੩. ਪੇਸੁਞ੍ਞਸਿਕ੍ਖਾਪਦਂ

੩੬. ਤਤਿਯੇ ‘‘ਜਾਤਭਣ੍ਡਨਾਨ’’ਨ੍ਤਿ ਵਤ੍ਤਬ੍ਬੇ ਅਗ੍ਯਾਹਿਤੋਤਿਆਦੀਸੁ ਵਿਯ ਵਿਸੇਸਨਪਰਨਿਪਾਤਵਸੇਨ ‘‘ਭਣ੍ਡਨਜਾਤਾਨ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਞ੍ਜਾਤਭਣ੍ਡਨਾਨ’’ਨ੍ਤਿ. ‘‘ਪੁਬ੍ਬਭਾਗੋ’’ਤਿ ਵਤ੍ਵਾ ਤਸ੍ਸ ਸਰੂਪਂ ਦਸ੍ਸੇਤਿ ‘‘ਇਮਿਨਾ ਚ ਇਮਿਨਾ ਚਾ’’ਤਿਆਦਿਨਾ. ਵਿਰੁਦ੍ਧਂ ਵਦਤਿ ਏਤੇਨਾਤਿ ਵਿਵਾਦੋ, ਵਿਗ੍ਗਾਹਿਕਕਥਾ, ਤਂ ਆਪਨ੍ਨਾਤਿ ਵਿਵਾਦਾਪਨ੍ਨਾ, ਤੇਸਂ. ਪਿਸਤਿ ਸਞ੍ਚੁਣ੍ਣੇਤੀਤਿ ਪਿਸੁਣੋ, ਪੁਗ੍ਗਲੋ, ਤਸ੍ਸ ਇਦਨ੍ਤਿ ਪੇਸੁਞ੍ਞਂ, ਵਚਨਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੇਸੁਞ੍ਞਨ੍ਤਿ ਪਿਸੁਣਵਾਚ’’ਨ੍ਤਿ.

੩੭. ਭਿਕ੍ਖੁਪੇਸੁਞ੍ਞੇਤਿ ਭਿਕ੍ਖੂਨਂ ਸਨ੍ਤਿਕਂ ਉਪਸਂਹਟੇ ਪੇਸੁਞ੍ਞਵਚਨੇਤਿ ਛਟ੍ਠੀਸਮਾਸੋ.

੩੮. ‘‘ਦਿਸ੍ਵਾ’’ਤਿ ਪਦਂ ‘‘ਭਣਨ੍ਤਸ੍ਸਾ’’ਤਿ ਪਦੇ ਪੁਬ੍ਬਕਾਲਕਿਰਿਯਾ, ਦਸ੍ਸਨਂ ਹੁਤ੍ਵਾਤਿ ਅਤ੍ਥੋ. ਤਤਿਯਂ.