੫. ਅਨਙ੍ਗਣਸੁਤ੍ਤਵਣ੍ਣਨਾ
੫੭. ਆਯਸ੍ਮਾ ਸਾਰਿਪੁਤ੍ਤੋਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਏਵਮਾਦਿਕਨ੍ਤਿ ਅਤ੍ਥੋ. ਤੇਨ ‘‘ਭਿਕ੍ਖੂ ਆਮਨ੍ਤੇਸੀ’’ਤਿਆਦਿਕਂ ਸਬ੍ਬਂ ਸੁਤ੍ਤਂ ਸਙ੍ਗਣ੍ਹਾਤਿ. ਤੇਨਾਹ ‘‘ਅਨਙ੍ਗਣਸੁਤ੍ਤ’’ਨ੍ਤਿ. ਤਸ੍ਸ ਕੋ ਨਿਕ੍ਖੇਪੋ? ਅਤ੍ਤਜ੍ਝਾਸਯੋ. ਪਰੇਹਿ ਅਨਜ੍ਝਿਟ੍ਠੋਯੇਵ ਹਿ ਮਹਾਥੇਰੋ ਇਮਂ ਦੇਸਨਂ ਆਰਭਿ. ਕੇਚਿ ਪਨਾਹੁ ‘‘ਏਕਚ੍ਚੇ ਭਿਕ੍ਖੂ ਸਂਕਿਲਿਟ੍ਠਚਿਤ੍ਤੇ ਦਿਸ੍ਵਾ ਤੇਸਂ ਚਿਤ੍ਤਸਂਕਿਲੇਸਪ੍ਪਹਾਨਾਯ ਚੇਵ ਏਕਚ੍ਚਾਨਂ ਆਯਤਿਂ ਅਨੁਪ੍ਪਾਦਨਾਯ ਚ ਅਯਂ ਦੇਸਨਾ ਆਰਦ੍ਧਾ’’ਤਿ. ਏਵਂ ਸਬ੍ਬਸੁਤ੍ਤੇਸੂਤਿ ਯਥਾ ਏਤ੍ਥ ਅਨਙ੍ਗਣਸੁਤ੍ਤੇ, ਏਵਂ ਇਤੋ ਪਰੇਸੂਤਿ ਸਬ੍ਬੇਸੁਪਿ ਸੁਤ੍ਤੇਸੁ ਅਨੁਤ੍ਤਾਨਅਪੁਬ੍ਬਪਦਵਣ੍ਣਨਾ ਏਵ ਕਰੀਯਤਿ. ਤੇਨਾਹ ‘‘ਤਸ੍ਮਾ’’ਤਿਆਦਿ. ਗਣਨਪਰਿਚ੍ਛੇਦੋਤਿ ਗਣਨੇਨ ਪਰਿਚ੍ਛਿਨ੍ਦਨਂ. ਇਦਞ੍ਹਿ ਅਪ੍ਪਰਜਕ੍ਖਮਹਾਰਜਕ੍ਖਤਾਵਸੇਨ ਦੁਵਿਧੇ ਸਤ੍ਤੇ ਪਚ੍ਚੇਕਂ ਅਤ੍ਥਞ੍ਞੁਤਾਨਤ੍ਥਞ੍ਞੁਤਾਵਸੇਨ ਦ੍ਵਿਧਾ ਕਤ੍ਵਾ ‘‘ਚਤ੍ਤਾਰੋ’’ਤਿ ਅਨਵਸੇਸਪਰਿਯਾਦਾਨਂ. ਵਜ੍ਜੀਪੁਤ੍ਤਕਾਦਯੋ ਵਿਯ ਪੁਗ੍ਗਲਵਾਦੀਤਿ ਨ ਗਹੇਤਬ੍ਬਂ ਲੋਕਸਮਞ੍ਞਾਨੁਸਾਰੇਨ ਅਤ੍ਥਂ ਪਟਿਵਿਜ੍ਝਿਤੁਂ ਸਮਤ੍ਥਾਨਂ ਵਸੇਨ ਦੇਸਨਾਯ ਆਰਦ੍ਧਤ੍ਤਾ, ਅਯਞ੍ਚ ਦੇਸਨਾਨਯੋ ਸਤ੍ਥੁ ਨਿਸ੍ਸਾਯ ਏਵਾਤਿ ਦਸ੍ਸੇਨ੍ਤੋ ‘‘ਅਯਞ੍ਹੀ’’ਤਿਆਦਿਮਾਹ.
ਸਮ੍ਮੁਤਿਪਰਮਤ੍ਥਦੇਸਨਾਕਥਾਵਣ੍ਣਨਾ
ਤਤ੍ਥ (ਅ. ਨਿ. ਟੀ. ੧.੧.੧੭੦) ਸਮ੍ਮੁਤਿਯਾ ਦੇਸਨਾ ਸਮ੍ਮੁਤਿਦੇਸਨਾ, ਪਰਮਤ੍ਥਸ੍ਸ ਦੇਸਨਾ ਪਰਮਤ੍ਥਦੇਸਨਾ. ਤਤ੍ਥਾਤਿ ਸਮ੍ਮੁਤਿਪਰਮਤ੍ਥਦੇਸਨਾਸੁ, ਨ ਸਮ੍ਮੁਤਿਪਰਮਤ੍ਥੇਸੁ. ਤੇਨਾਹ ‘‘ਏਵਰੂਪਾ ਸਮ੍ਮੁਤਿਦੇਸਨਾ, ਏਵਰੂਪਾ ਪਰਮਤ੍ਥਦੇਸਨਾ’’ਤਿ. ਤਤ੍ਰਿਦਂ ਸਮ੍ਮੁਤਿਪਰਮਤ੍ਥਾਨਂ ਲਕ੍ਖਣਂ – ਯਸ੍ਮਿਂ ਭਿਨ੍ਨੇ, ਬੁਦ੍ਧਿਯਾ ਅਵਯਵਵਿਨਿਬ੍ਭੋਗੇ ਵਾ ਕਤੇ ਨ ਤਂਸਮਞ੍ਞਾ, ਸਾ ਘਟਪਟਾਦਿਪ੍ਪਭੇਦਾ ਸਮ੍ਮੁਤਿ, ਤਬ੍ਬਿਪਰਿਯਾਯਤੋ ਪਰਮਤ੍ਥੋ. ਨ ਹਿ ਕਕ੍ਖਲ਼ਫੁਸਨਾਦਿਸਭਾਵੇ ਅਯਂ ਨਯੋ ਲਬ੍ਭਤਿ, ਤਤ੍ਥ ਰੂਪਾਦਿਧਮ੍ਮਂ ਸਮੂਹਸਨ੍ਤਾਨਵਸੇਨ ਪਵਤ੍ਤਮਾਨਂ ਉਪਾਦਾਯ ਪੁਗ੍ਗਲਵੋਹਾਰੋਤਿ ਆਹ ‘‘ਪੁਗ੍ਗਲੋਤਿ ਸਮ੍ਮੁਤਿਦੇਸਨਾ’’ਤਿ. ਸੇਸਪਦੇਸੁਪਿ ਏਸੇਵ ਨਯੋ. ਉਪ੍ਪਾਦਵਯਵਨ੍ਤੋ ਸਭਾਵਧਮ੍ਮਾ ਨ ਨਿਚ੍ਚਾਤਿ ਆਹ ‘‘ਅਨਿਚ੍ਚਨ੍ਤਿ ਪਰਮਤ੍ਥਦੇਸਨਾ’’ਤਿ. ਏਸ ਨਯੋ ਸੇਸਪਦੇਸੁਪਿ. ਨਨੁ ਖਨ੍ਧਦੇਸਨਾਪਿ ਸਮ੍ਮੁਤਿਦੇਸਨਾਵ. ਖਨ੍ਧਟ੍ਠੋ ਹਿ ਰਾਸਟ੍ਠੋ, ਕੋਟ੍ਠਾਸਟ੍ਠੋ ਵਾਤਿ? ਸਚ੍ਚਮੇਤਂ, ਅਯਂ ਪਨ ਖਨ੍ਧਸਮਞ੍ਞਾ ਫਸ੍ਸਾਦੀਸੁ ਤਜ੍ਜਾਪਞ੍ਞਤ੍ਤਿ ਵਿਯ ਪਰਮਤ੍ਥਸਨ੍ਨਿਸ੍ਸਯਾ ਤਸ੍ਸ ਆਸਨ੍ਨਤਰਾ, ਪੁਗ੍ਗਲਸਮਞ੍ਞਾਦਯੋ ਵਿਯ ਨ ਦੂਰੇਤਿ ਪਰਮਤ੍ਥਸਙ੍ਗਹਤਾ ਵੁਤ੍ਤਾ, ਖਨ੍ਧਸੀਸੇਨ ਵਾ ਤਦੁਪਾਦਾਨਾ ਸਭਾਵਧਮ੍ਮਾ ਏਵ ਗਹਿਤਾ. ਨਨੁ ਚ ਸਭਾਵਧਮ੍ਮਾ ਸਬ੍ਬੇਪਿ ਸਮ੍ਮੁਤਿਮੁਖੇਨੇਵ ਦੇਸਨਂ ਆਰੋਹਨ੍ਤਿ, ਨ ਸਮੁਖੇਨਾਤਿ ਸਬ੍ਬਾਪਿ ਦੇਸਨਾ ਸਮ੍ਮੁਤਿਦੇਸਨਾਵ ਸਿਯਾਤਿ? ਨਯਿਦਮੇਵਂ ਦੇਸੇਤਬ੍ਬਧਮ੍ਮਵਿਭਾਗੇਨ ਦੇਸਨਾਵਿਭਾਗਸ੍ਸ ਅਧਿਪ੍ਪੇਤਤ੍ਤਾ, ਨ ਚ ਸਦ੍ਦੋ ਕੇਨਚਿ ਪਵਤ੍ਤਿਨਿਮਿਤ੍ਤੇਨ ਵਿਨਾ ਅਤ੍ਥਂ ਪਕਾਸੇਤੀਤਿ.
ਸਮ੍ਮੁਤਿਵਸੇਨ ਦੇਸਨਂ ਸੁਤ੍ਵਾਤਿ ‘‘ਇਧੇਕਚ੍ਚੋ ਪੁਗ੍ਗਲੋ ਅਤ੍ਤਨ੍ਤਪੋ ਹੋਤਿ ਅਤ੍ਤਪਰਿਤਾਪਾਨੁਯੋਗਮਨੁਯੁਤ੍ਤੋ’’ਤਿਆਦਿਨਾ (ਮ. ਨਿ. ੨.੪੧੩; ਪੁ. ਪ. ੧੦.੨੫ ਮਾਤਿਕਾ) ਸਮ੍ਮੁਤਿਮੁਖੇਨ ਪਵਤ੍ਤਿਤਂ ਦੇਸਨਂ ਸੁਤਮਯਞਾਣੁਪ੍ਪਾਦਨਵਸੇਨ ਸੁਤ੍ਵਾ. ਅਤ੍ਥਂ ਪਟਿਵਿਜ੍ਝਿਤ੍ਵਾਤਿ ਤਦਨੁਸਾਰੇਨ ਚਤੁਸਚ੍ਚਸਙ੍ਖਾਤਂ ਅਤ੍ਥਂ ਸਹ ਵਿਪਸ੍ਸਨਾਯ ਮਗ੍ਗੇਨ ਪਟਿਵਿਜ੍ਝਿਤ੍ਵਾ. ਮੋਹਂ ਪਹਾਯਾਤਿ ਤਦੇਕਟ੍ਠੇਹਿ ਕਿਲੇਸੇਹਿ ਸਦ੍ਧਿਂ ਅਨਵਸੇਸਂ ਮੋਹਂ ਪਜਹਿਤ੍ਵਾ. ਵਿਸੇਸਨ੍ਤਿ ਨਿਬ੍ਬਾਨਸਙ੍ਖਾਤਂ ਅਰਹਤ੍ਤਸਙ੍ਖਾਤਞ੍ਚ ਵਿਸੇਸਂ. ਤੇਸਨ੍ਤਿ ਤਾਦਿਸਾਨਂ ਵਿਨੇਯ੍ਯਾਨਂ. ਪਰਮਤ੍ਥਵਸੇਨਾਤਿ ‘‘ਪਞ੍ਚਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨੀ’’ਤਿਆਦਿਨਾ (ਸਂ. ਨਿ. ੫.੪੭੨-੪੭੪) ਪਰਮਤ੍ਥਧਮ੍ਮਵਸੇਨ. ਸੇਸਂ ਅਨਨ੍ਤਰਨਯੇ ਵੁਤ੍ਤਸਦਿਸਮੇਵ. ਤਤ੍ਥਾਤਿ ਤਸ੍ਸਂ ਸਮ੍ਮੁਤਿਵਸੇਨ ਪਰਮਤ੍ਥਵਸੇਨ ਚ ਦੇਸਨਾਯਂ. ਦੇਸਭਾਸਾਕੁਸਲੋਤਿ ਨਾਨਾਦੇਸਭਾਸਾਸੁ ਕੁਸਲੋ. ਤਿਣ੍ਣਂ ਵੇਦਾਨਨ੍ਤਿ ਨਿਦਸ੍ਸਨਮਤ੍ਤਂ, ਤਿਣ੍ਣਂ ਵੇਦਾਨਂ ਸਿਪ੍ਪਗਨ੍ਥਾਨਮ੍ਪੀਤਿ ਅਧਿਪ੍ਪਾਯੋ ਸਿਪ੍ਪੁਗ੍ਗਹਣਞ੍ਹਿ ਪਰਤੋ ਵਕ੍ਖਤਿ. ਸਿਪ੍ਪਾਨਿ ਵਾ ਵੇਦਨ੍ਤੋਗਧੇ ਕਤ੍ਵਾ ‘‘ਤਿਣ੍ਣਂ ਵੇਦਾਨ’’ਨ੍ਤਿ ਵੁਤ੍ਤਂ. ਕਥੇਤਬ੍ਬਭਾਵੇਨ ਠਿਤਾਨਿ, ਨ ਕਤ੍ਥਚਿ ਸਨ੍ਨਿਹਿਤਭਾਵੇਨਾਤਿ ਵੇਦਾਨਮ੍ਪਿ ਕਥੇਤਬ੍ਬਭਾਵੇਨੇਵ ਅਵਟ੍ਠਾਨਂ ਦੀਪੇਨ੍ਤੋ ‘‘ਗੁਯ੍ਹਾ ਤਯੀ ਨਿਹਿਤਾ ਗਯ੍ਹਤੀ’’ਤਿ ਮਿਚ੍ਛਾਵਾਦਂ ਪਟਿਕ੍ਖਿਪਤਿ. ਨਾਨਾਵਿਧਾ ਦੇਸਭਾਸਾ ਏਤੇਸਨ੍ਤਿ ਨਾਨਾਦੇਸਭਾਸਾ.
ਪਰਮੋ ਉਤ੍ਤਮੋ ਅਤ੍ਥੋ ਪਰਮਤ੍ਥੋ, ਧਮ੍ਮਾਨਂ ਯਥਾਭੂਤਸਭਾਵੋ. ਲੋਕਸਙ੍ਕੇਤਮਤ੍ਤਸਿਦ੍ਧਾ ਸਮ੍ਮੁਤਿ. ਯਦਿ ਏਵਂ ਕਥਂ ਸਮ੍ਮੁਤਿਕਥਾਯ ਸਚ੍ਚਤਾਤਿਆਹ ‘‘ਲੋਕਸਮ੍ਮੁਤਿਕਾਰਣਾ’’ਤਿ, ਲੋਕਸਮਞ੍ਞਂ ਨਿਸ੍ਸਾਯ ਪਵਤ੍ਤਨਤੋ. ਲੋਕਸਮਞ੍ਞਾਯ ਹਿ ਅਭਿਨਿਵੇਸੇਨ ਵਿਨਾ ਞਾਪਨਾ ਏਕਚ੍ਚਸ੍ਸ ਸੁਤਸ੍ਸ ਸਾਵਨਾ ਵਿਯ ਨ ਮੁਸਾ ਅਨਤਿਧਾਵਿਤਬ੍ਬਤੋ ਤਸ੍ਸਾ. ਤੇਨਾਹ ਭਗਵਾ ‘‘ਜਨਪਦਨਿਰੁਤ੍ਤਿਂ ਨਾਭਿਨਿਵੇਸੇਯ੍ਯ, ਸਮਞ੍ਞਂ ਨਾਤਿਧਾਵੇਯ੍ਯਾ’’ਤਿ (ਮ. ਨਿ. ੩.੩੩੨). ਧਮ੍ਮਾਨਨ੍ਤਿ ਸਭਾਵਧਮ੍ਮਾਨਂ. ਭੂਤਕਾਰਣਾਤਿ ਯਥਾਭੂਤਸਭਾਵਂ ਨਿਸ੍ਸਾਯ ਪਵਤ੍ਤਨਤੋ. ਸਮ੍ਮੁਤਿਂ ਵੋਹਰਨ੍ਤਸ੍ਸਾਤਿ ‘‘ਪੁਗ੍ਗਲੋ ਸਤ੍ਤੋ’’ਤਿਆਦਿਨਾ ਲੋਕਸਮਞ੍ਞਂ ਕਥੇਨ੍ਤਸ੍ਸ.
ਹਿਰੋਤ੍ਤਪ੍ਪਦੀਪਨਤ੍ਥਨ੍ਤਿ ਲੋਕਪਾਲਨਕਿਚ੍ਚੇ ਹਿਰੋਤ੍ਤਪ੍ਪਧਮ੍ਮੇ ਕਿਚ੍ਚਤੋ ਪਕਾਸੇਤੁਂ. ਤੇਸਞ੍ਹਿ ਕਿਚ੍ਚਂ ਸਤ੍ਤਸਨ੍ਤਾਨੇਯੇਵ ਪਾਕਟਂ ਹੋਤੀਤਿ ਪੁਗ੍ਗਲਾਧਿਟ੍ਠਾਨਾਯ ਕਥਾਯ ਤਂ ਵਤ੍ਤਬ੍ਬਂ. ਏਸ ਨਯੋ ਸੇਸੇਸੁਪਿ. ਯਸ੍ਮਿਞ੍ਹਿ ਚਿਤ੍ਤੁਪ੍ਪਾਦੇ ਕਮ੍ਮਂ ਉਪ੍ਪਨ੍ਨਂ, ਤਂਸਨ੍ਤਾਨੇ ਏਵ ਤਸ੍ਸ ਫਲਸ੍ਸ ਉਪ੍ਪਤ੍ਤਿ ਕਮ੍ਮਸ੍ਸਕਤਾ. ਏਵਞ੍ਹਿ ਕਤਵਿਞ੍ਞਾਣਨਾਸੋ ਅਕਤਾਗਮੋ ਵਾ ਨਤ੍ਥੀਤਿ ਸਾ ਪੁਗ੍ਗਲਾਧਿਟ੍ਠਾਨਾਯ ਏਵ ਕਥਾਯ ਦੀਪੇਤਬ੍ਬਾ. ਤੇਹਿ ਸਤ੍ਤੇਹਿ ਕਾਤਬ੍ਬਾ ਪੁਞ੍ਞਾਦਿਕਿਰਿਯਾ ਪਚ੍ਚਤ੍ਤਪੁਰਿਸਕਾਰੋਪਿ ਸਨ੍ਤਾਨਵਸੇਨ ਨਿਪ੍ਫਾਦੇਤਬ੍ਬਤੋ ਪੁਗ੍ਗਲਾਧਿਟ੍ਠਾਨਾਯ ਏਵ ਕਥਾਯ ਦੀਪੇਤਬ੍ਬੋ.
ਆਨਨ੍ਤਰਿਯਦੀਪਨਤ੍ਥਨ੍ਤਿ ਚੁਤਿਅਨਨ੍ਤਰਂ ਫਲਂ ਅਨਨ੍ਤਰਂ ਨਾਮ, ਤਸ੍ਮਿਂ ਅਨਨ੍ਤਰੇ ਨਿਯੁਤ੍ਤਾਨਿ, ਤਨ੍ਨਿਬ੍ਬਤ੍ਤਨੇਨ ਅਨਨ੍ਤਰਕਰਣਸੀਲਾਨਿ, ਅਨਨ੍ਤਰਪਯੋਜਨਾਨਿ ਵਾਤਿ ਆਨਨ੍ਤਰਿਯਾਨਿ, ਮਾਤੁਘਾਤਾਦੀਨਿ, ਤੇਸਂ ਦੀਪਨਤ੍ਥਂ. ਤਾਨਿਪਿ ਹਿ ਸਨ੍ਤਾਨਵਸੇਨ ਨਿਪ੍ਫਾਦੇਤਬ੍ਬਤੋ ‘‘ਮਾਤਰਂ ਜੀਵਿਤਾ ਵੋਰੋਪੇਤੀ’’ਤਿਆਦਿਨਾ (ਪਟ੍ਠਾ. ੧.੧.੪੨੩) ਪੁਗ੍ਗਲਾਧਿਟ੍ਠਾਨਾਯ ਏਵ ਕਥਾਯ ਦੀਪੇਤਬ੍ਬਾਨਿ, ਤਥਾ ‘‘ਸੋ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤੀ’’ਤਿਆਦਿਨਾ (ਦੀ. ਨਿ. ੧.੫੫੬; ੩.੩੦੮; ਮ. ਨਿ. ੧.੭੭; ੨.੩੦੯; ੩.੨੩੦; ਵਿਭ. ੬੪੨, ੬੪੩) ‘‘ਸੋ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ ਏਕਮ੍ਪਿ ਜਾਤਿ’’ਨ੍ਤਿਆਦਿਨਾ (ਦੀ. ਨਿ. ੧.੨੪੪, ੨੪੫; ਮ. ਨਿ. ੧.੧੪੮, ੩੮੪, ੪੩੧; ਪਾਰਾ. ੧੨) ‘‘ਅਤ੍ਥਿ ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿਆਦਿਨਾ (ਮ. ਨਿ. ੩.੩੮੧) ਚ ਪਵਤ੍ਤਾ ਬ੍ਰਹ੍ਮਵਿਹਾਰਪੁਬ੍ਬੇਨਿਵਾਸਦਕ੍ਖਿਣਾਵਿਸੁਦ੍ਧਿਕਥਾ ਪੁਗ੍ਗਲਾਧਿਟ੍ਠਾਨਾਯ ਏਵ ਕਥਾਯ ਦੀਪੇਤਬ੍ਬਾ ਸਤ੍ਤਸਨ੍ਤਾਨਵਿਸਯਤ੍ਤਾ. ‘‘ਅਟ੍ਠ ਪੁਰਿਸਪੁਗ੍ਗਲਾ (ਸਂ. ਨਿ. ੧.੨੪੯), ਨ ਸਮਯਵਿਮੁਤ੍ਤੋ ਪੁਗ੍ਗਲੋ’’ਤਿਆਦਿਨਾ (ਪੁ. ਪ. ੧) ਚ ਪਰਮਤ੍ਥਂ ਕਥੇਨ੍ਤੋਪਿ ਲੋਕਸਮ੍ਮੁਤਿਯਾ ਅਪ੍ਪਹਾਨਤ੍ਥਂ ਪੁਗ੍ਗਲਕਥਂ ਕਥੇਸਿ. ਏਤੇਨ ਵੁਤ੍ਤਾਵਸੇਸਾਯ ਕਥਾਯ ਪੁਗ੍ਗਲਾਧਿਟ੍ਠਾਨਭਾਵੇ ਪਯੋਜਨਂ ਸਾਮਞ੍ਞਵਸੇਨ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਕਾਮਞ੍ਚੇਤਂ ਸਬ੍ਬਂ ਅਪਰਿਞ੍ਞਾਤਵਤ੍ਥੁਕਾਨਂ ਵਸੇਨ ਵੁਤ੍ਤਂ, ਪਰਿਞ੍ਞਾਤਵਤ੍ਥੁਕਾਨਮ੍ਪਿ ਪਨ ਏਵਂ ਦੇਸਨਾ ਸੁਖਾਵਹਾ ਹੋਤਿ.
ਮਹਾਜਨੋਤਿ ਲੋਕਿਯਮਹਾਜਨੋ. ਨ ਜਾਨਾਤਿ ਘਨਵਿਨਿਬ੍ਭੋਗਾਭਾਵੇਨ ਧਮ੍ਮਕਿਚ੍ਚਸ੍ਸ ਅਸਲ੍ਲਕ੍ਖਣੇਨ. ਤਤ੍ਥ ‘‘ਕਿਂ ਨਾਮੇਤਂ, ਕਥਂ ਨਾਮੇਤ’’ਨ੍ਤਿ ਸਂਸਯਪਕ੍ਖਨ੍ਦਤਾਯ ਸਮ੍ਮੋਹਂ ਆਪਜ੍ਜਤਿ. ਵਿਰੁਦ੍ਧਾਭਿਨਿਵੇਸਿਤਾਯ ਪਟਿਸਤ੍ਤੁ ਹੋਤਿ. ਜਾਨਾਤਿ ਚਿਰਪਰਿਚਿਤਤ੍ਥਾ ਵੋਹਾਰਕਥਾਯ. ਤਤੋ ਏਵ ਨ ਸਮ੍ਮੋਹਮਾਪਜ੍ਜਤਿ, ਨ ਪਟਿਸਤ੍ਤੁ ਹੋਤਿ.
ਨਪ੍ਪਜਹਨ੍ਤਿ ਵੋਹਾਰਮੁਖੇਨ ਪਰਮਤ੍ਥਸ੍ਸ ਦੀਪਨਤੋ. ਸਮਞ੍ਞਾਗਹਣਵਸੇਨ ਲੋਕੇਨ ਞਾਯਤਿ ਸਮਞ੍ਞਾਯਤਿ ਵੋਹਰੀਯਤੀਤਿ ਲੋਕਸਮਞ੍ਞਾ, ਤਾਯ ਲੋਕਸਮਞ੍ਞਾਯ. ਤਸ੍ਸ ਤਸ੍ਸ ਅਤ੍ਥਸ੍ਸ ਵਿਭਾਵਨੇ ਲੋਕੇਨ ਨਿਚ੍ਛਿਤਂ, ਨਿਯਤਂ ਵਾ ਵੁਚ੍ਚਤਿ ਵੋਹਰੀਯਤੀਤਿ ਲੋਕਨਿਰੁਤ੍ਤਿ, ਤਸ੍ਸਂ ਲੋਕਨਿਰੁਤ੍ਤਿਯਂ. ਤਥਾ ਲੋਕੇਨ ਅਭਿਲਪੀਯਤੀਤਿ ਲੋਕਸਮਞ੍ਞਤਾਯ ਲੋਕਾਭਿਲਾਪੋ, ਤਸ੍ਮਿਂ ਲੋਕਾਭਿਲਾਪੇ ਠਿਤਾਯੇਵ ਅਪ੍ਪਹਾਨਤੋ. ਪੁਗ੍ਗਲਵਾਦਿਨੋ ਵਿਯ ਪਰਮਤ੍ਥਵਸੇਨ ਅਗ੍ਗਹੇਤ੍ਵਾ.
ਸਨ੍ਤੋਤਿ ਏਤ੍ਥ ਸਨ੍ਤਸਦ੍ਦੋ ‘‘ਦੀਘਂ ਸਨ੍ਤਸ੍ਸ ਯੋਜਨ’’ਨ੍ਤਿਆਦੀਸੁ (ਧ. ਪ. ੭੦) ਕਿਲਨ੍ਤਭਾਵੇ ਆਗਤੋ, ‘‘ਅਯਞ੍ਚ ਵਿਤਕ੍ਕੋ ਅਯਞ੍ਚ ਵਿਚਾਰੋ ਸਨ੍ਤਾ ਹੋਨ੍ਤਿ ਸਮਿਤਾ’’ਤਿਆਦੀਸੁ (ਵਿਭ. ੫੭੬) ਨਿਰੁਦ੍ਧਭਾਵੇ ਆਗਤੋ, ‘‘ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ ਗਮ੍ਭੀਰੋ ਦੁਦ੍ਦਸੋ ਦੁਰਨੁਬੋਧੋ ਸਨ੍ਤੋ ਪਣੀਤੋ’’ਤਿਆਦੀਸੁ (ਦੀ. ਨਿ. ੨.੬੭; ਮ. ਨਿ. ੧.੨੮੧; ੨.੩੩੭; ਸਂ. ਨਿ. ੨.੧੭੨; ਮਹਾਵ. ੭) ਸਨ੍ਤਞਾਣਗੋਚਰਤਾਯ, ‘‘ਉਪਸਨ੍ਤਸ੍ਸ ਸਦਾ ਸਤਿਮਤੋ’’ਤਿਆਦੀਸੁ (ਉਦਾ. ੨੭) ਕਿਲੇਸਵੂਪਸਮੇ, ‘‘ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤੀ’’ਤਿਆਦੀਸੁ (ਧ. ਪ. ੧੫) ਸਾਧੂਸੁ, ‘‘ਪਞ੍ਚਿਮੇ, ਭਿਕ੍ਖਵੇ, ਮਹਾਚੋਰਾ ਸਨ੍ਤੋ ਸਂਵਿਜ੍ਜਮਾਨਾ’’ਤਿਆਦੀਸੁ (ਪਾਰਾ. ੧੯੫) ਅਤ੍ਥਿਭਾਵੇ, ਇਧਾਪਿ ਅਤ੍ਥਿਭਾਵੇਯੇਵ. ਸੋ ਚ ਪੁਗ੍ਗਲਸਮ੍ਬਨ੍ਧੇਨ ਵੁਤ੍ਤਤ੍ਤਾ ਲੋਕਸਮਞ੍ਞਾਵਸੇਨਾਤਿ ਦਸ੍ਸੇਨ੍ਤੋ ‘‘ਲੋਕਸਙ੍ਕੇਤਵਸੇਨ ਅਤ੍ਥੀ’’ਤਿ ਆਹ. ਅਤ੍ਥੀਤਿ ਚੇਤਂ ਨਿਪਾਤਪਦਂ ਦਟ੍ਠਬ੍ਬਂ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿਆਦੀਸੁ (ਦੀ. ਨਿ. ੨.੩੭੩-੩੭੪; ਮ. ਨਿ. ੧.੧੧੦; ੩.੧੫੪; ਅ. ਨਿ. ੬.੨੯; ੧੦.੬੦) ਵਿਯ. ਸਂਵਿਜ੍ਜਮਾਨਾਤਿ ਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਉਪਲਬ੍ਭਮਾਨਾ’’ਤਿ ਆਹ. ਯਞ੍ਹਿ ਸਂਵਿਜ੍ਜਤਿ, ਤਂ ਉਪਲਬ੍ਭਤੀਤਿ. ਅਙ੍ਗਨ੍ਤਿ ਏਤੇਹਿ ਤਂਸਮਙ੍ਗਿਪੁਗ੍ਗਲਾ ਨਿਹੀਨਭਾਵਂ ਗਚ੍ਛਨ੍ਤੀਤਿ ਅਙ੍ਗਣਾਨਿ, ਰਾਗਾਦਯੋ. ਅਞ੍ਜਤਿ ਮਕ੍ਖੇਤੀਤਿ ਅਙ੍ਗਣਂ, ਮਲਾਦਿ. ਅਞ੍ਜੇਤਿ ਤਤ੍ਥ ਠਿਤਂ ਅਹੁਨ੍ਦਰਤਾਯ ਅਭਿਬ੍ਯਞ੍ਜੇਤੀਤਿ ਅਙ੍ਗਣਂ, ਵਿਵਟੋ ਭੂਮਿਪਦੇਸੋ. ਦੋਸਾਦੀਨਂ ਪਵਤ੍ਤਿਆਕਾਰਵਿਸੇਸਤਾਯ ਨਾਨਪ੍ਪਕਾਰਾ ਬਹੁਲਪ੍ਪਵਤ੍ਤਿਯਾ ਤਿਬ੍ਬਕਿਲੇਸਾ. ਪਾਪਕਾਨਨ੍ਤਿ ਲਾਮਕਾਨਂ. ਅਕੁਸਲਾਨਨ੍ਤਿ ਅਕੋਸਲ੍ਲਸਮ੍ਭੂਤਾਨਂ. ਇਚ੍ਛਾਵਚਰਾਨਨ੍ਤਿ ਇਚ੍ਛਾਵਸੇਨ ਪਵਤ੍ਤਾਨਂ. ਸਹ ਅਙ੍ਗਣੇਨਾਤਿ ਅਙ੍ਗਣਨ੍ਤਿ ਲਦ੍ਧਨਾਮੇਨ ਯਥਾਵੁਤ੍ਤਕਿਲੇਸੇਨ ਸਹ ਵਤ੍ਤਤਿ.
ਅਤ੍ਥੀਤਿਪਿ ਨ ਜਾਨਾਤਿ ਤਾਦਿਸਸ੍ਸ ਯੋਨਿਸੋਮਨਸਿਕਾਰਸ੍ਸ ਅਭਾਵਾ. ਯੇਸਂ ਕਿਲੇਸਾਨਂ ਅਤ੍ਥਿਤਾ, ਤੇਸਂ ਸਪ੍ਪਟਿਭਯਤਾ ਵਿਸੇਸਤੋ ਜਾਨਿਤਬ੍ਬਾਤਿ ਦਸ੍ਸੇਤੁਂ ‘‘ਇਮੇ ਕਿਲੇਸਾ ਨਾਮਾ’’ਤਿਆਦਿ ਵੁਤ੍ਤਂ. ਤਤ੍ਥ ਕਕ੍ਖਲ਼ਾਤਿ ਫਰੁਸਾ. ਵਾਲ਼ਾਤਿ ਕੁਰੁਰਾ. ਨ ਗਹਿਤਬ੍ਬਾਤਿ ਨ ਉਪ੍ਪਾਦੇਤਬ੍ਬਾ. ਯਾਥਾਵਸਰਸਤੋਤਿ ਯਥਾਭੂਤਸਭਾਵਤੋ. ਏਵਞ੍ਚਾਤਿ ‘‘ਇਮੇ ਕਿਲੇਸਾ ਨਾਮਾ’’ਤਿਆਦਿਨਾ ਵੁਤ੍ਤਪ੍ਪਕਾਰੇਨ. ਯੇਨ ਵਾ ਤੇਨ ਵਾਤਿ ਨਵਕਮ੍ਮੇਸੁ ਵਾ ਪਰਿਯਤ੍ਤਿਧੁਤਙ੍ਗਾਦੀਸੁ ਵਾ ਯੇਨ ਵਾ ਤੇਨ ਵਾ. ਤਤ੍ਰਾਤਿ ਨਿਦ੍ਧਾਰਣੇ ਭੁਮ੍ਮਂ. ਤਂ ਪਨ ਨਿਦ੍ਧਾਰਣਂ ਸਙ੍ਗਣਾਨਙ੍ਗਣਸਮੁਦਾਯਤੋਤਿ ਦਸ੍ਸੇਨ੍ਤੋ ‘‘ਚਤੂਸੁ ਪੁਗ੍ਗਲੇਸੂ’’ਤਿ ਵਤ੍ਵਾ ਪੁਨ ਤਦੇਕਦੇਸਤੋ ਦਸ੍ਸੇਨ੍ਤੋ ‘‘ਤੇਸੁ ਵਾ ਦ੍ਵੀਸੁ ਸਾਙ੍ਗਣੇਸੂ’’ਤਿ ਆਹ. ਤਞ੍ਹਿ ਦ੍ਵਯਂ ਪਠਮਂ ਹੀਨਸੇਟ੍ਠਭਾਵੇਨ ਨਿਦ੍ਧਾਰੀਯਤਿ ਪਠਮਂ ਉਦ੍ਦਿਟ੍ਠਤ੍ਤਾ. ਨਿਦ੍ਧਾਰਣਞ੍ਹਿ ਕ੍ਵਚਿ ਕੁਤੋਚਿ ਕੇਨਚਿ ਹੋਤੀਤਿ.
੫੮. ਕਿਞ੍ਚਾਪਿ ਅਞ੍ਞਤ੍ਥ ‘‘ਜਨਕੋ ਹੇਤੁ, ਪਰਿਗ੍ਗਾਹਤੋ ਪਚ੍ਚਯੋ, ਅਸਾਧਾਰਣੋ ਹੇਤੁ, ਸਾਧਾਰਣੋ ਪਚ੍ਚਯੋ, ਸਭਾਗੋ ਹੇਤੁ, ਅਸਭਾਗੋ ਪਚ੍ਚਯੋ, ਪੁਬ੍ਬਕਾਲਿਕੋ ਹੇਤੁ, ਸਹਪ੍ਪਵਤ੍ਤੋ ਪਚ੍ਚਯੋ’’ਤਿਆਦਿਨਾ ਹੇਤੁਪਚ੍ਚਯਾ ਵਿਭਜ੍ਜ ਵੁਚ੍ਚਨ੍ਤਿ, ਇਧ ਪਨ ‘‘ਚਤ੍ਤਾਰੋ ਖੋ, ਭਿਕ੍ਖਵੇ, ਮਹਾਭੂਤਾ ਹੇਤੂ, ਚਤ੍ਤਾਰੋ ਮਹਾਭੂਤਾ ਪਚ੍ਚਯਾ ਰੂਪਕ੍ਖਨ੍ਧਸ੍ਸ ਪਞ੍ਞਾਪਨਾਯਾ’’ਤਿਆਦੀਸੁ (ਮ. ਨਿ. ੩.੮੫) ਵਿਯ ਹੇਤੁਪਚ੍ਚਯਸਦ੍ਦਾ ਸਮਾਨਤ੍ਥਾਤਿ ਦਸ੍ਸੇਤੁਂ ‘‘ਉਭਯੇਨਪਿ ਕਾਰਣਮੇਵ ਪੁਚ੍ਛਤੀ’’ਤਿ ਵੁਤ੍ਤਂ. ਤਤ੍ਥ ਉਭਯੇਨਾਤਿ ਹੇਤੁਪਚ੍ਚਯਵਚਨਦ੍ਵਯੇਨ. ਪੁਚ੍ਛਤਿ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਸਨਂ ਵਡ੍ਢੇਤੁਕਾਮੋ. ਕਿਞ੍ਚਾਪੀਤਿ ਅਨੁਜਾਨਨਸਮ੍ਭਾਵਨਤ੍ਥੇ ਨਿਪਾਤੋ. ਕਿਂ ਅਨੁਜਾਨਾਤਿ? ਸਮਾਨੇਪਿ ਦ੍ਵਿਨ੍ਨਂ ਸਾਙ੍ਗਣਭਾਵੇ ਤਸ੍ਸਾ ਪਜਾਨਨਾਪ੍ਪਜਾਨਨਹੇਤੁਕਤਂ ਤੇਸਂ ਸੇਟ੍ਠਹੀਨਤਂ. ਕਿਂ ਸਮ੍ਭਾਵੇਤਿ? ਥੇਰਸ੍ਸ ਵਿਚਿਤ੍ਤਪਟਿਭਾਨਤਾਯ ਨਾਨਾਹੇਤੂਪਮਾਹਿ ਅਲਙ੍ਕਤ੍ਵਾ ਯਥਾਪੁਚ੍ਛਿਤਸ੍ਸ ਅਤ੍ਥਸ੍ਸ ਪਾਕਟਕਰਣਂ. ਤੇਨਾਹ ‘‘ਨਪ੍ਪਜਾਨਾਤੀ’’ਤਿਆਦਿ. ਹੇਤੁ ਚੇਵ ਪਚ੍ਚਯੋ ਚ ਸੇਟ੍ਠਹੀਨਭਾਵੇ. ਤਥਾਅਕ੍ਖਾਤਬ੍ਬਤਾਪਿ ਹਿ ਤੇਸਂ ਤਨ੍ਨਿਮਿਤ੍ਤਾ ਏਵਾਤਿ.
੫੯. ਤਨ੍ਤਿ ਤੇਸਂ ਦ੍ਵਿਨ੍ਨਂ ਪੁਗ੍ਗਲਾਨਂ ਹੀਨਸੇਟ੍ਠਤਾਯ ਕਾਰਣਂ. ਓਪਮ੍ਮੇਹਿ ਪਾਕਟਤਰਂ ਕਤ੍ਵਾ ਦਸ੍ਸੇਤੁਂ. ਏਤਨ੍ਤਿ ਸੁਤ੍ਤੇ ਅਨਨ੍ਤਰਂ ਵੁਚ੍ਚਮਾਨਂ ਵੀਰਿਯਾਰਮ੍ਭਾਭਾਵੇਨ ਅਙ੍ਗਣਸ੍ਸ ਅਪ੍ਪਹਾਨਂ. ਤੇਨਾਹ ‘‘ਨ ਛਨ੍ਦਂ…ਪੇ… ਸਨ੍ਧਾਯਾਹਾ’’ਤਿ. ਕਤ੍ਤੁਕਮ੍ਯਤਾਛਨ੍ਧਨ੍ਤਿ ਕਤ੍ਤੁਕਮ੍ਯਤਾਸਙ੍ਖਾਤਂ ਅਙ੍ਗਣਸ੍ਸ ਪਹਾਤੁਕਮ੍ਯਤਾਵਸੇਨ ਉਪ੍ਪਜ੍ਜਨਕਕੁਸਲਧਮ੍ਮਚ੍ਛਨ੍ਦਂ. ਨ ਜਨੇਸ੍ਸਤੀਤਿ ਨ ਉਪ੍ਪਾਦੇਸ੍ਸਤਿ. ਕੁਸਲੋ ਵਾਯਾਮੋ ਨਾਮ ਛਨ੍ਦਤੋ ਬਲਵਾਤਿ ਆਹ ‘‘ਤਤੋ ਬਲਵਤਰਂ ਵਾਯਾਮਂ ਨ ਕਰਿਸ੍ਸਤੀ’’ਤਿ, ਛਨ੍ਦਮ੍ਪਿ ਅਨੁਪ੍ਪਾਦੇਨ੍ਤੋ ਕਥਂ ਤਜ੍ਜਂ ਵਾਯਾਮਂ ਕਰਿਸ੍ਸਤੀਤਿ ਅਧਿਪ੍ਪਾਯੋ. ਥਾਮਗਤਵੀਰਿਯਂ ਉਸ੍ਸੋਲ਼੍ਹੀਭਾਵਪ੍ਪਤ੍ਤਂ ਦਲ਼੍ਹਂ ਵੀਰਿਯਂ. ਸਾਙ੍ਗਣਗ੍ਗਹਣੇਨੇਵ ਅਙ੍ਗਣਾਨਂ ਕਿਲੇਸਵਤ੍ਥੁਤਾਯ ਚਿਤ੍ਤਸ੍ਸ ਸਂਕਿਲਿਟ੍ਠਤਾਯ ਸਦ੍ਧਾਯ ਪੁਨ ਸਂਕਿਲਿਟ੍ਠਗ੍ਗਹਣਂ ਸਵਿਸੇਸਂ ਕਿਲਿਟ੍ਠਭਾਵਵਿਭਾਵਨਨ੍ਤਿ ਆਹ ‘‘ਸੁਟ੍ਠੁਤਰਂ ਕਿਲਿਟ੍ਠਚਿਤ੍ਤੋ’’ਤਿ. ਮਲਿਨਚਿਤ੍ਤੋਤਿਆਦੀਸੁਪਿ ‘‘ਤੇਹਿਯੇਵਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਉਕ੍ਖਲਿਪੁਚ੍ਛਨਚੋਲ਼ਕਸ੍ਸ ਵਿਯ ਵਸਾਪੀਤਪਿਲੋਤਿਕਾ ਵਿਯ ਚ ਦੁਮ੍ਮੋਚਨੀਯਭਾਵੇਨ ਮਲਗ੍ਗਹਣਂ ਮਲੀਨਤਾ, ਪੀਲ਼ਨਂ ਹਿਂਸਨਂ ਅਵਿਪ੍ਫਾਰਿਕਤਾਕਰਣਂ ਵਿਬਾਧਨਂ ਦਰਥਪਰਿਲ਼ਾਹੁਪ੍ਪਾਦਨੇਨ ਪਰਿਦਹਨਂ ਉਪਤਾਪਨਂ, ਕਾਲਨ੍ਤਿ ਕਾਲਨਂ, ਯਥਾਗਹਿਤਸ੍ਸ ਅਤ੍ਤਭਾਵਸ੍ਸ ਖੇਪਨਂ ਆਯੁਕ੍ਖਯਨ੍ਤਿ ਅਤ੍ਥੋ. ਕਰਿਸ੍ਸਤੀਤਿ ਪਵਤ੍ਤੇਸ੍ਸਤਿ, ਪਾਪੁਣਿਸ੍ਸਤੀਤਿ ਵੁਤ੍ਤਂ ਹੋਤਿ. ਤਥਾਭੂਤੋ ਚ ਪਾਣਂ ਚਜਿਸ੍ਸਤਿ ਨਾਮਾਤਿ ਆਹ ‘‘ਮਰਿਸ੍ਸਤੀ’’ਤਿ.
ਸੇਯ੍ਯਥਾਪੀਤਿ ਉਪਮਾਨਿਦਸ੍ਸਨੇ ਨਿਪਾਤੋ. ਤਦਤ੍ਥਂ ਦਸ੍ਸੇਨ੍ਤੋ ‘‘ਯਥਾ ਨਾਮਾ’’ਤਿ ਆਹ. ਪਂਸੁਆਦਿਨਾਤਿ ਆਦਿ-ਸਦ੍ਦੇਨ ਜਲ੍ਲਾਦੀਨਂ ਸਙ੍ਗਹੋ, ਘਂਸਨਾਦੀਹੀਤਿ ਆਦਿ-ਸਦ੍ਦੇਨ ਛਾਰਿਕਾਪਰਿਮਜ੍ਜਨਾਦੀਨਂ ਸਙ੍ਗਹੋਤਿ. ‘‘ਅਭਿਰੂਪਾਯ ਕਞ੍ਞਾ ਦਾਤਬ੍ਬਾ’’ਤਿਆਦੀਸੁ ਵਿਯ ਅਨ੍ਤਰੇਨਪਿ ਅਤਿਸਯਤ੍ਥਬੋਧਕਸਦ੍ਦੇਨ ਅਤਿਸਯਤ੍ਥੋ ਞਾਯਤੀਤਿ ਆਹ ‘‘ਮਲਗ੍ਗਹਿਤਤਰਾਤਿ ਵੁਤ੍ਤਂ ਹੋਤੀ’’ਤਿ. ਪਟਿਪੁਚ੍ਛਾਵਚਨਨ੍ਤਿ ਅਨੁਮਤਿਪੁਚ੍ਛਾਵਿਸੇਸੋ. ਏਵਂ ਕਰਿਯਮਾਨਾਤਿ ਅਪਰਿਭੋਗ-ਅਪਰਿਯੋਦਪਨਰਜੋਪਥਨਿਕ੍ਖਿਪਨੇਹਿ ਕਿਲਿਟ੍ਠਭਾਵਂ ਆਪਾਦਿਯਮਾਨਾ. ਓਪਮ੍ਮਂ ਸਮ੍ਪਟਿਪਾਦੇਨ੍ਤੋਤਿ ਯਥੂਪਨੀਤਂ ਉਪਮਂ ਉਪਮੇਯ੍ਯਤ੍ਥੇਨ ਸਮਂ ਕਤ੍ਵਾ ਪਟਿਪਾਦੇਨ੍ਤੋ, ਸਂਸਨ੍ਦੇਨ੍ਤੋਤਿ ਅਤ੍ਥੋ. ਸਾਙ੍ਗਣੋ ਪੁਗ੍ਗਲੋਤਿ ਸਾਙ੍ਗਣੋ ਤਸ੍ਮਿਂ ਅਤ੍ਤਭਾਵੇ ਅਸੁਜ੍ਝਨਕਪੁਗ੍ਗਲੋ. ਆਪਣਾਦਿਤੋ ਕੁਲਘਰਂ ਆਨੀਤਸ੍ਸ ਮਲਗ੍ਗਹਿਤਕਂਸਭਾਜਨਸ੍ਸ ਤਤ੍ਥ ਲਦ੍ਧਬ੍ਬਾਯ ਵਿਸੁਦ੍ਧਿਯਾ ਅਲਾਭਤੋ ਯਥਾ ਅਨੁਕ੍ਕਮੇਨ ਸਂਕਿਲਿਟ੍ਠਤਰਭਾਵੋ, ਏਵਂ ਘਰਤੋ ਨਿਕ੍ਖਨ੍ਤਸ੍ਸ ਪੁਗ੍ਗਲਸ੍ਸ ਪਬ੍ਬਜ੍ਜਾਯ ਲਦ੍ਧਬ੍ਬਾਯ ਵਿਸੁਦ੍ਧਿਯਾ ਅਲਾਭਤੋ ਅਨੁਕ੍ਕਮੇਨ ਸਂਕਿਲਿਟ੍ਠਤਰਭਾਵੋਤਿ ਦਸ੍ਸੇਨ੍ਤੋ ‘‘ਸਂਕਿਲਿਟ੍ਠਕਂਸਪਾਤਿਯਾ’’ਤਿਆਦਿਮਾਹ. ਸਂਕਿਲਿਟ੍ਠਤਰਭਾਵੋ ਚ ਨਾਮ ਪਬ੍ਬਜਿਤਸ੍ਸ ਆਜੀਵਵਿਪਤ੍ਤਿਵਸੇਨ ਵਾ ਸਿਯਾ ਆਚਾਰਦਿਟ੍ਠਿਸੀਲਵਿਪਤ੍ਤੀਸੁ ਅਞ੍ਞਤਰਵਸੇਨ ਵਾਤਿ ਤਂ ਸਬ੍ਬਂ ਸਙ੍ਗਹੇਤ੍ਵਾ ਦਸ੍ਸੇਤੁਂ ‘‘ਤਸ੍ਸ ਪੁਗ੍ਗਲਸ੍ਸਾ’’ਤਿਆਦਿ ਵੁਤ੍ਤਂ. ਪਾਚਿਤ੍ਤਿਯਵੀਤਿਕ੍ਕਮਨਗ੍ਗਹਣੇਨ ਹਿ ਏਕਚ੍ਚਦਿਟ੍ਠਿਵਿਪਤ੍ਤਿਯਾਪਿ ਸਙ੍ਗਹੋ ਹੋਤੀਤਿ. ਏਤ੍ਥ ਠਿਤਸ੍ਸਾਤਿ ਏਤਿਸ੍ਸਂ ਆਜੀਵਵਿਪਤ੍ਤਿਯਂ ਠਿਤਸ੍ਸ. ਇਮਿਨਾ ਨਯੇਨ ਸੇਸੇਸੁਪਿ ਯਥਾਰਹਂ ਵਤ੍ਤਬ੍ਬਂ. ਸਬ੍ਬਪਰਿਸਸਾਧਾਰਣਾ ਮਹਾਥੇਰਸ੍ਸ ਦੇਸਨਾ, ਤਸ੍ਮਾ ਗਹਪਤਿਵਸੇਨਪਿ ਯੋਜੇਤਬ੍ਬਂ. ਤਤ੍ਥ ਉਕ੍ਕਂਸਗਤਸਂਕਿਲਿਟ੍ਠਤਰਭਾਵਂ ਦਸ੍ਸੇਨ੍ਤੋ ‘‘ਮਾਤੁਘਾਤਾਦਿਆਨਨ੍ਤਰਿਯਕਰਣ’’ਨ੍ਤਿ ਆਹ. ਅਵਿਸੋਧੇਤ੍ਵਾਤਿ ਯਥਾ ਅਤ੍ਤਨੋ ਸੀਲੇ ਵਾ ਦਿਟ੍ਠਿਯਾ ਵਾ ਵਿਸੁਦ੍ਧਿ ਹੋਤਿ, ਏਵਂ ਕਿਲੇਸਮਲਿਨਚਿਤ੍ਤਸਨ੍ਤਾਨਂ ਅਵਿਸੋਧੇਤ੍ਵਾ.
ਭਬ੍ਬਪੁਗ੍ਗਲੋਤਿ ਉਪਨਿਸ੍ਸਯਾਦਿਸਮ੍ਪਤ੍ਤਿਯਾ ਤਸ੍ਮਿਂ ਅਤ੍ਤਭਾਵੇ ਵਿਸੁਦ੍ਧਪੁਗ੍ਗਲੋ. ਆਦਿਂ ਕਤ੍ਵਾਤਿ ਇਮਿਨਾ ਧੋਵਨਘਂਸਨਾਦੀਹਿ ਪਰਿਯੋਦਪਨਂ ਆਦਿਮਨ੍ਤਂ ਕਤ੍ਵਾ ਵਦਤਿ. ਸੁਦ੍ਧਟ੍ਠਾਨਂ ਯਤ੍ਥ ਵਾ ਨ ਰਜੇਨ ਓਕਿਰੀਯਤਿ. ਦਣ੍ਡਕਮ੍ਮਂ ਕਤ੍ਵਾਤਿ ‘‘ਏਤ੍ਤਕਾ ਉਦਕਾ, ਵਾਲੁਕਾ ਵਾ ਆਨੇਤਬ੍ਬਾ’’ਤਿ ਦਣ੍ਡਕਮ੍ਮਂ ਕਤ੍ਵਾ. ਏਤ੍ਥ ਠਿਤਸ੍ਸਾਤਿ ਪਰਿਸੁਦ੍ਧੇ ਸੀਲੇ ਠਿਤਸ੍ਸ. ਸਮ੍ਮਾਵਤ੍ਤਪਟਿਪਤ੍ਤਿਸੀਲੇਹਿ ਸੀਲਵਿਸੁਦ੍ਧਿ ਦਸ੍ਸਿਤਾ. ਵਤ੍ਤਪਟਿਪਤ੍ਤਿਯਾਪਿ ਹਿ ਅਙ੍ਗਣਾਨਂ ਵਿਕ੍ਖਮ੍ਭਨਂ ਸਿਯਾ. ਤਥਾ ਹਿਸ੍ਸਾ ਸਂਕਿਲਿਟ੍ਠਕਂਸਪਾਤਿਯਾ ਪਰਿਸੁਦ੍ਧਪਰਿਯੋਦਾਤਭਾਵੋ ਉਪਮਾਭਾਵੇਨ ਵੁਤ੍ਤੋ. ਪਨ੍ਤਸੇਨਾਸਨਵਾਸੋ ਕਿਲੇਸਵਿਕ੍ਖਮ੍ਭਨਂ ਕਿਲੇਸਾਨਂ ਤਦਙ੍ਗਨਿਵਾਰਣਂ. ਸੋਤਾਪਤ੍ਤਿਫਲਾਧਿਗਮੋ…ਪੇ… ਅਰਹਤ੍ਤਸਚ੍ਛਿਕਿਰਿਯਾਤਿ ਸਤ੍ਤਸੁਪਿ ਠਾਨੇਸੁ ‘‘ਪਰਿਸੁਦ੍ਧਪਰਿਯੋਦਾਤਭਾਵੋ ਵਿਯਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਪਬ੍ਬਜਿਤਸ੍ਸ ਹਿ ਵਿਸੁਦ੍ਧਿ ਨਾਮ ਹੇਟ੍ਠਿਮਨ੍ਤੇਨ ਸੀਲਵਿਸੁਦ੍ਧਿਯਾ ਵਾ ਸਿਯਾ ਕਮ੍ਮਟ੍ਠਾਨਾਨੁਯੋਗਵਸੇਨ ਵਿਵੇਕਵਾਸੇਨ ਝਾਨਸ੍ਸਾਧਿਗਮੇਨ ਵਾ ਵਿਪਸ੍ਸਨਾਭਾਵਨਾਯ ਵਾ ਸਾਮਞ੍ਞਫਲਾਧਿਗਮੇਨ ਵਾਤਿ.
ਰਾਗਟ੍ਠਾਨਿਯਨ੍ਤਿ ਰਾਗੁਪ੍ਪਤ੍ਤਿਹੇਤੁਭੂਤਂ. ਵਿਸਭਾਗਾਰਮ੍ਮਣਂ ਸਨ੍ਧਾਯ ਵਦਤਿ ‘‘ਇਟ੍ਠਾਰਮ੍ਮਣ’’ਨ੍ਤਿ. ਤਸ੍ਮਿਨ੍ਤਿ ਇਟ੍ਠਾਰਮ੍ਮਣੇ. ਵਿਪਨ੍ਨਸ੍ਸਤੀਤਿ ਮੁਟ੍ਠਸ੍ਸਤਿ. ਤਂ ਨਿਮਿਤ੍ਤਨ੍ਤਿ ਸੁਭਨਿਮਿਤ੍ਤਂ. ਆਵਜ੍ਜਿਸ੍ਸਤੀਤਿ ਅਯੋਨਿਸੋ ਆਵਜ੍ਜਿਸ੍ਸਤਿ. ਸਯਮੇਵ ਅਞ੍ਞੇਨ ਅਵੋਮਿਸ੍ਸੋ. ਕੁਸਲਵਾਰਪਚ੍ਛਿਨ੍ਦਨਮੇਵ ਚੇਤ੍ਥ ਅਨੁਦ੍ਧਂਸਨਂ ਦਟ੍ਠਬ੍ਬਂ. ਸੇਸਨ੍ਤਿ ‘‘ਸਾਙ੍ਗਣੋ ਸਂਕਿਲਿਟ੍ਠਚਿਤ੍ਤੋ’’ਤਿਆਦਿ. ਵੁਤ੍ਤਨਯਾਨੁਸਾਰੇਨਾਤਿ ਪਠਮਵਾਰੇ ਵੁਤ੍ਤਨਯਾਨੁਸਾਰੇਨ. ਸਬ੍ਬਨ੍ਤਿ ਮਾਤੁਘਾਤਾਦਿਆਨਨ੍ਤਰਿਯਕਰਣਪਰਿਯੋਸਾਨਂ ਸਬ੍ਬਂ ਉਪਮਾਸਂਸਨ੍ਦਨਵਚਨਂ.
ਅਤਿਵਿਰਹਾਭਾਵਤੋਤਿ ਸਤਿਸਮ੍ਮੋਸਾਭਾਵਤੋ, ਉਪਟ੍ਠਿਤਸ੍ਸਤਿ ਭਾਵਤੋਤਿ ਅਤ੍ਥੋ. ਸੇਸਨ੍ਤਿ ‘‘ਸੋ ਅਰਾਗੋ’’ਤਿਆਦਿ. ‘‘ਧੋਵਨਘਂਸਨਸਣ੍ਹਛਾਰਿਕਾਪਰਿਮਜ੍ਜਨਾਦੀਹੀ’’ਤਿਆਦਿਨਾ ਦੁਤਿਯਵਾਰਾਨੁਸਾਰੇਨ. ‘‘ਕੋ ਨੁ ਖੋ’’ਤਿਆਦਿ ਪੁਚ੍ਛਾਵਸੇਨ ਆਗਤਂ, ਇਦਂ ਨਿਗਮਨਵਸੇਨਾਤਿ ਅਯਮੇਵ ਵਿਸੇਸੋ.
੬੦. ਅਙ੍ਗਣਨ੍ਤਿ ਤਤ੍ਥ ਤਤ੍ਥ ਨਾਮਤੋ ਏਵ ਵਿਭਾਵਿਤਂ, ਨ ਪਨ ਸਭਾਵਤੋ, ਪਭੇਦਤੋ ਵਾਤਿ ਸਭਾਵਾਦਿਤੋ ਵਿਭਾਵਨਂ ਸਨ੍ਧਾਯਾਹ ‘‘ਨਾਨਪ੍ਪਕਾਰਤੋ ਪਾਕਟਂ ਕਾਰਾਪੇਤੁਕਾਮੇਨਾ’’ਤਿ. ਇਚ੍ਛਾਯ ਅਵਚਰਾਨਨ੍ਤਿ ਇਚ੍ਛਾਵਸੇਨ ਅਵਚਰਣਾਨਂ. ਓਤਿਣ੍ਣਾਨਨ੍ਤਿ ਚਿਤ੍ਤਸਨ੍ਤਾਨਂ ਅਨੁਪਵਿਟ੍ਠਾਨਂ. ਤੇ ਪਨ ਤਤ੍ਥ ਪਚ੍ਚਯਵਸੇਨ ਨਿਬ੍ਬਤ੍ਤਤ੍ਤਾ ਪਵਤ੍ਤਾ ਨਾਮ ਹੋਨ੍ਤੀਤਿ ਆਹ ‘‘ਪਵਤ੍ਤਾਨ’’ਨ੍ਤਿ. ਨਾਨਪ੍ਪਕਾਰਾਨਨ੍ਤਿ ਵਿਸਯਭੇਦੇਨ ਪਵਤ੍ਤਿਆਕਾਰਭੇਦੇਨ ਚ ਨਾਨਾਵਿਧਾਨਂ. ਯੇਨਕਾਰਣੇਨ. ਨ ਕੇਵਲਂ ਲਾਭਤ੍ਥਿਕਤਾ ਏਵ, ਅਥ ਖੋ ਪੁਞ੍ਞਵਨ੍ਤਤਾ ਸਕ੍ਕਤਗਰੁਕਤਾ ਚ ਏਤ੍ਥ ਕਾਰਣਭਾਵੇਨ ਗਹੇਤਬ੍ਬਾਤਿ ਦਸ੍ਸੇਨ੍ਤੋ ‘‘ਪਕਤਿਯਾਪਿ ਚਾ’’ਤਿਆਦਿਮਾਹ. ਤੇਨ ਲਾਭਤ੍ਥਿਕੋਪਿ ਨ ਯੋ ਕੋਚਿ ਏਵਂ ਚਿਤ੍ਤਂ ਉਪ੍ਪਾਦੇਤਿ ਪੁਞ੍ਞਵਾ ਸਮ੍ਭਾਵਨੀਯੋਤਿ ਦਸ੍ਸੇਤਿ. ਥੇਰਾ ਅਵਜ੍ਜਪਟਿਚ੍ਛਾਦਨਭਯੇਨ ਮਜ੍ਝਿਮਾਨਂ ਆਰੋਚੇਨ੍ਤਿ, ਤਥਾ ਮਜ੍ਝਿਮਾ ਨਵਕਾਨਂ, ਨਵਕਾ ਪਨ ਅਤ੍ਤਨੋ ਨਵਕਭਾਵੇਨ ਵਿਘਾਸਾਦਾਦੀਨਂ ਆਰੋਚੇਨ੍ਤਿ ‘‘ਪਸ੍ਸਥ ਤੁਮ੍ਹਾਕਂ ਥੇਰਸ੍ਸ ਕਮ੍ਮ’’ਨ੍ਤਿ. ਵਿਘਾਸਾਦਾਦਯੋ ਨਾਮ ‘‘ਈਦਿਸਸ੍ਸ ਸਨ੍ਤਿਕੇ ਓਵਾਦਤ੍ਥਂ ਤੁਮ੍ਹੇ ਆਗਤਾ’’ਤਿ ਭਿਕ੍ਖੁਨੀਨਂ ਆਰੋਚੇਨ੍ਤਿ. ਨ ਚ ਮਂ ਭਿਕ੍ਖੂ ਜਾਨੇਯ੍ਯੁਨ੍ਤਿ ਨ ਚ ਵਤ ਮਂ ਭਿਕ੍ਖੂ ਜਾਨੇਯ੍ਯੁਂ, ਅਹੋ ਵਤ ਮਂ ਭਿਕ੍ਖੂ ਨ ਜਾਨੇਯ੍ਯੁਨ੍ਤਿ ਯੋਜਨਾ. ਠਾਨਂ ਖੋ ਪਨੇਤਨ੍ਤਿ ਏਤ੍ਥ ਖੋ-ਸਦ੍ਦੋ ਅਵਧਾਰਣਤ੍ਥੋ, ਪਨ-ਸਦ੍ਦੋ ਵਚਨਾਲਙ੍ਕਾਰੋਤਿ ਆਹ ‘‘ਅਤ੍ਥਿਯੇਵਾ’’ਤਿ. ਪੁਬ੍ਬੇ ਇਚ੍ਛੁਪ੍ਪਾਦਵਾਰਵਣ੍ਣਨਾਯ ਵੁਤ੍ਤਨਯੇਨ. ਇਤਿ-ਸਦ੍ਦੋ ਇਧ ਆਸਨ੍ਨਕਾਰਣਤ੍ਥੋਤਿ ਤਂ ਦਸ੍ਸੇਨ੍ਤੋ ‘‘ਇਮਿਨਾ ਕਾਰਣੇਨਾ’’ਤਿ ਆਹ. ਇਦਞ੍ਚ ਕੋਪਅਪ੍ਪਚ੍ਚਯਾਨਮੇਵ ਗਹਣਂ. ਤਾਦਿਸਾਨਨ੍ਤਿ ਕੋਪਅਪ੍ਪਚ੍ਚਯਾਧਿਭੂਤਾਨਨ੍ਤਿ ਅਧਿਪ੍ਪਾਯੋ.
ਅਨੁਰਹੋਤਿ ਅਨੁਰੂਪੇ ਰਹਸਿ. ਏਵਮੇਵ ਹਿ ਅਤ੍ਥਂ ਦਸ੍ਸੇਤੁਂ ‘‘ਵਿਹਾਰਪਚ੍ਚਨ੍ਤੇ’’ਤਿਆਦਿ ਵੁਤ੍ਤਂ. ਪੁਰਿਮਸਦਿਸਮੇਵਾਤਿ ‘‘ਲਾਭਤ੍ਥਿਕੋ ਹੀ’’ਤਿਆਦਿਨਾ ਵੁਤ੍ਤੇਨ ਪੁਰਿਮੇਨ ਯੋਜਨਾਨਯੇਨ ਸਦਿਸਮੇਵ.
ਚੋਦਨਾਯ ਪਟਿਪੁਗ੍ਗਲਭਾਵੋ, ਚੋਦਨਾ ਚ ਆਪਤ੍ਤਿਯਾਤਿ ਚੁਦਿਤਕੇਨ ਚੋਦਕਸ੍ਸ ਸਮਾਨਭਾਵੋ ਆਪਤ੍ਤਿਆਪਨ੍ਨਤਾਯਾਤਿ ਆਹ ‘‘ਸਮਾਨੋਤਿ ਸਾਪਤ੍ਤਿਕੋ’’ਤਿ. ਸਪ੍ਪਟਿਪੁਗ੍ਗਲੇਨੇਵਸ੍ਸ ਚੋਦਨਿਚ੍ਛਾਯ ਕਾਰਣਂ ਵਿਭਾਵੇਤੁਂ ‘‘ਅਯ’’ਨ੍ਤਿਆਦਿ ਵੁਤ੍ਤਂ. ਨ ਚਾਯਂ ਸਾਪਤ੍ਤਿਕਤਾਯ ਏਵ ਸਮਾਨਤਂ ਇਚ੍ਛਤਿ, ਅਥ ਖੋ ਅਞ੍ਞਥਾਪੀਤਿ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਅਞ੍ਞੇਨ ਵਾ ਪਟਿਪੁਗ੍ਗਲੇਨ ਸਪ੍ਪਟਿਪੁਗ੍ਗਲੋ. ਅਯਞ੍ਹਿ ‘‘ਸਪ੍ਪਟਿਪੁਗ੍ਗਲੋਵ ਮਂ ਚੋਦੇਯ੍ਯਾ’’ਤਿ ਇਚ੍ਛਤਿ ‘‘ਏਵਾਹਂ ਤਸ੍ਸ ਪਟਿਪੁਗ੍ਗਲੇਹਿ ਸਦ੍ਧਿਂ ਏਕਜ੍ਝਾਸਯੋ ਹੁਤ੍ਵਾ ਤਸ੍ਸ ਉਪਰਿ ਕਿਞ੍ਚਿ ਵਤ੍ਤੁਂ ਕਾਤੁਂ ਵਾ ਲਭਿਸ੍ਸਾਮੀ’’ਤਿ ਮਞ੍ਞਮਾਨੋ. ਇਮਸ੍ਮਿਂ ਪਨ ਪਕ੍ਖੇ ਨੋ ਅਪ੍ਪਟਿਪੁਗ੍ਗਲੋਤਿ ਨਤ੍ਥਿ ਏਤਸ੍ਸ ਪਟਿਪੁਗ੍ਗਲੋਤਿ ਅਪ੍ਪਟਿਪੁਗ੍ਗਲੋਤਿ ਏਵਮਤ੍ਥੋ ਵੇਦਿਤਬ੍ਬੋ.
‘‘ਅਹੋ ਵਤਾ’’ਤਿ ਇਦਂ ਪਦਂ ਦਿਸ੍ਸਤੀਤਿ ਸਮ੍ਬਨ੍ਧੋ, ਇਮਸ੍ਸ ਪੁਗ੍ਗਲਸ੍ਸ ਇਚ੍ਛਾਚਾਰੇ ਠਿਤਤ੍ਤਾ ਭਿਕ੍ਖੂਨਂ ਧਮ੍ਮਂ ਦੇਸੇਯ੍ਯਾਤਿ ਵਚਨਤੋ ‘‘ਤਞ੍ਚ ਖੋ ਅਨੁਮਤਿਪੁਚ੍ਛਾਯਾ’’ਤਿ ਵੁਤ੍ਤਂ. ਨ ਹੇਸ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੂ’’ਤਿਆਦਿਨਾ ਕਿਞ੍ਚਿ ਵੀਤਿਕ੍ਕਮਂ ਉਦ੍ਦਿਸ੍ਸ ਭਗਵਤਾ ਪੁਚ੍ਛਿਤਬ੍ਬਤਂ ਇਚ੍ਛਤਿ. ਨੋ ਮਗ੍ਗਂ ਵਾ ਫਲਂ ਵਾ ਵਿਪਸ੍ਸਨਂ ਵਾ ਅਨ੍ਤਰਂ ਕਤ੍ਵਾਤਿ ਮਗ੍ਗਭਾਵਨਂ ਵਾ ਫਲਸਚ੍ਛਿਕਿਰਿਯਂ ਵਾ ਸਿਖਾਪ੍ਪਤ੍ਤਵਿਪਸ੍ਸਨਾਨੁਯੋਗਂ ਵਾ ਨਿਰੋਧਸਮਾਪਜ੍ਜਨਂ ਵਾ ਝਾਨਸਮਾਪਜ੍ਜਨਮੇਵ ਵਾ ਅਨ੍ਤਰਂ ਕਾਰਣਂ ਕਤ੍ਵਾ ਭਗਵਤਾ ਅਤ੍ਤਾਨਂ ਪਟਿਪੁਚ੍ਛਿਤਬ੍ਬਂ ਨੋ ਇਚ੍ਛਤਿ. ਨਿਚ੍ਚਂ ਅਨਿਚ੍ਚਨ੍ਤਿਆਦਿਨਾ ਅਨੁਮਤਿਗ੍ਗਹਣਵਸੇਨ ਪੁਚ੍ਛਿਤਬ੍ਬਂ ਇਚ੍ਛਤਿ, ਉਤ੍ਤਾਨਮੇਵ ਕਤ੍ਵਾ ਪੁਚ੍ਛਿਤਬ੍ਬਂ ਇਚ੍ਛਤੀਤਿ ਅਤ੍ਥੋ. ਉਪਹਰਨ੍ਤੇ ਪਸ੍ਸਤੀਤਿ ਸਮ੍ਬਨ੍ਧੋ. ਅਭਬ੍ਬਟ੍ਠਾਨਭਿਕ੍ਖੁਤਾਯ ਨਿਹਰਿਸ੍ਸਨ੍ਤਿ ਸਾਸਨਤੋ.
ਤਂ ਸਮ੍ਪਤ੍ਤਿਨ੍ਤਿ ਪਰਿਵਾਰਸਮ੍ਪਤ੍ਤਿਞ੍ਚੇਵ ਭਿਕ੍ਖੂਹਿ ਕਰਿਯਮਾਨਂ ਸਕ੍ਕਾਰਗਰੁਕਾਰਸਮ੍ਪਤ੍ਤਿਞ੍ਚ. ਗਹੇਤ੍ਵਾ ਪਰਿਭੁਞ੍ਜਨ੍ਤਿ ਮਯਾ ਸਂਵਿਭਾਗੇ ਕਰਿਯਮਾਨੇ. ਸਯਮੇਵ ਪਞ੍ਞਾਯਤੀਤਿ ਸਯਮੇਵ ਗਨ੍ਤ੍ਵਾ ਭਿਕ੍ਖੂਨਂ ਪੁਰਤੋ ਅਤ੍ਤਾਨਂ ਦਸ੍ਸੇਤਿ, ਪੁਰਤੋ ਵਸਨ੍ਤਂ ਪਨ ਭਿਕ੍ਖੁ ਪੁਰਕ੍ਖਤ੍ਵਾ ਗਚ੍ਛਨ੍ਤਿਯੇਵਾਤਿ ਅਧਿਪ੍ਪਾਯੋ.
ਦਕ੍ਖਿਣੋਦਕਨ੍ਤਿ ਅਗ੍ਗਤੋ ਉਪਨੀਯਮਾਨਂ ਦਕ੍ਖਿਣੋਦਕਂ. ਯਤੋ ਏਵ-ਕਾਰੋ, ਤਤੋ ਅਞ੍ਞਤ੍ਥ ਨਿਯਮੋ ਇਚ੍ਛਿਤੋ. ਅਵਧਾਰਣਤ੍ਥਂ ਵਾ ਏਵ-ਕਾਰਗ੍ਗਹਣਨ੍ਤਿ ਕਤ੍ਵਾ ਅਹਮੇਵ ਲਭੇਯ੍ਯਨ੍ਤਿ ਅਹਂ ਲਭੇਯ੍ਯਮੇਵਾਤਿ ਏਵਮੇਤਂ ਅਵਧਾਰਣਂ ਦਟ੍ਠਬ੍ਬਨ੍ਤਿ ਅਧਿਪ੍ਪਾਯੇਨਾਹ ‘‘ਅਹਮੇਵ ਲਭੇਯ੍ਯਨ੍ਤਿ ਇਚ੍ਛਾ ਨਾਤਿਮਹਾਸਾਵਜ੍ਜਾ’’ਤਿ, ਅਞ੍ਞਥਾ ਯਥਾਰੁਤਵਸੇਨ ਅਵਧਾਰਣੇ ਗਯ੍ਹਮਾਨੇ ‘‘ਨ ਅਞ੍ਞੇ ਲਭੇਯ੍ਯੁ’’ਨ੍ਤਿ ਅਯਮੇਵੇਤ੍ਥ ਅਤ੍ਥੋ ਸਿਯਾਤਿ. ਪਾਸਾਦਿਕੋ ਹੋਤੀਤਿ ਇਦਂ ਤਸ੍ਸ ਅਗ੍ਗਾਸਨਾਦਿਪਚ੍ਚਾਸੀਸਨਾਯ ਕਾਰਣਦਸ੍ਸਨਂ.
ਅਨੁਮੋਦਨਨ੍ਤਿ ਮਙ੍ਗਲਾਮਙ੍ਗਲੇਸੁ ਅਨੁਮੋਦਨਾਵਸੇਨ ਪਵਤ੍ਤੇਤਬ੍ਬਧਮ੍ਮਕਥਂ. ਖਣ੍ਡਾਨੁਮੋਦਨਨ੍ਤਿ ਅਨੁਮੋਦਨੇਕਦੇਸਂ. ‘‘ਪੁਬ੍ਬੇ ਅਨੁਮੋਦਿਤਪੁਬ੍ਬੋ ਅਨੁਮੋਦਤੂ’’ਤਿ ਅਵਤ੍ਵਾ ਥੇਰੇਨ ਵੁਤ੍ਤਮਤ੍ਤੇਯੇਵ.
ਤਾਦਿਸੇਸੁ ਠਾਨੇਸੂਤਿ ਤਾਦਿਸੇਸੁ ਪੇਸਲਾਨਂ ਬਹੁਸ੍ਸੁਤਾਨਂ ਵਸਨਟ੍ਠਾਨੇਸੁ. ਸਬ੍ਬਮ੍ਪਿ ਰਤਿਂ ਪਵਤ੍ਤਨਤੋ ਸਬ੍ਬਰਤ੍ਤਿਕਾਨਿ. ਵਿਨਿਚ੍ਛਯਕੁਸਲਾਨਨ੍ਤਿ ਅਨੇਕਵਿਹਿਤੇਸੁ ਕਙ੍ਖਟ੍ਠਾਨਿਯੇਸੁ ਕਙ੍ਖਾਵਿਨਯਨਾਯ ਤਂ ਤਂ ਪਞ੍ਹਾਨਂ ਵਿਨਿਚ੍ਛਯੇ ਕੁਸਲਾਨਂ ਛੇਕਾਨਂ. ਤੇਸੁ ਤੇਸੁ ਧਮ੍ਮਕਥਿਕੇਸੁ ਅਜ੍ਝਿਟ੍ਠੇਸੁ ਵਾਰੇਨ ਧਮ੍ਮਂ ਕਥੇਨ੍ਤੇਸੁ ‘‘ਅਯਂ ਬ੍ਯਤ੍ਤੋ’’ਤਿ ਧਮ੍ਮਜ੍ਝੇਸਕੇਨ ਅਜ੍ਝਿਟ੍ਠਤ੍ਤਾ ਓਕਾਸਂ ਅਲਭਮਾਨੋ.
ਸਕ੍ਕਚ੍ਚਞ੍ਚ ਕਰੇਯ੍ਯੁਨ੍ਤਿ ਭਿਕ੍ਖੂ ਯਂ ਮਮ ਅਭਿਵਾਦਨਪਚ੍ਚੁਟ੍ਠਾਨਞ੍ਜਲਿਕਮ੍ਮਸਾਮੀਚਿਕਮ੍ਮਾਦਿਂ ਕਰੋਨ੍ਤਿ. ਤਂ ਆਦਰੇਨੇਵ ਕਰੇਯ੍ਯੁਂ, ਯਞ੍ਚ ਮੇ ਪਰਿਕ੍ਖਾਰਜਾਤਂ ਪਟਿਯਾਦੇਨ੍ਤਿ, ਤਮ੍ਪਿ ਸੁਨ੍ਦਰਂ ਸਮ੍ਮਦੇਵ ਅਭਿਸਙ੍ਖਤਂ ਕਰੇਯ੍ਯੁਨ੍ਤਿ ਅਤ੍ਥੋ. ਭਾਰਿਯਨ੍ਤਿ ਪਾਸਾਣਚ੍ਛਤ੍ਤਂ ਵਿਯ ਗਰੁਕਾਤਬ੍ਬਂ. ਏਤਂ ਵਿਧਿਨ੍ਤਿ ਏਤਂ ‘‘ਸਕ੍ਕਰੇਯ੍ਯੁ’’ਨ੍ਤਿਆਦਿਨਾ ਵੁਤ੍ਤਸਕ੍ਕਾਰਾਦਿਵਿਧਿਂ. ਤੇਨਾਤਿ ਤੇਨ ਕਾਰਣੇਨ, ਬਾਹੁਸਚ੍ਚਾਦਿਗੁਣਵਿਸੇਸਵਤੋ ਏਵ ਸਕ੍ਕਾਰਾਦੀਨਂ ਅਰਹਤ੍ਤਾਤਿ ਅਤ੍ਥੋ. ਏਵਰੂਪਨ੍ਤਿ ਈਦਿਸਂ ‘‘ਪਿਯੋ ਗਰੂ’’ਤਿਆਦਿਨਾ (ਅ. ਨਿ. ੭.੩੭) ਵੁਤ੍ਤਪ੍ਪਕਾਰਂ. ਏਵਂ ਕਰੇਯ੍ਯੁਨ੍ਤਿ ਏਵਂ ‘‘ਸਕ੍ਕਰੇਯ੍ਯੁ’’ਨ੍ਤਿਆਦਿਨਾ ਵੁਤ੍ਤਪ੍ਪਕਾਰਂ ਸਕ੍ਕਾਰਾਦਿਂ ਕਰੇਯ੍ਯੁਂ. ਏਸ ਨਯੋਤਿ ਯੋਯਂ ਭਿਕ੍ਖੁਵਾਰੇ ਵੁਤ੍ਤਵਿਧਿ, ਏਸੇਵ ਨਯੋ. ਇਤੋ ਪਰੇਸੁ ਭਿਕ੍ਖੁਨੀਵਾਰਾਦੀਸੁ ਵਾਰੇਸੁ.
ਅਹਮੇਵ ਲਾਭੀ ਅਸ੍ਸਨ੍ਤਿ ਏਤ੍ਥਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਅਵਧਾਰਣਂ ਗਹੇਤਬ੍ਬਂ. ਪਿਣ੍ਡਪਾਤਸ੍ਸ ਪਣੀਤਤਾ ਉਪਸੇਚਨਾਦਿਵਸੇਨਾਤਿ ਆਹ ‘‘ਸਪ੍ਪਿਤੇਲਮਧੁਸਕ੍ਖਰਾਦਿਪੂਰਿਤਾਨ’’ਨ੍ਤਿ. ਮਞ੍ਚਪੀਠਾਦੀਨਨ੍ਤਿ ਨਿਦਸ੍ਸਨਮਤ੍ਤਂ ਉਤੁਸਪ੍ਪਾਯਾਨਂ ਨਿਵਾਤਾਨਂ ਫਸ੍ਸਿਤਤਲਾਨਂ ਪਿਹਿਤਦ੍ਵਾਰਕਵਾਲ਼ਵਾਤਪਾਨਾਦੀਨਮ੍ਪਿ ਪਣੀਤਸੇਨਾਸਨਭਾਵਤੋ. ਆਦਿ-ਸਦ੍ਦੇਨ ਵਾ ਤੇਸਮ੍ਪਿ ਗਹਣਂ ਦਟ੍ਠਬ੍ਬਂ. ਸਬ੍ਬਤ੍ਥਾਪੀਤਿ ਸਬ੍ਬੇਸੁ ਤੇਸੁ ਚਤੂਸੁਪਿ ਪਚ੍ਚਯਵਾਰੇਸੁ.
੬੧. ਕਾਯਕਮ੍ਮਂ ਦਿਸ੍ਵਾਤਿ ਇਦਂ ਨ ਕਾਯਕਮ੍ਮਂ ਚਕ੍ਖੁਵਿਞ੍ਞੇਯ੍ਯਂ, ਕਾਯਕਮ੍ਮੁਨਾ ਪਨ ਸਹ ਪਵਤ੍ਤਂ ਓਟ੍ਠਪਰਿਪ੍ਫਨ੍ਦਨਂ ਭਾਕੁਟਿਕਰਣਂ ਕਾਯਙ੍ਗਾਦਿਦਸ੍ਸਨਂ ਕਾਯਕਮ੍ਮਦਸ੍ਸਨਂ ਵਿਯ ਹੋਤੀਤਿ ਕਤ੍ਵਾ ਵੁਤ੍ਤਂ. ਵਚੀਕਮ੍ਮਂ ਸੁਤ੍ਵਾਤਿ ਏਤ੍ਥਾਪਿ ਏਸੇਵ ਨਯੋ, ਤਸ੍ਮਾ ਕਾਯਵਿਕਾਰਜਨਕਾ ਧਮ੍ਮਾ ‘‘ਦਿਸ੍ਸਨ੍ਤੀ’’ਤਿ ਵੁਤ੍ਤਾ, ਵਚੀਵਿਕਾਰਜਨਕਾ ‘‘ਸੂਯਨ੍ਤੀ’’ਤਿ. ਤਤੋ ਏਵ ਚ ਤੇ ਪਚ੍ਚਕ੍ਖਕਾਲੇ ਸਮ੍ਮੁਖਕਾਲੇ ਦਿਸ੍ਸਨ੍ਤਿ ਨਾਮ. ਤਿਰੋਕ੍ਖਕਾਲੇ ਅਸਮ੍ਮੁਖਕਾਲੇ ਸੂਯਨ੍ਤਿ ਨਾਮ. ਅਨੁਰੂਪਤੋ ਗਹਣਂ ਅਨੁਗ੍ਗਹੋ. ਆਰਞ੍ਞਿਕਤ੍ਤਨ੍ਤਿ ਤਸ੍ਸ ਭਿਕ੍ਖੁਨੋ ਧੁਤਗੁਣਤ੍ਤਾਨੁਰੂਪਤੋ ਗਣ੍ਹਾਤਿ. ਤੇਨਾਹ ‘‘ਆਰਞ੍ਞਿਕਤ੍ਤਂ ਅਨੁਗ੍ਗਣ੍ਹਾਤੀ’’ਤਿ. ਅਰਞ੍ਞੇ ਨਿਵਾਸੋ ਅਸ੍ਸਾਤਿ ਆਰਞ੍ਞਿਕੋ. ਪਨ੍ਤਂ ਪਰਿਯਨ੍ਤਂ ਦੂਰਤਰਂ ਸੇਨਾਸਨਂ ਅਸ੍ਸਾਤਿ ਪਨ੍ਤਸੇਨਾਸਨੋ. ਤਂ ਪਨ ਅਤ੍ਥਮਤ੍ਤੇਨ ਦਸ੍ਸੇਨ੍ਤੇਨ ‘‘ਪਨ੍ਤਸੇਨਾਸਨੇ ਵਸਤੀ’’ਤਿ ਵੁਤ੍ਤਂ. ਭਿਕ੍ਖਾਸਙ੍ਖਾਤਾਨਂ ਪਿਣ੍ਡਾਨਂ ਪਾਤੋ ਪਿਣ੍ਡਾਪਾਤੋ, ਤਂ ਪਿਣ੍ਡਪਾਤਂ ਉਞ੍ਛਤਿ ਗਵੇਸਤੀਤਿ ਪਿਣ੍ਡਪਾਤਿਕੋ. ਪਿਣ੍ਡਾਯ ਪਤਿਤੁਂ ਚਰਿਤੁਂ ਵਤਮੇਤਸ੍ਸਾਤਿ ਵਾ ਪਿਣ੍ਡਪਾਤਿ, ਸੋ ਏਵ ਪਿਣ੍ਡਪਾਤਿਕੋ. ਦਾਨਤੋ ਅਵਖਣ੍ਡਨਤੋ ਅਪੇਤਂ ਅਪਦਾਨਂ, ਸਹ ਅਪਦਾਨੇਨ ਸਪਦਾਨਂ, ਅਨਵਖਣ੍ਡਨਂ. ਅਨੁਘਰਂ ਚਰਣਸੀਲੋ ਸਪਦਾਨਚਾਰੀ. ਉਨ੍ਨਤਭਾਵੇਨ ਪਂਸੁਕੂਲਂ ਵਿਯ ਪਂਸੁਕੂਲਂ, ਪਂਸੁ ਵਿਯ ਵਾ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਂ, ਤਸ੍ਸ ਧਾਰਣਂ ਇਧ ਪਂਸੁਕੂਲਂ, ਤਂ ਸੀਲਮਸ੍ਸਾਤਿ ਪਂਸੁਕੂਲਿਕੋ.
ਤੀਹਿ ਕਾਰਣੇਹਿ ਲੂਖਂ ਵੇਦਿਤਬ੍ਬਂ ਅਗ੍ਘਫਸ੍ਸਵਣ੍ਣਪਰਿਹਾਨਿਤੋ ਅਪਂਸੁਕੂਲਮ੍ਪਿ, ਕੋ ਪਨ ਵਾਦੋ ਪਂਸੁਕੂਲਨ੍ਤਿ ਅਧਿਪ੍ਪਾਯੋ. ਥੂਲਦੀਘਸੁਤ੍ਤਕੇਨਾਤਿ ਥੂਲੇਨ ਓਲਮ੍ਬਮਾਨੇਨ ਦੀਘਸੁਤ੍ਤਕੇਨ. ਵਣ੍ਣੇਨਾਤਿ ਏਤ੍ਥ ਫਸ੍ਸੇਨਪਿ ਪਰਿਹਾਯਤੀਤਿ ਵਤ੍ਤਬ੍ਬਂ. ਤਞ੍ਹਿ ਤਤ੍ਥ ਖਰਫਸ੍ਸਮ੍ਪਿ ਹੋਤਿਯੇਵਾਤਿ. ਕਸ੍ਮਾ ਪਨ ਪਾਲ਼ਿਯਂ ਆਰਞ੍ਞਿਕਾਦਿਗ੍ਗਹਣੇਨ ਚਤ੍ਤਾਰੋਵ ਧੁਤਗੁਣਾ ਵੁਤ੍ਤਾਤਿ? ਪਧਾਨਤ੍ਤਾ, ਤਗ੍ਗਹਣੇਨੇਵ ਚ ਇਤੋ ਪਰੇਸਮ੍ਪਿ ਸੁਖਪਰਿਭੋਗਤਾਯ ਗਹਣਸਮ੍ਭਵਤੋ. ਯੋ ਹਿ ਆਰਞ੍ਞਿਕੋ ਪਨ੍ਤਸੇਨਾਸਨੋ, ਤਸ੍ਸ ਅਬ੍ਭੋਕਾਸਿਕ-ਰੁਕ੍ਖਮੂਲਿਕ-ਨੇਸਜ੍ਜਿਕ-ਯਥਾਸਨ੍ਥਤਿਕ-ਸੋਸਾਨਿਕਙ੍ਗਾਨਿ ਸੁਪਰਿਪੂਰਾਨਿ. ਯੋ ਚ ਪਿਣ੍ਡਪਾਤਿਕੋ ਸਪਦਾਨਚਾਰੀ ਚ, ਤਸ੍ਸ ਪਤ੍ਤਪਿਣ੍ਡਿਕਖਲੁਪਚ੍ਛਾਭਤ੍ਤਿਕਏਕਾਸਨਿਕਙ੍ਗਾਨਿ. ਯੋ ਪਨ ਪਂਸੁਕੂਲਿਕੋ, ਤਸ੍ਸ ਤੇਚੀਵਰਿਕਙ੍ਗਂ ਸੁਪਰਿਹਰਮੇਵਾਤਿ. ਪਧਾਨਤ੍ਤਾ ਹਿ ਭਗਵਤਾਪਿ ‘‘ਕਦਾਹਂ ਨਨ੍ਦਂ ਪਸ੍ਸੇਯ੍ਯਂ, ਆਰਞ੍ਞਂ ਪਂਸੁਕੂਲਿਕ’’ਨ੍ਤਿਆਦਿਨਾ (ਸਂ. ਨਿ. ੨.੨੪੨; ਨੇਤ੍ਤਿ. ੧੦੦) ਤਤ੍ਥ ਤਤ੍ਥ ਆਰਞ੍ਞਿਕਾਦਯੋ ਏਵ ਗਯ੍ਹਨ੍ਤਿ. ਏਤ੍ਤਕਾਤਿ ਪਾਲ਼ਿਯਂ ਆਗਤਾਨਂ ਪਰਿਚ੍ਛਿਜ੍ਜ ਗਹਣਮੇਤਂ, ਨ ਏਤ੍ਤਕਾ ਸਬ੍ਬੇਪਿ ਏਕਸ੍ਸ ਏਕਂਸਤੋ ਸਮ੍ਭਵਨ੍ਤਿ, ਨਾਪਿ ਏਤ੍ਤਕਾਯੇਵ ਪਾਪਧਮ੍ਮਾ ਪਹਾਤਬ੍ਬਾ. ਨ ਹਿ ਮਕ੍ਖਪਲ਼ਾਸਾਦੀਨਂ ਅਪ੍ਪਹੀਨਭਾਵੇਪਿ ਸਬ੍ਰਹ੍ਮਚਾਰੀ ਨੇਵ ਸਕ੍ਕਰੋਨ੍ਤਿ…ਪੇ… ਨ ਪੂਜੇਨ੍ਤੀਤਿ.
ਤਮਤ੍ਥਨ੍ਤਿ ‘‘ਯਸ੍ਸ ਕਸ੍ਸਚੀ’’ਤਿਆਦਿਨਾ ਵੁਤ੍ਤਮਤ੍ਥਂ. ਉਪਮਾਯ ਪਾਕਟਂ ਕਰੋਨ੍ਤੋਤਿ ਅਨ੍ਵਯਤੋ ਬ੍ਯਤਿਰੇਕਤੋ ਚ ਉਦਾਹਰਣੇਨ ਵਿਭਾਵੇਨ੍ਤੋ. ਅਹਿਕੁਣਪਾਦੀਨਂ ਅਤਿਪਟਿਕੂਲਜਿਗੁਚ੍ਛਨੀਯਤਾ ਅਤਿਵਿਯ ਦੁਗ੍ਗਨ੍ਧਤਾਯ. ਸਾ ਚ ਅਹੀਨਂ ਤਿਖਿਣਕੋਪਤਾਯ, ਕੁਕ੍ਕੁਰਮਨੁਸ੍ਸਾਨਂ ਓਦਨਕੁਮ੍ਮਾਸੂਪਚਯਤਾਯ ਸਰੀਰਸ੍ਸ ਹੋਤੀਤਿ ਵਦਨ੍ਤਿ. ਇਮੇਸਨ੍ਤਿ ਅਹਿਆਦੀਨਂ. ਵਡ੍ਢੇਤ੍ਵਾਤਿ ਉਪਰੂਪਰਿ ਖਿਪਨੇਨ ਰਚਿਤਂ ਕਤ੍ਵਾ. ਤਂ ਪਨ ਵਡ੍ਢਿਤਂ ਤੇਨ ਚ ਭਾਜਨਂ ਪੂਰਿਤਂ ਹੋਤੀਤਿ ਆਹ ‘‘ਵਡ੍ਢੇਤ੍ਵਾ ਪਰਿਪੂਰੇਤ੍ਵਾ’’ਤਿ. ਜਨਸ੍ਸ ਦਸ੍ਸਨਯੋਗ੍ਯਂ ਦਸ੍ਸਨੀਯਂ ਜਞ੍ਞਂ, ਤਂ ਪਰਮਪਰਿਸੁਦ੍ਧਂ ਮਨੋਹਰਞ੍ਚ ਹੋਤੀਤਿ ਆਹ ‘‘ਚੋਕ੍ਖਚੋਕ੍ਖ’’ਨ੍ਤਿ. ਅਭਿਨਵਨਿਵਿਟ੍ਠਾ ਮਹਾਮਾਤਾ ਵਧੁਕਾ. ਸਾ ਪਨ ਪੁਤ੍ਤਲਾਭਯੋਗ੍ਯਤਂ ਉਪਾਦਾਯ ਮਙ੍ਗਲਵਚਨੇਨ ‘‘ਜਨੀ’’ਤਿ ਵੁਚ੍ਚਤਿ, ਤਸ੍ਸਾ ਨਿਯ੍ਯਮਾਨਂ ਪਣ੍ਣਾਕਾਰਂ ਜਨਿਯਾ ਹਰਤੀਤਿ ਜਞ੍ਞਂ. ਉਭਯਤ੍ਥਾਤਿ ਅਤ੍ਥਦ੍ਵਯੇ. ਪੁਨਰੁਤ੍ਤਨ੍ਤਿ ਆਮੇਡਿਤਵਚਨਮਾਹ. ਨ ਮਨਾਪਂ ਏਤਸ੍ਸਾਤਿ ਅਮਨਾਪੋ, ਤਸ੍ਸ ਭਾਵੋ ਅਮਨਾਪਤਾ, ਤਥਾਪਵਤ੍ਤੋ ਚਿਤ੍ਤੁਪ੍ਪਾਦੋਤਿ ਆਹ ‘‘ਅਮਨਾਪਂ ਇਦਨ੍ਤਿ…ਪੇ… ਅਧਿਵਚਨ’’ਨ੍ਤਿ. ਬੁਦ੍ਧਵੇਸਤ੍ਤਾ ਲਿਙ੍ਗਸ੍ਸ ਪਰਿਸੁਦ੍ਧਕਂਸਪਾਤਿਸਦਿਸਕਾ. ਕੁਣਪਰਚਨਂ ਵਿਯ ਇਚ੍ਛਾਵਚਰੇਹਿ ਸਨ੍ਤਾਨਸ੍ਸ ਭਰਿਤਭਾਵੋ. ਸੋ ਪਨ ਤੇਸਂ ਅਪ੍ਪਹੀਨਤਾਯਾਤਿ ਆਹ ‘‘ਇਚ੍ਛਾਵਚਰਾਨਂ ਅਪ੍ਪਹਾਨ’’ਨ੍ਤਿ.
੬੨. ‘‘ਤੇਨ ਗਾਮਨ੍ਤਵਿਹਾਰਂ ਅਨੁਗ੍ਗਣ੍ਹਾਤੀ’’ਤਿ ਵਤ੍ਤਬ੍ਬੇ ‘‘ਆਰਞ੍ਞਿਕਤ੍ਤ’’ਨ੍ਤਿ ਪਨ ਪੋਤ੍ਥਕੇ ਲਿਖਿਤਂ. ਨ ਹਿ ਸੁਕ੍ਕਪਕ੍ਖੇ ਪਾਲ਼ਿਯਂ ਆਰਞ੍ਞਿਕਗ੍ਗਹਣਂ ਅਤ੍ਥਿ, ਸਤਿ ਚ ਇਚ੍ਛਾਵਚਰਪ੍ਪਹਾਨੇ ਗਾਮਨ੍ਤਵਿਹਾਰੋ ਏਕਨ੍ਤੇਨ ਨ ਪਟਿਕ੍ਖਿਪਿਤਬ੍ਬੋ, ਇਚ੍ਛਿਤਬ੍ਬੋਵ ਤਾਦਿਸਾਨਂ ਉਤ੍ਤਰਿਮਨੁਸ੍ਸਧਮ੍ਮਪਟਿਚ੍ਛਾਦਨਤੋ. ਤਥਾ ਹਿ ਵਕ੍ਖਤਿ ‘‘ਅਪ੍ਪਿਚ੍ਛਤਾਸਮੁਟ੍ਠਾਨੇਹੀ’’ਤਿਆਦਿ. ਸਾਲਿਵਰਭਤ੍ਤਰਚਨਂ ਵਿਯ ਇਚ੍ਛਾਵਚਰਪ੍ਪਹਾਨਂ ਮਨੁਞ੍ਞਭਾਵਤੋ ਤਿਤ੍ਤਿਹੇਤੁਤੋ ਚ.
੬੩. ਮਂ ਤਨ੍ਤਿ ਚ ਉਪਯੋਗਵਚਨਂ ਪਟਿ-ਸਦ੍ਦਯੋਗੇਨ, ਅਤ੍ਥੋ ਪਨ ਸਮ੍ਪਦਾਨਮੇਵਾਤਿ ਆਹ ‘‘ਮਯ੍ਹਂ ਤੁਯ੍ਹ’’ਨ੍ਤਿ ਚ. ‘‘ਸਮਯੇ’’ਤਿ ਭੁਮ੍ਮਤ੍ਥੇ ‘‘ਸਮਯ’’ਨ੍ਤਿ ਉਪਯੋਗਵਚਨਂ. ਗਿਜ੍ਝਕੂਟਪਣ੍ਡਵਇਸਿਗਿਲਿਵੇਭਾਰਵੇਪੁਲ੍ਲਪਬ੍ਬਤਾਨਂ ਵਸੇਨ ਸਮਨ੍ਤਤੋ ਗਿਰਿਪਰਿਕ੍ਖੇਪੇਨ. ਰਾਜਗਹੇਤਿ ਸਮੀਪਤ੍ਥੇ ਭੁਮ੍ਮਵਚਨਨ੍ਤਿ ਆਹ ‘‘ਤਂ ਨਿਸ੍ਸਾਯ ਵਿਹਰਾਮੀ’’ਤਿ.
ਪੁਰਾਣਯਾਨਕਾਰਪੁਤ੍ਤੋਤਿ ਪੁਰਾਣੇ ਪਬ੍ਬਜਿਤਤੋ ਪੁਬ੍ਬੇ ਯਾਨਕਾਰਪੁਤ੍ਤੋ ਤਥਾਪਞ੍ਞਾਤੋ. ਜਿਮ੍ਹਨ੍ਤਿ ਗੋਮੁਤ੍ਤਕੁਟਿਲਂ. ਤੇਨਾਹ ‘‘ਸਪ੍ਪਗਤਮਗ੍ਗਸਦਿਸ’’ਨ੍ਤਿ. ਸੋਤਿ ਪਣ੍ਡੁਪੁਤ੍ਤੋ. ਇਤਰੋਤਿ ਸਮਿਤਿ. ਚਿਨ੍ਤਿਤਟ੍ਠਾਨਮੇਵਾਤਿ ਚਿਨ੍ਤਿਤਚਿਨ੍ਤਿਤਟ੍ਠਾਨਮੇਵ ਤਚ੍ਛਤਿ, ਤਞ੍ਚ ਖੋ ਨ ਤਸ੍ਸ ਚਿਤ੍ਤਾਨੁਸਾਰੇਨ, ਅਥ ਖੋ ਅਤ੍ਤਨੋ ਸੁਤ੍ਤਾਨੁਸਾਰੇਨ ਤਚ੍ਛਨ੍ਤੋ ਯਾਨਕਾਰਪੁਤ੍ਤੋ. ਚਿਤ੍ਤਨ੍ਤਿ ਅਤ੍ਤਨੋ ਚਿਤ੍ਤੇਨ ਮਮ ਚਿਤ੍ਤਂ ਜਾਨਿਤ੍ਵਾ ਵਿਯ.
‘‘ਨ ਸਦ੍ਧਾਯ ਪਬ੍ਬਜਿਤੋ’’ਤਿ ਇਮਿਨਾਵ ਕਮ੍ਮਫਲਸਦ੍ਧਾਯ ਅਭਾਵੋ ਨੇਸਂ ਪਕਾਸਿਤੋਤਿ ਆਹ ‘‘ਅਸ੍ਸਦ੍ਧਾਤਿ ਬੁਦ੍ਧਧਮ੍ਮਸਙ੍ਘੇਸੁ ਸਦ੍ਧਾਵਿਰਹਿਤਾ’’ਤਿ. ਪਬ੍ਬਜਿਤਾਨਂ ਜੀਵਿਕਾ ਅਤ੍ਥੋ ਏਤੇਸਨ੍ਤਿ ਜੀਵਿਕਤ੍ਥਾ. ਤੇਨਾਹ ‘‘ਇਣਭਯਾਦੀਹੀ’’ਤਿਆਦਿ. ਕੇਰਾਟਿਕਂ ਵੁਚ੍ਚਤਿ ਸਾਠੇਯ੍ਯਂ. ਸਠਾਨਂ ਗੁਣਵਾਣਿਜਕਾਨਂ ਕਮ੍ਮਂ ਸਾਠੇਯ੍ਯਨ੍ਤਿ ਆਹ ‘‘ਸਾਠੇਯ੍ਯਞ੍ਹੀ’’ਤਿਆਦਿ. ਤੁਚ੍ਛਸਭਾਵੇਨ ਮਾਨੋ ਨਲ਼ੋ ਵਿਯਾਤਿ ਨਲ਼ੋ, ਮਾਨਸਙ੍ਖਾਤੋ ਉਗ੍ਗਤੋ ਨਲ਼ੋ ਏਤੇਸਨ੍ਤਿ ਉਨ੍ਨਲ਼ਾ. ਤੇਨਾਹ ‘‘ਉਟ੍ਠਿਤਤੁਚ੍ਛਮਾਨਾ’’ਤਿ. ਲਹੁਕਤਾਯ ਵਾ ਚਪਲਾ. ਫਰੁਸਵਚਨਤਾਯ ਖਰਵਚਨਾ. ਤਿਰਚ੍ਛਾਨਕਥਾਬਹੁਲਤਾਯ ਨਿਰਤ੍ਥਕਵਚਨਪਲਾਪਿਨੋ. ਅਸਂਵੁਤਕਮ੍ਮਦ੍ਵਾਰਾਤਿ ਇਦਂ ਕਮ੍ਮਦ੍ਵਾਰਾਦੀਨਂ ਅਸਂਵੁਤਭਾਵੋ ਉਪ੍ਪਤ੍ਤਿਦ੍ਵਾਰਾਨਂ ਅਸਂਵੁਤਤਾਯ ਏਵ ਹੋਤੀਤਿ ਕਤ੍ਵਾ ਵੁਤ੍ਤਂ. ਅਥ ਵਾ ਛਸੁ ਇਨ੍ਦ੍ਰਿਯੇਸੂਤਿ ਨਿਮਿਤ੍ਤੇ ਭੁਮ੍ਮਂ, ਛਸੁ ਇਨ੍ਦ੍ਰਿਯੇਸੁ ਨਿਮਿਤ੍ਤਭੂਤੇਸੁ ਅਸਂਵੁਤਕਮ੍ਮਦ੍ਵਾਰਾਤਿ ਅਤ੍ਥੋ. ਯਾ ਮਤ੍ਤਾਤਿ ਭੋਜਨੇ ਅਯੁਤ੍ਤਪਰਿਯੇਸਨ-ਅਯੁਤ੍ਤਪਟਿਗ੍ਗਹਣ-ਅਯੁਤ੍ਤਪਰਿਭੋਗੇ ਵਜ੍ਜੇਤ੍ਵਾ ਯੁਤ੍ਤਪਰਿਯੇਸਨ-ਯੁਤ੍ਤਪਟਿਗ੍ਗਹਣ-ਯੁਤ੍ਤਪਰਿਭੋਗਸਙ੍ਖਾਤਾ ਯਾ ਮਤ੍ਤਾ ਅਪ੍ਪਮਤ੍ਤੇਹਿ ਜਾਨਿਤਬ੍ਬਾ. ਤੇਨਾਹ ‘‘ਯੁਤ੍ਤਤਾ’’ਤਿ. ਜਾਗਰੇਤਿ ਰਤ੍ਤਿਨ੍ਦਿਵਂ ਆਵਰਣਿਯੇਹਿ ਧਮ੍ਮੇਹਿ ਚਿਤ੍ਤਪਰਿਸੋਧਨਸਙ੍ਖਾਤੇ ਜਾਗਰੇ. ਤੇਸਂ ਜਾਗਰਿਤਾਯ ਅਧਿਸੀਲਸਿਕ੍ਖਾਯ ਗਾਰਵਰਹਿਤਾਨਂ ਇਤਰਸਿਕ੍ਖਾਸੁ ਪਤਿਟ੍ਠਾ ਏਵ ਨਤ੍ਥੀਤਿ ਦਸ੍ਸੇਨ੍ਤੋ ‘‘ਸਿਕ੍ਖਾਪਦੇਸੁ ਬਹੁਲਗਾਰਵਾ ਨ ਹੋਨ੍ਤੀ’’ਤਿ ਵਤ੍ਵਾ ਤਮੇਵ ਗਾਰਵਾਭਾਵਂ ਸਰੂਪੇਨ ਵਿਭਾਵੇਨ੍ਤੋ ‘‘ਆਪਤ੍ਤਿਵੀਤਿਕ੍ਕਮਬਹੁਲਾ’’ਤਿ ਆਹ.
ਪਕਤਿਯਾਪਿ ਸਿਦ੍ਧਾਯ ਰਤਨਤ੍ਤਯਸਦ੍ਧਾਯ ਕਮ੍ਮਫਲਸਦ੍ਧਾਯ ਚ ਸਦ੍ਧਾ. ਪਿਵਨ੍ਤਿ ਮਞ੍ਞੇ ਯਥਾ ਤਂ ਦ੍ਰਵਭੂਤਂ ਅਮਤਂ ਲਦ੍ਧਾ. ਘਸਨ੍ਤਿ ਮਞ੍ਞੇ ਯਥਾ ਤਂ ਬਹਲਪਿਣ੍ਡਿਕਸੁਧਾਭੋਜਨਂ ਲਦ੍ਧਾ. ਅਤ੍ਤਮਨਵਾਚਂ ਨਿਚ੍ਛਾਰੇਨ੍ਤਾ ‘‘ਸਾਧੁ ਸਾਧੂ’’ਤਿ. ਤਮੇਵ ਪਨ ਸਾਧੁਕਾਰਂ ਹਦਯੇ ਠਪੇਤ੍ਵਾ ਅਬ੍ਭਨੁਮੋਦਨ੍ਤਾ. ਏਤ੍ਥ ਚ ਅਤ੍ਤਮਨਵਾਚਾਨਿਚ੍ਛਾਰਣਂ ਪਿਵਨਸਦਿਸਂ ਕਤ੍ਵਾ ਵੁਤ੍ਤਂ ਬਹਿਦ੍ਧਾਭਾਵਤੋ, ਮਨਸਾ ਅਬ੍ਭਨੁਮੋਦਨਂ ਪਨ ਅਬ੍ਭਨ੍ਤਰਭਾਵਤੋ ਘਸਨਸਦਿਸਂ ਵੁਤ੍ਤਂ. ਸਙ੍ਖਾਦਨਜ੍ਝੋਹਰਣਞ੍ਹਿ ਘਸਨਨ੍ਤਿ. ਰਸ੍ਸਞ੍ਚ ਏਕਵਚਨਂ ਹੋਤੀਤਿ ਆਹ ‘‘ਰਸ੍ਸੇ ਸਤਿ ਸਾਰਿਪੁਤ੍ਤਸ੍ਸ ਉਪਰਿ ਹੋਤੀ’’ਤਿ. ਦੀਘਞ੍ਚ ਬਹੁਵਚਨਂ ਹੋਤੀਤਿ ਆਹ ‘‘ਦੀਘੇ ਸਤਿ ਸਬ੍ਰਹ੍ਮਚਾਰੀਨ’’ਨ੍ਤਿ. ‘‘ਉਪਰਿ ਹੋਤੀ’’ਤਿ ਆਨੇਤ੍ਵਾ ਸਮ੍ਬਨ੍ਧੋ. ਆਲਸਿਯਬ੍ਯਸਨਾਦੀਹੀਤਿ ਆਲਸਿਯੇਨ ਵਾ ਞਾਤਿਬ੍ਯਸਨਾਦੀਹਿ ਵਾ. ‘‘ਮਹਾਨਾਗਾਤਿ ਵੁਚ੍ਚਨ੍ਤੀ’’ਤਿ ਵਤ੍ਵਾ ਤਤ੍ਥ ਕਾਰਣਂ ਵਿਭਾਵੇਨ੍ਤੋ ‘‘ਤਤ੍ਰਾ’’ਤਿਆਦਿਮਾਹ. ਤਤ੍ਥ ‘‘ਨ ਗਚ੍ਛਨ੍ਤੀਤਿ ਨਾਗਾ, ਨ ਆਗਚ੍ਛਨ੍ਤੀਤਿ ਨਾਗਾ, ਨ ਆਗੁਂ ਕਰੋਨ੍ਤੀਤਿ ਨਾਗਾ’’ਤਿ ਯੋ ਵਿਵਿਧੋ ਵਚਨਤ੍ਥੋ ਇਚ੍ਛਿਤੋ, ਤਂ ਵਿਚਾਰੇਤ੍ਵਾ ਦਸ੍ਸੇਤੁਂ ‘‘ਛਨ੍ਦਾਦੀਹੀ’’ਤਿਆਦਿ ਵੁਤ੍ਤਂ, ਤਂ ਪਨ ਞੇਯ੍ਯਾਵਬੋਧਾਯ ਵਚਨਤੋ ਅਪ੍ਪਮਤ੍ਤਕਾਰਣਂ.
ਸਯਮੇਵ ਆਗੁਂ ਨ ਕਰੋਤਿ ਸਬ੍ਬਥਾ ਮਗ੍ਗੇਨ ਪਹੀਨਆਗੁਤ੍ਤਾ. ਸੋ ਕਾਮਯੋਗਾਦਿਕੇ ਸਬ੍ਬਸਂਯੋਗੇ ਦਸਵਿਧਸਂਯੋਜਨਪ੍ਪਭੇਦਾਨਿ ਚ ਸਬ੍ਬਬਨ੍ਧਨਾਨਿ ਵਿਸਜ੍ਜ ਜਹਿਤ੍ਵਾ ਸਬ੍ਬਤ੍ਥ ਯਕ੍ਖਾਦੀਸੁ, ਸਬ੍ਬੇਸੁ ਵਾ ਭਵੇਸੁ ਕੇਨਚਿ ਸਙ੍ਗੇਨ ਨ ਸਜ੍ਜਤਿ ਤੀਹਿ ਚ ਵਿਮੁਤ੍ਤੀਹਿ ਵਿਮੁਤ੍ਤੋ, ਤਤੋ ਏਵ ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤਿਯਾ ਤਾਦਿ, ਸੋ ਵੁਤ੍ਤਲਕ੍ਖਣੇਨ ਤਥਤ੍ਤਾ ਤਂਸਭਾਵਤ੍ਤਾ ਨਾਗੋ ਪਵੁਚ੍ਚਤੇਤਿ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ’’ਤਿ. ਅਞ੍ਞੇਹਿ ਖੀਣਾਸਵਨਾਗੇਹਿ ਅਗ੍ਗਸਾਵਕਤ੍ਤਾ ਗੁਣਵਿਸੇਸਯੋਗਤੋ ਪੁਜ੍ਜਤਰਾ ਚ ਪਾਸਂਸਤਰਾ ਚ. ਸਮਂ ਅਨੁਮੋਦਿਸੁਨ੍ਤਿ ਅਞ੍ਞਮਞ੍ਞਸ੍ਸ ਸੁਭਾਸਿਤਤੋ ਸਮ੍ਪਟਿਚ੍ਛਨੇਨ ਸਮਪ੍ਪਵਤ੍ਤਮੋਦਤਾਯ ਸਮਂ ਸਦਿਸਂ ਅਬ੍ਭਨੁਮੋਦਿਂਸੁ. ਤਂ ਪਨ ਸਮਨੁਮੋਦਨਂ ‘‘ਤਤ੍ਥਾ’’ਤਿਆਦਿਨਾ ਪਾਲ਼ਿਵਸੇਨੇਵ ਦਸ੍ਸੇਤਿ.
ਸਮ੍ਮੁਤਿਪਰਮਤ੍ਥਦੇਸਨਾਕਥਾਵਣ੍ਣਨਾ ਨਿਟ੍ਠਿਤਾ.
ਅਨਙ੍ਗਣਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.