੬. ਦੁਤਿਯਸਹਸੇਯ੍ਯਸਿਕ੍ਖਾਪਦਂ

੫੫. ਛਟ੍ਠੇ ਆਗਨ੍ਤੁਕਾ ਵਸਨ੍ਤਿ ਏਤ੍ਥਾਤਿ ਆਵਸਥੋ, ਆਵਸਥੋ ਚ ਸੋ ਅਗਾਰਞ੍ਚੇਤਿ ਆਵਸਥਾਗਾਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਆਗਨ੍ਤੁਕਾਨਂ ਵਸਨਾਗਾਰ’’ਨ੍ਤਿ. ਮਨੁਸ੍ਸਾਨਂ ਸਨ੍ਤਿਕਾ ਵਚਨਂ ਸੁਤ੍ਵਾਤਿ ਵਚਨਸੇਸੋ ਯੋਜੇਤਬ੍ਬੋ. ਸਾਟਕਨ੍ਤਿ ਉਤ੍ਤਰਸਾਟਕਂ, ਨਿਵਤ੍ਥਵਤ੍ਥਨ੍ਤਿਪਿ ਵਦਨ੍ਤਿ. ਅਚ੍ਚਾਗਮ੍ਮਾਤਿ ਤ੍ਵਾਪਚ੍ਚਯਨ੍ਤਪਦਸ੍ਸ ਸਮ੍ਬਨ੍ਧਂ ਦਸ੍ਸੇਤੁਮਾਹ ‘‘ਪਵਤ੍ਤੋ’’ਤਿ. ਯਥਾ ਓਮਸਵਾਦਸਿਕ੍ਖਾਪਦੇ ਅਕ੍ਕੋਸੇਤੁਕਾਮਤਾਯ ਖਤ੍ਤਿਯਂ ‘‘ਚਣ੍ਡਾਲੋ’’ਤਿ ਵਦਤੋ ਅਲਿਕਂ ਭਣਤੋਪਿ ਮੁਸਾਵਾਦਸਿਕ੍ਖਾਪਦੇਨ ਅਨਾਪਤ੍ਤਿ, ਓਮਸਵਾਦਸਿਕ੍ਖਾਪਦੇਨੇਵ ਆਪਤ੍ਤਿ, ਏਵਮਿਧਾਪਿ ਮਾਤੁਗਾਮੇਨ ਸਹ ਸਯਤੋ ਪਠਮਸਹਸੇਯ੍ਯਸਿਕ੍ਖਾਪਦੇਨ ਅਨਾਪਤ੍ਤਿ, ਇਮਿਨਾਵ ਆਪਤ੍ਤੀਤਿ ਦਟ੍ਠਬ੍ਬਨ੍ਤਿ. ਛਟ੍ਠਂ.