ਸਙ੍ਘਾਦਿਸੇਸਕਣ੍ਡੋ
ਇਮੇ ਖੋ ਪਨਾਤਿ ਇਦਾਨਿ ਵਤ੍ਤਬ੍ਬਾਨਂ ਅਭਿਮੁਖੀਕਰਣਂ. ਆਯਸ੍ਮਨ੍ਤੋਤਿ ਸਨ੍ਨਿਪਤਿਤਾਨਂ ਪਿਯਵਚਨੇਨ ਆਲਪਨਂ. ਤੇਰਸਾਤਿ ਗਣਨਪਰਿਚ੍ਛੇਦੋ. ਸਙ੍ਘਾਦਿਸੇਸਾਤਿ ਏਵਂਨਾਮਕਾ. ਧਮ੍ਮਾਤਿ ਆਪਤ੍ਤਿਯੋ. ਉਦ੍ਦੇਸਂ ਆਗਚ੍ਛਨ੍ਤੀਤਿ ਸਰੂਪੇਨ ਉਦ੍ਦਿਸਿਤਬ੍ਬਤਂ ਆਗਚ੍ਛਨ੍ਤਿ, ਨ ਨਿਦਾਨੇ ਵਿਯ ‘‘ਯਸ੍ਸ ਸਿਯਾ ਆਪਤ੍ਤੀ’’ਤਿ ਸਾਧਾਰਣਵਚਨਮਤ੍ਤੇਨ.
੧. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ
ਸਂਵਿਜ੍ਜਤਿ ਚੇਤਨਾ ਅਸ੍ਸਾਤਿ ਸਞ੍ਚੇਤਨਾ, ਸਞ੍ਚੇਤਨਾਵ ਸਞ੍ਚੇਤਨਿਕਾ, ਸਞ੍ਚੇਤਨਾ ਵਾ ਅਸ੍ਸ ਅਤ੍ਥੀਤਿ ਸਞ੍ਚੇਤਨਿਕਾ. ਸੁਕ੍ਕਵਿਸ੍ਸਟ੍ਠੀਤਿ ਸੁਕ੍ਕਸ੍ਸ ਵਿਸ੍ਸਟ੍ਠਿ, ਰਾਗੂਪਤ੍ਥਮ੍ਭਾਦੀਸੁ ਯੇਨ ਕੇਨਚਿ ਅਙ੍ਗਜਾਤੇ ਕਮ੍ਮਞ੍ਞਤਂ ਪਤ੍ਤੇ ਆਰੋਗ੍ਯਾਦੀਸੁ ਯਂਕਿਞ੍ਚਿ ਅਪਦਿਸਿਤ੍ਵਾ ਅਜ੍ਝਤ੍ਤਰੂਪਾਦੀਸੁ ਯਤ੍ਥ ਕਤ੍ਥਚਿ ਮੋਚਨਸ੍ਸਾਦਚੇਤਨਾਯ ਨਿਮਿਤ੍ਤੇ ਉਪਕ੍ਕਮਨ੍ਤਸ੍ਸ ਆਸਯਧਾਤੁਨਾਨਤ੍ਤਤੋ ਨੀਲਾਦਿਵਸੇਨ (ਪਾਰਾ. ੨੩੯-੨੪੦) ਦਸਵਿਧੇਸੁ ਸੁਕ੍ਕੇਸੁ ਯਸ੍ਸ ਕਸ੍ਸਚਿ ਸੁਕ੍ਕਸ੍ਸ ਠਾਨਾ ਚਾਵਨਾਤਿ ਅਤ੍ਥੋ. ਅਞ੍ਞਤ੍ਰ ਸੁਪਿਨਨ੍ਤਾਤਿ ਯਾ ਸੁਪਿਨੇ ਸੁਕ੍ਕਵਿਸ੍ਸਟ੍ਠਿ ਹੋਤਿ, ਤਂ ਠਪੇਤ੍ਵਾ. ਸਙ੍ਘਾਦਿਸੇਸੋਤਿ ਯਾ ਅਞ੍ਞਤ੍ਰ ਸੁਪਿਨਨ੍ਤਾ ਸਞ੍ਚੇਤਨਿਕਾ ਸੁਕ੍ਕਵਿਸ੍ਸਟ੍ਠਿ, ਅਯਂ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋਤਿ ਅਤ੍ਥੋ. ਵਚਨਤ੍ਥੋ ਪਨੇਤ੍ਥ ਸਙ੍ਘੋ ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋ. ਕਿਂ ਵੁਤ੍ਤਂ ਹੋਤਿ – ਇਮਂ ਆਪਤ੍ਤਿਂ ਆਪਜ੍ਜਿਤ੍ਵਾ ਵੁਟ੍ਠਾਤੁਕਾਮਸ੍ਸ ਯਂ ਤਂ ਆਪਤ੍ਤਿਵੁਟ੍ਠਾਨਂ, ਤਸ੍ਸ ਆਦਿਮ੍ਹਿ ਚੇਵ ਪਰਿਵਾਸਦਾਨਤ੍ਥਾਯ, ਆਦਿਤੋ ਸੇਸੇ ਮਜ੍ਝੇ ਮਾਨਤ੍ਤਦਾਨਤ੍ਥਾਯ ਮੂਲਾਯ ਪਟਿਕਸ੍ਸਨੇਨ ਵਾ ਸਹ ਮਾਨਤ੍ਤਦਾਨਤ੍ਥਾਯ, ਅਵਸਾਨੇ ਅਬ੍ਭਾਨਤ੍ਥਾਯ ਚ ਸਙ੍ਘੋ ਇਚ੍ਛਿਤਬ੍ਬੋ, ਨ ਹੇਤ੍ਥ ਏਕਮ੍ਪਿ ਕਮ੍ਮਂ ਵਿਨਾ ਸਙ੍ਘੇਨ ਸਕ੍ਕਾ ਕਾਤੁਂ. ਇਤਿ ਸਙ੍ਘੋ ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋਤਿ.
ਸਾਵਤ੍ਥਿਯਂ ਸੇਯ੍ਯਸਕਂ ਆਰਬ੍ਭ ਉਪਕ੍ਕਮਿਤ੍ਵਾ ਅਸੁਚਿਮੋਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸੁਪਿਨਨ੍ਤਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ. ਸਚੇ ਪਨ ਪਰੇਨ ਅਤ੍ਤਨੋ ਅਙ੍ਗਜਾਤੇ ਉਪਕ੍ਕਮਂ ਕਾਰੇਤ੍ਵਾ ਮੋਚਾਪੇਤਿ, ਆਪਜ੍ਜਤਿਯੇਵ. ਚੇਤੇਤ੍ਵਾ ਅਨ੍ਤਮਸੋ ਆਕਾਸੇ ਕਟਿਕਮ੍ਪਨੇਨਪਿ ਨਿਮਿਤ੍ਤੇ ਉਪਕ੍ਕਮਨ੍ਤਸ੍ਸ ਸਚੇ ਨ ਮੁਚ੍ਚਤਿ, ਥੁਲ੍ਲਚ੍ਚਯਂ. ਸਚੇ ਪਨ ਅਨ੍ਤਮਸੋ ਯਂ ਏਕਾ ਖੁਦ੍ਦਕਮਕ੍ਖਿਕਾ ਪਿਵੇਯ੍ਯ, ਤਤ੍ਤਕਮ੍ਪਿ ਠਾਨਤੋ ਮੁਚ੍ਚਤਿ, ਦਕਸੋਤਂ ਅਨੋਤਿਣ੍ਣੇਪਿ ਸਙ੍ਘਾਦਿਸੇਸੋ. ਠਾਨਤੋ ਪਨ ਚੁਤਂ ਅਵਸ੍ਸਮੇਵ ਦਕਸੋਤਂ ਓਤਰਤਿ, ਤਸ੍ਮਾ ‘‘ਦਕਸੋਤਂ ਓਤਿਣ੍ਣਮਤ੍ਤੇ ਬਹਿ ਨਿਕ੍ਖਨ੍ਤੇ ਵਾ ਅਨਿਕ੍ਖਨ੍ਤੇ ਵਾ ਸਙ੍ਘਾਦਿਸੇਸੋ’’ਤਿ (ਪਾਰਾ. ਅਟ੍ਠ. ੨.੨੩੭) ਅਟ੍ਠਕਥਾਸੁ ਵੁਤ੍ਤਂ. ਅਨੁਪਕ੍ਕਮਨ੍ਤਸ੍ਸ ਚ, ਅਮੋਚਨਾਧਿਪ੍ਪਾਯਸ੍ਸ ਚ, ਸੁਪਿਨਂ ਪਸ੍ਸਨ੍ਤਸ੍ਸ ਚ, ਉਮ੍ਮਤ੍ਤਕਾਦੀਨਞ੍ਚ ਮੁਤ੍ਤੇਪਿ ਅਨਾਪਤ੍ਤਿ. ਸੀਲਵਿਪਤ੍ਤਿ, ਚੇਤਨਾ, ਉਪਕ੍ਕਮੋ, ਮੁਚ੍ਚਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕੇ ਵੁਤ੍ਤਸਦਿਸਾਨੇਵਾਤਿ.
ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਓਤਿਣ੍ਣੋਤਿ ਯਕ੍ਖਾਦੀਹਿ ਵਿਯ ਸਤ੍ਤਾ ਅਨ੍ਤੋ ਉਪ੍ਪਜ੍ਜਨ੍ਤੇਨ ਰਾਗੇਨ ਵਾ ਓਤਿਣ੍ਣੋ, ਕੂਪਾਦੀਨਿ ਵਿਯ ਸਤ੍ਤਾ ਅਸਮਪੇਕ੍ਖਿਤ੍ਵਾ ਰਜ੍ਜਨੀਯੇ ਠਾਨੇ ਰਜ੍ਜਨ੍ਤੋ ਸਯਂ ਵਾ ਰਾਗਂ ਓਤਿਣ੍ਣੋ, ਕਾਯਸਂਸਗ੍ਗਰਾਗਸਮਙ੍ਗਿਸ੍ਸੇਤਂ ਅਧਿਵਚਨਂ. ਵਿਪਰਿਣਤੇਨ ਚਿਤ੍ਤੇਨਾਤਿ ਪਰਿਸੁਦ੍ਧਭਵਙ੍ਗਸਨ੍ਤਤਿਸਙ੍ਖਾਤਂ ਪਕਤਿਂ ਵਿਜਹਿਤ੍ਵਾ ਅਞ੍ਞਥਾ ਪਵਤ੍ਤੇਨ, ਵਿਰੂਪਂ ਵਾ ਪਰਿਣਤੇਨ ਯਥਾ ਪਰਿਵਤ੍ਤਮਾਨਂ ਵਿਰੂਪਂ ਹੋਤਿ, ਏਵਂ ਵੁਤ੍ਤਰਾਗਵਸੇਨ ਪਰਿਵਤ੍ਤੇਤ੍ਵਾ ਠਿਤੇਨ ਚਿਤ੍ਤੇਨਾਤਿ ਅਤ੍ਥੋ. ਮਾਤੁਗਾਮੇਨ ਸਦ੍ਧਿਨ੍ਤਿ ਤਦਹੁਜਾਤਾਯਪਿ ਜੀਵਮਾਨਕਮਨੁਸ੍ਸਿਤ੍ਥਿਯਾ ਸਦ੍ਧਿਂ. ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾਤਿ ਹਤ੍ਥਗ੍ਗਹਣਾਦਿਕਆਯਸਮ੍ਪਯੋਗਂ ਕਾਯਮਿਸ੍ਸੀਭਾਵਂ ਸਮਾਪਜ੍ਜੇਯ੍ਯ. ਹਤ੍ਥਗ੍ਗਾਹਂ ਵਾਤਿਆਦਿ ਪਨਸ੍ਸ ਵਿਤ੍ਥਾਰੇਨ ਅਤ੍ਥਦਸ੍ਸਨਂ. ਤਤ੍ਥ ਹਤ੍ਥੋ ਨਾਮ ਕਪ੍ਪਰਤੋ ਪਟ੍ਠਾਯ ਯਾਵ ਅਗ੍ਗਨਖਾ. ਵੇਣੀ ਨਾਮ ਵਿਨਨ੍ਧਿਤ੍ਵਾ ਵਾ ਅਵਿਨਨ੍ਧਿਤ੍ਵਾ ਵਾ ਸੁਦ੍ਧਕੇਸੇਹਿ ਵਾ ਨੀਲਾਦਿਵਣ੍ਣਸੁਤ੍ਤਕੁਸੁਮਕਹਾਪਣਮਾਲਾਸੁਵਣ੍ਣਚੀਰਕਮੁਤ੍ਤਾਵਲ਼ਿਆਦੀਸੁ ਅਞ੍ਞਤਰਮਿਸ੍ਸੇਹਿ ਵਾ ਕਤਕੇਸਕਲਾਪਸ੍ਸੇਤਂ ਅਧਿਵਚਨਂ. ਵੇਣਿਗ੍ਗਹਣੇਨ ਚੇਤ੍ਥ ਕੇਸਾਪਿ ਗਹਿਤਾਯੇਵ ਸਦ੍ਧਿਂ ਲੋਮੇਹਿ. ਇਤਿ ਵੁਤ੍ਤਲਕ੍ਖਣਸ੍ਸ ਹਤ੍ਥਸ੍ਸ ਗਹਣਂ ਹਤ੍ਥਗ੍ਗਾਹੋ, ਵੇਣਿਯਾ ਗਹਣਂ ਵੇਣਿਗ੍ਗਾਹੋ. ਅਵਸੇਸਸ੍ਸ ਸਰੀਰਸ੍ਸ ਪਰਾਮਸਨਂ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨਂ ਨਾਮ. ਯੋ ਤਂ ਹਤ੍ਥਗ੍ਗਾਹਂ ਵਾ ਵੇਣਿਗ੍ਗਾਹਂ ਵਾ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨਂ ਸਮਾਪਜ੍ਜੇਯ੍ਯ, ਤਸ੍ਸ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋ ਹੋਤੀਤਿ.
ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਕਾਯਸਂਸਗ੍ਗਸਮਾਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਅਨ੍ਤਮਸੋ ਲੋਮੇਨ ਲੋਮਂ ਫੁਸਨ੍ਤਸ੍ਸਾਪਿ, ਇਤ੍ਥਿਯਾ ਵਾ ਫੁਸਿਯਮਾਨਸ੍ਸ ਸੇਵਨਾਧਿਪ੍ਪਾਯੇਨ ਵਾਯਮਿਤ੍ਵਾ ਫਸ੍ਸਂ ਪਟਿਜਾਨਨ੍ਤਸ੍ਸ ਸਙ੍ਘਾਦਿਸੇਸੋ. ਏਕੇਨ ਪਨ ਹਤ੍ਥੇਨ ਗਹੇਤ੍ਵਾ ਦੁਤਿਯੇਨ ਹਤ੍ਥੇਨ ਦਿਵਸਮ੍ਪਿ ਤਤ੍ਥ ਤਤ੍ਥ ਫੁਸਨ੍ਤਸ੍ਸ ਏਕਾਵ ਆਪਤ੍ਤਿ, ਅਗ੍ਗਹੇਤ੍ਵਾ ਫੁਸਨ੍ਤੋ ਪਨ ਸਚੇ ਸੀਸਤੋ ਯਾਵ ਪਾਦਾ, ਤਾਵ ਕਾਯਤੋ ਹਤ੍ਥਂ ਅਮੋਚੇਨ੍ਤੋਯੇਵ ਫੁਸਤਿ, ਏਕਾਵ ਆਪਤ੍ਤਿ, ਪਞ੍ਚਨ੍ਨਂ ਅਙ੍ਗੁਲੀਨਂ ਏਕਤੋ ਗਹਣੇਪਿ ਏਕਾਯੇਵ. ਸਚੇ ਪਨ ਨਾਨਿਤ੍ਥੀਨਂ ਪਞ੍ਚਙ੍ਗੁਲਿਯੋ ਏਕਤੋ ਗਣ੍ਹਾਤਿ, ਪਞ੍ਚ ਆਪਤ੍ਤਿਯੋ. ਇਤ੍ਥਿਯਾ ਵੇਮਤਿਕਸ੍ਸ, ਪਣ੍ਡਕਪੁਰਿਸਤਿਰਚ੍ਛਾਨਗਤਸਞ੍ਞਿਸ੍ਸ ਚ ਥੁਲ੍ਲਚ੍ਚਯਂ, ਤਥਾ ਕਾਯੇਨ ਕਾਯਪ੍ਪਟਿਬਦ੍ਧੇਨ, ਅਮਨੁਸ੍ਸਿਤ੍ਥਿਪਣ੍ਡਕੇਹਿ ਚ ਸਦ੍ਧਿਂ ਕਾਯਸਂਸਗ੍ਗੇਪਿ. ਮਨੁਸ੍ਸਿਤ੍ਥਿਯਾ ਪਨ ਕਾਯਪ੍ਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧਾਦੀਸੁ, ਪੁਰਿਸਕਾਯਫੁਸਨਾਦੀਸੁ ਚ ਦੁਕ੍ਕਟਂ. ਇਤ੍ਥਿਯਾ ਫੁਸਿਯਮਾਨਸ੍ਸ ਸੇਵਨਾਧਿਪ੍ਪਾਯਸ੍ਸਾਪਿ ਕਾਯੇਨ ਅਵਾਯਮਿਤ੍ਵਾ ਫਸ੍ਸਂ ਪਟਿਜਾਨਨ੍ਤਸ੍ਸ, ਮੋਕ੍ਖਾਧਿਪ੍ਪਾਯੇਨ ਇਤ੍ਥਿਂ ਫੁਸਨ੍ਤਸ੍ਸ, ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਸ੍ਸ, ਅਸਾਦਿਯਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੀਲਵਿਪਤ੍ਤਿ, ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਤੇਨ ਰਾਗੇਨ ਵਾਯਾਮੋ, ਹਤ੍ਥਗ੍ਗਾਹਾਦਿਸਮਾਪਜ੍ਜਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕੇ ਵੁਤ੍ਤਸਦਿਸਾਨੇਵਾਤਿ.
ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ
ਤਤਿਯੇ ਓਤਿਣ੍ਣਤਾ ਚ ਵਿਪਰਿਣਤਚਿਤ੍ਤਤਾ ਚ ਦੁਟ੍ਠੁਲ੍ਲਵਾਚਸ੍ਸਾਦਰਾਗਵਸੇਨ ਵੇਦਿਤਬ੍ਬਾ. ਮਾਤੁਗਾਮਨ੍ਤਿ ਦੁਟ੍ਠੁਲ੍ਲਾਦੁਟ੍ਠੁਲ੍ਲਸਂਲਕ੍ਖਣਸਮਤ੍ਥਂ ਮਨੁਸ੍ਸਿਤ੍ਥਿਂ. ਦੁਟ੍ਠੁਲ੍ਲਾਹਿਵਾਚਾਹੀਤਿ ਵਚ੍ਚਮਗ੍ਗਪਸ੍ਸਾਵਮਗ੍ਗੇਮੇਥੁਨਧਮ੍ਮਪ੍ਪਟਿਸਂਯੁਤ੍ਤਾਹਿ ਵਾਚਾਹਿ. ਓਭਾਸੇਯ੍ਯਾਤਿ ਅਵਭਾਸੇਯ੍ਯ, ਵਣ੍ਣਾਵਣ੍ਣਯਾਚਨਆਯਾਚਨਪੁਚ੍ਛਨਪਟਿਪੁਚ੍ਛਨਆਚਿਕ੍ਖਣਾਨੁਸਾਸਨਅਕ੍ਕੋਸਨਵਸੇਨ ਨਾਨਪ੍ਪਕਾਰਂ ਅਸਦ੍ਧਮ੍ਮਵਚਨਂ ਵਦੇਯ੍ਯ. ਯਥਾ ਤਨ੍ਤਿ ਏਤ੍ਥ ਨ੍ਤਿ ਨਿਪਾਤਮਤ੍ਤਂ, ਯਥਾ ਯੁਵਾ ਯੁਵਤਿਨ੍ਤਿ ਅਤ੍ਥੋ. ਏਤੇਨ ਓਭਾਸਨੇ ਨਿਰਾਸਙ੍ਕਭਾਵਂ ਦਸ੍ਸੇਤਿ. ਮੇਥੁਨੁਪਸਂਹਿਤਾਹੀਤਿਇਦਂ ਦੁਟ੍ਠੁਲ੍ਲਵਾਚਾਯ ਸਿਖਾਪਤ੍ਤਲਕ੍ਖਣਦਸ੍ਸਨਂ. ਸਙ੍ਘਾਦਿਸੇਸੋਤਿ ਦ੍ਵਿਨ੍ਨਂ ਮਗ੍ਗਾਨਂ ਵਸੇਨ ਵਣ੍ਣਾਵਣ੍ਣੇਹਿ ਵਾ ਮੇਥੁਨਯਾਚਨਾਦੀਹਿ ਵਾ ‘‘ਸਿਖਰਣੀਸਿ, ਸਂਭਿਨ੍ਨਾਸਿ, ਉਭਤੋਬ੍ਯਞ੍ਜਨਕਾਸੀ’’ਤਿ ਇਮੇਸੁ ਤੀਸੁ ਅਞ੍ਞਤਰੇਨ ਅਕ੍ਕੋਸਵਚਨੇਨ ਵਾ ਮਾਤੁਗਾਮਂ ਓਭਾਸਨ੍ਤਸ੍ਸ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋ ਹੋਤੀਤਿ.
ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਦੁਟ੍ਠੁਲ੍ਲਵਾਚਾਹਿ ਓਭਾਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਅਨ੍ਤਮਸੋ ਹਤ੍ਥਮੁਦ੍ਦਾਯਪਿ ਵੁਤ੍ਤਨਯੇਨ ਓਭਾਸਨ੍ਤਸ੍ਸ ਸਚੇ ਸਾ ਤਮਤ੍ਥਂ ਤਸ੍ਮਿਂਯੇਵ ਖਣੇ ਜਾਨਾਤਿ, ਸਙ੍ਘਾਦਿਸੇਸੋ. ਪਣ੍ਡਕੇ ਥੁਲ੍ਲਚ੍ਚਯਂ. ਤਸ੍ਮਿਂਯੇਵ ਇਤ੍ਥਿਸਞ੍ਞਿਨੋ ਦੁਕ੍ਕਟਂ. ਪੁਨਪ੍ਪੁਨਂ ਓਭਾਸਨ੍ਤਸ੍ਸ, ਸਮ੍ਬਹੁਲਾ ਚ ਇਤ੍ਥਿਯੋ ਏਕਵਾਚਾਯ ਓਭਾਸਨ੍ਤਸ੍ਸ ਵਾਚਾਗਣਨਾਯ ਚੇਵ ਇਤ੍ਥਿਗਣਨਾਯ ਚ ਆਪਤ੍ਤਿਯੋ. ਸਚੇ ਯਂ ਇਤ੍ਥਿਂ ਓਭਾਸਤਿ, ਸਾ ਨ ਜਾਨਾਤਿ, ਥੁਲ੍ਲਚ੍ਚਯਂ. ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਦਿਸ੍ਸ ਵਣ੍ਣਾਦਿਭਣਨੇਪਿ ਥੁਲ੍ਲਚ੍ਚਯਂ. ਪਣ੍ਡਕੇ ਦੁਕ੍ਕਟਂ, ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਕਾਯਪ੍ਪਟਿਬਦ੍ਧਞ੍ਚ ਆਦਿਸ੍ਸ ਵਣ੍ਣਾਦਿਭਣਨੇ ਸਬ੍ਬਤ੍ਥ ਦੁਕ੍ਕਟਂ. ਅਤ੍ਥਧਮ੍ਮਅਨੁਸਾਸਨਿਪੁਰੇਕ੍ਖਾਰਾਨਂ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੀਲਵਿਪਤ੍ਤਿ, ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਦੁਟ੍ਠੁਲ੍ਲਵਾਚਸ੍ਸਾਦਰਾਗੋ, ਤੇਨ ਰਾਗੇਨ ਓਭਾਸਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਅਦਿਨ੍ਨਾਦਾਨਸਮੁਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.
ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਅਤ੍ਤਕਾਮਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਓਤਿਣ੍ਣਤਾ ਚ ਵਿਪਰਿਣਤਚਿਤ੍ਤਤਾ ਚ ਅਤ੍ਤਕਾਮਪਾਰਿਚਰਿਯਾਵਸੇਨ ਵੇਦਿਤਬ੍ਬਾ. ਮਾਤੁਗਾਮਸ੍ਸ ਸਨ੍ਤਿਕੇਤਿ ਦੁਟ੍ਠੁਲ੍ਲੋਭਾਸਨੇ ਵੁਤ੍ਤਪ੍ਪਕਾਰਾਯ ਇਤ੍ਥਿਯਾ ਸਮੀਪੇ. ਅਤ੍ਤਕਾਮਪਾਰਿਚਰਿਯਾਯਾਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਪਾਰਿਚਰਿਯਾ ਕਾਮਪਾਰਿਚਰਿਯਾ, ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ ਅਤ੍ਤਕਾਮਪਾਰਿਚਰਿਯਾ, ਅਤ੍ਤਨਾ ਵਾ ਕਾਮਿਤਾ ਇਚ੍ਛਿਤਾਤਿ ਅਤ੍ਤਕਾਮਾ, ਸਯਂ ਮੇਥੁਨਰਾਗਵਸੇਨ ਪਤ੍ਥਿਤਾਤਿ ਅਤ੍ਥੋ, ਅਤ੍ਤਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਅਤ੍ਤਕਾਮਪਾਰਿਚਰਿਯਾ, ਤਸ੍ਸਾ ਅਤ੍ਤਕਾਮਪਾਰਿਚਰਿਯਾਯ. ਵਣ੍ਣਂ ਭਾਸੇਯ੍ਯਾਤਿ ਗੁਣਂ ਆਨਿਸਂਸਂ ਪਕਾਸੇਯ੍ਯ. ਏਤਦਗ੍ਗਨ੍ਤਿਆਦਿ ਤਸ੍ਸਾ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਭਾਸਨਾਕਾਰਨਿਦਸ੍ਸਨਂ. ਤਤ੍ਰਾਯਂ ਪਦਸਮ੍ਬਨ੍ਧਵਸੇਨੇਵ ਸਙ੍ਖੇਪਤ੍ਥੋ – ਯਾ ਮਾਦਿਸਂ ਪਾਣਾਤਿਪਾਤਾਦੀਹਿ ਵਿਰਹਿਤਤ੍ਤਾ ਸੀਲਵਨ੍ਤਂ ਮੇਥੁਨਧਮ੍ਮਾ ਵਿਰਹਿਤਤ੍ਤਾ ਬ੍ਰਹ੍ਮਚਾਰਿਂ ਤਦੁਭਯੇਨਾਪਿ ਕਲ੍ਯਾਣਧਮ੍ਮਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯ ਅਭਿਰਮੇਯ੍ਯ, ਤਸ੍ਸਾ ਏਵਂ ਮਾਦਿਸਂ ਪਰਿਚਰਨ੍ਤਿਯਾ ਯਾ ਅਯਂ ਪਾਰਿਚਰਿਯਾ ਨਾਮ, ਏਤਦਗ੍ਗਂ ਪਾਰਿਚਰਿਯਾਨਨ੍ਤਿ. ਮੇਥੁਨੁਪਸਂਹਿਤੇਨ ਸਙ੍ਘਾਦਿਸੇਸੋਤਿ ਏਵਂ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤੋ ਚ ‘‘ਅਰਹਸਿ ਤ੍ਵਂ ਮਯ੍ਹਂ ਮੇਥੁਨਧਮ੍ਮਂ ਦਾਤੁ’’ਨ੍ਤਿਆਦਿਨਾ ਮੇਥੁਨਪ੍ਪਟਿਸਂਯੁਤ੍ਤੇਨੇਵ ਵਚਨੇਨ ਯੋ ਭਾਸੇਯ੍ਯ, ਤਸ੍ਸ ਸਙ੍ਘਾਦਿਸੇਸੋ.
ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਭਾਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਅਨ੍ਤਮਸੋ ਹਤ੍ਥਮੁਦ੍ਦਾਯਪਿ ਵੁਤ੍ਤਨਯੇਨੇਵ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤਸ੍ਸ ਸਚੇ ਸਾ ਤਮਤ੍ਥਂ ਤਸ੍ਮਿਂਯੇਵ ਖਣੇ ਜਾਨਾਤਿ, ਸਙ੍ਘਾਦਿਸੇਸੋ. ਨੋ ਚੇ ਜਾਨਾਤਿ, ਥੁਲ੍ਲਚ੍ਚਯਂ. ਪਣ੍ਡਕੇ ਪਣ੍ਡਕਸਞ੍ਞਿਨੋਪਿ ਥੁਲ੍ਲਚ੍ਚਯਂ. ਤਸ੍ਮਿਂਯੇਵ ਇਤ੍ਥਿਸਞ੍ਞਿਨੋ ਦੁਕ੍ਕਟਂ. ਚੀਵਰਾਦੀਹਿ ਵਤ੍ਥੁਕਾਮੇਹਿ ਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤਸ੍ਸ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੀਲਵਿਪਤ੍ਤਿ, ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ ਵਣ੍ਣਭਣਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਦੁਟ੍ਠੁਲ੍ਲੋਭਾਸਨੇ ਵੁਤ੍ਤਸਦਿਸਾਨੇਵਾਤਿ.
ਅਤ੍ਤਕਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਸਞ੍ਚਰਿਤ੍ਤਨ੍ਤਿ ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਂਚਰਣਭਾਵਂ. ਸਮਾਪਜ੍ਜੇਯ੍ਯਾਤਿ ਸਮ੍ਮਾ ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਾਨਿ ਕਰੋਨ੍ਤੋ ਆਪਜ੍ਜੇਯ੍ਯ. ਇਤ੍ਥਿਯਾ ਵਾਤਿਆਦਿ ਸਮਾਪਜ੍ਜਨਾਕਾਰਦਸ੍ਸਨਂ. ਤਤ੍ਥ ਇਤ੍ਥਿਯਾ ਵਾ ਪੁਰਿਸਮਤਿਨ੍ਤਿ ਪੁਰਿਸੇਨ ਵਾ ਤਸ੍ਸ ਮਾਤਾਪਿਤਾਦੀਹਿ ਵਾ ਪੇਸਿਤੋ ਪੁਰਿਸਸ੍ਸ ਮਤਿਂ ਅਧਿਪ੍ਪਾਯਂ ਇਤ੍ਥਿਯਾ ਆਰੋਚੇਯ੍ਯਾਤਿ ਅਤ੍ਥੋ. ਪੁਰਿਸਸ੍ਸ ਵਾ ਇਤ੍ਥਿਮਤਿਨ੍ਤਿ ਇਤ੍ਥਿਯਾ ਵਾ ਤਸ੍ਸਾ ਮਾਤਾਪਿਤਾਦੀਹਿ ਵਾ ਪੇਸਿਤੋ ਇਤ੍ਥਿਯਾ ਮਤਿਂ ਅਧਿਪ੍ਪਾਯਂ ਪੁਰਿਸਸ੍ਸ ਆਰੋਚੇਯ੍ਯਾਤਿ ਅਤ੍ਥੋ. ਜਾਯਤ੍ਤਨੇ ਵਾ ਜਾਰਤ੍ਤਨੇ ਵਾਤਿ ਜਾਯਭਾਵੇ ਵਾ ਜਾਰਭਾਵੇ ਵਾ. ਪੁਰਿਸਸ੍ਸ ਹਿ ਮਤਿਂ ਇਤ੍ਥਿਯਾ ਆਰੋਚੇਨ੍ਤੋ ਜਾਯਤ੍ਤਨੇ ਆਰੋਚੇਤਿ, ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤਿ. ਅਪਿਚ ਪੁਰਿਸਸ੍ਸੇਵ ਮਤਿਂ ਇਤ੍ਥਿਯਾ ਆਰੋਚੇਨ੍ਤੋ ਜਾਯਤ੍ਤਨੇ ਵਾ ਆਰੋਚੇਤਿ ਨਿਬਦ੍ਧਭਰਿਯਭਾਵੇ, ਜਾਰਤ੍ਤਨੇ ਵਾ ਮਿਚ੍ਛਾਚਾਰਭਾਵੇ, ਤੇਨੇਵਸ੍ਸ ਪਦਭਾਜਨੇ (ਪਾਰਾ. ੩੦੨) ‘‘ਜਾਯਤ੍ਤਨੇ ਵਾਤਿ ਜਾਯਾ ਭਵਿਸ੍ਸਸਿ, ਜਾਰਤ੍ਤਨੇ ਵਾਤਿ ਜਾਰੀ ਭਵਿਸ੍ਸਸੀ’’ਤਿ ਵੁਤ੍ਤਂ. ਏਤੇਨੇਵ ਉਪਾਯੇਨ ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚਨੇਪਿ ‘‘ਪਤਿ ਭਵਿਸ੍ਸਸਿ, ਜਾਰੋ ਭਵਿਸ੍ਸਸੀ’’ਤਿ ਵਤ੍ਤਬ੍ਬਤਾ ਵੇਦਿਤਬ੍ਬਾ. ਅਨ੍ਤਮਸੋ ਤਙ੍ਖਣਿਕਾਯਪੀਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯਾ ਅਯਂ ਤਙ੍ਖਣੇ ਮੁਹੁਤ੍ਤਮਤ੍ਤੇ ਸਂਵਸਿਤਬ੍ਬਤੋ ‘‘ਤਙ੍ਖਣਿਕਾ’’ਤਿ ਵੁਚ੍ਚਤਿ, ਮੁਹੁਤ੍ਤਿਕਾਤਿ ਅਤ੍ਥੋ. ਤਸ੍ਸਾਪਿ ‘‘ਮੁਹੁਤ੍ਤਿਕਾ ਭਵਿਸ੍ਸਸੀ’’ਤਿ ਏਵਂ ਪੁਰਿਸਸ੍ਸ ਮਤਿਂ ਆਰੋਚੇਨ੍ਤਸ੍ਸ ਸਙ੍ਘਾਦਿਸੇਸੋ, ਏਤੇਨੇਵ ਉਪਾਯੇਨ ‘‘ਮੁਹੁਤ੍ਤਿਕੋ ਭਵਿਸ੍ਸਸੀ’’ਤਿ ਏਵਂ ਪੁਰਿਸਸ੍ਸ ਇਤ੍ਥਿਮਤਿਂ ਆਰੋਚੇਨ੍ਤੋਪਿ ਸਙ੍ਘਾਦਿਸੇਸਂ ਆਪਜ੍ਜਤੀਤਿ ਵੇਦਿਤਬ੍ਬੋ.
ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਸਞ੍ਚਰਿਤ੍ਤਸਮਾਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਨ੍ਤਮਸੋ ਤਙ੍ਖਣਿਕਾਯਪੀ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ‘‘ਪਟਿਗ੍ਗਣ੍ਹਾਤਿ, ਵੀਮਂਸਤਿ, ਅਨ੍ਤੇਵਾਸਿਂ ਪਚ੍ਚਾਹਰਾਪੇਤੀ’’ਤਿਇਮਿਨਾ (ਪਾਰਾ. ੩੩੮) ਨਯੇਨ ਸਾਣਤ੍ਤਿਕਂ, ਅਞ੍ਞਤ੍ਰ ਨਾਲਂਵਚਨੀਯਾਯ ਯਾਯ ਕਾਯਚਿ ਇਤ੍ਥਿਯਾ ਅਨ੍ਤਮਸੋ ਮਾਤੁਯਾਪਿ ਪੁਰਿਸਮਤਿਂ ਆਰੋਚੇਨ੍ਤੋ ‘‘ਹੋਹਿ ਕਿਰ ਭਰਿਯਾ ਧਨਕ੍ਕੀਤਾ’’ਤਿ ਵਤ੍ਤੁਕਾਮੋ ਸਚੇਪਿ ਛਨ੍ਦਵਾਸਿਨੀਆਦੀਸੁ ਅਞ੍ਞਤਰਾਕਾਰੇਨ ਆਰੋਚੇਤ੍ਵਾ ਤਾਯ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੇਪਿ ਅਸਮ੍ਪਟਿਚ੍ਛਿਤੇਪਿ ਪੁਨ ਆਗਨ੍ਤ੍ਵਾ ਯੇਨ ਪਹਿਤੋ, ਤਸ੍ਸ ਤਂ ਪਵਤ੍ਤਿਂ ਆਰੋਚੇਤਿ, ਸਙ੍ਘਾਦਿਸੇਸਂ ਆਪਜ੍ਜਤਿ. ਸਾ ਪਨ ਤਸ੍ਸ ਭਰਿਯਾ ਹੋਤੁ ਵਾ, ਮਾ ਵਾ, ਅਕਾਰਣਮੇਤਂ. ਸਚੇਪਿ ਯਸ੍ਸਾ ਸਨ੍ਤਿਕਂ ਪੇਸਿਤੋ, ਤਂ ਅਦਿਸ੍ਵਾ ਅਞ੍ਞਤਰਸ੍ਸ ਅਵਸ੍ਸਾਰੋਚਨਕਸ੍ਸ ‘‘ਆਰੋਚੇਹੀ’’ਤਿ ਵਤ੍ਵਾ ਪਚ੍ਚਾਹਰਤਿ, ਆਪਜ੍ਜਤਿਯੇਵ. ‘‘ਮਾਤੁਰਕ੍ਖਿਤਂ ਬ੍ਰੂਹੀ’’ਤਿ ਪੇਸਿਤਸ੍ਸ ਪਨ ਗਨ੍ਤ੍ਵਾ ਅਞ੍ਞਂ ਪਿਤੁਰਕ੍ਖਿਤਾਦੀਸੁ ਅਞ੍ਞਤਰਂ ਵਦਨ੍ਤਸ੍ਸ ਵਿਸਙ੍ਕੇਤਂ ਹੋਤਿ, ਪੁਰਿਸਸ੍ਸ ਵਾ ਇਤ੍ਥਿਯਾ ਵਾ ਵਚਨਂ ‘‘ਸਾਧੂ’’ਤਿ ਕਾਯੇਨ ਵਾ ਵਾਚਾਯ ਵਾ ਉਭਯੇਨ ਵਾ ਪਟਿਗ੍ਗਣ੍ਹਿਤ੍ਵਾ ਤਸ੍ਸਾ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਆਰੋਚੇਤ੍ਵਾ ਵਾ ਆਰੋਚਾਪੇਤ੍ਵਾ ਵਾ ਪੁਨ ਯੇਨ ਪੇਸਿਤੋ, ਤਸ੍ਸ ਤਂ ਪਵਤ੍ਤਿਂ ਸਯਂ ਆਰੋਚੇਨ੍ਤਸ੍ਸ ਵਾ ਅਞ੍ਞੇਨ ਆਰੋਚਾਪੇਨ੍ਤਸ੍ਸ ਵਾ ਸਙ੍ਘਾਦਿਸੇਸੋ. ਏਤ੍ਤਾਵਤਾ ਹਿ ‘‘ਪਟਿਗ੍ਗਣ੍ਹਾਤਿ, ਵੀਮਂਸਤਿ, ਪਚ੍ਚਾਹਰਤੀ’’ਤਿਇਦਂ ਅਙ੍ਗਤ੍ਤਯਂ ਸਮ੍ਪਾਦਿਤਮੇਵ ਹੋਤਿ, ਇਤੋ ਪਨ ਯੇਹਿ ਕੇਹਿਚਿ ਦ੍ਵੀਹਿ ਅਙ੍ਗੇਹਿ, ਪਣ੍ਡਕੇ ਚ ਅਙ੍ਗਤ੍ਤਯੇਨਾਪਿ ਥੁਲ੍ਲਚ੍ਚਯਂ. ਏਕੇਨ ਦੁਕ੍ਕਟਂ. ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਗਿਲਾਨਸ੍ਸ ਵਾ ਕਿਚ੍ਚੇਨ ਗਚ੍ਛਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ.
ਸੀਲਵਿਪਤ੍ਤਿ, ਯੇਸੁ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਤੇਸਂ ਮਨੁਸ੍ਸਜਾਤਿਕਤਾ, ਨ ਨਾਲਂਵਚਨੀਯਤਾ,
ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਛਸਮੁਟ੍ਠਾਨਂ, ਪਣ੍ਣਤ੍ਤਿਂ ਵਾ ਅਲਂਵਚਨੀਯਭਾਵਂ ਵਾ ਅਜਾਨਨ੍ਤਸ੍ਸ ਕਾਯਵਿਕਾਰੇਨ ਸਾਸਨਂ ਗਹੇਤ੍ਵਾ ਤਥੇਵ ਵੀਮਂਸਿਤ੍ਵਾ ਤਥੇਵ ਪਚ੍ਚਾਹਰਨ੍ਤਸ੍ਸ ਕਾਯਤੋ ਸਮੁਟ੍ਠਾਤਿ. ‘‘ਇਤ੍ਥਨ੍ਨਾਮਾ ਆਗਮਿਸ੍ਸਤਿ, ਤਸ੍ਸਾ ਚਿਤ੍ਤਂ ਜਾਨੇਯ੍ਯਾਥਾ’’ਤਿ ਕੇਨਚਿ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਆਗਤਂ ਵਤ੍ਵਾ ਪੁਨ ਤਸ੍ਮਿਂ ਪੁਰਿਸੇ ਆਗਤੇ ਆਰੋਚੇਨ੍ਤਸ੍ਸ ਕਾਯੇਨ ਕਿਞ੍ਚਿ ਅਕਤਤ੍ਤਾ ਵਾਚਤੋ ਸਮੁਟ੍ਠਾਤਿ. ਵਾਚਾਯ ‘‘ਸਾਧੂ’’ਤਿ ਸਾਸਨਂ ਗਹੇਤ੍ਵਾ ਅਞ੍ਞੇਨ ਕਰਣੀਯੇਨ ਤਸ੍ਸਾ ਘਰਂ ਗਨ੍ਤ੍ਵਾ ਅਞ੍ਞਤ੍ਥ ਵਾ ਗਮਨਕਾਲੇ ਤਂ ਦਿਸ੍ਵਾ ਵਚੀਭੇਦੇਨ ਵੀਮਂਸਿਤ੍ਵਾ ਪੁਨਪਿ ਅਞ੍ਞੇਨੇਵ ਕਾਰਣੇਨ ਤਤੋ ਅਪਕ੍ਕਮ੍ਮ ਕਦਾਚਿਦੇਵ ਤਂ ਪੁਰਿਸਂ ਦਿਸ੍ਵਾ ਆਰੋਚੇਨ੍ਤਸ੍ਸਾਪਿ ਵਾਚਤੋ ਸਮੁਟ੍ਠਾਤਿ. ਪਣ੍ਣਤ੍ਤਿਂ ਅਜਾਨਨ੍ਤਸ੍ਸ ਪਨ ਖੀਣਾਸਵਸ੍ਸਾਪਿ ਪਿਤੁਵਚਨੇਨ ਗਨ੍ਤ੍ਵਾ ਅਲਂਵਚਨੀਯਂ ਮਾਤਰਮ੍ਪਿ ‘‘ਏਹਿ ਮੇ ਪਿਤਰਂ ਉਪਟ੍ਠਾਹੀ’’ਤਿ ਵਤ੍ਵਾ ਪਚ੍ਚਾਹਰਨ੍ਤਸ੍ਸ ਕਾਯਵਾਚਤੋ ਸਮੁਟ੍ਠਾਤਿ. ਇਮਾਨਿ ਤੀਣਿ ਅਚਿਤ੍ਤਕਸਮੁਟ੍ਠਾਨਾਨਿ. ਤਦੁਭਯਂ ਪਨ ਜਾਨਿਤ੍ਵਾ ਏਤੇਹੇਵ ਤੀਹਿ ਨਯੇਹਿ ਸਮਾਪਜ੍ਜਨ੍ਤਸ੍ਸ ਤਾਨੇਵ ਤੀਣਿ ਤਦੁਭਯਜਾਨਨਚਿਤ੍ਤੇਨ ਸਚਿਤ੍ਤਕਾਨਿ ਹੋਨ੍ਤਿ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਕੁਸਲਾਦਿਵਸੇਨ ਚੇਤ੍ਥ ਤੀਣਿ ਚਿਤ੍ਤਾਨਿ, ਸੁਖਾਦਿਵਸੇਨ ਤਿਸ੍ਸੋ ਵੇਦਨਾਤਿ.
ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਕੁਟਿਕਾਰਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਸਞ੍ਞਾਚਿਕਾਯ ਪਨਾਤਿ ਏਤ੍ਥ ਸਞ੍ਞਾਚਿਕਾ ਨਾਮ ਸਯਂ ਪਵਤ੍ਤਿਤਯਾਚਨਾ ਵੁਚ੍ਚਤਿ, ਤਸ੍ਮਾ ਸਞ੍ਞਾਚਿਕਾਯਾਤਿ ਅਤ੍ਤਨੋ ਯਾਚਨਾਯਾਤਿ ਵੁਤ੍ਤਂ ਹੋਤਿ, ਸਯਂ ਯਾਚਿਤਕੇਹਿ ਉਪਕਰਣੇਹੀਤਿ ਅਤ੍ਥੋ. ਏਤ੍ਥ ਚ ਯਂਕਿਞ੍ਚਿ ਪਰਪਰਿਗ੍ਗਹਿਤਕਂ ਮੂਲਚ੍ਛੇਦਵਸੇਨ ਯਾਚਿਤੁਂ ਨ ਵਟ੍ਟਤਿ, ਤਾਵਕਾਲਿਕਂ ਪਨ ਵਟ੍ਟਤਿ. ਸਹਾਯਤ੍ਥਾਯ ਕਮ੍ਮਕਰਣਤ੍ਥਾਯ ‘‘ਪੁਰਿਸਂ ਦੇਥਾ’’ਤਿ ਵਤ੍ਤੁਂ ਵਟ੍ਟਤਿ, ਪੁਰਿਸਤ੍ਤਕਰਮ੍ਪਿ ਯਾਚਿਤੁਂ ਵਟ੍ਟਤਿ, ਪੁਰਿਸਤ੍ਤਕਰੋ ਨਾਮ ਵਡ੍ਢਕਿਆਦਿਨਾ ਪੁਰਿਸੇਨ ਕਾਤਬ੍ਬਂ ਹਤ੍ਥਕਮ੍ਮਂ. ਤਂ ‘‘ਪੁਰਿਸਤ੍ਤਕਰਂ ਦੇਹੀ’’ਤਿ ਵਾ ‘‘ਹਤ੍ਥਕਮ੍ਮਂ ਦੇਹੀ’’ਤਿ ਵਾ ਵਤ੍ਵਾ ਯਾਚਿਤੁਂ ਵਟ੍ਟਤਿ. ਹਤ੍ਥਕਮ੍ਮਂ ਨਾਮ ਕਿਞ੍ਚਿ ਵਤ੍ਥੁ ਨ ਹੋਤਿ, ਤਸ੍ਮਾ ‘‘ਕਿਂ, ਭਨ੍ਤੇ, ਆਗਤਤ੍ਥਾ’’ਤਿ ਪੁਚ੍ਛਿਤੇ ਵਾ ਅਪੁਚ੍ਛਿਤੇ ਵਾ ਯਾਚਿਤੁਂ ਵਟ੍ਟਤਿ, ਵਿਞ੍ਞਤ੍ਤਿਪਚ੍ਚਯਾ ਦੋਸੋ ਨਤ੍ਥਿ, ਮਿਗਲੁਦ੍ਦਕਾਦਯੋ ਪਨ ਸਕਕਮ੍ਮਂ ਨ ਯਾਚਿਤਬ੍ਬਾ. ਕੁਟਿਨ੍ਤਿ ਉਲ੍ਲਿਤ੍ਤਾਦੀਸੁ ਅਞ੍ਞਤਰਂ. ਤਤ੍ਥ ਉਲ੍ਲਿਤ੍ਤਾ ਨਾਮ ਠਪੇਤ੍ਵਾ ਥਮ੍ਭਤੁਲਾਪਿਟ੍ਠਸਙ੍ਘਾਟਵਾਤਪਾਨਧੂਮਚ੍ਛਿਦ੍ਦਾਦਿਭੇਦਂ ਅਲੇਪੋਕਾਸਂ ਅਵਸੇਸੇ ਲੇਪੋਕਾਸੇ ਕੁਟ੍ਟੇਹਿ ਸਦ੍ਧਿਂ ਘਟੇਤ੍ਵਾ ਛਦਨਸ੍ਸ ਅਨ੍ਤੋ ਸੁਧਾਯ ਵਾ ਮਤ੍ਤਿਕਾਯ ਵਾ ਲਿਤ੍ਤਾ. ਅਵਲਿਤ੍ਤਾ ਨਾਮ ਤਥੇਵ ਵੁਤ੍ਤਨਯੇਨੇਵ ਛਦਨਸ੍ਸ ਬਹਿ ਲਿਤ੍ਤਾ. ਉਲ੍ਲਿਤ੍ਤਾਵਲਿਤ੍ਤਾ ਨਾਮ ਤਥੇਵ ਛਦਨਸ੍ਸ ਅਨ੍ਤੋ ਚ ਬਹਿ ਚ ਲਿਤ੍ਤਾ. ਕਾਰਯਮਾਨੇਨਾਤਿ ਸਯਂ ਵਾ ਕਰੋਨ੍ਤੇਨ, ਆਣਤ੍ਤਿਯਾ ਵਾ ਕਾਰਾਪੇਨ੍ਤੇਨ. ਅਸਾਮਿਕਨ੍ਤਿ ਕਾਰੇਤਾ ਦਾਯਕੇਨ ਵਿਰਹਿਤਂ. ਅਤ੍ਤੁਦ੍ਦੇਸਨ੍ਤਿ ‘‘ਮਯ੍ਹਂ ਵਾਸਾਗਾਰਂ ਏਸਾ’’ਤਿ ਏਵਂ ਅਤ੍ਤਾ ਉਦ੍ਦੇਸੋ ਏਤਿਸ੍ਸਾਤਿ ਅਤ੍ਤੁਦ੍ਦੇਸਾ, ਤਂ ਅਤ੍ਤੁਦ੍ਦੇਸਂ. ਪਮਾਣਿਕਾ ਕਾਰੇਤਬ੍ਬਾਤਿ ਪਮਾਣਯੁਤ੍ਤਾ ਕਾਰੇਤਬ੍ਬਾ. ਤਤ੍ਰਿਦਂ ਪਮਾਣਨ੍ਤਿ ਤਸ੍ਸਾ ਕੁਟਿਯਾ ਇਦਂ ਪਮਾਣਂ. ਦੀਘਸੋਤਿ ਦੀਘਤੋ. ਦ੍ਵਾਦਸ ਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾਤਿਏਤ੍ਥ ਸੁਗਤਵਿਦਤ੍ਥਿ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ, ਵਡ੍ਢਕਿਹਤ੍ਥੇਨ ਦਿਯਡ੍ਢੋ ਹਤ੍ਥੋ ਹੋਤਿ. ਮਿਨਨ੍ਤੇਨ ਪਨ ਕੁਟਿਯਾ ਬਹਿਕੁਟ੍ਟੇ ਪਠਮਂ ਦਿਨ੍ਨਂ ਮਹਾਮਤ੍ਤਿਕਪਰਿਯਨ੍ਤਂ ਅਗ੍ਗਹੇਤ੍ਵਾ ਥੁਸਪਿਣ੍ਡਪਰਿਯਨ੍ਤੇਨ ਦ੍ਵਾਦਸ ਵਿਦਤ੍ਥਿਯੋ ਮਿਨੇਤਬ੍ਬਾ, ਸਚੇ ਥੁਸਪਿਣ੍ਡਕੇਨ ਅਨਤ੍ਥਿਕੋ ਹੋਤਿ, ਮਹਾਮਤ੍ਤਿਕਲੇਪੇਨੇਵ ਨਿਟ੍ਠਾਪੇਤਿ, ਸ੍ਵੇਵ ਪਰਿਚ੍ਛੇਦੋ. ਤਿਰਿਯਨ੍ਤਿ ਵਿਤ੍ਥਾਰਤੋ. ਸਤ੍ਤਨ੍ਤਰਾਤਿ ਕੁਟ੍ਟਸ੍ਸ ਬਹਿਅਨ੍ਤਂ ਅਗ੍ਗਹੇਤ੍ਵਾ ਅਬ੍ਭਨ੍ਤਰਿਮੇਨ ਅਨ੍ਤੇਨ ਸਤ੍ਤ ਸੁਗਤਵਿਦਤ੍ਥਿਯੋ ਪਮਾਣਨ੍ਤਿ ਵੁਤ੍ਤਂ ਹੋਤਿ. ਏਤ੍ਥ ਚ ਕੇਸਗ੍ਗਮਤ੍ਤਮ੍ਪਿ ਦੀਘਤੋ ਹਾਪੇਤ੍ਵਾ ਤਿਰਿਯਂ, ਤਿਰਿਯਤੋ ਵਾ ਹਾਪੇਤ੍ਵਾ ਦੀਘਂ ਵਡ੍ਢੇਤੁਂ ਨ ਵਟ੍ਟਤਿ, ਕੋ ਪਨ ਵਾਦੋ ਉਭਤੋਵਡ੍ਢਨੇ. ਯਾ ਪਨ ਦੀਘਤੋ ਸਟ੍ਠਿਹਤ੍ਥਾਪਿ ਹੋਤਿ, ਤਿਰਿਯਤੋ ਤਿਹਤ੍ਥਾ ਵਾ ਊਨਕਚਤੁਹਤ੍ਥਾ ਵਾ, ਯਤ੍ਥ ਪਮਾਣਯੁਤ੍ਤੋ ਮਞ੍ਚੋ ਇਤੋ ਚਿਤੋ ਚ ਨ ਪਰਿਵਟ੍ਟਤਿ, ਪਚ੍ਛਿਮਕੋਟਿਯਾ ਚਤੁਹਤ੍ਥਵਿਤ੍ਥਾਰਾ ਨ ਹੋਤਿ, ਅਯਂ ਕੁਟਿਸਙ੍ਖ੍ਯਂ ਨ ਗਚ੍ਛਤਿ, ਤਸ੍ਮਾ ਵਟ੍ਟਤਿ. ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯਾਤਿ ਯਸ੍ਮਿਂ ਪਦੇਸੇ ਕੁਟਿਂ ਕਾਰੇਤੁਕਾਮੋ ਹੋਤਿ, ਤਂ ਸੋਧੇਤ੍ਵਾ ਪਦਭਾਜਨੇ (ਪਾਰਾ. ੩੪੯) ਵੁਤ੍ਤਨਯੇਨ ਸਙ੍ਘਂ ਤਿਕ੍ਖਤ੍ਤੁਂ ਯਾਚਿਤ੍ਵਾ ਸਬ੍ਬੇ ਵਾ ਸਙ੍ਘਪਰਿਯਾਪਨ੍ਨਾ ਸਙ੍ਘੇਨ ਵਾ ਸਮ੍ਮਤਾ ਦ੍ਵੇ ਤਯੋ ਭਿਕ੍ਖੂ ਤਤ੍ਥ ਵਤ੍ਥੁਦੇਸਨਤ੍ਥਾਯ ਨੇਤਬ੍ਬਾ. ਤੇਹਿ ਭਿਕ੍ਖੂਹਿ ਵਤ੍ਥੁ ਦੇਸੇਤਬ੍ਬਂ ਅਨਾਰਮ੍ਭਂ ਸਪਰਿਕ੍ਕਮਨਨ੍ਤਿ ਤੇਹਿ ਭਿਕ੍ਖੂਹਿ ਕਿਪਿਲ੍ਲਿਕਾਦੀਨਂ ਆਸਯਾਦੀਹਿ ਤੇਰਸਹਿ, ਪੁਬ੍ਬਣ੍ਣਾਪਰਣ੍ਣਨਿਸ੍ਸਿਤਾਦੀਹਿ ਸੋਲ਼ਸਹਿ ਉਪਦ੍ਦਵੇਹਿ ਵਿਰਹਿਤਤ੍ਤਾ ਅਨਾਰਮ੍ਭਂ, ਦ੍ਵੀਹਿ ਵਾ ਚਤੂਹਿ ਵਾ ਬਲਿਬਦ੍ਧੇਹਿ ਯੁਤ੍ਤੇਨ ਸਕਟੇਨ ਏਕਂ ਚਕ੍ਕਂ ਨਿਬ੍ਬੋਦਕਪਤਨਟ੍ਠਾਨੇ ਏਕਂ ਬਹਿ ਕਤ੍ਵਾ ਆਵਿਜ੍ਝਿਤੁਂ ਸਕ੍ਕੁਣੇਯ੍ਯਤਾਯ ਸਪਰਿਕ੍ਕਮਨਨ੍ਤਿ ਸਲ੍ਲਕ੍ਖੇਤ੍ਵਾ ਸਚੇ ਸਙ੍ਘਪਹੋਨਕਾ ਹੋਨ੍ਤਿ, ਤਤ੍ਥੇਵ, ਨੋ ਚੇ, ਸਙ੍ਘਮਜ੍ਝਂ ਗਨ੍ਤ੍ਵਾ ਤੇਨ ਭਿਕ੍ਖੁਨਾ ਯਾਚਿਤੇਹਿ ਞਤ੍ਤਿਦੁਤਿਯੇਨ ਕਮ੍ਮੇਨ ਵਤ੍ਥੁ ਦੇਸੇਤਬ੍ਬਂ. ਸਾਰਮ੍ਭੇ ਚੇਤਿਆਦਿ ਪਟਿਪਕ੍ਖਨਯੇਨ ਵੇਦਿਤਬ੍ਬਂ.
ਆਲ਼ਵਿਯਂ ਆਲ਼ਵਿਕੇ ਭਿਕ੍ਖੂ ਆਰਬ੍ਭ ਸਞ੍ਞਾਚਿਕਾਯ ਕੁਟਿਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ‘‘ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਕੁਟਿਂ ਕਾਰੇਸ੍ਸਾਮੀ’’ਤਿ ਉਪਕਰਣਤ੍ਥਂ ਅਰਞ੍ਞਂ ਗਮਨਤੋ ਪਟ੍ਠਾਯ ਸਬ੍ਬਪਯੋਗੇਸੁ ਦੁਕ੍ਕਟਂ, ‘‘ਇਦਾਨਿ ਦ੍ਵੀਹਿ ਪਿਣ੍ਡੇਹਿ ਨਿਟ੍ਠਾਨਂ ਗਮਿਸ੍ਸਤੀ’’ਤਿ ਤੇਸੁ ਪਠਮਪਿਣ੍ਡਦਾਨੇ ਥੁਲ੍ਲਚ੍ਚਯਂ, ਦੁਤਿਯਦਾਨੇਨ ਲੇਪੇ ਘਟਿਤੇ ਸਚੇ ਅਦੇਸਿਤਵਤ੍ਥੁਕਾ ਏਵ ਵਾ ਪਮਾਣਾਤਿਕ੍ਕਨ੍ਤਾ ਏਵ ਵਾ ਹੋਤਿ, ਏਕੋ ਸਙ੍ਘਾਦਿਸੇਸੋ, ਦ੍ਵੇ ਚ ਦੁਕ੍ਕਟਾਨਿ. ਉਭਯਵਿਪ੍ਪਨ੍ਨਾ, ਦ੍ਵੇ ਸਙ੍ਘਾਦਿਸੇਸਾ, ਦ੍ਵੇ ਚ ਦੁਕ੍ਕਟਾਨਿ. ਸਚੇ ਪਨ ਦ੍ਵਾਰਬਨ੍ਧਂ ਵਾ ਵਾਤਪਾਨਂ ਵਾ ਅਟ੍ਠਪੇਤ੍ਵਾਵ ਮਤ੍ਤਿਕਾਯ ਲਿਮ੍ਪਤਿ, ਠਪਿਤੇ ਚ ਤਸ੍ਮਿਂ ਲੇਪੋ ਨ ਘਟਿਯਤਿ, ਰਕ੍ਖਤਿ ਤਾਵ. ਪੁਨ ਲਿਮ੍ਪਨ੍ਤਸ੍ਸ ਪਨ ਘਟਿਤਮਤ੍ਤੇ ਸਙ੍ਘਾਦਿਸੇਸੋ. ਸਚੇ ਤਂ ਠਪਿਯਮਾਨਂ ਪਠਮਦਿਨ੍ਨਲੇਪੇਨ ਸਦ੍ਧਿਂ ਨਿਰਨ੍ਤਰਮੇਵ ਹੁਤ੍ਵਾ ਤਿਟ੍ਠਤਿ, ਪਠਮਮੇਵ ਸਙ੍ਘਾਦਿਸੇਸੋ. ਕੇਵਲਂ ਸਾਰਮ੍ਭਾਯ ਦੁਕ੍ਕਟਂ, ਤਥਾ ਅਪਰਿਕ੍ਕਮਨਾਯ. ਵਿਪ੍ਪਕਤਂ ਕੁਟਿਂ ਅਞ੍ਞਸ੍ਸ ਦਦਤੋ ਚ, ਭੂਮਿਂ ਸਮਂ ਕਤ੍ਵਾ ਭਿਨ੍ਦਨ੍ਤਸ੍ਸ ਚ, ਲੇਣਗੁਹਾਤਿਣਕੁਟਿਪਣ੍ਣਚ੍ਛਦਨਗੇਹੇਸੁ ਅਞ੍ਞਤਰਂ ਕਾਰੇਨ੍ਤਸ੍ਸ, ਕੁਟਿਮ੍ਪਿ ਅਞ੍ਞਸ੍ਸ ਵਾਸਤ੍ਥਾਯ, ਵਾਸਾਗਾਰਂ ਠਪੇਤ੍ਵਾ ਉਪੋਸਥਾਗਾਰਾਦੀਸੁ ਅਞ੍ਞਤਰਤ੍ਥਾਯ ਕਾਰੇਨ੍ਤਸ੍ਸ ਚ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੀਲਵਿਪਤ੍ਤਿ, ਉਲ੍ਲਿਤ੍ਤਾਦੀਨਂ ਅਞ੍ਞਤਰਤਾ, ਹੇਟ੍ਠਿਮਪਮਾਣਸਮ੍ਭਵੋ, ਅਦੇਸਿਤਵਤ੍ਥੁਕਤਾ, ਪਮਾਣਾਤਿਕ੍ਕਨ੍ਤਤਾ, ਅਤ੍ਤੁਦ੍ਦੇਸਿਕਤਾ, ਵਾਸਾਗਾਰਤਾ, ਲੇਪਘਟਨਾਤਿ ਇਮਾਨੇਤ੍ਥ ਛ ਵਾ ਸਤ੍ਤ ਵਾ ਅਙ੍ਗਾਨਿ. ਛਸਮੁਟ੍ਠਾਨਂ, ਕਿਰਿਯਞ੍ਚ, ਕਿਰਿਯਾਕਿਰਿਯਞ੍ਚ. ਇਦਞ੍ਹਿ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਨ੍ਤਂ ਵਾ ਕਰੋਤੋ ਕਿਰਿਯਤੋ ਸਮੁਟ੍ਠਾਤਿ, ਅਦੇਸਾਪੇਤ੍ਵਾ ਕਰੋਤੋ ਕਿਰਿਯਾਕਿਰਿਯਤੋ ਸਮੁਟ੍ਠਾਤਿ. ਸੇਸਮੇਤ੍ਥ ਸਞ੍ਚਰਿਤ੍ਤੇ ਵੁਤ੍ਤਸਦਿਸਮੇਵਾਤਿ.
ਕੁਟਿਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਮਹਲ੍ਲਕਨ੍ਤਿ ਸਸਾਮਿਕਭਾਵੇਨ ਸਞ੍ਞਾਚਿਤਕੁਟਿਤੋ ਮਹਨ੍ਤਭਾਵੋ ਏਤਸ੍ਸ ਅਤ੍ਥੀਤਿ ਮਹਲ੍ਲਕੋ, ਯਸ੍ਮਾ ਵਾ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਮੇਨਾਪਿ ਕਾਤੁਂ ਵਟ੍ਟਤਿ, ਤਸ੍ਮਾ ਪਮਾਣਮਹਨ੍ਤਤਾਯਪਿ ਮਹਲ੍ਲਕੋ, ਤਂ ਮਹਲ੍ਲਕਂ. ਯਸ੍ਮਾ ਪਨਸ੍ਸ ਤਂ ਪਮਾਣਮਹਨ੍ਤਤ੍ਤਂ ਸਸਾਮਿਕਤ੍ਤਾਵ ਲਬ੍ਭਤਿ, ਤਸ੍ਮਾ ਤਦਤ੍ਥਦਸ੍ਸਨਤ੍ਥਂ ‘‘ਮਹਲ੍ਲਕੋ ਨਾਮ ਵਿਹਾਰੋ ਸਸਾਮਿਕੋ ਵੁਚ੍ਚਤੀ’’ਤਿ ਏਵਮਸ੍ਸ ਪਦਭਾਜਨੇ (ਪਾਰਾ. ੩੬੭) ਵੁਤ੍ਤਂ. ਸੇਸਂ ਸਬ੍ਬਂ ਕੁਟਿਕਾਰਸਿਕ੍ਖਾਪਦੇ ਵੁਤ੍ਤਸਦਿਸਂ, ਸਸਾਮਿਕਭਾਵਮਤ੍ਤਮੇਵ ਹਿ ਵਿਸੇਸੋ.
ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਚੇਤਿਯਰੁਕ੍ਖਂ ਛੇਦਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਭਾਵੋ, ਅਕਿਰਿਯਮਤ੍ਤਤੋ ਸਮੁਟ੍ਠਾਨਭਾਵੋ, ਏਕਸਙ੍ਘਾਦਿਸੇਸਤਾ ਚ ਏਤ੍ਥ ਵਿਸੇਸੋ.
ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਦੁਟ੍ਠੋ ਦੋਸੋਤਿ ਦੂਸਿਤੋ ਚੇਵ ਦੂਸਕੋ ਚ. ਉਪ੍ਪਨ੍ਨੇ ਹਿ ਦੋਸੇ ਪੁਗ੍ਗਲੋ ਤੇਨ ਦੋਸੇਨ ਦੂਸਿਤੋ ਹੋਤਿ, ਪਕਤਿਭਾਵਂ ਜਹਾਪਿਤੋ, ਤਸ੍ਮਾ ‘‘ਦੁਟ੍ਠੋ’’ਤਿ ਵੁਚ੍ਚਤਿ. ਪਰਞ੍ਚ ਦੂਸੇਤਿ ਵਿਨਾਸੇਤਿ, ਤਸ੍ਮਾ ‘‘ਦੋਸੋ’’ਤਿ ਵੁਚ੍ਚਤਿ. ਇਤਿ ‘‘ਦੁਟ੍ਠੋ ਦੋਸੋ’’ਤਿ ਏਕਸ੍ਸੇਵੇਤਂ ਪੁਗ੍ਗਲਸ੍ਸ ਆਕਾਰਨਾਨਤ੍ਤੇਨ ਨਿਦਸ੍ਸਨਂ. ਅਪ੍ਪਤੀਤੋਤਿ ਨਪ੍ਪਤੀਤੋ, ਪੀਤਿਸੁਖਾਦੀਹਿ ਵਿਵਜ੍ਜਿਤੋ, ਨ ਅਭਿਸਟੋਤਿ ਅਤ੍ਥੋ. ਅਮੂਲਕੇਨਾਤਿ ਯਂ ਚੋਦਕੇਨ ਚੁਦਿਤਕਮ੍ਹਿ ਪੁਗ੍ਗਲੇ ਅਦਿਟ੍ਠਂ ਅਸ੍ਸੁਤਂ ਅਪਰਿਸਙ੍ਕਿਤਂ, ਇਦਂ ਏਤੇਸਂ ਦਸ੍ਸਨਸਵਨਪਰਿਸਙ੍ਕਾਸਙ੍ਖਾਤਾਨਂ ਮੂਲਾਨਂ ਅਭਾਵਤੋ ਅਮੂਲਕਂ ਨਾਮ. ਤਂ ਪਨ ਸੋ ਆਪਨ੍ਨੋ ਵਾ ਹੋਤੁ, ਅਨਾਪਨ੍ਨੋ ਵਾ, ਏਤਂ ਇਧ ਅਪ੍ਪਮਾਣਂ. ਏਤ੍ਥ ਚ ਅਦਿਟ੍ਠਂ ਨਾਮ ਅਤ੍ਤਨੋ ਪਸਾਦਚਕ੍ਖੁਨਾ ਵਾ ਦਿਬ੍ਬਚਕ੍ਖੁਨਾ ਵਾ ਅਦਿਟ੍ਠਂ, ਅਸ੍ਸੁਤਂ ਨਾਮ ਤਥੇਵ ਕੇਨਚਿ ਵੁਚ੍ਚਮਾਨਂ ਨ ਸੁਤਂ, ਅਪਰਿਸਙ੍ਕਿਤਂ ਨਾਮ ਅਤ੍ਤਨੋ ਵਾ ਪਰਸ੍ਸ ਵਾ ਦਿਟ੍ਠਸੁਤਮੁਤਵਸੇਨ ਚੇਤਸਾ ਅਪਰਿਸਙ੍ਕਿਤਂ, ਇਤਿ ਏਵਰੂਪੇਨ ਅਮੂਲਕੇਨ. ਪਾਰਾਜਿਕੇਨਾਤਿ ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਅਞ੍ਞਤਰੇਨ, ਪਦਭਾਜਨੇ (ਪਾਰਾ. ੩੮੬) ਪਨ ਪਾਰਾਜਿਕੁਦ੍ਦੇਸੇ ਆਗਤਾਨੇਵ ਗਹੇਤ੍ਵਾ ‘‘ਚਤੁਨ੍ਨਂ ਅਞ੍ਞਤਰੇਨਾ’’ਤਿ ਵੁਤ੍ਤਂ. ਅਨੁਦ੍ਧਂਸੇਯ੍ਯਾਤਿ ਧਂਸੇਯ੍ਯ ਵਿਦ੍ਧਂਸੇਯ੍ਯ ਪਧਂਸੇਯ੍ਯ ਅਭਿਭਵੇਯ੍ਯ. ਤਂ ਪਨ ਅਨੁਦ੍ਧਂਸਨਂ ਯਸ੍ਮਾ ਅਤ੍ਤਨਾ ਚੋਦੇਨ੍ਤੋਪਿ ਪਰੇਨ ਚੋਦਾਪੇਨ੍ਤੋਪਿ ਕਰੋਤਿ, ਤਸ੍ਮਾਸ੍ਸ ਪਦਭਾਜਨੇ ‘‘ਚੋਦੇਤਿ ਵਾ ਚੋਦਾਪੇਤਿ ਵਾ’’ਤਿ ਵੁਤ੍ਤਂ. ਤਤ੍ਥ ਵਤ੍ਥੁਸਨ੍ਦਸ੍ਸਨਾ ਆਪਤ੍ਤਿਸਨ੍ਦਸ੍ਸਨਾ ਸਂਵਾਸਪ੍ਪਟਿਕ੍ਖੇਪੋ ਸਾਮੀਚਿਪ੍ਪਟਿਕ੍ਖੇਪੋਤਿ ਸਙ੍ਖੇਪਤੋ ਚਤਸ੍ਸੋ ਚੋਦਨਾ. ਤਾਸੁ ਵਤ੍ਥੁਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵੀ’’ਤਿਆਦਿਨਾ ਨਯੇਨ ਪਵਤ੍ਤਾ. ਆਪਤ੍ਤਿਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਧਮ੍ਮਾਪਤ੍ਤਿਂ ਆਪਨ੍ਨੋ’’ਤਿਆਦਿਨਾ ਨਯੇਨ ਪਵਤ੍ਤਾ. ਸਂਵਾਸਪ੍ਪਟਿਕ੍ਖੇਪੋ ਨਾਮ ‘‘ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ ਏਵਂ ਪਵਤ੍ਤੋ. ਏਤ੍ਤਾਵਤਾ ਪਨ ਸੀਸਂ ਨ ਏਤਿ, ‘‘ਅਸ੍ਸਮਣੋਸੀ’’ਤਿਆਦੀਹਿ ਵਚਨੇਹਿ ਸਦ੍ਧਿਂ ਘਟਿਤੇਯੇਵ ਸੀਸਂ ਏਤਿ. ਸਾਮੀਚਿਪ੍ਪਟਿਕ੍ਖੇਪੋ ਨਾਮ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲਿਕਮ੍ਮਸਾਮੀਚਿਕਮ੍ਮਬੀਜਨਿਕਮ੍ਮਾਦੀਨਂ ਅਕਰਣਂ, ਤਂ ਪਟਿਪਾਤਿਯਾ ਵਨ੍ਦਨਾਦੀਨਿ ਕਰੋਤੋ ਏਕਸ੍ਸ ਅਕਤ੍ਵਾ ਸੇਸਾਨਂ ਕਰਣਕਾਲੇ ਵੇਦਿਤਬ੍ਬਂ. ਏਤ੍ਤਾਵਤਾ ਚ ਚੋਦਨਾ ਨਾਮ ਹੋਤਿ, ਆਪਤ੍ਤਿ ਪਨ ਸੀਸਂ ਨ ਏਤਿ. ‘‘ਕਸ੍ਮਾ ਮਮ ਵਨ੍ਦਨਾਦੀਨਿ ਨ ਕਰੋਸੀ’’ਤਿ ਪੁਚ੍ਛਿਤੇ ਪਨ ‘‘ਅਸ੍ਸਮਣੋਸੀ’’ਤਿਆਦਿਵਚਨੇਹਿ ਸਦ੍ਧਿਂ ਘਟਿਤੇਯੇਵ ਸੀਸਂ ਏਤਿ, ਤਸ੍ਮਾ ਯੋ ਭਿਕ੍ਖੁ ਭਿਕ੍ਖੁਂ ਸਮੀਪੇ ਠਤ੍ਵਾ ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵੀ’’ਤਿ ਵਾ ‘‘ਅਸ੍ਸਮਣੋਸੀ’’ਤਿ ਵਾ ਆਦੀਹਿ ਵਚਨੇਹਿ ਹਤ੍ਥਮੁਦ੍ਦਾਯ ਏਵ ਵਾ ਏਤਮਤ੍ਥਂ ਦੀਪੇਨ੍ਤੋ ਸਯਂ ਵਾ ਚੋਦੇਤਿ, ਗਹਟ੍ਠਪਬ੍ਬਜਿਤੇਸੁ ਵਾ ਅਞ੍ਞਤਰੇਨ ਚੋਦਾਪੇਤਿ, ਅਯਂ ਅਨੁਦ੍ਧਂਸੇਤਿ ਨਾਮ. ਅਪ੍ਪੇਵ ਨਾਮ ਨਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯਨ੍ਤਿ ਅਪਿ ਏਵ ਨਾਮ ਨਂ ਪੁਗ੍ਗਲਂ ਇਮਮ੍ਹਾ ਸੇਟ੍ਠਚਰਿਯਾ ਅਪਨੇਯ੍ਯਂ. ‘‘ਸਾਧੁ ਵਤਸ੍ਸ ਸਚਾਹਂ ਇਮਂ ਪੁਗ੍ਗਲਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯ’’ਨ੍ਤਿ ਇਮਿਨਾ ਅਧਿਪ੍ਪਾਯੇਨ ਅਨੁਦ੍ਧਂਸੇਯ੍ਯਾਤਿ ਵੁਤ੍ਤਂ ਹੋਤਿ. ਏਤੇਨ ਏਕਂ ਚਾਵਨਾਧਿਪ੍ਪਾਯਂ ਗਹੇਤ੍ਵਾ ਅਵਸੇਸਾ ਅਕ੍ਕੋਸਾਧਿਪ੍ਪਾਯੋ ਕਮ੍ਮਾਧਿਪ੍ਪਾਯੋ ਵੁਟ੍ਠਾਨਾਧਿਪ੍ਪਾਯੋ ਉਪੋਸਥਟ੍ਠਪਨਾਧਿਪ੍ਪਾਯੋ ਪਵਾਰਣਟ੍ਠਪਨਾਧਿਪ੍ਪਾਯੋ ਅਨੁਵਿਜ੍ਜਨਾਧਿਪ੍ਪਾਯੋ ਧਮ੍ਮਕਥਾਧਿਪ੍ਪਾਯੋਤਿ ਸਤ੍ਤ ਅਧਿਪ੍ਪਾਯਾ ਪਟਿਕ੍ਖਿਤ੍ਤਾ ਹੋਨ੍ਤਿ. ਤਤੋ ਅਪਰੇਨ ਸਮਯੇਨਾਤਿ ਯਸ੍ਮਿਂ ਸਮਯੇ ਅਨੁਦ੍ਧਂਸਿਤੋ ਹੋਤਿ, ਤਤੋ ਅਞ੍ਞਸ੍ਮਿਂ ਸਮਯੇ. ਸਮਨੁਗ੍ਗਾਹੀਯਮਾਨੋ ਵਾਤਿ ਅਨੁਵਿਜ੍ਜਕੇਨ ਕਿਂ ਤੇ ਦਿਟ੍ਠਨ੍ਤਿਆਦਿਨਾ ਨਯੇਨ ਅਨੁਵਿਜ੍ਜਿਯਮਾਨੋ ਉਪਪਰਿਕ੍ਖਿਯਮਾਨੋ. ਅਸਮਨੁਗ੍ਗਾਹੀਯਮਾਨੋ ਵਾਤਿ ਦਿਟ੍ਠਾਦੀਸੁ ਕੇਨਚਿ ਵਤ੍ਥੁਨਾਵਾ ਅਨੁਵਿਜ੍ਜਕਾਦੀਸੁ ਯੇਨ ਕੇਨਚਿ ਪੁਗ੍ਗਲੇਨ ਵਾ ਅਵੁਚ੍ਚਮਾਨੋ. ਇਮੇਸਂ ਪਨ ਪਦਾਨਂ ਪਰਤੋ ‘‘ਭਿਕ੍ਖੁ ਚ ਦੋਸਂ ਪਤਿਟ੍ਠਾਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਇਦਞ੍ਹਿ ਵੁਤ੍ਤਂ ਹੋਤਿ – ਏਵਂ ਸਮਨੁਗ੍ਗਾਹੀਯਮਾਨੋ ਵਾ ਅਸਮਨੁਗ੍ਗਾਹੀਯਮਾਨੋ ਵਾ ਭਿਕ੍ਖੁ ਚ ਦੋਸਂ ਪਤਿਟ੍ਠਾਤਿ ਪਟਿਚ੍ਚ ਤਿਟ੍ਠਤਿ ਪਟਿਜਾਨਾਤਿ, ਸਙ੍ਘਾਦਿਸੇਸੋਤਿ. ਇਦਞ੍ਚ ਅਮੂਲਕਭਾਵਸ੍ਸ ਪਾਕਟਕਾਲਦਸ੍ਸਨਤ੍ਥਂ ਵੁਤ੍ਤਂ. ਆਪਤ੍ਤਿਂ ਪਨ ਅਨੁਦ੍ਧਂਸਿਤਕ੍ਖਣੇਯੇਵ ਆਪਜ੍ਜਤਿ. ਅਮੂਲਕਞ੍ਚੇਵ ਤਂ ਅਧਿਕਰਣਂ ਹੋਤੀਤਿ ਏਤ੍ਥ ਪਨ ਦਿਟ੍ਠਮੂਲਾਦੀਨਂ ਅਭਾਵੇਨ ਅਮੂਲਕਂ, ਸਮਥੇਹਿ ਅਧਿਕਰਣੀਯਭਾਵੇਨ ਅਧਿਕਰਣਂ. ਯਞ੍ਹਿ ਅਧਿਕਿਚ੍ਚ ਆਰਬ੍ਭ ਪਟਿਚ੍ਚ ਸਨ੍ਧਾਯ ਸਮਥਾ ਪਵਤ੍ਤਨ੍ਤਿ, ਤਂ ਅਧਿਕਰਣਂ. ਇਧ ਪਨ ਪਾਰਾਜਿਕਸਙ੍ਖਾਤਂ ਆਪਤ੍ਤਾਧਿਕਰਣਮੇਵ ਅਧਿਪ੍ਪੇਤਂ. ਯਦਿ ਹਿ ਤਂ ਅਧਿਕਰਣਂ ਦਿਟ੍ਠਾਦੀਹਿ ਮੂਲੇਹਿ ਅਮੂਲਕਞ੍ਚੇਵ ਹੋਤਿ, ਅਯਂ ਚੋਦੇਤੁਂ ਆਗਤੋ ਭਿਕ੍ਖੁ ਚ ਦੋਸਂ ਪਤਿਟ੍ਠਾਤਿ ਪਟਿਚ੍ਚ ਤਿਟ੍ਠਤਿ, ‘‘ਤੁਚ੍ਛਕਂ ਮਯਾ ਭਣਿਤ’’ਨ੍ਤਿਆਦੀਨਿ (ਪਾਰਾ. ੩੮੬) ਵਦਨ੍ਤੋ ਪਟਿਜਾਨਾਤਿ, ਤਸ੍ਸ ਭਿਕ੍ਖੁਨੋ ਅਨੁਦ੍ਧਂਸਿਤਕ੍ਖਣੇਯੇਵ ਸਙ੍ਘਾਦਿਸੇਸੋਤਿ, ਅਯਂ ਸਿਕ੍ਖਾਪਦਸ੍ਸ ਪਦਾਨੁਕ੍ਕਮੇਨ ਅਤ੍ਥੋ.
ਰਾਜਗਹੇ ਮੇਤ੍ਤਿਯਭੂਮਜਕੇ ਭਿਕ੍ਖੂ ਆਰਬ੍ਭ ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਕਤੂਪਸਮ੍ਪਦਂ ਸੁਦ੍ਧਂ ਵਾ ਅਸੁਦ੍ਧਂ ਵਾ ਪੁਗ੍ਗਲਂ ਯੇਨ ਪਾਰਾਜਿਕੇਨ ਚੋਦੇਤਿ, ਤਂ ‘‘ਅਯਂ ਅਨਜ੍ਝਾਪਨ੍ਨੋ’’ਤਿ ਞਤ੍ਵਾ ਚਾਵਨਾਧਿਪ੍ਪਾਯੇਨ ‘‘ਕਰੋਤੁ ਮੇ ਆਯਸ੍ਮਾ ਓਕਾਸਂ, ਅਹਂ ਤਂ ਵਤ੍ਤੁਕਾਮੋ’’ਤਿ ਏਵਂ ਓਕਾਸਂ ਅਕਾਰੇਤ੍ਵਾ ਚੋਦੇਨ੍ਤਸ੍ਸ ਸਚੇ ਸੋ ਤਙ੍ਖਣੇਯੇਵ ਜਾਨਾਤਿ ‘‘ਮਂ ਚੋਦੇਤੀ’’ਤਿ, ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ ਚੇਵ ਦੁਕ੍ਕਟਞ੍ਚ. ਓਕਾਸਂ ਕਾਰੇਤ੍ਵਾ ਚੋਦੇਨ੍ਤਸ੍ਸ ਸਙ੍ਘਾਦਿਸੇਸੋਯੇਵ. ਹਤ੍ਥਮੁਦ੍ਦਾਯ ਸਮ੍ਮੁਖਾ ਚੋਦੇਨ੍ਤਸ੍ਸਾਪਿ ਏਸੇਵ ਨਯੋ. ਪਰਮ੍ਮੁਖਾ ਚੋਦੇਨ੍ਤਸ੍ਸ ਪਨ ਸੀਸਂ ਨ ਏਤਿ. ਅਤ੍ਤਨਾ ਸਮੀਪੇ ਠਤ੍ਵਾ ਅਞ੍ਞਂ ਭਿਕ੍ਖੁਂ ਆਣਾਪੇਤਿ, ਸੋ ਤਸ੍ਸ ਵਚਨੇਨ ਤਂ ਚੋਦੇਤਿ, ਚੋਦਾਪਕਸ੍ਸੇਵ ਵੁਤ੍ਤਨਯੇਨ ਆਪਤ੍ਤਿਯੋ. ਅਥ ਸੋਪਿ ‘‘ਮਯਾ ਦਿਟ੍ਠਂ ਸੁਤਂ ਅਤ੍ਥੀ’’ਤਿ ਚੋਦੇਤਿ, ਦ੍ਵਿਨ੍ਨਮ੍ਪਿ ਜਾਨਾਨਂ ਤਥੇਵ ਆਪਤ੍ਤਿਯੋ. ਅਕ੍ਕੋਸਾਧਿਪ੍ਪਾਯੇਨ ਪਨ ਓਕਾਸਂ ਅਕਾਰੇਤ੍ਵਾ ਵਦਨ੍ਤਸ੍ਸ ਵੁਤ੍ਤਨਯੇਨੇਵ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ. ਓਕਾਸਂ ਕਾਰੇਤ੍ਵਾ ਵਦਨ੍ਤਸ੍ਸ ਪਾਚਿਤ੍ਤਿਯਮੇਵ. ਕਮ੍ਮਾਧਿਪ੍ਪਾਯੇਨ ਅਸਮ੍ਮੁਖਾ ਸਤ੍ਤਵਿਧਮ੍ਪਿ ਕਮ੍ਮਂ ਕਰੋਨ੍ਤਸ੍ਸ ਦੁਕ੍ਕਟਮੇਵ. ਵੁਟ੍ਠਾਨਾਧਿਪ੍ਪਾਯੇਨ ‘‘ਤ੍ਵਂ ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਕਰੋਹੀ’’ਤਿ ਵਦਨ੍ਤਸ੍ਸ, ਉਪੋਸਥਂ ਵਾ ਪਵਾਰਣਂ ਵਾ ਠਪੇਨ੍ਤਸ੍ਸ ਚ ਓਕਾਸਕਮ੍ਮਂ ਨਤ੍ਥਿ, ਠਪਨਕ੍ਖੇਤ੍ਤਂ ਪਨ ਜਾਨਿਤਬ੍ਬਂ, ਅਨੁਵਿਜ੍ਜਕਸ੍ਸਾਪਿ ਓਸਟੇ ਵਤ੍ਥੁਸ੍ਮਿਂ ‘‘ਅਤ੍ਥੇਤਂ ਤਵਾ’’ਤਿ ਅਨੁਵਿਜ੍ਜਨਾਧਿਪ੍ਪਾਯੇਨ ਵਦਨ੍ਤਸ੍ਸ ਓਕਾਸਕਮ੍ਮਂ ਨਤ੍ਥਿ, ਧਮ੍ਮਕਥਿਕਸ੍ਸਾਪਿ ‘‘ਯੋ ਇਦਞ੍ਚ ਇਦਞ੍ਚ ਕਰੋਤਿ, ਅਯਂ ਅਸ੍ਸਮਣੋ’’ਤਿਆਦਿਨਾ ਨਯੇਨ ਅਨੋਦਿਸਕਂ ਧਮ੍ਮਂ ਕਥੇਨ੍ਤਸ੍ਸ ਓਕਾਸਕਮ੍ਮਂ ਨਤ੍ਥਿ. ਸਚੇ ਪਨ ਓਦਿਸ੍ਸ ਨਿਯਮੇਤ੍ਵਾ ‘‘ਅਸੁਕੋ ਚ ਅਸੁਕੋ ਚ ਅਸ੍ਸਮਣੋ ਅਨੁਪਾਸਕੋ’’ਤਿ ਕਥੇਤਿ, ਆਸਨਤੋ ਓਰੁਯ੍ਹ ਆਪਤ੍ਤਿਂ ਦੇਸੇਤ੍ਵਾ ਗਨ੍ਤਬ੍ਬਂ. ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ, ਸੀਲਵਿਪਤ੍ਤਿ, ਯਂ ਚੋਦੇਤਿ ਵਾ ਚੋਦਾਪੇਤਿ ਵਾ, ਤਸ੍ਸ ‘‘ਉਪਸਮ੍ਪਨ੍ਨੋ’’ਤਿ ਸਙ੍ਖ੍ਯੁਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ਸਮ੍ਮੁਖਾਚੋਦਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ. ਵੇਦਨਾ ਪਨੇਤ੍ਥ ਦੁਕ੍ਖਾਯੇਵਾਤਿ.
ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਅਞ੍ਞਭਾਗਿਯਸਿਕ੍ਖਾਪਦਵਣ੍ਣਨਾ
ਨਵਮੇ ਅਞ੍ਞਭਾਗਿਯਸ੍ਸਾਤਿਆਦੀਸੁ ਅਞ੍ਞਭਾਗਸ੍ਸ ਇਦਂ, ਅਞ੍ਞਭਾਗੋ ਵਾ ਅਸ੍ਸ ਅਤ੍ਥੀਤਿ ਅਞ੍ਞਭਾਗਿਯਂ. ਅਧਿਕਰਣਨ੍ਤਿ ਆਧਾਰੋ ਵੇਦਿਤਬ੍ਬੋ, ਵਤ੍ਥੁ ਅਧਿਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਯੋ ਹਿ ਸੋ ਅਟ੍ਠੁਪ੍ਪਤ੍ਤਿਯਂ ‘‘ਦਬ੍ਬੋ ਮਲ੍ਲਪੁਤ੍ਤੋ ਨਾਮਾ’’ਤਿ ਛਗਲਕੋ ਵੁਤ੍ਤੋ. ਸੋ ਯ੍ਵਾਯਂ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਭਾਗੋ ਕੋਟ੍ਠਾਸੋ ਪਕ੍ਖੋ ਮਨੁਸ੍ਸਜਾਤਿ ਚੇਵ ਭਿਕ੍ਖੁਭਾਵੋ ਚ, ਤਤੋ ਅਞ੍ਞਸ੍ਸ ਭਾਗਸ੍ਸ ਕੋਟ੍ਠਾਸਸ੍ਸ ਪਕ੍ਖਸ੍ਸ ਹੋਤਿ ਤਿਰਚ੍ਛਾਨਜਾਤਿਯਾ ਚੇਵ ਛਗਲਕਭਾਵਸ੍ਸ ਚ, ਸੋ ਵਾ ਅਞ੍ਞਭਾਗੋ ਅਸ੍ਸ ਅਤ੍ਥਿ, ਤਸ੍ਮਾ ਅਞ੍ਞਭਾਗਿਯਸਙ੍ਖ੍ਯਂ ਲਭਤਿ. ਯਸ੍ਮਾ ਚ ਤੇਸਂ ‘‘ਇਮਂ ਮਯਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਕਰੋਮਾ’’ਤਿ ਵਦਨ੍ਤਾਨਂ ਤਸ੍ਸ ਨਾਮਕਰਣਸਞ੍ਞਾਯ ਆਧਾਰੋ ਵਤ੍ਥੁ ਅਧਿਟ੍ਠਾਨਂ, ਤਸ੍ਮਾ ‘‘ਅਧਿਕਰਣ’’ਨ੍ਤਿ ਵੇਦਿਤਬ੍ਬੋ. ਤਞ੍ਹਿ ਸਨ੍ਧਾਯ ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾ’’ਤਿਆਦਿ (ਪਾਰਾ. ੩੯੧) ਵੁਤ੍ਤਂ. ਨ ਵਿਵਾਦਾਧਿਕਰਣਾਦੀਸੁ ਅਞ੍ਞਤਰਂ, ਕਸ੍ਮਾ? ਅਸਮ੍ਭਵਤੋ. ਨ ਹਿ ਮੇਤ੍ਤਿਯਭੂਮਜਕਾ ਚਤੁਨ੍ਨਂ ਅਧਿਕਰਣਾਨਂ ਕਸ੍ਸਚਿ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪ੍ਪਾਦਿਯਿਂਸੁ, ਨ ਚ ਚਤੁਨ੍ਨਂ ਅਧਿਕਰਣਾਨਂ ਲੇਸੋ ਨਾਮ ਅਤ੍ਥਿ. ਜਾਤਿਲੇਸਾਦਯੋ ਹਿ ਪੁਗ੍ਗਲਾਨਂਯੇਵ ਲੇਸਾ ਵੁਤ੍ਤਾ, ਨ ਵਿਵਾਦਾਧਿਕਰਣਾਦੀਨਂ. ਤਞ੍ਚ ‘‘ਦਬ੍ਬੋ ਮਲ੍ਲਪੁਤ੍ਤੋ’’ਤਿ ਨਾਮਂ ਤਸ੍ਸ ਅਞ੍ਞਭਾਗਿਯਾਧਿਕਰਣਭਾਵੇ ਠਿਤਸ੍ਸ ਛਗਲਕਸ੍ਸ ਕੋਚਿ ਦੇਸੋ ਹੋਤਿ ਥੇਰਂ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਤੁਂ ਲੇਸਮਤ੍ਤੋ, ਏਤ੍ਥ ਚ ਦਿਸ੍ਸਤਿ ਅਪਦਿਸ੍ਸਤਿ ‘‘ਅਸ੍ਸ ਅਯ’’ਨ੍ਤਿ ਵੋਹਰੀਯਤੀਤਿ ਦੇਸੋ, ਜਾਤਿਆਦੀਸੁ ਅਞ੍ਞਤਰਕੋਟ੍ਠਾਸਸ੍ਸੇਤਂ ਅਧਿਵਚਨਂ. ਅਞ੍ਞਮ੍ਪਿ ਵਤ੍ਥੁਂ ਲਿਸ੍ਸਤਿ ਸਿਲਿਸ੍ਸਤਿ ਵੋਹਾਰਮਤ੍ਤੇਨੇਵ ਈਸਕਂ ਅਲ੍ਲੀਯਤੀਤਿ ਲੇਸੋ, ਜਾਤਿਆਦੀਨਂਯੇਵ ਅਞ੍ਞਤਰਕੋਟ੍ਠਾਸਸ੍ਸੇਤਂ ਅਧਿਵਚਨਂ. ਪਦਭਾਜਨੇ (ਪਾਰਾ. ੩੯੩) ਪਨ ਯਸ੍ਸ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਯ੍ਯ, ਤਂ ਯਸ੍ਮਾ ਅਟ੍ਠੁਪ੍ਪਤ੍ਤਿਵਸੇਨੇਵ ਆਵਿਭੂਤਂ, ਤਸ੍ਮਾ ਤਂ ਅਵਿਭਜਿਤ੍ਵਾ ਯਾਨਿ ‘‘ਅਧਿਕਰਣ’’ਨ੍ਤਿ ਵਚਨਸਾਮਞ੍ਞਤੋ ਅਤ੍ਥੁਦ੍ਧਾਰਵਸੇਨ ਪਵਤ੍ਤਾਨਿ ਚਤ੍ਤਾਰਿ ਅਧਿਕਰਣਾਨਿ, ਤੇਸਂ ਅਞ੍ਞਭਾਗਿਯਤਾ ਚ ਤਬ੍ਭਾਗਿਯਤਾ ਚ ਯਸ੍ਮਾ ਅਪਾਕਟਾ, ਜਾਨਿਤਬ੍ਬਾ ਚ ਵਿਨਯਧਰੇਹਿ, ਤਸ੍ਮਾ ਤਞ੍ਚ ਅਵਸਾਨੇ ਆਪਤ੍ਤਞ੍ਞਭਾਗਿਯੇਨ ਚੋਦਨਞ੍ਚ ਆਵਿਕਾਤੁਂ ‘‘ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾਤਿ ਆਪਤ੍ਤਞ੍ਞਭਾਗਿਯਂ ਵਾ ਹੋਤਿ ਅਧਿਕਰਣਞ੍ਞਭਾਗਿਯਂ ਵਾ’’ਤਿਆਦਿ ਵੁਤ੍ਤਂ, ਸੇਸਾ ਵਿਨਿਚ੍ਛਯਕਥਾ ਅਟ੍ਠਮੇ ਵੁਤ੍ਤਸਦਿਸਾਯੇਵ. ਅਯਂ ਪਨ ਵਿਸੇਸੋ – ਇਦਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਇਧ ਚ ਆਪਤ੍ਤਞ੍ਞਭਾਗਿਯਚੋਦਨਾਯ ਤਥਾਸਞ੍ਞਿਨੋਪਿ ਅਨਾਪਤ੍ਤਿ. ਅਙ੍ਗੇਸੁ ਚ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਿਯਨਤਾ ਅਧਿਕਾਤਿ.
ਅਞ੍ਞਭਾਗਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਸਙ੍ਘਭੇਦਸਿਕ੍ਖਾਪਦਵਣ੍ਣਨਾ
ਦਸਮੇ ਸਮਗ੍ਗਸ੍ਸ ਸਙ੍ਘਸ੍ਸਾਤਿ ਸਹਿਤਸ੍ਸ ਭਿਕ੍ਖੁਸਙ੍ਘਸ੍ਸ, ਚਿਤ੍ਤੇਨ ਚ ਸਰੀਰੇਨ ਚ ਅਵਿਯੁਤ੍ਤਸ੍ਸਾਤਿ ਅਤ੍ਥੋ. ਤੇਨੇਵਸ੍ਸ ਪਦਭਾਜਨੇ (ਪਾਰਾ. ੪੧੨) ‘‘ਸਮਗ੍ਗੋ ਨਾਮ ਸਙ੍ਘੋ ਸਮਾਨਸਂਵਾਸਕੋ ਸਮਾਨਸੀਮਾਯਂ ਠਿਤੋ’’ਤਿ ਵੁਤ੍ਤਂ. ਸਮਾਨਸਂਵਾਸਕੋ ਹਿ ਸਮਚਿਤ੍ਤਤਾਯ ਚਿਤ੍ਤੇਨ ਅਵਿਯੁਤ੍ਤੋ ਹੋਤਿ, ਸਮਾਨਸੀਮਾਯਂ ਠਿਤੋ ਕਾਯਸਾਮਗ੍ਗਿਦਾਨਤੋ ਸਰੀਰੇਨ ਅਵਿਯੁਤ੍ਤੋ. ਭੇਦਾਯ ਪਰਕ੍ਕਮੇਯ੍ਯਾਤਿ ‘‘ਕਥਂ ਨਾਮਾਯਂ ਭਿਜ੍ਜੇਯ੍ਯਾ’’ਤਿ ਭੇਦਨਤ੍ਥਾਯ ਵਾਯਾਮੇਯ੍ਯ. ਭੇਦਨਸਂਵਤ੍ਤਨਿਕਂ ਵਾ ਅਧਿਕਰਣਨ੍ਤਿ ਭੇਦਨਸ੍ਸ ਸਙ੍ਘਭੇਦਸ੍ਸ ਅਤ੍ਥਾਯ ਸਂਵਤ੍ਤਨਿਕਂ ਕਾਰਣਂ. ਇਮਸ੍ਮਿਞ੍ਹਿ ਓਕਾਸੇ ‘‘ਕਾਮਹੇਤੁ ਕਾਮਨਿਦਾਨਂ ਕਾਮਾਧਿਕਰਣ’’ਨ੍ਤਿ ਆਦੀਸੁ (ਮ. ਨਿ. ੧.੧੬੮, ੧੭੮) ਵਿਯ ਕਾਰਣਂ ‘‘ਅਧਿਕਰਣ’’ਨ੍ਤਿ ਅਧਿਪ੍ਪੇਤਂ. ਤਂ ਭੇਦਕਰਵਤ੍ਥੁਵਸੇਨ ਅਟ੍ਠਾਰਸਵਿਧਂ. ਸਮਾਦਾਯਾਤਿ ਗਹੇਤ੍ਵਾ. ਪਗ੍ਗਯ੍ਹ ਤਿਟ੍ਠੇਯ੍ਯਾਤਿ ਤਂ ਸਙ੍ਘਭੇਦਸ੍ਸ ਅਤ੍ਥਾਯ ਸਂਵਤ੍ਤਨਿਕਂ ਸਙ੍ਘਭੇਦਨਿਬ੍ਬਤ੍ਤਿਸਮਤ੍ਥਂ ਕਾਰਣਂ ਗਹੇਤ੍ਵਾ ਦੀਪੇਯ੍ਯ ਚੇਵ ਨਪ੍ਪਟਿਨਿਸ੍ਸਜ੍ਜੇਯ੍ਯ ਚ. ਭਿਕ੍ਖੂਹਿ ਏਵਮਸ੍ਸ ਵਚਨੀਯੋਤਿ ਯੇ ਤਂ ਪਗ੍ਗਯ੍ਹ ਤਿਟ੍ਠਨ੍ਤਂ ਸਮ੍ਮੁਖਾ ਪਸ੍ਸਨ੍ਤਿ, ਯੇ ਵਾ ‘‘ਅਸੁਕਸ੍ਮਿਂ ਨਾਮ ਵਿਹਾਰੇ’’ਤਿ ਸੁਣਨ੍ਤਿ, ਤੇਹਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਅਡ੍ਢਯੋਜਨਮਤ੍ਤਂ ਗਨ੍ਤ੍ਵਾਪਿ ਯ੍ਵਾਯਂ ਅਨਨ੍ਤਰੇ ‘‘ਮਾਯਸ੍ਮਾ’’ਤਿਆਦਿਵਚਨਕ੍ਕਮੋ ਵੁਤ੍ਤੋ, ਏਵਮਸ੍ਸ ਵਚਨੀਯੋ. ਦਿਸ੍ਵਾ ਵਾ ਸੁਤ੍ਵਾ ਵਾ ਅਵਦਨ੍ਤਾਨਂ ਦੁਕ੍ਕਟਂ. ਏਤ੍ਥ ਚ ਮਾਇਤਿ ਪਦਂ ‘‘ਪਰਕ੍ਕਮੀ’’ਤਿਪਦੇਨ ‘‘ਅਟ੍ਠਾਸੀ’’ਤਿਪਦੇਨ ਚ ਸਦ੍ਧਿਂ ‘‘ਮਾ ਪਰਕ੍ਕਮਿ, ਮਾ ਅਟ੍ਠਾਸੀ’’ਤਿ ਯੋਜੇਤਬ੍ਬਂ. ਸਮੇਤਾਯਸ੍ਮਾ ਸਙ੍ਘੇਨਾਤਿ ਆਯਸ੍ਮਾ ਸਙ੍ਘੇਨ ਸਦ੍ਧਿਂ ਸਮੇਤੁ ਸਮਾਗਚ੍ਛਤੁ, ਏਕਲਦ੍ਧਿਕੋ ਹੋਤੂਤਿ ਅਤ੍ਥੋ. ਕਿਂ ਕਾਰਣਾ? ਸਮਗ੍ਗੋ ਹਿ ਸਙ੍ਘੋ…ਪੇ… ਵਿਹਰਤੀਤਿ. ਤਤ੍ਥ ਸਮ੍ਮੋਦਮਾਨੋਤਿ ਅਞ੍ਞਮਞ੍ਞਸਮ੍ਪਤ੍ਤਿਯਾ ਸੁਟ੍ਠੁ ਮੋਦਮਾਨੋ. ਅਵਿਵਦਮਾਨੋਤਿ ‘‘ਅਯਂ ਧਮ੍ਮੋ, ਨਾਯਂ ਧਮ੍ਮੋ’’ਤਿ ਏਵਂ ਨ ਵਿਵਦਮਾਨੋ. ਏਕੋ ਉਦ੍ਦੇਸੋ ਅਸ੍ਸਾਤਿ ਏਕੁਦ੍ਦੇਸੋ, ਏਕਤੋ ਪਵਤ੍ਤਪਾਤਿਮੋਕ੍ਖੁਦ੍ਦੇਸੋਤਿ ਅਤ੍ਥੋ. ਫਾਸੁ ਵਿਹਰਤੀਤਿ ਸੁਖਂ ਵਿਹਰਤਿ. ਏਵਂ ਵਿਸੁਮ੍ਪਿ ਸਙ੍ਘਮਜ੍ਝੇਪਿ ਤਿਕ੍ਖਤ੍ਤੁਂ ਵੁਚ੍ਚਮਾਨਸ੍ਸ ਅਪ੍ਪਟਿਨਿਸ੍ਸਜ੍ਜਤੋ ਦੁਕ੍ਕਟਂ. ਏਵਞ੍ਚ ਸੋਤਿਆਦਿਮ੍ਹਿ ਸਮਨੁਭਾਸਿਤਬ੍ਬੋਤਿ ਸਮਨੁਭਾਸਨਕਮ੍ਮਂ ਕਾਤਬ੍ਬਂ. ਇਚ੍ਚੇਤਂ ਕੁਸਲਨ੍ਤਿ ਇਤਿ ਏਤਂ ਪਟਿਨਿਸ੍ਸਜ੍ਜਨਂ ਕੁਸਲਂ ਖੇਮਂ ਸੋਤ੍ਥਿਭਾਵੋ ਤਸ੍ਸ ਭਿਕ੍ਖੁਨੋ. ਨੋ ਚੇ ਪਟਿਨਿਸ੍ਸਜ੍ਜੇਯ੍ਯ, ਸਙ੍ਘਾਦਿਸੇਸੋਤਿ ਏਤ੍ਥ ਸਮਨੁਭਾਸਨਕਮ੍ਮਪਰਿਯੋਸਾਨੇ ਅਪ੍ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ. ਸੇਸਂ ਉਤ੍ਤਾਨਪਦਤ੍ਥਮੇਵ.
ਰਾਜਗਹੇ ਦੇਵਦਤ੍ਤਂ ਆਰਬ੍ਭ ਸਙ੍ਘਭੇਦਾਯ ਪਰਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਸਮਨੁਭਾਸਨਕਮ੍ਮੇ ਕਰਿਯਮਾਨੇ ਅਪ੍ਪਟਿਨਿਸ੍ਸਜ੍ਜਨ੍ਤਸ੍ਸ ਞਤ੍ਤਿਪਰਿਯੋਸਾਨੇ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਦ੍ਵੇ ਥੁਲ੍ਲਚ੍ਚਯਾ, ‘‘ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯਾ’’ਤਿ ਏਵਂ ਯ੍ਯ-ਕਾਰਪਤ੍ਤਾਯ ਤਤਿਯਕਮ੍ਮਵਾਚਾਯ ਤਞ੍ਚ ਦੁਕ੍ਕਟਂ ਤੇ ਚ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤਿ, ਸਙ੍ਘਾਦਿਸੇਸੋਯੇਵ ਤਿਟ੍ਠਤਿ. ਅਸਮਨੁਭਾਸਿਯਮਾਨਸ੍ਸ ਚ ਪਟਿਨਿਸ੍ਸਜ੍ਜਨ੍ਤਸ੍ਸ ਚ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੀਲਵਿਪਤ੍ਤਿ, ਭੇਦਾਯ ਪਰਕ੍ਕਮਨਂ, ਧਮ੍ਮਕਮ੍ਮੇਨ ਸਮਨੁਭਾਸਨਂ, ਕਮ੍ਮਵਾਚਾਪਰਿਯੋਸਾਨਂ, ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮਨੁਭਾਸਨਸਮੁਟ੍ਠਾਨਂ, ਅਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.
ਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੧. ਭੇਦਾਨੁਵਤ੍ਤਕਸਿਕ੍ਖਾਪਦਵਣ੍ਣਨਾ
ਏਕਾਦਸਮੇ ਤਸ੍ਸੇਵ ਖੋ ਪਨਾਤਿ ਯੋ ਸਙ੍ਘਭੇਦਾਯ ਪਰਕ੍ਕਮਤਿ, ਤਸ੍ਸੇਵ. ਅਨੁਵਤ੍ਤਕਾਤਿ ਤਸ੍ਸ ਦਿਟ੍ਠਿਂ ਖਨ੍ਤਿਂ ਰੁਚਿਂ ਗਹਣੇਨ ਅਨੁਪਟਿਪਜ੍ਜਨਕਾ. ਵਗ੍ਗਂ ਅਸਾਮਗ੍ਗਿਪਕ੍ਖਿਯਵਚਨਂ ਵਦਨ੍ਤੀਤਿ ਵਗ੍ਗਵਾਦਕਾ. ਯਸ੍ਮਾ ਪਨ ਤਿਣ੍ਣਂ ਉਦ੍ਧਂ ਕਮ੍ਮਾਰਹਾ ਨ ਹੋਨ੍ਤਿ. ਨ ਹਿ ਸਙ੍ਘੋ ਸਙ੍ਘਸ੍ਸ ਕਮ੍ਮਂ ਕਰੋਤਿ, ਤਸ੍ਮਾ ‘‘ਏਕੋ ਵਾ ਦ੍ਵੇ ਵਾ ਤਯੋ ਵਾ’’ਤਿ ਵੁਤ੍ਤਂ. ਜਾਨਾਤਿ ਨੋਤਿ ਅਮ੍ਹਾਕਂ ਛਨ੍ਦਾਦੀਨਿ ਜਾਨਾਤਿ. ਭਾਸਤੀਤਿ ‘‘ਏਵਂ ਕਰੋਮਾ’’ਤਿ ਅਮ੍ਹੇਹਿ ਸਦ੍ਧਿਂ ਭਾਸਤਿ. ਅਮ੍ਹਾਕਮ੍ਪੇਤਂ ਖਮਤੀਤਿ ਯਂ ਸੋ ਕਰੋਤਿ, ਏਤਂ ਅਮ੍ਹਾਕਮ੍ਪਿ ਰੁਚ੍ਚਤਿ. ਸਮੇਤਾਯਸ੍ਮਨ੍ਤਾਨਂ ਸਙ੍ਘੇਨਾਤਿ ਆਯਸ੍ਮਨ੍ਤਾਨਂ ਚਿਤ੍ਤਂ ਸਙ੍ਘੇਨ ਸਦ੍ਧਿਂ ਸਮੇਤੁ ਸਮਾਗਚ੍ਛਤੁ, ਏਕੀਭਾਵਂ ਗਚ੍ਛਤੂਤਿ ਵੁਤ੍ਤਂ ਹੋਤਿ. ਸੇਸਂ ਪਦਤ੍ਥਤੋ ਉਤ੍ਤਾਨਮੇਵ. ਵਿਨਿਚ੍ਛਯਕਥਾਪੇਤ੍ਥ ਦਸਮੇ ਵੁਤ੍ਤਸਦਿਸਾਯੇਵ.
ਅਯਂ ਪਨ ਵਿਸੇਸੋ – ਇਦਂ ਰਾਜਗਹੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਦੇਵਦਤ੍ਤਸ੍ਸ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਅਨੁਵਤ੍ਤਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਙ੍ਗੇਸੁ ਚ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਅਨੁਵਤ੍ਤਨਂ ਦਟ੍ਠਬ੍ਬਨ੍ਤਿ.
ਭੇਦਾਨੁਵਤ੍ਤਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੨. ਦੁਬ੍ਬਚਸਿਕ੍ਖਾਪਦਵਣ੍ਣਨਾ
ਦ੍ਵਾਦਸਮੇ ਦੁਬ੍ਬਚਜਾਤਿਕੋਤਿ ਦੁਬ੍ਬਚਸਭਾਵੋ, ਵਤ੍ਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਉਦ੍ਦੇਸਪਰਿਯਾਪਨ੍ਨੇਸੂਤਿ ਉਦ੍ਦੇਸੇ ਪਰਿਯਾਪਨ੍ਨੇਸੁ ਅਨ੍ਤੋਗਧੇਸੁ, ‘‘ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯਾ’’ਤਿ ਏਵਂ ਸਙ੍ਗਹਿਤਤ੍ਤਾ ਅਨ੍ਤੋ ਪਾਤਿਮੋਕ੍ਖਸ੍ਸ ਵਤ੍ਤਮਾਨੇਸੂਤਿ ਅਤ੍ਥੋ. ਸਹਧਮ੍ਮਿਕਂ ਵੁਚ੍ਚਮਾਨੋਤਿ ਸਹਧਮ੍ਮਿਕੇਨ ਵੁਚ੍ਚਮਾਨੋ, ਕਾਰਣਤ੍ਥੇ ਚੇਤਂ ਉਪਯੋਗਵਚਨਂ. ਪਞ੍ਚਹਿ ਸਹਧਮ੍ਮਿਕੇਹਿ ਸਿਕ੍ਖਿਤਬ੍ਬਤ੍ਤਾ, ਤੇਸਂ ਵਾ ਸਨ੍ਤਕਤ੍ਤਾ ‘‘ਸਹਧਮ੍ਮਿਕ’’ਨ੍ਤਿ ਲਦ੍ਧਨਾਮੇਨ ਬੁਦ੍ਧਪਞ੍ਞਤ੍ਤੇਨ ਸਿਕ੍ਖਾਪਦੇਨ ਵੁਚ੍ਚਮਾਨੋਤਿ ਅਤ੍ਥੋ. ਵਿਰਮਥਾਯਸ੍ਮਨ੍ਤੋ ਮਮ ਵਚਨਾਯਾਤਿ ਯੇਨ ਵਚਨੇਨ ਮਂ ਵਦਥ, ਤਤੋ ਮਮ ਵਚਨਤੋ ਵਿਰਮਥ, ਮਾ ਮਂ ਤਂ ਵਚਨਂ ਵਦਥਾਤਿ ਵੁਤ੍ਤਂ ਹੋਤਿ. ਵਦਤੁ ਸਹ ਧਮ੍ਮੇਨਾਤਿ ਸਹਧਮ੍ਮਿਕੇਨ ਸਿਕ੍ਖਾਪਦੇਨ, ਸਹਧਮ੍ਮੇਨ ਵਾ ਅਞ੍ਞੇਨਪਿ ਪਾਸਾਦਿਕਭਾਵਸਂਵਤ੍ਤਨਿਕੇਨ ਵਚਨੇਨ ਵਦੇਤੁ. ਯਦਿਦਨ੍ਤਿ ਵੁਦ੍ਧਿਕਾਰਣਦਸ੍ਸਨਤ੍ਥੇ ਨਿਪਾਤੋ, ਤੇਨ ਯਂ ਇਦਂ ਅਞ੍ਞਮਞ੍ਞਸ੍ਸ ਹਿਤਵਚਨਂ, ਆਪਤ੍ਤਿਤੋ ਚ ਵੁਟ੍ਠਾਪਨਂ, ਤੇਨ ਅਞ੍ਞਮਞ੍ਞਵਚਨੇਨ ਅਞ੍ਞਮਞ੍ਞਵੁਟ੍ਠਾਪਨੇਨ. ਏਵਂ ਸਂਵਦ੍ਧਾਹਿ ਤਸ੍ਸ ਭਗਵਤੋ ਪਰਿਸਾਤਿ ਏਵਂ ਪਰਿਸਾਯ ਵੁਦ੍ਧਿਕਾਰਣਂ ਦਸ੍ਸਿਤਂ ਹੋਤਿ. ਸੇਸਂ ਉਤ੍ਤਾਨਤ੍ਥਮੇਵ. ਵਿਨਿਚ੍ਛਯਕਥਾਪਿ ਦਸਮੇ ਵੁਤ੍ਤਸਦਿਸਾਯੇਵ.
ਅਯਂ ਪਨ ਵਿਸੇਸੋ – ਇਦਂ ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਅਤ੍ਤਾਨਂ ਅਵਚਨੀਯਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਙ੍ਗੇਸੁ ਚ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਅਵਚਨੀਯਕਰਣਤਾ ਦਟ੍ਠਬ੍ਬਾਤਿ.
ਦੁਬ੍ਬਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ
ਤੇਰਸਮੇ ਗਾਮਂ ਵਾ ਨਿਗਮਂਵਾਤਿ ਏਤ੍ਥ ਨਗਰਮ੍ਪਿ ਗਾਮੇ ਅਨ੍ਤੋਗਧਮੇਵ. ਉਪਨਿਸ੍ਸਾਯ ਵਿਹਰਤੀਤਿਤਤ੍ਥ ਪਟਿਬਦ੍ਧਚੀਵਰਾਦਿਪਚ੍ਚਯਤਾਯ ਤਂ ਨਿਸ੍ਸਾਯ ਵਸਤਿ. ਪੁਪ੍ਫਦਾਨਾਦੀਹਿ ਮਨੁਸ੍ਸਾਨਂ ਸਦ੍ਧਂ ਵਿਨਾਸੇਨ੍ਤੋ ਕੁਲਾਨਿ ਦੂਸੇਤੀਤਿ ਕੁਲਦੂਸਕੋ. ਮਾਲਾਵਚ੍ਛਰੋਪਨਾਦਯੋ ਪਾਪਕਾ ਸਮਾਚਾਰਾ ਅਸ੍ਸਾਤਿ ਪਾਪਸਮਾਚਾਰੋ. ਸੋ ਭਿਕ੍ਖੂਤਿ ਸੋ ਕੁਲਦੂਸਕੋ ਭਿਕ੍ਖੁ. ਆਯਸ੍ਮਾ ਖੋ ਕੁਲਦੂਸਕੋ…ਪੇ… ਅਲਂ ਤੇ ਇਧ ਵਾਸੇਨਾਤਿ ਇਮਿਨਾਸ੍ਸ ਪਬ੍ਬਾਜਨੀਯਕਮ੍ਮਾਰਹਤਂ ਦਸ੍ਸੇਤਿ. ਪਬ੍ਬਾਜਨੀਯਕਮ੍ਮਕਤੋ ਪਨੇਸ ਯਸ੍ਮਿਂ ਗਾਮੇ ਵਾ ਨਿਗਮੇ ਵਾ ਕੁਲਦੂਸਕਕਮ੍ਮਂ ਕਤਂ, ਯਸ੍ਮਿਞ੍ਚ ਵਿਹਾਰੇ ਵਸਤਿ, ਨੇਵ ਤਸ੍ਮਿਂ ਗਾਮੇ ਵਾ ਨਿਗਮੇ ਵਾ ਚਰਿਤੁਂ ਲਭਤਿ, ਨ ਵਿਹਾਰੇ ਵਸਿਤੁਂ. ਏਵਞ੍ਚ ਸੋ ਭਿਕ੍ਖੂਤਿਏਤ੍ਥ ਸੋਤਿ ਪਬ੍ਬਾਜਨੀਯਕਮ੍ਮਕਤੋ ਅਧਿਪ੍ਪੇਤੋ. ਛਨ੍ਦੇਨ ਗਚ੍ਛਨ੍ਤੀਤਿ ਛਨ੍ਦਗਾਮਿਨੋ, ਏਸ ਨਯੋ ਸੇਸੇਸੁ. ਸੋ ਭਿਕ੍ਖੂਤਿ ਸੋ ‘‘ਛਨ੍ਦਗਾਮਿਨੋ’’ਤਿਆਦੀਨਿ ਵਦਮਾਨੋ. ਤਸ੍ਸ ਵਚਨਸ੍ਸ ਪਟਿਨਿਸ੍ਸਗ੍ਗਾਯ ਏਵਂ ਵਚਨੀਯੋ, ਨ ਕੁਲਦੂਸਨਨਿਵਾਰਣਤ੍ਥਾਯ. ਕੁਲਦੂਸਨਕਮ੍ਮੇਨ ਹਿ ਸੋ ਆਪਜ੍ਜਿਤਬ੍ਬਾ ਆਪਤ੍ਤਿਯੋ ਪੁਬ੍ਬੇਵ ਆਪਨ੍ਨੋ, ਏਵਂ ਪਨਸ੍ਸ ਵਿਸੁਮ੍ਪਿ ਸਙ੍ਘਮਜ੍ਝੇਪਿ ਵੁਚ੍ਚਮਾਨਸ੍ਸ ਅਪ੍ਪਟਿਨਿਸ੍ਸਜ੍ਜਤੋ ਅਪਰਂ ਦੁਕ੍ਕਟਂ. ਏਵਞ੍ਚ ਸੋਤਿਆਦਿ ਇਤੋ ਪੁਬ੍ਬੇ ਵੁਤ੍ਤਞ੍ਚ ਅਵੁਤ੍ਤਞ੍ਚ ਸਬ੍ਬਂ ਉਤ੍ਤਾਨਤ੍ਥਮੇਵ. ਵਿਨਿਚ੍ਛਯਕਥਾਪਿ ਦਸਮੇ ਵੁਤ੍ਤਸਦਿਸਾਯੇਵ.
ਅਯਂ ਪਨ ਵਿਸੇਸੋ – ਇਦਂ ਸਾਵਤ੍ਥਿਯਂ ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਆਰਬ੍ਭ ਛਨ੍ਦਗਾਮਿਤਾਦੀਹਿ ਪਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਙ੍ਗੇਸੁ ਚ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਛਨ੍ਦਾਦੀਹਿ ਪਾਪਨਂ ਦਟ੍ਠਬ੍ਬਨ੍ਤਿ.
ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਗਮਨਵਣ੍ਣਨਾ
ਉਦ੍ਦਿਟ੍ਠਾ ਖੋ…ਪੇ… ਏਵਮੇਤਂ ਧਾਰਯਾਮੀਤਿਏਤ੍ਥ ਪਠਮਂ ਆਪਤ੍ਤਿ ਏਤੇਸਨ੍ਤਿ ਪਠਮਾਪਤ੍ਤਿਕਾ, ਪਠਮਂ ਵੀਤਿਕ੍ਕਮਨਕ੍ਖਣੇਯੇਵ ਆਪਜ੍ਜਿਤਬ੍ਬਾਤਿ ਅਤ੍ਥੋ. ਇਤਰੇ ਪਨ ਯਥਾ ਤਤਿਯੇ ਚ ਚਤੁਤ੍ਥੇ ਚ ਦਿਵਸੇ ਹੋਤੀਤਿ ਏਤ੍ਥ ‘‘ਤਤਿਯਕੋ, ਚਤੁਤ੍ਥਕੋ’’ਤਿ ਵੁਚ੍ਚਤਿ, ਏਵਂ ਯਾਵਤਤਿਯੇ ਸਮਨੁਭਾਸਨਕਮ੍ਮੇ ਹੋਨ੍ਤੀਤਿ ਯਾਵਤਤਿਯਕਾਤਿ ਵੇਦਿਤਬ੍ਬਾ. ਯਾਵਤੀਹਨ੍ਤਿ ਯਤ੍ਤਕਾਨਿ ਅਹਾਨਿ. ਜਾਨਂ ਪਟਿਚ੍ਛਾਦੇਤੀਤਿ ਜਾਨਨ੍ਤੋ ਪਟਿਚ੍ਛਾਦੇਤਿ. ਤਤ੍ਥਾਯਂ ਪਟਿਚ੍ਛਾਦਨਲਕ੍ਖਣਸ੍ਸ ਮਾਤਿਕਾ – ਆਪਤ੍ਤਿ ਚ ਹੋਤਿ, ਆਪਤ੍ਤਿਸਞ੍ਞੀ ਚ, ਪਕਤਤ੍ਤੋ ਚ ਹੋਤਿ, ਪਕਤਤ੍ਤਸਞ੍ਞੀ ਚ, ਅਨਨ੍ਤਰਾਯਿਕੋ ਚ ਹੋਤਿ, ਅਨਨ੍ਤਰਾਯਿਕਸਞ੍ਞੀ ਚ, ਪਹੁ ਚ ਹੋਤਿ, ਪਹੁਸਞ੍ਞੀ ਚ, ਛਾਦੇਤੁਕਾਮੋ ਚ ਹੋਤਿ, ਛਾਦੇਤਿ ਚਾਤਿ. ਤਤ੍ਥ ਆਪਤ੍ਤਿ ਚ ਹੋਤਿ, ਆਪਤ੍ਤਿਸਞ੍ਞੀ ਚਾਤਿ ਯਂ ਆਪਤ੍ਤਿਂ ਆਪਨ੍ਨੋ, ਸਾ ਤੇਰਸਨ੍ਨਂ ਅਞ੍ਞਤਰਾ ਹੋਤਿ, ਸੋਪਿ ਚ ਤਤ੍ਥ ਵਤ੍ਥੁਵਸੇਨ ਵਾ ‘‘ਇਦਂ ਭਿਕ੍ਖੂਨਂ ਨ ਵਟ੍ਟਤੀ’’ਤਿ ਨਾਮਮਤ੍ਤਵਸੇਨ ਵਾ ‘‘ਅਯਂ ਇਤ੍ਥਨ੍ਨਾਮਾ ਆਪਤ੍ਤੀ’’ਤਿ ਆਪਤ੍ਤਿਸਞ੍ਞੀਯੇਵ ਹੁਤ੍ਵਾ ‘‘ਨ ਦਾਨਿ ਨਂ ਕਸ੍ਸਚਿ ਆਰੋਚੇਸ੍ਸਾਮੀ’’ਤਿ ਏਵਂ ਛਾਦੇਤੁਕਾਮੋਵ ਧੁਰਂ ਨਿਕ੍ਖਿਪਿਤ੍ਵਾ ਅਰੁਣਂ ਉਟ੍ਠਾਪੇਤਿ, ਛਨ੍ਨਾ ਹੋਤਿ ਆਪਤ੍ਤਿ. ਸਚੇ ਪਨੇਤ੍ਥ ਅਨਾਪਤ੍ਤਿਸਞ੍ਞੀ ਵਾ ਹੋਤਿ, ਅਞ੍ਞਾਪਤ੍ਤਿਕ੍ਖਨ੍ਧਸਞ੍ਞੀ ਵਾ, ਵੇਮਤਿਕੋ ਵਾ, ਅਚ੍ਛਨ੍ਨਾਵ ਹੋਤਿ. ਪਕਤਤ੍ਤੋਤਿ ਅਨੁਕ੍ਖਿਤ੍ਤੋ ਸਮਾਨਸਂਵਾਸਕੋ. ਸੋ ਚੇ ਪਕਤਤ੍ਤਸਞ੍ਞੀ ਹੁਤ੍ਵਾ ਵੁਤ੍ਤਨਯੇਨੇਵ ਛਾਦੇਤਿ, ਛਨ੍ਨਾ ਹੋਤਿ. ਅਨਨ੍ਤਰਾਯਿਕੋਤਿ ਯਸ੍ਸ ਦਸਸੁ ਰਾਜਚੋਰਅਗ੍ਗਿਉਦਕਮਨੁਸ੍ਸਅਮਨੁਸ੍ਸਵਾਲ਼ਸਰੀਸਪਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ ਏਕੋਪਿ ਨਤ੍ਥਿ, ਸੋ ਚੇ ਅਨਨ੍ਤਰਾਯਿਕਸਞ੍ਞੀ ਛਾਦੇਤਿ, ਛਨ੍ਨਾ ਹੋਤਿ. ਪਹੂਤਿ ਯੋ ਸਕ੍ਕੋਤਿ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤੁਞ੍ਚੇਵ ਆਰੋਚੇਤੁਞ੍ਚ, ਸੋ ਚੇ ਪਹੁਸਞ੍ਞੀ ਹੁਤ੍ਵਾ ਛਾਦੇਤਿ, ਛਨ੍ਨਾ ਹੋਤਿ. ਛਾਦੇਤੁਕਾਮੋ ਚ ਹੋਤਿ, ਛਾਦੇਤਿ ਚਾਤਿਇਦਂ ਉਤ੍ਤਾਨਮੇਵ. ਸਚੇਪਿ ਹਿ ਸੋ ਸਭਾਗਂ ਦਿਸ੍ਵਾ ‘‘ਅਯਂ ਮੇ ਉਪਜ੍ਝਾਯੋ ਵਾ ਆਚਰਿਯੋ ਵਾ’’ਤਿ ਲਜ੍ਜਾਯ ਨਾਰੋਚੇਤਿ, ਛਨ੍ਨਾਵ ਹੋਤਿ. ਉਪਜ੍ਝਾਯਾਦਿਭਾਵੋ ਹਿ ਇਧ ਅਪ੍ਪਮਾਣਂ, ਸਭਾਗਮਤ੍ਤਮੇਵ ਪਮਾਣਂ. ਅਯਂ ‘‘ਜਾਨਂ ਪਟਿਚ੍ਛਾਦੇਤੀ’’ਤਿਪਦਸ੍ਸ ਸਙ੍ਖੇਪਤੋ ਅਤ੍ਥਵਿਨਿਚ੍ਛਯੋ.
ਤਾਵਤੀਹਨ੍ਤਿ ਤਤ੍ਤਕਾਨਿ ਅਹਾਨਿ, ਪਟਿਚ੍ਛਾਦਿਤਦਿਵਸਤੋ ਪਟ੍ਠਾਯ ਯਾਵ ਆਰੋਚਿਤਦਿਵਸੋ, ਤਾਵ ਦਿਵਸਪਕ੍ਖਮਾਸਸਂਵਚ੍ਛਰਵਸੇਨ ਯਤ੍ਤਕੋ ਕਾਲੋ ਅਤਿਕ੍ਕਨ੍ਤੋ, ਤਤ੍ਤਕਂ ਕਾਲਨ੍ਤਿ ਅਤ੍ਥੋ. ਅਕਾਮਾ ਪਰਿਵਤ੍ਥਬ੍ਬਨ੍ਤਿ ਨ ਕਾਮੇਨ ਨ ਵਸੇਨ, ਅਥ ਖੋ ਅਕਾਮੇਨ ਅਵਸੇਨ ਪਰਿਵਾਸਂ ਸਮਾਦਾਯ ਵਤ੍ਥਬ੍ਬਂ. ਤਤ੍ਥ ਪਟਿਚ੍ਛਨ੍ਨਪਰਿਵਾਸੋ ਸੁਦ੍ਧਨ੍ਤਪਰਿਵਾਸੋ ਸਮੋਧਾਨਪਰਿਵਾਸੋ ਚਾਤਿ ਤਿਵਿਧੋ ਪਰਿਵਾਸੋ. ਤਤ੍ਥ ਪਟਿਚ੍ਛਨ੍ਨਪਰਿਵਾਸੋ ਤਾਵ ਯਥਾਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬੋ. ਕਸ੍ਸਚਿ ਹਿ ਏਕਾਹਪ੍ਪਟਿਚ੍ਛਨ੍ਨਾ ਆਪਤ੍ਤਿ ਹੋਤਿ, ਕਸ੍ਸਚਿ ਦ੍ਵੀਹਾਦਿਪ੍ਪਟਿਚ੍ਛਨ੍ਨਾ. ਕਸ੍ਸਚਿ ਏਕਾ ਆਪਤ੍ਤਿ ਹੋਤਿ, ਕਸ੍ਸਚਿ ਦ੍ਵੇ ਵਾ ਤਿਸ੍ਸੋ ਵਾ ਤਦੁਤ੍ਤਰਿ ਵਾ. ਤਸ੍ਮਾ ਪਟਿਚ੍ਛਨ੍ਨਪਰਿਵਾਸਂ ਦੇਨ੍ਤੇਨ ਪਠਮਮੇਵ ਵੁਤ੍ਤਨਯੇਨ ਪਟਿਚ੍ਛਨ੍ਨਭਾਵਂ ਞਤ੍ਵਾ ਤਤੋ ਪਟਿਚ੍ਛਨ੍ਨਦਿਵਸੇ ਚ ਆਪਤ੍ਤਿਯੋ ਚ ਸਲ੍ਲਕ੍ਖੇਤ੍ਵਾ ਸਚੇ ਏਕਾ ਏਕਾਹਪ੍ਪਟਿਚ੍ਛਨ੍ਨਾ ਹੋਤਿ, ‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਏਕਾਹਪ੍ਪਟਿਚ੍ਛਨ੍ਨ’’ਨ੍ਤਿ ਏਵਂ ਪਰਿਵਾਸਂ ਯਾਚਾਪੇਤ੍ਵਾ ਖਨ੍ਧਕੇ (ਚੂਲ਼ਵ. ੯੮) ਆਗਤਨਯੇਨ ਕਮ੍ਮਵਾਚਂ ਵਤ੍ਵਾ ਪਰਿਵਾਸੋ ਦਾਤਬ੍ਬੋ. ਅਥ ਦ੍ਵੀਹਤੀਹਾਦਿਪ੍ਪਟਿਚ੍ਛਨ੍ਨਾ ਹੋਤਿ, ਦ੍ਵੀਹਪ੍ਪਟਿਚ੍ਛਨ੍ਨਂ ਤੀਹਪ੍ਪਟਿਚ੍ਛਨ੍ਨਂ ਚਤੂਹਪ੍ਪਟਿਚ੍ਛਨ੍ਨਂ ਪਞ੍ਚਾਹਪ੍ਪਟਿਚ੍ਛਨ੍ਨਂ…ਪੇ… ਚੁਦ੍ਦਸਾਹਪ੍ਪਟਿਚ੍ਛਨ੍ਨਨ੍ਤਿਏਵਂ ਯਾਵ ਚੁਦ੍ਦਸਦਿਵਸਾਨਿ ਦਿਵਸਵਸੇਨ ਯੋਜਨਾ ਕਾਤਬ੍ਬਾ, ਪਞ੍ਚਦਸਦਿਵਸਪ੍ਪਟਿਚ੍ਛਨ੍ਨਾਯਂ ‘‘ਪਕ੍ਖਪ੍ਪਟਿਚ੍ਛਨ੍ਨ’’ਨ੍ਤਿ ਯੋਜਨਾ ਕਾਤਬ੍ਬਾ. ਤਤੋ ਯਾਵ ਏਕੂਨਤਿਂਸਤਿਮੋ ਦਿਵਸੋ, ਤਾਵ ‘‘ਅਤਿਰੇਕਪਕ੍ਖਪ੍ਪਟਿਚ੍ਛਨ੍ਨ’’ਨ੍ਤਿ, ਤਤੋ ਮਾਸਪ੍ਪਟਿਚ੍ਛਨ੍ਨਂ ਅਤਿਰੇਕਮਾਸਪ੍ਪਟਿਚ੍ਛਨ੍ਨਂ ਦ੍ਵੇਮਾਸਪ੍ਪਟਿਚ੍ਛਨ੍ਨਂ ਅਤਿਰੇਕਦ੍ਵੇਮਾਸਪ੍ਪਟਿਚ੍ਛਨ੍ਨਂ ਤੇਮਾਸਪ੍ਪਟਿਚ੍ਛਨ੍ਨਂ…ਪੇ… ਅਤਿਰੇਕਏਕਾਦਸਮਾਸਪ੍ਪਟਿਚ੍ਛਨ੍ਨਨ੍ਤਿ ਏਵਂ ਯੋਜਨਾ ਕਾਤਬ੍ਬਾ. ਸਂਵਚ੍ਛਰੇ ਪੁਣ੍ਣੇ ‘‘ਏਕਸਂਵਚ੍ਛਰਪ੍ਪਟਿਚ੍ਛਨ੍ਨ’’ਨ੍ਤਿ, ਤਤੋ ਪਰਂ ਅਤਿਰੇਕਸਂਵਚ੍ਛਰਂ ਦ੍ਵੇਸਂਵਚ੍ਛਰਂ ਏਵਂ ਯਾਵ ਸਟ੍ਠਿਸਂਵਚ੍ਛਰਅਤਿਰੇਕਸਟ੍ਠਿਸਂਵਚ੍ਛਰਪ੍ਪਟਿਚ੍ਛਨ੍ਨਨ੍ਤਿ, ਤਤੋ ਵਾ ਭਿਯ੍ਯੋਪਿ ਵਤ੍ਵਾ ਯੋਜਨਾ ਕਾਤਬ੍ਬਾ.
ਸਚੇ ਪਨ ਦ੍ਵੇ ਤਿਸ੍ਸੋ ਤਦੁਤ੍ਤਰਿ ਵਾ ਆਪਤ੍ਤਿਯੋ ਹੋਨ੍ਤਿ, ਯਥਾ ‘‘ਏਕਂ ਆਪਤ੍ਤਿ’’ਨ੍ਤਿ ਵੁਤ੍ਤਂ, ਏਵਂ ‘‘ਦ੍ਵੇ ਆਪਤ੍ਤਿਯੋ, ਤਿਸ੍ਸੋ ਆਪਤ੍ਤਿਯੋ’’ਤਿ ਵਤ੍ਤਬ੍ਬਂ. ਤਤੋ ਪਰਂ ਪਨ ਸਤਂ ਵਾ ਹੋਤੁ, ਸਹਸ੍ਸਂ ਵਾ, ‘‘ਸਮ੍ਬਹੁਲਾ’’ਤਿ ਵਤ੍ਤੁਂ ਵਟ੍ਟਤਿ. ਨਾਨਾਵਤ੍ਥੁਕਾਸੁਪਿ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਂ ਸੁਕ੍ਕਵਿਸ੍ਸਟ੍ਠਿਂ ਏਕਂ ਕਾਯਸਂਸਗ੍ਗਂ ਏਕਂ ਦੁਟ੍ਠੁਲ੍ਲਵਾਚਂ ਏਕਂ ਅਤ੍ਤਕਾਮਂ ਏਕਂ ਸਞ੍ਚਰਿਤ੍ਤਂ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿ ਏਵਂ ਗਣਨਵਸੇਨ ਵਾ, ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿ ਏਵਂ ਵਤ੍ਥੁਕਿਤ੍ਤਨਵਸੇਨ ਵਾ, ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿ ਏਵਂ ਨਾਮਮਤ੍ਤਵਸੇਨ ਵਾ ਯੋਜਨਾ ਕਾਤਬ੍ਬਾ. ਤਤ੍ਥ ਨਾਮਂ ਦੁਵਿਧਂ ਸਜਾਤਿਸਾਧਾਰਣਂ ਸਬ੍ਬਸਾਧਾਰਣਞ੍ਚ, ਤਤ੍ਥ ਸਙ੍ਘਾਦਿਸੇਸੋਤਿ ਸਜਾਤਿਸਾਧਾਰਣਂ, ਆਪਤ੍ਤੀਤਿ ਸਬ੍ਬਸਾਧਾਰਣਂ, ਤਸ੍ਮਾ ‘‘ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿ ਏਵਂ ਸਬ੍ਬਸਾਧਾਰਣਨਾਮਵਸੇਨਾਪਿ ਵਤ੍ਤੁਂ ਵਟ੍ਟਤਿ. ਇਦਞ੍ਹਿ ਪਰਿਵਾਸਾਦਿਵਿਨਯਕਮ੍ਮਂ ਵਤ੍ਥੁਵਸੇਨ ਗੋਤ੍ਤਵਸੇਨ ਨਾਮਵਸੇਨ ਆਪਤ੍ਤਿਵਸੇਨ ਚ ਕਾਤੁਂ ਵਟ੍ਟਤਿਯੇਵ. ਤਤ੍ਥ ਸੁਕ੍ਕਵਿਸ੍ਸਟ੍ਠੀਤਿ ਵਤ੍ਥੁ ਚੇਵ ਗੋਤ੍ਤਞ੍ਚ, ਸਙ੍ਘਾਦਿਸੇਸੋਤਿ ਨਾਮਞ੍ਚੇਵ ਆਪਤ੍ਤਿ ਚ, ਤਤ੍ਥ ‘‘ਸੁਕ੍ਕਵਿਸ੍ਸਟ੍ਠਿਂ ਕਾਯਸਂਸਗ੍ਗ’’ਨ੍ਤਿਆਦਿਵਚਨੇਨਾਪਿ ‘‘ਨਾਨਾਵਤ੍ਥੁਕਾਯੋ’’ਤਿਵਚਨੇਨਾਪਿ ਵਤ੍ਥੁ ਚੇਵ ਗੋਤ੍ਤਞ੍ਚ ਗਹਿਤਂ ਹੋਤਿ, ‘‘ਸਙ੍ਘਾਦਿਸੇਸੋ’’ਤਿਵਚਨੇਨਾਪਿ ‘‘ਆਪਤ੍ਤਿਯੋ’’ਤਿਵਚਨੇਨਾਪਿ ਨਾਮਞ੍ਚੇਵ ਆਪਤ੍ਤਿ ਚ ਗਹਿਤਾ ਹੋਤਿ, ਤਸ੍ਮਾ ਏਤੇਸੁ ਯਸ੍ਸ ਕਸ੍ਸਚਿ ਵਸੇਨ ਕਮ੍ਮਵਾਚਾ ਕਾਤਬ੍ਬਾ.
ਕਮ੍ਮਵਾਚਾਪਰਿਯੋਸਾਨੇ ਚ ਸਚੇ ਅਪ੍ਪਭਿਕ੍ਖੁਕੋ ਆਵਾਸੋ ਹੋਤਿ, ਸਕ੍ਕਾ ਰਤ੍ਤਿਚ੍ਛੇਦਂ ਅਨਾਪਜ੍ਜਨ੍ਤੇਨ ਵਸਿਤੁਂ, ਤਤ੍ਥੇਵ ‘‘ਪਰਿਵਾਸਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਂ ਸਮਾਦਾਤਬ੍ਬਂ, ਸਮਾਦਿਯਿਤ੍ਵਾ ਤਤ੍ਥੇਵ ਸਙ੍ਘਸ੍ਸ ਆਰੋਚੇਤ੍ਵਾ ਪੁਨ ਆਗਤਾਗਤਾਨਂ ਭਿਕ੍ਖੂਨਂ ਆਰੋਚੇਨ੍ਤੇਨ ਵਤ੍ਤਭੇਦਞ੍ਚ ਰਤ੍ਤਿਚ੍ਛੇਦਞ੍ਚ ਅਕਤ੍ਵਾ ਪਰਿਵਸਿਤਬ੍ਬਂ. ਸਚੇ ਨ ਸਕ੍ਕਾ ਹੋਤਿ ਪਰਿਵਾਸਂ ਸੋਧੇਤੁਂ, ਨਿਕ੍ਖਿਤ੍ਤਵਤ੍ਤੇਨ ਵਸਿਤੁਕਾਮੋ ਹੋਤਿ, ਤਤ੍ਥੇਵ ਸਙ੍ਘਮਜ੍ਝੇ, ਏਕਪੁਗ੍ਗਲਸ੍ਸ ਵਾ ਸਨ੍ਤਿਕੇ ‘‘ਪਰਿਵਾਸਂ ਨਿਕ੍ਖਿਪਾਮਿ, ਵਤ੍ਤਂ ਨਿਕ੍ਖਿਪਾਮੀ’’ਤਿ ਪਰਿਵਾਸੋ ਨਿਕ੍ਖਿਪਿਤਬ੍ਬੋ, ਏਕਪਦੇਨਾਪਿ ਚੇਤ੍ਥ ਨਿਕ੍ਖਿਤ੍ਤੋ ਹੋਤਿ ਪਰਿਵਾਸੋ, ਦ੍ਵੀਹਿ ਪਨ ਸੁਨਿਕ੍ਖਿਤ੍ਤੋਯੇਵ, ਸਮਾਦਾਨੇਪਿ ਏਸੇਵ ਨਯੋ. ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ, ਅਥਾਨੇਨ ਪਚ੍ਚੂਸਸਮਯੇ ਏਕੇਨ ਭਿਕ੍ਖੁਨਾ ਸਦ੍ਧਿਂ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਤੋ ਓਕ੍ਕਮ੍ਮ ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤ੍ਵਾ ਅਨ੍ਤੋਅਰੁਣੇਯੇਵ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਂ. ਯਮ੍ਪਿ ਅਞ੍ਞਂ ਭਿਕ੍ਖੁਂ ਪਸ੍ਸਤਿ, ਤਸ੍ਸਾਪਿ ਆਰੋਚੇਤਬ੍ਬਮੇਵ. ਅਰੁਣੇ ਉਟ੍ਠਿਤੇ ਤਸ੍ਸ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤ੍ਵਾ ਵਿਹਾਰਂ ਗਨ੍ਤਬ੍ਬਂ. ਸਚੇ ਸੋ ਪੁਰੇ ਅਰੁਣੇਯੇਵ ਕੇਨਚਿ ਕਰਣੀਯੇਨ ਗਤੋ, ਵਿਹਾਰਂ ਗਨ੍ਤ੍ਵਾ ਯਂ ਸਬ੍ਬਪਠਮਂ ਭਿਕ੍ਖੁਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਏਵਂ ਸਲ੍ਲਕ੍ਖੇਤ੍ਵਾ ਯਾਵ ਰਤ੍ਤਿਯੋ ਪੂਰੇਨ੍ਤਿ, ਤਾਵ ਪਰਿਵਤ੍ਥਬ੍ਬਂ, ਅਯਂ ਸਙ੍ਖੇਪਤੋ ਪਟਿਚ੍ਛਨ੍ਨਪਰਿਵਾਸਵਿਨਿਚ੍ਛਯੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ (ਚੂਲ਼ਵ. ਅਟ੍ਠ. ੯੭) ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਇਤਰੇਸੁ ਪਨ ਦ੍ਵੀਸੁ ‘‘ਆਪਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਰਤ੍ਤਿਪਰਿਯਨ੍ਤਂ ਨ ਜਾਨਾਤੀ’’ਤਿ (ਚੂਲ਼ਵ. ੧੫੭) ਇਮਸ੍ਮਿਂ ਵਤ੍ਥੁਸ੍ਮਿਂ ਖਨ੍ਧਕੇ ਅਨੁਞ੍ਞਾਤੋ ਸੁਦ੍ਧਨ੍ਤਪਰਿਵਾਸੋ ਨਾਮ, ਸੋ ਦੁਵਿਧੋ ਚੂਲ਼ਸੁਦ੍ਧਨ੍ਤੋ ਮਹਾਸੁਦ੍ਧਨ੍ਤੋਤਿ, ਦੁਵਿਧੋਪਿ ਚੇਸ ਰਤ੍ਤਿਪਰਿਚ੍ਛੇਦਂ ਸਕਲਂ ਵਾ ਏਕਚ੍ਚਂ ਵਾ ਅਜਾਨਨ੍ਤਸ੍ਸ ਚ ਅਸ੍ਸਰਨ੍ਤਸ੍ਸ ਚ ਤਤ੍ਥ ਵੇਮਤਿਕਸ੍ਸ ਚ ਦਾਤਬ੍ਬੋ. ਆਪਤ੍ਤਿਪਰਿਯਨ੍ਤਂ ਪਨ ‘‘ਏਤ੍ਤਿਕਾ ਅਹਂ ਆਪਤ੍ਤਿਯੋ ਆਪਨ੍ਨੋ’’ਤਿ ਜਾਨਾਤੁ ਵਾ, ਮਾ ਵਾ, ਅਕਾਰਣਮੇਤਂ. ਤਸ੍ਸ ਦਾਨਵਿਧਿ ਖਨ੍ਧਕੇ ਆਗਤੋ, ਵਿਨਿਚ੍ਛਯਕਥਾ ਪਨ ਵਿਤ੍ਥਾਰਤੋ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੧੦੨) ਵੁਤ੍ਤਾ. ਇਤਰੋ ਪਨ ਸਮੋਧਾਨਪਰਿਵਾਸੋ ਨਾਮ, ਸੋ ਤਿਵਿਧੋ ਹੋਤਿ ਓਧਾਨਸਮੋਧਾਨੋ ਅਗ੍ਘਸਮੋਧਾਨੋ ਮਿਸ੍ਸਕਸਮੋਧਾਨੋਤਿ. ਤਤ੍ਥ ਓਧਾਨਸਮੋਧਾਨੋ ਨਾਮ ਅਨ੍ਤਰਾਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਾਦੇਨ੍ਤਸ੍ਸ ਪਰਿਵੁਤ੍ਥਦਿਵਸੇ ਓਧੁਨਿਤ੍ਵਾ ਮਕ੍ਖੇਤ੍ਵਾ ਪੁਰਿਮਾਯ ਆਪਤ੍ਤਿਯਾ ਮੂਲਦਿਵਸਪਰਿਚ੍ਛੇਦੇ ਪਚ੍ਛਾ ਆਪਨ੍ਨਂ ਆਪਤ੍ਤਿਂ ਸਮੋਦਹਿਤ੍ਵਾ ਦਾਤਬ੍ਬਪਰਿਵਾਸੋ ਵੁਚ੍ਚਤਿ. ਅਗ੍ਘਸਮੋਧਾਨੋ ਨਾਮ ਸਮ੍ਬਹੁਲਾਸੁ ਆਪਤ੍ਤੀਸੁ ਯਾ ਏਕਾ ਵਾ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਆਪਤ੍ਤਿਯੋ ਸਬ੍ਬਚਿਰਪ੍ਪਟਿਚ੍ਛਨ੍ਨਾਯੋ, ਤਾਸਂ ਅਗ੍ਘੇਨ ਸਮੋਧਾਯ ਤਾਸਂ ਰਤ੍ਤਿਪਰਿਚ੍ਛੇਦਵਸੇਨ ਅਵਸੇਸਾਨਂ ਊਨਤਰਪ੍ਪਟਿਚ੍ਛਨ੍ਨਾਨਂ ਆਪਤ੍ਤੀਨਂ ਦਾਤਬ੍ਬਪਰਿਵਾਸੋ ਵੁਚ੍ਚਤਿ. ਮਿਸ੍ਸਕਸਮੋਧਾਨੋ ਨਾਮ ਨਾਨਾਵਤ੍ਥੁਕਾਯੋ ਆਪਤ੍ਤਿਯੋ ਏਕਤੋ ਕਤ੍ਵਾ ਦਾਤਬ੍ਬਪਰਿਵਾਸੋ ਵੁਚ੍ਚਤਿ, ਅਯਂ ਤਿਵਿਧੇਪਿ ਸਮੋਧਾਨਪਰਿਵਾਸੇ ਸਙ੍ਖੇਪਕਥਾ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੧੦੨) ਵੁਤ੍ਤੋ, ਇਦਂ ‘‘ਪਰਿਵਤ੍ਥਬ੍ਬ’’ਨ੍ਤਿ ਪਦਸ੍ਸ ਵਿਨਿਚ੍ਛਯਕਥਾਮੁਖਂ.
ਉਤ੍ਤਰਿ ਛਾਰਤ੍ਤਨ੍ਤਿ ਪਰਿਵਾਸਤੋ ਉਤ੍ਤਰਿ ਛ ਰਤ੍ਤਿਯੋ. ਭਿਕ੍ਖੁਮਾਨਤ੍ਤਾਯਾਤਿ ਭਿਕ੍ਖੂਨਂ ਮਾਨਭਾਵਾਯ, ਆਰਾਧਨਤ੍ਥਾਯਾਤਿ ਵੁਤ੍ਤਂ ਹੋਤਿ. ਪਟਿਪਜ੍ਜਿਤਬ੍ਬਨ੍ਤਿ ਵਤ੍ਤਿਤਬ੍ਬਂ. ਭਿਕ੍ਖੁਮਾਨਤ੍ਤਞ੍ਚ ਪਨੇਤਂ ਪਟਿਚ੍ਛਨ੍ਨਾਪਟਿਚ੍ਛਨ੍ਨਵਸੇਨ ਦੁਵਿਧਂ. ਤਤ੍ਥ ਯਸ੍ਸ ਅਪ੍ਪਟਿਚ੍ਛਨ੍ਨਾਪਤ੍ਤਿ ਹੋਤਿ, ਤਸ੍ਸ ਪਰਿਵਾਸਂ ਅਦਤ੍ਵਾ ਮਾਨਤ੍ਤਮੇਵ ਦਾਤਬ੍ਬਂ, ਇਦਂ ਅਪ੍ਪਟਿਚ੍ਛਨ੍ਨਮਾਨਤ੍ਤਂ. ਯਸ੍ਸ ਪਟਿਚ੍ਛਨ੍ਨਾ ਹੋਤਿ, ਤਸ੍ਸ ਪਰਿਵਾਸਪਰਿਯੋਸਾਨੇ ਦਾਤਬ੍ਬਂ ਮਾਨਤ੍ਤਂ ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵੁਚ੍ਚਤਿ, ਇਦਂ ਇਧ ਅਧਿਪ੍ਪੇਤਂ. ਉਭਿਨ੍ਨਮ੍ਪਿ ਪਨੇਤੇਸਂ ਦਾਨਵਿਧਿ ਵਿਨਿਚ੍ਛਯਕਥਾ ਚ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੧੦੨) ਵੁਤ੍ਤਨਯੇਨ ਵੇਦਿਤਬ੍ਬਾ, ਅਯਂ ਪਨੇਤ੍ਥ ਸਙ੍ਖੇਪੋ. ਸਚੇ ਅਯਂ ਵਤ੍ਤਂ ਨਿਕ੍ਖਿਪਿਤ੍ਵਾ ਪਚ੍ਚੂਸਸਮਯੇ ਸਮਾਦਾਤੁਂ ਗਚ੍ਛਤਿ, ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੂਹਿ ਭਿਕ੍ਖੂਹਿ ਸਦ੍ਧਿਂ ਪਰਿਵਾਸੇ ਵੁਤ੍ਤਪ੍ਪਕਾਰਂ ਪਦੇਸਂ ਗਨ੍ਤ੍ਵਾ ‘‘ਮਾਨਤ੍ਤਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਸਮਾਦਿਯਿਤ੍ਵਾ ਨੇਸਂ ਆਰੋਚੇਤ੍ਵਾ ਤਤੋ ਤੇਸੁ ਗਤੇਸੁ ਵਾ ਅਗਤੇਸੁ ਵਾ ਪੁਰਿਮਨਯੇਨ ਪਟਿਪਜ੍ਜਿਤਬ੍ਬਂ. ਯਤ੍ਥ ਸਿਯਾ ਵੀਸਤਿਗਣੋਤਿ ਏਤ੍ਥ ਵੀਸਤਿਸਙ੍ਘੋ ਗਣੋ ਅਸ੍ਸਾਤਿ ਵੀਸਤਿਗਣੋ. ਤਤ੍ਰਾਤਿ ਯਤ੍ਰ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਵੀਸਤਿਗਣੋ ਭਿਕ੍ਖੁਸਙ੍ਘੋ ਅਤ੍ਥਿ, ਤਤ੍ਥ. ਅਬ੍ਭੇਤਬ੍ਬੋਤਿ ਅਭਿਏਤਬ੍ਬੋ, ਸਮ੍ਪਟਿਚ੍ਛਿਤਬ੍ਬੋ, ਅਬ੍ਭਾਨਕਮ੍ਮਵਸੇਨ ਓਸਾਰੇਤਬ੍ਬੋਤਿ ਵੁਤ੍ਤਂ ਹੋਤਿ. ਅਵ੍ਹਾਤਬ੍ਬੋਤਿ ਵਾ ਅਤ੍ਥੋ. ਅਬ੍ਭਾਨਕਮ੍ਮਂ ਪਨ ਪਾਲ਼ਿਵਸੇਨ ਖਨ੍ਧਕੇ (ਚੂਲ਼ਵ. ੧੦੦ ਆਦਯੋ) ਵਿਨਿਚ੍ਛਯਵਸੇਨ ਸਮਨ੍ਤਪਾਸਾਦਿਕਾਯਂ ਵੁਤ੍ਤਂ. ਅਨਬ੍ਭਿਤੋਤਿ ਨ ਅਬ੍ਭਿਤੋ ਅਸਮ੍ਪਟਿਚ੍ਛਿਤੋ, ਅਕਤਬ੍ਭਾਨਕਮ੍ਮੋਤਿ ਵੁਤ੍ਤਂ ਹੋਤਿ. ਅਨਵ੍ਹਾਤੋਤਿ ਵਾ ਅਤ੍ਥੋ. ਤੇ ਚ ਭਿਕ੍ਖੂ ਗਾਰਯ੍ਹਾਤਿ ਯੇ ਊਨਭਾਵਂ ਞਤ੍ਵਾ ਅਬ੍ਭੇਨ੍ਤਿ, ਤੇ ਭਿਕ੍ਖੂ ਚ ਗਰਹਿਤਬ੍ਬਾ, ਸਾਤਿਸਾਰਾ ਸਦੋਸਾ ਦੁਕ੍ਕਟਂ ਆਪਜ੍ਜਨ੍ਤੀਤਿ ਅਤ੍ਥੋ. ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ ਲੋਕੁਤ੍ਤਰਧਮ੍ਮਂ ਅਨੁਗਤਾ ਓਵਾਦਾਨੁਸਾਸਨੀ ਸਾਮੀਚਿ ਧਮ੍ਮਤਾ. ਸੇਸਮੇਤ੍ਥ ਵੁਤ੍ਤਨਯਮੇਵਾਤਿ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਸਙ੍ਘਾਦਿਸੇਸਵਣ੍ਣਨਾ ਨਿਟ੍ਠਿਤਾ.