੯. ਪਟਿਗ੍ਗਾਹਨਿਦ੍ਦੇਸਵਣ੍ਣਨਾ

੧੦੬. ਦਾਤੁਂ ਕਾਮੇਤੀਤਿ ਦਾਤੁਕਾਮੋ, ਤਸ੍ਸ ਅਭਿਹਾਰੋ ਈਸਕਮ੍ਪਿ ਓਣਮਨਾਦਿਨਾਭਿਹਰਣਨ੍ਤਿ ਤਪ੍ਪੁਰਿਸੋ, ਹਤ੍ਥਸ੍ਸ ਪਾਸੋ ਹਤ੍ਥਪਾਸੋ. ਰੁਲ਼੍ਹੀਵਸੇਨ ਤੁ ਅਡ੍ਢਤੇਯ੍ਯਹਤ੍ਥੋ ਹਤ੍ਥਪਾਸੋ ਨਾਮ. ਸੋ ਚ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਦਾਯਕਸ੍ਸ ਨਿਸਿਨ੍ਨਸ੍ਸ ਠਿਤਸ੍ਸ ਵਾ ਠਪੇਤ੍ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਵੇਦਿਤਬ੍ਬੋ. ਏਰਣਕ੍ਖਮਨ੍ਤਿ ਥਾਮਮਜ੍ਝਿਮੇਨ ਪੁਰਿਸੇਨ ਏਰਣਸ੍ਸ ਉਕ੍ਖਿਪਨਸ੍ਸ ਖਮਂ ਯੋਗ੍ਗਂ. ਵਤ੍ਥੁਸਦ੍ਦਾਪੇਕ੍ਖਂ ਨਪੁਂਸਕਤ੍ਤਂ. ਤਿਧਾ ਦੇਨ੍ਤੇਤਿ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਵਸੇਨ ਤੀਹਿ ਪਕਾਰੇਹਿ ਦਾਯਕੇ ਦਦਮਾਨੇ. ਤਤ੍ਥ ਯੇਨ ਕੇਨਚਿ ਸਰੀਰਾਵਯਵੇਨ ਅਨ੍ਤਮਸੋ ਪਾਦਙ੍ਗੁਲਿਯਾਪਿ ਦੀਯਮਾਨਂ ਕਾਯੇਨ ਦਿਨ੍ਨਂ ਨਾਮ ਹੋਤਿ, ਕਟਚ੍ਛੁਆਦੀਸੁ ਯੇਨ ਕੇਨਚਿ ਦੀਯਮਾਨਂ ਕਾਯਪ੍ਪਟਿਬਦ੍ਧੇਨ, ਕਾਯਤੋ ਪਨ ਕਾਯਪ੍ਪਟਿਬਦ੍ਧਤੋ ਵਾ ਮੋਚੇਤ੍ਵਾ ਹਤ੍ਥਪਾਸੇ ਠਿਤਸ੍ਸ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਪਾਤਿਯਮਾਨਂ ਨਿਸ੍ਸਗ੍ਗਿਯੇਨ ਪਯੋਗੇਨ ਦਿਨ੍ਨਂ ਨਾਮ. ਦ੍ਵਿਧਾ ਗਾਹੋਤਿ ਕਾਯਕਾਯਪ੍ਪਟਿਬਦ੍ਧਾਨਂ ਵਸੇਨ ਦ੍ਵੀਹਿ ਪਕਾਰੇਹਿ ਯੇਹਿ ਕੇਹਿਚਿ ਦੀਯਮਾਨਸ੍ਸ ਗਹਣਂ. ਏਵਂ ਪਟਿਗ੍ਗਹੋ ਪਞ੍ਚਙ੍ਗੋਤਿ ਯੋਜਨਾ. ਪਞ੍ਚਙ੍ਗੋਤਿ ਪਞ੍ਚ ਅਙ੍ਗਾਨਿ ਯਸ੍ਸਾਤਿ ਬਹੁਬ੍ਬੀਹਿ.

੧੦੭. ਇਦਾਨਿ ਅਨੇਰਣਕ੍ਖਮੇ ਚ ਕਿਸ੍ਮਿਞ੍ਚਿ ਕਾਯਪ੍ਪਟਿਬਦ੍ਧੇ ਚ ਪਟਿਗ੍ਗਹਣਾਰੋਹਨਂ ਦਸ੍ਸੇਤੁਂ ‘‘ਅਸਂਹਾਰਿਯੇ’’ਤਿਆਦਿਮਾਹ. ਤਤ੍ਥ ਅਸਂਹਾਰਿਯੇਤਿ ਆਨੇਤੁਮਸਕ੍ਕੁਣੇਯ੍ਯੇ ਫਲਕਪਾਸਾਣਾਦਿਮ੍ਹਿ. ਤਤ੍ਥਜਾਤੇਤਿ ਤੇਸੁਯੇਵ ਰੁਕ੍ਖਾਦੀਸੁ ਜਾਤੇ ਕਿਂਸੁਕਪਦੁਮਿਨਿਪਣ੍ਣਾਦਿਕੇ. ਚਿਞ੍ਚਆਦੀਨਂ ਸੁਖੁਮੇ ਪਣ੍ਣੇਤਿ ਸਮ੍ਬਨ੍ਧੋ. ਤਾਨਿ ਹਿ ਸਨ੍ਧਾਰੇਤੁਂ ਨ ਸਕ੍ਕੋਨ੍ਤਿ. ਤੇਸਂ ਪਨ ਸਾਖਾਸੁ ਵਟ੍ਟਤਿ. ਆਦਿ-ਸਦ੍ਦੇਨ ‘‘ਅਙ੍ਗ’’ਨ੍ਤਿਆਦਿਕਂ ਸਙ੍ਗਣ੍ਹਾਤਿ. ਵਾ-ਸਦ੍ਦੋ ਸਮੁਚ੍ਚਯੇ. ਅਸਯ੍ਹਭਾਰੇਤਿ ਥਾਮਮਜ੍ਝਿਮਪੁਰਿਸੇਨ ਸਹਿਤੁਂ ਸਨ੍ਧਾਰੇਤੁਂ ਅਸਕ੍ਕੁਣੇਯ੍ਯੇ ਭਾਰੇ. ਸਬ੍ਬੇਸਂ ਪਟਿਗ੍ਗਹੋ ‘‘ਨ ਰੂਹਤੀ’’ਤਿ ਇਮਿਨਾ ਸਮ੍ਬਨ੍ਧੋ.

੧੦੮. ਇਦਾਨਿ ਪਟਿਗ੍ਗਹਣਵਿਜਹਨਂ ਦਸ੍ਸੇਤਿ ‘‘ਸਿਕ੍ਖਾ’’ਤਿਆਦਿਨਾ. ਤਤ੍ਥ ਸਿਕ੍ਖਾਮਰਣਲਿਙ੍ਗੇਹੀਤਿ ਸਿਕ੍ਖਾਪਚ੍ਚਕ੍ਖਾਨੇਨ ਚ ਮਰਣੇਨ ਚ ਲਿਙ੍ਗਪਰਿਵਤ੍ਤਨੇਨ ਚ. ਅਨਪੇਕ੍ਖਵਿਸਗ੍ਗਤੋਤਿ ਨਤ੍ਥਿ ਅਪੇਕ੍ਖੋ ਏਤਸ੍ਸਾਤਿ ਅਨਪੇਕ੍ਖੋ, ਸੋਵ ਵਿਸਗ੍ਗੋ, ਤਤੋ ਚ. ਅਚ੍ਛੇਦਾਤਿ ਚੋਰਾਦੀਹਿ ਅਚ੍ਛਿਨ੍ਦਿਤ੍ਵਾ ਗਹਣੇਨ. ਅਨੁਪਸਮ੍ਪਨ੍ਨਦਾਨਾਤਿ ਅਨੁਪਸਮ੍ਪਨ੍ਨਸ੍ਸ ਦਾਨੇਨ. ਚ-ਸਦ੍ਦੋ ਸਬ੍ਬਤ੍ਥ ਆਨੇਤਬ੍ਬੋ. ਗਾਹੋਤਿ ਪਟਿਗ੍ਗਹਣਂ. ਉਪਸਮ੍ਮਤੀਤਿ ਵਿਜਹਤਿ.

੧੦੯-੧੦. ਇਦਾਨਿ ਅਪ੍ਪਟਿਗ੍ਗਹਿਤਂ ਪਰਿਭੋਗੇ ਦੋਸਂ ਦਸ੍ਸੇਤੁਂ ‘‘ਅਪ੍ਪਟਿਗ੍ਗਹਿਤ’’ਨ੍ਤਿਆਦਿਮਾਹ. ਤਤ੍ਥ ਸਬ੍ਬਨ੍ਤਿ ਚਤੁਕਾਲਿਕਪਰਿਯਾਪਨ੍ਨਂ ਸਕਲਮ੍ਪਿ. ਇਦਾਨਿ ਅਪ੍ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ ਦਸ੍ਸੇਤੁਂ ‘‘ਸੁਦ੍ਧ’’ਨ੍ਤਿਆਦਿਮਾਹ. ਤਤ੍ਥ ਸੁਦ੍ਧਂ ਨਾਤਿਬਹਲਂ ਉਦਕਞ੍ਚ ਤਥਾ ਅਙ੍ਗਲਗ੍ਗਂ ਅਵਿਚ੍ਛਿਨ੍ਨਂ ਦਨ੍ਤ…ਪੇ… ਗੂਥਕਞ੍ਚ ਲੋਣ…ਪੇ… ਕਰੀਸਕਞ੍ਚ ਕਪ੍ਪਤੇਤਿ ਸਮ੍ਬਨ੍ਧੋ. ਤਤ੍ਥ ਸੁਦ੍ਧਨ੍ਤਿ ਰਜਰੇਣੂਹਿ ਅਞ੍ਞਰਸੇਨ ਚ ਅਸਮ੍ਮਿਸ੍ਸਤਾਯ ਪਰਿਸੁਦ੍ਧਂ. ਨਾਤਿਬਹਲਨ੍ਤਿ ਯਂ ਕਸਿਤਟ੍ਠਾਨੇ ਬਹਲਮੁਦਕਂ ਵਿਯ ਮੁਖੇ ਵਾ ਹਤ੍ਥੇ ਵਾ ਨ ਲਗ੍ਗਂ, ਤਂ. ਅਵਿਚ੍ਛਿਨ੍ਨਨ੍ਤਿ ਅਙ੍ਗਤੋ ਵਿਚ੍ਛਿਨ੍ਦਿਤ੍ਵਾ ਨ ਗਤਂ. ਦਨ੍ਤਾਨਿ ਚ ਅਕ੍ਖੀਨਿ ਚ ਕਣ੍ਣਞ੍ਚ ਦਨ੍ਤਕ੍ਖਿਕਣ੍ਣਂ ਪਾਣ੍ਯਙ੍ਗਤ੍ਤਾ, ਤਸ੍ਸ ਗੂਥਕਨ੍ਤਿ ਤਪ੍ਪੁਰਿਸੋ. ਲੋਣਂ ਸਰੀਰੁਟ੍ਠਿਤਂ. ਸਿਙ੍ਘਾਣੀਤਿ ਸਿਙ੍ਘਾਣਿਕਾ. ਵਿਚ੍ਛਿਨ੍ਨਂ ਨ ਪਟਿਗ੍ਗਹੇਤਬ੍ਬਂ.

੧੧੧. ਇਦਾਨਿ ‘‘ਗੂਥਾ’’ਤਿਆਦਿਨਾ ਕਾਲੋਦਿਸ੍ਸਂ ਦਸ੍ਸੇਤਿ. ਤਥਾਵਿਧੇਤਿ ਸਪ੍ਪਦਟ੍ਠਕ੍ਖਣਾਦਿਕੇ ਤਥਾਵਿਧੇ ਕਾਲੇ. ਤਥਾ ਤਾਦਿਸੋ ਵਿਧੋ ਕਾਲੋ ਏਤਸ੍ਸਾਤਿ ਬਹੁਬ੍ਬੀਹਿ. ਸੇਵੇਯ੍ਯਾਤਿ ਸੇਵਨਂ ਕਰੇਯ੍ਯ, ਪਰਿਭੁਞ੍ਜੇਯ੍ਯਾਤਿ ਵੁਤ੍ਤਂ ਹੋਤਿ. ਅਸਨ੍ਤੇ ਕਪ੍ਪਕਾਰਕੇਤਿ ਏਤ੍ਥ ਦੁਬ੍ਬਚੋਪਿ ਅਸਮਤ੍ਥੋਪਿ ਕਪ੍ਪਿਯਕਾਰਕੋ ਅਸਨ੍ਤਪਕ੍ਖੇਯੇਵ ਤਿਟ੍ਠਤੀਤਿ ਵੇਦਿਤਬ੍ਬੋ. ਕਾਲੋਦਿਸ੍ਸਤ੍ਤਾ ਪਨ ਛਾਰਿਕਾਯ ਅਸਤਿ ਅਲ੍ਲਦਾਰੁਂ ਰੁਕ੍ਖਤੋ ਛਿਨ੍ਦਿਤ੍ਵਾ ਕਾਤੁਂ, ਮਤ੍ਤਿਕਾਯ ਅਸਤਿ ਭੂਮਿਂ ਖਣਿਤ੍ਵਾਪਿ ਮਤ੍ਤਿਕਂ ਗਹੇਤੁਂ ਵਟ੍ਟਤਿ.

੧੧੨. ਦੁਰੂਪਚਿਣ੍ਣੇਤਿ ਦੁਟ੍ਠੁਂ ਉਪਚਿਣ੍ਣਂ ਆਮਟ੍ਠਂ ਦੁਰੂਪਚਿਣ੍ਣਂ. ਸਚੇ ਭਿਕ੍ਖੁ ਅਪ੍ਪਟਿਗ੍ਗਹਿਤਂ ਸਾਮਿਸਂ ਭਾਜਨਂ ਠਿਤਟ੍ਠਾਨਤੋ ਅਪਨੇਤ੍ਵਾ ਆਮਸਤਿ, ਪਿਧਾਨਂ ਆਮਸਤਿ, ਉਪਰਿ ਠਿਤਕਚਵਰਾਦਿਂ ਛਡ੍ਡੇਤਿ, ਤਤ੍ਥਜਾਤਕਫਲਿਨਿਯਾ ਸਾਖਾਯ ਵਾ ਵਲ੍ਲਿਯਾ ਵਾ ਗਹੇਤ੍ਵਾ ਵਾ ਚਾਲੇਤਿ, ਦੁਰੂਪਚਿਣ੍ਣਂ ਨਾਮ ਹੋਤਿ. ਤਸ੍ਮਿਂ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਫਲਰੁਕ੍ਖਂ ਪਨ ਅਪਸ੍ਸਯਿਤੁਂ ਵਾ ਤਤ੍ਥ ਕਣ੍ਟਕਂ ਵਾ ਬਨ੍ਧਿਤੁਂ ਵਟ੍ਟਤਿ. ਅਰਞ੍ਞੇ ਪਤਿਤਅਮ੍ਬਫਲਾਦਿਂ ‘‘ਸਾਮਣੇਰਸ੍ਸ ਦਸ੍ਸਾਮੀ’’ਤਿ ਆਹਰਿਤ੍ਵਾ ਦਾਤੁਂ ਵਟ੍ਟਤਿ. ਰਜੋਕਿਣ੍ਣੇਤਿ ਰਜਸਾ ਓਕਿਣ੍ਣੇ, ਤਸ੍ਮਿਂ ਪਤ੍ਤਾਦਿਕੇ ਯਂ ਕਿਞ੍ਚਿ ਪਟਿਗ੍ਗਣ੍ਹਤੋ ਵਿਨਯਦੁਕ੍ਕਟਂ ਹੋਤੀਤਿ ਅਤ੍ਥੋ. ਸਚੇ ਪਿਣ੍ਡਾਯ ਚਰਨ੍ਤਸ੍ਸ ਪਤ੍ਤੇ ਰਜਂ ਪਤਤਿ, ਪਟਿਗ੍ਗਹੇਤ੍ਵਾ ਭਿਕ੍ਖਾ ਗਣ੍ਹਿਤਬ੍ਬਾ. ‘‘ਪਟਿਗ੍ਗਹੇਤ੍ਵਾ ਦੇਥਾ’’ਤਿ ਵੁਤ੍ਤੇਪਿ ਆਕਿਰਨ੍ਤਿ, ਹਤ੍ਥਤੋ ਅਮੋਚੇਨ੍ਤੇਨੇਵ ਪਟਿਗ੍ਗਾਹਾਪਕਸ੍ਸ ਸਨ੍ਤਿਕਂ ਨੇਤ੍ਵਾ ਪਟਿਗ੍ਗਹੇਤਬ੍ਬਂ. ਸਚੇ ਮਹਾਵਾਤੋ ਤਤੋ ਤਤੋ ਰਜਂ ਪਾਤੇਤਿ, ਨ ਸਕ੍ਕਾ ਹੋਤਿ ਭਿਕ੍ਖਂ ਗਹੇਤੁਂ, ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਸੁਦ੍ਧਚਿਤ੍ਤੇਨ ਆਭੋਗਂ ਕਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਤਂ ਪਨ ਤੇਨ ਦਿਨ੍ਨਂ ਵਾ ਵਿਸ੍ਸਾਸੇਨ ਵਾ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਅਥਾਤਿ ਵਕ੍ਖਮਾਨਾਰਮ੍ਭੇ. ਉਗ੍ਗਹਪ੍ਪਟਿਗ੍ਗਹੇਤਿ ਉਗ੍ਗਹਿਤ੍ਥਾਤਿ ਉਗ੍ਗਹੋ, ਉਗ੍ਗਹਿਤਂ, ਤਸ੍ਸ ਪਟਿਗ੍ਗਹੋ, ਤਸ੍ਮਿਂ. ਅਪ੍ਪਟਿਗ੍ਗਹਿਤਭਾਵਂ ਜਾਨਤੋ ਅਤ੍ਤਨਾ ਏਵ ਉਗ੍ਗਹੇਤ੍ਵਾ ਗਹਣੇਤਿ ਅਧਿਪ੍ਪਾਯੋ. ਮਾਤਾਪਿਤੂਨਂ ਅਤ੍ਥਾਯ ਪਨ ਅਪ੍ਪਟਿਗ੍ਗਹੇਤ੍ਵਾ ਤੇਲਾਦੀਨਿ, ਛਾਯਤ੍ਥਾਯ ਸਾਖਾਦੀਨਿ ਵਾ ਗਹੇਤ੍ਵਾ ਪਚ੍ਛਤੋ ਭੁਞ੍ਜਿਤੁਕਾਮਤਾਯ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਚ੍ਛੁਆਦੀਸੁ ਫਾਲਿਤੇਸੁ ਮਲਂ ਨ ਪਞ੍ਞਾਯਤਿ, ਮੂਲਭੇਸਜ੍ਜਾਦੀਨਿ ਪਿਸਨ੍ਤਾਨਂ ਵਾ ਕੋਟ੍ਟੇਨ੍ਤਾਨਂ ਵਾ ਨਿਸਦਨਿਸਦਪੋਤਕਉਦੁਕ੍ਖਲਮੁਸਲਾਨਿ ਖੀਯਨ੍ਤਿ, ਦਨ੍ਤਨ੍ਤਰੇ ਲਗ੍ਗਂ ਸੁਖੁਮਆਮਿਸਂ ਹੋਤਿ, ਰਸੋ ਨ ਪਞ੍ਞਾਯਤਿ, ਅਬ੍ਬੋਹਾਰਿਕਂ. ਅਨ੍ਤੋਵੁਤ੍ਥੇਤਿ ਅਕਪ੍ਪਿਯਕੁਟਿਯਾ ਛਦਨਬ੍ਭਨ੍ਤਰੇ ਵੁਤ੍ਥੇਤਿ ਅਤ੍ਥੋ. ਸਯਂਪਕ੍ਕੇਤਿ ਅਤ੍ਤਨਾ ਯਤ੍ਥ ਕਤ੍ਥਚਿ ਪਕ੍ਕੇ. ਸਚੇ ਵਾਸਿਆਦਿਂ ਤਾਪੇਤ੍ਵਾ ਤਕ੍ਕਾਦੀਸੁ ਪਕ੍ਖਿਪਤਿ, ਏਤ੍ਤਾਵਤਾਪਿ ਸਾਮਪਾਕਤੋ ਨ ਮੁਚ੍ਚਤਿ. ਪੁਰਿਮਕਾਲਿਕਦ੍ਵਯੇ ਪੁਨਪਾਕਞ੍ਹਿ ਠਪੇਤ੍ਵਾ ਯਂ ਕਿਞ੍ਚਿ ਆਮਿਸਂ ਭਿਕ੍ਖੁਨੋ ਪਚਿਤੁਂ ਨ ਵਟ੍ਟਤਿ. ਸਚੇਪਿਸ੍ਸ ਉਣ੍ਹਯਾਗੁਯਾ ਸੁਲਸਿਪਣ੍ਣਾਦੀਨਿ ਵਾ ਸਿਙ੍ਗਿਵੇਰਂ ਵਾ ਪਕ੍ਖਿਪਨ੍ਤਿ, ਚਾਲੇਤੁਂ ਨ ਵਟ੍ਟਤਿ. ਉਤ੍ਤਣ੍ਡੁਲਂ ਭਤ੍ਤਂ ਲਭਿਤ੍ਵਾ ਪਿਦਹਿਤੁਂ ਨ ਵਟ੍ਟਤਿ. ਅਨ੍ਤੋਪਕ੍ਕੇਤਿ ਅਕਪ੍ਪਿਯਕੁਟਿਯਾ ਅਨ੍ਤੋ ਪਕ੍ਕੇ. ਸਬ੍ਬਤ੍ਥ ਦੁਕ੍ਕਟਨ੍ਤਿ ਸਮ੍ਬਨ੍ਧੋ.

ਪਟਿਗ੍ਗਾਹਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.