੫. ਪਤ੍ਤਨਿਦ੍ਦੇਸੋ

ਪਤ੍ਤੋ ਚਾਤਿ –

੬੦. ਅਯੋਪਤ੍ਤੋ ਭੂਮਿਪਤ੍ਤੋ, ਜਾਤਿਯਾ ਕਪ੍ਪਿਯਾ ਦੁਵੇ;

ਉਕ੍ਕਟ੍ਠੋ ਮਜ੍ਝਿਮੋ ਚੇਵ, ਓਮਕੋ ਚ ਪਮਾਣਤੋ.

੬੧. ਉਕ੍ਕਟ੍ਠੋ ਮਗਧੇ ਨਾਲ਼ਿ-ਦ੍ਵਯਤਣ੍ਡੁਲਸਾਧਿਤਂ;

ਗਣ੍ਹਾਤਿ ਓਦਨਂ ਸੂਪਂ, ਬ੍ਯਞ੍ਜਨਞ੍ਚ ਤਦੂਪਿਯਂ.

੬੨. ਮਜ੍ਝਿਮੋ ਤਸ੍ਸੁਪਡ੍ਢੋਵ, ਤਤੋਪਡ੍ਢੋਵ ਓਮਕੋ;

ਉਕ੍ਕਟ੍ਠਤੋ ਚ ਉਕ੍ਕਟ੍ਠੋ, ਅਪਤ੍ਤੋ ਓਮਕੋਮਕੋ.

੬੩. ਅਤਿਰੇਕਪਤ੍ਤੋ ਧਾਰੇਯ੍ਯੋ, ਦਸਾਹਪਰਮਂ ਸਕੋ;

ਕਪ੍ਪੋ ਨਿਸ੍ਸਗ੍ਗਿਯੋ ਹੋਤਿ, ਤਸ੍ਮਿਂ ਕਾਲੇਤਿਨਾਮਿਤੇ.

੬੪. ਅਚ੍ਛੇਦਦਾਨਗਾਹੇਹਿ, ਵਿਬ੍ਭਮਾ ਮਰਣੁਦ੍ਧਟਾ;

ਲਿਙ੍ਗਸਿਕ੍ਖਾਹਿ ਛਿਦ੍ਦੇਨ, ਪਤ੍ਤਾਧਿਟ੍ਠਾਨਮੁਜ੍ਝਤਿ.

੬੫. ਪਤ੍ਤਂ ਨ ਪਟਿਸਾਮੇਯ੍ਯ, ਸੋਦਕਂ ਨ ਚ ਓਤਪੇ;

ਉਣ੍ਹੇ ਨ ਨਿਦਹੇ ਭੁਮ੍ਯਾ, ਨ ਠਪੇ ਨੋ ਚ ਲਗ੍ਗਯੇ.

੬੬. ਮਿਡ੍ਢਨ੍ਤੇ ਪਰਿਭਣ੍ਡਨ੍ਤੇ, ਅਙ੍ਕੇ ਵਾ ਆਤਪਤ੍ਤਕੇ;

ਪਾਦੇਸੁ ਮਞ੍ਚਪੀਠੇ ਵਾ, ਠਪੇਤੁਂ ਨ ਚ ਕਪ੍ਪਤਿ.

੬੭. ਨ ਨੀਹਰੇਯ੍ਯ ਉਚ੍ਛਿਟ੍ਠੋ-ਦਕਞ੍ਚ ਚਲਕਟ੍ਠਿਕਂ;

ਪਤ੍ਤੇਨ ਪਤ੍ਤਹਤ੍ਥੋ ਵਾ, ਕਵਾਟਂ ਨ ਪਣਾਮਯੇ.

੬੮. ਭੂਮਿਆਧਾਰਕੇ ਦਾਰੁਦਣ੍ਡਾਧਾਰੇ ਸੁਸਜ੍ਜਿਤੇ;

ਦੁਵੇ ਪਤ੍ਤੇ ਠਪੇਯ੍ਯੇਕਂ, ਨਿਕ੍ਕੁਜ੍ਜਿਤ੍ਵਾਨ ਭੂਮਿਯਂ.

੬੯. ਦਾਰੁਰੂਪਿਯਸੋਵਣ੍ਣ-ਮਣਿਵੇਲ਼ੁਰਿਯਾਮਯਾ;

ਕਂਸਕਾਚਤਿਪੁਸੀਸਫਲਿਕਾਤਮ੍ਬਲੋਹਜਾ.

੭੦. ਛਵਸੀਸਮਯੋ ਚਾਪਿ, ਘਟੀਤੁਮ੍ਬਕਟਾਹਜਾ;

ਪਤ੍ਤਾ ਅਕਪ੍ਪਿਯਾ ਸਬ੍ਬੇ, ਵੁਤ੍ਤਾ ਦੁਕ੍ਕਟਵਤ੍ਥੁਕਾਤਿ.