੧੯. ਨ੍ਹਾਨਕਪ੍ਪਨਿਦ੍ਦੇਸਵਣ੍ਣਨਾ

੧੬੮. ਕਪ੍ਪਨਂ ਕਪ੍ਪਿਯਤਾ ਕਪ੍ਪੋ, ਨ੍ਹਾਨੇ ਕਪ੍ਪੋ ਨ੍ਹਾਨਕਪ੍ਪੋ. ਨਵਕੋ ਥੇਰਾਨਂ ਪੁਰਤੋ ਉਪਰਿ ਵਾ ਨ ਚ ਨ੍ਹਾਯੇਯ੍ਯਾਤਿ ਸਮ੍ਬਨ੍ਧੋ. ਨ ਚਾਤਿ ਨਯੇਵ. ਪੁਰਤੋਤਿ ਅਭਿਮੁਖੇ. ਉਪਰੀਤਿ ਨਦਿਯਾ ਉਪਰਿ.

੧੬੯-੧੭੧. ਕੁਟ੍ਟਤ੍ਥਮ੍ਭਤਰੁਟ੍ਟਾਨੇ ਕਾਯਂ ਨ ਘਂਸਯੇਤਿ ਸਮ੍ਬਨ੍ਧੋ. ਤਤ੍ਥ ਕੁਟ੍ਟਂ ਨਾਮ ਇਟ੍ਠਕਦਾਰੁਸਿਲਾਭਿਤ੍ਤਿ. ਥਮ੍ਭੋ ਨਾਮ ਨਹਾਨਤਿਤ੍ਥੇ ਨਿਖਨਿਤ੍ਵਾ ਠਪਿਤੋ. ਤਰੂਤਿ ਰੁਕ੍ਖੋ. ਅਟ੍ਟਾਨਂ ਨਾਮ ਤਚ੍ਛੇਤ੍ਵਾ ਅਟ੍ਠਪਦਾਕਾਰੇਨ ਰਾਜਿਯੋ ਛਿਨ੍ਦਿਤ੍ਵਾ ਨਹਾਨਤਿਤ੍ਥੇ ਨਿਖਾਤਫਲਕਂ. ਗਨ੍ਧਬ੍ਬਹਤ੍ਥੇਨ ਵਾ…ਪੇ… ਮਲ੍ਲਕੇਨ ਵਾ ਕਾਯਂ ਸਰੀਰੇਨ ਵਾ ਅਞ੍ਞਮਞ੍ਞਂ ਨ ਘਂਸਯੇਤਿ ਸਮ੍ਬਨ੍ਧੋ. ਗਨ੍ਧਬ੍ਬਹਤ੍ਥੇਨਾਤਿ ਦਾਰੁਮਯਹਤ੍ਥੇਨ. ਕੁਰੁਵਿਨ੍ਦਕਸੁਤ੍ਤਿਯਾਤਿ ਕੁਰੁਵਿਨ੍ਦਕਪਾਸਾਣਚੁਣ੍ਣਾਨਿ ਲਾਖਾਯ ਬਨ੍ਧਿਤ੍ਵਾ ਕਤਗੁਲ਼ਿਕਾਵਲਿਯਾ ਸੁਤ੍ਤੇਨ ਆਵੁਣਿਤਸੁਤ੍ਤਿਯਾ. ਮਲ੍ਲਕੇਨਾਤਿ ਮਕਰਦਨ੍ਤਕੇ ਛਿਨ੍ਦਿਤ੍ਵਾ ਪਦੁਮਕਣ੍ਣਿਕਸਣ੍ਠਾਨੇਨ ਕਤਮਲ੍ਲਕੇਨ. ਸਰੀਰੇਨਾਤਿ ਅਤ੍ਤਨੋ ਕਾਯੇਨ. ਅਞ੍ਞਮਞ੍ਞਸ੍ਸ ਅਞ੍ਞਮਞ੍ਞਂ ਕਿਰਿਯਾਕਰਣਸਙ੍ਖਾਤੇ ਕਿਰਿਯਾਬ੍ਯਭਿਹਾਰੇ ਦ੍ਵਿਤ੍ਤਂ. ਕਪਾਲ…ਪੇ… ਪੁਥੁਪਾਣਿ ਚ ਸਬ੍ਬੇਸਂ ਵਟ੍ਟਤੀਤਿ ਸਮ੍ਬਨ੍ਧੋ. ਕਪਾਲਞ੍ਚ ਇਟ੍ਠਕਾ ਚ, ਤਾਸਂ ਖਣ੍ਡਾਨਿ. ਪੁਥੁਪਾਣੀਤਿ ਪੁਥੁ ਨਾਨਾ ਪਾਣਿ ਪੁਥੁਪਾਣਿ, ਹਤ੍ਥਪਰਿਕਮ੍ਮਂ ਰੁਲ਼੍ਹੀਵਸੇਨ. ਸਬ੍ਬੇਸਨ੍ਤਿ ਗਿਲਾਨਾਗਿਲਾਨਾਨਂ. ਗਿਲਾਨਸ੍ਸ ਅਕਤਮਲ੍ਲਕਂ ਵਟ੍ਟਤੀਤਿ ਸਮ੍ਬਨ੍ਧੋ. ਅਕਤਮਲ੍ਲਕਂ ਨਾਮ ਕਤਮਲ੍ਲਕਵਿਪਰੀਤਂ. ਫੇਣਂ ਨਾਮ ਸਮੁਦ੍ਦਫੇਣਨ੍ਤਿ.

ਨ੍ਹਾਨਕਪ੍ਪਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.