੭. ਵਤ੍ਥਸੁਤ੍ਤਵਣ੍ਣਨਾ

੭੦. ਛਾਦੇਤਬ੍ਬਂ ਠਾਨਂ ਵਸਤਿ ਪਟਿਚ੍ਛਾਦੇਤੀਤਿ ਵਤ੍ਥਂ. ਯਂ ਸਮਾਨਂ ਵਿਯ ਨ ਸਬ੍ਬਸੋ ਮਿਨੋਤਿ, ਮਾਨਸ੍ਸ ਪਨ ਸਮੀਪੇ, ਤਂ ਉਪਮਾਨਂ. ਉਪਮੀਯਤਿ ਏਤਾਯਾਤਿ ਉਪਮਾ, ਉਪਮਾਯ ਬੋਧਕਵਚਨਂ ਉਪਮਾਵਚਨਂ. ਕਤ੍ਥਚਿ ਸੁਤ੍ਤੇ. ਅਤ੍ਥਨ੍ਤਿ ਉਪਮਿਯਤ੍ਥਂ. ਪਠਮਂ ਉਪਮਂ ਵਤ੍ਵਾ ਤਦਨਨ੍ਤਰਂ ਅਤ੍ਥਂ ਵਤ੍ਵਾ ਪੁਨ ਉਪਮਂ ਵਦਨ੍ਤੋ ‘‘ਉਪਮਾਯ ਅਤ੍ਥਂ ਪਰਿਵਾਰੇਤ੍ਵਾ ਦਸ੍ਸੇਤੀ’’ਤਿ ਵੁਤ੍ਤੋ. ਅਤ੍ਥੇਨ ਉਪਮਂ ਪਰਿਵਾਰੇਤ੍ਵਾਤਿ ਏਤ੍ਥਾਪਿ ਏਸੇਵ ਨਯੋ. ਇਦਾਨਿ ਤੇ ਚਤ੍ਤਾਰੋਪਿ ਪਕਾਰੇ ਸੁਤ੍ਤੇ ਆਗਤਨਯੇਨੇਵ ਦਸ੍ਸੇਨ੍ਤੋ ‘‘ਸੇਯ੍ਯਥਾਪਿਸ੍ਸੁ, ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ ਦ੍ਵੇ ਅਗਾਰਾਤਿ ਦ੍ਵੇ ਪਟਿਵਿਸ੍ਸਕਘਰਾ. ਸਦ੍ਵਾਰਾਤਿ ਸਮ੍ਮੁਖਦ੍ਵਾਰਾ.

ਸ੍ਵਾਯਨ੍ਤਿ ਸੋ ਅਯਂ ਏਵਂ ਉਪਮਾਦਸ੍ਸਨਵਸੇਨਪਿ ਨਾਨਾਨਯੇਨਪਿ ਧਮ੍ਮਦੇਸਕੋ ਭਗਵਾ. ਏਕਚ੍ਚਾਨਂ ਵੇਨੇਯ੍ਯਾਨਂ ਅਤ੍ਥਸ੍ਸ ਸੁਖਾਵਬੋਧੋ ਪਠਮਂ ਉਪਮਾਦਸ੍ਸਨੇ ਹੇਤੁ, ਏਵਂ ਪਠਮਂ ਅਤ੍ਥਦਸ੍ਸਨੇ, ਉਪਮਾਯ ਅਤ੍ਥਪਰਿਵਾਰਣੇ, ਅਤ੍ਥੇਨ ਉਪਮਾਪਰਿਵਾਰਣੇ ਚਾ’’ਤਿ ਇਮਮਤ੍ਥਂ ਦਸ੍ਸੇਤਿ ‘‘ਏਸ ਨਯੋ ਸਬ੍ਬਤ੍ਥਾ’’ਤਿ ਇਮਿਨਾ. ਧਮ੍ਮਧਾਤੁਯਾਤਿ ਸਬ੍ਬਞ੍ਞੁਤਞ੍ਞਾਣਸ੍ਸ. ਤਞ੍ਹਿ ਧਮ੍ਮਧਾਤੁਪਰਿਯਾਪਨ੍ਨਤ੍ਤਾ ਯਥਾਵੁਤ੍ਤਧਮ੍ਮੇ ਚ ਸਬ੍ਬੇਪਿ ਞੇਯ੍ਯਧਮ੍ਮੇ ਚ ਪਦਹਤਿ ਯਥਾਸਭਾਵਤੋ ਬੁਜ੍ਝਤਿ ਬੋਧੇਤਿ ਚਾਤਿ ਧਾਤੁ, ਧੀਯਨ੍ਤਿ ਵਾ ਧਮ੍ਮਾ ਏਤਾਯ ਸਬ੍ਬਾਕਾਰਤੋ ਞਾਯਨ੍ਤਿ ਞਾਪਿਯਨ੍ਤਿ ਚਾਤਿ ਧਮ੍ਮਧਾਤੁ. ਤਸ੍ਸਾ ਪਨ ਸੁਟ੍ਠੁ ਸਚ੍ਚਸਮ੍ਪਟਿਵੇਧਵਸੇਨ ਲਦ੍ਧਤ੍ਤਾ ਸੁਪ੍ਪਟਿਵਿਦ੍ਧਤ੍ਤਾਤਿ, ਯਦਗ੍ਗੇਨ ਵਾ ਞੇਯ੍ਯਂ ਤਾਯ ਸੁਪ੍ਪਟਿਵਿਦ੍ਧਂ, ਤਦਗ੍ਗੇਨ ਸਾਪਿਸ੍ਸ ਸੁਪ੍ਪਟਿਵਿਦ੍ਧਾ ਏਵਾਤਿ ਆਹ ‘‘ਸੁਪ੍ਪਟਿਵਿਦ੍ਧਤ੍ਤਾ’’ਤਿ.

ਪਕਤਿਪਰਿਯੋਦਾਤਸ੍ਸ ਚਿਤ੍ਤਸ੍ਸ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਭਾਵਦਸ੍ਸਨਤ੍ਥਂ ਸਂਕਿਲਿਟ੍ਠਵਤ੍ਥਦਸ੍ਸਨਨ੍ਤਿ ਕਤ੍ਵਾ ਵੁਤ੍ਤਂ ‘‘ਪਕਤਿਪਰਿਸੁਦ੍ਧਂ ਵਤ੍ਥ’’ਨ੍ਤਿ. ਰਜਾਦਿਨਾਤਿ ਏਤ੍ਥਰਜੋ ਨਾਮ ਰੇਣੁ. ਆਦਿ-ਸਦ੍ਦੇਨ ਅਣੁਤਜ੍ਜਾਰਿਧੂਮਾਦਿਕਂ ਵਤ੍ਥਸ੍ਸ ਅਪਰਿਸੁਦ੍ਧਿਕਾਰਣਂ ਸਙ੍ਗਣ੍ਹਾਤਿ. ਸਬ੍ਬਸੋ ਕਿਲਿਸ੍ਸਤਿ ਵਿਨਸ੍ਸਤਿ ਵਿਸੁਦ੍ਧਿ ਏਤੇਨਾਤਿ ਸਂਕਿਲੇਸੋ, ਤੇਨ ਸਂਕਿਲੇਸੇਨ ਪਂਸੁਰਜਾਦਿਨਾ ਸਂਕਿਲਿਟ੍ਠਂ ਵਣ੍ਣਵਿਨਾਸਨੇਨ ਵਿਦੂਸਿਤਂ. ਮਲਂ ਮਸਿ. ਜਲ੍ਲਿਕਾ ਵੁਚ੍ਚਤਿ ਲੋਣਪਟਲਾਦਿ ਛਵਿਯਾ ਉਪਰਿ ਠਿਤਂ ਸਰੀਰਮਲਂ. ਆਦਿਸਦ੍ਦੇਨ ਸਰੀਰਜਲ੍ਲਮੇਵ ਅਸ੍ਸੁਖੇਲ਼ਸਿਙ੍ਘਾਣਿਕਾਦਿਕਂ ਤਦਞ੍ਞਮਲਂ ਸਙ੍ਗਣ੍ਹਾਤਿ. ਗਹਿਤਤ੍ਤਾਤਿ ਪਰਿਯੋਨਨ੍ਧਨਵਸੇਨ ਗਹਿਤਤ੍ਤਾ. ਰਜਨ੍ਤਿ ਸਤ੍ਤਾ ਤੇਨਾਤਿ ਰਙ੍ਗਂ, ਰਙ੍ਗਮੇਵ ਰਙ੍ਗਜਾਤਂ ਯਥਾ ਕੋਪਮੇਵ ਕੋਪਜਾਤਂ. ਉਪਨਾਮੇਯ੍ਯਾਤਿ ਪਕ੍ਖਿਪੇਯ੍ਯ. ਨੀਲਕਤ੍ਥਾਯਾਤਿ ਨੀਲਵਣ੍ਣਤ੍ਥਾਯ. ਪਲਾਸਨੀਲਾਦਿਕੇਤਿ ਆਦਿ-ਸਦ੍ਦੇਨ ਕਾਲ਼ਸਾਮਾਦਿਂ ਸਙ੍ਗਣ੍ਹਾਤਿ. ਹਲਿਦ੍ਦਿਕਕੁਧਸੇਲਾਦਿਕੇ ਪੀਤਕਰਙ੍ਗੇ. ਲਾਖਾਪਤ੍ਤਙ੍ਗਰਸਾਦਿਕੇ ਲੋਹਿਤਕਰਙ੍ਗੇ. ਮਹਾਰਜਨਲੋਦ੍ਦਕਨ੍ਦੁਲਾਦਿਕੇ ਮਨ੍ਦਰਤ੍ਤਰਙ੍ਗੇ. ਦੁਟ੍ਠੁ ਰਜਿਤਵਣ੍ਣਂ ਅਪਭਸ੍ਸਰਂ. ਤੇਨਾਹ ‘‘ਅਪਰਿਸੁਦ੍ਧਵਣ੍ਣਮੇਵਸ੍ਸਾ’’ਤਿ. ਈਦਿਸਨ੍ਤਿ ਦੁਰਤ੍ਤਵਣ੍ਣਂ. ਤਸ੍ਮਿਂ ਵਤ੍ਥੇ ਰਙ੍ਗਜਾਤਂ ਸਯਂ ਸੁਪਰਿਸੁਦ੍ਧਂ ਸਮਾਨਂ ਕਿਸ੍ਸ ਹੇਤੁ ਕੇਨ ਰਤ੍ਤਵਣ੍ਣਂ ਅਪਰਿਸੁਦ੍ਧਂ ਹੋਤੀਤਿ ਰਙ੍ਗਜਾਤਸ੍ਸ ਨਿਦ੍ਦੋਸਤਂ ਵਦਤਿ. ਤੇਨਾਹ ‘‘ਯਸ੍ਮਾ ਪਨਾ’’ਤਿਆਦਿ.

ਸਂਕਿਲੇਸਪਕ੍ਖਂ ਦਸ੍ਸੇਨ੍ਤੇਨ ਅਸਂਕਿਲਿਟ੍ਠਮੇਵ ਵਤ੍ਥਂ ਉਦਾਹਰਿਤਬ੍ਬਨ੍ਤਿ ਪਾਕਟੋਯਮਤ੍ਥੋ, ਸਂਕਿਲਿਟ੍ਠਵਤ੍ਥਨਿਦਸ੍ਸਨੇਨ ਪਨ ‘‘ਸਿਯਾ ਨੁ ਖੋ ਅਞ੍ਞੋਪਿ ਕੋਚਿ ਵਿਸੇਸੋ’’ਤਿ ਅਧਿਪ੍ਪਾਯੇਨ ਪੁਚ੍ਛਤਿ ‘‘ਕਸ੍ਮਾ ਪਨਾ’’ਤਿਆਦਿਨਾ. ਇਤਰੋ ਅਤ੍ਥਵਿਸੇਸੋਤਿ ਦਸ੍ਸੇਨ੍ਤੋ ‘‘ਵਾਯਾਮਮਹਪ੍ਫਲਦਸ੍ਸਨਤ੍ਥ’’ਨ੍ਤਿਆਦਿਮਾਹ. ਏਤ੍ਥ ਚ ਸਂਕਿਲਿਟ੍ਠਚਿਤ੍ਤਵਿਸੋਧਨਵਿਧਾਨੇ ਸਂਕਿਲਿਟ੍ਠਵਤ੍ਥਂ ਨਿਦਸ੍ਸਤਬ੍ਬਨ੍ਤਿ ਪਟਿਞ੍ਞਾ, ਵਾਯਾਮਮਹਪ੍ਫਲਦਸ੍ਸਨਤ੍ਥਨ੍ਤਿ ਹੇਤੁਅਤ੍ਥੋ. ਯਥਾ ਹੀਤਿਆਦਿ ਅਨ੍ਵਯਤ੍ਥੋ. ਨ ਤਤ੍ਥ ਜਾਤਿਕਾਲ਼ਕੇ ਵਿਯਾਤਿਆਦਿ ਬ੍ਯਤਿਰੇਕਤ੍ਥੋ. ਸਦਿਸੂਦਾਹਰਣਂ ਪਨ ਮਲਗ੍ਗਹਿਤਕਂਸਪਾਤਿਆਦਿ ਦਟ੍ਠਬ੍ਬਂ. ਏਵਂ ਚਿਤ੍ਤਮ੍ਪੀਤਿਆਦਿ ਓਪਮ੍ਮਤ੍ਥਸ੍ਸ ਉਪਮੇਯ੍ਯਉਪਨਯਨਂ. ਤਤ੍ਥ ਪਕਤਿਯਾਤਿ ਅਕਿਤ੍ਤਿਮੇਨ ਸਭਾਵੇਨ. ਤਨ੍ਤਿ ਚਿਤ੍ਤਂ. ਸਾਮਞ੍ਞਗ੍ਗਹਣਞ੍ਚੇਤਂ ਚਿਤ੍ਤਭਾਵਾਵਿਸੇਸਤੋ. ਤੇਨਾਹ ‘‘ਸਕਲੇਪੀ’’ਤਿ. ਪਣ੍ਡਰਮੇਵ ਨ ਸਂਕਿਲਿਟ੍ਠਂ ਸਂਕਿਲੇਸੇਹਿ ਅਸਮਨ੍ਨਾਗਤਭਾਵਤੋ. ਨਨੁ ਕਿਰਿਯਾਮਯਚਿਤ੍ਤੇਹਿ ਵਿਪਾਕਸਨ੍ਤਾਨੇ ਵਿਸੇਸਾਧਾਨਂ ਲਬ੍ਭਤਿ, ਅਞ੍ਞਥਾ ਕਤਵਿਨਾਸਾ ਕਤਬ੍ਭਾਗਮਾ ਆਪਜ੍ਜੇਯ੍ਯੁਂ? ਕਿਞ੍ਚਾਪਿ ਲਬ੍ਭਤਿ, ਤਸ੍ਸ ਸਂਕਿਲੇਸੋ ਵਟ੍ਟੁਪਨਿਸ੍ਸਯੋ, ਅਸੁਦ੍ਧਿ ਵਾ ਨ ਹੋਤਿ, ਅਸਂਕਿਲੇਸੋ ਵਿਵਟ੍ਟੁਪਨਿਸ੍ਸਯੋ, ਵਿਸੁਦ੍ਧਿ ਵਾ ਨ ਹੋਤਿ ਏਵ. ਉਪਕ੍ਕਿਲਿਟ੍ਠਨ੍ਤਿ ਪਨੇਤਂ ਉਪਕ੍ਕਿਲੇਸਨਾਰਹਸ੍ਸ ਚਿਤ੍ਤਸ੍ਸ ਵਸੇਨ ਵੁਤ੍ਤਂ, ਨ ਵਿਪਾਕਪਬਨ੍ਧਸ੍ਸ. ਤੇਨਾਹ ‘‘ਪਭਸ੍ਸਰਮਿਦਂ ਭਿਕ੍ਖਵੇ ਚਿਤ੍ਤ’’ਨ੍ਤਿ, ‘‘ਪਣ੍ਡਰਮੇਵਾ’’ਤਿ ਚ. ਤਞ੍ਚ ਖੋਤਿ ਪਨ ਸਕਸਨ੍ਤਤਿਪਰਿਯਾਪਨ੍ਨਤਾਯ ਨੇਸਂ ਕੇਵਲਂ ਏਕਤ੍ਤਨਯਵਸੇਨ ਵੁਤ੍ਤਂ, ਨ ਵਿਪਾਕਧਮ੍ਮਾਨਂ ਕਿਲੇਸਾਸਮਙ੍ਗਿਭਾਵਤੋ. ਅਥ ਵਾ ਉਪਕ੍ਕਿਲਿਟ੍ਠਨ੍ਤਿ ਇਮਿਨਾ ਉਪਕ੍ਕਿਲੇਸਹੇਤੁ ਤਤ੍ਥ ਵਿਜ੍ਜਮਾਨਂ ਵਿਸੇਸਾਧਾਨਮਾਹ, ਨ ‘‘ਸਂਕਿਲਿਟ੍ਠਾ ਧਮ੍ਮਾ’’ਤਿਆਦੀਸੁ (ਧ. ਸ. ੭੭.ਦੁਕਮਾਤਿਕਾ) ਵਿਯ ਤਂਸਮਙ੍ਗਿਤਨ੍ਤਿ ਦਟ੍ਠਬ੍ਬਂ. ਵਿਸੋਧਿਯਮਾਨਨ੍ਤਿ ਵਿਪਸ੍ਸਨਾਪਞ੍ਞਾਯ ਅਨੁਕ੍ਕਮੇਨ ਸਬ੍ਬੁਪਕ੍ਕਿਲੇਸੇਹਿ ਵਿਮੋਚਿਯਮਾਨਂ. ਸਕ੍ਕਾ ਅਗ੍ਗਮਗ੍ਗਕ੍ਖਣੇ ਪਭਸ੍ਸਰਤਰਂ ਕਾਤੁਂ, ਯਤੋ ਨ ਪੁਨ ਉਪਕ੍ਕਿਲਿਸ੍ਸਤਿ. ਏਵਨ੍ਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਂ.

ਦੁਟ੍ਠਗਤਿਪਰਿਪੂਰਣਵਸੇਨ ਪਟਿਪਜ੍ਜਨਂ ਪਟਿਪਤ੍ਤਿ. ਸਾ ਏਵ ਕਿਲੇਸਦਰਥਪਰਿਲ਼ਾਹਾਦਿਵਸੇਨ ਉਪਾਯਾਸਦੁਕ੍ਖਾ, ਕੁਚ੍ਛਿਤਾ ਵਾ ਗਤਿ ਪਵਤ੍ਤਿ, ਦੁਗ੍ਗਤਿਹੇਤੂਤਿ ਵਾ ਦੁਗ੍ਗਤਿ, ਦੁਗ੍ਗਤਿਯਾ ਪਨ ਪਟਿਪਤ੍ਤਿਯਾ ਗਨ੍ਧਬ੍ਬਤੋ, ਤਸ੍ਸਾ ਵਾ ਨਿਪ੍ਫਨ੍ਨਭਾਵਤੋ ਕੁਚ੍ਛਿਤੋ, ਦੁਕ੍ਖਾ ਚ ਗਤੀਤਿ ਦੁਗ੍ਗਤਿ. ਸਂਕਿਲਿਟ੍ਠਚਿਤ੍ਤੋਤਿ ਇਦਂ ਤਸ੍ਸਾ ਪਟਿਪਤ੍ਤਿਯਾ ਦੁਗ੍ਗਤਿਭਾਵਦਸ੍ਸਨਤ੍ਥਂ, ਨ ਵਿਸੇਸਨਤ੍ਥਂ. ਨ ਹਿ ਅਸਂਕਿਲਿਟ੍ਠਚਿਤ੍ਤਸ੍ਸ ਪਾਣਘਾਤਾਦਿਵਸੇਨ ਪਵਤ੍ਤਿ. ਸਂਕਿਲਿਟ੍ਠਚਿਤ੍ਤੋਤਿ ਲਾਭਾਸਾਯ ਸਬ੍ਬਸੋ ਕਿਲਿਟ੍ਠਚਿਤ੍ਤੋ. ਦੂਤੇਯ੍ਯਪਹਿਣਗਮਨਨ੍ਤਿ ਦੂਤੇਯ੍ਯਂ ਵੁਚ੍ਚਤਿ ਦੁਤਕਮ੍ਮਂ, ਗਿਹੀਨਂ ਪਣ੍ਣਂ ਵਾ ਸਾਸਨਂ ਵਾ ਗਹੇਤ੍ਵਾ ਤਤ੍ਥ ਤਤ੍ਥ ਗਮਨਂ, ਪਹਿਣਗਮਨਂ ਘਰਾਘਰਂ ਪੇਸਿਤਸ੍ਸ ਖੁਦ੍ਦਕਗਮਨਂ, ਦੂਤੇਯ੍ਯਗਮਨਂ ਪਹਿਣਗਮਨਞ੍ਚ ਗਚ੍ਛਤਿ. ਵੇਜ੍ਜਕਮ੍ਮਨ੍ਤਿ ਅਨਨੁਞ੍ਞਾਤੇ ਠਾਨੇ ਲਾਭਾਸਾਯ ਗਹਟ੍ਠਾਨਂ ਭੇਸਜ੍ਜਂ ਕਰੋਤਿ. ਸਙ੍ਘਭੇਦਕਥਾ ਪਰਤੋ ਆਗਮਿਸ੍ਸਤਿ. ਵੇਲ਼ੁਦਾਨਾਦੀਹੀਤਿ ਵੇਲ਼ੁਦਾਨਪਤ੍ਤਦਾਨਪੁਪ੍ਫਦਾਨਾਦੀਹਿ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਤਿ. ਸਕਲਮ੍ਪੀਤਿ ‘‘ਅਤ੍ਥਿ ਅਨਾਚਾਰੋ, ਅਤ੍ਥਿ ਅਗੋਚਰੋ’’ਤਿਆਦਿਨਾ ਵਿਭਙ੍ਗੇ (ਵਿਭ. ੫੧੩, ੫੧੪) ਆਗਤਂ ਸਬ੍ਬਮ੍ਪਿ ਅਨਾਚਾਰਂ ਅਗੋਚਰਞ੍ਚ ਚਰਣਵਸੇਨ ਪਰਿਪੂਰੇਤਿ.

‘‘ਨਿਰਯਮ੍ਪਿ …ਪੇ… ਪੇਤ੍ਤਿਵਿਸਯਮ੍ਪਿ ਗਚ੍ਛਤੀ’’ਤਿ ਵਤ੍ਵਾ ਤਤ੍ਥ ਪੇਤ੍ਤਿਵਿਸਯਗਮਨਂ ਦਸ੍ਸੇਨ੍ਤੋ ‘‘ਸਮਣਯਕ੍ਖੋ ਨਾਮ ਹੋਤੀ’’ਤਿਆਦਿਮਾਹ.

ਸੁਕ੍ਕਪਕ੍ਖੇ ਪਰਿਸੁਦ੍ਧਨ੍ਤਿ ਸਬ੍ਬਸੋ ਵਿਸੁਦ੍ਧਂ ਅਸਂਕਿਲਿਟ੍ਠਂ. ਪਰਿਸੁਦ੍ਧਤ੍ਤਾ ਏਵ ਪਰਿਯੋਦਾਤਂ, ਪਭਸ੍ਸਰਨ੍ਤਿ ਅਤ੍ਥੋ. ਸੁਰਤ੍ਤਵਣ੍ਣਮੇਵਸ੍ਸਾਤਿ ਸੁਟ੍ਠੁ ਰਤ੍ਤਵਣ੍ਣਮੇਵ ਅਸ੍ਸ. ਪਰਿਸੁਦ੍ਧਵਣ੍ਣਮੇਵਸ੍ਸਾਤਿ ਨੀਲਵਣ੍ਣੋਪਿਸ੍ਸ ਪਰਿਸੁਦ੍ਧੋ ਚ ਭਵੇਯ੍ਯਾਤਿ ਏਵਮਾਦਿਂ ਸਨ੍ਧਾਯਾਹ ‘‘ਕਣ੍ਹਪਕ੍ਖੇ ਵੁਤ੍ਤਪਚ੍ਚਨੀਕੇਨੇਵ ਵੇਦਿਤਬ੍ਬਾ’’ਤਿ. ਰਙ੍ਗਜਾਤਨ੍ਤਿਆਦਿ ਪਨ ਤਤ੍ਥ ਵੁਤ੍ਤਵਸੇਨੇਵ ਵੇਦਿਤਬ੍ਬਂ. ਪਟਿਪਤ੍ਤਿਸੁਗਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਪਟਿਪਤ੍ਤਿਦੁਗ੍ਗਤਿਆਦੀਸੁ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਂ. ਪਰਿਸੁਦ੍ਧਚਿਤ੍ਤੋਤਿ ਸੁਦ੍ਧਾਸਯੋ. ਦਸ ਕੁਸਲਕਮ੍ਮਪਥੇ ਪਰਿਪੂਰੇਤੀਤਿ ਇਦਂ ਕਣ੍ਹਪਕ੍ਖੇ ‘‘ਦਸ ਅਕੁਸਲਕਮ੍ਮਪਥੇ ਪਰਿਪੂਰੇਤੀ’’ਤਿ ਵੁਤ੍ਤਸ੍ਸ ਪਟਿਪਕ੍ਖਦਸ੍ਸਨਵਸੇਨ ਵੁਤ੍ਤਂ. ਯਥਾ ਹਿ ਤਤ੍ਥ ਅਭਿਜ੍ਝਾਬ੍ਯਾਪਾਦਮਿਚ੍ਛਾਦਿਟ੍ਠਿਗ੍ਗਹਣੇਨ ਕਮ੍ਮਪਥਸਂਸਨ੍ਦਨਨਯੇਨ ਕਮ੍ਮਪਥਂ ਅਪ੍ਪਤ੍ਤਾਯ ਚ ਅਗਾਰਿਯਸ੍ਸ ਤਥਾਰੂਪਾਯ ਮਿਚ੍ਛਾਪਟਿਪਤ੍ਤਿਯਾ ਸਙ੍ਗਹੋ ਇਚ੍ਛਿਤੋ, ਏਵਂ ਇਧਾਪਿ ਅਨਭਿਜ੍ਝਾਅਬ੍ਯਾਪਾਦਸਮ੍ਮਾਦਿਟ੍ਠਿਗ੍ਗਹਣੇਨ ਅਲੋਭਾਦੋਸਾਮੋਹਵਸੇਨ ਪਵਤ੍ਤਾ ਅਗਾਰਿਯਸ੍ਸ ਸਮ੍ਮਾਪਟਿਪਤ੍ਤਿ ਸਙ੍ਗਹਿਤਾਤਿ ਦਟ੍ਠਬ੍ਬਂ, ਨ ਕਮ੍ਮਪਥਪ੍ਪਤ੍ਤਾਵਾਤਿ. ਮਨੁਸ੍ਸਮਹਨ੍ਤਤਨ੍ਤਿ ਜਾਤਿਰੂਪਭੋਗਾਧਿਪਤੇਯ੍ਯਾਦਿਵਸੇਨ ਮਨੁਸ੍ਸੇਸੁ ਮਹਨ੍ਤਭਾਵਂ. ਦਸਹਿ ਠਾਨੇਹਿ ਅਞ੍ਞੇਸਂ ਦੇਵਾਨਂ ਅਭਿਭਵੋ ਦੇਵਮਹਨ੍ਤਤਾ. ਪਟਿਪਤ੍ਤਿ ਸੁਗਤਿਯਾ ਭਾਜਿਯਮਾਨਤ੍ਤਾ ‘‘ਅਨਾਗਾਮਿਮਗ੍ਗਂ ਭਾਵੇਤੀ’’ਤਿ ਤਥਾ ਅਨਾਗਾਮਿਭਾਵਨਂ ਪਾਪੇਤ੍ਵਾ ਠਪਿਤਾ. ਗਹਿਤਗ੍ਗਹਣੇਨ ਸੁਖਾਨੁਭਵਟ੍ਠਾਨਸ੍ਸ ਅਧਿਪ੍ਪੇਤਤ੍ਤਾ ਤਦਭਾਵਤੋ ਅਸਞ੍ਞਿਭਵਂ ਅਨਾਦਿਯਨ੍ਤੋ ‘‘ਦਸਸੁ ਵਾ ਬ੍ਰਹ੍ਮਭਵਨੇਸੂ’’ਤਿਆਦਿਮਾਹ.

੭੧. ਸਕਭਣ੍ਡੇ ਛਨ੍ਦਰਾਗੋ ਅਭਿਜ੍ਝਾਯਨਟ੍ਠੇਨ ਅਭਿਜ੍ਝਾ, ਅਭਿਜ੍ਝਾਯਨਾਤਿ ਅਤ੍ਥੋ. ਪਰਭਣ੍ਡੇ ਛਨ੍ਦਰਾਗੋ ਵਿਸਮਂ ਲੁਬ੍ਭਤੀਤਿ ਵਿਸਮਲੋਭੋ. ਏਵਮ੍ਪਿ ਅਭਿਜ੍ਝਾਵਿਸਮਲੋਭਾਨਂ ਵਿਸੇਸੋ ਹੋਤੀਤਿ ਦਸ੍ਸੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਤਤ੍ਥ ਅਤ੍ਤਨੋ ਸਨ੍ਤਕਂ ਤਂਸਦਿਸਞ੍ਚ ਯੁਤ੍ਤਟ੍ਠਾਨਂ. ਯਂ ਯਾਚਿਤਂ, ਅਪ੍ਪਕਸਿਰੇਨ ਵਾ ਸਕ੍ਕਾ ਲਦ੍ਧੁਂ, ਤਂ ਪਤ੍ਤਟ੍ਠਾਨਂ. ਪਰਦਾਰਗਰੁਦਾਰਾਤਿ ਅਯੁਤ੍ਤਟ੍ਠਾਨਂ. ਯਂ ਅਪਤ੍ਥਨਿਯਂ, ਯਸ੍ਸ ਵਾ ਪਤ੍ਥਨਾਯ ਬ੍ਯਸਨਂ ਆਪਜ੍ਜਤਿ, ਤਂ ਅਪ੍ਪਤ੍ਤਟ੍ਠਾਨਂ. ਥੇਰੋਤਿ ਮਹਾਸਙ੍ਘਰਕ੍ਖਿਤਤ੍ਥੇਰੋ, ਯੇਨ ਅਟ੍ਠਕਥਾ ਪੋਤ੍ਥਕਂ ਆਰੋਪਿਤਾ. ਸੋ ਹਿ ਅਨ੍ਤੇਵਾਸਿਕੇਸੁ ਸਾਕਚ੍ਛਨ੍ਤੇਸੁ ਏਵਮਾਹ. ਸੋਪਿ ਇਮਸ੍ਮਿਂਯੇਵ ਸੁਤ੍ਤੇ ਵਿਨਿਬ੍ਭੋਗੋ ਨ ਲਬ੍ਭਤਿ ਚਿਤ੍ਤਸਂਕਿਲੇਸਸ੍ਸ ਅਧਿਪ੍ਪੇਤਤ੍ਤਾ. ਤੇਨਾਹ ‘‘ਯੁਤ੍ਤੇ ਵਾ’’ਤਿਆਦਿ. ਅਯੋਨਿਸੋਮਨਸਿਕਾਰਵਸੇਨ ਉਪ੍ਪਜ੍ਜਨਤੋ ਸਮ੍ਪਤ੍ਤਿ ਆਯਤਿਞ੍ਚ ਦੁਕ੍ਖਸ੍ਸੇਵ ਉਪ੍ਪਾਦਨਤੋ ਨ ਕੋਚਿ ਲੋਭੋ ਅਵਿਸਮੋ ਨਾਮ. ਅਭਿਜ੍ਝਾਯਨਟ੍ਠੇਨਾਤਿ ਯਸ੍ਸ ਕਸ੍ਸਚਿ ਆਰਮ੍ਮਣਸ੍ਸ ਯੁਤ੍ਤਸ੍ਸ ਅਯੁਤ੍ਤਸ੍ਸ ਅਪ੍ਪਤ੍ਤਸ੍ਸ ਚ ਅਭਿਜ੍ਜਾਯਨਵਸੇਨ ਅਭਿਪਤ੍ਥਨਾਵਸੇਨ ਚ ਪਵਤ੍ਤਾ ਤਣ੍ਹਾ ਅਭਿਜ੍ਝਾਤਿ ਲੋਭਤੋ ਨਿਬ੍ਬਿਸੇਸਨ੍ਤਿ ਦਸ੍ਸੇਤਿ. ਤੇਨਾਹ ‘‘ਏਕਤ੍ਥਮੇਤਂ ਬ੍ਯਞ੍ਜਨਮੇਵ ਨਾਨ’’ਨ੍ਤਿ. ਦੂਸੇਤੀਤਿ ਸਭਾਵਸਨ੍ਤਂ ਅਸਂਕਿਲੇਸਂ ਵਿਨਾਸੇਤਿ ਅਵਿਸੁਦ੍ਧਂ ਕਰੋਤਿ. ਤੇਨਾਹ ‘‘ਓਭਾਸਿਤੁਂ ਨ ਦੇਤੀ’’ਤਿ. ‘‘ਇਮੇ ਸਤ੍ਤਾ ਉਚ੍ਛਿਜ੍ਜਨ੍ਤੁ ਵਿਨਸ੍ਸਨ੍ਤੂ’’ਤਿ ਸਤ੍ਤੇਸੁ ਬ੍ਯਾਪਜ੍ਜਨਾਕਾਰਪ੍ਪਵਤ੍ਤਿਯਾ ਬ੍ਯਾਪਾਦੋ ਨਵਵਿਧਆਘਾਤਵਤ੍ਥੁਸਮ੍ਭਵੋ ਵੁਤ੍ਤੋ. ਕੋਧੋ ਪਨ ਸਙ੍ਖਾਰੇਸੁਪਿ ਪਵਤ੍ਤਨਤੋ ਦਸਵਿਧਆਘਾਤਵਤ੍ਥੁਸਮ੍ਭਵੋ ਵੁਤ੍ਤੋ. ਉਭਯਮ੍ਪਿ ਪਟਿਘਮੇਵ, ਪਵਤ੍ਤਨਾਨਤ੍ਤਤੋ ਭਿਨ੍ਦਿਤ੍ਵਾ ਵੁਤ੍ਤੋ. ਕੁਜ੍ਝਨਵਸੇਨੇਵ ਚਿਤ੍ਤਪਰਿਯੋਨਨ੍ਧਨੋ ‘‘ਅਕ੍ਕੋਚ੍ਛਿ ਮਂ ਅਵਧਿ ਮ’’ਨ੍ਤਿਆਦਿਨਾ.

ਸੁਟ੍ਠੁ ਕਤਂ ਕਰਣਂ ਸੁਕਤਂ, ਤਸ੍ਸ ਪੁਬ੍ਬਕਾਰਿਤਾਲਕ੍ਖਣਸ੍ਸ ਗੁਣਸ੍ਸ ਵਿਨਾਸਨੋ ਉਦਕਪੁਞ੍ਛਨਿਯਾ ਵਿਯ ਸਰੀਰਾਨੁਗਤਂ ਉਦਕਂ ਪੁਞ੍ਛਨ੍ਤੋ ਮਕ੍ਖੋ. ਤਥਾ ਹਿ ਸੋ ਪਰੇਸਂ ਗੁਣਾਨਂ ਮਕ੍ਖਨਟ੍ਠੇਨ ‘‘ਮਕ੍ਖੋ’’ਤਿ ਵੁਚ੍ਚਤਿ. ਇਦਾਨਿ ਅਨਗਾਰਿਯਸ੍ਸ ਵਾਤਿਆਦਿਨਾ ਸਙ੍ਖੇਪੇਨ ਵੁਤ੍ਤਤ੍ਥਂ ਵਿਤ੍ਥਾਰੇਨ ਦਸ੍ਸੇਤੁਂ ‘‘ਅਨਗਾਰਿਯੋਪੀ’’ਤਿਆਦਿ ਵੁਤ੍ਤਂ. ਨਿਸਿਨ੍ਨਕਥਾਪਰਿਕਥਾਦਿਵਸੇਨ ਧਮ੍ਮਸ੍ਸ ਕਥਾ ਧਮ੍ਮਕਥਾਨਯੋ, ਏਕਤ੍ਤਾਦਿਧਮ੍ਮਨੀਤਿ ਏਵ ਵਾ. ਪਕਰਣਂ ਸਤ੍ਤ ਪਕਰਣਾਨਿ, ਤਤ੍ਥ ਕੋਸਲ੍ਲਂ ਧਮ੍ਮਕਥਾਨਯਪਕਰਣਕੋਸਲ੍ਲਂ. ਆਦਿ-ਸਦ੍ਦੇਨ ਵਿਨਯਕ੍ਕਮੇ ਚਤੂਸੁ ਮਹਾਨਿਕਾਯੇਸੁ ਚ ਕੋਸਲ੍ਲਂ ਸਙ੍ਗਣ੍ਹਾਤਿ. ਅਚਿਤ੍ਤੀਕਤੋਤਿ ਚਿਤ੍ਤੀਕਾਰਰਹਿਤੋ. ਯਥਾ ਚਾਯਨ੍ਤਿ ਇਮਿਨਾ ਯਥਾਯਂ ਮਕ੍ਖੋ ਚਿਤ੍ਤਂ ਦੂਸੇਤਿ, ਏਵਂ ਪਲ਼ਾਸੋਪਿ ਚਿਤ੍ਤਂ ਦੂਸੇਤਿ, ਤਸ੍ਮਾ ਉਪਕ੍ਕਿਲੇਸੋਤਿ ਦਸ੍ਸੇਤਿ. ਅਨਿਯਤਾ ਗਤਿ ਨਿਯਾਮੋਕ੍ਕਮਨਾਭਾਵਤੋ. ਆਦਿ-ਸਦ੍ਦੇਨ ‘‘ਰਤ੍ਤਞ੍ਞੂ ਚਿਰਪਬ੍ਬਜਿਤੇ ਪੁਗ੍ਗਲੇ ਅਜ੍ਝੋਤ੍ਥਰਿਤ੍ਵਾ ‘ਤ੍ਵਮ੍ਪਿ ਇਮਸ੍ਮਿਂ ਸਾਸਨੇ ਪਬ੍ਬਜਿਤੋ, ਅਹਮ੍ਪਿ ਪਬ੍ਬਜਿਤੋ, ਤ੍ਵਮ੍ਪਿ ਸੀਲਮਤ੍ਤੇ ਠਿਤੋ ਅਹਮ੍ਪੀ’ਤਿ’’ ਏਵਮਾਦੀਨਂ ਸਙ੍ਗਹੋ. ਯੁਗਗ੍ਗਾਹਗਾਹੀਤਿ ‘‘ਤਵ ਵਾ ਮਮ ਵਾ ਕੋ ਵਿਸੇਸੋ’’ਤਿ ਅਸਮਮ੍ਪਿ ਸਮਂ ਕਤ੍ਵਾ ਸਮਧੁਰਗ੍ਗਾਹਗਣ੍ਹਨਕੋ. ਖੀਯਨਾ ਉਸੂਯਨਾ. ਅਤ੍ਤਨੋ ਸਮ੍ਪਤ੍ਤਿਯਾ ਨਿਗੂਹਨਂ ਤਸ੍ਸ ਪਰੇਹਿ ਸਾਧਾਰਣਭਾਵਾਸਹਨੇਨ ਹੋਤੀਤਿ ‘‘ਪਰੇਹਿ ਸਾਧਾਰਣਭਾਵਂ ਅਸਹਮਾਨਂ’’ਇਚ੍ਚੇਵ ਵੁਤ੍ਤਂ. ਕਾਰਣੇ ਹਿ ਗਹਿਤੇ ਫਲਮ੍ਪਿ ਗਹਿਤਮੇਵ ਹੋਤੀਤਿ. ਅਞ੍ਞਥਾ ਅਤ੍ਤਨੋ ਪਵੇਦਨਕਪੁਗ੍ਗਲੋ ਕੇਰਾਟਿਕੋ, ‘‘ਨੇਕਤਿਕਵਾਣਿਜੋ’’ਤਿਪਿ ਵਦਨ੍ਤਿ. ਸਪ੍ਪਮੁਖਾ ਮਚ੍ਛਵਾਲਾ ਏਕਾ ਮਚ੍ਛਜਾਤਿ ਆਯਤਨਮਚ੍ਛੋ. ਤੇਨਾਹ ‘‘ਆਯਤਨਮਚ੍ਛੋ ਨਾਮਾ’’ਤਿਆਦਿ. ਬਦ੍ਧਚਰੋਤਿ ਅਨ੍ਤੇਵਾਸੀ.

ਸਬ੍ਬਸੋ ਅਮਦ੍ਦਿਤਸਭਾਵੇਨ ਵਾ ਤਭਰਿਤਭਤ੍ਤਸਦਿਸਸ੍ਸ ਥਦ੍ਧਭਾਵਸ੍ਸ ਅਨੋਨਮਿਤਦਣ੍ਡਸਦਿਸਤਾਯ ਪਗ੍ਗਹਿਤਸਿਰਅਨਿਵਾਤਵੁਤ੍ਤਿਕਾਰਸ੍ਸ ਚ ਕਰਣਤੋ ਵਾ ਤਭਰਿਤ…ਪੇ… ਕਰਣੋ. ਤਦੁਤ੍ਤਰਿਕਰਣੋਤਿ ਯਂ ਯੇਨ ਕਤਂ ਦੁਚ੍ਚਰਿਤਂ ਵਾ ਸੁਚਰਿਤਂ ਵਾ, ਤਦੁਤ੍ਤਰਿ, ਤਸ੍ਸ ਦ੍ਵਿਗੁਣਂ ਵਾ ਕਰਣੋ. ਅਤ੍ਤਨੋ ਮਣ੍ਡਨਾਦਿਅਤ੍ਥਂ ਪਰੇਨ ਕਤਂ ਅਲਙ੍ਕਾਰਾਦਿਂ. ਪਰਿਯਾਪੁਣਾਤਿ ਵਾ ਕਥੇਤਿ ਵਾ ਅਤ੍ਤਨੋ ਬਲਾਨੁਰੂਪਂ. ਕਾਮਂ ਨਿਕਾਯਦ੍ਵਯਗ੍ਗਹਣਾਦਿਵਸੇਨ ਪਵਤ੍ਤੋ ਸੇਵਿਤਬ੍ਬਮਾਨੋ ਏਵ, ਤਥਾਪਿਸ੍ਸ ਸਂਕਿਲੇਸਪਕ੍ਖਤ੍ਤਾ ਵੁਤ੍ਤਂ ‘‘ਮਾਨਂ ਅਨਿਸ੍ਸਾਯਾ’’ਤਿ.

ਉਣ੍ਣਤਿਵਸੇਨਾਤਿ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਚਿਤ੍ਤਸ੍ਸ ਪਗ੍ਗਹਣਵਸੇਨ. ਪੁਬ੍ਬੇ ਕੇਨਚਿ ਅਤ੍ਤਾਨਂ ਸਦਿਸਂ ਕਤ੍ਵਾ ਪਚ੍ਛਾ ਤਤੋ ਅਧਿਕਤੋ ਦਹਨਤੋ ਉਪ੍ਪਜ੍ਜਨਕੋ ਅਤਿਮਾਨੋ. ਮਦਗ੍ਗਹਣਾਕਾਰੋ ਜਾਤਿਆਦਿਂ ਪਟਿਚ੍ਚ ਮਜ੍ਜਨਾਕਾਰੋ, ਸੋਪਿ ਅਤ੍ਥਤੋ ਮਾਨੋ ਏਵ. ਪਮਾਦੋ ਤਥਾਪਵਤ੍ਤੋ ਚਿਤ੍ਤੁਪ੍ਪਾਦੋ.

ਤਸ੍ਮਾ ਲੋਭਮਾਦਿਂ ਕਤ੍ਵਾ ਦਸ੍ਸੇਤੀਤਿ ਲੋਭਸ੍ਸ ਆਦਿਤੋ ਗਹਣੇ ਕਾਰਣਂ ਵਿਭਾਵੇਤੁਕਾਮੋ ਪੁਚ੍ਛਤਿ. ਪਠਮੁਪ੍ਪਤ੍ਤਿਤੋਤਿ ਤਤ੍ਥ ਤਤ੍ਥ ਭਵੇ ਸਬ੍ਬਪਠਮਂ ਉਪ੍ਪਜ੍ਜਨਤੋ. ਸਤ੍ਤਾਨਞ੍ਹਿ ਯਥਾਧਿਗਤਂ ਝਾਨਾਦਿਵਿਸੇਸਂ ਆਰਬ੍ਭ ਪਚ੍ਚਵੇਕ੍ਖਣਾ ਵਿਯ ਯਥਾਲਦ੍ਧਂ ਉਪਪਤਿਭਵਂ ਆਰਬ੍ਭ ਨਿਕਨ੍ਤਿ ਏਵ. ਤੇਨਾਹ ‘‘ਸਬ੍ਬਸਤ੍ਤਾਨ’’ਨ੍ਤਿਆਦਿ. ਯਥਾਸਮ੍ਭਵਂ ਇਤਰੇਤਿ ਇਤਰੇ ਬ੍ਯਾਪਾਦਾਦਯੋ ਯਥਾਪਚ੍ਚਯਂ ਉਪ੍ਪਜ੍ਜਨ੍ਤਿ, ਲੋਭਸ੍ਸ ਵਿਯ ਆਦਿਤੋ ਅਸੁਕਸ੍ਸ ਅਨਨ੍ਤਰਂ ਅਸੁਕੋਤਿ ਵਾ ਨ ਨੇਸਂ ਨਿਯਮੋ ਅਤ੍ਥੀਤਿ ਅਤ੍ਥੋ. ਕਿਂ ਪਨ ਏਤੇ ਸੋਲ਼ਸੇਵ ਚਿਤ੍ਤਸ੍ਸ ਉਪਕ੍ਕਿਲੇਸਾ, ਉਦਾਹੁ ਅਞ੍ਞੇਪਿ ਸਨ੍ਤੀਤਿ ਅਨੁਯੋਗਂ ਸਨ੍ਧਾਯ ਅਞ੍ਞੇਪਿ ਸਨ੍ਤੀਤਿ ਦਸ੍ਸੇਨ੍ਤੋ ‘‘ਨ ਚ ਏਤੇ’’ਤਿਆਦਿਮਾਹ. ਯਦਿ ਏਵਂ ਕਸ੍ਮਾ ਏਤ੍ਤਕਾ ਏਵ ਇਧ ਵੁਤ੍ਤਾਤਿ. ਨਯਦਸ੍ਸਨਵਸੇਨਾਤਿ ਦਸ੍ਸੇਨ੍ਤੋ ਆਹ ‘‘ਏਤੇਨ ਪਨ…ਪੇ… ਵੇਦਿਤਬ੍ਬਾ’’ਤਿ. ਤੇਨ ਥਿਨਮਿਦ੍ਧਉਦ੍ਧਚ੍ਚਕੁਕ੍ਕੁਚ੍ਚ-ਵਿਚਿਕਿਚ੍ਛਾ-ਅਤ੍ਤੁਕ੍ਕਂਸਨ-ਪਰਵਬ੍ਭਨਛਮ੍ਭਿਤਤ੍ਤਾ- ਭੀਰੁਕਤਾ-ਅਹਿਰਿਕਾਨੋਤ੍ਤਪ੍ਪ-ਅਤ੍ਤਿਚ੍ਛਤਾ-ਪਾਪਿਚ੍ਛਤਾ-ਮਹਿਚ੍ਛਤਾਦਯੋ ਸਙ੍ਗਹਿਤਾਤਿ ਵੇਦਿਤਬ੍ਬਂ.

੭੨. ਸਂਕਿਲੇਸਂ ਦਸ੍ਸੇਤ੍ਵਾਤਿ ਸਂਕਿਲਿਟ੍ਠਵਤ੍ਤਨਿਦਸ੍ਸਨੇਨ ਸਙ੍ਖੇਪੇਨ ਵੁਤ੍ਤਂ ਸਂਕਿਲੇਸਂ ਵਿਭਾਗੇਨ ਦਸ੍ਸੇਤ੍ਵਾ. ਵੋਦਾਨਂ ਦਸ੍ਸੇਨ੍ਤੋਤਿ ਏਤ੍ਥਾਪਿ ਏਸੇਵ ਨਯੋ. ਏਵਂ ਜਾਨਿਤ੍ਵਾਤਿ ‘‘ਅਭਿਜ੍ਝਾ ਵਿਸਮਲੋਭੋ ਏਕਨ੍ਤੇਨੇਵ ਚਿਤ੍ਤਸ੍ਸ ਉਪ੍ਪਕ੍ਕਿਲੇਸੋ’’ਤਿ ਸਭਾਵਤੋ ਸਮੁਦਯਤੋ ਨਿਰੋਧਤੋ ਨਿਰੋਧੂਪਾਯਤੋ ਚ ਪੁਬ੍ਬਭਾਗਪਞ੍ਞਾਯ ਚੇਵ ਹੇਟ੍ਠਿਮਮਗ੍ਗਦ੍ਵਯਪਞ੍ਞਾਯ ਚ ਜਾਨਿਤ੍ਵਾ. ਪਜਹਤੀਤਿ ਏਤ੍ਥ ਅਚ੍ਚਨ੍ਤਪ੍ਪਹਾਨਮੇਵ ਅਧਿਪ੍ਪੇਤਨ੍ਤਿ ਦਸ੍ਸੇਨ੍ਤੋ ‘‘ਸਮੁਚ੍ਛੇਦਪ੍ਪਹਾਨਵਸੇਨ ਅਰਿਯਮਗ੍ਗੇਨ ਪਜਹਤੀ’’ਤਿ ਆਹ. ਅਰਿਯਮਗ੍ਗੇਨਾਤਿ ਅਨਾਗਾਮਿਮਗ੍ਗੇਨ. ਤੇਨ ਹਿ ਪਹਾਨਂ ਇਧ ਸਬ੍ਬਵਾਰੇਸੁ ਅਧਿਪ੍ਪੇਤਂ. ਕਿਲੇਸਪਟਿਪਾਟਿ ਇਧ ਕਿਲੇਸਾਨਂ ਦੇਸਨਾਕ੍ਕਮੋ. ਮਗ੍ਗਪਟਿਪਾਟਿਪਨ ਚਤੁਨ੍ਨਂ ਅਰਿਯਮਗ੍ਗਾਨਂ ਦੇਸਨਾਕ੍ਕਮੋਪਿ ਤਾਯ ਦੇਸਨਾਯ ਪਟਿਪਜ੍ਜਨਕ੍ਕਮੋਪਿ ਤਾਯ ਪਟਿਪਤ੍ਤਿਯਾ ਉਪ੍ਪਤ੍ਤਿਕ੍ਕਮੋਪਿ. ਤਤ੍ਥ ਯੇ ਯੇ ਕਿਲੇਸਾ ਯੇਨ ਯੇਨ ਮਗ੍ਗੇਨ ਪਹੀਯਨ੍ਤਿ, ਮਗ੍ਗਪਟਿਪਾਟਿਂ ਅਨੋਲੋਕੇਤ੍ਵਾ ਤੇਸਂ ਤੇਸਂ ਕਿਲੇਸਾਨਂ ਤੇਨ ਤੇਨ ਮਗ੍ਗੇਨ ਪਹਾਨਦਸ੍ਸਨਂ ਕਿਲੇਸਪਟਿਪਾਟਿ ਨ ਕਿਲੇਸਾਨਂ ਉਪ੍ਪਤ੍ਤਿਕ੍ਕਮੋ ਇਧ ਦੇਸਨਾਕ੍ਕਮੋ ਚਾਤਿ ਦਸ੍ਸੇਨ੍ਤੋ ‘‘ਅਭਿਜ੍ਝਾ ਵਿਸਮਲੋਭੋ’’ਤਿਆਦਿਮਾਹ. ਯੇਨ ਯੇਨ ਪਨ ਮਗ੍ਗੇਨ ਯੇ ਯੇ ਕਿਲੇਸਾ ਪਹੀਯਨ੍ਤਿ ਮਗ੍ਗਾਨੁਪੁਬ੍ਬਿਯਾ, ਤੇਨ ਤੇਨ ਮਗ੍ਗੇਨ ਤੇਸਂ ਤੇਸਂ ਕਿਲੇਸਾਨਂ ਪਹਾਨਦਸ੍ਸਨਂ ਮਗ੍ਗਪਟਿਪਾਟਿਯਾ ਪਹਾਨਦਸ੍ਸਨਨ੍ਤਿ ਦਸ੍ਸੇਨ੍ਤੋ ‘‘ਸੋਤਾਪਤ੍ਤਿਮਗ੍ਗੇਨਾ’’ਤਿਆਦਿਮਾਹ.

ਇਮਸ੍ਮਿਂ ਪਨ ਠਾਨੇਤਿ ‘‘ਸ ਖੋ ਸੋ, ਭਿਕ੍ਖਵੇ, ਭਿਕ੍ਖੂ’’ਤਿਆਦਿਨਾ ਆਗਤੋ ਇਮਸ੍ਮਿਂ ਪਹਾਨਵਾਰੇ. ਇਮੇ ਕਿਲੇਸਾਤਿ ਇਮੇ ਯਥਾਵੁਤ੍ਤਾ ਕਿਲੇਸਾ. ਸੋਤਾਪਤ੍ਤਿਮਗ੍ਗਵਜ੍ਝਾ ਵਾ ਹੋਨ੍ਤੁ ਸੇਸਮਗ੍ਗਵਜ੍ਝਾ ਵਾਹੇਟ੍ਠਾ ਦਸ੍ਸਿਤਮਗ੍ਗਪਟਿਪਾਟਿਵਸੇਨ. ਤਤ੍ਥ ਪਨ ਯੇ ਤਤਿਯਮਗ੍ਗਵਜ੍ਝਾ, ਤੇਸਂ ਅਨਾਗਾਮਿਮਗ੍ਗੇਨੇਵ ਪਹਾਨੇ ਵਤ੍ਤਬ੍ਬਂ ਨਤ੍ਥਿ, ਯੇਸਂ ਪਨੇਤ੍ਥ ਹੇਟ੍ਠਿਮਮਗ੍ਗਵਜ੍ਝਾਨਂ ਇਧ ਸਙ੍ਗਹੇ ਕਾਰਣਂ ਪਚ੍ਛਾ ਵਤ੍ਤੁਕਾਮੇਨ ਅਗ੍ਗਮਗ੍ਗਵਜ੍ਝਾਨਂ ਅਨਾਦਿਯਿਤ੍ਵਾ ਕਸ੍ਮਾ ਤਤਿਯਮਗ੍ਗਵਜ੍ਝਾਨਮੇਵ ਗਹਣਂ ਕਤਨ੍ਤਿ ਆਹ ‘‘ਅਯਮੇਤ੍ਥ ਪਵੇਣਿਮਗ੍ਗਾਗਤੋ ਸਮ੍ਭਵੋ’’ਤਿ, ਅਯਂ ਇਮਸ੍ਸ ਸੁਤ੍ਤਸ੍ਸ ਏਤਸ੍ਮਿਂ ਠਾਨੇ ਆਚਰਿਯਪਵੇਣਿਯਾ ਕਥਾਮਗ੍ਗੋ ਤਤੋ ਆਗਤੋ ਅਤ੍ਥਸਮ੍ਭਵੋ ਅਤ੍ਥਤਤ੍ਵਨ੍ਤਿ ਅਤ੍ਥੋ. ਤਤ੍ਥ ਹੇਟ੍ਠਿਮਮਗ੍ਗਵਜ੍ਝਾਨਂ ਇਧ ਸਙ੍ਗਹੇ ਕਾਰਣਂ ਪਚ੍ਛਾ ਵਤ੍ਤੁਕਾਮੋ ਅਗ੍ਗਮਗ੍ਗਵਜ੍ਝਾਨਂ ਅਗ੍ਗਹਣੇ ਯੁਤ੍ਤਿਂ ਦਸ੍ਸੇਨ੍ਤੋ ‘‘ਸੋ ਚਾ’’ਤਿਆਦਿਮਾਹ. ਤੇਨਾਤਿ ਚਤੁਤ੍ਥਮਗ੍ਗੇਨ. ਸੇਸਾਨਨ੍ਤਿ ਬ੍ਯਾਪਾਦਾਦੀਨਂ. ਯੇਪੀਤਿ ਮਕ੍ਖਾਦਿਕੇ ਸਨ੍ਧਾਯਾਹ. ਤਂਸਮੁਟ੍ਠਾਪਕਚਿਤ੍ਤਾਨਨ੍ਤਿ ਤੇਸਂ ਮਕ੍ਖਾਦੀਨਂ ਸਮੁਟ੍ਠਾਪਕਚਿਤ੍ਤੁਪ੍ਪਾਦਾਨਂ. ਤਤ੍ਥ ਮਕ੍ਖ-ਪਲ਼ਾਸ-ਇਸ੍ਸਾ-ਮਚ੍ਛਰਿਯ-ਸਮੁਟ੍ਠਾਪਕਂ ਪਟਿਘਦ੍ਵਯਚਿਤ੍ਤਂ, ਵਿਸੇਸਤੋ ਪਞ੍ਚਕਾਮਗੁਣਲੋਭੇਨ ਸਠੋ ਮਾਯਾਵੀ ਚ ਹੋਤਿ, ਪਞ੍ਚਕਾਮਗੁਣਿਕਰਾਗੋ ਚ ਅਨਾਗਾਮਿਮਗ੍ਗੇਨੇਵ ਨਿਰਵਸੇਸਤੋ ਪਹੀਯਤਿ, ਤਸ੍ਮਾ ਵੁਤ੍ਤਂ ‘‘ਤਂਸਮੁਟ੍ਠਾਪਕਚਿਤ੍ਤਾਨਂ ਅਪ੍ਪਹੀਨਤ੍ਤਾ’’ਤਿ. ਤੇਪਿ ਸੁਪ੍ਪਹੀਨਾ ਹੋਨ੍ਤੀਤਿ ਸਮ੍ਬਨ੍ਧੋ. ਤਨ੍ਤਿ ਪਠਮਮਗ੍ਗੇਨੇਵ ਪਹਾਨਂ ਪੁਬ੍ਬਾਪਰੇਨ ਨ ਸਨ੍ਧਿਯਤਿ ‘‘ਯਥੋਧਿ ਖੋ’’ਤਿ ਏਤ੍ਥ ਓਧਿਵਚਨਸ੍ਸ ਮਗ੍ਗਤ੍ਤਯਵਾਚਕਤ੍ਤਾ. ਰਤਨਤ੍ਤਯੇ ਅਵੇਚ੍ਚਪ੍ਪਸਾਦੋ ਨਾਮ ਅਰਿਯਕਨ੍ਤਸੀਲਂ ਵਿਯ ਸੋਤਾਪਨ੍ਨਸ੍ਸ ਅਙ੍ਗਾਨਿ, ਤੇ ਚ ਪਹਾਨਤੋ ਪਚ੍ਛਾ ਨਿਦ੍ਦਿਟ੍ਠਾ, ਤਸ੍ਮਾ ਇਧ ਵੁਤ੍ਤਪ੍ਪਹਾਨਂ ਵਿਕ੍ਖਮ੍ਭਨਪਹਾਨਮੇਵਾਤਿ ਕੇਚਿ ਵਦਨ੍ਤਿ. ਤੇਸਂ ਇਚ੍ਛਾਮਤ੍ਤਮੇਵ ਯਥਾਵੁਤ੍ਤਪਹਾਨਸ੍ਸੇਵ ਵਸੇਨ ਅਵੇਚ੍ਚਪ੍ਪਸਾਦਾਨਂ ਓਧਿਸੋ ਪਹਾਨਸ੍ਸ ਵਿਭਾਵਿਤਤ੍ਤਾ, ਸ੍ਵਾਯਮਤ੍ਥੋ ਹੇਟ੍ਠਾ ਯੁਤ੍ਤਿਤੋਪਿ ਪਕਾਸਿਤੋਯੇਵ.

੭੪. ਏਕਮੇਕੇਨ ਪਦੇਨ ਯੋਜੇਤਬ੍ਬਂ, ਯਤੋ ਏਕਮੇਕਸ੍ਸਪਿ ਉਪਕ੍ਕਿਲੇਸਸ੍ਸ ਸਭਾਵਾਦਿਤੋ ਦਸ੍ਸਨਂ ਨਿਯ੍ਯਾਨਮੁਖਂ ਹੋਤਿ, ਤਥਾ ਚੇਵ ਹੇਟ੍ਠਾ ਸਂਵਣ੍ਣਿਤਂ. ਅਨਾਗਾਮਿਮਗ੍ਗਵਸੇਨ ਪਹਾਨਂ ਵਤ੍ਵਾ ਪਸਾਦਸ੍ਸ ਉਦ੍ਧਟਤ੍ਤਾ ਵੁਤ੍ਤਂ ‘‘ਅਨਾਗਾਮਿਮਗ੍ਗੇਨ ਲੋਕੁਤ੍ਤਰਪ੍ਪਸਾਦੋ ਆਗਤੋ’’ਤਿ. ਯਦਿ ਏਵਂ ਕਸ੍ਮਾ ‘‘ਲੋਕਿਯੋ ਉਪ੍ਪਜ੍ਜਤੀ’’ਤਿ ਵੁਤ੍ਤਨ੍ਤਿ? ‘‘ਇਤਿਪਿ ਸੋ ਭਗਵਾ’’ਤਿਆਦਿਨਯਪ੍ਪਵਤ੍ਤਸ੍ਸ ਲੋਕਿਯਤ੍ਤਾ. ਨਿਬ੍ਬਾਨਾਰਮ੍ਮਣੋ ਏਵ ਹਿ ਲੋਕੁਤ੍ਤਰੋ ਪਸਾਦੋ. ‘‘ਇਤਿਪਿ ਸੋ ਭਗਵਾ’’ਤਿਆਦਿਵਚਨੇਨ ਲੋਕਿਯਂ, ਅਵੇਚ੍ਚਪ੍ਪਸਾਦਵਚਨੇਨ ਲੋਕੁਤ੍ਤਰਨ੍ਤਿ ਲੋਕਿਯਲੋਕੁਤ੍ਤਰਮਿਸ੍ਸਕਂ ਪਸਾਦਂ ਦਸ੍ਸੇਨ੍ਤੋ. ਅਵੇਚ੍ਚ ਰਤਨਤ੍ਤਯਗੁਣੇ ਯਾਥਾਵਤੋ ਞਤ੍ਵਾ ਪਸਾਦੋ ਅਵੇਚ੍ਚਪ੍ਪਸਾਦੋ. ਸੋ ਪਨ ਯਸ੍ਮਾ ਮਗ੍ਗੇਨਾਗਤਤ੍ਤਾ ਕੇਨਚਿ ਅਕਮ੍ਪਨਿਯੋ ਅਪ੍ਪਧਂਸਿਯੋ ਚ ਹੋਤਿ, ਤਸ੍ਮਾ ਵੁਤ੍ਤਂ ‘‘ਅਚਲੇਨ ਅਚ੍ਚੁਤੇਨਾ’’ਤਿ. ਤਤ੍ਥ ਲੋਕੁਤ੍ਤਰੋ ਸਬ੍ਬਸੋ ਬੁਦ੍ਧਗੁਣਾਦੀਸੁ ਸਮ੍ਮੋਹਂ ਵਿਦ੍ਧਂਸੇਨ੍ਤੋ ਤਤ੍ਥ ਕਿਚ੍ਚਤੋ ਪਵਤ੍ਤਤਿ, ਇਤਰੋ ਆਰਮ੍ਮਣਵਸੇਨ ਤੇ ਆਰਬ੍ਭ. ਤਂ ਵਿਧਿਨ੍ਤਿ ਤਂ ਤਸ੍ਸ ਉਪ੍ਪਨ੍ਨਪ੍ਪਕਾਰਂ. ਅਨੁਸ੍ਸਤਿਟ੍ਠਾਨਾਨੀਤਿ ਅਨੁਸ੍ਸਤਿਕਮ੍ਮਟ੍ਠਾਨਾਨਿ.

੭੫. ਸੋਮਨਸ੍ਸਾਦੀਤਿ ਆਦਿ-ਸਦ੍ਦੇਨ ਞਾਣਾਦੀਨਿ ਸਙ੍ਗਣ੍ਹਾਤਿ. ਚੋਰਾਨਂ ਅਭਿਣ੍ਹਂ ਸਞ੍ਚਰਣਟ੍ਠਾਨਤਾਯ ਪਚ੍ਚਨ੍ਤਗ੍ਗਹਣਂ. ਪਚ੍ਚਵੇਕ੍ਖਤੋਤਿ ‘‘ਅਸੁਕਸ੍ਮਿਞ੍ਚ ਠਾਨੇ ਇਮੇ ਚਿਮੇ ਚੋਰਾ ਏਵਞ੍ਚ ਏਵਞ੍ਚ ਵਿਨਾਸਿਤਾ’’ਤਿ ਪਚ੍ਚਵੇਕ੍ਖਤੋ ਰਞ੍ਞੋ ਵਿਯ.

ਯੋ ਯੋ ਓਧਿ ਯਥੋਧਿ. ਯਥਾ-ਸਦ੍ਦੋ ਬ੍ਯਾਪਨਿਚ੍ਛਾਯਂ, ਖੋ ਸਦ੍ਦੋ ਅਵਧਾਰਣੇਤਿ ਦਸ੍ਸੇਨ੍ਤੋ ‘‘ਸਕਸਕਓਧਿਵਸੇਨ ਚਤ੍ਤਮੇਵ ਹੋਤੀ’’ਤਿਆਦਿਮਾਹ. ਤੇਨ ‘‘ਵਨ੍ਤ’’ਨ੍ਤਿਆਦੀਸੁਪਿ ਅਵਧਾਰੇਤਬ੍ਬਨ੍ਤਿ ਦਸ੍ਸੇਤਿ. ਸਕਸਕਓਧਿਵਸੇਨਾਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਦ੍ਵੇ ਓਧੀ’’ਤਿਆਦਿ ਆਰਦ੍ਧਂ. ਤਤ੍ਥ ਯਂਮਗ੍ਗਵਜ੍ਝਾਤਿ ਯੇਨ ਮਗ੍ਗੇਨ ਅਨਵਸੇਸਤੋ ਪਹਾਤਬ੍ਬਾ. ਅਨਵਸੇਸਪ੍ਪਹਾਨਵਸੇਨ ਹਿ ਤਂਤਂਮਗ੍ਗਵਜ੍ਝਾਨਂ ਕਿਲੇਸਾਨਂ ਤਦਞ੍ਞਮਗ੍ਗਵਜ੍ਝੇਹਿ ਅਸਮ੍ਮਿਸ੍ਸਤਾ, ਅਞ੍ਞਥਾ ਯੇ ਸਕਸਕਓਧਿਵਸੇਨ ਉਪਰਿਮਗ੍ਗਵਜ੍ਝਾ, ਤੇ ਹੇਟ੍ਠਿਮਮਗ੍ਗੇਹਿ ਪਹੀਨਾਪਾਯਗਮਨੀਯਾਦਿਸਭਾਵਾ ਏਵ ਤੇਹਿ ਪਹੀਯਨ੍ਤੀਤਿ ਪਹਾਨਵਸੇਨ ਸਮ੍ਮਿਸ੍ਸਾ ਸਿਯੁਂ. ਤੇਨ ਤੇਯੇਵ ਪਹੀਨਾ ਹੋਨ੍ਤੀਤਿ ਏਤ੍ਥਾਪਿ ਏਸੇਵ ਨਯੋ. ਤਤੁਤ੍ਤਰਿਪੀਤਿ ਤਤੋ ਪਹਾਨਨਿਮਿਤ੍ਤਸੋਮਨਸ੍ਸੁਪ੍ਪਤ੍ਤਿਤੋ ਉਦ੍ਧਮ੍ਪਿ. ਪਟਿਪਕ੍ਖੇਸੁ ਓਧਿਸੋ ਪਵਤ੍ਤਿਕਿਚ੍ਚਤ੍ਤਾ ਓਧੀਤਿ ਹੇਟ੍ਠਾ ਤਯੋ ਮਗ੍ਗਾ ਵੁਚ੍ਚਨ੍ਤਿ. ਤੇ ਹੀਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਵਿਵਰਣਂ. ਇਮਸ੍ਸ ਭਿਕ੍ਖੁਨੋਤਿ ਅਨਾਗਾਮਿਂ ਸਨ੍ਧਾਯਾਹ. ਤੇਨ ਵੁਤ੍ਤਂ ‘‘ਹੇਟ੍ਠਾਮਗ੍ਗਤ੍ਤਯੇਨ ਚਤ੍ਤ’’ਨ੍ਤਿ.

ਕੇਚਿ ਚਤ੍ਤਮ੍ਪਿ ਗਣ੍ਹਨ੍ਤਿ, ਨਯਿਦਮੇਵਨ੍ਤਿ ਦਸ੍ਸਨਤ੍ਥਂ ‘‘ਵਨ੍ਤ’’ਨ੍ਤਿ ਵੁਤ੍ਤਂ. ਨ ਹਿ ਯਂ ਯੇਨ ਵਨ੍ਤਂ, ਸੋ ਪੁਨ ਤਂ ਆਦਿਯਤਿ. ਤੇਨਾਹ ‘‘ਅਨਾਦਿਯਨਭਾਵਦਸ੍ਸਨਵਸੇਨਾ’’ਤਿ. ਵਨ੍ਤਮ੍ਪਿ ਕਿਞ੍ਚਿ ਸਸਨ੍ਤਤਿਲਗ੍ਗਂ ਸਿਯਾ, ਨਯਿਦਮੇਵਨ੍ਤਿ ਦਸ੍ਸਨਤ੍ਥਂ ‘‘ਮੁਤ੍ਤ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਸਨ੍ਤਤਿਤੋ ਵਿਨਿਮੋਚਨਵਸੇਨਾ’’ਤਿ. ਮੁਤ੍ਤਮ੍ਪਿ ਕਿਞ੍ਚਿ ਮੁਤ੍ਤਬਨ੍ਧਨਾ ਵਿਯ ਫਲਂ ਕੁਹਿਞ੍ਚਿ ਤਿਟ੍ਠਤਿ, ਨ ਏਵਮਿਦਨ੍ਤਿ ਦਸ੍ਸਨਤ੍ਥਂ ‘‘ਪਹੀਨ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਕ੍ਵਚਿ ਅਨਵਟ੍ਠਾਨਦਸ੍ਸਨਵਸੇਨਾ’’ਤਿ. ਯਥਾ ਕਿਞ੍ਚਿ ਦੁਨ੍ਨਿਸ੍ਸਟ੍ਠਂ ਪੁਨ ਆਦਾਯ ਸਮ੍ਮਦੇਵ ਨਿਸ੍ਸਟ੍ਠਂ ਪਟਿਨਿਸ੍ਸਟ੍ਠਨ੍ਤਿ ਵੁਚ੍ਚਤਿ, ਏਵਂ ਵਿਪਸ੍ਸਨਾਯ ਨਿਸ੍ਸਟ੍ਠਂ ਆਦਿਨ੍ਨਸਦਿਸਂ ਮਗ੍ਗੇਨ ਪਹੀਨਂ ਪਟਿਨਿਸ੍ਸਟ੍ਠਂ ਨਾਮ ਹੋਤੀਤਿ ਦਸ੍ਸਨਤ੍ਥਂ ‘‘ਪਟਿਨਿਸ੍ਸਟ੍ਠ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਆਦਿਨ੍ਨਪੁਬ੍ਬਸ੍ਸ ਪਟਿਨਿਸ੍ਸਗ੍ਗਦਸ੍ਸਨਵਸੇਨਾ’’ਤਿ. ਨ ਕਾਪੁਰਿਸੇਨ ਵਿਯ ਪਰਮ੍ਮੁਖੇਨ ਨਿਸ੍ਸਟ੍ਠਂ, ਅਥ ਖੋ ਅਭਿਮੁਖੇਨੇਵ ਨਿਸ੍ਸਟ੍ਠਨ੍ਤਿ ਦਸ੍ਸਨਤ੍ਥਂ ‘‘ਪਟਿਨਿਸ੍ਸਟ੍ਠ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਪਟਿਮੁਖਂ ਵਾ’’ਤਿਆਦਿ. ਉਪਗਨ੍ਤਬ੍ਬਤੋਤਿ ਅਤ੍ਤਨੋ ਹਿਤਸੁਖਂ ਪਚ੍ਚਾਸੀਸਨ੍ਤੇਨ ਏਕਨ੍ਤੇਨ ਅਧਿਗਨ੍ਤਬ੍ਬਤੋ. ਧਾਰਣਤੋਤਿ ਤਂਸਮਙ੍ਗੀਨਂ ਅਪਾਯਪਾਤਤੋ ਸਨ੍ਧਾਰਣੇਨ. ਗਨ੍ਥੋ‘‘ਵੇਦੋ’’ਤਿ ਵੁਚ੍ਚਤਿ ‘‘ਵਿਦਨ੍ਤਿ ਏਤੇਨਾ’’ਤਿ, ਵੇਦੇਹਿ ਞਾਣੇਹਿ ਗਤੋ ਪਟਿਪਨ੍ਨੋਤਿ ਵੇਦਗੂ. ਅਭਿਜਞ੍ਞਾਤਿ ਜਾਨੇਯ੍ਯ. ਵੇਦਜਾਤਾਤਿ ਉਪ੍ਪਨ੍ਨਸੋਮਨਸ੍ਸਾ. ਞਾਣਂ ‘‘ਵੇਦੋ’’ਤਿ ਵੁਚ੍ਚਤਿ ‘‘ਵੇਦਿਤਬ੍ਬਂ ਵੇਦੇਤੀ’’ਤਿ. ਸੋਮਨਸ੍ਸਂ ‘‘ਵੇਦੋ’’ਤਿ ਵੁਚ੍ਚਤਿ ਆਰਮ੍ਮਣਰਸਂ ਵਿਨ੍ਦਤਿ ਅਨੁਭਵਤੀਤਿ.

ਉਪ੍ਪਨ੍ਨਨ੍ਤਿ ਅਵੇਚ੍ਚਪ੍ਪਸਾਦਂ ਨਿਸ੍ਸਾਯ ਉਪ੍ਪਨ੍ਨਂ. ਵੁਤ੍ਤਪ੍ਪਕਾਰਮੇਵ ਵੇਦਨ੍ਤਿ ‘‘ਸੋਮਨਸ੍ਸਂ ਸੋਮਨਸ੍ਸਮਯਞਾਣਞ੍ਚਾ’’ਤਿ ਏਵਂ ਵੁਤ੍ਤਪ੍ਪਕਾਰਮੇਵ. ਅਤ੍ਥਵੇਦਨ੍ਤਿ ਅਤ੍ਥੇ ਹੇਤੁਫਲੇ ਵੇਦਂ. ਧਮ੍ਮਵੇਦਨ੍ਤਿ ਧਮ੍ਮੇ ਹੇਤੁਮ੍ਹਿ ਵੇਦਂ. ਤੇਨਾਹ ‘‘ਅਵੇਚ੍ਚਪ੍ਪਸਾਦਸ੍ਸ ਹੇਤੁ’’ਨ੍ਤਿਆਦਿ. ਇਧ ਧਮ੍ਮਤ੍ਥਸਦ੍ਦਾ ਹੇਤੁਫਲਪਰਿਯਾਯਾਤਿ ਇਮਮਤ੍ਥਂ ਪਾਲ਼ਿਯਾ ਏਵ ਦਸ੍ਸੇਤੁਂ ‘‘ਵੁਤ੍ਤਞ੍ਹੇਤ’’ਨ੍ਤਿਆਦਿ ਵੁਤ੍ਤਂ. ਤਮੇਵ ਅਤ੍ਥਞ੍ਚ ਧਮ੍ਮਞ੍ਚਾਤਿ ਅਤ੍ਥੋ ਧਮ੍ਮੋਤਿ ਚ ਵੁਤ੍ਤਂ ਅਵੇਚ੍ਚਪ੍ਪਸਾਦਨਿਮਿਤ੍ਤਂ ਯਥਾਵੁਤ੍ਤਂ ਕਿਲੇਸਪ੍ਪਹਾਨਞ੍ਚ. ਅਤ੍ਥਧਮ੍ਮਾਨਿਸਂਸਭੂਤਂ ਵੇਦਨ੍ਤਿ ਯਥਾਵੁਤ੍ਤਅਤ੍ਥਧਮ੍ਮਾਨਿਸਂਸਭੂਤਂ ਸੋਮਨਸ੍ਸਮਯਞਾਣਸਙ੍ਖਾਤਂ ਵੇਦਞ੍ਚ. ਪਾਮੋਜ੍ਜਨ੍ਤਿ ਤਰੁਣਪੀਤਿਂ ਆਹ. ਪਚ੍ਚਵੇਕ੍ਖਣਾਕਾਰਪ੍ਪਵਤ੍ਤੇਨਾਤਿ ਏਤੇਨ ਪਚ੍ਚਵੇਕ੍ਖਣਾ ਏਵੇਤ੍ਥ ਅਨਵਜ੍ਜਸਭਾਵਤਾਯ ਧਮ੍ਮੋਤਿ ਵੁਤ੍ਤੋਤਿ ਦਟ੍ਠਬ੍ਬਂ. ਪੀਤਿ ਜਾਯਤੀਤਿ ਪਰਪ੍ਪਚ੍ਚਯਂ ਬਲਵਪੀਤਿਮਾਹ. ਪੀਣਿਤਮਨਸ੍ਸਾਤਿ ਪਸ੍ਸਦ੍ਧਿਆਵਹੇਹਿ ਉਲ਼ਾਰੇਹਿ ਪੀਤਿਵੇਗੇਹਿ ਤਿਤ੍ਤਚਿਤ੍ਤਸ੍ਸ. ਕਾਯੋਤਿ ਨਾਮਕਾਯੋ. ਵੂਪਸਨ੍ਤਦਰਥੋਤਿ ਕਿਲੇਸਪਰਿਲ਼ਾਹਾਨਂ ਦੂਰੀਭਾਵੇਨ ਸੁਟ੍ਠੁ ਉਪਸਨ੍ਤਦਰਥੋ. ਪਚ੍ਚਵੇਕ੍ਖਣਹੇਤੁਕਂ ਚਿਤ੍ਤਸ੍ਸ ਸਮਾਧਾਨਂ ਇਧ ਅਧਿਪ੍ਪੇਤਨ੍ਤਿ ਆਹ ‘‘ਅਪ੍ਪਿਤਂ ਵਿਯ ਅਚਲਂ ਤਿਟ੍ਠਤੀ’’ਤਿ.

੭੬. ਕਾਮਂ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਮ੍ਹਿ, ਧਮ੍ਮੇ ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਮ੍ਹੀ’’ਤਿ ਇਦਮ੍ਪਿ ਤਸ੍ਸਾ ਪਚ੍ਚਵੇਕ੍ਖਣਾਯ ਪਵਤ੍ਤਿਆਕਾਰਪਕਾਸਨਮੇਵ, ਇਦਂ ਪਨ ਵਿਸੇਸਤੋ ਰਤਨਤ੍ਤਯੇ ਉਪ੍ਪਨ੍ਨਸੋਮਨਸ੍ਸਾਦਿਪ੍ਪਕਾਸਨਪਦਂ. ‘‘ਯਥੋਧਿ ਖੋ ਪਨਾ’’ਤਿ ਇਦਮ੍ਪਿ ਸਵਿਸੇਸਂ ਪਚ੍ਚਵੇਕ੍ਖਣਾਕਾਰਪ੍ਪਕਾਸਨਪਦਨ੍ਤਿ ਅਧਿਪ੍ਪਾਯੇਨ ‘‘ਇਦਾਨਿ ਯਥੋਧਿ…ਪੇ… ਪਕਾਸੇਤ੍ਵਾ’’ਤਿ ਵੁਤ੍ਤਂ. ਚਤ੍ਤਾਰੋਪਿ ਪਨ ਵਾਰਾ ਪਚ੍ਚਵੇਕ੍ਖਣਾਕਾਰਪ੍ਪਕਾਸਨਵਸੇਨ ਚੇਵ ਸੋਮਨਸ੍ਸਾਦਿਆਨਿਸਂਸਦਸ੍ਸਨਵਸੇਨ ਚ ਵੁਤ੍ਤਾਤਿ ਸਕ੍ਕਾ ਵਿਞ੍ਞਾਤੁਂ ਉਭਯਤ੍ਥਾਪਿ ਉਭਯਸ੍ਸ ਵੁਤ੍ਤਤ੍ਤਾ. ਯਦਿਪਿ ਅਰਿਯਮਗ੍ਗੋ ਏਕਚਿਤ੍ਤਕ੍ਖਣਿਕੋ ਨ ਪੁਨ ਉਪ੍ਪਜ੍ਜਤਿ, ਪਟਿਪਕ੍ਖਸ੍ਸ ਪਨ ਤੇਨ ਸੁਪ੍ਪਹੀਨਤ੍ਤਾ ਤਂਸਮਙ੍ਗੀ ਅਪਰਿਹਾਨਧਮ੍ਮੋ ਤਂਸੀਲਾਦਿਭਾਵੇਨੇਵ ਵੁਚ੍ਚਤੀਤਿ ਆਹ ‘‘ਤਸ੍ਸ ਅਨਾਗਾਮਿਮਗ੍ਗਸਮ੍ਪਯੁਤ੍ਤਂ ਸੀਲਕ੍ਖਨ੍ਧਂ ਦਸ੍ਸੇਤੀ’’ਤਿਆਦਿ. ‘‘ਏਵਂਧਮ੍ਮਾ ਤੇ ਭਗਵਨ੍ਤੋ ਅਹੇਸੁ’’ਨ੍ਤਿਆਦੀਸੁ (ਦੀ. ਨਿ. ੨.੧੩; ਮ. ਨਿ. ੩.੧੯੭-੧੯੮; ਸਂ. ਨਿ. ੫.੩੭੮) ਵਿਯ ਇਧ ਧਮ੍ਮ-ਸਦ੍ਦੋ ਸਮਾਧਿਪਰਿਯਾਯੋਤਿ ਆਹ ‘‘ਸਮਾਧਿਕ੍ਖਨ੍ਧਂ ਪਞ੍ਞਾਕ੍ਖਨ੍ਧਞ੍ਚ ਦਸ੍ਸੇਤੀ’’ਤਿ. ਤਥਾ ਹਿ ਸੋ ਸਮ੍ਪਯੁਤ੍ਤਧਮ੍ਮੇ ਏਕਾਰਮ੍ਮਣੇ ਅਵਿਕ੍ਖਿਪਮਾਨੇ ਅਵਿਪ੍ਪਕਿਣ੍ਣੇ ਅਵਿਸਟੇ ਕਤ੍ਵਾ ਸਮਂ, ਸਮ੍ਮਾ ਚ ਆਦਹਨ੍ਤੋ ਤਥਾ ਤੇ ਧਾਰੇਤੀਤਿ ਚ ਵਤ੍ਤਬ੍ਬਤਂ ਅਰਹਤੀਤਿ ਧਮ੍ਮੋਤਿ ਚ ਵੁਚ੍ਚਤਿ. ਅਨੇਕਰੂਪਾਨਨ੍ਤਿ ਅਨੇਕਪ੍ਪਕਾਰਾਨਂ. ਅਨ੍ਤਰਾਯੋ ਨਾਮ ਅਪ੍ਪਟਿਲਦ੍ਧਸ੍ਸ ਵਾ ਅਲਬ੍ਭਨਵਸੇਨ, ਪਟਿਲਦ੍ਧਸ੍ਸ ਵਾ ਪਰਿਹਾਨਵਸੇਨ, ਤਦੁਭਯਮ੍ਪਿ ਇਧ ਨਤ੍ਥੀਤਿ ਦਸ੍ਸੇਨ੍ਤੋ ‘‘ਮਗ੍ਗਸ੍ਸ ਵਾ’’ਤਿਆਦਿਮਾਹ. ਨੇਵਸ੍ਸ ਤਂ ਹੋਤਿ ਅਨ੍ਤਰਾਯਾਯਾਤਿ ਤਸ੍ਸ ਅਨਾਗਾਮਿਨੋ ਪਿਣ੍ਡਪਾਤਭੋਜਨਂ ਨੇਵ ਹੋਤਿ ਅਨ੍ਤਰਾਯਾਯ ਉਕ੍ਕਂਸਗਤਾਯ ਪਚ੍ਚਵੇਕ੍ਖਣਾਯ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨਤੋ. ਤਞ੍ਚਸ੍ਸਾ ਉਕ੍ਕਂਸਗਮਨਂ ਹਤਪਟਿਪਕ੍ਖਤ੍ਤਾਤਿ ਦਸ੍ਸੇਨ੍ਤੋ ‘‘ਮਗ੍ਗੇਨ ਵਿਸੁਦ੍ਧਚਿਤ੍ਤਤ੍ਤਾ’’ਤਿ ਆਹ.

ਏਤ੍ਥਾਤਿ ਏਤਸ੍ਮਿਂ ਅਨ੍ਤਰਾਯਾਭਾਵੇ. ਏਤਦੇਵ ਵਿਸੁਦ੍ਧਚਿਤ੍ਤਤ੍ਤਮੇਵ ਕਾਰਣਂ. ਏਤ੍ਥ ਚ ‘‘ਨੇਵਸ੍ਸ ਤਂ ਹੋਤਿ ਅਨ੍ਤਰਾਯਾਯਾ’’ਤਿ ਇਮਿਨਾ ਹੇਟ੍ਠਾ ਵੁਤ੍ਤਪ੍ਪਹਾਨਂ ਅਨਾਗਾਮਿਮਗ੍ਗੇਨੇਵਾਤਿ ਸਿਦ੍ਧਂ ਹੋਤਿ. ਅਨਾਗਾਮਿਨੋ ਹਿ ਸਬ੍ਬਸੋ ਕਾਮਰਾਗੋ ਪਹੀਨੋ ਹੋਤਿ, ਰਸਤਣ੍ਹਾਯ ਅਭਾਵਤੋ ਤਾਦਿਸਪਿਣ੍ਡਪਾਤਪਰਿਭੋਗੋ ਅਗ੍ਗਮਗ੍ਗਾਧਿਗਮੇ ਕਥਞ੍ਚਿਪਿ ਅਨ੍ਤਰਾਯਾਯ ਨ ਹੋਤੀਤਿ. ‘‘ਸੇਯ੍ਯਥਾਪਿ, ਭਿਕ੍ਖਵੇ, ਵਤ੍ਥ’’ਨ੍ਤਿ ਵਦਨ੍ਤੋ ਭਗਵਾਆਦਿਮ੍ਹਿ ਅਤ੍ਤਨਾ ਉਪਨੀਤਵਤ੍ਥੂਪਮਂ ਅਨੁਸਨ੍ਧੇਤਿ. ਉਦਕਸ੍ਸ ਅਚ੍ਛਭਾਵੋ ਪਙ੍ਕਸੇਵਾਲਪਣਕਾਦਿਮਲਾਭਾਵੇਨ ਪਸਨ੍ਨਤਾਯ, ਤਬ੍ਬਿਪਰਿਯਾਯਤੋ ਬਹਲਤਾਤਿ ਆਹ ‘‘ਅਚ੍ਛਨ੍ਤਿ ਵਿਪ੍ਪਸਨ੍ਨ’’ਨ੍ਤਿ. ਵਣ੍ਣਨਿਭਾਯ ਵਿਗਤਸਂਕਿਲੇਸਤਾਯ ਸਮੁਜ੍ਜਲਨਂ ਪਭਸ੍ਸਰਤਾਯ ਵਤ੍ਥਸ੍ਸ, ਤਂ ਪਰਿਯੋਦਾਤਨ੍ਤਿ ਵਤ੍ਤਬ੍ਬਤਂ ਲਭਤੀਤਿ ਆਹ ‘‘ਪਰਿਯੋਦਾਤਂ ਪਭਸ੍ਸਰਤਾਯਾ’’ਤਿ. ਉਕ੍ਕਂ ਬਨ੍ਧੇਯ੍ਯਾਤਿ ਅਙ੍ਗਾਰਕਪਲ੍ਲਂ ਯਥਾ ਦਾਰੁਘਟਿਕਙ੍ਗਾਰਾਦਿਕੇਨ ਨ ਭਿਜ੍ਜਤਿ, ਏਵਂ ਤਨੁਮਤ੍ਤਿਕਾਲੇਪਾਦਿਨਾ ਬਨ੍ਧੇਯ੍ਯ. ਮੇਘਪਟਲਤੋ ਵੇਰਮ੍ਭਵਾਤਧਾਰਾਸਙ੍ਘਟ੍ਟਨਤੋ ਵਿਜ੍ਜੁਤਾ ਵਿਯ ਕੇਵਲਂ ਵਾਤਧਾਰਾਸਙ੍ਘਟ੍ਟਨਜਨਿਤਾ ਪਭਾ ਉਕ੍ਕਾਪਭਾ, ਸਾ ਪਨ ਯਸ੍ਮਾ ਦ੍ਵਿਨ੍ਨਂ ਵਾਤਧਾਰਾਨਂ ਵੇਗਸਮ੍ਭੂਤਸਙ੍ਘਟ੍ਟਨਹੇਤੁਕਾ, ਤਸ੍ਮਾ ਕਾਰਣਵਸੇਨ ‘‘ਵਾਤਵੇਗੋ ਉਕ੍ਕਾ’’ਤਿ ਵੁਤ੍ਤਂ.

੭੭. ਯਥਾਨੁਸਨ੍ਧਿਵਸੇਨਾਤਿਆਦਿਮ੍ਹਿ ਉਟ੍ਠਿਤਦੇਸਨਾਯ ਅਨੁਰੂਪਾ ਅਨੁਸਨ੍ਧਿ ਯਥਾਨੁਸਨ੍ਧਿ, ਤਸ੍ਸਾ ਵਸੇਨ. ਬ੍ਯਤਿਰੇਕਦਸ੍ਸਨਂ ਵਿਯ ਹਿ ਸਾਧੇਤਬ੍ਬਸ੍ਸ ਆਦਿਮ੍ਹਿ ਉਟ੍ਠਿਤਦੇਸਨਾਯ ਪਟਿਪਕ੍ਖਦਸ੍ਸਨਮ੍ਪਿ ਅਨੁਰੂਪਦੇਸਨਾਵ ਸਮ੍ਮਦੇਵ ਪਤਿਟ੍ਠਾਪਨਭਾਵਤੋ, ਯਥਾ ਤਂ ਆਵਤ੍ਤਹਾਰਯੋਜਨਾਯਂ ਵਿਸਭਾਗਧਮ੍ਮਾਵਤ੍ਤਨ੍ਤਿ ਦਟ੍ਠਬ੍ਬਂ. ‘‘ਯਥਾਨੁਸਨ੍ਧਿਵਸੇਨ ਦੇਸਨਾ ਆਗਤਾ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰੇਨ੍ਤੋ ਤਪ੍ਪਸਙ੍ਗੇਨ ਇਤਰੇਪਿ ਅਨੁਸਨ੍ਧੀ ਦਸ੍ਸੇਤੁਂ ‘‘ਤਯੋ ਹੀ’’ਤਿਆਦਿਮਾਹ. ਬਹਿਦ੍ਧਾਤਿ ਬਾਹਿਰੇਸੁ ਵਤ੍ਥੂਸੁ. ਅਸਤਿ ਪਰਿਤਸ੍ਸਨਾਤਿ ਤਣ੍ਹਾਦਿਟ੍ਠਿਪਰਿਤਸ੍ਸਨਾਭਾਵੋ. ਵਿਸ੍ਸਜ੍ਜਿਤਸੁਤ੍ਤਵਸੇਨਾਤਿ ‘‘ਇਧ ਭਿਕ੍ਖੁ ਏਕਚ੍ਚਸ੍ਸਾ’’ਤਿਆਦਿਨਾ (ਮ. ਨਿ. ੧.੨੪੨) ਵਿਸ੍ਸਜ੍ਜਿਤਸੁਤ੍ਤਵਸੇਨ. ਯੇਨ ਧਮ੍ਮੇਨਾਤਿ ਸੀਲਾਦਿਵੋਦਾਨਧਮ੍ਮੇਸੁ ਅਕ੍ਖਨ੍ਤਿਯਾਦਿਸਂਕਿਲੇਸਧਮ੍ਮੇਸੁ ਚ ਯੇਨ ਯੇਨ ਧਮ੍ਮੇਨ. ਛ ਅਭਿਞ੍ਞਾ ਆਗਤਾਤਿ ਇਮਿਨਾ ‘‘ਅਨੁਰੂਪਧਮ੍ਮਵਸੇਨ ਵਾ’’ਤਿ ਵੁਤ੍ਤਵਿਕਪ੍ਪਂ ਦਸ੍ਸੇਤਿ, ਸੇਸੇਹਿ ‘‘ਪਟਿਪਕ੍ਖਵਸੇਨ ਵਾ’’ਤਿ ਵੁਤ੍ਤਵਿਕਪ੍ਪਂ. ਅਕ੍ਖਨ੍ਤਿਯਾ ਹਿ ਕਕਚੂਪਮੋਵਾਦੋ (ਮ. ਨਿ. ੧.੨੨੨) ਪਟਿਪਕ੍ਖੋ, ਤਥਾ ਦਿਟ੍ਠਿਯਾ ‘‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’’ਤਿ ਏਵਂ ਪਟਿਭਾਗਾ ਸੁਞ੍ਞਤਾਕਾਰੇਨ. ਸੇਸਦ੍ਵਯੇਪਿ ਏਸੇਵ ਨਯੋ. ‘‘ਚਿਤ੍ਤੇ ਸਂਕਿਲਿਟ੍ਠੇ ਦੁਗ੍ਗਤਿ ਪਾਟਿਕਙ੍ਖਾ’’ਤਿ (ਮ. ਨਿ. ੧.੭੦) ਹੇਟ੍ਠਾ ਕਿਲੇਸਦੇਸਨਾ ਆਗਤਾ. ਸਬ੍ਬੋਤਿ ਅਨਵਸੇਸੋ. ਸਬ੍ਬਾਕਾਰੇਨਾਤਿ ਆਦੀਨਵਾਨਿਸਂਸਪਚ੍ਚਵੇਕ੍ਖਣਪੁਗ੍ਗਲਦੋਸਜਾਨਨਾਦਿਨਾ ਸਬ੍ਬਪ੍ਪਕਾਰੇਨ.

੭੮. ‘‘ਮੇਤ੍ਤਾ ਭਾਵੇਤਬ੍ਬਾ ਬ੍ਯਾਪਾਦਸ੍ਸ ਪਹਾਨਾਯਾ’’ਤਿਆਦਿਵਚਨਤੋ (ਅ. ਨਿ. ੯.੧) ਮੇਤ੍ਤਾਦਯੋ ਬ੍ਯਾਪਾਦਵਿਹੇਸਾਰਤਿਰਾਗਾਨਂ ਪਟਿਪਕ੍ਖਾ. ਯਸ੍ਮਾ ‘‘ਸੋ ਅਤ੍ਥੀ’’ਤਿਆਦਿਨਾ ਭਗਵਤਾ ਅਨਾਗਾਮਿਨੋ ਅਗ੍ਗਮਗ੍ਗਾਧਿਗਮਨਂ ਚਤੁਸਚ੍ਚਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਤ੍ਵਾ ਕਥਿਤਂ, ਤਸ੍ਮਾ ਤਂ ਦਸ੍ਸੇਨ੍ਤੋ ‘‘ਇਦਾਨਿਸ੍ਸਾ’’ਤਿਆਦਿਮਾਹ.

ਬ੍ਰਹ੍ਮਵਿਹਾਰਧਮ੍ਮੇਤਿ ਬ੍ਰਹ੍ਮਵਿਹਾਰੇ ਚੇਵ ਬ੍ਰਹ੍ਮਵਿਹਾਰਸਹਗਤਧਮ੍ਮੇ ਚ. ਤੇਨਾਹ ‘‘ਨਾਮਵਸੇਨਾ’’ਤਿ. ਵਵਤ੍ਥਪੇਤ੍ਵਾਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਨਾਮਨ੍ਤਿਪਿ ਹਿ ਈਦਿਸੇਸੁ ਠਾਨੇਸੁ ਚਤ੍ਤਾਰੋ ਅਰੂਪਿਨੋ ਖਨ੍ਧਾ ਵੁਚ੍ਚਨ੍ਤਿ. ਇਮਿਨਾ ਨਯੇਨਾਤਿ ਏਤੇਨ ਭੂਤਨਿਸ੍ਸਿਤਾਨਂ ਸੇਸੁਪਾਦਾਯਧਮ੍ਮਾਨਂ ਸਬ੍ਬੇਸਮ੍ਪਿ ਪਹਾਤਬ੍ਬਤਣ੍ਹਾਵਜ੍ਜਾਨਂ ਤੇਭੂਮਕਧਮ੍ਮਾਨਂ ਪਰਿਗ੍ਗਹਵਿਧਿਂ ਉਲ੍ਲਿਙ੍ਗੇਤਿ. ਸਭਾਵਤੋ ਵਿਜ੍ਜਮਾਨਂ ਤਂ ਅਤ੍ਤਪਚ੍ਚਕ੍ਖਂ ਕਤ੍ਵਾ ਞਾਣੇਨ ਯਾਥਾਵਤੋ ਪਟਿਵਿਜ੍ਝਿਯਮਾਨਤਂ ਉਪਾਦਾਯ ‘‘ਅਤ੍ਥਿ ਇਦ’’ਨ੍ਤਿ ਯਥਾਵਵਤ੍ਥਾਪਿਤਂ ਨਾਮਰੂਪਂ. ਤੇਨੇਵਾਹ ‘‘ਏਤ੍ਤਾਵਤਾਨੇਨ ਦੁਕ੍ਖਸਚ੍ਚਵਵਤ੍ਥਾਨਂ ਕਤਂ ਹੋਤੀ’’ਤਿ. ਸਾਵਧਾਰਣਞ੍ਚੇਤਂ ਵਚਨਂ, ਲੋਕਸਮਞ੍ਞਾਸਿਦ੍ਧਂ ਸਤ੍ਤਇਤ੍ਥਿਪੁਰਿਸਾਦਿ ਵਿਯ, ਇਤੋ ਬਾਹਿਰਕਪਰਿਕਪ੍ਪਿਤਂ ਪਕਤਿਆਦਿ ਦ੍ਰਬ੍ਯਾਦਿ ਜੀਵਾਦਿ ਕਾਯਾਦਿ ਵਿਯ ਚ ਨ ਪਰਮਤ੍ਥਤੋ ਨਤ੍ਥਿ, ਅਤ੍ਥੇਵਾਤਿ ਵੁਤ੍ਤਂ ਹੋਤਿ. ਪਜਾਨਾਤੀਤਿ ਪੁਬ੍ਬਭਾਗੇ ਤਾਵ ਲਕ੍ਖਣਰਸਾਦਿਵਸੇਨ ਚੇਵ ਪਟਿਗ੍ਗਹਵਿਭਾਗਵਸੇਨ ਚ ਪਕਾਰਤੋ ਜਾਨਾਤਿ, ਅਪਰਭਾਗੇ ਪਨ ਪਰਿਞ੍ਞਾਭਿਸਮਯਵਸੇਨ ਪਟਿਵਿਜ੍ਝਨ੍ਤੋ ਜਾਨਾਤਿ. ਏਕਨ੍ਤਹੀਨਾ ਨਾਮ ਅਕੁਸਲਧਮ੍ਮਾ ਸਮ੍ਪਤਿ ਆਯਤਿਞ੍ਚ ਦੁਕ੍ਖਮੂਲਤ੍ਤਾ, ਤਤ੍ਥਾਪਿ ਵਿਸੇਸਤੋ ਤਣ੍ਹਾਤਿ ਆਹ ‘‘ਦੁਕ੍ਖਸ੍ਸ ਸਮੁਦਯਂ ਪਟਿਵਿਜ੍ਝਨ੍ਤੋ ਅਤ੍ਥਿ ਹੀਨਨ੍ਤਿ ਪਜਾਨਾਤੀ’’ਤਿ. ਅਤ੍ਤਨੋ ਪਚ੍ਚਯੇਹਿ ਪਧਾਨਭਾਵਂ ਨੀਤਤ੍ਤਾ ਪਣੀਤਨ੍ਤਿ ਇਮਿਨਾ ਅਤ੍ਥੇਨ ਅਰਿਯਮਗ੍ਗੋਵ ‘‘ਪਣੀਤ’’ਨ੍ਤਿ ਵੁਚ੍ਚਤੀਤਿ ਆਹ ‘‘ਪਹਾਨੁਪਾਯਂ ਵਿਚਿਨਨ੍ਤੋ ਅਤ੍ਥਿ ਪਣੀਤਨ੍ਤਿ ਪਜਾਨਾਤੀ’’ਤਿ. ‘‘ਉਤ੍ਤਮਟ੍ਠੇਨ ਚ ਪਣੀਤ’’ਨ੍ਤਿ ਵੁਚ੍ਚਮਾਨੇ ਨਿਰੋਧਸਚ੍ਚਸ੍ਸਪਿ ਸਙ੍ਗਹੋ ਸਿਯਾ, ਤਸ੍ਸ ਪਨ ਪਦਨ੍ਤਰੇਨ ਸਙ੍ਗਹਿਤਤ੍ਤਾ ਵੁਤ੍ਤਨਯੇਨੇਵੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਪ੍ਪਮਞ੍ਞਾਮੁਖੇਨ ਵਿਪਸ੍ਸਨਾਭਿਨਿਵੇਸਸ੍ਸੇਵ ਕਤਤ੍ਤਾ ‘‘ਬ੍ਰਹ੍ਮਵਿਹਾਰਸਞ੍ਞਾਗਤਸ੍ਸਾ’’ਤਿ ਵੁਤ੍ਤਂ. ‘‘ਸਬ੍ਬਸ੍ਸਪਿ ਤੇਭੂਮਕਸ੍ਸ ਸਞ੍ਞਾਗਤਸ੍ਸਾ’’ਤਿ ਵਤ੍ਤੁਂ ਵਟ੍ਟਤਿਯੇਵ. ਨ ਚੇਤ੍ਥ ਅਸਙ੍ਗਹੋ ਤਸ੍ਸਾਪਿ ਸਞ੍ਞਾਯ ਆਗਤਭਾਵਤੋ. ਲੋਕਂ ਉਤ੍ਤਰਿਤ੍ਵਾ ਸਮਤਿਕ੍ਕਮਿਤ੍ਵਾ ਨਿਸ੍ਸਰਿਤ੍ਵਾ ਵਿਸਂਯੁਤ੍ਤਂ ਹੁਤ੍ਵਾ ਠਿਤਤ੍ਤਾ ਵੁਤ੍ਤਂ ‘‘ਉਤ੍ਤਰਿ ਨਿਸ੍ਸਰਣਂ ਨਿਬ੍ਬਾਨ’’ਨ੍ਤਿ.

ਚਤੂਹਿ ਆਕਾਰੇਹੀਤਿ ‘‘ਅਤ੍ਥਿ ਹੀਨ’’ਨ੍ਤਿਆਦੀਹਿ ਚਤੂਹਿ ਪਕਾਰੇਹਿ. ਅਨ੍ਵਯਞਾਣਤਾਯ ਅਨੁਬੋਧਭੂਤਾਯ ਵਿਪਸ੍ਸਨਾਪਞ੍ਞਾਯ ਜਾਨਨਤ੍ਥੋ ਧਮ੍ਮਞਾਣਤਾਯ ਪਟਿਵੇਧਭੂਤਾਯ ਮਗ੍ਗਪਞ੍ਞਾਯ ਦਸ੍ਸਨਤ੍ਥੋ ਸਭਾਵਸਿਦ੍ਧੋਤਿ ਦਸ੍ਸੇਨ੍ਤੋ ‘‘ਵਿਪਸ੍ਸਨਾਪਞ੍ਞਾਯ ਚਤ੍ਤਾਰਿ ਸਚ੍ਚਾਨਿ ਜਾਨਨਤੋ ਮਗ੍ਗਪਞ੍ਞਾਯ ਪਸ੍ਸਤੋ’’ਤਿ ਵੁਤ੍ਤਂ. ਭਯਭੇਰਵੇ ਵੁਤ੍ਤਨਯੇਨੇਵਾਤਿ ਭਯਭੇਰਵਸੁਤ੍ਤਵਣ੍ਣਨਾਯਂ ਅਤ੍ਤਨਾ ਵੁਤ੍ਤਅਤ੍ਥਵਚਨਤ੍ਥਪਾਠੇਨ ਇਧ ਪਾਠਸ੍ਸ ਸਦਿਸਤ੍ਤਾ ਅਤਿਦਿਸਨ੍ਤੋ ‘‘ਕਾਮਾਸਵਾਪਿ…ਪੇ… ਪਜਾਨਾਤੀ’’ਤਿ ਆਹ. ਏਤ੍ਥ ਚ ਯਸ੍ਮਾ ‘‘ਕਾਮਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ…ਪੇ… ਅਵਿਜ੍ਜਾਸਵਾਪਿ ਚਿਤ੍ਤਂ ਵਿਮੁਚ੍ਚਤੀ’’ਤਿ ‘‘ਖੀਣਾ ਜਾਤੀ’’ਤਿਆਦੀਨਿ ਵਦਤਾ ਭਗਵਤਾ ਚਤੁਤ੍ਥਮਗ੍ਗੋ ਨਿਦ੍ਦਿਟ੍ਠੋ, ਤਸ੍ਮਾ ਯਂ ਹੇਟ੍ਠਾ ਅਟ੍ਠਕਥਾਯਂ ਵੁਤ੍ਤਂ ‘‘ਸੋ ਚ ਉਪਰਿ ਚਤੁਤ੍ਥਮਗ੍ਗਸ੍ਸੇਵ ਨਿਦ੍ਦਿਟ੍ਠਤ੍ਤਾ ਯੁਜ੍ਜਤੀ’’ਤਿ, ਤਂ ਸੁਵੁਤ੍ਤਮੇਵਾਤਿ ਦਟ੍ਠਬ੍ਬਂ.

ਤਸ੍ਸ ਚੋਦਨਤ੍ਥਾਯਾਤਿ ਤਸ੍ਸ ਬ੍ਰਾਹ੍ਮਣਸ੍ਸ ਭਗਵਾ ਅਤ੍ਤਨੋ ਚੋਦਨਤ੍ਥਾਯ ‘‘ਪੁਚ੍ਛ ਮਂ ਤ੍ਵਂ ਬ੍ਰਾਹ੍ਮਣ ਯਦੇਤ੍ਥ ਤਯਾ ਮਨਸਾਭਿਸਮੀਹਿਤ’’ਨ੍ਤਿ ਚੋਦਨਾਯ, ਓਕਾਸਦਾਨਤ੍ਥਾਯਾਤਿ ਅਧਿਪ੍ਪਾਯੋ. ਦੇਸਨਾਸਨ੍ਨਿਸ੍ਸਯੋ ਬ੍ਰਾਹ੍ਮਣਸ੍ਸ ਤਥਾਰੂਪੋ ਏਤ੍ਥ ਅਜ੍ਝਾਸਯੋਪਿ ਨਤ੍ਥੀਤਿ ਯਥਾਵੁਤ੍ਤਅਨੁਸਨ੍ਧਿਤ੍ਤਯਵਿਨਿਮੁਤ੍ਤਤ੍ਤਾ ‘‘ਪਾਟਿਯੇਕ੍ਕਂ ਅਨੁਸਨ੍ਧਿਂ ਆਹਾ’’ਤਿ ਵੁਤ੍ਤਂ. ਚਿਤ੍ਤਗਤਤ੍ਤਾ ਅਬ੍ਭਨ੍ਤਰੇਨ. ਕਿਲੇਸਵੁਟ੍ਠਾਨਸਿਨਾਨੇਨਾਤਿ ਕਿਲੇਸਮਲਪਵਾਹਨੇਨ ਰਾਗਪਰਿਲ਼ਾਹਾਦਿਵੂਪਸਮਕਰੇਨ ਚ ਅਟ੍ਠਙ੍ਗਿਕਅਰਿਯਮਗ੍ਗਸਲਿਲਸਿਨਾਨੇਨ.

੭੯. ਧਮ੍ਮਸਭਾਮਣ੍ਡਪਂ ਤਾਵਦੇਵ ਉਪਗਤਤ੍ਤਾ ਬਾਹੁਕਾ ਨਦਿਤੋ ਆਗਤਂ ਵਿਯ ਮਞ੍ਞਮਾਨੋ. ਅਰਿਯਫਲਮਦ੍ਦਨਚੁਣ੍ਣਾਦਯੋ ਤੇਲਸਿਨੇਹਸ੍ਸ ਵਿਵੇਚਨੇਨ. ਲੂਖਭਾਵੋ ਲੋਕਂ, ਤਂ ਏਤਿਸ੍ਸਾ ਅਤ੍ਥੀਤਿ ਲੋਕਾਤਿ ਸਮ੍ਮਤਾ. ਲੋਕ੍ਖਸਮ੍ਮਤਗ੍ਗਹਣੇਨ ‘‘ਤਥਾ ਸਾ ਨਦੀ ਲੋਕੇ ਪਾਕਟਾ’’ਤਿ ਏਵਂ ਪਵਤ੍ਤਂ ਅਤ੍ਤਨੋ ਮਿਚ੍ਛਾਗਾਹਂ ਦੀਪੇਤਿ. ਤੇਨਾਹ ‘‘ਵਿਸੁਦ੍ਧਭਾਵਂ ਦੇਤੀਤਿ ਏਵਂ ਸਮ੍ਮਤਾ’’ਤਿ. ਪਾਪਪਵਾਹਨੇਨ ਸਮ੍ਪਰਾਯਿਕਾਦਿਸਮ੍ਪਤ੍ਤਿਆਵਹਤੋ ਲੋਕਸ੍ਸ ਹਿਤਾ ਲੋਕ੍ਯਾ. ਲੋਕ੍ਯਾਤਿ ਸਮ੍ਮਤਾਤਿ ਸਬ੍ਬਂ ਪੁਰਿਮਸਦਿਸਂ. ਤੇਨਾਹ ‘‘ਸੇਟ੍ਠਂ ਲੋਕਂ ਗਮਯਤੀਤਿ ਏਵਂ ਸਮ੍ਮਤਾ’’ਤਿ. ਪੁਞ੍ਞਸਮ੍ਮਤਾਤਿ ਪੁਜ੍ਜਭਵਫਲਨਿਬ੍ਬਤ੍ਤਨੇਨ ਸਤ੍ਤਾਨਂ ਪੁਨਨੇਨ ਵਿਸੋਧਨੇਨ ਪੁਞ੍ਞਾਤਿ ਸਮ੍ਮਤਾ. ਤਦਤ੍ਥਦੀਪਨਤ੍ਥਮੇਵਾਤਿ ਤਸ੍ਸਾ ਪੁਬ੍ਬੇ ਆਗਤਦੇਸਨਾਯ ਅਤ੍ਥਦੀਪਨਤ੍ਥਮੇਵ. ਵੁਤ੍ਤਸ੍ਸੇਵਤ੍ਥਸ੍ਸ ਪੁਨ ਦੀਪਨਂ ਕਿਮਤ੍ਥਿਯਨ੍ਤਿ ਆਹ ‘‘ਗਾਥਾਰੁਚਿਕਾਨ’’ਨ੍ਤਿ. ਚੁਣ੍ਣਿਕਵਚਨਂ ਅਸਮ੍ਭਾਵੇਨ੍ਤਾ ਤਥਾ ਚ ਵੁਤ੍ਤੇ ਅਤ੍ਥਮਬੁਜ੍ਝਨਕਾ ਪਜ੍ਜਵਚਨਂ ਸਮ੍ਭਾਵੇਨ੍ਤਾ ਤਥਾ ਚ ਵੁਤ੍ਤੇ ਬੁਜ੍ਝਨਕਾ ਗਾਥਾਰੁਚਿਕਾ. ਵਿਸੇਸਤ੍ਥਦੀਪਨਤ੍ਥਨ੍ਤਿ ਵਿਸਿਟ੍ਠਦੀਪਨਤ੍ਥਂ, ਪੁਰਿਮਦੇਸਨਾਯ ਅਞ੍ਞਦੀਪਨਤ੍ਥਨ੍ਤਿ ਅਤ੍ਥੋ.

‘‘ਗਚ੍ਛਤਿ ਪਨ ਭਵਂ ਗੋਤਮੋ ਬਾਹੁਕਂ ਨਦਿਂ ਸਿਨਾਯਿਤੁ’’ਨ੍ਤਿ (ਮ. ਨਿ. ੧.੭੮) ਹੇਟ੍ਠਾ ਵੁਤ੍ਤਤ੍ਤਾ ਬਾਹੁਕਨ੍ਤਿ ਇਦਮੇਵ ਏਤ੍ਥ ਤਦਤ੍ਥਦੀਪਕਂ. ਸੇਸਾਨਿ ਅਧਿਕਕ੍ਕਾਦਿਵਚਨਾਨਿ ਤਤੋ ਵਿਸਿਟ੍ਠਸ੍ਸ ਅਤ੍ਥਸ੍ਸ ਬੋਧਨਤੋ ਵਿਸੇਸਤ੍ਥਦੀਪਕਾਨਿ. ਕਸ੍ਮਾ ਪਨੇਤ੍ਥ ਭਗਵਤਾ ਬ੍ਰਾਹ੍ਮਣੇਨ ਅਵੁਤ੍ਤਾਨਿ ਅਧਿਕਕ੍ਕਾਦੀਨਿ ਗਹਿਤਾਨੀਤਿ ਆਹ ‘‘ਯਥੇਵ ਹੀ’’ਤਿਆਦਿ. ਕਕ੍ਕਨ੍ਤਿ ਨ੍ਹਾਨਪਿਣ੍ਡਂ ਅਧਿਪ੍ਪੇਤਂ, ਨ੍ਹਾਯਿਤ੍ਵਾ ਅਧਿਕਂ ਕਕ੍ਕਂ ਏਤ੍ਥ ਗਣ੍ਹਨ੍ਤੀਤਿ ਅਧਿਕਕ੍ਕਂ. ਤੇਨਾਹ ‘‘ਨ੍ਹਾਨਸਮ੍ਭਾਰਵਸੇਨਾ’’ਤਿਆਦਿ. ਮਣ੍ਡਲਵਾਪਿਸਣ੍ਠਾਨਨ੍ਤਿ ਵਟ੍ਟਪੋਕ੍ਖਰਣੀਸਣ੍ਠਾਨਂ. ਨਦਿਯੋਤਿ ਵਿਸੁਂ ਨਦਿਯੋ, ਨ ਅਧਿਕਕ੍ਕਾਦੀਨਿ ਵਿਯ ਤਿਤ੍ਥਮਤ੍ਤਂ.

ਤੀਹਿ ਪਦੇਹੀਤਿ ਸੁਨ੍ਦਰਿਕਾਪਯਾਗਬਾਹੁਕਾਪਦੇਹਿ. ਚਤ੍ਤਾਰੀਤਿ ਅਧਿਕਕ੍ਕਾਦੀਨਿ ਚਤ੍ਤਾਰਿ. ਵੁਤ੍ਤਾਨੇਵ ਹੋਨ੍ਤੀਤਿ ਲੋਕਸਮ੍ਮਤਾਲਕ੍ਖਣੇਨ ਏਕਲਕ੍ਖਣਤਾ ਬ੍ਰਾਹ੍ਮਣਸ੍ਸ ਅਧਿਪ੍ਪਾਯੇਨ, ਪਰਮਤ੍ਥਤੋ ਪਨ ਪਾਪਪਵਾਹਲਕ੍ਖਣੇਨ ਏਕਲਕ੍ਖਣਤ੍ਤਾ. ਤੇਨਾਹ ‘‘ਤਸ੍ਮਾ’’ਤਿਆਦਿ. ਕਿਞ੍ਚਿ ਪਾਪਸੁਦ੍ਧਿਂ ਨ ਕਰੋਨ੍ਤਿਯੇਵ. ਨ ਹਿ ਨਂ ਸੋਧਯੇਤਿ ਨਂ ਪੁਗ੍ਗਲਂ ਨ ਸੋਧਯੇ. ਵੇਰਕਿਬ੍ਬਿਸਭਾਵਂ ਅਪ੍ਪਤ੍ਤਾ ਨਾਮ ਕਮ੍ਮਪਥਭਾਵਂ ਅਪ੍ਪਤ੍ਤਾ. ਤੇਨਾਹ ‘‘ਖੁਦ੍ਦਕੇਹੀ’’ਤਿ.

ਪਟਿਹਨਨ੍ਤੋਤਿ ਅਯੁਤ੍ਤਭਾਵਦਸ੍ਸਨੇਨ ਤਂ ਦਿਟ੍ਠਿਂ ਪਟਿਬਾਹਨ੍ਤੋ. ਤਤ੍ਥਾਯਂ ਪਟਿਬਾਹਨਵਿਧਿ ਯਥਾ ਯਂ ਕਿਞ੍ਚਿ ਉਦਕੋਰੋਹਨਂ ਨ ਪਾਪਪਵਾਹਨਂ, ਏਵਂ ਯੋ ਕੋਚਿ ਨਕ੍ਖਤ੍ਤਯੋਗੋ ਪਾਪਹੇਤੂਨਂ ਪਟਿਪਕ੍ਖਾਭਾਵਤੋ. ਯਞ੍ਹਿ ਵਿਨਾਸੇਤਿ, ਸੋ ਤਸ੍ਸ ਪਟਿਪਕ੍ਖੋ. ਯਥਾ ਆਲੋਕੋ ਅਨ੍ਧਕਾਰਸ੍ਸ ਵਿਜ੍ਜਾ ਚ ਅਵਿਜ੍ਜਾਯ, ਨ ਏਵਂ ਉਦਕੋਰੋਹਨਂ ਨਕ੍ਖਤ੍ਤਯੋਗੋ ਵਾ ਪਾਪਹੇਤੂਨਂ ਲੋਭਾਦੀਨਂ ਪਟਿਪਕ੍ਖੋ, ਤਸ੍ਮਾ ਨਿਟ੍ਠਮੇਤ੍ਥ ਗਨ੍ਤਬ੍ਬਂ ‘‘ਨ ਉਦਕੋਰੋਹਨਾਦਿ ਪਾਪਪਵਾਹਨ’’ਨ੍ਤਿ. ਨਿਚ੍ਚਂ ਫਗ੍ਗੁਨੀਨਕ੍ਖਤ੍ਤਨ੍ਤਿ ਸੁਦ੍ਧਸੀਲਾਦਿਕਸ੍ਸ ਸਬ੍ਬਕਾਲਂ ਮਙ੍ਗਲਦਿਵਸੋ ਏਵਾਤਿ ਅਧਿਪ੍ਪਾਯੋ. ਇਤਰੋਤਿ ਸੀਲਾਦਿਵਸੇਨ ਅਸੁਦ੍ਧੋ. ਨਿਚ੍ਚਮੇਵ ਉਪੋਸਥੋ ਅਰਿਯੁਪੋਸਥੇਨ ਉਪਵੁਤ੍ਥਭਾਵਤੋ. ਸੁਦ੍ਧਸ੍ਸਾਤਿ ਪਰਿਸੁਦ੍ਧਮਨੋਸਮਾਚਾਰਸ੍ਸ. ਸੁਚਿਕਮ੍ਮਸ੍ਸਾਤਿ ਪਰਿਸੁਦ੍ਧਕਾਯਵਚੀਸਮਾਚਾਰਸ੍ਸ. ਤੇਨਾਹ ‘‘ਨਿਕ੍ਕਿਲੇਸਤਾਯਾ’’ਤਿਆਦਿ. ਕੁਸਲੂਪਸਞ੍ਹਿਤਨ੍ਤਿ ਅਨਵਜ੍ਜਭਾਵੂਪਗਤਂ. ਵਤਸਮਾਦਾਨਨ੍ਤਿ ਧੁਤਧਮ੍ਮਸਮਾਦਾਨਾਦਿ ਸਮ੍ਪਨ੍ਨਮੇਵ ਹੋਤਿ, ਨਾਸ੍ਸ ਵਿਪਤ੍ਤਿ ਅਤ੍ਥੀਤਿ ਅਤ੍ਥੋ. ਮਮ ਸਾਸਨੇਯੇਵ ਸਿਨਾਹਿ, ਯਦਿ ਅਚ੍ਚਨ੍ਤਮੇਵ ਸੁਦ੍ਧਿਂ ਇਚ੍ਛਸੀਤਿ ਅਧਿਪ੍ਪਾਯੋ. ਤੇਨਾਹ ‘‘ਸਚੇ’’ਤਿਆਦਿ. ਖੇਮਤਨ੍ਤਿ ਖੇਮਭਾਵਂ. ਯਥਾ ਸਬ੍ਬਭੂਤਾਨਿ ਤਪਵਸੇਨ ਖੇਮਪ੍ਪਤ੍ਤਾਨਿ ਅਭਯਪ੍ਪਤ੍ਤਾਨਿ ਹੋਨ੍ਤਿ, ਏਵਂ ਕਰੋਹੀਤਿ ਤਂ ਹੇਟ੍ਠਾ ਦਸ੍ਸਿਤਂ ਮੇਤ੍ਤਾਦਿਭਾਵਨਂ ਬ੍ਰਾਹ੍ਮਣਸ੍ਸ ਸਙ੍ਖੇਪੇਨ ਉਪਦਿਸਨ੍ਤੇਨਸ੍ਸ ਏਕਚ੍ਚਸਮਾਧਿਸਮ੍ਪਦਾ ਤਦਵਿਨਾਭਾਵਿਨੀ ਪਞ੍ਞਾਸਮ੍ਪਦਾ ਚ ਦਸ੍ਸਿਤਾਤਿ ਦਟ੍ਠਬ੍ਬਂ. ਤੇਨਾਹ ‘‘ਮਨੋਦ੍ਵਾਰਸੁਦ੍ਧਿ ਦਸ੍ਸਿਤਾ’’ਤਿ.

ਤਸ੍ਸ ਪਨ ਸਮ੍ਪਦਾਦ੍ਵਯਸ੍ਸ ਨਿਸ੍ਸਯਭੂਤਂ ਸੀਲਸਮ੍ਪਦਂ ਦਸ੍ਸੇਤੁਂ ‘‘ਸਚੇ ਮੁਸਾ ਨ ਭਣਸੀ’’ਤਿਆਦਿ ਵੁਤ੍ਤਂ. ਏਤ੍ਥ ਚ ਯਥਾ ‘‘ਸਚੇ ਮੁਸਾ ਨ ਭਣਸੀ’’ਤਿਆਦਿਨਾ ਮੁਸਾਵਾਦ-ਪਾਣਾਤਿਪਾਤ-ਅਦਿਨ੍ਨਾਦਾਨ-ਪਟਿਵਿਰਤਿਵਚਨੇਨ ਅਵਸੇਸਕਾਯਵਚੀਦੁਚ੍ਚਰਿਤਵਿਰਤੀਪਿ ਵੁਤ੍ਤਾ ਏਵ ਹੋਤਿ ਲਕ੍ਖਣਹਾਰਨਯੇਨ, ਏਵਂ ‘‘ਸਦ੍ਦਹਾਨੋ ਅਮਚ੍ਛਰੀ’’ਤਿ ਸਦ੍ਧਾਦਿਧਨਸਮ੍ਪਦਾਨਿਯੋਜਨੇਨੇਵ ਅਵਸੇਸਅਰਿਯਧਨਸਮ੍ਪਦਾਨਿਯੋਜਨਮ੍ਪਿ ਸਿਦ੍ਧਮੇਵ ਹੋਤੀਤਿ ਸਦ੍ਧਾਦਯੋ ਵਿਮੁਤ੍ਤਿਪਰਿਪਾਚਨੀਯਧਮ੍ਮਾ ਬ੍ਰਾਹ੍ਮਣਸ੍ਸ ਪਕਾਸਿਤਾ ਏਵਾਤਿ ਵੇਦਿਤਬ੍ਬਾ. ਤੇਨੇਵਾਹ ‘‘ਇਮਾਯ ਏਵ ਪਟਿਪਤ੍ਤਿਯਾ ਕਿਲੇਸਸੁਦ੍ਧੀ’’ਤਿ. ਗਯਾ ਸਮ੍ਮਤਤਰਾ ਬਾਹੁਕਾਦੀਹਿਪੀਤਿ ਅਧਿਪ੍ਪਾਯੋ.

੮੦. ਏਕੋਤਿ ਅਸਹਾਯੋ, ਏਸਾ ਪਨਸ੍ਸ ਅਸਹਾਯਤਾ ਏਕੀਭਾਵੇਨਾਤਿ. ਨ ਹਿਸ੍ਸ ਤਾਵ ਤਣ੍ਹਾਦੁਤਿਯਤਾ ਵਿਗਤਾ. ਤੇਨੇਵਾਹ ‘‘ਨ ਚਿਰਸ੍ਸੇਵਾ’’ਤਿਆਦਿ. ਏਕਗ੍ਗਹਣੇਨੇਵ ਕਾਯੇਨ ਵੂਪਕਟ੍ਠਤਾ ਵੁਤ੍ਤਾਤਿ ਆਹ ‘‘ਵੁਪਕਟ੍ਠੋ ਚਿਤ੍ਤਵਿਵੇਕੇਨਾ’’ਤਿ. ਤੇਨ ‘‘ਦਿਵਾ ਚਙ੍ਕਮੇਨ ਨਿਸਜ੍ਜਾਯਾ’’ਤਿਆਦਿਨਾ (ਮ. ਨਿ. ੧.੪੨੩; ੩.੭੫; ਵਿਭ. ੫੧੯; ਮਹਾਨਿ. ੧੬੧) ਆਗਤਂ ਜਾਗਰਿਯਾਨੁਯੋਗਮਾਹ. ਤਥਾਭੂਤਸ੍ਸ ਚਸ੍ਸ ਏਕਾਦਸਹਿ ਅਗ੍ਗੀਹਿ ਆਦਿਤ੍ਤੇ ਤਯੋ ਭਵੇ ਪਸ੍ਸਤੋ ਯਥਾ ਪਮਾਦਸ੍ਸ ਲੇਸੋਪਿ ਨਾਹੋਸਿ, ਏਵਂ ਕਮ੍ਮਟ੍ਠਾਨਂ ਬ੍ਰੂਹੇਨ੍ਤੋ ਸਮ੍ਮਦੇਵ ਪਦਹਤਿ. ਕਤ੍ਥਚਿ ਸਙ੍ਖਾਰਗਤੇ ਅਨਪੇਕ੍ਖਚਿਤ੍ਤੋ ਨਿਬ੍ਬਾਨਾਧਿਮੁਤ੍ਤੋ ਏਵ ਵਿਹਾਸੀਤਿ ਦਸ੍ਸੇਤੁਂ ‘‘ਅਪ੍ਪਮਤ੍ਤੋ’’ਤਿਆਦਿ ਵੁਤ੍ਤਂ. ਖੀਣਾ ਜਾਤੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਵਤ੍ਥਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.