੧. ਪਤ੍ਤਵਗ੍ਗੋ
੧. ਪਤ੍ਤਸਨ੍ਨਿਚਯਸਿਕ੍ਖਾਪਦਵਣ੍ਣਨਾ
ਪਠਮਂ ਉਤ੍ਤਾਨਤ੍ਥਮੇਵ.
ਪਤ੍ਤਸਨ੍ਨਿਚਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ
ਯਂ ਅਤ੍ਤਨਾ ਲਦ੍ਧਂ, ਤਂ ਨਿਸ੍ਸਗ੍ਗਿਯਂ ਹੋਤੀਤਿ ਯਂ ਚੀਵਰਂ ਭਾਜਾਪਿਤਾਯ ਅਤ੍ਤਨਾ ਲਦ੍ਧਂ, ਤਮੇਵ ਨਿਸ੍ਸਗ੍ਗਿਯਂ ਹੋਤਿ, ਤਂ ਵਿਨਯਕਮ੍ਮਂ ਕਤ੍ਵਾਪਿ ਅਤ੍ਤਨਾ ਨ ਲਬ੍ਭਤਿ. ਤੇਨਾਹ ‘‘ਨਿਸ੍ਸਟ੍ਠ’’ਨ੍ਤਿਆਦਿ. ਤਤ੍ਥ ਨਿਸ੍ਸਟ੍ਠਂ ਪਟਿਲਭਿਤ੍ਵਾਪੀਤਿ ‘‘ਅਯ੍ਯਾਯ, ਦਮ੍ਮੀ’’ਤਿ ਏਵਂ ਨਿਸ੍ਸਟ੍ਠਂ ਪਟਿਲਭਿਤ੍ਵਾਪਿ. ਯਥਾਦਾਨੇਯੇਵ ਉਪਨੇਤਬ੍ਬਨ੍ਤਿ ਯਥਾ ਦਾਯਕੇਹਿ ਦਿਨ੍ਨਂ, ਤਥੇਵ ਉਪਨੇਤਬ੍ਬਂ, ਅਕਾਲਚੀਵਰਪਕ੍ਖੇਯੇਵ ਠਪੇਤਬ੍ਬਨ੍ਤਿ ਵੁਤ੍ਤਂ ਹੋਤਿ.
ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਚੀਵਰਪਰਿਵਤ੍ਤਨਸਿਕ੍ਖਾਪਦਵਣ੍ਣਨਾ
ਮੇਤਨ੍ਤਿ ਮੇ ਏਤਂ. ਸਕਸਞ੍ਞਾਯ ਗਹਿਤਤ੍ਤਾ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ ਵੁਤ੍ਤਂ, ਇਤਰਥਾ ਭਣ੍ਡਗ੍ਘੇਨ ਕਾਰੇਤਬ੍ਬਂ.
ਚੀਵਰਪਰਿਵਤ੍ਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਅਞ੍ਞਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ
ਪਟਿਲਾਭੇਨਾਤਿ ਪਠਮਵਿਞ੍ਞਤ੍ਤਿਤੋ ਊਨਤਰਸ੍ਸਾਪਿ ਅਞ੍ਞਸ੍ਸ ਪਟਿਲਾਭੇਨ.
ਤਸ੍ਮਿਂ ਅਪ੍ਪਹੋਨ੍ਤੇ ਪੁਨ ਤਞ੍ਞੇਵਾਤਿ ਯਂ ਪਠਮਂ ਵਿਞ੍ਞਤ੍ਤਂ, ਥੋਕਤ੍ਤਾ ਤਸ੍ਮਿਂ ਅਪ੍ਪਹੋਨ੍ਤੇ ਪੁਨ ਤਞ੍ਞੇਵ ਵਿਞ੍ਞਾਪੇਨ੍ਤਿਯਾਤਿ ਅਤ੍ਥੋ. ਅਞ੍ਞੇਨਪਿ ਅਤ੍ਥੇ ਸਤੀ ਤਿ ਪਠਮਂ ਵਿਞ੍ਞਤ੍ਤਿਤੋ ਅਞ੍ਞੇਨਪਿ ਅਤ੍ਥੇ ਸਤਿ. ਤੇਨ ਸਦ੍ਧਿਂ ਅਞ੍ਞਞ੍ਚਾਤਿ ਯਂ ਪਠਮਂ ਵਿਞ੍ਞਤ੍ਤਂ, ਤੇਨ ਸਦ੍ਧਿਂ ਅਞ੍ਞਞ੍ਚ. ਕਿਂ ਵੁਤ੍ਤਂ ਹੋਤਿ? ਸਚੇ ਪਠਮਂ ਸਪ੍ਪਿ ਵਿਞ੍ਞਤ੍ਤਂ, ‘‘ਯਮਕਂ ਪਚਿਤਬ੍ਬ’’ਨ੍ਤਿ ਚ ਵੇਜ੍ਜੇਨ ਵੁਤ੍ਤਤ੍ਤਾ ਤੇਲੇਨਾਪਿ ਅਤ੍ਥੋ ਹੋਤਿ. ਤਤੋ ‘‘ਤੇਲੇਨਾਪਿ ਮੇ ਅਤ੍ਥੋ’’ਤਿ ਏਵਮਾਦਿਨਾ ਅਞ੍ਞਞ੍ਚ ਵਿਞ੍ਞਾਪੇਨ੍ਤਿਯਾਤਿ ਵੁਤ੍ਤਂ ਹੋਤਿ. ਆਨਿਸਂਸਂ ਦਸ੍ਸੇਤ੍ਵਾਤਿ ‘‘ਸਚੇ ਕਹਾਪਣਸ੍ਸ ਸਪ੍ਪਿ ਆਭਤਂ ਹੋਤਿ, ਇਮਿਨਾ ਮੂਲੇਨ ਦ੍ਵਿਗੁਣਂ ਤੇਲਂ ਲਬ੍ਭਤਿ, ਤੇਲੇਨਾਪਿ ਚ ਇਦਂ ਕਿਚ੍ਚਂ ਨਿਪ੍ਪਜ੍ਜਤਿ, ਤਸ੍ਮਾ ਤੇਲਂ ਆਹਰਾ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ.
ਅਞ੍ਞਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਅਞ੍ਞਚੇਤਾਪਨਸਿਕ੍ਖਾਪਦਵਣ੍ਣਨਾ
ਤਤੋ ਅਞ੍ਞਂ ਚੇਤਾਪੇਯ੍ਯਾਤਿ ਪਠਮਂ ਚੇਤਾਪਿਤਤੋ ਯਂ ਕਿਞ੍ਚਿ ਅਞ੍ਞਂ ਚੇਤਾਪੇਯ੍ਯ.
ਅਞ੍ਞਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਅਞ੍ਞਸ੍ਸਤ੍ਥਾਯ ਦਿਨ੍ਨੇਨਾਤਿ ਯਂ ਚੇਤਾਪੇਤਿ, ਤਤੋ ਅਞ੍ਞਸ੍ਸਤ੍ਥਾਯ ਦਿਨ੍ਨੇਨ. ਅਞ੍ਞੁਦ੍ਦਿਸਿਕੇਨਾਤਿ ਪੁਰਿਮਸ੍ਸੇਵਤ੍ਥਦੀਪਨਂ.
ਸੇਸਕਂ ਉਪਨੇਨ੍ਤਿਯਾਤਿ ਯਦਤ੍ਥਾਯ ਦਿਨ੍ਨੋ, ਤਂ ਚੇਤਾਪੇਤ੍ਵਾ ਅਵਸੇਸਂ ਅਞ੍ਞਸ੍ਸਤ੍ਥਾਯ ਉਪਨੇਨ੍ਤਿਯਾ. ਸਾਮਿਕੇ ਅਪਲੋਕੇਤ੍ਵਾਤਿ ਦਾਯਕੇ ਆਪੁਚ੍ਛਿਤ੍ਵਾ. ਏਵਰੂਪਾਸੂ ਆਪਦਾਸੁ ਉਪਨੇਨ੍ਤੀਨਨ੍ਤਿ ਏਵਰੂਪੇਸੁ ਉਪਦ੍ਦਵੇਸੁ ਅਞ੍ਞਸ੍ਸ ਯਸ੍ਸ ਕਸ੍ਸਚਿ ਅਤ੍ਥਾਯ ਉਪਨੇਨ੍ਤੀਨਂ.
ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਨ ਕੇਵਲਂ ਤੇਨੇਵ ਪਰਿਕ੍ਖਾਰੇਨਾਤਿ ਆਹ ‘‘ਸਯਂ ਯਾਚਿਤਕੇਨਾਪੀ’’ਤਿ. ਵੁਤ੍ਤਞ੍ਹੇਤਂ ਪਾਲ਼ਿਯਂ ‘‘ਭਿਕ੍ਖੁਨਿਯੋ ਤੇਨ ਚ ਪਰਿਕ੍ਖਾਰੇਨ ਸਯਮ੍ਪਿ ਯਾਚਿਤ੍ਵਾ ਭੇਸਜ੍ਜਂ ਚੇਤਾਪੇਤ੍ਵਾ ਪਰਿਭੁਞ੍ਜਿਂਸੂ’’ਤਿ (ਪਾਚਿ. ੭੬੩). ਮਾਤਿਕਾਯਂ ਪਨ ਗਮ੍ਯਮਾਨਤ੍ਤਾ ਪਿ-ਸਦ੍ਦੋ ਨਪ੍ਪਯੁਤ੍ਤੋ. ਗਮ੍ਯਮਾਨਤ੍ਥਸ੍ਸ ਹਿ ਸਦ੍ਦਸ੍ਸ ਪਯੋਗਂ ਪਤਿ ਕਾਮਚਾਰੋਤਿ ਯੁਤ੍ਤਿ.
ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮-੯-੧੦. ਪਠਮਗਣਿਕਚੇਤਾਪਨਾਦਿਸਿਕ੍ਖਾਪਦਵਣ੍ਣਨਾ
ਅਟ੍ਠਮਨਵਮਦਸਮਾਨਿ ਉਤ੍ਤਾਨਤ੍ਥਾਨੇਵ.
ਪਠਮਗਣਿਕਚੇਤਾਪਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਪਤ੍ਤਵਗ੍ਗੋ ਪਠਮੋ.