੪. ਭਯਭੇਰਵਸੁਤ੍ਤਵਣ੍ਣਨਾ

੩੪. ਏਵਂ ਮੇ ਸੁਤਨ੍ਤਿ ਭਯਭੇਰਵਸੁਤ੍ਤਂ. ਕੋ ਨਿਕ੍ਖੇਪੋ? ਕੇਚਿ ਤਾਵ ਏਵਮਾਹੁ ‘‘ਪੁਚ੍ਛਾਵਸਿਕੋ ਨਿਕ੍ਖੇਪੋ’’ਤਿ. ਦੁਵਿਧਾ ਹਿ ਪੁਚ੍ਛਾ ਪਾਕਟਾਪਾਕਟਭੇਦਤੋ. ਤਤ੍ਥ ਯਸ੍ਸਾ ਦੇਸਨਾਯ ਨਿਮਿਤ੍ਤਭੂਤੋ ਞਾਤੁਂ ਇਚ੍ਛਿਤੋ ਅਤ੍ਥੋ ਕਿਂ-ਸਦ੍ਦਪੁਬ੍ਬਕੇਨ ਪਕਾਸੀਯਤਿ, ਸਾ ਪਾਕਟਾ ਪੁਚ੍ਛਾ ਯਥਾ ‘‘ਕਿਂਸੂਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠ’’ਨ੍ਤਿ ਏਵਮਾਦਿ (ਸਂ. ਨਿ. ੧.੨੪੬; ਸੁ. ਨਿ. ੧੮੩). ਯਸ੍ਸਾ ਪਨ ਦੇਸਨਾਯ ਨਿਮਿਤ੍ਤਭੂਤੋ ਞਾਤੁਂ ਇਚ੍ਛਿਤੋ ਅਤ੍ਥੋ ਕਿਂ-ਸਦ੍ਦਰਹਿਤੇਨ ਕੇਵਲੇਨੇਵ ਸਦ੍ਦਪਯੋਗੇਨ ਪਕਾਸੀਯਤਿ, ਸਾ ਅਪਾਕਟਾ ਪੁਚ੍ਛਾ. ਞਾਤੁਂ ਇਚ੍ਛਿਤੋ ਹਿ ਅਤ੍ਥੋ ‘‘ਪਞ੍ਹਾ, ਪੁਚ੍ਛਾ’’ਤਿ ਵੁਚ੍ਚਤਿ, ਤਸ੍ਮਾਯੇਵ ਇਧ ‘‘ਯੇ ਮੇ ਭੋ ਗੋਤਮਾ’’ਤਿਆਦਿਕਾ ਅਪਾਕਟਾਤਿ ‘‘ਪੁਚ੍ਛਾਵਸਿਕੋ ਨਿਕ੍ਖੇਪੋ’’ਤਿ. ਤਯਿਦਂ ਅਕਾਰਣਂ, ਯਸ੍ਮਾ ਸੋ ਬ੍ਰਾਹ੍ਮਣੋ ‘‘ਯੇਮੇ ਭੋ ਗੋਤਮਾ’’ਤਿਆਦੀਨਿ ਵਦਨ੍ਤੋ ਨ ਤਤ੍ਥ ਕਙ੍ਖੀ ਵਿਚਿਕਿਚ੍ਛੀ ਸਂਸਯਮਾਪਨ੍ਨੋ ਅਵੋਚ, ਅਥ ਖੋ ਅਤ੍ਤਨਾ ਯਥਾਨਿਚ੍ਛਿਤਮਤ੍ਥਂ ਭਗਵਤਿ ਪਸਾਦਭਾਵਬਹੁਮਾਨਂ ਪਵੇਦੇਨ੍ਤੋ ਕਥੇਸਿ. ਤੇਨਾਹ ‘‘ਭਗਵਤਿ ਪਸਾਦਂ ਅਲਤ੍ਥਾ’’ਤਿਆਦਿ (ਮ. ਨਿ. ਅਟ੍ਠ. ੧.੩੪). ਵਿਹਾਰੇਤਿ ਵਿਹਾਰਕੇ ਨਿਵਾਸੇ. ਅਵਿਚ੍ਛਿਨ੍ਨੇਯੇਵਾਤਿ ਪਵਤ੍ਤਮਾਨੇਯੇਵ. ਪਦਦ੍ਵਯਸ੍ਸਪਿ ਵਸਨ੍ਤੇ ਏਵਾਤਿ ਅਤ੍ਥੋ. ਏਤਂ ਪੁਰੋਹਿਤਟ੍ਠਾਨਂ ਉਣ੍ਹੀਸਾਦਿਕਕੁਧਭਣ੍ਡੇਹਿ ਸਦ੍ਧਿਂ ਲਦ੍ਧਂ, ਤਥਾ ਚ ‘‘ਅਸ੍ਸ ਰਞ੍ਞਾ ਦਿਨ੍ਨ’’ਨ੍ਤਿ ਵਦਨ੍ਤਿ. ਤੇਨਾਹ ‘‘ਤਂ ਤਸ੍ਸ ਰਞ੍ਞਾ ਦਿਨ੍ਨ’’ਨ੍ਤਿ. ਬ੍ਰਹ੍ਮਨ੍ਤਿ ਵੇਦਂ. ਸੋ ਪਨ ਮਨ੍ਤਬ੍ਰਹ੍ਮਕਪ੍ਪਵਸੇਨ ਤਿਵਿਧੋ. ਤਤ੍ਥ ਮਨ੍ਤਾ ਪਧਾਨਂ ਮੂਲਭਾਵਤੋ, ਯੇ ਅਟ੍ਠਕਾਦੀਹਿ ਪਵੁਤ੍ਤਾ, ਇਤਰੇ ਤਨ੍ਨਿਸ੍ਸਯੇਨ ਜਾਤਾ, ਤੇਨ ਤੇਸਂਯੇਵ ਗਹਣਂ ‘‘ਮਨ੍ਤੇ ਸਜ੍ਝਾਯਤੀ’’ਤਿ. ਤੇ ਹਿ ਗੁਤ੍ਤਭਾਸਿਤਬ੍ਬਤਾਯ ‘‘ਮਨ੍ਤਾ’’ਤਿ ਵੁਚ੍ਚਨ੍ਤਿ. ਇਦਮੇਵ ਹੀਤਿ ਅਵਧਾਰਣੇਨ ‘‘ਬ੍ਰਹ੍ਮਤੋ ਜਾਤਾ’’ਤਿਆਦਿਕਂ ਨਿਰੁਤ੍ਤਿਂ ਪਟਿਕ੍ਖਿਪਤਿ.

ਯੇਨ ਵਾ ਕਾਰਣੇਨਾਤਿ (ਸਾਰਤ੍ਥ. ਟੀ. ਵੇਰਞ੍ਜਕਣ੍ਡਵਣ੍ਣਨਾਯਂ ੨; ਸਂ. ਨਿ. ਟੀ. ੧.੧.੧; ਅ. ਨਿ. ਟੀ. ੨.੨.੧੬) ਹੇਤੁਮ੍ਹਿ ਇਦਂ ਕਰਣਵਚਨਂ. ਹੇਤੁਅਤ੍ਥੋ ਹਿ ਕਿਰਿਯਾਕਾਰਣਂ, ਨ ਕਰਣਂ ਵਿਯ ਕਿਰਿਯਤ੍ਥੋ, ਤਸ੍ਮਾ ਨਾਨਪ੍ਪਕਾਰਗੁਣਵਿਸੇਸਾਧਿਗਮਤ੍ਥਾ ਇਧ ਉਪਸਙ੍ਕਮਨਕਿਰਿਯਾਤਿ ‘‘ਅਨ੍ਨੇਨ ਵਸਤੀ’’ਤਿਆਦੀਸੁ ਵਿਯ ਹੇਤੁਅਤ੍ਥਮੇਵੇਤਂ ਕਰਣਵਚਨਂ ਯੁਤ੍ਤਂ, ਨ ਕਰਣਤ੍ਥਂ ਤਸ੍ਸ ਅਯੁਜ੍ਜਮਾਨਤ੍ਤਾਤਿ ਵੁਤ੍ਤਂ ‘‘ਯੇਨ ਵਾ ਕਾਰਣੇਨਾ’’ਤਿਆਦਿ. ਭਗਵਤੋ ਸਤਤਪ੍ਪਵਤ੍ਤਨਿਰਤਿਸਯਸਾਦੁਵਿਪੁਲਾਮਤਰਸਸਦ੍ਧਮ੍ਮਫਲਤਾਯ ਸਾਦੁਫਲਨਿਚ੍ਚਫਲਿਤਮਹਾਰੁਕ੍ਖੇਨ ਭਗਵਾ ਉਪਮਿਤੋ, ਸਾਦੁਫਲੂਪਭੋਗਾਧਿਪ੍ਪਾਯਗ੍ਗਹਣੇਨੇਵ ਹਿ ਮਹਾਰੁਕ੍ਖਸ੍ਸ ਸਾਦੁਫਲਤਾ ਗਹਿਤਾਤਿ.

ਉਪਸਙ੍ਕਮੀਤਿ ਉਪਸਙ੍ਕਨ੍ਤੋ. ਸਮ੍ਪਤ੍ਤੁਕਾਮਤਾਯ ਹਿ ਕਿਞ੍ਚਿ ਠਾਨਂ ਗਚ੍ਛਨ੍ਤੋ ਤਂਤਂਪਦੇਸਾਤਿਕ੍ਕਮਨੇਨ ਉਪਸਙ੍ਕਮਿ, ਉਪਸਙ੍ਕਨ੍ਤੋਤਿ ਵਾ ਵਤ੍ਤਬ੍ਬਤਂ ਲਭਤਿ. ਤੇਨਾਹ ‘‘ਗਤੋਤਿ ਵੁਤ੍ਤਂ ਹੋਤੀ’’ਤਿ, ਉਪਗਤੋਤਿ ਅਤ੍ਥੋ. ਉਪਸਙ੍ਕਮਿਤ੍ਵਾਤਿ ਪੁਬ੍ਬਕਾਲਕਿਰਿਯਾਨਿਦ੍ਦੇਸੋਤਿ ਆਹ ‘‘ਉਪਸਙ੍ਕਮਨਪਰਿਯੋਸਾਨਦੀਪਨ’’ਨ੍ਤਿ. ਤਤੋਤਿ ਯਂ ਠਾਨਂ ਪਤ੍ਤੋ ‘‘ਉਪਸਙ੍ਕਮੀ’’ਤਿ ਵੁਤ੍ਤੋ, ਤਤੋ ਉਪਗਤਟ੍ਠਾਨਤੋ. ਯਥਾ ਖਮਨੀਯਾਦੀਨਿ ਪੁਚ੍ਛਨ੍ਤੋਤਿ (ਸਂ. ਨਿ. ਟੀ. ੧.੧.੧੧੨) ਯਥਾ ਭਗਵਾ ‘‘ਕਚ੍ਚਿ ਤੇ ਬ੍ਰਾਹ੍ਮਣ ਖਮਨੀਯਂ, ਕਚ੍ਚਿ ਯਾਪਨੀਯ’’ਨ੍ਤਿਆਦਿਨਾ ਖਮਨੀਯਾਦੀਨਿ ਪੁਚ੍ਛਨ੍ਤੋ ਤੇਨ ਬ੍ਰਾਹ੍ਮਣੇਨ ਸਦ੍ਧਿਂ ਸਮਪ੍ਪਵਤ੍ਤਮੋਦੋ ਅਹੋਸਿ ਪੁਬ੍ਬਭਾਸਿਤਾਯ, ਤਦਨੁਕਰਣੇਨ ਏਵਂ ਸੋਪਿ ਬ੍ਰਾਹ੍ਮਣੋ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦੋ ਅਹੋਸੀਤਿ ਯੋਜਨਾ. ਤਂ ਪਨ ਸਮਪ੍ਪਵਤ੍ਤਮੋਦਤਂ ਉਪਮਾਯ ਦਸ੍ਸੇਤੁਂ ‘‘ਸੀਤੋਦਕਂ ਵਿਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਮ੍ਮੋਦਿਤਨ੍ਤਿ ਸਂਸਨ੍ਦਿਤਂ. ਏਕੀਭਾਵਨ੍ਤਿ ਸਮ੍ਮੋਦਨਕਿਰਿਯਾਯ ਸਮਾਨਤਂ ਏਕਰੂਪਤਂ. ਖਮਨੀਯਨ੍ਤਿ ‘‘ਇਦਂ ਚਤੁਚਕ੍ਕਂ ਨਵਦ੍ਵਾਰਂ ਸਰੀਰਯਨ੍ਤਂ ਖਣਭਙ੍ਗੁਰਤਾਯ ਸਭਾਵਤੋ ਦੁਸ੍ਸਹਂ, ਕਚ੍ਚਿ ਖਮਿਤੁਂ ਸਕ੍ਕੁਣੇਯ੍ਯ’’ਨ੍ਤਿ ਪੁਚ੍ਛਤਿ. ਯਾਪਨੀਯਨ੍ਤਿ ਪਚ੍ਚਯਾਯਤ੍ਤਵੁਤ੍ਤਿਕਂ ਚਿਰਪ੍ਪਬਨ੍ਧਸਙ੍ਖਾਤਾਯ ਯਾਪਨਾਯ ਕਚ੍ਚਿ ਯਾਪੇਤੁਂ ਸਕ੍ਕੁਣੇਯ੍ਯਂ. ਸੀਸਰੋਗਾਦਿਆਬਾਧਾਭਾਵੇਨ ਕਚ੍ਚਿ ਅਪ੍ਪਾਬਾਧਂ. ਦੁਕ੍ਖਜੀਵਿਕਾਭਾਵੇਨ ਕਚ੍ਚਿ ਅਪ੍ਪਾਤਙ੍ਕਂ. ਤਂਤਂਕਿਚ੍ਚਕਰਣੇ ਉਟ੍ਠਾਨਸੁਖਤਾਯ ਕਚ੍ਚਿ ਲਹੁਟ੍ਠਾਨਂ. ਤਦਨਰੂਪਬਲਯੋਗਤੋ ਕਚ੍ਚਿ ਬਲਂ. ਸੁਖਵਿਹਾਰਸਬ੍ਭਾਵੇਨ ਕਚ੍ਚਿ ਫਾਸੁਵਿਹਾਰੋ ਅਤ੍ਥੀਤਿ ਤਤ੍ਥ ਤਤ੍ਥ ਕਚ੍ਚਿ-ਸਦ੍ਦਂ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ.

ਬਲਵਪ੍ਪਤ੍ਤਾ ਪੀਤਿ ਪੀਤਿਯੇਵ. ਤਰੁਣਪੀਤਿ ਪਾਮੋਜ੍ਜਂ. ਸਮ੍ਮੋਦਨਂ ਜਨੇਤਿ ਕਰੋਤੀਤਿ ਸਮ੍ਮੋਦਨਿਕਂ, ਤਦੇਵ ਸਮ੍ਮੋਦਨੀਯਨ੍ਤਿ ਆਹ ‘‘ਸਮ੍ਮੋਦਜਨਨਤੋ’’ਤਿ. ਸਮ੍ਮੋਦਿਤਬ੍ਬਤੋ ਸਮ੍ਮੋਦਨੀਯਨ੍ਤਿ ਇਮਂ ਪਨ ਅਤ੍ਥਂ ਦਸ੍ਸੇਨ੍ਤੋ ‘‘ਸਮ੍ਮੋਦਿਤੁਂ ਯੁਤ੍ਤਭਾਵਤੋ’’ਤਿ ਆਹ. ਸਰਿਤਬ੍ਬਭਾਵਤੋਤਿ ਅਨੁਸ੍ਸਰਿਤਬ੍ਬਭਾਵਤੋ. ‘‘ਸਰਣੀਯ’’ਨ੍ਤਿ ਵਤ੍ਤਬ੍ਬੇ ਦੀਘਂ ਕਤ੍ਵਾ ‘‘ਸਾਰਣੀਯ’’ਨ੍ਤਿ ਵੁਤ੍ਤਂ. ਸੁਯ੍ਯਮਾਨਸੁਖਤੋਤਿ ਆਪਾਥਮਧੁਰਤਂ ਆਹ, ਅਨੁਸ੍ਸਰਿਯਮਾਨਸੁਖਤੋਤਿ ਵਿਮਦ੍ਦਰਮਣੀਯਤਂ. ਬ੍ਯਞ੍ਜਨਪਰਿਸੁਦ੍ਧਤਾਯਾਤਿ ਸਭਾਵਨਿਰੁਤ੍ਤਿਭਾਵੇਨ ਤਸ੍ਸਾ ਕਥਾਯ ਵਚਨਚਾਤੁਰਿਯਮਾਹ, ਅਤ੍ਥਪਰਿਸੁਦ੍ਧਤਾਯਾਤਿ ਅਤ੍ਥਸ੍ਸ ਨਿਰੁਪਕ੍ਕਿਲੇਸਤਂ. ਅਨੇਕੇਹਿ ਪਰਿਯਾਯੇਹੀਤਿ ਅਨੇਕੇਹਿ ਕਾਰਣੇਹਿ.

ਅਭਿਦੂਰਅਚ੍ਚਾਸਨ੍ਨਪਟਿਕ੍ਖੇਪੇਨ ਨਾਤਿਦੂਰਨਾਚ੍ਚਾਸਨ੍ਨਂ ਨਾਮ ਗਹਿਤਂ, ਤਂ ਪਨ ਅਵਕਂਸਤੋ ਉਭਿਨ੍ਨਂ ਪਸਾਰਿਤਹਤ੍ਥਸਙ੍ਘਟ੍ਟਨੇਨ ਦਟ੍ਠਬ੍ਬਂ. ਗੀਵਂ ਪਸਾਰੇਤ੍ਵਾਤਿ ਗੀਵਂ ਪਰਿਵਤ੍ਤਨਵਸੇਨ ਪਸਾਰੇਤ੍ਵਾ.

ਯੇਮੇਤਿ ਏਤ੍ਥ ਸਨ੍ਧਿਵਸੇਨ ਇਕਾਰਲੋਪੋਤਿ ਦਸ੍ਸੇਨ੍ਤੋ ‘‘ਯੇ ਇਮੇ’’ਤਿਆਦਿਮਾਹ. ਉਚ੍ਚਾਕੁਲੀਨਤਾਯ ਜਾਤਿਵਸੇਨ ਅਭਿਜਾਤਾ ਜਾਤਿਕੁਲਪੁਤ੍ਤਾ. ਤੇਨਾਹ ‘‘ਉਚ੍ਚਾਕੁਲਪ੍ਪਸੁਤਾ’’ਤਿ. ਆਚਾਰਸਮ੍ਪਤ੍ਤਿਯਾ ਅਭਿਜਾਤਾ ਆਚਾਰਕੁਲਪੁਤ੍ਤਾ. ਤੇਨਾਹ ‘‘ਆਚਾਰਸਮ੍ਪਨ੍ਨਾ’’ਤਿ. ਯਤ੍ਥ ਕਤ੍ਥਚਿ ਅਪਾਕਟੇਪਿ ਕੁਲੇ. ਤੇਨ ਬ੍ਰਾਹ੍ਮਣੇਨ ਅਧਿਪ੍ਪੇਤਾ ਭਿਕ੍ਖੂਸੁ ਦੁਵਿਧਾਪਿ ਸਂਵਿਜ੍ਜਨ੍ਤੀਤਿ ਆਹ ‘‘ਇਧ ਪਨ ਦ੍ਵੀਹਿਪਿ ਕਾਰਣੇਹਿ ਕੁਲਪੁਤ੍ਤਾਯੇਵਾ’’ਤਿ.

ਸਦ੍ਧਾਤਿ ਇਦਂ ਕਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਸਦ੍ਧਾਯਾ’’ਤਿ, ਸਦ੍ਧਾਤਿ ਵਾ ਸਦ੍ਦਹਿਤ੍ਵਾਤਿ ਅਤ੍ਥੋ. ਇਮਸ੍ਮਿਂ ਪਕ੍ਖੇ ਪਾਲ਼ਿਯਂ ਯ-ਕਾਰਲੋਪੇਨ ਨਿਦ੍ਦੇਸੋਤਿ ਦਟ੍ਠਬ੍ਬਂ. ਅਗਾਰਤੋਤਿ ਅਗਾਰਵਾਸਤੋ, ਉਤ੍ਤਰਪਦਲੋਪੇਨ, ਨਿਸ੍ਸਯੂਪਚਾਰੇਨ ਵਾ ਅਯਂ ਨਿਦ੍ਦੇਸੋਤਿ. ਭਿਕ੍ਖਨਸੀਲਤਾਦਿਲਕ੍ਖਣੋ ਭਿਕ੍ਖੁਭਾਵੋ ਪਬ੍ਬਜ੍ਜਾਸਹਚਰਿਤਾਯ ਸਦ੍ਧਿਂ ਭਿਕ੍ਖੁਭਾਵਂ ਅਨ੍ਵਾਚਿਨਨ੍ਤੋਤਿ ਆਹ ‘‘ਪਬ੍ਬਜ੍ਜਂ ਭਿਕ੍ਖੁਭਾਵਞ੍ਚਾ’’ਤਿ. ਕਮ੍ਮਵਾਚਾਲਕ੍ਖਣੇ ਪਨ ਭਿਕ੍ਖੁਭਾਵੇ ਅਧਿਪ੍ਪੇਤੇ ਸਮੁਚ੍ਚਯਤ੍ਥੋ ਚ-ਸਦ੍ਦੋ ਦਟ੍ਠਬ੍ਬੋ. ਅਨਗਾਰਸ੍ਸ ਭਾਵੋਤਿ ਏਤੇਨ ਪਬ੍ਬਜ੍ਜਾਨਿਸ੍ਸਿਤੋ ਸੁਵਿਸੁਦ੍ਧੋ ਸੀਲਾਚਾਰਗੁਣਵਿਸੇਸੋ ਗਹਿਤੋ, ਕਸਿਗੋਰਕ੍ਖਾਦਿਕਮ੍ਮਪਟਿਕ੍ਖੇਪੋ ਇਧ ਅਨੁਪ੍ਪਾਦਾਦੀਹਿ ਵੇਦਿਤਬ੍ਬੋ. ਸੇਸਗ੍ਗਹਣੇ ਪਨ ਸਰਣਗਮਨਾਦਿਵਸੇਨ ਪਬ੍ਬਜ੍ਜਾਯ, ਸਰਣਗਮਨਾਦਿਵਸੇਨ ਉਪਸਮ੍ਪਦਾਯ ਚ ਅਨੇਕਭੇਦਤ੍ਤਾ ਆਹ ‘‘ਸਬ੍ਬਥਾਪੀ’’ਤਿ, ਤੇਨ ਤੇਨ ਪਕਾਰੇਨਾਤਿ ਅਤ੍ਥੋ. ਪੁਰਤੋਗਾਮਿਤਾ ਪਟਿਪਤ੍ਤਿਗਮਨੇਨ, ਨ ਕਾਯਗਮਨੇਨਾਤਿ ਆਹ ‘‘ਨਾਯਕੋ’’ਤਿ, ਸਮ੍ਮਾਪਟਿਪਤ੍ਤਿਯਾ ਨਿਬ੍ਬਾਨਸਮ੍ਪਾਪਕੋਤਿ ਅਤ੍ਥੋ. ਹਿਤਕਿਰਿਯਾਯਾਤਿ ਦਿਟ੍ਠਧਮ੍ਮਿਕਾਦਿਹਿਤਚਰਿਯਾਯ. ਗਾਹਣਂ ਅਧਿਸੀਲਾਦੀਸੁ ਅਚ੍ਚਨ੍ਤਾਯ ਨਿਯੋਜਨਂ, ਨ ਕਥਨਮਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਗਾਹੇਤਾ’’ਤਿ ਵਤ੍ਵਾ ‘‘ਸਿਕ੍ਖਾਪੇਤਾ’’ਤਿ ਆਹ. ਦਿਟ੍ਠਾਨੁਗਤਿਨ੍ਤਿ ਦਿਟ੍ਠਿਯਾ ਅਨੁਗਮਨਨ੍ਤਿ ਦਸ੍ਸੇਨ੍ਤੋ ‘‘ਦਸ੍ਸਨਾਨੁਗਤਿ’’ਨ੍ਤਿ ਵਤ੍ਵਾ ਸਿਕ੍ਖਾਤ੍ਤਯਸਙ੍ਗਹਂ ਭਗਵਤੋ ਸਾਸਨਂ ਤੇਨ ਦਿਟ੍ਠਤ੍ਤਾ ਦਿਟ੍ਠਿ, ਤਸ੍ਸ ਤਸ੍ਸੇਵ ਖਮਨਵਸੇਨ ਖਨ੍ਤਿ, ਰੁਚ੍ਚਨਵਸੇਨ ਰੁਚਿ, ਤਂਦਿਟ੍ਠਿਖਨ੍ਤਿਰੁਚਿਕਾਵ ਭਗਵਤੋ ਸਾਵਕਾਤਿ ਆਹ ‘‘ਯਂਦਿਟ੍ਠਿਕੋ’’ਤਿਆਦਿ.

ਏਸ ਕਿਰ ਅਲਤ੍ਥਾਤਿ ਸਮ੍ਬਨ੍ਧੋ. ਦੇਵਪੁਤ੍ਤੇ ਵਿਯਾਤਿਆਦਿ ਕਸ੍ਸਚਿ ਪਾਰਿਜੁਞ੍ਞਸ੍ਸ ਅਭਾਵਦੀਪਨਤੋ ‘‘ਸਦ੍ਧਾਯਾ’’ਤਿਆਦਿਨਾ ਵੁਤ੍ਤਸ੍ਸ ਪਬ੍ਬਜਿਤਭਾਵਸ੍ਸ ਪਾਕਟੀਕਰਣਂ. ਸਦ੍ਧਾਯ ਘਰਾ ਨਿਕ੍ਖਮ੍ਮ ਪਬ੍ਬਜਿਤ੍ਵਾਤਿ ਇਦਂ ਹਟ੍ਠਪਹਟ੍ਠਾਦਿਭਾਵਸ੍ਸ ਕਾਰਣਵਚਨਂ. ਘਾਸਚ੍ਛਾਦਨਪਰਮਤਾਯ ਸਨ੍ਤੁਟ੍ਠੇਤਿ ਇਦਂ ਅਨੁਸ੍ਸਙ੍ਕਿਤਾਪਰਿਸਙ੍ਕਿਤਤਾਯ ਕਾਰਣਵਚਨਨ੍ਤਿ ਦਟ੍ਠਬ੍ਬਂ.

ਏਵਮੇਤਨ੍ਤਿਆਦਿਨਾ ਆਮੇਡਿਤਵਚਨਂ ਸਮ੍ਪਹਂਸਨਵਸੇਨ, ਪਸਾਦਵਸੇਨ ਵਾ ਕਤਨ੍ਤਿ ਦਟ੍ਠਬ੍ਬਂ. ਤਥਾ ਹਿ ਏਵਂ-ਸਦ੍ਦੋ ਸਮ੍ਪਟਿਚ੍ਛਨਤ੍ਥੋ ਅਬ੍ਭਨੁਮੋਦਨਤ੍ਥੋ ਚ ਵੁਤ੍ਤੋ. ਮਮਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ, ਨਿਪਾਤਪਦਂ ਵਾ ਏਤਂ ‘‘ਮ’’ਨ੍ਤਿ ਇਮਿਨਾ ਸਮਾਨਤ੍ਥਨ੍ਤਿ ਦਟ੍ਠਬ੍ਬਂ. ਆਦੀਨੀਤਿ ਆਦਿ-ਸਦ੍ਦੇਨ ਨਜੀਵਿਕਾਪਕਤਾਦਿਂ ਸਙ੍ਗਣ੍ਹਾਤਿ ਈਦਿਸਾਨਂਯੇਵਾਤਿ ਸਦ੍ਧਾਪਬ੍ਬਜ੍ਜਾਯ ਵਿਭਾਵਿਤਅਨਭਿਜ੍ਝਾਲੁਆਦਿਸਭਾਵਾਨਂਯੇਵ, ਨ ਇਤਰੇਸਂ ਅਭਿਜ੍ਝਾਲੁਸਭਾਵਾਨਂ. ਵੁਤ੍ਤਞ੍ਹੇਤਂ –

‘‘ਸਙ੍ਘਾਟਿਕਣ੍ਣੇ ਚੇਪਿ ਮੇ, ਭਿਕ੍ਖਵੇ, ਭਿਕ੍ਖੁ ਗਹੇਤ੍ਵਾ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੋ ਅਸ੍ਸ ਪਦੇ ਪਦਂ ਨਿਕ੍ਖਿਪਨ੍ਤੋ, ਸੋ ਚ ਹੋਤਿ ਅਭਿਜ੍ਝਾਲੁ ਕਾਮੇਸੁ ਤਿਬ੍ਬਸਾਰਾਗੋ ਬ੍ਯਾਪਨ੍ਨਚਿਤ੍ਤੋ ਪਦੁਟ੍ਠਮਨਸਙ੍ਕਪ੍ਪੋ ਮੁਟ੍ਠਸ੍ਸਤਿ ਅਸਮ੍ਪਜਾਨੋ ਅਸਮਾਹਿਤੋ ਵਿਬ੍ਭਨ੍ਤਚਿਤ੍ਤੋ ਪਾਕਟਿਨ੍ਦ੍ਰਿਯੋ, ਅਥ ਖੋ ਆਰਕਾਵ ਮਮ ਅਹਞ੍ਚ ਤਸ੍ਸਾ’’ਤਿ (ਇਤਿਵੁ. ੯੨).

ਅਜ੍ਝੋਗਾਹੇਤ੍ਵਾ ਅਧਿਪ੍ਪੇਤਤ੍ਥਂ ਸਮ੍ਭਵਿਤੁਂ ਸਾਧੇਤੁਂ ਦੁਕ੍ਖਾਨੀਤਿ ਦੁਰਭਿਸਮ੍ਭਵਾਨਿ. ਅਟ੍ਠਕਥਾਯਂ ਪਨ ਤਤ੍ਥ ਨਿਵਾਸੋਯੇਵ ਦੁਕ੍ਖੋਤਿ ਦਸ੍ਸੇਤੁਂ ‘‘ਸਮ੍ਭਵਿਤੁਂ ਦੁਕ੍ਖਾਨਿ ਦੁਸ੍ਸਹਾਨੀ’’ਤਿ ਵੁਤ੍ਤਂ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਲਕ੍ਖਣਪ੍ਪਤ੍ਤਾਨਿ ਵਨਸਣ੍ਡਾਨਿ. ਵਨਪਤ੍ਥ-ਸਦ੍ਦੋ ਹਿ ਸਣ੍ਡਭੂਤੇ ਰੁਕ੍ਖਸਮੂਹੇਪਿ ਵਤ੍ਤਤੀਤਿ ਅਰਞ੍ਞਗ੍ਗਹਣਂ. ਕਿਞ੍ਚਾਪੀਤਿ ਅਨੁਜਾਨਨਸਮ੍ਭਾਵਨਤ੍ਥੇ ਨਿਪਾਤੋ. ਕਿਂ ਅਨੁਜਾਨਾਤਿ? ਨਿਪ੍ਪਰਿਯਾਯਤੋ ਅਰਞ੍ਞਾਭਾਵਂ ‘‘ਗਾਮਤੋ ਬਹਿ ਅਰਞ੍ਞ’’ਨ੍ਤਿ. ਤੇਨਾਹ ‘‘ਨਿਪ੍ਪਰਿਯਾਯੇਨਾ’’ਤਿਆਦਿ. ਕਿਂ ਸਮ੍ਭਾਵੇਤਿ? ਆਰਞ੍ਞਕਙ੍ਗਨਿਪ੍ਫਾਦਕਤ੍ਤਂ. ਯਞ੍ਹਿ ਆਰਞ੍ਞਕਙ੍ਗਨਿਪ੍ਫਾਦਕਂ, ਤਂ ਵਿਸੇਸਤੋ ‘‘ਅਰਞ੍ਞ’’ਨ੍ਤਿ ਵੁਤ੍ਤਨ੍ਤਿ. ਤੇਨੇਵਾਹ ‘‘ਯਂ ਤਂ ਪਞ੍ਚਧਨੁਸਤਿਕ’’ਨ੍ਤਿਆਦਿ. ਨਿਕ੍ਖਮਿਤ੍ਵਾ ਬਹਿਇਨ੍ਦਖੀਲਾਤਿ ਇਨ੍ਦਖੀਲਤੋ ਬਹਿ ਨਿਕ੍ਖਮਿਤ੍ਵਾ, ਤਤੋ ਬਹਿ ਪਟ੍ਠਾਯਾਤਿ ਅਤ੍ਥੋ. ਬਹਿ ਇਨ੍ਦਖੀਲਾਤਿ ਯਤ੍ਥ ਦ੍ਵੇ ਤੀਣਿ ਇਨ੍ਦਖੀਲਾਨਿ, ਤਤ੍ਥ ਬਹਿਦ੍ਧਾ ਇਨ੍ਦਖੀਲਤੋ ਪਟ੍ਠਾਯ, ਯਤ੍ਥ ਤਂ ਨਤ੍ਥਿ, ਤਤ੍ਥ ਤਦਰਹਟ੍ਠਾਨਤੋ ਪਟ੍ਠਾਯਾਤਿ ਵਦਨ੍ਤਿ. ਯਸ੍ਮਾ ਬਹਿ ਇਨ੍ਦਖੀਲਤੋ ਪਟ੍ਠਾਯ ਮਨੁਸ੍ਸੂਪਚਾਰੇ ਭਯਭੇਰਵਂ ਨਤ੍ਥਿ, ਤਸ੍ਮਾ ਇਧ ਨਾਧਿਪ੍ਪੇਤਨ੍ਤਿ ਦਟ੍ਠਬ੍ਬਂ.

ਗਾਮਨ੍ਤਨ੍ਤਿ ਗਾਮਸਮੀਪਂ. ਅਨੁਪਚਾਰਟ੍ਠਾਨਨ੍ਤਿ ਨਿਚ੍ਚਕਿਚ੍ਚਵਸੇਨ ਨੁਪਚਰਿਤਬ੍ਬਟ੍ਠਾਨਂ. ਤੇਨਾਹ ‘‘ਯਤ੍ਥ ਨ ਕਸੀਯਤਿ ਨ ਵਪੀਯਤੀ’’ਤਿ. ਪਨ੍ਤਾਨੀਤਿ ਇਮਿਨਾ ‘‘ਪਰਿਯਨ੍ਤਾਨ’’ਨ੍ਤਿ ਇਮਸ੍ਸ ਪਰਿਯਾਯਸ੍ਸ ਇਧ ਪਾਲ਼ਿਯਂ ਗਹਿਤਤ੍ਤਾ ਵੁਤ੍ਤਂ ‘‘ਪਰਿਯਨ੍ਤਾਨਨ੍ਤਿ ਇਮਮੇਕਂ ਪਰਿਯਾਯਂ ਠਪੇਤ੍ਵਾ’’ਤਿ. ਦੂਰਾਨਨ੍ਤਿ ਪਨ ਅਯਂ ਪਰਿਯਾਯੋ ਠਪੇਤਬ੍ਬੋ ਸਿਯਾ ਤਸ੍ਸਾਪਿ ‘‘ਪਨ੍ਤਾਨੀ’’ਤਿ ਇਮਿਨਾਵ ਅਤ੍ਥਤੋ ਗਹਿਤਤ੍ਤਾ, ਤਥਾ ਸਤਿ ‘‘ਨ ਮਨੁਸ੍ਸੂਪਚਾਰਾਨ’’ਨ੍ਤਿ ਏਦਿਸਾਨਮ੍ਪਿ ਠਪੇਤਬ੍ਬਤਾ ਆਪਜ੍ਜਤਿ, ਤਸ੍ਮਾ ਸਦ੍ਦਤੋ ਏਵ ਠਪਨਂ ਦਟ੍ਠਬ੍ਬਂ. ਪਵਿਵੇਕਨ੍ਤਿ ਪਕਾਰਤੋ, ਪਕਾਰੇਹਿ ਵਾ ਵਿਵੇਚਨਂ, ਰੂਪਾਦਿਪੁਥੁਤ੍ਤਾਰਮ੍ਮਣੇ ਪਕਾਰਤੋ ਗਮਨਾਦਿਇਰਿਯਾਪਥਪ੍ਪਕਾਰੇਹਿ ਅਤ੍ਤਨੋ ਕਾਯਸ੍ਸ ਵਿਵੇਚਨਂ ਗਚ੍ਛਤੋਪਿ ਤਿਟ੍ਠਤੋਪਿ ਨਿਸਜ੍ਜਤੋਪਿ ਏਕਸ੍ਸੇਵ ਪਵਤ੍ਤਤਿ. ਤੇਨੇਵ ਹਿ ਵਿਵੇਚੇਤਬ੍ਬਾਨਂ ਵਿਵੇਚਨਾਕਾਰਸ੍ਸ ਚ ਭੇਦਤੋ ਬਹੁਵਿਧਤ੍ਤਾ ਤੇ ਏਕਤ੍ਤੇਨ ਗਹੇਤ੍ਵਾ ‘‘ਪਵਿਵੇਕ’’ਨ੍ਤਿ ਏਕਵਚਨੇਨ ਵੁਤ੍ਤਂ. ਦੁਕ੍ਕਰਂ ਪਵਿਵੇਕਨ੍ਤਿ ਵਾ ਪਵਿਵੇਕਂ ਕਤ੍ਤੁਂ ਨ ਸੁਖਨ੍ਤਿ ਅਤ੍ਥੋ. ਏਕੀਭਾਵੇਤਿ ਏਕਿਕਭਾਵੇ. ਦ੍ਵਯਂਦ੍ਵਯਾਰਾਮੋਤਿ ਦ੍ਵਿਨ੍ਨਂ ਦ੍ਵਿਨ੍ਨਂ ਭਾਵਾਭਿਰਤੋ. ਹਰਨ੍ਤਿ ਵਿਯਾਤਿ ਸਂਹਰਨ੍ਤਿ ਵਿਯ ਵਿਘਾਤੁਪ੍ਪਾਦਨੇਨ. ਤੇਨਾਹ ‘‘ਘਸਨ੍ਤਿ ਵਿਯਾ’’ਤਿ, ਭਯਸਨ੍ਤਾਸੁਪ੍ਪਾਦਨੇਨ ਖਾਦਿਤੁਂ ਆਗਤਾ ਯਕ੍ਖਰਕ੍ਖਸਪਿਸਾਚਾਦਯੋ ਵਿਯਾਤਿ ਅਧਿਪ੍ਪਾਯੋ. ਈਦਿਸਸ੍ਸਾਤਿ ਅਲਦ੍ਧਸਮਾਧਿਨੋ. ਤਿਣਪਣ੍ਣਮਿਗਾਦਿਸਦ੍ਦੇਹੀਤਿ ਵਾਤੇਰਿਤਾਨਂ ਤਿਣਪਣ੍ਣਾਦੀਨਂ ਮਿਗਪਕ੍ਖਿਆਦੀਨਞ੍ਚ ਭਿਂਸਨਕੇਹਿ ਭੇਰਵੇਹਿ ਸਦ੍ਦੇਹਿ ਵਿਵਿਧੇਹਿ ਚ ਅਞ੍ਞੇਹਿ ਖਾਣੁਆਦੀਹਿ ਯਕ੍ਖਾਦਿਆਕਾਰੇਹਿ ਉਪਟ੍ਠਿਤੇਹਿ ਭਿਂਸਨਕੇਹਿ. ਏਵਂ ਦੁਕ੍ਕਰਂ ਦੁਰਭਿਸਮ੍ਭਵਂ ਨਾਮ ਕਰੋਨ੍ਤੋ ਅਹੋ ਅਚ੍ਛਰਿਯਾ ਏਤੇਤਿ ਵਿਮ੍ਹਿਤੋ.

ਕਾਯਕਮ੍ਮਨ੍ਤਵਾਰਕਥਾਵਣ੍ਣਨਾ

੩੫. ਸੋਲ਼ਸਸੁ ਠਾਨੇਸੂਤਿ ‘‘ਯੇ ਖੋ ਕੇਚੀ’’ਤਿਆਦਿਨਾ ਪਾਲ਼ਿਯਂ ਵਕ੍ਖਮਾਨੇਸੁ ਸੋਲ਼ਸਸੁ ਕਾਰਣੇਸੁ. ਅਪਰਿਸੁਦ੍ਧਕਾਯਕਮ੍ਮਨ੍ਤਤਾਦਯੋ ਅਰਞ੍ਞੇ ਵਿਹਰਨ੍ਤਾਨਂ ਚਿਤ੍ਤੁਤ੍ਰਾਸਨਿਮਿਤ੍ਤਤਾਯ ਵਿਸੇਸਤੋ ਵਿਕ੍ਖੇਪਾਵਹਾ, ਪਰਿਸੁਦ੍ਧਕਾਯਕਮ੍ਮਨ੍ਤਤਾਦਯੋ ਪਨ ਤਦਭਾਵਤੋ ਤੇਸਂ ਅਵਿਕ੍ਖੇਪਾਵਹਾ. ਤੇਨਾਹ ‘‘ਅਪਰਿਸੁਦ੍ਧਕਾਯਕਮ੍ਮਨ੍ਤਸਨ੍ਦੋਸਹੇਤੂ’’ਤਿਆਦਿ. ਸੋਲ਼ਸਸੂਤਿ ਚ ਵੋਦਾਨਪਕ੍ਖਂਯੇਵ ਗਹੇਤ੍ਵਾ ਵੁਤ੍ਤਂ. ਸਂਕਿਲੇਸਗ੍ਗਹਣਮ੍ਪਿ ਯਾਵਦੇਵ ਵੋਦਾਨਦਸ੍ਸਨਤ੍ਥਨ੍ਤਿ. ਆਰਮ੍ਮਣਪਰਿਗ੍ਗਹਰਹਿਤਾਨਨ੍ਤਿ ਅਪਰਿਸੁਦ੍ਧਕਾਯਕਮ੍ਮਨ੍ਤਾਦਿਕਸ੍ਸ ਅਰਞ੍ਞੇ ਦਿਟ੍ਠਸ੍ਸ ਤਸ੍ਸ ਆਰਮ੍ਮਣਸ੍ਸ ‘‘ਯੇ ਖੋ ਕੇਚੀ’’ਤਿਆਦਿਨਾ ਪਾਲ਼ਿਯਂ ਆਗਤਨਯੇਨ ਪਰਿਗ੍ਗਣ੍ਹਨਞਾਣਰਹਿਤਾਨਂ. ਆਰਮ੍ਮਣਪਰਿਗ੍ਗਹਯੁਤ੍ਤਾਨਨ੍ਤਿ ਏਤ੍ਥ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਅਤ੍ਤਨਾਤਿ ਭਗਵਨ੍ਤਂ ਸਨ੍ਧਾਯ ਵਦਤਿ, ਸਯਨ੍ਤਿ ਅਤ੍ਥੋ. ਤਾਦਿਸੋਤਿ ਆਰਮ੍ਮਣਪਰਿਗ੍ਗਹਯੁਤ੍ਤੋ.

ਸਮ੍ਬੁਜ੍ਝਤਿ ਏਤੇਨਾਤਿ ਸਮ੍ਬੋਧੋ, ਅਰਿਯਮਗ੍ਗੋਤਿ ਆਹ ‘‘ਅਰਿਯਮਗ੍ਗਪ੍ਪਤ੍ਤਿਤੋ’’ਤਿ. ਅਗ੍ਗਮਗ੍ਗਾਧਿਗਮਾਧੀਨੋ ਬੁਦ੍ਧਾਨਂ ਸਬ੍ਬਞ੍ਞੁਤਞ੍ਞਾਣਾਧਿਗਮੋਤਿ ਆਹ ‘‘ਅਨਭਿਸਮ੍ਬੁਦ੍ਧਸ੍ਸਾਤਿ ਅਪ੍ਪਟਿਵਿਦ੍ਧਚਤੁਸਚ੍ਚਸ੍ਸਾ’’ਤਿ. ਅਨਵਸੇਸਤੋ ਞੇਯ੍ਯਂ, ਬੁਜ੍ਝਿਤੁਂ ਅਰਹਤੀਤਿ ਬੋਧਿ, ਮਹਾਵੀਰਿਯਤਾਦਿਨਾ ਤਤ੍ਥ ਵਿਸੇਸਯੋਗਤੋ ਸਤ੍ਤੋਤਿ ਆਹ ‘‘ਬੁਜ੍ਝਨਕਸਤ੍ਤਸ੍ਸਾ’’ਤਿ. ਤੇਨਾਹ ‘‘ਸਮ੍ਮਾਸਮ੍ਬੋਧਿ’’ਨ੍ਤਿਆਦਿ. ਨਿਯਤਭਾਵਪ੍ਪਤ੍ਤਿਤੋ ਪਟ੍ਠਾਯ ਮਹਾਸਤ੍ਤਾ ਯਥਾ ਮਹਾਬੋਧਿਯਾਨਪਟਿਪਦਾ ਹਾਨਭਾਗਿਯਾ, ਠਿਤਿਭਾਗਿਯਾ ਵਾ ਨ ਹੋਤਿ, ਅਥ ਖੋ ਵਿਸੇਸਭਾਗਿਯਾ ਨਿਬ੍ਬੇਧਭਾਗਿਯਾ ਚ ਹੋਤਿ, ਤਥਾ ਪਟਿਪਜ੍ਜਨਤੋ ਬੋਧਿਯਂ ਨਿਨ੍ਨਗੋਣਪਬ੍ਭਾਰਾ ਏਵਾਤਿ ਆਹ ‘‘ਬੋਧਿਯਾ ਵਾ ਸਤ੍ਤਸ੍ਸੇਵ ਲਗ੍ਗਸ੍ਸੇਵਾ’’ਤਿ. ਤੇਨਾਹ ‘‘ਦੀਪਙ੍ਕਰਸ੍ਸ ਹੀ’’ਤਿਆਦਿ. ਅਟ੍ਠਧਮ੍ਮਸਮੋਧਾਨੇਨਾਤਿ –

‘‘ਮਨੁਸ੍ਸਤ੍ਤਂ ਲਿਙ੍ਗਸਮ੍ਪਤ੍ਤਿ, ਹੇਤੁ ਸਤ੍ਥਾਰਦਸ੍ਸਨਂ;

ਪਬ੍ਬਜ੍ਜਾ ਗੁਣਸਮ੍ਪਤ੍ਤਿ, ਅਧਿਕਾਰੋ ਚ ਛਨ੍ਦਤਾ’’ਤਿ. (ਬੁ. ਵਂ. ੨.੫੯) –

ਇਮੇਸਂ ਅਭਿਨੀਹਾਰਸ੍ਸ ਅਙ੍ਗਭੂਤਾਨਂ ਅਟ੍ਠਨ੍ਨਂ ਧਮ੍ਮਾਨਂ ਸਮੋਧਾਨੇਨ ਸਮਵਧਾਨੇਨ.

ਪਬ੍ਬਜ੍ਜੂਪਗਤਾਤਿ ਪਬ੍ਬਜ੍ਜਂ ਉਪਗਤਾ. ਤੇਨ ਪਬ੍ਬਜ੍ਜਾਮਤ੍ਤੇਨ ਸਮਣਾ, ਨ ਸਮਿਤਪਾਪਤਾਯਾਤਿ ਦਸ੍ਸੇਤਿ. ਜਾਤਿਮਤ੍ਤੇਨ ਇਧ ਬ੍ਰਾਹ੍ਮਣਾਤਿ ਅਧਿਪ੍ਪੇਤਾਤਿ ਆਹ ‘‘ਭੋਵਾਦਿਨੋ ਵਾ’’ਤਿ. ਤੇ ਹਿ ‘‘ਭੋ ਭੋ’’ਤਿ ਵਦਨਸੀਲਾ, ਤੇਨਾਹ ‘‘ਭੋਵਾਦੀ ਨਾਮ ਸੋ ਹੋਤਿ, ਸਚੇ ਹੋਤਿ ਸਕਿਞ੍ਚਨੋ’’ਤਿ (ਧ. ਪ. ੩੯੬; ਸੁ. ਨਿ. ੬੨੫). ਪਾਣਾਤਿਪਾਤਾਦਿਨਾਤਿ ਆਦਿ-ਸਦ੍ਦੇਨ ਅਦਿਨ੍ਨਾਦਾਨਂ ਅਬ੍ਰਹ੍ਮਚਰਿਯਞ੍ਚ ਸਙ੍ਗਣ੍ਹਾਤਿ. ਅਪਰਿਸੁਦ੍ਧੇਨਾਤਿ ਚ ਵਿਸੇਸਨਂ ਕਾਯਕਮ੍ਮਨ੍ਤਾਪੇਕ੍ਖਾਯ, ਨ ਪਾਣਾਤਿਪਾਤਾਦਿਅਪੇਕ੍ਖਾਯ. ਨ ਹਿ ਪਾਣਾਤਿਪਾਤਾਦਿਕੋ ਤਸ੍ਸ ਪੁਬ੍ਬਭਾਗਪਯੋਗੋ ਚ ਕੋਚਿ ਪਰਿਸੁਦ੍ਧੋ ਨਾਮ ਅਤ੍ਥਿ. ਭਾਯਨਟ੍ਠੇਨ ਭਯਂ, ਭੀਰੁਤਾਵਹਟ੍ਠੇਨ ਭੇਰਵਂ. ਸਨ੍ਦੋਸਹੇਤੂਤਿ ਸਦੋਸਹੇਤੁ. ਸ-ਸਦ੍ਦੋ ਹਿ ਇਧ ਸਾਨੁਸਾਰੋ ਵੁਤ੍ਤੋ. ਤੇਨਾਹ ‘‘ਅਤ੍ਤਨੋ ਦੋਸਸ੍ਸ ਹੇਤੂ’’ਤਿ. ਏਕਨ੍ਤੇਨ ਚਿਤ੍ਤੁਤ੍ਰਾਸਲਕ੍ਖਣਸ੍ਸ ਭਯਸ੍ਸ ਵਸੇਨ ‘‘ਸਾਵਜ੍ਜ’’ਨ੍ਤਿ ਵੁਤ੍ਤਂ. ਚਿਤ੍ਤੁਤ੍ਰਾਸੋ ਹਿ ਏਕਨ੍ਤਸਾਵਜ੍ਜੋ ਭਾਯਨਟ੍ਠੇਨ ਭਯਞ੍ਚਾਤਿ. ਅਕ੍ਖੇਮਨ੍ਤਿ ਇਦਂ ਉਭਯਵਸੇਨ. ਚਿਤ੍ਤੁਤ੍ਰਾਸੋਪਿ ਹਿ ਸਰੀਰਚਿਤ੍ਤਾਨਂ ਅਨਤ੍ਥਾਵਹਤੋ ਅਕ੍ਖੇਮ, ਤਥਾ ਭਯਾਨਕਾਰਮ੍ਮਣਮ੍ਪੀਤਿ. ਅਟ੍ਠਕਥਾਯਂ ਪਨ ਅਤ੍ਥਦ੍ਵਯਂ ਯਥਾਸਙ੍ਖ੍ਯਂ ਯੋਜਿਤਂ. ਸਯਂ ਪਰਿਕਪ੍ਪਿਤਭਯਾਨਕਾਰਮ੍ਮਣਨਿਮਿਤ੍ਤਂ ਚਿਤ੍ਤੁਤ੍ਰਾਸਸਮੁਪ੍ਪਾਦਨਵਸੇਨ ਆਨੇਨ੍ਤਾ ਭਯਭੇਰਵਂ ਅਵ੍ਹਾਯਨ੍ਤਿ ਵਿਯ ਹੋਨ੍ਤੀਤਿ ਵੁਤ੍ਤਂ ‘‘ਅਵ੍ਹਾਯਨ੍ਤੀਤਿ ਪਕ੍ਕੋਸਨ੍ਤੀ’’ਤਿ. ਤੇਤਿ ਮਾਰਿਤਮਨੁਸ੍ਸਾਨਂ ਞਾਤਿਮਿਤ੍ਤਾਦਯੋ. ਗਚ੍ਛਂ ਗਹਨਭੂਤਂ ਮਹਨ੍ਤਂ ਕਣ੍ਟਕਸਣ੍ਡਂ, ਗੁਮ੍ਬਂ ਨਾਤਿਮਹਨ੍ਤਨ੍ਤਿ ਵਦਨ੍ਤਿ. ਗਚ੍ਛਨ੍ਤਿ ਪਨ ਤਿਣਵਨਂ ਵੇਦਿਤਬ੍ਬਂ, ‘‘ਗਚ੍ਛੇ ਰੁਲ਼੍ਹਤਿਣੇ’’ਤਿ ਵੁਤ੍ਤਂ, ਗੁਮ੍ਬਂ ਕਣ੍ਟਕਲਤਾਦਿਭਰਿਤਾਵਿਰੁਲ਼੍ਹਂ. ਬਦ੍ਧਾ ਵਧਿਤਾ ਵਿਯਾਤਿ ਬਦ੍ਧਾ ਹੁਤ੍ਵਾ ਤਾਲ਼ਿਯਮਾਨਾ ਵਿਯ.

‘‘ਨ ਖੋ ਪਨਾਤਿ ਏਤ੍ਥ ਖੋਤਿ ਅਵਧਾਰਣਤ੍ਥੇ ਨਿਪਾਤੋ, ਪਨਾ’’ਤਿ ਵਿਸੇਸਤ੍ਥੇ. ਤੇਨੇਤਂ ਦਸ੍ਸੇਤਿ ‘‘ਅਞ੍ਞੇ ਸਮਣਬ੍ਰਾਹ੍ਮਣਾ ਵਿਯ ਅਹਂ ਅਪਰਿਸੁਦ੍ਧਕਾਯਕਮ੍ਮਨ੍ਤੋ ਹੁਤ੍ਵਾ ਅਰਞ੍ਞਵਨਪਤ੍ਥਾਨਿ ਪਨ੍ਤਾਨਿ ਸੇਨਾਸਨਾਨਿ ਨ ਖੋ ਪਨ ਪਟਿਸੇਵਾਮਿ, ਪਰਿਸੁਦ੍ਧਕਾਯਕਮ੍ਮਨ੍ਤੋਯੇਵ ਪਨ ਹੁਤ੍ਵਾ ਤਾਨਿ ਪਟਿਸੇਵਾਮੀ’’ਤਿ. ਏਵਂ ਵਾ ਏਤ੍ਥ ਅਤ੍ਥਯੋਜਨਾ ਵੇਦਿਤਬ੍ਬਾ. ‘‘ਪਰਿਸੁਦ੍ਧਕਾਯਕਮ੍ਮਨ੍ਤੋਹਮਸ੍ਮੀ’’ਤਿ ਹਿ ਤੇਨ ਅਵਧਾਰਣੇਨ ਵਿਭਾਵਿਤਤ੍ਥਦਸ੍ਸਨਂ. ਤੇਸਮਹਂ ਅਞ੍ਞਤਰੋਤਿ ਤਾਯ ਪਰਿਸੁਦ੍ਧਕਾਯਕਮ੍ਮਤਾਯ ਤੇਸਂ ਅਰਿਯਾਨਂ ਅਹਂ ਅਞ੍ਞਤਰੋਤਿ ਕਾਯਕਮ੍ਮਪਾਰਿਸੁਦ੍ਧਿਯਾ ਮਹਾਸਤ੍ਤੋ ਅਤ੍ਤਾਨਂ ਅਰਿਯੇਸੁ ਪਕ੍ਖਿਪਤਿ. ਪਰਮਸਲ੍ਲੇਖਭਾਵਪ੍ਪਤ੍ਤਾ ਹਿ ਤਦਾ ਬੋਧਿਸਤ੍ਤਸ੍ਸ ਕਾਯਕਮ੍ਮਪਾਰਿਸੁਦ੍ਧਿ, ਤਥਾ ਵਚੀਕਮ੍ਮਾਦਿਪਾਰਿਸੁਦ੍ਧਿ, ਯਤੋ ਮਾਰੋ ਰਨ੍ਧਗਵੇਸੀ ਹੁਤ੍ਵਾ ਛਬ੍ਬਸ੍ਸਾਨਿ ਨਿਰਨ੍ਤਰਂ ਅਨੁਬਨ੍ਧੋ ਅਨ੍ਤਰਂ ਨ ਲਭਤਿ. ਤੇਨਾਹ –

‘‘ਸਤ੍ਤ ਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮);

ਭਿਯ੍ਯੋਤਿ ਅਧਿਕਂ ਸਵਿਸੇਸਂ, ਉਪਰੂਪਰਿ ਵਾ. ਭੀਤਤਸਿਤਾ ਭਯੂਪਦ੍ਦਵੇਨ ਛਮ੍ਭਿਤਸਰੀਰਾ ਹਟ੍ਠਲੋਮਾ ਹੋਨ੍ਤਿ, ਅਭੀਤਾਤਸਿਤਾ ਪਨ ਭਯੂਪਦ੍ਦਵਾਭਾਵਤੋ ਅਹਟ੍ਠਲੋਮਾ ਖੇਮੇਨ ਸੋਤ੍ਥਿਨਾ ਤਿਟ੍ਠਨ੍ਤੀਤਿ ਤੇਸਂ ਖੇਮਪ੍ਪਤ੍ਤਿ ਸੋਤ੍ਥਿਭਾਵੋ ਵਾ ਪਨ੍ਨਲੋਮਤਾਯ ਪਾਕਟੋ ਹੋਤੀਤਿ ਪਾਲ਼ਿਯਂ ‘‘ਪਲ੍ਲੋਮ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਪਨ੍ਨਲੋਮਤ’’ਨ੍ਤਿਆਦਿ. ਏਤ੍ਥ ਚ ਭਿਯ੍ਯੋ ਪਲ੍ਲੋਮਮਾਪਾਦਿਂ ਅਰਞ੍ਞੇ ਵਿਹਾਰਾਯਾਤਿ ਪਟਿਞ੍ਞਾਨਿਦ੍ਦੇਸੋ. ਪਰਿਸੁਦ੍ਧਕਾਯਕਮ੍ਮਨ੍ਤੋਹਮਸ੍ਮੀਤਿ ਹੇਤੁਦਸ੍ਸਨਂ. ‘‘ਯੇ ਹਿ ਵੋ ਅਰਿਯਾ’’ਤਿ ਸਦਿਸੂਦਾਹਰਣਦਸ੍ਸਨਂ. ਯੇ ਖੋ ਕੇਚਿ ਸਮਣਾ ਵਾ ਬ੍ਰਾਹ੍ਮਣਾ ਵਾਤਿ ਵਿਸਦਿਸੂਦਾਹਰਣਦਸ੍ਸਨਂ. ਸੇਸਾਨਿ ਅਨ੍ਵਯਬ੍ਯਤਿਰੇਕਵਿਭਾਵਨਾਨੀਤਿ ਦਟ੍ਠਬ੍ਬਨ੍ਤਿ ਅਯਮੇਤ੍ਥ ਯੁਤ੍ਤਿਵਿਭਾਵਨਾ. ਇਮਿਨਾ ਨਯੇਨ ਸੇਸਵਾਰੇਸੁਪਿ ਯੁਤ੍ਤਿਵਿਭਾਵਨਾ ਵੇਦਿਤਬ੍ਬਾ.

ਕਾਯਕਮ੍ਮਨ੍ਤਵਾਰਕਥਾਵਣ੍ਣਨਾ ਨਿਟ੍ਠਿਤਾ.

ਵਚੀਕਮ੍ਮਨ੍ਤਵਾਰਾਦਿਕਥਾਵਣ੍ਣਨਾ

੩੬. ਅਪਰਿਸੁਦ੍ਧੇਨ ਮੁਸਾਵਾਦਾਦਿਨਾਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਨਯਮੇਵ. ਆਦਿ-ਸਦ੍ਦੇਨ ਪਨ ਸਙ੍ਗਹਿਤਂ ਤੇਸਞ੍ਚ ਮੁਸਾਵਾਦਾਦੀਨਂ ਪਵਤ੍ਤਿਭੇਦਂ ਭਯਭੇਰਵਾਵ੍ਹਾਨਮੁਖੇਨ ਦਸ੍ਸੇਤੁਂ ‘‘ਕਥ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.

ਭਣ੍ਡੇਸੂਤਿ ਸਵਿਞ੍ਞਾਣਕਾਵਿਞ੍ਞਾਣਕੇਸੁ ਭਣ੍ਡੇਸੁ. ਉਪ੍ਪਾਦੇਤ੍ਵਾਤਿ ਅਤ੍ਤਨੋ ਪਰਿਣਾਮਵਸੇਨ ਅਭਿਜ੍ਝਾਸਙ੍ਖਾਤਂ ਵਿਸਮਲੋਭਂ ਉਪ੍ਪਾਦੇਤ੍ਵਾ. ਕੁਜ੍ਝਿਤ੍ਵਾਤਿ ਵਿਨਾਸਚਿਨ੍ਤਾਵਸੇਨ ਪਰਸ੍ਸ ਕੁਜ੍ਝਿਤ੍ਵਾ. ਏਵਞ੍ਹਿ ਨੇਸਂ ‘‘ਯੇਸਂ ਅਪਰਜ੍ਝਿਮ੍ਹਾ, ਤੇ ਇਦਾਨਿ ਅਨੁਬਨ੍ਧਿਤ੍ਵਾ’’ਤਿਆਦਿਨਾ ਪਚ੍ਛਾ ਆਸਙ੍ਕੁਪ੍ਪਤ੍ਤਿ ਸਿਯਾ. ‘‘ਏਤੇ ਅਮ੍ਹਾਕਂ ਪਰਿਗ੍ਗਹਵਤ੍ਥੁਂ ਗਹੇਤੁਕਾਮਾ ਮਞ੍ਞੇ, ਵਿਨਾਸਂ ਕਾਤੁਕਾਮਾ ਮਞ੍ਞੇ’’ਤਿ ਯਥਾ ਪਰੇ ਪਰਤੋ ਤੇਸਂ ਅਭਿਜ੍ਝਾਬ੍ਯਾਪਾਦਪ੍ਪਵਤ੍ਤਿਂ ਪਰਿਗ੍ਗਣ੍ਹਨ੍ਤਿ, ਤਾਦਿਸਂ ਮਨੋਕਮ੍ਮਨ੍ਤਂ ਸਨ੍ਧਾਯ ‘‘ਤੇ ਪਰੇਸ’’ਨ੍ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਾਮਂ ਅਕੁਸਲਕਾਯਕਮ੍ਮਵਚੀਕਮ੍ਮਪਵਤ੍ਤਿਕਾਲੇਪਿ ਅਭਿਜ੍ਝਾਦਯੋ ਪਵਤ੍ਤਨ੍ਤਿਯੇਵ, ਤਦਾ ਪਨ ਤੇ ਚੇਤਨਾਪਕ੍ਖਿਕਾ ਵਾ ਅਬ੍ਬੋਹਾਰਿਕਾ ਵਾਤਿ ਮਨੋਕਮ੍ਮਨ੍ਤਵਾਰੇ ਏਵ ਅਭਿਜ੍ਝਾਦਿਵਸੇਨ ਯੋਜਨਾ ਕਤਾ. ਅਥ ਵਾ ਦ੍ਵਾਰਨ੍ਤਰੇ ਪਵਤ੍ਤਾਨਮ੍ਪਿ ਪਾਣਾਤਿਪਾਤਾਦੀਨਂ ਵਚੀਕਮ੍ਮਾਦਿਭਾਵਾਭਾਵੋ ਵਿਯ ਦ੍ਵਾਰਨ੍ਤਰੇ ਪਵਤ੍ਤਾਨਮ੍ਪਿ ਅਭਿਜ੍ਝਾਦੀਨਂ ਕਾਯਕਮ੍ਮਾਦਿਭਾਵਾਭਾਵੋ, ਮਨੋਕਮ੍ਮਭਾਵੋ ਏਵ ਪਨ ਸਿਦ੍ਧੋਤਿ ਕਤ੍ਵਾ ਮਨੋਕਮ੍ਮਨ੍ਤਵਾਰੇ ਏਵ ਅਭਿਜ੍ਝਾਦਯੋ ਉਦ੍ਧਟਾ. ਤਥਾ ਹਿ ਵੁਤ੍ਤਂ –

‘‘ਦ੍ਵਾਰੇ ਚਰਨ੍ਤਿ ਕਮ੍ਮਾਨਿ, ਨ ਦ੍ਵਾਰਾ ਦ੍ਵਾਰਚਾਰਿਨੋ;

ਤਸ੍ਮਾ ਦ੍ਵਾਰੇਹਿ ਕਮ੍ਮਾਨਿ, ਅਞ੍ਞਮਞ੍ਞਂ ਵਵਤ੍ਥਿਤਾ’’ਤਿ. (ਧ. ਸ. ਅਟ੍ਠ. ੧.ਕਾਯਕਮ੍ਮਦ੍ਵਾਰ);

ਕਿਞ੍ਚਾਪਿ ਅਟ੍ਠਕਥਾਯਂ ਸਾਸਨੇ ਪਬ੍ਬਜਿਤਵਸੇਨ ਆਜੀਵਵਾਰੇ ਭਯਭੇਰਵਾਵ੍ਹਾਨਂ ਯੋਜਿਤਂ, ‘‘ਯੇ ਖੋ ਕੇਚਿ ਸਮਣਾ ਵਾ ਬ੍ਰਾਹ੍ਮਣਾ ਵਾ’’ਤਿ ਪਨ ਵਚਨਤੋ ਬਾਹਿਰਕਵਸੇਨ ਗਹਟ੍ਠਵਸੇਨ ਚ ਯੋਜਨਾ ਵੇਦਿਤਬ੍ਬਾ. ਗਹਟ੍ਠਾਨਮ੍ਪਿ ਹਿ ਜਾਤਿਧਮ੍ਮਕੁਲਧਮ੍ਮਦੇਸਧਮ੍ਮਵਿਲੋਮਨਵਸੇਨ ਅਞ੍ਞਥਾਪਿ ਮਿਚ੍ਛਾਜੀਵੋ ਲਬ੍ਭਤੇਵ, ਤਾਯ ਏਵ ਚ ਆਜੀਵਵਿਪਤ੍ਤਿਯਾ ਅਞ੍ਞਥਾ ਵਾ ਨੇਸਂ ਅਰਞ੍ਞਵਾਸੋ ਸਮ੍ਭਵੇਯ੍ਯਾਤਿ.

੩੭. ਏਵਂ ਆਜੀਵਟ੍ਠਮਕਸੀਲਵਸੇਨ ਭਯਭੇਰਵਂ ਦਸ੍ਸੇਤ੍ਵਾ ਤਤੋ ਪਰਂ ਨੀਵਰਣਪ੍ਪਹਾਨਾਦਿਵਸੇਨ ਤਂ ਦਸ੍ਸੇਤੁਂ ਦੇਸਨਾ ਵਡ੍ਢਿਤਾਤਿ ਤਦਤ੍ਥਂ ਵਿਵਰਨ੍ਤੋ ‘‘ਇਤੋ ਪਰ’’ਨ੍ਤਿਆਦਿਮਾਹ. ਤਤ੍ਥ ਨੀਵਰਣਵਸੇਨ ਪੁਨ ਵੁਤ੍ਤਾਤਿ ਅਯਮਧਿਪ੍ਪਾਯੋ – ਏਵਂ ਸੀਲਵਿਸੁਦ੍ਧਿਮਤ੍ਤਮ੍ਪਿ ਅਰਞ੍ਞੇ ਵਿਹਰਤੋ ਭਯਭੇਰਵਾਭਾਵਂ ਆਵਹਤਿ, ਕਿਮਙ੍ਗਂ ਪਨ ਨੀਵਰਣਾਨਿ ਪਹਾਯ ਅਪ੍ਪਨਾਸਮਾਧਿਂ, ਉਪਚਾਰਸਮਾਧਿਮੇਵ ਵਾ ਸਮ੍ਪਾਦਯਤੋਤਿ ਸਮਾਧਿਸਮ੍ਪਦਾਯ ਭਯਭੇਰਵਾਭਾਵਹੇਤੁਕਂ ਦਸ੍ਸੇਤੁਂ ਉਪਰਿ ਦੇਸਨਾ ਵਡ੍ਢਿਤਾਤਿ ਅਕੁਸਲਮਨੋਕਮ੍ਮਨ੍ਤਭਾਵੇਨ ਗਹਿਤਾਪਿ ਅਭਿਜ੍ਝਾਬ੍ਯਾਪਾਦਾ ਨੀਵਰਣਵਸੇਨ ਪੁਨ ਵੁਤ੍ਤਾਤਿ ਅਧਿਪ੍ਪਾਯੋ. ਅਭਿ-ਪੁਬ੍ਬੋ ਝਾ-ਸਦ੍ਦੋ ਅਭਿਜ੍ਝਾਯਨਤ੍ਥੋਤਿ ਆਹ ‘‘ਪਰਭਣ੍ਡਾਦਿਅਭਿਜ੍ਝਾਯਨਸੀਲਾ’’ਤਿ. ਵਤ੍ਥੁਕਾਮੇਸੂਤਿ ਰੂਪਾਦੀਸੁ ਕਿਲੇਸਕਾਮਸ੍ਸ ਵਤ੍ਥੁਭੂਤੇਸੁ ਕਾਮੇਸੁ. ਬਹਲਕਿਲੇਸਰਾਗਾਤਿ ਥਿਰਮੂਲਦੁਮ੍ਮੋਚਨੀਯਤਾਹਿ ਅਜ੍ਝੋਸਾਨੇ ਪਭੂਤਕਿਲੇਸਕਾਮਾ. ਅਭਿਜ੍ਝਾ ਚੇਤ੍ਥ ਅਪ੍ਪਤ੍ਤਵਿਸਯਪਤ੍ਥਨਾ, ਤਿਬ੍ਬਸਾਰਾਗੋ ਸਮ੍ਪਤ੍ਤਿਵਿਸਯਾਭਿਨਿਵੇਸੋ. ਤੇ ਹਿ ਲੋਭਾਭਿਭੂਤਾ ਪੁਗ੍ਗਲਾ ਅਤ੍ਤਨਿ ਤਿਬ੍ਬਸਾਪੇਕ੍ਖਤਾਯ ਏਵ ਲੋਭਾਭਿਭੂਤਤਾਯ ਅਵਵਤ੍ਥਿਤਾਰਮ੍ਮਣਾ ਅਵਿਨਿਚ੍ਛਿਤਵਿਸਯਾ ਅਰਞ੍ਞੇ ਤਂ ਤਂ ਵਿਸਯਂ ਅਨੁਪਧਾਰਿਤ੍ਵਾ ਵਿਹਰਨ੍ਤਿ, ਰਜ੍ਜੁਆਦੀਨਿ ਯਾਥਾਵਤੋ ਨ ਸਲ੍ਲਕ੍ਖੇਨ੍ਤਿ. ਤੇਨਾਹ ‘‘ਤੇਸ’’ਨ੍ਤਿਆਦਿ. ਉਪਟ੍ਠਾਤਿ ਸਨ੍ਤਚਿਤ੍ਤਤਾਯ. ਤਥਾ ਹਿ ਵੁਤ੍ਤਂ ‘‘ਆਕੁਲਚਿਤ੍ਤਾ’’ਤਿ. ‘‘ਇਦਾਨਿਮ੍ਹ ਨਟ੍ਠਾ’’ਤਿ ਤਸਨ੍ਤਿ ਵਿਤਸਨ੍ਤਿ, ਆਗਨ੍ਤ੍ਵਾ ਬਾਧਿਯਮਾਨਾ ਵਿਯ ਹੋਨ੍ਤਿ, ਏਵਂ ਤਂ ਭਯਭੇਰਵਂ ਅਤ੍ਤਨਿ ਸਮਾਰੋਪਨਟ੍ਠੇਨ ਅਵ੍ਹਾਯਨ੍ਤਿ ਪਕ੍ਕੋਸਨ੍ਤੀਤਿ ਯੋਜਨਂ ਸਨ੍ਧਾਯਾਹ ‘‘ਸੇਸਂ ਤਾਦਿਸਮੇਵਾ’’ਤਿ. ‘‘ਅਨਭਿਜ੍ਝਾਲੁਹਮਸ੍ਮੀ’’ਤਿ ਪਾਲ਼ਿਪਦੇ ਚਿਰਪਰਿਚਿਤਅਲੋਭਜ੍ਝਾਸਯਤਾਯ ਕਮਲਦਲੇ ਜਲਬਿਨ੍ਦੁ ਵਿਯ ਅਲਗ੍ਗਮਾਨਸਤ੍ਤਾ ਸਬ੍ਬਤ੍ਥ ਅਨਪੇਕ੍ਖੋਹਮਸ੍ਮੀਤਿ ਅਤ੍ਥੋ.

੩੮. ਪਕਤਿਭਾਵਵਿਜਹਨੇਨਾਤਿ ਪਰਿਸੁਦ੍ਧਭਾਵਸਙ੍ਖਾਤਸ੍ਸ ਚ ਪਕਤਿਭਾਵਸ੍ਸ ਵਿਜਹਨੇਨ. ਸਾਵਜ੍ਜਧਮ੍ਮਸਮੁਪ੍ਪਤ੍ਤਿਯਾ ਹਿ ਚਿਤ੍ਤਸ੍ਸ ਅਨਵਜ੍ਜਭਾਵੋ ਜਹਿਤੋ ਹੋਤੀਤਿ. ਵਿਪਨ੍ਨਚਿਤ੍ਤਾਤਿ ਕਿਲੇਸਾਸੁਚਿਦੂਸਿਤਤਾਯ ਕੁਥਿਤਚਿਤ੍ਤਾ. ਤੇਨਾਹ ‘‘ਕਿਲੇਸਾਨੁਗਤਂ…ਪੇ… ਪੂਤਿਕਂ ਹੋਤੀ’’ਤਿ. ਪਦੁਟ੍ਠਮਨਸਙ੍ਕਪ੍ਪਾਤਿ ਵਿਸਸਂਸਟ੍ਠਮੁਤ੍ਤਂ ਵਿਯ ਦੋਸੇਨ ਪਦੂਸਿਤਚਿਤ੍ਤਸਙ੍ਕਪ੍ਪਾ. ਵੁਤ੍ਤਨਯੇਨੇਵਾਤਿ ‘‘ਤੇ ਅਵਵਤ੍ਥਿਤਾਰਮ੍ਮਣਾ ਹੋਨ੍ਤੀ’’ਤਿਆਦਿਨਾ ਅਭਿਜ੍ਝਾਲੁਵਾਰੇ ਵੁਤ੍ਤਨਯੇਨੇਵ. ਯਥਾ ਹਿ ਲੋਭਵਸੇਨ, ਏਵਂ ਦੋਸਾਦਿਵਸੇਨਪਿ ਅਵਵਤ੍ਥਿਤਾਰਮ੍ਮਣਾ ਹੋਨ੍ਤੀਤਿ. ਸਬ੍ਬਤ੍ਥਾਤਿ ਹੇਟ੍ਠਾ ਉਪਰਿ ਚਾਤਿ ਸਬ੍ਬਤ੍ਥ ਠਾਨੇਸੁ ਵਣ੍ਣੇਤਬ੍ਬਾ.

੩੯. ‘‘ਯਾ ਚਿਤ੍ਤਸ੍ਸ ਅਕਲ੍ਲਤਾ ਅਕਮ੍ਮਞ੍ਞਤਾ’’ਤਿ ਵਚਨਤੋ ਥਿਨਂ ਚਿਤ੍ਤਸ੍ਸ ਗੇਲਞ੍ਞਭਾਵੇਨ ਗਹਣਂ ਗਚ੍ਛਤੀਤਿ ਆਹ ‘‘ਚਿਤ੍ਤਗੇਲਞ੍ਞਭੂਤੇਨ ਥਿਨੇਨਾ’’ਤਿ. ਤਥਾ ‘‘ਯਾ ਕਾਯਸ੍ਸ ਅਕਲ੍ਲਤਾ ਅਕਮ੍ਮਞ੍ਞਤਾ’’ਤਿ (ਧ. ਸ. ੧੧੬੩) ਵਚਨਤੋ ਮਿਦ੍ਧਂ ਵਿਸੇਸਤੋ ਨਾਮਕਾਯਸ੍ਸ ਗੇਲਞ੍ਞਭਾਵੇਨ ਗਹਣਂ ਗਚ੍ਛਤੀਤਿ ਆਹ ‘‘ਸੇਸਨਾਮਕਾਯਗੇਲਞ੍ਞਭੂਤੇਨ ਮਿਦ੍ਧੇਨਾ’’ਤਿ. ਸੇਸਗ੍ਗਹਣਞ੍ਚੇਤ੍ਥ ਚਿਤ੍ਤਨਿਵਤ੍ਤਨਤ੍ਥਂ. ਇਦਞ੍ਚ ਮਿਦ੍ਧਂ ਰੂਪਕਾਯਸ੍ਸਪਿ ਗੇਲਞ੍ਞਾਵਹਨ੍ਤਿ ਦਟ੍ਠਬ੍ਬਂ ਨਿਦ੍ਦਾਯ ਹੇਤੁਭਾਵਤੋ. ਤਥਾ ਹਿ ਤਂ ‘‘ਨਿਦ੍ਦਾ ਚਪਲਾਯਿਕਾ’’ਤਿ ਨਿਦ੍ਦਿਟ੍ਠਂ. ਤੇਨਾਹ ‘‘ਤੇ ਨਿਦ੍ਦਾਬਹੁਲਾ ਹੋਨ੍ਤੀ’’ਤਿ.

੪੦. ਉਦ੍ਧਚ੍ਚਪਕਤਿਕਾਤਿ ਉਦ੍ਧਚ੍ਚਸੀਲਾ ਅਨਵਟ੍ਠਿਤਸਭਾਵਾ. ਅਨਵਟ੍ਠਾਨਰਸਞ੍ਹਿ ਉਦ੍ਧਚ੍ਚਂ. ਤੇਨਾਹ ‘‘ਵਿਪ੍ਫਨ੍ਦਮਾਨਚਿਤ੍ਤਾ’’ਤਿਆਦਿ. ਇਧਾਤਿ ‘‘ਅਵੂਪਸਨ੍ਤਚਿਤ੍ਤਾ’’ਤਿ ਇਮਸ੍ਮਿਂ ਪਦੇ. ਕੁਕ੍ਕੁਚ੍ਚਂ ਗਹੇਤੁਂ ਵਟ੍ਟਤਿ ਸਂਵਣ੍ਣਨਾਵਸੇਨ ਪਚ੍ਛਾਨੁਤਾਪਸ੍ਸਪਿ ਚਿਤ੍ਤਸ੍ਸ ਅਵੂਪਸਮਕਰਤ੍ਤਾ. ਉਦ੍ਧਚ੍ਚਂ ਪਨ ਸਰੂਪੇਨੇਵ ਗਹਿਤਨ੍ਤਿ ਅਧਿਪ੍ਪਾਯੋ.

੪੧. ਏਕਮੇਵਿਦਂ ਪਞ੍ਚਮਂ ਨੀਵਰਣਂ ਯਦਿਦਂ ਕਙ੍ਖਾ ਵਿਚਿਕਿਚ੍ਛਾਤਿ ਚ. ਯਦਿ ਏਵਂ ਕਸ੍ਮਾ ਦ੍ਵਿਧਾ ਕਤ੍ਵਾ ਵੁਤ੍ਤਨ੍ਤਿ ਆਹ ‘‘ਕਿਂ ਨੁ ਖੋ’’ਤਿਆਦਿ. ਕਙ੍ਖਨਤੋਤਿ ਸਂਸਯਨਤੋ. ਵਿਚਿਕਿਚ੍ਛਾਤਿ ਵੁਚ੍ਚਤਿ ‘‘ਧਮ੍ਮਸਭਾਵਂ ਵਿਚਿਨਨ੍ਤੋ ਏਤਾਯ ਕਿਚ੍ਛਤਿ, ਵਿਗਤਾ ਤਿਕਿਚ੍ਛਾ ਵਾ’’ਤਿ ਕਤ੍ਵਾ.

੪੨. ਏਵਂ ਨੀਵਰਣਾਭਾਵਕਿਤ੍ਤਨਮੁਖੇਨ ਸਮਾਧਿਸਮ੍ਪਦਾਯ ਭਯਭੇਰਵਾਭਾਵਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤੁਕ੍ਕਂਸਨਾਦਿਅਭਾਵਕਿਤ੍ਤਨਮੁਖੇਨ ਪਞ੍ਞਾਸਮ੍ਪਦਾਯ ਭਯਭੇਰਵਾਭਾਵਂ ਦਸ੍ਸੇਤੁਂ ‘‘ਯੇ ਖੋ ਕੇਚੀ’’ਤਿਆਦਿਨਾ ਉਪਰਿ ਦੇਸਨਾ ਵਡ੍ਢਿਤਾ, ਤਦਤ੍ਥਂ ਵਿਵਰਿਤੁਂ ‘‘ਅਤ੍ਤੁਕ੍ਕਂਸਨਕਾ’’ਤਿਆਦਿ ਵੁਤ੍ਤਂ. ਉਕ੍ਕਂਸੇਨ੍ਤਿ ਮਾਨਵਸੇਨ ਪਗ੍ਗਣ੍ਹਨੇਨ. ਤੇਨਾਹ ‘‘ਉਚ੍ਚੇ ਠਾਨੇ ਠਪੇਨ੍ਤੀ’’ਤਿ. ਥਿਨਮਿਦ੍ਧਉਦ੍ਧਚ੍ਚਕੁਕ੍ਕੁਚ੍ਚਵਿਚਿਕਿਚ੍ਛਾਵਾਰੇਸੁ ਗਯ੍ਹਮਾਨਂ ਅਭਿਜ੍ਝਾਲੁਵਾਰਸਦਿਸਨ੍ਤਿ ਤਤ੍ਥ ਤਂ ਅਨਾਮਸਿਤ੍ਵਾ ਅਤ੍ਤੁਕ੍ਕਂਸਕਵਾਰੇ ਕਿਞ੍ਚਿ ਵਿਸਦਿਸਂ ਅਤ੍ਥੀਤਿ ਤਂ ਦਸ੍ਸੇਤੁਂ ‘‘ਤੇ ਕਥ’’ਨ੍ਤਿਆਦਿ ਵੁਤ੍ਤਂ.

੪੩. ਛਮ੍ਭਨਂ ਛਮ੍ਭੋ, ਕਾਯਸ੍ਸ ਛਮ੍ਭਿਤਤ੍ਤਹੇਤੁਭੂਤੋ ਬਲਵਚਿਤ੍ਤੁਤ੍ਰਾਸੋ. ਸੋ ਏਤੇਸਂ ਅਤ੍ਥੀਤਿ ਛਮ੍ਭੀ. ਤੇਨਾਹ ‘‘ਕਾਯਥਮ੍ਭਨਾ’’ਤਿਆਦਿ. ਭੀਰੁਕਜਾਤਿਕਾਤਿ ਭਾਯਨਕਸੀਲਾ. ਏਕਮੇਵ ਚੇਤਂ ਸਾਵਜ੍ਜਭਯਂ ਕਾਯੇ ਛਮ੍ਭਿਤਤ੍ਤਸ੍ਸ, ਚਿਤ੍ਤੇ ਚ ਕਾਯੇ ਚ ਥਦ੍ਧਭਾਵਸ੍ਸ ਉਪ੍ਪਾਦਨਵਸੇਨ ‘‘ਛਮ੍ਭੋ ਭੀਰੁਤਾ’’ਤਿ ਚ ਵੁਚ੍ਚਤੀਤਿ ਤਂਸਮਙ੍ਗਿਨੋ ਸਮਣਬ੍ਰਾਹ੍ਮਣਾ ‘‘ਛਮ੍ਭੀ ਭੀਰੁਕਜਾਤਿਕਾ’’ਤਿ ਵੁਤ੍ਤਾ, ਇਧ ਭਯਭੇਰਵਂ ਸਰੂਪੇਨੇਵ ਗਹਿਤਂ.

੪੪. ਲਬ੍ਭਤਿ ਪਾਪੁਣੀਯਤੀਤਿ ਲਾਭਸਦ੍ਦਸ੍ਸ ਕਮ੍ਮਸਾਧਨਤ੍ਤਮਾਹ. ਸਕ੍ਕਚ੍ਚਂ ਕਾਤਬ੍ਬੋ ਦਾਤਬ੍ਬੋਤਿ ਸਕ੍ਕਾਰੋ. ਤਦਤ੍ਥਦੀਪਕਨ੍ਤਿ ਲਾਭਾਦਿਂ ਪਹਾਯ ਅਰਞ੍ਞੇ ਵਸਤੋ ਭਯਭੇਰਵਾਵ੍ਹਾਯਨਂ ਨਤ੍ਥੀਤਿ ਦੀਪਕਂ. ਸੋ ਕਿਰ ਲਾਭਗਰੁਤਾਯੇਵ ਪਿਯੋ ਗਾਮੋ ਏਤਸ੍ਸਾਤਿ ‘‘ਪਿਯਗਾਮਿਕੋ’’ਤਿ ਨਾਮਂ ਲਭਤਿ. ਕਮ੍ਮਮੁਤ੍ਤੋਤਿ ਜਰਾਜਿਣ੍ਣਤ੍ਤਾ ਕਮ੍ਮਂ ਕਾਤੁਂ ਨ ਸਕ੍ਕੋਤੀਤਿ ਸਾਮਿਕੇਹਿ ਵਿਸ੍ਸਟ੍ਠੋ.

੪੫. ਅਲਸਭਾਵੇਨ ਸਮ੍ਮਾਵਾਯਾਮਸ੍ਸ ਅਕਰਣਤੋ ਕੁਚ੍ਛਿਤਂ ਸੀਦਨ੍ਤੀਤਿ ਕੁਸੀਤਾ. ਵੀਰਸ੍ਸ ਭਾਵੋ, ਕਮ੍ਮਂ ਵਾ ਵੀਰਿਯਂ, ਵਿਧਿਨਾ ਵਾ ਈਰੇਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਵੀਰਿਯਂ, ਸਮ੍ਮਾਵਾਯਾਮੋ. ਤੇਨ ਹੀਨਾ ਹੀਨਵੀਰਿਯਾ. ਕਾਯਵਿਞ੍ਞਤ੍ਤਿਯਾ ਸਮੁਟ੍ਠਾਨਵਸੇਨ ਪਵਤ੍ਤਵੀਰਿਯਂ ਕਾਯਿਕਵੀਰਿਯਂ, ਵਤ੍ਤਕਰਣਚਙ੍ਕਮਨਾਦੀਸੁ ਦਟ੍ਠਬ੍ਬਂ. ਨਿਸਜ੍ਜ ਸਯਿਤ੍ਵਾ ਚ ਕਮ੍ਮਟ੍ਠਾਨਮਨਸਿਕਾਰਵਸੇਨ ਪਵਤ੍ਤਵੀਰਿਯਂ ਚੇਤਸਿਕਵੀਰਿਯਂ. ਤਤ੍ਥ ਪੁਰਿਮਂ ਵਿਸੇਸਤੋ ਕੋਸਜ੍ਜਪਟਿਪਕ੍ਖਤਾਵਸੇਨ, ਦੁਤਿਯਂ ਵੀਰਿਯਾਰਮ੍ਭਤਾਵਸੇਨ ਪਾਕਟਂ ਹੋਤੀਤਿ ਦਸ੍ਸੇਨ੍ਤੋ ‘‘ਕੁਸੀਤਾ’’ਤਿਆਦਿਮਾਹ. ਤੇ ਹਿ ਹੀਨਵੀਰਿਯਾ ਅਲਸਤਾਯੇਵ ਆਰਮ੍ਮਣਵਵਤ੍ਥਾਨਮਤ੍ਤਮ੍ਪਿ ਕਾਤੁਂ ਨ ਸਕ੍ਕੋਨ੍ਤਿ.

੪੬. ਨਟ੍ਠਸ੍ਸਤੀਤਿ ਅਲਬ੍ਭਮਾਨਸ੍ਸਤਿ, ਪਚ੍ਚਯਵੇਕਲ੍ਲੇਨ ਵਿਜ੍ਜਮਾਨਾਯਪਿ ਸਤਿਯਾ ਸਤਿਕਿਚ੍ਚਂ ਕਾਤੁਂ ਅਸਮਤ੍ਥਤਾਯ ਏਵਂ ਵੁਤ੍ਤਂ. ਨ ਸਮ੍ਪਜਾਨਾਤਿ ਅਸਮ੍ਪਜਾਨਾ. ਤਂਯੋਗਨਿਵਤ੍ਤਿਯਞ੍ਚਾਯਂ ਅ-ਕਾਰੋ ‘‘ਅਹੇਤੁਕਾ ਧਮ੍ਮਾ (ਧ. ਸ. ੨.ਦੁਕਮਾਤਿਕਾ), ਅਭਿਕ੍ਖੁਕੋ ਆਵਾਸੋ’’ਤਿਆਦੀਸੁ (ਚੂਲ਼ਵ. ੭੬) ਵਿਯਾਤਿ ਆਹ ‘‘ਪਞ੍ਞਾਰਹਿਤਾ’’ਤਿ. ਨਨੁ ਸੋਲ਼ਸਮੋ ਪਞ੍ਞਾਵਾਰੋ, ਅਯਂ ਸਤਿਵਾਰੋ, ਤਤ੍ਥ ਕਸ੍ਮਾ ਸਂਕਿਲੇਸਪਕ੍ਖੇ ਪਞ੍ਞਾ ਗਹਿਤਾਤਿ ਚੋਦਨਂ ਸਨ੍ਧਾਯਾਹ ‘‘ਇਮਸ੍ਸ ਚਾ’’ਤਿਆਦਿ. ਸਤਿਭਾਜਨੀਯਮੇਵੇਤਂ, ਯਦਿਦਂ ਚੁਦ੍ਦਸਮੋ ਵਾਰੋ, ਪਞ੍ਞਾ ਪਨੇਤ੍ਥ ਚੁਦ੍ਦਸਮੇ ਵਾਰੇ ਕੇਵਲਾ ਸਤਿ ਦੁਬ੍ਬਲਾਤਿ ਸਤਿਦੁਬ੍ਬਲ੍ਯਦੀਪਨਤ੍ਥਂ ‘‘ਅਸਮ੍ਪਜਾਨਾ’’ਤਿ ਪਟਿਕ੍ਖੇਪਮੁਖੇਨ ਵੁਤ੍ਤਾ. ਇਦਾਨਿ ਵੁਤ੍ਤਮੇਵਤ੍ਥਂ ਪਾਕਟਤਰਂ ਕਾਤੁਂ ‘‘ਦੁਵਿਧਾ ਹੀ’’ਤਿਆਦਿ ਵੁਤ੍ਤਂ.

੪੭. ਅਪ੍ਪਨਾਸਮਾਧਿਨਾ, ਉਪਚਾਰਸਮਾਧਿਨਾ ਵਾ ਚਿਤ੍ਤਂ ਆਰਮ੍ਮਣੇ ਸਮਂ, ਸਮ੍ਮਾ ਵਾ ਆਹਿਤਂ ਨਾਮ ਹੋਤਿ, ਨਾਞ੍ਞਥਾਤਿ ਦਸ੍ਸੇਨ੍ਤੋ ‘‘ਅਸਮਾਹਿਤਾਤਿ ਉਪਚਾਰਪ੍ਪਨਾਸਮਾਧਿਵਿਰਹਿਤਾ’’ਤਿ ਆਹ. ਵਿਬ੍ਭਨ੍ਤਚਿਤ੍ਤਾਤਿ ਅਨਵਟ੍ਠਿਤਚਿਤ੍ਤਾ. ਪੁਬ੍ਬੇ ਨੀਵਰਣਭਾਵਸਾਮਞ੍ਞੇਨ ਉਦ੍ਧਚ੍ਚਂ ਗਹਿਤਂ ‘‘ਉਦ੍ਧਤਾ ਅਵੂਪਸਨ੍ਤਚਿਤ੍ਤਾ’’ਤਿ, ਇਧ ਸਮਾਧਾਨਾਭਾਵੇਨ ਉਦ੍ਧਚ੍ਚਹੇਤੁਕੋ ਚਿਤ੍ਤਵਿਬ੍ਭਮੋ ਵੁਤ੍ਤੋ ‘‘ਅਸਮਾਹਿਤਾ ਵਿਬ੍ਭਨ੍ਤਚਿਤ੍ਤਾ’’ਤਿ, ਅਯਮੇਤੇਸਂ ਵਿਸੇਸੋ. ਪੁਬ੍ਬੇ ਵੁਤ੍ਤਨਯੇਨਾਤਿ ਪੁਬ੍ਬੇ ‘‘ਉਦ੍ਧਚ੍ਚੇਨ ਹਿ ਏਕਾਰਮ੍ਮਣੇ ਚਿਤ੍ਤਂ ਵਿਪ੍ਫਨ੍ਦਤਿ ਧਜਯਟ੍ਠਿਯਂ ਵਾਤੇਨ ਪਟਾਕਾ ਵਿਯਾ’’ਤਿ (ਮ. ਨਿ. ਅਟ੍ਠ. ੧.੪੦) ਵੁਤ੍ਤਨਯੇਨ. ਸਬ੍ਬਂ ਪੁਬ੍ਬਸਦਿਸਮੇਵਾਤਿ ਭਯਭੇਰਵਾਵ੍ਹਾਯਨਸ੍ਸ ਅਭਿਜ੍ਝਾਲੁਵਾਰੇ ਵੁਤ੍ਤਸਦਿਸਤਂ ਸਨ੍ਧਾਯ ਵਦਤਿ.

੪੮. ਦੁਪ੍ਪਞ੍ਞਾਤਿ ਏਤ੍ਥ ਦੁ-ਸਦ੍ਦੋ ‘‘ਦੁਸ੍ਸੀਲੋ’’ਤਿਆਦੀਸੁ ਵਿਯ ਅਭਾਵਤ੍ਥੋ, ਨ ‘‘ਦੁਗ੍ਗਤਿ, ਦੁਪ੍ਪਟਿਪਨ੍ਨੋ’’ਤਿਆਦੀਸੁ ਵਿਯ ਗਰਹਤ੍ਥੋਤਿ ਦਸ੍ਸੇਤੁਂ ‘‘ਨਿਪ੍ਪਞ੍ਞਾਨਮੇਤਂ ਅਧਿਵਚਨ’’ਨ੍ਤਿ ਵਤ੍ਵਾ ‘‘ਪਞ੍ਞਾ ਪਨ ਦੁਟ੍ਠਾ ਨਾਮ ਨਤ੍ਥੀ’’ਤਿ ਵੁਤ੍ਤਂ. ਤੇਤਿ ਦੁਪ੍ਪਞ੍ਞਾ. ਸਬ੍ਬਤ੍ਥਾਤਿ ਚਤੂਸੁਪਿ ਪਾਠਵਿਕਪ੍ਪੇਸੁ. ਏਲਨ੍ਤਿ ਵਾ ਦੋਸੋ ਵੁਚ੍ਚਤਿ. ਤੇਨਾਹ ‘‘ਯਾ ਸਾ ਵਾਚਾ ਨੇਲਾ ਕਣ੍ਣਸੁਖਾ’’ਤਿ. ਤਥਾ ਹਿ ਸੀਲਂ ‘‘ਨੇਲਙ੍ਗ’’ਨ੍ਤਿ ਵੁਤ੍ਤਂ. ਦੁਪ੍ਪਞ੍ਞਾ ਚ ਕਥੇਨ੍ਤਾ ਸਦੋਸਮੇਵ ਕਥਂ ਕਥੇਨ੍ਤਿ ਅਪਣ੍ਡਿਤਭਾਵਤੋ. ਤੇਨੇਵਾਹ ‘‘ਦੁਬ੍ਭਾਸਿਤਭਾਸੀ’’ਤਿ. ਤਸ੍ਮਾ ਏਲਸਬ੍ਭਾਵਤੋ ਏਲਂ ਮੁਖਂ ਏਤੇਸਨ੍ਤਿ ਏਲਮੂਗਾਤਿ ਵੁਤ੍ਤਾਤਿ ਏਵਮ੍ਪਿ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਾਯ ਪਞ੍ਞਾਯ ਵਸੇਨ ‘‘ਪਞ੍ਞਾਸਮ੍ਪਨ੍ਨੋ’’ਤਿ ਵੁਤ੍ਤਂ, ਤਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ ‘‘ਨੋ ਚ ਖੋ’’ਤਿਆਦਿ ਵੁਤ੍ਤਂ. ਨਨੁ ਚ ਬੋਧਿਸਤ੍ਤਾ ਬਹੁਲਵਿਪਸ੍ਸਨਾਪਞ੍ਞਾਯ ਸਮਨ੍ਨਾਗਤਾ ਹੋਨ੍ਤੀਤਿ? ਹੋਨ੍ਤਿ, ਤਦਾ ਪਨ ਬੋਧਿਸਤ੍ਤੇਨ ਨ ਵਿਪਸ੍ਸਨਾਰਮ੍ਭੋ ਕਤੋ, ਨੋ ਚ ਵਿਪਸ੍ਸਨਾਪਞ੍ਞਾ ਅਧਿਪ੍ਪੇਤਾਤਿ ਵੁਤ੍ਤਂ ‘‘ਨੋ ਚ ਖੋ ਵਿਪਸ੍ਸਨਾਪਞ੍ਞਾਯਾ’’ਤਿ.

ਕੇਚਿ ਪਨੇਤ੍ਥ ‘‘ਸਦ੍ਧਾਵਿਰਹਿਤਾ ਅਪਰਿਸੁਦ੍ਧਕਾਯਕਮ੍ਮਨ੍ਤਾਦਯੋ ਵਿਯ ਭਯਭੇਰਵਾਵ੍ਹਾਯਨਸ੍ਸ ਵਿਸੇਸਕਾਰਣਂ, ਨਾਪਿ ਸਦ੍ਧਾਲੁਤਾ ਪਲ੍ਲੋਮਤਾਯਾਤਿ ਸਦ੍ਧਾਵਾਰੋ ਅਨੁਦ੍ਧਟੋ’’ਤਿ ਵਦਨ੍ਤਿ, ਤਂ ਅਕਾਰਣਂ. ਕਮ੍ਮਫਲੇ ਹਿ ਸਦ੍ਦਹਨ੍ਤੋ ਕਮ੍ਮਪਟਿਸਰਣਤਂਯੇਵ ਨਿਸ੍ਸਾਯ ਭਯਭੇਰਵਂ ਤਿਣਾਯਪਿ ਅਮਞ੍ਞਮਾਨੋ ਪਲ੍ਲੋਮਤਮਾਪਜ੍ਜੇਯ੍ਯ. ਯਸ੍ਮਾ ਪਨ ਵੀਰਿਯਾਦਯੋ ਸਦ੍ਧਾਯ ਵਿਨਾ ਨਪ੍ਪਵਤ੍ਤਨ੍ਤੀਤਿ ਤੇਸਂ ਉਪਨਿਸ੍ਸਯਭੂਤਾ ਸਹਜਾਤਾ ਚ ਸਾ ਤਗ੍ਗਹਣੇਨੇਵ ਗਹਿਤਾ ਹੋਤੀਤਿ ਵਿਸੁਂ ਨ ਉਦ੍ਧਟਾ. ਤਥਾ ਹਿ ਸਾ ਝਾਨਸ੍ਸ ਪੁਬ੍ਬਭਾਗਪਟਿਪਦਾਯਮ੍ਪਿ ਨ ਉਦ੍ਧਟਾ, ਕਿਂ ਵਾ ਏਤਾਯ ਸਦ੍ਧਾਯ, ਅਦ੍ਧਾ ਸਾ ਇਮਸ੍ਮਿਂ ਆਰਮ੍ਮਣਪਰਿਗ੍ਗਹਟ੍ਠਾਨੇ ਨ ਗਹੇਤਬ੍ਬਾਵ, ਤਤੋ ਧਮ੍ਮਸ੍ਸਾਮਿਨਾ ਇਧ ਨ ਉਦ੍ਧਟਾ, ਏਵਂ ਅਞ੍ਞੇਸੁਪਿ ਏਦਿਸੇਸੁ ਠਾਨੇਸੁ ਨਿਚ੍ਛਯੋ ਕਾਤਬ੍ਬੋ. ਯਥਾਨੁਲੋਮਦੇਸਨਾ ਹਿ ਸੁਤ੍ਤਨ੍ਤਕਥਾਤਿ.

ਵਚੀਕਮ੍ਮਨ੍ਤਵਾਰਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਸੋਲ਼ਸਟ੍ਠਾਨਾਰਮ੍ਮਣਪਰਿਗ੍ਗਹੋ ਨਿਟ੍ਠਿਤੋ.

ਭਯਭੇਰਵਸੇਨਾਸਨਾਦਿਵਣ੍ਣਨਾ

੪੯. ਸੋਲ਼ਸਾਰਮ੍ਮਣਾਨੀਤਿ ਸੋਲ਼ਸਟ੍ਠਾਨਾਨਿ ਆਰਮ੍ਮਣਾਨਿ. ਏਵਰੂਪਾਸੁ ਰਤ੍ਤੀਸੂਤਿ ਚਾਤੁਦ੍ਦਸੀਆਦਿਕਾ ਉਪਰਿ ਵਕ੍ਖਮਾਨਾ ਰਤ੍ਤਿਯੋ ਸਨ੍ਧਾਯ ਵਦਤਿ. ਏਵਰੂਪੇ ਸੇਨਾਸਨੇਤਿ ਏਤ੍ਥਾਪਿ ਏਸੇਵ ਨਯੋ. ਯਾਤਿ ਅਨਿਯਮਤੋ ਉਦ੍ਦਿਟ੍ਠਾਨਂ ਪੁਨ ‘‘ਤਾ’’ਤਿ ਵਚਨਂ ਨਿਦ੍ਦੇਸੋ ਵਿਯ ਹੋਤੀਤਿ ਵੁਤ੍ਤਂ ‘‘ਯਾ ਤਾਤਿ ਉਭਯਮੇਤਂ ਰਤ੍ਤੀਨਂਯੇਵ ਉਦ੍ਦੇਸਨਿਦ੍ਦੇਸਵਚਨ’’ਨ੍ਤਿ. ਅਭੀਤਿ ਲਕ੍ਖਣਤ੍ਥੇ ‘‘ਅਞ੍ਞੇ ਚ ਅਭਿਞ੍ਞਾਤਾ ਬ੍ਰਾਹ੍ਮਣਮਹਾਸਾਲਾ’’ਤਿਆਦੀਸੁ ਵਿਯ. ਕਥਂ ਪਨੇਤ੍ਥ ਲਕ੍ਖਣਤ੍ਥਤਾ ਵੇਦਿਤਬ੍ਬਾ? ਲਕ੍ਖੀਯਤਿ ਏਤੇਨਾਤਿ ਲਕ੍ਖਣਨ੍ਤਿ ਆਹ ‘‘ਚਨ੍ਦਪਾਰਿਪੂਰਿਯਾ’’ਤਿਆਦਿ. ਪੁਣ੍ਣਮਾਸਿਯਂ ਚਨ੍ਦਪਾਰਿਪੂਰਿਯਾ ਅਮਾਵਾਸਿਯਂ ਚਨ੍ਦਪਰਿਕ੍ਖਯੇਨ. ਆਦਿ-ਸਦ੍ਦੇਨ ਚਨ੍ਦਸ੍ਸ ਉਪਡ੍ਢਮਣ੍ਡਲਤਾਰਾਹੁਗ੍ਗਹਤਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਉਪਸਗ੍ਗਮਤ੍ਤਮੇਵ ਅਭਿ-ਸਦ੍ਦੋ ਲਕ੍ਖਿਤਸਦ੍ਦੇਨੇਵ ਲਕ੍ਖਣਤ੍ਥਸ੍ਸ ਵਿਞ੍ਞਾਯਮਾਨਤ੍ਤਾਤਿ ਅਧਿਪ੍ਪਾਯੋ.

ਪਠਮਦਿਵਸਤੋ ਪਭੁਤੀਤਿ ਪਠਮਪਾਟਿਪਦਦਿਵਸਤੋ ਪਟ੍ਠਾਯ. ਯਸ੍ਮਾ ਚੋਦਕੋ ਭਗਵਤੋ ਕਾਲੇ ਅਨਭਿਲਕ੍ਖਿਤਾਪਿ ਅਪਰਭਾਗੇ ਅਭਿਲਕ੍ਖਿਤਾ ਜਾਤਾ, ਤਸ੍ਮਾ ਤਂ ਅਭਿਲਕ੍ਖਣੀਯਤਂ ਉਪਾਦਾਯ ‘‘ਸਬ੍ਬਦਸ੍ਸਿਨਾ ਭਗਵਤਾ ਪਞ੍ਚਮੀ ਕਸ੍ਮਾ ਨ ਗਹਿਤਾ’’ਤਿ ਚੋਦੇਤਿ, ਇਤਰੋ ਸਬ੍ਬਕਾਲਿਕਾਸੁ ਚਾਤੁਦ੍ਦਸੀਆਦੀਸੁ ਗਯ੍ਹਮਾਨਾਸੁ ਅਸਬ੍ਬਕਾਲਿਕਾਯ ਕਥਂ ਗਹਣਨ੍ਤਿ ਅਧਿਪ੍ਪਾਯੇਨ ‘‘ਅਸਬ੍ਬਕਾਲਿਕਤ੍ਤਾ’’ਤਿ ਪਰਿਹਰਤਿ.

ਤਥਾਵਿਧਾਸੂਤਿ ‘‘ਅਭਿਞ੍ਞਾਤਾ’’ਤਿਆਦਿਨਾ ਯਥਾ ਵੁਤ੍ਤਾ, ਤਥਾਵਿਧਾਸੁ. ਦੇਵਤਾਧਿਟ੍ਠਿਤਭਾਵੇਨ ਆਰਾਮਾਦੀਨਂ ਲੋਕਸ੍ਸ ਚੇਤਿਯਭਾਵੋਤਿ ਆਹ ‘‘ਪੂਜਨੀਯਟ੍ਠੇਨਾ’’ਤਿ. ਮਨੁਸ੍ਸਾ ਯੇਭੁਯ੍ਯੇਨ ਗਾਮਾਦੀਨਂ ਦ੍ਵਾਰੇਸੁ ਤਥਾਰੂਪੇ ਰੁਕ੍ਖੇ ਚੇਤਿਯਟ੍ਠਾਨਿਯੇ ਕਤ੍ਵਾ ਵੋਹਰਨ੍ਤੀਤਿ ਆਹ ‘‘ਗਾਮਨਿਗਮਾਦਿਦ੍ਵਾਰੇਸੂ’’ਤਿਆਦਿ. ਦਸ੍ਸਨਮਤ੍ਤੇਨਪਿ ਸਵਨਮਤ੍ਤੇਨਪਿ ਭਯੁਪ੍ਪਾਦਨੇਨ ਪਾਕਤਿਕਸਤ੍ਤੇ ਭਿਂਸੇਨ੍ਤੀਤਿ ਭਿਂਸਨਕਾਨਿ. ਤੇਨਾਹ ‘‘ਭਯਜਨਕਾਨੀ’’ਤਿਆਦਿ. ਭਾਯਤਿ ਏਤਸ੍ਮਾਤਿ ਭਯਂ, ਅਤਿਵਿਯ ਸਪ੍ਪਟਿਭਯਂ ਭੇਰਵਂ.

ਆਯਾਚਨਉਪਹਾਰਕਰਣਾਰਹਨ੍ਤਿ ਤਂਤਂਬਲਿਕਮ੍ਮਪਣਿਧਿਕਮ੍ਮਕਰਣਯੋਗ੍ਗਂ. ਪੁਪ੍ਫਧੂਪ…ਪੇ… ਧਰਣਿਤਲਨ੍ਤਿ ਇਦਂ ਯਥਾਪਟਿਸੂਤੇਨ ਸੁਪ੍ਪਾਦਿਨਾ ਉਪਹਾਰਕਰਣਦਸ੍ਸਨਂ. ਕੋਟ੍ਟੇਨ੍ਤੋਤਿ ਪਹਰਨ੍ਤੋ, ਸਿਙ੍ਗਪ੍ਪਹਾਰਖੁਰਪ੍ਪਹਾਰੇਹਿ ਸਦ੍ਦਂ ਕਰੋਨ੍ਤੋਤਿ ਅਧਿਪ੍ਪਾਯੋ. ਸਬ੍ਬਚਤੁਪ੍ਪਦਾਨਂ ਇਧ ਮਗੋਤਿ ਨਾਮਂ, ਨ ‘‘ਅਚ੍ਛਚਮ੍ਮਂ ਮਿਗਚਮ੍ਮਂ ਏਲ਼ਕਚਮ੍ਮ’’ਨ੍ਤਿਆਦੀਸੁ (ਮਹਾਵ. ੨੫੯) ਵਿਯ, ਰੋਹਿਤੋਤਿਆਦਿ ਮਿਗਵਿਸੇਸਾਨਨ੍ਤਿ ਅਧਿਪ੍ਪਾਯੋ. ਚਾਲੇਤ੍ਵਾਤਿ ਅਗ੍ਗਮਦ੍ਦਨੇਨ ਚਾਲੇਤ੍ਵਾ. ਮੋਰਗ੍ਗਹਣਞ੍ਚੇਤ੍ਥ ਉਪਲਕ੍ਖਣਨ੍ਤਿ ਦਸ੍ਸੇਨ੍ਤੋ ਆਹ ‘‘ਇਧ ਸਬ੍ਬਪਕ੍ਖਿਗਹਣਂ ਅਧਿਪ੍ਪੇਤ’’ਨ੍ਤਿ. ਏਸ ਨਯੋਤਿ ਇਦਂ ਯਥਾ ‘‘ਮੋਰੋ ਵਾ’’ਤਿ ਏਤ੍ਥ ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਨਤ੍ਥੋ, ਏਵਂ ‘‘ਮਿਗੋ ਵਾ’’ਤਿ ਏਤ੍ਥਾਪੀਤਿ ਮਿਗਸਦ੍ਦਸ੍ਸ ਵਿਸੇਸਤ੍ਥਵੁਤ੍ਤਿਤਂ ਸਨ੍ਧਾਯਾਹ. ਇਤੋ ਪਭੂਤੀਤਿ ‘‘ਯਂਨੂਨਾਹਂ ਯਾ ਤਾ ਰਤ੍ਤਿਯੋ’’ਤਿਆਦਿਨਾ ਭਯਭੇਰਵਸ੍ਸ ਗਵੇਸਨਚਿਨ੍ਤਨਤੋ ਪਭੁਤਿ, ਨ ਗਵੇਸਨਾਰਮ੍ਭਤੋ ਪਭੁਤਿ. ‘‘ਅਪ੍ਪੇਵ ਨਾਮਾਹਂ ਭਯਭੇਰਵਂ ਪਸ੍ਸੇਯ੍ਯ’’ਨ੍ਤਿ ਏਤ੍ਥਾਪਿ ਹਿ ਆਰਮ੍ਮਣਮੇਵ ਭਯਭੇਰਵਂ. ਸੁਖਾਰਮ੍ਮਣਂ ਰੂਪਂ ਸੁਖਮਿਵ ‘‘ਰੂਪਂ ਸੁਖਂ ਸੁਖਾਨੁਪਤਿਤਂ ਸੁਖਾਵਕ੍ਕਨ੍ਤ’’ਨ੍ਤਿਆਦੀਸੁ (ਸਂ. ਨਿ. ੩.੬੦). ਕਥਂ ਭਯਗ੍ਗਹਣੇਨ ਚ ਰੂਪਾਰਮ੍ਮਣਗ੍ਗਹਣਨ੍ਤਿ ਆਹ ‘‘ਪਰਿਤ੍ਤਸ੍ਸ ਚਾ’’ਤਿਆਦਿ. ‘‘ਆਗਚ੍ਛਤੀ’’ਤਿ ਵਚਨਤੋ ਗਵੇਸਨਾਰਮ੍ਭਤੋ ਪਭੁਤਿ ‘‘ਏਤਂ ਭਯ’’ਨ੍ਤਿ ਆਰਮ੍ਮਣਂ ਅਧਿਪ੍ਪੇਤਨ੍ਤਿ ਕੇਚਿ ‘‘ਤਂ ਨ ਪਸ੍ਸੇਯ੍ਯ’’ਨ੍ਤਿ ਚਕ੍ਖੁਨਾ ਦਸ੍ਸਨਸ੍ਸ ਅਧਿਪ੍ਪੇਤਤ੍ਤਾ, ਤਸ੍ਮਾ ਵੁਤ੍ਤਨਯੇਨੇਵ ਅਤ੍ਥੋ ਗਹੇਤਬ੍ਬੋ. ਭਯਂ ਆਕਙ੍ਖਮਾਨੋਤਿ ਉਪਪਰਿਕ੍ਖਨਵਸੇਨ ਅਹਂ ਭਯਵਤ੍ਥੁਂ ਆਕਙ੍ਖਨ੍ਤੋ ਵਿਹਰਾਮਿ, ਤਂ ਕਿਮਤ੍ਥਿਯਂ, ਏਤ੍ਤਕੋਪਿ ਭਯਸਮਨ੍ਨਾਹਾਰੋ ਮਯ੍ਹਂ ਅਯੁਤ੍ਤੋਤਿ ਅਧਿਪ੍ਪਾਯੋ.

ਯਂ ਪਕਾਰਂ ਭੂਤੋ ਯਥਾਭੂਤੋ, ਸੋ ਪਨੇਤ੍ਥ ਪਕਾਰੋ ਇਰਿਯਾਪਥਵਸੇਨ ਯੁਤ੍ਤੋ ਪਾਲ਼ਿਯਂ ਤਥਾ ਆਗਤਤ੍ਤਾਤਿ ਆਹ ‘‘ਯੇਨ ਯੇਨ ਇਰਿਯਾਪਥੇਨ ਭੂਤਸ੍ਸਾ’’ਤਿ. ਭਵਿਤਸ੍ਸਾਤਿ ਇਦਂ ‘‘ਭੂਤਸ੍ਸਾ’’ਤਿ ਇਮਿਨਾ ਸਮਾਨਤ੍ਥਂ ਪਦਨ੍ਤਿ ਦਟ੍ਠਬ੍ਬਂ. ‘‘ਸਮਙ੍ਗੀਭੂਤਸ੍ਸਾ’’ਤਿ ਪਦਂ ਪੁਰਿਮਪਦਲੋਪੇਨ ਭੂਤਸ੍ਸਾਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਸਮਙ੍ਗੀਭੂਤਸ੍ਸ ਵਾ’’ਤਿ ਆਹ. ਭਯਭੇਰਵਾਰਮ੍ਮਣੇਤਿ ਭਯਭੇਰਵਾਭਿਮਤੇ ਆਰਮ੍ਮਣੇ. ਨੇਵ ਮਹਾਸਤ੍ਤੋ ਤਿਟ੍ਠਤੀਤਿਆਦਿ ‘‘ਤਥਾਭੂਤੋ ਚ ਤਂ ਪਟਿਵਿਨੇਯ੍ਯ’’ਨ੍ਤਿ ਯਥਾ ਚਿਨ੍ਤਿਤਂ, ਤਥਾ ਪਟਿਪਨ੍ਨਭਾਵਦਸ੍ਸਨਂ. ਇਰਿਯਾਪਥਪਟਿਪਾਟਿ ਨਾਮ ਠਾਨਗਮਨਨਿਸਜ੍ਜਾਨਿਪਜ੍ਜਾਤਿ ਵਦਨ੍ਤਿ, ਉਪ੍ਪਟਿਪਾਟਿ ਪਨ ਪਠਮਂ ਨਿਪਜ੍ਜਾ, ਪੁਨ ਨਿਸਜ੍ਜਾ, ਪੁਨ ਠਾਨਂ, ਪਚ੍ਛਾ ਗਮਨਨ੍ਤਿ ਏਵਂ ਵੇਦਿਤਬ੍ਬਾ. ਆਸਨ੍ਨਪਟਿਪਾਟਿਯਾਤਿ ਗਮਨਸ੍ਸ ਤਾਵ ਠਾਨਂ ਆਸਨ੍ਨਂ, ਠਾਨਸ੍ਸ ਨਿਸਜ੍ਜਾ ਗਮਨਞ੍ਚ, ਨਿਸਜ੍ਜਾਯ ਨਿਪਜ੍ਜਾ ਠਾਨਞ੍ਚ, ਨਿਪਜ੍ਜਾਯ ਨਿਸਜ੍ਜਾ ਆਸਨ੍ਨਾ. ਇਧ ਪਨ ਗਮਨਸ੍ਸ ਠਾਨਂ, ਠਾਨਸ੍ਸ ਚ ਗਮਨਂ, ਨਿਸਜ੍ਜਾਯ ਚ ਨਿਪਜ੍ਜਾ, ਨਿਪਜ੍ਜਾਯ ਚ ਨਿਸਜ੍ਜਾ ਆਸਨ੍ਨਭਾਵੇਨ ਗਹਿਤਾ, ਇਤਰੇ ਪਰਮ੍ਪਰਾਵਸੇਨਾਤਿ ਵੇਦਿਤਬ੍ਬਾ. ਭਿਕ੍ਖੁਸ੍ਸ ਪਨ ਇਰਿਯਾਪਥਾ ਸਮ੍ਪਤ੍ਤਪਟਿਪਾਟਿਯਾ ਵਿਯ ਅਪਰਾਪਰੁਪ੍ਪਤ੍ਤਿਵਸੇਨ ਵੁਚ੍ਚਨ੍ਤਿ.

ਭਯਭੇਰਵਸੇਨਾਸਨਾਦਿਵਣ੍ਣਨਾ ਨਿਟ੍ਠਿਤਾ.

ਅਸਮ੍ਮੋਹਵਿਹਾਰਵਣ੍ਣਨਾ

੫੦. ਅਯਞ੍ਚ ਮੇ ਸਬ੍ਬਸੋ ਭਯਭੇਰਵਾਭਾਵੋ ਵਿਸੇਸਤੋ ਅਸਮ੍ਮੋਹਧਮ੍ਮਤ੍ਤਾਤਿ ਦਸ੍ਸੇਤੁਂ ‘‘ਸਨ੍ਤਿ ਖੋ ਪਨਾ’’ਤਿਆਦਿਨਾ ਉਪਰਿ ਦੇਸਨਾ ਵਡ੍ਢਿਤਾਤਿ ਅਯਂ ਵਾ ਏਤ੍ਥ ਅਨੁਸਨ੍ਧਿ. ਝਾਯੀਨਂ ਸਮ੍ਮੋਹਟ੍ਠਾਨੇਸੂਤਿ ਇਮਿਨਾ ਅਜ੍ਝਾਯੀਨਂ ਸਮ੍ਮੋਹਟ੍ਠਾਨੇਸੁ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਅਤ੍ਥੀਤਿ ਇਦਂ ਨਿਪਾਤਪਦਂ ਪੁਥੁਵਚਨਮ੍ਪਿ ਹੋਤਿ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿਆਦੀਸੁ (ਦੀ. ਨਿ. ੨.੩੭੩-੩੭੪; ਮ. ਨਿ. ੧.੧੧੦; ੩.੧੫੪; ਸਂ. ਨਿ. ੪.੧੨੭; ਖੁ. ਪਾ. ੩.ਦ੍ਵਤਿਂਸਾਕਾਰ) ਵਿਯਾਤਿ ‘‘ਸਨ੍ਤੀ’’ਤਿ ਪਦਸ੍ਸ ਅਤ੍ਥਦਸ੍ਸਨਵਸੇਨ ਵੁਤ੍ਤਂ. ਕਿਂ ਖਣਤ੍ਤਯਸਮਙ੍ਗਿਤਾਯ ਤੇ ਅਤ੍ਥਿ, ਨੋਤਿ ਆਹ ‘‘ਸਂਵਿਜ੍ਜਨ੍ਤਿ ਉਪਲਬ੍ਭਨ੍ਤੀ’’ਤਿ, ਮਹਤਿ ਲੋਕਸਨ੍ਨਿਵਾਸੇ ਏਦਿਸਾਪਿ ਸਂਵਿਜ੍ਜਨ੍ਤਿ ਞਾਣੇਨ ਗਹੇਤਬ੍ਬਤਾਯ ਉਪਲਬ੍ਭਨ੍ਤੀਤਿ. ਓਦਾਤਕਸਿਣਲਾਭੀਤਿ ਅਪ੍ਪਮਾਣਓਦਾਤਕਸਿਣਲਾਭੀ. ਏਵਂ ਹਿਸ੍ਸ ਸਮਨ੍ਤਤੋ ਆਲੋਕੋ ਵਿਯ ਉਪਟ੍ਠਾਤਿ. ਪਰਿਕਮ੍ਮਨ੍ਤਿ ਸਮਾਪਤ੍ਤਿਪੁਬ੍ਬਭਾਗਮਾਹ. ਏਤ੍ਤਕਂ ਸੂਰਿਯੇ ਗਤੇ ਵੁਟ੍ਠਹਾਮੀਤਿ,ਨੋ ਚ ਖੋ ਅਦ੍ਧਾਨਪਰਿਚ੍ਛੇਦੇ ਕੁਸਲੋ ਹੋਤਿ, ਕੇਵਲਂ ‘‘ਦਿਵਾ ਏਵ ਵੁਟ੍ਠਹਾਮੀ’’ਤਿ ਮਨਸਿਕਾਰਂ ਉਪ੍ਪਾਦੇਸਿ. ਵਿਸਦਂ ਹੋਤਿ ਸਬ੍ਬਂ ਆਰਮ੍ਮਣਜਾਤਂ, ਦਿਬ੍ਬਚਕ੍ਖੁਨਾ ਪਸ੍ਸਨ੍ਤਸ੍ਸ ਵਿਯ ਵਿਭੂਤਂ. ਅਵਿਸਦਨ੍ਤਿ ਏਤ੍ਥ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਏਵਂਸਞ੍ਞਿਨੋਤਿ ਰਤ੍ਤਿਂ ‘‘ਦਿਵਾ’’ਤਿ, ਦਿਵਾ ਚ ‘‘ਰਤ੍ਤੀ’’ਤਿ ਏਵਂਸਞ੍ਞਿਨੋ.

ਅਨ੍ਤੋਸੇਨਾਸਨੇ ਰਤ੍ਤਿਂ ਨਿਸਿਨ੍ਨੋ ਹੋਤੀਤਿ ਰਤ੍ਤਿ-ਸਦ੍ਦੋ ਅਜ੍ਝਾਹਰਿਤਬ੍ਬੋ. ਪਰਿਤ੍ਤਾਸਨਾਦੀਹਿ, ਅਞ੍ਞੇਹਿ ਵਾ ਕਾਰਣੇਹਿ. ਗਮ੍ਭੀਰਾਯ ਭੂਮਿਗਬ੍ਭਸਦਿਸਾਯ ਘਨਵਨਪਟਿਚ੍ਛਨ੍ਨਾਯ ਬਹਲਤਰਜਾਲਵਨਪਟਲਪਟਿਚ੍ਛਨ੍ਨਾਯ. ਅਨ੍ਤਰਹਿਤਸੂਰਿਯਾਲੋਕੇ ਕਾਲੇਤਿ ਏਤੇਨੇਵ ਦਿਵਾਤਿ ਅਵੁਤ੍ਤਸਿਦ੍ਧੋ. ਸਮ੍ਮੋਹਵਿਹਾਰੋ ਨਾਮ ਬਹੁਵਿਧੋਤਿ ਆਹ ‘‘ਸਮ੍ਮੋਹਵਿਹਾਰਾਨਂ ਅਞ੍ਞਤਰ’’ਨ੍ਤਿ.

ਪਾਕਟੋ ਬੋਧਿਸਤ੍ਤਸ੍ਸ ਰਤ੍ਤਿਨ੍ਦਿਵਪਰਿਚ੍ਛੇਦੋ ਅਨ੍ਤਮਸੋ ਲਵਤੁਟਿਖਣਸ੍ਸਪਿ ਉਪਾਦਾਯ ਸੁਵਵਤ੍ਥਿਤਤ੍ਤਾ, ਤਥਾ ਰਤ੍ਤਿਦਿਵਸਕੋਟ੍ਠਾਸਪਰਿਚ੍ਛੇਦੋ ਅਤ੍ਤਨਾ ਕਾਤਬ੍ਬਕਿਚ੍ਚਵਸੇਨ ਕਾਲਞਾਣਵਸੇਨ ਚ.

ਕਾਲਥਮ੍ਭੇ ਲਦ੍ਧਬ੍ਬਛਾਯਾਵਸੇਨ ਦ੍ਵਙ੍ਗੁਲਕਾਲੇ. ਯਾਮਘਣ੍ਟਿਕਂ ਪਹਰਤਿ ਸਙ੍ਘਸ੍ਸ ਤਂਤਂਵਤ੍ਤਕਰਣਤ੍ਥਂ. ਮੁਗ੍ਗਰਨ੍ਤਿ ਘਣ੍ਟਿਕਪ੍ਪਹਰਣਮੁਗ੍ਗਰਂ. ਯਾਮਯਨ੍ਤਂ ਪਤਤਿ ਅਞ੍ਞੇਹਿ ਭਿਕ੍ਖੂਹਿ ਯੋਜਿਤਨ੍ਤਿ ਅਧਿਪ੍ਪਾਯੋ. ਯਾਵ ਅਞ੍ਞੇ ਭਿਕ੍ਖੂ ਭੋਜਨਸਾਲਂ ਉਪਗਚ੍ਛਨ੍ਤਿ, ਤਾਵ ਦਿਵਾਵਿਹਾਰਟ੍ਠਾਨਂ ਗਨ੍ਤ੍ਵਾ ਸਮਣਧਮ੍ਮਂ ਕਰੋਤਿ.

ਯਂ ਖੋ ਤਨ੍ਤਿ ਏਤ੍ਥ ਯਨ੍ਤਿ ਅਨਿਯਮੁਦ੍ਦੇਸੋ, ਖੋਤਿ ਅਵਧਾਰਣੇ, ਯਮੇਵ ਪੁਗ੍ਗਲਨ੍ਤਿ ਅਤ੍ਥੋ. ਤਨ੍ਤਿ ਵੁਚ੍ਚਮਾਨਾਕਾਰਵਚਨਂ. ਮਮੇਵਾਤਿ ਮਂ ਏਵ. ਅਸਮ੍ਮੋਹਸਭਾਵੋਤਿ ਸਭਾਵਭੂਤਅਸਮ੍ਮੋਹੋ. ‘‘ਉਪ੍ਪਨ੍ਨੋ’’ਤਿ ਵੁਤ੍ਤਤ੍ਤਾ ‘‘ਮਨੁਸ੍ਸਲੋਕੇ’’ਤਿ ਵੁਤ੍ਤਂ. ਪਞ੍ਞਾਸਮ੍ਪਤ੍ਤਿਯਾਤਿ ਯਾਥਾਵਤੋ ਹਿਤਸ੍ਸ ਜਾਨਨਸਮਤ੍ਥੇਨ ਅਤ੍ਤਨੋ ਪਞ੍ਞਾਗੁਣੇਨ, ਨ ਕੇਵਲਂ ਅਜ੍ਝਾਸਯੇਨੇਵ ਹਿਤੇਸਿਤਾ, ਅਥ ਖੋ ਪਯੋਗੇਨਾਤਿ ਦਸ੍ਸੇਨ੍ਤੋ ‘‘ਹਿਤੂਪਦੇਸਕੋ’’ਤਿ ਆਹ. ਅਜ੍ਝਾਸਯੇਨ ਪਨ ਹਿਤੇਸਿਤਾ ‘‘ਲੋਕਾਨੁਕਮ੍ਪਾਯਾ’’ਤਿ ਇਮਿਨਾ ਦਸ੍ਸਿਤਾ. ਉਪਕਰਣੇਹਿ ਵਿਨਾ ਨ ਕਦਾਚਿ ਭੋਗਸੁਖਂ ਉਪਕਰਣਦਾਨਞ੍ਚ ਚਾਗਸਮ੍ਪਤ੍ਤਿਹੇਤੁਕਨ੍ਤਿ ਆਹ ‘‘ਚਾਗਸਮ੍ਪਤ੍ਤਿਯਾ…ਪੇ… ਦਾਯਕੋ’’ਤਿ. ਮੇਤ੍ਤਾਸਮ੍ਪਤ੍ਤਿਯਾ ਹਿਤੂਪਸਂਹਾਰੇਨ ਰਕ੍ਖਿਤਾ. ਕਰੁਣਾਸਮ੍ਪਤ੍ਤਿਯਾ ਦੁਕ੍ਖਾਪਨਯਨੇਨ ਗੋਪਾਯਿਤਾ. ਨਨੁ ਚ ਪੁਬ੍ਬੇਪਿ ਵੁਤ੍ਤਂ ‘‘ਹਿਤਾਯ ਸੁਖਾਯਾ’’ਤਿ, ਅਥ ਕਸ੍ਮਾ ਪੁਨ ਤਂ ਗਹਿਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਇਧ ਦੇਵਮਨੁਸ੍ਸਗ੍ਗਹਣੇਨਾ’’ਤਿਆਦਿ. ਤੇਨ ਪੁਬ੍ਬੇ ਅਵਿਸੇਸਤੋ ਹਿਤਾਦੀਨਿ ਦਸ੍ਸਿਤਾਨਿ, ਇਦਾਨਿ ਵਿਸੇਸਤੋ ਸਹ ਪਯੋਜਨੇਨ ਤਾਨਿ ਦਸ੍ਸਿਤਾਨੀਤਿ ਦੀਪੇਤਿ. ਨਿਬ੍ਬਾਨਤੋ ਪਰੋ ਪਰਮੋ ਅਤ੍ਥੋ ਨਾਮ ਨਤ੍ਥੀਤਿ ਆਹ ‘‘ਪਰਮਤ੍ਥਤ੍ਤਾਯਾ’’ਤਿ. ਹਿਨੋਤਿ ਨਿਬ੍ਬਾਨਂ ਗਚ੍ਛਤੀਤਿ ਹਿਤਂ, ਮਗ੍ਗੋ. ਉਕ੍ਕਂਸਤੋ ਸੁਖਤ੍ਥਂ ਅਰਿਯਫਲਨ੍ਤਿ ਆਹ ‘‘ਤਤੋ ਉਤ੍ਤਰਿ ਸੁਖਾਭਾਵਤੋ’’ਤਿ.

ਅਸਮ੍ਮੋਹਵਿਹਾਰਵਣ੍ਣਨਾ ਨਿਟ੍ਠਿਤਾ.

ਪੁਬ੍ਬਭਾਗਪਟਿਪਦਾਦਿਵਣ੍ਣਨਾ

੫੧. ਅਸਮ੍ਮੋਹਵਿਹਾਰਨ੍ਤਿ ਅਸਮ੍ਮੋਹਵੁਤ੍ਤਿਂ, ਅਸਮ੍ਮੋਹਸਮ੍ਬੋਧਿਨ੍ਤਿ ਵਾ ਅਤ੍ਥੋ. ਤਨ੍ਤਿ ਸਮਥਵਿਪਸ੍ਸਨਾਭਾਵਨਾਸਙ੍ਖਾਤਂ ਪਟਿਪਦਂ. ਪੁਬ੍ਬਭਾਗਤੋ ਪਭੁਤੀਤਿ ਭਾਵਨਾਯ ਪੁਬ੍ਬਭਾਗਵੀਰਿਯਾਰਮ੍ਭਾਦਿਤੋ ਪਟ੍ਠਾਯ. ਕੇਚੀਤਿ ਉਤ੍ਤਰਵਿਹਾਰਵਾਸਿਨੋ.

ਬੋਧਿਮਣ੍ਡੇਤਿ (ਸਾਰਤ੍ਥ. ਟੀ. ੧.੧੧.ਵੇਰਞ੍ਜਕਣ੍ਡਵਣ੍ਣਨਾ; ਅ. ਨਿ. ਟੀ. ੩.੮.੧੧) ਬੋਧਿਸਙ੍ਖਾਤਸ੍ਸ ਞਾਣਸ੍ਸ ਮਣ੍ਡਭਾਵਪ੍ਪਤ੍ਤੇ ਠਾਨੇ. ਚਤੁਰਙ੍ਗਨ੍ਤਿ ‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸਿਸ੍ਸਤੂ’’ਤਿਆਦਿਨਾ (ਮ. ਨਿ. ੨.੧੮੪; ਸਂ. ਨਿ. ੨.੨੩੭; ਅ. ਨਿ. ੨.੫; ੮.੧੩; ਮਹਾਨਿ. ੧੭, ੧੯੬) ਵੁਤ੍ਤਚਤੁਰਙ੍ਗਸਮਨ੍ਨਾਗਤਂ. ਪਗ੍ਗਹਿਤਨ੍ਤਿ ਆਰਮ੍ਭਂ ਸਿਥਿਲਂ ਅਕਤ੍ਵਾ ਦਲ਼੍ਹਪਰਕ੍ਕਮਸਙ੍ਖਾਤੁਸ੍ਸਹਨਭਾਵੇਨ ਗਹਿਤਂ. ਤੇਨਾਹ ‘‘ਅਸਿਥਿਲਪ੍ਪਵਤ੍ਤਿਤਨ੍ਤਿ ਵੁਤ੍ਤਂ ਹੋਤੀ’’ਤਿ. ਅਸਲ੍ਲੀਨਨ੍ਤਿ ਅਸਙ੍ਕੁਚਿਤਂ ਕੋਸਜ੍ਜਵਸੇਨ ਸਙ੍ਕੋਚਂ ਅਨਾਪਨ੍ਨਂ.

ਉਪਟ੍ਠਿਤਾਤਿ ਓਗਾਹਨਸਙ੍ਖਾਤੇਨ ਅਪਿਲਾਪਨਭਾਵੇਨ ਆਰਮ੍ਮਣਂ ਉਪਗਨ੍ਤ੍ਵਾ ਠਿਤਾ. ਤੇਨਾਹ ‘‘ਆਰਮ੍ਮਣਾਭਿਮੁਖੀਭਾਵੇਨਾ’’ਤਿ. ਸਮ੍ਮੋਸਸ੍ਸ ਵਿਦ੍ਧਂਸਨਵਸੇਨ ਪਵਤ੍ਤਿਯਾ ਨ ਸਮ੍ਮੁਟ੍ਠਾਤਿ ਅਸਮ੍ਮੁਟ੍ਠਾ. ਕਿਞ੍ਚਾਪਿ ਚਿਤ੍ਤਮਿਵ ਚਿਤ੍ਤਪਸ੍ਸਦ੍ਧਿਵਸੇਨ ਕਾਯਪਸ੍ਸਦ੍ਧਿਵਸੇਨੇਵ ਕਾਯੋ ਪਸ੍ਸਦ੍ਧੋ ਹੋਤਿ, ਤਥਾਪਿ ਯਸ੍ਮਾ ਕਾਯਪਸ੍ਸਦ੍ਧਿ ਉਪ੍ਪਜ੍ਜਮਾਨਾ ਚਿਤ੍ਤਪਸ੍ਸਦ੍ਧਿਯਾ ਸਹੇਵ ਉਪ੍ਪਜ੍ਜਤਿ, ਨ ਵਿਨਾ, ਤਸ੍ਮਾ ਵੁਤ੍ਤਂ ‘‘ਕਾਯਚਿਤ੍ਤਪਸ੍ਸਦ੍ਧਿਸਮ੍ਭਵੇਨਾ’’ਤਿ. ਰੂਪਕਾਯੋਪਿ ਪਸ੍ਸਦ੍ਧੋਯੇਵ ਹੋਤਿ ਕਾਯਪਸ੍ਸਦ੍ਧਿਯਾ ਉਭਯੇਸਮ੍ਪਿ ਕਾਯਾਨਂ ਪਸ੍ਸਮ੍ਭਨਾਵਹਤ੍ਤਾ. ਸੋ ਚ ਖੋ ਕਾਯੋ. ਵਿਗਤਦਰਥੋਤਿ ਵਿਗਤਕਿਲੇਸਦਰਥੋ. ਨਾਮਕਾਯੇ ਹਿ ਵਿਗਤਦਰਥੇ ਰੂਪਕਾਯੋਪਿ ਵੂਪਸਨ੍ਤਦਰਥਪਰਿਲ਼ਾਹੋ ਹੋਤਿ. ਸਮ੍ਮਾ ਆਹਿਤਨ੍ਤਿ ਨਾਨਾਰਮ੍ਮਣੇਸੁ ਵਿਧਾਵਨਸਙ੍ਖਾਤਵਿਕ੍ਖੇਪਂ ਵਿਚ੍ਛਿਨ੍ਦਿਤ੍ਵਾ ਏਕਸ੍ਮਿਂਯੇਵ ਆਰਮ੍ਮਣੇ ਅਵਿਕ੍ਖਿਤ੍ਤਭਾਵਾਪਾਦਾਨੇਨ ਸਮ੍ਮਦੇਵ ਆਹਿਤਂ. ਤੇਨਾਹ ‘‘ਸੁਟ੍ਠੁ ਠਪਿਤ’’ਨ੍ਤਿਆਦਿ. ਚਿਤ੍ਤਸ੍ਸ ਅਨੇਕਗ੍ਗਭਾਵੋ ਵਿਕ੍ਖੇਪਵਸੇਨ ਚਞ੍ਚਲਤਾ, ਸਾ ਸਤਿ ਏਕਗ੍ਗਤਾਯ ਨ ਹੋਤੀਤਿ ਆਹ ‘‘ਏਕਗ੍ਗਂ ਅਚਲਂ ਨਿਪ੍ਫਨ੍ਦਨ’’ਨ੍ਤਿ. ਏਤ੍ਤਾਵਤਾਤਿ ‘‘ਆਰਦ੍ਧਂ ਖੋ ਪਨਾ’’ਤਿਆਦਿਨਾ ਵੀਰਿਯਸਤਿਪਸ੍ਸਦ੍ਧਿਸਮਾਧੀਨਂ ਕਿਚ੍ਚਸਿਦ੍ਧਿਦਸ੍ਸਨੇਨ. ਨਨੁ ਚ ਸਦ੍ਧਾਪਞ੍ਞਾਨਮ੍ਪਿ ਕਿਚ੍ਚਸਿਦ੍ਧਿ ਝਾਨਸ੍ਸ ਪੁਬ੍ਬਪਟਿਪਦਾਯ ਇਚ੍ਛਿਤਬ੍ਬਾਤਿ? ਸਚ੍ਚਂ ਇਚ੍ਛਿਤਬ੍ਬਾ, ਸਾ ਪਨ ਨਾਨਨ੍ਤਰਿਯਭਾਵੇਨ ਅਵੁਤ੍ਤਸਿਦ੍ਧਾਤਿ ਨ ਗਹਿਤਾ. ਅਸਤਿ ਹਿ ਸਦ੍ਧਾਯ ਵੀਰਿਯਾਰਮ੍ਭਾਦੀਨਂ ਅਸਮ੍ਭਵੋਯੇਵ, ਪਞ੍ਞਾਪਰਿਗ੍ਗਹੇ ਚ ਨੇਸਂ ਅਸਤਿ ਪਞ੍ਞਾਯਾਰਮ੍ਭਾਦਿਭਾਵੋ ਨ ਸਿਯਾ. ਤਥਾ ਅਸਲ੍ਲੀਨਾਸਮ੍ਮੋਸਤਾਦਯੋ ਵੀਰਿਯਾਦੀਨਨ੍ਤਿ ਅਸਲ੍ਲੀਨਤਾਦਿਗ੍ਗਹਣੇਨੇਵੇਤ੍ਥ ਪਞ੍ਞਾਕਿਚ੍ਚਸਿਦ੍ਧਿ ਗਹਿਤਾਤਿ ਦਟ੍ਠਬ੍ਬਂ. ਝਾਨਭਾਵਨਾਯਂ ਵਾ ਸਮਾਧਿਕਿਚ੍ਚਂ ਅਧਿਕਂ ਇਚ੍ਛਿਤਬ੍ਬਨ੍ਤਿ ਦਸ੍ਸੇਤੁਂ ਸਮਾਧਿਪਰਿਯੋਸਾਨਾਵ ਝਾਨਸ੍ਸ ਪੁਬ੍ਬਪਟਿਪਦਾ ਕਥਿਤਾਤਿ ਦਟ੍ਠਬ੍ਬਂ.

ਵੁਤ੍ਤਂ, ਤਸ੍ਮਾ ਇਧ ਨ ਵਤ੍ਤਬ੍ਬਂ. ਵਿਸੁਦ੍ਧਿਮਗ੍ਗੋ ਹਿ ਇਮਿਸ੍ਸਾ ਸਂਵਣ੍ਣਨਾਯ ਏਕਦੇਸਭੂਤੋਤਿ ਵੁਤ੍ਤੋਵਾਯਮਤ੍ਥੋਤਿ. ਵਿਹਰਤੀਤਿ ਆਗਤਂ ਪਰੁਦ੍ਦੇਸਿਕਤ੍ਤਾ ਵਿਹਾਰਸ੍ਸ. ਇਧ ਵਿਹਾਸਿਨ੍ਤਿ ਆਗਤਂ ਅਤ੍ਥੁਦ੍ਦੇਸਿਕਤ੍ਤਾ. ਇਦਂ ਕਿਰ ਸਬ੍ਬਬੁਦ੍ਧਾਨਂ ਅਵਿਜਹਿਤਨ੍ਤਿ ਆਹ ‘‘ਆਨਾਪਾਨਸ੍ਸਤਿਕਮ੍ਮਟ੍ਠਾਨ’’ਨ੍ਤਿ. ਰੂਪਵਿਰਾਗਭਾਵਨਾਵਸੇਨ (ਸਾਰਤ੍ਥ. ਟੀ. ੧.੧੨.ਨੇਰਞ੍ਜਕਣ੍ਡਵਣ੍ਣਨਾ) ਪਵਤ੍ਤੋ ਚਤੁਬ੍ਬਿਧੋਪਿ ਅਰੂਪਜ੍ਝਾਨਵਿਸੇਸੋ ਚਤੁਤ੍ਥਜ੍ਝਾਨਸਙ੍ਗਹੋ ਏਵਾਤਿ ਆਹ ‘‘ਚਤ੍ਤਾਰਿ ਝਾਨਾਨੀ’’ਤਿ. ਯੁਤ੍ਤਂ ਤਾਵ ਚਿਤ੍ਤੇਕਗ੍ਗਤਾ ਭਵੋਕ੍ਕਮਨਤ੍ਥਤਾ ਵਿਯ ਵਿਪਸ੍ਸਨਾਪਾਦਕਤਾਪਿ ਚਤੁਨ੍ਨਂ ਝਾਨਾਨਂ ਸਾਧਾਰਣਾਤਿ ਤੇਸਂ ਵਸੇਨ ‘‘ਚਤ੍ਤਾਰਿ ਝਾਨਾਨੀ’’ਤਿ ਵਚਨਂ, ਅਭਿਞ੍ਞਾਪਾਦਕਤਾ ਪਨ ਨਿਰੋਧਪਾਦਕਤਾ ਚ ਚਤੁਤ੍ਥਸ੍ਸੇਵ ਝਾਨਸ੍ਸ ਆਵੇਣਿਕਾ, ਸਾ ਕਥਂ ਚਤੁਨ੍ਨਂ ਝਾਨਾਨਂ ਸਾਧਾਰਣਾ ਵੁਤ੍ਤਾਤਿ? ਪਰਮ੍ਪਰਾਧਿਟ੍ਠਾਨਭਾਵਤੋ. ਪਦਟ੍ਠਾਨਪਦਟ੍ਠਾਨਮ੍ਪਿ ਹਿ ਪਦਟ੍ਠਾਨਨ੍ਤੇਵ ਵੁਚ੍ਚਤਿ, ਕਾਰਣਕਾਰਣਮ੍ਪਿ ਕਾਰਣਨ੍ਤਿ ਯਥਾ ‘‘ਤਿਣੇਹਿ ਸਤ੍ਤਂ ਸਿਦ੍ਧ’’ਨ੍ਤਿ, ਏਵਞ੍ਚ ਕਤ੍ਵਾ ਪਯੋਜਨਨਿਦ੍ਦੇਸੇ ਅਟ੍ਠਸਮਾਪਤ੍ਤਿਗ੍ਗਹਣਂ ਸਮਤ੍ਥਿਤਂ ਹੋਤਿ. ਚਿਤ੍ਤੇਕਗ੍ਗਤਤ੍ਥਾਨੀਤਿ ਚਿਤ੍ਤਸਮਾਧਾਨਤ੍ਥਾਨਿ, ਦਿਟ੍ਠਧਮ੍ਮਸੁਖਵਿਹਾਰਤ੍ਥਾਨੀਤਿ ਅਤ੍ਥੋ. ਚਿਤ੍ਤੇਕਗ੍ਗਤਾਸੀਸੇਨ ਹਿ ਦਿਟ੍ਠਧਮ੍ਮਸੁਖਵਿਹਾਰੋ ਵੁਤ੍ਤੋ, ਸੁਕ੍ਖਵਿਪਸ੍ਸਕਖੀਣਾਸਵਵਸੇਨ ਚੇਤਂ ਵੁਤ੍ਤਂ. ਤੇਨਾਹ ‘‘ਏਕਗ੍ਗਚਿਤ੍ਤਾ ਸੁਖਂ ਦਿਵਸਂ ਵਿਹਰਿਸ੍ਸਾਮਾ’’ਤਿ. ਭਵੋਕ੍ਕਮਨਤ੍ਥਾਨੀਤਿ ਭਵੇਸੁ ਨਿਬ੍ਬਤ੍ਤਿਅਤ੍ਥਾਨਿ.

ਯਸ੍ਮਾ (ਸਾਰਤ੍ਥ. ਟੀ. ੧.੧੨.ਨੇਰਞ੍ਜਕਣ੍ਡਵਣ੍ਣਨਾ) ਬੋਧਿਸਤ੍ਤੇਨ ਬੋਧਿਮਣ੍ਡੂਪਸਙ੍ਕਮਨਤੋ ਪੁਬ੍ਬੇਪਿ ਚਰਿਮਭਵੇ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤਿਤਪੁਬ੍ਬਂ, ਤਦਾ ਪਨ ਤਂ ਨਿਬ੍ਬਤ੍ਤਿਤਮਤ੍ਤਮੇਵ ਅਹੋਸਿ, ਨ ਵਿਪਸ੍ਸਨਾਦਿਪਾਦਕਂ, ਤਸ੍ਮਾ ‘‘ਬੋਧਿਰੁਕ੍ਖਮੂਲੇ ਨਿਬ੍ਬਤ੍ਤਿਤ’’ਨ੍ਤਿ ਤਤੋ ਵਿਸੇਸੇਤ੍ਵਾ ਵੁਤ੍ਤਂ. ਵਿਪਸ੍ਸਨਾਪਾਦਕਨ੍ਤਿ ਵਿਪਸ੍ਸਨਾਰਮ੍ਭੇ ਵਿਪਸ੍ਸਨਾਯ ਪਾਦਕਂ. ਅਭਿਞ੍ਞਾਪਾਦਕਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਬੁਦ੍ਧਾਨਞ੍ਹਿ ਪਠਮਾਰਮ੍ਭੇ ਏਵ ਪਾਦਕਜ੍ਝਾਨੇਨ ਪਯੋਜਨਂ ਅਹੋਸਿ, ਨ ਤਤੋ ਪਰਂ ਉਪਰਿਮਗ੍ਗਾਧਿਗਮਫਲਸਮਾਪਤ੍ਤਿਅਭਿਞ੍ਞਾਵਲ਼ਞ੍ਜਨਾਦਿਅਤ੍ਥਂ. ਅਭਿਸਮ੍ਬੋਧਿਸਮਧਿਗਮਤੋ ਪਟ੍ਠਾਯ ਹਿ ਸਬ੍ਬਂ ਞਾਣਸਮਾਧਿਕਿਚ੍ਚਂ ਆਕਙ੍ਖਮਤ੍ਤਪਟਿਬਦ੍ਧਮੇਵਾਤਿ. ਸਬ੍ਬਕਿਚ੍ਚਸਾਧਕਨ੍ਤਿ ਅਨੁਪੁਬ੍ਬਵਿਹਾਰਾਦਿਸਬ੍ਬਕਿਚ੍ਚਸਾਧਕਂ. ਸਬ੍ਬਲੋਕਿਯਲੋਕੁਤ੍ਤਰਗੁਣਦਾਯਕਨ੍ਤਿ ਏਤ੍ਥ ਵਿਪਸ੍ਸਨਾਭਿਞ੍ਞਾਪਾਦਕਤ੍ਤਾ ਏਵ ਚਤੁਤ੍ਥਸ੍ਸ ਝਾਨਸ੍ਸ ਭਗਵਤੋ ਸਬ੍ਬਲੋਕਿਯਲੋਕੁਤ੍ਤਰਗੁਣਦਾਯਕਤਾ ਵੇਦਿਤਬ੍ਬਾ. ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਞ੍ਹਿ ਮਗ੍ਗਞਾਣਂ, ਮਗ੍ਗਞਾਣਪਦਟ੍ਠਾਨਞ੍ਚ ਸਬ੍ਬਞ੍ਞੁਤਞ੍ਞਾਣਂ ਅਭਿਸਮ੍ਬੋਧਿ, ਤਦਧਿਗਮਸਮਕਾਲਮੇਵ ਭਗਵਤੋ ਸਬ੍ਬੇ ਬੁਦ੍ਧਗੁਣਾ ਹਤ੍ਥਗਤਾ ਅਹੇਸੁਂ, ਚਤੁਤ੍ਥਜ੍ਝਾਨਸਨ੍ਨਿਸ੍ਸਯੋ ਚ ਮਗ੍ਗਾਧਿਗਮੋਤਿ.

ਪੁਬ੍ਬਭਾਗਪਟਿਪਦਾਦਿਵਣ੍ਣਨਾ ਨਿਟ੍ਠਿਤਾ.

ਪੁਬ੍ਬੇਨਿਵਾਸਕਥਾਵਣ੍ਣਨਾ

੫੨. ਦ੍ਵਿਨ੍ਨਂ ਵਿਜ੍ਜਾਨਨ੍ਤਿ ਪੁਬ੍ਬੇਨਿਵਾਸਞਾਣਦਿਬ੍ਬਚਕ੍ਖੁਞਾਣਸਙ੍ਖਾਤਾਨਂ ਦ੍ਵਿਨ੍ਨਂ ਵਿਜ੍ਜਾਨਂ. ਅਨੁਪਦਵਣ੍ਣਨਾਤਿ ਤਾਸਂ ਵਿਜ੍ਜਾਨਂ ਨਿਦ੍ਦੇਸਪਾਲ਼ਿਯਾ ਅਨੁਪਦਵਣ੍ਣਨਾ. ਭਾਵਨਾਨਯੋਤਿ ਉਪ੍ਪਾਦਨਵਿਧਿ. ‘‘ਸੋ’’ਤਿ ਪਚ੍ਚਤ੍ਤਵਚਨਸ੍ਸ ਅਹਂ-ਸਦ੍ਦੇਨ ਸਮ੍ਬਨ੍ਧਨੇ ਕਾਰਣਂ ਦਸ੍ਸੇਤੁਂ ‘‘ਅਭਿਨਿਨ੍ਨਾਮੇਸਿ’’ਨ੍ਤਿਆਦਿ ਵੁਤ੍ਤਂ. ਪਾਲ਼ਿਯਂ ਵਾ ‘‘ਅਭਿਨਿਨ੍ਨਾਮੇਸਿ’’ਨ੍ਤਿ ਉਤ੍ਤਮਪੁਰਿਸਸ੍ਸ ਯੋਗੋਤਿ ਅਹਂ-ਸਦ੍ਦੇਨ ਆਨੇਤ੍ਵਾ ਵੁਚ੍ਚਮਾਨੇ ਤਦਤ੍ਥੋ ਪਾਕਟੋ ਹੋਤੀਤਿ ‘‘ਸੋ ਅਹ’’ਨ੍ਤਿ ਵੁਤ੍ਤਂ. ਅਭਿਨੀਹਰਿਨ੍ਤਿ ਚਿਤ੍ਤਂ ਝਾਨਾਰਮ੍ਮਣਤੋ ਅਪਨੇਤ੍ਵਾ ਪੁਬ੍ਬੇਨਿਵਾਸਾਭਿਮੁਖਂ ਪੇਸੇਸਿਂ, ਪੁਬ੍ਬੇਨਿਵਾਸਨਿਨ੍ਨਂ ਪੁਬ੍ਬੇਨਿਵਾਸਪੋਣਂ ਪੁਬ੍ਬੇਨਿਵਾਸਪਬ੍ਭਾਰਂ ਅਕਾਸਿਨ੍ਤਿ ਅਤ੍ਥੋ.

ਪੁਬ੍ਬੇਅਤੀਤਜਾਤੀਸੁ ਨਿਵੁਤ੍ਥਕ੍ਖਨ੍ਧਾ ਪੁਬ੍ਬੇਨਿਵਾਸੋ. ਨਿਵੁਤ੍ਥਾਤਿ ਚ ਅਜ੍ਝਾਵੁਤ੍ਥਾ ਅਨੁਭੂਤਾ ਅਤ੍ਤਨੋ ਸਨ੍ਤਾਨੇ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਾ, ਗੋਚਰਨਿਵਾਸੇਨ ਨਿਵੁਤ੍ਥਧਮ੍ਮਾ ਵਾ ਅਤ੍ਤਨੋ ਵਿਞ੍ਞਾਣੇਨਵਿਞ੍ਞਾਤਾ, ਪਰਵਿਞ੍ਞਾਣਵਿਞ੍ਞਾਤਾਪਿ ਵਾ ਛਿਨ੍ਨਵਟੁਮਕਾਨੁਸ੍ਸਰਣਾਦੀਸੁ, ਤਂ ਪੁਬ੍ਬੇਨਿਵਾਸਂ ਯਾਯ ਸਤਿਯਾ ਅਨੁਸ੍ਸਰਤਿ, ਤਾਯ ਸਮ੍ਪਯੁਤ੍ਤਂ ਞਾਣਂ ਪੁਬ੍ਬੇਨਿਵਾਸਾਨੁਸ੍ਸਤਿਞ੍ਞਾਣਂ. ਪਟਿਨਿਵਤ੍ਤਨ੍ਤਸ੍ਸਾਤਿ ਪੁਬ੍ਬੇਨਿਵਾਸਂ ਅਨੁਸ੍ਸਰਣਵਸੇਨ ਯਾਵਦਿਚ੍ਛਕਂ ਗਨ੍ਤ੍ਵਾ ਪਚ੍ਚਾਗਚ੍ਛਨ੍ਤਸ੍ਸ. ਤਸ੍ਮਾਤਿ ਵੁਤ੍ਤਸ੍ਸੇਵਤ੍ਥਸ੍ਸ ਕਾਰਣਭਾਵੇਨ ਪਚ੍ਚਾਮਸਨਂ, ਪਟਿਨਿਵਤ੍ਤਨ੍ਤਸ੍ਸ ਪਚ੍ਚਵੇਕ੍ਖਣਭਾਵਤੋਤਿ ਵੁਤ੍ਤਂ ਹੋਤਿ. ਇਧੂਪਪਤ੍ਤਿਯਾਤਿ ਇਧ ਚਰਿਮਭਵੇ ਉਪਪਤ੍ਤਿਯਾ. ਅਨਨ੍ਤਰਨ੍ਤਿ ਅਤੀਤਾਨਨ੍ਤਰਮਾਹ. ਅਮੁਤ੍ਰਾਤਿ ਅਮੁਕਸ੍ਮਿਂ ਭਵੇਤਿ ਅਤ੍ਥੋ. ਉਦਪਾਦਿਨ੍ਤਿ ਉਪ੍ਪਜ੍ਜਿਂ. ਤਾਹਿ ਦੇਵਤਾਹੀਤਿ ਤੁਸਿਤਾਦੇਵਤਾਹਿ. ਏਕਗੋਤ੍ਤੋਤਿ ਤੁਸਿਤਗੋਤ੍ਤੇਨ ਏਕਗੋਤ੍ਤੋ. ਮਹਾਬੋਧਿਸਤ੍ਤਾਨਂ ਸਨ੍ਤਾਨਸ੍ਸ ਪਰਿਯੋਸਾਨਾਵਤ੍ਥਾਯ ਦੇਵਲੋਕੂਪਪਤ੍ਤਿਜਨਕਂ ਨਾਮ ਅਕੁਸਲੇਨ ਕਮ੍ਮੁਨਾ ਅਨੁਪਦ੍ਦੁਤਮੇਵ ਹੋਤੀਤਿ ਅਧਿਪ੍ਪਾਯੇਨ ‘‘ਦੁਕ੍ਖਂ ਪਨ ਸਙ੍ਖਾਰਦੁਕ੍ਖਮੇਵਾ’’ਤਿ ਵੁਤ੍ਤਂ. ਮਹਾਪੁਞ੍ਞਾਨਮ੍ਪਿ ਪਨ ਦੇਵਪੁਤ੍ਤਾਨਂ ਪੁਬ੍ਬਨਿਮਿਤ੍ਤੁਪ੍ਪਤ੍ਤਿਕਾਲਾਦੀਸੁ ਅਨਿਟ੍ਠਾਰਮ੍ਮਣਸਮਾਯੋਗੋ ਹੋਤਿਯੇਵਾਤਿ ‘‘ਕਦਾਚਿ ਦੁਕ੍ਖਦੁਕ੍ਖਸ੍ਸਪਿ ਸਮ੍ਭਵੋ ਨਤ੍ਥੀ’’ਤਿ ਨ ਸਕ੍ਕਾ ਵਤ੍ਤੁਂ. ਸਤ੍ਤਪਞ੍ਞਾਸ…ਪੇ… ਪਰਿਯਨ੍ਤੋਤਿ ਇਦਂ ਮਨੁਸ੍ਸਾਨਂ ਵਸ੍ਸਗਣਨਾਵਸੇਨ ਵੁਤ੍ਤਂ. ਤਤ੍ਥ ਦੇਵਾਨਂ ਵਸ੍ਸਗਣਨਾਯ ਪਨ ਚਤੁਸਹਸ੍ਸਮੇਵ.

ਅਤੀਤਭਵੇ (ਸਾਰਤ੍ਥ. ਟੀ. ੧.੧੨.ਪੁਬ੍ਬੇਨਿਵਾਸਕਥਾਯਂ) ਖਨ੍ਧਾ ਤਪ੍ਪਟਿਬਦ੍ਧਨਾਮਗੋਤ੍ਤਾਨਿ ਚ ਸਬ੍ਬਂ ਪੁਬ੍ਬੇਨਿਵਾਸਨ੍ਤੇਵ ਸਙ੍ਗਹਿਤਨ੍ਤਿ ਆਹ ‘‘ਕਿਂ ਵਿਦਿਤਂ ਕਰੋਤਿ? ਪੁਬ੍ਬੇਨਿਵਾਸ’’ਨ੍ਤਿ. ਮੋਹੋ ਪਟਿਚ੍ਛਾਦਕਟ੍ਠੇਨ‘‘ਤਮੋ’’ਤਿ ਵੁਚ੍ਚਤਿ ‘‘ਤਮੋ ਵਿਯਾ’’ਤਿ ਕਤ੍ਵਾ. ਓਭਾਸਕਰਣਟ੍ਠੇਨਾਤਿ ਕਾਤਬ੍ਬਤੋ ਕਰਣਂ, ਓਭਾਸੋਵ ਕਰਣਂ, ਅਤ੍ਤਨੋ ਪਚ੍ਚਯੇਨ ਓਭਾਸਭਾਵੇਨ ਨਿਬ੍ਬਤ੍ਤੇਤਬ੍ਬਟ੍ਠੇਨਾਤਿ ਅਤ੍ਥੋ. ਸੇਸਂ ਪਸਂਸਾਵਚਨਨ੍ਤਿ ਪਟਿਪਕ੍ਖਵਿਧਮਨਪਵਤ੍ਤਿਵਿਸੇਸਾਨਂ ਬੋਧਨਤੋ ਵੁਤ੍ਤਂ. ਅਵਿਜ੍ਜਾ ਵਿਹਤਾਤਿ ਏਤੇਨ ਵਿਜ੍ਜਨਟ੍ਠੇਨ ਵਿਜ੍ਜਾਤਿ ਅਯਮ੍ਪਿ ਅਤ੍ਥੋ ਦੀਪਿਤੋਤਿ ਦਟ੍ਠਬ੍ਬਂ. ਯਸ੍ਮਾ ਵਿਜ੍ਜਾ ਉਪ੍ਪਨ੍ਨਾਤਿ ਏਤੇਨ ਵਿਜ੍ਜਾਪਟਿਪਕ੍ਖਾ ਅਵਿਜ੍ਜਾ, ਪਟਿਪਕ੍ਖਤਾ ਚਸ੍ਸਾ ਪਹਾਤਬ੍ਬਭਾਵੇਨ ਵਿਜ੍ਜਾਯ ਚ ਪਹਾਯਕਭਾਵੇਨਾਤਿ ਦਸ੍ਸੇਤਿ. ਏਸ ਨਯੋ ਇਤਰਸ੍ਮਿਮ੍ਪਿ ਪਦਦ੍ਵਯੇਤਿ ਇਮਿਨਾ ਤਮੋ ਵਿਹਤੋ ਵਿਨਟ੍ਠੋ. ਕਸ੍ਮਾ? ਯਸ੍ਮਾ ਆਲੋਕੋ ਉਪ੍ਪਨ੍ਨੋਤਿ ਇਮਮਤ੍ਥਂ ਅਤਿਦਿਸਤਿ. ਪੇਸਿਤਤ੍ਤਸ੍ਸਾਤਿ ਯਥਾਧਿਪ੍ਪੇਤਤ੍ਥਸਿਦ੍ਧਿਂ ਪਤਿ ਵਿਸ੍ਸਟ੍ਠਚਿਤ੍ਤਸ੍ਸ. ਯਥਾ ਅਪ੍ਪਮਤ੍ਤਸ੍ਸਾਤਿ ਅਞ੍ਞਸ੍ਸਪਿ ਕਸ੍ਸਚਿ ਮਾਦਿਸਸ੍ਸਾਤਿ ਅਧਿਪ੍ਪਾਯੋ.

ਪੁਬ੍ਬੇਨਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

ਦਿਬ੍ਬਚਕ੍ਖੁਞਾਣਕਥਾਵਣ੍ਣਨਾ

੫੩. ਇਧਾਤਿ ਭਯਭੇਰਵਸੁਤ੍ਤੇ ਵੁਤ੍ਤਂ. ਇਧ ਅਯਂ ਵਿਸੇਸੋਤਿ ਯੋਜਨਾ. ਵੁਤ੍ਤਸਦਿਸਮੇਵ ‘‘ਮੇਤਿ ਮਯਾ’’ਤਿਆਦਿਨਾ. ਪਰਿਕਮ੍ਮਕਿਚ੍ਚਨ੍ਤਿ ‘‘ਅਭਿਞ੍ਞਾਪਾਦਕਚਤੁਤ੍ਥਜ੍ਝਾਨਤੋ ਵੁਟ੍ਠਾਯ ਸਬ੍ਬਪਚ੍ਛਿਮਾ ਨਿਸਜ੍ਜਾ ਆਵਜ੍ਜਿਤਬ੍ਬਾ’’ਤਿਆਦਿਨਾ, ਕਸਿਣਾਰਮ੍ਮਣਂ ਅਭਿਞ੍ਞਾਪਾਦਕਜ੍ਝਾਨਂ ਸਬ੍ਬਾਕਾਰੇਨ ਅਭਿਨੀਹਾਰਕ੍ਖਮਂ ਕਤ੍ਵਾ’’ਤਿਆਦਿਨਾ ਚ ਵੁਤ੍ਤੇਨ ਪਰਿਕਮ੍ਮੇਨ ਕਿਚ੍ਚਂ ਪਯੋਜਨਂ ਨਤ੍ਥਿ. ਨ ਤੇਨ ਇਧ ਅਤ੍ਥੋਤਿ ਤੇਨ ਭਾਵਨਾਨਯੇਨ ਇਧ ਪਾਲ਼ਿਯਾ ਅਤ੍ਥਵਣ੍ਣਨਾਯਂ ਅਤ੍ਥੋ ਨਤ੍ਥਿ ਤਥਾਭਾਵਨਾਯ ਇਧ ਅਨਧਿਪ੍ਪੇਤਤ੍ਤਾਤਿ ਅਧਿਪ੍ਪਾਯੋ.

ਦਿਬ੍ਬਚਕ੍ਖੁਞਾਣਕਥਾਵਣ੍ਣਨਾ ਨਿਟ੍ਠਿਤਾ.

ਆਸਵਕ੍ਖਯਞਾਣਕਥਾਵਣ੍ਣਨਾ

੫੪. ਵਿਪਸ੍ਸਨਾਪਾਦਕਨ੍ਤਿ (ਸਾਰਤ੍ਥ. ਟੀ. ੧.੧੪.ਆਸਵਕ੍ਖਯਞਾਣਕਥਾਯਂ; ਦੀ. ਨਿ. ਟੀ. ੧.੨੪੮; ਅ. ਨਿ. ਟੀ. ੨.੩.੫੯) ਵਿਪਸ੍ਸਨਾਯ ਪਦਟ੍ਠਾਨਭੂਤਂ. ਵਿਪਸ੍ਸਨਾ ਚ ਤਿਵਿਧਾ ਵਿਪਸ੍ਸਨਕਪੁਗ੍ਗਲਭੇਦੇਨ. ਮਹਾਬੋਧਿਸਤ੍ਤਾਨਞ੍ਹਿ ਪਚ੍ਚੇਕਬੋਧਿਸਤ੍ਤਾਨਞ੍ਚ ਵਿਪਸ੍ਸਨਾ ਚਿਨ੍ਤਾਮਯਞਾਣਸਂਵਦ੍ਧਿਤਤ੍ਤਾ ਸਯਮ੍ਭੁਞਾਣਭੂਤਾ, ਇਤਰੇਸਂ ਸੁਤਮਯਞਾਣਸਂਵਦ੍ਧਿਤਤ੍ਤਾ ਪਰੋਪਦੇਸਸਮ੍ਭੂਤਾ, ਸਾ ‘‘ਠਪੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਂ ਅਵਸੇਸਰੂਪਾਰੂਪਜ੍ਝਾਨਾਨਂ ਅਞ੍ਞਤਰਤੋ ਵੁਟ੍ਠਾਯਾ’’ਤਿਆਦਿਨਾ ਅਨੇਕਧਾ ਅਰੂਪਮੁਖਵਸੇਨ ਚਤੁਧਾਤੁਵਵਤ੍ਥਾਨੇ ਵੁਤ੍ਤਾਨਂ ਤੇਸਂ ਤੇਸਂ ਧਾਤੁਪਰਿਗ੍ਗਹਮੁਖਾਨਂ ਅਞ੍ਞਤਰਮੁਖਵਸੇਨ ਅਨੇਕਧਾਵ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੦੬) ਨਾਨਾਨਯਤੋ ਵਿਭਾਵਿਤਾ. ਮਹਾਬੋਧਿਸਤ੍ਤਾਨਂ ਪਨ ਚਤੁਵੀਸਤਿਕੋਟਿਸਤਸਹਸ੍ਸਮੁਖੇਨ ਪਭੇਦਗਮਨਤੋ ਨਾਨਾਨਯਂ ਸਬ੍ਬਞ੍ਞੁਤਞ੍ਞਾਣਸਨ੍ਨਿਸ੍ਸਯਸ੍ਸ ਅਰਿਯਮਗ੍ਗਞਾਣਸ੍ਸ ਅਧਿਟ੍ਠਾਨਭੂਤਂ ਪੁਬ੍ਬਭਾਗਞਾਣਗਬ੍ਭਂ ਗਣ੍ਹਾਪੇਨ੍ਤਂ ਪਰਿਪਾਕਂ ਗਚ੍ਛਨ੍ਤਂ ਪਰਮਗਮ੍ਭੀਰਸਣ੍ਹਸੁਖੁਮਤਰਂ ਅਨਞ੍ਞਸਾਧਾਰਣਂ ਵਿਪਸ੍ਸਨਾਞਾਣਂ ਹੋਤਿ, ਯਂ ਅਟ੍ਠਕਥਾਸੁ ਮਹਾਵਜਿਰਞਾਣਨ੍ਤਿ ਵੁਚ੍ਚਤਿ. ਯਸ੍ਸ ਚ ਪਵਤ੍ਤਿਵਿਭਾਗੇਨ ਚਤੁਵੀਸਤਿਕੋਟਿਸਤਸਹਸ੍ਸਪ੍ਪਭੇਦਸ੍ਸ ਪਾਦਕਭਾਵੇਨ ਸਮਾਪਜ੍ਜਿਯਮਾਨਾ ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਦੇਵਸਿਕਂ ਸਤ੍ਥੁ ਵਲ਼ਞ੍ਜਨਕਸਮਾਪਤ੍ਤਿਯੋ ਵੁਚ੍ਚਨ੍ਤਿ, ਸ੍ਵਾਯਂ ਬੁਦ੍ਧਾਨਂ ਵਿਪਸ੍ਸਨਾਚਾਰੋ ਪਰਮਤ੍ਥਮਞ੍ਜੂਸਾਯ ਵਿਸੁਦ੍ਧਿਮਗ੍ਗਸਂਵਣ੍ਣਨਾਯ (ਵਿਸੁਦ੍ਧਿ. ਮਹਾਟੀ. ੧.੧੪੪) ਉਦ੍ਦੇਸਤੋ ਦਸ੍ਸਿਤੋ, ਅਤ੍ਥਿਕੇਹਿ ਤਤੋ ਗਹੇਤਬ੍ਬੋਤਿ.

ਆਸਵਾਨਂ ਖੇਪਨਤੋ ਸਮੁਚ੍ਛਿਨ੍ਦਨਤੋ ਆਸਵਕ੍ਖਯੋ, ਅਰਿਯਮਗ੍ਗੋ, ਉਕ੍ਕਟ੍ਠਨਿਦ੍ਦੇਸਵਸੇਨ ਅਰਹਤ੍ਤਮਗ੍ਗਗ੍ਗਹਣਂ. ਆਸਵਾਨਂ ਖਯੇ ਞਾਣਂ ਆਸਵਕ੍ਖਯਞਾਣਨ੍ਤਿ ਦਸ੍ਸੇਨ੍ਤੋ ‘‘ਤਤ੍ਰ ਚੇਤਂ ਞਾਣ’’ਨ੍ਤਿ ਵਤ੍ਵਾ ਖਯੇਤਿ ਚ ਆਧਾਰੇ ਭੁਮ੍ਮਂ, ਨ ਵਿਸਯੇਤਿ ਦਸ੍ਸੇਨ੍ਤੋ ‘‘ਤਪ੍ਪਰਿਯਾ ਪਨ੍ਨਤ੍ਤਾ’’ਤਿ ਆਹ. ਇਦਂ ਦੁਕ੍ਖਨ੍ਤਿ ਦੁਕ੍ਖਸ੍ਸ ਅਰਿਯਸਚ੍ਚਸ੍ਸ ਤਦਾ ਪਚ੍ਚਕ੍ਖਤੋ ਗਹਿਤਭਾਵਦਸ੍ਸਨਂ. ਏਤ੍ਤਕਂ ਦੁਕ੍ਖਨ੍ਤਿ ਦੁਕ੍ਖਸ੍ਸ ਅਰਿਯਸਚ੍ਚਸ੍ਸ ਤਦਾ ਪਚ੍ਚਕ੍ਖਤੋ ਗਹਿਤਭਾਵਦਸ੍ਸਨਂ. ਏਤ੍ਤਕਂ ਦੁਕ੍ਖਨ੍ਤਿ ਤਸ੍ਸ ਪਰਿਚ੍ਛਿਜ੍ਜ ਗਹਿਤਭਾਵਦਸ੍ਸਨਂ. ਨ ਇਤੋ ਭਿਯ੍ਯੋਤਿ ਅਨਵਸੇਸੇਤ੍ਵਾ ਗਹਿਤਭਾਵਦਸ੍ਸਨਂ. ਤੇਨਾਹ ‘‘ਸਬ੍ਬਮ੍ਪਿ ਦੁਕ੍ਖਸਚ੍ਚ’’ਨ੍ਤਿਆਦਿ. ਸਰਸਲਕ੍ਖਣਪਟਿਵੇਧੇਨਾਤਿ ਸਭਾਵਸਙ੍ਖਾਤਸ੍ਸ ਲਕ੍ਖਣਸ੍ਸ ਅਸਮ੍ਮੋਹਤੋ ਪਟਿਵਿਜ੍ਝਨੇਨ. ਅਸਮ੍ਮੋਹਪਟਿਵੇਧੋਤਿ ਚ ਯਥਾ ਤਸ੍ਮਿਂ ਞਾਣੇ ਪਵਤ੍ਤੇ ਪਚ੍ਛਾ ਦੁਕ੍ਖਸ੍ਸ ਸਰੂਪਾਦਿਪਰਿਚ੍ਛੇਦੇ ਸਮ੍ਮੋਹੋ ਨ ਹੋਤਿ, ਤਥਾ ਪਵਤ੍ਤਿ. ਤੇਨਾਹ ‘‘ਯਥਾਭੂਤਂ ਅਬ੍ਭਞ੍ਞਾਸਿ’’ਨ੍ਤਿ. ਯਂ ਠਾਨਂ ਪਤ੍ਵਾਤਿ ਯਂ ਨਿਬ੍ਬਾਨਂ ਮਗ੍ਗਸ੍ਸ ਆਰਮ੍ਮਣਪਚ੍ਚਯਟ੍ਠੇਨ ਕਾਰਣਭੂਤਂ ਆਗਮ੍ਮ. ਤਦੁਭਯਵਤੋ ਹਿ ਪੁਗ੍ਗਲਸ੍ਸ ਪਤ੍ਤਿ ਤਦੁਭਯਸ੍ਸ ਪਤ੍ਤੀਤਿ ਵੁਤ੍ਤਂ. ਪਤ੍ਵਾਤਿ ਵਾ ਪਾਪੁਣਨਹੇਤੁ. ਅਪ੍ਪਵਤ੍ਤਿਨ੍ਤਿ ਅਪ੍ਪਵਤ੍ਤਿਨਿਮਿਤ੍ਤਂ. ਤੇ ਵਾ ਨਪ੍ਪਵਤ੍ਤਨ੍ਤਿ ਏਤ੍ਥਾਤਿ ਅਪ੍ਪਵਤ੍ਤਿ, ਨਿਬ੍ਬਾਨਂ. ਤਸ੍ਸਾਤਿ ਦੁਕ੍ਖਨਿਰੋਧਸ੍ਸ. ਸਮ੍ਪਾਪਕਨ੍ਤਿ ਸਚ੍ਛਿਕਿਰਿਯਾਵਸੇਨ ਸਮ੍ਮਦੇਵ ਪਾਪਕਂ.

ਕਿਲੇਸਵਸੇਨਾਤਿ ਆਸਵਸਙ੍ਖਾਤਕਿਲੇਸਵਸੇਨ. ਯਸ੍ਮਾ ਆਸਵਾਨਂ ਦੁਕ੍ਖਸਚ੍ਚਪਰਿਯਾਯੋ ਤਪ੍ਪਰਿਯਾਪਨ੍ਨਤ੍ਤਾ, ਸੇਸਸਚ੍ਚਾਨਞ੍ਚ ਤਂਸਮੁਦਯਾਦਿਪਰਿਯਾਯੋ ਅਤ੍ਥਿ, ਤਸ੍ਮਾ ਵੁਤ੍ਤਂ. ‘‘ਪਰਿਯਾਯਤੋ’’ਤਿ. ਦਸ੍ਸੇਨ੍ਤੋ ਸਚ੍ਚਾਨੀਤਿ ਯੋਜਨਾ. ਆਸਵਾਨਂਯੇਵ ਚੇਤ੍ਥ ਗਹਣਂ ‘‘ਆਸਵਾਨਂ ਖਯਞਾਣਾਯਾ’’ਤਿ ਆਰਦ੍ਧਤ੍ਤਾ. ਤਥਾ ਹਿ ਆਸਵਵਿਮੁਤ੍ਤਿ ਸੀਸੇਨੇਵ ਸਬ੍ਬਸਂਕਿਲੇਸਵਿਮੁਤ੍ਤਿ ਵੁਤ੍ਤਾ. ‘‘ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਅਬ੍ਭਞ੍ਞਾਸਿ’’ਨ੍ਤਿਆਦਿਨਾ ਮਿਸ੍ਸਕਮਗ੍ਗੋ ਇਧ ਕਥਿਤੋਤਿ ‘‘ਸਹ ਵਿਪਸ੍ਸਨਾਯ ਕੋਟਿਪ੍ਪਤ੍ਤਂ ਮਗ੍ਗਂ ਕਥੇਤੀ’’ਤਿ ਵੁਤ੍ਤਂ. ਏਤ੍ਥ ਚ ਸਚ੍ਚਪਟਿਵੇਧਸ੍ਸ ਤਦਾ ਅਤੀਤਕਾਲਿਕਤ੍ਤਾ ‘‘ਯਥਾਭੂਤਂ ਅਬ੍ਭਞ੍ਞਾਸਿ’’ਨ੍ਤਿ ਵਤ੍ਵਾਪਿ ਅਭਿਸਮਯਕਾਲੇ ਤਸ੍ਸ ਪਚ੍ਚੁਪ੍ਪਨ੍ਨਤਂ ਉਪਾਦਾਯ ‘‘ਏਵਂ ਜਾਨਤੋ ਏਵਂ ਪਸ੍ਸਤੋ’’ਤਿ ਵਤ੍ਤਮਾਨਕਾਲੇਨ ਨਿਦ੍ਦੇਸੋ ਕਤੋ. ਸੋ ਚ ਕਾਮਂ ਮਗ੍ਗਕ੍ਖਣਤੋ ਪਰਂ ਯਾਵਜ੍ਜਤਨਾ ਅਤੀਤਕਾਲਿਕੋ ਏਵ, ਸਬ੍ਬਪਠਮਂ ਪਨਸ੍ਸ ਅਤੀਤਕਾਲਿਕਤ੍ਤਂ ਫਲਕ੍ਖਣੇਨ ਵੇਦਿਤਬ੍ਬਨ੍ਤਿ ਆਹ ‘‘ਵਿਮੁਚ੍ਚਿਤ੍ਥਾਤਿ ਇਮਿਨਾ ਫਲਕ੍ਖਣਂ ਦਸ੍ਸੇਤੀ’’ਤਿ. ਜਾਨਤੋ ਪਸ੍ਸਤੋਤਿ ਵਾ ਹੇਤੁਨਿਦ੍ਦੇਸੋਯਂ. ਜਾਨਨਹੇਤੁ ਦਸ੍ਸਨਹੇਤੁ ਕਾਮਾਸਵਾ ਚਿਤ੍ਤਂ ਵਿਮੁਚ੍ਚਿਤ੍ਥਾਤਿ ਯੋਜਨਾ. ਭਵਾਸਵਗ੍ਗਹਣੇਨੇਵ ਚੇਤ੍ਥ ਭਵਰਾਗਸ੍ਸ ਵਿਯ ਭਵਦਿਟ੍ਠਿਯਾਪਿ ਸਮਵਰੋਧੋਤਿ ਦਿਟ੍ਠਾਸਵਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ.

ਖੀਣਾਜਾਤੀਤਿਆਦੀਹਿ ਪਦੇਹਿ. ਤਸ੍ਸਾਤਿ ਪਚ੍ਚਵੇਕ੍ਖਣਞਾਣਸ੍ਸ. ਭੂਮੀਨ੍ਤਿ ਪਵਤ੍ਤਿਟ੍ਠਾਨਂ. ਨ ਤਾਵਸ੍ਸ ਅਤੀਤਾ ਜਾਤਿ ਖੀਣਾ ਮਗ੍ਗਭਾਵਨਾਯਾਤਿ ਅਧਿਪ੍ਪਾਯੋ. ਤਤ੍ਥ ਕਾਰਣਮਾਹ ‘‘ਪੁਬ੍ਬੇਵ ਖੀਣਤ੍ਤਾ’’ਤਿ. ਨ ਅਨਾਗਤਾ ਅਸ੍ਸਜਾਤਿ ਖੀਣਾਤਿ ਯੋਜਨਾ. ਨ ਅਨਾਗਤਾਤਿ ਚ ਅਨਾਗਤਤ੍ਤਸਾਮਞ੍ਞਂ ਗਹੇਤ੍ਵਾ ਲੇਸੇਨ ਚੋਦੇਤਿ. ਤੇਨਾਹ ‘‘ਅਨਾਗਤੇ ਵਾਯਾਮਾਭਾਵਤੋ’’ਤਿ, ਅਨਾਗਤਵਿਸੇਸੋ ਪਨੇਤ੍ਥ ਅਧਿਪ੍ਪੇਤੋ, ਤਸ੍ਸ ਚ ਖੇਪਨੇ ਵਾਯਾਮੋਪਿ ਲਬ੍ਭਤੇਵ. ਤੇਨਾਹ ‘‘ਯਾ ਪਨ ਮਗ੍ਗਸ੍ਸਾ’’ਤਿਆਦਿ. ਏਕਚਤੁਪਞ੍ਚਵੋਕਾਰਭਵੇਸੂਤਿ ਭਵਤ੍ਤਯਗ੍ਗਹਣਂ ਵੁਤ੍ਤਨਯੇਨ ਅਨਵਸੇਸਤੋ ਜਾਤਿਯਾ ਖੀਣਭਾਵਦਸ੍ਸਨਤ੍ਥਂ. ਤਨ੍ਤਿ ਯਥਾਵੁਤ੍ਤਂ ਜਾਤਿਂ. ਸੋਤਿ ਭਗਵਾ.

ਬ੍ਰਹ੍ਮਚਰਿਯਵਾਸੋ ਨਾਮ ਇਧ ਮਗ੍ਗਬ੍ਰਹ੍ਮਚਰਿਯਸ੍ਸ ਨਿਬ੍ਬਤ੍ਤਨਮੇਵਾਤਿ ਆਹ ‘‘ਨਿਟ੍ਠਿਤ’’ਨ੍ਤਿ. ਸਮ੍ਮਾਦਿਟ੍ਠਿਯਾ ਚਤੂਸੁ ਸਚ੍ਚੇਸੁ ਪਰਿਞ੍ਞਾਦਿਕਿਚ੍ਚਸਾਧਨਵਸੇਨ ਪਵਤ੍ਤਮਾਨਾਯ ਸਮ੍ਮਾ ਸਙ੍ਕਪ੍ਪਾਦੀਨਮ੍ਪਿ ਦੁਕ੍ਖਸਚ੍ਚੇ ਪਰਿਞ੍ਞਾਭਿਸਮਯਾਨੁਗੁਣਾ ਪਵਤ੍ਤਿ, ਇਤਰਸਚ੍ਚੇਸੁ ਚ ਨੇਸਂ ਪਹਾਨਾਭਿਸਮਯਾਦਿਵਸੇਨ ਪਵਤ੍ਤਿ ਪਾਕਟਾ ਏਵ. ਤੇਨ ਵੁਤ੍ਤਂ ‘‘ਚਤੂਹਿ ਮਗ੍ਗੇਹਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਵਸੇਨਾ’’ਤਿ. ਇਤ੍ਥਤ੍ਤਾਯਾਤਿ ਇਮੇ ਪਕਾਰਾ ਇਤ੍ਥਂ, ਤਬ੍ਭਾਵੋ ਇਤ੍ਥਤ੍ਤਂ, ਤਦਤ੍ਥਨ੍ਤਿ ਵੁਤ੍ਤਂ ਹੋਤਿ. ਤੇ ਪਨ ਪਕਾਰਾ ਅਰਿਯਮਗ੍ਗਬ੍ਯਾਪਾਰਭੂਤਾ ਪਰਿਞ੍ਞਾਦਯੋ ਇਧਾਧਿਪ੍ਪੇਤਾਤਿ ਆਹ ‘‘ਏਵਂਸੋਲ਼ਸਕਿਚ੍ਚਭਾਵਾਯਾ’’ਤਿ. ਤੇ ਹਿ ਮਗ੍ਗਂ ਪਚ੍ਚਵੇਕ੍ਖਤੋ ਮਗ੍ਗਾਨੁਭਾਵੇਨ ਪਾਕਟਾ ਹੁਤ੍ਵਾ ਉਪਟ੍ਠਹਨ੍ਤਿ, ਪਰਿਞ੍ਞਾਦੀਸੁ ਚ ਪਹਾਨਮੇਵ ਪਧਾਨਂ ਤਦਤ੍ਥਤ੍ਤਾ ਇਤਰੇਸਨ੍ਤਿ ਆਹ ‘‘ਕਿਲੇਸਕ੍ਖਯਾਯਵਾ’’ਤਿ. ਪਹੀਨਕਿਲੇਸਪਚ੍ਚਵੇਕ੍ਖਣਵਸੇਨ ਵਾ ਏਤਂ ਵੁਤ੍ਤਂ. ਇਤ੍ਥਤ੍ਤਾਯਾਤਿ ਨਿਸ੍ਸਕ੍ਕੇ ਸਮ੍ਪਦਾਨਵਚਨਨ੍ਤਿ ਆਹ ‘‘ਇਤ੍ਥਭਾਵਤੋ’’ਤਿ. ਅਪਰਂ ਅਨਾਗਤਂ. ਇਮੇ ਪਨ ਚਰਿਮਤ੍ਤਭਾਵਸਙ੍ਖਾਤਾ ਪਞ੍ਚਕ੍ਖਨ੍ਧਾ. ਪਰਿਞ੍ਞਾਤਾ ਤਿਟ੍ਠਨ੍ਤੀਤਿ ਏਤੇਨ ਤੇਸਂ ਅਪ੍ਪਤਿਟ੍ਠਤਂ ਦਸ੍ਸੇਤਿ. ਅਪਰਿਞ੍ਞਾਮੂਲਕਾ ਹਿ ਪਤਿਟ੍ਠਾ. ਯਥਾਹ ‘‘ਕਬਲ਼ੀਕਾਰੇ ਚੇ, ਭਿਕ੍ਖਵੇ, ਆਹਾਰੇ ਅਤ੍ਥਿ ਰਾਗੋ ਅਤ੍ਥਿ ਨਨ੍ਦੀ ਅਤ੍ਥਿ ਤਣ੍ਹਾ, ਪਤਿਟ੍ਠਿਤਂ ਤਤ੍ਥ ਵਿਞ੍ਞਾਣਂ ਵਿਰੂਲ਼੍ਹ’’ਨ੍ਤਿਆਦਿ (ਸਂ. ਨਿ. ੨.੬੪; ਮਹਾਨਿ. ੭; ਕਥਾ. ੨੯੬). ਤੇਨੇਵਾਹ ‘‘ਛਿਨ੍ਨਮੂਲਕਾ ਰੁਕ੍ਖਾ ਵਿਯਾ’’ਤਿਆਦਿ.

ਪਚ੍ਚਵੇਕ੍ਖਣਞਾਣਪਰਿਗ੍ਗਹਿਤਂ, ਨ ਪਠਮਦੁਤਿਯਞਾਣਦ੍ਵਯਾਧਿਗਮਂ ਵਿਯ ਕੇਵਲਨ੍ਤਿ ਅਧਿਪ੍ਪਾਯੋ. ਦਸ੍ਸੇਨ੍ਤੋ ਨਿਗਮਨਵਸੇਨਾਤਿ ਅਧਿਪ੍ਪਾਯੋ. ਸਰੂਪਤੋ ਹਿ ਤਂ ਪੁਬ੍ਬੇ ਦਸ੍ਸਿਤਮੇਵਾਤਿ. ਪੁਬ੍ਬੇਨਿਵਾਸਞਾਣੇਨ ਅਤੀਤਾਰਮ੍ਮਣਸਭਾਗਤਾਯ ਤਬ੍ਭਾਵੀਭਾਵਤੋ ਚ ਅਤੀਤਂਸਞਾਣਂ ਸਙ੍ਗਹੇਤ੍ਵਾਤਿ ਯੋਜਨਾ. ਤਤ੍ਥ ਅਤੀਤਂਸਞਾਣਨ੍ਤਿ ਅਤੀਤਖਨ੍ਧਾਯਤਨਧਾਤੁਸਙ੍ਖਾਤੇ ਅਤੀਤਕੋਟ੍ਠਾਸੇ ਅਪ੍ਪਟਿਹਤਂ ਞਾਣਂ. ਦਿਬ੍ਬਚਕ੍ਖੁਨਾਤਿ ਸਪਰਿਭਣ੍ਡੇਨ ਦਿਬ੍ਬਚਕ੍ਖੁਞਾਣੇਨ. ਪਚ੍ਚੁਪ੍ਪਨ੍ਨਂਸੋ ਚ ਅਨਾਗਤਂਸੋ ਚ ਪਚ੍ਚੁਪ੍ਪਨ੍ਨਾਨਾਗਤਂਸਂ, ਤਤ੍ਥ ਞਾਣਂ ਪਚ੍ਚੁਪ੍ਪਨ੍ਨਾਨਾਗਤਂਸਞਾਣਂ. ਸਕਲਲੋਕਿਯਲੋਕੁਤ੍ਤਰਗੁਣਨ੍ਤਿ ਏਤੇਨ ਸਬ੍ਬਂ ਲੋਕਂ ਉਤ੍ਤਰਿਤ੍ਵਾ ਅਭਿਭੁਯ੍ਯ ਠਿਤਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ ਵਿਯ ਸੇਸਾਸਾਧਾਰਣਞਾਣਸ੍ਸ ਬਲਞਾਣਆਵੇਣਿਕਬੁਦ੍ਧਧਮ੍ਮਾਦੀਨਮ੍ਪਿ ਅਨਞ੍ਞਸਾਧਾਰਣਾਨਂ ਬੁਦ੍ਧਗੁਣਾਨਂ ਸਙ੍ਗਹੋ ਵੇਦਿਤਬ੍ਬੋ. ਤੇਨਾਹ ‘‘ਸਬ੍ਬੇਪਿ ਸਬ੍ਬਞ੍ਞੁਗੁਣੇ ਸਙ੍ਗਹੇਤ੍ਵਾ’’ਤਿ.

ਆਸਵਕ੍ਖਯਞਾਣਕਥਾਵਣ੍ਣਨਾ ਨਿਟ੍ਠਿਤਾ.

ਅਰਞ੍ਞਵਾਸਕਾਰਣਵਣ੍ਣਨਾ

੫੫. ਸਿਯਾ ਖੋ ਪਨ ਤੇ ਬ੍ਰਾਹ੍ਮਣਾਤਿ ਏਤ੍ਥ ਸਿਯਾਤਿ ‘‘ਅਪ੍ਪੇਵਾ’’ਤਿ ਇਮਿਨਾ ਸਮਾਨਤ੍ਥੋ ਨਿਪਾਤੋ, ਤਸ੍ਮਾ ‘ਬ੍ਰਾਹ੍ਮਣ, ਅਪ੍ਪੇਵ ਖੋ ਪਨ ਤੇ ਏਵਮਸ੍ਸਾ’ਤਿ ਅਤ੍ਥੋ. ਯਂ ਪਨ ਅਟ੍ਠਕਥਾਯਂ ‘‘ਕਦਾਚੀ’’ਤਿ ਵੁਤ੍ਤਂ, ਤਮ੍ਪਿ ਇਮਮੇਵਤ੍ਥਂ ਸਨ੍ਧਾਯ ਵੁਤ੍ਤਂ ਅਕਾਰਣਂ ਬ੍ਰਾਹ੍ਮਣੇਨ ਪਰਿਕਪ੍ਪਿਤਮਤ੍ਥਂ ਪਟਿਪਕ੍ਖਿਪਿਤ੍ਵਾ ਅਤ੍ਤਨੋ ਅਧਿਪ੍ਪੇਤਂ ਕਾਰਣਂ ਦਸ੍ਸੇਨ੍ਤੋ. ਅਤ੍ਥੋਵ ਫਲਂ ਤਦਧੀਨਵੁਤ੍ਤਿਤਾਯ ਵਸੋ ਏਤਸ੍ਸਾਤਿ ਅਤ੍ਥਵਸੋ, ਹੇਤੂਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਤ੍ਤਨੋ ਚ ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਏਤੇਨ ਸਤ੍ਥਾ ਅਤ੍ਤਨੋ ਵਿਵੇਕਾਭਿਰਤਿਂ ਪਕਾਸੇਤੀਤਿ ਦਸ੍ਸੇਨ੍ਤੋ ‘‘ਦਿਟ੍ਠਧਮ੍ਮੋ ਨਾਮਾ’’ਤਿਆਦਿਮਾਹ. ਤਤ੍ਥ ਇਰਿਯਾਪਥਵਿਹਾਰਾਨਨ੍ਤਿ ਇਰਿਯਾਪਥਪਵਤ੍ਤੀਨਂ. ਤਪ੍ਪਵਤ੍ਤਿਯੋ ਹਿ ਏਕਸ੍ਮਿਂ ਇਰਿਯਾਪਥੇ ਉਪ੍ਪਨ੍ਨਦੁਕ੍ਖਂ ਅਞ੍ਞੇਨ ਇਰਿਯਾਪਥੇਨ ਵਿਚ੍ਛਿਨ੍ਦਿਤ੍ਵਾ ਹਰਣਤੋ ਵਿਹਾਰਾਤਿ ਵੁਚ੍ਚਨ੍ਤਿ. ਪਚ੍ਛਿਮਞ੍ਚ ਜਨਤਂ ਅਨੁਕਮ੍ਪਮਾਨੋਤਿ ਏਤੇਨ ਯੋ ਆਦਿਤੋ ਬ੍ਰਾਹ੍ਮਣੇਨ ‘‘ਭਵਂ ਤੇਸਂ ਗੋਤਮੋ ਪੁਬ੍ਬਙ੍ਗਮੋ…ਪੇ… ਦਿਟ੍ਠਾਨੁਗਤਿਂ ਆਪਜ੍ਜਤੀ’’ਤਿ ਵੁਤ੍ਤੋ, ਯੋ ਚ ਤਥਾ ‘‘ਏਵਮੇਤਂ ਬ੍ਰਾਹ੍ਮਣਾ’’ਤਿਆਦਿਨਾ ਅਤ੍ਤਨਾ ਸਮ੍ਪਟਿਚ੍ਛਿਤੋ, ਤਮੇਵ ਅਤ੍ਥਂ ਨਿਗਮਨਵਸੇਨ ਦਸ੍ਸੇਨ੍ਤੋ ਯਥਾਨੁਸਨ੍ਧਿਨਾਵ ਸਤ੍ਥਾ ਦੇਸਨਂ ਨਿਟ੍ਠਾਪੇਸਿ.

ਅਰਞ੍ਞਵਾਸਕਾਰਣਵਣ੍ਣਨਾ ਨਿਟ੍ਠਿਤਾ.

ਦੇਸਨਾਨੁਮੋਦਨਾਵਣ੍ਣਨਾ

੫੬. ਏਵਂ ਨਿਟ੍ਠਾਪਿਤਾਯ ਦੇਸਨਾਯ ਬ੍ਰਾਹ੍ਮਣੋ ਤਤ੍ਥ ਭਗਵਤਿ ਪਸਾਦਂ ਪਵੇਦੇਨ੍ਤੋ ‘‘ਅਭਿਕ੍ਕਨ੍ਤ’’ਨ੍ਤਿਆਦਿਮਾਹ. ਅਭਿਕ੍ਕਨ੍ਤਾਤਿ (ਸਾਰਤ੍ਥ. ਟੀ. ੧.੧੫.ਦੇਸਨਾਨੁਮੋਦਨਕਥਾ; ਦੀ. ਨਿ. ਟੀ. ੧.੨੫੦; ਸਂ. ਨਿ. ਟੀ. ੧.੧.੧; ਅ. ਨਿ. ਟੀ. ੨.੨.੧੬) ਅਤਿਕ੍ਕਨ੍ਤਾ, ਵਿਗਤਾਤਿ ਅਤ੍ਥੋਤਿ ਆਹ ‘‘ਖਯੇ ਦਿਸ੍ਸਤੀ’’ਤਿ. ਤੇਨੇਵ ਹਿ ‘‘ਨਿਕ੍ਖਨ੍ਤੋ ਪਠਮੋ ਯਾਮੋ’’ਤਿ ਵੁਤ੍ਤਂ. ਅਭਿਕ੍ਕਨ੍ਤਤਰੋਤਿ ਅਤਿਵਿਯ ਕਨ੍ਤਤਰੋ ਮਨੋਰਮੋ. ਤਾਦਿਸੋ ਚ ਸੁਨ੍ਦਰੋ ਭਦ੍ਦਕੋ ਨਾਮ ਹੋਤੀਤਿ ਆਹ ‘‘ਸੁਨ੍ਦਰੇ ਦਿਸ੍ਸਤੀ’’ਤਿ.

ਕੋਤਿ ਦੇਵਨਾਗਯਕ੍ਖਗਨ੍ਧਬ੍ਬਾਦੀਸੁ ਕੋ ਕਤਮੋ. ਮੇਤਿ ਮਮ. ਪਾਦਾਨੀਤਿ ਪਾਦੇ. ਇਦ੍ਧਿਯਾਤਿ ਇਮਾਯ ਏਵਰੂਪਾਯ ਦੇਵਿਦ੍ਧਿਯਾ. ਯਸਸਾਤਿ ਇਮਿਨਾ ਏਦਿਸੇਨ ਪਰਿਵਾਰੇਨ ਪਰਿਜਨੇਨ. ਜਲਨ੍ਤਿ ਵਿਜ੍ਜੋਤਮਾਨੋ. ਅਭਿਕ੍ਕਨ੍ਤੇਨਾਤਿ ਅਤਿਵਿਯ ਕਨ੍ਤੇਨ ਕਮਨੀਯੇਨ ਅਭਿਰੂਪੇਨ. ਵਣ੍ਣੇਨਾਤਿ ਛਵਿਵਣ੍ਣੇਨ ਸਰੀਰਵਣ੍ਣਨਿਭਾਯ. ਸਬ੍ਬਾ ਓਭਾਸਯਂ ਦਿਸਾਤਿ ਦਸਪਿ ਦਿਸਾ ਓਭਾਸੇਨ੍ਤੋ ਪਭਾਸੇਨ੍ਤੋ, ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਏਕੋਭਾਸਂ ਏਕਾਲੋਕਂ ਕਰੋਨ੍ਤੋਤਿ ਗਾਥਾਯ ਅਤ੍ਥੋ. ਅਭਿਰੂਪੇਤਿ ਉਲ਼ਾਰਰੂਪੇ ਸਮ੍ਪਨ੍ਨਰੂਪੇ.

‘‘ਚੋਰੋ ਚੋਰੋ, ਸਪ੍ਪੋ ਸਪ੍ਪੋ’’ਤਿਆਦੀਸੁ ਭਯੇ ਆਮੇਡਿਤਂ. ‘‘ਵਿਜ੍ਝ ਵਿਜ੍ਝ, ਪਹਰ ਪਹਰਾ’’ਤਿਆਦੀਸੁ ਕੋਧੇ, ‘‘ਸਾਧੁ ਸਾਧੂਤਿਆਦੀਸੁ (ਮ. ਨਿ. ੧.੩੨੭; ਸਂ. ਨਿ. ੨.੧੨੭; ੩.੩੫; ੫.੧੦੮੫) ਪਸਂਸਾਯਂ, ‘‘ਗਚ੍ਛ ਗਚ੍ਛ, ਲੁਨਾਹਿ ਲੁਨਾਹੀ’’ਤਿਆਦੀਸੁ ਤੁਰਿਤੇ, ‘‘ਆਗਚ੍ਛ ਆਗਚ੍ਛਾ’’ਤਿਆਦੀਸੁ ਕੋਤੂਹਲੇ, ‘‘ਬੁਦ੍ਧੋ ਬੁਦ੍ਧੋਤਿ ਚਿਨ੍ਤੇਨ੍ਤੋ’’ਤਿਆਦੀਸੁ (ਬੁ. ਵਂ. ੨.੪੪) ਅਚ੍ਛਰੇ, ‘‘ਅਭਿਕ੍ਕਮਥਾਯਸ੍ਮਨ੍ਤੋ, ਅਭਿਕ੍ਕਮਥਾਯਸ੍ਮਨ੍ਤੋ’’ਤਿਆਦੀਸੁ (ਦੀ. ਨਿ. ੩.੨੦; ਅ. ਨਿ. ੯.੧੧) ਹਾਸੇ, ‘‘ਕਹਂ ਏਕਪੁਤ੍ਤਕ, ਕਹਂ ਏਕਪੁਤ੍ਤਕਾ’’ਤਿਆਦੀਸੁ (ਮ. ਨਿ. ੨.੩੫੩; ਸਂ. ਨਿ. ੨.੬੩) ਸੋਕੇ, ‘‘ਅਹੋ ਸੁਖਂ ਅਹੋ ਸੁਖ’’ਨ੍ਤਿਆਦੀਸੁ (ਉਦਾ. ੨੦; ਦੀ. ਨਿ. ੩.੩੦੫; ਚੂਲ਼ਵ. ੩੩੨) ਪਸਾਦੇ. ਚ-ਸਦ੍ਦੋ ਅਵੁਤ੍ਤਸਮੁਚ੍ਚਯਤ੍ਥੋ. ਤੇਨ ਗਰਹਾਅਸਮ੍ਮਾਨਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਤਤ੍ਥ ‘‘ਪਾਪੋ ਪਾਪੋ’’ਤਿਆਦੀਸੁ ਗਰਹਾਯਂ. ‘‘ਅਭਿਰੂਪਕ ਅਭਿਰੂਪਕਾ’’ਤਿਆਦੀਸੁ ਅਸਮ੍ਮਾਨੇ ਦਟ੍ਠਬ੍ਬਂ.

ਨਯਿਦਂ ਆਮੇਡਿਤਵਸੇਨ ਦ੍ਵਿਕ੍ਖਤ੍ਤੁਂ ਵੁਤ੍ਤਂ, ਅਥ ਖੋ ਅਤ੍ਥਦ੍ਵਯਵਸੇਨਾਤਿ ਦਸ੍ਸੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਅਭਿਕ੍ਕਨ੍ਤਨ੍ਤਿ ਵਚਨਂ ਅਪੇਕ੍ਖਿਤ੍ਵਾ ਨਪੁਂਸਕਲਿਙ੍ਗਵਸੇਨ ਵੁਤ੍ਤਂ, ਤਂ ਪਨ ਭਗਵਤੋ ਵਚਨਂ ਧਮ੍ਮਸ੍ਸ ਦੇਸਨਾਤਿ ਕਤ੍ਵਾ ਤਥਾ ਵੁਤ੍ਤਂ. ਅਤ੍ਥਮਤ੍ਤਦਸ੍ਸਨਂ ਵਾ ਏਤਂ, ਤਸ੍ਮਾ ਅਤ੍ਥਵਸੇਨ ਲਿਙ੍ਗਵਿਭਤ੍ਤਿਵਿਪਰਿਣਾਮੋ ਵੇਦਿਤਬ੍ਬੋ. ਦੁਤਿਯਪਦੇਪਿ ਏਸੇਵ ਨਯੋ. ਦੋਸਨਾਸਨਤੋਤਿ ਰਾਗਾਦਿਕਿਲੇਸਦੋਸਵਿਧਮਨਤੋ, ਗੁਣਾਧਿਗਮਨਤੋਤਿ ਸੀਲਾਦਿਗੁਣਾਨਂ ਸਮ੍ਪਾਪਨਤੋ. ਯੇ ਗੁਣੇ ਦੇਸਨਾ ਅਧਿਗਮੇਤਿ, ਤੇਸੁ ਪਧਾਨਭੂਤਾ ਦਸ੍ਸੇਤਬ੍ਬਾਤਿ ਤੇ ਪਧਾਨਭੂਤੇ ਤਾਵ ਦਸ੍ਸੇਤੁਂ ‘‘ਸਦ੍ਧਾਜਨਨਤੋ ਪਞ੍ਞਾਜਨਨਤੋ’’ਤਿ ਵੁਤ੍ਤਂ. ਸਦ੍ਧਾਪਮੁਖਾ ਹਿ ਲੋਕਿਯਾ ਗੁਣਾ, ਪਞ੍ਞਾਪਮੁਖਾ ਲੋਕੁਤ੍ਤਰਾ. ਸੀਲਾਦਿਅਤ੍ਥਸਮ੍ਪਤ੍ਤਿਯਾ ਸਾਤ੍ਥਤੋ, ਸਭਾਵਨਿਰੁਤ੍ਤਿਸਮ੍ਪਤ੍ਤਿਯਾ ਸਬ੍ਯਞ੍ਜਨਤੋ. ਸੁਵਿਞ੍ਞੇਯ੍ਯਸਦ੍ਦਪਯੋਗਤਾਯ ਉਤ੍ਤਾਨਪਦਤੋ, ਸਣ੍ਹਸੁਖੁਮਭਾਵੇਨ ਦੁਬ੍ਬਿਞ੍ਞੇਯ੍ਯਤ੍ਥਤਾਯ ਗਮ੍ਭੀਰਤ੍ਥਤੋ. ਸਿਨਿਦ੍ਧਮੁਦੁਮਧੁਰਸਦ੍ਦਪਯੋਗਤਾਯ ਕਣ੍ਣਸੁਖਤੋ, ਵਿਪੁਲਵਿਸੁਦ੍ਧਪੇਮਨੀਯਤ੍ਥਤਾਯ ਹਦਯਙ੍ਗਮਤੋ. ਮਾਨਾਤਿਮਾਨਵਿਧਮਨੇਨ ਅਨਤ੍ਤੁਕ੍ਕਂਸਨਤੋ, ਥਮ੍ਭਸਾਰਮ੍ਭਮਦ੍ਦਨੇਨ ਅਪਰਵਮ੍ਭਨਤੋ. ਹਿਤਾਧਿਪ੍ਪਾਯਪਵਤ੍ਤਿਯਾ ਪਰੇਸਂ ਰਾਗਪਰਿਲ਼ਾਹਾਦਿਵੂਪਸਮਨੇਨ ਚ ਕਰੁਣਾਸੀਤਲਤੋ, ਕਿਲੇਸਨ੍ਧਕਾਰਵਿਧਮਨੇਨ ਪਞ੍ਞਾਵਦਾਤਤੋ. ਕਰਵੀਕਰੁਤਮਞ੍ਜੁਤਾਯ ਆਪਾਥਰਮਣੀਯਤੋ, ਪੁਬ੍ਬਾਪਰਾਵਿਰੁਦ੍ਧਸੁਵਿਸੁਦ੍ਧਤ੍ਥਤਾਯ ਵਿਮਦ੍ਦਕ੍ਖਮਤੋ. ਆਪਾਥਰਮਣੀਯਤਾਯ ਏਵ ਸੁਯ੍ਯਮਾਨਸੁਖਤੋ, ਵਿਮਦ੍ਦਕ੍ਖਮਤਾਯ ਹਿਤਜ੍ਝਾਸਯਪ੍ਪਵਤ੍ਤਿਤਤਾਯ ਚ ਵੀਮਂਸਿਯਮਾਨਹਿਤਤੋ. ਏਵਮਾਦੀਹੀਤਿ ਆਦਿਸਦ੍ਦੇਨ ਸਂਸਾਰਚਕ੍ਕਨਿਵਤ੍ਤਨਤੋ, ਸਦ੍ਧਮ੍ਮਚਕ੍ਕਪ੍ਪਵਤ੍ਤਨਤੋ, ਮਿਚ੍ਛਾਵਾਦਵਿਧਮਨਤੋ, ਸਮ੍ਮਾਵਾਦਪਤਿਟ੍ਠਾਪਨਤੋ, ਅਕੁਸਲਮੂਲਸਮੁਦ੍ਧਰਣਤੋ, ਕੁਸਲਮੂਲਸਂਰੋਪਨਤੋ, ਅਪਾਯਦ੍ਵਾਰਪਿਧਾਨਤੋ, ਸਗ੍ਗਮਗ੍ਗਦ੍ਵਾਰਵਿਵਰਣਤੋ, ਪਰਿਯੁਟ੍ਠਾਨਵੂਪਸਮਨਤੋ, ਅਨੁਸਯਸਮੁਗ੍ਘਾਤਨਤੋਤਿ ਏਵਮਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਅਧੋਮੁਖਟ੍ਠਪਿਤਨ੍ਤਿ ਕੇਨਚਿ ਅਧੋਮੁਖਂ ਠਪਿਤਂ. ਹੇਟ੍ਠਾਮੁਖਜਾਤਨ੍ਤਿ ਸਭਾਵੇਨੇਵ ਹੇਟ੍ਠਾਮੁਖਜਾਤਂ. ਉਗ੍ਘਾਟੇਯ੍ਯਾਤਿ ਵਿਵਟਂ ਕਰੇਯ੍ਯ. ਹਤ੍ਥੇ ਗਹੇਤ੍ਵਾਤਿ ‘‘ਪੁਰਤ੍ਥਾਭਿਮੁਖੋ, ਉਤ੍ਤਰਾਭਿਮੁਖੋ ਵਾ ਗਚ੍ਛਾ’’ਤਿਆਦੀਨਿ ਅਵਤ੍ਵਾ ਹਤ੍ਥੇ ਗਹੇਤ੍ਵਾ ‘‘ਨਿਸ੍ਸਨ੍ਦੇਹਂ ਏਸ ਮਗ੍ਗੋ, ਏਵਂ ਗਚ੍ਛਾ’’ਤਿ ਵਦੇਯ੍ਯ. ਕਾਲ਼ਪਕ੍ਖਚਾਤੁਦ੍ਦਸੀਤਿ ਕਾਲ਼ਪਕ੍ਖੇ ਚਾਤੁਦ੍ਦਸੀ.

ਨਿਕੁਜ੍ਜਿਤਂ ਆਧੇਯ੍ਯਸ੍ਸ ਅਨਾਧਾਰਭੂਤਂ ਭਾਜਨਂ ਆਧਾਰਭਾਵਾਪਾਦਨਵਸੇਨ ਉਕ੍ਕੁਜ੍ਜੇਯ੍ਯ. ਹੇਟ੍ਠਾਮੁਖਜਾਤਤਾਯ ਸਦ੍ਧਮ੍ਮਵਿਮੁਖਂ, ਅਧੋਮੁਖਟ੍ਠਪਿਤਤਾਯ ਅਸਦ੍ਧਮ੍ਮੇ ਪਤਿਤਨ੍ਤਿ ਏਵਂ ਪਦਦ੍ਵਯਂ ਯਥਾਰਹਂ ਯੋਜੇਤਬ੍ਬਂ, ਨ ਯਥਾਸਙ੍ਖ੍ਯਂ. ਕਾਮਂ ਕਾਮਚ੍ਛਨ੍ਦਾਦਯੋਪਿ ਪਟਿਚ੍ਛਾਦਕਾ, ਮਿਚ੍ਛਾਦਿਟ੍ਠਿ ਪਨ ਸਵਿਸੇਸਂ ਪਟਿਚ੍ਛਾਦਿਕਾਤਿ ਆਹ ‘‘ਮਿਚ੍ਛਾਦਿਟ੍ਠਿਗਹਨਪਟਿਚ੍ਛਨ੍ਨ’’ਨ੍ਤਿ. ਤੇਨਾਹ ਭਗਵਾ ‘‘ਮਿਚ੍ਛਾਦਿਟ੍ਠਿਪਰਮਾਹਂ, ਭਿਕ੍ਖਵੇ, ਵਜ੍ਜਂ ਵਦਾਮੀ’’ਤਿ (ਅ. ਨਿ. ੧.੩੧੦). ਸਬ੍ਬੋ ਅਪਾਯਗਾਮਿਮਗ੍ਗੋ ਕੁਮ੍ਮਗ੍ਗੋ ‘‘ਕੁਚ੍ਛਿਤੋ ਮਗ੍ਗੋ’’ਤਿ ਕਤ੍ਵਾ. ਸਮ੍ਮਾਦਿਟ੍ਠਿਆਦੀਨਂ ਉਜੁਪਟਿਪਕ੍ਖਤਾਯ ਮਿਚ੍ਛਾਦਿਟ੍ਠਿਆਦਯੋ ਅਟ੍ਠ ਮਿਚ੍ਛਤ੍ਤਧਮ੍ਮਾ ਮਿਚ੍ਛਾਮਗ੍ਗੋ. ਤੇਨੇਵ ਹਿ ਤਦੁਭਯਪਟਿਪਕ੍ਖਤਂ ਸਨ੍ਧਾਯ ‘‘ਸਗ੍ਗਮੋਕ੍ਖਮਗ੍ਗਂ ਆਚਿਕ੍ਖਨ੍ਤੇਨਾ’’ਤਿ ਵੁਤ੍ਤਂ. ਸਪ੍ਪਿਆਦਿਸਨ੍ਨਿਸ੍ਸਯੋ ਪਦੀਪੋ ਨ ਤਥਾ ਉਜ੍ਜਲੋ, ਯਥਾ ਤੇਲਸਨ੍ਨਿਸ੍ਸਯੋਤਿ ਤੇਲਪਜ੍ਜੋਤਗ੍ਗਹਣਂ. ਏਤੇਹਿ ਪਰਿਯਾਯੇਹੀਤਿ ਏਤੇਹਿ ਨਿਕੁਜ੍ਜਿਤੁਕ੍ਕੁਜ੍ਜਨਪਟਿਚ੍ਛਨ੍ਨਵਿਵਰਣਾਦਿਉਪਮੋਪਮਿਤਬ੍ਬਪਕਾਰੇਹਿ, ਏਤੇਹਿ ਵਾ ਯਥਾਵੁਤ੍ਤੇਹਿ ਸੋਲ਼ਸਾਰਮ੍ਮਣਪਰਿਗ੍ਗਹਅਸਮ੍ਮੋਹਵਿਹਾਰਦਿਬ੍ਬਵਿਹਾਰਵਿਭਾਵਨਪਰਿਯਾਯੇਹਿ ਵਿਜ੍ਜਾਤ੍ਤਯਵਿਭਾਵਨਾਪਦੇਸੇਨ ਅਤ੍ਤਨੋ ਸਬ੍ਬਞ੍ਞੁਗੁਣਵਿਭਾਵਨਪਰਿਯਾਯੇਹਿ ਚ. ਤੇਨਾਹ ‘‘ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ’’ਤਿ.

ਦੇਸਨਾਨੁਮੋਦਨਾਵਣ੍ਣਨਾ ਨਿਟ੍ਠਿਤਾ.

ਪਸਨ੍ਨਕਾਰਵਣ੍ਣਨਾ

ਪਸਨ੍ਨਕਾਰਨ੍ਤਿ ਪਸਨ੍ਨੇਹਿ ਕਾਤਬ੍ਬਂ ਸਕ੍ਕਾਰਂ. ਸਰਣਨ੍ਤਿ ਪਟਿਸਰਣਂ. ਤੇਨਾਹ ‘‘ਪਰਾਯਣ’’ਨ੍ਤਿ. ਪਰਾਯਣਭਾਵੋ ਚ ਅਨਤ੍ਥਨਿਸੇਧਨੇਨ ਅਤ੍ਥਸਮ੍ਪਟਿਪਾਦਨੇਨ ਚ ਹੋਤੀਤਿ ਆਹ ‘‘ਅਘਸ੍ਸ ਤਾਤਾ ਹਿਤਸ੍ਸ ਚ ਵਿਧਾਤਾ’’ਤਿ. ਅਘਸ੍ਸਾਤਿ ਦੁਕ੍ਖਤੋਤਿ ਵਦਨ੍ਤਿ, ਪਾਪਤੋਤਿ ਪਨ ਯੁਤ੍ਤਂ. ਨਿਸ੍ਸਕ੍ਕੇ ਚੇਤਂ ਸਾਮਿਵਚਨਂ. ਏਤ੍ਥ ਚ ਨਾਯਂ ਗਮਿ-ਸਦ੍ਦੋ ਨੀ-ਸਦ੍ਦਾਦਯੋ ਵਿਯ ਦ੍ਵਿਕਮ੍ਮਕੋ, ਤਸ੍ਮਾ ਯਥਾ ‘‘ਅਜਂ ਗਾਮਂ ਨੇਤੀ’’ਤਿ ਵੁਚ੍ਚਤਿ, ਏਵਂ ‘‘ਗੋਤਮਂ ਸਰਣਂ ਗਚ੍ਛਾਮੀ’’ਤਿ ਵਤ੍ਤੁਂ ਨ ਸਕ੍ਕਾ, ‘‘ਸਰਣਨ੍ਤਿ ਗਚ੍ਛਾਮੀ’’ਤਿ ਪਨ ਵਤ੍ਤਬ੍ਬਂ. ਇਤਿ-ਸਦ੍ਦੋ ਚੇਤ੍ਥ ਲੁਤ੍ਤਨਿਦ੍ਦਿਟ੍ਠੋ, ਤਸ੍ਸ ਚਾਯਮਤ੍ਥੋ – ਗਮਨਞ੍ਚ ਤਦਧਿਪ੍ਪਾਯੇਨ ਭਜਨਂ, ਤਥਾ ਜਾਨਨਂ ਵਾਤਿ ਦਸ੍ਸੇਨ੍ਤੋ ‘‘ਇਤਿ ਇਮਿਨਾ ਅਧਿਪ੍ਪਾਯੇਨਾ’’ਤਿਆਦਿਮਾਹ. ਤਤ੍ਥ ਭਜਾਮੀਤਿਆਦੀਸੁ ਪੁਰਿਮਸ੍ਸ ਪੁਰਿਮਸ੍ਸ ਪਚ੍ਛਿਮਂ ਪਚ੍ਛਿਮਂ ਅਤ੍ਥਵਚਨਂ. ਭਜਨਂ ਵਾ ਸਰਣਾਧਿਪ੍ਪਾਯੇਨ ਉਪਸਙ੍ਕਮਨਂ, ਸੇਵਨਂ ਸਨ੍ਤਿਕਾਵਚਰਤਾ, ਪਯਿਰੁਪਾਸਨਂ ਵਤ੍ਤਪਟਿਵਤ੍ਤਕਰਣੇਨ ਉਪਟ੍ਠਾਨਨ੍ਤਿ ਏਵਂ ਸਬ੍ਬਥਾਪਿ ਅਨਞ੍ਞਸਰਣਤਂਯੇਵ ਦੀਪੇਤਿ. ‘‘ਗਚ੍ਛਾਮੀ’’ਤਿ ਪਦਸ੍ਸ ਕਥਂ ‘‘ਬੁਜ੍ਝਾਮੀ’’ਤਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਯੇਸਞ੍ਹੀ’’ਤਿਆਦਿ.

ਅਧਿਗਤਮਗ੍ਗੇ,ਸਚ੍ਛਿਕਤਨਿਰੋਧੇਤਿ ਪਦਦ੍ਵਯੇਨਪਿ ਫਲਟ੍ਠਾ ਏਵ ਦਸ੍ਸਿਤਾ, ਨ ਮਗ੍ਗਟ੍ਠਾਤਿ ਤੇ ਦਸ੍ਸੇਨ੍ਤੋ ‘‘ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚਾ’’ਤਿ ਆਹ. ਨਨੁ ਚ ਕਲ੍ਯਾਣਪੁਥੁਜ੍ਜਨੋਪਿ ਯਥਾਨੁਸਿਟ੍ਠਂ ਪਟਿਪਜ੍ਜਤੀਤਿ ਵੁਚ੍ਚਤੀਤਿ? ਕਿਞ੍ਚਾਪਿ ਵੁਚ੍ਚਤਿ, ਨਿਪ੍ਪਰਿਯਾਯੇਨ ਪਨ ਮਗ੍ਗਟ੍ਠਾ ਏਵ ਤਥਾ ਵਤ੍ਤਬ੍ਬਾ, ਨ ਇਤਰੇ ਨਿਯਾਮੋਕ੍ਕਮਨਾਭਾਵਤੋ. ਤਥਾ ਹਿ ਤੇ ਏਵ ‘‘ਅਪਾਯੇਸੁ ਅਪਤਮਾਨੇ ਧਾਰੇਤੀ’’ਤਿ ਵੁਤ੍ਤਾ. ਸਮ੍ਮਤ੍ਤਨਿਯਾਮੋਕ੍ਕਮਨੇਨ ਹਿ ਅਪਾਯਵਿਨਿਮੁਤ੍ਤਿਸਮ੍ਭਵੋ. ਅਕ੍ਖਾਯਤੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋ ਵਾ. ਤੇਨ ‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ ਸੁਤ੍ਤਪਦਂ (ਅ. ਨਿ. ੪.੩੪; ਇਤਿਵੁ. ੯੦) ਸਙ੍ਗਣ੍ਹਾਤਿ, ਵਿਤ੍ਥਾਰੋਤਿ ਵਾ ਇਮਿਨਾ. ਏਤ੍ਥ ਚ ਅਰਿਯਮਗ੍ਗੋ ਨਿਯ੍ਯਾਨਿਕਤਾਯ, ਨਿਬ੍ਬਾਨਂ ਤਸ੍ਸ ਤਦਤ੍ਥਸਿਦ੍ਧਿਹੇਤੁਤਾਯਾਤਿ ਉਭਯਮੇਵੇਤ੍ਥ ਨਿਪ੍ਪਰਿਯਾਯੇਨ ਧਮ੍ਮੋਤਿ ਵੁਤ੍ਤੋ. ਨਿਬ੍ਬਾਨਞ੍ਹਿ ਆਰਮ੍ਮਣਪਚ੍ਚਯਭੂਤਂ ਲਭਿਤ੍ਵਾ ਅਰਿਯਮਗ੍ਗਸ੍ਸ ਤਦਤ੍ਥਸਿਦ੍ਧਿ, ਅਰਿਯਫਲਾਨਂ ‘‘ਯਸ੍ਮਾ ਤਾਯ ਸਦ੍ਧਾਯ ਅਵੂਪਸਨ੍ਤਾਯਾ’’ਤਿਆਦਿਵਚਨਤੋ ਮਗ੍ਗੇਨ ਸਮੁਚ੍ਛਿਨ੍ਨਾਨਂ ਕਿਲੇਸਾਨਂ ਪਟਿਪ੍ਪਸ੍ਸਦ੍ਧਿਪਹਾਨਕਿਚ੍ਚਤਾਯ ਨਿਯ੍ਯਾਨਾਨੁਗੁਣਤਾਯ ਨਿਯ੍ਯਾਨਪਰਿਯੋਸਾਨਤਾਯ ਚ. ਪਰਿਯਤ੍ਤਿਧਮ੍ਮਸ੍ਸ ਪਨ ਨਿਯ੍ਯਾਨਧਮ੍ਮਸਮਧਿਗਮਹੇਤੁਤਾਯਾਤਿ ਇਮਿਨਾ ਪਰਿਯਾਯੇਨ ਧਮ੍ਮਭਾਵੋ ਲਬ੍ਭਤਿ ਏਵ, ਸ੍ਵਾਯਮਤ੍ਥੋ ਪਾਠਾਰੁਲ਼੍ਹੋ ਏਵਾਤਿ ਦਸ੍ਸੇਨ੍ਤੋ ‘‘ਨ ਕੇਵਲ’’ਨ੍ਤਿਆਦਿਮਾਹ.

ਕਾਮਰਾਗੋ ਭਵਰਾਗੋਤਿ ਏਵਮਾਦਿਭੇਦੋ ਸਬ੍ਬੋਪਿ ਰਾਗੋ ਵਿਰਜ੍ਜਤਿ ਪਹੀਯਤਿ ਏਤੇਨਾਤਿ ਰਾਗਵਿਰਾਗੋਤਿ ਮਗ੍ਗੋ ਕਥਿਤੋ. ਏਜਾਸਙ੍ਖਾਤਾਯ ਤਣ੍ਹਾਯ ਅਨ੍ਤੋਨਿਜ੍ਝਾਨਲਕ੍ਖਣਸ੍ਸ ਸੋਕਸ੍ਸ ਚ ਤਦੁਪ੍ਪਤ੍ਤਿਯਂ ਸਬ੍ਬਸੋ ਪਰਿਕ੍ਖੀਣਤ੍ਤਾ ਅਨੇਜਮਸੋਕਨ੍ਤਿ ਫਲਂ ਕਥਿਤਂ. ਅਪ੍ਪਟਿਕੂਲਨ੍ਤਿ ਅਵਿਰੋਧਦੀਪਨਤੋ ਕੇਨਚਿ ਅਵਿਰੁਦ੍ਧਂ, ਇਟ੍ਠਂ ਪਣੀਤਨ੍ਤਿ ਵਾ ਅਤ੍ਥੋ. ਪਗੁਣਰੂਪੇਨ ਪਵਤ੍ਤਿਤਤ੍ਤਾ, ਪਕਟ੍ਠਗੁਣਵਿਭਾਵਨਤੋ ਵਾ ਪਗੁਣਂ. ਯਥਾਹ ‘‘ਵਿਹਿਂਸਸਞ੍ਞੀ ਪਗੁਣਂ ਨ ਭਾਸਿਂ, ਧਮ੍ਮਂ ਪਣੀਤਂ ਮਨੁਜੇਸੁ ਬ੍ਰਹ੍ਮੇ’’ਤਿ. ਸਬ੍ਬਧਮ੍ਮਕ੍ਖਨ੍ਧਾ ਕਥਿਤਾਤਿ ਯੋਜਨਾ.

ਦਿਟ੍ਠਿਸੀਲਸਙ੍ਘਾਤੇਨਾਤਿ ‘‘ਯਾਯਂ ਦਿਟ੍ਠਿ ਅਰਿਯਾ ਨਿਯ੍ਯਾਨਿਕਾ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯ, ਤਥਾਰੂਪਾਯ ਦਿਟ੍ਠਿਯਾ ਦਿਟ੍ਠਿਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪) ਏਵਂ ਵੁਤ੍ਤਾਯ ਦਿਟ੍ਠਿਯਾ, ‘‘ਯਾਨਿ ਤਾਨਿ ਸੀਲਾਨਿ ਅਖਣ੍ਡਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ ਭੁਜਿਸ੍ਸਾਨਿ ਵਿਞ੍ਞੁਪ੍ਪਸਤ੍ਥਾਨਿ ਅਪਰਾਮਟ੍ਠਾਨਿ ਸਮਾਧਿਸਂਵਤ੍ਤਨਿਕਾਨਿ, ਤਥਾਰੂਪੇਹਿ ਸੀਲੇਹਿ ਸੀਲਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਏਵਂ ਵੁਤ੍ਤਾਨਂ ਸੀਲਾਨਞ੍ਚ ਸਂਹਤਭਾਵੇਨ, ਦਿਟ੍ਠਿਸੀਲਸਾਮਞ੍ਞੇਨਾਤਿ ਅਤ੍ਥੋ. ਸਂਹਤੋਤਿ ਘਟਿਤੋ. ਅਰਿਯਪੁਗ੍ਗਲਾ ਹਿ ਯਤ੍ਥ ਕਤ੍ਥਚਿ ਦੂਰੇ ਠਿਤਾਪਿ ਅਤ੍ਤਨੋ ਗੁਣਸਾਮਗ੍ਗਿਯਾ ਸਂਹਤਾ ਏਵ. ਅਟ੍ਠ ਚ ਪੁਗ੍ਗਲ ਧਮ੍ਮਦਸਾ ਤੇਤਿ ਤੇ ਪੁਰਿਸਯੁਗਵਸੇਨ ਚਤ੍ਤਾਰੋਪਿ ਪੁਗ੍ਗਲਵਸੇਨ ਅਟ੍ਠੇਵ ਅਰਿਯਧਮ੍ਮਸ੍ਸ ਪਚ੍ਚਕ੍ਖਦਸ੍ਸਾਵਿਤਾਯ ਧਮ੍ਮਦਸਾ. ਤੀਣਿ ਵਤ੍ਥੂਨਿ ਸਰਣਨ੍ਤਿ ਗਮਨੇਨ ਤਿਕ੍ਖਤ੍ਤੁਂ ਗਮਨੇਨ ਚ ਤੀਣਿ ਸਰਣਗਮਨਾਨਿ. ਪਟਿਵੇਦੇਸੀਤਿ ਅਤ੍ਤਨੋ ਹਦਯਗਤਂ ਵਾਚਾਯ ਪਵੇਦੇਸਿ.

ਪਸਨ੍ਨਕਾਰਵਣ੍ਣਨਾ ਨਿਟ੍ਠਿਤਾ.

ਸਰਣਗਮਨਕਥਾਵਣ੍ਣਨਾ

ਸਰਣਗਮਨਸ੍ਸ ਵਿਸਯਪਭੇਦਫਲਸਂਕਿਲੇਸਭੇਦਾਨਂ ਵਿਯ ਕਤ੍ਤੁ ਚ ਵਿਭਾਵਨਾ ਤਤ੍ਥ ਕੋਸਲ੍ਲਾਯ ਹੋਤੀਤਿ ‘‘ਸਰਣਗਮਨੇਸੁ ਕੋਸਲ੍ਲਤ੍ਥਂ ਸਰਣਂ…ਪੇ… ਵੇਦਿਤਬ੍ਬੋ’’ਤਿ ਵੁਤ੍ਤਂ ਤੇਨ ਵਿਨਾ ਸਰਣਗਮਨਸ੍ਸੇਵ ਅਸਮ੍ਭਵਤੋ. ਕਸ੍ਮਾ ਪਨੇਤ੍ਥ ਵੋਦਾਨਂ ਨ ਗਹਿਤਂ, ਨਨੁ ਵੋਦਾਨਵਿਭਾਵਨਾਪਿ ਤਤ੍ਥ ਕੋਸਲ੍ਲਾਵਹਾਤਿ? ਸਚ੍ਚਮੇਤਂ, ਤਂ ਪਨ ਸਂਕਿਲੇਸਗ੍ਗਹਣੇਨੇਵ ਅਤ੍ਥਤੋ ਦੀਪਿਤਂ ਹੋਤੀਤਿ ਨ ਗਹਿਤਂ. ਯਾਨਿ ਹਿ ਤੇਸਂ ਸਂਕਿਲੇਸਕਾਰਣਾਨਿ ਅਞ੍ਞਾਣਾਦੀਨਿ, ਤੇਸਂ ਸਬ੍ਬੇਨ ਸਬ੍ਬਂ ਅਨੁਪ੍ਪਨ੍ਨਾਨਂ ਅਨੁਪ੍ਪਾਦਨੇਨ, ਉਪ੍ਪਨ੍ਨਾਨਞ੍ਚ ਪਹਾਨੇਨ ਵੋਦਾਨਂ ਹੋਤੀਤਿ. ਹਿਂਸਤ੍ਥਸ੍ਸ ਸਰ-ਸਦ੍ਦਸ੍ਸ ਵਸੇਨੇਤਂ ਪਦਂ ਦਟ੍ਠਬ੍ਬਨ੍ਤਿ ‘‘ਹਿਂਸਤੀਤਿ ਸਰਣ’’ਨ੍ਤਿ ਵਤ੍ਵਾ ਤਂ ਪਨ ਹਿਂਸਨਂ ਕੇਸਂ, ਕਥਂ, ਕਸ੍ਸ ਵਾਤਿ ਚੋਦਨਂ ਸੋਧੇਨ੍ਤੋ ‘‘ਸਰਣਗਤਾਨ’’ਨ੍ਤਿਆਦਿਮਾਹ. ਤਤ੍ਥ ਭਯਨ੍ਤਿ ਵਟ੍ਟਭਯਂ. ਸਨ੍ਤਾਸਨ੍ਤਿ ਚਿਤ੍ਤੁਤ੍ਰਾਸਂ. ਤੇਨੇਵ ਚੇਤਸਿਕਦੁਕ੍ਖਸ੍ਸ ਗਹਿਤਤ੍ਤਾ ਦੁਕ੍ਖਨ੍ਤਿ ਇਧ ਕਾਯਿਕਂ ਦੁਕ੍ਖਂ. ਦੁਗ੍ਗਤਿਪਰਿਕਿਲੇਸਨ੍ਤਿ ਦੁਗ੍ਗਤਿਪਰਿਯਾਪਨ੍ਨਂ ਸਬ੍ਬਂ ਦੁਕ੍ਖਂ. ਤਯਿਦਂ ਸਬ੍ਬਂ ਪਰਤੋ ਫਲਕਥਾਯਂ ਆਵਿ ਭਵਿਸ੍ਸਤਿ. ਏਤਨ੍ਤਿ ‘‘ਸਰਣ’’ਨ੍ਤਿ ਪਦਂ.

ਏਵਂ ਅਵਿਸੇਸਤੋ ਸਰਣਸਦ੍ਦਸ੍ਸ ਅਤ੍ਥਂ ਦਸ੍ਸੇਤ੍ਵਾ ਇਦਾਨਿ ਵਿਸੇਸਤੋ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਹਿਤੇ ਪਵਤ੍ਤਮਾਨੇਨਾਤਿ ‘‘ਸਮ੍ਪਨ੍ਨਸੀਲਾ, ਭਿਕ੍ਖਵੇ, ਵਿਹਰਥਾ’’ਤਿਆਦਿਨਾ (ਮ. ਨਿ. ੧.੬੪, ੬੯) ਅਤ੍ਥੇ ਨਿਯੋਜਨੇਨ. ਅਹਿਤਾ ਚ ਨਿਵਤ੍ਤਨੇਨਾਤਿ ‘‘ਪਾਣਾਤਿਪਾਤਸ੍ਸ ਖੋ ਪਾਪਕੋ ਵਿਪਾਕੋ ਪਾਪਕਂ ਅਭਿਸਮ੍ਪਰਾਯ’’ਨ੍ਤਿਆਦਿਨਾ ਆਦੀਨਵਦਸ੍ਸਨਾਦਿਮੁਖੇਨ ਅਨਤ੍ਥਤੋ ਵਿਨਿਵਤ੍ਤਨੇਨ. ਭਯਂ ਹਿਂਸਤੀਤਿ ਹਿਤਾਹਿਤੇਸੁ ਅਪ੍ਪਵਤ੍ਤਿਪਵਤ੍ਤਿਹੇਤੁਕਂ ਬ੍ਯਸਨਂ ਅਪ੍ਪਵਤ੍ਤਿਕਰਣੇਨ ਵਿਨਾਸੇਤਿ. ਭਵਕਨ੍ਤਾਰਾ ਉਤ੍ਤਾਰਣੇਨ ਮਗ੍ਗਸਙ੍ਖਾਤੋ ਧਮ੍ਮੋ, ਇਤਰੋ ਅਸ੍ਸਾਸਦਾਨੇਨ ਸਤ੍ਤਾਨਂ ਭਯਂ ਹਿਂਸਤੀਤਿ ਯੋਜਨਾ. ਕਾਰਾਨਨ੍ਤਿ ਦਾਨਵਸੇਨ ਪੂਜਾਵਸੇਨ ਚ ਉਪਨੀਤਾਨਂ ਸਕ੍ਕਾਰਾਨਂ. ਵਿਪੁਲਫਲਪਟਿਲਾਭਕਰਣੇਨ ਸਤ੍ਤਾਨਂ ਭਯਂ ਹਿਂਸਤਿ ਅਨੁਤ੍ਤਰਦਕ੍ਖਿਣੇਯ੍ਯਭਾਵਤੋਤਿ ਅਧਿਪ੍ਪਾਯੋ. ਇਮਿਨਾਪਿ ਪਰਿਯਾਯੇਨਾਤਿ ਇਮਿਨਾਪਿ ਵਿਭਜਿਤ੍ਵਾ ਵੁਤ੍ਤੇਨ ਕਾਰਣੇਨ.

‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਏਵਂ ਪਵਤ੍ਤੋ ਤਤ੍ਥ ਰਤਨਤ੍ਤਯੇ ਪਸਾਦੋ ਤਪ੍ਪਸਾਦੋ, ਤਦੇਵ ਰਤਨਤ੍ਤਯਂ ਗਰੁ ਏਤਸ੍ਸਾਤਿ ਤਗ੍ਗਰੁ, ਤਸ੍ਸ ਭਾਵੋ ਤਗ੍ਗਰੁਤਾ, ਤਪ੍ਪਸਾਦੋ ਚ ਤਗ੍ਗਰੁਤਾ ਚ ਤਪ੍ਪਸਾਦਤਗ੍ਗਰੁਤਾ, ਤਾਹਿ. ਵਿਧੁਤਦਿਟ੍ਠਿਵਿਚਿਕਿਚ੍ਛਾਸਮ੍ਮੋਹਅਸ੍ਸਦ੍ਧਿਯਾਦਿਤਾਯ ਵਿਹਤਕਿਲੇਸੋ. ‘‘ਤਦੇਵ ਰਤਨਤ੍ਤਯਂ ਪਰਾਯਣਂ ਗਤਿ ਤਾਣਂ ਲੇਣ’’ਨ੍ਤਿ ਏਵਂ ਆਕਾਰੇਨ ਪਵਤ੍ਤਿਯਾ ਤਪ੍ਪਰਾਯਣਤਾਕਾਰਪਵਤ੍ਤੋ ਚਿਤ੍ਤੁਪ੍ਪਾਦੋ ਸਰਣਗਮਨਂ ‘‘ਸਰਣਨ੍ਤਿ ਗਚ੍ਛਤਿ ਏਤੇਨਾ’’ਤਿ. ਤਂਸਮਙ੍ਗੀਤਿ ਤੇਨ ਯਥਾਵੁਤ੍ਤਚਿਤ੍ਤੁਪ੍ਪਾਦੇਨ ਸਮਨ੍ਨਾਗਤੋ. ਏਵਂ ਉਪੇਤੀਤਿ ਏਵਂ ਭਜਤਿ ਸੇਵਤਿ ਪਯਿਰੁਪਾਸਤਿ, ਏਵਂ ਵਾ ਜਾਨਾਤਿ ਬੁਜ੍ਝਤੀਤਿ ਏਵਮਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਪਸਾਦਗ੍ਗਹਣੇਨ ਲੋਕਿਯਸਰਣਗਮਨਮਾਹ. ਤਞ੍ਹਿ ਪਸਾਦਪ੍ਪਧਾਨਂ, ਨ ਞਾਣਪ੍ਪਧਾਨਂ. ਗਰੁਤਾਗਹਣੇਨ ਲੋਕੁਤ੍ਤਰਂ. ਅਰਿਯਾ ਹਿ ਰਤਨਤ੍ਤਯਂ ਗੁਣਾਭਿਞ੍ਞਾਤਾਯ ਪਾਸਾਣਚ੍ਛਤ੍ਤਂ ਵਿਯ ਗਰੁਂ ਕਤ੍ਵਾ ਪਸ੍ਸਨ੍ਤਿ, ਤਸ੍ਮਾ ਤਪ੍ਪਸਾਦੇਨ ਵਿਕ੍ਖਮ੍ਭਨਵਸੇਨ ਵਿਹਤਕਿਲੇਸੋ ਤਗ੍ਗਰੁਤਾਯ ਸਮੁਚ੍ਛੇਦਵਸੇਨਾਤਿ ਯੋਜੇਤਬ੍ਬਂ. ਤਪ੍ਪਰਾਯਣਤਾ ਪਨੇਤ੍ਥ ਤਗ੍ਗਤਿਕਤਾਤਿ ਤਾਯ ਚਤੁਬ੍ਬਿਧਮ੍ਪਿ ਵਕ੍ਖਮਾਨਂ ਸਰਣਗਮਨਂ ਗਹਿਤਨ੍ਤਿ ਦਟ੍ਠਬ੍ਬਂ. ਅਵਿਸੇਸੇਨ ਵਾ ਪਸਾਦਗਰੁਤਾ ਜੋਤਿਤਾਤਿ ਪਸਾਦਗ੍ਗਹਣੇਨ ਅਵੇਚ੍ਚਪ੍ਪਸਾਦਸ੍ਸ ਇਤਰਸ੍ਸ ਚ ਗਹਣਂ, ਤਥਾ ਗਰੁਤਾਗਹਣੇਨਾਤਿ ਉਭਯੇਨਪਿ ਉਭਯਂ ਸਰਣਗਮਨਂ ਯੋਜੇਤਬ੍ਬਂ.

ਮਗ੍ਗਕ੍ਖਣੇ ਇਜ੍ਝਤੀਤਿ ਯੋਜਨਾ. ਨਿਬ੍ਬਾਨਾਰਮ੍ਮਣਂ ਹੁਤ੍ਵਾਤਿ ਏਤੇਨ ਅਤ੍ਥਤੋ ਚਤੁਸਚ੍ਚਾਧਿਗਮੋਯੇਵ ਲੋਕੁਤ੍ਤਰਂ ਸਰਣਗਮਨਨ੍ਤਿ ਦਸ੍ਸੇਤਿ. ਤਤ੍ਥ ਹਿ ਨਿਬ੍ਬਾਨਧਮ੍ਮੋ ਸਚ੍ਛਿਕਿਰਿਯਾਭਿਸਮਯਵਸੇਨ, ਮਗ੍ਗਧਮ੍ਮੋ ਭਾਵਨਾਭਿਸਮਯਵਸੇਨ ਪਟਿਵਿਜ੍ਝਿਯਮਾਨੋਯੇਵ ਸਰਣਗਮਨਤ੍ਤਂ ਸਾਧੇਤਿ, ਬੁਦ੍ਧਗੁਣਾ ਪਨ ਸਾਵਕਗੋਚਰਭੂਤਾ ਪਰਿਞ੍ਞਾਭਿਸਮਯਵਸੇਨ, ਤਥਾ ਅਰਿਯਸਙ੍ਘਗੁਣਾ. ਤੇਨਾਹ ‘‘ਕਿਚ੍ਚਤੋ ਸਕਲੇਪਿ ਰਤਨਤ੍ਤਯੇ ਇਜ੍ਝਤੀ’’ਤਿ, ਇਜ੍ਝਨ੍ਤਞ੍ਚ ਸਹੇਵ ਇਜ੍ਝਤਿ, ਨ ਲੋਕਿਯਂ ਵਿਯ ਪਟਿਪਾਟਿਯਾ ਅਸਮ੍ਮੋਹਪਟਿਵੇਧੇਨ ਪਟਿਵਿਦ੍ਧਤ੍ਤਾਤਿ ਅਧਿਪ੍ਪਾਯੋ. ਯੇ ਪਨ ਵਦਨ੍ਤਿ ‘‘ਨ ਸਰਣਗਮਨਂ ਨਿਬ੍ਬਾਨਾਰਮ੍ਮਣਂ ਹੁਤ੍ਵਾ ਪਵਤ੍ਤਤਿ, ਮਗ੍ਗਸ੍ਸ ਅਧਿਗਤਤ੍ਤਾ ਪਨ ਅਧਿਗਤਮੇਵ ਹੋਤਿ ਏਕਚ੍ਚਾਨਂ ਤੇਵਿਜ੍ਜਾਦੀਨਂ ਲੋਕਿਯਵਿਜ੍ਜਾਦਯੋ ਵਿਯਾ’’ਤਿ, ਤੇਸਂ ਲੋਕਿਯਮੇਵ ਸਰਣਗਮਨਂ ਸਿਯਾ, ਨ ਲੋਕੁਤ੍ਤਰਂ, ਤਞ੍ਚ ਅਯੁਤ੍ਤਂ ਦੁਵਿਧਸ੍ਸਪਿ ਇਚ੍ਛਿਤਬ੍ਬਤ੍ਤਾ. ਤਨ੍ਤਿ ਲੋਕਿਯਸਰਣਗਮਨਂ. ਸਦ੍ਧਾਪਟਿਲਾਭੋ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿਆਦਿਨਾ. ਸਦ੍ਧਾਮੂਲਿਕਾਤਿ ਯਥਾਵੁਤ੍ਤਸਦ੍ਧਾਪੁਬ੍ਬਙ੍ਗਮਾ ਸਮ੍ਮਾਦਿਟ੍ਠਿ ਬੁਦ੍ਧਸੁਬੁਦ੍ਧਤਂ ਧਮ੍ਮਸੁਧਮ੍ਮਤਂ ਸਙ੍ਘਸੁਪ੍ਪਟਿਪਤਿਞ੍ਚ ਲੋਕਿਯਾਵਬੋਧਵਸੇਨੇਵ ਸਮ੍ਮਾ ਞਾਯੇਨ ਦਸ੍ਸਨਤੋ. ‘‘ਸਦ੍ਧਾਮੂਲਿਕਾ ਸਮ੍ਮਾਦਿਟ੍ਠੀ’’ਤਿ ਏਤੇਨ ਸਦ੍ਧੂਪਨਿਸ੍ਸਯਾ ਯਥਾਵੁਤ੍ਤਲਕ੍ਖਣਾ ਪਞ੍ਞਾ ਲੋਕਿਯਸਰਣਗਮਨਨ੍ਤਿ ਦਸ੍ਸੇਤਿ. ਤੇਨਾਹ ‘‘ਦਿਟ੍ਠਿਜੁਕਮ੍ਮਨ੍ਤਿ ਵੁਚ੍ਚਤੀ’’ਤਿ ‘‘ਦਿਟ੍ਠਿ ਏਵ ਅਤ੍ਤਨੋ ਪਚ੍ਚਯੇਹਿ ਉਜੁਂ ਕਰੀਯਤੀ’’ਤਿ ਕਤ੍ਵਾ. ਦਿਟ੍ਠਿ ਵਾ ਉਜੁਂ ਕਰੀਯਤਿ ਏਤੇਨਾਤਿ ਦਿਟ੍ਠਿਜੁਕਮ੍ਮਂ, ਤਥਾ ਪਵਤ੍ਤੋ ਚਿਤ੍ਤੁਪ੍ਪਾਦੋ. ਏਵਞ੍ਚ ਕਤ੍ਵਾ ‘‘ਤਪ੍ਪਰਾਯਣਤਾਕਾਰਪਵਤ੍ਤੋ ਚਿਤ੍ਤੁਪ੍ਪਾਦੋ’’ਤਿ ਇਦਞ੍ਚ ਵਚਨਂ ਸਮਤ੍ਥਿਤਂ ਹੋਤਿ. ਸਦ੍ਧਾਪੁਬ੍ਬਙ੍ਗਮਸਮ੍ਮਾਦਿਟ੍ਠਿਗ੍ਗਹਣਂ ਪਨ ਚਿਤ੍ਤੁਪ੍ਪਾਦਸ੍ਸ ਤਪ੍ਪਧਾਨਤਾਯਾਤਿ ਦਟ੍ਠਬ੍ਬਂ. ‘‘ਸਦ੍ਧਾਪਟਿਲਾਭੋ’’ਤਿ ਇਮਿਨਾ ਮਾਤਾਦੀਹਿ ਉਸ੍ਸਾਹਿਤਦਾਰਕਾਦੀਨਂ ਵਿਯ ਞਾਣਵਿਪ੍ਪਯੁਤ੍ਤਸਰਣਗਮਨਂ ਦਸ੍ਸੇਤਿ, ‘‘ਸਮ੍ਮਾਦਿਟ੍ਠੀ’’ਤਿ ਇਮਿਨਾ ਞਾਣਸਮ੍ਪਯੁਤ੍ਤਸਰਣਗਮਨਂ.

ਤਯਿਦਂ ਲੋਕਿਯਂ ਸਰਣਗਮਨਂ. ਅਤ੍ਤਾ ਸਨ੍ਨਿਯ੍ਯਾਤੀਯਤਿ ਅਪ੍ਪੀਯਤਿ ਪਰਿਚ੍ਚਜੀਯਤਿ ਏਤੇਨਾਤਿ ਅਤ੍ਤਸਨ੍ਨਿਯ੍ਯਾਤਨਂ, ਯਥਾਵੁਤ੍ਤਂ ਦਿਟ੍ਠਿਜੁਕਮ੍ਮਂ. ਤਂ ਰਤਨਤ੍ਤਯਂ ਪਰਾਯਣਂ ਪਟਿਸਰਣਂ ਏਤਸ੍ਸਾਤਿ ਤਪ੍ਪਰਾਯਣੋ, ਪੁਗ੍ਗਲੋ, ਚਿਤ੍ਤੁਪ੍ਪਾਦੋ ਵਾ, ਤਸ੍ਸ ਭਾਵੋ ਤਪ੍ਪਰਾਯਣਤਾ, ਯਥਾਵੁਤ੍ਤਦਿਟ੍ਠਿਜੁਕਮ੍ਮਮੇਵ. ਸਰਣਨ੍ਤਿ ਅਧਿਪ੍ਪਾਯੇਨ ਸਿਸ੍ਸਭਾਵਂ ਅਨ੍ਤੇਵਾਸਿਕਭਾਵਂ ਉਪਗਚ੍ਛਤਿ ਏਤੇਨਾਤਿ ਸਿਸ੍ਸਭਾਵੂਪਗਮਨਂ. ਸਰਣਗਮਨਾਧਿਪ੍ਪਾਯੇਨੇਵ ਪਣਿਪਤਤਿ ਏਤੇਨਾਤਿ ਪਣਿਪਾਤੋ. ਸਬ੍ਬਤ੍ਥ ਯਥਾਵੁਤ੍ਤਦਿਟ੍ਠਿਜੁਕਮ੍ਮਵਸੇਨੇਵ ਅਤ੍ਥੋ ਵੇਦਿਤਬ੍ਬੋ. ਅਤ੍ਤਪਰਿਚ੍ਚਜਨਨ੍ਤਿ ਸਂਸਾਰਦੁਕ੍ਖਨਿਤ੍ਥਰਣਤ੍ਥਂ ਅਤ੍ਤਨੋ ਅਤ੍ਤਭਾਵਸ੍ਸ ਪਰਿਚ੍ਚਜਨਂ. ਏਸ ਨਯੋ ਸੇਸੇਸੁਪਿ. ਬੁਦ੍ਧਾਦੀਨਂਯੇਵਾਤਿ ਅਵਧਾਰਣਂ ਇਤਰੇਸੁਪਿ ਸਰਣਗਮਨਵਿਸੇਸੇਸੁ ਯਥਾਰਹਂ ਵਤ੍ਤਬ੍ਬਂ. ਏਵਞ੍ਹਿ ਤਦਞ੍ਞਨਿਵਤ੍ਤਨਂ ਕਤਂ ਹੋਤਿ.

ਏਵਂ ਅਤ੍ਤਸਨ੍ਨਿਯਾਤਨਾਦੀਨਿ ਏਕੇਨ ਪਕਾਰੇਨ ਦਸ੍ਸੇਤ੍ਵਾ ਇਦਾਨਿ ਅਪਰੇਹਿਪਿ ਪਕਾਰੇਹਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਆਰਦ੍ਧਂ. ਤੇਨ ਪਰਿਯਾਯਨ੍ਤਰੇਹਿਪਿ ਅਤ੍ਤਸਨ੍ਨਿਯ੍ਯਾਤਨਾਦਿ ਕਤਮੇਵ ਹੋਤਿ ਅਤ੍ਥਸ੍ਸ ਅਭਿਨ੍ਨਤ੍ਤਾਤਿ ਦਸ੍ਸੇਤਿ. ਆਲ਼ਵਕਾਦੀਨਨ੍ਤਿ ਆਦਿ-ਸਦ੍ਦੇਨ ਸਾਤਾਗਿਰਿਹੇਮਵਤਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਨਨੁ ਚੇਤੇ ਆਲ਼ਵਕਾਦਯੋ ਮਗ੍ਗੇਨੇਵ ਆਗਤਸਰਣਗਮਨਾ, ਕਥਂ ਤੇਸਂ ਤਪ੍ਪਰਾਯਣਤਾਸਰਣਗਮਨਂ ਵੁਤ੍ਤਨ੍ਤਿ? ਮਗ੍ਗੇਨਾਗਤਸਰਣਗਮਨੇਹਿਪਿ ‘‘ਸੋ ਅਹਂ ਵਿਚਰਿਸ੍ਸਾਮਿ ਗਾਮਾ ਗਾਮ’’ਨ੍ਤਿਆਦਿਨਾ (ਸਂ. ਨਿ. ੧.੨੪੬) ਤੇਹਿ ਤਪ੍ਪਰਾਯਣਤਾਕਾਰਸ੍ਸ ਪਵੇਦਿਤਤ੍ਤਾ ਤਥਾ ਵੁਤ੍ਤਂ.

ਞਾਤਿ…ਪੇ… ਵਸੇਨਾਤਿ ਏਤ੍ਥ ਞਾਤਿਵਸੇਨ ਭਯਵਸੇਨ ਆਚਰਿਯਵਸੇਨ ਦਕ੍ਖਿਣੇਯ੍ਯਵਸੇਨਾਤਿ ਪਚ੍ਚੇਕਂ ‘‘ਵਸੇਨਾ’’ਤਿ ਪਦਂ ਯੋਜੇਤਬ੍ਬਂ. ਤਤ੍ਥ ਞਾਤਿਵਸੇਨਾਤਿ ਞਾਤਿਭਾਵਵਸੇਨ. ਏਵਂ ਸੇਸੇਸੁਪਿ. ਦਕ੍ਖਿਣੇਯ੍ਯਪਣਿਪਾਤੇਨਾਤਿ ਦਕ੍ਖਿਣੇਯ੍ਯਤਾਹੇਤੁਕੇਨ ਪਣਿਪਾਤੇਨ. ਇਤਰੇਹੀਤਿ ਞਾਤਿਭਾਵਾਦਿਵਸਪ੍ਪਵਤ੍ਤੇਹਿ ਤੀਹਿ ਪਣਿਪਾਤੇਹਿ. ਇਤਰੇਹੀਤਿਆਦਿਨਾ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਤਸ੍ਮਾ’’ਤਿਆਦਿ ਵੁਤ੍ਤਂ. ਵਨ੍ਦਤੀਤਿ ਪਣਿਪਾਤਸ੍ਸ ਲਕ੍ਖਣਵਚਨਂ. ਏਵਰੂਪਨ੍ਤਿ ਦਿਟ੍ਠਧਮ੍ਮਿਕਂ ਸਨ੍ਧਾਯ ਵਦਤਿ. ਸਮ੍ਪਰਾਯਿਕਞ੍ਹਿ ਨਿਯ੍ਯਾਨਿਕਂ ਵਾ ਅਨੁਸਾਸਨਂ ਪਚ੍ਚਾਸੀਸਨ੍ਤੋ ਦਕ੍ਖਿਣੇਯ੍ਯਪਣਿਪਾਤਮੇਵ ਕਰੋਤੀਤਿ ਅਧਿਪ੍ਪਾਯੋ. ਸਰਣਗਮਨਪ੍ਪਭੇਦੋਤਿ ਸਰਣਗਮਨਵਿਭਾਗੋ.

ਅਰਿਯਮਗ੍ਗੋਯੇਵ ਲੋਕੁਤ੍ਤਰਸਰਣਗਮਨਨ੍ਤਿ ਆਹ ‘‘ਚਤ੍ਤਾਰਿ ਸਾਮਞ੍ਞਫਲਾਨਿ ਵਿਪਾਕਫਲ’’ਨ੍ਤਿ. ਸਬ੍ਬਦੁਕ੍ਖਕ੍ਖਯੋਤਿ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਅਨੁਪ੍ਪਾਦਨਿਰੋਧੋ. ਏਤਨ੍ਤਿ ‘‘ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤੀ’’ਤਿ (ਧ. ਪ. ੧੯੦) ਏਵਂ ਵੁਤ੍ਤਂ ਅਰਿਯਸਚ੍ਚਦਸ੍ਸਨਂ.

ਨਿਚ੍ਚਤੋ ਅਨੁਪਗਮਨਾਦਿਵਸੇਨਾਤਿ ਨਿਚ੍ਚਨ੍ਤਿ ਅਗ੍ਗਹਣਾਦਿਵਸੇਨ. ਅਟ੍ਠਾਨਨ੍ਤਿ ਹੇਤੁਪਟਿਕ੍ਖੇਪੋ. ਅਨਵਕਾਸੋਤਿ ਪਚ੍ਚਯਪਟਿਕ੍ਖੇਪੋ. ਉਭਯੇਨਪਿ ਕਾਰਣਮੇਵ ਪਟਿਕ੍ਖਿਪਤਿ. ਯਨ੍ਤਿ ਯੇਨ ਕਾਰਣੇਨ. ਦਿਟ੍ਠਿਸਮ੍ਪਨ੍ਨੋਤਿ ਮਗ੍ਗਦਿਟ੍ਠਿਯਾ ਸਮ੍ਪਨ੍ਨੋ ਸੋਤਾਪਨ੍ਨੋ. ਕਞ੍ਚਿ ਸਙ੍ਖਾਰਨ੍ਤਿ ਚਤੁਭੂਮਕੇਸੁ ਸਙ੍ਖਤਸਙ੍ਖਾਰੇਸੁ ਏਕਸਙ੍ਖਾਰਮ੍ਪਿ. ਨਿਚ੍ਚਤੋ ਉਪਗਚ੍ਛੇਯ੍ਯਾਤਿ ‘‘ਨਿਚ੍ਚੋ’’ਤਿ ਗਣ੍ਹੇਯ੍ਯ. ਸੁਖਤੋ ਉਪਗਚ੍ਛੇਯ੍ਯਾਤਿ ‘‘ਏਕਨ੍ਤਸੁਖੀ ਅਤ੍ਤਾ ਹੋਤਿ ਅਰੋਗੋ ਪਰਂ ਮਰਣਾ’’ਤਿ (ਦੀ. ਨਿ. ੧.੭੬) ਏਵਂ ਅਤ੍ਤਦਿਟ੍ਠਿਵਸੇਨ ਸੁਖਤੋ ਗਾਹਂ ਸਨ੍ਧਾਯੇਤਂ ਵੁਤ੍ਤਂ. ਦਿਟ੍ਠਿਵਿਪ੍ਪਯੁਤ੍ਤਚਿਤ੍ਤੇਨ ਪਨ ਅਰਿਯਸਾਵਕੋ ਪਰਿਲ਼ਾਹਵੂਪਸਮਨਤ੍ਥਂ ਮਤ੍ਤਹਤ੍ਥਿਪਰਿਤ੍ਤਾਸਿਤੋ ਵਿਯ ਚੋਕ੍ਖਬ੍ਰਾਹ੍ਮਣੋ ਉਕ੍ਕਾਰਭੂਮਿਂ ਕਞ੍ਚਿ ਸਙ੍ਖਾਰਂ ਸੁਖਤੋ ਉਪਗਚ੍ਛਤਿ. ਅਤ੍ਤਵਾਰੇ ਕਸਿਣਾਦਿਪਞ੍ਞਤ੍ਤਿਸਙ੍ਗਹਣਤ੍ਥਂ ‘‘ਸਙ੍ਖਾਰ’’ਨ੍ਤਿ ਅਵਤ੍ਵਾ ‘‘ਕਞ੍ਚਿ ਧਮ੍ਮ’’ਨ੍ਤਿ ਵੁਤ੍ਤਂ. ਇਮੇਸੁਪਿ ਵਾਰੇਸੁ ਚਤੁਭੂਮਕਵਸੇਨੇਵ ਪਰਿਚ੍ਛੇਦੋ ਵੇਦਿਤਬ੍ਬੋ ਤੇਭੂਮਕਵਸੇਨੇਵ ਵਾ. ਯਂ ਯਞ੍ਹਿ ਪੁਥੁਜ੍ਜਨੋ ਗਾਹਵਸੇਨ ਗਣ੍ਹਾਤਿ, ਤਤੋ ਤਤੋ ਅਰਿਯਸਾਵਕੋ ਗਾਹਂ ਵਿਨਿਵੇਠੇਤਿ. ਮਾਤਰਨ੍ਤਿਆਦੀਸੁ ਜਨਿਕਾ ਮਾਤਾ, ਜਨਕੋ ਪਿਤਾ, ਮਨੁਸ੍ਸਭੂਤੋ ਖੀਣਾਸਵੋ ਅਰਹਾਤਿ ਅਧਿਪ੍ਪੇਤੋ. ਕਿਂ ਪਨ ਅਰਿਯਸਾਵਕੋ ਅਞ੍ਞਂ ਜੀਵਿਤਾ ਵੋਰੋਪੇਯ੍ਯਾਤਿ? ਏਤਮ੍ਪਿ ਅਟ੍ਠਾਨਂ, ਪੁਥੁਜ੍ਜਨਭਾਵਸ੍ਸ ਪਨ ਮਹਾਸਾਵਜ੍ਜਭਾਵਦਸ੍ਸਨਤ੍ਥਂ ਅਰਿਯਸਾਵਕਸ੍ਸ ਫਲਦੀਪਨਤ੍ਥਞ੍ਚੇਵਂ ਵੁਤ੍ਤਂ. ਦੁਟ੍ਠਚਿਤ੍ਤੋ ਵਧਕਚਿਤ੍ਤੇਨ ਪਦੁਟ੍ਠਚਿਤ੍ਤੋ. ਲੋਹਿਤਂ ਉਪ੍ਪਾਦੇਯ੍ਯਾਤਿ ਜੀਵਮਾਨਕਸਰੀਰੇ ਖੁਦ੍ਦਕਮਕ੍ਖਿਕਾਯ ਪਿਵਨਮਤ੍ਤਮ੍ਪਿ ਲੋਹਿਤਂ ਉਪ੍ਪਾਦੇਯ੍ਯ. ਸਙ੍ਘਂ ਭਿਨ੍ਦੇਯ੍ਯਾਤਿ ਸਮਾਨਸਂਵਾਸਕਂ ਸਮਾਨਸੀਮਾਯਂ ਠਿਤਂ ਸਙ੍ਘਂ ‘ਕਮ੍ਮੇਨ ਉਦ੍ਦੇਸੇਨ ਵੋਹਰਨ੍ਤੋ ਅਨੁਸ੍ਸਾਵਨੇਨ ਸਲਾਕਗ੍ਗਾਹੇਨਾ’’ਤਿ (ਪਰਿ. ੪੫੮) ਏਵਂ ਵੁਤ੍ਤੇਹਿ ਪਞ੍ਚਹਿ ਕਾਰਣੇਹਿ ਭਿਨ੍ਦੇਯ੍ਯ. ਅਞ੍ਞਂ ਸਤ੍ਥਾਰਨ੍ਤਿ ਅਞ੍ਞਂ ਤਿਤ੍ਥਕਰਂ ‘‘ਅਯਂ ਮੇ ਸਤ੍ਥਾ’’ਤਿ ਏਵਂ ਗਣ੍ਹੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤੀਤਿ ਅਤ੍ਥੋ.

ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਨ੍ਤਿ ਤੇ ਬੁਦ੍ਧਂ ਸਰਣਂ ਗਤਾ ਤਨ੍ਨਿਮਿਤ੍ਤਂ ਅਪਾਯਭੂਮਿਂ ਨ ਗਮਿਸ੍ਸਨ੍ਤਿ, ਦੇਵਕਾਯਂ ਪਨ ਪਰਿਪੂਰੇਸ੍ਸਨ੍ਤੀਤਿ ਅਤ੍ਥੋ.

ਦਸਹਿ ਠਾਨੇਹੀਤਿ ਦਸਹਿ ਕਾਰਣੇਹਿ. ਅਧਿਗ੍ਗਣ੍ਹਨ੍ਤੀਤਿ ਅਧਿਭਵਨ੍ਤਿ. ਵੇਲਾਮਸੁਤ੍ਤਾਦਿਵਸੇਨਾਪੀਤਿ ਏਤ੍ਥ ‘‘ਚਤੁਰਾਸੀਤਿਸਹਸ੍ਸਸਙ੍ਖਾਨਂ ਸੁਵਣ੍ਣਪਾਤਿਰੂਪਿਯਪਾਤਿਕਂਸਪਾਤੀਨਂ ਯਥਾਕ੍ਕਮਂ ਰੂਪਿਯਸੁਵਣ੍ਣਹਿਰਞ੍ਞਪੂਰਾਨਂ ਕਰੀਸਸ੍ਸ ਚਤੁਤ੍ਥਭਾਵਪ੍ਪਮਾਣਾਨਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾਨਂ ਚਤੁਰਾਸੀਤਿਯਾ ਹਤ੍ਥਿਸਹਸ੍ਸਾਨਂ ਚਤੁਰਾਸੀਤਿਯਾ ਅਸ੍ਸਸਹਸ੍ਸਾਨਂ ਚਤੁਰਾਸੀਤਿਯਾ ਰਥਸਹਸ੍ਸਾਨਂ ਚਤੁਰਾਸੀਤਿਯਾ ਧੇਨੁਸਹਸ੍ਸਾਨਂ ਚਤੁਰਾਸੀਤਿਯਾ ਕਞ੍ਞਾਸਹਸ੍ਸਾਨਂ ਚਤੁਰਾਸੀਤਿਯਾ ਪਲ੍ਲਙ੍ਕਸਹਸ੍ਸਾਨਂ ਚਤੁਰਾਸੀਤਿਯਾ ਵਤ੍ਥਕੋਟਿਸਹਸ੍ਸਾਨਂ ਅਪਰਿਮਾਣਸ੍ਸ ਚ ਖਜ੍ਜਭੋਜ੍ਜਾਦਿਭੇਦਸ੍ਸ ਆਹਾਰਸ੍ਸ ਪਰਿਚ੍ਚਜਨਵਸੇਨ ਸਤ੍ਤਮਾਸਾਧਿਕਾਨਿ ਸਤ੍ਤ ਸਂਵਚ੍ਛਰਾਨਿ ਨਿਰਨ੍ਤਰਂ ਪਵਤ੍ਤਵੇਲਾਮਮਹਾਦਾਨਤੋ ਏਕਸ੍ਸ ਸੋਤਾਪਨ੍ਨਸ੍ਸ ਦਿਨ੍ਨਦਾਨਂ ਮਹਪ੍ਫਲਤਰਂ, ਤਤੋ ਸਤਂ ਸੋਤਾਪਨ੍ਨਾਨਂ ਦਿਨ੍ਨਦਾਨਤੋ ਏਕਸ੍ਸ ਸਕਦਾਗਾਮਿਸ੍ਸ, ਤਤੋ ਏਕਸ੍ਸ ਅਨਾਗਾਮਿਸ੍ਸ, ਤਤੋ ਏਕਸ੍ਸ ਅਰਹਤੋ, ਤਤੋ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ, ਤਤੋ ਸਮ੍ਮਾਸਮ੍ਬੁਦ੍ਧਸ੍ਸ, ਤਤੋ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਿਨ੍ਨਦਾਨਂ ਮਹਪ੍ਫਲਤਰਂ, ਤਤੋ ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਵਿਹਾਰਕਰਣਂ, ਤਤੋ ਸਰਣਗਮਨਂ ਮਹਪ੍ਫਲਤਰ’’ਨ੍ਤਿ ਇਮਮਤ੍ਥਂ ਦੀਪੇਨ੍ਤਸ੍ਸ ਵੇਲਾਮਸੁਤ੍ਤਸ੍ਸ (ਅ. ਨਿ. ੯.੨੦) ਵਸੇਨ. ਵੁਤ੍ਤਞ੍ਹੇਤਂ ‘‘ਯਂ ਗਹਪਤਿ, ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ, ਯੋ ਏਕਂ ਦਿਟ੍ਠਿਸਮ੍ਪਨ੍ਨਂ ਭੋਜੇਯ੍ਯ, ਇਦਂ ਤਤੋ ਮਹਪ੍ਫਲਤਰ’’ਨ੍ਤਿਆਦਿ (ਅ. ਨਿ. ੯.੨੦). ਵੇਲਾਮਸੁਤ੍ਤਾਦੀਤਿ ਆਦਿ-ਸਦ੍ਦੇਨ ਅਗ੍ਗਪ੍ਪਸਾਦਸੁਤ੍ਤਾਦੀਨਂ (ਅ. ਨਿ. ੪.੩੪; ਇਤਿਵੁ. ੯੦) ਸਙ੍ਗਹੋ ਦਟ੍ਠਬ੍ਬੋ.

ਅਞ੍ਞਾਣਂ ਵਤ੍ਥੁਤ੍ਤਯਸ੍ਸ ਗੁਣਾਨਂ ਅਜਾਨਨਂ ਤਤ੍ਥ ਸਮ੍ਮੋਹੋ, ‘‘ਬੁਦ੍ਧੋ ਨੁ ਖੋ, ਨ ਨੁ ਖੋ ਬੁਦ੍ਧੋ’’ਤਿਆਦਿਨਾ ਵਿਚਿਕਿਚ੍ਛਾ ਸਂਸਯੋ,ਮਿਚ੍ਛਾਞਾਣਂ ਤਸ੍ਸ ਗੁਣਾਨਂ ਅਗੁਣਭਾਵਪਰਿਕਪ੍ਪਨੇਨ ਵਿਪਰੀਤਗ੍ਗਾਹੋ. ਆਦਿ-ਸਦ੍ਦੇਨ ਅਨਾਦਰਾਗਾਰਵਾਦੀਨਂ ਸਙ੍ਗਹੋ. ਨ ਮਹਾਜੁਤਿਕਨ੍ਤਿ ਨ ਉਜ੍ਜਲਂ, ਅਪਰਿਸੁਦ੍ਧਂ ਅਪਰਿਯੋਦਾਤਨ੍ਤਿ ਅਤ੍ਥੋ. ਨ ਮਹਾਵਿਪ੍ਫਾਰਨ੍ਤਿ ਅਨੁਲ਼ਾਰਂ. ਸਾਵਜ੍ਜੋਤਿ ਦਿਟ੍ਠਿਤਣ੍ਹਾਦਿਵਸੇਨ ਸਦੋਸੋ. ਲੋਕਿਯਂ ਸਰਣਗਮਨਂ ਸਿਕ੍ਖਾਸਮਾਦਾਨਂ ਵਿਯ ਅਗ੍ਗਹਿਤਕਾਲਪਰਿਚ੍ਛੇਦਂ ਜੀਵਿਤਪਰਿਯਨ੍ਤਮੇਵ ਹੋਤਿ, ਤਸ੍ਮਾ ਤਸ੍ਸ ਖਨ੍ਧਭੇਦੇਨ ਭੇਦੋਤਿ ਆਹ ‘‘ਅਨਵਜ੍ਜੋ ਕਾਲਕਿਰਿਯਾਯਾ’’ਤਿ. ਸੋਤਿ ਅਨਵਜ੍ਜੋ ਸਰਣਗਮਨਭੇਦੋ. ਸਤਿਪਿ ਅਨਵਜ੍ਜਤ੍ਤੇ ਇਟ੍ਠਫਲੋਪਿ ਨ ਹੋਤੀਤਿ ਆਹ ‘‘ਅਫਲੋ’’ਤਿ.

ਸਰਣਗਮਨਕਥਾਵਣ੍ਣਨਾ ਨਿਟ੍ਠਿਤਾ.

ਉਪਾਸਕਵਿਧਿਕਥਾਵਣ੍ਣਨਾ

ਕੋ ਉਪਾਸਕੋਤਿ ਸਰੂਪਪੁਚ੍ਛਾ, ਤਸ੍ਮਾ ਕਿਂਲਕ੍ਖਣੋ ਉਪਾਸਕੋਤਿ ਵੁਤ੍ਤਂ ਹੋਤਿ. ਕਸ੍ਮਾਤਿ ਹੇਤੁਪੁਚ੍ਛਾ. ਤੇਨ ਕੇਨ ਪਵਤ੍ਤਿਨਿਮਿਤ੍ਤੇਨ ਉਪਾਸਕਸਦ੍ਦੋ ਤਸ੍ਮਿਂ ਪੁਗ੍ਗਲੇ ਨਿਰੁਲ਼੍ਹੋਤਿ ਦਸ੍ਸੇਤਿ. ਕਿਮਸ੍ਸ ਸੀਲਨ੍ਤਿ ਕੀਦਿਸਂ ਅਸ੍ਸ ਉਪਾਸਕਸ੍ਸ ਸੀਲਂ, ਕਿਤ੍ਤਕੇਨ ਸੀਲੇਨਾਯਂ ਸੀਲਸਮ੍ਪਨ੍ਨੋ ਨਾਮ ਹੋਤੀਤਿ ਅਤ੍ਥੋ. ਕੋ ਆਜੀਵੋਤਿ ਕੋ ਅਸ੍ਸ ਸਮ੍ਮਾਆਜੀਵੋ, ਸੋ ਪਨ ਮਿਚ੍ਛਾਜੀਵਸ੍ਸ ਪਰਿਵਜ੍ਜਨੇਨ ਹੋਤੀਤਿ ਸੋਪਿ ਵਿਭਜੀਯਤੀਤਿ. ਕਾ ਵਿਪਤ੍ਤੀਤਿ ਕਾ ਅਸ੍ਸ ਸੀਲਸ੍ਸ, ਆਜੀਵਸ੍ਸ ਵਾ ਵਿਪਤ੍ਤਿ. ਅਨਨ੍ਤਰਸ੍ਸ ਹਿ ਵਿਧਿ ਵਾ ਪਟਿਸੇਧੋ ਵਾ. ਕਾ ਸਮ੍ਪਤ੍ਤੀਤਿ ਏਤ੍ਥਾਪਿ ਏਸੇਵ ਨਯੋ.

ਯੋ ਕੋਚੀਤਿ ਖਤ੍ਤਿਯਾਦੀਸੁ ਯੋ ਕੋਚਿ. ਤੇਨ ਸਰਣਗਮਨਮੇਵੇਤ੍ਥ ਕਾਰਣਂ, ਨ ਜਾਤਿਆਦਿਵਿਸੇਸੋਤਿ ਦਸ੍ਸੇਤਿ. ਉਪਾਸਨਤੋਤਿ ਤੇਨੇਵ ਸਰਣਗਮਨੇਨ ਤਤ੍ਥ ਚ ਸਕ੍ਕਚ੍ਚਕਾਰਿਤਾਯ ਆਦਰਗਾਰਵਬਹੁਮਾਨਾਦਿਯੋਗੇਨ ਪਯਿਰੁਪਾਸਨਤੋ. ਵੇਰਮਣਿਯੋਤਿ ਵੇਰਂ ਵੁਚ੍ਚਤਿ ਪਾਣਾਤਿਪਾਤਾਦਿਦੁਸ੍ਸੀਲ੍ਯਂ, ਤਸ੍ਸ ਮਣਨਤੋ ਹਨਨਤੋ ਵਿਨਾਸਨਤੋ ਵੇਰਮਣਿਯੋ, ਪਞ੍ਚ ਵਿਰਤਿਯੋ ਵਿਰਤਿਪ੍ਪਧਾਨਤ੍ਤਾ ਤਸ੍ਸ ਸੀਲਸ੍ਸ. ਤੇਨੇਵਾਹ ਤਤ੍ਥ ਤਤ੍ਥ ‘‘ਪਟਿਵਿਰਤੋ ਹੋਤੀ’’ਤਿ.

ਮਿਚ੍ਛਾਵਣਿਜ੍ਜਾਤਿ ਨ ਸਮ੍ਮਾਵਣਿਜ੍ਜਾ ਅਯੁਤ੍ਤਵਣਿਜ੍ਜਾ ਅਸਾਰੁਪ੍ਪਵਣਿਜ੍ਜਾ. ਪਹਾਯਾਤਿ ਅਕਰਣੇਨੇਵ ਪਜਹਿਤ੍ਵਾ. ਧਮ੍ਮੇਨਾਤਿ ਧਮ੍ਮਤੋ ਅਨਪੇਤੇਨ. ਤੇਨ ਅਞ੍ਞਮ੍ਪਿ ਅਧਮ੍ਮਿਕਂ ਜੀਵਿਕਂ ਪਟਿਕ੍ਖਿਪਤਿ. ਸਮੇਨਾਤਿ ਅਵਿਸਮੇਨ. ਤੇਨ ਕਾਯਵਿਸਮਾਦਿਦੁਚ੍ਚਰਿਤਂ ਵਜ੍ਜੇਤ੍ਵਾ ਕਾਯਸਮਾਦਿਨਾ ਸੁਚਰਿਤੇਨ ਜੀਵਨਂ ਦਸ੍ਸੇਤਿ. ਸਤ੍ਥਵਣਿਜ੍ਜਾਤਿ ਆਵੁਧਭਣ੍ਡਂ ਕਤ੍ਵਾ ਵਾ ਕਾਰੇਤ੍ਵਾ ਵਾ ਯਥਾਕਤਂ ਵਾ ਪਟਿਲਭਿਤ੍ਵਾ ਤਸ੍ਸ ਵਿਕ੍ਕਯੋ. ਸਤ੍ਥਵਣਿਜ੍ਜਾਤਿ ਮਨੁਸ੍ਸਵਿਕ੍ਕਯੋ. ਮਂਸਵਣਿਜ੍ਜਾਤਿ ਸੂਨਕਾਰਾਦਯੋ ਵਿਯ ਮਿਗਸੂਕਰਾਦਿਕੇ ਪੋਸੇਤ੍ਵਾ ਮਂਸਂ ਸਮ੍ਪਾਦੇਤ੍ਵਾ ਵਿਕ੍ਕਯੋ. ਮਜ੍ਜਵਣਿਜ੍ਜਾਤਿ ਯਂ ਕਿਞ੍ਚਿ ਮਜ੍ਜਂ ਯੋਜੇਤ੍ਵਾ ਤਸ੍ਸ ਵਿਕ੍ਕਯੋ. ਵਿਸਵਣਿਜ੍ਜਾਤਿ ਵਿਸਂ ਯੋਜੇਤ੍ਵਾ, ਵਿਸਂ ਗਹੇਤ੍ਵਾ ਵਾ ਤਸ੍ਸ ਵਿਕ੍ਕਯੋ. ਤਤ੍ਥ ਸਤ੍ਥਵਣਿਜ੍ਜਾ ਪਰੋਪਰੋਧਨਿਮਿਤ੍ਤਤਾਯ ਅਕਰਣੀਯਾ ਵੁਤ੍ਤਾ, ਸਤ੍ਤਵਣਿਜ੍ਜਾ ਅਭੁਜਿਸ੍ਸਭਾਵਕਰਣਤੋ, ਮਂਸਵਿਸਵਣਿਜ੍ਜਾ ਵਧਹੇਤੁਤੋ, ਮਜ੍ਜਵਣਿਜ੍ਜਾ ਪਮਾਦਟ੍ਠਾਨਤੋ.

ਤਸ੍ਸੇਵਾਤਿ ਪਞ੍ਚਵੇਰਮਣਿਲਕ੍ਖਣਸ੍ਸ ਸੀਲਸ੍ਸ ਚੇਵ ਪਞ੍ਚਮਿਚ੍ਛਾਵਣਿਜ੍ਜਾਲਕ੍ਖਣਸ੍ਸ ਆਜੀਵਸ੍ਸ ਚ. ਵਿਪਤ੍ਤੀਤਿ ਭੇਦੋ ਪਕੋਪੋ ਚ. ਯਾਯਾਤਿ ਯਾਯ ਪਟਿਪਤ੍ਤਿਯਾ. ਚਣ੍ਡਾਲੋਤਿ ਉਪਾਸਕਚਣ੍ਡਾਲੋ. ਮਲਨ੍ਤਿ ਉਪਾਸਕਮਲਂ. ਪਤਿਕਿਟ੍ਠੋਤਿ ਉਪਾਸਕਨਿਹੀਨੋ. ਬੁਦ੍ਧਾਦੀਸੁ ਕਮ੍ਮਕਮ੍ਮਫਲੇਸੁ ਚ ਸਦ੍ਧਾਵਿਪਰਿਯਾਯੋ ਅਸ੍ਸਦ੍ਧਿਯਂ ਮਿਚ੍ਛਾਧਿਮੋਕ੍ਖੋ. ਯਥਾਵੁਤ੍ਤੇਨ ਅਸ੍ਸਦ੍ਧਿਯੇਨ ਸਮਨ੍ਨਾਗਤੋ ਅਸ੍ਸਦ੍ਧੋ. ਯਥਾਵੁਤ੍ਤ ਸੀਲਵਿਪਤ੍ਤਿ ਆਜੀਵਵਿਪਤ੍ਤਿਵਸੇਨ ਦੁਸ੍ਸੀਲੋ. ‘‘ਇਮਿਨਾ ਦਿਟ੍ਠਾਦਿਨਾ ਇਦਂ ਨਾਮ ਮਙ੍ਗਲਂ ਭਵਿਸ੍ਸਤੀ’’ਤਿ ਏਵਂ ਬਾਲਜਨਪਰਿਕਪ੍ਪਿਤਕੋਤੂਹਲਸਙ੍ਖਾਤੇਨ ਦਿਟ੍ਠਸੁਤਮੁਤਮਙ੍ਗਲੇਨ ਸਮਨ੍ਨਾਗਤੋ ਕੋਤੂਹਲਮਙ੍ਗਲਿਕੋ. ਮਙ੍ਗਲਂ ਪਚ੍ਚੇਤੀਤਿ ਦਿਟ੍ਠਮਙ੍ਗਲਾਦਿਭੇਦਂ ਮਙ੍ਗਲਮੇਵ ਪਤ੍ਤਿਯਾਯਤਿ. ਨੋ ਕਮ੍ਮਨ੍ਤਿ ਕਮ੍ਮਸ੍ਸਕਤਂ ਨੋ ਪਤ੍ਤਿਯਾਯਤਿ. ਇਤੋ ਬਹਿਦ੍ਧਾਤਿ ਇਤੋ ਸਬ੍ਬਞ੍ਞੁਬੁਦ੍ਧਸਾਸਨਤੋ ਬਹਿਦ੍ਧਾ ਬਾਹਿਰਕਸਮਯੇ. ਦਕ੍ਖਿਣੇਯ੍ਯਂ ਪਰਿਯੇਸਤੀਤਿ ਦੁਪ੍ਪਟਿਪਨ੍ਨਂ ਦਕ੍ਖਿਣਾਰਹਸਞ੍ਞੀ ਗਵੇਸਤਿ. ਪੁਬ੍ਬਕਾਰਂ ਕਰੋਤੀਤਿ ਦਾਨਮਾਨਨਾਦਿਕਂ ਕੁਸਲਕਿਰਿਯਂ ਪਠਮਂ ਕਰੋਤਿ. ਏਤ੍ਥ ਚ ਦਕ੍ਖਿਣੇਯ੍ਯਪਰਿਯੇਸਨਪੁਬ੍ਬਕਾਰੇ ਏਕਂ ਕਤ੍ਵਾ ਪਞ੍ਚ ਧਮ੍ਮਾ ਵੇਦਿਤਬ੍ਬਾ.

ਵਿਪਤ੍ਤਿਯਂ ਵੁਤ੍ਤਵਿਪਰਿਯਾਯੇਨ ਸਮ੍ਪਤ੍ਤਿ ਞਾਤਬ੍ਬਾ. ਅਯਂ ਪਨ ਵਿਸੇਸੋ – ਚਤੁਨ੍ਨਮ੍ਪਿ ਪਰਿਸਾਨਂ ਰਤਿਜਨਨਟ੍ਠੇਨ ਉਪਾਸਕੋਵ ਰਤਨਂ ਉਪਾਸਕਰਤਨਂ. ਗੁਣਸੋਭਾਕਿਤ੍ਤਿਸਦ੍ਦਸੁਗਨ੍ਧਤਾਹਿ ਉਪਾਸਕੋਵ ਪਦੁਮਂ ਉਪਾਸਕਪਦੁਮਂ. ਤਥਾ ਉਪਾਸਕਪੁਣ੍ਡਰੀਕੋ.

ਆਦਿਮ੍ਹੀਤਿ ਆਦਿਅਤ੍ਥੇ. ਕੋਟਿਯਨ੍ਤਿ ਪਰਿਯਨ੍ਤਕੋਟਿਯਂ. ਵਿਹਾਰਗ੍ਗੇਨਾਤਿ ਓਵਰਕਕੋਟ੍ਠਾਸੇਨ, ‘‘ਇਮਸ੍ਮਿਂ ਗਬ੍ਭੇ ਵਸਨ੍ਤਾਨਂ ਇਦਂ ਨਾਮ ਪਨਸਫਲਂ ਪਾਪੁਣਾਤੀ’’ਤਿਆਦਿਨਾ ਤਂਤਂਵਸਨਟ੍ਠਾਨਕੋਟ੍ਠਾਸੇਨਾਤਿ ਅਤ੍ਥੋ. ਅਜ੍ਜਤਨ੍ਤਿ ਅਜ੍ਜਇਚ੍ਚੇਵ ਅਤ੍ਥੋ.

ਪਾਣੇਹਿ ਉਪੇਤਨ੍ਤਿ ਇਮਿਨਾ ਤਸ੍ਸ ਸਰਣਗਮਨਸ੍ਸ ਆਪਾਣਕੋਟਿਕਤਂ ਦਸ੍ਸੇਨ੍ਤੋ ‘‘ਯਾਵ ਮੇ ਜੀਵਿਤਂ ਪਵਤ੍ਤਤੀ’’ਤਿਆਦਿਨਾ ਵਤ੍ਵਾ ਪੁਨ ਜੀਵਿਤੇਨ ਤਂ ਵਤ੍ਥੁਤ੍ਤਯਂ ਪਟਿਪੂਜੇਨ੍ਤੋ ‘‘ਸਰਣਗਮਨਂ ਰਕ੍ਖਾਮੀ’’ਤਿ ਉਪ੍ਪਨ੍ਨਂ ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਪ੍ਪਾਯਂ ਵਿਭਾਵੇਨ੍ਤੋ ‘‘ਅਹਞ੍ਹੀ’’ਤਿਆਦਿਮਾਹ. ਪਾਣੇਹਿ ਉਪੇਤਨ੍ਤਿ ਹਿ ਯਾਵ ਮੇ ਪਾਣਾ ਧਰਨ੍ਤਿ, ਤਾਵ ਸਰਣਂ ਉਪੇਤਂ, ਉਪੇਨ੍ਤੋ ਚ ਨ ਵਾਚਾਮਤ੍ਤੇਨ, ਨ ਏਕਵਾਰਂ ਚਿਤ੍ਤੁਪ੍ਪਾਦਨਮਤ੍ਤੇਨ, ਅਥ ਖੋ ਪਾਣੇ ਪਰਿਚ੍ਚਜਿਤ੍ਵਾਪਿ ਯਾਵਜੀਵਂ ਉਪੇਤਨ੍ਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋਤਿ.

ਉਪਾਸਕਵਿਧਿਕਥਾਵਣ੍ਣਨਾ ਨਿਟ੍ਠਿਤਾ.

ਭਯਭੇਰਵਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.