੩. ਪਤ੍ਤਵਗ੍ਗੋ

੧. ਪਤ੍ਤਸਿਕ੍ਖਾਪਦਵਣ੍ਣਨਾ

ਪਤ੍ਤਵਗ੍ਗਸ੍ਸ ਪਠਮੇ ਅਤਿਰੇਕਪਤ੍ਤੋਤਿ ਅਨਧਿਟ੍ਠਿਤੋ ਚ ਅਵਿਕਪ੍ਪਿਤੋ ਚ, ਸੋ ਚ ਖੋ ਉਕ੍ਕਟ੍ਠਮਜ੍ਝਿਮੋਮਕਾਨਂ ਅਞ੍ਞਤਰੋ ਪਮਾਣਯੁਤ੍ਤੋਵ, ਤਸ੍ਸ ਪਮਾਣਂ ‘‘ਅਡ੍ਢਾਲ਼੍ਹਕੋਦਨਂ ਗਣ੍ਹਾਤੀ’’ਤਿਆਦਿਨਾ (ਪਾਰਾ ੬੦੨) ਨਯੇਨ ਪਾਲ਼ਿਯਂ ਵੁਤ੍ਤਂ. ਤਤ੍ਰਾਯਂ ਵਿਨਿਚ੍ਛਯੋ – ਅਨੁਪਹਤਪੁਰਾਣਸਾਲਿਤਣ੍ਡੁਲਾਨਂ ਸੁਕੋਟ੍ਟਿਤਪਰਿਸੁਦ੍ਧਾਨਂ ਦ੍ਵੇ ਮਗਧਨਾਲ਼ਿਯੋ ਗਹੇਤ੍ਵਾ ਤੇਹਿ ਤਣ੍ਡੁਲੇਹਿ ਅਨੁਤ੍ਤਣ੍ਡੁਲਮਕਿਲਿਨ੍ਨਮਪਿਣ੍ਡਿਕਂ ਸੁਵਿਸਦਂ ਕੁਨ੍ਦਮਕੁਲ਼ਰਾਸਿਸਦਿਸਂ ਅਵਸ੍ਸਾਵਿਤੋਦਨਂ ਪਚਿਤ੍ਵਾ ਨਿਰਵਸੇਸਂ ਪਤ੍ਤੇ ਪਕ੍ਖਿਪਿਤ੍ਵਾ ਤਸ੍ਸ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣੋ ਨਾਤਿਘਨੋ ਨਾਤਿਤਨੁਕੋ ਹਤ੍ਥਹਾਰਿਯੋ ਸਬ੍ਬਸਮ੍ਭਾਰਸਙ੍ਖਤੋ ਮੁਗ੍ਗਸੂਪੋ ਪਕ੍ਖਿਪਿਤਬ੍ਬੋ, ਤਤੋ ਆਲੋਪਸ੍ਸ ਅਨੁਰੂਪਂ ਯਾਵਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਂ ਪਕ੍ਖਿਪਿਤਬ੍ਬਂ, ਸਪ੍ਪਿਤੇਲਤਕ੍ਕਰਸਕਞ੍ਜਿਯਾਦੀਨਿ ਪਨ ਗਣਨੂਪਗਾਨਿ ਨ ਹੋਨ੍ਤਿ. ਤਾਨਿ ਹਿ ਓਦਨਗਤਿਕਾਨੇਵ, ਨੇਵ ਹਾਪੇਤੁਂ, ਨ ਵਡ੍ਢੇਤੁਂ ਸਕ੍ਕੋਨ੍ਤਿ, ਏਵਮੇਤਂ ਸਬ੍ਬਮ੍ਪਿ ਪਕ੍ਖਿਤ੍ਤਂ ਸਚੇ ਪਤ੍ਤਸ੍ਸ ਮੁਖਵਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ ਵਾ ਹੀਰੇਨ ਵਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ ਵਾ ਹੀਰਸ੍ਸ ਵਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ, ਅਨ੍ਤੋਗਧਮੇਵ ਹੋਤਿ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ ਪਤ੍ਤੋ. ਉਕ੍ਕਟ੍ਠਤੋ ਉਪਡ੍ਢਪ੍ਪਮਾਣੋ ਮਜ੍ਝਿਮੋ. ਮਜ੍ਝਿਮਪਤ੍ਤਤੋ ਉਪਡ੍ਢਪ੍ਪਮਾਣੋ ਓਮਕੋ. ਤੇਸਮ੍ਪਿ ਵੁਤ੍ਤਨਯੇਨੇਵ ਭੇਦੋ ਵੇਦਿਤਬ੍ਬੋ. ਇਚ੍ਚੇਤੇਸੁ ਨਵਸੁ ਉਕ੍ਕਟ੍ਠੁਕ੍ਕਟ੍ਠੋ ਚ ਓਮਕੋਮਕੋ ਚਾਤਿ ਦ੍ਵੇ ਅਪਤ੍ਤਾ, ਸੇਸਾ ਸਤ੍ਤ ਪਤ੍ਤਾ ਪਮਾਣਯੁਤ੍ਤਾ ਨਾਮ, ਅਯਮੇਤ੍ਥਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੨.੫੯੮ ਆਦਯੋ) ਵੁਤ੍ਤੋ, ਤਸ੍ਮਾ ਏਵਂ ਪਮਾਣਯੁਤ੍ਤਂ ਸਮਣਸਾਰੁਪ੍ਪੇਨ ਪਕ੍ਕਂ ਅਯੋਪਤ੍ਤਂ ਵਾ ਮਤ੍ਤਿਕਾਪਤ੍ਤਂ ਵਾ ਲਭਿਤ੍ਵਾ ਪੁਰਾਣਪਤ੍ਤਂ ਪਚ੍ਚੁਦ੍ਧਰਿਤ੍ਵਾ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬੋ. ਸਚੇ ਪਨਸ੍ਸ ਮੂਲਤੋ ਕਾਕਣਿਕਮਤ੍ਤਮ੍ਪਿ ਦਾਤਬ੍ਬਂ ਅਵਸਿਟ੍ਠਂ ਹੋਤਿ, ਅਧਿਟ੍ਠਾਨੁਪਗੋ ਨ ਹੋਤਿ, ਅਪ੍ਪਚ੍ਚੁਦ੍ਧਰਨ੍ਤੇਨ ਵਿਕਪ੍ਪੇਤਬ੍ਬੋ. ਤਤ੍ਥ ਪਚ੍ਚੁਦ੍ਧਰਣਾਧਿਟ੍ਠਾਨਲਕ੍ਖਣਂ ਚੀਵਰਵਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਵਿਕਪ੍ਪਨਲਕ੍ਖਣਂ ਪਰਤੋ ਵਕ੍ਖਾਮ. ਸਚੇ ਪਨ ਕੋਚਿ ਅਪਤ੍ਤਕੋ ਭਿਕ੍ਖੁ ਦਸ ਪਤ੍ਤੇ ਲਭਿਤ੍ਵਾ ਸਬ੍ਬੇ ਅਤ੍ਤਨਾਵ ਪਰਿਭੁਞ੍ਜਿਤੁਕਾਮੋ ਹੋਤਿ, ਏਕਂ ਪਤ੍ਤਂ ਅਧਿਟ੍ਠਾਯ ਪੁਨ ਦਿਵਸੇ ਤਂ ਪਚ੍ਚੁਦ੍ਧਰਿਤ੍ਵਾ ਅਞ੍ਞੋ ਅਧਿਟ੍ਠਾਤਬ੍ਬੋ, ਏਤੇਨੁਪਾਯੇਨ ਵਸ੍ਸਸਤਮ੍ਪਿ ਪਰਿਹਰਿਤੁਂ ਸਕ੍ਕਾ. ਯੋ ਪਨਸ੍ਸ ਪਤ੍ਤੋ ਮੁਖਵਟ੍ਟਿਤੋ ਹੇਟ੍ਠਾ ਦ੍ਵਙ੍ਗੁਲਮਤ੍ਤੋਕਾਸਤੋ ਪਟ੍ਠਾਯ ਯਤ੍ਥਕਤ੍ਥਚਿ ਕਙ੍ਗੁਸਿਤ੍ਥਨਿਕ੍ਖਮਨਮਤ੍ਤੇਨ ਛਿਦ੍ਦੇਨ ਛਿਦ੍ਦੋ ਹੋਤਿ, ਸੋ ਅਧਿਟ੍ਠਾਨੁਪਗੋ ਨ ਹੋਤਿ. ਪੁਨ ਛਿਦ੍ਦੇ ਪਾਕਤਿਕੇ ਕਤੇ ਅਧਿਟ੍ਠਾਤਬ੍ਬੋ, ਸੇਸਂ ਅਧਿਟ੍ਠਾਨਵਿਜਹਨਂ ਤਿਚੀਵਰੇ ਵੁਤ੍ਤਨਯਮੇਵ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਤਿਰੇਕਪਤ੍ਤਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸੇਸਵਣ੍ਣਨਾਕ੍ਕਮੋ ਚੀਵਰਵਗ੍ਗਸ੍ਸ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ.

ਪਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਊਨਾਨਿ ਪਞ੍ਚ ਬਨ੍ਧਨਾਨਿ ਅਸ੍ਸਾਤਿ ਊਨਪਞ੍ਚਬਨ੍ਧਨੋ, ਨਾਸ੍ਸ ਪਞ੍ਚ ਬਨ੍ਧਨਾਨਿ ਪੂਰੇਨ੍ਤੀਤਿ ਅਤ੍ਥੋ, ਤੇਨ ਊਨਪਞ੍ਚਬਨ੍ਧਨੇਨ, ਇਤ੍ਥਮ੍ਭੂਤਸ੍ਸ ਲਕ੍ਖਣੇ ਕਰਣਵਚਨਂ. ਤਤ੍ਥ ਯਸ੍ਮਾ ਅਬਨ੍ਧਨਸ੍ਸਾਪਿ ਪਞ੍ਚ ਬਨ੍ਧਨਾਨਿ ਨ ਪੂਰੇਨ੍ਤਿ ਸਬ੍ਬਸੋ ਨਤ੍ਥਿਤਾਯ, ਤੇਨਸ੍ਸ ਪਦਭਾਜਨੇ ‘‘ਊਨਪਞ੍ਚਬਨ੍ਧਨੋ ਨਾਮ ਪਤ੍ਤੋ ਅਬਨ੍ਧਨੋ ਵਾ ਏਕਬਨ੍ਧਨੋ ਵਾ’’ਤਿਆਦਿ (ਪਾਰਾ. ੬੧੩) ਵੁਤ੍ਤਂ. ‘‘ਊਨਪਞ੍ਚਬਨ੍ਧਨੇਨਾ’’ਤਿ ਚ ਵੁਤ੍ਤਤ੍ਤਾ ਯਸ੍ਸ ਪਞ੍ਚਬਨ੍ਧਨੋ ਪਤ੍ਤੋ ਹੋਤਿ ਪਞ੍ਚਬਨ੍ਧਨੋਕਾਸੋ ਵਾ, ਤਸ੍ਸ ਸੋ ਅਪਤ੍ਤੋ, ਤਸ੍ਮਾ ਅਞ੍ਞਂ ਵਿਞ੍ਞਾਪੇਤੁਂ ਵਟ੍ਟਤਿ. ਯਸ੍ਮਿਂ ਪਨ ਪਤ੍ਤੇ ਮੁਖਵਟ੍ਟਿਤੋ ਹੇਟ੍ਠਾ ਭਟ੍ਠਾ ਦ੍ਵਙ੍ਗੁਲਪ੍ਪਮਾਣਾ ਏਕਾਪਿ ਰਾਜਿ ਹੋਤਿ, ਤਂ ਤਸ੍ਸਾ ਰਾਜਿਯਾ ਹੇਟ੍ਠਿਮਪਰਿਯਨ੍ਤੇ ਪਤ੍ਤਵੇਧਕੇਨ ਵਿਜ੍ਝਿਤ੍ਵਾ ਪਚਿਤ੍ਵਾ ਸੁਤ੍ਤਰਜ੍ਜੁਕਮਕਚਿਰਜ੍ਜੁਕਾਦੀਹਿ ਵਾ ਤਿਪੁਸੁਤ੍ਤਕੇਨ ਵਾ ਬਨ੍ਧਿਤ੍ਵਾ ਤਂ ਬਨ੍ਧਨਂ ਆਮਿਸਸ੍ਸ ਅਲਗ੍ਗਨਤ੍ਥਂ ਤਿਪੁਪਟ੍ਟਕੇਨ ਵਾ ਕੇਨਚਿ ਬਦ੍ਧਸਿਲੇਸਾਦਿਨਾ ਵਾ ਪਟਿਚ੍ਛਾਦੇਤਬ੍ਬਂ, ਸੋ ਚ ਪਤ੍ਤੋ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬੋ, ਸੁਖੁਮਂ ਵਾ ਛਿਦ੍ਦਂ ਕਤ੍ਵਾ ਬਨ੍ਧਿਤਬ੍ਬੋ, ਫਾਣਿਤਂ ਝਾਪੇਤ੍ਵਾ ਪਾਸਾਣਚੁਣ੍ਣੇਨ ਬਨ੍ਧਿਤੁਮ੍ਪਿ ਵਟ੍ਟਤਿ. ਯਸ੍ਸ ਪਨ ਦ੍ਵੇ ਰਾਜਿਯੋ ਵਾ ਏਕਾਯੇਵ ਵਾ ਚਤੁਰਙ੍ਗੁਲਾ, ਤਸ੍ਸ ਦ੍ਵੇ ਬਨ੍ਧਨਾਨਿ ਦਾਤਬ੍ਬਾਨਿ. ਯਸ੍ਸ ਤਿਸ੍ਸੋ ਵਾ ਏਕਾਯੇਵ ਵਾ ਛਲ਼ਙ੍ਗੁਲਾ, ਤਸ੍ਸ ਤੀਣਿ. ਯਸ੍ਸ ਚਤਸ੍ਸੋ ਵਾ ਏਕਾਯੇਵ ਵਾ ਅਟ੍ਠਙ੍ਗੁਲਾ, ਤਸ੍ਸ ਚਤ੍ਤਾਰਿ. ਯਸ੍ਸ ਪਞ੍ਚ ਵਾ ਏਕਾਯੇਵ ਵਾ ਦਸਙ੍ਗੁਲਾ, ਸੋ ਬਦ੍ਧੋਪਿ ਅਬਦ੍ਧੋਪਿ ਅਪਤ੍ਤੋਯੇਵ, ਅਞ੍ਞੋ ਵਿਞ੍ਞਾਪੇਤਬ੍ਬੋ, ਏਸ ਤਾਵ ਮਤ੍ਤਿਕਾਪਤ੍ਤੇ ਵਿਨਿਚ੍ਛਯੋ.

ਅਯੋਪਤ੍ਤੇ ਪਨ ਸਚੇਪਿ ਪਞ੍ਚ ਵਾ ਅਤਿਰੇਕਾਨਿ ਵਾ ਛਿਦ੍ਦਾਨਿ ਹੋਨ੍ਤਿ, ਤਾਨਿ ਚੇ ਅਯਚੁਣ੍ਣੇਨ ਵਾ ਆਣਿਯਾ ਵਾ ਲੋਹਮਣ੍ਡਲੇਨ ਵਾ ਬਦ੍ਧਾਨਿ ਮਟ੍ਠਾਨਿ ਹੋਨ੍ਤਿ, ਸ੍ਵੇਵ ਪਰਿਭੁਞ੍ਜਿਤਬ੍ਬੋ, ਅਞ੍ਞੋ ਨ ਵਿਞ੍ਞਾਪੇਤਬ੍ਬੋ. ਅਥ ਪਨ ਏਕਮ੍ਪਿ ਛਿਦ੍ਦਂ ਮਹਨ੍ਤਂ ਹੋਤਿ, ਲੋਹਮਣ੍ਡਲੇਨ ਬਦ੍ਧਮ੍ਪਿ ਮਟ੍ਠਂ ਨ ਹੋਤਿ, ਪਤ੍ਤੇ ਆਮਿਸਂ ਲਗ੍ਗਤਿ, ਅਕਪ੍ਪਿਯੋ ਹੋਤਿ ਅਯਂ ਪਤ੍ਤੋ, ਅਞ੍ਞੋ ਵਿਞ੍ਞਾਪੇਤਬ੍ਬੋ. ਯੋ ਪਨ ਏਵਂ ਪਤ੍ਤਸਙ੍ਖੇਪਗਤੇ ਵਾ ਅਯੋਪਤ੍ਤੇ, ਊਨਪਞ੍ਚਬਨ੍ਧਨੇ ਵਾ ਮਤ੍ਤਿਕਾਪਤ੍ਤੇ ਸਤਿ ਅਞ੍ਞਂ ਵਿਞ੍ਞਾਪੇਤਿ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯੋ ਹੋਤਿ, ਨਿਸ੍ਸਜ੍ਜਿਤਬ੍ਬੋ. ਨਿਸ੍ਸਜ੍ਜਨ੍ਤੇਨ ਸਙ੍ਘਮਜ੍ਝੇ ਏਵ ਨਿਸ੍ਸਜ੍ਜਿਤਬ੍ਬੋ, ਤੇਨ ਵੁਤ੍ਤਂ ‘‘ਭਿਕ੍ਖੁਪਰਿਸਾਯ ਨਿਸ੍ਸਜ੍ਜਿਤਬ੍ਬੋ’’ਤਿ. ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯਾਤਿਏਤ੍ਥ ਤੇਹਿ ਭਿਕ੍ਖੂਹਿ ਪਕਤਿਯਾ ਏਵ ਅਤ੍ਤਨੋ ਅਤ੍ਤਨੋ ਅਧਿਟ੍ਠਿਤਂ ਪਤ੍ਤਂ ਗਹੇਤ੍ਵਾ ਸਨ੍ਨਿਪਤਿਤਬ੍ਬਂ, ਤਤੋ ਸਮ੍ਮਤੇਨ ਪਤ੍ਤਗ੍ਗਾਹਾਪਕੇਨ ਪਤ੍ਤਸ੍ਸ ਵਿਜ੍ਜਮਾਨਗੁਣਂ ਵਤ੍ਵਾ ‘‘ਭਨ੍ਤੇ, ਇਮਂ ਗਣ੍ਹਥਾ’’ਤਿ ਥੇਰੋ ਵਤ੍ਤਬ੍ਬੋ. ਸਚੇ ਥੇਰਸ੍ਸ ਸੋ ਪਤ੍ਤੋ ਨ ਰੁਚ੍ਚਤਿ, ਅਪ੍ਪਿਚ੍ਛਤਾਯ ਵਾ ਨ ਗਣ੍ਹਾਤਿ, ਵਟ੍ਟਤਿ. ਤਸ੍ਮਿਂ ਪਨ ਅਨੁਕਮ੍ਪਾਯ ਅਗਣ੍ਹਨ੍ਤਸ੍ਸ ਦੁਕ੍ਕਟਂ. ਸਚੇ ਪਨ ਗਣ੍ਹਾਤਿ, ਥੇਰਸ੍ਸ ਪਤ੍ਤਂ ਦੁਤਿਯਤ੍ਥੇਰਂ ਗਾਹਾਪੇਤ੍ਵਾ ਏਤੇਨੇਵ ਉਪਾਯੇਨ ਯਾਵ ਸਙ੍ਘਨਵਕਾ ਗਾਹਾਪੇਤਬ੍ਬੋ, ਤੇਨ ਪਰਿਚ੍ਚਤ੍ਤਪਤ੍ਤੋ ਪਨ ਪਤ੍ਤਪਰਿਯਨ੍ਤੋ ਨਾਮ, ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ. ਤੇਨਾਪਿ ਸੋ ਯਥਾ ਵਿਞ੍ਞਾਪੇਤ੍ਵਾ ਗਹਿਤਪਤ੍ਤੋ, ਏਵਮੇਵ ਸਕ੍ਕਚ੍ਚਂ ਪਰਿਭੁਞ੍ਜਿਤਬ੍ਬੋ. ਸਚੇ ਪਨ ਤਂ ਜਿਗੁਚ੍ਛਨ੍ਤੋ ਅਦੇਸੇ ਵਾ ਨਿਕ੍ਖਿਪਤਿ, ਅਪਰਿਭੋਗੇਨ ਵਾ ਪਰਿਭੁਞ੍ਜਤਿ, ਵਿਸ੍ਸਜ੍ਜੇਤਿ ਵਾ, ਦੁਕ੍ਕਟਂ ਆਪਜ੍ਜਤਿ.

ਸਕ੍ਕੇਸੁ ਛਬ੍ਬਗ੍ਗਿਯੇ ਆਰਬ੍ਭ ਬਹੂ ਪਤ੍ਤੇ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਅਬਨ੍ਧਨੇਨ ਅਬਨ੍ਧਨਂ, ਏਕਬਨ੍ਧਨਂ, ਦੁਬਨ੍ਧਨਂ, ਤਿਬਨ੍ਧਨਂ, ਚਤੁਬ੍ਬਨ੍ਧਨਂ, ਅਬਨ੍ਧਨੋਕਾਸਂ, ਏਕਦ੍ਵਿਤਿਚਤੁਬ੍ਬਨ੍ਧਨੋਕਾਸਂ ਚੇਤਾਪੇਤਿ, ਏਵਂ ਏਕੇਕੇਨ ਪਤ੍ਤੇਨ ਦਸਧਾ ਦਸਵਿਧਂ ਪਤ੍ਤਂ. ਚੇਤਾਪਨਵਸੇਨ ਪਨ ਏਕਂ ਨਿਸ੍ਸਗ੍ਗਿਯਪਾਚਿਤ੍ਤਿਯਸਤਂ ਹੋਤਿ. ਨਟ੍ਠਪਤ੍ਤਸ੍ਸ, ਭਿਨ੍ਨਪਤ੍ਤਸ੍ਸ, ਅਤ੍ਤਨੋ ਞਾਤਕਪ੍ਪਵਾਰਿਤੇ, ਅਞ੍ਞਸ੍ਸ ਚ ਞਾਤਕਪ੍ਪਵਾਰਿਤੇ, ਤਸ੍ਸੇਵਤ੍ਥਾਯ ਵਿਞ੍ਞਾਪੇਨ੍ਤਸ੍ਸ, ਅਤ੍ਤਨੋ ਧਨੇਨ ਗਣ੍ਹਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਧਿਟ੍ਠਾਨੁਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਅਕਤਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਧੋਵਾਪਨਸਿਕ੍ਖਾਪਦੇ ਵੁਤ੍ਤਨਯਾਨੇਵਾਤਿ.

ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਭੇਸਜ੍ਜਸਿਕ੍ਖਾਪਦਵਣ੍ਣਨਾ

ਤਤਿਯੇ ਪਟਿਸਾਯਨੀਯਾਨੀਤਿ ਪਟਿਸਾਯਿਤਬ੍ਬਾਨਿ, ਪਰਿਭੁਞ੍ਜਿਤਬ੍ਬਾਨੀਤਿ ਅਤ੍ਥੋ. ਏਤੇਨ ਸਯਂ ਉਗ੍ਗਹੇਤ੍ਵਾ ਨਿਕ੍ਖਿਤ੍ਤਾਨਂ ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿਂ ਦਸ੍ਸੇਤਿ, ਤਾਨਿ ਹਿ ਪਟਿਸਾਯਿਤੁਂ ਨ ਵਟ੍ਟਨ੍ਤਿ. ਭੇਸਜ੍ਜਾਨੀਤਿ ਭੇਸਜ੍ਜਕਿਚ੍ਚਂ ਕਰੋਨ੍ਤੁ ਵਾ, ਮਾ ਵਾ, ਏਵਂ ਲਦ੍ਧਵੋਹਾਰਾਨਿ. ਸਪ੍ਪਿ ਨਾਮ ਗਵਾਦੀਨਂ ਸਪ੍ਪਿ, ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ. ਤਥਾ ਨਵਨੀਤਂ. ਤੇਲਂ ਨਾਮ ਤਿਲਸਾਸਪਮਧੂਕਏਰਣ੍ਡਕਵਸਾਦੀਹਿ ਨਿਬ੍ਬਤ੍ਤਿਤਂ. ਮਧੁ ਨਾਮ ਮਕ੍ਖਿਕਾਮਧੁਮੇਵ. ਫਾਣਿਤਂ ਨਾਮ ਉਚ੍ਛੁਰਸਂ ਉਪਾਦਾਯ ਪਨ ਅਪਕ੍ਕਾ ਵਾ ਅਵਤ੍ਥੁਕਪਕ੍ਕਾ ਵਾ ਸਬ੍ਬਾਪਿ ਉਚ੍ਛੁਵਿਕਤਿ ‘‘ਫਾਣਿਤ’’ਨ੍ਤਿ ਵੇਦਿਤਬ੍ਬਂ. ਤਾਨਿ ਪਟਿਗ੍ਗਹੇਤ੍ਵਾਤਿ ਤਾਨਿ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ, ਨ ਤੇਸਂ ਵਤ੍ਥੂਨਿ. ਏਤੇਨ ਠਪੇਤ੍ਵਾ ਵਸਾਤੇਲਂ ਯਾਨੇਤ੍ਥ ਯਾਵਕਾਲਿਕਵਤ੍ਥੁਕਾਨਿ, ਤੇਸਂ ਵਤ੍ਥੂਨਿ ਪਟਿਗ੍ਗਹੇਤ੍ਵਾ ਕਤਾਨਿ ਸਪ੍ਪਿਆਦੀਨਿ ਸਤ੍ਤਾਹਂ ਅਤਿਕ੍ਕਾਮਯਤੋਪਿ ਅਨਾਪਤ੍ਤਿਂ ਦਸ੍ਸੇਤਿ. ਵਸਾਤੇਲਂ ਪਨ ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ, ਤਸ੍ਮਾ ਠਪੇਤ੍ਵਾ ਮਨੁਸ੍ਸਵਸਂ ਅਞ੍ਞਂ ਯਂਕਞ੍ਚਿ ਵਸਂ ਪੁਰੇਭਤ੍ਤਂ ਪਟਿਗ੍ਗਹੇਤ੍ਵਾ ਸਾਮਂ ਪਚਿਤ੍ਵਾ ਨਿਬ੍ਬਤ੍ਤਿਤਤੇਲਮ੍ਪਿ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ ਵਟ੍ਟਤਿ. ਅਨੁਪਸਮ੍ਪਨ੍ਨੇਨ ਪਚਿਤ੍ਵਾ ਦਿਨ੍ਨਂ ਪਨ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਅਞ੍ਞੇਸਂ ਯਾਵਕਾਲਿਕਵਤ੍ਥੂਨਂ ਵਤ੍ਥੁਂ ਪਚਿਤੁਂ ਨ ਵਟ੍ਟਤਿਯੇਵ. ਨਿਬ੍ਬਤ੍ਤਿਤਸਪ੍ਪਿ ਵਾ ਨਵਨੀਤਂ ਵਾ ਪਚਿਤੁਂ ਵਟ੍ਟਤਿ, ਤਂ ਪਨ ਤਦਹੁਪੁਰੇਭਤ੍ਤਮ੍ਪਿ ਸਾਮਿਸਂ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਪੁਰੇਭਤ੍ਤਂ ਪਟਿਗ੍ਗਹਿਤਖੀਰਾਦਿਤੋ ਅਨੁਪਸਮ੍ਪਨ੍ਨੇਨ ਪਚਿਤ੍ਵਾ ਕਤਸਪ੍ਪਿਆਦੀਨਿ ਪਨ ਤਦਹੁਪੁਰੇਭਤ੍ਤਂ ਸਾਮਿਸਾਨਿਪਿ ਵਟ੍ਟਨ੍ਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਅਨਜ੍ਝੋਹਰਣੀਯਾਨਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀਤਿ ਸਨ੍ਨਿਧਿਂ ਕਤ੍ਵਾ ਨਿਦਹਿਤ੍ਵਾ ਪੁਰੇਭਤ੍ਤਂ ਪਟਿਗ੍ਗਹਿਤਾਨਿ ਤਦਹੁਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ ਵਟ੍ਟਨ੍ਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਪਨ ਤਾਨਿ ਚ, ਪਚ੍ਛਾਭਤ੍ਤਂ ਪਟਿਗ੍ਗਹਿਤਾਨਿ ਚ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ ਪਰਿਭੁਞ੍ਜਿਤਬ੍ਬਾਨੀਤਿ ਅਤ੍ਥੋ. ‘‘ਪਰਿਭੁਞ੍ਜਿਤਬ੍ਬਾਨੀ’’ਤਿ ਚ ਵਚਨਤੋ ਅਨ੍ਤੋਸਤ੍ਤਾਹੇ ਅਬ੍ਭਞ੍ਜਨਾਦੀਨਂ ਅਤ੍ਥਾਯ ਅਧਿਟ੍ਠਹਿਤ੍ਵਾ ਠਪਿਤੇਸੁ ਅਨਾਪਤ੍ਤਿ, ਯਾਵਜੀਵਿਕਾਨਿ ਸਾਸਪਮਧੂਕਏਰਣ੍ਡਕਅਟ੍ਠੀਨਿ ਤੇਲਕਰਣਤ੍ਥਂ ਪਟਿਗ੍ਗਹੇਤ੍ਵਾ ਤਦਹੇਵ ਕਤਤੇਲਂ ਸਤ੍ਤਾਹਕਾਲਿਕਂ, ਦੁਤਿਯਦਿਵਸੇ ਕਤਂ ਛਾਹਂ ਵਟ੍ਟਤਿ, ਤਤਿਯਦਿਵਸੇ ਕਤਂ ਪਞ੍ਚਾਹਂ, ਚਤੁਤ੍ਥਪਞ੍ਚਮਛਟ੍ਠਸਤ੍ਤਮਦਿਵਸੇ ਕਤਂ ਤਦਹੇਵ ਵਟ੍ਟਤਿ. ਸਚੇ ਯਾਵ ਅਰੁਣਸ੍ਸ ਉਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਂ ਹੋਤਿ, ਅਟ੍ਠਮਦਿਵਸੇ ਕਤਂ ਅਨਜ੍ਝੋਹਰਣੀਯਂ, ਅਨਿਸ੍ਸਗ੍ਗਿਯਤ੍ਤਾ ਪਨ ਬਾਹਿਰਪਰਿਭੋਗੇਨ ਵਟ੍ਟਤਿ. ਸਚੇਪਿ ਨ ਕਰੋਤਿ, ਤੇਲਤ੍ਥਾਯ ਪਟਿਗ੍ਗਹਿਤਸਾਸਪਾਦੀਨਂ ਪਨ ਪਾਲ਼ਿਯਂ ਅਨਾਗਤਸਪ੍ਪਿਆਦੀਨਞ੍ਚ ਸਤ੍ਤਾਹਾਤਿਕ੍ਕਮੇ ਦੁਕ੍ਕਟਂ ਆਪਜ੍ਜਤਿ. ਸੀਤੁਦਕੇਨ ਕਤਮਧੂਕਪੁਪ੍ਫਫਾਣਿਤਂ ਪਨ ਫਾਣਿਤਗਤਿਕਮੇਵ, ਅਮ੍ਬਫਾਣਿਤਾਦੀਨਿ ਯਾਵਕਾਲਿਕਾਨਿ. ਯਂ ਪਨੇਤ੍ਥ ਸਤ੍ਤਾਹਕਾਲਿਕਂ, ਤਂ ਨਿਸ੍ਸਟ੍ਠਂ ਪਟਿਲਭਿਤ੍ਵਾਪਿ ਅਰੁਆਦੀਨਿ ਵਾ ਮਕ੍ਖੇਤੁਂ, ਅਜ੍ਝੋਹਰਿਤੁਂ ਵਾ ਨ ਵਟ੍ਟਤਿ. ਪਦੀਪੇ ਕਾਲ਼ਵਣ੍ਣੇ ਵਾ ਉਪਨੇਤਬ੍ਬਂ, ਅਞ੍ਞਸ੍ਸ ਭਿਕ੍ਖੁਨੋ ਕਾਯਿਕਪਰਿਭੋਗਂ ਵਟ੍ਟਤਿ. ਯਂ ਪਨ ਨਿਰਪੇਕ੍ਖੋ ਪਰਿਚ੍ਚਜਿਤ੍ਵਾ ਪੁਨ ਲਭਤਿ, ਤਂ ਅਜ੍ਝੋਹਰਿਤੁਮ੍ਪਿ ਵਟ੍ਟਤਿ. ਵਿਸੁਂ ਠਪਿਤਸਪ੍ਪਿਆਦੀਸੁ, ਏਕਭਾਜਨੇ ਵਾ ਅਮਿਸ੍ਸਿਤੇਸੁ ਵਤ੍ਥੁਗਣਨਾਯ ਆਪਤ੍ਤਿਯੋ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਤ੍ਤਾਹਂ ਅਤਿਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਚੀਵਰਵਗ੍ਗਸ੍ਸ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਭੇਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਚਤੁਨ੍ਨਂ ਗਿਮ੍ਹਮਾਸਾਨਂ ਏਕੋ ਪਚ੍ਛਿਮਮਾਸੋ ਸੇਸੋ. ਪਰਿਯੇਸਿਤਬ੍ਬਨ੍ਤਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਪਠਮਦਿਵਸਤੋ ਪਟ੍ਠਾਯ ਯਾਵ ਕਤ੍ਤਿਕਮਾਸਸ੍ਸ ਪਚ੍ਛਿਮਦਿਵਸੋ, ਤਾਵ ‘‘ਕਾਲੋ ਵਸ੍ਸਿਕਸਾਟਿਕਾਯਾ’’ਤਿਆਦਿਨਾ ਸਤੁਪ੍ਪਾਦਕਰਣੇਨ, ਸਙ੍ਘਸ੍ਸ ਪਵਾਰਿਤਟ੍ਠਾਨਤੋ, ਅਤ੍ਤਨੋ ਞਾਤਕਪ੍ਪਵਾਰਿਤਟ੍ਠਾਨਤੋ ਪਨ ‘‘ਦੇਥ ਮੇ ਵਸ੍ਸਿਕਸਾਟਿਕਚੀਵਰ’’ਨ੍ਤਿਆਦਿਕਾਯ ਵਿਞ੍ਞਤ੍ਤਿਯਾਪਿ ਪਰਿਯੇਸਿਤਬ੍ਬਂ. ਅਞ੍ਞਾਤਕਅਪ੍ਪਵਾਰਿਤਟ੍ਠਾਨੇ ਸਤੁਪ੍ਪਾਦਂ ਕਰੋਨ੍ਤਸ੍ਸ ਵਤ੍ਤਭੇਦੇ ਦੁਕ੍ਕਟਂ, ਯਥਾ ਵਾ ਤਥਾ ਵਾ ‘‘ਦੇਥ ਮੇ’’ਤਿਆਦਿਵਚਨੇਨ ਵਿਞ੍ਞਾਪੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਕਤ੍ਵਾ ਨਿਵਾਸੇਤਬ੍ਬਨ੍ਤਿ ਗਿਮ੍ਹਾਨਂ ਪਚ੍ਛਿਮਦ੍ਧਮਾਸਸ੍ਸ ਪਠਮਦਿਵਸਤੋ ਪਟ੍ਠਾਯ ਯਾਵ ਕਤ੍ਤਿਕਮਾਸਸ੍ਸ ਪਚ੍ਛਿਮਦਿਵਸੋ, ਤਾਵ ਸੂਚਿਕਮ੍ਮਨਿਟ੍ਠਾਨੇਨ ਸਕਿਮ੍ਪਿ ਵਣ੍ਣਭੇਦਮਤ੍ਤਰਜਨੇਨ ਕਪ੍ਪਬਿਨ੍ਦੁਕਰਣੇਨ ਚ ਕਤ੍ਵਾ ਪਰਿਦਹਿਤਬ੍ਬਾ. ਏਤ੍ਤਾਵਤਾ ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਪਰਿਯੇਸਨਕ੍ਖੇਤ੍ਤਂ, ਪਚ੍ਛਿਮੋ ਅਦ੍ਧਮਾਸੋ ਕਰਣਨਿਵਾਸਨਕ੍ਖੇਤ੍ਤਮ੍ਪਿ, ਵਸ੍ਸਾਨਸ੍ਸ ਚਤੂਸੁ ਮਾਸੇਸੁ ਸਬ੍ਬਮ੍ਪਿ ਤਂ ਵਟ੍ਟਤੀਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ. ਯੋ ਚਾਯਂ ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਅਨੁਞ੍ਞਾਤੋ, ਏਤ੍ਥ ਕਤਪਰਿਯੇਸਿਤਮ੍ਪਿ ਵਸ੍ਸਿਕਸਾਟਿਕਂ ਅਧਿਟ੍ਠਾਤੁਂ ਨ ਵਟ੍ਟਤਿ. ਸਚੇ ਤਸ੍ਮਿਂ ਮਾਸੇ ਅਤਿਕ੍ਕਨ੍ਤੇ ਵਸ੍ਸਂ ਉਕ੍ਕਡ੍ਢਿਯਤਿ, ਪੁਨ ਮਾਸਪਰਿਹਾਰਂ ਲਭਤਿ, ਧੋਵਿਤ੍ਵਾ ਪਨ ਨਿਕ੍ਖਿਪਿਤ੍ਵਾ ਵਸ੍ਸੂਪਨਾਯਿਕਦਿਵਸੇ ਅਧਿਟ੍ਠਾਤਬ੍ਬਾ. ਸਚੇ ਸਤਿਸਮ੍ਮੋਸੇਨ ਵਾ ਅਪ੍ਪਹੋਨਕਭਾਵੇਨ ਵਾ ਅਕਤਾ ਹੋਤਿ. ਤੇ ਚ ਦ੍ਵੇ ਮਾਸੇ ਵਸ੍ਸਾਨਸ੍ਸ ਚਤੁਮਾਸਨ੍ਤਿ ਛ ਮਾਸੇ ਪਰਿਹਾਰਂ ਲਭਤਿ. ਸਚੇ ਪਨ ਕਤ੍ਤਿਕਮਾਸੇ ਕਥਿਨਂ ਅਤ੍ਥਰਿਯਤਿ, ਅਪਰੇਪਿ ਚਤ੍ਤਾਰੋ ਮਾਸੇ ਲਭਤਿ, ਏਵਂ ਦਸ ਮਾਸਾ ਹੋਨ੍ਤਿ. ਤਤੋ ਪਰਮ੍ਪਿ ਸਤਿਯਾ ਪਚ੍ਚਾਸਾਯ ਤਂ ਮੂਲਚੀਵਰਂ ਕਤ੍ਵਾ ਠਪੇਨ੍ਤਸ੍ਸ ਏਕਮਾਸਨ੍ਤਿ ਏਵਂ ਏਕਾਦਸ ਮਾਸੇ ਪਰਿਹਾਰਂ ਲਭਤਿ, ਇਤੋ ਪਰਂ ਏਕਾਹਮ੍ਪਿ ਨ ਲਭਤਿ.

ਓਰੇਨ ਚੇ ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਓਰਿਮਭਾਗੇ ਯਾਵ ਹੇਮਨ੍ਤਸ੍ਸ ਪਠਮਦਿਵਸੋ, ਤਾਵਾਤਿ ਅਤ੍ਥੋ. ਪਰਿਯੇਸੇਯ੍ਯਾਤਿ ਏਤੇਸੁ ਸਤ੍ਤਸੁ ਪਿਟ੍ਠਿਸਮਯਮਾਸੇਸੁ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਸਤੁਪ੍ਪਾਦਕਰਣੇਨ ਪਰਿਯੇਸਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਵਿਞ੍ਞਾਪੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਞਾਤਕਪ੍ਪਵਾਰਿਤੇ ਵਿਞ੍ਞਾਪੇਨ੍ਤਸ੍ਸ ਤੇਨ ਸਿਕ੍ਖਾਪਦੇਨ ਅਨਾਪਤ੍ਤਿ, ਸਤੁਪ੍ਪਾਦਂ ਕਰੋਨ੍ਤਸ੍ਸ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ. ਓਰੇਨਦ੍ਧਮਾਸੋ ਸੇਸੋ ਗਿਮ੍ਹਾਨਨ੍ਤਿ ਗਿਮ੍ਹਾਨਸ੍ਸ ਪਚ੍ਛਿਮਦ੍ਧਮਾਸਤੋ ਓਰਿਮਭਾਗੇ ਏਕਸ੍ਮਿਂ ਅਦ੍ਧਮਾਸੇ. ਕਤ੍ਵਾ ਨਿਵਾਸੇਯ੍ਯਾਤਿ ਏਤ੍ਥਨ੍ਤਰੇ ਧਮ੍ਮੇਨ ਉਪ੍ਪਨ੍ਨਮ੍ਪਿ ਕਤ੍ਵਾ ਨਿਵਾਸੇਨ੍ਤਸ੍ਸ ਨਿਸ੍ਸਗ੍ਗਿਯਂ ਹੋਤਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਵਸ੍ਸਿਕਸਾਟਿਕਪਰਿਯੇਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕਮਾਸਦ੍ਧਮਾਸੇਸੁ ਅਤਿਰੇਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ, ਤਥਾ ਸਤਿਯਾ ਵਸ੍ਸਿਕਸਾਟਿਕਾਯ ਨਗ੍ਗਸ੍ਸ ਕਾਯਂ ਓਵਸ੍ਸਾਪਯਤੋ. ਪੋਕ੍ਖਰਣਿਯਾਦੀਸੁ ਪਨ ਨ੍ਹਾਯਨ੍ਤਸ੍ਸ ਵਾ ਅਚ੍ਛਿਨ੍ਨਚੀਵਰਸ੍ਸ ਵਾ ਨਟ੍ਠਚੀਵਰਸ੍ਸ ਵਾ ‘‘ਅਨਿਵਤ੍ਥਂ ਚੋਰਾ ਹਰਨ੍ਤੀ’’ਤਿ ਏਵਂ ਆਪਦਾਸੁ ਵਾ ਨਿਵਾਸਯਤੋ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਏਤ੍ਥ ਚ ਵਸ੍ਸਿਕਸਾਟਿਕਾਯ ਅਤ੍ਤੁਦ੍ਦੇਸਿਕਤਾ, ਅਸਮਯੇ ਪਰਿਯੇਸਨਤਾ, ਤਾਯ ਚ ਪਟਿਲਾਭੋਤਿ ਇਮਾਨਿ ਤਾਵ ਪਰਿਯੇਸਨਾਪਤ੍ਤਿਯਾ ਤੀਣਿ ਅਙ੍ਗਾਨਿ. ਸਚੀਵਰਤਾ, ਆਪਦਾਭਾਵੋ, ਵਸ੍ਸਿਕਸਾਟਿਕਾਯ ਸਕਭਾਵੋ, ਅਸਮਯੇ ਨਿਵਾਸਨਨ੍ਤਿ ਇਮਾਨਿ ਨਿਵਾਸਨਾਪਤ੍ਤਿਯਾ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਧੋਵਾਪਨਸਿਕ੍ਖਾਪਦੇ ਵੁਤ੍ਤਨਯਾਨੇਵਾਤਿ.

ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਸਾਮਂ ਚੀਵਰਂ ਦਤ੍ਵਾਤਿ ਵੇਯ੍ਯਾਵਚ੍ਚਾਦੀਨਿ ਪਚ੍ਚਾਸਿਸਮਾਨੋ ਸਯਮੇਵ ਦਤ੍ਵਾ. ਅਚ੍ਛਿਨ੍ਦੇਯ੍ਯਾਤਿ ਵੇਯ੍ਯਾਵਚ੍ਚਾਦੀਨਿ ਅਕਰੋਨ੍ਤਂ ਦਿਸ੍ਵਾ ਸਕਸਞ੍ਞਾਯ ਅਚ੍ਛਿਨ੍ਦਨ੍ਤਸ੍ਸ ਵਤ੍ਥੁਗਣਨਾਯ ਆਪਤ੍ਤਿਯੋ. ਅਚ੍ਛਿਨ੍ਦਾਪੇਯ੍ਯਾਤਿਏਤ੍ਥ ਪਨ ‘‘ਅਚ੍ਛਿਨ੍ਦਾ’’ਤਿ ਆਣਤ੍ਤਿਯਾ ਦੁਕ੍ਕਟਂ, ਅਚ੍ਛਿਨ੍ਦੇਸੁ ਯਤ੍ਤਕਾਨਿ ਆਣਤ੍ਤਾਨਿ, ਤੇਸਂ ਗਣਨਾਯ ਆਪਤ੍ਤਿਯੋ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀਵਰਅਚ੍ਛਿਨ੍ਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ. ਅਨੁਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞਿਨੋ, ਵੇਮਤਿਕਸ੍ਸ, ਅਨੁਪਸਮ੍ਪਨ੍ਨਸਞ੍ਞਿਨੋ ਵਾ, ਉਪਸਮ੍ਪਨ੍ਨਸ੍ਸਾਪਿ ਵਿਕਪ੍ਪਨੁਪਗਪਚ੍ਛਿਮਚੀਵਰਂ ਠਪੇਤ੍ਵਾ ਅਞ੍ਞਂ ਪਰਿਕ੍ਖਾਰਂ, ਅਨੁਪਸਮ੍ਪਨ੍ਨਸ੍ਸ ਚ ਯਂਕਿਞ੍ਚਿ ਅਚ੍ਛਿਨ੍ਦਤੋ ਵਾ ਦੁਕ੍ਕਟਂ. ਤੇਨ ਤੁਟ੍ਠੇਨ ਵਾ ਕੁਪਿਤੇਨ ਵਾ ਦਿਨ੍ਨਂ ਪਨ ਤਸ੍ਸ ਵਿਸ੍ਸਾਸਂ ਵਾ ਗਣ੍ਹਨ੍ਤਸ੍ਸ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵਿਕਪ੍ਪਨੁਪਗਪਚ੍ਛਿਮਚੀਵਰਤਾ, ਸਾਮਂ ਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧਵਸੇਨ ਅਚ੍ਛਿਨ੍ਦਨਂ ਵਾ ਅਚ੍ਛਿਨ੍ਦਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ ਅਞ੍ਞਤ੍ਰ ਵੇਦਨਾਯ. ਵੇਦਨਾ ਪਨ ਇਧ ਦੁਕ੍ਖਵੇਦਨਾਯੇਵਾਤਿ.

ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਸੁਤ੍ਤਨ੍ਤਿ ਛਬ੍ਬਿਧਂ ਖੋਮਸੁਤ੍ਤਾਦਿਂ ਵਾ ਤੇਸਂ ਅਨੁਲੋਮਂ ਵਾ. ਵਿਞ੍ਞਾਪੇਤ੍ਵਾਤਿ ਚੀਵਰਤ੍ਥਾਯ ਯਾਚਿਤ੍ਵਾ. ਵਾਯਾਪੇਯ੍ਯਾਤਿ ‘‘ਚੀਵਰਂ ਮੇ, ਆਵੁਸੋ, ਵਾਯਥਾ’’ਤਿ ਅਕਪ੍ਪਿਯਾਯ ਵਿਞ੍ਞਤ੍ਤਿਯਾ ਵਾਯਾਪੇਯ੍ਯ. ਨਿਸ੍ਸਗ੍ਗਿਯਨ੍ਤਿ ਏਵਂ ਵਾਯਾਪੇਨ੍ਤਸ੍ਸ ਯੋ ਤਨ੍ਤਵਾਯੋ ਚੀਵਰਵਾਯਨਤ੍ਥਂ ਤੁਰਿਵੇਮਸਜ੍ਜਨਾਦਿਕੇ ਪਯੋਗੇ ਕਰੋਤਿ, ਤਸ੍ਸ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ.

ਰਾਜਗਹੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਚੀਵਰਵਾਯਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਵਿਞ੍ਞਾਪਿਤਸੁਤ੍ਤਂ ਵਿਞ੍ਞਾਪਿਤਤਨ੍ਤਵਾਯੇਨ ਵਾਯਾਪੇਨ੍ਤਸ੍ਸ ਦੀਘਤੋ ਵਿਦਤ੍ਥਿਮਤ੍ਤੇ ਤਿਰਿਯਞ੍ਚ ਹਤ੍ਥਮਤ੍ਤੇ ਵੀਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਇਤਿ ਯਾਵ ਚੀਵਰਂ ਵਡ੍ਢਤਿ, ਤਾਵ ਇਮਿਨਾ ਪਮਾਣੇਨ ਆਪਤ੍ਤਿਯੋ ਵਡ੍ਢਨ੍ਤਿ. ਤੇਨੇਵ ਪਨ ਅਵਿਞ੍ਞਤ੍ਤਿਯਾ ਲਦ੍ਧਸੁਤ੍ਤਂ ਵਾਯਾਪੇਨ੍ਤਸ੍ਸ ਯਥਾ ਪੁਬ੍ਬੇ ਨਿਸ੍ਸਗ੍ਗਿਯਂ, ਏਵਂ ਇਧ ਦੁਕ੍ਕਟਂ. ਤੇਨੇਵ ਵਿਞ੍ਞਤ੍ਤਞ੍ਚ ਅਵਿਞ੍ਞਤ੍ਤਞ੍ਚ ਵਾਯਾਪੇਨ੍ਤਸ੍ਸ ਸਚੇ ਵੁਤ੍ਤਪ੍ਪਮਾਣੇਨ ਕੇਦਾਰਬਦ੍ਧਂ ਵਿਯ ਚੀਵਰਂ ਹੋਤਿ, ਅਕਪ੍ਪਿਯਸੁਤ੍ਤਮਯੇ ਪਰਿਚ੍ਛੇਦੇ ਪਾਚਿਤ੍ਤਿਯਂ, ਇਤਰਸ੍ਮਿਂ ਤਥੇਵ ਦੁਕ੍ਕਟਂ. ਤਤੋ ਚੇ ਊਨਤਰਾ ਪਰਿਚ੍ਛੇਦਾ, ਸਬ੍ਬਪਰਿਚ੍ਛੇਦੇਸੁ ਦੁਕ੍ਕਟਾਨੇਵ. ਅਥ ਏਕਨ੍ਤਰਿਕੇਨ ਵਾ ਸੁਤ੍ਤੇਨ ਦੀਘਤੋ ਵਾ ਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍ਵਾ ਵੀਤਂ ਹੋਤਿ, ਪੁਬ੍ਬੇ ਵੁਤ੍ਤਪ੍ਪਮਾਣਗਣਨਾਯ ਦੁਕ੍ਕਟਾਨਿ. ਏਤੇਨੇਵ ਉਪਾਯੇਨ ਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਸੁਤ੍ਤੇ, ਕਪ੍ਪਿਯਾਕਪ੍ਪਿਯੇਹਿ ਤਨ੍ਤਵਾਯੇਹਿ ਸੁਤ੍ਤੇਪਿ ਕਪ੍ਪਿਯੇ ਅਕਪ੍ਪਿਯੇ ਕਪ੍ਪਿਯਾਕਪ੍ਪਿਯੇ ਚ ਆਪਤ੍ਤਿਭੇਦੋ ਵੇਦਿਤਬ੍ਬੋ. ਤਿਕਪਾਚਿਤ੍ਤਿਯਂ, ਅਵਾਯਾਪਿਤੇ ਵਾਯਾਪਿਤਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਚੀਵਰਸਿਬ੍ਬਨਆਯੋਗਕਾਯਬਨ੍ਧਨਅਂਸਬਦ੍ਧਕਪਤ੍ਤਤ੍ਥਵਿਕਪਰਿਸ੍ਸਾਵਨਾਨਂ ਅਤ੍ਥਾਯ ਸੁਤ੍ਤਂ ਵਿਞ੍ਞਾਪੇਨ੍ਤਸ੍ਸ, ਞਾਤਕਪ੍ਪਵਾਰਿਤੇਹਿ ਕਪ੍ਪਿਯਸੁਤ੍ਤਂ ਵਾਯਾਪੇਨ੍ਤਸ੍ਸ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ, ਚੀਵਰਤ੍ਥਾਯ ਵਿਞ੍ਞਾਪਿਤਸੁਤ੍ਤਂ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਧੋਵਾਪਨਸਿਕ੍ਖਾਪਦੇ ਵੁਤ੍ਤਨਯਾਨੇਵਾਤਿ.

ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਤਤ੍ਰ ਚੇ ਸੋ ਭਿਕ੍ਖੂਤਿ ਯਤ੍ਰ ਗਾਮੇ ਵਾ ਨਿਗਮੇ ਵਾ ਤਨ੍ਤਵਾਯਾ, ਤਤ੍ਰ. ਪੁਬ੍ਬੇ ਅਪ੍ਪਵਾਰਿਤੋਤਿ ਚੀਵਰਸਾਮਿਕੇਹਿ ਅਪ੍ਪਵਾਰਿਤੋ ਹੁਤ੍ਵਾ. ਵਿਕਪ੍ਪਂ ਆਪਜ੍ਜੇਯ੍ਯਾਤਿ ਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ ਆਪਜ੍ਜੇਯ੍ਯ. ਇਦਾਨਿ ਯੇਨਾਕਾਰੇਨ ਵਿਕਪ੍ਪਂ ਆਪਨ੍ਨੋ ਹੋਤਿ, ਤਂ ਦਸ੍ਸੇਤੁਂ ਇਦਂ ਖੋ, ਆਵੁਸੋਤਿਆਦਿ ਵੁਤ੍ਤਂ. ਤਤ੍ਥ ਆਯਤਨ੍ਤਿ ਦੀਘਂ. ਵਿਤ੍ਥਤਨ੍ਤਿ ਪੁਥੁਲਂ. ਅਪ੍ਪਿਤਨ੍ਤਿ ਘਨਂ. ਸੁਵੀਤਨ੍ਤਿ ਸੁਟ੍ਠੁ ਵੀਤਂ, ਸਬ੍ਬਟ੍ਠਾਨੇਸੁ ਸਮਂ ਕਤ੍ਵਾ ਵੀਤਂ. ਸੁਪ੍ਪਵਾਯਿਤਨ੍ਤਿ ਸੁਟ੍ਠੁ ਪਵਾਯਿਤਂ, ਸਬ੍ਬਟ੍ਠਾਨੇਸੁ ਸਮਂ ਕਤ੍ਵਾ ਤਨ੍ਤੇ ਪਸਾਰਿਤਂ. ਸੁਵਿਲੇਖਿਤਨ੍ਤਿ ਲੇਖਨਿਯਾ ਸੁਟ੍ਠੁ ਵਿਲੇਖਿਤਂ. ਸੁਵਿਤਚ੍ਛਿਤਨ੍ਤਿ ਕੋਚ੍ਛੇਨ ਸੁਟ੍ਠੁ ਵਿਤਚ੍ਛਿਤਂ, ਸੁਟ੍ਠੁ ਨਿਦ੍ਧੋਤਨ੍ਤਿ ਅਤ੍ਥੋ. ਪਿਣ੍ਡਪਾਤਮਤ੍ਤਮ੍ਪੀਤਿ ਏਤ੍ਥ ਚ ਨ ਭਿਕ੍ਖੁਨੋ ਪਿਣ੍ਡਪਾਤਦਾਨਮਤ੍ਤੇਨ ਤਂ ਨਿਸ੍ਸਗ੍ਗਿਯਂ ਹੋਤਿ, ਸਚੇ ਪਨ ਤੇ ਤਸ੍ਸ ਵਚਨੇਨ ਚੀਵਰਸਾਮਿਕਾਨਂ ਹਤ੍ਥਤੋ ਸੁਤ੍ਤਂ ਗਹੇਤ੍ਵਾ ਈਸਕਮ੍ਪਿ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਕਰੋਨ੍ਤਿ, ਅਥ ਤੇਸਂ ਪਯੋਗੇ ਭਿਕ੍ਖੁਨੋ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀਵਰੇ ਵਿਕਪ੍ਪਂ ਆਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਕੇ ਅਞ੍ਞਾਤਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਞਾਤਕਪ੍ਪਵਾਰਿਤਾਨਂ ਤਨ੍ਤਵਾਯੇਹਿ, ਅਞ੍ਞਸ੍ਸ ਵਾ ਅਤ੍ਥਾਯ, ਅਤ੍ਤਨੋ ਵਾ ਧਨੇਨ, ਮਹਗ੍ਘਂ ਵਾਯਾਪੇਤੁਕਾਮਂ ਅਪ੍ਪਗ੍ਘਂ ਵਾਯਾਪੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਞ੍ਞਾਤਕਅਪ੍ਪਵਾਰਿਤਾਨਂ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਵਿਕਪ੍ਪਮਾਪਜ੍ਜਨਤਾ, ਚੀਵਰਸ੍ਸ ਅਤ੍ਤੁਦ੍ਦੇਸਿਕਤਾ, ਤਸ੍ਸ ਵਚਨੇਨ ਸੁਤ੍ਤਵਡ੍ਢਨਂ, ਚੀਵਰਪ੍ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਧੋਵਾਪਨਸਿਕ੍ਖਾਪਦੇ ਵੁਤ੍ਤਨਯਾਨੇਵਾਤਿ.

ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਦਸਾਹਾਨਾਗਤਨ੍ਤਿ ਦਸ ਅਹਾਨਿ ਦਸਾਹਂ, ਤੇਨ ਦਸਾਹੇਨ ਅਨਾਗਤਾ ਦਸਾਹਾਨਾਗਤਾ, ਦਸਾਹੇਨ ਅਸਮ੍ਪਤ੍ਤਾਤਿ ਅਤ੍ਥੋ, ਤਂ ਦਸਾਹਾਨਾਗਤਂ, ਅਚ੍ਚਨ੍ਤਸਂਯੋਗਵਸੇਨ ਭੁਮ੍ਮਤ੍ਥੇ ਉਪਯੋਗਵਚਨਂ. ਕਤ੍ਤਿਕਤੇਮਾਸਿਕਪੁਣ੍ਣਮਨ੍ਤਿ ਪਠਮਕਤ੍ਤਿਕਪੁਣ੍ਣਮਂ, ਇਧਾਪਿ ਪਠਮਪਦਸ੍ਸ ਅਨੁਪਯੋਗਤਾ ਪੁਰਿਮਨਯੇਨੇਵ ਭੁਮ੍ਮਤ੍ਥੇ ਉਪਯੋਗਵਚਨਂ. ਇਦਂ ਵੁਤ੍ਤਂ ਹੋਤਿ – ਯਤੋ ਪਟ੍ਠਾਯ ਪਠਮਪ੍ਪਵਾਰਣਾ ‘‘ਦਸਾਹਾਨਾਗਤਾ’’ਤਿ ਵੁਚ੍ਚਤਿ, ਸਚੇਪਿ ਤਾਨਿ ਦਿਵਸਾਨਿ ਅਚ੍ਚਨ੍ਤਮੇਵ ਭਿਕ੍ਖੁਨੋ ਅਚ੍ਚੇਕਚੀਵਰਂ ਉਪ੍ਪਜ੍ਜੇਯ੍ਯ, ‘‘ਅਚ੍ਚੇਕਂ ਇਦ’’ਨ੍ਤਿ ਜਾਨਮਾਨੇਨ ਭਿਕ੍ਖੁਨਾ ਸਬ੍ਬਮ੍ਪਿ ਪਟਿਗ੍ਗਹੇਤਬ੍ਬਨ੍ਤਿ. ਤੇਨ ਪਵਾਰਣਾਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤਿ. ਕਾਮਞ੍ਚੇਸ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿਇਮਿਨਾਵ ਸਿਦ੍ਧੋ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤਂ. ਅਚ੍ਚੇਕਚੀਵਰਨ੍ਤਿ ਗਮਿਕਗਿਲਾਨਗਬ੍ਭਿਨਿਅਭਿਨਵੁਪ੍ਪਨ੍ਨਸਦ੍ਧਾਨਂ ਪੁਗ੍ਗਲਾਨਂ ਅਞ੍ਞਤਰੇਨ ‘‘ਵਸ੍ਸਾਵਾਸਿਕਂ ਦਸ੍ਸਾਮੀ’’ਤਿ ਏਵਂ ਆਰੋਚੇਤ੍ਵਾ ਦਿਨ੍ਨਂ. ਸਚੇ ਤਂ ਪੁਰੇ ਪਵਾਰਣਾਯ ਵਿਭਜਿਤਂ, ਯੇਨ ਗਹਿਤਂ, ਤੇਨ ਵਸ੍ਸਚ੍ਛੇਦੋ ਨ ਕਾਤਬ੍ਬੋ, ਕਰੋਤਿ ਚੇ, ਤਂ ਚੀਵਰਂ ਸਙ੍ਘਿਕਂ ਹੋਤਿ. ਯਾਵ ਚੀਵਰਕਾਲਸਮਯਨ੍ਤਿ ਅਨਤ੍ਥਤੇ ਕਥਿਨੇ ਯਾਵ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਯਾਵ ਪਞ੍ਚ ਮਾਸਾ, ਤਾਵ ਨਿਕ੍ਖਿਪਿਤਬ੍ਬਂ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਚ੍ਚੇਕਚੀਵਰਸ੍ਸ ਚੀਵਰਕਾਲਸਮਯਂ ਅਤਿਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਚੀਵਰਵਗ੍ਗਸ੍ਸ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਸਾਸਙ੍ਕਸਿਕ੍ਖਾਪਦਵਣ੍ਣਨਾ

ਨਵਮੇ ਉਪਵਸ੍ਸਂ ਖੋ ਪਨਾਤਿ ਏਤ੍ਥ ਉਪਵਸ੍ਸਨ੍ਤਿ ਉਪਵਸ੍ਸ, ਉਪਵਸਿਤ੍ਵਾਤਿ ਵੁਤ੍ਤਂ ਹੋਤਿ, ਉਪਸਮ੍ਪਜ੍ਜਨ੍ਤਿਆਦੀਸੁ (ਵਿਭ. ੫੭੦) ਵਿਯ ਹੇਤ੍ਥ ਅਨੁਨਾਸਿਕੋ ਦਟ੍ਠਬ੍ਬੋ, ਵਸ੍ਸਂ ਉਪਗਨ੍ਤ੍ਵਾ ਵਸਿਤ੍ਵਾ ਚਾਤਿ ਅਤ੍ਥੋ. ਇਮਸ੍ਸ ਚ ਪਦਸ੍ਸ ‘‘ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ ਵਿਹਰਨ੍ਤੋ’’ਤਿਇਮਿਨਾ ਸਮ੍ਬਨ੍ਧੋ, ਇਦਂ ਵੁਤ੍ਤਂ ਹੋਤਿ – ਵਸ੍ਸਂ ਉਪਗਨ੍ਤ੍ਵਾ ਵਸਿਤ੍ਵਾ ਚ ਤਤੋ ਪਰਂ ਪਚ੍ਛਿਮਕਤ੍ਤਿਕਪੁਣ੍ਣਮਪਰਿਯੋਸਾਨਕਾਲਂ ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ…ਪੇ… ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ. ਤਤ੍ਥ ਆਰਞ੍ਞਕਾਨੀਤਿ ਸਬ੍ਬਪਚ੍ਛਿਮਾਨਿ ਆਰੋਪਿਤੇਨ ਆਚਰਿਯਧਨੁਨਾ ਗਾਮਸ੍ਸ ਇਨ੍ਦਖੀਲਤੋ ਪਟ੍ਠਾਯ ਪਞ੍ਚਧਨੁਸਤਪ੍ਪਮਾਣੇ ਪਦੇਸੇ ਕਤਸੇਨਾਸਨਾਨਿ. ਸਚੇ ਪਨ ਅਪਰਿਕ੍ਖਿਤ੍ਤੋ ਗਾਮੋ ਹੋਤਿ, ਪਰਿਕ੍ਖੇਪਾਰਹਟ੍ਠਾਨਤੋ ਪਟ੍ਠਾਯ ਮਿਨੇਤਬ੍ਬਂ. ਸਚੇ ਵਿਹਾਰਸ੍ਸ ਪਰਿਕ੍ਖੇਪੋ ਵਾ ਅਪਰਿਕ੍ਖਿਤ੍ਤਸ੍ਸ ਯਂ ਗਾਮਤੋ ਸਬ੍ਬਪਠਮਂ ਸੇਨਾਸਨਂ ਵਾ ਚੇਤਿਯਂ ਵਾ ਬੋਧਿ ਵਾ ਧੁਵਸਨ੍ਨਿਪਾਤਟ੍ਠਾਨਂ ਵਾ ਯਾਵ, ਤਂ ਤਾਵ ਪਕਤਿਮਗ੍ਗੇਨ ਮਿਨੇਤਬ੍ਬਂ, ਅਞ੍ਞਂ ਮਗ੍ਗਂ ਕਾਤੁਂ, ਅਮਗ੍ਗੇਨ ਵਾ ਮਿਨੇਤੁਂ ਨ ਵਟ੍ਟਤਿ. ਸਾਸਙ੍ਕਸਮ੍ਮਤਾਨੀਤਿ ਚੋਰਾਦੀਨਂ ਨਿਵਿਟ੍ਠੋਕਾਸਾਦਿਦਸ੍ਸਨੇਨ ‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨਿ, ਏਵਂ ਸਞ੍ਞਾਤਾਨੀਤਿ ਅਤ੍ਥੋ. ਸਹ ਪਟਿਭਯੇਨ ਸਪ੍ਪਟਿਭਯਾਨਿ, ਚੋਰੇਹਿ ਮਨੁਸ੍ਸਾਨਂ ਹਤਵਿਲੁਤ੍ਤਾਕੋਟਿਤਭਾਵਦਸ੍ਸਨਤੋ ਸਨ੍ਨਿਹਿਤਬਲਵਭਯਾਨੀਤਿ ਅਤ੍ਥੋ.

ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ ਆਰਞ੍ਞਕਸ੍ਸ ਸੇਨਾਸਨਸ੍ਸ ਸਮਨ੍ਤਾ ਸਬ੍ਬਦਿਸਾਭਾਗੇਸੁ ਅਤ੍ਤਨਾ ਅਭਿਰੁਚਿਤੇ ਗੋਚਰਗਾਮੇ ਨਿਕ੍ਖਿਪੇਯ੍ਯ. ਤਞ੍ਚ ਖੋ ਸਤਿਯਾ ਅਙ੍ਗਸਮ੍ਪਤ੍ਤਿਯਾ, ਤਤ੍ਰਾਯਂ ਅਙ੍ਗਸਮ੍ਪਤ੍ਤਿ – ਪੁਰਿਮਿਕਾਯ ਉਪਗਨ੍ਤ੍ਵਾ ਮਹਾਪਵਾਰਣਾਯ ਪਵਾਰਿਤੋ ਹੋਤਿ, ਇਦਮੇਕਂ ਅਙ੍ਗਂ. ਕਤ੍ਤਿਕਮਾਸੋਯੇਵ ਹੋਤਿ, ਇਦਂ ਦੁਤਿਯਂ ਅਙ੍ਗਂ. ਪਞ੍ਚਧਨੁਸਤਿਕਪਚ੍ਛਿਮਪ੍ਪਮਾਣਯੁਤ੍ਤਂ ਸੇਨਾਸਨਂ ਹੋਤਿ, ਇਦਂ ਤਤਿਯਂ ਅਙ੍ਗਂ. ਊਨਪ੍ਪਮਾਣੇ ਵਾ ਗਾਵੁਤਤੋ ਅਤਿਰੇਕਪ੍ਪਮਾਣੇ ਵਾ ਨ ਲਭਤਿ, ਯਤ੍ਰ ਹਿ ਪਿਣ੍ਡਾਯ ਚਰਿਤ੍ਵਾ ਭੁਤ੍ਤਵੇਲਾਯਮੇਵ ਪੁਨ ਵਿਹਾਰਂ ਸਕ੍ਕਾ ਆਗਨ੍ਤੁਂ, ਤਦੇਵ ਇਧਾਧਿਪ੍ਪੇਤਂ. ਸਾਸਙ੍ਕਸਪ੍ਪਟਿਭਯਮੇਵ ਹੋਤਿ, ਇਦਂ ਚਤੁਤ੍ਥਂ ਅਙ੍ਗਂ ਹੋਤੀਤਿ. ਕੋਚਿਦੇਵ ਪਚ੍ਚਯੋਤਿ ਕਿਞ੍ਚਿਦੇਵ ਕਾਰਣਂ. ਤੇਨ ਚੀਵਰੇਨਾਤਿ ਤੇਨ ਅਨ੍ਤਰਘਰੇ ਨਿਕ੍ਖਿਤ੍ਤਚੀਵਰੇਨ. ਵਿਪ੍ਪਵਾਸਾਯਾਤਿ ਵਿਯੋਗਵਾਸਾਯ. ਤਤੋ ਚੇ ਉਤ੍ਤਰਿ ਵਿਪ੍ਪਵਸੇਯ੍ਯਾਤਿ ਛਾਰਤ੍ਤਤੋ ਉਤ੍ਤਰਿ ਤਸ੍ਮਿਂ ਸੇਨਾਸਨੇ ਸਤ੍ਤਮਂ ਅਰੁਣਂ ਉਟ੍ਠਾਪੇਯ੍ਯਾਤਿ ਅਤ੍ਥੋ, ਤਥਾ ਅਸਕ੍ਕੋਨ੍ਤੇਨ ਪਨ ਗਾਮਸੀਮਂ ਓਕ੍ਕਮਿਤ੍ਵਾ ਸਭਾਯਂ ਵਾ ਯਤ੍ਥ ਕਤ੍ਥਚਿ ਵਾ ਵਸਿਤ੍ਵਾ ਚੀਵਰਪ੍ਪਵਤ੍ਤਿਂ ਞਤ੍ਵਾ ਪਕ੍ਕਮਿਤੁਂ ਵਟ੍ਟਤਿ. ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਚੀਵਰੇਨ ਵਿਪ੍ਪਵਾਸਸਮ੍ਮੁਤਿਂ ਦੇਤਿ, ਤਂ ਠਪੇਤ੍ਵਾ ਅਲਦ੍ਧਸਮ੍ਮੁਤਿਕਸ੍ਸ ਅਤਿਰੇਕਛਾਰਤ੍ਤਂ ਵਿਪ੍ਪਵਸਤੋ ਨਿਸ੍ਸਗ੍ਗਿਯਂ ਹੋਤਿ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਚੀਵਰਵਿਪ੍ਪਵਾਸਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਚੀਵਰਵਗ੍ਗਸ੍ਸ ਦੁਤਿਯਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਸਾਸਙ੍ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਰਿਣਤਸਿਕ੍ਖਾਪਦਵਣ੍ਣਨਾ

ਦਸਮੇ ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ. ਸੋ ਹਿ ਸਙ੍ਘਸ੍ਸ ਪਰਿਣਤਤ੍ਤਾ ਹਤ੍ਥੇ ਅਨਾਰੁਲ਼੍ਹੋਪਿ ਏਕੇਨ ਪਰਿਯਾਯੇਨ ਸਙ੍ਘਸਨ੍ਤਕੋ ਹੋਤਿ. ਲਾਭਨ੍ਤਿ ਲਭਿਤਬ੍ਬਂ ਚੀਵਰਾਦਿਵਤ੍ਥੁਂ. ਪਰਿਣਤਨ੍ਤਿ ‘‘ਦਸ੍ਸਾਮ ਕਰਿਸ੍ਸਾਮਾ’’ਤਿ ਵਚੀਭੇਦੇਨ ਵਾ ਹਤ੍ਥਮੁਦ੍ਦਾਯ ਵਾ ਸਙ੍ਘਸ੍ਸ ਨਿਨ੍ਨਂ ਹੁਤ੍ਵਾ ਠਿਤਂ. ਅਤ੍ਤਨੋ ਪਰਿਣਾਮੇਯ੍ਯਾਤਿ ‘‘ਇਦਂ ਮਯ੍ਹਂ ਦੇਥਾ’’ਤਿਆਦੀਨਿ ਵਦਨ੍ਤੋ ਅਤ੍ਤਨਿਨ੍ਨਂ ਕਰੇਯ੍ਯ. ਸਚੇ ਪਨ ਸਙ੍ਘਸ੍ਸ ਦਿਨ੍ਨਂ ਹੋਤਿ, ਤਂ ਗਹੇਤੁਂ ਨ ਵਟ੍ਟਤਿ, ਸਙ੍ਘਸ੍ਸੇਵ ਦਾਤਬ੍ਬਂ. ਪਰਿਣਤਂ ਪਨ ਸਹਧਮ੍ਮਿਕਾਨਂ ਵਾ ਗਿਹੀਨਂ ਵਾ ਅਨ੍ਤਮਸੋ ਮਾਤੁਸਨ੍ਤਕਮ੍ਪਿ ਅਤ੍ਤਨੋ ਪਰਿਣਾਮੇਨ੍ਤਸ੍ਸ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਰਿਣਾਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਪਰਿਣਤੇ ਵੇਮਤਿਕਸ੍ਸ, ਅਪਰਿਣਤੇ ਪਰਿਣਤਸਞ੍ਞਿਨੋ ਚੇਵ ਵੇਮਤਿਕਸ੍ਸ ਚ, ਸਙ੍ਘਚੇਤਿਯਪੁਗ੍ਗਲੇਸੁ ਯਸ੍ਸ ਕਸ੍ਸਚਿ ਪਰਿਣਤਂ ਅਞ੍ਞਸਙ੍ਘਾਦੀਨਂ ਪਰਿਣਾਮੇਨ੍ਤਸ੍ਸ ਚ ਦੁਕ੍ਕਟਂ. ਅਪਰਿਣਤਸਞ੍ਞਿਨੋ, ‘‘ਕਤ੍ਥ ਦੇਮਾ’’ਤਿ ਪੁਚ੍ਛਿਤੇ ‘‘ਯਤ੍ਥ ਤੁਮ੍ਹਾਕਂ ਚਿਤ੍ਤਂ ਪਸੀਦਤਿ, ਤਤ੍ਥ ਦੇਥ, ਤੁਮ੍ਹਾਕਂ ਦੇਯ੍ਯਧਮ੍ਮੋ ਪਰਿਭੋਗਂ ਵਾ ਲਭੇਯ੍ਯਾ’’ਤਿਆਦੀਨਿ ਵਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘੇ ਪਰਿਣਤਭਾਵੋ, ਤਂ ਞਤ੍ਵਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.

ਪਰਿਣਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਪਤ੍ਤਵਗ੍ਗੋ ਤਤਿਯੋ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਨਿਸ੍ਸਗ੍ਗਿਯਪਾਚਿਤ੍ਤਿਯਵਣ੍ਣਨਾ ਨਿਟ੍ਠਿਤਾ.