੪੩. ਛਨ੍ਦਦਾਨਨਿਦ੍ਦੇਸੋ

ਛਨ੍ਦਦਾਨਾਦੀਤਿ –

੩੯੯. ਭੇਰਿਂ ਘਣ੍ਟਿਂ ਪਤਾਲ਼ੇਤ੍ਵਾ, ਕਮ੍ਮਪ੍ਪਤ੍ਤੇ ਸਮਾਗਤੇ;

ਸਙ੍ਘੇ ਹਰੇਯ੍ਯ ਛਨ੍ਦਂ ਵਾ, ਪਾਰਿਸੁਦ੍ਧਿਂ ਪਵਾਰਣਂ.

੪੦੦. ਏਕਂ ਭਿਕ੍ਖੁਂ ਉਪਗ੍ਗਮ੍ਮ, ਨਿਸੀਦਿਤ੍ਵਾ ਉਕ੍ਕੁਟਿਕਂ;

ਅਞ੍ਜਲਿਂ ਪਗ੍ਗਣ੍ਹਿਤ੍ਵਾਨ, ਦਦੇ ਛਨ੍ਦਂ ਵਿਚਕ੍ਖਣੋ.

੪੦੧. (ਕ) ‘‘ਛਨ੍ਦਂ ਦਮ੍ਮਿ, ਛਨ੍ਦਂ ਮੇ ਹਰ, ਛਨ੍ਦਂ ਮੇ ਆਰੋਚੇਹੀ’’ਤਿ ਵਤ੍ਤਬ੍ਬਂ.

(ਖ) ਪਾਰਿਸੁਦ੍ਧਿਂ ਦੇਨ੍ਤੇਨ ‘‘ਪਾਰਿਸੁਦ੍ਧਿਂ ਦਮ੍ਮਿ, ਪਾਰਿਸੁਦ੍ਧਿਂ ਮੇ ਹਰ, ਪਾਰਿਸੁਦ੍ਧਿਂ ਮੇ ਆਰੋਚੇਹੀ’’ਤਿ ਵਤ੍ਤਬ੍ਬਂ.

੪੦੨. ਪਾਰਿਸੁਦ੍ਧਿਪ੍ਪਦਾਨੇਨ, ਸਮ੍ਪਾਦੇਤਿ ਉਪੋਸਥਂ;

ਸਙ੍ਘਸ੍ਸ ਅਤ੍ਤਨੋ ਚਾਪਿ, ਸੇਸਕਮ੍ਮਂ ਵਿਬਾਧਤਿ.

੪੦੩. ਛਨ੍ਦਦਾਨੇਨ ਸਙ੍ਘਸ੍ਸ, ਦ੍ਵਯਂ ਸਾਧੇਤਿ ਨਤ੍ਤਨੋ;

ਤਸ੍ਮਾ ਛਨ੍ਦਂ ਦਦਨ੍ਤੇਨ, ਦਾਤਬ੍ਬਾ ਪਾਰਿਸੁਦ੍ਧਿਪਿ.

੪੦੪. ਹਰੇਯ੍ਯੇਕੋ ਬਹੂਨਮ੍ਪਿ, ਪਰਮ੍ਪਰਾ ਨ ਹਾਰਯੇ;

ਪਰਮ੍ਪਰਾਹਟਾ ਛਨ੍ਦ-ਪਾਰਿਸੁਦ੍ਧਿ ਨ ਗਚ੍ਛਤਿ.

੪੦੫. ਸਬ੍ਬੂਪਚਾਰਂ ਕਤ੍ਵਾਨ, ਏਵਂ ਦੇਯ੍ਯਾ ਪਵਾਰਣਾ. ‘‘ਪਵਾਰਣਂ ਦਮ੍ਮਿ, ਪਵਾਰਣਂ ਮੇ ਹਰ, ਪਵਾਰਣਂ ਮੇ ਆਰੋਚੇਹਿ, ਮਮਤ੍ਥਾਯ ਪਵਾਰੇਹੀ’’ਤਿ.

੪੦੬. ਆਰੋਚੇਤ੍ਵਾਥ ਸੋ ਸਙ੍ਘਂ, ਪਵਾਰੇਯ੍ਯੇਵਮਾਗਤੋ. ‘‘ਇਤ੍ਥਨ੍ਨਾਮੋ, ਭਨ੍ਤੇ, ਸਙ੍ਘਂ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤੁ ਤਂ ਸਙ੍ਘੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ.

੪੦੭. ਗਹੇਤ੍ਵਾ ਪਾਰਿਸੁਦ੍ਧਿਂ ਵਾ, ਛਨ੍ਦਂ ਵਾਪਿ ਪਵਾਰਣਂ;

ਹਾਰਕੋ ਸਙ੍ਘਮਪ੍ਪਤ੍ਵਾ, ਵਿਬ੍ਭਮੇਯ੍ਯ ਮਰੇਯ੍ਯ ਵਾ.

੪੦੮. ਸਾਮਣੇਰਾਦਿਭਾਵਂ ਵਾ,

ਪਟਿਜਾਨੇਯ੍ਯ ਨਾਹਟਾ;

ਪਤ੍ਵਾ ਸਙ੍ਘਂ ਤਥਾ ਹੇਯ੍ਯ,

ਆਹਟਾ ਹੋਤਿ ਹਾਰਕੋ.

੪੦੯. ਸਙ੍ਘਪ੍ਪਤ੍ਤੋ ਪਮਤ੍ਤੋ ਵਾ, ਸੁਤ੍ਤੋ ਨਾਰੋਚਯੇਯ੍ਯ ਵਾ;

ਅਨਾਪਤ੍ਤਿਵ ਸਞ੍ਚਿਚ੍ਚ, ਨਾਰੋਚੇਨ੍ਤਸ੍ਸ ਦੁਕ੍ਕਟਨ੍ਤਿ.