੭. ਪਵਾਰਣਾਨਿਦ੍ਦੇਸਵਣ੍ਣਨਾ

੭੩. ਯੇਨ ਇਰਿਯਾਪਥੇਨ ਉਪਲਕ੍ਖਿਤੋ ਪਞ੍ਚਨ੍ਨਂ ਭੋਜਨਾਨਂ ਯਂ ਕਿਞ੍ਚਿ ਭੋਜਨਂ ਭੁਞ੍ਜਮਾਨੋ ਅਯਂ ਭਿਕ੍ਖੁ ਕਪ੍ਪਿਯਾਨਂ ਪਞ੍ਚਨ੍ਨਂ ਭੋਜਨਾਨਂ ਹਤ੍ਥਪਾਸੋਪਨੀਤਾਨਂ ਪਵਾਰਿਤੋ, ਤਤੋ ਇਰਿਯਾਪਥਤੋ ਅਞ੍ਞੇਨ ਇਰਿਯਾਪਥੇਨ ਅਨਤਿਰਿਤ੍ਤਕਂ ਯਾਵਕਾਲਿਕਂ ਭੁਞ੍ਜੇਯ੍ਯ ਚੇ, ਇਮਸ੍ਸ ਪਾਚਿਤ੍ਤਿ ਹੋਤੀਤਿ ਪਦਤ੍ਥਯੋਜਨਾ. ਭੁਞ੍ਜਨਤ੍ਥਾਯ ਪਟਿਗ੍ਗਹਣੇ ਪਨ ਦੁਕ੍ਕਟਂ. ਤਤ੍ਥ ਇਰਿਯਾਯ ਕਾਯਿਕਕਿਰਿਯਾਯ ਪਥੋ ਪਵਤ੍ਤਨੂਪਾਯੋ ਇਰਿਯਾਪਥੋ, ਠਾਨਗਮਨਨਿਸਜ੍ਜਨਸਯਨਾਨਿ. ਪਵਾਰੇਤਿ ਪਟਿਕ੍ਖਿਪਤੀਤਿ ਪਵਾਰਿਤੋ, ਅਥ ਵਾ ਪਵਾਰਣਂ ਪਟਿਕ੍ਖਿਪਨਂ ਪਵਾਰਿਤਂ, ਤਮਸ੍ਸ ਅਤ੍ਥੀਤਿ ਪਵਾਰਿਤੋ, ਕਤਪ੍ਪਵਾਰਣੋ ਕਤਪ੍ਪਟਿਕ੍ਖੇਪੋਤਿ ਅਤ੍ਥੋ, ਅਥ ਵਾ ਪਰਿਵੇਸਕੇਨ ਵਾਰੀਯਤੀਤਿ ਪਵਾਰਿਤੋ ਪਟਿਕ੍ਖੇਪਿਤੋ. ਅਨਤਿਰਿਤ੍ਤਕਨ੍ਤਿ ਯਂ ਪਵਾਰੇਤ੍ਵਾ ਆਸਨਾ ਵੁਟ੍ਠਹਨ੍ਤਸ੍ਸ ‘‘ਅਲਮੇਤਂ ਸਬ੍ਬ’’ਨ੍ਤਿ ਏਵਂ ਅਤਿਰਿਤ੍ਤਕਰਣਾਦੀਹਿ ਸਤ੍ਤਹਿ ਵਿਨਯਕਮ੍ਮਾਕਾਰੇਹਿ ਕਪ੍ਪਿਯਂ ਕਤਂ, ਤਞ੍ਚ ‘‘ਅਜ੍ਜ ਵਾ ਯਦਾ ਵਾ ਇਚ੍ਛਤਿ, ਤਦਾ ਖਾਦਿਸ੍ਸਤੀ’’ਤਿ ਆਹਟਂ, ਗਿਲਾਨਾਤਿਰਿਤ੍ਤਞ੍ਚ ਅਤਿਰਿਤ੍ਤਂ ਅਧਿਕਨ੍ਤਿ ਵੁਚ੍ਚਤਿ, ਤਤੋ ਅਞ੍ਞਂ ਅਨਤਿਰਿਤ੍ਤਕਂ ਅਨਧਿਕਨ੍ਤਿ ਅਤ੍ਥੋ. ਕੁਸਲਂ ਚਿਤ੍ਤਂ ਪਾਤੇਤੀਤਿ ਪਾਚਿਤ੍ਤਿ, ਤਸ੍ਮਾ ਇਤ੍ਥਿਯਂ ਤਿਮ੍ਹਿ ਤ-ਕਾਰਸ੍ਸ ਚ-ਕਾਰੇ, ਦ੍ਵਿਤ੍ਤੇ ਚ ਪਾਚਿਤ੍ਤਿ. ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯ ਪਟਿਗ੍ਗਣ੍ਹਤੋ ਆਪਤ੍ਤਿ ਦੁਕ੍ਕਟਸ੍ਸ, ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸ.

੭੪. ਇਦਾਨਿ ਯਾਯ ਪਵਾਰਿਤਾ, ਸਾ ਪਞ੍ਚਙ੍ਗਸਮ੍ਪਨ੍ਨਾਯੇਵ ਪਵਾਰਣਾ ਨਾਮ ਹੋਤੀਤਿ ਦਸ੍ਸੇਤੁਂ ‘‘ਅਸਨ’’ਨ੍ਤਿਆਦਿਮਾਹ. ਤਤ੍ਥ ਅਸਨਨ੍ਤਿ ਭੁਞ੍ਜਮਾਨਸ੍ਸ ਭੁਞ੍ਜਨਂ. ਇਮਿਨਾ ਯਂ ਵਿਪ੍ਪਕਤਂ ਭੋਜਨਂ, ਤਂ ਦਸ੍ਸੇਤਿ. ਭੋਜਨਞ੍ਚੇਵਾਤਿ ਪਵਾਰਣਪ੍ਪਹੋਨਕਂ ਭੋਜਨਞ੍ਚੇਵ ਹੋਤੀਤਿ. ਅਭਿਹਾਰੋਤਿ ਦਾਯਕਸ੍ਸ ਕਾਯੇਨ ਪਵਾਰਣਪ੍ਪਹੋਨਕਸ੍ਸ ਅਭਿਹਰਣਂ, ਨ ਵਾਚਾਯ. ਸਮੀਪਤਾਤਿ ਅਡ੍ਢਤੇਯ੍ਯਹਤ੍ਥਪ੍ਪਮਾਣਸਙ੍ਖਾਤਾ ਸਮੀਪਤਾ ਚ. ਏਤ੍ਥ ਪਨ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਦਾਯਕਸ੍ਸ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਨਿਪਨ੍ਨਸ੍ਸ ਵਾ ਠਪੇਤ੍ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਅਡ੍ਢਤੇਯ੍ਯਹਤ੍ਥਪਾਸੋ ਵੇਦਿਤਬ੍ਬੋ. ਕਾਯਵਾਚਾਪਟਿਕ੍ਖੇਪੋਤਿ ਤਸ੍ਸ ਅਭਿਹਟਭੋਜਨਸ੍ਸ ਅਙ੍ਗੁਲਿਚਲਨਾਦਿਕਾਯਵਿਕਾਰੇਨ ਵਾ ‘‘ਅਲ’’ਨ੍ਤਿਆਦਿਨਾ ਵਚੀਵਿਕਾਰੇਨ ਵਾ ਪਟਿਕ੍ਖਿਪਨਂ. ਇਤਿ ਇਮੇਹਿ ਪਞ੍ਚਹਙ੍ਗੇਹਿ ਪਵਾਰਣਾ ਪਕਾਰਯੁਤ੍ਤਵਾਰਣਾ ਪਞ੍ਚਅਙ੍ਗਾਤਿ ਸਮ੍ਬਨ੍ਧੋ. ਪਞ੍ਚ ਅਙ੍ਗਾਨਿ ਯਸ੍ਸਾ ਸਾ ਪਞ੍ਚਅਙ੍ਗਾ.

੭੫. ਇਦਾਨਿ ਏਤੇਸੁ ਓਦਨਾਦਿਪਞ੍ਚਵਿਧਂ ਭੋਜਨਂ ਦਸ੍ਸੇਤ੍ਵਾ ਤਾਨਿ ਚ ਪੁਨ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਓਦਨੋ’’ਤਿਆਦਿ ਆਰਦ੍ਧਂ. ਤਤ੍ਥ ਸਾਲੀਤਿ ਰਤ੍ਤਸਾਲਿਆਦਿਕਾ ਸਬ੍ਬਾਪਿ ਸਾਲਿਜਾਤਿ. ਵੀਹੀਤਿ ਸਬ੍ਬਾਪਿ ਵੀਹਿਨਾਮਿਕਾ ਵੀਹਿਜਾਤਿ. ਕਙ੍ਗੂਤਿ ਸੇਤਰਤ੍ਤਕਾਲ਼ਭੇਦਾ ਸਬ੍ਬਾਪਿ ਕਙ੍ਗੁਜਾਤਿ. ਕੁਦ੍ਰੂਸੋ ਨਾਮ ਕਾਲ਼ਕੋਦ੍ਰਵੋ. ਵਰਕੋ ਨਾਮ ਸੇਤਵਣ੍ਣੋ ਕੋਦ੍ਰਵੋ. ਯਵਗੋਧੁਮੇਸੁ ਪਨ ਭੇਦੋ ਨਤ੍ਥਿ. ਏਵਂ ਯਥਾਵੁਤ੍ਤਾਨਂ ਸਾਨੁਲੋਮਾਨਂ ਸਤ੍ਤਨ੍ਨਂ ਧਞ੍ਞਾਨਂ ਭੋਜ੍ਜਯਾਗੁ ਚਾਤਿ ਸਮ੍ਬਨ੍ਧੋ. ਭੋਜ੍ਜਯਾਗੁ ਚਾਤਿ ਉਣ੍ਹਂ ਵਾ ਸੀਤਲਂ ਵਾ ਭੁਞ੍ਜਨ੍ਤਾਨਂ ਭੋਜਨਕਾਲੇ ਗਹਿਤਟ੍ਠਾਨੇ ਓਧਿ ਪਞ੍ਞਾਯਤਿ, ਸਾ ਭੋਜ੍ਜਯਾਗੁ. ਚ-ਸਦ੍ਦੇਨ ਓਦਨੋ ਚਾਤਿ ਸਮ੍ਬਨ੍ਧੋ, ਓਦਨੋ ਨਾਮਾਤਿ ਅਤ੍ਥੋ. ਸਚੇ ਪਨ ਭਤ੍ਤੇ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਦੇਨ੍ਤਿ, ਕਿਞ੍ਚਾਪਿ ਤਨੁਕਾ ਹੋਤਿ, ਪਵਾਰਣਂ ਜਨੇਤਿ. ਸਚੇ ਪਨ ਉਦਕਾਦੀਸੁ ਪਕ੍ਖਿਪਿਤ੍ਵਾ ਪਚਿਤ੍ਵਾ ਦੇਨ੍ਤਿ, ਯਾਗੁਸਙ੍ਗਹਮੇਵ ਗਚ੍ਛਤਿ. ਸਚੇ ਪਨ ਤਨੁਕਾਯਪਿ ਯਾਗੁਯਾ ਸਾਸਪਮਤ੍ਤਮ੍ਪਿ ਮਚ੍ਛਮਂਸਖਣ੍ਡਂ ਵਾ ਨ੍ਹਾਰੁ ਵਾ ਪਕ੍ਖਿਤ੍ਤਂ ਹੋਤਿ, ਪਵਾਰਣਂ ਜਨੇਤਿ.

੭੬. ਸਾਮਾਕਾਦਿਤਿਣਂ ਕੁਦ੍ਰੂਸਕੇ ਸਙ੍ਗਹਂ ਗਤਂ, ਵਰਕਚੋਰਕੋ ਵਰਕੇ ਸਙ੍ਗਹਂ ਗਤੋ, ਨੀਵਾਰੋ ਚੇਵ ਸਾਲਿਯਂ ਸਙ੍ਗਹਂ ਗਤੋਤਿ ਯੋਜਨਾ. ਸਾਮਾਕਾਦਿਤਿਣਨ੍ਤਿ ਸਾਮਾਕੋ ਆਦਿ ਯਸ੍ਸ, ਤਮੇਵ ਤਿਣਂ ਤਿਣਧਞ੍ਞਨ੍ਤਿ ਸਮਾਸੋ.

੭੭. ਭਟ੍ਠਧਞ੍ਞਮਯੋਤਿ ਖਰਪਾਕਭਜ੍ਜਿਤੇਹਿ ਸਤ੍ਤਵਿਧੇਹਿ ਧਞ੍ਞੇਹਿ ਕੋਟ੍ਟੇਤ੍ਵਾ ਕਤੋ, ਅਨ੍ਤਮਸੋ ਚੁਣ੍ਣਮ੍ਪਿ ਕੁਣ੍ਡਕਮ੍ਪਿ ਸਤ੍ਤੁ ਨਾਮਾਤਿ ਅਤ੍ਥੋ. ਸਮਪਾਕਭਜ੍ਜਿਤਾਨਂ ਪਨ ਆਤਪਸੁਕ੍ਖਾਨਂ ਵਾ ਤਣ੍ਡੁਲਾਨਂ ਸਤ੍ਤੁ ਵਾ ਕੁਣ੍ਡਕਾਨਿ ਏਵ ਵਾ ਨ ਪਵਾਰੇਨ੍ਤਿ. ਯਵੇਨ ਸਮ੍ਭਵੋ ਉਪ੍ਪਤ੍ਤਿ ਅਸ੍ਸਾਤਿ ਯਵਸਮ੍ਭਵੋ, ਕੁਮ੍ਮਾਸੋ ਕੁਮ੍ਮਾਸੋ ਨਾਮ. ਮੁਗ੍ਗਾਦੀਹਿ ਕਤੋ ਪਨ ਪਵਾਰਣਂ ਨ ਜਨੇਤਿ. ਕਪ੍ਪਿਯੋ ਚਾਤਿ ਕਪ੍ਪਿਯੋਯੇਵ ਮਂਸੋ ‘‘ਮਂਸੋ’’ਤਿ ਵੁਤ੍ਤੋਤਿ ਯੋਜਨਾ. ਚਾਤਿ ਅਵਧਾਰਣੇ. ਅਕਪ੍ਪਿਯੋ ਪਨ ਪਟਿਕ੍ਖਿਪਿਤਬ੍ਬੋਵ. ਪਟਿਕ੍ਖਿਤ੍ਤੋਪਿ ਨ ਪਵਾਰੇਤਿ. ਉਦਕੇ ਸਮ੍ਭਵੋ ਯਸ੍ਸ ਸੋ ਮਚ੍ਛੋ ਨਾਮ. ਦ੍ਵੀਸੁ ਪਨੇਤੇਸੁ ਸਚੇ ਯਾਗੁਂ ਪਿਵਨ੍ਤਸ੍ਸ ਯਾਗੁਸਿਤ੍ਥਮਤ੍ਤੇਸੁਪਿ ਮਚ੍ਛਖਣ੍ਡੇਸੁ ਵਾ ਮਂਸਖਣ੍ਡੇਸੁ ਵਾ ਏਕਂ ਖਾਦਿਤਂ ਏਕਂ ਹਤ੍ਥੇ ਵਾ ਪਤ੍ਤੇ ਵਾ ਹੋਤਿ, ਸੋ ਚੇ ਅਞ੍ਞਂ ਪਟਿਕ੍ਖਿਪਤਿ, ਪਵਾਰੇਤਿ. ਦ੍ਵੇਪਿ ਖਾਦਿਤਾਨਿ ਹੋਨ੍ਤਿ, ਮੁਖੇ ਸਾਸਪਮਤ੍ਤਮ੍ਪਿ ਅਵਸਿਟ੍ਠਂ ਨਤ੍ਥਿ, ਸਚੇਪਿ ਅਞ੍ਞਂ ਪਟਿਕ੍ਖਿਪਤਿ, ਨ ਪਵਾਰੇਤਿ.

੭੮. ਇਦਾਨਿ ‘‘ਕੀਦਿਸਂ ਭੁਞ੍ਜਨ੍ਤੋ ਕਿਨ੍ਤਿ ਵਤ੍ਵਾ ਉਪਨੀਤਂ ਕਿਂ ਨਾਮ ਨਿਸੇਧੇਨ੍ਤੋ ਪਵਾਰੇਤਿ ਨਾਮਾ’’ਤਿ ਚੋਦਨਂ ਮਨਸਿ ਨਿਧਾਯਾਹ ‘‘ਭੁਞ੍ਜਨ੍ਤੋ’’ਤਿਆਦਿ. ਤਤ੍ਥ ਕਪ੍ਪਂ ਵਾ ਅਕਪ੍ਪਂ ਵਾ ਪਞ੍ਚਸੁ ਭੋਜਨੇਸੁ ਯਂ ਕਿਞ੍ਚਿ ਭੋਜਨਂ ਭੁਞ੍ਜਨ੍ਤੋ ਭਿਕ੍ਖੁ ਤਨ੍ਨਾਮੇਨ ਤੇਸਂ ਪਵਾਰਣਾਜਨਕਭੋਜਨਾਨਂ ਨਾਮੇਨ ਵਾ ‘‘ਇਮ’’ਨ੍ਤਿ ਸਾਮਞ੍ਞੇਨ ਵਾ ਵਤ੍ਵਾ ਅਭਿਹਟਂ ਹਤ੍ਥਪਾਸੋਪਨੀਤਂ ਕਪ੍ਪਂ ਕਪ੍ਪਿਯਂ ਯਥਾਵੁਤ੍ਤਭੋਜਨਂ ਨਿਸੇਧਯਂ ਨਿਸੇਧਯਨ੍ਤੋ ਪਵਾਰੇਯ੍ਯਾਤਿ ਪਦਤ੍ਥਸਮ੍ਬਨ੍ਧੋ. ਅਯਮੇਤ੍ਥ ਅਧਿਪ੍ਪਾਯੋ – ਯੇਨ ਚੇ ਅਕਪ੍ਪਿਯਮਂਸਞ੍ਚ ਕੁਲਦੂਸਨਵੇਜ੍ਜਕਮ੍ਮਉਤ੍ਤਰਿਮਨੁਸ੍ਸਧਮ੍ਮਾਰੋਚਨਸਾਦਿਤਰੂਪਿਯਾਦੀਹਿ ਨਿਬ੍ਬਤ੍ਤਂ ਅਕਪ੍ਪਿਯਭੋਜਨਞ੍ਚ ਤਥਾ ਅਞ੍ਞਞ੍ਚ ਕਪ੍ਪਿਯਂ ਵਾ ਅਕਪ੍ਪਿਯਂ ਵਾ ਏਕਸਿਤ੍ਥਮਤ੍ਤਮ੍ਪਿ ਅਜ੍ਝੋਹਟਂ ਹੋਤਿ, ਸੋ ਸਚੇ ਪਤ੍ਤਮੁਖਹਤ੍ਥੇਸੁ ਯਤ੍ਥ ਕਤ੍ਥਚਿ ਭੋਜਨੇ ਸਤਿ ਸਾਪੇਕ੍ਖੋਵ ਅਞ੍ਞਂ ਹਤ੍ਥਪਾਸੇ ਠਿਤੇਨ ‘‘ਓਦਨਂ ਗਣ੍ਹਥਾ’’ਤਿਆਦਿਨਾ ਪਵਾਰਣਪ੍ਪਹੋਨਕਸ੍ਸੇਵ ਨਾਮੇਨ ਵਾ ‘‘ਇਮ’’ਨ੍ਤਿ ਸਾਮਞ੍ਞਵਸੇਨੇਵ ਵਾ ਕਾਯੇਨੇਵ ਅਭਿਹਟਂ ਵੁਤ੍ਤਲਕ੍ਖਣਂ ਕਪ੍ਪਿਯਮੇਵ ਭੋਜਨਂ ਕੇਵਲਂ ਵਾ ਮਿਸ੍ਸਂ ਵਾ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖਿਪਤਿ ਪਵਾਰੇਤੀਤਿ. ‘‘ਆਕਿਰ ਆਕਿਰ, ਕੋਟ੍ਟੇਤ੍ਵਾ ਕੋਟ੍ਟੇਤ੍ਵਾ ਪੂਰੇਹੀ’’ਤਿ ਪਨ ਵਤ੍ਤੁਂ ਵਟ੍ਟਤਿ.

੭੯-੮੦. ਇਦਾਨਿ ਯੇ ਪਵਾਰਣਂ ਨ ਜਨੇਨ੍ਤਿ, ਤੇ ਦਸ੍ਸੇਤੁਂ ‘‘ਲਾਜਾ’’ਤਿਆਦਿਮਾਹ. ਤਤ੍ਥ ਲਾਜਾ…ਪੇ… ਫਲਾਦੀਨਿ ਪਵਾਰਣਂ ਨ ਜਨੇਨ੍ਤੀਤਿ ਸਮ੍ਬਨ੍ਧੋ. ਲਾਜਾਤਿ ਸਾਲਿਆਦੀਹਿ ਕਤਾ ਲਾਜਾ. ਤਂਸਤ੍ਤੁਭਤ੍ਤਾਨੀਤਿ ਤੇਹਿ ਲਾਜੇਹਿ ਕਤਾ ਸਤ੍ਤੁ ਚੇਵ ਭਤ੍ਤਾਨਿ ਚ. ਗੋਰਸੋਤਿ ਗੁਨ੍ਨਂ ਰਸੋ ਖੀਰਾਦਿ. ਸੁਦ੍ਧਖਜ੍ਜਕੋਤਿ ਮਚ੍ਛਮਂਸੇਹਿ ਅਸਮ੍ਮਿਸ੍ਸਤਾਯ ਸੁਦ੍ਧਖਜ੍ਜਕੋ. ਸਤ੍ਤੁਯੋ ਪਿਣ੍ਡੇਤ੍ਵਾ ਕਤੋ ਅਪਕ੍ਕੋ ਸਤ੍ਤੁਗੁਲ਼ੋ ਪਨ ਸਤ੍ਤੁਮੋਦਕਸਙ੍ਖਾਤੋ ਪਵਾਰੇਤਿ. ਤਣ੍ਡੁਲਾਤਿ ਸਮਪਾਕਭਜ੍ਜਿਤਾਨਂ ਸਾਲਿਆਦੀਨਂ ਤਣ੍ਡੁਲਾ, ਭਜ੍ਜਿਤਤਣ੍ਡੁਲਾ ਏਵ ਵਾ. ਭਟ੍ਠਪਿਟ੍ਠਨ੍ਤਿ ਸੁਦ੍ਧਂ ਯਂ ਕਿਞ੍ਚਿ ਭਜ੍ਜਿਤਂ ਪਿਟ੍ਠਂ. ਪੁਥੁਕਾਤਿ ਸਾਲਿਆਦੀਨਂ ਪੁਥੁਕਾ. ਪੁਥੁਕਾ ਹਿ ਤਨ੍ਤਿਆਗਮਯੁਤ੍ਤਿਯਾ ਵਿਸੁਮ੍ਪਿ ਗਯ੍ਹਤਿ, ਏਕਤੋਪਿ, ਤਸ੍ਮਾ ਵੁਤ੍ਤਾਵਸੇਸਾਨਂ ਪੁਥੁਕਾਵੇਲ਼ੁਆਦੀਨਂ ਭਤ੍ਤਨ੍ਤਿ ਚ ਸਮ੍ਬਨ੍ਧੋ. ਵੇਲ਼ੂਤਿ ਤੇਸਂ ਤਣ੍ਡੁਲਾ ਵੁਚ੍ਚਨ੍ਤਿ. ਪੁਥੁਕਾ ਚ ਵੇਲ਼ੁ ਚ, ਤੇ ਆਦਯੋ ਯੇਸਨ੍ਤਿ ਸਮਾਸੋ. ਚ-ਸਦ੍ਦੋ ਪਨੇਤ੍ਥ ਸਬ੍ਬਤ੍ਥਾਪਿ ਯੋਜੇਤਬ੍ਬੋ. ਆਦਿ-ਸਦ੍ਦੇਨ ਕਨ੍ਦਮੂਲਫਲਾਨਿਪਿ ਗਯ੍ਹਨ੍ਤਿ. ਵੁਤ੍ਤਾਵਸੇਸਾਨਨ੍ਤਿ ਵੁਤ੍ਤੇਹਿ ਸਤ੍ਤਵਿਧੇਹਿ ਧਞ੍ਞੇਹਿ ਅਵਸੇਸਾਨਂ. ਰਸਯਾਗੂਤਿ ਰਸੇਹਿ ਪਕ੍ਕਮਂਸਾਦੀਹਿ ਸਮ੍ਮਿਸ੍ਸਾ ਯਾਗੁ. ਰਸੋਪਿ ਤਾਦਿਸੋਵ. ਸੁਦ੍ਧਯਾਗੂਤਿ ਮਂਸਾਦੀਹਿ ਅਮਿਸ੍ਸਾ ਸੁਦ੍ਧਯਾਗੁ. ਫਲਾਦੀਨੀਤਿ ਆਦਿ-ਸਦ੍ਦੇਨ ਕਨ੍ਦਾਦੀਨਮ੍ਪਿ ਗਹਣਂ. ਅਪਿ ਚਾਤਿ ਨਿਪਾਤੋ, ਨਿਪਾਤਸਮੁਦਾਯੋ ਵਾ ਸਮੁਚ੍ਚਯੇ, ਸੋ ਪਚ੍ਚੇਕਂ ਯੋਜੇਤਬ੍ਬੋ.

੮੧. ਇਦਾਨਿ ਯਸ੍ਮਾ ਸਤ੍ਤਹਿ ਵਿਨਯਕਮ੍ਮਾਕਾਰੇਹਿ ਯਂ ਅਤਿਰਿਤ੍ਤਂ ਅਕਤਂ, ਤਤ੍ਥ ਪਾਚਿਤ੍ਤਿਯਂ ਵੁਤ੍ਤਂ, ਬ੍ਯਤਿਰੇਕਤੋ ਅਤਿਰਿਤ੍ਤਕਤੇ ਨਤ੍ਥਿ, ਤਸ੍ਮਾ ਅਤਿਰਿਤ੍ਤਂ ਕਰੋਨ੍ਤੇਨ ਏਵਂ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਪਵਾਰਿਤੇਨਾ’’ਤਿਆਦਿਮਾਹ. ਤਤ੍ਥ ਪਵਾਰਿਤੇਨ ਵੁਟ੍ਠਾਯ ਅਤਿਰਿਤ੍ਤਂ ਨ ਕਾਤਬ੍ਬਂ, ਭੋਜਨਂ ਅਭੁਤ੍ਤੇਨ ਚ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਭੋਜਨਨ੍ਤਿ ਪਵਾਰਣਪ੍ਪਹੋਨਕਭੋਜਨਂ. ਅਭੁਤ੍ਤੇਨਾਤਿ ਏਕਸਿਤ੍ਥਮਤ੍ਤਮ੍ਪਿ ਅਭੁਤ੍ਤਾਵਿਨਾ. ਯੇਨ ਯਂਵਾ ਪੁਰੇ ਕਤਨ੍ਤਿ ਏਤ੍ਥ ਚ ਏਵ-ਸਦ੍ਦੋ ਦੀਘਂ ਕਤ੍ਵਾ ਨਿਦ੍ਦਿਟ੍ਠੋ, ਸੋ ਚ ਅਜ੍ਝਾਹਟੇਨ ਤਂ-ਸਦ੍ਦੇਨ ਸਮ੍ਬਨ੍ਧੀਯਤਿ, ਤਸ੍ਮਾ ਯੇਨ ਭਿਕ੍ਖੁਨਾ ਯਂ ਭੋਜਨਂ ਪੁਰੇ ਪੁਬ੍ਬੇ ਅਤਿਰਿਤ੍ਤਂ ਕਤਂ, ਤੇਨੇਵ ਤਮੇਵ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਤਸ੍ਮਾ ਕਪ੍ਪਿਯਂ ਕਾਰੇਤ੍ਵਾ ਭੁਞ੍ਜਨ੍ਤਸ੍ਸ ਅਞ੍ਞਂ ਆਮਿਸਂ ਆਕਿਰਨ੍ਤਿ, ਤਂ ਸੋ ਪੁਨ ਕਾਤੁਂ ਨ ਲਭਤਿ, ਤਸ੍ਮਿਂ ਭੋਜਨੇ ਕਰਿਯਮਾਨੇ ਪਠਮਕਤੇਨ ਸਦ੍ਧਿਂ ਕਤਂ ਹੋਤੀਤਿ. ਅਞ੍ਞਸ੍ਮਿਂ ਪਨ ਤੇਨ ਵਾ ਅਞ੍ਞੇਨ ਵਾ ਕਾਤੁਂ ਵਟ੍ਟਤਿ.

੮੨. ‘‘ਕਪ੍ਪਿਯ’’ਨ੍ਤਿਆਦੀਨਿ ‘‘ਕਰੋਨ੍ਤੋ’’ਤਿ ਏਤਸ੍ਸ ਕਮ੍ਮਪਦਾਨਿ. ਕਪ੍ਪਿਯਞ੍ਚੇਵ ਗਹਿਤਞ੍ਚੇਵ ਉਚ੍ਚਾਰਿਤਞ੍ਚੇਵ ਹਤ੍ਥਪਾਸਗਞ੍ਚੇਵ ਯਾਵਕਾਲਿਕਂ ਅਤਿਰਿਤ੍ਤਂ ਕਰੋਨ੍ਤੋ ‘‘ਅਲਮੇਤਂ ਸਬ੍ਬ’’ਨ੍ਤਿ ਏਵਂ ਭਾਸਤੂਤਿ ਯੋਜਨਾ. ਤਤ੍ਥਯਂ ਫਲਂ ਵਾ ਕਨ੍ਦਮੂਲਾਦਿ ਵਾ ਪਞ੍ਚਹਿ ਸਮਣਕਪ੍ਪੇਹਿ ਕਪ੍ਪਿਯਂ ਕਤਂ, ਯਞ੍ਚ ਕਪ੍ਪਿਯਮਂਸਂ ਵਾ ਕਪ੍ਪਿਯਭੋਜਨਂ ਵਾ, ਏਤਂ ਕਪ੍ਪਿਯਂ ਨਾਮ. ਗਹਿਤਨ੍ਤਿ ਭਿਕ੍ਖੁਨਾ ਪਟਿਗ੍ਗਹਿਤਂ. ਉਚ੍ਚਾਰਿਤਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਭਿਕ੍ਖੁਨਾ ਈਸਕਮ੍ਪਿ ਉਕ੍ਖਿਤ੍ਤਂ ਵਾ ਅਪਨਾਮਿਤਂ ਵਾ, ਤਂ ਪਨ ਅਤਿਰਿਤ੍ਤਕਾਰਕੇਨ ‘‘ਅਲਮੇਤਂ ਸਬ੍ਬ’’ਨ੍ਤਿ ਵੁਤ੍ਤੇਨ ਕਾਤਬ੍ਬਂ. ਹਤ੍ਥਪਾਸਗਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਹਤ੍ਥਪਾਸਂ ਗਤਂ. ਅਤਿਰਿਤ੍ਤਂ ਕਰੋਨ੍ਤੋਤਿ ਈਦਿਸਂ ਚਤੁਬ੍ਬਿਧਾਕਾਰਸਮ੍ਪਨ੍ਨਂ ਭੋਜਨਂ ਅਤਿਰਿਤ੍ਤਂ ਕਰੋਨ੍ਤੋ ਪਵਾਰੇਤ੍ਵਾ ਆਸਨਾ ਅਵੁਟ੍ਠਿਤੋ ਵਾ ਅਪ੍ਪਵਾਰੇਤ੍ਵਾਪਿ ਸਬ੍ਬਥਾ ਭੁਤ੍ਤੋ ਵਾਤਿ ਏਵਂ ਦੁਵਿਧਵਿਨਯਕਮ੍ਮਾਕਾਰਸਮ੍ਪਨ੍ਨੋ ਭਿਕ੍ਖੁ. ਅਲਮੇਤਂ ਸਬ੍ਬਨ੍ਤਿ ਏਵਂ ਭਾਸਤੂਤਿ ਅਲਮੇਤਂ ਸਬ੍ਬਂ ਇਤਿ ਏਵਂ ਭਾਸਤੁ. ਏਵਂ ਸਤ੍ਤਵਿਧਂ ਵਿਨਯਕਮ੍ਮਾਕਾਰਂ ਸਮ੍ਪਾਦੇਨ੍ਤੋ ਵਚੀਭੇਦਂ ਕਤ੍ਵਾ ਸਕਿਮ੍ਪਿ ਏਵਂ ਵਦੇਯ੍ਯਾਤਿ ਅਤ੍ਥੋ.

੮੩. ਕਪ੍ਪਿਯਂ ਕਰੋਨ੍ਤੇਨ ਪਨ ਅਨੁਪਸਮ੍ਪਨ੍ਨਸ੍ਸ ਹਤ੍ਥੇ ਠਿਤਂ ਨ ਕਾਤਬ੍ਬਂ. ਤੇਨਾਹ ‘‘ਨ ਕਰੇ…ਪੇ… ਹਤ੍ਥਗ’’ਨ੍ਤਿ. ਉਪਸਮ੍ਪਨ੍ਨਤੋ ਅਞ੍ਞੋ ਅਨੁਪਸਮ੍ਪਨ੍ਨੋ, ਤਸ੍ਸ ਹਤ੍ਥੇ ਗਤਂ ਅਨੁਪਸਮ੍ਪਨ੍ਨਹਤ੍ਥਗਂ. ਪੇਸਯਿਤ੍ਵਾਪੀਤਿ ਸਚੇ ਤਤ੍ਥ ਅਞ੍ਞੋ ਬ੍ਯਤ੍ਤੋ ਭਿਕ੍ਖੁ ਨਤ੍ਥਿ, ਯਤ੍ਥ ਅਤ੍ਥਿ, ਤਤ੍ਥ ਪੇਸਯਿਤ੍ਵਾਪਿ. ਤਂ ਅਤਿਰਿਤ੍ਤਕਤਂ ਅਕਾਰਕੋ ਅਤਿਰਿਤ੍ਤਕਾਰਕਤੋ ਅਞ੍ਞੋ ਸਬ੍ਬੋ ਪਵਾਰਿਤੋਪਿ ਅਪ੍ਪਵਾਰਿਤੋਪਿ ਭੁਞ੍ਜਿਤੁਂ ਲਬ੍ਭਤੇਤਿ ਸਮ੍ਬਨ੍ਧਨੀਯਂ. ਪਵਾਰਿਤੇਨ ਪਨ ਮੁਖਞ੍ਚ ਹਤ੍ਥਞ੍ਚ ਸੋਧੇਤ੍ਵਾ ਭੁਞ੍ਜਿਤਬ੍ਬਂ.

ਪਵਾਰਣਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.