੨. ਏਲ਼ਕਲੋਮਵਗ੍ਗੋ

੧. ਕੋਸਿਯਸਿਕ੍ਖਾਪਦਵਣ੍ਣਨਾ

ਏਲ਼ਕਲੋਮਵਗ੍ਗਸ੍ਸ ਪਠਮੇ ਕੋਸਿਯਮਿਸ੍ਸਕਨ੍ਤਿ ਏਕੇਨਾਪਿ ਕੋਸਿਯਂਸੁਨਾ ਅਨ੍ਤਮਸੋ ਤਸ੍ਸ ਕਰਣਟ੍ਠਾਨੇ ਵਾਤਵੇਗੇਨ ਨਿਪਾਤਿਤੇਨਾਪਿ ਮਿਸ੍ਸੀਕਤਂ. ਸਨ੍ਥਤਨ੍ਤਿ ਸਮੇ ਭੂਮਿਭਾਗੇ ਕੋਸਿਯਂਸੂਨਿ ਉਪਰੂਪਰਿ ਸਨ੍ਥਰਿਤ੍ਵਾ ਕਞ੍ਜਿਯਾਦੀਹਿ ਸਿਞ੍ਚਿਤ੍ਵਾ ਕਤ੍ਤਬ੍ਬਤਾਲਕ੍ਖਣਂ. ਕਾਰਾਪੇਯ੍ਯ ਨਿਸ੍ਸਗ੍ਗਿਯਨ੍ਤਿ ਕਰਣਕਾਰਾਪਨਪ੍ਪਯੋਗੇਸੁ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਏਤ੍ਥ ਚ ‘‘ਇਦਂ ਮੇ, ਭਨ੍ਤੇ, ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਰਾਪਿਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੪੪) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ, ਇਮਸ੍ਸੇਵ ਵਚਨਸ੍ਸ ਅਨੁਸਾਰੇਨ ਇਤੋ ਪਰਂ ਸਬ੍ਬਸਨ੍ਥਤਂ ਵੇਦਿਤਬ੍ਬਂ. ਸਕ੍ਕਾ ਹਿ ਏਤ੍ਤਾਵਤਾ ਜਾਨਿਤੁਨ੍ਤਿ ਨ ਤਂ ਇਤੋ ਪਰਂ ਦਸ੍ਸਯਿਸ੍ਸਾਮ.

ਆਲ਼ਵਿਯਂ ਛਬ੍ਬਗ੍ਗਿਯੇ ਆਰਬ੍ਭ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਤ੍ਤਨੋ ਅਤ੍ਥਾਯ ਕਾਰਾਪਨਵਸੇਨ ਸਾਣਤ੍ਤਿਕਂ, ਅਤ੍ਤਨਾ ਵਿਪ੍ਪਕਤਪਅਯੋਸਾਪਨਨਯੇਨ ਚਤੁਕ੍ਕਪਾਚਿਤ੍ਤਿਯਂ, ਅਞ੍ਞਸ੍ਸਤ੍ਥਾਯ ਕਰਣਕਾਰਾਪਨੇਸੁ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਨੇ ਚ ਦੁਕ੍ਕਟਂ. ਵਿਤਾਨਾਦਿਕਰਣੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਕੋਸਿਯਮਿਸ੍ਸਕਭਾਵੋ, ਅਤ੍ਤਨੋ ਅਤ੍ਥਾਯ ਸਨ੍ਥਤਸ੍ਸ ਕਰਣਕਾਰਾਪਨਂ, ਪਟਿਲਾਭੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਧੋਵਾਪਨਸਿਕ੍ਖਾਪਦੇ ਵੁਤ੍ਤਨਯੇਨੇਵਾਤਿ.

ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਸੁਦ੍ਧਕਾਲ਼ਕਾਨਨ੍ਤਿ ਸੁਦ੍ਧਾਨਂ ਕਾਲ਼ਕਾਨਂ ਅਞ੍ਞੇਹਿ ਅਮਿਸ੍ਸੀਕਤਾਨਂ. ਵੇਸਾਲਿਯਂ ਛਬ੍ਬਗ੍ਗਿਯੇ ਆਰਬ੍ਭ ਤਾਦਿਸਂ ਸਨ੍ਥਤਂ ਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਪਠਮਸਦਿਸਮੇਵਾਤਿ.

ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ

ਤਤਿਯੇ ਦ੍ਵੇ ਭਾਗਾਤਿ ਦ੍ਵੇ ਕੋਟ੍ਠਾਸਾ. ਆਦਾਤਬ੍ਬਾਤਿ ਗਹੇਤਬ੍ਬਾ. ਗੋਚਰਿਯਾਨਨ੍ਤਿ ਕਪਿਲਵਣ੍ਣਾਨਂ. ਅਯਂ ਪਨੇਤ੍ਥ ਵਿਨਿਚ੍ਛਯੋ – ਯਤ੍ਤਕੇਹਿ ਕਤ੍ਤੁਕਾਮੋ ਹੋਤਿ, ਤੇਸੁ ਤੁਲਯਿਤ੍ਵਾ ਦ੍ਵੇ ਕੋਟ੍ਠਾਸਾ ਕਾਲ਼ਕਾਨਂ ਗਹੇਤਬ੍ਬਾ, ਏਕੋ ਓਦਾਤਾਨਂ, ਏਕੋ ਗੋਚਰਿਯਾਨਂ. ਏਕਸ੍ਸਾਪਿ ਕਾਲ਼ਕਲੋਮਸ੍ਸ ਅਤਿਰੇਕਭਾਵੇ ਨਿਸ੍ਸਗ੍ਗਿਯਂ ਹੋਤਿ, ਊਨਕਂ ਵਟ੍ਟਤਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਤਾਦਿਸਂ ਸਨ੍ਥਤਂ ਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਕਿਰਿਯਾਕਿਰਿਯਂ, ਸੇਸਂ ਪਠਮਸਦਿਸਮੇਵਾਤਿ. ਇਮਾਨਿ ਪਨ ਤੀਣਿ ਨਿਸ੍ਸਜ੍ਜਿਤ੍ਵਾ ਪਟਿਲਦ੍ਧਾਨਿਪਿ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ.

ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਓਰੇਨ ਚੇ ਛਨ੍ਨਂ ਵਸ੍ਸਾਨਨ੍ਤਿ ਛਨ੍ਨਂ ਵਸ੍ਸਾਨਂ ਓਰਿਮਭਾਗੇ, ਅਨ੍ਤੋਤਿ ਅਤ੍ਥੋ. ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਸਨ੍ਥਤਸਮ੍ਮੁਤਿਂ ਦੇਤਿ, ਤਂ ਠਪੇਤ੍ਵਾ ਅਲਦ੍ਧਸਮ੍ਮੁਤਿਕਸ੍ਸ ਛਬ੍ਬਸ੍ਸਬ੍ਭਨ੍ਤਰੇ ਅਞ੍ਞਂ ਸਨ੍ਥਤਂ ਕਰੋਨ੍ਤਸ੍ਸ ਨਿਸ੍ਸਗ੍ਗਿਯਂ ਹੋਤਿ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਵਸ੍ਸਂ ਸਨ੍ਥਤਂ ਕਾਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾ ਯੇਨ ਲਦ੍ਧਾ ਹੋਤਿ, ਤਸ੍ਸ ਯਾਵ ਰੋਗੋ ਨ ਵੂਪਸਮ੍ਮਤਿ, ਵੂਪਸਨ੍ਤੋ ਵਾ ਪੁਨ ਕੁਪ੍ਪਤਿ, ਤਾਵ ਗਤਗਤਟ੍ਠਾਨੇ ਅਨੁਵਸ੍ਸਮ੍ਪਿ ਕਾਤੁਂ ਵਟ੍ਟਤਿ, ਅਞ੍ਞਸ੍ਸਤ੍ਥਾਯ ਕਾਰੇਤੁਂ, ਕਤਞ੍ਚ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਮ੍ਪਿ ਵਟ੍ਟਤਿ, ਸੇਸਂ ਪਠਮਸਦਿਸਮੇਵਾਤਿ.

ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਨਿਸੀਦਨਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਪੁਰਾਣਸਨ੍ਥਤਂ ਨਾਮ ਯਤ੍ਥ ਸਕਿਮ੍ਪਿ ਨਿਸਿਨ੍ਨੋ ਵਾ ਹੋਤਿ ਨਿਪਨ੍ਨੋ ਵਾ. ਸਮਨ੍ਤਾਤਿ ਏਕਪਸ੍ਸਤੋ ਵਟ੍ਟਂ ਵਾ ਚਤੁਰਸ੍ਸਂ ਵਾ ਛਿਨ੍ਦਿਤ੍ਵਾ ਗਹਿਤਟ੍ਠਾਨਂ ਯਥਾ ਵਿਦਤ੍ਥਿਮਤ੍ਤਂ ਹੋਤਿ, ਏਵਂ ਗਹੇਤਬ੍ਬਂ. ਸਨ੍ਥਰਨ੍ਤੇਨ ਪਨ ਏਕਦੇਸੇ ਵਾ ਸਨ੍ਥਰਿਤਬ੍ਬਂ, ਵਿਜਟੇਤ੍ਵਾ ਵਾ ਮਿਸ੍ਸਕਂ ਕਤ੍ਵਾ ਸਨ੍ਥਰਿਤਬ੍ਬਂ, ਏਵਂ ਥਿਰਤਰਂ ਹੋਤਿ. ਅਨਾਦਾ ਚੇਤਿ ਸਤਿ ਪੁਰਾਣਸਨ੍ਥਤੇ ਅਗ੍ਗਹੇਤ੍ਵਾ. ਅਸਤਿ ਪਨ ਅਗ੍ਗਹੇਤ੍ਵਾਪਿ ਵਟ੍ਟਤਿ, ਅਞ੍ਞਸ੍ਸਤ੍ਥਾਯ ਕਾਰੇਤੁਂ, ਕਤਞ੍ਚ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਮ੍ਪਿ ਵਟ੍ਟਤਿ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਨ੍ਥਤਵਿਸ੍ਸਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਤਤਿਯਸਦਿਸਮੇਵਾਤਿ.

ਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾਤਿ ਅਦ੍ਧਾਨਸਙ੍ਖਾਤਂ ਦੀਘਮਗ੍ਗਂ ਪਟਿਪਨ੍ਨਸ੍ਸ, ਸਬ੍ਬਞ੍ਚੇਤਂ ਵਤ੍ਥੁਮਤ੍ਤਦੀਪਨਮੇਵ, ਯਤ੍ਥ ਕਤ੍ਥਚਿ ਪਨ ਧਮ੍ਮੇਨ ਲਭਿਤ੍ਵਾ ਗਣ੍ਹਤੋ ਦੋਸੋ ਨਤ੍ਥਿ. ਤਿਯੋਜਨਪਰਮਨ੍ਤਿ ਗਹਿਤਟ੍ਠਾਨਤੋ ਤਿਯੋਜਨਪ੍ਪਮਾਣਂ ਦੇਸਂ. ਸਹਤ੍ਥਾਤਿ ਸਹਤ੍ਥੇਨ, ਅਤ੍ਤਨਾ ਹਰਿਤਬ੍ਬਾਨੀਤਿ ਅਤ੍ਥੋ. ਅਸਨ੍ਤੇ ਹਾਰਕੇਤਿ ਅਸਨ੍ਤੇਯੇਵ ਅਞ੍ਞਸ੍ਮਿਮ੍ਪਿ ਹਾਰਕੇ. ਸਚੇ ਪਨ ਅਤ੍ਥਿ, ਤਂ ਗਾਹੇਤੁਂ ਵਟ੍ਟਤਿ. ਅਤ੍ਤਨਾ ਪਨ ਅਨ੍ਤਮਸੋ ਵਾਤਾਬਾਧਪ੍ਪਟਿਕਾਰਤ੍ਥਂ ਸੁਤ੍ਤਕੇਨ ਅਬਨ੍ਧਿਤ੍ਵਾ ਕਣ੍ਣਚ੍ਛਿਦ੍ਦੇ ਪਕ੍ਖਿਤ੍ਤਾਨਿਪਿ ਆਦਾਯ ਤਿਯੋਜਨਂ ਏਕਂ ਪਾਦਂ ਅਤਿਕ੍ਕਾਮੇਨ੍ਤਸ੍ਸ ਦੁਕ੍ਕਟਂ, ਦੁਤਿਯਪਾਦਾਤਿਕ੍ਕਮੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਤਿਯੋਜਨਾਤਿਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕਤਿਯੋਜਨੇ ਅਤਿਰੇਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਤਿਯੋਜਨਂ ਹਰਣਪਚ੍ਚਾਹਰਣੇ, ਵਾਸਾਧਿਪ੍ਪਾਯੇਨ ਗਨ੍ਤ੍ਵਾ ਤਤੋ ਪਰਂ ਹਰਣੇ, ਅਚ੍ਛਿਨ੍ਨਂ ਵਾ ਨਿਸ੍ਸਟ੍ਠਂ ਵਾ ਪਟਿਲਭਿਤ੍ਵਾ ਹਰਣੇ, ਅਞ੍ਞਂ ਹਰਾਪਨੇ, ਅਨ੍ਤਮਸੋ ਸੁਤ੍ਤਕੇਨਪਿ ਬਦ੍ਧਕਤਭਣ੍ਡਹਰਣੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਏਲ਼ਕਲੋਮਾਨਂ ਅਕਤਭਣ੍ਡਤਾ, ਪਠਮਪ੍ਪਟਿਲਾਭੋ, ਅਤ੍ਤਨਾ ਆਦਾਯ ਵਾ ਅਞ੍ਞਸ੍ਸ ਅਜਾਨਨ੍ਤਸ੍ਸ ਯਾਨੇ ਪਕ੍ਖਿਪਿਤ੍ਵਾ ਵਾ ਤਿਯੋਜਨਾਤਿਕ੍ਕਮਨਂ, ਆਹਰਣਪਚ੍ਚਾਹਰਣਂ, ਅਵਾਸਾਧਿਪ੍ਪਾਯਤਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਏਲ਼ਕਲੋਮਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਸਕ੍ਕੇਸੁ ਛਬ੍ਬਗ੍ਗਿਯੇ ਆਰਬ੍ਭ ਏਲ਼ਕਲੋਮਧੋਵਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਤਤ੍ਥ ਪੁਰਾਣਚੀਵਰਧੋਵਾਪਨੇ ਵੁਤ੍ਤਨਯੇਨੇਵ ਸਬ੍ਬੋਪਿ ਵਿਨਿਚ੍ਛਯੋ ਵੇਦਿਤਬ੍ਬੋ.

ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਜਾਤਰੂਪਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਜਾਤਰੂਪਰਜਤਨ੍ਤਿ ਸੁਵਣ੍ਣਞ੍ਚੇਵ ਰੂਪਿਯਞ੍ਚ, ਅਪਿਚ ਕਹਾਪਣੋ ਲੋਹਮਾਸਕਦਾਰੁਮਾਸਕਜਤੁਮਾਸਕਾਦਯੋਪਿ ਯੇ ਵੋਹਾਰਂ ਗਚ੍ਛਨ੍ਤਿ, ਸਬ੍ਬੇ ਤੇ ਇਧ ਰਜਤਨ੍ਤ੍ਵੇਵ ਵੁਤ੍ਤਾ. ਉਗ੍ਗਣ੍ਹੇਯ੍ਯ ਵਾਤਿ ਅਤ੍ਤਨੋ ਅਤ੍ਥਾਯ ਦਿਯ੍ਯਮਾਨਂ ਵਾ ਯਤ੍ਥਕਤ੍ਥਚਿ ਠਿਤਂ ਵਾ ਨਿਪ੍ਪਰਿਗ੍ਗਹਿਤਂ ਦਿਸ੍ਵਾ ਸਯਂ ਗਣ੍ਹੇਯ੍ਯ ਵਾ. ਉਗ੍ਗਣ੍ਹਾਪੇਯ੍ਯ ਵਾਤਿ ਤਦੇਵ ਅਞ੍ਞੇਨ ਗਾਹਾਪੇਯ੍ਯ ਵਾ. ਉਪਨਿਕ੍ਖਿਤ੍ਤਂ ਵਾ ਸਾਦਿਯੇਯ੍ਯਾਤਿ ‘‘ਇਦਂ ਅਯ੍ਯਸ੍ਸ ਹੋਤੂ’’ਤਿ ਏਵਂ ਸਮ੍ਮੁਖਾ ਵਾ, ‘‘ਅਸੁਕਸ੍ਮਿਂ ਨਾਮ ਠਾਨੇ ਮਮ ਹਿਰਞ੍ਞਸੁਵਣ੍ਣਂ, ਤਂ ਤੁਯ੍ਹਂ ਹੋਤੂ’’ਤਿ ਏਵਂ ਪਰਮ੍ਮੁਖਾ ਠਿਤਂ ਵਾ ਕੇਵਲਂ ਵਾਚਾਯ ਵਾ ਹਤ੍ਥਮੁਦ੍ਦਾਯ ਵਾ ‘‘ਤੁਯ੍ਹ’’ਨ੍ਤਿ ਵਤ੍ਵਾ ਪਰਿਚ੍ਚਤ੍ਤਂ ਯੋ ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਚਿਤ੍ਤੇਨ ਅਧਿਵਾਸੇਯ੍ਯ, ਅਯਂ ‘‘ਸਾਦਿਯੇਯ੍ਯਾ’’ਤਿ ਵੁਚ੍ਚਤਿ. ਸਚੇ ਪਨ ਚਿਤ੍ਤੇਨ ਸਾਦਿਯਤਿ, ਗਣ੍ਹਿਤੁਕਾਮੋ ਹੋਤਿ, ਕਾਯੇਨ ਵਾ ਵਾਚਾਯ ਵਾ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਸੁਦ੍ਧਚਿਤ੍ਤੋ ਹੁਤ੍ਵਾ ‘‘ਨਯਿਦਂ ਅਮ੍ਹਾਕਂ ਕਪ੍ਪਤੀ’’ਤਿ ਨ ਸਾਦਿਯਤਿ, ਵਟ੍ਟਤਿ. ਨਿਸ੍ਸਗ੍ਗਿਯਨ੍ਤਿ ਉਗ੍ਗਹਣਾਦੀਸੁ ਯਂਕਿਞ੍ਚਿ ਕਰੋਨ੍ਤਸ੍ਸ ਅਘਨਬਦ੍ਧੇਸੁ ਵਤ੍ਥੂਸੁ ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤਂ ਨਿਸ੍ਸਜ੍ਜਨ੍ਤੇਨ ‘‘ਅਹਂ, ਭਨ੍ਤੇ, ਰੂਪਿਯਂ ਪਟਿਗ੍ਗਹੇਸਿਂ, ਇਦਂ ਮੇ, ਭਨ੍ਤੇ, ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ (ਪਾਰਾ. ੫੮੪) ਏਵਂ ਸਙ੍ਘਮਜ੍ਝੇਯੇਵ ਨਿਸ੍ਸਜ੍ਜਿਤਬ੍ਬਂ. ਸਚੇ ਤਤ੍ਥ ਕੋਚਿ ਗਹਟ੍ਠੋ ਆਗਚ੍ਛਤਿ, ‘‘ਇਦਂ ਜਾਨਾਹੀ’’ਤਿ ਵਤ੍ਤਬ੍ਬੋ. ‘‘ਇਮਿਨਾ ਕਿਂ ਆਹਰਿਯ੍ਯਤੂ’’ਤਿ ਭਣਨ੍ਤੇ ਪਨ ‘‘ਇਦਂ ਨਾਮਾ’’ਤਿ ਅਵਤ੍ਵਾ ‘‘ਸਪ੍ਪਿਆਦੀਨਿ ਭਿਕ੍ਖੂਨਂ ਕਪ੍ਪਨ੍ਤੀ’’ਤਿ ਏਵਂ ਕਪ੍ਪਿਯਂ ਆਚਿਕ੍ਖਿਤਬ੍ਬਂ. ਸਚੇ ਸੋ ਆਹਰਤਿ, ਰੂਪਿਯਪ੍ਪਟਿਗ੍ਗਾਹਕਂ ਠਪੇਤ੍ਵਾ ਸਬ੍ਬੇਹਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਰੂਪਿਯਪ੍ਪਟਿਗ੍ਗਾਹਕਸ੍ਸ ਪਨ ਯਂ ਤਪ੍ਪਚ੍ਚਯਾ ਉਪ੍ਪਨ੍ਨਂ, ਤਂ ਅਞ੍ਞੇਨ ਲਭਿਤ੍ਵਾ ਦਿਯ੍ਯਮਾਨਮ੍ਪਿ ਅਨ੍ਤਮਸੋ ਤਤੋ ਨਿਬ੍ਬਤ੍ਤਰੁਕ੍ਖਚ੍ਛਾਯਾਪਿ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਸਚੇ ਪਨ ਸੋ ਕਿਞ੍ਚਿ ਆਹਰਿਤੁਂ ਨ ਇਚ੍ਛਤਿ, ‘‘ਇਮਂ ਛਟ੍ਟੇਹੀ’’ਤਿ ਵਤ੍ਤਬ੍ਬੋ. ਸਚੇ ਯਤ੍ਥ ਕਤ੍ਥਚਿ ਨਿਕ੍ਖਿਪਤਿ, ਗਹੇਤ੍ਵਾ ਵਾ ਗਚ੍ਛਤਿ, ਨ ਵਾਰੇਤਬ੍ਬੋ. ਨੋ ਚੇ ਛਟ੍ਟੇਤਿ, ਪਞ੍ਚਙ੍ਗਸਮਨ੍ਨਾਗਤੋ ਭਿਕ੍ਖੁ ਰੂਪਿਯਛਟ੍ਟਕੋ ਸਮ੍ਮਨ੍ਨਿਤਬ੍ਬੋ. ਤੇਨ ਅਨਿਮਿਤ੍ਤਂ ਕਤ੍ਵਾਵ ਗੂਥਂ ਵਿਯ ਛਟ੍ਟੇਤਬ੍ਬਂ. ਸਚੇ ਨਿਮਿਤ੍ਤਂ ਕਰੋਤਿ, ਦੁਕ੍ਕਟਂ ਆਪਜ੍ਜਤਿ.

ਰਾਜਗਹੇ ਉਪਨਨ੍ਦਂ ਆਰਬ੍ਭ ਰੂਪਿਯਪ੍ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਰੂਪਿਯੇ ਰੂਪਿਯਸਞ੍ਞਿਨੋ ਵੇਮਤਿਕਸ੍ਸ ਵਾ, ਸਙ੍ਘਚੇਤਿਯਾਦੀਨਂ ਅਤ੍ਥਾਯ ਗਣ੍ਹਨ੍ਤਸ੍ਸ, ਮੁਤ੍ਤਾਮਣਿਆਦਿਪ੍ਪਟਿਗ੍ਗਹਣੇ ਚ ਦੁਕ੍ਕਟਂ. ਰਤਨਸਿਕ੍ਖਾਪਦਨਯੇਨ ਨਿਕ੍ਖਿਪਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਜਾਤਰੂਪਰਜਤਭਾਵੋ, ਅਤ੍ਤੁਦ੍ਦੇਸਿਕਤਾ, ਗਹਣਾਦੀਸੁ ਅਞ੍ਞਤਰਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਸੁ ਸਿਯਾ ਕਿਰਿਯਂ ਗਹਣੇਨ ਆਪਜ੍ਜਨਤੋ, ਸਿਯਾ ਅਕਿਰਿਯਂ ਪਟਿਕ੍ਖੇਪਸ੍ਸ ਅਕਰਣਤੋ, ਸੇਸਂ ਸਞ੍ਚਰਿਤ੍ਤੇ ਵੁਤ੍ਤਨਯਮੇਵਾਤਿ.

ਜਾਤਰੂਪਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ

ਨਵਮੇ ਨਾਨਪ੍ਪਕਾਰਕਨ੍ਤਿ ਕਤਾਦਿਵਸੇਨ ਅਨੇਕਵਿਧਂ. ਰੂਪਿਯਸਂਵੋਹਾਰਨ੍ਤਿ ਜਾਤਰੂਪਰਜਤਪਰਿਵਤ੍ਤਨਂ. ਪੁਰਿਮਸਿਕ੍ਖਾਪਦੇਨ ਹਿ ਨਿਸ੍ਸਗ੍ਗਿਯਵਤ੍ਥੁਦੁਕ੍ਕਟਵਤ੍ਥੂਨਂ ਪਟਿਗ੍ਗਹਣਂ ਵਾਰਿਤਂ, ਇਮਿਨਾ ਪਰਿਵਤ੍ਤਨਂ. ਤਸ੍ਮਾ ਦੁਕ੍ਕਟਵਤ੍ਥੁਨਾ ਦੁਕ੍ਕਟਵਤ੍ਥੁਕਪ੍ਪਿਯਵਤ੍ਥੂਨਿ, ਕਪ੍ਪਿਯਵਤ੍ਥੁਨਾ ਚ ਦੁਕ੍ਕਟਵਤ੍ਥੁਂ ਪਰਿਵਤ੍ਤੇਨ੍ਤਸ੍ਸ ਦੁਕ੍ਕਟਂ. ਨਿਸ੍ਸਗ੍ਗਿਯਵਤ੍ਥੁਨਾ ਪਨ ਨਿਸ੍ਸਗ੍ਗਿਯਵਤ੍ਥੁਂ ਵਾ ਦੁਕ੍ਕਟਵਤ੍ਥੁਂ ਵਾ ਕਪ੍ਪਿਯਵਤ੍ਥੁਂ ਵਾ, ਦੁਕ੍ਕਟਵਤ੍ਥੁਕਪ੍ਪਿਯਵਤ੍ਥੂਹਿ ਚ ਨਿਸ੍ਸਗ੍ਗਿਯਵਤ੍ਥੁਂ ਪਰਿਵਤ੍ਤੇਨ੍ਤਸ੍ਸ ਨਿਸ੍ਸਗ੍ਗਿਯਂ ਹੋਤਿ, ਤਂ ਪੁਰਿਮਨਯਾਨੁਸਾਰੇਨੇਵ ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬਂ, ਨਿਸ੍ਸਟ੍ਠਵਤ੍ਥੁਸ੍ਮਿਞ੍ਚ ਤਤ੍ਥ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਰੂਪਿਯਸਂਵੋਹਾਰਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਯਂ ਅਤ੍ਤਨੋ ਧਨੇਨ ਪਰਿਵਤ੍ਤੇਤਿ, ਤਸ੍ਸ ਵਾ ਧਨਸ੍ਸ ਵਾ ਰੂਪਿਯਭਾਵੋ ਚੇਵ, ਪਰਿਵਤ੍ਤਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਕਿਰਿਯਂ, ਸੇਸਂ ਅਨਨ੍ਤਰਸਿਕ੍ਖਾਪਦੇ ਵੁਤ੍ਤਨਯਮੇਵਾਤਿ.

ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ

ਦਸਮੇ ਨਾਨਪ੍ਪਕਾਰਕਨ੍ਤਿ ਚੀਵਰਾਦੀਨਂ ਕਪ੍ਪਿਯਭਣ੍ਡਾਨਂ ਵਸੇਨ ਅਨੇਕਵਿਧਂ. ਕਯਵਿਕ੍ਕਯਨ੍ਤਿ ਕਯਞ੍ਚੇਵ ਵਿਕ੍ਕਯਞ੍ਚ. ‘‘ਇਮਿਨਾ ਇਮਂ ਦੇਹਿ, ਇਮਂ ਆਹਰ, ਪਰਿਵਤ੍ਤੇਹਿ, ਚੇਤਾਪੇਹੀ’’ਤਿ ਇਮਿਨਾ ਹਿ ਨਯੇਨ ਪਰਸ੍ਸ ਕਪ੍ਪਿਯਭਣ੍ਡਂ ਗਣ੍ਹਨ੍ਤੋ ਕਯਂ ਸਮਾਪਜ੍ਜਤਿ, ਅਤ੍ਤਨੋ ਕਪ੍ਪਿਯਭਣ੍ਡਂ ਦੇਨ੍ਤੋ ਵਿਕ੍ਕਯਂ ਸਮਾਪਜ੍ਜਤਿ. ਤਸ੍ਮਾ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਯਂ ਏਵਂ ਅਤ੍ਤਨੋ ਕਪ੍ਪਿਯਭਣ੍ਡਂ ਦਤ੍ਵਾ ਮਾਤੁ ਸਨ੍ਤਕਮ੍ਪਿ ਕਪ੍ਪਿਯਭਣ੍ਡਂ ਗਣ੍ਹਾਤਿ, ਤਂ ਨਿਸ੍ਸਗ੍ਗਿਯਂ ਹੋਤਿ. ਵੁਤ੍ਤਲਕ੍ਖਣਵਸੇਨ ਸਙ੍ਘਗਣਪੁਗ੍ਗਲੇਸੁ ਯਸ੍ਸ ਕਸ੍ਸਚਿ ਨਿਸ੍ਸਜ੍ਜਿਤਬ੍ਬਂ, ‘‘ਇਮਂ ਭੁਞ੍ਜਿਤ੍ਵਾ ਵਾ ਗਹੇਤ੍ਵਾ ਵਾ ਇਦਂ ਨਾਮ ਆਹਰ ਵਾ ਕਰੋਹਿ ਵਾ’’ਤਿ ਰਜਨਾਦਿਂ ਆਹਰਾਪੇਤ੍ਵਾ ਵਾ ਧਮਕਰਣਾਦਿਪਰਿਕ੍ਖਾਰਂ ਭੂਮਿਸੋਧਨਾਦਿਞ੍ਚ ਨਵਕਮ੍ਮਂ ਕਾਰੇਤ੍ਵਾ ਵਾ ਸਨ੍ਤਂ ਵਤ੍ਥੁ ਨਿਸ੍ਸਜ੍ਜਿਤਬ੍ਬਂ, ਅਸਨ੍ਤੇ ਪਾਚਿਤ੍ਤਿਯਂ ਦੇਸੇਤਬ੍ਬਮੇਵ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਕਯਵਿਕ੍ਕਯਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਇਦਂ ਕਿਂ ਅਗ੍ਘਤੀ’’ਤਿ ਏਵਂ ਅਗ੍ਘਂ ਪੁਚ੍ਛਨ੍ਤਸ੍ਸ, ਯਸ੍ਸ ਹਤ੍ਥਤੋ ਭਣ੍ਡਂ ਗਣ੍ਹਿਤੁਕਾਮੋ ਹੋਤਿ, ਤਂ ਠਪੇਤ੍ਵਾ ਅਞ੍ਞਂ ਅਨ੍ਤਮਸੋ ਤਸ੍ਸੇਵ ਪੁਤ੍ਤਭਾਤੁਕਮ੍ਪਿ ਕਪ੍ਪਿਯਕਾਰਕਂ ਕਤ੍ਵਾ ‘‘ਇਮਿਨਾ ਇਦਂ ਨਾਮ ਗਹੇਤ੍ਵਾ ਦੇਹੀ’’ਤਿ ਆਚਿਕ੍ਖਨ੍ਤਸ੍ਸ, ‘‘ਇਦਂ ਅਮ੍ਹਾਕਂ ਅਤ੍ਥਿ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਅਤ੍ਥੋ’’ਤਿ ਏਵਂ ਵਤ੍ਵਾ ਅਤ੍ਤਨੋ ਧਨੇਨ ਲਦ੍ਧਂ ਗਣ੍ਹਨ੍ਤਸ੍ਸ, ਸਹਧਮ੍ਮਿਕੇਹਿ ਸਦ੍ਧਿਂ ਕਯਵਿਕ੍ਕਯਂ ਕਰੋਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਯਂ ਅਤ੍ਤਨੋ ਧਨੇਨ ਪਰਿਵਤ੍ਤੇਤਿ, ਯੇਨ ਚ ਪਰਿਵਤ੍ਤੇਤਿ, ਤੇਸਂ ਕਪ੍ਪਿਯਵਤ੍ਥੁਤਾ, ਅਸਹਧਮ੍ਮਿਕਤਾ, ਕਯਵਿਕ੍ਕਯਾਪਜ੍ਜਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸੇਸਂ ਰੂਪਿਯਸਂਵੋਹਾਰੇ ਵੁਤ੍ਤਨਯਮੇਵਾਤਿ.

ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਏਲ਼ਕਲੋਮਵਗ੍ਗੋ ਦੁਤਿਯੋ.