੧੭. ਆਪੁਚ੍ਛਕਰਣਨਿਦ੍ਦੇਸਵਣ੍ਣਨਾ

੧੬੧. ਆਪੁਚ੍ਛਕਰਣਨ੍ਤਿ ਆਪੁਚ੍ਛਾਯ ਕਰਣਂ. ਅਨਜ੍ਝਿਟ੍ਠੋਵਾਤਿ ਅਨਾਣਤ੍ਤੋਵ, ਅਯਾਚਿਤੋ ਏਵ ਵਾ. ਨ ਚ ਵਿਸ੍ਸਜੇਤਿ ਪੁਚ੍ਛਿਤਪਞ੍ਹਂ ਨ ਵਿਸ੍ਸਜ੍ਜੇਯ੍ਯ ਚ, ਆਪੁਚ੍ਛਿਤ੍ਵਾ ਵਾ ਯਾਚਿਤੋ ਵਾ ਯਥਾਵੁਤ੍ਤਮੇਤਂ ਕਾਤੁਂ ਲਭਤੀਤਿ ਅਧਿਪ੍ਪਾਯੋ.

੧੬੨. ਆਪੁਚ੍ਛਿਤ੍ਵਾ ਕਥੇਨ੍ਤਸ੍ਸਾਤਿ ਅਤ੍ਤਨੋ ਵੁਡ੍ਢਂ ਆਪੁਚ੍ਛਿਤ੍ਵਾ ਧਮ੍ਮਾਦਿਕਂ ਭਾਸਨ੍ਤਸ੍ਸ. ਪੁਨ ਵੁਡ੍ਢਤਰਾਗਮੇਤਿ ਪੁਨ ਅਞ੍ਞਸ੍ਸ ਵੁਡ੍ਢਤਰਸ੍ਸ ਆਗਮਨੇ ਸਤੀਤਿ ਅਤ੍ਥੋ. ਪੁਨਆਪੁਚ੍ਛਨਂ ਨਤ੍ਥੀਤਿ ਭਾਸਿਤਬ੍ਬਂ ਠਪੇਤ੍ਵਾ ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥੀਤਿ ਅਤ੍ਥੋ. ਸਙ੍ਘਤ੍ਥੇਰੇ ਅਸਤਿ ਆਰਦ੍ਧਮ੍ਪਿ ਅਟ੍ਠਪੇਤ੍ਵਾ ਕਥੇਨ੍ਤਸ੍ਸਾਪਿ ਏਸੇਵ ਨਯੋ. ਭਤ੍ਤਗ੍ਗੇ ਅਨੁਮੋਦਤੋ ਚ ਆਪੁਚ੍ਛਨਂ ਨਤ੍ਥੀਤਿ ਸਮ੍ਬਨ੍ਧੋ. ਅਨੁਮੋਦਤੋਤਿ ਦਾਯਕੇਹਿ ਯਾਚਿਤਸ੍ਸ ਤਂਤਂਪੁਞ੍ਞਾਨੁਮੋਦਨਵਸੇਨ ਧਮ੍ਮਕਥਂ ਕਰੋਤੋ ਚ. ਅਨੁਮੋਦਨਞ੍ਚ ਥੇਰਾਧੇਯ੍ਯਂ. ‘‘ਅਨੁਜਾਨਾਮਿ, ਭਿਕ੍ਖਵੇ ਥੇਰੇਨ ਭਿਕ੍ਖੁਨਾ ਭਤ੍ਤਗ੍ਗੇ ਅਨੁਮੋਦਿਤੁ’’ਨ੍ਤਿ (ਚੂਲ਼ਵ. ੩੬੨) ਹਿ ਵੁਤ੍ਤਂ. ‘‘ਸਚੇ ਮਨੁਸ੍ਸਾ ਅਤ੍ਤਨੋ ਅਭਿਰੁਚਿਕੇਨ ਏਕੇਨ ਅਨੁਮੋਦਨਂ ਕਾਰੇਨ੍ਤਿ, ਨੇਵ ਤਸ੍ਸ ਅਨੁਮੋਦਤੋ ਆਪਤ੍ਤਿ, ਨ ਮਹਾਥੇਰਸ੍ਸ ਭਾਰੋ ਹੋਤਿ. ਉਪਨਿਸਿਨ੍ਨਕਥਾਯਮੇਵ ਹਿ ਮਨੁਸ੍ਸੇਸੁ ਕਥਾਪੇਨ੍ਤੇਸੁ ਮਹਾਥੇਰੋ ਆਪੁਚ੍ਛਿਤਬ੍ਬੋ’’ਤਿ ਅਟ੍ਠਕਥਾਯਂ (ਚੁਲ਼ਵ. ਅਟ੍ਠ. ੩੬੨) ਵੁਤ੍ਤਂ.

੧੬੩. ਵੁਡ੍ਢੇਨ ਏਕਵਿਹਾਰਕੇ ਵਸਨ੍ਤੋ ਚਾਤਿ ਸਮ੍ਬਨ੍ਧੋ. ਵੁਡ੍ਢੇਨਾਤਿ ਵੁਡ੍ਢੇਨ ਸਦ੍ਧਿਂ. ਏਕਵਿਹਾਰਕੇਤਿ ਸਵਨੂਪਚਾਰੇ ਖੁਦ੍ਦਕਵਿਹਾਰੇ, ਨ ਮਹਾਵਿਹਾਰੇ. ਕੁਚ੍ਛਿਤਤ੍ਥੇ ਹਿ ਕਪ੍ਪਚ੍ਚਯੋ. ਨ ਸਜ੍ਝਾਯੇਯ੍ਯਾਤਿ ਸਜ੍ਝਾਯਨਂ ਨ ਕਰੇਯ੍ਯ.

੧੬੪. ‘‘ਧਮ੍ਮਂ ਨ ਭਾਸਯੇ’’ਤਿਆਦੀਸੁ ਅਨਾਪੁਚ੍ਛਾਤਿ ਸਮ੍ਬਨ੍ਧਿਤਬ੍ਬਂ. ਨ ਚ ਵਿਜ੍ਝਪੇਤਿ ਨ ਚ ਨਿਬ੍ਬਾਯੇਯ੍ਯ. ਵਾਤਪਾਨਞ੍ਚ ਆਲੋਕਸਨ੍ਧਿਫਲਕਂ ਕਵਾਟਞ੍ਚ ਦ੍ਵਾਰਫਲਕਂ ਵਾਤਪਾਨਕਵਾਟਂ ਵਾ ਨ ਵਿਵਰੇਯ੍ਯ ਨ ਥਕੇਯ੍ਯ ਚਾਤਿ ਨ-ਕਾਰੋ ਸਬ੍ਬਤ੍ਥ ਯੋਜੇਤਬ੍ਬੋ.

੧੬੫. ਏਕਚਙ੍ਕਮੇ ਵੁਡ੍ਢੇਨ ਚਙ੍ਕਮਨ੍ਤੋਪਿ ਯੇਨ ਵੁਡ੍ਢੋ, ਤੇਨ ਪਰਿਵਤ੍ਤਯੇਤਿ ਯੋਜਨਾ. ਯੇਨ ਤੇਨਾਤਿ ਭੁਮ੍ਮਤ੍ਥੇ ਕਰਣਵਚਨਂ, ਯਤ੍ਥ ਵੁਡ੍ਢੋ, ਤਤ੍ਥਾਤਿ ਅਤ੍ਥੋ, ਵੁਡ੍ਢਂ ਓਹਾਯ ਅਞ੍ਞਤੋ ਨ ਗਨ੍ਤਬ੍ਬਨ੍ਤਿ ਅਧਿਪ੍ਪਾਯੋ. ਸੋਤਿ ਨਵਕੋ. ਏਨਨ੍ਤਿ ਵੁਡ੍ਢਂ. ਸਬ੍ਬਤ੍ਥ ਦੁਕ੍ਕਟਂ. ਅਯਞ੍ਹਿ ਖਨ੍ਧਕਧਮ੍ਮਤਾ ਯਤ੍ਥ ਨ-ਕਾਰੇਨ ਪਟਿਸੇਧੋ, ਤਤ੍ਥ ਦੁਕ੍ਕਟਨ੍ਤਿ.

ਆਪੁਚ੍ਛਕਰਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.