੨੮. ਕਮ੍ਮਨਿਦ੍ਦੇਸੋ

ਕਮ੍ਮਞ੍ਚਾਤਿ –

੧੯੯. ਵਗ੍ਗੇਨ ਅਧਮ੍ਮਕਮ੍ਮਂ, ਸਮਗ੍ਗੇਨ ਅਧਮ੍ਮਿਕਂ;

ਵਗ੍ਗੇਨ ਧਮ੍ਮਕਮ੍ਮਞ੍ਚ, ਸਮਗ੍ਗੇਨ ਚ ਧਮ੍ਮਿਕਂ;

ਚਤੁਤ੍ਥਂਯੇਵਾਨੁਞ੍ਞਾਤਂ, ਸੇਸਕਮ੍ਮੇਸੁ ਦੁਕ੍ਕਟਂ.

੨੦੦. ਚਤੁਵਗ੍ਗੋ ਪਞ੍ਚਵਗ੍ਗੋ, ਦਸਵੀਸਤਿਵਗ੍ਗਿਕੋ;

ਤਿਰੇਕਵੀਸਤਿਵਗ੍ਗੋ, ਪਞ੍ਚ ਸਙ੍ਘਾ ਵਿਭਾਵਿਤਾ.

੨੦੧. ਚਤੁਵਗ੍ਗੇਤ੍ਥ ਅਬ੍ਭਾਨੁ-ਪਸਮ੍ਪਦਾਪਵਾਰਣਾ;

ਪਞ੍ਚਵਗ੍ਗੋ ਚ ਅਬ੍ਭਾਨਂ, ਮਜ੍ਝਦੇਸੁਪਸਮ੍ਪਦਂ.

੨੦੨. ਦਸਵਗ੍ਗੋ ਚ ਅਬ੍ਭਾਨਂ, ਠਪੇਤ੍ਵਾ ਸਬ੍ਬਕਮ੍ਮਿਕੋ;

ਇਤਰੋ ਸਬ੍ਬਕਮ੍ਮੇਸੁ, ਕਮ੍ਮਪ੍ਪਤ੍ਤੋਤਿ ਦੀਪਿਤੋ.

੨੦੩. ਚਤੁਵਗ੍ਗੇਨ ਕਤ੍ਤਬ੍ਬੇ, ਚਤ੍ਤਾਰੋ ਪਕਤਤ੍ਤਕਾ;

ਕਮ੍ਮਪ੍ਪਤ੍ਤਾ ਪਰੇ ਛਨ੍ਦਾ-ਰਹਾ ਸੇਸੇਪ੍ਯਯਂ ਨਯੋ.

੨੦੪. ਚਤੁਵਗ੍ਗਾਦਿਕਤ੍ਤਬ੍ਬਂ, ਅਸਂਵਾਸਕਮ੍ਮਾਰਹ;

ਗਰੁਕਟ੍ਠੇਸ੍ਵਞ੍ਞਤਰਂ, ਕਤ੍ਵਾਨ ਗਣਪੂਰਕਂ;

ਪਰਿਵਾਸਾਦਿਕਂ ਕਮ੍ਮਂ, ਕਤਂ ਕੁਪ੍ਪਞ੍ਚ ਦੁਕ੍ਕਟਂ.

੨੦੫. ਅਧਮ੍ਮਕਮ੍ਮਂ ਵਾਰੇਯ੍ਯ, ਅਨ੍ਤਰਾਯੇ ਦੁਵੇ ਤਯੋ;

ਦਿਟ੍ਠਾਵਿਮੇਕੋਧਿਟ੍ਠਾਨਂ, ਵਾਰੇਨ੍ਤੇਵ ਤਤੋਧਿਕਾ.

੨੦੬. ਕਮ੍ਮਾਰਹਾ ਅਸਂਵਾਸਾ, ਖਿਤ੍ਤਚਿਤ੍ਤਦੁਖਟ੍ਟਿਤਾ;

ਏਤੇਸਂ ਸਙ੍ਘਮਜ੍ਝਮ੍ਹਿ, ਪਟਿਕ੍ਖੇਪੋ ਨ ਰੁਹਤਿ.

੨੦੭. ਪਕਤਤ੍ਤੇਕਸੀਮਟ੍ਠ-ਸਮਸਂਵਾਸਭਿਕ੍ਖੁਨੋ;

ਆਰੋਚੇਨ੍ਤਸ੍ਸਨ੍ਤਮਸੋ-ਨਨ੍ਤਰਸ੍ਸਾਪਿ ਰੂਹਤਿ.

੨੦੮. ਕੋਪੇਤੁਂ ਧਮ੍ਮਿਕਂ ਕਮ੍ਮਂ, ਪਟਿਕ੍ਕੋਸੇਯ੍ਯ ਸਮ੍ਮੁਖਾ;

ਤਿਰੋਕ੍ਖਾ ਕਾਯਸਾਮਗ੍ਗਿਂ, ਛਨ੍ਦਂ ਨੋ ਦੇਯ੍ਯ ਦੁਕ੍ਕਟਨ੍ਤਿ.