੮. ਆਵਸਥਵਿਹਾਰਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਆਵਸਥਨ੍ਤਿ ਕਵਾਟਬਦ੍ਧਵਿਹਾਰਂ. ਅਨਿਸ੍ਸਜ੍ਜਿਤ੍ਵਾਤਿ ਰਕ੍ਖਣਤ੍ਥਾਯ ਅਦਤ੍ਵਾ, ‘‘ਇਦਂ ਜਗ੍ਗੇਯ੍ਯਾਸੀ’’ਤਿ ਏਵਂ ਅਨਾਪੁਚ੍ਛਿਤ੍ਵਾਤਿ ਅਤ੍ਥੋ. ਚਾਰਿਕਂ ਪਕ੍ਕਮੇਯ੍ਯ ਪਾਚਿਤ੍ਤਿਯਨ੍ਤਿ ਏਤ੍ਥ ਸਕਗਾਮਤੋ ਅਞ੍ਞਂ ਗਾਮਂ ਏਕਰਤ੍ਤਿਵਾਸਤ੍ਥਾਯਪਿ ਪਕ੍ਕਮਨ੍ਤਿਯਾ ਪਰਿਕ੍ਖਿਤ੍ਤਸ੍ਸ ਆਵਸਥਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਪਠਮਪਾਦੇਨ ਅਤਿਕ੍ਕਨ੍ਤਮਤ੍ਤੇ ਦੁਕ੍ਕਟਂ, ਦੁਤਿਯੇਨ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਆਵਸਥਂ ਅਨਿਸ੍ਸਜ੍ਜਿਤ੍ਵਾ ਚਾਰਿਕਂ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਕਵਾਟਬਦ੍ਧੇ ਦੁਕ੍ਕਟਂ, ਨਿਸ੍ਸਜ੍ਜਿਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਨਿਸ੍ਸਜ੍ਜਿਤਸਞ੍ਞਾਯ, ਸਤਿ ਅਨ੍ਤਰਾਯੇ, ਪਟਿਜਗ੍ਗਿਕਂ ਪਰਿਯੇਸਿਤ੍ਵਾ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਕਵਾਟਬਦ੍ਧਤਾ, ਵੁਤ੍ਤਨਯੇਨ ਪਕ੍ਕਮਨਂ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੀਤਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਆਵਸਥਵਿਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.