੭. ਸੇਖਿਯਕਣ੍ਡਂ

੧. ਪਰਿਮਣ੍ਡਲਵਗ੍ਗ-ਅਤ੍ਥਯੋਜਨਾ

ਸਿਕ੍ਖਿਤਸਿਕ੍ਖੇਨ ਤੀਸੁ ਸਿਕ੍ਖਾਸੁ ਚਤੂਹਿ ਮਗ੍ਗੇਹਿ ਸਿਕ੍ਖਿਤਸਿਕ੍ਖੇਨ ਤਾਦਿਨਾ ਅਟ੍ਠਹਿ ਲੋਕਧਮ੍ਮੇਹਿ ਅਕਮ੍ਪਿਯਟ੍ਠੇਨ ਤਾਦਿਨਾ, ਇਟ੍ਠਾਨਿਟ੍ਠੇਸੁ ਵਾ ਅਵਿਕਾਰਟ੍ਠੇਨ ਤਾਦਿਨਾ ਭਗਵਤਾ ਯਾਨਿ ਸਿਕ੍ਖਾਪਦਾਨਿ ‘‘ਸੇਖਿਯਾਨੀ’’ਤਿ ਭਾਸਿਤਾਨਿ, ਦਾਨਿ ਤੇਸਮ੍ਪਿ ਸਿਕ੍ਖਾਪਦਾਨਂ ਅਯਮ੍ਪਿ ਵਣ੍ਣਨਾਕ੍ਕਮੋ ਭਵਤੀਤਿ ਯੋਜਨਾ.

੫੭੬. ਤਤ੍ਥਾਤਿ ਸੇਖਿਯਸਿਕ੍ਖਾਪਦੇਸੁ, ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ‘‘ਸਮਨ੍ਤਤੋ’’ਤਿਇਮਿਨਾ ਪਰਿਤ੍ਯੂਪਸਗ੍ਗਸ੍ਸਤ੍ਥਂ ਦਸ੍ਸੇਤਿ. ‘‘ਨਾਭਿਮਣ੍ਡਲਂ ਜਾਣੁਮਣ੍ਡਲ’’ਨ੍ਤਿ ਏਤ੍ਥ ਉਦ੍ਧਂਸਦ੍ਦੋ ਚ ਅਧੋਸਦ੍ਦੋ ਚ ਅਜ੍ਝਾਹਰਿਤਬ੍ਬੋਤਿ ਆਹ ‘‘ਉਦ੍ਧ’’ਨ੍ਤਿਆਦਿ. ਅਟ੍ਠਙ੍ਗੁਲਮਤ੍ਤਨ੍ਤਿ ਭਾਵਨਪੁਂਸਕਂ, ਨਿਵਾਸੇਤਬ੍ਬਨ੍ਤਿ ਸਮ੍ਬਨ੍ਧੋ. ਤਤੋਤਿ ਅਟ੍ਠਙ੍ਗੁਲਮਤ੍ਤਤੋ. ਯਥਾ ਪਟਿਚ੍ਛਨ੍ਨਂ ਹੋਤਿ, ਏਵਂ ਨਿਵਾਸੇਨ੍ਤਸ੍ਸਾਤਿ ਯੋਜਨਾ. ਤਤ੍ਰਿਦਂ ਪਮਾਣਨ੍ਤਿ ਤਸ੍ਸ ਨਿਵਾਸਨਸ੍ਸ ਇਦਂ ਪਮਾਣਂ. ਤਾਦਿਸਸ੍ਸਾਤਿ ਦੀਘਤੋ ਮੁਟ੍ਠਿਪਞ੍ਚਕਸ੍ਸ ਤਿਰਿਯਂ ਅਡ੍ਢਤੇਯ੍ਯਹਤ੍ਥਸ੍ਸ ਨਿਵਾਸਨਸ੍ਸ. ਜਾਣੁਮਣ੍ਡਲਂ ਪਟਿਚ੍ਛਾਦਨਤ੍ਥਂ ਵਟ੍ਟਤੀਤਿ ਯੋਜਨਾ. ਤਤ੍ਥਾਤਿ ਚੀਵਰੇਸੁ. ਨ ਤਿਟ੍ਠਤੀਤਿ ਵਿਰਲ਼ਤ੍ਤਾ ਨ ਤਿਟ੍ਠਤਿ. ਤਿਟ੍ਠਤੀਤਿ ਘਨਤ੍ਤਾ ਤਿਟ੍ਠਤਿ.

ਨਿਵਾਸੇਨ੍ਤਸ੍ਸ ਚਾਤਿਏਤ੍ਥ ਚਸਦ੍ਦੋ ਅਵਧਾਰਣਤ੍ਥੋ, ਨਿਵਾਸੇਨ੍ਤਸ੍ਸੇਵਾਤਿ ਅਤ੍ਥੋ. ਕੇਵਲਂ ਏਵਂ ਨਿਵਾਸੇਨ੍ਤਸ੍ਸੇਵ ਦੁਕ੍ਕਟਂ ਨ ਹੋਤਿ, ਅਥ ਖੋ ਤਥਾ ਨਿਵਾਸੇਨ੍ਤਸ੍ਸਾਪਿ ਦੁਕ੍ਕਟਮੇਵਾਤਿ ਯੋਜਨਾ. ਯੇ ਪਨ ਨਿਵਾਸਨਦੋਸਾਤਿ ਸਮ੍ਬਨ੍ਧੋ. ਅਞ੍ਞੇਤਿ ਪੁਰਤੋ ਚ ਪਚ੍ਛਤੋ ਚ ਓਲਮ੍ਬੇਤ੍ਵਾ ਨਿਵਸਨਤੋ ਅਞ੍ਞੇ. ਤੇ ਸਬ੍ਬੇਤਿ ਸਬ੍ਬੇ ਤੇ ਨਿਵਾਸਨਦੋਸਾ. ਏਤ੍ਥਾਤਿ ਇਮਸ੍ਮਿਂ ਵਿਭਙ੍ਗੇ. ਤਤ੍ਥੇਵਾਤਿ ਖਨ੍ਧਕੇਯੇਵ.

ਅਸਞ੍ਚਿਚ੍ਚ ਨਿਵਾਸੇਨ੍ਤਸ੍ਸ ਅਨਾਪਤ੍ਤੀਤਿ ਸਮ੍ਬਨ੍ਧੋ. ਏਸੇਵ ਨਯੋ ‘‘ਅਸਤਿਯਾ’’ਤਿ ਏਤ੍ਥਾਪਿ. ਅਜਾਨਨ੍ਤਸ੍ਸਾਤਿ ਏਤ੍ਥ ਅਜਾਨਨਂ ਦੁਵਿਧਂ ਨਿਵਾਸਨਵਤ੍ਤਸ੍ਸ ਅਜਾਨਨਂ, ਆਰੂਲ਼੍ਹੋਰੂਲ਼੍ਹਭਾਵਸ੍ਸ ਅਜਾਨਨਨ੍ਤਿ. ਤਤ੍ਥ ਆਰੂਲ਼੍ਹੋਰੂਲ਼੍ਹਭਾਵਸ੍ਸ ਅਜਾਨਨਂ ਸਨ੍ਧਾਯ ਵੁਤ੍ਤਂ ‘‘ਅਜਾਨਨ੍ਤਸ੍ਸਾ’’ਤਿ ਦਸ੍ਸੇਨ੍ਤੋ ਆਹ ‘‘ਅਜਾਨਨ੍ਤਸ੍ਸਾਤਿ ਏਤ੍ਥਾ’’ਤਿਆਦਿ. ਹੀਤਿ ਸਚ੍ਚਂ. ਤਸ੍ਸਾਤਿ ਨਿਵਾਸਨਵਤ੍ਤਸ੍ਸ. ਅਸ੍ਸਾਤਿ ਭਿਕ੍ਖੁਨੋ. ਤਂ ਪਨਾਤਿ ਆਪਤ੍ਤਿਤੋ ਅਮੋਕ੍ਖਨਂ ਪਨ. ਤਸ੍ਮਾਤਿ ਯਸ੍ਮਾ ਯੁਜ੍ਜਤਿ, ਤਸ੍ਮਾ. ਯੋਤਿ ਭਿਕ੍ਖੁ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸੁਕ੍ਖਾ ਜਙ੍ਘਾ ਇਮਸ੍ਸਾਤਿ ਸੁਕ੍ਖਜਙ੍ਘੋ. ਮਹਨ੍ਤਂ ਪਿਣ੍ਡਿਕਮਂਸਂ ਇਮਸ੍ਸਾਤਿ ਮਹਾਪਿਣ੍ਡਿਕਮਂਸੋ. ਤਸ੍ਸਾਤਿ ਭਿਕ੍ਖੁਸ੍ਸ.

ਵਣੋਤਿ ਅਰੁ. ਤਞ੍ਹਿ ਵਣਤਿ ਗਤ੍ਤਵਿਚੁਣ੍ਣਨਂ ਕਰੋਤੀਤਿ ਵਣੋਤਿ ਵੁਚ੍ਚਤਿ. ਵਾਲ਼ਮਿਗਾ ਵਾ ਚੋਰਾ ਵਾਤਿ ਏਤ੍ਥ ਵਾਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋ, ਤੇਨ ਅਞ੍ਞਾਪਿ ਉਦਕਚਿਕ੍ਖਲ੍ਲਾਦਯੋ ਆਪਦਾ ਸਙ੍ਗਯ੍ਹਨ੍ਤਿ.

੫੭੭. ਇਧਾਤਿ ਇਮਸ੍ਮਿਂ ਵਿਭਙ੍ਗੇ, ਸਿਕ੍ਖਾਪਦੇ ਵਾ. ਉਭੋ ਕਣ੍ਣੇਤਿ ਪੁਰਤੋ ਚ ਪਚ੍ਛਤੋ ਚ ਨਿਗ੍ਗਤੇ ਦ੍ਵੇ ਕਣ੍ਣੇ. ਅਵਿਸੇਸੇਨਾਤਿ ‘‘ਅਨ੍ਤਰਘਰੇ’’ਤਿ ਚ ‘‘ਆਰਾਮੇ’’ਤਿ ਚ ਵਿਸੇਸਂ ਅਕਤ੍ਵਾ ਸਾਮਞ੍ਞੇਨ. ਵਿਹਾਰੇਪੀਤਿ ਸਙ੍ਘਸਨ੍ਨਿਪਾਤਬੁਦ੍ਧੁਪਟ੍ਠਾਨਥੇਰੁਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ.

੫੭੮. ਕਾਯੇਕਦੇਸੇ ਕਾਯਸਦ੍ਦੋ ਵਤ੍ਤਤੀਤਿ ਆਹ ‘‘ਜਾਣੁਮ੍ਪਿ ਉਰਮ੍ਪੀ’’ਤਿ. ‘‘ਨ ਸੀਸਂ ਪਾਰੁਤੇਨਾ’’ਤਿਇਮਿਨਾ ‘‘ਸੁਪ੍ਪਟਿਚ੍ਛਨ੍ਨੇਨਾ’’ਤਿਪਦਸ੍ਸ ਅਤਿਬ੍ਯਾਪਿਤਦੋਸਂ ਪਟਿਕ੍ਖਿਪਤਿ. ਗਣ੍ਠਿਕਨ੍ਤਿ ਪਾਸੋ. ਸੋ ਹਿ ਗਨ੍ਥੇਤਿ ਬਨ੍ਧਤੀਤਿ ਵਾ, ਗਨ੍ਥੇਤਿ ਬਨ੍ਧਤਿ ਏਤ੍ਥਾਤਿ ਵਾ ਕਤ੍ਵਾ ਗਨ੍ਥਿਕੋਤਿ ਵੁਚ੍ਚਤਿ. ਨ੍ਥਕਾਰਸ੍ਸ ਵਾਣ੍ਠਕਾਰੇ ਕਤੇ ਗਣ੍ਠਿਕੋ, ਤਂ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ. ਉਭੋ ਕਣ੍ਣੇਤਿ ਚੀਵਰਸ੍ਸ ਦ੍ਵੇ ਕੋਣੇ. ਗਲਵਾਟਕਤੋਤਿ ਏਤ੍ਥ ਗਲੋਤਿ ਕਣ੍ਠੋ. ਸੋ ਹਿ ਖਜ੍ਜਭੋਜ੍ਜਲੇਯ੍ਯਪੇਯ੍ਯਸਙ੍ਖਾਤਂ ਚਤੁਬ੍ਬਿਧਂ ਅਸਨਂ ਗਲਤਿ ਪਨ੍ਨੋ ਹੁਤ੍ਵਾ ਕੁਚ੍ਛਿਯਂ ਪਤਤਿ ਇਤੋਤਿ ਗਲੋਤਿ ਵੁਚ੍ਚਤਿ. ਆਵਾਟੋਯੇਵ ਖੁਦ੍ਦਕਟ੍ਠੇਨ ਆਵਾਟਕੋ, ਖੁਦ੍ਦਕਤ੍ਥੇ ਕੋ. ਗਲੇ ਠਿਤੋ ਆਵਾਟਕੋ ਗਲਵਾਟਕੋ. ਅਕਾਰਤੋ ਹਿ ਆਕਾਰਸ੍ਸ ਲੋਪੋ ‘‘ਪਪ’’ਨ੍ਤਿਆਦੀਸੁ (ਜਾ. ੧.੧.੨) ਵਿਯ. ਏਤ੍ਥ ਹਿ ਪਆਪਨ੍ਤਿ ਪਦਚ੍ਛੇਦੋ, ਅਕਾਰਤੋ ਆਕਾਰਸ੍ਸ ਚ ਲੋਪੋ. ਪਵਦ੍ਧਂ ਆਪਂ ਪਪਂ, ਮਹਨ੍ਤਂ ਉਦਕਨ੍ਤਿ ਅਤ੍ਥੋ. ਸੀਸਂ ਵਿਵਰਿਤ੍ਵਾਤਿ ਸਮ੍ਬਨ੍ਧੋ.

੫੭੯. ਵਾਸਂ ਉਪਗਤੋਤਿ ਵਾ ਵਾਸੇਨ ਉਪਗਤੋਤਿ ਵਾ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਵਾਸਤ੍ਥਾਯ ਉਪਗਤਸ੍ਸਾ’’ਤਿ.

੫੮੦. ਹਤ੍ਥਪਾਦੇ ਅਕੀਲ਼ਨ੍ਤੋ ਸੁਸਂਵੁਤੋ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਹਤ੍ਥਂ ਵਾ ਪਾਦਂ ਵਾ ਅਕੀਲ਼ਾਪੇਨ੍ਤੋ’’ਤਿ.

੫੮੨. ਓਕ੍ਖਿਤ੍ਤਚਕ੍ਖੂਤਿ ਏਤ੍ਥ ਓਸਦ੍ਦੋ ਹੇਟ੍ਠਾਪਰਿਯਾਯੋਤਿ ਆਹ ‘‘ਹੇਟ੍ਠਾ ਖਿਤ੍ਤਚਕ੍ਖੂ’’ਤਿ. ‘‘ਹੁਤ੍ਵਾ’’ਤਿਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਯੁਗਯੁਤ੍ਤਕੋਤਿ ਯੁਗੇ ਯੁਤ੍ਤਕੋ. ਦਮਿਯਿਤ੍ਥਾਤਿ ਦਨ੍ਤੋ. ਆਭੁਸੋ ਜਾਨਾਤਿ ਕਾਰਣਾਕਾਰਣਨ੍ਤਿ ਆਜਾਨੇਯ੍ਯੋ. ਏਤ੍ਤਕਨ੍ਤਿ ਚਤੁਹਤ੍ਥਪਮਾਣਂ. ਯੋ ਗਚ੍ਛਤਿ, ਅਸ੍ਸ ਭਿਕ੍ਖੁਨੋ ਦੁਕ੍ਕਟਾ ਆਪਤ੍ਤਿ ਹੋਤੀਤਿ ਯੋਜਨਾ. ‘‘ਪਰਿਸ੍ਸਯਭਾਵ’’ਨ੍ਤਿ ਚ ‘‘ਪਰਿਸ੍ਸਯਾਭਾਵ’’ਨ੍ਤਿ ਚ ਦ੍ਵੇ ਪਾਠਾ ਯੁਜ੍ਜਨ੍ਤਿਯੇਵ.

੫੮੪. ਇਤ੍ਥਮ੍ਭੂਤਲਕ੍ਖਣੇਤਿ ਇਮਂ ਪਕਾਰਂ ਇਤ੍ਥਂ ਚੀਵਰੁਕ੍ਖਿਪਨਂ, ਭਵਤਿ ਗਚ੍ਛਤੀਤਿ ਭੂਤੋ, ਭਿਕ੍ਖੁ. ਲਕ੍ਖੀਯਤਿ ਅਨੇਨਾਤਿ ਲਕ੍ਖਣਂ, ਚੀਵਰਂ. ਇਤ੍ਥਂ ਭੂਤੋ ਇਤ੍ਥਮ੍ਭੂਤੋ, ਤਸ੍ਸ ਲਕ੍ਖਣਂ ਇਤ੍ਥਮ੍ਭੂਤਲਕ੍ਖਣਂ, ਤਸ੍ਮਿਂ. ਕਰਣਵਚਨਂ ਦਟ੍ਠਬ੍ਬਨ੍ਤਿ ਯੋਜਨਾ. ਇਤ੍ਥਮ੍ਭੂਤਲਕ੍ਖਣਂ ਨਾਮ ਕਿਰਿਯਾਵਿਸੇਸਨਸ੍ਸ ਸਭਾਵੋਤਿ ਆਹ ‘‘ਏਕਤੋ ਵਾ…ਪੇ… ਹੁਤ੍ਵਾਤਿ ਅਤ੍ਥੋ’’ਤਿ. ਅਨ੍ਤੋਇਨ੍ਦਖੀਲਤੋਤਿ ਗਾਮਸ੍ਸ ਅਨ੍ਤੋਇਨ੍ਦਖੀਲਤੋਤਿ. ਪਠਮੋ ਵਗ੍ਗੋ.

੨. ਉਜ੍ਜਗ੍ਘਿਕਵਗ੍ਗ-ਅਤ੍ਥਯੋਜਨਾ

੫੮੬. ਉਚ੍ਚਾਸਦ੍ਦਂ ਕਤ੍ਵਾ ਜਗ੍ਘਨਂ ਹਸਨਂ ਉਜ੍ਜਗ੍ਘੋ, ਸੋਯੇਵ ਉਜ੍ਜਗ੍ਘਿਕਾ, ਤਾਯ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਹਾਹਸਿਤਂ ਹਸਨ੍ਤੋ’’ਤਿ. ਏਤ੍ਥਾਤਿ ‘‘ਉਜ੍ਜਗ੍ਘਿਕਾਯਾ’’ਤਿਪਦੇ.

੫੮੮. ਕਿਤ੍ਤਾਵਤਾਤਿ ਕਿਤ੍ਤਕੇਨ ਪਮਾਣੇਨ, ਏਵਂ ਨਿਸਿਨ੍ਨੇਸੁ ਥੇਰੇਸੂਤਿ ਸਮ੍ਬਨ੍ਧੋ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਵਵਤ੍ਥਪੇਤੀਤਿ ਇਦਞ੍ਚੀਦਞ੍ਚ ਕਥੇਤੀਤਿ ਵਵਤ੍ਥਪੇਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਪਮਾਣੇਨ.

੫੯੦. ਨਿਚ੍ਚਲਂ ਕਤ੍ਵਾ ਕਾਯਸ੍ਸ ਉਜੁਟ੍ਠਪਨਂ ਕਾਯਪਗ੍ਗਹੋ ਨਾਮਾਤਿ ਆਹ ‘‘ਨਿਚ੍ਚਲਂ ਕਤ੍ਵਾ’’ਤਿਆਦਿ. ਏਸੇਵ ਨਯੋ ਬਾਹੁਪਗ੍ਗਹਸੀਸਪਗ੍ਗਹੇਸੁਪੀਤਿ. ਦੁਤਿਯੋ ਵਗ੍ਗੋ.

੩. ਖਮ੍ਭਕਤਵਗ੍ਗ-ਅਤ੍ਥਯੋਜਨਾ

੫੯੬. ਖਮ੍ਭੋ ਕਤੋ ਯੇਨਾਤਿ ਖਮ੍ਭਕਤੋ. ਖਮ੍ਭੋਤਿ ਚ ਪਟਿਬਦ੍ਧੋ. ਕਤ੍ਥ ਪਟਿਬਦ੍ਧੋਤਿ ਆਹ ‘‘ਕਟਿਯਂ ਹਤ੍ਥਂ ਠਪੇਤ੍ਵਾ’’ਤਿ. ਸਸੀਸਂ ਅਵਗੁਣ੍ਠਯਤਿ ਪਰਿਵੇਠਤੀਤਿ ਓਗੁਣ੍ਠਿਤੋਤਿ ਆਹ ‘‘ਸਸੀਸਂ ਪਾਰੁਤੋ’’ਤਿ.

੬੦੦. ਉਦ੍ਧਂ ਏਕਾ ਕੋਟਿ ਇਮਿਸ੍ਸਾ ਗਮਨਾਯਾਤਿ ਉਕ੍ਕੁਟਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਕ੍ਕੁਟਿਕਾ ਵੁਚ੍ਚਤੀ’’ਤਿਆਦਿ. ਏਤ੍ਥਾਤਿ ‘‘ਉਕ੍ਕੁਟਿਕਾਯਾ’’ਤਿਪਦੇ.

੬੦੧. ਹਤ੍ਥਪਲ੍ਲਤ੍ਥੀਕਦੁਸ੍ਸਪਲ੍ਲਤ੍ਥੀਕੇਸੁ ਦ੍ਵੀਸੁ ਦੁਸ੍ਸਪਲ੍ਲਤ੍ਥਿਕੇ ਆਯੋਗਪਲ੍ਲਤ੍ਥੀਕਾਪਿ ਸਙ੍ਗਹਂ ਗਚ੍ਛਤੀਤਿ ਆਹ ‘‘ਆਯੋਗਪਲ੍ਲਤ੍ਥਿਕਾਪਿ ਦੁਸ੍ਸਪਲ੍ਲਤ੍ਥਿਕਾ ਏਵਾ’’ਤਿ.

੬੦੨. ਸਤਿਯਾ ਉਪਟ੍ਠਾਨਂ ਸਕ੍ਕਚ੍ਚਨ੍ਤਿ ਆਹ ‘‘ਸਤਿਂਉਪਟ੍ਠਪੇਤ੍ਵਾ’’ਤਿ.

੬੦੩. ਪਿਣ੍ਡਪਾਤਂ ਦੇਨ੍ਤੇਪੀਤਿ ਪਿਣ੍ਡਪਾਤਂ ਪਤ੍ਤੇ ਪਕ੍ਖਿਪਨ੍ਤੇਪਿ. ਪਤ੍ਤੇ ਸਞ੍ਞਾ ਪਤ੍ਤਸਞ੍ਞਾ, ਸਾ ਅਸ੍ਸਤ੍ਥੀਤਿ ਪਤ੍ਤਸਞ੍ਞੀ. ‘‘ਕਤ੍ਵਾ’’ ਤਿਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੬੦੪. ਸਮਸੂਪਕਂ ਪਿਣ੍ਡਪਾਤਨ੍ਤਿ ਏਤ੍ਥ ਸੂਪਪਿਣ੍ਡਪਾਤਾਨਂ ਸਮਉਪਡ੍ਢਭਾਵਂ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਸਮਸੂਪਕੋ ਨਾਮਾ’’ਤਿਆਦਿ. ਯਤ੍ਥਾਤਿ ਪਿਣ੍ਡਪਾਤੇ. ਭਤ੍ਤਸ੍ਸ ਚਤੁਤ੍ਥਭਾਗਪਮਾਣੋ ਸੂਪੋ ਹੋਤਿ, ਸੋ ਪਿਣ੍ਡਪਾਤੋ ਸਮਸੂਪਕੋ ਨਾਮਾਤਿ ਯੋਜਨਾ. ਓਲੋਣੀ ਚ ਸਾਕਸੂਪੇਯ੍ਯਞ੍ਚ ਮਚ੍ਛਰਸੋ ਚ ਮਂਸਰਸੋ ਚਾਤਿ ਦ੍ਵਨ੍ਦੋ. ਤਤ੍ਥ ਓਲੋਣੀਤਿ ਏਕਾ ਬ੍ਯਞ੍ਜਨਵਿਕਤਿ. ਸਾਕਸੂਪੇਯ੍ਯਨ੍ਤਿ ਸੂਪਸ੍ਸ ਹਿਤਂ ਸੂਪੇਯ੍ਯਂ, ਸਾਕਮੇਵ ਸੂਪੇਯ੍ਯਂ ਸਾਕਸੂਪੇਯ੍ਯਂ. ਇਮਿਨਾ ਸਬ੍ਬਾਪਿ ਸਾਕਸੂਪੇਯ੍ਯਬ੍ਯਞ੍ਜਨਵਿਕਤਿ ਗਹਿਤਾ. ਮਚ੍ਛਰਸਮਂਸਰਸਾਦੀਨੀਤਿ ਏਤ੍ਥ ਆਦਿਸਦ੍ਦੇਨ ਅਵਸੇਸਾ ਸਬ੍ਬਾਪਿ ਬ੍ਯਞ੍ਜਨਵਿਕਤਿ ਸਙ੍ਗਹਿਤਾ. ਤਂ ਸਬ੍ਬਂ ਰਸਾਨਂ ਰਸੋ ਰਸਰਸੋਤਿ ਕਤ੍ਵਾ ‘‘ਰਸਰਸੋ’’ਤਿ ਵੁਚ੍ਚਤਿ.

੬੦੫. ਸਮਪੁਣ੍ਣਂ ਸਮਭਰਿਤਨ੍ਤਿ ਵੇਵਚਨਮੇਵ. ਥੂਪਂ ਕਤੋ ਥੂਪੀਕਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਥੂਪੀਕਤੋ ਨਾਮਾ’’ਤਿਆਦਿ.

ਤਤ੍ਥਾਤਿ ‘‘ਥੂਪੀਕਤ’’ਨ੍ਤਿਆਦਿਵਚਨੇ. ਤੇਸਨ੍ਤਿ ਅਭਯਤ੍ਥੇਰਤਿਪਿਟਕਚੂਲ਼ਨਾਗਤ੍ਥੇਰਾਨਂ. ਇਤਿ ਪੁਚ੍ਛਿਂਸੁ, ਤੇਸਞ੍ਚ ਥੇਰਾਨਂ ਵਾਦਂ ਆਰੋਚੇਸੁਨ੍ਤਿ ਯੋਜਨਾ. ਥੇਰੋਤਿ ਚੂਲ਼ਸੁਮਨਤ੍ਥੇਰੋ. ਏਤਸ੍ਸਾਤਿ ਤਿਪਿਟਕਚੂਲ਼ਨਾਗਤ੍ਥੇਰਸ੍ਸ. ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤ ਵਾਰੇ. ਕੁਤੋਤਿ ਕਸ੍ਸਾਚਰਿਯਸ੍ਸ ਸਨ੍ਤਿਕਾ. ਤਸ੍ਮਾਤਿ ਯਸ੍ਮਾ ਯਾਵਕਾਲਿਕੇਨ ਪਰਿਚ੍ਛਿਨ੍ਨੋ, ਤਸ੍ਮਾ. ਆਮਿਸਜਾਤਿਕਂ ਯਾਗੁਭਤ੍ਤਂ ਵਾ ਫਲਾਫਲਂ ਵਾਤਿ ਯੋਜਨਾ. ਤਞ੍ਚ ਖੋਤਿ ਤਞ੍ਚ ਸਮਤਿਤ੍ਥਿਕਂ. ਇਤਰੇਨ ਪਨਾਤਿ ਨਾਧਿਟ੍ਠਾਨੁਪਗੇਨ ਪਤ੍ਤੇਨ ਪਨ. ਯਂ ਪੂਵਉਚ੍ਛੁਖਣ੍ਡਫਲਾਫਲਾਦਿ ਹੇਟ੍ਠਾ ਓਰੋਹਤਿ, ਤਂ ਪੂਵਉਚ੍ਛੁਖਣ੍ਡਫਲਾਫਲਾਦੀਤਿ ਯੋਜਨਾ. ਪੂਵਵਟਂਸਕੋਤਿ ਏਤ੍ਥ ਵਟਂਸਕੋਤਿ ਉਤ੍ਤਂਸੋ. ਸੋ ਹਿ ਉਦ੍ਧਂ ਤਸੀਯਤੇ ਅਲਙ੍ਕਰੀਯਤੇਤਿ ਵਟਂਸੋਤਿ ਵੁਚ੍ਚਤਿ ਉਕਾਰਸ੍ਸ ਵਕਾਰਂ, ਤਕਾਰਸ੍ਸ ਚ ਟਕਾਰਂ ਕਤ੍ਵਾ, ਸੋਯੇਵ ਵਟਂਸਕੋ, ਮੁਦ੍ਧਨਿ ਪਿਲਨ੍ਧਿਤੋ ਏਕੋ ਅਲਙ੍ਕਾਰਵਿਸੇਸੋ. ਪੂਵਮੇਵ ਤਂਸਦਿਸਤ੍ਤਾ ਪੂਵਵਟਂਸਕੋ, ਤਂ. ਪੁਪ੍ਫਵਟਂਸਕੋ ਚ ਤਕ੍ਕੋਲਕਟੁਕਫਲਾਦਿਵਟਂਸਕੋ ਚਾਤਿ ਦ੍ਵਨ੍ਦੋ, ਤੇ.

ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਨਨੁ ਸਬ੍ਬਥੂਪੀਕਤੇਸੁ ਪਟਿਗ੍ਗਹਣਸ੍ਸ ਅਕਪ੍ਪਿਯਤ੍ਤਾ ਪਰਿਭੁਞ੍ਜਨਮ੍ਪਿ ਨ ਵਟ੍ਟਤੀਤਿ ਆਹ ‘‘ਸਬ੍ਬਤ੍ਥ ਪਨਾ’’ਤਿਆਦਿ. ਤਤ੍ਥ ਸਬ੍ਬਤ੍ਥਾਤਿ ਸਬ੍ਬੇਸੁ ਥੂਪੀਕਤੇਸੂਤਿ. ਤਤਿਯੋ ਵਗ੍ਗੋ.

੪. ਸਕ੍ਕਚ੍ਚਵਗ੍ਗ-ਅਤ੍ਥਯੋਜਨਾ

੬੦੮. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਓਧਿਨ੍ਤਿ ਅਵਧਿਂ ਮਰਿਯਾਦਂ.

੬੧੦. ਥੂਪਕਤੋਤਿ ਥੂਪਮੇਵ ਥੂਪਕਂ, ਤਤੋ ਥੂਪਕਤੋਤਿ ਦਸ੍ਸੇਨ੍ਤੋ ਆਹ ‘‘ਮਤ੍ਥਕਤੋ’’ਤਿ.

੬੧੧. ਮਾਘਾਤਸਮਯਾਦੀਸੂਤਿ ‘‘ਪਾਣੇ ਮਾ ਘਾਤੇਥਾ’’ਤਿ ਰਾਜਾਨੋ ਭੇਰਿਂ ਚਰਾਪੇਨ੍ਤਿ ਏਤ੍ਥਾਤਿ ਮਾਘਾਤੋ, ਸੋਯੇਵ ਸਮਯੋ ਮਾਘਾਤਸਮਯੋ. ਆਦਿਸਦ੍ਦੇਨ ਅਞ੍ਞਂ ਪਟਿਚ੍ਛਨ੍ਨਕਾਰਣਂ ਗਹੇਤਬ੍ਬਂ.

੬੧੫. ਤੇਸਨ੍ਤਿ ਮਯੂਰਣ੍ਡਕੁਕ੍ਕੁਟਣ੍ਡਾਨਨ੍ਤਿ. ਚਤੁਤ੍ਥੋ ਵਗ੍ਗੋ.

੫. ਕਬਲ਼ਵਗ੍ਗ-ਅਤ੍ਥਯੋਜਨਾ

੬੧੭. ‘‘ਮੁਖਦ੍ਵਾਰ’’ਨ੍ਤਿ ਕਮ੍ਮਸ੍ਸ ‘‘ਅਨਾਹਟੇ’’ਤਿ ਚ ‘‘ਵਿਵਰਿਸ੍ਸਾਮੀ’’ਤਿ ਚ ਦ੍ਵੀਸੁ ਕਿਰਿਯਾਸੁ ਸਮ੍ਬਨ੍ਧਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਨਾਹਰਿਤੇ ਮੁਖਦ੍ਵਾਰ’’ਨ੍ਤਿ.

੬੧੮. ਸਕਲਂ ਹਤ੍ਥਨ੍ਤਿ ਪਞ੍ਚਙ੍ਗੁਲਿਂ ਸਨ੍ਧਾਯ ਵੁਤ੍ਤਂ.

੬੧੯. ਸਕਬਲ਼ੇਨਾਤਿ ਏਤ੍ਥ ਕਬਲ਼ਸਦ੍ਦੇਨ ਵਚਨਸ੍ਸ ਅਪਰਿਪੁਣ੍ਣਕਾਰਣਂ ਸਬ੍ਬਮ੍ਪਿ ਗਹੇਤਬ੍ਬਂ.

੬੨੦. ਪਿਣ੍ਡੁਕ੍ਖੇਪਕਨ੍ਤਿਆਦੀਸੁ ਵਿਚ੍ਛਤ੍ਥੇ ਕਪਚ੍ਚਯੋਤਿ ਆਹ ‘‘ਪਿਣ੍ਡਂ ਉਕ੍ਖਿਪਿਤ੍ਵਾ ਉਕ੍ਖਿਪਿਤ੍ਵਾ’’ਤਿ. ਤ੍ਵਾਸਦ੍ਦੇਨ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੬੨੪. ‘‘ਅਵਕਿਰਿਤ੍ਵਾ’’ਤਿ ਇਮਿਨਾ ਸਿਤ੍ਥਾਵਕਾਰਕਨ੍ਤਿ ਏਤ੍ਥ ਅਵਪੁਬ੍ਬੋ ਕਿਰਧਾਤੁਯੇਵ, ਨ ਕਰਧਾਤੂਤਿ ਦਸ੍ਸੇਤਿ.

੬੨੬. ‘‘ਚਪੁਚਪੂ’’ਤਿ ਏਵਂ ਸਦ੍ਦਨ੍ਤਿ ‘‘ਚਪੁਚਪੂ’’ਤਿ ਏਵਂ ਅਨੁਕਰਣਰਵਨ੍ਤਿ. ਪਞ੍ਚਮੋ ਵਗ੍ਗੋ.

੬. ਸੁਰੁਸੁਰੁਵਗ੍ਗ-ਅਤ੍ਥਯੋਜਨਾ

੬੨੭. ‘‘ਸੁਰੁਸੁਰੂ’’ਤਿ ਏਵਂ ਸਦ੍ਦਨ੍ਤਿ ‘‘ਸੁਰੁਸੁਰੂ’’ਤਿ ਏਵਂ ਅਨੁਕਰਣਰਵਂ. ਦਵਨਂ ਕੀਲ਼ਨਨ੍ਤਿ ਇਮਿਨਾ ਵਚਨਤ੍ਥੇਨ ਪਰਿਹਾਸੋ ਦਵੋ ਨਾਮਾਤਿ ਆਹ ‘‘ਦਵੋਤਿ ਪਰਿਹਾਸਵਚਨ’’ਨ੍ਤਿ. ਤਨ੍ਤਿ ਸੋ ਦਵੋ. ਲਿਙ੍ਗਵਿਪਲ੍ਲਾਸੋ ਹੇਸ. ਨ ਕਾਤਬ੍ਬਂ ਨ ਕਾਤਬ੍ਬੋਤਿ ਸਮ੍ਬਨ੍ਧੋ. ਸਿਲਕਬੁਦ੍ਧੋਤਿ ਸਿਲਾਯ ਕਤੋ, ਸਿਲੇਨ ਨਿਯੁਤ੍ਤੋ ਵਾ ਬੁਦ੍ਧੋ. ਅਪਟਿਬੁਦ੍ਧੋਤਿ ਅਪਟਿਵਿਦ੍ਧੋ ਬੁਦ੍ਧੋ, ਪਰਿਹਾਸਵਚਨਮੇਤਂ. ਗੋਧਮ੍ਮੋਤਿ ਗੁਨ੍ਨਂ ਧਮ੍ਮੋ. ਅਜਧਮ੍ਮੋਤਿ ਅਜਾਨਂ ਧਮ੍ਮੋ. ਮਿਗਸਙ੍ਘੋਤਿ ਮਿਗਾਨਂ ਸਙ੍ਘੋ. ਪਸੁਸਙ੍ਘੋਤਿ ਪਸੂਨਂ ਸਙ੍ਘੋ.

੬੨੮. ‘‘ਭੁਞ੍ਜਨ੍ਤੇਨਾ’’ਤਿ ਪਦਂ ‘‘ਨਿਲ੍ਲੇਹਿਤੁ’’ਨ੍ਤਿ ਪਦੇ ਭਾਵਕਤ੍ਤਾ.

੬੩੧. ਏਵਂਨਾਮਕੇਤਿ ‘‘ਕੋਕਨੁਦ’’ਨ੍ਤਿ ਏਵਂ ਨਾਮਂ ਅਸ੍ਸ ਪਾਸਾਦਸ੍ਸਾਤਿ ਏਵਂਨਾਮਕੋ, ਪਾਸਾਦੋ, ਤਸ੍ਮਿਂ. ‘‘ਪਦੁਮਸਣ੍ਠਾਨੋ’’ਤਿ ਇਮਿਨਾ ਪਾਸਾਦਸ੍ਸ ਸਦਿਸੂਪਚਾਰੇਨ ‘‘ਕੋਕਨੁਦੋ’’ਤਿ ਨਾਮਲਭਨਂ ਦਸ੍ਸੇਤਿ. ਤੇਨਾਤਿ ਪਦੁਮਸਣ੍ਠਾਨਤ੍ਤਾ. ਅਸ੍ਸਾਤਿ ਪਾਸਾਦਸ੍ਸ. ਪੁਗ੍ਗਲਿਕਮ੍ਪੀਤਿ ਪਰਪੁਗ੍ਗਲਸਨ੍ਤਕਂ ਗਹੇਤਬ੍ਬਂ ‘‘ਅਤ੍ਤਨੋ ਸਨ੍ਤਕਮ੍ਪੀ’’ਤਿ ਅਤ੍ਤਪੁਗ੍ਗਲਸਨ੍ਤਕਸ੍ਸ ਵਿਸੁਂ ਗਯ੍ਹਮਾਨਤ੍ਤਾ. ਸਙ੍ਖਮ੍ਪੀਤਿ ਪਾਨੀਯਸਙ੍ਖਮ੍ਪਿ. ਸਰਾਵਮ੍ਪੀਤਿ ਪਾਨੀਯਸਰਾਵਮ੍ਪਿ. ਥਾਲਕਮ੍ਪੀਤਿ ਪਾਨੀਯਥਾਲਕਮ੍ਪਿ.

੬੩੨. ‘‘ਉਦ੍ਧਰਿਤ੍ਵਾ’’ਤਿ ਸਾਮਞ੍ਞਤੋ ਵੁਤ੍ਤਵਚਨਸ੍ਸ ਕਮ੍ਮਾਪਾਦਾਨਾਨਿ ਦਸ੍ਸੇਤੁਂ ਵੁਤ੍ਤਂ ‘‘ਸਿਤ੍ਥਾਨਿ ਉਦਕਤੋ’’ਤਿ. ਭਿਨ੍ਦਿਤ੍ਵਾਤਿ ਚੁਣ੍ਣਵਿਚੁਣ੍ਣਾਨਿ ਕਤ੍ਵਾ. ਬਹੀਤਿ ਅਨ੍ਤਰਘਰਤੋ ਬਹਿ.

੬੩੪. ਸੇਤਚ੍ਛਤ੍ਤਨ੍ਤਿ ਏਤ੍ਥ ਸੇਤਸਦ੍ਦੋ ਪਣ੍ਡਰਪਰਿਯਾਯੋਤਿ ਆਹ ‘‘ਪਣ੍ਡਰਚ੍ਛਤ੍ਤ’’ਨ੍ਤਿ. ਵਤ੍ਥਪਲਿਗੁਣ੍ਠਿਤਨ੍ਤਿ ਵਤ੍ਥੇਹਿ ਸਮਨ੍ਤਤੋ ਵੇਠਿਤਂ. ਸੇਤਂ ਛਤ੍ਤਂ ਸੇਤਚ੍ਛਤ੍ਤਂ. ਕਿਲ਼ਞ੍ਜੇਹਿ ਕਤਂ ਛਤ੍ਤਂ ਕਿਲ਼ਞ੍ਜਚ੍ਛਤ੍ਤਂ. ਪਣ੍ਣੇਹਿ ਕਤਂ ਛਤ੍ਤਂ ਪਣ੍ਣਚ੍ਛਤ੍ਤਂ. ਮਣ੍ਡਲੇਨ ਬਦ੍ਧਂ ਮਣ੍ਡਲਬਦ੍ਧਂ. ਸਲਾਕਾਹਿ ਬਦ੍ਧਂ ਸਲਾਕਬਦ੍ਧਂ. ਤਾਨੀਤਿ ਤੀਣਿ ਛਤ੍ਤਾਨਿ. ਹੀਤਿ ਸਚ੍ਚਂ. ਯਮ੍ਪਿ ਏਕਪਣ੍ਣਚ੍ਛਤ੍ਤਨ੍ਤਿ ਯੋਜਨਾ. ਏਤੇਸੂਤਿ ਤੀਸੁ ਛਤ੍ਤੇਸੁ. ਅਸ੍ਸਾਤਿ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ. ਸੋਤਿ ਯੋ ਕੋਚਿ ਗਹਟ੍ਠੋ ਵਾ ਪਬ੍ਬਜਿਤੋ ਵਾ. ਛਤ੍ਤਪਾਦੁਕਾਯ ਵਾਤਿ ਛਤ੍ਤਦਣ੍ਡਨਿਕ੍ਖੇਪਨਾਯ ਪਾਦੁਕਾਯ ਵਾ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੬੩੫. ਮਜ੍ਝਿਮਸ੍ਸਾਤਿ ਪਮਾਣਮਜ੍ਝਿਮਸ੍ਸ. ‘‘ਚਤੁਹਤ੍ਥਪ੍ਪਮਾਣੋ’’ਤਿਇਮਿਨਾ ਚਤੁਹਤ੍ਥਤੋ ਊਨਾਤਿਰੇਕੋ ਦਣ੍ਡੋ ਨ ਦਣ੍ਡੋ ਨਾਮਾਤਿ ਦਸ੍ਸੇਤਿ. ਦਣ੍ਡੋ ਪਾਣਿਮ੍ਹਿ ਅਸ੍ਸਾਤਿ ਵਚਨਤ੍ਥਂ ਅਤਿਦਿਸਨ੍ਤੋ ਆਹ ‘‘ਵੁਤ੍ਤਨਯੇਨੇਵਾ’’ਤਿ.

੬੩੬. ‘‘ਸਤ੍ਥਪਾਣਿਮ੍ਹੀ’’ਤਿ ਏਤ੍ਥ ਅਸਿ ਏਵ ਅਧਿਪ੍ਪੇਤੋਤਿ ਆਹ ‘‘ਅਸਿ’’ਨ੍ਤਿ. ਅਸਿਨ੍ਤਿ ਖਗ੍ਗਂ.

੬੩੭. ‘‘ਆਵੁਧਂ ਨਾਮ ਚਾਪੋ ਕੋਦਣ੍ਡੋ’’ਤਿ ਪਾਲ਼ਿਯਂ ਵੁਤ੍ਤਵਚਨਂ ਉਪਲਕ੍ਖਣਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਆਵੁਧਪਾਣਿਸ੍ਸਾਤਿ ਏਤ੍ਥਾ’’ਤਿਆਦਿ. ਸਬ੍ਬਾਪਿ ਧਨੁਵਿਕਤਿ ਆਵੁਧਨ੍ਤਿ ਵੇਦਿਤਬ੍ਬਾਤਿ ਯੋਜਨਾ. ਯਥਾ ਅਸਿਂ ਸਨ੍ਨਹਿਤ੍ਵਾ ਠਿਤੋ ਸਤ੍ਥਪਾਣੀਤਿ ਸਙ੍ਖ੍ਯਂ ਨ ਗਚ੍ਛਤਿ, ਏਵਂ ਧਨੁਂ ਕਣ੍ਠੇ ਪਟਿਮੁਕ੍ਕੋ ਆਵੁਧਪਾਣੀਤਿ ਆਹ ‘‘ਸਚੇ ਪਨਾ’’ਤਿਆਦਿ, ਇਮਿਨਾ ਆਵੁਧੋ ਪਾਣਿਨਾ ਗਹਿਤੋਯੇਵ ਆਵੁਧਪਾਣਿ ਨਾਮਾਤਿ ਦਸ੍ਸੇਤੀਤਿ. ਛਟ੍ਠੋ ਵਗ੍ਗੋ.

੭. ਪਾਦੁਕਵਗ੍ਗ-ਅਤ੍ਥਯੋਜਨਾ

੬੩੮. ਅਙ੍ਗੁਲਨ੍ਤਰਨ੍ਤਿ ਪਾਦਙ੍ਗੁਲਵਿਵਰਂ. ਪਾਦੁਕਨ੍ਤਿ ਉਪਾਹਨਵਿਸੇਸੋ. ਸੋ ਹਿ ਪਜ੍ਜਤੇ ਇਮਾਯਾਤਿ ਪਾਦੁਕਾਤਿ ਵੁਚ੍ਚਤਿ, ਸਾ ਬਹੁਪਟਲਾ ਚਮ੍ਮਮਯਾ ਵਾ ਹੋਤਿ ਕਟ੍ਠਮਯਾ ਵਾ. ਪਟਿਮੁਞ੍ਚਿਤ੍ਵਾਤਿ ਪਾਦੁਕਂ ਪਟਿਮੁਞ੍ਚੀਤ੍ਵਾ.

੬੪੦. ਦ੍ਵੀਹਿ ਜਨੇਹਿ ਗਹਿਤੋਤਿ ਸਮ੍ਬਨ੍ਧੋ. ਵਂਸੇਨਾਤਿ ਵੇਣੁਨਾ, ਯਾਨੇ ਨਿਸਿਨ੍ਨੋਤਿ ਸਮ੍ਬਨ੍ਧੋ. ਵਿਸਙ੍ਖਰਿਤ੍ਵਾਤਿ ਵਿਪਤ੍ਤਿਂ ਕਰਿਤ੍ਵਾ. ਦ੍ਵੇਪੀਤਿ ਧਮ੍ਮਕਥਿਕਧਮ੍ਮਪਟਿਗ੍ਗਾਹਕਸਙ੍ਖਾਤਾ ਉਭੋਪਿ ਜਨਾ. ਵਟ੍ਟਤੀਤਿ ਦੇਸੇਤੁਂ ਵਟ੍ਟਤਿ.

੬੪੧. ਸਯਨਗਤਸ੍ਸਾਤਿ ਸਯਨਂ ਗਤਸ੍ਸ, ਸਯਨੇ ਨਿਪਨ੍ਨਸ੍ਸਾਤਿ ਅਤ੍ਥੋ. ਨਿਪਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਸਮ੍ਬਨ੍ਧੋ.

੬੪੨. ਤੀਸੁ ਪਲ੍ਲਤ੍ਥਿਕਾਸੁ ਯਾਯ ਕਾਯਚਿ ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸ ਧਮ੍ਮਂ ਦੇਸੇਤੁਂ ਨ ਵਟ੍ਟਤੀਤਿ ਦਸ੍ਸੇਨ੍ਤੋ ਆਹ ‘‘ਪਲ੍ਲਤ੍ਥਿਕਾਯਾ’’ਤਿਆਦਿ.

੬੪੩. ਯਥਾ ਵੇਠਿਯਮਾਨੇ ਕੇਸਨ੍ਤੋ ਨ ਦਿਸ੍ਸਤਿ, ਏਵਂ ਵੇਠਿਤਸੀਸਸ੍ਸਾਤਿ ਯੋਜਨਾ.

੬੪੭. ਛਪਕਸਦ੍ਦਸ੍ਸ ਚ ਚਣ੍ਡਾਲਸਦ੍ਦਸ੍ਸ ਚ ਵੇਵਚਨਤ੍ਤਾ ਵੁਤ੍ਤਂ ‘‘ਚਣ੍ਡਾਲਸ੍ਸਾ’’ਤਿ. ਚਣ੍ਡਾਲੋ ਹਿ ਸਂ ਸੁਨਖਂ ਪਚਤੀਤਿ ਛਪਕੋਤਿ ਵੁਚ੍ਚਤਿ ਸਕਾਰਸ੍ਸ ਛਕਾਰਂ ਕਤ੍ਵਾ. ਛਪਕਸ੍ਸ ਏਸਾ ਛਪਕੀ, ਚਣ੍ਡਾਲਭਰਿਯਾ. ਯਤ੍ਰਾਤਿ ਏਤ੍ਥ ਤ੍ਰਪਚ੍ਚਯੋ ਪਚ੍ਚਤ੍ਤੇ ਹੋਤੀਤਿ ਆਹ ‘‘ਯੋ ਹਿ ਨਾਮਾ’’ਤਿ. ਯੋ ਰਾਜਾ ਉਚ੍ਚੇ ਆਸਨੇ ਨਿਸੀਦਿਤ੍ਵਾ ਮਨ੍ਤਂ ਪਰਿਯਾਪੁਣਿਸ੍ਸਤਿ ਨਾਮ, ਅਯਂ ਰਾਜਾ ਯਾਵ ਅਤਿਵਿਯ ਅਧਮ੍ਮਿਕੋਤਿ ਵੁਤ੍ਤਂ ਹੋਤਿ. ‘‘ਸਬ੍ਬਮਿਦ’’ਨ੍ਤਿ ਅਯਂ ਸਦ੍ਦੋ ਲਿਙ੍ਗਵਿਪਲ੍ਲਾਸੋਤਿ ਆਹ ‘‘ਸਬ੍ਬੋ ਅਯ’’ਨ੍ਤਿ. ‘‘ਲੋਕੋ’’ਤਿ ਇਮਿਨਾ ਇਧਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਚਰਿਮਸਦ੍ਦੋ ਅਨ੍ਤਿਮਪਰਿਯਾਯੋ. ਅਨ੍ਤਿਮੋਤਿ ਚ ਲਾਮਕੋ. ਲਾਮਕੋਤਿ ਚ ਨਾਮ ਇਧ ਵਿਪਤ੍ਤੀਤਿ ਆਹ ‘‘ਸਙ੍ਕਰ’’ਨ੍ਤਿ. ਸਙ੍ਕਰਨ੍ਤਿ ਵਿਪਤ੍ਤਿਂ. ‘‘ਨਿਮ੍ਮਰਿਯਾਦੋ’’ਤਿ ਇਮਿਨਾ ‘‘ਸਙ੍ਕਰਂ ਗਤੋ’’ਤਿ ਪਦਾਨਂ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਚਰਿਮਂ ਗਤਂ ਚਰਿਮਗਤਂ, ਸਬ੍ਬੋ ਅਯਂ ਲੋਕੋ ਚਰਿਮਗਤੋਤਿ ਅਤ੍ਥੋ. ਇਧ ਚ ਜਾਤਕੇ (ਜਾ. ੧.੪.੩੩) ਚ ਕੇਸੁਚਿ ਪੋਤ੍ਥਕੇਸੁ ‘‘ਚਮਰਿਕਤ’’ਨ੍ਤਿ ਪਾਠੋ ਅਤ੍ਥਿ, ਸੋ ਅਯੁਤ੍ਤੋਯੇਵ. ਤਤ੍ਥੇਵਾਤਿ ਅਮ੍ਬਰੁਕ੍ਖਮੂਲੇਯੇਵ. ਤੇਸਨ੍ਤਿ ਰਾਜਬ੍ਰਾਹ੍ਮਣਾਨਂ.

ਤਤ੍ਥਾਤਿ ਤਿਸ੍ਸਂ ਗਾਥਾਯਂ. ਪਾਲ਼ਿਯਾਤਿ ਅਤ੍ਤਨੋ ਆਚਾਰਪਕਾਸਕਗਨ੍ਥਸਙ੍ਖਾਤਾਯ ਪਾਲ਼ਿਯਾ. ਨ ਪਸ੍ਸਰੇਤਿ ਏਤ੍ਥ ਰੇਸਦ੍ਦੋ ਅਨ੍ਤਿਸ੍ਸ ਕਾਰਿਯੋਤਿ ਆਹ ‘‘ਨ ਪਸ੍ਸਨ੍ਤੀ’’ਤਿ. ਯੋ ਚਾਯਨ੍ਤਿ ਯੋ ਚ ਅਯਂ. ਅਯਂਸਦ੍ਦੋ ਪਦਾਲਙ੍ਕਾਰਮਤ੍ਤੋ, ਬ੍ਰਾਹ੍ਮਣੋਤਿ ਅਤ੍ਥੋ. ਅਧੀਯਤੀਤਿ ਅਜ੍ਝਾਯਤਿ, ਸਿਕ੍ਖਤੀਤਿ ਅਤ੍ਥੋ.

ਤਤੋਤਿ ਬੋਧਿਸਤ੍ਤੇਨ ਵੁਤ੍ਤਗਾਥਾਤੋ ਪਰਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਗਾਥਾਯ. ਭੋਤਿ ਬੋਧਿਸਤ੍ਤਂ ਆਮਨ੍ਤੇਤਿ. ‘‘ਭੁਤ੍ਤੋ’’ਤਿ ਪਦਸ੍ਸ ਕਮ੍ਮਵਾਚਕਭਾਵਮਾਵਿਕਾਤੁਂ ਵੁਤ੍ਤਂ ‘‘ਮਯਾ’’ਤਿ. ਅਸ੍ਸਾਤਿ ਓਦਨਸ੍ਸ. ਇਮਿਨਾ ਸੁਚਿ ਪਰਿਸੁਦ੍ਧਂ ਮਂਸਂ ਸੁਚਿਮਂਸਂ, ਤੇਨ ਉਪਸੇਚਨਮਸ੍ਸਾਤਿ ਸੁਚਿਮਂਸੂਪਸੇਚਨੋਤਿ ਬਾਹਿਰਤ੍ਥਸਮਾਸਂ ਦਸ੍ਸੇਤਿ. ਧਮ੍ਮੇਤਿ ਆਚਾਰਧਮ੍ਮੇ. ਬਦ੍ਧੋ ਹੁਤ੍ਵਾਤਿ ਥਦ੍ਧੋ ਹੁਤ੍ਵਾ, ਅਯਮੇਵ ਵਾ ਪਾਠੋ. ਵਣ੍ਣਸਦ੍ਦਸ੍ਸ ਸਣ੍ਠਾਨਾਦਿਕੇ ਅਞ੍ਞੇ ਅਤ੍ਥੇ ਪਟਿਕ੍ਖਿਪਿਤੁਂ ਵੁਤ੍ਤਂ ‘‘ਪਸਤ੍ਥੋ’’ਤਿ. ਥੋਮਿਤੋਤਿ ਤਸ੍ਸੇਵ ਵੇਵਚਨਂ.

ਅਥਾਤਿ ਅਨਨ੍ਤਰੇ. ਨਨ੍ਤਿ ਬ੍ਰਾਹ੍ਮਣਂ. ਤਸ੍ਸਾਤਿ ਗਾਥਾਦ੍ਵਯਸ੍ਸ. ਬ੍ਰਾਹ੍ਮਣਾਤਿ ਪੁਰੋਹਿਤਂ ਆਲਪਤਿ. ਸਮ੍ਪਤੀਤਿ ਸਨ੍ਦੀਟ੍ਠਿਕੇ. ‘‘ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ’’ਤਿ ਪਦਾਨਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਨਿਪ੍ਪਜ੍ਜਤੀ’’ਤਿ.

ਮਹਾਬ੍ਰਹ੍ਮੇਤਿ ਏਤ੍ਥ ਬ੍ਰਹ੍ਮਸਦ੍ਦੋ ਬ੍ਰਾਹ੍ਮਣਵਾਚਕੋਤਿ ਆਹ ‘‘ਮਹਾਬ੍ਰਾਹ੍ਮਣਾ’’ਤਿ. ਅਞ੍ਞੇਪੀਤਿ ਰਾਜਬ੍ਰਾਹ੍ਮਣੇਹਿ ਅਪਰੇਪਿ. ‘‘ਪਚਨ੍ਤੀ’’ਤਿ ਵੁਤ੍ਤੇ ਅਵਿਨਾਭਾਵਤੋ ‘‘ਭੁਞ੍ਜਨ੍ਤੀ’’ਤਿ ਅਤ੍ਥੋਪਿ ਗਹੇਤਬ੍ਬੋਤਿ ਆਹ ‘‘ਪਚਨ੍ਤਿ ਚੇਵ ਭੁਞ੍ਜਨ੍ਤਿ ਚਾ’’ਤਿ. ‘‘ਨ ਕੇਵਲ’’ਨ੍ਤਿਆਦਿਨਾ ਅਞ੍ਞੇਪੀਤਿ ਏਤ੍ਥ ਪਿਸਦ੍ਦਸ੍ਸ ਸਮ੍ਪਿਣ੍ਡਨਤ੍ਥਂ ਦਸ੍ਸੇਤਿ, ਤ੍ਵਂ ਆਚਰਿਸ੍ਸਸੀਤਿ ਸਮ੍ਬਨ੍ਧੋ. ਪੁਨ ਤ੍ਵਨ੍ਤਿ ਤਂ, ਉਪਯੋਗਤ੍ਥੇ ਚੇਤਂ ਪਚ੍ਚਤ੍ਤਵਚਨਂ, ‘‘ਮਾ ਭਿਦਾ’’ਤਿਇਮਿਨਾ ਸਮ੍ਬਨ੍ਧਿਤਬ੍ਬਂ. ‘‘ਪਾਸਾਣੋ’’ਤਿਇਮਿਨਾ ਅਸ੍ਮਸਦ੍ਦੋ ਪਾਸਾਣਪਰਿਯਾਯੋਤਿ ਦਸ੍ਸੇਤਿ. ਤੇਨਾਤਿ ਭਿਨ੍ਦਨਹੇਤੁਨਾ.

੬੪੮. ਅਤ੍ਤਨੋ ਕਙ੍ਖਾਠਾਨਸ੍ਸ ਪੁਚ੍ਛਨਂ ਸਨ੍ਧਾਯ ਵੁਤ੍ਤਂ ‘‘ਨ ਕਥੇਤਬ੍ਬ’’ਨ੍ਤਿ.

੬੪੯. ਸਮਧੁਰੇਨਾਤਿ ਸਮਂ ਧੁਰੇਨ, ਸਮਂ ਮੁਖੇਨਾਤਿ ਅਤ੍ਥੋ.

੬੫੨. ਯਂ ਮੂਲਂ ਵਾ ਯਾ ਸਾਖਾ ਵਾ ਗਚ੍ਛਤੀਤਿ ਯੋਜਨਾ. ਖਨ੍ਧੇਤਿ ਰੁਕ੍ਖਸ੍ਸ ਖਨ੍ਧੇ. ਨਿਕ੍ਖਮਤੀਤਿ ਉਚ੍ਚਾਰਪਸ੍ਸਾਵੋ ਨਿਕ੍ਖਮਤਿ. ਤਿਣਣ੍ਡੁਪਕਨ੍ਤਿ ਤਿਣੇਨ ਕਤਂ, ਤਿਣਮਯਂ ਵਾ ਅਣ੍ਡੁਪਕਂ. ਏਤ੍ਥਾਤਿ ਉਚ੍ਚਾਰਪਸ੍ਸਾਵਖੇਲ਼ੇਸੁ.

੬੫੩. ਅਧਿਪ੍ਪੇਤਉਦਕਂ ਦਸ੍ਸੇਤੁਂ ਵੁਤ੍ਤਂ ‘‘ਪਰਿਭੋਗਉਦਕਮੇਵਾ’’ਤਿ. ਸਤ੍ਤਮੋ ਵਗ੍ਗੋ.

ਏਤ੍ਥਾਤਿ ਸੇਖਿਯੇਸੁ. ਸੂਪਬ੍ਯਞ੍ਜਨਪਟਿਚ੍ਛਾਦਨੇਤਿ ਸੂਪਬ੍ਯਞ੍ਜਨੇ ਓਦਨੇਨ ਪਟਿਚ੍ਛਾਦੇਤਿ. ਸਮਤ੍ਤਾ ਸੇਖਿਯਾ.

੮. ਸਤ੍ਤਾਧਿਕਰਣਸਮਥ-ਅਤ੍ਥਯੋਜਨਾ

੬੫੫. ਸਙ੍ਖ੍ਯਂ ਪਰਿਚ੍ਛਿਜ੍ਜਤੀਤਿ ਸਙ੍ਖ੍ਯਾਪਰਿਚ੍ਛੇਦੋ. ਤੇਸਨ੍ਤਿ ਚਤੁਬ੍ਬਿਧਾਨਮਧਿਕਰਣਾਨਂ. ਤਸ੍ਸਾਤਿ ਤੇਸਂ ਖਨ੍ਧਕਪਰਿਵਾਰਾਨਂ. ਤਤ੍ਥੇਵਾਤਿ ਤੇਸੁ ਏਵ ਖਨ੍ਧਕਪਰਿਵਾਰੇਸੁ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਿਕ੍ਖਾਪਦੇਸੂਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਭਿਕ੍ਖੁਵਿਭਙ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.

ਜਾਦਿਲਞ੍ਛਿਤਨਾਮੇਨ ਨੇਕਾਨਂ ਵਾਚਿਤੋ ਮਯਾ.

ਸਾਧੁਂ ਮਹਾਵਿਭਙ੍ਗਸ੍ਸ, ਸਮਤ੍ਤੋ ਯੋਜਨਾਨਯੋਤਿ.