੩. ਵਮ੍ਮਿਕਸੁਤ੍ਤਵਣ੍ਣਨਾ

੨੪੯. ਪਿਯਵਚਨਨ੍ਤਿ ਪਿਯਸਮੁਦਾਚਾਰੋ. ਵਿਞ੍ਞੁਜਾਤਿਕਾ ਹਿ ਪਰਂ ਪਿਯੇਨ ਸਮੁਦਾਚਰਨ੍ਤਾ ‘‘ਭਵ’’ਨ੍ਤਿ ਵਾ, ‘‘ਦੇਵਾਨਂ ਪਿਯੋ’’ਤਿ ਵਾ, ‘‘ਆਯਸ੍ਮਾ’’ਤਿ ਵਾ ਸਮੁਦਾਚਰਨ੍ਤਿ, ਤਸ੍ਮਾ ਸਮ੍ਮੁਖਾ ਸਮ੍ਬੋਧਨਵਸੇਨ ‘‘ਆਵੁਸੋ’’ਤਿ, ਤਿਰੋਕ੍ਖਂ ‘‘ਆਯਸ੍ਮਾ’’ਤਿ ਅਯਮ੍ਪਿ ਸਮੁਦਾਚਾਰੋ. ਮਹਾਕਸ੍ਸਪਉਰੁਵੇਲਕਸ੍ਸਪਾਦਯੋ ਅਞ੍ਞੇਪਿ ਕਸ੍ਸਪਨਾਮਕਾ ਅਤ੍ਥੀਤਿ ‘‘ਕਤਰਸ੍ਸ ਕਸ੍ਸਪਸ੍ਸਾ’’ਤਿ ਪੁਚ੍ਛਨ੍ਤਿ. ਰਞ੍ਞਾਤਿ ਕੋਸਲਰਞ੍ਞਾ. ‘‘ਸਞ੍ਜਾਨਿਂਸੂ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਅਯਂ ਪਨਾ’’ਤਿਆਦਿ ਆਰਦ੍ਧਂ. ਅਸ੍ਸਾਤਿ ਕੁਮਾਰਕਸ੍ਸਪਸ੍ਸ, ‘‘ਸਞ੍ਜਾਨਿਂਸੂ’’ਤਿ ਵੁਤ੍ਤਸਞ੍ਜਾਨਨਸ੍ਸ ਵਾ. ਪੁਞ੍ਞਾਨਿ ਕਰੋਨ੍ਤੋਤਿ ਕਪ੍ਪਸਤਸਹਸ੍ਸਂ ਦੇਵੇਸੁ ਚ ਮਨੁਸ੍ਸੇਸੁ ਚ ਨਿਬ੍ਬਤ੍ਤਿਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਭਾਵੇਨ੍ਤੋ. ਓਸਕ੍ਕਨ੍ਤੇਤਿ ਪਰਿਹਾਯਮਾਨੇ. ਪਠਮਨ੍ਤਿ ਕੁਮਾਰਿਕਾਕਾਲੇ. ਸਤ੍ਥਾ ਉਪਾਲਿਤ੍ਥੇਰਂ ਪਟਿਚ੍ਛਾਪੇਸਿ ਤਂ ਅਧਿਕਰਣਂ ਵਿਨਯਕਮ੍ਮੇਨੇਵਸ੍ਸਾ ਭਿਕ੍ਖੁਨਿਯਾ ਪਬ੍ਬਜ੍ਜਾਯ ਅਰੋਗਭਾਵਂ.

ਪਞ੍ਞਤ੍ਤਿਵਿਭਾਵਨਾਤਿ ‘‘ਅਨ੍ਧਵਨ’’ਨ੍ਤ੍ਵੇਵ ਪਞ੍ਞਾਯਮਾਨਸ੍ਸ ਵਿਭਾਵਨਾ. ਓਲੀਯਤੀਤਿ ਸਙ੍ਕੁਚਤਿ ਸਣਿਕਂ ਵਤ੍ਤਤਿ. ਭਾਣਕੋਤਿ ਸਰਭਾਣਕੋ. ਯਂ ਅਤ੍ਥਿ, ਤਂ ਗਹੇਤ੍ਵਾਤਿ ਇਦਾਨਿ ਪਰਿਯੇਸਿਤਬ੍ਬਟ੍ਠਾਨਂ ਨਤ੍ਥਿ, ਯਥਾਗਤਂ ਪਨ ਯਂ ਅਤ੍ਥਿ, ਤਂ ਗਹੇਤ੍ਵਾ. ਬਲਵਗੁਣੇਤਿ ਅਧਿਮਤ੍ਤਗੁਣੇ. ਕਸ੍ਸਪਭਗਵਤੋ ਕਾਲੇ ਨਿਰੁਲ਼੍ਹਸਮਞ੍ਞਾਵਸੇਨ ਵਚਨਸਨ੍ਤਤਿਯਾ ਅਵਿਚ੍ਛੇਦੇਨ ਚ ਇਮਸ੍ਮਿਮ੍ਪਿ ਬੁਦ੍ਧੁਪ੍ਪਾਦੇ ਤਂ ‘‘ਅਨ੍ਧਵਨ’’ਨ੍ਤ੍ਵੇਵ ਪਞ੍ਞਾਯਿਤ੍ਥ, ਉਪਰੂਪਰਿਵਡ੍ਢਮਾਨਾਯ ਪਥਵਿਯਾ ਉਪਰਿ ਰੁਕ੍ਖਗਚ੍ਛਾਦੀਸੁ ਸਞ੍ਜਾਯਨ੍ਤੇਸੁਪੀਤਿ. ਸੇਕ੍ਖਪਟਿਪਦਨ੍ਤਿ ਸੇਕ੍ਖਭਾਵਾਵਹਂ ਵਿਸੁਦ੍ਧਿਪਟਿਪਤ੍ਤਿਂ.

ਅਞ੍ਞਤਰ-ਸਦ੍ਦੋ ਅਪਾਕਟੇ ਵਿਯ ਪਾਕਟੇਪਿ ਵਤ੍ਤਤਿ ਏਕ-ਸਦ੍ਦੇਨ ਸਮਾਨਤ੍ਥਤ੍ਤਾਤਿ ਦਸ੍ਸੇਤੁਂ ‘‘ਅਭਿਜਾਨਾਤੀ’’ਤਿਆਦਿ ਵੁਤ੍ਤਂ. ਭਯਭੇਰਵਦਸ੍ਸਿਤਮ੍ਪਿ ਅਭਿਕ੍ਕਨ੍ਤ-ਸਦ੍ਦਸ੍ਸ ਅਤ੍ਥੁਦ੍ਧਾਰਂ ਇਧ ਦਸ੍ਸੇਨ੍ਤੋ ਏਵਂ ਹੇਟ੍ਠਾ ਤਤ੍ਥ ਤਤ੍ਥ ਕਤਾ ਅਤ੍ਥਸਂਵਣ੍ਣਨਾ ਪਰਤੋ ਤਸ੍ਮਿਂ ਤਸ੍ਮਿਂ ਸੁਤ੍ਤਪਦੇਸੇ ਯਥਾਰਹਂ ਵਤ੍ਤਬ੍ਬਾਤਿ ਨਯਦਸ੍ਸਨਂ ਕਰੋਤਿ. ਕਞ੍ਚਨਸਨ੍ਨਿਭਤ੍ਤਚਤਾ ਸੁਵਣ੍ਣਵਣ੍ਣਗ੍ਗਹਣੇਨ ਗਹਿਤਾਤਿ ਅਧਿਪ੍ਪਾਯੇਨਾਹ ‘‘ਛਵਿਯ’’ਨ੍ਤਿ. ਛਵਿਗਤਾ ਪਨ ਵਣ੍ਣਧਾਤੁ ਏਵ ‘‘ਸੁਵਣ੍ਣਵਣ੍ਣੋ’’ਤਿ ਏਤ੍ਥ ਵਣ੍ਣਗ੍ਗਹਣੇਨ ਗਹਿਤਾਤਿ ਅਪਰੇ. ਵਣ੍ਣੀਯਤਿ ਕਿਤ੍ਤੀਯਤਿ ਉਗ੍ਘੋਸਨਨ੍ਤਿ ਵਣ੍ਣੋ, ਥੁਤਿ. ਵਣ੍ਣੀਯਤਿ ਅਸਙ੍ਕਰਤੋ ਵਵਤ੍ਥਪੀਯਤੀਤਿ ਵਣ੍ਣੋ, ਕੁਲਵਗ੍ਗੋ. ਵਣ੍ਣੀਯਤਿ ਫਲਂ ਏਤੇਨ ਯਥਾਸਭਾਵਤੋ ਵਿਭਾਵੀਯਤੀਤਿ ਵਣ੍ਣੋ, ਕਾਰਣਂ. ਵਣ੍ਣਨਂ ਦੀਘਰਸ੍ਸਾਦਿਵਸੇਨ ਸਣ੍ਠਹਨਨ੍ਤਿ ਵਣ੍ਣੋ, ਸਣ੍ਠਾਨਂ. ਵਣ੍ਣੀਯਤਿ ਅਣੁਮਹਨ੍ਤਾਦਿਵਸੇਨ ਪਮੀਯਤੀਤਿ ਵਣ੍ਣੋ, ਪਮਾਣਂ. ਵਣ੍ਣੇਤਿ ਵਿਕਾਰਮਾਪਜ੍ਜਮਾਨਂ ਹਦਯਙ੍ਗਤਭਾਵਂ ਪਕਾਸੇਤੀਤਿ ਵਣ੍ਣੋ, ਰੂਪਾਯਤਨਂ. ਏਵਂ ਤੇਨ ਤੇਨ ਪਵਤ੍ਤਿਨਿਮਿਤ੍ਤੇਨ ਵਣ੍ਣ-ਸਦ੍ਦਸ੍ਸ ਤਸ੍ਮਿਂ ਤਸ੍ਮਿਂ ਅਤ੍ਥੇ ਪਵਤ੍ਤਿ ਵੇਦਿਤਬ੍ਬਾ.

ਅਨਵਸੇਸਤ੍ਤਂ ਸਕਲਤਾ ਕੇਵਲਤਾ. ਕੇਵਲਕਪ੍ਪਾਤਿ ਏਤ੍ਥ ਕੇਚਿ ਈਸਂ ਅਸਮਤ੍ਤਾ ਕੇਵਲਾ ਕੇਵਲਕਪ੍ਪਾਤਿ ਵਦਨ੍ਤਿ, ਏਵਂ ਸਤਿ ਅਨਵਸੇਸਤ੍ਥੋ ਏਵ ਕੇਵਲ-ਸਦ੍ਦੋ ਸਿਯਾ. ਅਨਤ੍ਥਨ੍ਤਰੇਨ ਪਨ ਕਪ੍ਪ-ਸਦ੍ਦੇਨ ਪਦਵਡ੍ਢਨਂ ਕਤ੍ਵਾ ਕੇਵਲਾ ਏਵ ਕੇਵਲਕਪ੍ਪਾ. ਤਥਾ ਵਾ ਕਪ੍ਪਨੀਯਤ੍ਤਾ ਪਞ੍ਞਪੇਤਬ੍ਬਤ੍ਤਾ ਕੇਵਲਕਪ੍ਪਾ. ਯੇਭੁਯ੍ਯਤਾ ਬਹੁਲਭਾਵੋ. ਅਬ੍ਯਾਮਿਸ੍ਸਤਾ ਵਿਜਾਤਿਯੇਨ ਅਸਙ੍ਕਰੋ ਸੁਦ੍ਧਤਾ. ਅਨਤਿਰੇਕਤਾ ਤਂਮਤ੍ਤਤਾ ਵਿਸੇਸਾਭਾਵੋ. ਕੇਵਲਕਪ੍ਪਨ੍ਤਿ ਕੇਵਲਂ ਦਲ਼੍ਹਂ ਕਤ੍ਵਾਤਿ ਅਤ੍ਥੋ. ਕੇਵਲਂ ਵੁਚ੍ਚਤਿ ਨਿਬ੍ਬਾਨਂ ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ. ਤੇਨਾਹ ‘‘ਵਿਸਂਯੋਗਾਦਿਅਨੇਕਤ੍ਥੋ’’ਤਿ. ਕੇਵਲਂ ਏਤਸ੍ਸ ਅਧਿਗਤਂ ਅਤ੍ਥੀਤਿ ਕੇਵਲੀ, ਸਚ੍ਛਿਕਤਨਿਰੋਧੋ ਖੀਣਾਸਵੋ.

ਕਪ੍ਪ-ਸਦ੍ਦੋ ਪਨਾਯਂ ਸਉਪਸਗ੍ਗੋ ਅਨੁਪਸਗ੍ਗੋ ਚਾਤਿ ਅਧਿਪ੍ਪਾਯੇਨ ਓਕਪ੍ਪਨੀਯਪਦੇ ਲਬ੍ਭਮਾਨਂ ਓਕਪ੍ਪਸਦ੍ਦਮਤ੍ਤਂ ਨਿਦਸ੍ਸੇਤਿ, ਅਞ੍ਞਥਾ ਕਪ੍ਪ-ਸਦ੍ਦਸ੍ਸ ਅਤ੍ਥੁਦ੍ਧਾਰੇ ਓਕਪ੍ਪਨੀਯਪਦਂ ਅਨਿਦਸ੍ਸਨਮੇਵ ਸਿਯਾ. ਸਮਣਕਪ੍ਪੇਹੀਤਿ ਵਿਨਯਸਿਦ੍ਧੇਹਿ ਸਮਣਵੋਹਾਰੇਹਿ. ਨਿਚ੍ਚਕਪ੍ਪਨ੍ਤਿ ਨਿਚ੍ਚਕਾਲਂ. ਪਞ੍ਞਤ੍ਤੀਤਿ ਨਾਮਂ. ਨਾਮਞ੍ਹੇਤਂ ਤਸ੍ਸ ਆਯਸ੍ਮਤੋ, ਯਦਿਦਂ ਕਪ੍ਪੋਤਿ. ਕਪ੍ਪਿਤਕੇਸਮਸ੍ਸੂਤਿ ਕਤ੍ਤਰਿਕਾਯ ਛੇਦਿਤਕੇਸਮਸ੍ਸੁ. ਦ੍ਵਙ੍ਗੁਲਕਪ੍ਪੋਤਿ ਮਜ੍ਝਨ੍ਹਿਕਵੇਲਾਯ ਵੀਤਿਕ੍ਕਨ੍ਤਾਯ ਦ੍ਵਙ੍ਗੁਲਤਾਵਿਕਪ੍ਪੋ. ਲੇਸੋਤਿ ਅਪਦੇਸੋ. ਅਨਵਸੇਸਂ ਫਰਿਤੁਂ ਸਮਤ੍ਥਸ੍ਸਪਿ ਓਭਾਸਸ੍ਸ ਕੇਨਚਿ ਕਾਰਣੇਨ ਏਕਦੇਸਫਰਣਮ੍ਪਿ ਸਿਯਾ, ਅਯਂ ਪਨ ਸਬ੍ਬਸੋਵ ਫਰੀਤਿ ਦਸ੍ਸੇਤੁਂ ਸਮਨ੍ਤਤ੍ਥੋ ਕਪ੍ਪ-ਸਦ੍ਦੋ ਗਹਿਤੋਤਿ ਆਹ ‘‘ਅਨਵਸੇਸਂ ਸਮਨ੍ਤਤੋ’’ਤਿ.

ਸਮਣਸਞ੍ਞਾਸਮੁਦਾਚਾਰੇਨਾਤਿ ‘‘ਅਹਂ ਸਮਣੋ’’ਤਿ ਏਵਂ ਉਪ੍ਪਨ੍ਨਸਞ੍ਞਾਸਮੁਟ੍ਠਿਤੇਨ ਸਮੁਦਾਚਾਰੇਨ, ਤਨ੍ਨਿਮਿਤ੍ਤੇਨ ਵਾ ਤਬ੍ਬੋਹਾਰੇਨ. ਪੁਬ੍ਬਯੋਗੇਤਿ ਪੁਬ੍ਬਯੋਗਕਥਾਯਂ. ਪਪਞ੍ਚੋ ਏਸਾਤਿ ਏਸੋ ਤੁਮ੍ਹੇਸੁ ਆਗਤੇਸੁ ਯਥਾਪਵਤ੍ਤੋ ਪਟਿਸਨ੍ਥਾਰੋ ਕਥਾਸਮੁਦਾਚਾਰੋ ਚ ਅਮ੍ਹਾਕਂ ਪਪਞ੍ਚੋ. ਏਤ੍ਤਕਮ੍ਪਿ ਅਕਤ੍ਵਾ ਸਮਣਧਮ੍ਮਮੇਵ ਕਰੋਮਾਤਿ ਅਧਿਪ੍ਪਾਯੋ.

ਅਰਿਯਭੂਮਿਂ ਪਤ੍ਤੋਤਿ ਅਨਾਗਾਮਿਫਲਂ ਅਧਿਗਤੋ. ਪਕ੍ਕੁਸਾਤਿਕੁਲਪੁਤ੍ਤਂ ਸਨ੍ਧਾਯ ਵਦਤਿ. ਵਿਭਜਿਤ੍ਵਾਤਿ ਵਿਭਾਗਂ ਕਤ੍ਵਾ. ਤੁਰਿਤਾਲਪਨਵਸੇਨਾਤਿ ਤੁਰਿਤਂ ਆਲਪਨਵਸੇਨ. ਤੇਨ ਦੁਲ੍ਲਭੋ ਅਯਂ ਸਮਣੋ, ਤਸ੍ਮਾ ਸੀਘਮਸ੍ਸ ਪਞ੍ਹੋ ਕਥੇਤਬ੍ਬੋ, ਇਮਿਨਾ ਚ ਸੀਘਂ ਗਨ੍ਤ੍ਵਾ ਸਤ੍ਥਾ ਪੁਚ੍ਛਿਤਬ੍ਬੋਤਿ ਤੁਰਿਤਂ ਆਲਪੀਤਿ ਦਸ੍ਸੇਤਿ. ‘‘ਯਥਾ ਵਾ’’ਤਿਆਦਿਨਾ ਪਨ ਵਚਨਾਲਙ੍ਕਾਰਵਸੇਨ ਦ੍ਵਿਕ੍ਖਤ੍ਤੁਂ ਆਲਪਤਿ. ਏਵਮਾਹਾਤਿ ‘‘ਭਿਕ੍ਖੁ ਭਿਕ੍ਖੂ’’ਤਿ ਏਵਂ ਦ੍ਵਿਕ੍ਖਤ੍ਤੁਂ ਅਵੋਚ.

ਵਮ੍ਮਿਕਪਰਿਯਾਯੇਨ ਕਰਜਕਾਯਂ ਪਚ੍ਚਕ੍ਖਂ ਕਤ੍ਵਾ ਦਸ੍ਸੇਨ੍ਤੀ ਦੇਵਤਾ ‘‘ਅਯਂ ਵਮ੍ਮਿਕੋ’’ਤਿ ਆਹ. ਤਾਯ ਪਨ ਭਾਵਤ੍ਥਸ੍ਸ ਅਭਾਸਿਤਤ੍ਤਾ ਸਦ੍ਦਤ੍ਥਮੇਵ ਦਸ੍ਸੇਨ੍ਤੋ ‘‘ਪੁਰਤੋ ਠਿਤਂ…ਪੇ… ਅਯਨ੍ਤਿ ਆਹਾ’’ਤਿ ਅਵੋਚ. ਸੇਸੇਸੁਪਿ ਏਸੇਵ ਨਯੋ. ਮਣ੍ਡੂਕਨ੍ਤਿ ਥਲਮਣ੍ਡੂਕਂ. ਸੋ ਹਿ ਉਦ੍ਧੁਮਾਯਿਕਾਤਿ ਵੁਚ੍ਚਤਿ, ਨ ਉਦਕਮਣ੍ਡੂਕੋ. ਤਸ੍ਸ ਨਿਵਾਸਤੋ ਵਾਤੋ ਮਾ ਖੋ ਬਾਧਯਿਤ੍ਥਾਤਿ ‘‘ਉਪਰਿਵਾਤਤੋ ਅਪਗਮ੍ਮਾ’’ਤਿ ਵੁਤ੍ਤਂ. ਕਥਂ ਪਨਾਯਂ ਦੇਵਤਾ ਇਮਿਨਾ ਨੀਹਾਰੇਨ ਇਮੇ ਪਞ੍ਹੇ ਥੇਰਸ੍ਸ ਆਚਿਕ੍ਖੀਤਿ? ਕੇਚਿ ਤਾਵ ਆਹੁ – ਯਥਾਸੁਤਮਤ੍ਥਂ ਉਪਮਾਭਾਵੇਨ ਗਹੇਤ੍ਵਾ ਅਤ੍ਤਨੋ ਪਟਿਭਾਨੇਨ ਉਪਮੇਯ੍ਯਤ੍ਥਂ ਮਨਸਾ ਚਿਨ੍ਤੇਤ੍ਵਾ ਤਂ ਭਗਵਾਵ ਇਮਸ੍ਸ ਆਚਿਕ੍ਖਿਸ੍ਸਤਿ. ਸਾ ਚ ਦੇਸਨਾ ਅਤ੍ਥਾਯ ਹਿਤਾਯ ਸੁਖਾਯ ਹੋਤੀਤਿ ‘‘ਅਯਂ ਵਮ੍ਮਿਕੋ’’ਤਿਆਦਿਨਾ ਉਪਮਾਵਸੇਨੇਵ ਪਨ੍ਨਰਸ ਪਞ੍ਹੇ ਥੇਰਸ੍ਸ ਆਚਿਕ੍ਖਿ. ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕਿਰ ਬਾਰਾਣਸਿਯਂ ਏਕੋ ਸੇਟ੍ਠਿ ਅਡ੍ਢੋ ਮਹਦ੍ਧਨੋ ਮਹਨ੍ਤਂ ਨਿਧਾਨਂ ਨਿਦਹਿਤ੍ਵਾ ਪਲਿਘਾਦਿਆਕਾਰਾਨਿ ਕਾਨਿਚਿਪਿ ਲਙ੍ਗਾਨਿ ਤਤ੍ਥ ਠਪੇਸਿ. ਸੋ ਮਰਣਕਾਲੇ ਅਤ੍ਤਨੋ ਸਹਾਯਸ੍ਸ ਬ੍ਰਾਹ੍ਮਣਸ੍ਸ ਆਰੋਚੇਸਿ – ‘‘ਇਮਸ੍ਮਿਂ ਠਾਨੇ ਮਯਾ ਨਿਧਾਨਂ ਨਿਦਹਿਤਂ, ਤਂ ਮਮ ਪੁਤ੍ਤਸ੍ਸ ਵਿਞ੍ਞੁਤਂ ਪਤ੍ਤਸ੍ਸ ਦਸ੍ਸੇਤੀ’’ਤਿ ਵਤ੍ਵਾ ਕਾਲਮਕਾਸਿ. ਬ੍ਰਾਹ੍ਮਣੋ ਸਹਾਯਕਪੁਤ੍ਤਸ੍ਸ ਵਿਞ੍ਞੁਤਂ ਪਤ੍ਤਕਾਲੇ ਤਂ ਠਾਨਂ ਦਸ੍ਸੇਸਿ. ਸੋ ਨਿਖਨਿਤ੍ਵਾ ਸਬ੍ਬਪਚ੍ਛਾ ਨਾਗਂ ਪਸ੍ਸਿ, ਨਾਗੋ ਅਤ੍ਤਨੋ ਪੁਤ੍ਤਂ ਦਿਸ੍ਵਾ ‘‘ਸੁਖੇਨੇਵ ਧਨਂ ਗਣ੍ਹਤੂ’’ਤਿ ਅਪਗਚ੍ਛਿ. ਸ੍ਵਾਯਮਤ੍ਥੋ ਤਦਾ ਲੋਕੇ ਪਾਕਟੋ ਜਾਤੋ. ਅਯਂ ਪਨ ਦੇਵਤਾ ਤਦਾ ਬਾਰਾਣਸਿਯਂ ਗਹਪਤਿਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਰਿਨਿਬ੍ਬੁਤੇ ਉਰਂ ਦਤ੍ਵਾ ਸਾਸਨੇ ਪਬ੍ਬਜਿਤੋ ਪਞ੍ਚਹਿ ਸਹਾਯਕਭਿਕ੍ਖੂਹਿ ਸਦ੍ਧਿਂ ਸਮਣਧਮ੍ਮਮਕਾਸਿ. ਯੇ ਸਨ੍ਧਾਯ ਵੁਤ੍ਤਂ ‘‘ਪਞ੍ਚ ਭਿਕ੍ਖੂ ਨਿਸ੍ਸੇਣਿਂ ਬਨ੍ਧਿਤ੍ਵਾ’’ਤਿਆਦਿ. ਤੇਨ ਵੁਤ੍ਤਂ ‘‘ਯਥਾਸੁਤਮਤ੍ਥਂ ਉਪਮਾਭਾਵੇਨ ਗਹੇਤ੍ਵਾ’’ਤਿਆਦਿ. ਅਪਰੇ ਪਨ ‘‘ਦੇਵਤਾ ਅਤ੍ਤਨੋ ਪਟਿਭਾਨੇਨ ਇਮੇ ਪਞ੍ਹੇ ਏਵਂ ਅਭਿਸਙ੍ਖਰਿਤ੍ਵਾ ਥੇਰਸ੍ਸ ਆਚਿਕ੍ਖੀ’’ਤਿ ਵਦਨ੍ਤਿ. ਦੇਵਪੁਤ੍ਤੇ ਨਿਸ੍ਸਕ੍ਕਂ ਦੇਵਪੁਤ੍ਤਪਞ੍ਹਤ੍ਤਾ ਤਸ੍ਸ ਅਤ੍ਥਸ੍ਸ.

੨੫੧. ਚਤੂਹਿ ਮਹਾਭੂਤੇਹਿ ਨਿਬ੍ਬਤ੍ਤੋਤਿ ਚਾਤੁਮਹਾਭੂਤਿਕੋ. ਤੇਨਾਹ ‘‘ਚਤੁਮਹਾਭੂਤਮਯਸ੍ਸਾ’’ਤਿ. ਵਮਤਿ ਉਗ੍ਗਿਰਨ੍ਤੋ ਵਿਯ ਹੋਤੀਤਿ ਅਤ੍ਥੋ. ਵਨ੍ਤਕੋਤਿ ਉਚ੍ਛਡ੍ਡਕੋ. ਵਨ੍ਤੁਸ੍ਸਯੋਤਿ ਉਪਚਿਕਾਹਿ ਵਨ੍ਤਸ੍ਸ ਮਤ੍ਤਿਕਾਪਿਣ੍ਡਸ੍ਸ ਉਸ੍ਸਯਭੂਤੋ. ਵਨ੍ਤਸਿਨੇਹਸਮ੍ਬਦ੍ਧੋਤਿ ਵਨ੍ਤੇਨ ਖੇਲ਼ਸਿਨੇਹੇਨ ਸਮ੍ਪਿਣ੍ਡਿਤੋ. ਅਸੁਚਿਕਲਿਮਲਂ ਵਮਤੀਤਿ ਏਤ੍ਥ ਮੁਖਾਦੀਹਿ ਪਾਣਕਾਨਂ ਨਿਗ੍ਗਮਨਤੋ ਪਾਣਕੇ ਵਮਤੀਤਿ ਅਯਮ੍ਪਿ ਅਤ੍ਥੋ ਲਬ੍ਭਤੇਵ. ਅਰਿਯੇਹਿ ਵਨ੍ਤਕੋਤਿ ਕਾਯਭਾਵਸਾਮਞ੍ਞੇਨ ਵੁਤ੍ਤਂ. ਦੁਕ੍ਖਸਚ੍ਚਪਰਿਞ੍ਞਾਯ ਵਾ ਸਬ੍ਬਸ੍ਸਪਿ ਤੇਭੂਮਕਧਮ੍ਮਜਾਤਸ੍ਸ ਪਰਿਞ੍ਞਾਤਤ੍ਤਾ ਸਬ੍ਬੋਪਿ ਕਾਯੋ ਅਰਿਯੇਹਿ ਛਨ੍ਦਰਾਗਪ੍ਪਹਾਨੇਨ ਵਨ੍ਤੋ ਏਵ. ਤਂ ਸਬ੍ਬਨ੍ਤਿ ਯੇਹਿ ਤੀਹਿ ਅਟ੍ਠਿਸਤੇਹਿ ਉਸ੍ਸਿਤੋ, ਯੇਹਿ ਨ੍ਹਾਰੂਹਿ ਸਮ੍ਬਦ੍ਧੋ, ਯੇਹਿ ਮਂਸੇਹਿ ਅਵਲਿਤ੍ਤੋ, ਯੇਨ ਅਲ੍ਲਚਮ੍ਮੇਨ ਪਰਿਯੋਨਦ੍ਧੋ, ਯਾਯ ਛਵਿਯਾ ਰਞ੍ਜਿਤੋ, ਤਂ ਅਟ੍ਠਿਆਦਿਸਬ੍ਬਂ ਅਚ੍ਚਨ੍ਤਮੇਵ ਜਿਗੁਚ੍ਛਿਤ੍ਵਾ ਵਿਰਤ੍ਤਤਾਯਵਨ੍ਤਮੇਵ. ‘‘ਯਥਾ ਚਾ’’ਤਿਆਦਿਨਾ ਵਤ੍ਤਬ੍ਬੋਪਮਤੋਪਿ ਵਮ੍ਮਿਕੋ ਵਿਯ ਵਮ੍ਮਿਕੋਤਿ ਇਮਮਤ੍ਥਂ ਦਸ੍ਸੇਤਿ.

ਸਮ੍ਭਵਤਿ ਏਤਸ੍ਮਾਤਿ ਸਮ੍ਭਵੋ, ਮਾਤਾਪੇਤ੍ਤਿਕੋ ਸਮ੍ਭਵੋ ਏਤਸ੍ਸਾਤਿ ਮਾਤਾਪੇਤ੍ਤਿਕਸਮ੍ਭਵੋ. ਤਸ੍ਸ. ਉਪਚਿਯਤਿ ਏਤੇਨਾਤਿ ਉਪਚਯੋ’ ਓਦਨਕੁਮ੍ਮਾਸਂ ਉਪਚਯੋ ਏਤਸ੍ਸਾਤਿ ਓਦਨਕੁਮ੍ਮਾਸੂਪਚਯੋ. ਤਸ੍ਸ. ਅਧੁਵਸਭਾਵਤਾਯ ਅਨਿਚ੍ਚਧਮ੍ਮਸ੍ਸ, ਸੇਦਗੂਥ-ਪਿਤ੍ਤ-ਸੇਮ੍ਹਾਦਿ-ਧਾਤੁਕ੍ਖੋਭ-ਗਰੁਭਾਵਦੁਗ੍ਗਨ੍ਧਾਨਂ ਵਿਨੋਦਨਾਯ ਉਚ੍ਛਾਦੇਤਬ੍ਬਧਮ੍ਮਸ੍ਸ, ਪਰਿਤੋ ਸਮ੍ਬਾਹਨੇਨ ਪਰਿਮਦ੍ਦਿਤਬ੍ਬਧਮ੍ਮਸ੍ਸ, ਖਣੇ ਖਣੇ ਭਿਜ੍ਜਨਸਭਾਵਤਾਯ ਭੇਦਨਧਮ੍ਮਸ੍ਸ, ਤਤੋ ਏਵ ਵਿਕਿਰਣਸਭਾਵਤਾਯ ਵਿਦ੍ਧਂਸਨਧਮ੍ਮਸ੍ਸਾਤਿ ਧਮ੍ਮ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਤਨੁਵਿਲੇਪਨੇਨਾਤਿ ਕਾਯਾਵਲੇਪਨੇਨ ਉਚ੍ਛਾਦਨਵਿਲੇਪਨੇਨ. ਅਙ੍ਗਪਚ੍ਚਙ੍ਗਾਬਾਧਵਿਨੋਦਨਤ੍ਥਾਯਾਤਿ ਤਾਦਿਸਸਮੁਟ੍ਠਾਨ-ਸਰੀਰਵਿਕਾਰਵਿਗਮਾਯ. ਯਸ੍ਮਾ ਸੁਕ੍ਕਸੋਣਿਤਂ ਆਹਾਰੋ, ਉਚ੍ਛਾਦਨਂ ਪਰਿਮਦ੍ਦਨਞ੍ਚ ਯਥਾਰਹਂ ਉਪ੍ਪਾਦਸ੍ਸ, ਵੁਡ੍ਢਿਯਾ ਚ ਪਚ੍ਚਯੋ, ਤਸ੍ਮਾ ਆਹ ‘‘ਮਾਤਾਪੇਤ੍ਤਿਕ…ਪੇ… ਕਥਿਤੋ’’ਤਿ. ਉਚ੍ਚਾਵਚਭਾਵੋਤਿ ਯਥਾਰਹਂ ਯੋਜੇਤਬ੍ਬੋ – ਓਦਨਕੁਮ੍ਮਾਸੂਪਚਯ-ਉਚ੍ਛਾਦਨਪਰਿਮਦ੍ਦਨਗ੍ਗਹਣੇਹਿ ਉਚ੍ਚਭਾਵੋ, ਵਡ੍ਢੀ. ਮਾਤਾਪੇਤ੍ਤਿਕਸਮ੍ਭਵਗ੍ਗਹਣੇਨ ਸਮੁਦਯੋ. ਇਤਰੇਹਿ ਅਵਚਭਾਵੋ, ਪਰਿਹਾਨਿ, ਅਤ੍ਥਙ੍ਗਮੋ ਪਕਾਸਿਤੋ. ਅਙ੍ਗਪਚ੍ਚਙ੍ਗਾਨਂ ਸਣ੍ਠਪਨਮ੍ਪਿ ਹਿ ਵਟ੍ਟਪਚ੍ਚਯਤ੍ਤਾ ਵਟ੍ਟਨ੍ਤਿ.

ਕੋਧੋ ਧੂਮੋਤਿ ਏਤ੍ਥ ਧੂਮਪਰਿਯਾਯੇਨ ਕੋਧਸ੍ਸ ਵੁਤ੍ਤਤ੍ਤਾ ਧੂਮ-ਸਦ੍ਦੋ ਕੋਧੇ ਵਤ੍ਤਤੀਤਿ ਵੁਤ੍ਤਂ ‘‘ਧੂਮੋ ਵਿਯ ਧੂਮੋ’’ਤਿ. ਭਸ੍ਮਨੀਤਿ ਭਸ੍ਮਂ. ਮੋਸਵਜ੍ਜਨ੍ਤਿ ਮੁਸਾਵਾਦੋ. ਧੂਮੋ ਏਵ ਧੂਮਾਯਿਤਂ. ਇਚ੍ਛਾ ਧੂਮਾਯਿਤਂ ਏਤਿਸ੍ਸਾਤਿ ਇਚ੍ਛਾਧੂਮਾਯਿਤਾ, ਪਜਾ. ਇਚ੍ਛਾਧੂਮਾਯਿਤਸਦ੍ਦਸ੍ਸ ਤਣ੍ਹਾਯ ਵੁਤ੍ਤਿ ਵੁਤ੍ਤਨਯੋ ਏਵ. ਧੂਮਾਯਨ੍ਤੋਤਿ ਵਿਤਕ੍ਕਸਨ੍ਤਾਪੇਨ ਸਂਤਪ੍ਪੇਨ੍ਤੋ, ਵਿਤਕ੍ਕੇਨ੍ਤੋਤਿ ਅਤ੍ਥੋ. ਪਲਿਪੋਤਿ ਦੁਕ੍ਕਰਮਹਾਕਦ੍ਦਮਂ. ਤਿਮੂਲਨ੍ਤਿ ਤੀਹਿ ਮੂਲੇਹਿ ਪਤਿਟ੍ਠਿਤਂ ਵਿਯ ਅਚਲਂ ਪਵਤ੍ਤਨ੍ਤਿ ਵੁਤ੍ਤਂ. ਰਜੋ ਚ ਧੂਮੋ ਚ ਮਯਾ ਪਕਾਸਿਤਾਤਿ ਰਜਸਭਾਵਕਰਣਟ੍ਠੇਨ ‘‘ਰਜੋ’’ਤਿ ਚ ਧੂਮਸਭਾਵਕਰਣਟ੍ਠੇਨ ‘‘ਧੂਮੋ’’ਤਿ ਚ ਮਯਾ ਪਕਾਸਿਤਾ. ਪਕਤਿਧੂਮੋ ਵਿਯ ਅਗ੍ਗਿਸ੍ਸ ਕਿਲੇਸਗ੍ਗਿਜਾਲਸ੍ਸ ਪਞ੍ਞਾਣਭਾਵਤੋ. ਧਮ੍ਮਦੇਸਨਾਧੂਮੋ ਞਾਣਗ੍ਗਿਸਨ੍ਧੀਪਨਸ੍ਸ ਪੁਬ੍ਬਙ੍ਗਮਭਾਵਤੋ. ਅਯਂ ਰਤ੍ਤਿਂ ਧੂਮਾਯਨਾਤਿ ਯਾ ਦਿਵਾ ਕਤ੍ਤਬ੍ਬਕਮ੍ਮਨ੍ਤੇ ਉਦ੍ਦਿਸ੍ਸ ਰਤ੍ਤਿਯਂ ਅਨੁਵਿਤਕ੍ਕਨਾ, ਅਯਂ ਰਤ੍ਤਿਂ ਧੂਮਾਯਨਾ.

ਸਤ੍ਤਨ੍ਨਂ ਧਮ੍ਮਾਨਨ੍ਤਿ ਇਦਂ ਸੁਤ੍ਤੇ (ਚੂਲ਼ਨਿ. ਮੇਤ੍ਤਗੂਮਾਣਵਪੁਚ੍ਛਾਨਿਦ੍ਦੇਸ ੨੮) ਆਗਤਨਯੇਨ ਵੁਤ੍ਤਂ. ਸੁਤ੍ਤਞ੍ਚ ਤਥਾ ਆਰਾਧਨਵੇਨੇਯ੍ਯਜ੍ਝਾਸਯਵਸੇਨ. ਤਦੇਕਟ੍ਠਤਾਯ ਵਾ ਤਦਞ੍ਞਕਿਲੇਸਾਨਂ. ਸੁਨ੍ਦਰਪਞ੍ਞੋਤਿ ਞਾਤਤੀਰਣਪਹਾਨਪਰਿਞ੍ਞਾਯ ਪਞ੍ਞਾਯ ਸੁਨ੍ਦਰਪਞ੍ਞੋ.

ਏਤਨ੍ਤਿ ‘‘ਸਤ੍ਥ’’ਨ੍ਤਿ ਏਤਂ ਅਧਿਵਚਨਂ ਸਂਕਿਲੇਸਧਮ੍ਮਾਨਂ ਸਸਨਤੋ ਸਮੁਚ੍ਛਿਨ੍ਦਨਤੋ. ਨ੍ਤਿ ਵੀਰਿਯਂ. ਪਞ੍ਞਾਗਤਿਕਮੇਵ ਪਞ੍ਞਾਯ ਹਿਤਸ੍ਸੇਵ ਅਧਿਪ੍ਪੇਤਤ੍ਤਾ. ਲੋਕਿਯਾਯ ਪਞ੍ਞਾਯ ਆਰਮ੍ਭਕਾਲੇ ਲੋਕਿਯਵੀਰਿਯਂ ਗਹੇਤਬ੍ਬਂ, ਲੋਕੁਤ੍ਤਰਾਯ ਪਞ੍ਞਾਯ ਪਵਤ੍ਤਿਕ੍ਖਣੇ ਲੋਕੁਤ੍ਤਰਵੀਰਿਯਂ ਗਹੇਤਬ੍ਬਨ੍ਤਿ ਯੋਜਨਾ. ਅਤ੍ਥਦੀਪਨਾਤਿ ਉਪਮੇਯ੍ਯਤ੍ਥਦੀਪਨੀ ਉਪਮਾ.

ਗਾਮਤੋਤਿ ਅਤ੍ਤਨੋ ਵਸਨਗਾਮਤੋ. ਮਨ੍ਤੇਤਿ ਆਥਬ੍ਬਨਮਨ੍ਤੇ. ਤੇ ਹਿ ਬ੍ਰਾਹ੍ਮਣਾ ਅਰਞ੍ਞੇ ਏਵ ਵਾਚੇਨ੍ਤਿ ‘‘ਮਾ ਅਞ੍ਞੇ ਅਸ੍ਸੋਸੁ’’ਨ੍ਤਿ. ਤਥਾ ਅਕਾਸੀਤਿ ਚਤ੍ਤਾਰੋ ਕੋਟ੍ਠਾਸੇ ਅਕਾਸਿ. ਏਵਮੇਤ੍ਥ ਵਮ੍ਮਿਕਪਞ੍ਹਸ੍ਸੇਵ ਵਸੇਨ ਉਪਮਾ ਆਗਤਾ, ਸੇਸਾਨਂ ਵਸੇਨ ਹੇਟ੍ਠਾ ਵੁਤ੍ਤਨਯੇਨ ਵੇਦਿਤਬ੍ਬਾ.

ਲਙ੍ਗਨਟ੍ਠੇਨ ਨਿਵਾਰਣਟ੍ਠੇਨ ਲਙ੍ਗੀ, ਪਲਿਘੋ. ਞਾਣਮੁਖੇਤਿ ਵਿਪਸ੍ਸਨਾਞਾਣਵੀਥਿਯਂ. ਪਤਤੀਤਿ ਪਵਤ੍ਤਤਿ. ਕਮ੍ਮਟ੍ਠਾਨਉਗ੍ਗਹਪਰਿਪੁਚ੍ਛਾਵਸੇਨਾਤਿ ਚਤੁਸਚ੍ਚਕਮ੍ਮਟ੍ਠਾਨਸ੍ਸ ਉਗ੍ਗਣ੍ਹਨੇਨ ਤਸ੍ਸ ਅਤ੍ਥਪਰਿਪੁਚ੍ਛਾਵਸੇਨ ਚੇਵ ਵਿਪਸ੍ਸਨਾਸਙ੍ਖਾਤ-ਅਤ੍ਥਵਿਨਿਚ੍ਛਯ-ਪਰਿਪੁਚ੍ਛਾਵਸੇਨ ਚ. ਸਬ੍ਬਸੋ ਞਾਤੁਂ ਇਚ੍ਛਾ ਹਿ ਪਰਿਪੁਚ੍ਛਾ. ਵਿਪਸ੍ਸਨਾ ਚ ਅਨਿਚ੍ਚਾਦਿਤੋ ਸਬ੍ਬਤੇਭੂਮਕਧਮ੍ਮਾਨਂ ਞਾਤੁਂ ਇਚ੍ਛਤਿ. ਏਵਂ ਵਿਪਸ੍ਸਨਾਵਸੇਨ ਅਵਿਜ੍ਜਾਪਹਾਨਮਾਹ, ਉਪਰਿਕਤ੍ਤਬ੍ਬਸਬ੍ਭਾਵਤੋ ਨ ਤਾਵ ਮਗ੍ਗਵਸੇਨ.

ਵਲ੍ਲਿਅਨ੍ਤਰੇ ਵਾਤਿ ਵਾ-ਸਦ੍ਦੋ ਪਂਸੁਅਨ੍ਤਰੇ ਵਾ ਮਤ੍ਤਿਕਨ੍ਤਰੇ ਵਾਤਿ ਅਵੁਤ੍ਤਵਿਕਪ੍ਪਤ੍ਥੋ. ਚਿਤ੍ਤਾਵਿਲਮਤ੍ਤਕੋਵਾਤਿ ਚਿਤ੍ਤਕ੍ਖੋਭਮਤ੍ਤਕੋਵ. ਅਨਿਗ੍ਗਹਿਤੋਤਿ ਪਟਿਸਙ੍ਖਾਨਬਲੇਨ ਅਨਿਵਾਰਿਤੋ. ਮੁਖਵਿਕੁਲਨਂ ਮੁਖਸਙ੍ਕੋਚੋ. ਹਨੁਸਞ੍ਚੋਪਨਂ ਪਾਪੇਤਿ ਅਨ੍ਤੋਜਪ੍ਪਨਾਵਤ੍ਥਾਯਂ. ਦਿਸਾ ਵਿਲੋਕਨਂ ਪਾਪੇਤਿ ਯਤ੍ਥ ਬਾਧੇਤਬ੍ਬੋ ਠਿਤੋ, ਤਂਦਸ੍ਸਨਤ੍ਥਂ ਨਿਵਾਰਕਪਰਿਵਾਰਣਤ੍ਥਂ. ਦਣ੍ਡਸਤ੍ਥਾਭਿਨਿਪਾਤਨ੍ਤਿ ਦਣ੍ਡਸਤ੍ਥਾਨਂ ਪਰਸ੍ਸ ਉਪਰਿ ਨਿਪਾਤਨਾਵਤ੍ਥਂ. ਯੇਨ ਕੋਧੇਨ ਅਨਿਗ੍ਗਹਿਤੇਨ ਮਾਤਾਦਿਕਂ ਅਘਾਤੇਤਬ੍ਬਂ ਉਗ੍ਘਾਤੇਤ੍ਵਾ ‘‘ਅਯੁਤ੍ਤਂ ਵਤ ਮਯਾ ਕਤ’’ਨ੍ਤਿ ਅਤ੍ਤਾਨਮ੍ਪਿ ਹਨਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਪਰਘਾਤਨਮ੍ਪਿ ਅਤ੍ਤਘਾਤਨਮ੍ਪਿ ਪਾਪੇਤੀ’’ਤਿ. ਯੇਨ ਵਾ ਪਰਸ੍ਸ ਹਞ੍ਞਮਾਨਸ੍ਸ ਵਸੇਨ ਘਾਤਕੋਪਿ ਘਾਤਨਂ ਪਾਪੁਣਾਤਿ, ਤਾਦਿਸਸ੍ਸ ਵਸੇਨਾਯਮਤ੍ਥੋ ਵੇਦਿਤਬ੍ਬੋ. ਕੋਧਸਾਮਞ੍ਞੇਨ ਹੇਤਂ ਵੁਤ੍ਤਂ ‘‘ਪਰਂ ਘਾਤੇਤ੍ਵਾ ਅਤ੍ਤਾਨਂ ਘਾਤੇਤੀ’’ਤਿ. ਪਰਮੁਸ੍ਸਦਗਤੋਤਿ ਪਰਮੁਕ੍ਕਂਸਗਤੋ. ਦਲ਼੍ਹਂ ਪਰਿਸ੍ਸਯਮਾਵਹਤਾਯ ਕੋਧੋਵ ਕੋਧੂਪਾਯਾਸੋ. ਤੇਨਾਹ ‘‘ਬਲਵਪ੍ਪਤ੍ਤੋ’’ਤਿਆਦਿ.

ਦ੍ਵੇਧਾਪਥਸਮਾ ਹੋਤਿ ਅਪ੍ਪਟਿਪਤ੍ਤਿਹੇਤੁਭਾਵਤੋ.

ਕੁਸਲਧਮ੍ਮੋ ਨ ਤਿਟ੍ਠਤਿ ਨੀਵਰਣੇਹਿ ਨਿਵਾਰਿਤਪਰਮਤ੍ਤਾ. ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵਯਤੋ ਪਠਮਂ ਸਮਥੇਨ ਨੀਵਰਣਵਿਕ੍ਖਮ੍ਭਨਂ ਹੋਤਿ, ਵਿਪਸ੍ਸਨਾ ਪਨ ਤਦਙ੍ਗਵਸੇਨੇਵ ਤਾਨਿ ਨੀਹਰਤੀਤਿ ਵੁਤ੍ਤਂ ‘‘ਵਿਕ੍ਖਮ੍ਭਨਤਦਙ੍ਗਵਸੇਨਾ’’ਤਿ.

‘‘ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ’’ਤਿਆਦੀਸੁ (ਸਂ. ਨਿ. ੧.੧੭) ਕੁਮ੍ਮਸ੍ਸ ਅਙ੍ਗਭਾਵੇਨ ਵਿਸੇਸਤੋ ਪਾਦਸੀਸਾਨਿ ਏਵ ਵੁਚ੍ਚਨ੍ਤੀਤਿ ਆਹ ‘‘ਪਞ੍ਚੇਵ ਅਙ੍ਗਾਨਿ ਹੋਨ੍ਤੀ’’ਤਿ. ਵਿਪਸ੍ਸਨਾਚਾਰਸ੍ਸ ਵੁਚ੍ਚਮਾਨਤ੍ਤਾ ਅਧਿਕਾਰਤੋ ਸਮ੍ਮਸਨੀਯਾਨਮੇਵ ਧਮ੍ਮਾਨਂ ਇਧ ਗਹਣਨ੍ਤਿ ‘‘ਸਬ੍ਬੇਪਿ ਸਙ੍ਖਤਾ ਧਮ੍ਮਾ’’ਤਿ ਵਿਸੇਸਂ ਕਤ੍ਵਾਵ ਵੁਤ੍ਤਂ. ਤੇਨਾਹ ਭਗਵਾ ‘‘ਪਞ੍ਚਨ੍ਨੇਤਂ ਉਪਾਦਾਨਕ੍ਖਨ੍ਧਾਨਂ ਅਧਿਵਚਨ’’ਨ੍ਤਿ.

ਸੁਨਨ੍ਤਿ ਕੋਟ੍ਟਨ੍ਤਿ ਏਤ੍ਥਾਤਿ ਸੂਨਾ, ਅਧਿਕੁਟ੍ਟਨਨ੍ਤਿ ਆਹ ‘‘ਸੂਨਾਯ ਉਪਰੀ’’ਤਿ. ਅਸਿਨਾਤਿ ਮਂਸਕਨ੍ਤਨੇਨ. ਘਾਤਿਯਮਾਨਾਤਿ ਹਞ੍ਞਮਾਨਾ ਵਿਬਾਧਿਯਮਾਨਾ. ਵਤ੍ਥੁਕਾਮਾਨਂ ਉਪਰਿ ਕਤ੍ਵਾਤਿ ਵਤ੍ਥੁਕਾਮੇਸੁ ਠਪੇਤ੍ਵਾ ਤੇ ਅਚ੍ਚਾਧਾਨਂ ਕਤ੍ਵਾ. ਕਨ੍ਤਿਤਾਤਿ ਛਿਨ੍ਦਿਤਾ. ਕੋਟ੍ਟਿਤਾਤਿ ਬਿਲਸੋ ਵਿਭਜਿਤਾ. ਛਨ੍ਦਰਾਗਪ੍ਪਹਾਨਨ੍ਤਿ ਛਨ੍ਦਰਾਗਸ੍ਸ ਵਿਕ੍ਖਮ੍ਭਨਪ੍ਪਹਾਨਂ.

ਸਮ੍ਮਤ੍ਤਾਤਿ ਮੁਚ੍ਛਿਤਾ ਸਮ੍ਮੂਲ਼੍ਹਾ. ਨਨ੍ਦੀਰਾਗਂ ਉਪਗਮ੍ਮ ਵਟ੍ਟਂ ਵਡ੍ਢੇਨ੍ਤੀਤਿ ਸਮ੍ਮੂਲ਼੍ਹਤ੍ਤਾ ਏਵਆਦੀਨਵਂ ਅਪਸ੍ਸਨ੍ਤਾ ਨਨ੍ਦੀਰਾਗਸ੍ਸ ਆਰਮ੍ਮਣਂ ਉਪਗਨ੍ਤ੍ਵਾ ਤਂ ਪਰਿਬ੍ਰੂਹੇਨ੍ਤਿ. ਨਨ੍ਦੀਰਾਗਬਦ੍ਧਾਤਿ ਨਨ੍ਦੀਰਾਗੇ ਲਗ੍ਗਤ੍ਤਾ ਤੇਨ ਬਦ੍ਧਾ. ਵਟ੍ਟੇ ਲਗ੍ਗਨ੍ਤੀਤਿ ਤੇਭੂਮਕੇ ਵਟ੍ਟੇ ਸਜ੍ਜਨ੍ਤਿ. ਤਤ੍ਥ ਸਜ੍ਜਤ੍ਤਾ ਏਵ ਦੁਕ੍ਖਂ ਪਤ੍ਵਾਪਿ ਨ ਉਕ੍ਕਣ੍ਠਨ੍ਤਿ ਨ ਨਿਬ੍ਬਿਨ੍ਦਨ੍ਤਿ. ਇਧ ਅਨਵਸੇਸਪ੍ਪਹਾਨਂ ਅਧਿਪ੍ਪੇਤਨ੍ਤਿ ਆਹ ‘‘ਚਤੁਤ੍ਥਮਗ੍ਗੇਨ ਨਨ੍ਦੀਰਾਗਪ੍ਪਹਾਨਂ ਕਥਿਤ’’ਨ੍ਤਿ.

ਅਨਙ੍ਗਣਸੁਤ੍ਤੇ (ਮ. ਨਿ. ਅਟ੍ਠ. ੧.੬੩) ਪਕਾਸਿਤੋ ਏਵ ‘‘ਛਨ੍ਦਾਦੀਹਿ ਨ ਗਚ੍ਛਨ੍ਤੀ’’ਤਿਆਦਿਨਾ. ‘‘ਬੁਦ੍ਧੋ ਸੋ ਭਗਵਾ’’ਤਿਆਦਿ ‘‘ਨਮੋ ਕਰੋਹੀ’’ਤਿ (ਮ. ਨਿ. ੧.੨੪੯, ੨੫੧) ਵੁਤ੍ਤਨਮਕ੍ਕਾਰਸ੍ਸ ਕਰਣਾਕਾਰਦਸ੍ਸਨਂ. ਬੋਧਾਯਾਤਿ ਚਤੁਸਚ੍ਚਸਮ੍ਬੋਧਾਯ. ਤਥਾ ਦਮਥਸਮਥਤਰਣਪਰਿਨਿਬ੍ਬਾਨਾਨਿ ਅਰਿਯਮਗ੍ਗਵਸੇਨ ਵੇਦਿਤਬ੍ਬਾਨਿ. ਸਮਥਪਰਿਨਿਬ੍ਬਾਨਾਨਿ ਪਨ ਅਨੁਪਾਦਿਸੇਸਵਸੇਨਪਿ ਯੋਜੇਤਬ੍ਬਾਨਿ. ਕਮ੍ਮਟ੍ਠਾਨਂ ਅਹੋਸੀਤਿ ਵਿਪਸ੍ਸਨਾਕਮ੍ਮਟ੍ਠਾਨਂ ਅਹੋਸਿ. ਏਤਸ੍ਸ ਪਞ੍ਹਸ੍ਸਾਤਿ ਏਤਸ੍ਸ ਪਨ੍ਨਰਸਮਸ੍ਸ ਪਞ੍ਹਸ੍ਸ ਅਤ੍ਥੋ. ਏਵਂ ਇਤਰੇਸੁਪਿ ਵਤ੍ਤਬ੍ਬਂ ਵਿਪਸ੍ਸਨਾਕਮ੍ਮਟ੍ਠਾਨਂ ਖੀਣਾਸਵਗੁਣੇਹਿ ਮਤ੍ਥਕਂ ਪਾਪੇਨ੍ਤੋ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸਿ, ਨ ਪੁਚ੍ਛਿਤਾਨੁਸਨ੍ਧਿਨਾਤਿ ਅਧਿਪ੍ਪਾਯੋ. ਨਨੁ ਚ ਪੁਚ੍ਛਾਵਸੇਨਾਯਂ ਦੇਸਨਾ ਆਰਦ੍ਧਾਤਿ? ਸਚ੍ਚਂ ਆਰਦ੍ਧਾ, ਏਵਂ ਪਨ ‘‘ਪੁਚ੍ਛਾਵਸਿਕੋ ਨਿਕ੍ਖੇਪੋ’’ਤਿ ਵਤ੍ਤਬ੍ਬਂ, ਨ ‘‘ਪੁਚ੍ਛਾਨੁਸਨ੍ਧਿਵਸੇਨ ਨਿਟ੍ਠਪਿਤਾ’’ਤਿ. ਅਨ੍ਤਰਪੁਚ੍ਛਾਵਸੇਨ ਦੇਸਨਾਯ ਅਪਰਿਵਤ੍ਤਿਤਤ੍ਤਾ ਆਰਮ੍ਭਾਨੁਰੂਪਮੇਵ ਪਨ ਦੇਸਨਾ ਨਿਟ੍ਠਪਿਤਾ.

ਵਮ੍ਮਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.