੨੫. ਅਕਪ੍ਪਿਯਸਯਨਨਿਦ੍ਦੇਸਵਣ੍ਣਨਾ

੧੮੭-੯. ਅਕਪ੍ਪਿਯਾਨਿ ਸਯਨਾਨੀਤਿ ਉਚ੍ਚਾਸਯਨਮਹਾਸਯਨਾਨਿ. ਪਧਾਨਵਸੇਨ ਪਨ ‘‘ਸਯਨਾਨੀ’’ਤਿ ਵੁਤ੍ਤਂ, ਪੀਠਾਦਯੋਪਿ ਏਤ੍ਥੇਵ ਸਙ੍ਗਯ੍ਹਨ੍ਤਿ ਅਞ੍ਜਨੀ-ਸਦ੍ਦੇਨ ਅਵਸੇਸਾਨਿ ਵਿਯ. ਆਸਨ੍ਦਿ ਚ…ਪੇ… ਉਭਤੋਰਤ੍ਤੂਪਧਾਨਕਞ੍ਚੇਤਿ ਏਤਾਨਿ ਅਕਪ੍ਪਿਯਾਨੀਤਿ ਸਮ੍ਬਨ੍ਧੋ. ਤਤ੍ਥ ਆਸਨ੍ਦੀਤਿ ਸੁਗਤਙ੍ਗੁਲੇਨ ਅਤਿਰੇਕਟ੍ਠਙ੍ਗੁਲਪਾਦਕਾਨਿ ਮਞ੍ਚਪੀਠਾਨਿ. ਤਤ੍ਥ ਪੀਠਂ ਨਾਮ ਮਞ੍ਚੋ ਵਿਯ ਨਾਤਿਦੀਘਂ ਵੁਚ੍ਚਤਿ. ਤਿਵਿਧਂ ਤੂਲਮੇਤਿਸ੍ਸਾ ਅਤ੍ਥੀਤਿ ਤੂਲੀ, ਪਕਤਿਤੂਲਿਕਾ. ‘‘ਪਲ੍ਲਙ੍ਕੋਤਿ ਪਾਦੇਸੁ ਵਾਲ਼ਰੂਪਾਨਿ ਠਪੇਤ੍ਵਾ ਕਤੋ’’ਤਿ ਠਪਨਸ੍ਸ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੨੫੪) ਵੁਤ੍ਤਤ੍ਤਾ ਠਪਨਞ੍ਚ ਯਥਾਕਥਞ੍ਚਿ ਹੋਤਿ, ਯੁਤ੍ਤਿ ਚ ਹੋਤੀਤਿ, ‘‘ਤਤ੍ਥੇਵ ਸੀਹਰੂਪਾਦਿਂ ਦਸ੍ਸੇਤ੍ਵਾ ਕਤੋ ਪਨ ਵਟ੍ਟਤੀਤਿ ਵਦਨ੍ਤੀ’’ਤਿ ਯਂ ਟੀਕਾਯਂ ਵੁਤ੍ਤਂ, ਤਂ ‘‘ਕਿਮਿਤਿ ਏਵਂ ਵਦਨ੍ਤੀ’’ਤਿ ਵਤ੍ਵਾ ਪਟਿਕ੍ਖਿਪਿਤਬ੍ਬਂ. ‘‘ਅਕਪ੍ਪਿਯਰੂਪਕਤੋ ਅਕਪ੍ਪਿਯਮਞ੍ਚੋ ਪਲ੍ਲਙ੍ਕੋ ਨਾਮਾ’’ਤਿ ਹਿ ਸਾਰਸਮਾਸੇਪਿ. ਆਸਨ੍ਦੀ ਪਲ੍ਲਙ੍ਕੋ ਉਚ੍ਚਾਸਯਨਂ, ਸੇਸਾ ਮਹਾਸਯਨਂ. ਪਟਿਕਾ ਉਣ੍ਣਾਮਯੋ ਸੇਤਤ੍ਥਰਣੋ. ਗੋਨੋ ਚਤੁਰਙ੍ਗੁਲਾਧਿਕਲੋਮੋ ਮਹਾਕੋਜਵੋ. ਚਿਤ੍ਤਕਂ ਵਾਨਵਿਚਿਤ੍ਰੋ ਉਣ੍ਣਾਮਯਤ੍ਥਰਣੋ. ਉਣ੍ਣਾ ਏਲ਼ਕਲੋਮਂ. ਪਟਲਿਕਾ ਘਨਪੁਪ੍ਫਿਕਾ. ਵਿਕਤੀਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਤੋ. ਉਦ੍ਦਲੋਮੀਤਿ ਏਕਤੋ ਉਗ੍ਗਤਲੋਮੋ. ਏਕਨ੍ਤਲੋਮਿਕਾਤਿ ਉਭਤੋ ਉਗ੍ਗਤਲੋਮੋ.

ਕੁਤ੍ਤਂ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗੋ. ਕੋਸੇਯ੍ਯਂ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਸੁਤ੍ਤਮਯਂ ਪਚ੍ਚਤ੍ਥਰਣਂ, ਕਟ੍ਟਿਸ੍ਸਂ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ. ਹਤ੍ਥਿਨੋ ਚ ਅਸ੍ਸਾ ਚ ਰਥਾ ਚਾਤਿ ਸੇਨਙ੍ਗਾਨਂ ਬਹੁਤ੍ਤੇ ਸਮਾਹਾਰਦ੍ਵਨ੍ਦੋ, ਹਤ੍ਥਿਅਸ੍ਸਰਥੇ ਤੇਸਂ ਪਿਟ੍ਠੀਸੁ ਅਤ੍ਥਰਾਤਿ ਤਪ੍ਪੁਰਿਸੋ. ਅਜਿਨਪ੍ਪਵੇਣੀਤਿ ਅਜਿਨਾਨਂ ਅਜਿਨਮਿਗਚਮ੍ਮਾਨਂ ਮਞ੍ਚਪ੍ਪਮਾਣੇਨ ਦੁਪਟ੍ਟਤਿਪਟ੍ਟਾਨਿ ਕਤ੍ਵਾ ਸਿਬ੍ਬਿਤਾ ਪਵੇਣੀ. ਕਦਲਿਮਿਗਾਨਂ ਇਦਂ ਕਦਲਿਮਿਗਂ, ਕਿਂ ਤਂ? ਚਮ੍ਮਂ, ਪਵਰੋ ਚ ਸੋ ਪਚ੍ਚਤ੍ਥਰੋ ਚਾਤਿ ਪਵਰਪਚ੍ਚਤ੍ਥਰੋ, ਸੋ ਚ ਤਂ ਸੇਤਵਤ੍ਥਸ੍ਸ ਉਪਰਿ ਅਤ੍ਥਤਞ੍ਚ, ਕਦਲਿਮਿਗਞ੍ਚ ਤਂ ਪਵਰਪਚ੍ਚਤ੍ਥਰਞ੍ਚਾਤਿ ਸਮਾਸੋ, ਪਵਰਪਚ੍ਚਤ੍ਥਰਣਸਙ੍ਖਾਤਂ ਸੇਤਵਤ੍ਥਸ੍ਸ ਉਪਰਿ ਪਤ੍ਥਰਿਤਂ ਕਦਲਿਮਿਗਪ੍ਪਵਰਪਚ੍ਚਤ੍ਥਰਣਨ੍ਤਿ ਅਤ੍ਥੋ. ਤਂ ਕਿਰ ਏਵਂ ਕਰੋਨ੍ਤਿ. ਟੀਕਾਯਂ ਪਨ ਯਥਾਵੁਤ੍ਤਦ੍ਵਯੇਨ ਅਤ੍ਥਤਂ ਅਞ੍ਞਮੇਵ ਕਿਞ੍ਚਿ ਵੁਤ੍ਤਂ, ਤਂ ਨ ਯੁਤ੍ਤਂ ‘‘ਅਜਿਨਪ੍ਪਵੇਣੀ ਧਾਰੇਤਬ੍ਬਾ’’ਤਿਆਦਿਨਾ (ਮਹਾਵ. ੨੫੪) ਵਿਸੁਂ ਅਤ੍ਥਰਣਾਨਮੇਵ ਵੁਤ੍ਤਤ੍ਤਾ. ਤੇਸੁ ਹਿ ਵੁਤ੍ਤੇਸੁ ਤਦਤ੍ਥਤਂ ਵੁਤ੍ਤਮੇਵ ਸਿਯਾ, ਤਥਾ ਚ ਵੁਤ੍ਤਂ ਹੇਟ੍ਠਾ ਵਿਸੁਂ ਪਟਿਕਾਦਿਕਨ੍ਤਿ.

ਸਲੋਹਿਤਵਿਤਾਨਨ੍ਤਿ ਏਤਂ ‘‘ਉਭਤੋਰਤ੍ਤੂਪਧਾਨਕ’’ਨ੍ਤਿਮਸ੍ਸ ਵਿਸੇਸਨਂ. ਲੋਹਿਤਵਿਤਾਨੇਨ ਸਹ ਵਤ੍ਤਮਾਨਨ੍ਤਿ ਸਮਾਸੋ. ਸੇਤਵਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯਪਚ੍ਚਤ੍ਥਰਣੇ ਸਤਿ ਨ ਵਟ੍ਟਤਿ. ਰਤ੍ਤਂ ਉਪਧਾਨਂ ਸੀਸੂਪਧਾਨਂ ਪਾਦੂਪਧਾਨਞ੍ਚ ਰਤ੍ਤੂਪਧਾਨਕਂ, ਉਭਤੋ ਮਞ੍ਚਸ੍ਸ ਸੀਸਪਾਦਨਿਕ੍ਖੇਪਨਟ੍ਠਾਨੇ ਰਤ੍ਤੂਪਧਾਨਕਨ੍ਤਿ ਅਲੋਪਸਮਾਸੋ. ਯਂ ਪਨ ਏਕਮੇਵ ਉਪਧਾਨਂ ਉਭਯਪਸ੍ਸੇਸੁ ਰਤ੍ਤਾਦਿਵਣ੍ਣਂ ਵਿਚਿਤ੍ਰਂ, ਤਂ ਪਮਾਣਯੁਤ੍ਤਮੇਵ ਵਟ੍ਟਤਿ. ਤਤ੍ਰਿਦਂ ਪਮਾਣਂ – ਵਿਤ੍ਥਾਰਤੋ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਂ ਅਨ੍ਤਰਂ ਵਿਦਤ੍ਥਿਚਤੁਰਙ੍ਗੁਲਂ, ਮਜ੍ਝੇ ਮੁਟ੍ਠਿਰਤਨਂ, ਦੀਘਤੋ ਪਨ ਦਿਯਡ੍ਢਰਤਨਂ ਵਾ ਦ੍ਵਿਰਤਨਂ ਵਾ. ਪਰਿਭੁਞ੍ਜਤੋਤਿ ਇਮਿਨਾ ਕਰੋਨ੍ਤਸ੍ਸ ਕਾਰਾਪੇਨ੍ਤਸ੍ਸ ਕਤ੍ਥਚਿ ਛੇਦਨਕਂ ਪਾਚਿਤ੍ਤਿਯਨ੍ਤਿ ਦੀਪੇਤਿ.

੧੯੦. ਧਮ੍ਮਾਸਨੇ ਚ ਭਤ੍ਤਗ੍ਗੇ ਚ ਘਰੇ ਚਾਪਿ ਆਸਨ੍ਦਾਦਿਤ੍ਤਯਾ ਸੇਸੇ ਗਿਹਿਸਨ੍ਤਕੇ ਗਿਹਿਵਿਕਟੇ ਸਤਿ ਨਿਸੀਦਿਤੁਂ ਲਬ੍ਭਤੀਤਿ ਅਜ੍ਝਾਹਾਰੋ ਪਦਸਮ੍ਬਨ੍ਧੋ ਵੇਦਿਤਬ੍ਬੋ. ਗਿਹਿਸਨ੍ਤਕੇਤਿ ਇਮਿਨਾ ਸਙ੍ਘਿਕਮ੍ਪਿ ਉਪਲਕ੍ਖੇਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਤੀਣਿ ਆਸਨ੍ਦਿਂ ਪਲ੍ਲਙ੍ਕਂ ਤੂਲਿਕਂ ਗਿਹਿਵਿਕਟ’’ਨ੍ਤਿ (ਚੂਲ਼ਵ. ੩੧੪) ਸਾਮਞ੍ਞੇਨ ਵੁਤ੍ਤਂ. ਸਾਮਞ੍ਞਜੋਤਨਾਯ ਪਨ ਵਿਸੇਸੇਪਿ ਅਵਟ੍ਠਾਨਤੋ ਆਸਨ੍ਦਾਦਿਤ੍ਤਯਾਤਿ ਏਤ੍ਥ ਧਮ੍ਮਾਸਨੇ ਆਸਨ੍ਦਾਦਿਤ੍ਤਯਾ ਸੇਸੇਤਿ ਯੋਜੇਤ੍ਵਾ ਅਤ੍ਥੋ ਗਹੇਤਬ੍ਬੋ. ਅਟ੍ਠਕਥਾਯਞ੍ਹਿ ‘‘ਆਸਨ੍ਦੀ ਪਲ੍ਲਙ੍ਕੋ ਗੋਨਕੋ’’ਤਿਆਦਿਪਾਲ਼ਿਕ੍ਕਮੇ ਆਸਨ੍ਦਾਦਿਦ੍ਵਯਮਾਦਿਤੋ ਹਿਤ੍ਵਾ ‘‘ਗੋਨਕਾਦੀਨਿ ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ ਮਞ੍ਚਪੀਠਕੇਸੁ ਅਤ੍ਥਰਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ, ਧਮ੍ਮਾਸਨੇ ਪਨ ਗਿਹਿਵਿਕਟਨੀਹਾਰੇਨ ਲਬ੍ਭਨ੍ਤਿ, ਤਤ੍ਰਾਪਿ ਨਿਪਜ੍ਜਿਤੁਂ ਨ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੦) ਵੁਤ੍ਤਂ. ਭਤ੍ਤਗ੍ਗਂ ਨਾਮ ਵਿਹਾਰੇ ਦਾਨਟ੍ਠਾਨਂ. ਧਮ੍ਮਾਸਨਂ ਪਨ ਯਤ੍ਥ ਕਤ੍ਥਚਿ. ਘਰੇਤਿ ਅਨ੍ਤਰਘਰੇ. ਨਿਸੀਦਿਤੁਂ ਲਬ੍ਭਤੇਤਿ ਇਮਿਨਾ ਨਿਪਜ੍ਜਿਤੁਂ ਨ ਵਟ੍ਟਤੀਤਿ ਦੀਪੇਤਿ. ਸਂਖਿਪਨਂ ਅਨ੍ਤੋਕਰਣਂ ਸਙ੍ਖੇਪੋ, ਭੂਮਤ੍ਥਰਣੇ ਸਙ੍ਖੇਪੋ ਅਸ੍ਸ ਸਯਨਸ੍ਸਾਤਿ ਸਮਾਸੋ. ਤਸ੍ਮਿਂ ਭੂਮਤ੍ਥਰਣੇ ਅਨ੍ਤੋਕਰਣਭੂਮਤ੍ਥਰਤੋ ਭੂਮਤ੍ਥਰਣਮੇਵਾਤਿ ਦਟ੍ਠਬ੍ਬਂ. ਸਯਿਤੁਞ੍ਚਾਤਿ ਅਤ੍ਤਨੋ ਕਪ੍ਪਿਯਪਚ੍ਚਤ੍ਥਰਣਂ ਅਤ੍ਥਰਿਤ੍ਵਾ ਸਯਿਤੁਞ੍ਚ ਨਿਸੀਦਿਤੁਞ੍ਚ. ‘‘ਪਰਿਭਣ੍ਡਕਤਂ ਭੂਮਿਂ ਵਾ ਭੂਮਤ੍ਥਰਣਸੇਨਾਸਨਂ ਵਾ ਸਙ੍ਘਿਕਮਞ੍ਚਪੀਠਂ ਵਾ ਅਤ੍ਤਨੋ ਸਨ੍ਤਕੇਨ ਪਚ੍ਚਤ੍ਥਰਣੇਨ ਪਚ੍ਚਤ੍ਥਰਿਤ੍ਵਾਵ ਨਿਪਜ੍ਜਿਤਬ੍ਬ’’ਨ੍ਤਿ ਹਿ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੩੨੪) ਵੁਤ੍ਤਂ. ਇਦਞ੍ਚ ਆਸਨ੍ਦਾਦੀਨਮ੍ਪਿ ਅਞ੍ਞਥਤ੍ਤਕਰਣੇ ਪਰਿਭੋਗੇ ਲਕ੍ਖਣਵਚਨਂ. ਵੁਤ੍ਤਞ੍ਹਿ ਭਗਵਤਾ ‘‘ਅਨੁਜਾਨਾਮਿ ਭਿਕ੍ਖਵੇ, ਆਸਨ੍ਦਿਯਾ ਪਾਦੇ ਛਿਨ੍ਦਿਤ੍ਵਾ ਪਰਿਭੁਞ੍ਜਿਤੁਂ, ਪਲ੍ਲਙ੍ਕਸ੍ਸ ਵਾਲ਼ੇ ਭਿਨ੍ਦਿਤ੍ਵਾ ਪਰਿਭੁਞ੍ਜਿਤੁਂ, ਤੂਲਿਕਂ ਵਿਜਟੇਤ੍ਵਾ ਬਿਬ੍ਬੋਹਨਂ ਕਾਤੁਂ, ਅਵਸੇਸਂ ਭੂਮਤ੍ਥਰਣਂ ਕਾਤੁ’’ਨ੍ਤਿ (ਚੂਲ਼ਵ. ੩੨੦).

੧੯੧. ਚਤੁਰਂਸਪੀਠਾ ਚ…ਪੇ… ਪਞ੍ਚਙ੍ਗਾ ਚ ਉਚ੍ਚਪਾਦਕਾ ਕਪ੍ਪਨ੍ਤੀਤਿ ਅਤ੍ਥਤੋ ਵਚਨਂ ਵਿਪਲ੍ਲਾਸੇਤ੍ਵਾ ਸਮ੍ਬਨ੍ਧਿਤਬ੍ਬਂ, ‘‘ਕਪ੍ਪਿਯਾ’’ਤਿ ਇਮਿਨਾ ਵਾ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਚਤ੍ਤਾਰੋ ਅਂਸਾ ਕੋਣਾ ਯੇਸਂ, ਤੇ ਚ ਤੇ ਪੀਠਾ ਚਾਤਿ ਸਮਾਸੋ. ਤਿਣ੍ਣਂ ਅਪਸ੍ਸਯਾਨਂ, ਚਤੁਨ੍ਨਞ੍ਚ ਪਾਦਾਨਂ ਵਸੇਨ ਸਤ੍ਤ ਅਙ੍ਗਾਨਿ ਯੇਸਨ੍ਤਿ ਸਮਾਸੋ. ਏਕਾਪਸ੍ਸਯਸ੍ਸ ਵਸੇਨ ਪਞ੍ਚਙ੍ਗਾ. ਚਤੁਰਂਸਪੀਠਾਨਂ ਵਿਸੁਂ ਕਪ੍ਪਿਯਭਾਵਸ੍ਸ ਵੁਤ੍ਤਤ੍ਤਾ ਸਤ੍ਤਙ੍ਗਾਦਯੋ ਪਨ ਦੀਘਾਤਿ ਵਿਞ੍ਞਾਯਨ੍ਤਿ. ਪਾਲ਼ਿਯਂ ਭਤ੍ਤਗ੍ਗਸ੍ਸ ਏਕਯੋਗਨਿਦ੍ਦਿਟ੍ਠਤ੍ਤਾ ਏਕਯੋਗਨਿਦ੍ਦਿਟ੍ਠਾਨਂ ਸਹ ਵਾ ਪਵਤ੍ਤਿ, ਸਹ ਵਾ ਨਿਵਤ੍ਤੀਤਿ ਘਰੇਤਿ ਇਮਿਨਾ ਭਤ੍ਤਗ੍ਗਸ੍ਸਪਿ ਗਹਣਂ. ਏਵ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋ, ਤਸ੍ਮਾ ਤੂਲੋਨਦ੍ਧਾ ਮਞ੍ਚਪੀਠਾ ਘਰੇ ਵਾ ਭਤ੍ਤਗ੍ਗੇ ਵਾ ਨਿਸੀਦਿਤੁਮੇਵ ਕਪ੍ਪਨ੍ਤੀਤਿ ਸਮ੍ਬਨ੍ਧੋ. ਤਤ੍ਰਾਯਂ ਪਾਲ਼ਿ ‘‘ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਤ੍ਤਗ੍ਗੇ ਅਨ੍ਤਰਘਰੇ ਤੂਲੋਨਦ੍ਧਂ ਮਞ੍ਚਮ੍ਪਿ ਪੀਠਮ੍ਪਿ ਪਞ੍ਞਪੇਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਭਿਨਿਸੀਦਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਿਹਿਵਿਕਟਂ ਅਭਿਨਿਸੀਦਿਤੁਂ, ਨ ਤ੍ਵੇਵ ਅਭਿਨਿਪਜ੍ਜਿਤੁ’’ਨ੍ਤਿ (ਚੂਲ਼ਵ. ੩੧੪). ਤੇ ਪਨ ਕਰੋਨ੍ਤਸ੍ਸ ਵਾ ਕਾਰਾਪੇਨ੍ਤਸ੍ਸ ਵਾ ਉਦ੍ਦਾਲਨਕਂ ਪਾਚਿਤ੍ਤਿਯਂ.

੧੯੨. ਸਾਨੁਲੋਮਾਨਂ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਛਵਿ ਏਤਾਸਨ੍ਤਿ ਵਿਗ੍ਗਹੋ. ਪਞ੍ਚ ਭਿਸੀਤਿ ਚੋਲ਼ਾਦਿਤੂਲਗਣਨਾਯ ਪਞ੍ਚਕਾ ਵੁਤ੍ਤਾ. ਸਬ੍ਬਤ੍ਥਾਤਿ ਵਿਹਾਰਮਞ੍ਚਪੀਠਾਦੀਸੁ ਸਬ੍ਬਤ੍ਥ.

੧੯੩. ਤੂਲਤ੍ਤਯਨ੍ਤਿ ਸਿਮ੍ਬਲਿਰੁਕ੍ਖਾਦੀਨਂ ਖੀਰਵਲ੍ਲਿਆਦੀਨਂ ਏਰਕਾਦੀਨਂ ਤਿਣਾਨਂ ਤੂਲਤ੍ਤਯਂ. ਭਿਸਿਗਬ੍ਭੋ ਚੋਲ਼ਾਦਿਕੋ ਪਞ੍ਚਵਿਧੋ ਭਿਸਿਗਬ੍ਭੋ. ਮਿਗਪਕ੍ਖਿਨਂ ਲੋਮਾਨੀਤਿ ਏਤਂ ਸਬ੍ਬਨ੍ਤਿ ਸੇਸੋ. ਮਿਗ-ਸਦ੍ਦੇਨੇਵ ਸਬ੍ਬੇਪਿ ਸੀਹਾਦਯੋ ਚਤੁਪ੍ਪਦਾ, ਪਕ੍ਖਿ-ਸਦ੍ਦੇਨ ਸਬ੍ਬੇਪਿ ਹਂਸਮੋਰਾਦਯੋ ਗਹਿਤਾ. ਨਨੁ ਚ ਭਿਸਿਗਬ੍ਭਸਦ੍ਦਨ੍ਤੋਗਧਾਯ ਉਣ੍ਣਾਯ ਮਿਗਪਕ੍ਖਿਲੋਮਾਨਮ੍ਪਿ ਗਹਣਸਬ੍ਭਾਵੇਪਿ ਤੇਸਂ ਵਿਸੁਂ ਗਹਣੇ ਸਤਿ ਪੁਨਰੁਤ੍ਤਿਦੋਸੋ ਆਪਜ੍ਜਤੀਤਿ? ਨਾਪਜ੍ਜਤਿ ਮਨੁਸ੍ਸਲੋਮਪਰਿਚ੍ਚਾਗਵਿਭਾਵਨਪ੍ਪਯੋਜਨਸਬ੍ਭਾਵਤੋ. ਨਨੁ ਚ ਏਵਮ੍ਪਿ ਦੋਸੋਯੇਵ, ‘‘ਮਨੁਸ੍ਸਲੋਮਮੁਣ੍ਣਾਯ’’ਨ੍ਤਿਆਦਿਨਾ ਭਿਸਿਗਬ੍ਭਾਨਂ ਉਪਰਿ ਨੀਯਮਾਨਤ੍ਤਾ ਗਮ੍ਯਤੇ ਬਿਬ੍ਬੋਹਨੇਪਿ ਅਯਮੇਵ ਭਿਸਿਗਬ੍ਭੋਤਿ? ਸਚ੍ਚਂ, ਤਥਾਪਿ ਨ ਦੋਸੋ, ਗਮ੍ਯਮਾਨਤ੍ਥਸ੍ਸ ਸਦ੍ਦਸ੍ਸ ਪਯੋਗਂ ਪਤਿ ਕਾਮਚਾਰੋਤਿ. ਮਸੂਰਕੇ ਤੂਲਵਜ੍ਜਾ ਅਨੁਞ੍ਞਾਤਾਤਿ ਵਿਪਰਿਣਾਮੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਮਸੂਰਕਂ ਨਾਮ ਚਮ੍ਮਛਵਿਕਾ ਭਿਸੀਤਿ ਵਦਨ੍ਤਿ.

੧੯੪. ਉਣ੍ਣਾਯਂ ਮਨੁਸ੍ਸਲੋਮਞ੍ਚ ਪਣ੍ਣੇ ਸੁਦ੍ਧਂ ਤਮਾਲਕਞ੍ਚ ਪੁਪ੍ਫਞ੍ਚ ਅਪ੍ਪਟਿਵੇਕ੍ਖਿਤਂ ਆਸਨਞ੍ਚੇਵ ਨ ਲਬ੍ਭਨ੍ਤਿ ਸਮ੍ਬਨ੍ਧੋ. ਮਨੁਸ੍ਸਲੋਮਨ੍ਤਿ ਇਮਿਨਾ ਨ ਕੇਵਲਂ ਇਧ ਏਲ਼ਕਲੋਮਮੇਵ ਉਣ੍ਣਾ, ਅਥ ਖੋ ਕਪ੍ਪਿਯਾਕਪ੍ਪਿਯਮਂਸਜਾਤੀਨਂ ਪਕ੍ਖਿਚਤੁਪ੍ਪਦਾਨਂ ਲੋਮਮ੍ਪੀਤਿ ਦਸ੍ਸੇਤਿ. ਪੁਪ੍ਫਨ੍ਤਿ ਪਿਯਙ੍ਗੁਬਕੁਲਪੁਪ੍ਫਾਦਿ. ਤਮਾਲਕਸਦ੍ਦੇਨੇਵ ਉਪਚਾਰਤੋ ਪਤ੍ਤਂ ਗਹੇਤ੍ਵਾ ‘‘ਤਮਾਲਕ’’ਨ੍ਤਿ ਵੁਤ੍ਤਂ. ਅਪ੍ਪਟਿਵੇਕ੍ਖਿਤਨ੍ਤਿ ਅਨੁਪਪਰਿਕ੍ਖਿਤਂ. ਕੀਦਿਸਂ ਪਨ ਪਟਿਵੇਕ੍ਖਿਤਬ੍ਬਂ, ਕੀਦਿਸਂ ਨ ਪਟਿਵੇਕ੍ਖਿਤਬ੍ਬਨ੍ਤਿ? ਯਂ ਵਿਨਿਚ੍ਛਯਤੋ ਵਿਞ੍ਞਾਤਂ, ਤਂ ਨ ਪਟਿਵੇਕ੍ਖਿਤਬ੍ਬਂ, ਇਤਰਂ ਹਤ੍ਥੇਨ ਪਰਾਮਸਨ੍ਤੇਨ ਪਟਿਵੇਕ੍ਖਿਤਬ੍ਬਂ.

ਅਕਪ੍ਪਿਯਸਯਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.