੮. ਭੂਤਾਰੋਚਨਸਿਕ੍ਖਾਪਦਂ

੬੭. ਅਟ੍ਠਮੇ ਤਤ੍ਥਾਤਿ ਚਤੁਤ੍ਥਪਾਰਾਜਿਕਸਿਕ੍ਖਾਪਦੇ. ਇਧਾਤਿ ਭੂਤਾਰੋਚਨਸਿਕ੍ਖਾਪਦੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਯੁਤ੍ਤਵਾਚਾਤਿ ਪਚ੍ਚਯੇਹਿ ਯੁਤ੍ਤਾ ਵਾਚਾ. ਤਥਾਤਿ ਤਤੋ ਗੁਣਾਰੋਚਨਕਾਰਣਾ, ਅਰਿਯਾ ਸਾਦਿਯਿਂਸੂਤਿ ਯੋਜਨਾ.

ਯਤਸਦ੍ਦਾਨਂ ਨਿਚ੍ਚਸਮ੍ਬਨ੍ਧਤ੍ਤਾ ਵੁਤ੍ਤਂ ‘‘ਯੇ’’ਤਿਆਦਿ. ਸਬ੍ਬੇਪੀਤਿ ਪੁਥੁਜ੍ਜਨਾਰਿਯਾਪਿ. ਭੂਤਨ੍ਤਿ ਵਿਜ੍ਜਮਾਨਂ. ਕਸ੍ਮਾ ਸਬ੍ਬੇਪਿ ਪਟਿਜਾਨਿਂਸੁ, ਨਨੁ ਅਰਿਯੇਹਿ ਅਤ੍ਤਨੋ ਗੁਣਾਨਂ ਅਨਾਰੋਚਿਤਤ੍ਤਾ ਨ ਪਟਿਜਾਨਿਤਬ੍ਬਨ੍ਤਿ ਆਹ ‘‘ਅਰਿਯਾਨਮ੍ਪੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਰਿਯਾਨਮ੍ਪਿ ਅਬ੍ਭਨ੍ਤਰੇ ਉਤ੍ਤਰਿਮਨੁਸ੍ਸਧਮ੍ਮੋ ਯਸ੍ਮਾ ਭੂਤੋ ਹੋਤਿ, ਤਸ੍ਮਾ ਸਬ੍ਬੇਪਿ ‘‘ਭੂਤਂ ਭਗਵਾ’’ਤਿ ਪਟਿਜਾਨਿਂਸੂਤਿ ਯੋਜਨਾ. ਯਸ੍ਮਾ ਭਾਸਿਤੋ ਵਿਯ ਹੋਤਿ, ਤਸ੍ਮਾਤਿ ਯੋਜਨਾ. ਅਰਿਯਾ ਪਟਿਜਾਨਿਂਸੂਤਿ ਸਮ੍ਬਨ੍ਧੋ. ਅਨਾਦੀਨਵਦਸ੍ਸਿਨੋਤਿ ਦੋਸਸ੍ਸ ਅਦਸ੍ਸਨਧਮ੍ਮਾ. ਤੇਹੀਤਿ ਅਰਿਯੇਹਿ, ਭਾਸਿਤੋਤਿ ਸਮ੍ਬਨ੍ਧੋ. ਯਂ ਪਿਣ੍ਡਪਾਤਂ ਉਪ੍ਪਾਦੇਸੁਨ੍ਤਿ ਯੋਜਨਾ. ਅਞ੍ਞੇਤਿ ਪੁਥੁਜ੍ਜਨਾ. ਸਬ੍ਬਸਙ੍ਗਾਹਿਕੇਨੇਵਾਤਿ ਸਬ੍ਬੇਸਂ ਪੁਥੁਜ੍ਜਨਾਰਿਯਾਨਂ ਸਙ੍ਗਹਣੇ ਪਵਤ੍ਤੇਨੇਵ. ਸਿਕ੍ਖਾਪਦਵਿਭਙ੍ਗੇਪੀਤਿ ਸਿਕ੍ਖਾਪਦਸ੍ਸ ਪਦਭਾਜਨਿਯੇਪਿ. ਤਤ੍ਥਾਤਿ ਚਤੁਤ੍ਥਪਾਰਾਜਿਕੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੭੭. ਉਤ੍ਤਰਿਮਨੁਸ੍ਸਧਮ੍ਮਮੇਵ ਸਨ੍ਧਾਯ ਵੁਤ੍ਤਂ, ਨ ਸੁਤਾਦਿਗੁਣਨ੍ਤਿ ਅਤ੍ਥੋ. ਅਨ੍ਤਰਾ ਵਾਤਿ ਪਰਿਨਿਬ੍ਬਾਨਕਾਲਤੋ ਅਞ੍ਞਸ੍ਮਿਂ ਕਾਲੇ ਵਾ. ਅਤਿਕਡ੍ਢਿਯਮਾਨੇਨਾਤਿ ਅਤਿਨਿਪ੍ਪੀਲ਼ਿਯਮਾਨੇਨ. ਉਮ੍ਮਤ੍ਤਕਸ੍ਸਾਤਿ ਇਦਂ ਪਨਾਤਿ ਏਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ. ਤੇਨ ‘‘ਖਿਤ੍ਤਚਿਤ੍ਤਸ੍ਸਾ’’ਤਿਆਦਿਂ ਸਙ੍ਗਣ੍ਹਾਤਿ. ਦਿਟ੍ਠਿਸਮ੍ਪਨ੍ਨਾਨਨ੍ਤਿ ਮਗ੍ਗਪਞ੍ਞਾਯ, ਫਲਪਞ੍ਞਾਯ ਚ ਸਮ੍ਪਨ੍ਨਾਨਂ. ਅਨਾਪਤ੍ਤੀਤਿ ਪਾਚਿਤ੍ਤਿਯਾਪਤ੍ਤਿਯਾ ਅਨਾਪਤ੍ਤਿ ਨ ਵਤ੍ਤਬ੍ਬਾ, ਆਪਤ੍ਤਿਯੇਵ ਹੋਤਿ, ਤਸ੍ਮਾ ‘‘ਉਮ੍ਮਤ੍ਤਕਸ੍ਸ ਅਨਾਪਤ੍ਤੀ’’ਤਿ ਨ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋਤਿ. ਅਟ੍ਠਮਂ.