੪੦. ਅਵੇਭਙ੍ਗਿਯਨਿਦ੍ਦੇਸੋ
ਅਵੇਭਙ੍ਗਿਯਨ੍ਤਿ –
੩੨੨. ਆਰਾਮਾਰਾਮਵਤ੍ਥੂਨਿ, ਵਿਹਾਰੋ ਤਸ੍ਸ ਵਤ੍ਥੁ ਚ;
ਮਞ੍ਚੋ ਪੀਠਂ ਭਿਸਿ ਬਿਬ੍ਬੋ-ਹਨਾਦਿਸਯਨਾਸਨਂ.
੩੨੩. ਲੋਹਕੁਮ੍ਭੀ ਕਟਾਹੋ ਚ,
ਲੋਹਭਾਣਕਵਾਰਕੋ;
ਕੁਠਾਰੀ ਵਾਸਿ ਫਰਸੁ,
ਕੁਦ੍ਦਾਲੋ ਚ ਨਿਖਾਦਨਂ.
੩੨੪. ਵਲ੍ਲਿ ਵੇਲ਼ੁ ਤਿਣਂ ਪਣ੍ਣਂ, ਮੁਞ੍ਜਪਬ੍ਬਜਮਤ੍ਤਿਕਾ;
ਦਾਰੁਮਤ੍ਤਿਕਭਣ੍ਡਾਨਿ, ਪਞ੍ਚੇਤੇ ਅਵਿਭਾਜਿਯਾ.
੩੨੫. ਥੁਲ੍ਲਚ੍ਚਯਂ ਭਾਜਯਤੋ, ਭਾਜਿਤਾਪਿ ਅਭਾਜਿਤਾ;
ਗਰੁਭਣ੍ਡਾਨਿ ਵੁਚ੍ਚਨ੍ਤਿ, ਏਤੇਵਿਸ੍ਸਜ੍ਜਿਯਾਨਿ ਚ.
੩੨੬. ਵਲ੍ਲਿਡ੍ਢਬਾਹੁਮਤ੍ਤਾਪਿ, ਵੇਲ਼ੁ ਅਟ੍ਠਙ੍ਗੁਲਾਯਤੋ;
ਤਿਣਾਦਿ ਮੁਟ੍ਠਿਮਤ੍ਤਮ੍ਪਿ, ਪਣ੍ਣਂ ਏਕਮ੍ਪਿ ਮਤ੍ਤਿਕਾ.
੩੨੭. ਪਾਕਤਾ ਪਞ੍ਚਵਣ੍ਣਾ ਵਾ, ਸੁਧਾਕਙ੍ਗੁਟ੍ਠ ਆਦਿਕਾ;
ਤਾਲਪਕ੍ਕਪ੍ਪਮਾਣਾਪਿ, ਦਿਨ੍ਨਾ ਵਾ ਤਤ੍ਥਜਾਤਕਾ.
੩੨੮. ਰਕ੍ਖਿਤਾ ਸਙ੍ਘਿਕਾ ਰਜ੍ਜੁ-ਯੋਤ੍ਤਾਦੀਪਿ ਅਭਾਜਿਯਾ;
ਨਿਟ੍ਠਿਤੇ ਭਾਜਿਯਾ ਕਮ੍ਮੇ, ਸਙ੍ਘਿਕੇ ਚੇਤਿਯਸ੍ਸ ਵਾ.
੩੨੯. ਪਤ੍ਤਾਦਿ ਭਿਕ੍ਖੁਸਾਰੁਪ੍ਪਂ, ਤਥਾ ਵਿਪ੍ਪਕਤਾਕਤਂ;
ਭਾਜਿਯਂ ਲੋਹਭਣ੍ਡੇਸੁ, ਵਾਰਕਂ ਪਾਦਗਣ੍ਹਕਂ.
੩੩੦. ਵੇਲ਼ੁਮ੍ਹਿ ਭਾਜਿਯਾ ਤੇਲ-ਨਾਲ਼ਿ ਕਤ੍ਤਰਦਣ੍ਡਕੋ;
ਛਤ੍ਤਦਣ੍ਡਸਲਾਕਾਯੋ, ਤਥੋਪਾਹਨਦਣ੍ਡਕੋ.
੩੩੧. ਅਨੁਞ੍ਞਾਤਵਾਸਿਦਣ੍ਡੋ, ਕਰਣ੍ਡੋ ਪਾਦਗਣ੍ਹਕੋ;
ਅਰਣਞ੍ਜਨਿਸਿਙ੍ਗਾਦਿ, ਭਿਕ੍ਖੂਪਕਰਣਂ ਤਥਾ.
੩੩੨. ਤਚ੍ਛਿਤਾਨਿਟ੍ਠਿਤਂ ਦਾਰੁਭਣ੍ਡਂ ਦਨ੍ਤਞ੍ਚ ਭਾਜਿਯਂ;
ਭਿਕ੍ਖੂਪਕਰਣੇ ਪਾਦਘਟਕੋ ਮਤ੍ਤਿਕਾਮਯੋ.
੩੩੩. ਭਾਜਿਯਂ ਕਪ੍ਪਿਯਂ ਚਮ੍ਮਂ, ਏਲ਼ਚਮ੍ਮਮਭਾਜਿਯਂ;
ਗਰੁਨਾ ਗਰੁਭਣ੍ਡਞ੍ਚ, ਥਾਵਰਂ ਥਾਵਰੇਨ ਚ.
੩੩੪. ਥਾਵਰਂ ਪਰਿਵਤ੍ਤੇਯ੍ਯ, ਤਥਾ ਕਤ੍ਵਾ ਚ ਭੁਞ੍ਜਤੁ;
ਵਲ੍ਲਾਦਿਂ ਫਾਤਿਕਮ੍ਮੇਨ, ਗਣ੍ਹੇ ਸੇਸਮਭਾਜਿਯਨ੍ਤਿ.