੧. ਸਾਲੇਯ੍ਯਕਸੁਤ੍ਤਵਣ੍ਣਨਾ

੪੩੯. ਮਹਾਜਨਕਾਯੇ ਸਨ੍ਨਿਪਤਿਤੇਤਿ ਕੇਚਿ ‘‘ਪਹਂਸਨਵਿਧਿਂ ਦਸ੍ਸੇਤ੍ਵਾ ਰਾਜਕੁਮਾਰਂ ਹਾਸੇਸ੍ਸਾਮਾ’’ਤਿ, ਕੇਚਿ ‘‘ਤਂ ਕੀਲ਼ਨਂ ਪਸ੍ਸਿਸ੍ਸਾਮਾ’’ਤਿ ਏਵਂ ਮਹਾਜਨਸਮੂਹੇ ਸਨ੍ਨਿਪਤਿਤੇ. ਦੇਵਨਟਨ੍ਤਿ ਦਿਬ੍ਬਗਨ੍ਧਬ੍ਬਂ. ਕੁਸਲਂ ਕੁਸਲਨ੍ਤਿ ਵਚਨਂ ਉਪਾਦਾਯਾਤਿ ‘‘ਕਚ੍ਚਿ ਕੁਸਲਂ? ਆਮ ਕੁਸਲ’’ਨ੍ਤਿ ਵਚਨਪਟਿਵਚਨਵਸੇਨ ਪਵਤ੍ਤਕੁਸਲਵਾਦਿਤਾਯ ਤੇ ਮਨੁਸ੍ਸਾ ਆਦਿਤੋ ਕੁਸਲਾਤਿ ਸਮਞ੍ਞਂ ਲਭਿਂਸੁ. ਤੇਸਂ ਕੁਸਲਾਨਂ ਇਸ੍ਸਰਾਤਿ ਰਾਜਕੁਮਾਰਾ ਕੋਸਲਾ. ਕੋਸਲੇ ਜਾਤਾ. ਤੇਸਂ ਨਿਵਾਸੋਤਿ ਸਬ੍ਬਂ ਪੁਬ੍ਬੇ ਵੁਤ੍ਤਨਯਮੇਵ. ਤੇਨਾਹ ‘‘ਸੋ ਪਦੇਸੋ ਕੋਸਲਾਤਿ ਵੁਚ੍ਚਤੀ’’ਤਿ.

ਚਾਰਿਕਂ ਚਰਮਾਨੋਤਿ ਸਾਮਞ੍ਞਵਚਨਮ੍ਪਿ ‘‘ਮਹਤਾ…ਪੇ… ਤਦਵਸਰੀ’’ਤਿ ਵਚਨਤੋ ਵਿਸੇਸਂ ਨਿਵਿਟ੍ਠਮੇਵਾਤਿ ਆਹ ‘‘ਅਤੁਰਿਤਚਾਰਿਕਂ ਚਰਮਾਨੋ’’ਤਿ. ਮਹਤਾਤਿ ਗੁਣਮਹਤ੍ਤੇਨਪਿ ਸਙ੍ਖ੍ਯਾਮਹਤ੍ਤੇਨਪਿ ਮਹਤਾ. ਤਸ੍ਮਿਞ੍ਹਿ ਭਿਕ੍ਖੁਸਮੂਹੇ ਕੇਚਿ ਅਧਿਸੀਲਸਿਕ੍ਖਾਵਸੇਨ ਸੀਲਸਮ੍ਪਨ੍ਨਾ, ਤਥਾ ਕੇਚਿ ਸੀਲਸਮਾਧਿਸਮ੍ਪਨ੍ਨਾ, ਕੇਚਿ ਸੀਲਸਮਾਧਿਪਞ੍ਞਾਸਮ੍ਪਨ੍ਨਾਤਿ ਗੁਣਮਹਤ੍ਤੇਨਪਿ ਸੋ ਭਿਕ੍ਖੁਸਮੂਹੋ ਮਹਾਤਿ. ਤਂ ਅਨਾਮਸਿਤ੍ਵਾ ਸਙ੍ਖ੍ਯਾਮਹਤ੍ਤਮੇਵ ਦਸ੍ਸੇਨ੍ਤੋ ‘‘ਸਤਂ ਵਾ’’ਤਿਆਦਿਮਾਹ. ਅਞ੍ਞਗਾਮਪਟਿਬਦ੍ਧਜੀਵਿਕਾਵਸੇਨ ਸਮੋਸਰਨ੍ਤਿ ਏਤ੍ਥਾਤਿ ਸਮੋਸਰਣਂ, ਗਾਮੋ ਨਿਵਾਸਗਾਮੋ. ਨ੍ਤਿ ਸਾਲਂ ਬ੍ਰਾਹ੍ਮਣਗਾਮਂ. ਵਿਹਾਰੋਤਿ ਭਗਵਤੋ ਵਿਹਰਣਟ੍ਠਾਨਂ. ਏਤ੍ਥਾਤਿ ਏਤਸ੍ਮਿਂ ਸਾਲੇਯ੍ਯਕਸੁਤ੍ਤੇ. ਅਨਿਯਮਿਤੋਤਿ ਅਸੁਕਸ੍ਮਿਂ ਆਰਾਮੇ ਪਬ੍ਬਤੇ ਰੁਕ੍ਖਮੂਲੇ ਵਾਤਿ ਨ ਨਿਯਮਿਤੋ, ਸਰੂਪਗ੍ਗਹਣਵਸੇਨ ਨ ਨਿਯਮਿਤ੍ਵਾ ਵੁਤ੍ਤੋ. ਤਸ੍ਮਾਤਿ ਅਨਿਯਮਿਤਤ੍ਤਾ. ਅਤ੍ਥਾਪਤ੍ਤਿਸਿਦ੍ਧਮਤ੍ਥਂ ਪਰਿਕਪ੍ਪਨਵਸੇਨ ਦਸ੍ਸੇਨ੍ਤੋ ‘‘ਵਨਸਣ੍ਡੋ ਭਵਿਸ੍ਸਤੀ’’ਤਿ ਆਹ, ਅਦ੍ਧਾ ਭਵੇਯ੍ਯਾਤਿ ਅਤ੍ਥੋ.

ਉਪਲਭਿਂਸੂਤਿ (ਸਾਰਤ੍ਥ. ਟੀ. ੧.੧.ਵੇਰਞ੍ਜਕਣ੍ਡਵਣ੍ਣਨਾ; ਦੀ. ਨਿ. ਟੀ. ੧.੨੫੫; ਅ. ਨਿ. ਟੀ. ੨.੩.੬੪) ਸਵਨਵਸੇਨ ਉਪਲਭਿਂਸੂਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਸੋਤਦ੍ਵਾਰ…ਪੇ… ਜਾਨਿਂਸੂ’’ਤਿ ਆਹ. ਅਵਧਾਰਣਫਲਤ੍ਤਾ ਸਬ੍ਬਮ੍ਪਿ ਵਾਕ੍ਯਂ ਅਨ੍ਤੋਗਧਾਵਧਾਰਣਨ੍ਤਿ ਆਹ ‘‘ਪਦਪੂਰਣਮਤ੍ਤੇ ਵਾ ਨਿਪਾਤੋ’’ਤਿ. ਅਵਧਾਰਣਤ੍ਥੇਤਿ ਪਨ ਇਮਿਨਾ ਇਟ੍ਠਤ੍ਥਾਵਧਾਰਣਤ੍ਥਂ ਖੋ-ਸਦ੍ਦਗ੍ਗਹਣਨ੍ਤਿ ਦਸ੍ਸੇਤਿ. ‘‘ਅਸ੍ਸੋਸੁ’’ਨ੍ਤਿ ਪਦਂ ਖੋ-ਸਦ੍ਦੇ ਗਹਿਤੇ ਤੇਨ ਫੁਲ੍ਲਿਤਮਣ੍ਡਿਤਵਿਭੂਸਿਤਂ ਵਿਯ ਹੋਨ੍ਤਂ ਪੂਰਿਤਂ ਨਾਮ ਹੋਤਿ, ਤੇਨ ਚ ਪੁਰਿਮਪਚ੍ਛਿਮਪਦਾਨਿ ਸਂਸਿਲਿਟ੍ਠਾਨਿ ਹੋਨ੍ਤਿ, ਨ ਤਸ੍ਮਿਂ ਅਗ੍ਗਹਿਤੇਤਿ ਆਹ ‘‘ਪਦਪੂਰਣੇਨ ਬ੍ਯਞ੍ਜਨਸਿਲਿਟ੍ਠਤਾਮਤ੍ਤਮੇਵਾ’’ਤਿ. ਮਤ੍ਤ-ਸਦ੍ਦੋ ਵਿਸੇਸਨਿਵਤ੍ਤਿਅਤ੍ਥੋ. ਤੇਨਸ੍ਸ ਅਨਤ੍ਥਨ੍ਤਰਦੀਪਨਤਂ ਦਸ੍ਸੇਤਿ, ਏਵ-ਸਦ੍ਦੇਨ ਪਨ ਬ੍ਯਞ੍ਜਨਸਿਲਿਟ੍ਠਤਾਯ ਏਕਨ੍ਤਿਕਤਂ. ਸਾਲਾਯਂ ਜਾਤਾ ਸਂਵਡ੍ਢਕਾ ਸਾਲੇਯ੍ਯਕਾ ਯਥਾ ‘‘ਕਤ੍ਤੇਯ੍ਯਕਾ ਉਬ੍ਭੇਯ੍ਯਕਾ’’ਤਿ.

ਸਮਿਤਪਾਪਤ੍ਤਾਤਿ ਅਚ੍ਚਨ੍ਤਂ ਅਨਵਸੇਸਤੋ ਸਵਾਸਨਂ ਸਮਿਤਪਾਪਤ੍ਤਾ. ਏਵਞ੍ਹਿ ਬਾਹਿਰਕਵੀਤਰਾਗਸੇਕ੍ਖਾਸੇਕ੍ਖਪਾਪਸਮਨਤੋ ਭਗਵਤੋ ਪਾਪਸਮਨਂ ਵਿਸੇਸਿਤਂ ਹੋਤਿ. ਅਨੇਕਤ੍ਥਤ੍ਤਾ ਨਿਪਾਤਾਨਂ ਇਧ ਅਨੁਸ੍ਸਵਤ੍ਥੋ ਅਧਿਪ੍ਪੇਤੋਤਿ ਆਹ ‘‘ਖਲੂਤਿ ਅਨੁਸ੍ਸਵਨਤ੍ਥੇ ਨਿਪਾਤੋ’’ਤਿ. ਆਲਪਨਮਤ੍ਤਨ੍ਤਿ ਪਿਯਾਲਾਪਵਚਨਂ. ਪਿਯਸਮੁਦਾਹਾਰਾ ਹੇਤੇ ‘‘ਭੋ’’ਤਿ ਵਾ ‘‘ਆਵੁਸੋ’’ਤਿ ਵਾ ‘‘ਦੇਵਾਨਂਪਿਯਾ’’ਤਿ ਵਾ. ਗੋਤ੍ਤਵਸੇਨਾਤਿ ਏਤ੍ਥ ਤਂ ਤਾਯਤੀਤਿ ਗੋਤ੍ਤਂ. ਗੋਤਮੋਤਿ ਹਿ ਪਵਤ੍ਤਮਾਨਂ ਅਭਿਧਾਨਂ ਬੁਦ੍ਧਿਞ੍ਚ ਏਕਂਸਿਕਵਿਸਯਤਾਯ ਤਾਯਤਿ ਰਕ੍ਖਤੀਤਿ ਗੋਤਮਗੋਤ੍ਤਂ. ਯਥਾ ਹਿ ਬੁਦ੍ਧਿ ਆਰਮ੍ਮਣਭੂਤੇਨ ਅਤ੍ਥੇਨ ਵਿਨਾ ਨ ਵਤ੍ਤਤਿ, ਏਵਂ ਅਭਿਧਾਨਂ ਅਭਿਧੇਯ੍ਯਭੂਤੇਨ, ਤਸ੍ਮਾ ਸੋ ਤਾਨਿ ਤਾਯਤਿ ਰਕ੍ਖਤੀਤਿ ਵੁਚ੍ਚਤਿ. ਸੋ ਪਨ ਅਤ੍ਥਤੋ ਅਞ੍ਞਕੁਲਪਰਮ੍ਪਰਾਸਾਧਾਰਣਂ ਤਸ੍ਸ ਕੁਲਸ੍ਸ ਆਦਿਪੁਰਿਸਸਮੁਦਾਗਤਂ ਤਂਕੁਲਪਰਿਯਾਪਨ੍ਨਸਾਧਾਰਣਂ ਸਾਮਞ੍ਞਰੂਪਨ੍ਤਿ ਦਟ੍ਠਬ੍ਬਂ. ਉਚ੍ਚਾਕੁਲਪਰਿਦੀਪਨਂ ਉਦਿਤੋਦਿਤਵਿਪੁਲਖਤ੍ਤਿਯਕੁਲਵਿਭਾਵਨਤੋ. ਸਬ੍ਬਖਤ੍ਤਿਯਾਨਞ੍ਹਿ ਆਦਿਭੂਤਮਹਾਸਮ੍ਮਤਮਹਾਰਾਜਤੋ ਪਟ੍ਠਾਯ ਅਸਮ੍ਭਿਨ੍ਨਂ ਉਲ਼ਾਰਤਮਂ ਸਕ੍ਯਰਾਜਕੁਲਂ. ਕੇਨਚਿ ਪਾਰਿਜੁਞ੍ਞੇਨਾਤਿ ਞਾਤਿਪਾਰਿਜੁਞ੍ਞਭੋਗਪਾਰਿਜੁਞ੍ਞਾਦਿਨਾ ਕੇਨਚਿਪਿ ਪਾਰਿਜੁਞ੍ਞੇਨ ਪਰਿਹਾਨਿਯਾ ਅਨਭਿਭੂਤੋ ਅਨਜ੍ਝੋਤ੍ਥਟੋ. ਤਥਾ ਹਿ ਕਦਾਚਿਪਿ ਤਸ੍ਸ ਕੁਲਸ੍ਸ ਤਾਦਿਸਪਾਰਿਜੁਞ੍ਞਾਭਾਵੋ, ਅਭਿਨਿਕ੍ਖਮਨਕਾਲੇ ਚ ਤਤੋ ਸਮਿਦ੍ਧਤਮਭਾਵੋ ਲੋਕੇ ਪਾਕਟੋ ਪਞ੍ਞਾਤੋਤਿ. ਸਕ੍ਯਕੁਲਾ ਪਬ੍ਬਜਿਤੋਤਿ ਇਦਂ ਵਚਨਂ ਭਗਵਤੋ ਸਦ੍ਧਾਪਬ੍ਬਜਿਤਭਾਵਦੀਪਨਂ ਵੁਤ੍ਤਂ ਮਹਨ੍ਤਂ ਞਾਤਿਪਰਿਵਟ੍ਟਂ ਮਹਨ੍ਤਞ੍ਚ ਭੋਗਕ੍ਖਨ੍ਧਂ ਪਹਾਯ ਪਬ੍ਬਜਿਤਭਾਵਦੀਪਨਤੋ. ਏਤ੍ਥ ਚ ਸਮਣੋਤਿ ਇਮਿਨਾ ਪਰਿਕ੍ਖਕਜਨੇਹਿ ਭਗਵਤੋ ਬਹੁਮਤਭਾਵੋ ਦਸ੍ਸਿਤੋ ਸਮਿਤਪਾਪਤਾਦੀਪਨਤੋ, ਗੋਤਮੋਤਿ ਇਮਿਨਾ ਲੋਕਿਯਜਨੇਹਿ ਉਲ਼ਾਰਤਮਕੁਲੀਨਤਾਦੀਪਨਤੋ.

ਅਬ੍ਭੁਗ੍ਗਤੋਤਿ ਏਤ੍ਥ ਅਭਿ-ਸਦ੍ਦੋ ਇਤ੍ਥਮ੍ਭੂਤਾਖ੍ਯਾਨੇ, ਤਂਯੋਗਤੋ ਪਨ ‘‘ਭਵਨ੍ਤਂ ਗੋਤਮ’’ਨ੍ਤਿ ਉਪਯੋਗਵਚਨਂ ਸਾਮਿਅਤ੍ਥੇਪਿ ਸਮਾਨਂ ਇਤ੍ਥਮ੍ਭੂਤਯੋਗਦੀਪਨਤੋ ‘‘ਇਤ੍ਥਮ੍ਭੂਤਾਖ੍ਯਾਨਤ੍ਥੇ’’ਤਿ ਵੁਤ੍ਤਂ. ਤੇਨਾਹ ‘‘ਤਸ੍ਸ ਖੋ ਪਨ ਭੋਤੋ ਗੋਤਮਸ੍ਸਾਤਿ ਅਤ੍ਥੋ’’ਤਿ. ਕਲ੍ਯਾਣੋਤਿ ਭਦ੍ਦਕੋ. ਸਾ ਚਸ੍ਸ ਕਲ੍ਯਾਣਤਾ ਉਲ਼ਾਰਵਿਸਯਤਾਯਾਤਿ ਆਹ ‘‘ਕਲ੍ਯਾਣਗੁਣਸਮਨ੍ਨਾਗਤੋ’’ਤਿ. ਤਂਵਿਸਯਤਾ ਹੇਤ੍ਥ ਸਮਨ੍ਨਾਗਮੋ. ਸੇਟ੍ਠੋਤਿ ਏਤ੍ਥਾਪਿ ਏਸੇਵ ਨਯੋ ਯਥਾ ‘‘ਭਗਵਾਤਿ ਵਚਨਂ ਸੇਟ੍ਠ’’ਨ੍ਤਿ (ਪਾਰਾ. ਅਟ੍ਠ. ੧.ਵੇਰਞ੍ਜਕਣ੍ਡਵਣ੍ਣਨਾ; ਵਿਸੁਦ੍ਧਿ. ੧.੧੪੨; ਉਦਾ. ਅਟ੍ਠ. ੧; ਇਤਿਵੁ. ਅਟ੍ਠ. ਨਿਦਾਨਵਣ੍ਣਨਾ; ਮਹਾਨਿ. ਅਟ੍ਠ. ੫੦). ‘‘ਭਗਵਾ ਅਰਹ’’ਨ੍ਤਿਆਦਿਨਾ ਗੁਣਾਨਂ ਸਂਕਿਤ੍ਤਨਤੋ ਸਂਸਦ੍ਦਨਤੋ ਚ ਕਿਤ੍ਤਿਸਦ੍ਦੋ ਵਣ੍ਣੋਤਿ ਆਹ ‘‘ਕਿਤ੍ਤਿਯੇਵਾ’’ਤਿ. ਕਿਤ੍ਤਿਪਰਿਯਾਯੋਪਿ ਹਿ ਸਦ੍ਦ-ਸਦ੍ਦੋ ਯਥਾ ਤਂ ‘‘ਉਲ਼ਾਰਸਦ੍ਦਾ ਇਸਯੋ ਗੁਣਵਨ੍ਤੋ ਤਪਸ੍ਸਿਨੋ’’ਤਿ. ਥੁਤਿਘੋਸੋਤਿ ਅਭਿਤ੍ਥਵੁਦਾਹਾਰੋ. ਅਜ੍ਝੋਤ੍ਥਰਿਤ੍ਵਾਤਿ ਪਟਿਪਕ੍ਖਾਭਾਵੇਨ ਅਨਞ੍ਞਸਾਧਾਰਣਤਾਯ ਚ ਅਭਿਭਵਿਤ੍ਵਾ.

ਸੋ ਭਗਵਾਤਿ ਯੋ ਸੋ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ ਦੇਵਾਨਂ ਅਤਿਦੇਵੋ ਸਕ੍ਕਾਨਂ ਅਤਿਸਕ੍ਕੋ ਬ੍ਰਹ੍ਮਾਨਂ ਅਤਿਬ੍ਰਹ੍ਮਾ ਲੋਕਨਾਥੋ ਭਾਗ੍ਯਵਨ੍ਤਤਾਦੀਹਿ ਕਾਰਣੇਹਿ ਭਗਵਾਤਿ ਲਦ੍ਧਨਾਮੋ, ਸੋ ਭਗਵਾ. ‘‘ਭਗਵਾ’’ਤਿ ਹਿ ਇਦਂ ਸਤ੍ਥੁ ਨਾਮਕਿਤ੍ਤਨਂ. ਤਥਾ ਹਿ ਵੁਤ੍ਤਂ ‘‘ਭਗਵਾਤਿ ਨੇਤਂ ਨਾਮਂ ਮਾਤਰਾ ਕਤ’’ਨ੍ਤਿਆਦਿ (ਮਹਾਨਿ. ੧੪੯, ੧੯੮, ੨੧੦; ਚੂਲ਼ਨਿ. ਅਜਿਤਮਾਣਵਪੁਚ੍ਛਾਨਿਦ੍ਦੇਸ ੨). ਪਰਤੋ ਪਨ ‘‘ਭਗਵਾ’’ਤਿ ਗੁਣਕਿਤ੍ਤਨਮੇਵ. ਏਵਂ ‘‘ਅਰਹ’’ਨ੍ਤਿਆਦੀਹਿ ਪਦੇਹਿ ਯੇ ਸਦੇਵਕੇ ਲੋਕੇ ਅਤਿਵਿਯ ਪਞ੍ਞਾਤਾ ਬੁਦ੍ਧਗੁਣਾ, ਤੇ ਨਾਨਪ੍ਪਕਾਰਤੋ ਵਿਭਾਵਿਤਾਤਿ ਦਸ੍ਸੇਤੁਂ ਪਚ੍ਚੇਕਂ ਇਤਿਪਿ-ਸਦ੍ਦੋ ਯੋਜੇਤਬ੍ਬੋਤਿ ਆਹ ‘‘ਇਤਿਪਿ ਅਰਹਂ, ਇਤਿਪਿ ਸਮਾਸਮ੍ਬੁਦ੍ਧੋ…ਪੇ… ਇਤਿਪਿ ਭਗਵਾ’’ਤਿ. ‘‘ਇਤਿਪੇਤਂ ਭੂਤਂ, ਇਤਿਪੇਤਂ ਤਚ੍ਛ’’ਨ੍ਤਿਆਦੀਸੁ (ਦੀ. ਨਿ. ੧.੬) ਵਿਯ ਹਿ ਇਧ ਇਤਿ-ਸਦ੍ਦੋ ਆਸਨ੍ਨਪਚ੍ਚਕ੍ਖਕਾਰਣਤ੍ਥੋ, ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ ਤੇਨ ਤੇਸਂ ਗੁਣਾਨਂ ਬਹੁਭਾਵਦੀਪਨਤੋ. ਤਾਨਿ ਗੁਣਸਲ੍ਲਕ੍ਖਣਕਾਰਣਾਨਿ ਸਦ੍ਧਾਸਮ੍ਪਨ੍ਨਾਨਂ ਵਿਞ੍ਞੁਜਾਤਿਕਾਨਂ ਪਚ੍ਚਕ੍ਖਾਨਿ ਏਵਾਤਿ ਦਸ੍ਸੇਨ੍ਤੋ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨਾਤਿ ਵੁਤ੍ਤਂ ਹੋਤੀ’’ਤਿਆਦਿ. ਤਤੋ ਵਿਸੁਦ੍ਧਿਮਗ੍ਗਤੋ. ਤੇਸਨ੍ਤਿ ‘‘ਅਰਹ’’ਨ੍ਤਿਆਦੀਨਂ. ਵਿਤ੍ਥਾਰੋ ਅਤ੍ਥਨਿਦ੍ਦੇਸੋ ਗਹੇਤਬ੍ਬੋ. ਤਤੋ ਏਵ ਤਂਸਂਵਣ੍ਣਨਾਯਂ (ਵਿਸੁਦ੍ਧਿ. ਮਹਾਟੀ. ੧.੧੩੦) ਵੁਤ੍ਤੋ ‘‘ਆਰਕਾਤਿ ਅਰਹਂ ਸੁਵਿਦੂਰਭਾਵਤੋ, ਆਰਕਾਤਿ ਅਰਹਂ ਆਸਨ੍ਨਭਾਵਤੋ, ਰਹਿਤਬ੍ਬਸ੍ਸ ਅਭਾਵਤੋ, ਸਯਞ੍ਚ ਅਰਹਿਤਬ੍ਬਤੋ, ਨਤ੍ਥਿ ਏਤਸ੍ਸ ਰਹੋਗਮਨਂ ਗਤੀਸੁ ਪਚ੍ਚਾਜਾਤਿ, ਪਾਸਂਸਭਾਵਤੋ ਵਾ ਅਰਹ’’ਨ੍ਤਿਆਦਿਨਾ ‘‘ਅਰਹ’’ਨ੍ਤਿਆਦੀਨਂ ਪਦਾਨਂ ਅਤ੍ਥੋ ਵਿਤ੍ਥਾਰਤੋ ਵੇਦਿਤਬ੍ਬੋ.

ਭਵਨ੍ਤਿ ਚੇਤ੍ਥ (ਵਿਸੁਦ੍ਧਿ. ਮਹਾਟੀ. ੧.੧੩੦; ਸਾਰਤ੍ਥ. ਟੀ. ੧.ਵੇਰਞ੍ਜਕਣ੍ਡਵਣ੍ਣਨਾ) –

‘‘ਸਮ੍ਮਾ ਨਪ੍ਪਟਿਪਜ੍ਜਨ੍ਤਿ, ਯੇ ਨਿਹੀਨਾਸਯਾ ਨਰਾ;

ਆਰਕਾ ਤੇਹਿ ਭਗਵਾ, ਦੂਰੇ ਤੇਨਾਰਹਂ ਮਤੋ.

ਯੇ ਸਮ੍ਮਾ ਪਟਿਪਜ੍ਜਨ੍ਤਿ, ਸੁਪ੍ਪਣੀਤਾਧਿਮੁਤ੍ਤਿਕਾ;

ਭਗਵਾ ਤੇਹਿ ਆਸਨ੍ਨੋ, ਤੇਨਾਪਿ ਅਰਹਂ ਜਿਨੋ.

ਪਾਪਧਮ੍ਮਾ ਰਹਾ ਨਾਮ, ਸਾਧੂਹਿ ਰਹਿਤਬ੍ਬਤੋ;

ਤੇਸਂ ਸੁਟ੍ਠੁ ਪਹੀਨਤ੍ਤਾ, ਭਗਵਾ ਅਰਹਂ ਮਤੋ.

ਯੇ ਸਚ੍ਛਿਕਤਸਦ੍ਧਮ੍ਮਾ, ਅਰਿਯਾ ਸੁਦ੍ਧਗੋਚਰਾ;

ਨ ਤੇਹਿ ਰਹਿਤੋ ਹੋਤਿ, ਨਾਥੋ ਤੇਨਾਰਹਂ ਮਤੋ.

ਰਹੋ ਵਾ ਗਮਨਂ ਯਸ੍ਸ, ਸਂਸਾਰੇ ਨਤ੍ਥਿ ਸਬ੍ਬਸੋ;

ਪਹੀਨਜਾਤਿਮਰਣੋ, ਅਰਹਂ ਸੁਗਤੋ ਮਤੋ.

ਗੁਣੇਹਿ ਸਦਿਸੋ ਨਤ੍ਥਿ, ਯਸ੍ਮਾ ਲੋਕੇ ਸਦੇਵਕੇ;

ਤਸ੍ਮਾ ਪਾਸਂਸਿਯਤ੍ਤਾਪਿ, ਅਰਹਂ ਦ੍ਵਿਪਦੁਤ੍ਤਮੋ.

ਆਰਕਾ ਮਨ੍ਦਬੁਦ੍ਧੀਨਂ, ਆਸਨ੍ਨਾ ਚ ਵਿਜਾਨਤਂ;

ਰਹਾਨਂ ਸੁਪ੍ਪਹੀਨਤ੍ਤਾ, ਵਿਦੂਨਮਰਹੇਯ੍ਯਤੋ;

ਭਵੇਸੁ ਚ ਰਹਾਭਾਵਾ, ਪਾਸਂਸਾ ਅਰਹਂ ਜਿਨੋ’’ਤਿ.

ਸੁਨ੍ਦਰਨ੍ਤਿ ਭਦ੍ਦਕਂ. ਤਞ੍ਚ ਪਸ੍ਸਨ੍ਤਸ੍ਸ ਹਿਤਸੁਖਾਵਹਭਾਵੇਨ ਵੇਦਿਤਬ੍ਬਨ੍ਤਿ ਆਹ ‘‘ਅਤ੍ਥਾਵਹਂ ਸੁਖਾਵਹ’’ਨ੍ਤਿ. ਤਤ੍ਥ ਅਤ੍ਥਾਵਹਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਸਞ੍ਹਿਤਹਿਤਾਵਹਂ. ਸੁਖਾਵਹਨ੍ਤਿ ਤਪ੍ਪਰਿਯਾਪਨ੍ਨਤਿਵਿਧਸੁਖਾਵਹਂ. ਤਥਾਰੂਪਾਨਨ੍ਤਿ ਤਾਦਿਸਾਨਂ. ਯਾਦਿਸੇਹਿ ਪਨ ਗੁਣੇਹਿ ਭਗਵਾ ਸਮਨ੍ਨਾਗਤੋ, ਤੇਹਿ ਚਤੁਪ੍ਪਮਾਣਿਕਸ੍ਸ ਲੋਕਸ੍ਸ ਸਬ੍ਬਥਾਪਿ ਅਚ੍ਚਨ੍ਤਾਯ ਪਸਾਦਨੀਯੋਤਿ ਦਸ੍ਸੇਤੁਂ ‘‘ਅਨੇਕੇਹਿਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾਭੂਤ…ਪੇ… ਅਰਹਤਨ੍ਤਿ ਇਮਿਨਾ ਧਮ੍ਮਪ੍ਪਮਾਣਾਨਂ ਲੂਖਪ੍ਪਮਾਣਾਨਂ ਸਤ੍ਤਾਨਂ ਭਗਵਤੋ ਪਸਾਦਾਵਹਤਮਾਹ, ਇਤਰੇਨ ਇਤਰੇਸਂ. ਦਸ੍ਸਨਮਤ੍ਤਮ੍ਪਿਸਾਧੁ ਹੋਤੀਤਿ ਏਤ੍ਥ ਕੋਸਿਯਸਕੁਣਸ੍ਸ ਵਤ੍ਥੁ ਕਥੇਤਬ੍ਬਂ. ਏਕਂ ਪਦਮ੍ਪਿ ਸੋਤੁਂ ਲਭਿਸ੍ਸਾਮ, ਸਾਧੁਤਰਂਯੇਵ ਭਵਿਸ੍ਸਤੀਤਿ ਏਤ੍ਥ ਮਣ੍ਡੂਕਦੇਵਪੁਤ੍ਤਵਤ੍ਥੁ ਕਥੇਤਬ੍ਬਂ.

ਇਮਿਨਾ ਨਯੇਨ ਅਗਾਰਿਕਪੁਚ੍ਛਾ ਆਗਤਾਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ. ਯੇਭੁਯ੍ਯੇਨ ਹਿ ਅਗਾਰਿਕਾ ਏਵਂ ਪੁਚ੍ਛਨ੍ਤਿ. ਅਨਗਾਰਿਕਪੁਚ੍ਛਾਯਪਿ ਏਸੇਵ ਨਯੋ. ਯਥਾ ਨ ਸਕ੍ਕੋਨ੍ਤਿ…ਪੇ… ਵਿਸ੍ਸਜ੍ਜੇਨ੍ਤੋਤਿ ਇਮਿਨਾ ਸਤ੍ਥੁ ਤੇਸਂ ਬ੍ਰਾਹ੍ਮਣਗਹਪਤਿਕਾਨਂ ਨਿਗ੍ਗਣ੍ਹਨਵਿਧਿਂ ਦਸ੍ਸੇਤਿ. ਤੇਸਞ੍ਹਿ ਸਂਖਿਤ੍ਤਰੁਚਿਤਾਯ ਸਙ੍ਖੇਪਦੇਸਨਾ, ਤਾਯ ਅਤ੍ਥਂ ਅਜਾਨਨ੍ਤਾ ਵਿਤ੍ਥਾਰਦੇਸਨਂ ਆਯਾਚਨ੍ਤਿ, ਸਾ ਚ ਨੇਸਂ ਸਂਖਿਤ੍ਤਰੁਚਿਤਾ ਪਣ੍ਡਿਤਮਾਨਿਤਾਯ, ਸੋ ਚ ਮਾਨੋ ਯਥਾਦੇਸਿਤਸ੍ਸ ਅਤ੍ਥਸ੍ਸ ਅਜਾਨਨ੍ਤੇ ਅਪ੍ਪਤਿਟ੍ਠੋ ਹੋਤਿ, ਇਤਿ ਭਗਵਾ ਤੇਸਂ ਮਾਨਨਿਗ੍ਗਹਵਿਧਿਂ ਚਿਨ੍ਤੇਤ੍ਵਾ ਸਙ੍ਖੇਪੇਨੇਵ ਪਞ੍ਹਂ ਵਿਸ੍ਸਜ੍ਜੇਸਿ, ਨ ਸਬ੍ਬਸੋ ਦੇਸਨਾਯ ਅਸਲ੍ਲਕ੍ਖਣਤ੍ਥਂ. ਤੇਨਾਹ ‘‘ਪਣ੍ਡਿਤਮਾਨਿਕਾ ਹੀ’’ਤਿਆਦਿ. ਯਸ੍ਮਾ ਮਂ ਤੁਮ੍ਹੇ ਯਾਚਥ, ਸਂਖਿਤ੍ਤੇਨ ਵੁਤ੍ਤਮਤ੍ਥਂ ਨ ਜਾਨਿਤ੍ਥਾਤਿ ਅਧਿਪ੍ਪਾਯੋ.

੪੪੦. ‘‘ਏਕਵਿਧੇਨ ਞਾਣਵਤ੍ਥੁ’’ਨ੍ਤਿਆਦੀਸੁ (ਵਿਭ. ੭੫੧) ਵਿਯ ਕੋਟ੍ਠਾਸਤ੍ਥੋ ਵਿਧ-ਸਦ੍ਦੋ, ਸੋ ਚ ਵਿਭਤ੍ਤਿਵਚਨਵਿਪਲ੍ਲਾਸਂ ਕਤ੍ਵਾ ਪਚ੍ਚਤ੍ਤੇ ਕਰਣਵਚਨਵਸੇਨ ‘‘ਤਿਵਿਧ’’ਨ੍ਤਿ ਵੁਤ੍ਤੋ. ਅਤ੍ਥੋ ਪਨ ਕਰਣਪੁਥੁਵਚਨਵਸੇਨ ਦਟ੍ਠਬ੍ਬੋਤਿ ਆਹ ‘‘ਤਿਵਿਧਨ੍ਤਿ ਤੀਹਿ ਕੋਟ੍ਠਾਸੇਹੀ’’ਤਿ. ਪਕਾਰਤ੍ਥੋ ਵਾ ਵਿਧ-ਸਦ੍ਦੋ, ਪਕਾਰਤ੍ਥਤ੍ਤਾਯੇਵ ਲਬ੍ਭਮਾਨਂ ਅਧਮ੍ਮਚਰਿਯਾਵਿਸਮਚਰਿਯਾਭਾਵਸਾਮਞ੍ਞਂ, ਕਾਯਦ੍ਵਾਰਿਕਭਾਵਸਾਮਞ੍ਞਂ ਵਾ ਉਪਾਦਾਯ ਏਕਤ੍ਤਂ ਨੇਤ੍ਵਾ ‘‘ਤਿਵਿਧ’’ਨ੍ਤਿ ਵੁਤ੍ਤਂ. ਪਕਾਰਭੇਦੇ ਪਨ ਅਪੇਕ੍ਖਿਤੇ ‘‘ਤਿਵਿਧਾ’’ਇਚ੍ਚੇਵ ਵੁਤ੍ਤਂ ਹੋਤਿ. ਕਾਯੇਨਾਤਿ ਏਤ੍ਥ ਕਾਯੋਤਿ ਚੋਪਨਕਾਯੋ ਅਧਿਪ੍ਪੇਤੋ, ਸੋ ਚ ਅਧਮ੍ਮਚਰਿਯਾਯ ਦ੍ਵਾਰਭੂਤੋ ਤੇਨ ਵਿਨਾ ਤਸ੍ਸਾ ਅਪ੍ਪਵਤ੍ਤਨਤੋ. ਕਾਯੇਨਾਤਿ ਚ ਹੇਤੁਮ੍ਹਿ ਕਰਣਵਚਨਂ. ਕਿਞ੍ਚਾਪਿ ਹਿ ਅਧਮ੍ਮਚਰਿਯਾਸਙ੍ਖਾਤਚੇਤਨਾਸਮੁਟ੍ਠਾਨਾ ਸਾ ਵਿਞ੍ਞਤ੍ਤਿ, ਨ ਚ ਸਾ ਪਟ੍ਠਾਨੇ ਆਗਤੇਸੁ ਚਤੁਵੀਸਤਿਯਾ ਪਚ੍ਚਯੇਸੁ ਏਕੇਨਪਿ ਪਚ੍ਚਯੇਨ ਚੇਤਨਾਯ ਪਚ੍ਚਯੋ ਹੋਤਿ, ਤਸ੍ਸਾ ਪਨ ਤਥਾਪਵਤ੍ਤਮਾਨਾਯ ਕਾਯਕਮ੍ਮਸਞ੍ਞਿਤਾਯ ਚੇਤਨਾਯ ਪਵਤ੍ਤਿ ਹੋਤੀਤਿ ਤੇਨ ਦ੍ਵਾਰੇਨ ਲਕ੍ਖਿਤਬ੍ਬਭਾਵਤੋ ਤਸ੍ਸਾ ਕਾਰਣਂ ਵਿਯ ਚ ਸਬ੍ਬੋਹਾਰਮਤ੍ਤਂ ਹੋਤਿ. ਕਾਯਦ੍ਵਾਰੇਨਾਤਿ ਵਾ ਕਾਯੇਨ ਦ੍ਵਾਰਭੂਤੇਨ ਕਾਯਦ੍ਵਾਰਭੂਤੇਨਾਤਿ ਤਂ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਅਧਮ੍ਮਂ ਚਰਤਿ ਏਤਾਯਾਤਿ ਅਧਮ੍ਮਚਰਿਯਾ, ਤਥਾਪਵਤ੍ਤਾ ਚੇਤਨਾ. ਅਧਮ੍ਮੋਤਿ ਪਨ ਤਂਸਮੁਟ੍ਠਾਨੋ ਪਯੋਗੋ ਦਟ੍ਠਬ੍ਬੋ. ਧਮ੍ਮਤੋ ਅਨਪੇਤਾਤਿ ਧਮ੍ਮਾ, ਨ ਧਮ੍ਮਾਤਿ ਅਧਮ੍ਮਾ, ਅਧਮ੍ਮਾ ਚ ਸਾ ਚਰਿਯਾ ਚਾਤਿ ਅਧਮ੍ਮਚਰਿਯਾ. ਪਚ੍ਚਨੀਕਸਮਨਟ੍ਠੇਨ ਸਮਂ, ਸਮਾਨਂ ਸਦਿਸਂ ਯੁਤ੍ਤਨ੍ਤਿ ਵਾ ਸਮਂ, ਸੁਚਰਿਤਂ. ਸਮਤੋ ਵਿਗਤਂ, ਵਿਰੁਦ੍ਧਂ ਵਾ ਤਸ੍ਸਾਤਿ ਵਿਸਮਂ, ਦੁਚ੍ਚਰਿਤਂ. ਸਾ ਏਵ ਵਿਸਮਾ ਚਰਿਯਾਤਿ ਵਿਸਮਚਰਿਯਾ. ਸਬ੍ਬੇਸੁ ਕਣ੍ਹਸੁਕ੍ਕਪਦੇਸੂਤਿ ‘‘ਚਤੁਬ੍ਬਿਧਂ ਵਾਚਾਯ ਅਧਮ੍ਮਚਰਿਯਾਵਿਸਮਚਰਿਯਾ ਹੋਤੀ’’ਤਿਆਦਿਨਾ ਉਦ੍ਦੇਸਨਿਦ੍ਦੇਸਵਸੇਨ ਆਗਤੇਸੁ ਸਬ੍ਬੇਸੁ ਕਣ੍ਹਪਦੇਸੁ – ‘‘ਤਿਵਿਧਂ ਖੋ ਗਹਪਤਯੋ ਕਾਯੇਨ ਧਮ੍ਮਚਰਿਯਾਸਮਚਰਿਯਾ ਹੋਤੀ’’ਤਿਆਦਿਨਾ ਉਦ੍ਦੇਸਨਿਦ੍ਦੇਸਵਸੇਨ ਆਗਤੇਸੁ ਸਬ੍ਬੇਸੁ ਸੁਕ੍ਕਪਦੇਸੁ ਚ.

ਰੋਦੇਤਿ ਕੁਰੂਰਕਮ੍ਮਨ੍ਤਤਾਯ ਪਰਪਟਿਬਦ੍ਧੇ ਸਤ੍ਤੇ ਅਸ੍ਸੂਨਿ ਮੋਚੇਤੀਤਿ ਰੁਦ੍ਦੋ, ਸੋ ਏਵ ਲੁਦ੍ਦੋ ਰ-ਕਾਰਸ੍ਸ ਲ-ਕਾਰਂ ਕਤ੍ਵਾ. ਕਕ੍ਖਲ਼ੋਤਿ ਲੁਦ੍ਦੋ. ਦਾਰੁਣੋਤਿ ਫਰੁਸੋ. ਸਾਹਸਿਕੋਤਿ ਸਾਹਸ੍ਸਕਾਰੀ. ਸਚੇਪਿ ਨ ਲਿਪ੍ਪਨ੍ਤਿ. ਤਥਾਵਿਧੋ ਪਰੇਸਂ ਘਾਤਨਸੀਲੋ ਲੋਹਿਤਪਾਣੀਤ੍ਵੇਵ ਵੁਚ੍ਚਤਿ ਯਥਾ ਦਾਨਸੀਲੋ ਪਰੇਸਂ ਦਾਨਤ੍ਥਂ ਅਧੋਤਹਤ੍ਥੋਪਿ ‘‘ਪਯਤਪਾਣੀ’’ਤ੍ਵੇਵ ਵੁਚ੍ਚਤਿ. ਪਹਰਣਂ ਪਹਾਰਦਾਨਮਤ੍ਤਂ ਹਤਂ, ਪਵੁਦ੍ਧਂ ਪਹਰਣਂ ਪਰਸ੍ਸ ਮਾਰਣਂ ਪਹਤਨ੍ਤਿ ਦਸ੍ਸੇਨ੍ਤੋ ‘‘ਹਤੇ’’ਤਿਆਦਿਮਾਹ. ਤਤ੍ਥ ਨਿਵਿਟ੍ਠੋਤਿ ਅਭਿਨਿਵਿਟ੍ਠੋ ਪਸੁਤੋ.

ਯਸ੍ਸ ਵਸੇਨ ‘‘ਪਰਸ੍ਸਾ’’ਤਿ ਸਾਮਿਨਿਦ੍ਦੇਸੋ, ਤਂ ਸਾਪਤੇਯ੍ਯਂ. ਯਞ੍ਹਿ ਸਾਮਞ੍ਞਤੋ ਗਹਿਤਂ, ਤਂ ਤੇਨੇਵ ਸਾਮਿਨਿਦ੍ਦੇਸੇਨ ਪਕਾਸਿਤਨ੍ਤਿ ਆਹ ‘‘ਪਰਸ੍ਸ ਸਨ੍ਤਕ’’ਨ੍ਤਿ. ਪਰਸ੍ਸਪਰਵਿਤ੍ਤੂਪਕਰਣਨ੍ਤਿ ਵਾ ਏਕਮੇਵੇਤਂ ਸਮਾਸਪਦਂ, ਯਂ ਕਿਞ੍ਚਿ ਪਰਸਨ੍ਤਕਂ ਵਿਸੇਸਤੋ ਪਰਸ੍ਸ ਵਿਤ੍ਤੂਪਕਰਣਂ ਵਾਤਿ ਅਤ੍ਥੋ. ਤੇਹਿ ਪਰੇਹੀਤਿ ਯੇਸਂ ਸਨ੍ਤਕਂ, ਤੇਹਿ. ਯਸ੍ਸ ਵਸੇਨ ਪੁਰਿਸੋ ‘‘ਥੇਨੋ’’ਤਿ ਵੁਚ੍ਚਤਿ, ਤਂ ਥੇਯ੍ਯਨ੍ਤਿ ਆਹ ‘‘ਅਵਹਰਣਚਿਤ੍ਤਸ੍ਸੇਤਂ ਅਧਿਵਚਨ’’ਨ੍ਤਿ. ਥੇਯ੍ਯਸਙ੍ਖਾਤੇਨ, ਨ ਵਿਸ੍ਸਾਸਤਾਵਕਾਲਿਕਾਦਿਵਸੇਨਾਤਿ ਅਤ੍ਥੋ.

ਮਤੇ ਵਾਤਿ ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਤ੍ਥੋ. ਤੇਨ ਪਬ੍ਬਜਿਤਾਦਿਭਾਵਂ ਸਙ੍ਗਣ੍ਹਾਤਿ. ਏਤੇਨੁਪਾਯੇਨਾਤਿ ਯਂ ਮਾਤਰਿ ਮਤਾਯ, ਨਟ੍ਠਾਯ ਵਾ ਪਿਤਾ ਰਕ੍ਖਤਿ, ਸਾ ਪਿਤੁਰਕ੍ਖਿਤਾ. ਯਂ ਉਭੋਸੁ ਅਸਨ੍ਤੇਸੁ ਭਾਤਾ ਰਕ੍ਖਤਿ, ਸਾ ਭਾਤੁਰਕ੍ਖਿਤਾਤਿ ਏਵਮਾਦਿਂ ਸਨ੍ਧਾਯਾਹ. ਸਭਾਗਕੁਲਾਨੀਤਿ ਆਵਾਹਕਿਰਿਯਾਯ ਸਭਾਗਾਨਿ ਕੁਲਾਨਿ. ਦਸ੍ਸੁਕਵਿਧਿਂ ਵਾ ਉਦ੍ਦਿਸ੍ਸ ਠਪਿਤਦਣ੍ਡਾਰਾਜਾਦੀਹਿ. ਸਮ੍ਮਾਦਿਟ੍ਠਿਸੁਤ੍ਤੇ (ਮ. ਨਿ. ਅਟ੍ਠ. ੧.੮੯) ‘‘ਅਸਦ੍ਧਮ੍ਮਾਧਿਪ੍ਪਾਯੇਨ ਕਾਯਦ੍ਵਾਰਪ੍ਪਵਤ੍ਤਾ ਅਗਮਨੀਯਟ੍ਠਾਨਵੀਤਿਕ੍ਕਮਚੇਤਨਾ’’ਤਿ ਏਵਂ ਵੁਤ੍ਤਮਿਚ੍ਛਾਚਾਰਲਕ੍ਖਣਵਸੇਨ.

ਹਤ੍ਥਪਾਦਾਦਿਹੇਤੂਤਿ ਹਤ੍ਥਪਾਦਾਦਿਭੇਦਨਹੇਤੁ. ਧਨਹੇਤੂਤਿ ਧਨਸ੍ਸ ਲਾਭਹੇਤੁ ਜਾਨਿਹੇਤੁ ਚ. ਲਾਭੋਤਿ ਘਾਸਚ੍ਛਾਦਨਾਨਿ ਲਬ੍ਭਤੀਤਿ ਲਾਭੋ. ਕਿਞ੍ਚਿਕ੍ਖਨ੍ਤਿ ਕਿਞ੍ਚਿਮਤ੍ਤਕਂ ਆਮਿਸਜਾਤਂ. ਤੇਨਾਹ ‘‘ਯਂ ਵਾ’’ਤਿਆਦਿ. ਜਾਨਨ੍ਤੋਯੇਵਾਤਿ ਮੁਸਾਭਾਵਂ ਤਸ੍ਸ ਵਤ੍ਥੁਨੋ ਅਤ੍ਥਿ, ਤਂ ਜਾਨਨ੍ਤੋ ਏਵ.

ਅਣ੍ਡਕਾਤਿ ਵੁਚ੍ਚਤਿ ਰੁਕ੍ਖੇ ਅਣ੍ਡਸਦਿਸਾ ਗਣ੍ਠਿਯੋ. ਯਥਾ ਥਦ੍ਧਾ ਵਿਸਮਾ ਦੁਬ੍ਬਿਨੀਤਾ ਚ ਹੋਨ੍ਤਿ, ਏਵਮੇਵਂ ਖੁਂਸਨਵਮ੍ਭਨਵਸੇਨ ਪਵਤ੍ਤਵਾਚਾਪਿ ਹਿ ‘‘ਅਣ੍ਡਕਾ’’ਤਿ ਵੁਤ੍ਤਾ. ਤੇਨਾਹ ‘‘ਯਥਾ ਸਦੋਸੇ ਰੁਕ੍ਖੇ’’ਤਿਆਦਿ. ਕਕ੍ਕਸਾਤਿ ਫਰੁਸਾ ਏਵ, ਸੋ ਪਨਸ੍ਸਾ ਕਕ੍ਕਸਭਾਵੋ ਬ੍ਯਾਪਾਦਨਿਮਿਤ੍ਤਤਾਯ ਤਤੋ ਪੂਤਿਕਾਤਿ. ਤੇਨਾਹ ‘‘ਯਥਾ ਨਾਮਾ’’ਤਿਆਦਿ. ਕਟੁਕਾਤਿ ਅਨਿਟ੍ਠਾ. ਅਮਨਾਪਾਤਿ ਨ ਮਨਵਡ੍ਢਨੀ, ਤਤੋ ਏਵ ਦੋਸਜਨਨੀ, ਚਿਤ੍ਤਸਨ੍ਦੋਸੁਪ੍ਪਤ੍ਤਿਕਾਰਿਕਾ. ਮਮ੍ਮੇਸੂਤਿ ਘਟ੍ਟਨੇਨ ਦੁਕ੍ਖੁਪ੍ਪਤ੍ਤਿਤੋ ਮਮ੍ਮਸਦਿਸੇਸੁ ਜਾਤਿਆਦੀਸੁ. ਲਗ੍ਗਨਕਾਰੀਤਿ ਏਵਂ ਵਦਨ੍ਤਸ੍ਸ ਏਵਂ ਵਦਾਮੀਤਿ ਅਤ੍ਥਾਧਿਪ੍ਪਾਯੇਨ ਲਗ੍ਗਨਕਾਰੀ, ਨ ਬ੍ਯਞ੍ਜਨਵਸੇਨ. ਕੋਧਸ੍ਸ ਆਸਨ੍ਨਾ ਤਸ੍ਸ ਕਾਰਣਭਾਵਤੋ. ਸਦੋਸਵਾਚਾਯਾਤਿ ਅਤ੍ਤਨੋ ਸਮੁਟ੍ਠਾਪਕਦੋਸਸ੍ਸ ਵਸੇਨ ਸਦੋਸਵਾਚਾਯ ਵੇਵਚਨਾਨਿ.

ਅਕਾਲੇਨਾਤਿ ਅਯੁਤ੍ਤਕਾਲੇਨ. ਅਕਾਰਣਨਿਸ੍ਸਿਤਨ੍ਤਿ ਨਿਪ੍ਫਲਂ. ਫਲਞ੍ਹਿ ਕਾਰਣਨਿਸ੍ਸਿਤਂ ਨਾਮ ਤਦਵਿਨਾਭਾਵਤੋ. ਅਕਾਰਣਨਿਸ੍ਸਿਤਂ ਨਿਪ੍ਫਲਂ, ਸਮ੍ਫਨ੍ਤਿ ਅਤ੍ਥੋ. ਅਸਭਾਵਵਤ੍ਤਾਤਿ ਅਯਾਥਾਵਵਾਦੀ. ਅਸਂਵਰਵਿਨਯਪਟਿਸਂਯੁਤ੍ਤਸ੍ਸਾਤਿ ਸਂਵਰਵਿਨਯਰਹਿਤਸ੍ਸ, ਅਤ੍ਤਨੋ ਸੁਣਨ੍ਤਸ੍ਸ ਚ ਨ ਸਂਵਰਵਿਨਯਾਵਹਸ੍ਸ ਵਤ੍ਤਾ. ਹਦਯਮਞ੍ਜੂਸਾਯਂ ਨਿਧੇਤੁਨ੍ਤਿ ਅਹਿਤਸਂਹਿਤਤ੍ਤਾ ਚਿਤ੍ਤਂ ਅਨੁਪ੍ਪਵਿਸੇਤ੍ਵਾ ਨਿਧੇਤੁਂ. ਅਯੁਤ੍ਤਕਾਲੇਤਿ ਧਮ੍ਮਂ ਕਥੇਨ੍ਤੇਨ ਯੋ ਅਤ੍ਥੋ ਯਸ੍ਮਿਂ ਕਾਲੇ ਵਤ੍ਤਬ੍ਬੋ, ਤਤੋ ਪੁਬ੍ਬੇ ਪਚ੍ਛਾ ਤਸ੍ਸ ਅਕਾਲੋ, ਤਸ੍ਮਿਂ ਅਯੁਤ੍ਤਕਾਲੇ ਵਤ੍ਤਾ ਹੋਤਿ. ਅਨਪਦੇਸਨ੍ਤਿ ਭਗਵਤਾ ਅਸੁਕਸੁਤ੍ਤੇ ਏਵਂ ਵੁਤ੍ਤਨ੍ਤਿ ਸੁਤ੍ਤਾਪਦੇਸਵਿਰਹਿਤਂ. ਅਪਰਿਚ੍ਛੇਦਨ੍ਤਿ ਪਰਿਚ੍ਛੇਦਰਹਿਤਂ. ਯਥਾ ਪਨ ਵਾਚਾ ਪਰਿਚ੍ਛੇਦਰਹਿਤਾ ਹੋਤਿ, ਤਂ ਦਸ੍ਸੇਤੁਂ ‘‘ਸੁਤ੍ਤਂ ਵਾ’’ਤਿਆਦਿ ਵੁਤ੍ਤਂ. ਉਪਲਬ੍ਭਨ੍ਤਿ ਅਨੁਯੋਗਂ. ਬਾਹਿਰਕਥਂਯੇਵਾਤਿ ਯਂ ਸੁਤ੍ਤਂ, ਜਾਤਕਂ ਵਾ ਨਿਕ੍ਖਿਤ੍ਤਂ, ਤਸ੍ਸ ਸਰੀਰਭੂਤਂ ਕਥਂ ਅਨਾਮਸਿਤ੍ਵਾ ਤਤੋ ਬਹਿਭੂਤਂਯੇਵ ਕਥਂ. ਸਮ੍ਪਜ੍ਜਿਤ੍ਵਾਤਿ ਵਿਰੁਲ਼੍ਹਂ ਆਪਜ੍ਜਿਤ੍ਵਾ. ਪਵੇਣਿਜਾਤਕਾਵਾਤਿ ਅਨੁਜਾਤਪਾਰੋਹਮੂਲਾਨਿਯੇਵ ਤਿਟ੍ਠਨ੍ਤਿ. ਆਹਰਿਤ੍ਵਾਤਿ ਨਿਕ੍ਖਿਤ੍ਤਸੁਤ੍ਤਤੋ ਅਞ੍ਞਮ੍ਪਿ ਅਨੁਯੋਗਉਪਮਾਵਤ੍ਥੁਵਸੇਨ ਤਦਨੁਪਯੋਗਿਨਂ ਆਹਰਿਤ੍ਵਾ. ਜਾਨਾਪੇਤੁਨ੍ਤਿ ਏਤਦਤ੍ਥਮਿਦਂ ਵੁਤ੍ਤਨ੍ਤਿ ਜਾਨਾਪੇਤੁਂ ਯੋ ਸਕ੍ਕੋਤਿ. ਤਸ੍ਸ ਕਥੇਤੁਨ੍ਤਿ ਤਸ੍ਸ ਤਥਾਰੂਪਸ੍ਸ ਧਮ੍ਮਕਥਿਕਸ੍ਸ ਬਹੁਮ੍ਪਿ ਕਥੇਤੁਂ ਵਟ੍ਟਤਿ. ਨ ਅਤ੍ਥਨਿਸ੍ਸਿਤਨ੍ਤਿ ਅਤ੍ਤਨੋ ਪਰੇਸਞ੍ਚ ਨ ਹਿਤਾਵਹਂ.

ਅਭਿਜ੍ਝਾਯਨਂ ਯੇਭੁਯ੍ਯੇਨ ਪਰਸਨ੍ਤਕਸ੍ਸ ਦਸ੍ਸਨਵਸੇਨ ਹੋਤੀਤਿ ‘‘ਅਭਿਜ੍ਝਾਯ ਓਲੋਕੇਤਾ ਹੋਤੀ’’ਤਿ ਵੁਤ੍ਤਂ. ਅਭਿਜ੍ਝਾਯਨ੍ਤੋ ਵਾ ਅਭਿਜ੍ਝਾਯਿਤਂ ਵਤ੍ਥੁਂ ਯਤ੍ਥ ਕਤ੍ਥਚਿ ਠਿਤਮ੍ਪਿ ਪਚ੍ਚਕ੍ਖਤੋ ਪਸ੍ਸਨ੍ਤੋ ਵਿਯ ਅਭਿਜ੍ਝਾਯਤੀਤਿ ਵੁਤ੍ਤਂ ‘‘ਅਭਿਜ੍ਝਾਯ ਓਲੋਕੇਤਾ ਹੋਤੀ’’ਤਿ. ਕਮ੍ਮਪਥਭੇਦੋ ਨ ਹੋਤਿ, ਕੇਵਲਂ ਲੋਭਮਤ੍ਤੋਵ ਹੋਤਿ ਪਰਿਣਾਮਨਵਸੇਨ ਅਪ੍ਪਵਤ੍ਤਤ੍ਤਾ. ਯਥਾ ਪਨ ਕਮ੍ਮਪਥਭੇਦੋ ਹੋਤਿ, ਤਂ ਦਸ੍ਸੇਤੁਂ ‘‘ਯਦਾ ਪਨਾ’’ਤਿਆਦਿ ਵੁਤ੍ਤਂ. ਪਰਿਣਾਮੇਤੀਤਿ ਅਤ੍ਤਨੋ ਸਨ੍ਤਕਭਾਵੇਨ ਪਰਿਗ੍ਗਯ੍ਹ ਨਾਮੇਤਿ.

ਵਿਪਨ੍ਨਚਿਤ੍ਤੋਤਿ ਬ੍ਯਾਪਾਦੇਨ ਵਿਪਤ੍ਤਿਂ ਆਪਾਦਿਤਚਿਤ੍ਤੋ. ਤੇਨਾਹ ‘‘ਪੂਤਿਭੂਤਚਿਤ੍ਤੋ’’ਤਿ. ਬ੍ਯਾਪਾਦੋ ਹਿ ਵਿਸਂ ਵਿਯ ਲੋਹਿਤਸ੍ਸ ਚਿਤ੍ਤਂ ਪੂਤਿਭਾਵਂ ਜਨੇਤਿ. ਦੋਸੇਨ ਦੁਟ੍ਠਚਿਤ੍ਤਸਙ੍ਕਪ੍ਪੋਤਿ ਵਿਸੇਨ ਵਿਯ ਸਪ੍ਪਿਆਦਿਕੋਪੇਨ ਦੂਸਿਤਚਿਤ੍ਤਸਙ੍ਕਪ੍ਪੋ. ਘਾਤੀਯਨ੍ਤੂਤਿ ਹਨੀਯਨ੍ਤੁ. ਵਧਂ ਪਾਪੁਣਨ੍ਤੂਤਿ ਮਰਣਂ ਪਾਪੁਣਨ੍ਤੁ. ਮਾ ਵਾ ਅਹੇਸੁਨ੍ਤਿ ਸਬ੍ਬੇਨ ਸਬ੍ਬਂ ਨ ਹੋਨ੍ਤੁ. ਤੇਨਾਹ ‘‘ਕਿਞ੍ਚਿਪਿ ਮਾ ਅਹੇਸੁ’’ਨ੍ਤਿ, ਅਨਵਸੇਸਵਿਨਾਸਂ ਪਾਪੁਣਨ੍ਤੂਤਿ ਅਤ੍ਥੋ. ਹਞ੍ਞਨ੍ਤੂਤਿ ਆਦਿਚਿਨ੍ਤਨੇਨੇਵਾਤਿ ਏਕਨ੍ਤਤੋ ਵਿਨਾਸਚਿਨ੍ਤਾਯ ਏਵ.

ਮਿਚ੍ਛਾਦਿਟ੍ਠਿਕੋਤਿ ਅਯੋਨਿਸੋ ਉਪ੍ਪਨ੍ਨਦਿਟ੍ਠਿਕੋ. ਸੋ ਚ ਏਕਨ੍ਤਤੋ ਕੁਸਲਪਟਿਪਕ੍ਖਦਿਟ੍ਠਿਕੋਤਿ ਆਹ ‘‘ਅਕੁਸਲਦਸ੍ਸਨੋ’’ਤਿ. ਵਿਪਲ੍ਲਤ੍ਥਦਸ੍ਸਨੋਤਿ ਧਮ੍ਮਤਾਯ ਵਿਪਰਿਯਾਸਗ੍ਗਾਹੀ. ਨਤ੍ਥਿ ਦਿਨ੍ਨਨ੍ਤਿ ਦੇਯ੍ਯਧਮ੍ਮਸੀਸੇਨ ਦਾਨਂ ਵੁਤ੍ਤਨ੍ਤਿ ਆਹ ‘‘ਦਿਨ੍ਨਸ੍ਸ ਫਲਾਭਾਵਂ ਸਨ੍ਧਾਯ ਵਦਤੀ’’ਤਿ. ਦਿਨ੍ਨਂ ਪਨ ਅਨ੍ਨਾਦਿਵਤ੍ਥੁਂ ਕਥਂ ਪਟਿਕ੍ਖਿਪਤਿ. ਏਸ ਨਯੋ ‘‘ਯਿਟ੍ਠਂ ਹੁਤ’’ਨ੍ਤਿ ਏਤ੍ਥਾਪਿ. ਮਹਾਯਾਗੋਤਿ ਸਬ੍ਬਸਾਧਾਰਣਂ ਮਹਾਦਾਨਂ. ਪਹੇਣਕਸਕ੍ਕਾਰੋਤਿ ਪਾਹੁਨਕਾਨਂ ਕਤ੍ਤਬ੍ਬਸਕ੍ਕਾਰੋ. ਫਲਨ੍ਤਿ ਆਨਿਸਂਸਫਲਞ੍ਚ ਨਿਸ੍ਸਨ੍ਦਫਲਞ੍ਚ. ਵਿਪਾਕੋਤਿ ਸਦਿਸਂ ਫਲਂ. ਪਰਲੋਕੇ ਠਿਤਸ੍ਸ ਅਯਂ ਲੋਕੋ ਨਤ੍ਥੀਤਿ ਪਰਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਅਯਂ ਲੋਕੋ ਨ ਹੋਤਿ. ਇਧਲੋਕੇ ਠਿਤਸ੍ਸਪਿ ਪਰਲੋਕੋ ਨਤ੍ਥੀਤਿ ਇਧਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਪਰਲੋਕੋ ਨ ਹੋਤਿ. ਤਤ੍ਥ ਕਾਰਣਮਾਹ ‘‘ਸਬ੍ਬੇ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤੀ’’ਤਿ. ਇਮੇ ਸਤ੍ਤਾ ਯਤ੍ਥ ਯਤ੍ਥ ਭਵਯੋਨਿਗਤਿਆਦੀਸੁ ਠਿਤਾ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤਿ ਨਿਰੁਦਯਵਿਨਾਸਵਸੇਨ ਵਿਨਸ੍ਸਨ੍ਤਿ. ਫਲਾਭਾਵਵਸੇਨਾਤਿ ਮਾਤਾਪਿਤੂਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਫਲਸ੍ਸ ਅਭਾਵਵਸੇਨ ‘‘ਨਤ੍ਥਿ ਮਾਤਾ, ਨਤ੍ਥਿ ਪਿਤਾ’’ਤਿ ਵਦਤਿ, ਨ ਮਾਤਾਪਿਤੂਨਂ, ਨਾਪਿ ਤੇਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਅਭਾਵਵਸੇਨ ਤੇਸਂ ਲੋਕਪਚ੍ਚਕ੍ਖਤ੍ਤਾ. ਬੁਬ੍ਬੁਲ਼ਕਸ੍ਸ ਵਿਯ ਇਮੇਸਂ ਸਤ੍ਤਾਨਂ ਉਪ੍ਪਾਦੋ ਨਾਮ ਕੇਵਲੋਵ, ਨ ਚਵਿਤ੍ਵਾ ਆਗਮਨਪੁਬ੍ਬਕੋਤਿ ਦਸ੍ਸਨਤ੍ਥਂ ‘‘ਨਤ੍ਥਿ ਸਤ੍ਤਾ ਓਪਪਾਤਿਕਾ’’ਤਿ ਵੁਤ੍ਤਨ੍ਤਿ ਆਹ ‘‘ਚਵਿਤ੍ਵਾ ਉਪਪਜ੍ਜਨਕਸਤ੍ਤਾ ਨਾਮ ਨਤ੍ਥੀਤਿ ਵਦਤੀ’’ਤਿ. ਸਮਣੇਨ ਨਾਮ ਯਾਥਾਵਤੋ ਜਾਨਨ੍ਤੇਨ ਕਸ੍ਸਚਿ ਕਿਞ੍ਚਿ ਅਕਥੇਤ੍ਵਾ ਸਞ੍ਞਤੇਨ ਭਵਿਤਬ੍ਬਂ, ਅਞ੍ਞਥਾ ਅਹੋਪੁਰਿਸਿਕਾ ਨਾਮ ਸਿਯਾ, ਕਿਂ ਪਰੋ ਪਰਸ੍ਸ ਕਰਿਸ੍ਸਤਿ, ਤਥਾ ਅਤ੍ਤਨੋ ਸਮ੍ਪਾਦਨਸ੍ਸ ਕਸ੍ਸਚਿ ਅਵਸਰੋ ਏਵ ਨਤ੍ਥਿ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨਤੋਤਿ ਆਹ ‘‘ਯੇ ਇਮਞ੍ਚ…ਪੇ… ਪਵੇਦੇਨ੍ਤੀ’’ਤਿ. ਏਤ੍ਤਾਵਤਾਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ ਬ੍ਯਪਦੇਸੇਨ. ਦਸਵਤ੍ਥੁਕਾਤਿ ਪਟਿਕ੍ਖਿਪਿਤਬ੍ਬਾਨਿ ਦਸ ਵਤ੍ਥੂਨਿ ਏਤਿਸ੍ਸਾਤਿ ਦਸਵਤ੍ਥੁਕਾ.

੪੪੧. ਅਨਭਿਜ੍ਝਾਦਯੋ ਹੇਟ੍ਠਾ ਅਤ੍ਥਤੋ ਪਕਾਸਿਤਤ੍ਤਾ ਉਤ੍ਤਾਨਤ੍ਥਾਯੇਵ.

੪੪੨. ਸਹ ਬ੍ਯਯਤਿ ਗਚ੍ਛਤੀਤਿ ਸਹਬ੍ਯੋ, ਸਹਵਤ੍ਤਨਕੋ, ਤਸ੍ਸ ਭਾਵੋ ਸਹਬ੍ਯਤਾ, ਸਹਪਵਤ੍ਤੀਤਿ ਆਹ ‘‘ਸਹਭਾਵਂ ਉਪਗਚ੍ਛੇਯ੍ਯ’’ਨ੍ਤਿ. ਬ੍ਰਹ੍ਮਾਨਂ ਕਾਯੋ ਸਮੂਹੋਤਿ ਬ੍ਰਹ੍ਮਕਾਯੋ, ਤਪ੍ਪਰਿਯਾਪਨ੍ਨਤਾਯ ਤਤ੍ਥ ਗਤਾਤਿ ਬ੍ਰਹ੍ਮਕਾਯਿਕਾ. ਕਾਮਂ ਚੇਤਾਯ ਸਬ੍ਬਸ੍ਸਪਿ ਬ੍ਰਹ੍ਮਨਿਕਾਯਸ੍ਸ ਸਮਞ੍ਞਾਯ ਭਵਿਤਬ੍ਬਂ, ‘‘ਆਭਾਨ’’ਨ੍ਤਿਆਦਿਨਾ ਪਨ ਦੁਤਿਯਜ੍ਝਾਨਭੂਮਿਕਾਦੀਨਂ ਉਪਰਿ ਗਹਿਤਤ੍ਤਾ ਗੋਬਲੀਬਦ੍ਦਞਾਯੇਨ ਤਦਵਸੇਸਾਨਂ ਅਯਂ ਸਮਞ੍ਞਾਤਿ ਆਹ ‘‘ਬ੍ਰਹ੍ਮਕਾਯਿਕਾਨਂ ਦੇਵਾਨਨ੍ਤਿ ਪਠਮਜ੍ਝਾਨਭੂਮਿਦੇਵਾਨ’’ਨ੍ਤਿ. ਆਭਾ ਨਾਮ ਵਿਸੁਂ ਦੇਵਾ ਨਤ੍ਥਿ, ਪਰਿਤ੍ਤਾਭਾਦੀਨਂਯੇਵ ਪਨ ਆਭਾਵਨ੍ਤਤਾਸਾਮਞ੍ਞੇਨ ਏਕਜ੍ਝਂ ਗਹੇਤ੍ਵਾ ਪਵਤ੍ਤਂ ਏਤਂ ਅਧਿਵਚਨਂ, ਯਦਿਦਂ ‘‘ਆਭਾ’’ਤਿ ਯਥਾ ‘‘ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤਮਹਾਬ੍ਰਹ੍ਮਾਨਂ ਬ੍ਰਹ੍ਮਕਾਯਿਕਾ’’ਤਿ. ਪਰਿਤ੍ਤਾਭਾਨਨ੍ਤਿਆਦਿ ਪਨਾਤਿ ਆਦਿ-ਸਦ੍ਦੇਨ ਅਪ੍ਪਮਾਣਾਭਾਨਂ ਦੇਵਾਨਂ ਆਭਸ੍ਸਰਾਨਂ ਦੇਵਾਨਨ੍ਤਿ ਇਮਂ ਪਾਲ਼ਿਂ ਸਙ੍ਗਣ੍ਹਾਤਿ. ਏਕਤੋ ਅਗ੍ਗਹੇਤ੍ਵਾਤਿ ਆਭਾਤਿ ਵਾ, ਏਕਤ੍ਤਕਾਯਨਾਨਤ੍ਤਸਞ੍ਞਾਤਿ ਵਾ ਏਕਤੋ ਅਗ੍ਗਹੇਤ੍ਵਾ. ਤੇਸਂਯੇਵਾਤਿ ਆਭਾਤਿ ਵੁਤ੍ਤਦੇਵਾਨਂਯੇਵ. ਭੇਦਤੋ ਗਹਣਨ੍ਤਿ ਕਾਰਣਸ੍ਸ ਹੀਨਾਦਿਭੇਦਭਿਨ੍ਨਤਾਦਸ੍ਸਨਵਸੇਨ ਪਰਿਤ੍ਤਾਭਾਦਿਗ੍ਗਹਣਂ. ਇਤਿ ਭਗਵਾ ਆਸਵਕ੍ਖਯਂ ਦਸ੍ਸੇਤ੍ਵਾਤਿ ਏਵਂ ਭਗਵਾ ਧਮ੍ਮਚਰਿਯਂ, ਸਮਚਰਿਯਂ, ਵਟ੍ਟਨਿਸ੍ਸਿਤਂ ਸੁਗਤਿਗਾਮਿਪਟਿਪਦਂ, ਵਿਵਟ੍ਟਨਿਸ੍ਸਿਤਂ ਆਸਵਕ੍ਖਯਗਾਮਿਪਟਿਪਦਂ ਕਤ੍ਵਾ ਤਿਭਵਭਞ੍ਜਨਤੋ ਆਸਵਕ੍ਖਯਂ ਦਸ੍ਸੇਤ੍ਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ.

ਇਧ ਠਤ੍ਵਾਤਿ ਇਮਸ੍ਮਿਂ ਧਮ੍ਮਚਰਿਯਾਸਮਚਰਿਯਾਯ ਨਿਦ੍ਦੇਸੇ ਠਤ੍ਵਾ. ਦੇਵਲੋਕਾ ਸਮਾਨੇਤਬ੍ਬਾਤਿ ਛਬ੍ਬੀਸਤਿਪਿ ਦੇਵਲੋਕਾ ਸਮੋਧਾਨੇਤਬ੍ਬਾ. ਵੀਸਤਿ ਬ੍ਰਹ੍ਮਲੋਕਾਤਿ ਤਂਤਂਭਵਪਰਿਯਾਪਨ੍ਨਨਿਕਾਯਵਸੇਨ ਵੀਸਤਿ ਬ੍ਰਹ੍ਮਲੋਕਾ, ਵੀਸਤਿ ਬ੍ਰਹ੍ਮਨਿਕਾਯਾਤਿ ਅਤ੍ਥੋ. ਦਸਕੁਸਲਕਮ੍ਮਪਥੇਹੀਤਿ ਯਥਾਰਹਂ ਦਸਕੁਸਲਕਮ੍ਮਪਥੇਹਿ ਕਮ੍ਮੂਪਨਿਸ੍ਸਯਪਚ੍ਚਯਭੂਤੇਹਿ ਕੇਵਲਂ ਉਪਨਿਸ੍ਸਯਭੂਤੇਹਿ ਚ ਨਿਬ੍ਬਤ੍ਤਿ ਦਸ੍ਸਿਤਾ.

ਤਿਣ੍ਣਂ ਸੁਚਰਿਤਾਨਨ੍ਤਿ ਤਿਣ੍ਣਂ ਕਾਮਾਵਚਰਸੁਚਰਿਤਾਨਂ. ਕਾਮਾਵਚਰਗ੍ਗਹਣਞ੍ਚੇਤ੍ਥ ਮਨੋਸੁਚਰਿਤਾਪੇਕ੍ਖਾਯ. ਵਿਪਾਕੇਨੇਵਾਤਿ ਇਮਿਨਾ ਵਿਪਾਕੁਪ੍ਪਾਦੇਨੇਵ ਨਿਬ੍ਬਤ੍ਤਿ ਹੋਤਿ, ਨ ਉਪਨਿਸ੍ਸਯਤਾਮਤ੍ਤੇਨਾਤਿ ਦਸ੍ਸੇਤਿ. ‘‘ਉਪਨਿਸ੍ਸਯਵਸੇਨਾ’’ਤਿ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਦਸ ਕੁਸਲਕਮ੍ਮਪਥਾ ਹੀ’’ਤਿਆਦਿ ਵੁਤ੍ਤਂ. ਦੁਤਿਯਾਦੀਨਿ ਭਾਵੇਤ੍ਵਾਤਿਆਦੀਸੁਪਿ ‘‘ਸੀਲੇ ਪਤਿਟ੍ਠਾਯਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਕਸ੍ਮਾ ਪਨੇਤ੍ਥ ‘‘ਉਪਨਿਸ੍ਸਯਵਸੇਨਾ’’ਤਿ ਵੁਤ੍ਤਂ, ਨਨੁ ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੪੧) – ‘‘ਪਠਮੇਨ ਝਾਨੇਨ ਨੀਵਰਣਾਨਂ ਪਹਾਨਂ ਸੀਲਂ, ਵੇਰਮਣਿ ਸੀਲਂ, ਚੇਤਨਾ ਸੀਲਂ, ਸਂਵਰੋ ਸੀਲਂ, ਅਵੀਤਿਕ੍ਕਮੋ ਸੀਲ’’ਨ੍ਤਿਆਦਿਨਾ ਸਬ੍ਬੇਸੁਪਿ ਝਾਨੇਸੁ ਸੀਲਂ ਉਦ੍ਧਟਨ੍ਤਿ ਤਸ੍ਸ ਵਸੇਨ ਉਪਰਿਦੇਵਲੋਕਾਨਮ੍ਪਿ ਵਿਪਾਕੇਨ ਨਿਬ੍ਬਤ੍ਤਿ ਵਤ੍ਤਬ੍ਬਾਤਿ? ਨ, ਤਸ੍ਸ ਪਰਿਞ੍ਞਾਯ ਦੇਸਨਤ੍ਤਾ, ਪਰਿਞ੍ਞਾਯ ਦੇਸਨਤਾ ਚਸ੍ਸ ‘‘ਯਤ੍ਥ ਚ ਪਹਾਨ’’ਨ੍ਤਿਆਦਿਨਾ ਵਿਸੁਦ੍ਧਿਮਗ੍ਗਸਂਵਣ੍ਣਨਾਯਞ੍ਚ (ਵਿਸੁਦ੍ਧਿ. ਮਹਾਟੀ. ੨.੮੩੭, ੮੩੯) ਪਕਾਸਿਤਾ ਏਵ. ਤਥਾ ਹਿ ਇਧਾਪਿ ‘‘ਦਸ ਕੁਸਲਕਮ੍ਮਪਥਾ ਹਿ ਸੀਲ’’ਨ੍ਤਿਆਦਿਨਾ ਸੀਲਸ੍ਸ ਰੂਪਾਰੂਪਭਵਾਨਂ ਉਪਨਿਸ੍ਸਯਤਾ ਵਿਭਾਵਿਤਾ, ਨ ਨਿਬ੍ਬਤ੍ਤਕਤਾਯ. ਕਸ੍ਮਾ ਪਨੇਤ੍ਥ ਭਾਵਨਾਲਕ੍ਖਣਾਯ ਧਮ੍ਮਚਰਿਯਾਯ ਭਵਵਿਸੇਸੇ ਵਿਭਜਿਯਮਾਨੇ ਅਸਞ੍ਞਭਵੋ ਨ ਗਹਿਤੋਤਿ ਆਹ ‘‘ਅਸਞ੍ਞਭਵੋ ਪਨ…ਪੇ… ਨ ਨਿਦ੍ਦਿਟ੍ਠੋ’’ਤਿ. ਬਾਹਿਰਕਾ ਹਿ ਅਯਥਾਭੂਤਦਸ੍ਸਿਤਾਯ ਅਸਞ੍ਞਭਵਂ ਭਵਵਿਪ੍ਪਮੋਕ੍ਖਂ ਮਞ੍ਞਮਾਨਾ ਤਦੁਪਗਜ੍ਝਾਨਂ ਭਾਵੇਤ੍ਵਾ ਅਸਞ੍ਞੇਸੁ ਨਿਬ੍ਬਤ੍ਤਨ੍ਤਿ. ਅਯਮੇਤ੍ਥ ਸਙ੍ਖੇਪੋ, ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਬ੍ਰਹ੍ਮਜਾਲਟ੍ਠਕਥਾਯਂ ਤਂਸਂਵਣ੍ਣਨਾਯਞ੍ਚ (ਦੀ. ਨਿ. ਅਟ੍ਠ. ੧.੬੮-੭੩; ਦੀ. ਨਿ. ਟੀ. ੧.੬੮-੭੩) ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਸਾਲੇਯ੍ਯਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.