੧. ਚੀਵਰਵਗ੍ਗੋ

੧. ਕਥਿਨਸਿਕ੍ਖਾਪਦਵਣ੍ਣਨਾ

ਨਿਸ੍ਸਗ੍ਗਿਯੇਸੁ ਪਨ ਚੀਵਰਵਗ੍ਗਸ੍ਸ ਤਾਵ ਪਠਮਸਿਕ੍ਖਾਪਦੇ ਨਿਟ੍ਠਿਤਚੀਵਰਸ੍ਮਿਨ੍ਤਿ ਸੂਚਿਕਮ੍ਮਪਰਿਯੋਸਾਨੇਨ ਵਾ, ‘‘ਨਟ੍ਠਂ ਵਾ ਵਿਨਟ੍ਠਂ ਵਾ ਦਡ੍ਢਂ ਵਾ ਚੀਵਰਾਸਾ ਵਾ ਉਪਚ੍ਛਿਨ੍ਨਾ’’ਤਿ (ਪਾਰਾ. ੪੬੩) ਇਮੇਸੁ ਵਾ ਯੇਨ ਕੇਨਚਿ ਆਕਾਰੇਨ ਨਿਟ੍ਠਿਤੇ ਚੀਵਰਸ੍ਮਿਂ, ਚੀਵਰਸ੍ਸ ਕਰਣਪਲਿਬੋਧੇ ਉਪਚ੍ਛਿਨ੍ਨੇਤਿ ਅਤ੍ਥੋ. ਅਤ੍ਥਤਕਥਿਨਸ੍ਸ ਹਿ ਭਿਕ੍ਖੁਨੋ ਯਾਵ ਇਮੇਹਾਕਾਰੇਹਿ ਚੀਵਰਪਲਿਬੋਧੋ ਨ ਛਿਜ੍ਜਤਿ, ਤਾਵ ਕਥਿਨਾਨਿਸਂਸਂ ਲਭਤਿ. ਉਬ੍ਭਤਸ੍ਮਿਂ ਕਥਿਨੇਤਿ ਯਂ ਸਙ੍ਘਸ੍ਸ ਕਥਿਨਂ ਅਤ੍ਥਤਂ, ਤਸ੍ਮਿਞ੍ਚ ਉਬ੍ਭਤੇ. ਤਤ੍ਰੇਵਂ ਸਙ੍ਖੇਪਤੋ ਕਥਿਨਤ੍ਥਾਰੋ ਚ ਉਬ੍ਭਾਰੋ ਚ ਵੇਦਿਤਬ੍ਬੋ. ਅਯਞ੍ਹਿ ਕਥਿਨਤ੍ਥਾਰੋ ਨਾਮ ਭਗਵਤਾ ਪੁਰਿਮਵਸ੍ਸਂਵੁਟ੍ਠਾਨਂ ਅਨੁਞ੍ਞਾਤੋ, ਸੋ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਪਞ੍ਚਨ੍ਨਂ ਜਨਾਨਂ ਵਟ੍ਟਤਿ, ਤਸ੍ਮਾ ਯਤ੍ਥ ਚਤ੍ਤਾਰੋ ਵਾ ਤਯੋ ਵਾ ਦ੍ਵੇ ਵਾ ਏਕੋ ਵਾ ਪੁਰਿਮਵਸ੍ਸਂ ਉਪਗਤੋ, ਤਤ੍ਥ ਪਚ੍ਛਿਮਵਸ੍ਸੂਪਗਤੇ ਗਣਪੂਰਕੇ ਕਤ੍ਵਾ ਅਤ੍ਥਰਿਤਬ੍ਬਂ, ਤੇ ਚ ਗਣਪੂਰਕਾਵ ਹੋਨ੍ਤਿ, ਆਨਿਸਂਸੇ ਨ ਲਭਨ੍ਤਿ, ਤਸ੍ਮਾ ਸਚੇ ਪੁਰਿਮਵਸ੍ਸਂਵੁਟ੍ਠਾਨਂ ਗਹਟ੍ਠਪਬ੍ਬਜਿਤੇਸੁ ਯੋ ਕੋਚਿ ਧਮ੍ਮੇਨ ਸਮੇਨ ਚੀਵਰਂ ਦੇਤਿ ‘‘ਇਮਿਨਾ ਕਥਿਨਂ ਅਤ੍ਥਰਥਾ’’ਤਿ (ਮਹਾਵ. ੩੦੬-੩੦੯), ਤਂ ਖਨ੍ਧਕੇ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਕਥਿਨਤ੍ਥਾਰਾਰਹਸ੍ਸ ਭਿਕ੍ਖੁਨੋ ਦਾਤਬ੍ਬਂ. ਤੇਨ ਤਦਹੇਵ ਪਞ੍ਚ ਵਾ ਅਤਿਰੇਕਾਨਿ ਵਾ ਖਣ੍ਡਾਨਿ ਛਿਨ੍ਦਿਤ੍ਵਾ ਸਙ੍ਘਾਟਿ ਵਾ ਉਤ੍ਤਰਾਸਙ੍ਗੋ ਵਾ ਅਨ੍ਤਰਵਾਸਕੋ ਵਾ ਕਾਤਬ੍ਬੋ, ਸੇਸਭਿਕ੍ਖੂਹਿਪਿ ਤਸ੍ਸ ਸਹਾਯੇਹਿ ਭਵਿਤਬ੍ਬਂ, ਸਚੇ ਕਤਚੀਵਰਮੇਵ ਉਪ੍ਪਜ੍ਜਤਿ, ਸੁਨ੍ਦਰਮੇਵ. ਅਚ੍ਛਿਨ੍ਨਾਸਿਬ੍ਬਿਤਂ ਪਨ ਨ ਵਟ੍ਟਤਿ. ਤੇਨ ਭਿਕ੍ਖੁਨਾ ਸਚੇ ਸਙ੍ਘਾਟਿਯਾ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਂ ਸਙ੍ਘਾਟਿਂ ਪਚ੍ਚੁਦ੍ਧਰਿਤ੍ਵਾ ਨਵਂ ਸਙ੍ਘਾਟਿਂ ਅਧਿਟ੍ਠਹਿਤ੍ਵਾ ‘‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’’ਤਿ ਅਤ੍ਥਰਿਤਬ੍ਬਂ. ਉਤ੍ਤਰਾਸਙ੍ਗਅਨ੍ਤਰਵਾਸਕੇਸੁਪਿ ਏਸੇਵ ਨਯੋ. ਤਤੋ ਤੇਨ ਪੁਰਿਮਵਸ੍ਸਂਵੁਟ੍ਠੇ ਅਨ੍ਤੋਸੀਮਾਗਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ (ਪਰਿ. ੪੧੩) ਵਤ੍ਤਬ੍ਬਂ, ਥੇਰਾਨਞ੍ਚ ਨਵਾਨਞ੍ਚ ਬਹੂਨਞ੍ਚ ਏਕਸ੍ਸ ਚ ਅਨੁਰੂਪਂ ਸਲ੍ਲਕ੍ਖੇਤ੍ਵਾ ਵਤ੍ਤਬ੍ਬਂ. ਤੇਹਿਪਿ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨ’’ਨ੍ਤਿ ਵਾ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨ’’ਨ੍ਤਿ ਵਾ ਵਤ੍ਵਾ ‘‘ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ ਵਾ ‘‘ਅਨੁਮੋਦਾਮੀ’’ਤਿ ਵਾ ਵਤ੍ਤਬ੍ਬਂ. ਪੁਰਿਮਵਸ੍ਸਂਵੁਟ੍ਠੇਸੁਪਿ ਯੇ ਅਨੁਮੋਦਨ੍ਤਿ, ਤੇਸਂਯੇਵ ਅਤ੍ਥਤਂ ਹੋਤਿ ਕਥਿਨਂ. ਤੇ ਤਤੋ ਪਟ੍ਠਾਯ ਯਾਵ ਕਥਿਨਸ੍ਸੁਬ੍ਭਾਰਾ ਅਨਾਮਨ੍ਤਚਾਰੋ, ਅਸਮਾਦਾਨਚਾਰੋ, ਯਾਵਦਤ੍ਥਚੀਵਰਂ, ਗਣਭੋਜਨਂ, ਯੋ ਚ ਤਤ੍ਥ ਚੀਵਰੁਪ੍ਪਾਦੋ, ਤਸ੍ਮਿਂ ਆਵਾਸੇ ਸਙ੍ਘਸ੍ਸ ਉਪ੍ਪਨ੍ਨਚੀਵਰਞ੍ਚਾਤਿ ਇਮੇ ਪਞ੍ਚਾਨਿਸਂਸੇ ਲਭਨ੍ਤਿ, ਅਯਂ ਤਾਵ ਕਥਿਨਤ੍ਥਾਰੋ. ਤਂ ਪਨੇਤਂ ਕਥਿਨਂ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸੁਬ੍ਭਾਰਾਯ ਪਕ੍ਕਮਨਨ੍ਤਿਕਾ ਨਿਟ੍ਠਾਨਨ੍ਤਿਕਾ ਸਨ੍ਨਿਟ੍ਠਾਨਨ੍ਤਿਕਾ ਨਾਸਨਨ੍ਤਿਕਾ ਸਵਨਨ੍ਤਿਕਾ ਆਸਾਵਚ੍ਛੇਦਿਕਾ ਸੀਮਾਤਿਕ੍ਕਮਨਨ੍ਤਿਕਾ ਸਹੁਬ੍ਭਾਰਾ’’ਤਿ (ਮਹਾਵ. ੩੧੦) ਏਵਂ ਵੁਤ੍ਤਾਸੁ ਅਟ੍ਠਸੁ ਮਾਤਿਕਾਸੁ ਅਞ੍ਞਤਰਵਸੇਨ ਉਦ੍ਧਰੀਯਤਿ, ਤਤ੍ਥ ਵਿਤ੍ਥਾਰਵਿਨਿਚ੍ਛਯੋ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੩੧੦) ਵੁਤ੍ਤਨਯੇਨ ਵੇਦਿਤਬ੍ਬੋ. ਇਤਿ ‘‘ਉਬ੍ਭਤਸ੍ਮਿਂ ਕਥਿਨੇ’’ਤਿਇਮਿਨਾ ਸੇਸਪਲਿਬੋਧਾਭਾਵਂ ਦਸ੍ਸੇਤਿ.

ਦਸਾਹਪਰਮਨ੍ਤਿ ਦਸ ਅਹਾਨਿ ਪਰਮੋ ਪਰਿਚ੍ਛੇਦੋ ਅਸ੍ਸਾਤਿ ਦਸਾਹਪਰਮੋ, ਤਂ ਦਸਾਹਪਰਮਂ ਕਾਲਂ ਧਾਰੇਤਬ੍ਬਨ੍ਤਿ ਅਤ੍ਥੋ. ਅਧਿਟ੍ਠਿਤਵਿਕਪ੍ਪਿਤੇਸੁ ਅਪਰਿਯਾਪਨ੍ਨਤ੍ਤਾ ਅਤਿਰੇਕਂ ਚੀਵਰਨ੍ਤਿ ਅਤਿਰੇਕਚੀਵਰਂ, ਚੀਵਰਂ ਨਾਮ ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗਨ੍ਤਿ ਏਤੇਸਂ ਵਾ ਤਦਨੁਲੋਮਾਨਂ ਵਾ ਅਞ੍ਞਤਰਂ ਅਯਮਸ੍ਸ ਜਾਤਿ, ਪਮਾਣਤੋ ਪਨ ਤਂ ਵਿਕਪ੍ਪਨੁਪਗਂ ਪਚ੍ਛਿਮਂ ਇਧ ਅਧਿਪ੍ਪੇਤਂ. ਵੁਤ੍ਤਞ੍ਹੇਤਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਆਯਾਮਤੋ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਂ ਚੀਵਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮). ਯਂ ਪਨ ਵੁਤ੍ਤਂ ‘‘ਅਧਿਟ੍ਠਿਤਵਿਕਪ੍ਪਿਤੇਸੁ ਅਪਰਿਯਾਪਨ੍ਨਤ੍ਤਾ’’ਤਿ, ਏਤ੍ਥ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ, ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ, ਨਿਸੀਦਨਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ ਪਚ੍ਚਤ੍ਥਰਣਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ, ਕਣ੍ਡੁਪ੍ਪਟਿਚ੍ਛਾਦਿਂ ਯਾਵ ਆਬਾਧਾ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ, ਮੁਖਪੁਞ੍ਛਨਚੋਲ਼ਕਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ, ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਇਮਿਨਾ ਨਯੇਨ ਅਧਿਟ੍ਠਾਤਬ੍ਬਵਿਕਪ੍ਪੇਤਬ੍ਬਤਾ ਜਾਨਿਤਬ੍ਬਾ. ਤਤ੍ਥ ਤਿਚੀਵਰਂ ਅਧਿਟ੍ਠਹਨ੍ਤੇਨ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਪਮਾਣਯੁਤ੍ਤਮੇਵ ਅਧਿਟ੍ਠਾਤਬ੍ਬਂ, ਤਸ੍ਸ ਪਮਾਣਂ ਉਕ੍ਕਟ੍ਠਪਰਿਚ੍ਛੇਦੇਨ ਸੁਗਤਚੀਵਰਤੋ ਊਨਕਂ ਵਟ੍ਟਤਿ, ਲਾਮਕਪਰਿਚ੍ਛੇਦੇਨ ਸਙ੍ਘਾਟਿਯਾ ਤਾਵ ਉਤ੍ਤਰਾਸਙ੍ਗਸ੍ਸ ਚ ਦੀਘਤੋ ਮੁਟ੍ਠਿਪਞ੍ਚਕਂ, ਤਿਰਿਯਂ ਮੁਟ੍ਠਿਤ੍ਤਿਕਂ, ਅਨ੍ਤਰਵਾਸਕੋ ਦੀਘਤੋ ਮੁਟ੍ਠਿਪਞ੍ਚਕੋ, ਤਿਰਿਯਂ ਦ੍ਵਿਹਤ੍ਥੋਪਿ ਵਟ੍ਟਤਿ. ਵੁਤ੍ਤਪ੍ਪਮਾਣਤੋ ਪਨ ਅਤਿਰੇਕਞ੍ਚ ਊਨਕਞ੍ਚ ‘‘ਪਰਿਕ੍ਖਾਰਚੋਲ਼’’ਨ੍ਤਿ ਅਧਿਟ੍ਠਾਤਬ੍ਬਂ. ਤਤ੍ਥ ਯਸ੍ਮਾ ‘‘ਦ੍ਵੇ ਚੀਵਰਸ੍ਸ ਅਧਿਟ੍ਠਾਨਾਨਿ ਕਾਯੇਨ ਵਾ ਅਧਿਟ੍ਠੇਤਿ, ਵਾਚਾਯ ਵਾ ਅਧਿਟ੍ਠੇਤੀ’’ਤਿ ਵੁਤ੍ਤਂ, ਤਸ੍ਮਾ ਪੁਰਾਣਸਙ੍ਘਾਟਿਂ ‘‘ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍ਵਾ ਨਵਂ ਹਤ੍ਥੇਨ ਗਹੇਤ੍ਵਾ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍ਵਾ ਕਾਯਵਿਕਾਰਂ ਕਰੋਨ੍ਤੇਨ ਕਾਯੇਨ ਵਾ ਅਧਿਟ੍ਠਾਤਬ੍ਬਾ, ਵਚੀਭੇਦਂ ਕਤ੍ਵਾ ਵਾਚਾਯ ਵਾ ਅਧਿਟ੍ਠਾਤਬ੍ਬਾ. ਤਤ੍ਰ ਦੁਵਿਧਂ ਅਧਿਟ੍ਠਾਨਂ – ਸਚੇ ਹਤ੍ਥਪਾਸੇ ਹੋਤਿ, ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਅਥ ਅਨ੍ਤੋਗਬ੍ਭਾਦੀਸੁ ਸਾਮਨ੍ਤਵਿਹਾਰੇ ਵਾ ਹੋਤਿ, ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ‘‘ਏਤਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਏਸ ਨਯੋ ਉਤ੍ਤਰਾਸਙ੍ਗੇ ਚ ਅਨ੍ਤਰਵਾਸਕੇ ਚ. ਨਾਮਮਤ੍ਤਮੇਵ ਹਿ ਵਿਸੇਸੋ. ਤਸ੍ਮਾ ਸਬ੍ਬਾਨਿ ਸਙ੍ਘਾਟਿਂ ਉਤ੍ਤਰਾਸਙ੍ਗਂ ਅਨ੍ਤਰਵਾਸਕਨ੍ਤਿ ਏਵਂ ਅਤ੍ਤਨੋ ਅਤ੍ਤਨੋ ਨਾਮੇਨੇਵ ਅਧਿਟ੍ਠਾਤਬ੍ਬਾਨਿ. ਸਚੇ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ ਸਙ੍ਘਾਟਿਆਦੀਨਿ ਕਰੋਤਿ, ਨਿਟ੍ਠਿਤੇ ਰਜਨੇ ਚ ਕਪ੍ਪੇ ਚ ‘‘ਇਮਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍ਵਾ ਪੁਨ ਅਧਿਟ੍ਠਾਤਬ੍ਬਾਨਿ. ਇਦਞ੍ਚ ਪਨ ਤਿਚੀਵਰਂ ਸੁਖਪਰਿਭੋਗਤ੍ਥਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਮ੍ਪਿ ਵਟ੍ਟਤਿ.

ਵਸ੍ਸਿਕਸਾਟਿਕਾ ਅਨਤਿਰਿਤ੍ਤਪਮਾਣਾ ਨਾਮਂ ਗਹੇਤ੍ਵਾ ਵੁਤ੍ਤਨਯੇਨੇਵ ਚਤ੍ਤਾਰੋ ਵਸ੍ਸਿਕੇ ਮਾਸੇ ਅਧਿਟ੍ਠਾਤਬ੍ਬਾ, ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ, ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤਿ, ਦ੍ਵੇ ਪਨ ਨ ਵਟ੍ਟਨ੍ਤਿ. ਨਿਸੀਦਨਂ ਵੁਤ੍ਤਨਯੇਨ ਅਧਿਟ੍ਠਾਤਬ੍ਬਮੇਵ, ਤਞ੍ਚ ਖੋ ਪਮਾਣਯੁਤ੍ਤਂ ਏਕਮੇਵ, ਦ੍ਵੇ ਨ ਵਟ੍ਟਨ੍ਤਿ. ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤਬ੍ਬਮੇਵ, ਤਂ ਪਨ ਮਹਨ੍ਤਮ੍ਪਿ ਏਕਮ੍ਪਿ ਬਹੂਨਿਪਿ ਵਟ੍ਟਨ੍ਤਿ, ਨੀਲਮ੍ਪਿ ਪੀਤਕਮ੍ਪਿ ਸਦਸਮ੍ਪਿ ਪੁਪ੍ਫਦਸਮ੍ਪੀਤਿ ਸਬ੍ਬਪ੍ਪਕਾਰਮ੍ਪਿ ਵਟ੍ਟਤਿ. ਕਣ੍ਡੁਪ੍ਪਟਿਚ੍ਛਾਦਿ ਯਾਵ ਆਬਾਧੋ ਅਤ੍ਥਿ, ਤਾਵ ਪਮਾਣਿਕਾ ਅਧਿਟ੍ਠਾਤਬ੍ਬਾ, ਆਬਾਧੇ ਵੂਪਸਨ੍ਤੇ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ, ਸਾ ਏਕਾਵ ਵਟ੍ਟਤਿ. ਮੁਖਪੁਞ੍ਛਨਚੋਲ਼ਂ ਅਧਿਟ੍ਠਾਤਬ੍ਬਮੇਵ, ਤਂ ਪਨ ਏਕਮ੍ਪਿ ਬਹੂਨਿਪਿ ਮਹਨ੍ਤਮ੍ਪਿ ਵਟ੍ਟਤਿਯੇਵ. ਪਰਿਕ੍ਖਾਰਚੋਲ਼ੇ ਗਣਨਾ ਨਤ੍ਥਿ, ਯਤ੍ਤਕਂ ਇਚ੍ਛਤਿ, ਤਤ੍ਤਕਂ ਅਧਿਟ੍ਠਾਤਬ੍ਬਮੇਵ. ਥਵਿਕਾਪਿ ਪਰਿਸ੍ਸਾਵਨਮ੍ਪਿ ਵਿਕਪ੍ਪਨੁਪਗਂ ਪਚ੍ਛਿਮਪਮਾਣਂ ‘‘ਪਰਿਕ੍ਖਾਰਚੋਲ਼’’ਨ੍ਤਿ ਅਧਿਟ੍ਠਾਤਬ੍ਬਮੇਵ, ਬਹੂਨਿਪਿ ਏਕਤੋ ਕਤ੍ਵਾ ‘‘ਇਮਾਨਿ ਚੀਵਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਾਮੀ’’ਤਿਆਦਿਨਾ ਨਯੇਨ ਅਧਿਟ੍ਠਾਤੁਂ ਵਟ੍ਟਤਿਯੇਵ. ਮਞ੍ਚਭਿਸਿ ਪੀਠਭਿਸਿ ਬਿਬ੍ਬੋਹਨਂ ਪਾਵਾਰੋ ਕੋਜਵੋਤਿ ਏਤੇਸੁ ਪਨ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇ ਚ ਅਧਿਟ੍ਠਾਨਕਿਚ੍ਚਂ ਨਤ੍ਥਿਯੇਵ. ਸਬ੍ਬਞ੍ਚ ਪਨੇਤਂ ਵੁਤ੍ਤਪ੍ਪਕਾਰੇਨ ਅਧਿਟ੍ਠਿਤਚੀਵਰਂ ਅਞ੍ਞਸ੍ਸ ਦਾਨੇਨ, ਅਚ੍ਛਿਨ੍ਦਿਤ੍ਵਾ ਗਹਣੇਨ, ਵਿਸ੍ਸਾਸਗ੍ਗਾਹੇਨ, ਹੀਨਾਯਾਵਤ੍ਤਨੇਨ, ਸਿਕ੍ਖਾਪਚ੍ਚਕ੍ਖਾਨੇਨ, ਕਾਲਙ੍ਕਿਰਿਯਾਯ, ਲਿਙ੍ਗਪਰਿਵਤ੍ਤਨੇਨ, ਪਚ੍ਚੁਦ੍ਧਰਣੇਨਾਤਿ ਇਮੇਹਿ ਅਟ੍ਠਹਿ ਕਾਰਣੇਹਿ ਅਧਿਟ੍ਠਾਨਂ ਵਿਜਹਤਿ. ਤਿਚੀਵਰਂ ਪਨ ਕਨਿਟ੍ਠਙ੍ਗੁਲਿਨਖਪਿਟ੍ਠਿਪ੍ਪਮਾਣੇਨ ਛਿਦ੍ਦੇਨਾਪਿ ਵਿਜਹਤਿ, ਤਞ੍ਚ ਖੋ ਵਿਨਿਬ੍ਬੇਧੇਨੇਵ. ਸਚੇ ਹਿ ਛਿਦ੍ਦਸ੍ਸ ਅਬ੍ਭਨ੍ਤਰੇ ਏਕਤਨ੍ਤੁਪਿ ਅਚ੍ਛਿਨ੍ਨੋ ਹੋਤਿ, ਰਕ੍ਖਤਿਯੇਵ. ਤਤ੍ਥ ਸਙ੍ਘਾਟਿਯਾ ਚ ਉਤ੍ਤਰਾਸਙ੍ਗਸ੍ਸ ਚ ਦੀਘਨ੍ਤਤੋ ਵਿਦਤ੍ਥਿਪ੍ਪਮਾਣਸ੍ਸ ਤਿਰਿਯਨ੍ਤਤੋ ਅਟ੍ਠਙ੍ਗੁਲਪ੍ਪਮਾਣਸ੍ਸ ਪਦੇਸਸ੍ਸ ਓਰਤੋ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਅਨ੍ਤਰਵਾਸਕੇਪਿ ਦੀਘਨ੍ਤਤੋ ਏਤਦੇਵ ਪਮਾਣਂ, ਤਿਰਿਯਨ੍ਤੇਨ ਪਨ ਚਤੁਰਙ੍ਗੁਲਤਾ ਵੇਦਿਤਬ੍ਬਾ. ਤਿਣ੍ਣਨ੍ਨਮ੍ਪਿ ਵੁਤ੍ਤੋਕਾਸਸ੍ਸ ਪਰਤੋ ਨ ਭਿਨ੍ਦਤਿ, ਤਸ੍ਮਾ ਛਿਦ੍ਦੇ ਜਾਤੇ ਤਿਚੀਵਰਂ ਅਤਿਰੇਕਚੀਵਰਟ੍ਠਾਨੇ ਤਿਟ੍ਠਤਿ, ਸੂਚਿਕਮ੍ਮਂ ਕਤ੍ਵਾ ਪੁਨ ਅਧਿਟ੍ਠਾਤਬ੍ਬਂ. ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਾਪਿ, ਕਣ੍ਡੁਪ੍ਪਟਿਚ੍ਛਾਦਿ ਆਬਾਧਵੂਪਸਮੇਨਾਪਿ ਅਧਿਟ੍ਠਾਨਂ ਵਿਜਹਤਿ. ਤਸ੍ਮਾ ਸਾ ਤਤੋ ਪਰਂ ਵਿਕਪ੍ਪੇਤਬ੍ਬਾ. ਵਿਕਪ੍ਪਨਲਕ੍ਖਣਂ ਪਨ ਸਬ੍ਬਚੀਵਰਾਨਂ ਵਿਕਪ੍ਪਨਸਿਕ੍ਖਾਪਦੇਯੇਵ ਵਣ੍ਣਯਿਸ੍ਸਾਮ. ਕੇਵਲਞ੍ਹਿ ਇਮਸ੍ਮਿਂ ਓਕਾਸੇ ਯਂ ਏਵਂ ਅਨਧਿਟ੍ਠਿਤਂ ਅਵਿਕਪ੍ਪਿਤਞ੍ਚ, ਤਂ ‘‘ਅਤਿਰੇਕਚੀਵਰ’’ਨ੍ਤਿ ਵੇਦਿਤਬ੍ਬਂ.

ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਤਂ ਯਥਾਵੁਤ੍ਤਜਾਤਿਪ੍ਪਮਾਣਂ ਚੀਵਰਂਦਸਾਹਪਰਮਂ ਕਾਲਂ ਅਤਿਕ੍ਕਾਮਯਤੋ ਏਤ੍ਥਨ੍ਤਰੇ ਯਥਾ ਅਤਿਰੇਕਚੀਵਰਂ ਨ ਹੋਤਿ, ਤਥਾ ਅਕ੍ਰੁਬ੍ਬਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਤਞ੍ਚ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਪਾਚਿਤ੍ਤਿਯਂ ਆਪਤ੍ਤਿ ਚਸ੍ਸ ਹੋਤੀਤਿ ਅਤ੍ਥੋ. ਅਥ ਵਾ ਨਿਸ੍ਸਜ੍ਜਨਂ ਨਿਸ੍ਸਗ੍ਗਿਯਂ, ਪੁਬ੍ਬਭਾਗੇ ਕਤ੍ਤਬ੍ਬਸ੍ਸ ਵਿਨਯਕਮ੍ਮਸ੍ਸੇਤਂ ਨਾਮਂ, ਨਿਸ੍ਸਗ੍ਗਿਯਮਸ੍ਸ ਅਤ੍ਥੀਤਿ ਨਿਸ੍ਸਗ੍ਗਿਯਮਿਚ੍ਚੇਵ. ਕਿਂ ਤਂ? ਪਾਚਿਤ੍ਤਿਯਂ. ਤਂ ਅਤਿਕ੍ਕਾਮਯਤੋ ਸਹ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਵਿਨਯਕਮ੍ਮਂ ਪਾਚਿਤ੍ਤਿਯਂ ਹੋਤੀਤਿ ਅਯਮੇਤ੍ਥ ਅਤ੍ਥੋ. ਤਞ੍ਚ ਪਨੇਤਂ ਚੀਵਰਂ ਯਂ ਦਿਵਸਂ ਉਪ੍ਪਨ੍ਨਂ, ਤਸ੍ਸ ਯੋ ਅਰੁਣੋ, ਸੋ ਉਪ੍ਪਨ੍ਨਦਿਵਸਨਿਸ੍ਸਿਤੋ, ਤਸ੍ਮਾ ਚੀਵਰੁਪ੍ਪਾਦਦਿਵਸੇਨ ਸਦ੍ਧਿਂ ਏਕਾਦਸੇ ਅਰੁਣੁਗ੍ਗਮਨੇ ਦਸਾਹਾਤਿਕ੍ਕਮਿਤਂ ਹੋਤਿ, ਤਂ ਗਹੇਤ੍ਵਾ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ ਨਿਸ੍ਸਜ੍ਜਿਤਬ੍ਬਂ, ਤਤ੍ਰਾਯਂ ਨਯੋ – ਸਙ੍ਘਸ੍ਸ ਤਾਵ ਏਵਂ ਨਿਸ੍ਸਜ੍ਜਿਤਬ੍ਬਂ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਦਸਹਾਤਿਕ੍ਕਨ੍ਤਂ ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ ਨਿਸ੍ਸਜ੍ਜਿਤ੍ਵਾ ‘‘ਅਹਂ, ਭਨ੍ਤੇ, ਏਕਂ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ ਏਵਂ ਆਪਤ੍ਤਿ ਦੇਸੇਤਬ੍ਬਾ. ਸਚੇ ਦ੍ਵੇ ਹੋਨ੍ਤਿ, ‘‘ਦ੍ਵੇ’’ਤਿ ਵਤ੍ਤਬ੍ਬਂ, ਸਚੇ ਤਦੁਤ੍ਤਰਿ, ‘‘ਸਮ੍ਬਹੁਲਾ’’ਤਿ ਵਤ੍ਤਬ੍ਬਂ. ਨਿਸ੍ਸਜ੍ਜਨੇਪਿ ਸਚੇ ਦ੍ਵੇ ਵਾ ਬਹੂਨਿ ਵਾ ਹੋਨ੍ਤਿ, ‘‘ਇਮਾਨਿ ਮੇ, ਭਨ੍ਤੇ, ਚੀਵਰਾਨਿ ਦਸਾਹਾਤਿਕ੍ਕਨ੍ਤਾਨਿ ਨਿਸ੍ਸਗ੍ਗਿਯਾਨਿ, ਇਮਾਨਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ ਵਤ੍ਤਬ੍ਬਂ, ਪਾਲ਼ਿਂ ਵਤ੍ਤੁਂ ਅਸਕ੍ਕੋਨ੍ਤੇਨ ਅਞ੍ਞਥਾਪਿ ਵਤ੍ਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ ਵਿਵਰਤਿ ਉਤ੍ਤਾਨਿਂ ਕਰੋਤਿ ਦੇਸੇਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’’ਨ੍ਤਿ (ਚੂਲ਼ਵ. ੨੩੯), ਇਮਿਨਾ ਲਕ੍ਖਣੇਨ ਆਪਤ੍ਤਿਂ ਪਟਿਗ੍ਗਣ੍ਹਿਤ੍ਵਾ ਵਤ੍ਤਬ੍ਬੋ ‘‘ਪਸ੍ਸਸੀ’’ਤਿ, ‘‘ਆਮ ਪਸ੍ਸਾਮੀ’’ਤਿ, ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ, ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ. ਦ੍ਵੀਸੁ ਪਨ ਸਮ੍ਬਹੁਲਾਸੁ ਵਾ ਪੁਰਿਮਨਯੇਨੇਵ ਵਚਨਭੇਦੋ ਕਾਤਬ੍ਬੋ. ਦੇਸਿਤਾਯ ਆਪਤ੍ਤਿਯਾ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਙ੍ਘਸ੍ਸ ਨਿਸ੍ਸਟ੍ਠਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯਾ’’ਤਿ (ਪਾਰਾ. ੪੬੪) ਏਵਂ ਨਿਸ੍ਸਟ੍ਠਚੀਵਰਂ ਦਾਤਬ੍ਬਂ, ਦ੍ਵੀਸੁ ਬਹੂਸੁ ਵਾ ਵਚਨਭੇਦੋ ਕਾਤਬ੍ਬੋ.

ਗਣਸ੍ਸ ਪਨ ਨਿਸ੍ਸਜ੍ਜਨ੍ਤੇਨ ‘‘ਇਮਾਹ’’ਨ੍ਤਿ ਵਾ ‘‘ਇਮਾਨਿ ਅਹ’’ਨ੍ਤਿ ਵਾ ਵਤ੍ਵਾ ‘‘ਆਯਸ੍ਮਨ੍ਤਾਨਂ ਨਿਸ੍ਸਜ੍ਜਾਮੀ’’ਤਿ ਵਤ੍ਤਬ੍ਬਂ, ਆਪਤ੍ਤਿਪ੍ਪਟਿਗ੍ਗਾਹਕੇਨਾਪਿ ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ…ਪੇ… ਦੇਸੇਤਿ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲ’’ਨ੍ਤਿ ਵਤ੍ਤਬ੍ਬਂ, ਚੀਵਰਦਾਨੇਪਿ ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਆਯਸ੍ਮਨ੍ਤਾਨਂ ਨਿਸ੍ਸਟ੍ਠਂ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਆਯਸ੍ਮਨ੍ਤਾ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯੁ’’ਨ੍ਤਿ (ਪਾਰਾ. ੪੬੬) ਵਤ੍ਤਬ੍ਬਂ, ਸੇਸਂ ਪੁਰਿਮਸਦਿਸਮੇਵ. ਪੁਗ੍ਗਲਸ੍ਸ ਪਨ ਨਿਸ੍ਸਜ੍ਜਨ੍ਤੇਨ ‘‘ਇਮਾਹ’’ਨ੍ਤਿ ਵਾ ‘‘ਇਮਾਨਿ ਅਹ’’ਨ੍ਤਿ ਵਾ ਵਤ੍ਵਾ ‘‘ਆਯਸ੍ਮਤੋ ਨਿਸ੍ਸਜ੍ਜਾਮੀ’’ਤਿ ਵਤ੍ਤਬ੍ਬਂ, ਨਿਸ੍ਸਜ੍ਜਿਤ੍ਵਾ ‘‘ਅਹਂ, ਭਨ੍ਤੇ, ਏਕਂ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ ਏਵਂ ਆਪਤ੍ਤਿ ਦੇਸੇਤਬ੍ਬਾ. ਸਚੇ ਪਨ ਨਵਕਤਰੋ ਹੋਤਿ, ‘‘ਆਵੁਸੋ’’ਤਿ ਵਤ੍ਤਬ੍ਬਂ, ਤੇਨਾਪਿ ‘‘ਪਸ੍ਸਸੀ’’ਤਿ ਵਾ ‘‘ਪਸ੍ਸਥਾ’’ਤਿ ਵਾ ਵੁਤ੍ਤੇ ‘‘ਆਮ, ਭਨ੍ਤੇ’’ਤਿ ਵਾ ‘‘ਆਮ ਆਵੁਸੋ’’ਤਿ ਵਾ ਵਤ੍ਵਾ ‘‘ਪਸ੍ਸਾਮੀ’’ਤਿ ਵਤ੍ਤਬ੍ਬਂ, ਤਤੋ ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਵਾ ‘‘ਸਂਵਰੇਯ੍ਯਾਥਾ’’ਤਿ ਵਾ ਵੁਤ੍ਤੇ ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ ਵਤ੍ਤਬ੍ਬਂ. ਏਵਂ ਦੇਸਿਤਾਯ ਆਪਤ੍ਤਿਯਾ ‘‘ਇਮਂ ਚੀਵਰਂ ਆਯਸ੍ਮਤੋ ਦਮ੍ਮੀ’’ਤਿ ਦਾਤਬ੍ਬਂ, ਦ੍ਵੀਸੁ ਤੀਸੁ ਵਾ ਪੁਬ੍ਬੇ ਵੁਤ੍ਤਾਨੁਸਾਰੇਨੇਵ ਨਯੋ ਵੇਦਿਤਬ੍ਬੋ. ਦ੍ਵਿਨ੍ਨਂ ਪਨ ਯਥਾ ਗਣਸ੍ਸ, ਏਵਂ ਨਿਸ੍ਸਜ੍ਜਿਤਬ੍ਬਂ, ਤਤੋ ਆਪਤ੍ਤਿਪ੍ਪਟਿਗ੍ਗਹਣਞ੍ਚ ਨਿਸ੍ਸਟ੍ਠਚੀਵਰਦਾਨਞ੍ਚ ਤੇਸਂ ਅਞ੍ਞਤਰੇਨ ਯਥਾ ਏਕੇਨ ਪੁਗ੍ਗਲੇਨ, ਤਥਾ ਕਾਤਬ੍ਬਂ, ਇਦਂ ਪਨ ਸਬ੍ਬਨਿਸ੍ਸਗ੍ਗਿਯੇਸੁ ਵਿਧਾਨਂ. ਚੀਵਰਂ ਪਤ੍ਤੋ ਨਿਸੀਦਨਨ੍ਤਿ ਵਤ੍ਥੁਮਤ੍ਤਮੇਵ ਹਿ ਨਾਨਂ, ਪਰਮ੍ਮੁਖਂ ਪਨ ਵਤ੍ਥੁ ‘‘ਏਤ’’ਨ੍ਤਿ ਨਿਸ੍ਸਜ੍ਜਿਤਬ੍ਬਂ. ਸਚੇ ਬਹੂਨਿ ਹੋਨ੍ਤਿ, ‘‘ਏਤਾਨੀ’’ਤਿ ਵਤ੍ਤਬ੍ਬਂ. ਨਿਸ੍ਸਟ੍ਠਦਾਨੇਪਿ ਏਸੇਵ ਨਯੋ. ਨਿਸ੍ਸਟ੍ਠਵਤ੍ਥੁਂ ‘‘ਦਿਨ੍ਨਮਿਦਂ ਇਮਿਨਾ ਮਯ੍ਹ’’ਨ੍ਤਿ ਸਞ੍ਞਾਯ ਨ ਪਟਿਦੇਨ੍ਤਸ੍ਸ ਦੁਕ੍ਕਟਂ, ਤਸ੍ਸ ਸਨ੍ਤਕਭਾਵਂ ਞਤ੍ਵਾ ਲੇਸੇਨ ਅਚ੍ਛਿਨ੍ਦਨ੍ਤੋ ਸਾਮਿਕਸ੍ਸ ਧੁਰਨਿਕ੍ਖੇਪੇਨ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋਤਿ.

ਵੇਸਾਲਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਅਤਿਰੇਕਚੀਵਰਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਦਸਾਹਪਰਮ’’ਨ੍ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ, ਯਥਾ ਚ ਇਧ, ਏਵਂ ਸਬ੍ਬਤ੍ਥ, ਤਸ੍ਮਾ ਨਂ ਪਰਤੋ ਨ ਵਕ੍ਖਾਮ. ਦਸਾਹਂ ਅਨਤਿਕ੍ਕਨ੍ਤੇਪਿ ਅਤਿਕ੍ਕਨ੍ਤਸਞ੍ਞਿਨੋ ਵੇਮਤਿਕਸ੍ਸ ਚ ਦੁਕ੍ਕਟਂ. ਅਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞਿਨੋਪਿ ਵੇਮਤਿਕਸ੍ਸਪਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਮੇਵ, ਤਥਾ ਅਨਧਿਟ੍ਠਿਤਾਵਿਕਪ੍ਪਿਤਅਅਸ੍ਸਜ੍ਜਿਤਅਨਟ੍ਠਾਵਿਨਟ੍ਠਅਦਡ੍ਢਾਵਿਲੁਤ੍ਤੇਸੁ ਅਧਿਟ੍ਠਿਤਾਦਿਸਞ੍ਞਿਨੋ. ਅਨ੍ਤੋਦਸਾਹਂ ਅਧਿਟ੍ਠਿਤੇ ਵਿਕਪ੍ਪਿਤੇ ਵਿਸ੍ਸਜ੍ਜਿਤੇ ਨਟ੍ਠੇ ਵਿਨਟ੍ਠੇ ਦਡ੍ਢੇ ਅਚ੍ਛਿਨ੍ਨੇ ਵਿਸ੍ਸਾਸੇਨ ਗਾਹਿਤੇ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਆਚਾਰਵਿਪਤ੍ਤਿ, ਯਥਾ ਚ ਇਦਂ, ਏਵਂ ਇਤੋ ਪਰਾਨਿਪਿ, ਉਭਤੋਪਾਤਿਮੋਕ੍ਖੇਸੁਪਿ ਹਿ ਪਾਰਾਜਿਕਾਨਿ ਚ ਸਙ੍ਘਾਦਿਸੇਸਾ ਚ ਸੀਲਵਿਪਤ੍ਤਿ, ਸੇਸਾਪਤ੍ਤਿਯੋ ਆਚਾਰਵਿਪਤ੍ਤਿ, ਆਜੀਵਵਿਪਤ੍ਤਿ ਵਾ ਦਿਟ੍ਠਿਵਿਪਤ੍ਤਿ ਵਾ ਕਾਚਿ ਆਪਤ੍ਤਿ ਨਾਮ ਨਤ੍ਥਿ. ਆਜੀਵਵਿਪਤ੍ਤਿਪਚ੍ਚਯਾ ਪਨ ਠਪੇਤ੍ਵਾ ਦੁਬ੍ਭਾਸਿਤਂ ਛ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾ, ਦਿਟ੍ਠਿਵਿਪਤ੍ਤਿਪਚ੍ਚਯਾ ਪਾਚਿਤ੍ਤਿਯਦੁਕ੍ਕਟਵਸੇਨ ਦ੍ਵੇ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਾਤਿ, ਇਦਮੇਤ੍ਥ ਲਕ੍ਖਣਂ, ਇਤਿ ਵਿਪਤ੍ਤਿਕਥਾ ਇਧੇਵ ਨਿਟ੍ਠਿਤਾਤਿ, ਨ ਨਂ ਇਤੋ ਪਰਂ ਵਿਚਾਰਯਿਸ੍ਸਾਮ. ਜਾਤਿਪ੍ਪਮਾਣਸਮ੍ਪਨ੍ਨਸ੍ਸ ਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਗਣਨੁਪਗਤਾ, ਛਿਨ੍ਨਪਲਿਬੋਧਭਾਵੋ, ਅਤਿਰੇਕਚੀਵਰਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਕਥਿਨਸਮੁਟ੍ਠਾਨਂ, ਅਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਉਦੋਸਿਤਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾਤਿਏਤ੍ਥ ਪੁਰਿਮਸਿਕ੍ਖਾਪਦੇ ਵਿਯ ਅਤ੍ਥਂ ਅਗ੍ਗਹੇਤ੍ਵਾ ਨਿਟ੍ਠਿਤੇ ਚੀਵਰਸ੍ਮਿਂ ਭਿਕ੍ਖੁਨੋਤਿ ਏਵਂ ਸਾਮਿਵਸੇਨ ਕਰਣਵਚਨਸ੍ਸ ਅਤ੍ਥੋ ਵੇਦਿਤਬ੍ਬੋ. ਕਰਣਵਸੇਨ ਹਿ ਭਿਕ੍ਖੁਨਾ ਇਦਂ ਨਾਮ ਕਮ੍ਮਂ ਕਾਤਬ੍ਬਂ, ਤਂ ਨਤ੍ਥਿ, ਸਾਮਿਵਸੇਨ ਪਨ ਭਿਕ੍ਖੁਨੋ ਚੀਵਰਸ੍ਮਿਂ ਨਿਟ੍ਠਿਤੇ ਕਥਿਨੇ ਚ ਉਬ੍ਭਤੇ ਏਵਂ ਇਮੇਹਿ ਚੀਵਰਨਿਟ੍ਠਾਨਕਥਿਨੁਬ੍ਭਾਰੇਹਿ ਛਿਨ੍ਨਪਲਿਬੋਧੋ ਏਕਰਤ੍ਤਮ੍ਪਿ ਚੇ ਭਿਕ੍ਖੁ ਤਿਚੀਵਰੇਨ ਵਿਪ੍ਪਵਸੇਯ੍ਯਾਤਿ ਏਵਂ ਅਤ੍ਥੋ ਯੁਜ੍ਜਤਿ. ਤਤ੍ਥ ਤਿਚੀਵਰੇਨਾਤਿ ਤਿਚੀਵਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ ਸਙ੍ਘਾਟਿਆਦੀਸੁ ਯੇਨਕੇਨਚਿ. ਵਿਪ੍ਪਵਸੇਯ੍ਯਾਤਿ ਵਿਯੁਤ੍ਤੋ ਵਸੇਯ੍ਯ, ‘‘ਗਾਮੋ ਏਕੂਪਚਾਰੋ ਨਾਨੂਪਚਾਰੋ’’ਤਿਆਦਿਨਾ (ਪਾਰਾ. ੪੭੭) ਨਯੇਨ ਪਾਲ਼ਿਯਂ ਵੁਤ੍ਤਾਨਂ ਗਾਮਨਿਗਮਨਨਿਵੇਸਨਉਦੋਸਿਤਅਟ੍ਟਮਾਲ਼ਪਾਸਾਦਹਮ੍ਮਿਯਨਾਵਾਸਤ੍ਥਖੇਤ੍ਤਧਞ੍ਞਕਰਣਆਰਾਮਵਿਹਾਰਰੁਕ੍ਖਮੂਲਅਜ੍ਝੋਕਾਸਪ੍ਪਭੇਦਾਨਂ ਪਨ੍ਨਰਸਾਨਂ ਨਿਕ੍ਖੇਪਟ੍ਠਾਨਾਨਂ ਯਤ੍ਥਕਤ੍ਥਚਿ ਨਿਕ੍ਖਿਪਿਤ੍ਵਾ ਤੇਸਂ ਗਾਮਾਦੀਨਂ ਬਹਿ ਹਤ੍ਥਪਾਸਾਤਿਕ੍ਕਮੇਨ ਅਰੁਣਂ ਉਟ੍ਠਾਪੇਯ੍ਯਾਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੨.੪੭੩-੪੭੭-੮) ਵੁਤ੍ਤੋ. ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿਂ ਦੇਤਿ, ਤਂ ਠਪੇਤ੍ਵਾ ਅਲਦ੍ਧਸਮ੍ਮੁਤਿਕਸ੍ਸ ਭਿਕ੍ਖੁਨੋ ਏਕਰਤ੍ਤਮ੍ਪਿ ਵਿਪ੍ਪਵਾਸਤੋ ਵੁਤ੍ਤਨਯੇਨੇਵ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਵੇਦਿਤਬ੍ਬਂ, ਕੇਵਲਂ ਇਧ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਰਤ੍ਤਿਵਿਪ੍ਪਵੁਤ੍ਥਂ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ ਨਿਸ੍ਸਗ੍ਗਿਯ’’ਨ੍ਤਿਆਦਿਨਾ ਨਯੇਨ ਵਚਨਭੇਦੋ ਹੋਤਿ, ਅਯਂ ਪਨ ਵਿਸੇਸੋ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਨ੍ਤਰੁਤ੍ਤਰੇਨ ਜਨਪਦਚਾਰਿਕਂ ਪਕ੍ਕਮਨਵਤ੍ਥੁਸ੍ਮਿਂ

ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਅਵਿਪ੍ਪਵੁਤ੍ਥੇ ਵਿਪ੍ਪਵੁਤ੍ਥਸਞ੍ਞਿਨੋ ਚੇਵ ਵੇਮਤਿਕਸ੍ਸ ਚ ਦੁਕ੍ਕਟਂ. ਵਿਪ੍ਪਵੁਤ੍ਥੇ ਵਿਪ੍ਪਵੁਤ੍ਥਸਞ੍ਞਿਨੋਪਿ ਅਵਿਪ੍ਪਵੁਤ੍ਥਸਞ੍ਞਿਨੋਪਿ ਵੇਮਤਿਕਸ੍ਸਾਪਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਤਥਾ ਅਪਚ੍ਚੁਦ੍ਧਟਅਵਿਸ੍ਸਜ੍ਜਿਤਾਦੀਸੁ ਚ ਪਚ੍ਚੁਦ੍ਧਟਵਿਸ੍ਸਜ੍ਜਿਤਾਦਿਸਞ੍ਞਿਨੋ. ਅਨ੍ਤੋਅਰੁਣੇ ਪਚ੍ਚੁਦ੍ਧਟੇ ਪਨ ਪਠਮਕਥਿਨੇ ਵੁਤ੍ਤਵਿਸ੍ਸਜ੍ਜਿਤਾਦਿਭੇਦੇ ਚ ਅਨਾਪਤ੍ਤਿ, ਤਥਾ ਲਦ੍ਧਸਮ੍ਮੁਤਿਕਸ੍ਸ ਵਿਪ੍ਪਵਾਸੇ. ਆਬਾਧੇ ਪਨ ਵੂਪਸਨ੍ਤੇ ਪਚ੍ਚਾਗਨ੍ਤਬ੍ਬਂ, ਤਤ੍ਥੇਵ ਵਾ ਠਿਤੇਨ ਪਚ੍ਚੁਦ੍ਧਰਿਤਬ੍ਬਂ, ਅਥਾਪਿਸ੍ਸ ਪੁਨ ਸੋ ਵਾ ਅਞ੍ਞੋ ਵਾ ਆਬਾਧੋ ਕੁਪ੍ਪਤਿ, ਲਦ੍ਧਕਪ੍ਪਿਯਮੇਵ. ਅਧਿਟ੍ਠਿਤਚੀਵਰਤਾ, ਅਨਤ੍ਥਤਕਥਿਨਤਾ, ਅਲਦ੍ਧਸਮ੍ਮੁਤਿਕਤਾ, ਰਤ੍ਤਿਵਿਪ੍ਪਵਾਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨੇ ਵੁਤ੍ਤਪ੍ਪਕਾਰਾਨੇਵ. ਕੇਵਲਞ੍ਹਿ ਤਤ੍ਥ ਅਨਧਿਟ੍ਠਾਨਂ ਅਵਿਕਪ੍ਪਨਞ੍ਚ ਅਕਿਰਿਯਾ, ਇਧ ਅਪ੍ਪਚ੍ਚੁਦ੍ਧਰਣਂ, ਅਯਂ ਵਿਸੇਸੋਤਿ.

ਉਦੋਸਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ

ਤਤਿਯੇ ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾਤਿ ਸਾਮਿਵਸੇਨੇਵ ਕਰਣਤ੍ਥੋ ਵੇਦਿਤਬ੍ਬੋ. ਅਕਾਲਚੀਵਰਂ ਨਾਮ ਯ੍ਵਾਯਂ ‘‘ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚਮਾਸਾ’’ਤਿ (ਪਾਰਾ. ੬੪੯) ਚੀਵਰਕਾਲੋ ਵੁਤ੍ਤੋ, ਤਂ ਠਪੇਤ੍ਵਾ ਅਞ੍ਞਦਾ ਉਪ੍ਪਨ੍ਨਂ, ਯਞ੍ਚ ਕਾਲੇਪਿ ਸਙ੍ਘਸ੍ਸ ਵਾ ‘‘ਇਦਂ ਅਕਾਲਚੀਵਰ’’ਨ੍ਤਿ, ਪੁਗ੍ਗਲਸ੍ਸ ਵਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿਆਦਿਨਾ ਨਯੇਨ ਦਿਨ੍ਨਂ, ਏਤਂ ਅਕਾਲਚੀਵਰਂ ਨਾਮ. ਉਪ੍ਪਜ੍ਜੇਯ੍ਯਾਤਿ ਏਵਰੂਪਂ ਚੀਵਰਂ ਅਤ੍ਤਨੋ ਭਾਗਪਟਿਲਾਭਵਸੇਨ ਸਙ੍ਘਤੋ ਵਾ ਸੁਤ੍ਤਨ੍ਤਿਕਾਦਿਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਪਂਸੁਕੂਲਂ ਵਾ ਅਤ੍ਤਨੋ ਵਾ ਧਨੇਨ (ਪਾਰਾ. ੫੦੦), ਅਥ ਵਾ ਪਨ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਚੀਵਰਸ੍ਸ ਉਪ੍ਪਾਦਾਯ ਸੀਮਾਯ ਦੇਤਿ, ਕਤਿਕਾਯ ਦੇਤਿ, ਭਿਕ੍ਖਾਪਞ੍ਞਤ੍ਤਿਕਾਯ ਦੇਤਿ, ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘਸ੍ਸ ਦੇਤਿ, ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਆਦਿਸ੍ਸ ਦੇਤਿ, ਪੁਗ੍ਗਲਸ੍ਸ ਦੇਤੀ’’ਤਿ (ਮਹਾਵ. ੩੭੯) ਇਮਾਸਂ ਅਟ੍ਠਨ੍ਨਂ ਮਾਤਿਕਾਨਂ ਅਞ੍ਞਤਰਤੋ ਉਪ੍ਪਜ੍ਜੇਯ੍ਯ. ਏਤ੍ਥ ਚ ‘‘ਸੀਮਾਯ ਦਮ੍ਮੀ’’ਤਿ ਏਵਂ ਸੀਮਂ ਪਰਾਮਸਿਤ੍ਵਾ ਦੇਨ੍ਤੋ ਸੀਮਾਯ ਦੇਤਿ ਨਾਮ, ਏਸ ਨਯੋ ਸਬ੍ਬਤ੍ਥ. ਏਤ੍ਥ ਚ ਸੀਮਾਤਿ ਖਣ੍ਡਸੀਮਾ ਉਪਚਾਰਸੀਮਾ ਸਮਾਨਸਂਵਾਸਸੀਮਾ ਅਵਿਪ੍ਪਵਾਸਸੀਮਾ ਲਾਭਸੀਮਾ ਗਾਮਸੀਮਾ ਨਿਗਮਸੀਮਾ ਨਗਰਸੀਮਾ ਅਬ੍ਭਨ੍ਤਰਸੀਮਾ ਉਦਕੁਕ੍ਖੇਪਸੀਮਾ ਜਨਪਦਸੀਮਾ ਰਟ੍ਠਸੀਮਾ ਰਜ੍ਜਸੀਮਾ ਦੀਪਸੀਮਾ ਚਕ੍ਕਵਾਲ਼ਸੀਮਾਤਿ ਪਨ੍ਨਰਸਵਿਧਾ. ਤਤ੍ਥ ਉਪਚਾਰਸੀਮਾ ਨਾਮ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੇਨ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨੇਨ ਪਰਿਚ੍ਛਿਨ੍ਨਾ. ਅਪਿ ਚ ਭਿਕ੍ਖੂਨਂ ਧੁਵਸਨ੍ਨਿਪਾਤਟ੍ਠਾਨਤੋ ਵਾ ਪਰਿਯਨ੍ਤੇ ਠਿਤਭੋਜਨਸਾਲਤੋ ਵਾ ਨਿਬਦ੍ਧਵਸਨਕਆਵਾਸਤੋ ਵਾ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤੋ ‘‘ਉਪਚਾਰਸੀਮਾ’’ਤਿ ਵੇਦਿਤਬ੍ਬਾ. ਸਾ ਪਨ ਆਵਾਸੇ ਵਡ੍ਢਨ੍ਤੇ ਵਡ੍ਢਤਿ, ਹਾਯਨ੍ਤੇ ਹਾਯਤਿ, ਯੋਜਨਸਤਮ੍ਪਿ ਉਪਚਾਰਸੀਮਾਵ ਹੋਤਿ. ਤਤ੍ਥ ਦਿਨ੍ਨਲਾਭੋ ਸਬ੍ਬੇਸਂ ਅਨ੍ਤੋਸੀਮਗਤਾਨਂ ਪਾਪੁਣਾਤਿ, ਭਿਕ੍ਖੁਨੀਨਂ ਆਰਾਮਪਵੇਸਨਸੇਨਾਸਨਾਪੁਚ੍ਛਨਾਨਿ ਪਰਿਵਾਸਮਾਨਤ੍ਤਾਰੋਚਨਂ ਵਸ੍ਸਚ੍ਛੇਦਨਿਸ੍ਸਯਸੇਨਾਸਨਗ੍ਗਾਹਾਦਿਵਿਧਾਨਨ੍ਤਿ ਇਦਮ੍ਪਿ ਸਬ੍ਬਂ ਇਮਿਸ੍ਸਾਵ ਸੀਮਾਯ ਵਸੇਨ ਵੇਦਿਤਬ੍ਬਂ. ਲਾਭਸੀਮਾਤਿ ਯਂ ਰਾਜਰਾਜਮਹਾਮਤ੍ਤਾਦਯੋ ਵਿਹਾਰਂ ਕਾਰਾਪੇਤ੍ਵਾ ਗਾਵੁਤਂ ਵਾ ਅਦ੍ਧਯੋਜਨਂ ਵਾ ਯੋਜਨਂ ਵਾ ਸਮਨ੍ਤਾ ਪਰਿਚ੍ਛਿਨ੍ਦਿਤ੍ਵਾ ‘‘ਅਯਂ ਅਮ੍ਹਾਕਂ ਵਿਹਾਰਸ੍ਸ ਲਾਭਸੀਮਾ, ਯਂ ਏਤ੍ਥਨ੍ਤਰੇ ਉਪ੍ਪਜ੍ਜਤਿ, ਤਂ ਸਬ੍ਬਂ ਅਮ੍ਹਾਕਂ ਵਿਹਾਰਸ੍ਸ ਦੇਮਾ’’ਤਿ ਠਪੇਨ੍ਤਿ, ਅਯਂ ਲਾਭਸੀਮਾ ਨਾਮ. ਕਾਸਿਕੋਸਲਾਦੀਨਂ ਪਨ ਰਟ੍ਠਾਨਂ ਅਨ੍ਤੋ ਬਹੂ ਜਨਪਦਾ ਹੋਨ੍ਤਿ, ਤਤ੍ਥ ਏਕੋ ਜਨਪਦਪਰਿਚ੍ਛੇਦੋ ਜਨਪਦਸੀਮਾ, ਕਾਸਿਕੋਸਲਾਦਿਰਟ੍ਠਪਰਿਚ੍ਛੇਦੋ ਰਟ੍ਠਸੀਮਾ, ਏਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਂ ਰਜ੍ਜਸੀਮਾ, ਸਮੁਦ੍ਦਨ੍ਤੇਨ ਪਰਿਚ੍ਛਿਨ੍ਨੋ ਮਹਾਦੀਪੋ ਵਾ ਅਨ੍ਤਰਦੀਪੋ ਵਾ ਦੀਪਸੀਮਾ, ਏਕਚਕ੍ਕਵਾਲ਼ਪਬ੍ਬਤਪਰਿਕ੍ਖੇਪਬ੍ਭਨ੍ਤਰਂ ਚਕ੍ਕਵਾਲ਼ਸੀਮਾ, ਸੇਸਾ ਨਿਦਾਨਕਥਾਯਂ ਵੁਤ੍ਤਨਯਾ ਏਵ. ਤਤ੍ਥ ‘‘ਖਣ੍ਡਸੀਮਾਯ ਦੇਮਾ’’ਤਿ ਦਿਨ੍ਨਂ ਖਣ੍ਡਸੀਮਟ੍ਠਾਨਂਯੇਵ ਪਾਪੁਣਾਤਿ, ਤਤੋ ਬਹਿਸੀਮਾਯ ਸੀਮਨ੍ਤਰਿਕਟ੍ਠਾਨਮ੍ਪਿ ਨ ਪਾਪੁਣਾਤਿ. ‘‘ਉਪਚਾਰਸੀਮਾਯ ਦੇਮਾ’’ਤਿ ਦਿਨ੍ਨਂ ਪਨ ਅਨ੍ਤੋਪਰਿਚ੍ਛੇਦੇ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਮ੍ਪਿ ਪਾਪੁਣਾਤਿ, ਸਮਾਨਸਂਵਾਸਸੀਮਾਯ ਦਿਨ੍ਨਂ ਖਣ੍ਡਸੀਮਾਸੀਮਨ੍ਤਰਿਕਟ੍ਠਾਨਂ ਨ ਪਾਪੁਣਾਤਿ, ਅਵਿਪ੍ਪਵਾਸਸੀਮਾਲਾਭਸੀਮਾਸੁ ਦਿਨ੍ਨਂ ਤਾਸਂ ਅਨ੍ਤੋਗਧਾਨਂਯੇਵ ਪਾਪੁਣਾਤਿ, ਗਾਮਸੀਮਾਦੀਸੁ ਦਿਨ੍ਨਂ ਤਾਸਂ ਸੀਮਾਨਂ ਅਬ੍ਭਨ੍ਤਰੇ ਬਦ੍ਧਸੀਮਟ੍ਠਾਨਮ੍ਪਿ ਪਾਪੁਣਾਤਿ, ਅਬ੍ਭਨ੍ਤਰਸੀਮਾਉਦਕੁਕ੍ਖੇਪਸੀਮਾਸੁ ਦਿਨ੍ਨਂ ਤਤ੍ਥ ਅਨ੍ਤੋਗਧਾਨਂਯੇਵ ਪਾਪੁਣਾਤਿ, ਜਨਪਦਸੀਮਾਦੀਸੁ ਦਿਨ੍ਨਮ੍ਪਿ ਤਾਸਂ ਅਬ੍ਭਨ੍ਤਰੇ ਬਦ੍ਧਸੀਮਟ੍ਠਾਨਮ੍ਪਿ ਪਾਪੁਣਾਤਿ, ਤਸ੍ਮਾ ਯਂ ਜਮ੍ਬੁਦੀਪੇ ਠਤ੍ਵਾ ‘‘ਤਮ੍ਬਪਣ੍ਣਿਦੀਪੇ ਸਙ੍ਘਸ੍ਸ ਦੇਮਾ’’ਤਿ ਦੀਯਤਿ, ਤਂ ਤਮ੍ਬਪਣ੍ਣਿਦੀਪਤੋ ਏਕੋਪਿ ਗਨ੍ਤ੍ਵਾ ਸਬ੍ਬੇਸਂ ਸਙ੍ਗਣ੍ਹਿਤੁਂ ਲਭਤਿ. ਸਚੇਪਿ ਤਤ੍ਥੇਵ ਏਕੋ ਸਭਾਗੋ ਭਿਕ੍ਖੁ ਸਭਾਗਾਨਂ ਭਾਗਂ ਗਣ੍ਹਾਤਿ, ਨ ਵਾਰੇਤਬ੍ਬੋ. ਯੋ ਪਨ ਵਿਹਾਰਂ ਪਵਿਸਿਤ੍ਵਾ ‘‘ਅਸੁਕਸੀਮਾਯਾ’’ਤਿ ਅਵਤ੍ਵਾਵ ਕੇਵਲਂ ‘‘ਸੀਮਾਯ ਦਮ੍ਮੀ’’ਤਿ ਵਦਤਿ, ਸੋ ਪੁਚ੍ਛਿਤਬ੍ਬੋ ‘‘ਸੀਮਾ ਨਾਮ ਬਹੁਵਿਧਾ, ਕਤਰਂ ਸਨ੍ਧਾਯ ਵਦਸੀ’’ਤਿ, ਸਚੇ ਵਦਤਿ ‘‘ਅਹਮੇਤਂ ਭੇਦਂ ਨ ਜਾਨਾਮਿ, ਸੀਮਟ੍ਠਕਸਙ੍ਘੋ ਗਣ੍ਹਤੂ’’ਤਿ, ਉਪਚਾਰਸੀਮਟ੍ਠੇਹਿ ਭਾਜੇਤਬ੍ਬਂ.

ਕਤਿਕਾਯਾਤਿਏਤ੍ਥ ਕਤਿਕਾ ਨਾਮ ਸਮਾਨਲਾਭਕਤਿਕਾ. ਸਾ ਪਨ ਏਵਂ ਕਾਤਬ੍ਬਾ, ਏਕਸ੍ਮਿਂ ਵਿਹਾਰੇ ਸਨ੍ਨਿਪਤਿਤੇਹਿ ਭਿਕ੍ਖੂਹਿ ਯਂ ਵਿਹਾਰਂ ਸਙ੍ਗਣ੍ਹਿਤੁਕਾਮਾ ਸਮਾਨਲਾਭਂ ਕਾਤੁਂ ਇਚ੍ਛਨ੍ਤਿ, ਤਸ੍ਸ ਨਾਮਂ ਗਹੇਤ੍ਵਾ ‘‘ਅਸੁਕੋ ਨਾਮ ਵਿਹਾਰੋ ਪੋਰਾਣਕੋ ਅਪ੍ਪਲਾਭੋ’’ਤਿ ਯਂ ਕਿਞ੍ਚਿ ਕਾਰਣਂ ਵਤ੍ਵਾ ‘‘ਤਂ ਵਿਹਾਰਂ ਇਮਿਨਾ ਵਿਹਾਰੇਨ ਸਦ੍ਧਿਂ ਏਕਲਾਭਂ ਕਾਤੁਂ ਸਙ੍ਘਸ੍ਸ ਰੁਚ੍ਚਤੀ’’ਤਿ ਤਿਕ੍ਖਤ੍ਤੁਂ ਸਾਵੇਤਬ੍ਬਂ, ਏਤ੍ਤਾਵਤਾ ਤਸ੍ਮਿਂ ਵਿਹਾਰੇ ਨਿਸਿਨ੍ਨੋਪਿ ਇਧ ਨਿਸਿਨ੍ਨੋਵ ਹੋਤਿ, ਤਸ੍ਮਿਂ ਵਿਹਾਰੇਪਿ ਏਵਮੇਵ ਕਾਤਬ੍ਬਂ, ਏਤ੍ਤਾਵਤਾ ਇਧ ਨਿਸਿਨ੍ਨੋਪਿ ਤਸ੍ਮਿਂ ਨਿਸਿਨ੍ਨੋਵ ਹੋਤਿ. ਏਕਸ੍ਮਿਂ ਵਿਹਾਰੇ ਲਾਭੇ ਭਾਜਿਯਮਾਨੇ ਇਤਰਸ੍ਮਿਂ ਠਿਤਸ੍ਸ ਭਾਗਂ ਗਹੇਤੁਂ ਵਟ੍ਟਤਿ.

ਭਿਕ੍ਖਾਪਞ੍ਞਤ੍ਤਿਯਾਤਿ ਏਤ੍ਥ ਭਿਕ੍ਖਾਪਞ੍ਞਤ੍ਤਿ ਨਾਮ ਦਾਯਕਸ੍ਸ ਪਰਿਚ੍ਚਾਗਪਞ੍ਞਤ੍ਤਿਟ੍ਠਾਨਂ, ਤਸ੍ਮਾ ‘‘ਯਤ੍ਥ ਮਯ੍ਹਂ ਧੁਵਕਾਰਾ ਕਰੀਯਨ੍ਤਿ, ਤਤ੍ਥ ਦਮ੍ਮੀ’’ਤਿ ਵਾ ‘‘ਤਤ੍ਥ ਦੇਥਾ’’ਤਿ ਵਾ ਵੁਤ੍ਤੇ ਯਤ੍ਥ ਤਸ੍ਸ ਪਾਕਵਤ੍ਤਂ ਵਾ ਵਤ੍ਤਤਿ, ਯਤੋ ਵਾ ਭਿਕ੍ਖੂ ਨਿਚ੍ਚਂ ਭੋਜੇਤਿ, ਯਤ੍ਥ ਵਾ ਤੇਨ ਕਿਞ੍ਚਿ ਸੇਨਾਸਨਂ ਕਤਂ, ਸਬ੍ਬਤ੍ਥ ਦਿਨ੍ਨਮੇਵ ਹੋਤਿ. ਸਚੇ ਪਨ ਏਕਸ੍ਮਿਂ ਧੁਵਕਾਰਟ੍ਠਾਨੇ ਥੋਕਤਰਾ ਭਿਕ੍ਖੂ ਹੋਨ੍ਤਿ, ਏਕਮੇਵ ਵਾ ਵਤ੍ਥਂ ਹੋਤਿ, ਮਾਤਿਕਂ ਆਰੋਪੇਤ੍ਵਾ ਯਥਾ ਸੋ ਵਦਤਿ, ਤਥਾ ਗਹੇਤਬ੍ਬਂ.

ਸਙ੍ਘਸ੍ਸ ਦੇਤੀਤਿ ਏਤ੍ਥ ਵਿਹਾਰਂ ਪਵਿਸਿਤ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ ਉਪਚਾਰਸੀਮਾਗਤਾਨਞ੍ਚ ਤਤੋ ਬਹਿਦ੍ਧਾਪਿ ਤੇਹਿ ਸਦ੍ਧਿਂ ਏਕਾਬਦ੍ਧਾਨਞ੍ਚ ਪਾਪੁਣਾਤਿ, ਤਸ੍ਮਾ ਤੇਸਂ ਗਾਹਕੇ ਸਤਿ ਅਸਮ੍ਪਤ੍ਤਾਨਮ੍ਪਿ ਭਾਗੋ ਦਾਤਬ੍ਬੋ. ਯਂ ਪਨ ਬਹਿ ਉਪਚਾਰਸੀਮਾਯ ਭਿਕ੍ਖੂ ਦਿਸ੍ਵਾ ‘‘ਸਙ੍ਘਸ੍ਸਾ’’ਤਿ ਦੀਯਤਿ, ਤਂ ਏਕਾਬਦ੍ਧਪਰਿਸਾਯ ਪਾਪੁਣਾਤਿ. ਯੇ ਪਨ ਦ੍ਵਾਦਸਹਿ ਹਤ੍ਥੇਹਿ ਪਰਿਸਂ ਅਸਮ੍ਪਤ੍ਤਾ, ਤੇਸਂ ਨ ਪਾਪੁਣਾਤਿ.

ਉਭਤੋਸਙ੍ਘਸ੍ਸਾਤਿ ਏਤ੍ਥ ਪਨ ਯਂ ਉਭਤੋਸਙ੍ਘਸ੍ਸ ਦਿਨ੍ਨਂ, ਤਤੋ ਉਪਡ੍ਢਂ ਭਿਕ੍ਖੂਨਂ, ਉਪਡ੍ਢਂ ਭਿਕ੍ਖੁਨੀਨਂ ਦਾਤਬ੍ਬਂ. ਸਚੇਪਿ ਏਕੋ ਭਿਕ੍ਖੁ ਹੋਤਿ, ਏਕਾ ਵਾ ਭਿਕ੍ਖੁਨੀ, ਅਨ੍ਤਮਸੋ ਅਨੁਪਸਮ੍ਪਨ੍ਨਸ੍ਸਾਪਿ ਉਪਡ੍ਢਮੇਵ ਦਾਤਬ੍ਬਂ. ‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪਨ ਸਚੇ ਦਸ ਭਿਕ੍ਖੂ ਚ ਦਸ ਭਿਕ੍ਖੁਨਿਯੋ ਚ ਹੋਨ੍ਤਿ, ਏਕਵੀਸਤਿ ਪਟਿਵੀਸੇ ਕਤ੍ਵਾ ਏਕੋ ਪੁਗ੍ਗਲਸ੍ਸ ਦਾਤਬ੍ਬੋ, ਦਸ ਭਿਕ੍ਖੁਸਙ੍ਘਸ੍ਸ, ਦਸ ਭਿਕ੍ਖੁਨਿਸਙ੍ਘਸ੍ਸ ਚ, ਯੇਨ ਪੁਗ੍ਗਲਿਕੋ ਲਦ੍ਧੋ, ਸੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤੁਂ ਲਭਤਿ, ਕਸ੍ਮਾ? ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾ, ‘‘ਉਭਤੋਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਇਧ ਪਨ ਚੇਤਿਯਸ੍ਸ ਸਙ੍ਘਤੋ ਪਾਪੁਣਕੋਟ੍ਠਾਸੋ ਨਾਮ ਨਤ੍ਥਿ, ਏਕਪੁਗ੍ਗਲਸ੍ਸ ਪਤ੍ਤਕੋਟ੍ਠਾਸਸਮੋ ਏਕੋ ਕੋਟ੍ਠਾਸੋ ਹੋਤਿ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚਾ’’ਤਿ ਵੁਤ੍ਤੇ ਪਨ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪੁਗ੍ਗਲੋ ਵਿਸੁਂ ਨ ਲਭਤਿ, ਪਾਪੁਣਕੋਟ੍ਠਾਸਤੋ ਏਕਮੇਵ ਲਭਤਿ. ‘‘ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਏਕੋ ਪੁਗ੍ਗਲਪਟਿਵੀਸੋ ਲਬ੍ਭਤਿ. ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚਾ’’ਤਿ ਵੁਤ੍ਤੇਪਿ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ, ਪੁਗ੍ਗਲਗਣਨਾਯ ਏਵ ਵਿਭਜਿਤਬ੍ਬਂ, ਤੇਹਿ ਸਦ੍ਧਿਂ ਪੁਗ੍ਗਲਚੇਤਿਯਪਰਾਮਸਨਂ ਅਨਨ੍ਤਰਨਯਸਦਿਸਮੇਵ, ਯਥਾ ਚ ਭਿਕ੍ਖੁਸਙ੍ਘਂ ਆਦਿਂ ਕਤ੍ਵਾ ਨਯੋ ਨੀਤੋ, ਏਵਂ ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਨੇਤਬ੍ਬੋ. ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇਪਿ ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਚੇਤਿਯਸ੍ਸ ਪਨ ਲਬ੍ਭਤਿ. ‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇਪਿ ਵਿਸੁਂ ਨ ਲਬ੍ਭਤਿ, ਚੇਤਿਯਸ੍ਸ ਪਨ ਲਬ੍ਭਤਿਯੇਵ.

ਵਸ੍ਸਂਵੁਟ੍ਠਸਙ੍ਘਸ੍ਸਾਤਿ ਏਤ੍ਥ ਸਚੇ ਵਿਹਾਰਂ ਪਵਿਸਿਤ੍ਵਾ ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਯੇ ਤਤ੍ਥ ਵਸ੍ਸਚ੍ਛੇਦਂ ਅਕਤ੍ਵਾ ਪੁਰਿਮਵਸ੍ਸਂਵੁਟ੍ਠਾ, ਤੇਸਂ ਬਹਿ ਸੀਮਟ੍ਠਾਨਮ੍ਪਿ ਪਾਪੁਣਾਤਿ, ਨ ਅਞ੍ਞੇਸਂ. ਸਚੇ ਪਨ ਬਹਿਉਪਚਾਰਸੀਮਾਯਂ ਠਿਤੋ ‘‘ਵਸ੍ਸਂਵੁਟ੍ਠਸਙ੍ਘਸ੍ਸਾ’’ਤਿ ਵਦਤਿ, ਯਤ੍ਥਕਤ੍ਥਚਿ ਵੁਟ੍ਠਵਸ੍ਸਾਨਂ ਸਬ੍ਬੇਸਂ ਸਮ੍ਪਤ੍ਤਾਨਂ ਪਾਪੁਣਾਤਿ. ਅਥ ‘‘ਅਸੁਕਵਿਹਾਰੇ ਵਸ੍ਸਂਵੁਟ੍ਠਸ੍ਸਾ’’ਤਿ ਵਦਤਿ, ਤਤ੍ਥ ਵਸ੍ਸਂਵੁਟ੍ਠਾਨਂਯੇਵ ਯਾਵ ਕਥਿਨਸ੍ਸੁਬ੍ਭਾਰਾ ਪਾਪੁਣਾਤਿ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ, ਨ ਅਞ੍ਞੇਸਂ.

ਆਦਿਸ੍ਸ ਦੇਤੀਤਿ ਆਦਿਸਿਤ੍ਵਾ ਪਰਿਚ੍ਛਿਨ੍ਦਿਤ੍ਵਾ ਦੇਤਿ, ਕਥਂ? ਭਿਕ੍ਖੂ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਯਾਗੁਯਾ ਨਿਮਨ੍ਤੇਤ੍ਵਾ ਤੇ ਘਰੇ ਯਾਗੁਂ ਪਾਯੇਤ੍ਵਾ ‘‘ਇਮਾਨਿ ਚੀਵਰਾਨਿ ਯੇਹਿ ਮਯ੍ਹਂ ਯਾਗੁ ਪੀਤਾ, ਤੇਸਂ ਦਮ੍ਮੀ’’ਤਿ ਵਦਤਿ, ਯੇਹਿ ਨਿਮਨ੍ਤਿਤੇਹਿ ਯਾਗੁ ਪੀਤਾ, ਤੇਸਂਯੇਵ ਪਾਪੁਣਾਤਿ, ਭਤ੍ਤਖਜ੍ਜਕਾਦੀਹਿ ਨਿਮਨ੍ਤਿਤੇਸੁਪਿ ਏਸੇਵ ਨਯੋ.

ਪੁਗ੍ਗਲਸ੍ਸ ਦੇਤੀਤਿ ‘‘ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਏਵਂ ਪਰਮ੍ਮੁਖਾ ਵਾ, ਪਾਦਮੂਲੇ ਠਪੇਤ੍ਵਾ ‘‘ਇਦਂ ਤੁਮ੍ਹਾਕ’’ਨ੍ਤਿ ਏਵਂ ਸਮ੍ਮੁਖਾ ਵਾ ਦੇਤੀਤਿ ਅਯਮੇਤ੍ਥ ਸਙ੍ਖੇਪਕਥਾ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ. ਇਤਿ ਇਮਾਸਂ ਅਟ੍ਠਨ੍ਨਂ ਮਾਤਿਕਾਪਦਾਨਂ ਵਸੇਨ ਯਂ ਅਕਾਲਚੀਵਰਲਕ੍ਖਣੇਨ ਪਟਿਲਦ੍ਧਂ, ਤਂ ਸਨ੍ਧਾਯ ‘‘ਅਕਾਲਚੀਵਰਂ ਉਪ੍ਪਜ੍ਜੇਯ੍ਯਾ’’ਤਿ ਵੁਤ੍ਤਂ.

ਆਕਙ੍ਖਮਾਨੇਨਾਤਿ ਇਚ੍ਛਮਾਨੇਨ. ਖਿਪ੍ਪਮੇਵ ਕਾਰੇਤਬ੍ਬਨ੍ਤਿ ਸੀਘਂ ਅਨ੍ਤੋਦਸਾਹੇਯੇਵ ਕਾਰੇਤਬ੍ਬਂ. ਨੋ ਚਸ੍ਸ ਪਾਰਿਪੂਰੀਤਿ ਨੋ ਚੇ ਪਾਰਿਪੂਰੀ ਭਵੇਯ੍ਯ, ਯਤ੍ਤਕੇਨ ਕਰਿਯਮਾਨਂ ਅਧਿਟ੍ਠਾਨਚੀਵਰਂ ਪਹੋਤਿ, ਤਂ ਚੀਵਰਂ ਤਤ੍ਤਕਂ ਨ ਭਵੇਯ੍ਯ, ਊਨਕਂ ਭਵੇਯ੍ਯਾਤਿ ਅਤ੍ਥੋ. ਸਤਿਯਾ ਪਚ੍ਚਾਸਾਯਾਤਿ ‘‘ਅਸੁਕਦਿਵਸਂ ਨਾਮ ਸਙ੍ਘੋ ਚੀਵਰਾਨਿ ਲਭਿਸ੍ਸਤਿ, ਤਤੋ ਮੇ ਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿਇਮਿਨਾ ਨਯੇਨ ਸਙ੍ਘਗਣਞਾਤਿਮਿਤ੍ਤੇਸੁ ਵਾ ਅਞ੍ਞਤਰਟ੍ਠਾਨਤੋ, ‘‘ਪਂਸੁਕੂਲਂ ਵਾ ਲਚ੍ਛਾਮੀ’’ਤਿ, ‘‘ਇਮਿਨਾ ਵਾ ਕਪ੍ਪਿਯਭਣ੍ਡੇਨ ਚੀਵਰਂ ਗਣ੍ਹਿਸ੍ਸਾਮੀ’’ਤਿ ਏਵਂ ਵਿਜ੍ਜਮਾਨਾਯ ਚੀਵਰਾਸਾਯ. ਤਤੋ ਚੇ ਉਤ੍ਤਰੀਤਿ ਮਾਸਪਰਮਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ, ਨਿਸ੍ਸਗ੍ਗਿਯਨ੍ਤਿ ਅਤ੍ਥੋ. ਯਦਿ ਪਨਸ੍ਸ ਮੂਲਚੀਵਰਂ ਸਣ੍ਹਂ ਹੋਤਿ, ਪਚ੍ਚਾਸਾਚੀਵਰਂ ਥੂਲਂ ਹੋਤਿ, ਨ ਸਕ੍ਕਾ ਯੋਜੇਤੁਂ, ਰਤ੍ਤਿਯੋ ਚ ਸੇਸਾ ਹੋਨ੍ਤਿ, ਨ ਤਾਵ ਮਾਸੋ ਪੂਰਤਿ, ਨ ਅਕਾਮਾ ਚੀਵਰਂ ਕਾਰੇਤਬ੍ਬਂ, ਅਞ੍ਞਂ ਪਚ੍ਚਾਸਾਚੀਵਰਂ ਲਭਿਤ੍ਵਾ ਏਵ ਕਾਲਬ੍ਭਨ੍ਤਰੇ ਕਾਰੇਤਬ੍ਬਂ. ਸਚੇ ਨ ਲਭਤਿ, ਪਚ੍ਚਾਸਾਚੀਵਰਮ੍ਪਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਂ. ਅਥ ਮੂਲਚੀਵਰਂ ਥੂਲਂ ਹੋਤਿ, ਪਚ੍ਚਾਸਾਚੀਵਰਂ ਸਣ੍ਹਂ, ਮੂਲਚੀਵਰਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਹਿਤ੍ਵਾ ਪਚ੍ਚਾਸਾਚੀਵਰਮੇਵ ਮੂਲਚੀਵਰਂ ਕਤ੍ਵਾ ਠਪੇਤਬ੍ਬਂ, ਤਂ ਪੁਨ ਮਾਸਪਰਿਹਾਰਂ ਲਭਤਿ, ਏਤੇਨੁਪਾਯੇਨ ਯਾਵ ਨ ਲਚ੍ਛਤਿ, ਤਾਵ ਅਞ੍ਞਂ ਮੂਲਚੀਵਰਂ ਕਤ੍ਵਾ ਠਪੇਤੁਂ ਲਬ੍ਭਤਿ. ਇਮਸ੍ਸ ‘‘ਇਦਂ ਮੇ, ਭਨ੍ਤੇ, ਅਕਾਲਚੀਵਰਂ ਮਾਸਾਤਿਕ੍ਕਨ੍ਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੦੦) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਕਾਲਚੀਵਰਂ ਪਟਿਗ੍ਗਹੇਤ੍ਵਾ ਮਾਸਂ ਅਤਿਕ੍ਕਮਨਵਤ੍ਥੁਸ੍ਮਿਂ

ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਇਤੋ ਪਰਂ ਸਬ੍ਬਂ ਪਠਮਕਥਿਨੇ ਵੁਤ੍ਤਸਦਿਸਮੇਵ. ਕੇਵਲਞ੍ਹਿ ਤਤ੍ਥ ਦਸਾਹਾਤਿਕ੍ਕਮੋ, ਇਧ ਮਾਸਾਤਿਕ੍ਕਮੋਤਿ ਅਯਂ ਵਿਸੇਸੋ. ਸੇਸਂ ਤਾਦਿਸਮੇਵਾਤਿ.

ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਅਞ੍ਞਾਤਿਕਾਯਾਤਿ ਨ ਞਾਤਿਕਾਯ, ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਂ ਯੁਗਂ, ਤਾਵ ਕੇਨਚਿ ਆਕਾਰੇਨ ਅਸਮ੍ਬਦ੍ਧਾਯਾਤਿ ਅਤ੍ਥੋ. ਭਿਕ੍ਖੁਨਿਯਾਤਿ ਸਾਕਿਯਾਨਿਯੋ ਵਿਯ ਸੁਦ੍ਧਭਿਕ੍ਖੁਸਙ੍ਘੇ ਵਾ ਉਭਤੋਸਙ੍ਘੇ ਵਾ ਉਪਸਮ੍ਪਨ੍ਨਾਯ. ਪੁਰਾਣਚੀਵਰਨ੍ਤਿ ਰਜਿਤ੍ਵਾ ਕਪ੍ਪਂ ਕਤ੍ਵਾ ਏਕਵਾਰਮ੍ਪਿ ਨਿਵਤ੍ਥਂ ਵਾ ਪਾਰੁਤਂ ਵਾ, ਯਂ ਅਨ੍ਤਮਸੋ ਪਰਿਭੋਗਸੀਸੇਨ ਅਂਸੇ ਵਾ ਮਤ੍ਥਕੇ ਵਾ ਕਤ੍ਵਾ ਮਗ੍ਗਂ ਗਤੋ ਹੋਤਿ, ਉਸ੍ਸੀਸਕਂ ਵਾ ਕਤ੍ਵਾ ਨਿਪਨ੍ਨੋ, ਏਤਮ੍ਪਿ ਪੁਰਾਣਚੀਵਰਮੇਵ. ਧੋਵਾਪੇਯ੍ਯ ਵਾਤਿ ਸਚੇ ‘‘ਧੋਵਾ’’ਤਿਵਾਚਾਯ ਵਦਤਿ, ਕਾਯਵਿਕਾਰਂ ਵਾ ਕਰੋਤਿ, ਹਤ੍ਥੇਨ ਵਾ ਹਤ੍ਥੇ ਦੇਤਿ, ਪਾਦਮੂਲੇ ਵਾ ਠਪੇਤਿ, ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ ਠਤ੍ਵਾ ਉਪਰਿ ਵਾ ਖਿਪਤਿ, ਅਞ੍ਞਸ੍ਸ ਵਾ ਹਤ੍ਥੇ ਪੇਸੇਤਿ, ਤਾਯ ਧੋਤਂ, ਧੋਵਾਪਿਤਮੇਵ ਹੋਤਿ, ਰਜਾਪਨਾਕੋਟਾਪਨੇਸੁਪਿ ਏਸੇਵ ਨਯੋ. ਸਿਕ੍ਖਮਾਨਾਯ ਵਾ ਸਾਮਣੇਰਿਯਾ ਵਾ ਉਪਾਸਿਕਾਯ ਵਾ ਹਤ੍ਥੇ ਧੋਵਨਤ੍ਥਾਯ ਦੇਤਿ, ਸਾ ਸਚੇ ਉਪਸਮ੍ਪਜ੍ਜਿਤ੍ਵਾ ਧੋਵਤਿ, ਏਵਮ੍ਪਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਉਪਾਸਕਸ੍ਸ ਵਾ ਸਾਮਣੇਰਸ੍ਸ ਵਾ ਹਤ੍ਥੇ ਦਿਨ੍ਨਂ ਹੋਤਿ, ਸੋ ਚੇ ਲਿਙ੍ਗੇ ਪਰਿਵਤ੍ਤੇ ਉਪਸਮ੍ਪਜ੍ਜਿਤ੍ਵਾ ਧੋਵਤਿ, ਦਹਰਸ੍ਸ ਭਿਕ੍ਖੁਸ੍ਸ ਵਾ ਦਿਨ੍ਨਂ ਹੋਤਿ, ਸੋਪਿ ਲਿਙ੍ਗੇ ਪਰਿਵਤ੍ਤੇ ਧੋਵਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਮੇਵ, ਰਜਾਪਨਾਕੋਟਾਪਨੇਸੁਪਿ ਏਸੇਵ ਨਯੋ. ‘‘ਇਦਂ ਮੇ, ਭਨ੍ਤੇ, ਪੁਰਾਣਚੀਵਰਂ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਧੋਵਾਪਿਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੦੫) ਇਮਿਨਾ ਪਨੇਤ੍ਥ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਪੁਰਾਣਚੀਵਰਧੋਵਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ ‘‘ਧੋਵਾ’’ਤਿਆਦਿਕਾਯ ਆਣਤ੍ਤਿਯਾ, ਏਵਂ ਆਣਤ੍ਤਾਯ ਚ ਭਿਕ੍ਖੁਨਿਯਾ ਉਦ੍ਧਨਸਜ੍ਜਨਾਦੀਸੁ ਸਬ੍ਬਪ੍ਪਯੋਗੇਸੁ ਭਿਕ੍ਖੁਨੋ ਦੁਕ੍ਕਟਂ. ਧੋਵਿਤ੍ਵਾ ਉਕ੍ਖਿਤ੍ਤਮਤ੍ਤਂ ਪਨ ਰਤ੍ਤਮਤ੍ਤਂ ਆਕੋਟਿਤਮਤ੍ਤਞ੍ਚ ਨਿਸ੍ਸਗ੍ਗਿਯਂ ਹੋਤਿ, ਧੋਵਨਾਦੀਨਿ ਤੀਣਿਪਿ ਦ੍ਵੇ ਵਾ ਕਾਰਾਪੇਨ੍ਤਸ੍ਸ ਏਕੇਨ ਵਤ੍ਥੁਨਾ ਨਿਸ੍ਸਗ੍ਗਿਯਂ, ਇਤਰੇਹਿ ਦੁਕ੍ਕਟਂ. ਸਚੇ ਪਨ ‘‘ਧੋਵਾ’’ਤਿ ਵੁਤ੍ਤਾ ਸਬ੍ਬਾਨਿਪਿ ਕਰੋਤਿ, ਧੋਵਨਪਚ੍ਚਯਾਵ ਆਪਤ੍ਤਿ. ‘‘ਇਮਸ੍ਮਿਂ ਚੀਵਰੇ ਯਂ ਕਤ੍ਤਬ੍ਬਂ, ਤਂ ਕਰੋਹੀ’’ਤਿ ਵਦਤੋ ਪਨ ਏਕਵਾਚਾਯ ਪਾਚਿਤ੍ਤਿਯੇਨ ਸਦ੍ਧਿਂ ਦ੍ਵੇ ਦੁਕ੍ਕਟਾਨਿ, ਭਿਕ੍ਖੁਨਿਸਙ੍ਘਵਸੇਨ ਏਕਤੋਉਪਸਮ੍ਪਨ੍ਨਾਯ ਧੋਵਾਪੇਨ੍ਤਸ੍ਸ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਅਞ੍ਞਸ੍ਸ ਵਾ ਸਨ੍ਤਕਂ ਨਿਸੀਦਨਪਚ੍ਚਤ੍ਥਰਣਂ ਵਾ ਧੋਵਾਪੇਨ੍ਤਸ੍ਸ, ਞਾਤਿਕਾਯ ਅਞ੍ਞਾਤਿਕਸਞ੍ਞਿਨੋ ਚੇਵ, ਵੇਮਤਿਕਸ੍ਸ ਚ ਦੁਕ੍ਕਟਂ, ਅਞ੍ਞਾਤਿਕਾਯ ਞਾਤਿਕਸਞ੍ਞਿਨੋਪਿ ਵੇਮਤਿਕਸ੍ਸਾਪਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਮੇਵ. ਇਤੋ ਪਰਂ ਪਨ ਏਵਰੂਪੇਸੁ ਠਾਨੇਸੁ ‘‘ਤਿਕਪਾਚਿਤ੍ਤਿਯ’’ਨ੍ਤਿ ਵਕ੍ਖਾਮ, ਸਚੇ ਞਾਤਿਕਾਯ ਸਹਾਯਾ ਅਞ੍ਞਾਤਿਕਾ ‘‘ਧੋਵਾ’’ਤਿ ਅਵੁਤ੍ਤਾ ਵਾ ਧੋਵਤਿ, ਅਪਰਿਭੁਤ੍ਤਂ ਵਾ ਅਞ੍ਞਂ ਵਾ ਪਰਿਕ੍ਖਾਰਂ ਧੋਵਤਿ, ਸਿਕ੍ਖਮਾਨਸਾਮਣੇਰਿਯੋ ਵਾ ਧੋਵਨ੍ਤਿ, ਅਨਾਪਤ੍ਤਿ, ਉਮ੍ਮਤ੍ਤਕਾਦੀਨਂ ਅਨਾਪਤ੍ਤਿਯੇਵ. ਪੁਰਾਣਚੀਵਰਤਾ, ਉਪਚਾਰੇ ਠਤ੍ਵਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਆਣਾਪਨਂ, ਤਸ੍ਸਾ ਧੋਵਨਾਦੀਨਿ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਞ੍ਚਰਿਤ੍ਤਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਅਞ੍ਞਾਤਿਕਾਯਾਤਿਇਦਂ ਵੁਤ੍ਤਨਯਮੇਵ, ਤਸ੍ਮਾ ਇਤੋ ਪਰਂ ਕਤ੍ਥਚਿ ਨ ਵਿਚਾਰਯਿਸ੍ਸਾਮ. ਚੀਵਰਨ੍ਤਿ ਛਨ੍ਨਂ ਅਞ੍ਞਤਰਂ ਵਿਕਪ੍ਪਨੁਪਗਂ, ਏਸ ਨਯੋ ਸਬ੍ਬੇਸੁ ਚੀਵਰਪ੍ਪਟਿਸਂਯੁਤ੍ਤਸਿਕ੍ਖਾਪਦੇਸੁ. ਯਤ੍ਥ ਪਨ ਵਿਸੇਸੋ ਭਵਿਸ੍ਸਤਿ, ਤਤ੍ਥ ਵਕ੍ਖਾਮ. ਪਟਿਗ੍ਗਣ੍ਹੇਯ੍ਯਾਤਿਏਤ੍ਥ ਹਤ੍ਥੇਨ ਵਾ ਹਤ੍ਥੇ ਦੇਤੁ, ਪਾਦਮੂਲੇ ਵਾ ਠਪੇਤੁ, ਧਮ੍ਮਕਥਂ ਕਥੇਨ੍ਤਸ੍ਸ ਵਤ੍ਥੇਸੁ ਖਿਪਿਯਮਾਨੇਸੁ ਉਪਚਾਰਂ ਮੁਞ੍ਚਿਤ੍ਵਾਪਿ ਉਪਰਿ ਵਾ ਖਿਪਤੁ, ਸਚੇ ਸਾਦਿਯਤਿ, ਪਟਿਗ੍ਗਹਿਤਮੇਵ ਹੋਤਿ. ਯਸ੍ਸ ਕਸ੍ਸਚਿ ਪਨ ਅਨੁਪਸਮ੍ਪਨ੍ਨਸ੍ਸ ਹਤ੍ਥੇ ਪੇਸਿਤਂ ਗਣ੍ਹਿਤੁਂ ਵਟ੍ਟਤਿ, ‘‘ਪਂਸੁਕੂਲਂ ਗਣ੍ਹਿਸ੍ਸਤੀ’’ਤਿ ਸਙ੍ਕਾਰਕੂਟਾਦੀਸੁ ਠਪਿਤਮ੍ਪਿ ਪਂਸੁਕੂਲਂ ਅਧਿਟ੍ਠਹਿਤ੍ਵਾ ਗਹੇਤੁਂ ਵਟ੍ਟਤਿਯੇਵ. ਅਞ੍ਞਤ੍ਰ ਪਾਰਿਵਤ੍ਤਕਾਤਿ ਯਂ ‘‘ਅਨ੍ਤਮਸੋ ਹਰੀਟਕਕ੍ਖਣ੍ਡਮ੍ਪਿ ਦਤ੍ਵਾ ਵਾ ਦਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਵਾ ਪਾਰਿਵਤ੍ਤਕਂ ਗਣ੍ਹਾਤਿ, ਤਂ ਠਪੇਤ੍ਵਾ ਅਞ੍ਞਂ ਅਨ੍ਤਮਸੋ ਵਿਕਪ੍ਪਨੁਪਗਂ ਪਟਪਰਿਸ੍ਸਾਵਨਮ੍ਪਿ ਗਣ੍ਹਨ੍ਤਸ੍ਸ ਨਿਸ੍ਸਗ੍ਗਿਯਂ ਹੋਤਿ. ਤਤ੍ਰ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਪਟਿਗ੍ਗਹਿਤਂ ਅਞ੍ਞਤ੍ਰ ਪਾਰਿਵਤ੍ਤਕਾ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੧੨) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਰਾਜਗਹੇ ਉਦਾਯਿਤ੍ਥੇਰਂ ਆਰਬ੍ਭ ਚੀਵਰਪ੍ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਪਾਰਿਵਤ੍ਤਕਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਗਹਣਤ੍ਥਾਯ ਹਤ੍ਥਪ੍ਪਸਾਰਣਾਦਿਪ੍ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਜ੍ਜਿਤਬ੍ਬਂ, ਤਿਕਪਾਚਿਤ੍ਤਿਯਂ, ਏਕਤੋਉਪਸਮ੍ਪਨ੍ਨਾਯ ਞਾਤਿਕਾਯ ਚ ਅਞ੍ਞਾਤਿਕਸਞ੍ਞਿਸ੍ਸ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਵਿਸ੍ਸਾਸਗ੍ਗਾਹੇ, ਤਾਵਕਾਲਿਕੇ, ਪਤ੍ਤਤ੍ਥਵਿਕਾਦਿਮ੍ਹਿ ਚ ਅਨਧਿਟ੍ਠਾਤਬ੍ਬਪਰਿਕ੍ਖਾਰੇ, ਸਿਕ੍ਖਮਾਨਸਾਮਣੇਰੀਨਂ ਹਤ੍ਥਤੋ ਗਹਣੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵਿਕਪ੍ਪਨੁਪਗਚੀਵਰਤਾ, ਪਾਰਿਵਤ੍ਤਕਾਭਾਵੋ, ਅਞ੍ਞਾਤਿਕਾਯ ਹਤ੍ਥਤੋ ਗਹਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਞ੍ਚਰਿਤ੍ਤਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਸੇਸਂ ਚਤੁਤ੍ਥਸਦਿਸਮੇਵਾਤਿ.

ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਗਹਪਤਿਨ੍ਤਿ ਭਿਕ੍ਖੂਸੁ ਅਪਬ੍ਬਜਿਤਮਨੁਸ੍ਸਂ. ਗਹਪਤਾਨਿਨ੍ਤਿ ਭਿਕ੍ਖੁਨੀਸੁ ਅਪਬ੍ਬਜਿਤਿਤ੍ਥਿਂ, ਏਸ ਨਯੋ ਸਬ੍ਬੇਸੁ ਗਹਪਤਿਪ੍ਪਟਿਸਂਯੁਤ੍ਤੇਸੁ ਸਿਕ੍ਖਾਪਦੇਸੁ. ਵਿਞ੍ਞਾਪੇਯ੍ਯਾਤਿ ਯਾਚੇਯ੍ਯ ਵਾ ਯਾਚਾਪੇਯ੍ਯ ਵਾ. ਅਞ੍ਞਤ੍ਰ ਸਮਯਾਤਿ ਯੋ ਅਚ੍ਛਿਨ੍ਨਚੀਵਰੋ ਵਾ ਹੋਤਿ ਨਟ੍ਠਚੀਵਰੋ ਵਾ, ਤਸ੍ਸ ਤਂ ਸਮਯਂ ਠਪੇਤ੍ਵਾ ਅਞ੍ਞਸ੍ਮਿਂ ਵਿਞ੍ਞਾਪਨਪ੍ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਤਤ੍ਥ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਅਞ੍ਞਾਤਕਂ ਗਹਪਤਿਕਂ ਅਞ੍ਞਤ੍ਰ ਸਮਯਾ ਵਿਞ੍ਞਾਪਿਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੨੪) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀਵਰਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਕੇ ਅਞ੍ਞਾਤਕਸਞ੍ਞਿਨੋ ਵੇਮਤਿਕਸ੍ਸ ਚ ਦੁਕ੍ਕਟਂ. ਸਮਯੇ ਵਾ ਞਾਤਕਪ੍ਪਵਾਰਿਤੇ ਵਾ ਵਿਞ੍ਞਾਪੇਨ੍ਤਸ੍ਸ, ਅਞ੍ਞਸ੍ਸ ਵਾ ਞਾਤਕਪ੍ਪਵਾਰਿਤੇ ਤਸ੍ਸੇਵਤ੍ਥਾਯ ਵਿਞ੍ਞਾਪੇਨ੍ਤਸ੍ਸ, ਅਤ੍ਤਨੋ ਧਨੇਨ ਗਣ੍ਹਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵਿਕਪ੍ਪਨੁਪਗਚੀਵਰਤਾ, ਸਮਯਾਭਾਵੋ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਚਤੁਤ੍ਥਸਦਿਸਾਨੇਵਾਤਿ.

ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਤਞ੍ਚੇਤਿ ਤਂ ਅਚ੍ਛਿਨ੍ਨਚੀਵਰਂ ਵਾ ਨਟ੍ਠਚੀਵਰਂ ਵਾ. ਅਭਿਹਟ੍ਠੁਨ੍ਤਿ ਅਭੀਤਿ ਉਪਸਗ੍ਗੋ, ਹਰਿਤੁਨ੍ਤਿ ਅਤ੍ਥੋ, ਗਣ੍ਹਿਤੁਨ੍ਤਿ ਵੁਤ੍ਤਂ ਹੋਤਿ. ਪਵਾਰੇਯ੍ਯਾਤਿ ਇਚ੍ਛਾਪੇਯ੍ਯ, ਇਚ੍ਛਂ ਰੁਚਿਂ ਉਪ੍ਪਾਦੇਯ੍ਯ, ‘‘ਯਾਵਤ੍ਤਕਂ ਇਚ੍ਛਸਿ, ਤਾਵਤ੍ਤਕਂ ਗਣ੍ਹਾਹੀ’’ਤਿ ਏਵਂ ਨਿਮਨ੍ਤੇਯ੍ਯਾਤਿ ਅਤ੍ਥੋ, ਯਥਾ ਵਾ ‘‘ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ’’ਤਿ (ਸੁ. ਨਿ. ੪੨੬, ੧੧੦੪; ਚੂਲ਼ਨਿ. ਜਤੁਕਣ੍ਣੀਮਾਣਵਪੁਚ੍ਛਾਨਿਦ੍ਦੇਸ ੬੭) ਏਤ੍ਥ ਦਿਸ੍ਵਾਤਿ ਅਤ੍ਥੋ, ਏਵਮਿਧਾਪਿ ‘‘ਅਭਿਹਟ੍ਠੁਂ ਪਵਾਰੇਯ੍ਯਾ’’ਤਿ ਉਪਨੇਤ੍ਵਾ ਪੁਰਤੋ ਠਪੇਨ੍ਤੋ ਕਾਯੇਨ ਵਾ, ‘‘ਅਮ੍ਹਾਕਂ ਦੁਸ੍ਸਕੋਟ੍ਠਾਗਾਰਤੋ ਯਤ੍ਤਕਂ ਇਚ੍ਛਥ, ਤਤ੍ਤਕਂ ਗਣ੍ਹਥਾ’’ਤਿ ਵਦਨ੍ਤੋ ਵਾਚਾਯ ਵਾ ਅਭਿਹਰਿਤ੍ਵਾ ਨਿਮਨ੍ਤੇਯ੍ਯਾਤਿ ਅਤ੍ਥੋ. ਸਨ੍ਤਰੁਤ੍ਤਰਪਰਮਨ੍ਤਿ ਸਅਨ੍ਤਰਂ ਉਤ੍ਤਰਂ ਪਰਮਂ ਅਸ੍ਸ ਚੀਵਰਸ੍ਸਾਤਿ ਸਨ੍ਤਰੁਤ੍ਤਰਪਰਮਂ, ਨਿਵਾਸਨੇਨ ਸਦ੍ਧਿਂ ਪਾਰੁਪਨਂ ਉਕ੍ਕਟ੍ਠਪਰਿਚ੍ਛੇਦੋ ਅਸ੍ਸਾਤਿ ਵੁਤ੍ਤਂ ਹੋਤਿ. ਤਤੋ ਚੀਵਰਂ ਸਾਦਿਤਬ੍ਬਨ੍ਤਿ ਤਤੋ ਅਭਿਹਟਚੀਵਰਤੋ ਏਤ੍ਤਕਂ ਚੀਵਰਂ ਗਹੇਤਬ੍ਬਂ, ਨ ਤਤੋ ਪਰਂ.

ਤਤ੍ਰਾਯਂ ਵਿਨਿਚ੍ਛਯੋ – ਯਸ੍ਸ ਅਧਿਟ੍ਠਿਤਚੀਵਰਸ੍ਸ ਤੀਣਿ ਨਟ੍ਠਾਨਿ, ਤੇਨ ਦ੍ਵੇ ਸਾਦਿਤਬ੍ਬਾਨਿ, ਏਕਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਅਞ੍ਞਂ ਸਭਾਗਟ੍ਠਾਨਤੋ ਪਰਿਯੇਸਿਤਬ੍ਬਂ. ਯਸ੍ਸ ਦ੍ਵੇ ਨਟ੍ਠਾਨਿ, ਤੇਨ ਏਕਂ ਸਾਦਿਤਬ੍ਬਂ. ਸਚੇ ਪਨ ਪਕਤਿਯਾਵ ਸਨ੍ਤਰੁਤ੍ਤਰੇਨ ਚਰਤਿ, ਦ੍ਵੇ ਸਾਦਿਤਬ੍ਬਾਨਿ, ਏਵਂ ਏਕਂ ਸਾਦਿਯਨ੍ਤੇਨੇਵ ਸਮੋ ਭਵਿਸ੍ਸਤਿ. ਯਸ੍ਸ ਤੀਸੁ ਏਕਂ ਨਟ੍ਠਂ, ਕਿਞ੍ਚਿ ਨ ਸਾਦਿਤਬ੍ਬਂ. ਯਸ੍ਸ ਪਨ ਦ੍ਵੀਸੁ ਏਕਂ ਨਟ੍ਠਂ, ਏਕਂ ਸਾਦਿਤਬ੍ਬਂ. ਯਸ੍ਸ ਏਕਂਯੇਵ ਹੋਤਿ, ਤਞ੍ਚ ਨਟ੍ਠਂ, ਦ੍ਵੇ ਸਾਦਿਤਬ੍ਬਾਨਿ. ਭਿਕ੍ਖੁਨਿਯਾ ਪਨ ਪਞ੍ਚਸੁ ਨਟ੍ਠੇਸੁ ਦ੍ਵੇ ਸਾਦਿਤਬ੍ਬਾਨਿ, ਚਤੂਸੁ ਨਟ੍ਠੇਸੁ ਏਕਂ ਸਾਦਿਤਬ੍ਬਂ, ਤੀਸੁ ਨਟ੍ਠੇਸੁ ਨ ਕਿਞ੍ਚਿ ਸਾਦਿਤਬ੍ਬਂ, ਕੋ ਪਨ ਵਾਦੋ ਦ੍ਵੀਸੁ ਵਾ ਏਕਸ੍ਮਿਂ ਵਾ. ਯੇਨ ਕੇਨਚਿ ਹਿ ਸਨ੍ਤਰੁਤ੍ਤਰਪਰਮਤਾਯ ਠਾਤਬ੍ਬਂ, ਤਤੋ ਉਤ੍ਤਰਿ ਵਿਞ੍ਞਾਪਨਪ੍ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਤਤ੍ਥ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਅਞ੍ਞਾਤਕਂ ਗਹਪਤਿਕਂ ਤਤੁਤ੍ਤਰਿ ਵਿਞ੍ਞਾਪਿਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੨੪) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਬਹੁਚੀਵਰਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਕੇ ਅਞ੍ਞਾਤਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਦ੍ਵੇ ਚੀਵਰਾਨਿ ਕਤ੍ਵਾ ‘‘ਸੇਸਕਂ ਆਹਰਿਸ੍ਸਾਮੀ’’ਤਿ ਵਤ੍ਵਾ ਗਣ੍ਹਨ੍ਤਸ੍ਸ, ‘‘ਸੇਸਕਂ ਤੁਯ੍ਹਂਯੇਵ ਹੋਤੂ’’ਤਿ ਵੁਤ੍ਤਸ੍ਸ, ਨ ਅਚ੍ਛਿਨ੍ਨਨਟ੍ਠਕਾਰਣਾ ਦਿਨ੍ਨਂ ਗਣ੍ਹਨ੍ਤਸ੍ਸ, ਵੁਤ੍ਤਨਯੇਨ ਞਾਤਕਪ੍ਪਵਾਰਿਤੇ ਵਿਞ੍ਞਾਪੇਨ੍ਤਸ੍ਸ, ਅਤ੍ਤਨੋ ਧਨੇਨ ਗਣ੍ਹਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਤਤੁਤ੍ਤਰਿਤਾ, ਅਚ੍ਛਿਨ੍ਨਾਦਿਕਾਰਣਤਾ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਚਤੁਤ੍ਥਸਦਿਸਾਨੇਵਾਤਿ.

ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਉਪਕ੍ਖਟਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਭਿਕ੍ਖੁਂ ਪਨੇਵ ਉਦ੍ਦਿਸ੍ਸਾਤਿ ‘‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਸ੍ਸਾਮੀ’’ਤਿ ਏਵਂ ਅਪਦਿਸਿਤ੍ਵਾ. ਚੀਵਰਚੇਤਾਪਨ੍ਨਨ੍ਤਿ ਹਿਰਞ੍ਞਾਦਿਕਂ ਚੀਵਰਮੂਲਂ. ਉਪਕ੍ਖਟਂ ਹੋਤੀਤਿ ਸਜ੍ਜਿਤਂ ਹੋਤਿ, ਸਂਹਰਿਤ੍ਵਾ ਠਪਿਤਂ. ਚੇਤਾਪੇਤ੍ਵਾਤਿ ਪਰਿਵਤ੍ਤੇਤ੍ਵਾ, ਕਾਰੇਤ੍ਵਾ ਵਾ ਕਿਣਿਤ੍ਵਾ ਵਾਤਿ ਅਤ੍ਥੋ. ਚੀਵਰੇਨ ਅਚ੍ਛਾਦੇਸ੍ਸਾਮੀਤਿ ਵੋਹਾਰਵਚਨਮੇਤਂ, ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਸ੍ਸਾਮੀਤਿ ਅਯਂ ਪਨੇਤ੍ਥ ਅਤ੍ਥੋ. ਤਤ੍ਰ ਚੇ ਸੋਤਿ ਯਤ੍ਰ ਸੋ ਗਹਪਤਿ ਵਾ ਗਹਪਤਾਨੀ ਵਾ, ਤਤ੍ਰ ਸੋ ਭਿਕ੍ਖੁ ਪੁਬ੍ਬੇ ਅਪ੍ਪਵਾਰਿਤੋ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜੇਯ੍ਯ ਚੇਤਿ ਅਯਮੇਤ੍ਥ ਪਦਸਮ੍ਬਨ੍ਧੋ. ਵਿਕਪ੍ਪਂ ਆਪਜ੍ਜੇਯ੍ਯਾਤਿ ਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ ਆਪਜ੍ਜੇਯ੍ਯ. ਯਥਾ ਪਨ ਤਮਾਪਜ੍ਜਤਿ, ਤਂ ਦਸ੍ਸੇਤੁਂ ਸਾਧੁ ਵਤਾਤਿਆਦਿਮਾਹ. ਤਤ੍ਥ ਸਾਧੂਤਿ ਆਯਾਚਨੇ ਨਿਪਾਤੋ. ਵਤਾਤਿ ਪਰਿਵਿਤਕ੍ਕੇ. ਮਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ. ਆਯਸ੍ਮਾਤਿ ਪਰਂ ਆਲਪਤਿ. ਏਵਰੂਪਂ ਵਾ ਏਵਰੂਪਂ ਵਾਤਿ ਆਯਤਾਦੀਸੁ ਅਞ੍ਞਤਰਂ. ਕਲ੍ਯਾਣਕਮ੍ਯਤਂ ਉਪਾਦਾਯਾਤਿ ਸੁਨ੍ਦਰਕਾਮਤਂ ਵਿਸਿਟ੍ਠਕਾਮਤਂ ਚਿਤ੍ਤੇਨ ਗਹੇਤ੍ਵਾ, ਤਸ੍ਸ ‘‘ਆਪਜ੍ਜੇਯ੍ਯ ਚੇ’’ਤਿਇਮਿਨਾ ਸਮ੍ਬਨ੍ਧੋ, ਸਚੇ ਪਨ ਏਵਰੂਪਂ ਆਪਜ੍ਜਨ੍ਤਸ੍ਸ ਤਸ੍ਸ ਵਚਨੇਨ ਯੋ ਪਠਮਂ ਅਧਿਪ੍ਪੇਤਤੋ ਮੂਲਂ ਵਡ੍ਢੇਤ੍ਵਾ ਸੁਨ੍ਦਰਤਰਂ ਚੇਤਾਪੇਤਿ, ਤਸ੍ਸ ਪਯੋਗੇ ਭਿਕ੍ਖੁਨੋ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਤਤ੍ਥ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਪੁਬ੍ਬੇ ਅਪ੍ਪਵਾਰਿਤਂ ਅਞ੍ਞਾਤਕਂ ਗਹਪਤਿਕਂ ਉਪਸਙ੍ਕਮਿਤ੍ਵਾ ਵਿਕਪ੍ਪਂ ਆਪਨ੍ਨਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੨੯) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀਵਰੇ ਵਿਕਪ੍ਪਂ ਆਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਕੇ ਅਞ੍ਞਾਤਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਮਹਗ੍ਘਂ ਚੇਤਾਪੇਤੁਕਾਮਂ ਅਪ੍ਪਗ੍ਘਂ ਵਾ, ਏਤੇਨੇਵ ਮੂਲੇਨ ‘‘ਅਞ੍ਞਂ ਏਵਰੂਪਂ ਵਾ ਦੇਹੀ’’ਤਿ ਵਦਨ੍ਤਸ੍ਸ, ਵੁਤ੍ਤਨਯੇਨ ਞਾਤਕਪ੍ਪਵਾਰਿਤੇ ਵਿਞ੍ਞਾਪੇਨ੍ਤਸ੍ਸ, ਅਤ੍ਤਨੋ ਧਨੇਨ ਗਣ੍ਹਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਚੀਵਰੇ ਭਿਯ੍ਯੋਕਮ੍ਯਤਾ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਚਤੁਤ੍ਥਸਦਿਸਾਨੇਵਾਤਿ.

ਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ

ਨਵਮੇ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਇਦਞ੍ਹਿ ਪੁਰਿਮਸ੍ਸ ਅਨੁਪਞ੍ਞਤ੍ਤਿਸਦਿਸਂ, ਕੇਵਲਂ ਤਤ੍ਥ ਏਕਸ੍ਸ ਪੀਲ਼ਾ ਕਤਾ, ਇਧ ਦ੍ਵਿਨ੍ਨਂ, ਅਯਮੇਤ੍ਥ ਵਿਸੇਸੋ, ਸੇਸਂ ਸਬ੍ਬਂ ਪੁਰਿਮਸਦਿਸਮੇਵ. ਯਥਾ ਚ ਦ੍ਵਿਨ੍ਨਂ, ਏਵਂ ਬਹੂਨਂ ਪੀਲ਼ਂ ਕਤ੍ਵਾ ਗਣ੍ਹਤੋਪਿ ਆਪਤ੍ਤਿ ਵੇਦਿਤਬ੍ਬਾ. ਨਿਸ੍ਸਜ੍ਜਨਵਿਧਾਨੇ ਚ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਪੁਬ੍ਬੇ ਅਪ੍ਪਵਾਰਿਤੇ ਅਞ੍ਞਾਤਕੇ ਗਹਪਤਿਕੇ ਉਪਸਙ੍ਕਮਿਤ੍ਵਾ ਵਿਕਪ੍ਪਂ ਆਪਨ੍ਨਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੩੪) ਇਮਿਨਾ ਨਯੇਨ ਵਚਨਭੇਦੋ ਞਾਤਬ੍ਬੋਤਿ.

ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਰਾਜਸਿਕ੍ਖਾਪਦਵਣ੍ਣਨਾ

ਦਸਮੇ ਰਾਜਭੋਗ੍ਗੋਤਿ ਰਾਜਤੋ ਭੋਗ੍ਗਂ ਭੁਞ੍ਜਿਤਬ੍ਬਂ ਅਸ੍ਸ ਅਤ੍ਥੀਤਿ ਰਾਜਭੋਗ੍ਗੋ, ‘‘ਰਾਜਭੋਗੋ’’ਤਿਪਿ ਪਾਠੋ, ਰਾਜਤੋ ਭੋਗੋ ਅਸ੍ਸ ਅਤ੍ਥੀਤਿ ਅਤ੍ਥੋ. ਚੀਵਰਚੇਤਾਪਨ੍ਨਨ੍ਤਿ ਹਿਰਞ੍ਞਾਦਿਕਂ ਅਕਪ੍ਪਿਯਂ. ਪਹਿਣੇਯ੍ਯਾਤਿ ਪੇਸੇਯ੍ਯ. ਇਮਿਨਾਤਿਆਦਿ ਆਗਮਨਸੁਦ੍ਧਿਂ ਦਸ੍ਸੇਤੁਂ ਵੁਤ੍ਤਂ. ਸਚੇ ਹਿ ‘‘ਇਦਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਹੀ’’ਤਿ ਪੇਸੇਯ੍ਯ, ਆਗਮਨਸ੍ਸ ਅਸੁਦ੍ਧਤ੍ਤਾ ਅਕਪ੍ਪਿਯਵਤ੍ਥੁਂ ਆਰਬ੍ਭ ਭਿਕ੍ਖੁਨਾ ਕਪ੍ਪਿਯਕਾਰਕੋਪਿ ਨਿਦ੍ਦਿਸਿਤਬ੍ਬੋ ਨ ਭਵੇਯ੍ਯ. ਆਭਤਨ੍ਤਿ ਆਨੀਤਂ. ਨ ਖੋ ਮਯਨ੍ਤਿਆਦਿ ਇਦਂ ਕਪ੍ਪਿਯਵਸੇਨ ਆਭਤਮ੍ਪਿ ਚੀਵਰਮੂਲਂ ਈਦਿਸੇਨ ਦੂਤਵਚਨੇਨ ਅਕਪ੍ਪਿਯਂ ਹੋਤਿ, ਤਸ੍ਮਾ ਤਂ ਪਟਿਕ੍ਖਿਪਿਤਬ੍ਬਨ੍ਤਿ ਦਸ੍ਸੇਤੁਂ ਵੁਤ੍ਤਂ. ਸੁਵਣ੍ਣਂ ਰਜਤਂ ਕਹਾਪਣੋ ਮਾਸਕੋਤਿ ਇਮਾਨਿ ਹਿ ਚਤ੍ਤਾਰਿ ਨਿਸ੍ਸਗ੍ਗਿਯਵਤ੍ਥੂਨਿ, ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਲੋਹਿਤਙ੍ਕੋ ਮਸਾਰਗਲ੍ਲਂ ਸਤ੍ਤ ਧਞ੍ਞਾਨਿ ਦਾਸਿਦਾਸਖੇਤ੍ਤਵਤ੍ਥੁਪੁਪ੍ਫਾਰਾਮਫਲਾਰਾਮਾਦਯੋਤਿ ਇਮਾਨਿ ਦੁਕ੍ਕਟਵਤ੍ਥੂਨਿ ਚ ਅਤ੍ਤਨੋ ਵਾ ਚੇਤਿਯਸਙ੍ਘਗਣਪੁਗ੍ਗਲਾਨਂ ਵਾ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਨ੍ਤਿ, ਤਸ੍ਮਾ ਤਂ ਸਾਦਿਤੁਂ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ‘‘ਨ ਖੋ ਮਯ’’ਨ੍ਤਿਆਦਿ ਵੁਤ੍ਤਂ.

ਚੀਵਰਞ੍ਚ ਖੋ ਮਯਂ ਪਟਿਗ੍ਗਣ੍ਹਾਮਾਤਿ ਇਦਂ ਪਨ ਅਤ੍ਤਾਨਂ ਉਦ੍ਦਿਸ੍ਸ ਆਭਤਤ੍ਤਾ ਵਤ੍ਤੁਂ ਵਟ੍ਟਤਿ, ਤਸ੍ਮਾ ਵੁਤ੍ਤਂ. ਕਾਲੇਨਾਤਿ ਯੁਤ੍ਤਪਤ੍ਤਕਾਲੇਨ, ਯਦਾ ਨੋ ਅਤ੍ਥੋ ਹੋਤਿ, ਤਦਾ ਕਪ੍ਪਿਯਂ ਚੀਵਰਂ ਪਟਿਗ੍ਗਣ੍ਹਾਮਾਤਿ ਅਤ੍ਥੋ. ਵੇਯ੍ਯਾਵਚ੍ਚਕਰੋਤਿ ਕਪ੍ਪਿਯਕਾਰਕੋ. ਨਿਦ੍ਦਿਸਿਤਬ੍ਬੋਤਿਇਦਂ ‘‘ਅਤ੍ਥਿ ਪਨਾਯਸ੍ਮਤੋ ਕੋਚਿ ਵੇਯ੍ਯਾਵਚ੍ਚਕਰੋ’’ਤਿ ਕਪ੍ਪਿਯਵਚਨੇਨ ਵੁਤ੍ਤਤ੍ਤਾ ਅਨੁਞ੍ਞਾਤਂ. ਸਚੇ ਪਨ ਦੂਤੋ ‘‘ਕੋ ਇਮਂ ਗਣ੍ਹਾਤੀ’’ਤਿ ਵਾ ‘‘ਕਸ੍ਸ ਦੇਮੀ’’ਤਿ ਵਾ ਵਦਤਿ, ਨ ਨਿਦ੍ਦਿਸਿਤਬ੍ਬੋ. ਆਰਾਮਿਕੋ ਵਾ ਉਪਾਸਕੋ ਵਾਤਿਇਦਂ ਸਾਰੁਪ੍ਪਤਾਯ ਵੁਤ੍ਤਂ, ਠਪੇਤ੍ਵਾ ਪਨ ਪਞ੍ਚ ਸਹਧਮ੍ਮਿਕੇ ਯੋ ਕੋਚਿ ਕਪ੍ਪਿਯਕਾਰਕੋ ਵਟ੍ਟਤਿ. ਏਸੋ ਖੋ, ਆਵੁਸੋਤਿਇਦਂ ਭਿਕ੍ਖੁਸ੍ਸ ਕਪ੍ਪਿਯਵਚਨਦਸ੍ਸਨਤ੍ਥਂ ਵੁਤ੍ਤਂ, ਏਵਮੇਵ ਹਿ ਵਤ੍ਤਬ੍ਬਂ, ‘‘ਏਤਸ੍ਸ ਦੇਹੀ’’ਤਿਆਦਿ ਨ ਵਤ੍ਤਬ੍ਬਂ. ਸਞ੍ਞਤ੍ਤੋ ਸੋ ਮਯਾਤਿ ਆਣਤ੍ਤੋ ਸੋ ਮਯਾ, ਯਥਾ ਤੁਮ੍ਹਾਕਂ ਚੀਵਰੇਨ ਅਤ੍ਥੇ ਸਤਿ ਚੀਵਰਂ ਦਸ੍ਸਤਿ, ਏਵਂ ਵੁਤ੍ਤੋਤਿ ਅਤ੍ਥੋ. ਦੂਤੇਨ ਹਿ ਏਵਂ ਆਰੋਚਿਤੇਯੇਵ ਤਂ ਚੋਦੇਤੁਂ ਵਟ੍ਟਤਿ, ਨੇਵ ਤਸ੍ਸ ਹਤ੍ਥੇ ਦਤ੍ਵਾ ਗਤਮਤ੍ਤਕਾਰਣੇਨ. ਸਚੇ ਪਨ ‘‘ਅਯਂ ਵੇਯ੍ਯਾਵਚ੍ਚਕਰੋ’’ਤਿ ਸਮ੍ਮੁਖਾ ਨਿਦ੍ਦਿਟ੍ਠੋ ਹੋਤਿ, ਦੂਤੋ ਚ ਸਮ੍ਮੁਖਾ ਏਵ ਤਸ੍ਸ ਹਤ੍ਥੇ ਚੇਤਾਪਨ੍ਨਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦੇਹੀ’’ਤਿ ਗਚ੍ਛਤਿ, ਏਵਂ ‘‘ਸਞ੍ਞਤ੍ਤੋ ਸੋ ਮਯਾ’’ਤਿ ਅਵੁਤ੍ਤੇਪਿ ਚੋਦੇਤੁਂ ਵਟ੍ਟਤਿ. ਸਚੇ ਪਨ ਦੂਤੋ ਗਚ੍ਛਨ੍ਤੋਵ ‘‘ਅਹਂ ਤਸ੍ਸ ਹਤ੍ਥੇ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਭਿਕ੍ਖੁਨੋ ਵਤ੍ਵਾ ਵਾ ਗਚ੍ਛਤਿ, ਅਞ੍ਞਂ ਵਾ ਪੇਸੇਤ੍ਵਾ ਆਰੋਚਾਪੇਤਿ, ਏਵਂ ਸਤਿ ਇਤਰਮ੍ਪਿ ਚੋਦੇਤੁਂ ਵਟ੍ਟਤਿਯੇਵ. ਦੇਸਨਾਮਤ੍ਤਮੇਵ ਚੇਤਂ ‘‘ਦੂਤੇਨਾ’’ਤਿ. ਯੋਪਿ ਅਤ੍ਤਨਾ ਆਹਰਿਤ੍ਵਾ ਏਵਂ ਪਟਿਪਜ੍ਜਤਿ, ਤਸ੍ਮਿਮ੍ਪਿ ਇਦਮੇਵ ਲਕ੍ਖਣਂ. ਅਤ੍ਥੋ ਮੇ, ਆਵੁਸੋ, ਚੀਵਰੇਨਾਤਿ ਚੋਦਨਾਲਕ੍ਖਣਨਿਦਸ੍ਸਨਮੇਤਂ. ਸਚੇ ਹਿ ਵਾਚਾਯ ਚੋਦੇਤਿ, ਇਦਂ ਵਾ ਵਚਨਂ ਯਾਯ ਕਾਯਚਿ ਭਾਸਾਯ ਏਤਸ੍ਸ ਅਤ੍ਥੋ ਵਾ ਵਤ੍ਤਬ੍ਬੋ, ‘‘ਦੇਹਿ ਮੇ, ਆਹਰ ਮੇ’’ਤਿਆਦਿਨਾ ਨਯੇਨ ਪਨ ਵਤ੍ਤੁਂ ਨ ਵਟ੍ਟਤਿ. ਅਭਿਨਿਪ੍ਫਾਦੇਯ੍ਯਾਤਿ ਏਵਂ ਵਚੀਭੇਦਂ ਕਤ੍ਵਾ ਤਿਕ੍ਖਤ੍ਤੁਂ ਚੋਦਯਮਾਨੋ ਪਟਿਲਾਭਵਸੇਨ ਸਾਧੇਯ੍ਯ. ਇਚ੍ਚੇਤਂ ਕੁਸਲਨ੍ਤਿ ਏਤਂ ਸੁਨ੍ਦਰਂ.

ਛਕ੍ਖਤ੍ਤੁਪਰਮਨ੍ਤਿ ਭਾਵਨਪੁਂਸਕਵਚਨਮੇਤਂ. ਛਕ੍ਖਤ੍ਤੁਪਰਮਞ੍ਹਿ ਤੇਨ ਚੀਵਰਂ ਉਦ੍ਦਿਸ੍ਸ ਤੁਣ੍ਹੀਭੂਤੇਨ ਠਾਤਬ੍ਬਂ, ਨ ਨਿਸੀਦਿਤਬ੍ਬਂ, ਨ ਆਮਿਸਂ ਪਟਿਗ੍ਗਹੇਤਬ੍ਬਂ, ਨ ਧਮ੍ਮੋ ਭਾਸਿਤਬ੍ਬੋ. ‘‘ਕਿਂਕਾਰਣਾ ਆਗਤੋਸੀ’’ਤਿ ਵੁਤ੍ਤੇ ਪਨ ‘‘ਜਾਨਾਹਿ, ਆਵੁਸੋ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ. ਸਚੇ ਨਿਸਜ੍ਜਾਦੀਨਿ ਕਰੋਤਿ, ਠਾਨਂ ਭਞ੍ਜਤਿ, ਆਗਤਕਾਰਣਂ ਵਿਨਾਸੇਤਿ, ਇਦਂ ਕਾਯੇਨ ਚੋਦਨਾਯ ਲਕ੍ਖਣਦਸ੍ਸਨਤ੍ਥਂ ਵੁਤ੍ਤਂ. ਏਤ੍ਥ ਚ ਉਕ੍ਕਟ੍ਠਪਰਿਚ੍ਛੇਦੇਨ ਤਿਸ੍ਸਨ੍ਨਂ ਚੋਦਨਾਨਂ ਛਨ੍ਨਞ੍ਚ ਠਾਨਾਨਂ ਅਨੁਞ੍ਞਾਤਤ੍ਤਾ ਚੋਦਨਾਯ ਦਿਗੁਣਂ ਠਾਨਂ ਅਨੁਞ੍ਞਾਤਂ ਹੋਤਿ, ਤਸ੍ਮਾ ਸਚੇ ਚੋਦੇਤਿਯੇਵ, ਨ ਤਿਟ੍ਠਤਿ, ਛ ਚੋਦਨਾਯੋ ਲਬ੍ਭਨ੍ਤਿ. ਸਚੇ ਤਿਟ੍ਠਤਿਯੇਵ, ਨ ਚੋਦੇਤਿ, ਦ੍ਵਾਦਸ ਠਾਨਾਨਿ ਲਬ੍ਭਨ੍ਤਿ. ਸਚੇ ਉਭਯਂ ਕਰੋਤਿ, ਏਕਾਯ ਚੋਦਨਾਯ ਦ੍ਵੇ ਠਾਨਾਨਿ ਹਾਪੇਤਬ੍ਬਾਨਿ. ਤਤ੍ਥ ਯੋ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਛਕ੍ਖਤ੍ਤੁਂ ਚੋਦੇਤਿ, ਸਕਿਂਯੇਵ ਵਾ ਗਨ੍ਤ੍ਵਾ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ ਛਕ੍ਖਤ੍ਤੁਂ ਵਦਤਿ, ਤਥਾ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਦ੍ਵਾਦਸਕ੍ਖਤ੍ਤੁਂ ਤਿਟ੍ਠਤਿ, ਸਕਿਂਯੇਵ ਵਾ ਗਨ੍ਤ੍ਵਾ ਤਤ੍ਰ ਤਤ੍ਰ ਠਾਨੇ ਤਿਟ੍ਠਤਿ, ਸੋਪਿ ਸਬ੍ਬਚੋਦਨਾਯੋ ਸਬ੍ਬਟ੍ਠਾਨਾਨਿ ਚ ਭਞ੍ਜਤਿ, ਕੋ ਪਨ ਵਾਦੋ ਨਾਨਾਦਿਵਸੇਸੁ ਏਵਂ ਕਰੋਨ੍ਤਸ੍ਸਾਤਿ ਅਯਮੇਤ੍ਥ ਵਿਨਿਚ੍ਛਯੋ. ਯੇ ਪਨ ਕਪ੍ਪਿਯਕਾਰਕੇ ਦਾਯਕੋ ਸਯਮੇਵ ਗਨ੍ਤ੍ਵਾ ਨਿਸੀਦਤਿ ਤੇ ਸਤਕ੍ਖਤ੍ਤੁਮ੍ਪਿ ਚੋਦੇਤੁਂ ਵਟ੍ਟਤਿ. ਯੋ ਪਨ ਉਭੋਹਿ ਪਿ ਅਨਿਦ੍ਦਿਟ੍ਠੋ ਮੁਖਵੇਵਟਿਕਕਪ੍ਪਿਯਕਾਰਕੋ ਚ ਪਰਮ੍ਮੁਖਕਪ੍ਪਿਯਕਾਰਕੋ ਚ, ਸੋ ਨ ਕਿਞ੍ਚਿ ਵਤ੍ਤਬ੍ਬੋ, ਏਵਂ ਇਧ ਦਸਪਿ ਕਪ੍ਪਿਯਕਾਰਕਾ ਦਸ੍ਸਿਤਾ ਹੋਨ੍ਤਿ.

ਤਤੋ ਚੇ ਉਤ੍ਤਰੀਤਿ ਵੁਤ੍ਤਚੋਦਨਾਠਾਨਪਰਿਮਾਣਤੋ ਉਤ੍ਤਰਿ. ਨਿਸ੍ਸਗ੍ਗਿਯਨ੍ਤਿ ਉਤ੍ਤਰਿ ਵਾਯਾਮਮਾਨਸ੍ਸ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਏਤ੍ਥ ਚ ‘‘ਇਦਂ ਮੇ, ਭਨ੍ਤੇ, ਚੀਵਰਂ ਅਤਿਰੇਕਤਿਕ੍ਖਤ੍ਤੁਂ ਚੋਦਨਾਯ ਅਤਿਰੇਕਛਕ੍ਖਤ੍ਤੁਂ ਠਾਨੇਨ ਅਭਿਨਿਪ੍ਫਾਦਿਤਂ ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੩੯) ਇਮਿਨਾ ਨਯੇਨ ਨਿਸ੍ਸਜ੍ਜਨਵਿਧਾਨਂ ਵੇਦਿਤਬ੍ਬਂ. ਯਤਸ੍ਸ ਚੀਵਰਚੇਤਾਪਨ੍ਨਂ ਆਭਤਨ੍ਤਿ ਯਤੋ ਰਾਜਤੋ ਵਾ ਰਾਜਭੋਗ੍ਗਤੋ ਵਾ ਅਸ੍ਸ ਭਿਕ੍ਖੁਨੋ ਚੀਵਰਚੇਤਾਪਨ੍ਨਂ ਆਨੀਤਂ, ‘‘ਯਤ੍ਵਸ੍ਸਾ’’ਤਿਪਿ ਪਾਠੋ, ਅਯਮੇਵ ਅਤ੍ਥੋ. ਤਤ੍ਥਾਤਿ ਤਸ੍ਸ ਰਞ੍ਞੋ ਵਾ ਰਾਜਭੋਗ੍ਗਸ੍ਸ ਵਾ ਸਨ੍ਤਿਕਂ, ਸਮੀਪਤ੍ਥੇ ਹਿ ਇਦਂ ਭੁਮ੍ਮਵਚਨਂ. ਨ ਤਂ ਤਸ੍ਸ ਭਿਕ੍ਖੁਨੋ ਕਿਞ੍ਚਿ ਅਤ੍ਥਂ ਅਨੁਭੋਤੀਤਿ ਤਂ ਚੇਤਾਪਨ੍ਨਂ ਤਸ੍ਸ ਭਿਕ੍ਖੁਨੋ ਅਪ੍ਪਮਤ੍ਤਕਮ੍ਪਿ ਕਮ੍ਮਂ ਨ ਨਿਪ੍ਫਾਦੇਤਿ. ਯੁਞ੍ਜਨ੍ਤਾਯਸ੍ਮਨ੍ਤੋ ਸਕਨ੍ਤਿ ਆਯਸ੍ਮਨ੍ਤੋ ਅਤ੍ਤਨੋ ਸਨ੍ਤਕਂ ਧਨਂ ਪਾਪੁਣਨ੍ਤੁ. ਮਾ ਵੋ ਸਕਂ ਵਿਨਸ੍ਸਾਤਿ ਤੁਮ੍ਹਾਕਂ ਸਨ੍ਤਕਂ ਮਾ ਵਿਨਸ੍ਸਤੁ. ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ ਲੋਕੁਤ੍ਤਰਧਮ੍ਮਂ ਅਨੁਗਤਾ, ਵਤ੍ਤਧਮ੍ਮਤਾਤਿ ਅਤ੍ਥੋ, ਤਸ੍ਮਾ ਏਵਂ ਅਕਰੋਨ੍ਤੋ ਵਤ੍ਤਭੇਦੇ ਦੁਕ੍ਕਟਂ ਆਪਜ੍ਜਤਿ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ‘‘ਅਜ੍ਜੁਣ੍ਹੋ, ਭਨ੍ਤੇ, ਆਗਮੇਹੀ’’ਤਿ (ਪਾਰਾ. ੫੩੭) ਵੁਚ੍ਚਮਾਨੋ ਨਾਗਮੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕੇਸੁ ਚੋਦਨਾਠਾਨੇਸੁ ਅਤਿਰੇਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਅਚੋਦਨਾਯ ਲਦ੍ਧੇ, ਸਾਮਿਕੇਹਿ ਚੋਦੇਤ੍ਵਾ ਦਿਨ੍ਨੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਕਪ੍ਪਿਯਕਾਰਕਸ੍ਸ ਭਿਕ੍ਖੁਨੋ ਨਿਦ੍ਦਿਟ੍ਠਭਾਵੋ, ਦੂਤੇਨ ਅਪ੍ਪਿਤਤਾ, ਤਤੁਤ੍ਤਰਿਵਾਯਾਮੋ, ਤੇਨ ਵਾਯਾਮੇਨ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਚਤੁਤ੍ਥਸਦਿਸਾਨੇਵਾਤਿ.

ਰਾਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਚੀਵਰਵਗ੍ਗੋ ਪਠਮੋ.