੫. ਪਤ੍ਤਨਿਦ੍ਦੇਸਵਣ੍ਣਨਾ

੬੦. ਅਯੋਪਤ੍ਤੋ ਨਾਮ ਅਯਸਾ ਕਾਲ਼ਲੋਹੇਨ ਨਿਬ੍ਬਤ੍ਤੋ ਪਤ੍ਤੋ. ਜਾਤਿਯਾ ਉਕ੍ਕਟ੍ਠਾਦੀਨਂ ਸਾਮਞ੍ਞਵਸੇਨ. ਪਮਾਣਤੋਤਿ ਪਰਿਚ੍ਛੇਦਤੋ. ਤਯੋ ਪਤ੍ਤਾਤਿ ਪਾਠਸੇਸੋ.

੬੧. ‘‘ਮਗਧੇਸੂ’’ਤਿ ਵਤ੍ਤਬ੍ਬੇ ਮਗਧੇਤਿ ਵਚਨਵਿਪਲ੍ਲਾਸੇਨ ਵਾ ‘‘ਪਚ੍ਚਾਸਾ ਸਤੀ’’ਤਿਆਦੀਸੁ ਵਿਯ ਸੁ-ਸਦ੍ਦਲੋਪੇਨ ਵਾ ਵੁਤ੍ਤਂ. ਨਾਲ਼ਿਦ੍ਵਯਤਣ੍ਡੁਲਸਾਧਿਤਨ੍ਤਿ ਏਤ੍ਥ ਮਗਧਾਪੇਕ੍ਖੋਪਿ ਨਾਲ਼ਿ-ਸਦ੍ਦੋ ਦ੍ਵਯ-ਸਦ੍ਦੇਨ ਸਮਾਸੋ ਹੋਤਿ ਗਮ੍ਮਕਤ੍ਤਾਤਿ ਨਾਲ਼ਿਯਾ ਦ੍ਵਯਂ ਨਾਲ਼ਿਦ੍ਵਯਂ. ਤਤ੍ਥ ਮਗਧਨਾਲ਼ਿ ਨਾਮ ਅਡ੍ਢਤੇਰਸਪਲਾ ਹੋਤਿ. ਏਤ੍ਥ ਚ ਅਡ੍ਢਤੇਰਸਪਲਾਨਿ ਮਾਸਾਨਨ੍ਤਿ ਵਦਨ੍ਤਿ. ਨਾਲ਼ਿਦ੍ਵਯੇਨ ਪਮਿਤਾ ਤਣ੍ਡੁਲਾ ਸੁਕੋਟ੍ਟਿਤਪਰਿਸੁਦ੍ਧਾ ਅਨੁਪਹਤਪੁਰਾਣਸਾਲਿਤਣ੍ਡੁਲਾ ਨਾਲ਼ਿਦ੍ਵਯਤਣ੍ਡੁਲਾ, ਤੇਹਿ ਸਾਧਿਤਂ ਪਚਿਤਨ੍ਤਿ ਅਤ੍ਥੋ. ਓਦਨਨ੍ਤਿ ਸਮ੍ਮਾ ਸਮ੍ਪਾਦਿਤਂ ਅਵਸ੍ਸਾਵਿਤੋਦਨਂ. ਸੂਪਨ੍ਤਿ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣਂ ਨਾਤਿਘਨਂ ਨਾਤਿਤਨੁਕਂ ਹਤ੍ਥਹਾਰਿਯਂ ਸਬ੍ਬਸਮ੍ਭਾਰਸਙ੍ਖਤਂ ਮੁਗ੍ਗਸੁਪਂ. ਬ੍ਯਞ੍ਜਨਞ੍ਚ ਤਦੂਪਿਯਨ੍ਤਿ ਤਸ੍ਸ ਓਦਨਸ੍ਸ ਉਪਿਯਂ ਅਨੁਰੂਪਂ ਯਾਵ ਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਞ੍ਚ ਉਕ੍ਕਟ੍ਠੋ ਗਣ੍ਹਾਤੀਤਿ ਸਮ੍ਬਨ੍ਧੋ.

੬੨. ਤਸ੍ਸਾਤਿ ਯਥਾਵੁਤ੍ਤਓਦਨਾਦਿਨੋ. ਉਪਡ੍ਢੋਤਿ ਉਪਡ੍ਢਂ ਨਾਲ਼ਿਕੋਦਨਾਦਿ ਅਸ੍ਸ ਅਤ੍ਥੀਤਿ ਉਪਡ੍ਢੋ. ਏਵ-ਕਾਰੇਨ ਅਤਿਰੇਕਂ ਨਿਵਤ੍ਤੇਤਿ. ਤਤੋਤਿ ਯਥਾਵੁਤ੍ਤਨਾਲ਼ਿਕੋਦਨਾਦਿਤੋ. ਉਕ੍ਕਟ੍ਠਤੋ ਉਕ੍ਕਟ੍ਠੋ ਚ ਓਮਕੋਮਕੋ ਚ ਅਪਤ੍ਤੋਤਿ ਯੋਜਨਾ. ਓਮਕਤੋ ਓਮਕੋ ਓਮਕੋਮਕੋ. ਇਮਿਨਾ ਪੁਨ ਪਤ੍ਤਦ੍ਵਯਦਸ੍ਸਨੇਨ ਪਮਾਣਤੋ ਤਯੋਪਿ ਪਤ੍ਤਾ ਵਿਭਾਗਤੋ ਨਵ ਹੋਨ੍ਤੀਤਿ ਦੀਪੇਤਿ. ਤਤ੍ਥ ਯਸ੍ਮਿਂ ਮਗਧਨਾਲ਼ਿਦ੍ਵਯਤਣ੍ਡੁਲੋਦਨਾਦਿਕਂ ਸਬ੍ਬਮ੍ਪਿ ਵਡ੍ਢਨਪਕ੍ਖੇ ਠਿਤਂ ਪਕ੍ਖਿਤ੍ਤਂ ਸਚੇ ਪਤ੍ਤਸ੍ਸ ਮੁਖਵਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ ਵਾ ਹੀਰੇਨ ਵਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ ਵਾ ਹੀਰਸ੍ਸ ਵਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ ਅਨ੍ਤੋਗਤਮੇਵ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ ਪਤ੍ਤੋ. ‘‘ਏਕਂ ਨਾਲ਼ਿਕੋਦਨਾਦਿ ਸਬ੍ਬਮ੍ਪਿ ਪਕ੍ਖਿਤ੍ਤਂ ਵੁਤ੍ਤਨਯੇਨੇਵ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਅਯਂ ਮਜ੍ਝਿਮੋ ਨਾਮ ਪਤ੍ਤੋ’’ਤਿਆਦਿਨਾ ਮਜ੍ਝਿਮਮਜ੍ਝਿਮੋਮਕਮਜ੍ਝਿਮੁਕ੍ਕਟ੍ਠਾ ਚ ‘‘ਯਤ੍ਥ ਉਪਡ੍ਢਨਾਲ਼ਿਕੋਦਨਾਦਿ ਸਬ੍ਬਮ੍ਪਿ ਪਕ੍ਖਿਤ੍ਤਂ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਅਯਂ ਓਮਕੋ ਨਾਮ ਪਤ੍ਤੋ’’ਤਿਆਦਿਨਾ ਓਮਕਓਮਕੋਮਕਓਮਕੁਕ੍ਕਟ੍ਠਾ ਚ ਪਤ੍ਤਾ ਉਕ੍ਕਟ੍ਠੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਤੇਸੁ ਦ੍ਵੇ ਅਪਤ੍ਤਾ ਭਾਜਨਪਰਿਭੋਗੇਨ ਪਰਿਭੁਞ੍ਜਿਤਬ੍ਬਾ, ਨਾਧਿਟ੍ਠਾਨੂਪਗਾ, ਨ ਵਿਕਪ੍ਪਨੂਪਗਾ.

੬੩. ਕਪ੍ਪੋ ਸਕੋ ਅਤਿਰੇਕਪਤ੍ਤੋ ਦਸਾਹਪਰਮਂ ਧਾਰੇਯ੍ਯਾਤਿ ਯੋਜਨਾ. ਤਤ੍ਥ ਕਪ੍ਪੋਤਿ ਕਪ੍ਪਿਯੋ. ਸਕੋਤਿ ਅਤ੍ਤਨੋ ਸਨ੍ਤਕੋ. ਕਪ੍ਪਿਯਤ੍ਤਾ ਪਨ ਅਤ੍ਤਸਨ੍ਤਕਤ੍ਤਾ ਚ ਸਤ੍ਤਨ੍ਨਮ੍ਪਿ ਅਧਿਟ੍ਠਾਨਵਿਕਪ੍ਪਨੂਪਗਤਾ ਵੇਦਿਤਬ੍ਬਾ. ਤਤ੍ਥ ਅਯੋਪਤ੍ਤੋ ਪਞ੍ਚਹਿ ਪਾਕੇਹਿ, ਮਤ੍ਤਿਕਾਪਤ੍ਤੋ ਦ੍ਵੀਹਿ ਪਾਕੇਹਿ ਪਕ੍ਕੋ ਅਧਿਟ੍ਠਾਨੂਪਗੋ ਚ ਵਿਕਪ੍ਪਨੂਪਗੋ ਚ, ਤਥਾ ਉਭੋਪਿ ਕਾਕਣਿਕਮਤ੍ਤਸ੍ਸਾਪਿ ਮੂਲਸ੍ਸ ਅਨਵਸੇਸੇਤ੍ਵਾ ਦਿਨ੍ਨੇ, ਸਬ੍ਬਸੋ ਅਤ੍ਤਸਨ੍ਤਕਤ੍ਤੇ ਵਿਞ੍ਞਾਤੇ ਚ ਅਧਿਟ੍ਠਾਨਵਿਕਪ੍ਪਨੂਪਗਾਤਿ ਦਟ੍ਠਬ੍ਬਂ. ਅਤਿਰੇਕਪਤ੍ਤੋਤਿ ਅਨਧਿਟ੍ਠਿਤਾਵਿਕਪ੍ਪਿਤਤਾਯ ਅਤਿਰੇਕਪਤ੍ਤੋ. ਅਧਿਟ੍ਠਾਨਪਚ੍ਚੁਦ੍ਧਾਰਾ ਪਨੇਤ੍ਥ ਚੀਵਰੇ ਵੁਤ੍ਤਾਵ. ਵਿਕਪ੍ਪੇਨ੍ਤੇਨ ਪਨ ਪਤ੍ਤਾਨਂ ਏਕਬਹੁਭਾਵਂ, ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘ਇਮਂ ਪਤ੍ਤ’’ਨ੍ਤਿ ਵਾ ‘‘ਇਮੇ ਪਤ੍ਤੇ’’ਤਿ ਵਾ ‘‘ਏਤਂ ਪਤ੍ਤ’’ਨ੍ਤਿ ਵਾ ‘‘ਏਤੇ ਪਤ੍ਤੇ’’ਤਿ ਵਾ ਵਤ੍ਵਾ ‘‘ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ. ਸਮ੍ਮੁਖਾਦਿਭੇਦੋ ਪਨੇਤ੍ਥ ਚੀਵਰੇ ਵਕ੍ਖਮਾਨਨਯੇਨ ਵੇਦਿਤਬ੍ਬੋ. ਦਸਾਹਪਰਮਨ੍ਤਿ ਦਸ ਅਹਾਨਿ ਪਰਮੋ ਪਰਿਚ੍ਛੇਦੋ ਅਸ੍ਸਾਤਿ ਦਹਾਹਪਰਮੋ, ਕਾਲੋ, ਤਂ. ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਧਾਰੇਯ੍ਯੋਤਿ ਪਰਿਭੋਗਵਸੇਨ ਧਾਰੇਤਬ੍ਬੋ. ਤਸ੍ਮਿਂਕਾਲੇ ਅਤਿਨਾਮਿਤੇ ਪਤ੍ਤੋ ਨਿਸ੍ਸਗ੍ਗਿਯੋ ਹੋਤੀਤਿ ਯੋਜਨਾ. ਅਤਿਨਾਮਿਤੇਤਿ ਅਤਿਕ੍ਕਾਮਿਤੇ ਨਿਸ੍ਸਗ੍ਗਿਯੋ ਹੋਤਿ, ਏਕਾਦਸੇ ਅਰੁਣੁਗ੍ਗਮਨੇ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ ਪਦਭਾਜਨੀਯੇ (ਪਾਰਾ. ੬੦੨) ਵੁਤ੍ਤਨਯੇਨ ਪਤ੍ਤੋ ਨਿਸ੍ਸਜ੍ਜਿਤਬ੍ਬੋ ਹੋਤਿ, ਤਥਾ ਸਤਿ ਪਾਚਿਤ੍ਤਿਯਾਪਤ੍ਤਿ ਚਸ੍ਸ ਹੋਤੀਤਿ ਅਧਿਪ੍ਪਾਯੋ.

੬੪. ‘‘ਅਚ੍ਛੇਦਾ’’ਤਿਆਦਿ ਚੀਵਰੇ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ. ਅਯਂ ਪਨ ਵਿਸੇਸੋ – ਮਰਣੁਦ੍ਧਟਾਤਿ ਉਦ੍ਧਰਣਂ ਉਦ੍ਧਲ਼ਂ, ਪਚ੍ਚੁਦ੍ਧਾਰੋ. ਮਰਣਞ੍ਚ ਉਦ੍ਧਟਞ੍ਚ ਮਰਣੁਦ੍ਧਟਾ, ਤਸ੍ਮਾ. ਛਿਦ੍ਦੇਨਾਤਿ ਯੇਨ ਕਙ੍ਗੁਸਿਤ੍ਥਂ ਨਿਕ੍ਖਮਤਿ ਚੇਵ ਪਵਿਸਤਿ ਚ, ਤੇਨ ਮੁਖਵਟ੍ਟਿਤੋ ਹੇਟ੍ਠਾ ਦ੍ਵਙ੍ਗੁਲਛਿਦ੍ਦੇਨ. ਪਤ੍ਤਾਧਿਟ੍ਠਾਨਮੁਜ੍ਝਤੀਤਿ ਪਤ੍ਤੋ ਅਧਿਟ੍ਠਾਨਂ ਉਜ੍ਝਤਿ ਵਿਸ੍ਸਜ੍ਜਤਿ.

੬੫. ਇਦਾਨਿ ‘‘ਪਤ੍ਤ’’ਨ੍ਤਿਆਦਿਨਾ ਅਞ੍ਞਥਾ ਪਰਿਹਰਣੇ ਦੁਕ੍ਕਟਂ ਦਸ੍ਸੇਤਿ. ਤਤ੍ਥ ਸੋਦਕਂ ਪਤ੍ਤਂ ਨ ਪਟਿਸਾਮੇਯ੍ਯਾਤਿ ਯੋਜਨਾ. ਨ ਪਟਿਸਾਮੇਯ੍ਯਾਤਿ ਗੁਤ੍ਤਟ੍ਠਾਨੇ ਨ ਨਿਕ੍ਖਿਪੇਯ੍ਯ, ‘‘ਸੋਦਕਂ ਪਤ੍ਤਂ ਉਣ੍ਹੇ ਨ ਚ ਓਤਪੇ’’ਤਿਆਦਿਨਾ ਚ ਯੋਜਨੀਯਂ. ਨ ਚ ਓਤਪੇਤਿ ਨੇਵ ਈਸਕਂ ਤਾਪੇਯ੍ਯ. ਨ ਨਿਦਹੇਤਿ ਨਿਰੁਦਕਂ ਕਤ੍ਵਾਪਿ ਭੁਸਂ ਨ ਨਿਦਹੇਯ੍ਯ, ਵੋਦਕਂ ਕਤ੍ਵਾ ਈਸਕਂ ਤਾਪੇਯ੍ਯਾਤਿਪਿ ਬ੍ਯਤਿਰੇਕਤ੍ਥੋ. ਭੂਮ੍ਯਾ ਨ ਠਪੇਤਿ ਖਰਾਯ ਭੂਮਿਯਾ ਨ ਠਪੇਯ੍ਯ. ਯਤ੍ਥ ਪਨ ਵਣ੍ਣੋ ਨ ਦੁਸ੍ਸਤਿ, ਏਵਰੂਪਾਯ ਮਤ੍ਤਿਕਾਯ ਪਰਿਭਣ੍ਡਕਤਾਯ ਭੂਮਿਯਾ ਵਾ ਤਥਾਰੂਪਾਯ ਏਵ ਵਾਲਿਕਾਯ ਵਾ ਨਿਕ੍ਕੁਜ੍ਜਿਤ੍ਵਾ ਉਕ੍ਕੁਜ੍ਜਿਤ੍ਵਾ ਠਪੇਤੁਂ ਵਟ੍ਟਤਿ. ਨੋ ਚ ਲਗ੍ਗਯੇਤਿ ਭਿਤ੍ਤਿਖਿਲਾਦੀਸੁ ਨ ਓਲਮ੍ਬੇਯ੍ਯ.

੬੬. ‘‘ਮਿਡ੍ਢਨ੍ਤੇ ਵਾ’’ਤਿਆਦਿਨਾ ਵਤ੍ਵਾ ਪਤ੍ਤਂ ਠਪੇਤੁਂ ਨ ਚ ਕਪ੍ਪਤੀਤਿ ਯੋਜੇਤਬ੍ਬਂ. ਮਿਡ੍ਢਨ੍ਤੇਤਿ ਆਲ਼ਿਨ੍ਦਕਮਿਡ੍ਢਿਕਾਦੀਨਂ ਮਿਡ੍ਢੀਨਂ ਅਨ੍ਤੇ. ਸਚੇ ਪਨ ਪਰਿਵਤ੍ਤੇਤ੍ਵਾ ਤਤ੍ਥੇਵ ਪਤਿਟ੍ਠਾਤਿ, ਏਵਰੂਪਾਯ ਵਿਤ੍ਥਿਣ੍ਣਾਯ ਮਿਡ੍ਢਿਯਾ ਠਪੇਤੁਂ ਵਟ੍ਟਤਿ. ਪਰਿਭਣ੍ਡਨ੍ਤੇ ਵਾਤਿ ਬਾਹਿਰਪਸ੍ਸੇ ਕਤਾਯ ਤਨੁਕਾਯ ਮਿਡ੍ਢਿਕਾਯ ਅਨ੍ਤੇ ਵਾ. ਏਤ੍ਥ ਵਾ-ਸਦ੍ਦੋ ਸਮੁਚ੍ਚਯੇ, ਸੋ ਚ ਪਚ੍ਚੇਕਂ ਯੋਜੇਤਬ੍ਬੋ. ਅਙ੍ਕੇ ਪਨ ਅਂਸਬਦ੍ਧਕੇਨ ਅਂਸਕੂਟੇ ਲਗ੍ਗੇਤ੍ਵਾ ਠਪੇਤੁਞ੍ਚ ਵਟ੍ਟਤਿ. ਛਤ੍ਤੇਪਿ ਭਣ੍ਡਕੇਨ ਸਦ੍ਧਿਂ ਬਨ੍ਧਿਤ੍ਵਾ ਵਾ ਅਟ੍ਟਂ ਕਤ੍ਵਾ ਵਾ ਠਪੇਤੁਂ ਵਟ੍ਟਤਿ. ਮਞ੍ਚੇਪਿ ਅਞ੍ਞੇਨ ਸਦ੍ਧਿਂ ਬਨ੍ਧਿਤ੍ਵਾ ਠਪੇਤੁਂ, ਅਟਨਿਯਂ ਬਨ੍ਧਿਤ੍ਵਾ ਓਲਮ੍ਬੇਤੁਂ ਵਟ੍ਟਤਿ.

੬੭. ਪਤ੍ਤੇਨ ਉਚ੍ਛਿਟ੍ਠੋਦਕਞ੍ਚ ਚਲਕਟ੍ਠਿਕਞ੍ਚ ਨ ਨੀਹਰੇਯ੍ਯਾਤਿ ਸਮ੍ਬਨ੍ਧੋ. ਉਚ੍ਛਿਟ੍ਠੋਦਕਨ੍ਤਿ ਮੁਖਵਿਕ੍ਖਾਲਨੋਦਕਂ. ਚਲਕਾਨਿ ਚ ਚਬ੍ਬੇਤ੍ਵਾ ਅਪਵਿਦ੍ਧਾਮਿਸਾਨਿ ਅਟ੍ਠਿਕਾਨਿ ਮਚ੍ਛਮਂਸਅਟ੍ਠਿਕਾਨਿ ਚ ਚਲਕਟ੍ਠਿਕਂ. ਪਤ੍ਤਂ ਪਟਿਗ੍ਗਹਂ ਕਤ੍ਵਾ ਹਤ੍ਥਂ ਧੋਵਿਤੁਮ੍ਪਿ ਹਤ੍ਥਧੋਤਾਦਿ ਉਦਕਮ੍ਪਿ ਪਤ੍ਤੇ ਆਕਿਰਿਤ੍ਵਾ ਨੀਹਰਿਤੁਮ੍ਪਿ ਅਨੁਚ੍ਛਿਟ੍ਠਂ ਸੁਦ੍ਧਪਤ੍ਤਂ ਉਚ੍ਛਿਟ੍ਠਹਤ੍ਥੇਨ ਗਣ੍ਹਿਤੁਮ੍ਪਿ ਨ ਵਟ੍ਟਤਿ. ਮਚ੍ਛਮਂਸਫਲਾਫਲਾਦੀਨਿ ਖਾਦਨ੍ਤੋ ਯਂ ਤਤ੍ਥ ਅਟ੍ਠਿਂ ਵਾ ਚਲਕਂ ਵਾ ਛਡ੍ਡੇਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਨ ਲਭਤਿ. ਮੁਖਤੋ ਨੀਹਟਂ ਪਨ ਯਂ ਕਿਞ੍ਚਿ ਪੁਨ ਅਖਾਦਿਤੁਕਾਮੋ ਪਤ੍ਤੇ ਠਪੇਤੁਂ ਨ ਲਭਤਿ. ਸਿਙ੍ਗਿਵੇਰਾਦੀਨਿ ਡਂਸਿਤ੍ਵਾ ਪੁਨ ਠਪੇਤੁਂ ਲਭਤਿ. ਪਤ੍ਤਹਤ੍ਥੋਤਿ ਪਤ੍ਤੋ ਹਤ੍ਥੇ ਯਸ੍ਸਾਤਿ ਵਿਗ੍ਗਹੋ. ‘‘ਪਤ੍ਤਹਤ੍ਥੋ, ਕਵਾਟ’’ਨ੍ਤਿ ਚ ਉਪਲਕ੍ਖਣਮੇਤਂ. ਯਤ੍ਥ ਕਤ੍ਥਚਿ ਸਰੀਰਾਵਯਵੇ ਪਨ ਪਤ੍ਤਸ੍ਮਿਂ ਸਤਿ ਯੇਨ ਕੇਨਚਿ ਸਰੀਰਾਵਯਵੇਨ ਕਵਾਟਂ ਪਣਾਮੇਤੁਂ, ਘਟਿਕਂ ਵਾ ਉਕ੍ਖਿਪਿਤੁਂ, ਸੂਚਿਂ ਵਾ ਕੁਞ੍ਚਿਕਾਯ ਅਵਾਪੁਰਿਤੁਂ ਨ ਲਭਤਿ. ਅਂਸਕੂਟੇ ਪਨ ਪਤ੍ਤਂ ਲਗ੍ਗੇਤ੍ਵਾ ਯਥਾਸੁਖਂ ਅਵਾਪੁਰਿਤੁਂ ਲਭਤਿ.

੬੮. ਭੂਮਿਯਾ ਭੂਮਿਸਮ੍ਬਨ੍ਧੀ ਆਧਾਰਕੋ, ਤਸ੍ਮਿਂ ਦਨ੍ਤਵਲ੍ਲਿਵੇਤ੍ਤਾਦੀਹਿ ਕਤੇ ਵਲਯਾਧਾਰਕੇ ਚ ਏਕਦਾਰੁਨਾ ਕਤੇ ਦਾਰੁਆਧਾਰਕੇ ਚ ਬਹੂਹਿ ਦਣ੍ਡੇਹਿ ਕਤੇ ਦਣ੍ਡਾਧਾਰਕੇ ਚ ਯਤ੍ਥ ਠਪਿਤੋ ਪਤ੍ਤੋ ਯਥਾ ਪਰਿਵਤ੍ਤਿਤ੍ਵਾ ਨ ਪਰਿਪਤਤਿ, ਤਥਾ ਸੁਟ੍ਠੁ ਸਜ੍ਜਿਤੇ ਤਸ੍ਮਿਂ ਪਤ੍ਤਸ੍ਸੁਪਰਿ ਪਤ੍ਤੋਤਿ ਏਵਰੂਪੇ ਦੁਵੇ ਪਤ੍ਤੇ ਠਪੇਯ੍ਯਾਤਿ ਪਦਤ੍ਥਯੋਜਨਾ. ਭਮਕੋਟਿਸਦਿਸੋ ਪਨ ਦਾਰੁਆਧਾਰਕੋ ਤੀਹਿ ਦਣ੍ਡਕੇਹਿ ਬਦ੍ਧੋ ਦਣ੍ਡਾਧਾਰਕੋ ਚ ਏਕਸ੍ਸਪਿ ਪਤ੍ਤਸ੍ਸ ਅਨੋਕਾਸੋ, ਤਤ੍ਥ ਠਪੇਤ੍ਵਾਪਿ ਹਤ੍ਥੇਨ ਗਹੇਤ੍ਵਾ ਨਿਸੀਦਿਤਬ੍ਬਂ. ਭੂਮਿਯਨ੍ਤਿ ਕਟਸਾਰਕਾਦਿਨਾ ਅਤ੍ਥਤਾਯ ਭੂਮਿਯਾ ਪਨ ਨਿਕ੍ਕੁਜ੍ਜਿਤ੍ਵਾ ਵਾ ਪਟਿਕੁਜ੍ਜਿਤ੍ਵਾ ਵਾ ਏਕਂ ਪਤ੍ਤਂ ਠਪੇਯ੍ਯਾਤਿ ਯੋਜਨਾ.

੬੯. ਇਦਾਨਿ ਅਕਪ੍ਪਿਯਪਤ੍ਤੇ ਦਸ੍ਸੇਤਿ ‘‘ਦਾਰੂ’’ਤਿਆਦਿਨਾ. ਤਤ੍ਥ ਸੁਵਣ੍ਣਮੇਵ ਸੋਵਣ੍ਣਂ. ਦਾਰੁ ਚ ਰੂਪਿਯਞ੍ਚ ਸੋਵਣ੍ਣਞ੍ਚ ਮਣਿ ਚ ਵੇਲ਼ੁਰਿਯਞ੍ਚ ਦਾਰੁ…ਪੇ… ਵੇਲ਼ੁਰਿਯਾਨਿ, ਤੇਹਿ ਨਿਬ੍ਬਤ੍ਤਾ ਦਾਰੁ…ਪੇ… ਮਯਾ. ਦੀਘੋ ਪਨ ‘‘ਵੇਲ਼ੁਰਿਯਾਮਯਾ’’ਤਿ ਗਾਥਾਬਨ੍ਧਸੁਖਤ੍ਥਂ ਕਤੋ. ਏਵਮੁਪਰਿਪਿ ਤਾਦਿਸਂ ਵਿਞ੍ਞੇਯ੍ਯਂ. ਤਤ੍ਥ ਇਨ੍ਦਨੀਲਾਦਿ ਮਣਿ ਨਾਮ. ਕਂਸੋ ਚ ਕਾਚੋ ਚ ਤਿਪੁ ਚ ਸੀਸਞ੍ਚ ਫਲਿਕਾ ਚ ਤਮ੍ਬਲੋਹੋ ਚਾਤਿ ਦ੍ਵਨ੍ਦੋ, ਤੇਹਿ ਜਾਤਾ ਕਂਸ…ਪੇ… ਜਾ. ਤਤ੍ਥ ਕਂਸ-ਸਦ੍ਦੇਨ ਵਟ੍ਟਲੋਹੋਪਿ ਸਙ੍ਗਹਿਤੋ. ਸੇਤਂ ਤਿਪੁ, ਕਣ੍ਹਂ ਸੀਸਂ.

੭੦. ਛਵਸੀਸਮਯੋਤਿ ਛਵਸ੍ਸ ਮਤਮਨੁਸ੍ਸਸ੍ਸ ਸੀਸਂ ਸੀਸਕਪਾਲਂ, ਤੇਨ ਨਿਬ੍ਬਤ੍ਤੋ ਛਵਸੀਸਮਯੋ. ਘਟਿ ਚ ਤੁਮ੍ਬਞ੍ਚ, ਤੇਸਂ ਕਟਾਹੋ, ਤੇਹਿ ਜਾਤਾਤਿ ਘਟਿਤੁਮ੍ਬਕਟਾਹਜਾ. ਤਤ੍ਥ ਘਟੀਤਿ ਘਟੋਯੇਵ. ਤੁਮ੍ਬਂ ਅਲਾਬੁ. ਇਤਿ ਇਮੇ ਸਬ੍ਬੇ ਪਤ੍ਤਾ ਅਕਪ੍ਪਿਯਾ ਵੁਤ੍ਤਾ, ਦੁਕ੍ਕਟਵਤ੍ਥੁਕਾ ਚ ਵੁਤ੍ਤਾਤਿ ਯੋਜਨਾ. ਤਤ੍ਥ ਰੂਪਿਯਾਦੀਸੁ ਚਤੂਸੁ ਸਚੇ ਗਿਹੀ ਭਤ੍ਤਗ੍ਗੇਸੁ ਸੁਵਣ੍ਣਤਟ੍ਟਕਾਦੀਸੁ ਬ੍ਯਞ੍ਜਨਂ ਕਤ੍ਵਾ ਉਪਨਾਮੇਨ੍ਤਿ, ਆਮਸਿਤੁਂ ਨ ਵਟ੍ਟਤਿ. ਕਂਸਕਾਚਫਲਿਕਜਾਨਿ ਪਨ ਤਟ੍ਟਕਾਦੀਨਿ ਭਾਜਨਾਨਿ ਪੁਗ੍ਗਲਿਕਪਰਿਭੋਗੇਨੇਵ ਨ ਵਟ੍ਟਨ੍ਤਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ. ਘਟਿਤੁਮ੍ਬਕਟਾਹਜਾ ਪਨ ਲਭਿਤ੍ਵਾ ਪਰਿਹਰਿਤੁਂ ਨ ਵਟ੍ਟਨ੍ਤਿ, ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਨ੍ਤਿ.

ਪਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.