੧. ਲਸੁਣਵਗ੍ਗੋ
੧. ਲਸੁਣਸਿਕ੍ਖਾਪਦਵਣ੍ਣਨਾ
ਪਾਚਿਤ੍ਤਿਯੇਸੁ ਲਸੁਣਵਗ੍ਗਸ੍ਸ ਤਾਵ ਪਠਮੇ ਲਸੁਣਨ੍ਤਿ ਮਗਧਰਟ੍ਠੇ ਜਾਤਂ ਆਮਕਂ ਭਣ੍ਡਿਕਲਸੁਣਮੇਵ, ਨ ਏਕਦ੍ਵਿਤਿਮਿਞ੍ਜਕਂ. ਤਞ੍ਹਿ ‘‘ਖਾਦਿਸ੍ਸਾਮੀ’’ਤਿ ਪਟਿਗ੍ਗਣ੍ਹਨ੍ਤਿਯਾ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਲਸੁਣਂ ਹਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਲਸੁਣੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਲਸੁਣਸਞ੍ਞਾਯ, ਪਲਣ੍ਡੁਕੇ, ਭਞ੍ਜਨਕੇ, ਹਰਿਤਕੇ, ਚਾਪਲਸੁਣੇ, ਸੂਪਸਮ੍ਪਾਕੇ, ਮਂਸਸਮ੍ਪਾਕੇ, ਤੇਲਸਮ੍ਪਾਕੇ, ਸਾਲ਼ਵੇ, ਉਤ੍ਤਰਿਭਙ੍ਗੇ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਮਕਲਸੁਣਞ੍ਚੇਵ, ਅਜ੍ਝੋਹਰਣਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਲਸੁਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਸਮ੍ਬਾਧੇਤਿ ਪਟਿਚ੍ਛਨ੍ਨੋਕਾਸੇ, ਉਪਕਚ੍ਛਕੇਸੁ ਚ ਮੁਤ੍ਤਕਰਣੇ ਚਾਤਿ ਅਤ੍ਥੋ. ਸਂਹਰਾਪੇਯ੍ਯਾਤਿ ਏਤ੍ਥ ਖੁਰਸਣ੍ਡਾਸਕਤ੍ਤਰਿਆਦੀਸੁ ਯੇਨ ਕੇਨਚਿ ਸਂਹਰਾਪੇਨ੍ਤਿਯਾ ਪਯੋਗਗਣਨਾਯ ਪਾਚਿਤ੍ਤਿਯਂ, ਨ ਲੋਮਗਣਨਾਯ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਸਮ੍ਬਾਧੇ ਲੋਮਂ ਸਂਹਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਤ੍ਤਨੋ ਅਤ੍ਥਾਯ ਅਞ੍ਞਂ ਆਣਾਪੇਨ੍ਤਿਯਾ ਸਾਣਤ੍ਤਿਕਂ, ਆਪਤ੍ਤਿਭੇਦੋਨਤ੍ਥਿ. ਆਬਾਧਪਚ੍ਚਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਬਾਧਾਭਾਵੋ, ਸਮ੍ਬਾਧੇ ਲੋਮਸਂਹਰਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਭਿਕ੍ਖੁਨਿਯਾ ਸਦ੍ਧਿਂ ਏਕਦ੍ਧਾਨਮਗ੍ਗਗਮਨਸਿਕ੍ਖਾਪਦਸਦਿਸਾਨੀਤਿ.
ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਤਲਘਾਤਕਸਿਕ੍ਖਾਪਦਵਣ੍ਣਨਾ
ਤਤਿਯੇ ਤਲਘਾਤਕੇਤਿ ਅਨ੍ਤਮਸੋ ਉਪ੍ਪਲਕੇਸਰੇਨਾਪਿ ਮੁਤ੍ਤਕਰਣਸ੍ਸ ਤਲਘਾਤਨੇ ਮੁਤ੍ਤਕਰਣਮ੍ਹਿ ਪਹਾਰਦਾਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ.
ਸਾਵਤ੍ਥਿਯਂ ਦ੍ਵੇ ਭਿਕ੍ਖੁਨਿਯੋ ਆਰਬ੍ਭ ਤਲਘਾਤਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਪੁਰਿਮਨਯੇਨੇਵ ਸਾਣਤ੍ਤਿਕਂ, ਆਪਤ੍ਤਿਭੇਦੋ ਨਤ੍ਥਿ. ਇਤੋ ਪਰਂ ਪਨ ਯਤ੍ਥ ਨਤ੍ਥਿ, ਤਤ੍ਥ ਅਵਤ੍ਵਾਵ ਗਮਿਸ੍ਸਾਮ. ਆਬਾਧਪਚ੍ਚਯਾ ਗਣ੍ਡਂ ਵਾ ਵਣਂ ਵਾ ਪਹਰਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਬਾਧਾਭਾਵੋ, ਮੁਤ੍ਤਕਰਣੇ ਪਹਾਰਦਾਨਂ, ਫਸ੍ਸਸਾਦਿਯਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ.
ਤਲਘਾਤਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਜਤੁਮਟ੍ਠਕੇਤਿ ਜਤੁਨਾ ਕਤੇ ਮਟ੍ਠਦਣ੍ਡਕੇ. ਵਤ੍ਥੁਵਸੇਨੇਤਂ ਵੁਤ੍ਤਂ, ਕਾਮਰਾਗੇਨ ਪਨ ਉਪ੍ਪਲਕੇਸਰਮ੍ਪਿ ਪਵੇਸੇਨ੍ਤਿਯਾ ਆਪਤ੍ਤਿ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਜਤੁਮਟ੍ਠਕਸਾਦਿਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਤਤਿਯਸਦਿਸਮੇਵਾਤਿ.
ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਉਦਕਸੁਦ੍ਧਿਕਨ੍ਤਿ ਮੁਤ੍ਤਕਰਣਸ੍ਸ ਧੋਵਨਂ. ਆਦਿਯਮਾਨਾਯਾਤਿ ਕਰੋਨ੍ਤਿਯਾ. ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬਨ੍ਤਿ ਦ੍ਵੀਸੁ ਅਙ੍ਗੁਲੀਸੁ ਏਕੇਕਂ ਕਤ੍ਵਾ ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬਂ. ਤਂ ਅਤਿਕ੍ਕਾਮੇਨ੍ਤਿਯਾਤਿ ਸਚੇ ਧੋਵਨਕਾਲੇ ਰਾਗਵਸੇਨ ਵਿਤ੍ਥਾਰਤੋ ਤਤਿਯਾਯ ਅਙ੍ਗੁਲਿਯਾ ਅਗ੍ਗਪਬ੍ਬਂ, ਗਮ੍ਭੀਰਤੋ ਏਕਿਸ੍ਸਾਵ ਅਙ੍ਗੁਲਿਯਾ ਤਤਿਯਪਬ੍ਬਂ ਪਵੇਸੇਤਿ ਪਾਚਿਤ੍ਤਿਯਂ.
ਸਕ੍ਕੇਸੁ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਅਤਿਗਮ੍ਭੀਰਂ ਉਦਕਸੁਦ੍ਧਿਕਂ ਆਦਿਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਊਨਕਦ੍ਵਙ੍ਗੁਲਪਬ੍ਬੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਊਨਕਸਞ੍ਞਾਯ, ਦ੍ਵਙ੍ਗੁਲਪਬ੍ਬਪਰਮਂ ਆਦਿਯਨ੍ਤਿਯਾ, ਆਬਾਧਪਚ੍ਚਯਾ ਅਤਿਰੇਕਮ੍ਪਿ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ, ਸੇਸਂ ਤਤਿਯਸਦਿਸਮੇਵਾਤਿ.
ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਭੁਞ੍ਜਨ੍ਤਸ੍ਸਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਤੋ. ਪਾਨੀਯੇਨਾਤਿ ਸੁਦ੍ਧੇਨ ਵਾ ਉਦਕੇਨ, ਤਕ੍ਕਾਦੀਸੁ ਵਾ ਅਞ੍ਞਤਰੇਨ. ਵਿਧੂਪਨੇਨਾਤਿ ਯਾਯ ਕਾਯਚਿ ਬੀਜਨਿਯਾ. ਉਪਤਿਟ੍ਠੇਯ੍ਯਾਤਿ ਯਾ ਏਤੇਸੁ ਦ੍ਵੀਸੁ ਅਞ੍ਞਤਰਂ ਗਹੇਤ੍ਵਾ ਹਤ੍ਥਪਾਸੇ ਤਿਟ੍ਠਤਿ, ਤਸ੍ਸਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਭੁਞ੍ਜਨ੍ਤਸ੍ਸ ਏਵਂ ਤਿਟ੍ਠਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਹਤ੍ਥਪਾਸਂ ਵਿਜਹਿਤ੍ਵਾ ਖਾਦਨੀਯਂ ਖਾਦਨ੍ਤਸ੍ਸ ਉਪਤਿਟ੍ਠਨ੍ਤਿਯਾ ਦੁਕ੍ਕਟਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ. ‘‘ਇਮਂ ਪਿਵਥ, ਇਮਿਨਾ ਬੀਜਥਾ’’ਤਿ ਏਵਂ ਦੇਨ੍ਤਿਯਾ ਵਾ, ਦਾਪੇਨ੍ਤਿਯਾ ਵਾ, ਅਨੁਪਸਮ੍ਪਨ੍ਨਂ ਵਾ ਉਪਤਿਟ੍ਠਾਪਨਤ੍ਥਂ ਆਣਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ ਵਾ ਵਿਧੂਪਨਸ੍ਸ ਵਾ ਗਹਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਵਿਞ੍ਞਤ੍ਵਾਤਿ ਅਨ੍ਤਮਸੋ ਮਾਤਰਮ੍ਪਿ ਯਾਚਿਤ੍ਵਾ. ਭੁਞ੍ਜੇਯ੍ਯਾਤਿ ਅਜ੍ਝੋਹਰੇਯ੍ਯ. ਏਤ੍ਥ ਚ ਵਿਞ੍ਞਤ੍ਤਿ ਚੇਵ ਭੋਜਨਞ੍ਚ ਪਮਾਣਂ, ਤਸ੍ਮਾ ਸਯਂ ਵਿਞ੍ਞਤ੍ਵਾ ਅਞ੍ਞਾਯ ਭਜ੍ਜਨਾਦੀਨਿ ਕਾਰਾਪੇਤ੍ਵਾ ਵਾ, ਅਞ੍ਞਾਯ ਵਿਞ੍ਞਾਪੇਤ੍ਵਾ ਸਯਂ ਭਜ੍ਜਨਾਦੀਨਿ ਕਤ੍ਵਾ ਵਾ ਪਟਿਗ੍ਗਹਣਤੋ ਪਟ੍ਠਾਯ ਯਾਵ ਦਨ੍ਤੇਹਿ ਸਂਖਾਦਨਂ, ਤਾਵ ਪੁਬ੍ਬਪ੍ਪਯੋਗੇਸੁ ਦੁਕ੍ਕਟਾਨਿ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਆਮਕਧਞ੍ਞਂ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ ਵਾ ਅਞ੍ਞਾਯ ਵਾ ਅਵਿਞ੍ਞਤ੍ਤਿਯਾ ਲਦ੍ਧਂ ਭਜ੍ਜਨਾਦੀਨਿ ਕਤ੍ਵਾ ਵਾ ਕਾਰੇਤ੍ਵਾ ਵਾ ਭੁਞ੍ਜਨ੍ਤਿਯਾ ਦੁਕ੍ਕਟਂ, ਅਞ੍ਞਾਯ ਵਿਞ੍ਞਤ੍ਤਿਯਾ ਲਦ੍ਧਂ ਪਨ ਸਯਂ ਭਜ੍ਜਨਾਦੀਨਿ ਕਤ੍ਵਾਪਿ ਕਾਰੇਤ੍ਵਾਪਿ ਭੁਞ੍ਜਨ੍ਤਿਯਾ ਦੁਕ੍ਕਟਮੇਵ. ਆਬਾਧੇ ਸਤਿ ਸੇਦਕਮ੍ਮਾਦੀਨਂ ਅਤ੍ਥਾਯ ਵਿਞ੍ਞਾਪੇਨ੍ਤਿਯਾ, ਅਵਿਞ੍ਞਤ੍ਤਿਯਾ ਲਬ੍ਭਮਾਨਂ ਨਵਕਮ੍ਮਤ੍ਥਾਯ ਸਮ੍ਪਟਿਚ੍ਛਨ੍ਤਿਯਾ, ਞਾਤਕਪ੍ਪਵਾਰਿਤਟ੍ਠਾਨੇ ਮੁਗ੍ਗਮਾਸਾਦਿਅਪਰਣ੍ਣਂ ਵਿਞ੍ਞਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਤ੍ਤਨ੍ਨਂ ਧਞ੍ਞਾਨਂ ਅਞ੍ਞਤਰਸ੍ਸ ਵਿਞ੍ਞਾਪਨਂ ਵਾ ਵਿਞ੍ਞਾਪਾਪਨਂ ਵਾ, ਪਟਿਲਾਭੋ, ਭਜ੍ਜਨਾਦੀਨਿ ਕਤ੍ਵਾ ਵਾ ਕਾਰੇਤ੍ਵਾ ਵਾ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦ੍ਧਾਨਮਗ੍ਗਸਿਕ੍ਖਾਪਦਸਦਿਸਾਨੀਤਿ.
ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਸਙ੍ਕਾਰਨ੍ਤਿ ਕਚਵਰਂ. ਵਿਘਾਸਨ੍ਤਿ ਯਂਕਿਞ੍ਚਿ ਪਰਿਭੁਤ੍ਤਾਵਸੇਸਂ ਉਚ੍ਛਿਟ੍ਠੋਦਕਮ੍ਪਿ ਦਨ੍ਤਕਟ੍ਠਮ੍ਪਿ, ਅਟ੍ਠਿਕਚਲਕੇਸੁ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾਤਿ ਯਸ੍ਸਕਸ੍ਸਚਿ ਕੁਟ੍ਟਸ੍ਸ ਵਾ ਪਾਕਾਰਸ੍ਸ ਵਾ ਪਰਤੋ. ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾਤਿ ਸਬ੍ਬਾਨਿਪੇਤਾਨਿ ਏਕਤੋ ਛਡ੍ਡੇਨ੍ਤਿਯਾ ਏਕਪ੍ਪਯੋਗੇ ਏਕਾਪਤ੍ਤਿ, ਸਕਿਂ ਆਣਤ੍ਤਿਯਾ ਬਹੁਕੇਪਿ ਛਡ੍ਡਿਤੇ ਏਕਾਵ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਭਿਕ੍ਖੁਸ੍ਸ ਦੁਕ੍ਕਟਂ, ਓਲੋਕੇਤ੍ਵਾ ਵਾ ਅਵਲਞ੍ਜੇ ਵਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਚ੍ਚਾਰਾਦਿਭਾਵੋ, ਅਨੋਲੋਕਨਂ, ਵਲਞ੍ਜਨਟ੍ਠਾਨਂ, ਤਿਰੋਕੁਟ੍ਟਤਿਰੋਪਾਕਾਰਤਾ, ਛਡ੍ਡਨਂ ਵਾ ਛਡ੍ਡਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ
ਨਵਮੇ ਹਰਿਤੇਤਿ ਖੇਤ੍ਤੇ ਵਾ ਨਾਲ਼ਿਕੇਰਾਦਿਆਰਾਮੇ ਵਾ ਯਤ੍ਥਕਤ੍ਥਚਿ ਰੋਪਿਮਹਰਿਤਟ੍ਠਾਨੇ. ਤਾਨਿ ਵਤ੍ਥੂਨਿ ਛਡ੍ਡੇਨ੍ਤਿਯਾ ਵਾ ਛਡ੍ਡਾਪੇਨ੍ਤਿਯਾ ਵਾ ਪੁਰਿਮਨਯੇਨੇਵ ਆਪਤ੍ਤਿ, ਤਾਦਿਸੇ ਠਾਨੇ ਨਿਸੀਦਿਤ੍ਵਾ ਅਨ੍ਤਮਸੋ ਉਦਕਂ ਪਿਵਿਤ੍ਵਾ ਮਤ੍ਥਕਚ੍ਛਿਨ੍ਨਂ ਨਾਲ਼ਿਕੇਰਮ੍ਪਿ ਛਡ੍ਡੇਨ੍ਤਿਯਾ ਆਪਤ੍ਤਿਯੇਵ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਉਚ੍ਚਾਰਾਦੀਨਿ ਹਰਿਤੇ ਛਡ੍ਡਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਭਿਕ੍ਖੁਨੋ ਦੁਕ੍ਕਟਂ, ਭਿਕ੍ਖੁਨਿਯਾਪਿ ਨਿਕ੍ਖਿਤ੍ਤਬੀਜੇ ਖੇਤ੍ਤੇ ਯਾਵ ਅਙ੍ਕੁਰੋ ਨ ਉਟ੍ਠਹਤਿ, ਤਾਵ ਦੁਕ੍ਕਟਂ, ਅਹਰਿਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਹਰਿਤਸਞ੍ਞਾਯ ਛਡ੍ਡਿਤਖੇਤ੍ਤੇ ਵਾ, ਸਾਮਿਕੇ ਅਪਲੋਕੇਤ੍ਵਾ ਵਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਅਟ੍ਠਮਸਦਿਸਮੇਵਾਤਿ.
ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ
ਦਸਮੇ ਨਚ੍ਚਨ੍ਤਿ ਅਨ੍ਤਮਸੋ ਮੋਰਨਚ੍ਚਮ੍ਪਿ. ਗੀਤਨ੍ਤਿ ਅਨ੍ਤਮਸੋ ਧਮ੍ਮਭਾਣਕਗੀਤਮ੍ਪਿ. ਵਾਦਿਤਨ੍ਤਿ ਅਨ੍ਤਮਸੋ ਉਦਕਭੇਰਿਵਾਦਿਤਮ੍ਪਿ. ਦਸ੍ਸਨਾਯਾਤਿ ਏਤੇਸੁ ਯਂਕਿਞ੍ਚਿ ਦਸ੍ਸਨਾਯ ਗਚ੍ਛਨ੍ਤਿਯਾ ਪਦੇ ਪਦੇ ਦੁਕ੍ਕਟਂ, ਯਤ੍ਥ ਠਿਤਾ ਪਸ੍ਸਤਿ ਵਾ ਸੁਣਾਤਿ ਵਾ, ਏਕਪ੍ਪਯੋਗੇ ਏਕਾਪਤ੍ਤਿ, ਤਂ ਤਂ ਦਿਸਂ ਓਲੋਕੇਨ੍ਤਿਯਾ ਪਯੋਗੇ ਪਯੋਗੇ ਆਪਤ੍ਤਿ.
ਰਾਜਗਹੇ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਨਚ੍ਚਾਦੀਨਿ ਦਸ੍ਸਨਾਯ ਗਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ ਤਾਨਿ ਵਤ੍ਥੂਨਿ ਕਰੋਨ੍ਤਿਯਾ, ਅਞ੍ਞਂ ਵਾ ਆਣਾਪੇਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਦੇਥਾ’’ਤਿ ਈਦਿਸੇਨ ਪਰਿਯਾਯੇਨ ਵਾ ਭਣਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਕਰੋਮਾ’’ਤਿ ਵਾ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਨ੍ਤਿਯਾ ਚ ਪਾਚਿਤ੍ਤਿਯਮੇਵਾਤਿ ਸਬ੍ਬਅਟ੍ਠਕਥਾਸੁ (ਪਾਚਿ. ਅਟ੍ਠ. ੮੩੫-੮੩੭) ਵੁਤ੍ਤਂ, ਭਿਕ੍ਖੁਨੋ ਸਬ੍ਬਤ੍ਥ ਦੁਕ੍ਕਟਂ. ‘‘ਤੁਮ੍ਹਾਕਂ ਚੇਤਿਯਸ੍ਸ ਉਪਟ੍ਠਾਨਂ ਕਰੋਮਾ’’ਤਿ ਵੁਤ੍ਤੇ ਪਨ ‘‘ਉਪਟ੍ਠਾਨਕਰਣਂ ਨਾਮ ਸੁਨ੍ਦਰ’’ਨ੍ਤਿ ਈਦਿਸਂ ਪਰਿਯਾਯਂ ਭਣਨ੍ਤਿਯਾ, ਆਰਾਮੇ ਠਤ੍ਵਾ ਪਸ੍ਸਨ੍ਤਿਯਾ ਵਾ ਸੁਣਨ੍ਤਿਯਾ ਵਾ, ਤਥਾ ਅਤ੍ਤਨੋ ਠਿਤੋਕਾਸਂ ਆਗਨ੍ਤ੍ਵਾ ਪਯੋਜਿਤਂ ਪਟਿਪਥਂ ਗਚ੍ਛਨ੍ਤਿਯਾ ਸਮ੍ਮੁਖੀਭੂਤਂ ਸਲਾਕਭਤ੍ਤਾਦਿਕੇ ਸਤਿ ਕਰਣੀਯੇ ਗਨ੍ਤ੍ਵਾ, ਆਪਦਾਸੁ ਵਾ ਸਮਜ੍ਜਟ੍ਠਾਨਂ ਪਵਿਸਿਤ੍ਵਾਪਿ ਪਸ੍ਸਨ੍ਤਿਯਾ ਵਾ ਸੁਣਨ੍ਤਿਯਾ ਵਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਚ੍ਚਾਦੀਨਂ ਅਞ੍ਞਤਰਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਂ ਵਾ ਸਵਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਲੋਕਵਜ੍ਜਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਲਸੁਣਵਗ੍ਗੋ ਪਠਮੋ.