਿ ਅਨਿਮਨ੍ਤਿਤਚਤੁਤ੍ਥਂ, ਅਨਿਮਨ੍ਤਿਤੇਨ ਵਾ ਚਤੁਤ੍ਥਂ ਅਨਿਮਨ੍ਤਿਤਚਤੁਤ੍ਥਂ. ਏਸੇਵ ਨਯੋ ਅਞ੍ਞੇਸੁਪਿ ਚਤੁਤ੍ਥੇਸੁ. ਇਧਾਤਿ ਇਮਸ੍ਮਿਂ ਸਾਸਨੇ. ਨਿਮਨ੍ਤੇਤੀਤਿ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤੇਤਿ. ਤੇਸੂਤਿ ਚਤੂਸੁ ਭਿਕ੍ਖੂਸੁ. ਸੋਤਿ ਉਪਾਸਕੋ. ਅਞ੍ਞਨ੍ਤਿ ਨਾਗਤਭਿਕ੍ਖੁਤੋ ਅਞ੍ਞਂ, ਨਿਮਨ੍ਤਿਤਭਿਕ੍ਖੁਤੋ ਵਾ. ਤਙ੍ਖਣਪ੍ਪਤ੍ਤਨ੍ਤਿ ਤਸ੍ਮਿਂ ਪੁਚ੍ਛਨਕਥਨਕ੍ਖਣੇ ਪਤ੍ਤਂ. ਹੀਤਿ ਵਿਤ੍ਥਾਰੋ. ਤਤ੍ਥਾਤਿ ਤਸ੍ਮਿਂ ਠਾਨੇ, ਗੇਹੇ ਵਾ. ਤੇਹੀਤਿ ਕਰਣਭੂਤੇਹਿ ਭਿਕ੍ਖੂਹਿ.

ਸੋਤਿ ਪਿਣ੍ਡਪਾਤਿਕੋ. ਅਨਾਗਚ੍ਛਨ੍ਤਮ੍ਪੀਤਿ ਸਯਂ ਨ ਆਗਚ੍ਛਨ੍ਤਮ੍ਪਿ. ਲਚ੍ਛਥਾਤਿ ਲਭਿਸ੍ਸਥ.

ਸੋਪੀਤਿ ਸਾਮਣੇਰੋਪਿ, ਨ ਪਿਣ੍ਡਪਾਤਿਕੋਯੇਵਾਤਿ ਅਤ੍ਥੋ.

ਤਤ੍ਥਾਤਿ ਗਿਲਾਨਚਤੁਤ੍ਥੇ, ਤੇਸੁ ਚਤੂਸੁ ਵਾ. ਗਿਲਾਨੋ ਇਤਰੇਸਂ ਪਨ ਗਣਪੂਰਕੋ ਹੋਤੀਤਿ ਯੋਜਨਾ.

ਗਣਪੂਰਕਤ੍ਤਾਤਿ ਸਮਯਲਦ੍ਧਸ੍ਸ ਗਣਪੂਰਕਤ੍ਤਾ. ਚਤੁਕ੍ਕਾਨੀਤਿ ਚੀਵਰਦਾਨਚਤੁਤ੍ਥਂ ਚੀਵਰਕਾਰਚਤੁਤ੍ਥਂ ਅਦ੍ਧਾਨਗਮਨਚਤੁਤ੍ਥਂ ਨਾਵਾਭਿਰੁਹਨਚਤੁਤ੍ਥਂ ਮਹਾਸਮਯਚਤੁਤ੍ਥਂ, ਸਮਣਭਤ੍ਤਚਤੁਤ੍ਥਨ੍ਤਿ ਛ ਚਤੁਕ੍ਕਾਨਿ. ਪੁਰਿਮੇਹਿ ਮਿਸ੍ਸੇਤ੍ਵਾ ਏਕਾਦਸ ਚਤੁਕ੍ਕਾਨਿ ਵੇਦਿਤਬ੍ਬਾਨਿ. ਏਕੋ ਪਣ੍ਡਿਤੋ ਭਿਕ੍ਖੁ ਨਿਸਿਨ੍ਨੋ ਹੋਤੀਤਿ ਸਮ੍ਬਨ੍ਧੋ. ਤੇਸੂਤਿ ਤੀਸੁ ਭਿਕ੍ਖੂਸੁ, ਗਤੇਸੁ ਗਚ੍ਛਤੀਤਿ ਯੋਜਨਾ. ਭੁਤ੍ਵਾ ਆਗਨ੍ਤ੍ਵਾ ਠਿਤੇਸੁਪਿ ਅਨਾਪਤ੍ਤਿਯੇਵ. ਕਸ੍ਮਾ ਸਬ੍ਬੇਸਂ ਅਨਾਪਤ੍ਤਿ, ਨਨੁ ਚਤ੍ਤਾਰੋ ਭਿਕ੍ਖੂ ਏਕਤੋ ਗਣ੍ਹਨ੍ਤੀਤਿ ਆਹ ‘‘ਪਞ੍ਚਨ੍ਨਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਭੋਜਨਾਨਂਯੇਵਾਤਿ ਨ ਯਾਗੁਖਜ੍ਜਕਫਲਾਫਲਾਦੀਨਂ. ਤਾਨਿ ਚਾਤਿ ਯੇਹਿ ਭੋਜਨੇਹਿ ਵਿਸਙ੍ਕੇਤਂ ਨਤ੍ਥਿ, ਤਾਨਿ ਚ ਭੋਜਨਾਨਿ. ਤੇਹੀਤਿ ਚਤੂਹਿ ਭਿਕ੍ਖੂਹਿ. ਤਾਨੀਤਿ ਯਾਗੁਆਦੀਨਿ. ਇਤੀਤਿ ਤਸ੍ਮਾ ਅਨਾਪਤ੍ਤਿਨ੍ਤਿ ਯੋਜਨਾ.

ਕੋਚਿ ਪੇਸਿਤੋ ਅਪਣ੍ਡਿਤਮਨੁਸ੍ਸੋ ਵਦਤੀਤਿ ਯੋਜਨਾ. ਕਤ੍ਤੁਕਾਮੇਨ ਪੇਸਿਤੋਤਿ ਸਮ੍ਬਨ੍ਧੋ. ਭਤ੍ਤਂ ਗਣ੍ਹਥਾਤਿ ਵਾਤਿ ਵਾਸਦ੍ਦੋ ‘‘ਓਦਨਂ ਗਣ੍ਹਥ, ਭੋਜਨਂ ਗਣ੍ਹਥ, ਅਨ੍ਨਂ ਗਣ੍ਹਥ, ਕੁਰਂ ਗਣ੍ਹਥਾ’’ਤਿ ਵਚਨਾਨਿਪਿ ਸਙ੍ਗਣ੍ਹਾਤਿ. ਨਿਮਨ੍ਤਨਂ ਸਾਦਿਯਨ੍ਤੀਤਿ ਨੇਮਨ੍ਤਨਿਕਾ. ਪਿਣ੍ਡਪਾਤੇ ਧੁਤਙ੍ਗੇ ਨਿਯੁਤ੍ਤਾਤਿ ਪਿਣ੍ਡਪਾਤਿਕਾ. ਪੁਨਦਿਵਸੇ ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਹਰਿਤ੍ਵਾਤਿ ਅਪਨੇਤ੍ਵਾ. ਤਤੋਤਿ ਤਤੋ ਵਦਨਤੋ ਪਰਨ੍ਤਿ ਸਮ੍ਬਨ੍ਧੋ. ਵਿਕ੍ਖੇਪਨ੍ਤਿ ਵਿਵਿਧਂ ਖੇਪਂ. ਤੇਤਿ ਅਸੁਕਾ ਚ ਅਸੁਕਾ ਚ ਗਾਮਿਕਾ. ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਸੋਪੀਤਿ ਅਪਣ੍ਡਿਤਮਨੁਸ੍ਸੋਪਿ, ਨ ਗਾਮਿਕਾਯੇਵਾਤਿ ਅਤ੍ਥੋ. ਕਸ੍ਮਾ ਨ ਲਭਾਮਿ ਭਨ੍ਤੇਤਿ ਵੁਤ੍ਤੇਤਿ ਯੋਜਨਾ. ਏਵਂ ‘‘ਕਥਂ ਨਿਮਨ੍ਤੇਸੁਂ ਭਨ੍ਤੇ’’ਤਿ ਏਤ੍ਥਾਪਿ. ਤਤੋਤਿ ਤਸ੍ਮਾ ਕਾਰਣਾ. ਏਸਾਤਿ ਏਸੋ ਗਾਮੋ. ਤਨ੍ਤਿ ਭੂਮਤ੍ਥੇ ਚੇਤਂ ਉਪਯੋਗਵਚਨਂ, ਤਸ੍ਮਿਂ ਗਾਮੇ ਚਰਥਾਤਿ ਹਿ ਅਤ੍ਥੋ. ਕਿਂ ਏਤੇਨਾਤਿ ਏਤੇਨ ਪੁਚ੍ਛਨੇਨ ਕਿਂ ਪਯੋਜਨਂ. ਏਤ੍ਥਾਤਿ ਪੁਚ੍ਛਨੇ. ਮਾ ਪਮਜ੍ਜਿਤ੍ਥਾਤਿ ਵਦਤੀਤਿ ਸਮ੍ਬਨ੍ਧੋ. ਦੁਤਿਯਦਿਵਸੇਤਿ ਨਿਮਨ੍ਤਨਦਿਵਸਤੋ ਦੁਤਿਯਦਿਵਸੇ. ਧੁਰਗਾਮੇਤਿ ਪਧਾਨਗਾਮੇ, ਅਨ੍ਤਿਕਗਾਮੇ ਵਾ. ਭਾਵੋ ਨਾਮ ਕਿਰਿਯਤ੍ਤਾ ਏਕੋਯੇਵ ਹੋਤਿ, ਤਸ੍ਮਾ ਕਤ੍ਤਾਰਂ ਵਾ ਕਮ੍ਮਂ ਵਾ ਸਮ੍ਬਨ੍ਧਂ ਵਾ ਅਪੇਕ੍ਖਿਤ੍ਵਾ ਬਹੁਵਚਨੇਨ ਨ ਭਵਿਤਬ੍ਬਂ, ਤੇਨ ਵੁਤ੍ਤਂ ‘‘ਨ ਦੁਬ੍ਬਚੇਹਿ ਭਵਿਤਬ੍ਬ’’ਨ੍ਤਿ. ਤੇਸੂਤਿ ਗਾਮਿਕੇਸੁ ਭੋਜੇਨ੍ਤੇਸੂਤਿ ਸਮ੍ਬਨ੍ਧੋ. ਅਸਨਸਾਲਾਯਨ੍ਤਿ ਭੋਜਨਸਾਲਾਯਂ. ਸਾ ਹਿ ਅਸਤਿ ਭੁਞ੍ਜਤਿ ਏਤ੍ਥਾਤਿ ਅਸਨਾ, ਸਲਨ੍ਤਿ ਪਵਿਸਨ੍ਤਿ ਅਸ੍ਸਨ੍ਤਿ ਸਾਲਾ, ਅਸਨਾ ਚ ਸਾ ਸਾਲਾਚੇਤਿ ਅਸਨਸਾਲਾਤਿ ਅਤ੍ਥੇਨ ‘‘ਅਸਨਸਾਲਾ’’ਤਿ ਵੁਚ੍ਚਤਿ.

ਅਥ ਪਨਾਤਿ ਤਤੋ ਅਞ੍ਞਥਾ ਪਨ. ਅਪਾਦਾਨਤ੍ਥੋ ਹਿ ਅਥਸਦ੍ਦੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ ਅਨ੍ਤਰਵੀਥਿਆਦੀਸੂਤਿ ਅਤ੍ਥੋ. ਪਟਿਕਚ੍ਚੇਵਾਤਿ ਪਠਮਂ ਕਤ੍ਵਾ ਏਵ. ਭਿਕ੍ਖੂਸੁ ਗਾਮਤੋ ਅਨਿਕ੍ਖਨ੍ਤੇਸੁ ਪਗੇਵਾਤਿ ਵੁਤ੍ਤਂ ਹੋਤਿ. ਨ ਵਟ੍ਟਤੀਤਿ ‘‘ਭਤ੍ਤਂ ਗਣ੍ਹਥਾ’’ਤਿ ਪਹਿਣਤ੍ਤਾ ਨ ਵਟ੍ਟਤਿ. ਯੇ ਪਨ ਮਨੁਸ੍ਸਾ ਭੋਜੇਨ੍ਤੀਤਿ ਸਮ੍ਬਨ੍ਧੋ. ਨਿਵਤ੍ਤਥਾਤਿ ਵੁਤ੍ਤਪਦੇਤਿ ‘‘ਨਿਵਤ੍ਤਥਾ’’ਤਿ ਵੁਤ੍ਤੇ ਕਿਰਿਯਾਪਦੇ. ਯਸ੍ਸਕਸ੍ਸਚਿ ਹੋਤੀਤਿ ਯਸ੍ਸ ਕਸ੍ਸਚਿ ਅਤ੍ਥਾਯ ਹੋਤੀਤਿ ਯੋਜਨਾ. ਨਿਵਤ੍ਤਿਤੁਂ ਵਟ੍ਟਤੀਤਿ ‘‘ਭਤ੍ਤਂ ਗਣ੍ਹਥਾ’’ਤਿ ਅਵੁਤ੍ਤਤ੍ਤਾ ਨਿਵਤ੍ਤਿਤੁਂ ਵਟ੍ਟਤਿ. ਸਮ੍ਬਨ੍ਧਂ ਕਤ੍ਵਾਤਿ ‘‘ਨਿਵਤ੍ਤਥ ਭਨ੍ਤੇ’’ਤਿ ਭਨ੍ਤੇਸਦ੍ਦੇਨ ਅਬ੍ਯਵਹਿਤਂ ਕਤ੍ਵਾ. ਨਿਸੀਦਥ ਭਨ੍ਤੇ, ਭਤ੍ਤਂ ਗਣ੍ਹਥਾਤਿ ਭਨ੍ਤੇਸਦ੍ਦੇਨ ਬ੍ਯਵਹਿਤਂ ਕਤ੍ਵਾ ਵੁਤ੍ਤੇ ‘‘ਨਿਸੀਦਥਾ’’ਤਿਪਦੇ ਨਿਸੀਦਿਤੁਂ ਵਟ੍ਟਤਿ. ਅਥ ਭਨ੍ਤੇਸਦ੍ਦੇਨ ਬ੍ਯਵਹਿਤਂ ਅਕਤ੍ਵਾ ‘‘ਨਿਸੀਦਥ, ਭਤ੍ਤਂ ਗਣ੍ਹਥਾ’’ਤਿ ਸਮ੍ਬਨ੍ਧਂ ਕਤ੍ਵਾ ਵੁਤ੍ਤੇ ਨਿਸੀਦਿਤੁਂ ਵਟ੍ਟਤਿ. ਇਚ੍ਚੇਤਂ ਨਯਂ ਅਤਿਦਿਸਤਿ ‘‘ਏਸੇਵ ਨਯੋ’’ਤਿਇਮਿਨਾਤਿ. ਦੁਤਿਯਂ.