੧੦. ਸਪ੍ਪਾਣਕਸਿਕ੍ਖਾਪਦਂ

੧੪੦. ਦਸਮੇ ‘‘ਜਾਨ’’ਨ੍ਤਿ ਗਚ੍ਛਨ੍ਤਾਦਿਗਣੋਤਿ ਆਹ ‘‘ਜਾਨਨ੍ਤੋ’’ਤਿ. ਸਂ ਵਿਜ੍ਜਤਿ ਪਾਣੋ ਏਤ੍ਥਾਤਿ ਸਪਾਣਕਂ. ਏਤਨ੍ਤਿ ਉਦਕਂ. ਸਯਂ ਜਾਨਨ੍ਤੋਪਿ ਪਰੇਨ ਜਾਨਾਪੇਨ੍ਤੋਪਿ ਜਾਨਾਤਿਯੇਵ ਨਾਮਾਤਿ ਆਹ ‘‘ਯਥਾ ਤਥਾ ਵਾ’’ਤਿ. ਸਪਾਣਕਂ ਉਦਕਨ੍ਤਿ ਕਰਣਤ੍ਥੇ ਚੇਤਂ ਉਪਯੋਗਵਚਨਂ, ਤੇਨਾਹ ‘‘ਤੇਨ ਉਦਕੇਨਾ’’ਤਿ. ਪੁਬ੍ਬੇਤਿ ਪਥਵਿਖਣਨਸਿਕ੍ਖਾਪਦਾਦਿਕੇ.

ਤਤ੍ਥਾਤਿ ‘‘ਸਿਞ੍ਚੇਯ੍ਯ ਵਾ ਸਿਞ੍ਚਾਪੇਯ੍ਯ ਵਾ’’ਤਿਪਦੇ. ਧਾਰਨ੍ਤਿ ਸੋਤਂ. ਮਾਤਿਕਂ ਪਮੁਖਨ੍ਤਿ ਮਾਤਿਕਂ ਅਭਿਮੁਖਂ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਅਞ੍ਞਤੋ ਠਾਨਤੋ ਅਞ੍ਞਂ ਠਾਨਂ ਨੇਤੀਤਿ ਯੋਜਨਾ. ‘‘ਸਪਾਣਕਂ ਉਦਕ’’ਨ੍ਤਿ ਸਾਮਞ੍ਞਵਚਨਸ੍ਸਪਿ ਵਿਸੇਸੇ ਅਵਟ੍ਠਾਨਤੋ, ਵਿਸੇਸਤ੍ਥਿਨਾ ਚ ਵਿਸੇਸਸ੍ਸ ਅਨੁਪਯੋਜਿਤਬ੍ਬਤੋ ਇਧ ਵਿਸੇਸਉਦਕਨ੍ਤਿ ਸਨ੍ਧਾਯਭਾਸਿਤਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਦਂ ਪਨਾ’’ਤਿਆਦਿ. ਇਦਂ ਪਨ ਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਉਦਕਂ ‘‘ਗਚ੍ਛਤੀ’’ਤਿਪਦੇ ਕਤ੍ਤਾ. ਯਤ੍ਥਾਤਿ ਯਸ੍ਮਿਂ ਉਦਕੇਤਿ. ਦਸਮਂ.

ਭੂਤਗਾਮਵਗ੍ਗੋ ਦੁਤਿਯੋ.