੩੦. ਵਤ੍ਤਨਿਦ੍ਦੇਸਵਣ੍ਣਨਾ

੨੧੩. ਸਉਪਾਹਨੋ…ਪੇ… ਚੀਵਰਂ ਸੀਸੇ ਕਰਿਤ੍ਵਾ ਵਾ ਆਗਨ੍ਤੁਕੋ ਆਰਾਮਂ ਨ ਪਵਿਸੇਤਿ ਸਮ੍ਬਨ੍ਧੋ. ਸਛਤ੍ਤੋਤਿ ਸੀਸੇ ਕਤਛਤ੍ਤੇਨ ਸਛਤ੍ਤੋ. ਓਗੁਣ੍ਠਿਤੋਤਿ ਸਸੀਸਂ ਪਾਰੁਪਿਤੋ. ‘‘ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨ’’ਨ੍ਤਿ ਵੁਤ੍ਤਂ ਉਪਚਾਰਸੀਮਾਸਮੀਪਂ ਪਤ੍ਵਾ ਉਪਾਹਨਾਓਮੁਞ੍ਚਨਾਦਿਸਬ੍ਬਂ ਕਤ੍ਵਾ ਆਰਾਮੋ ਪਵਿਸਿਤਬ੍ਬੋਤਿ ਅਯਮੇਤ੍ਥ ਬ੍ਯਤਿਰੇਕਲਦ੍ਧੋ ਅਤ੍ਥੋ.

੨੧੪. ਪਾਨੀਯੇਨ ਪਾਦੇ ਨ ਧੋਵੇਯ੍ਯਾਤਿ ਸਮ੍ਬਨ੍ਧੋ. ਪਟਿਕ੍ਕਮਨਂ ਪਤ੍ਵਾ ਏਕਮਨ੍ਤੇ ਪਤ੍ਤਚੀਵਰਂ ਨਿਕ੍ਖਿਪਿਤ੍ਵਾ ਪਤਿਰੂਪੇ ਨਿਸਜ੍ਜ ਪੁਚ੍ਛਿਤ੍ਵਾ ਪਾਨੀਯਂ ਪਾਤਬ੍ਬਂ, ਪਰਿਭੋਜਨੀਯੇਨ ਯਥਾਵੁਤ੍ਤਂ ਪਾਦਾ ਧੋਵਿਤਬ੍ਬਾਤਿ ਅਧਿਪ੍ਪਾਯੋ. ਵੁਡ੍ਢਤਰੇ ਆਵਾਸਿਕੇਪਿ ਚ ਅਭਿਵਾਦੇਯ੍ਯਾਤਿ ਇਮਿਨਾ ਵਸ੍ਸਂ ਪੁਚ੍ਛਿਤ੍ਵਾ ਨਵਕੇਨ ਆਵਾਸਿਕੇਨ ਅਭਿਵਾਦਾਪੇਤਬ੍ਬਨ੍ਤਿ ਦੀਪੇਤਿ. ਪੁਚ੍ਛੇਯ੍ਯ ਸਯਨਾਸਨਨ੍ਤਿ ‘‘ਕਤਮਂ ਸੇਨਾਸਨਂ ਪਾਪੁਣਾਤਿ, ਅਜ੍ਝਾਵੁਤ੍ਥਂ ਅਨਜ੍ਝਾਵੁਤ੍ਥਂ ਵਾ’’ਤਿ ਸੇਨਾਸਨਂ ਪੁਚ੍ਛੇਯ੍ਯ. ਇਦਞ੍ਚ ਪੁਚ੍ਛਾਯ ਲਕ੍ਖਣਵਚਨਂ. ਤਸ੍ਮਾ ਆਵਾਸਿਕਵਤ੍ਤੇ ਵੁਤ੍ਤਮਜ੍ਝਾਵੁਤ੍ਥਾਦਿਕਞ੍ਚ ਪੁਚ੍ਛਿਤਬ੍ਬਂ. ਸਚੇ ‘‘ਅਨਜ੍ਝਾਵੁਤ੍ਥ’’ਨ੍ਤਿ ਵਦਨ੍ਤਿ, ਕਵਾਟਂ ਆਕੋਟੇਤ੍ਵਾ ਮੁਹੁਤ੍ਤਂ ਆਗਮੇਤ੍ਵਾ ਘਟਿਕਂ ਉਗ੍ਘਾਟੇਤ੍ਵਾ ਕਵਾਟਂ ਪਣਾਮੇਤ੍ਵਾ ਬਹਿ ਠਿਤੇਨ ਉਲ੍ਲੋਕੇਤ੍ਵਾ ਪਵਿਸਿਤ੍ਵਾ ਸਬ੍ਬਂ ਸੇਨਾਸਨਵਤ੍ਤਂ ਕਾਤਬ੍ਬਂ. ਆਗਨ੍ਤੁਕਵਤ੍ਤਂ.

੨੧੫-੬. ਗਮਿਕੋ ਪਕ੍ਕਮੇਯ੍ਯਾਤਿ ਸਮ੍ਬਨ੍ਧੋ. ‘‘ਪਟਿਸਾਮੇਤ੍ਵਾ’’ਤਿਆਦੀਨਿਮਸ੍ਸ ਪੁਬ੍ਬਕਿਰਿਯਾਪਦਾਨਿ. ਦਾਰੁਮਤ੍ਤਿਕਭਣ੍ਡਕਨ੍ਤਿ ਏਤ੍ਥ ਮਞ੍ਚਪੀਠਾਦਿਦਾਰੁਭਣ੍ਡਂ ਰਜਨਭਾਜਨਾਦਿਮਤ੍ਤਿਕਾਭਣ੍ਡਂ. ਪਟਿਸਾਮੇਤ੍ਵਾਤਿ ਅਤ੍ਥਿ ਚੇ ਅਨੋਵਸ੍ਸਕੇ ਸਣ੍ਠਪੇਤ੍ਵਾ. ਥਕੇਤ੍ਵਾਨਾਤਿ ਦ੍ਵਾਰਵਾਤਪਾਨੇਹਿ ਪਿਧਾਯ. ਸਾਧੁਕਂ ਸਙ੍ਗੋਪੇਤ੍ਵਾਨਾਤਿ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਸ੍ਸ, ਪੀਠੇ ਪੀਠਸ੍ਸ ਆਰੋਪਨੇਨ ਸੇਨਾਸਨਸ੍ਸ ਉਪਰੂਪਰਿ ਪੁਞ੍ਜਕਰਣੇਨ ਸਾਧੁਕਂ ਸਙ੍ਗੋਪਨਂ ਕਤ੍ਵਾ. ਨ ਚਾਤਿ ਨੇਵ. ਗਮਿਕਵਤ੍ਤਂ.

੨੧੭-੮. ਆਵਾਸਿਕੋਤਿ ਇਦਂ ‘‘ਪਞ੍ਞਪੇਯ੍ਯਾ’’ਤਿਆਦੀਨਂ ਕਤ੍ਤੁਪਦਂ. ਨਵਕਮ੍ਮਕਰਣਾਦਿਭਾਰਨਿਤ੍ਥਰਣਤਾਯ ਆਵਾਸੋ ਵਿਹਾਰੋ ਅਸ੍ਸ ਅਤ੍ਥੀਤਿ ਆਵਾਸਿਕੋ. ਯਸ੍ਸ ਪਨ ਕੇਵਲਂ ਵਿਹਾਰੇ ਨਿਵਾਸਨਮਤ੍ਤਂ ਅਤ੍ਥਿ, ਸੋ ਨੇਵਾਸਿਕੋ. ਉਭੋਪਿ ਤੇ ਇਧ ਆਵਾਸਿਕ-ਸਦ੍ਦੇਨ ਸਙ੍ਗਹਿਤਾ. ਪਾਦੋਦਪ੍ਪਭੁਤਿਨ੍ਤਿ ਏਤ੍ਥ ਪਭੁਤਿ-ਸਦ੍ਦੇਨ ਪਾਦਪੀਠਪਾਦਕਥਲਿਕਾਨਂ ਗਹਣਂ. ਪਚ੍ਚੁਗ੍ਗਨ੍ਤ੍ਵਾਨ ਪਤ੍ਤਚੀਵਰਂ ਗਣ੍ਹੇਯ੍ਯਾਤਿ ਯੋਜਨਾ. ਪਞ੍ਞਪੇ ਸਯਨਾਸਨਨ੍ਤਿ ‘‘ਏਤਂ ਤੁਮ੍ਹਾਕਂ ਸੇਨਾਸਨਂ ਪਾਪੁਣਾਤੀ’’ਤਿ ਏਵਂ ਸਯਨਾਸਨਂ ਪਞ੍ਞਪੇਯ੍ਯ, ਪਕਾਸੇਯ੍ਯਾਤਿ ਵੁਤ੍ਤਂ ਹੋਤਿ.

੨੧੯. ਅਜ੍ਝਾਵੁਤ੍ਥਨ੍ਤਿ ਪੁਬ੍ਬੇ ਭਿਕ੍ਖੂਹਿ ਨਿਵੁਤ੍ਥਂ. ਗੋਚਰਾਗੋਚਰਂ ਵਦੇਤਿ ‘‘ਭਿਕ੍ਖਾਚਾਰਗਾਮੋ ਦੂਰੋ, ਆਸਨ੍ਨੋ’’ਤਿ ਵਾ, ‘‘ਕਾਲਸ੍ਸੇਵ ਪਿਣ੍ਡਾਯ ਚਰਿਤਬ੍ਬਂ, ਦਿਵਾ ਵਾ’’ਤਿ ਏਵਂ ਗੋਚਰਞ੍ਚ, ‘‘ਮਿਚ੍ਛਾਦਿਟ੍ਠਿਕਾਨਂ ਵਾ ਗਾਮੋ, ਪਰਿਚ੍ਛਿਨ੍ਨਭਿਕ੍ਖੋ ਵਾ’’ਤਿਆਦਿਨਾ ਅਗੋਚਰਞ੍ਚ ਵਦੇਯ੍ਯਾਤਿ ਅਤ੍ਥੋ. ਵਚ੍ਚਪਸ੍ਸਾਵਟ੍ਠਾਨਾਨੀਤਿਆਦੀਨਿਪਿ ‘‘ਵਦੇ’’ਤਿ ਇਮਸ੍ਸੇਵ ਕਮ੍ਮਵਚਨਾਨਿ. ਸੇਖਸਮ੍ਮੁਤਿਨ੍ਤਿ ਯਸ੍ਸ ਸਦ੍ਧਸ੍ਸ ਕੁਲਸ੍ਸ ਸਙ੍ਘੋ ਸੇਖਸਮ੍ਮੁਤਿਂ ਦੇਤਿ, ਤਂ ਕੁਲਞ੍ਚ.

੨੨੦. ਪਵੇਸਨਿਕ੍ਖਮੇ ਕਾਲਨ੍ਤਿ ‘‘ਕੇਸੁਚਿ ਠਾਨੇਸੁ ਵਾਲ਼ਮਿਗਾ ਵਾ ਅਮਨੁਸ੍ਸਾ ਵਾ ਹੋਨ੍ਤਿ, ਇਮਂ ਕਾਲਂ ਪਵਿਸਿਤਬ੍ਬਂ ਨਿਕ੍ਖਮਿਤਬ੍ਬਞ੍ਚਾ’’ਤਿ ਏਵਂ ਪਵੇਸਨਿਕ੍ਖਮੇ ਚ ਕਾਲਂ. ਏਤਂ ਪਨ ਆਸਨਪਞ੍ਞਪਨਾਦਿਕਂ ਸਬ੍ਬਂ ਵਤ੍ਤਂ ਵੁਡ੍ਢਤਰੇ ਆਗਤੇ ਚੀਵਰਕਮ੍ਮਾਦਿਂ ਵਾ ਨਾਤਿਗਿਲਾਨਸ੍ਸ ਭੇਸਜ੍ਜਂ ਵਾ ਠਪੇਤ੍ਵਾਪਿ ਕਾਤਬ੍ਬਂ. ਮਹਾਗਿਲਾਨਸ੍ਸ ਪਨ ਭੇਸਜ੍ਜਮੇਵ ਕਾਤਬ੍ਬਂ. ਚੇਤਿਯਙ੍ਗਣਵਤ੍ਤਂ ਕਰੋਨ੍ਤੇਨਾਪਿ ਤਸ੍ਸ ਵਤ੍ਤਂ ਕਾਤੁਂ ਆਰਭਿਤਬ੍ਬਂ. ਪਣ੍ਡਿਤੋ ਹਿ ਆਗਨ੍ਤੁਕੋ ‘‘ਕਰੋਹਿ ਤਾਵ ਭੇਸਜ੍ਜਂ, ਚੇਤਿਯਙ੍ਗਣਂ ਸਮ੍ਮਜ੍ਜਾਹੀ’’ਤਿ ਚ ਵਦੇਯ੍ਯ. ਅਪਿਚ ਬੀਜਨੇਨ ਬੀਜਿਤਬ੍ਬੋ, ਪਾਦਾਪਿਸ੍ਸ ਧੋਵਿਤਬ੍ਬਾ, ਤੇਲੇਨ ਮਕ੍ਖਿਤਬ੍ਬਾ. ਪਿਟ੍ਠਿ ਚੇ ਆਗਿਲਾਯਤਿ, ਸਮ੍ਬਾਧੇਤਬ੍ਬਾ. ਨਵਕਸ੍ਸ ਪਨ ਆਗਨ੍ਤੁਕਸ੍ਸ ‘‘ਇਦਮਾਸਨਂ, ਏਤ੍ਥ ਨਿਸੀਦਾ’’ਤਿਆਦਿਨਾ ਆਚਿਕ੍ਖਿਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਨਿਸਿਨ੍ਨੋਯੇਵਾ’’ਤਿਆਦਿਮਾਹ. ਨਿਸਿਨ੍ਨੋਯੇਵਾਤਿ ਇਮਿਨਾ ‘‘ਠਿਤੋਯੇਵਾ’’ਤਿਆਦਿਂ ਉਪਲਕ੍ਖੇਤਿ. ਸਮੁਦ੍ਦਿਸੇਤਿ ਆਦਰੇਨ ਵਦੇਯ੍ਯ. ਆਵਾਸਿਕਵਤ੍ਤਂ.

‘‘ਵਤ੍ਤ’’ਨ੍ਤਿ ਪਨ ਸਾਮਞ੍ਞੇਨ ਨਿਦ੍ਦਿਟ੍ਠਤ੍ਤਾ ਨ ਥੇਰੇ ਭਿਕ੍ਖੂ ਅਤਿਅਲ੍ਲੀਯਿਤ੍ਵਾ ਨਿਸੀਦਿਤਬ੍ਬਂ, ਮਹਾਥੇਰਸ੍ਸ ਨਿਸਿਨ੍ਨਾਸਨਤੋ ਏਕਂ ਦ੍ਵੇ ਆਸਨਾਨਿ ਠਪੇਤ੍ਵਾ ‘‘ਨਿਸੀਦਾ’’ਤਿ ਵੁਤ੍ਤੇ ਨਿਸੀਦਿਤਬ੍ਬਂ, ਨ ਨਵਾਪਿ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ, ਨ ਸਙ੍ਘਾਟਿਂ ਓਤ੍ਥਰਿਤ੍ਵਾ ਨਿਸੀਦਿਤਬ੍ਬਂ, ਸਦ੍ਦਂ ਅਕਤ੍ਵਾ ਉਦਕਕਿਚ੍ਚਂ ਕਾਤਬ੍ਬਂ, ਯਥਾ ਸੂਪਸ੍ਸ ਓਕਾਸੋ ਹੋਤਿ, ਏਵਮਤ੍ਤਾਯ ਓਦਨੋ ਗਣ੍ਹਿਤਬ੍ਬੋ, ਥੇਰੇਨ ਭਿਕ੍ਖੁਨਾ ‘‘ਠਪੇਤ੍ਵਾ ਅਪ੍ਪਕਂ ਓਦਨਾਦਿਕਂ ਸਬ੍ਬਂ ਸਬ੍ਬੇਸਂ ਸਮਕਂ ਸਮ੍ਪਾਦੇਹੀ’’ਤਿ ਵਤ੍ਤਬ੍ਬਂ, ਨ ਤਾਵ ਥੇਰੇਨ ਭੁਞ੍ਜਿਤਬ੍ਬਂ, ਭੁਤ੍ਤਾਵਿਨਾ ਨ ਤਾਵ ਉਦਕਂ ਪਟਿਗ੍ਗਹੇਤਬ੍ਬਂ, ਭਤ੍ਤਗ੍ਗਤੋ ਨਿਵਤ੍ਤਨ੍ਤੇਹਿ ਯਥਾਨੁਰੂਪਂ ਨਿਕ੍ਖਮਿਤ੍ਵਾ ਵਿਰਲ਼ਾਯ ਪਾਲ਼ਿਯਾ ਗਨ੍ਤਬ੍ਬਨ੍ਤਿ ਏਵਮਾਦਿਕਞ੍ਚ ਤਦਨੁਰੂਪਂ ਸੇਖਿਯਵਤ੍ਤਞ੍ਚ ਸਮ੍ਪਾਦੇਤਬ੍ਬਨ੍ਤਿ ਇਦਂ ਭਤ੍ਤਗ੍ਗਵਤ੍ਤਞ੍ਚ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ, ‘‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’’ਤਿ ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ, ਨਾਤਿਸਹਸਾ ਪਵਿਸਿਤਬ੍ਬਂ, ਨਾਤਿਸਹਸਾ ਨਿਕ੍ਖਮਿਤਬ੍ਬਂ, ਨਾਤਿਦੂਰੇ ਨਚ੍ਚਾਸਨ੍ਨੇ ਠਾਤਬ੍ਬਂ, ਨਾਤਿਚਿਰਂ ਠਾਤਬ੍ਬਂ, ਨਾਤਿਲਹੁਕਂ ਨਿਵਤ੍ਤਿਤਬ੍ਬਂ, ਦਾਤੁਕਾਮਤਾਕਾਰਂ ਞਤ੍ਵਾ ਠਾਤਬ੍ਬਂ, ਯੋ ਪਠਮਂ ਗਾਮਤੋ ਪਟਿਕ੍ਕਮਤਿ, ਤੇਨ ਆਸਨਪਞ੍ਞਪਨਾਦਿ ਸਬ੍ਬਂ ਕਾਤਬ੍ਬਂ, ਯੋ ਪਚ੍ਛਾ, ਤੇਨ ਆਸਨੁਦ੍ਧਰਣਾਦਿ ਸਬ੍ਬਂ ਕਾਤਬ੍ਬਨ੍ਤਿ ਏਵਮਾਦਿਕਞ੍ਚ ਤਦਨੁਰੂਪਂ ਸੇਖਿਯਵਤ੍ਤਞ੍ਚ ਸਮ੍ਪਾਦੇਤਬ੍ਬਨ੍ਤਿ ਇਦਂ ਪਿਣ੍ਡਚਾਰਿਕਵਤ੍ਤਞ੍ਚ ਕਾਤਬ੍ਬਂ.

ਸੇਨਾਸਨਟ੍ਠਾਨੇ ਸਬ੍ਬਂ ਵਤ੍ਤਞ੍ਚ ਸਮ੍ਪਾਦੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਸਾਧੁਕਂ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਚ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋਤਿਆਦਿ ਸਬ੍ਬਂ ਪਿਣ੍ਡਚਾਰਿਕਵਤ੍ਤਂ ਕਾਤਬ੍ਬਂ. ਪਾਨੀਯਪਰਿਭੋਜਨੀਯਅਗ੍ਗਿਅਰਣਿਸਹਿਤਕਤ੍ਤਰਦਣ੍ਡਾ ਉਪਟ੍ਠਪੇਤਬ੍ਬਾ, ਨਕ੍ਖਤ੍ਤਪਦਾਨਿ ਸਕਲਾਨਿ ਵਾ ਏਕਦੇਸਾਨਿ ਵਾ ਉਗ੍ਗਹੇਤਬ੍ਬਾਨਿ, ਦਿਸਾਕੁਸਲੇਨ ਭਵਿਤਬ੍ਬਨ੍ਤਿ ਇਦਂ ਆਰਞ੍ਞਿਕਵਤ੍ਤਞ੍ਚ ਉਦ੍ਦਿਟ੍ਠਂਯੇਵ ਹੋਤੀਤਿ ਅਵਗਨ੍ਤਬ੍ਬਨ੍ਤਿ.

ਵਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.