੩੭. ਉਗ੍ਗਹਨਿਦ੍ਦੇਸਵਣ੍ਣਨਾ

੨੮੧. ਪੁਗ੍ਗਲ-ਸਦ੍ਦਮਤ੍ਤੇ ਪਯੁਤ੍ਤੇ ਅਤ੍ਤਨੋਪਿ ਗਹਣਸਮ੍ਭਵੋ ਸਿਯਾਤਿ ਬ੍ਯਭਿਚਾਰਤ੍ਥਂ ਅਞ੍ਞ-ਸਦ੍ਦਪ੍ਪਯੋਗੋ. ਸਤਿ ਸਮ੍ਭਵੇ ਬ੍ਯਭਿਚਾਰੇ ਵਿਸੇਸਨਂ ਸਾਤ੍ਥਕਂ ਹੋਤੀਤਿ. ਦਸਭੇਦਮ੍ਪਿ ਰਤਨਨ੍ਤਿ ‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਙ੍ਕੋ ਮਸਾਰਗਲ੍ਲ’’ਨ੍ਤਿ (ਪਾਚਿ. ੫੦੬) ਏਵਂ ਵੁਤ੍ਤਂ ਦਸਭੇਦਮ੍ਪਿ ਰਤਨਂ. ਉਗ੍ਗਣ੍ਹਨ੍ਤਸ੍ਸਾਤਿ ਗਣ੍ਹਨ੍ਤਸ੍ਸ ਸਮ੍ਪਟਿਚ੍ਛਨ੍ਤਸ੍ਸ.

੨੮੨-੩. ਤੇਸੁ ਅਤ੍ਤਤ੍ਥਂ ਉਗ੍ਗਣ੍ਹਨ੍ਤਸ੍ਸ ਦ੍ਵੀਸੁ ਨਿਸ੍ਸਗ੍ਗੀਤਿ ਸਮ੍ਬਨ੍ਧੋ. ਤੇਸੂਤਿ ਤੇਸੁ ਦਸਸੁ ਮਜ੍ਝੇ. ਦ੍ਵੀਸੂਤਿ ਰਜਤਜਾਤਰੂਪਸਙ੍ਖਾਤੇਸੁ ਦ੍ਵੀਸੁ ਨਿਸ੍ਸਗ੍ਗਿਯਵਤ੍ਥੂਸੁ. ਅਤ੍ਤਤ੍ਥਨ੍ਤਿ ਇਮਿਨਾ ਨਵਕਮ੍ਮਾਦੀਨਂ ਪਞ੍ਚਨ੍ਨਂ ਅਤ੍ਥਾਯ ਦੁਕ੍ਕਟਨ੍ਤਿ ਦੀਪੇਤਿ. ਸੇਸੇਸੁ ਦੁਕ੍ਕਟਨ੍ਤਿ ਅਵਸੇਸੇਸੁ ਅਟ੍ਠਸੁ ਸਬ੍ਬੇਸਮ੍ਪਿ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਦੁਕ੍ਕਟਨ੍ਤਿ ਅਤ੍ਥੋ. ਗਣਞ੍ਚ ਸਙ੍ਘਞ੍ਚ ਪੁਗ੍ਗਲਞ੍ਚ ਅਨਾਮਸਿਤ੍ਵਾ ‘‘ਚੇਤ੍ਯਸ੍ਸ ਨਵਕਮ੍ਮਸ੍ਸ ਦਮ੍ਮੀ’’ਤਿ ਵੁਤ੍ਤੇ ਚ ਨ ਪਟਿਕ੍ਖਿਪੇਤਿ ਸਮ੍ਬਨ੍ਧਨੀਯਂ. ਨ ਪਟਿਕ੍ਖਿਪੇਤਿ ਇਮਿਨਾ ਸਙ੍ਘਾਦਿਂ ਆਮਸਿਤ੍ਵਾ ਵੁਤ੍ਤੇ ਪਟਿਕ੍ਖਿਪਨਂ ਦੀਪੇਤਿ. ਪਟਿਕ੍ਖਿਤ੍ਤੇ ‘‘ਕਪ੍ਪਿਯਕਾਰਕਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਮਮ ਪੁਰਿਸਾਨਂ ਮਯ੍ਹਮੇਵ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਦਤਿ, ਵਟ੍ਟਤਿ. ਚਤੁਪਚ੍ਚਯਤ੍ਥਾਯ ਚ ਦਿਨ੍ਨਂ ਯੇਨ ਯੇਨ ਅਤ੍ਥੋ ਹੋਤਿ, ਤਦਤ੍ਥਂ ਉਪਨੇਤਬ੍ਬਂ. ਤੇਸਂ ਚੀਵਰਤ੍ਥਾਯ ਦਿਨ੍ਨਂ ਚੀਵਰੇਯੇਵ ਉਪਨੇਤਬ੍ਬਂ. ਸਚੇ ਚੀਵਰੇਨ ਤਾਦਿਸੋ ਅਤ੍ਥੋ ਨਤ੍ਥਿ, ਪਿਣ੍ਡਪਾਤਾਦੀਹਿ ਸਙ੍ਘੋ ਕਿਲਮਤਿ, ਸਙ੍ਘਸੁਟ੍ਠੁਤਾਯ ਅਪਲੋਕੇਤ੍ਵਾ ਤਦਤ੍ਥਾਯਪਿ ਉਪਨੇਤਬ੍ਬਂ. ਏਸ ਨਯੋ ਪਿਣ੍ਡਪਾਤਗਿਲਾਨਪਚ੍ਚਯਤ੍ਥਾਯ ਦਿਨ੍ਨੇਪਿ. ਸੇਨਾਸਨਤ੍ਥਾਯ ਦਿਨ੍ਨਂ ਪਨ ਗਰੁਭਣ੍ਡਤ੍ਤਾ ਤਤ੍ਥੇਵ ਉਪਨੇਤਬ੍ਬਂ, ਸੇਨਾਸਨੇਸੁ ਨਸ੍ਸਨ੍ਤੇਸੁ ਜਗ੍ਗਨਤ੍ਥਂ ਮੂਲਚ੍ਛੇਜ੍ਜਂ ਅਕਤ੍ਵਾ ਅਵਿਸ੍ਸਜ੍ਜੇਤ੍ਵਾ ਯਾਪਨਮਤ੍ਤਂ ਪਰਿਭੁਞ੍ਜਿਤਬ੍ਬਂ.

੨੮੪. ਖੇਤ੍ਤਾਦੀਨਂ ਕੇਸਞ੍ਚਿ ਦੁਕ੍ਕਟਵਤ੍ਥੂਨਂ ਸਮ੍ਪਟਿਚ੍ਛਨੂਪਾਯਂ ਦਸ੍ਸੇਤੁਂ ‘‘ਖੇਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਖੇਤ੍ਤਨ੍ਤਿ ਪੁਬ੍ਬਣ੍ਣਵਿਰੁਹਨਟ੍ਠਾਨਂ. ਵਤ੍ਥੁਨ੍ਤਿ ਅਪਰਣ੍ਣਉਚ੍ਛੁਫਲਾਦੀਨਂ ਵਿਰੁਹਨਟ੍ਠਾਨਂ. ਦਾਸਪਸ੍ਵਾਦਿਕਨ੍ਤਿ ਦਾਸਪਸੁਪੁਪ੍ਫਾਰਾਮਫਲਾਰਾਮਾਦਿਕਂ. ਪਟਿਕ੍ਖਿਪਿਤ੍ਵਾ ਕਪ੍ਪਿਯੇਨ ਕਮੇਨ ਚ ਗਣ੍ਹੇਯ੍ਯਾਤਿ ਸਮ੍ਬਨ੍ਧੋ. ਕਪ੍ਪਿਯੇਨ ਕਮੇਨ ਚਾਤਿ ਏਤ੍ਥ ਕਮ-ਸਦ੍ਦੋ ਵੋਹਾਰਪ੍ਪਟਿਪਾਟਿਵਚਨੋ, ਤਸ੍ਮਾ ਪਰੇਸਂ ਅਤ੍ਤਨੋ ਚ ਕਪ੍ਪਿਯਵੋਹਾਰਕ੍ਕਮੇਨੇਵਾਤਿ ਅਤ੍ਥੋ.

ਸੋ ਚ ਖੇਤ੍ਤਵਤ੍ਥੂਸੁ ਤਾਵ ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਾ ‘‘ਕਪ੍ਪਿਯਕਾਰਕਾਨਂ ਹਤ੍ਥੇ ਭਵਿਸ੍ਸਤੀ’’ਤਿ ਵਾ ‘‘ਸਙ੍ਘੋ ਕਪ੍ਪਿਯਭਣ੍ਡਂ ਭੁਞ੍ਜਤੂ’’ਤਿ ਵਾ ‘‘ਸੀਮਂ ਦੇਮਾ’’ਤਿ ਵਾ ਪਰੇਹਿ ਵੁਤ੍ਤੋ, ‘‘ਸਾਧੁ, ਉਪਾਸਕ ਮਿਗਪਕ੍ਖਿਨੋ ਏਤ੍ਥ ਨਿਬ੍ਭਯਾ ਸੁਖੇਨ ਜੀਵਿਸ੍ਸਨ੍ਤੀ’’ਤਿ ਅਤ੍ਤਨਾ ਵਾ ਤਲ਼ਾਕੇ ਯਥਾਵੁਤ੍ਤੇਨੇਵ ‘‘ਉਦਕਂ ਪਰਿਭੁਞ੍ਜਿਸ੍ਸਨ੍ਤਿ, ਭਣ੍ਡਕਂ ਧੋਵਿਸ੍ਸਨ੍ਤਿ, ਮਿਗਪਕ੍ਖਿਨੋ ਪਿਵਿਸ੍ਸਨ੍ਤੀ’’ਤਿ ਪਰੇਹਿ ਵਾ ‘‘ਸਾਧੁ, ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤੀ’’ਤਿਆਦਿਨਾ ਅਤ੍ਤਨਾ ਵਾ ਦਾਸੇ ‘‘ਆਰਾਮਿਕਂ ਦਮ੍ਮਿ, ਵੇਯ੍ਯਾਵਚ੍ਚਕਰਂ ਦਮ੍ਮਿ, ਕਪ੍ਪਿਯਕਾਰਕਂ ਦਮ੍ਮੀ’’ਤਿ ਵਾ ਪਸੂਸੁ ‘‘ਪਞ੍ਚਗੋਰਸਪਰਿਭੋਗਤ੍ਥਾਯ ਦਮ੍ਮੀ’’ਤਿ ਆਰਾਮੇ ‘‘ਵਨਂ ਦਮ੍ਮੀ’’ਤਿ ਏਵਮਾਦਿਨਾ ਵੁਤ੍ਤੋ ਵੇਦਿਤਬ੍ਬੋ. ਸਚੇ ਪਨ ਕੋਚਿ ਅਬ੍ਯਤ੍ਤੋ ਅਕਪ੍ਪਿਯਵੋਹਾਰੇਨ ਖੇਤ੍ਤਾਦਿਂ ਪਟਿਗ੍ਗਣ੍ਹਾਤਿ ਵਾ ਕਾਰੇਤਿ ਵਾ, ਤਂ ਭਿਕ੍ਖੂਹਿ ਨ ਪਰਿਭੁਞ੍ਜਿਤਬ੍ਬਂ, ਤਂ ਨਿਸ੍ਸਾਯ ਲਦ੍ਧਂ ਕਪ੍ਪਿਯਭਣ੍ਡਮ੍ਪਿ ਅਕਪ੍ਪਿਯਮੇਵ. ਅਬ੍ਯਤ੍ਤੇਨ ਪਨ ਲਜ੍ਜੀਭਿਕ੍ਖੁਨਾ ਕਾਰਾਪਿਤੇਸੁ ਕਿਞ੍ਚਾਪਿ ਪਟਿਗ੍ਗਹਣਂ ਕਪ੍ਪਿਯਂ, ਭਿਕ੍ਖੁਸ੍ਸ ਪਯੋਗਪਚ੍ਚਯਾ ਉਪ੍ਪਨ੍ਨੇਨ ਮਿਸ੍ਸਤ੍ਤਾ ਵਿਸਗਤਪਿਣ੍ਡਪਾਤੋ ਵਿਯ, ਅਕਪ੍ਪਿਯਮਂਸਭੋਜਨਂ ਵਿਯ ਚ ਦੁਬ੍ਬਿਨਿਬ੍ਭੋਗਂ ਹੋਤਿ, ਸਬ੍ਬੇਸਂ ਅਕਪ੍ਪਿਯਮੇਵ.

੨੮੫-੬. ਨਵ…ਪੇ… ਕਿਰਿਯਾ ਚ ਅਨਵੇ ਮਤ੍ਤਿਕੁਦ੍ਧਾਰਣਞ੍ਚ ਬਨ੍ਧੋ ਚ ਆਲ਼ਿਯਾ ਥਿਰਕਾਰੋ ਚ ਅਨਵੇ ਕੇਦਾਰੇ ਅਤਿਰੇਕਭਾਗਗ੍ਗਹਣਞ੍ਚ ਨਵੇ ਚ ਅਪਰਿਚ੍ਛਿਨ੍ਨਭਾਗੇ ਸਸ੍ਸੇ ‘‘ਏਤ੍ਤਕੇ ਦੇਥਾ’’ਤਿ ਕਹਾਪਣੁਟ੍ਠਾਪਨਞ੍ਚਾਤਿ ਸਬ੍ਬੇਸਮ੍ਪਿ ਅਕਪ੍ਪਿਯਨ੍ਤਿ ਸਮ੍ਬਨ੍ਧੋ. ਮਾਤਿਕਾ ਚ ਕੇਦਾਰੋ ਚ ਤਲ਼ਾਕੋ ਚਾਤਿ ਦ੍ਵਨ੍ਦੋ ਮਾਤਿਕ…ਪੇ… ਤਲ਼ਾਕਾ. ਤੇਸਂ ਕਿਰਿਯਾਤਿ ਸਮਾਸੋ. ਅਨਵੇਤਿ ਚਤੁਪਚ੍ਚਯਵਸੇਨ ਪਟਿਗ੍ਗਹਿਤੇ ਪੁਰਾਣਤਲ਼ਾਕੇ. ਉਦਕਵਸੇਨ ਪਟਿਗ੍ਗਹਿਤੇ ਪਨ ਸੁਦ੍ਧਚਿਤ੍ਤਾਨਂ ਵਟ੍ਟਤਿ. ਬਨ੍ਧੋਤਿ ਪਾਲ਼ਿਯਾ ਬਨ੍ਧੋ. ਪੋਰਾਣਕੇਦਾਰੇ ਨਿਯਮਿਤਪਕਤਿਭਾਗਤ੍ਤਾ ਆਹ ‘‘ਅਨਵੇ’’ਤਿ. ਅਪਰਿਚ੍ਛਿਨ੍ਨਭਾਗੇਤਿ ‘‘ਏਤ੍ਤਕੇ ਭੂਮਿਭਾਗੇ ਏਤ੍ਤਕੋ ਭਾਗੋ ਦਾਤਬ੍ਬੋ’’ਤਿ ਏਵਂ ਅਪਰਿਚ੍ਛਿਨ੍ਨਭਾਗੇ.

੨੮੭-੯. ‘‘ਕਸ ਵਪ੍ਪ’’ ਇਚ੍ਚਾਦਿਂ ਅਵਤ੍ਵਾ ਚ ‘‘ਏਤ੍ਤਕਾਯ ਭੂਮਿਯਾ ਏਤ੍ਤਕੋ ਭਾਗੋ ਦੇਯ੍ਯੋ’’ਤਿ ਭੂਮਿਂ ਵਾ ਪਤਿਟ੍ਠਾਪੇਤਿ, ਤਸ੍ਸੇਵੇਤਮਕਪ੍ਪਿਯਨ੍ਤਿ ਸਮ੍ਬਨ੍ਧੋ. ਚ-ਸਦ੍ਦੋ ਅਵਧਾਰਣੇ. ਪਤਿਟ੍ਠਾਪੇਤੀਤਿ ਯੋ ਭਿਕ੍ਖੁ ਪਤਿਟ੍ਠਾਪੇਤਿ. ਤਸ੍ਸੇਵਾਤਿ ਤਸ੍ਸ ਪਤਿਟ੍ਠਾਪਕਭਿਕ੍ਖੁਸ੍ਸੇਵ. ਏਤਨ੍ਤਿ ਪਤਿਟ੍ਠਾਪਿਤਭੂਮਿਤੋ ਲਦ੍ਧਧਞ੍ਞਂ ‘‘ਏਤ੍ਤਕੇ ਭੂਮਿਭਾਗੇ ਸਸ੍ਸਂ ਕਤਂ, ਏਤ੍ਤਕਂ ਗਣ੍ਹਥਾ’’ਤਿ ਏਵਂ ਵਦਨ੍ਤੇ ਪਮਾਣਗਣ੍ਹਨਤ੍ਥਂ ਦਣ੍ਡਰਜ੍ਜੁਭਿ ਮਿਨਨੇ ਵਾ ਖਲੇ ਠਤ੍ਵਾ ਰਕ੍ਖਣੇ ਵਾ ਤਂ ਨੀਹਰਾਪਨੇ ਵਾ ਕੋਟ੍ਠਾਗਾਰਾਦਿਪਟਿਸਾਮਨੇ ਵਾ ਏਤਂ ਤਸ੍ਸੇਵ ਅਕਪ੍ਪਿਯਨ੍ਤਿ ਸਮ੍ਬਨ੍ਧਨੀਯਂ. ਪਤਿਟ੍ਠਾਪੇਤਿ ਚਾਤਿ ਸੋ ਭਿਕ੍ਖੁ ਪਤਿਟ੍ਠਾਪੇਤਿ ਚ. ਕਤਨ੍ਤਿ ਅਮ੍ਹੇਹਿ ਕਤਂ. ਵਦਨ੍ਤੇਵਨ੍ਤਿ ਏਵਂ ਕਸ੍ਸਕੇ ਵਦਨ੍ਤੇ. ਪਮਾਣਨ੍ਤਿ ਭੂਮਿਪ੍ਪਮਾਣਂ. ਨੀਹਰਾਪਨੇਤਿ ਖਲਤੋ ਗੇਹਸ੍ਸ ਨੀਹਰਾਪਨੇ. ਏਤਨ੍ਤਿ ਮਿਤਲਦ੍ਧਰਕ੍ਖਿਤਾਦਿਕਂ. ਤਸ੍ਸੇਵਾਤਿ ਮਾਨਕਰਕ੍ਖਕਾਦਿਨੋ ਏਵ. ਅਪੁਬ੍ਬਸ੍ਸ ਅਨੁਪ੍ਪਾਦਿਤਤ੍ਤਾ ਅਞ੍ਞੇਸਂ ਕਪ੍ਪਤੀਤਿ ਆਹ ‘‘ਤਸ੍ਸੇਵੇਤਮਕਪ੍ਪਿਯ’’ਨ੍ਤਿ.

੨੯੦. ਪਟਿਸਾਮਨਪ੍ਪਸਙ੍ਗੇਨਾਹ ‘‘ਪਟਿਸਾਮੇਯ੍ਯਾ’’ਤਿਆਦਿ. ਪਿਤੁਸਨ੍ਤਕਮ੍ਪਿ ਗਿਹਿਸਨ੍ਤਕਂ ਯਂ ਕਿਞ੍ਚੀਤਿ ਸਮ੍ਬਨ੍ਧੋ. ਪਿਤੁਸਨ੍ਤਕਨ੍ਤਿ ਪਿਤਾ ਚ ਮਾਤਾ ਚ ਪਿਤਰੋ, ਤੇਸਂ ਸਨ੍ਤਕਂ. ਗਿਹਿਸਨ੍ਤਕਨ੍ਤਿ ਇਮਿਨਾ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਨ੍ਤਕਂ ਯਂ ਕਿਞ੍ਚਿ ਪਰਿਕ੍ਖਾਰਂ ਪਟਿਸਾਮੇਤੁਂ ਵਟ੍ਟਤੀਤਿ ਦੀਪੇਤਿ. ਯਂ ਕਿਞ੍ਚੀਤਿ ਕਪ੍ਪਿਯਂ ਅਕਪ੍ਪਿਯਂ ਵਾ ਅਨ੍ਤਮਸੋ ਮਾਤੁਕਣ੍ਣਪਿਲ਼ਨ੍ਧਨਤਾਲਪਣ੍ਣਮ੍ਪਿ. ਭਣ੍ਡਾਗਾਰਿਕਸੀਸੇਨਾਤਿ ਸੀਸਙ੍ਗਮਿਵ ਪਧਾਨਂ ਯਂ ਕਿਞ੍ਚਿ ‘‘ਸੀਸ’’ਨ੍ਤਿ ਇਧ ਉਪਚਾਰਵਸੇਨ ਵੁਚ੍ਚਤਿ, ਤਥਾ ਭਣ੍ਡਾਗਾਰਿਕਸਦ੍ਦੋਪਿ ਭਾਵਪ੍ਪਧਾਨੋ, ਭਣ੍ਡਾਗਾਰਿਕੋ ਭਣ੍ਡਾਗਾਰਿਕਤ੍ਤਂ ਸੀਸਂ ਪਧਾਨਨ੍ਤਿ ਵਿਸੇਸਨਪਰਪਦੇ ਕਮ੍ਮਧਾਰਯੋ, ਤੇਨ, ਭਣ੍ਡਾਗਾਰਿਕਤ੍ਤਸ੍ਸ ਪਧਾਨਕਰਣੇਨਾਤਿ ਅਤ੍ਥੋ.

੨੯੧-੨. ਅਵਸ੍ਸਂ ਪਟਿਸਾਮਿਯਨ੍ਤਿ ਅਵਸ੍ਸਂ ਸਙ੍ਗੋਪੇਤਬ੍ਬਂ. ਵੁਤ੍ਤੇਪੀਤਿ ਮਾਤਾਪਿਤੂਹਿ ਵੁਤ੍ਤੇਪਿ.

੨੯੩-੪. ਵਡ੍ਢਕਿਆਦਯੋ ਵਾ ਰਾਜਵਲ੍ਲਭਾ ਵਾ ‘‘ਸਕਂ ਪਰਿਕ੍ਖਾਰਂ ਵਾ ਸਯਨਭਣ੍ਡਂ ਵਾ ਪਟਿਸਾਮੇਤ੍ਵਾ ਦੇਹੀ’’ਤਿ ਯਦਿ ਵਦਨ੍ਤਿ, ਛਨ੍ਦਤੋਪਿ ਭਯਾਪਿ ਨ ਕਰੇਯ੍ਯਾਤਿ ਯੋਜਨਾ. ਪਰਿਕ੍ਖਾਰਨ੍ਤਿ ਵਾਸਿਫਰਸੁਆਦਿਉਪਕਰਣਭਣ੍ਡਂ. ਛਨ੍ਦਤੋਪਿ ਭਯਾਪੀਤਿ ਵਡ੍ਢਕਿਆਦੀਸੁ ਛਨ੍ਦੇਨ, ਰਾਜਵਲ੍ਲਭੇਸੁ ਭਯੇਨ.

੨੯੫-੬. ਪਟਿਸਾਮਿਤੁਂ ਵਟ੍ਟਤੀਤਿ ਯੋਜੇਤਬ੍ਬਂ. ਸਙ੍ਕਨ੍ਤੀਤਿ ਯਾਦਿਸੇ ਪਦੇਸੇ ‘‘ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਗਹਿਤਂ ਭਵਿਸ੍ਸਤੀ’’ਤਿ ਸਙ੍ਕਂ ਉਪ੍ਪਾਦੇਨ੍ਤਿ, ਤਾਦਿਸੇ ਵਿਹਾਰਾਵਸਥਸ੍ਸਨ੍ਤੋਤਿ ਯੋਜਨੀਯਂ. ਵਿਹਾਰਾਵਸਥਸ੍ਸਾਤਿ ਵਿਹਾਰਸ੍ਸ ਚ ਆਵਸਥਸ੍ਸ ਚ. ਰਤਨਨ੍ਤਿ ਦਸਵਿਧਂ ਰਤਨਂ. ਰਤ੍ਨਸਮ੍ਮਤਨ੍ਤਿ ਵਤ੍ਥਾਦਿਕਂ. ਨਿਕ੍ਖਿਪੇਯ੍ਯਾਤਿ ਸਾਮਿਕੇ ਦਿਟ੍ਠੇ ਨਿਯਮੇਤ੍ਵਾ ਦਾਤੁਂ ‘‘ਏਤ੍ਤਕਾ ਕਹਾਪਣਾ’’ਤਿਆਦਿਨਾਨੁਰੂਪੇਨ ਮਤ੍ਤਿਕਲਞ੍ਛਨਾਦਿਨਿਮਿਤ੍ਤੇਨ ਵਾ ਸਞ੍ਞਾਣਂ ਕਤ੍ਵਾ ਨਿਕ੍ਖਿਪੇਯ੍ਯ. ਗਹੇਤ੍ਵਾਨਾਤਿ ਤਾਦਿਸੇ ਅਸਤਿ ਅਤ੍ਤਨਾਵ ਗਹੇਤ੍ਵਾ. ਤਾਦਿਸੇਤਿ ਰਤਨੇ ਵਾ ਰਤਨਸਮ੍ਮਤੇ ਵਾ ਸਤਿ. ਸਾਮਿਕਾਨਾਗਮਂ ਞਤ੍ਵਾਤਿ ਯਦਿ ਅਤ੍ਤਨਿ ਆਸਙ੍ਕਨ੍ਤਿ, ਮਗ੍ਗਾ ਓਕ੍ਕਮ੍ਮ ਨਿਸੀਦਿਯ ਪਚ੍ਛਾ ਸਾਮਿਕਾਨਂ ਅਨਾਗਮਨਂ ਵਿਞ੍ਞਾਯ. ਪਤਿਰੂਪਨ੍ਤਿ ਰਤਨਸਮ੍ਮਤੇ ਪਂਸੁਕੂਲਗ੍ਗਹਣਂ ਰਤਨੇ ਨਿਰੁਸ੍ਸੁਕ੍ਕਗਮਨਨ੍ਤਿ ਏਵਰੂਪਂ ਭਿਕ੍ਖੂਨਂ ਅਨੁਰੂਪਨ੍ਤਿ.

ਉਗ੍ਗਹਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.