੩੩. ਕਾਯਬਨ੍ਧਨਨਿਦ੍ਦੇਸੋ
ਕਾਯਬਨ੍ਧਨਨ੍ਤਿ –
੨੩੫. ਅਕਾਯਬਨ੍ਧਨੋ ਗਾਮਂ, ਦੁਕ੍ਕਟਂ ਪਵਿਸੇਯ੍ਯ ਚੇ;
ਬਨ੍ਧੇਯ੍ਯ ਯਤ੍ਥ ਸਰਤਿ, ਤਤ੍ਥੇਵਾਸਤਿਯਾ ਗਤੋ.
੨੩੬. ਪਟ੍ਟਿਕਾ ਸੂਕਰਨ੍ਤਨ੍ਤਿ, ਦੁਵਿਧਂ ਕਾਯਬਨ੍ਧਨਂ;
ਦੁਸ੍ਸਪਟ੍ਟੋ ਚ ਰਜ੍ਜੁ ਚ, ਏਕਾ ਤਦਨੁਲੋਮਿਕਾ.
੨੩੭. ਮਚ੍ਛਕਣ੍ਟਕਖਜ੍ਜੂਰੀ-ਪਤ੍ਤਾ ਮਟ੍ਠਾ ਚ ਪਟ੍ਟਿਕਾ;
ਲਬ੍ਭਾ ਦਸਾ ਚਤਸ੍ਸੋਪਿ, ਅਨ੍ਤੇ ਦਿਗੁਣਸੁਤ੍ਤਕਂ.
੨੩੮. ਮਾਲਾਦਿਂ ਕਕ੍ਕਟਚ੍ਛਾਦਿਂ, ਦਸ੍ਸੇਤ੍ਵਾ ਗੁਣਸੁਤ੍ਤਕ;
ਕੋਟ੍ਟਿਤਾ ਕੁਞ੍ਜਰਚ੍ਛਾਦਿਂ, ਪਟ੍ਟਿਕਾ ਨ ਚ ਕਪ੍ਪਤਿ.
੨੩੯. ਘਟਕਂ ਮਕਰਮੁਖਾਦਿਂ, ਨ ਕਪ੍ਪਨ੍ਤਿ ਦਸਾਮੁਖੇ;
ਉਭਨ੍ਤੇ ਘਟਕਾ ਲੇਖਾ, ਵਿਧੇ ਅਞ੍ਞਞ੍ਚ ਚਿਤ੍ਤਕਂ.
੨੪੦. ਦੇਡ੍ਡੁਭਕਞ੍ਚ ਮੁਰਜਂ, ਮਦ੍ਦਵੀਣਂ ਕਲਾਬੁਕਂ;
ਨ ਕਪ੍ਪਨ੍ਤਿ ਦਸਾਸੁ ਦ੍ਵੇ, ਮਜ੍ਝਿਮਾਯੇਵ ਕਪ੍ਪਰੇ.
੨੪੧. ਵੇਲ਼ੁਦਨ੍ਤਵਿਸਾਣਟ੍ਠਿਕਟ੍ਠਲਾਖਾਫਲਾਮਯਾ;
ਸਙ੍ਖਨਾਭਿਮਯਾ ਸੁਤ੍ਤਨਲ਼ਲੋਹਮਯਾਪਿ ਚ;
ਵਿਧਾ ਕਪ੍ਪਨ੍ਤਿ ਕਪ੍ਪਿਯਾ, ਗਣ੍ਠਿਯੋ ਚਾਪਿ ਤਮ੍ਮਯਾਤਿ.
ਪਠਮਭਾਣਵਾਰਂ ਨਿਟ੍ਠਿਤਂ.