੨. ਮਹਾਗੋਸਿਙ੍ਗਸੁਤ੍ਤਵਣ੍ਣਨਾ

੩੩੨. ਕੋਚਿਦੇਵਾਤਿ ਗੋਸਿਙ੍ਗਸਾਲਵਨਸਾਮਨ੍ਤਤੋ ਨਿਵਿਟ੍ਠੇਸੁ ਯੋ ਕੋਚਿ ਗਾਮੋ ਗੋਚਰਗਾਮੋ ਭਵਿਸ੍ਸਤਿ, ਤਸ੍ਮਾ ਅਨਿਬਦ੍ਧਭਾਵਤੋ ਗੋਚਰਗਾਮੋ ਨ ਗਹਿਤੋ, ਵਸਨਟ੍ਠਾਨਮੇਵ ਪਰਿਦੀਪਿਤਂ, ਤਤੋ ਏਵ ਅਰਞ੍ਞਨਿਦਾਨਕਂ ਨਾਮੇਤਂ. ਸਬ੍ਬਤ੍ਥਾਤਿ ਦੇਵਲੋਕੇ ਮਨੁਸ੍ਸਲੋਕੇ ਚ. ਥਿਰਕਾਰਕੇਹੀਤਿ ਸਾਸਨੇ ਥਿਰਭਾਵਕਾਰਕੇਹਿ. ਸਵਨਨ੍ਤੇ ਜਾਤਤ੍ਤਾਤਿ ਚਤੁਸਚ੍ਚਗਬ੍ਭਸ੍ਸ ਧਮ੍ਮਸ੍ਸਵਨਸ੍ਸ ਪਰਿਯੋਸਾਨੇ ਅਰਿਯਾਯ ਜਾਤਿਯਾ ਜਾਤਤ੍ਤਾ. ਯਥਾ ਪਟਿਵੇਧਬਾਹੁਸਚ੍ਚਂ ਇਜ੍ਝਤਿ, ਤਥਾ ਧਮ੍ਮਸ੍ਸ ਸਵਨਤੋ ਸਾਵਕਾ. ਸੂਰਿਯੋ ਵਿਯ ਭਾਸੁਰਗੁਣਰਂਸਿਤਾਯ ਮੋਹਨ੍ਧਕਾਰਵਿਧਮਨਤੋ. ਚਨ੍ਦੋ ਵਿਯ ਰਮਣੀਯਮਨੋਹਰਸੀਤਲਗੁਣਤਾਯ ਕਿਲੇਸਪਰਿਲ਼ਾਹਵੂਪਸਮਤੋ. ਸਾਗਰੋ ਵਿਯ ਗਮ੍ਭੀਰਥਿਰਵਿਪੁਲਾਨੇਕਗੁਣਤਾਯ ਠਿਤਧਮ੍ਮਸਭਾਵਤੋ. ਗੁਣਮਹਨ੍ਤਤਾਯ ਥੇਰਸ੍ਸ ਅਭਿਞ੍ਞਾਤਤਾ, ਗੁਣਮਹਨ੍ਤਤਾ ਚ ਸੁਤ੍ਤੇਸੁ ਆਗਤਨਯੇਨੇਵ ਞਾਤਬ੍ਬਾਤਿ ਤਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਨ ਕੇਵਲ’’ਨ੍ਤਿਆਦਿ ਵੁਤ੍ਤਂ. ਸੀਹਨਾਦਸੁਤ੍ਤਨ੍ਤਿ ਮਜ੍ਝਿਮਨਿਕਾਯੇ ਆਗਤਂ ਮਹਾਸੀਹਨਾਦਸੁਤ੍ਤਂ (ਮ. ਨਿ. ੧.੧੪੬). ਥੇਰਪਞ੍ਹਸੁਤ੍ਤਨ੍ਤਿ ਸੁਤ੍ਤਨਿਪਾਤੇ ਅਟ੍ਠਕਵਗ੍ਗੇ ਆਗਤਂ ਸਾਰਿਪੁਤ੍ਤਸੁਤ੍ਤਂ (ਸੁ. ਨਿ. ੯੬੧-੯੮੧). ਥੇਰਸੀਹਨਾਦਸੁਤ੍ਤਨ੍ਤਿ ਇਮਸ੍ਸ ਚ ਥੇਰਸ੍ਸ ਜਨਪਦਚਾਰਿਕਾਯ ਸਤ੍ਥੁ ਸਮ੍ਮੁਖਾ ਸੀਹਨਾਦਸੁਤ੍ਤਂ. ਅਭਿਨਿਕ੍ਖਮਨਨ੍ਤਿ ਥੇਰਸ੍ਸੇਵ ਮਹਤਾ ਞਾਤਿਪਰਿਵਟ੍ਟੇਨ ਮਹਤਾ ਚ ਭੋਗਪਰਿਵਟ੍ਟੇਨ ਸਹ ਘਰਾਵਾਸਪਰਿਚ੍ਚਾਗੋ ਅਭਿਨਿਕ੍ਖਮਨਂ. ਏਸ ਨਯੋ ਇਤੋ ਪਰੇਸੁਪਿ. ਯਦਿਦਨ੍ਤਿ ਨਿਪਾਤੋ, ਯੋ ਅਯਨ੍ਤਿ ਅਤ੍ਥੋ.

ਮਹਾਪਞ੍ਞੇ ਭਿਕ੍ਖੂ ਗਹੇਤ੍ਵਾਤਿ ਆਯਸ੍ਮਤੋ ਕਿਰ ਸਾਰਿਪੁਤ੍ਤਤ੍ਥੇਰਸ੍ਸ ਪਰਿਵਾਰਭਿਕ੍ਖੂਪਿ ਮਹਾਪਞ੍ਞਾ ਏਵ ਅਹੇਸੁਂ. ਧਾਤੁਸੋ ਹਿ ਸਤ੍ਤਾ ਸਂਸਨ੍ਦਨ੍ਤਿ. ਸਯਂ ਇਦ੍ਧਿਮਾਤਿਆਦੀਸੁਪਿ ਏਸੇਵ ਨਯੋ. ਅਯਂ ਪਨਤ੍ਥੋ ਧਾਤੁਸਂਯੁਤ੍ਤੇਨ (ਸਂ. ਨਿ. ੨.੯੯) ਦੀਪੇਤਬ੍ਬੋ – ਗਿਜ੍ਝਕੂਟਪਬ੍ਬਤੇ ਗਿਲਾਨਸੇਯ੍ਯਾਯ ਨਿਸਿਨ੍ਨੋ ਭਗਵਾ ਆਰਕ੍ਖਤ੍ਥਾਯ ਪਰਿਵਾਰੇਤ੍ਵਾ ਵਸਨ੍ਤੇਸੁ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦੀਸੁ ਏਕਮੇਕਂ ਅਤ੍ਤਨੋ ਪਰਿਸਾਯ ਸਦ੍ਧਿਂ ਚਙ੍ਕਮਨ੍ਤਂ ਵੋਲੋਕੇਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਸ੍ਸਥ ਨੋ ਤੁਮ੍ਹੇ, ਭਿਕ੍ਖਵੇ, ਸਾਰਿਪੁਤ੍ਤਂ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਚਙ੍ਕਮਨ੍ਤਨ੍ਤਿ. ਏਵਂ, ਭਨ੍ਤੇ. ਸਬ੍ਬੇ ਖੋ ਏਤੇ, ਭਿਕ੍ਖਵੇ, ਭਿਕ੍ਖੂ ਮਹਾਪਞ੍ਞਾ’’ਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ.

ਵਨਨ੍ਤੇਤਿ ਉਪਵਨਨ੍ਤੇ. ਮੇਘਵਣ੍ਣਾਯਾਤਿ ਨੀਲਾਭਾਯ. ਸਮੁਦ੍ਦਕੁਚ੍ਛਿਤੋ ਉਗ੍ਗਚ੍ਛਨ੍ਤਸ੍ਸ ਵਿਯ ਉਪਟ੍ਠਾਨਂ ਸਨ੍ਧਾਯ ਵੁਤ੍ਤਂ. ਚਕ੍ਕਵਾਲ਼ਪਬ੍ਬਤਮਤ੍ਥਕਸਮੀਪੇ ਆਭਾਫਰਣਵਸੇਨ ਪਵਤ੍ਤਿਯਾ ‘‘ਪਾਚੀਨਚਕ੍ਕਵਾਲ਼ਪਬ੍ਬਤਮਤ੍ਥਕੇ’’ਤਿ ਵੁਤ੍ਤਂ, ਨ ਚਕ੍ਕਵਾਲ਼ਪਬ੍ਬਤਮਤ੍ਥਕੇ ਚਨ੍ਦਮਣ੍ਡਲਸ੍ਸ ਵਿਚਰਣਤੋ. ਤਥਾ ਸਤਿ ਲੋਕਨ੍ਤਰਿਕਨਿਰਯੇਸੁਪਿ ਚਨ੍ਦਿਮਸੂਰਿਯਾਨਂ ਆਭਾ ਫਰੇਯ੍ਯ. ਉਬ੍ਬੇਧਵਸੇਨ ਹਿ ਚਕ੍ਕਵਾਲ਼ਪਬ੍ਬਤਸ੍ਸ ਵੇਮਜ੍ਝਤੋ ਚਨ੍ਦਿਮਸੂਰਿਯਾ ਵਿਚਰਨ੍ਤਿ. ਸਾਲਕੁਸੁਮਪਭਾਨਂ ਅਤਿਰਤ੍ਤਤਾਯ ਵੁਤ੍ਤਂ ‘‘ਲਾਖਾਰਸੇਨ ਸਿਞ੍ਚਮਾਨਂ ਵਿਯਾ’’ਤਿ. ਉਪਗਾਯਮਾਨਾ ਵਿਯਾਤਿ ਪਯਿਰੁਪਾਸਨਵਸੇਨ ਉਪੇਚ੍ਚ ਗਾਯਮਾਨਾ ਵਿਯ. ਕਾਯ ਨੁ ਖੋ ਅਜ੍ਜ ਰਤਿਯਾਤਿ ਅਜ੍ਜ ਝਾਨਸਮਾਪਤ੍ਤਿਰਤਿਯਾ ਏਵ ਨੁ ਖੋ, ਉਦਾਹੁ ਧਮ੍ਮਸਾਕਚ੍ਛਾਰਤਿਯਾ ਧਮ੍ਮਦੇਸਨਾਰਤਿਯਾਤਿ ਚਿਨ੍ਤੇਸਿ.

ਦ੍ਵੇ ਚਨ੍ਦਮਣ੍ਡਲਾਨਿ ਵਿਯ ਪਰਮਸੋਭਗ੍ਗਪ੍ਪਤ੍ਤਾਯ ਕਨ੍ਤਿਯਾ. ਦ੍ਵੇ ਸੂਰਿਯਮਣ੍ਡਲਾਨਿ ਵਿਯ ਅਤਿਵਿਯ ਸੁਵਿਸੁਦ੍ਧਸਮੁਜ੍ਜਲਾਯ ਗੁਣਵਿਭੂਤਿਯਾ. ਦ੍ਵੇ ਛਦ੍ਦਨ੍ਤਨਾਗਰਾਜਾਨੋ ਵਿਯ ਮਹਾਨੁਭਾਵਤਾਯ. ਦ੍ਵੇ ਸੀਹਾ ਵਿਯ ਤੇਜੁਸ੍ਸਦਤਾਯ. ਦ੍ਵੇ ਬ੍ਯਗ੍ਘਾ ਵਿਯ ਅਨੋਲੀਨਵੁਤ੍ਤਿਤਾਯ. ਸਬ੍ਬਪਾਲਿਫੁਲ੍ਲਮੇਵਾਤਿ ਸਬ੍ਬਮੇਵ ਸਮਨ੍ਤਤੋ ਵਿਕਸਿਤਂ.

੩੩੩. ਕਥਾ ਉਪਚਰਤਿ ਪਵਤ੍ਤਤਿ ਏਤ੍ਥਾਤਿ ਕਥਾਉਪਚਾਰੋ, ਸਵਨੂਪਚਾਰੋ ਪਦੇਸੋ, ਤਂ ਕਥਾਉਪਚਾਰਂ. ਰਮਣੀਯਮੇਵ ਰਾਮਣੇਯ੍ਯਕਂ. ਉਜ੍ਜਙ੍ਗਲੇਤਿ ਲੂਖਪਦੇਸੇ ਕਠਿਨਪਦੇਸੇ. ਦੋਸੇਹਿ ਇਤਾ ਅਪਗਤਾਤਿ ਦੋਸਿਨਾ ਤ-ਕਾਰਸ੍ਸ ਨ-ਕਾਰਂ ਕਤ੍ਵਾ. ਦਿਬ੍ਬਾ ਮਞ੍ਞੇ ਗਨ੍ਧਾਤਿ ਦੇਵਲੋਕੇ ਗਨ੍ਧਾ ਵਿਯ. ਦਿਵਿ ਭਵਾਤਿ ਦਿਬ੍ਬਾ. ਦ੍ਵੇ ਥੇਰਾਤਿ ਸਾਰਿਪੁਤ੍ਤਤ੍ਥੇਰਆਨਨ੍ਦਤ੍ਥੇਰਾ. ਆਨਨ੍ਦਤ੍ਥੇਰੋ ਤਾਵ ਮਮਾਯਤੁ ਅਖੀਣਾਸਵਭਾਵਤੋ, ਸਾਰਿਪੁਤ੍ਤਤ੍ਥੇਰੋ ਕਥਨ੍ਤਿ? ਨ ਇਦਂ ਮਮਾਯਨਂ ਗੇਹਸ੍ਸਿਤਪੇਮਵਸੇਨ, ਅਥ ਖੋ ਗੁਣਭਤ੍ਤਿਵਸੇਨਾਤਿ ਨਾਯਂ ਦੋਸੋ.

ਅਨੁਮਤਿਯਾ ਪੁਚ੍ਛਾ ਅਨੁਮਤਿਪੁਚ੍ਛਾ, ਅਨੁਮਤਿਗ੍ਗਹਣਤ੍ਥਂ ਪੁਚ੍ਛਨਂ. ਤਤ੍ਥ ਯਸ੍ਮਾ ਅਧਮ੍ਮਿਕਮ੍ਪਿ ਵੁਦ੍ਧਸ੍ਸ ਅਨੁਮਤਿਂ ਇਤਰੋ ਪਟਿਕ੍ਖਿਪਿਤੁਂ ਨ ਲਭਤਿ, ਤੇਨ ਸਾ ਅਨੁਜਾਨਿਤਬ੍ਬਾਵ ਹੋਤਿ, ਤਸ੍ਮਾ ਸਙ੍ਘਖੁਦ੍ਦਕਤੋ ਪਟ੍ਠਾਯ ਅਨੁਮਤਿ ਪੁਚ੍ਛਿਤਬ੍ਬਾ. ਤੇਨਾਹ ‘‘ਅਨੁਮਤਿਪੁਚ੍ਛਾ ਨਾਮੇਸਾ’’ਤਿਆਦਿ. ਖੁਦ੍ਦਕਤੋ ਪਟ੍ਠਾਯਾਤਿ ਕਣਿਟ੍ਠਤੋ ਪਟ੍ਠਾਯ. ਪਟਿਭਾਤਿ ਉਪਟ੍ਠਾਤੀਤਿ ਪਟਿਭਾਨਂ, ਯਥਾਧਿਪ੍ਪੇਤੋ ਅਤ੍ਥੋ, ਤਂ ਪਟਿਭਾਨਂ. ਸਿਖਾਪ੍ਪਤ੍ਤਾ ਵੇਪੁਲ੍ਲਪ੍ਪਤ੍ਤਾ ਨ ਭਵਿਸ੍ਸਤਿ ਪਦੇਸਞਾਣੇ ਠਿਤੇਹਿ ਭਾਸਿਤਤ੍ਤਾ. ਸਿਖਾਪ੍ਪਤ੍ਤਾ ਵੇਪੁਲ੍ਲਪ੍ਪਤ੍ਤਾ ਭਵਿਸ੍ਸਤਿ ਸਬ੍ਬਞ੍ਞੁਤਞ੍ਞਾਣੇਨ ਸਂਸਨ੍ਦਿਤਤ੍ਤਾ. ਵੁਤ੍ਤਮੇਵਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਚ੍ਚਤ੍ਥਿਕਾ ਅਟ੍ਟਿਯਨ੍ਤਿ ਦੁਕ੍ਖਾਯਨ੍ਤਿ ਏਤੇਨਾਤਿ ਅਟ੍ਟੋ, ਵਿਨਿਚ੍ਛਿਤਬ੍ਬਵੋਹਾਰੋ. ਗਾਮਭੋਜਕਨ੍ਤਿ ਯਸ੍ਮਿਂ ਗਾਮੇ ਸੋ ਉਪ੍ਪਨ੍ਨੋ, ਤਂ ਗਾਮਭੋਜਕਂ. ਜਨਪਦਭੋਜਕਨ੍ਤਿ ਯਸ੍ਮਿਂ ਜਨਪਦੇ ਸੋ ਉਪ੍ਪਨ੍ਨੋ, ਤਂ ਜਨਪਦਭੋਜਕਂ. ਮਹਾਵਿਨਿਚ੍ਛਯਅਮਚ੍ਚਨ੍ਤਿ ਯਸ੍ਮਿਂ ਰਜ੍ਜੇ ਸੋ ਜਨਪਦੋ, ਤਸ੍ਸ ਰਾਜਧਾਨਿਯਂ ਮਹਾਵਿਨਿਚ੍ਛਯਅਮਚ੍ਚਂ. ਸੇਨਾਪਤਿਨ੍ਤਿ ਯਸ੍ਸ ਰਞ੍ਞੋ ਸੋ ਅਮਚ੍ਚੋ, ਤਸ੍ਸ ਸੇਨਾਪਤਿਂ. ਤਥਾ ਉਪਰਾਜਨ੍ਤਿ. ਇਦਂ ਪਨੇਤ੍ਥ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ ਉਪਮੇਯ੍ਯਤ੍ਥਾਨੁਰੂਪਤੋਤਿ ਦਟ੍ਠਬ੍ਬਂ. ਅਪਰਾਪਰਂ ਨ ਸਞ੍ਚਰਤਿ ਵਿਨਿਚ੍ਛਯਨਾਰਹੇਨ ਵਿਨਿਚ੍ਛਿਤਭਾਵਤੋ.

ਪਕਟ੍ਠਾਨਂ (ਅ. ਨਿ. ਟੀ. ੨.੪.੨੨) ਉਕ੍ਕਟ੍ਠਾਨਂ ਸੀਲਾਦਿਅਤ੍ਥਾਨਂ ਬੋਧਨਤੋ, ਸਭਾਵਨਿਰੁਤ੍ਤਿਵਸੇਨ ਬੁਦ੍ਧਾਦੀਹਿ ਭਾਸਿਤਤ੍ਤਾ ਚ ਪਕਟ੍ਠਾਨਂ ਵਚਨਪ੍ਪਬਨ੍ਧਾਨਂ ਆਲ਼ੀਤਿ ਪਾਲ਼ਿ, ਪਰਿਯਤ੍ਤਿਧਮ੍ਮੋ. ਪੁਰਿਮਸ੍ਸ ਅਤ੍ਥਸ੍ਸ ਪਚ੍ਛਿਮੇਨ ਅਤ੍ਥੇਨ ਅਨੁਸਨ੍ਧਾਨਂ ਅਨੁਸਨ੍ਧਿ. ਅਤ੍ਥਮੁਖੇਨ ਪਨ ਪਾਲ਼ਿਪਦੇਸਾਨਮ੍ਪਿ ਅਨੁਸਨ੍ਧਿ ਹੋਤਿਯੇਵ, ਸੋ ਚ ਪੁਬ੍ਬਾਪਰਾਨੁਸਨ੍ਧਿ-ਪੁਚ੍ਛਾਨੁਸਨ੍ਧਿ-ਅਜ੍ਝਾਸਯਾਨੁਸਨ੍ਧਿ-ਯਥਾਨੁਸਨ੍ਧਿਵਸੇਨ ਚਤੁਬ੍ਬਿਧੋ. ਤਂਤਂਦੇਸਨਾਨਂ ਪਨ ਪੁਬ੍ਬਾਪਰਸਂਸਨ੍ਦਨਂ ਪੁਬ੍ਬਾਪਰਂ. ਪਾਲ਼ਿਵਸੇਨ ਅਨੁਸਨ੍ਧਿਵਸੇਨ ਪੁਬ੍ਬਾਪਰਵਸੇਨਾਤਿ ਪਚ੍ਚੇਕਂ ਯੋਜੇਤਬ੍ਬਂ. ਉਗ੍ਗਹਿਤਨ੍ਤਿ ਬ੍ਯਞ੍ਜਨਸੋ ਅਤ੍ਥਸੋ ਚ ਉਦ੍ਧਂ ਉਦ੍ਧਂ ਗਹਿਤਂ, ਪਰਿਯਾਪੁਣਨਵਸੇਨ ਚੇਵ ਪਰਿਪੁਚ੍ਛਾਵਸੇਨ ਚ ਹਦਯੇਨ ਗਹਿਤਨ੍ਤਿ ਅਤ੍ਥੋ. ਵਟ੍ਟਦੁਕ੍ਖਨਿਸ੍ਸਰਣਤ੍ਥਿਕੇਹਿ ਸੋਤਬ੍ਬਤੋ ਸੁਤਂ, ਪਰਿਯਤ੍ਤਿਧਮ੍ਮੋ, ਤਂ ਧਾਰੇਤੀਤਿ ਸੁਤਧਰੋ. ਯੋ ਹਿ ਸੁਤਧਰੋ, ਸੁਤਂ ਤਸ੍ਮਿਂ ਪਤਿਟ੍ਠਿਤਂ ਹੋਤਿ ਸੁਪ੍ਪਤਿਟ੍ਠਿਤਂ, ਤਸ੍ਮਾ ਵੁਤ੍ਤਂ ‘‘ਸੁਤਸ੍ਸ ਆਧਾਰਭੂਤੋ’’ਤਿ. ਤੇਨਾਹ ‘‘ਯਸ੍ਸ ਹੀ’’ਤਿਆਦਿ. ਏਕਪਦਂ ਏਕਕ੍ਖਰਮ੍ਪਿ ਅਵਿਨਟ੍ਠਂ ਹੁਤ੍ਵਾ ਸਨ੍ਨਿਚੀਯਤੀਤਿ ਸਨ੍ਨਿਚਯੋ, ਸੁਤਂ ਸਨ੍ਨਿਚਯੋ ਏਤਸ੍ਮਿਨ੍ਤਿ ਸੁਤਸਨ੍ਨਿਚਯੋ. ਅਜ੍ਝੋਸਾਯਾਤਿ ਅਨੁਪਵਿਸਿਤ੍ਵਾ. ਤਿਟ੍ਠਤੀਤਿ ਨ ਮੁਸ੍ਸਤਿ.

ਠਿਤਾ ਪਗੁਣਾਤਿ ਪਗੁਣਾ ਵਾਚੁਗ੍ਗਤਾ. ਨਿਚ੍ਚਲਿਤਨ੍ਤਿ ਅਪਰਿਵਤ੍ਤਿਤਂ. ਸਂਸਨ੍ਦਿਤ੍ਵਾਤਿ ਅਞ੍ਞੇਹਿ ਸਂਸਨ੍ਦਿਤ੍ਵਾ. ਸਮਨੁਗ੍ਗਾਹਿਤ੍ਵਾਤਿ ਪਰਿਪੁਚ੍ਛਾਵਸੇਨ ਅਤ੍ਥਂ ਓਗਾਹੇਤ੍ਵਾ. ਪਬਨ੍ਧਸ੍ਸ ਵਿਬਨ੍ਧਾਭਾਵਤੋ ਗਙ੍ਗਾਸੋਤਸਦਿਸਂ, ‘‘ਭਵਙ੍ਗਸੋਤਸਦਿਸ’’ਨ੍ਤਿ ਵਾ ਪਾਠੋ, ਅਕਿਤ੍ਤਿਮਂ ਸੁਖਪ੍ਪਵਤ੍ਤੀਤਿ ਅਤ੍ਥੋ. ਸੁਤ੍ਤੇਕਦੇਸਸ੍ਸ ਸੁਤ੍ਤਸ੍ਸ ਚ ਵਚਸਾ ਪਰਿਚਯੋ ਇਧ ਨਾਧਿਪ੍ਪੇਤੋ, ਵਗ੍ਗਾਦਿਵਸੇਨ ਪਨ ਅਧਿਪ੍ਪੇਤੋਤਿ ਆਹ ‘‘ਸੁਤ੍ਤਦਸਕ…ਪੇ… ਸਜ੍ਝਾਯਿਤਾ’’ਤਿ, ‘‘ਦਸ ਸੁਤ੍ਤਾਨਿ ਗਤਾਨਿ, ਦਸ ਵਗ੍ਗਾਗਤਾ’’ਤਿਆਦਿਨਾ ਸਲ੍ਲਕ੍ਖੇਤ੍ਵਾ ਵਾਚਾਯ ਸਜ੍ਝਾਯਿਤਾਤਿ ਅਤ੍ਥੋ. ਮਨਸਾ ਅਨੁ ਅਨੁ ਪੇਕ੍ਖਿਤਾ ਭਾਗਸੋ ਨਿਜ੍ਝਾਯਿਤਾ ਚਿਨ੍ਤਿਤਾ ਮਨਸਾਨੁਪੇਕ੍ਖਿਤਾ. ਰੂਪਗਤਂ ਵਿਯ ਪਞ੍ਞਾਯਤੀਤਿ ਰੂਪਗਤਂ ਵਿਯ ਚਕ੍ਖੁਸ੍ਸ ਵਿਭੂਤਂ ਹੁਤ੍ਵਾ ਪਞ੍ਞਾਯਤਿ. ਸੁਪ੍ਪਟਿਵਿਦ੍ਧਾਤਿ ਨਿਜ੍ਜਟਂ ਨਿਗ੍ਗੁਮ੍ਬਂ ਕਤ੍ਵਾ ਸੁਟ੍ਠੁ ਯਾਥਾਵਤੋ ਪਟਿਵਿਦ੍ਧਾ.

ਪਜ੍ਜਤਿ ਅਤ੍ਥੋ ਞਾਯਤਿ ਏਤੇਨਾਤਿ ਪਦਂ, ਤਦੇਵ ਅਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਨ੍ਤਿ ਆਹ ‘‘ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਨਤੋ ਪਦਬ੍ਯਞ੍ਜਨ’’ਨ੍ਤਿ. ਅਕ੍ਖਰਪਾਰਿਪੂਰਿਯਾ ਪਦਬ੍ਯਞ੍ਜਨਸ੍ਸ ਪਰਿਮਣ੍ਡਲਤਾ, ਸਾ ਪਨ ਪਾਰਿਪੂਰੀ ਏਵਂ ਵੇਦਿਤਬ੍ਬਾਤਿ ਆਹ ‘‘ਦਸਵਿਧਬ੍ਯਞ੍ਜਨਬੁਦ੍ਧਿਯੋ ਅਪਰਿਹਾਪੇਤ੍ਵਾ’’ਤਿ. ਅਞ੍ਞਂ ਉਪਾਰਮ੍ਭਕਰਨ੍ਤਿ ਯਥਾਨਿਕ੍ਖਿਤ੍ਤਸੁਤ੍ਤਤੋ ਅਞ੍ਞਂ ਤਸ੍ਸ ਅਨਨੁਲੋਮਕਂ ਸੁਤ੍ਤਂ ਆਹਰਤਿ. ਤਦਤ੍ਥਂ ਓਤਾਰੇਤੀਤਿ ਤਸ੍ਸ ਆਹਟਸੁਤ੍ਤਸ੍ਸੇਵ ਅਤ੍ਥਂ ਵਿਚਾਰੇਤਿ. ਤਸ੍ਸ ਕਥਾ ਅਪਰਿਮਣ੍ਡਲਾ ਨਾਮ ਹੋਤਿ ਅਤ੍ਥਸ੍ਸ ਅਪਰਿਪੁਣ੍ਣਭਾਵਤੋ. ਯਥਾਨਿਕ੍ਖਿਤ੍ਤਸ੍ਸ ਸੁਤ੍ਤਸ੍ਸ ਅਤ੍ਥਸਂਵਣ੍ਣਨਾਵਸੇਨੇਵ ਸੁਤ੍ਤਨ੍ਤਰਮ੍ਪਿ ਆਨੇਨ੍ਤੋ ਬਹਿ ਏਕਪਦਮ੍ਪਿ ਨ ਗਚ੍ਛਤਿ ਨਾਮ. ਅਮਕ੍ਖੇਨ੍ਤੋਤਿ ਅਵਿਨਾਸੇਨ੍ਤੋ. ਤਂ ਤਂ ਅਤ੍ਥਂ ਸੁਟ੍ਠੁ ਵਵਤ੍ਥਿਤਂ ਕਤ੍ਵਾ ਦਸ੍ਸੇਨ੍ਤੋ ਤੁਲਿਕਾਯ ਪਰਿਚ੍ਛਿਨ੍ਦਨ੍ਤੋ ਵਿਯ. ਗਮ੍ਭੀਰਤਰਮਤ੍ਥਂ ਗਮੇਨ੍ਤੋ ਗਮ੍ਭੀਰਮਾਤਿਕਾਯ ਉਦਕਂ ਪੇਸੇਨ੍ਤੋ ਵਿਯ. ਉਤ੍ਤਾਨਮਾਤਿਕਾਯ ਹਿ ਮਰਿਯਾਦਂ ਓਤ੍ਥਰਿਤ੍ਵਾ ਉਦਕਂ ਅਞ੍ਞਥਾ ਗਚ੍ਛੇਯ੍ਯ. ਏਕਂਯੇਵ ਪਦਂ ਅਨੇਕੇਹਿ ਪਰਿਯਾਯੇਹਿ ਪੁਨਪ੍ਪੁਨਂ ਸਂਵਣ੍ਣੇਨ੍ਤੋ ਪਦਂ ਕੋਟ੍ਟੇਨ੍ਤੋ ਸਿਨ੍ਧਵਾਜਾਨੀਯੋ ਵਿਯ. ਸੋ ਹਿ ਵਗ੍ਗਿਤਾਯ ਗਤਿਯਾ ਪਦੇ ਪਦਂ ਕੋਟ੍ਟੇਨ੍ਤੋ ਗਚ੍ਛਤਿ. ਕਥਾਮਗ੍ਗੇਨ ਤਸ੍ਸ ਕਥਾ ਪਰਿਮਣ੍ਡਲਾ ਨਾਮ ਹੋਤਿ ਧਮ੍ਮਤੋ ਅਤ੍ਥਤੋ ਅਨੁਸਨ੍ਧਿਤੋ ਪੁਬ੍ਬਾਪਰਤੋ ਆਚਰਿਯੁਗ੍ਗਹਤੋਤਿ ਸਬ੍ਬਸੋ ਪਰਿਪੁਣ੍ਣਭਾਵਤੋ.

ਅਨੁਪ੍ਪਬਨ੍ਧੇਹੀਤਿ ਵਿਸ੍ਸਟ੍ਠੇਹਿ ਆਸਜ੍ਜਮਾਨੇਹਿ. ਨਾਤਿਸੀਘਂ ਨਾਤਿਸਣਿਕਂ ਨਿਰਨ੍ਤਰਂ ਏਕਰਸਞ੍ਚ ਕਤ੍ਵਾ ਪਰਿਸਾਯ ਅਜ੍ਝਾਸਯਾਨੁਰੂਪਂ ਧਮ੍ਮਂ ਕਥੇਨ੍ਤੋ ਵਿਸ੍ਸਟ੍ਠਾਯ ਕਥਾਯ ਕਥੇਤਿ ਨਾਮ, ਨ ਅਞ੍ਞਥਾਤਿ ਦਸ੍ਸੇਨ੍ਤੋ ‘‘ਯੋ ਭਿਕ੍ਖੂ’’ਤਿਆਦਿਮਾਹ. ਅਰਣਿਂ ਮਨ੍ਥੇਨ੍ਤੋ ਵਿਯ, ਉਣ੍ਹਖਾਦਨੀਯਂ ਖਾਦਨ੍ਤੋ ਵਿਯਾਤਿ ਸੀਘਂ ਸੀਘਂ ਕਥਨਸ੍ਸ ਉਦਾਹਰਣਂ, ਗਹਿਤਂ ਗਹਿਤਮੇਵਾਤਿਆਦਿ ਲਙ੍ਘੇਤ੍ਵਾ ਕਥਨਸ੍ਸ. ਪੁਰਾਣਪਣ੍ਣਨ੍ਤਰੇਸੁ ਹਿ ਪਰਿਪਾਤਿਯਮਾਨਗੋਧਾ ਕਦਾਚਿ ਦਿਸ੍ਸਤਿ, ਏਵਮੇਕਚ੍ਚਸ੍ਸ ਅਤ੍ਥਵਣ੍ਣਨਾ ਕਤ੍ਥਚਿ ਨ ਦਿਸ੍ਸਤਿ. ਓਹਾਯਾਤਿ ਠਪੇਤ੍ਵਾ. ਯੋਪੀਤਿਆਦਿਨਾ ਏਕਰੂਪੇਨ ਕਥਾਯ ਅਕਥਨਂ ਦਸ੍ਸੇਤਿ. ਪੇਤਗ੍ਗਿ ਨਿਜ੍ਝਾਮਤਣ੍ਹਿਕਪੇਤਸ੍ਸ ਮੁਖਤੋ ਨਿਚ੍ਛਰਣਕਅਗ੍ਗਿ. ਵਿਤ੍ਥਾਯਤੀਤਿ ਅਪ੍ਪਟਿਤਾਨਤਮਾਪਜ੍ਜਤਿ. ਕੇਨਚਿ ਰੋਗੇਨ ਦੁਕ੍ਖਂ ਪਤ੍ਤੋ ਵਿਯ ਨਿਤ੍ਥੁਨਨ੍ਤੋ. ਕਨ੍ਦਨ੍ਤੋ ਵਿਯਾਤਿ ਉਕ੍ਕੁਟ੍ਠਿਂ ਕਰੋਨ੍ਤੋ ਵਿਯ. ਅਪ੍ਪਬਨ੍ਧਾ ਨਾਮ ਹੋਤਿ ਸੁਖੇਨ ਅਪ੍ਪਵਤ੍ਤਭਾਵਤੋ. ਆਚਰਿਯੇਹਿ ਦਿਨ੍ਨਨਯੇ ਠਿਤੋਤਿ ਆਚਰਿਯੁਗ੍ਗਹਂ ਅਮੁਞ੍ਚਨ੍ਤੋ, ਯਥਾ ਚ ਆਚਰਿਯਾ ਤਂ ਤਂ ਸੁਤ੍ਤਂ ਸਂਵਣ੍ਣੇਸੁਂ, ਤੇਨੇਵ ਨਯੇਨ ਸਂਵਣ੍ਣੇਨ੍ਤੋਤਿ ਅਤ੍ਥੋ. ਅਚ੍ਛਿਨ੍ਨਧਾਰਂ ਕਤ੍ਵਾਤਿ ‘‘ਨਾਤਿਸੀਘਂ ਨਾਤਿਸਣਿਕ’’ਨ੍ਤਿਆਦਿਨਾ ਹੇਟ੍ਠਾ ਵੁਤ੍ਤਨਯੇਨ ਅਵਿਚ੍ਛਿਨ੍ਨਂ ਕਥਾਪਬਨ੍ਧਂ ਕਤ੍ਵਾ. ਅਨੁਸਯਸਮੁਗ੍ਘਾਤਾਯਾਤਿ ਇਮਿਨਾ ਤਸ੍ਸਾ ਕਥਾਯ ਅਰਹਤ੍ਤਪਰਿਯੋਸਾਨਤਂ ਦਸ੍ਸੇਤਿ. ਏਵਰੂਪੇਨਾਤਿ ਨਯਿਦਂ ਏਕਵਚਨਂ ਤਤ੍ਤਕਵਸੇਨ ਗਹੇਤਬ੍ਬਂ, ਅਥ ਖੋ ਲਕ੍ਖਣੇ ਪਵਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਤਥਾਰੂਪੇਨੇਵ ਭਿਕ੍ਖੁਸਤੇਨ ਭਿਕ੍ਖੁਸਹਸ੍ਸੇਨ ਵਾ’’ਤਿ ਵੁਤ੍ਤਂ. ਪਲ੍ਲਙ੍ਕੇਨਾਤਿ ਪਲ੍ਲਙ੍ਕਪਦੇਸੇਨ, ਪਲ੍ਲਙ੍ਕਾਸਨਨ੍ਤੇਨਾਤਿ ਅਤ੍ਥੋ. ਇਮਿਨਾ ਨਯੇਨਾਤਿ ਵਾਰਨ੍ਤਰਸਾਧਾਰਣਂ ਅਤ੍ਥਂ ਅਤਿਦਿਸਤਿ, ਅਸਾਧਾਰਣਂ ਪਨ ਵਕ੍ਖਤੇਵਾਤਿ.

੩੩੪. ਆਰਮਤਿ ਏਤੇਨਾਤਿ ਆਰਾਮੋ.

੩੩੫. ਧੁਵਸੇਵਨਨ੍ਤਿ ਨਿਯਤਸੇਵਿਤਂ. ਪਾਸਾਦਪਰਿਵੇਣੇਤਿ ਪਾਸਾਦਙ੍ਗਣੇ. ਨਾਭਿਯਾ ਪਤਿਟ੍ਠਿਤਾਨਨ੍ਤਿ ਨਾਭਿਯਾ ਭੂਮਿਯਂ ਪਤਿਟ੍ਠਿਤਾਨਂ. ਅਰਨ੍ਤਰਾਨੀਤਿ ਅਰਵਿਵਰਾਨਿ ਤਂਤਂਅਰਾਨਂ ਵੇਮਜ੍ਝਟ੍ਠਾਨਾਨਿ.

੩੩੬. ਸਮਾਦਿਨ੍ਨਅਰਞ੍ਞਧੁਤਙ੍ਗੋ ਆਰਞ੍ਞਿਕੋ, ਨ ਅਰਞ੍ਞਵਾਸਮਤ੍ਤੇਨ.

੩੩੭. ਨ ਓਸਾਦੇਨ੍ਤੀਤਿ ਨ ਅਵਸਾਦੇਨ੍ਤਿ, ਨ ਅਵਸਾਦਨਾਪੇਕ੍ਖਾ ਅਞ੍ਞਮਞ੍ਞਂ ਪਞ੍ਹਂ ਪੁਚ੍ਛਨ੍ਤੀਤਿ ਅਤ੍ਥੋ. ਪਵਤ੍ਤਿਨੀਤਿ ਪਗੁਣਾ.

੩੩੮. ਲੋਕੁਤ੍ਤਰਾ ਵਿਹਾਰਸਮਾਪਤ੍ਤਿ ਨਾਮ ਥੇਰਸ੍ਸ ਅਰਹਤ੍ਤਫਲਸਮਾਪਤ੍ਤਿਯੋ, ਪਰਿਯਾਯਤੋ ਪਨ ਨਿਰੋਧਸਮਾਪਤ੍ਤਿਪਿ ਵੇਦਿਤਬ੍ਬਾ.

੩੩੯. ਸਾਧੁਕਾਰੋ ਆਨਨ੍ਦਤ੍ਥੇਰਸ੍ਸ ਦਿਨ੍ਨੋ. ਤੇਨਾਹ ਭਗਵਾ ‘‘ਯਥਾ ਤਂ ਆਨਨ੍ਦੋਵ ਸਮ੍ਮਾ ਬ੍ਯਾਕਰਮਾਨੋ ਬ੍ਯਾਕਰੇਯ੍ਯਾ’’ਤਿਆਦਿ. ਸਮ੍ਮਾਤਿ ਸੁਟ੍ਠੁ, ਯਥਾਅਜ੍ਝਾਸਯਨ੍ਤਿ ਅਧਿਪ੍ਪਾਯੋ. ਯੇਨ ਹਿ ਯਂ ਯਥਾਚਿਤ੍ਤਂ ਕਥਿਤਂ, ਤਂ ਸਮ੍ਮਾ ਕਥਿਤਂ ਨਾਮ ਹੋਤਿ. ਸਮ੍ਪਤ੍ਤਵਸੇਨ ਹਿ ਯਥਾਕਾਰੀ ਤਥਾਵਾਦੀ ਸੋਭਤਿ. ਤੇਨਾਹ ‘‘ਅਤ੍ਤਨੋ ਅਨੁਚ੍ਛਵਿਕਮੇਵਾ’’ਤਿਆਦਿ. ਬਹੁਸ੍ਸੁਤੋ ਭਿਕ੍ਖੁ ਤਤ੍ਥ ਤਤ੍ਥ ਸੁਤ੍ਤੇ ਸੀਲਾਦੀਨਂ ਆਗਤਟ੍ਠਾਨੇ ਤੇਸਂ ਸੁਵਿਦਿਤਤ੍ਤਾ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੋ ਤਾਨਿ ਪਰਿਪੂਰੇਤੀਤਿ ਆਹ ‘‘ਸੀਲਸ੍ਸ ਆਗਤਟ੍ਠਾਨੇ’’ਤਿਆਦਿ. ਮਗ੍ਗਾਦਿਪਸਵਨਾਯ ਵਿਪਸ੍ਸਨਾਗਬ੍ਭਂ ਗਣ੍ਹਾਪੇਤ੍ਵਾ ਪਰਿਪਾਕਂ ਗਮੇਤ੍ਵਾਤਿ ਅਤ੍ਥੋ.

੩੪੦. ‘‘ਏਸੇਵ ਨਯੋ’’ਤਿ ਅਤਿਦੇਸਵਸੇਨ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਆਯਸ੍ਮਾ ਹਿ ਰੇਵਤੋ’’ਤਿਆਦਿਮਾਹ.

੩੪੨. ਅਪਰੇਪਿ ਨਾਨਪ੍ਪਕਾਰੇ ਕਿਲੇਸੇਤਿ ਅਪਰੇਪਿ ਨਾਨਪ੍ਪਕਾਰੇ ਦੋਸਮੋਹਾਦਿਕਿਲੇਸੇ. ਧੁਨਿਤ੍ਵਾਤਿ ਵਿਧਮੇਤ੍ਵਾ.

੩੪੩. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਵਂ ਬ੍ਯਾਕਾਸੀਤਿ ਸਮ੍ਬਨ੍ਧੋ. ਸਕਲਮ੍ਪਿ ਚਕ੍ਖੁਵਿਞ੍ਞਾਣਵੀਥਿਗਤਂ ਚਿਤ੍ਤਂ ਚਕ੍ਖੁਵਿਞ੍ਞਾਣਨ੍ਤਿ ਅਗ੍ਗਹੇਤ੍ਵਾ ਚਕ੍ਖੁਸਨ੍ਨਿਸ੍ਸਿਤਮੇਵ ਪਨ ਵਿਞ੍ਞਾਣਂ ਚਕ੍ਖੁਵਿਞ੍ਞਾਣਂ, ਤਦਨਨ੍ਤਰਂ ਸਮ੍ਪਟਿਚ੍ਛਨਂ, ਤਦਨਨ੍ਤਰਂ ਸਨ੍ਤੀਰਣਨ੍ਤਿਆਦਿਨਾ ਸਣ੍ਹਂ ਸੁਖੁਮਂ ਅਤਿਇਤ੍ਤਰਖਣਵਨ੍ਤਂ ਚਿਤ੍ਤਨ੍ਤਰਂ ਚਿਤ੍ਤਨਾਨਤ੍ਤਂ. ਖਨ੍ਧਾਦੀਨਞ੍ਚ ਨਾਨਤ੍ਤਸਙ੍ਖਾਤਂ ਖਨ੍ਧਨ੍ਤਰਾਦਿ. ਪਥਵੀਕਸਿਣੇ ਪਠਮਜ੍ਝਾਨਂ ਸਮਾਪਜ੍ਜਿਤ੍ਵਾ ਤਥੇਵ ਤਤਿਯਂ ਝਾਨਨ੍ਤਿਆਦਿਨਾ ਆਰਮ੍ਮਣਂ ਅਨੁਕ੍ਕਮਿਤ੍ਵਾ ਝਾਨਸ੍ਸੇਵ ਏਕਨ੍ਤਰਿਕਭਾਵੇਨ ਉਕ੍ਕਮਨਂ ਝਾਨੋਕ੍ਕਨ੍ਤਿਕਂ ਨਾਮ. ਪਥਵੀਕਸਿਣੇ ਪਠਮਂ ਝਾਨਂ ਸਮਾਪਜ੍ਜਿਤ੍ਵਾ ਪੁਨ ਤਦੇਵ ਤੇਜੋਕਸਿਣੇਤਿਆਦਿਨਾ ਝਾਨਂ ਅਨੁਕ੍ਕਮਿਤ੍ਵਾ ਆਰਮ੍ਮਣਸ੍ਸੇਵ ਏਕਨ੍ਤਰਿਕਭਾਵੇਨ ਉਕ੍ਕਮਨਂ ਆਰਮ੍ਮਣੋਕ੍ਕਨ੍ਤਿਕਂ ਨਾਮ. ‘‘ਪਠਮਜ੍ਝਾਨਂ ਪਞ੍ਚਙ੍ਗਿਕ’’ਨ੍ਤਿਆਦਿਨਾ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਂ ਦੁਵਙ੍ਗਿਕਨ੍ਤਿ ਝਾਨਙ੍ਗਮਤ੍ਤਸ੍ਸੇਵ ਵਵਤ੍ਥਾਪਨਂ ਅਙ੍ਗਵਵਤ੍ਥਾਨਂ. ‘‘ਇਦਂ ਪਥਵੀਕਸਿਣਂ…ਪੇ… ਇਦਂ ਓਦਾਤਕਸਿਣ’’ਨ੍ਤਿ ਆਰਮ੍ਮਣਮਤ੍ਤਸ੍ਸੇਵ ਵਵਤ੍ਥਾਪਨਂ ਆਰਮ੍ਮਣਵਵਤ੍ਥਾਨਂ. ਪਥਵੀਕਸਿਣੇ ਪਠਮਂ ਝਾਨਂ ਸਮਾਪਜ੍ਜਿਤ੍ਵਾ ਤਤ੍ਥੇਵ ਇਤਰੇਸਮ੍ਪਿ ਸਮਾਪਜ੍ਜਨਂ ਅਙ੍ਗਸਙ੍ਕਨ੍ਤਿ. ਪਥਵੀਕਸਿਣੇ ਪਠਮਂ ਝਾਨਂ ਸਮਾਪਜ੍ਜਿਤ੍ਵਾ ਤਦੇਵ ਆਪੋਕਸਿਣੇਤਿ ਏਵਂ ਸਬ੍ਬਕਸਿਣੇਸੁ ਏਕਸ੍ਸੇਵ ਝਾਨਸ੍ਸ ਸਮਾਪਜ੍ਜਨਂ ਆਰਮ੍ਮਣਸਙ੍ਕਨ੍ਤਿ. ਏਕਤੋਵਡ੍ਢਨਂ ਉਭਤੋਵਡ੍ਢਨਨ੍ਤਿ ਇਦਂ ਖਨ੍ਧਾਦਿਦੇਸਨਾਯਂ ਲਬ੍ਭਤਿ. ਅਭਿਧਮ੍ਮਭਾਜਨੀਯੇ ਹਿ ਵੇਦਨਾਕ੍ਖਨ੍ਧਂ ਭਾਜੇਨ੍ਤੋ ਭਗਵਾ ਤਿਕੇ ਗਹੇਤ੍ਵਾ ਦੁਕੇਸੁ ਪਕ੍ਖਿਪਿ, ਦੁਕੇ ਗਹੇਤ੍ਵਾ ਤਿਕੇਸੁ ਪਕ੍ਖਿਪਿ, ਇਦਂ ਏਕਤੋਵਡ੍ਢਨਂ. ਤਿਕੇ ਚ ਦੁਕੇ ਚ ਉਭਤੋਵਡ੍ਢਨਨੀਹਾਰੇਨ ਕਥੇਸਿ, ਇਦਂ ਉਭਤੋਵਡ੍ਢਨਂ. ਏਵਂ ਸੇਸਖਨ੍ਧੇਸੁ ਧਾਤਾਯਤਨਾਦੀਸੁ ਚ ਯਥਾਰਹਂ ਵਿਭਙ੍ਗਪ੍ਪਕਰਣੇ (ਵਿਭ. ੩੨-੩੩; ੧੫੫-੧੫੬, ੧੮੩-੧੮੪) ਅਭਿਧਮ੍ਮਭਾਜਨੀਯੇ ਆਗਤਨਯੇਨ ਵੇਦਿਤਬ੍ਬਂ. ਤੇਨਾਹ ‘‘ਆਭਿਧਮ੍ਮਿਕਧਮ੍ਮਕਥਿਕਸ੍ਸੇਵ ਪਾਕਟ’’ਨ੍ਤਿ. ਖਨ੍ਧਾਦੀਸੁ ਸਭਾਵਧਮ੍ਮੇਸੁ ਤੀਸੁ ਲਕ੍ਖਣੇਸੁ ਪਞ੍ਞਤ੍ਤਿਯਂ ਸਮਯਨ੍ਤਰੇਸੁ ਚ ਕੋਸਲ੍ਲਾਭਾਵਤੋ ਅਯਂ ਸਕਵਾਦੋ ਅਯਂ ਪਰਵਾਦੋਤਿ ਨ ਜਾਨਾਤਿ. ਤਤੋ ਏਵ ਸਕਵਾਦਂ…ਪੇ… ਧਮ੍ਮਨ੍ਤਰਂ ਵਿਸਂਵਾਦੇਤਿ. ਖਨ੍ਧਾਦੀਸੁ ਪਨ ਕੁਸਲਤਾਯ ਆਭਿਧਮ੍ਮਿਕੋ ਸਕਵਾਦਂ…ਪੇ… ਨ ਵਿਸਂਵਾਦੇਤਿ.

੩੪੪. ਚਿਤ੍ਤਂ ਅਤ੍ਤਨੋ ਵਸੇ ਵਤ੍ਤੇਤੁਂ ਸਕ੍ਕੋਤਿ ਪਟਿਸਙ੍ਖਾਨਭਾਵਨਾਬਲੇਹਿ ਪਰਿਗ੍ਗਣ੍ਹਨਸਮਤ੍ਥਤ੍ਤਾ. ਇਦਾਨਿ ਤਮਤ੍ਥਂ ਬ੍ਯਤਿਰੇਕਤੋ ਅਨ੍ਵਯਤੋ ਚ ਵਿਭਾਵੇਤੁਂ ‘‘ਦੁਪ੍ਪਞ੍ਞੋ ਹੀ’’ਤਿਆਦਿਮਾਹ. ਤਤ੍ਥ ਸਬ੍ਬਾਨਸ੍ਸਾਤਿ ਸਬ੍ਬਾਨਿ ਅਸ੍ਸ. ਵਿਸੇਵਿਤਵਿਪ੍ਫਨ੍ਦਿਤਾਨੀਤਿ ਕਿਲੇਸਵਿਸੂਕਾਯਿਕਾਨਿ ਚੇਵ ਦੁਚ੍ਚਰਿਤਵਿਪ੍ਫਨ੍ਦਿਤਾਨਿ ਚ. ਭਞ੍ਜਿਤ੍ਵਾਤਿ ਮਦ੍ਦਿਤ੍ਵਾ. ਬਹੀਤਿ ਕਮ੍ਮਟ੍ਠਾਨਤੋ ਬਹਿ ਪੁਥੁਤ੍ਤਾਰਮ੍ਮਣੇ.

੩੪੫. ਪਰਿਯਾਯੇਨਾਤਿ ਏਤ੍ਥ ਪਰਿਯਾਯ-ਸਦ੍ਦੋ ‘‘ਅਤ੍ਥਿ ਖ੍ਵੇਸ, ਬ੍ਰਾਹ੍ਮਣ, ਪਰਿਯਾਯੋ’’ਤਿਆਦੀਸੁ (ਅ. ਨਿ. ੮.੧੧; ਪਾਰਾ. ੩-੯) ਵਿਯ ਕਾਰਣਤ੍ਥੋਤਿ ਆਹ ‘‘ਸੋਭਨਕਾਰਣਂ ਅਤ੍ਥੀ’’ਤਿ. ਯਦਿ ਭਗਵਾ – ‘‘ਇਧ, ਸਾਰਿਪੁਤ੍ਤ, ਭਿਕ੍ਖੁ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ’’ਤਿਆਦਿਨਾ ਅਤ੍ਤਨੋ ਮਹਾਬੋਧਿਪਲ੍ਲਙ੍ਕਂ ਸਨ੍ਧਾਯਾਹ, ਏਵਂ ਸਨ੍ਤੇ ਸਮ੍ਮਾਸਮ੍ਬੁਦ੍ਧੇਹੇਵ ਸਙ੍ਘਾਰਾਮੋ ਸੋਭੇਤਬ੍ਬੋ, ਨ ਅਞ੍ਞੇਹੀਤਿ ਆਪਨ੍ਨਨ੍ਤਿ ਆਹ ‘‘ਅਪਿਚ ਪਚ੍ਛਿਮਂ ਜਨਤ’’ਨ੍ਤਿਆਦਿ. ਨਿਬ੍ਬਾਨਤ੍ਥਾਯ ਪਟਿਪਤ੍ਤਿਸਾਰਂ ਏਤਸ੍ਸਾਤਿ ਪਟਿਪਤ੍ਤਿਸਾਰੋ, ਤਂ ਪਟਿਪਤ੍ਤਿਸਾਰਂ. ਨਿਪ੍ਪਰਿਯਾਯੇਨੇਵਾਤਿ ਕੇਨਚਿ ਪਰਿਯਾਯੇਨ ਲੇਸੇਨ ਵਿਨਾ ਮੁਖ੍ਯੇਨ ਨਯੇਨੇਵ. ਯੋ ‘‘ਅਰਹਤ੍ਤਂ ਅਪ੍ਪਤ੍ਵਾ ਨ ਵੁਟ੍ਠਹਿਸ੍ਸਾਮੀ’’ਤਿ ਦਲ਼੍ਹਸਮਾਦਾਨਂ ਕਤ੍ਵਾ ਨਿਸਿਨ੍ਨੋ ਤਂ ਅਧਿਗਨ੍ਤ੍ਵਾਵ ਉਟ੍ਠਹਤਿ. ਏਵਰੂਪੇਨ ਇਦਂ ਗੋਸਿਙ੍ਗਸਾਲਵਨਂ ਸੋਭਤਿ, ਸਾਸਨੇ ਸਬ੍ਬਾਰਮ੍ਭਾਨਂ ਤਦਤ੍ਥਤ੍ਤਾਤਿ ਅਤ੍ਥੋ. ਆਸਵਕ੍ਖਯਾਵਹਂ ਪਟਿਪਤ੍ਤਿਂ ਆਰਭਿਤ੍ਵਾ ਆਸਵਕ੍ਖਯੇਨੇਵ ਦੇਸਨਾਯ ਪਰਿਯੋਸਾਪਿਤਤ੍ਤਾ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸੀਤਿ.

ਮਹਾਗੋਸਿਙ੍ਗਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.