ਨਿਸ੍ਸਗ੍ਗਿਯਕਣ੍ਡੋ
੧. ਪਤ੍ਤਸਨ੍ਨਿਚਯਸਿਕ੍ਖਾਪਦਵਣ੍ਣਨਾ
ਨਿਸ੍ਸਗ੍ਗਿਯੇਸੁ ਆਦਿਵਗ੍ਗਸ੍ਸ ਤਾਵ ਪਠਮੇ ਪਤ੍ਤਸਨ੍ਨਿਚਯਂ ਕਰੇਯ੍ਯਾਤਿ ਪਤ੍ਤਸਨ੍ਨਿਧਿਂ ਕਰੇਯ੍ਯ, ਏਕਾਹਂ ਅਨਧਿਟ੍ਠਹਿਤ੍ਵਾ ਵਾ ਅਵਿਕਪ੍ਪੇਤ੍ਵਾ ਵਾ ਅਧਿਟ੍ਠਾਨੁਪਗਂ ਪਤ੍ਤਂ ਠਪੇਯ੍ਯਾਤਿ ਅਤ੍ਥੋ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਪਤ੍ਤਸਨ੍ਨਿਚਯਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਕਥਾਮਗ੍ਗੋ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ, ਤਤ੍ਰ ਹਿ ਦਸਾਹਾਤਿਕ੍ਕਮੇ ਆਪਤ੍ਤਿ, ਇਧ ਏਕਾਹਾਤਿਕ੍ਕਮੇਤਿ ਏਤ੍ਤਕਮੇਵ ਤਸ੍ਸ ਚ ਇਮਸ੍ਸ ਚ ਨਾਨਾਕਰਣਂ, ਸੇਸਂ ਤਾਦਿਸਮੇਵਾਤਿ.
ਪਤ੍ਤਸਨ੍ਨਿਚਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਅਕਾਲਚੀਵਰਨ੍ਤਿ ਅਤ੍ਥਤੇ ਕਥਿਨੇ ਕਥਿਨਮਾਸੇਹਿ, ਅਨਤ੍ਥਤੇ ਚੀਵਰਮਾਸਤੋ ਅਞ੍ਞਸ੍ਮਿਂ ਕਾਲੇ ਉਪ੍ਪਨ੍ਨਂ, ਯਂ ਵਾ ਪਨ ਕਾਲੇਪਿ ਆਦਿਸ੍ਸ ਦਿਨ੍ਨਂ. ਆਦਿਸ੍ਸ ਦਿਨ੍ਨਂ ਨਾਮ ‘‘ਸਮ੍ਪਤ੍ਤਾ ਭਾਜੇਨ੍ਤੂ’’ਤਿ ਵਤ੍ਵਾ ਵਾ, ‘‘ਇਦਂ ਗਣਸ੍ਸ, ਇਦਂ ਤੁਮ੍ਹਾਕਂ ਦਮ੍ਮੀ’’ਤਿ ਵਤ੍ਵਾ ਵਾ, ਦਾਤੁਕਾਮਤਾਯ ਪਾਦਮੂਲੇ ਠਪੇਤ੍ਵਾ ਵਾ ਦਿਨ੍ਨਂ. ਇਚ੍ਚੇਤਂ ਅਕਾਲਚੀਵਰਂ ‘‘ਕਾਲਚੀਵਰ’’ਨ੍ਤਿ ਅਧਿਟ੍ਠਹਿਤ੍ਵਾ ਭਾਜਾਪੇਨ੍ਤਿਯਾ ਪਯੋਗੇ ਦੁਕ੍ਕਟਂ, ਯਂ ਅਤ੍ਤਨਾ ਲਦ੍ਧਂ, ਤਂ ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਟ੍ਠਂ ਪਟਿਲਭਿਤ੍ਵਾਪਿ ਯਥਾਦਾਨੇਯੇਵ ਉਪਨੇਤਬ੍ਬਂ, ਅਞ੍ਞਸ੍ਮਿਮ੍ਪਿ ਏਵਰੂਪੇ ਸਿਕ੍ਖਾਪਦੇ ਏਸੇਵ ਨਯੋ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਕਾਲਚੀਵਰਂ ‘‘ਕਾਲਚੀਵਰ’’ਨ੍ਤਿ ਅਧਿਟ੍ਠਹਿਤ੍ਵਾ ਭਾਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਕਾਲਚੀਵਰੇ ਵੇਮਤਿਕਾਯ, ਕਾਲਚੀਵਰੇ ਅਕਾਲਚੀਵਰਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭੋਸੁ ਕਾਲਚੀਵਰਸਞ੍ਞਾਯ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਕਾਲਚੀਵਰਤਾ, ਤਥਾਸਞ੍ਞਿਤਾ, ‘‘ਕਾਲਚੀਵਰ’’ਨ੍ਤਿ ਅਧਿਟ੍ਠਾਯ ਲੇਸੇਨ ਭਾਜਾਪਨਂ, ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਚੀਵਰਪਰਿਵਤ੍ਤਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਹਨ੍ਦਾਤਿ ਗਣ੍ਹ. ਅਚ੍ਛਿਨ੍ਦੇਯ੍ਯਾਤਿ ਸਯਂ ਅਚ੍ਛਿਨ੍ਦਨ੍ਤਿਯਾ ਬਨ੍ਧਿਤ੍ਵਾ ਠਪਿਤੇਸੁ ਬਹੂਸੁਪਿ ਏਕਾਪਤ੍ਤਿ, ਇਤਰੇਸੁ ਵਤ੍ਥੁਗਣਨਾਯ ਆਪਤ੍ਤਿਯੋ. ਅਚ੍ਛਿਨ੍ਦਾਪਨੇ ਪਨ ਏਕਾਯ ਆਣਤ੍ਤਿਯਾ ਬਹੂਸੁ ਅਚ੍ਛਿਨ੍ਨੇਸੁਪਿ ਏਕਾਵਾਪਤ੍ਤਿ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਚੀਵਰਂ ਪਰਿਵਤ੍ਤੇਤ੍ਵਾ ਅਚ੍ਛਿਨ੍ਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਞ੍ਞਸ੍ਮਿਂ ਪਰਿਕ੍ਖਾਰੇ ਤਿਕਦੁਕ੍ਕਟਂ, ਅਨੁਪਸਮ੍ਪਨ੍ਨਾਯ ਚੀਵਰੇਪਿ ਤਿਕਦੁਕ੍ਕਟਮੇਵ. ਯਾ ਪਨ ਤਾਯ ਵਾ ਦਿਯ੍ਯਮਾਨਂ, ਤਸ੍ਸਾ ਵਾ ਵਿਸ੍ਸਾਸਂ ਗਣ੍ਹਾਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਪਰਿਵਤ੍ਤਿਤਚੀਵਰਸ੍ਸ ਵਿਕਪ੍ਪਨੁਪਗਤਾ, ਸਕਸਞ੍ਞਾਯ ਅਚ੍ਛਿਨ੍ਦਨਂ ਵਾ ਅਚ੍ਛਿਨ੍ਦਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਚੀਵਰਪਰਿਵਤ੍ਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਅਞ੍ਞਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਵਿਞ੍ਞਾਪੇਤ੍ਵਾਤਿ ਜਾਨਾਪੇਤ੍ਵਾ, ‘‘ਇਦਂ ਨਾਮ ਆਹਰਾ’’ਤਿ ਯਾਚਿਤ੍ਵਾ ਵਾ. ਅਞ੍ਞਂ ਵਿਞ੍ਞਾਪੇਯ੍ਯਾਤਿ ਯਂ ਪੁਬ੍ਬੇ ‘‘ਕਿਨ੍ਤੇ, ਅਯ੍ਯੇ, ਅਫਾਸੁ, ਕਿਂ ਆਹਰਿਯਤੂ’’ਤਿ ਵੁਤ੍ਤਾਯ ਵਿਞ੍ਞਾਪਿਤਂ, ਤਂ ਪਟਿਕ੍ਖਿਪਿਤ੍ਵਾ ਤਞ੍ਚੇਵ ਅਞ੍ਞਞ੍ਚ ਗਹੇਤੁਕਾਮਾ ਤਤੋ ਅਞ੍ਞਂ ਵਿਞ੍ਞਾਪੇਯ੍ਯ, ਤਸ੍ਸਾ ਵਿਞ੍ਞਤ੍ਤਿਯਾ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਞ੍ਞਂ ਵਿਞ੍ਞਾਪੇਤ੍ਵਾ ਅਞ੍ਞਂ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨਞ੍ਞੇ ਦ੍ਵਿਕਦੁਕ੍ਕਟਂ. ਅਨਞ੍ਞੇ ਅਨਞ੍ਞਸਞ੍ਞਾਯ ਪਨ, ਤਸ੍ਮਿਂ ਅਪ੍ਪਹੋਨ੍ਤੇ ਪੁਨ ਤਞ੍ਞੇਵ, ਅਞ੍ਞੇਨਪਿ ਅਤ੍ਥੇ ਸਤਿ ਤੇਨ ਸਦ੍ਧਿਂ ਅਞ੍ਞਞ੍ਚ, ਯਞ੍ਚ ਵਿਞ੍ਞਤ੍ਤਂ, ਤਤੋ ਚੇ ਅਞ੍ਞਂ ਸਮਗ੍ਘਤਰਂ ਹੋਤਿ, ਇਮਂ ਆਨਿਸਂਸਂ ਦਸ੍ਸੇਤ੍ਵਾ ਸੁਦ੍ਧਂ ਅਞ੍ਞਮੇਵ ਚ ਵਿਞ੍ਞਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਲੇਸੇਨ ਗਹੇਤੁਕਾਮਤਾ, ਅਞ੍ਞਸ੍ਸ ਵਿਞ੍ਞਾਪਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.
ਅਞ੍ਞਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਅਞ੍ਞਚੇਤਾਪਨਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਅਞ੍ਞਂ ਚੇਤਾਪੇਤ੍ਵਾਤਿ ਅਤ੍ਤਨੋ ਕਪ੍ਪਿਯਭਣ੍ਡੇਨ ‘‘ਇਦਂ ਨਾਮ ਆਹਰਾ’’ਤਿ ਅਞ੍ਞਂ ਪਰਿਵਤ੍ਤਾਪੇਤ੍ਵਾ. ਅਞ੍ਞਂ ਚੇਤਾਪੇਯ੍ਯਾਤਿ ‘‘ਏਵਂ ਮੇ ਇਦਂ ਦਤ੍ਵਾ ਅਞ੍ਞਮ੍ਪਿ ਆਹਰਿਸ੍ਸਤੀ’’ਤਿ ਮਞ੍ਞਮਾਨਾ ‘‘ਨ ਮੇ ਇਮਿਨਾ ਅਤ੍ਥੋ, ਇਦਂ ਨਾਮ ਮੇ ਆਹਰਾ’’ਤਿ ਤਤੋ ਅਞ੍ਞਂ ਚੇਤਾਪੇਯ੍ਯ. ਤਸ੍ਸਾ ਚੇਤਾਪਨਪ੍ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਤੇਨ ਵਾ ਅਞ੍ਞੇਨ ਵਾ ਮੂਲੇਨ ਆਹਟਂ ਨਿਸ੍ਸਗ੍ਗਿਯਂ ਹੋਤਿ, ਸੇਸਂ ਚਤੁਤ੍ਥਸਦਿਸਮੇਵਾਤਿ.
ਅਞ੍ਞਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਅਞ੍ਞਦਤ੍ਥਿਕੇਨਾਤਿ ਅਞ੍ਞਸ੍ਸਤ੍ਥਾਯ ਦਿਨ੍ਨੇਨ. ਅਞ੍ਞੁਦ੍ਦਿਸਿਕੇਨਾਤਿ ਅਞ੍ਞਂ ਉਦ੍ਦਿਸਿਤ੍ਵਾ ਦਿਨ੍ਨੇਨ. ਸਙ੍ਘਿਕੇਨਾਤਿ ਸਙ੍ਘਸ੍ਸ ਪਰਿਚ੍ਚਤ੍ਤੇਨ. ਪਰਿਕ੍ਖਾਰੇਨਾਤਿ ਕਪ੍ਪਿਯਭਣ੍ਡੇਨ. ਅਞ੍ਞਂ ਚੇਤਾਪੇਯ੍ਯਾਤਿ ‘‘ਇਦਂ ਨਾਮ ਪਰਿਭੁਞ੍ਜੇਯ੍ਯਾਥਾ’’ਤਿ ਯਂ ਉਦ੍ਦਿਸਿਤ੍ਵਾ ਨਿਯਮੇਤ੍ਵਾ ਯੋ ਪਰਿਕ੍ਖਾਰੋ ਦਿਨ੍ਨੋ, ਤਤੋ ਅਞ੍ਞਂ ਪਰਿਵਤ੍ਤਾਪੇਯ੍ਯ, ਤਸ੍ਸਾ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਤਾਦਿਸੇਨ ਪਰਿਕ੍ਖਾਰੇਨ ਅਞ੍ਞਂ ਚੇਤਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨਞ੍ਞਦਤ੍ਥਿਕੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਨਞ੍ਞਦਤ੍ਥਿਕਸਞ੍ਞਾਯ, ਸੇਸਕਂ ਉਪਨੇਨ੍ਤਿਯਾ, ‘‘ਤੁਮ੍ਹੇਹਿ ਏਤਦਤ੍ਥਾਯ ਦਿਨ੍ਨੋ, ਅਮ੍ਹਾਕਞ੍ਚ ਇਮਿਨਾ ਨਾਮ ਅਤ੍ਥੋ’’ਤਿ ਸਾਮਿਕੇ ਅਪਲੋਕੇਤ੍ਵਾ ਉਪਨੇਨ੍ਤਿਯਾ, ਯਦਾ ਭਿਕ੍ਖੁਨਿਯੋ ਵਿਹਾਰਮ੍ਪਿ ਛਡ੍ਡੇਤ੍ਵਾ ਪਕ੍ਕਮਨ੍ਤਿ, ਏਵਰੂਪਾਸੁ ਆਪਦਾਸੁ ਉਪਨੇਨ੍ਤੀਨਂ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਚਤੁਤ੍ਥਸਦਿਸਮੇਵਾਤਿ.
ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨਾਪਿ. ਏਤਦੇਵੇਤ੍ਥ ਨਾਨਾਕਰਣਂ, ਸੇਸਂ ਛਟ੍ਠਸਦਿਸਮੇਵਾਤਿ.
ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਪਠਮਗਣਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਮਹਾਜਨਿਕੇਨਾਤਿ ਗਣਸ੍ਸ ਪਰਿਚ੍ਚਤ੍ਤੇਨ, ਇਦਮੇਤ੍ਥ ਛਟ੍ਠਤੋ ਨਾਨਾਕਰਣਂ.
ਪਠਮਗਣਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਦੁਤਿਯਗਣਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਨਵਮੇ ਸਞ੍ਞਾਚਿਕੇਨਾਤਿ ਇਦਂ ਅਟ੍ਠਮਤੋ ਅਤਿਰਿਤ੍ਤਂ, ਸੇਸਂ ਦ੍ਵੀਸੁਪਿ ਛਟ੍ਠਸਿਕ੍ਖਾਪਦਸਦਿਸਮੇਵਾਤਿ.
ਦੁਤਿਯਗਣਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਪੁਗ੍ਗਲਿਕਚੇਤਾਪਨਸਿਕ੍ਖਾਪਦਵਣ੍ਣਨਾ
ਦਸਮੇ ਪੁਗ੍ਗਲਿਕੇਨਾਤਿ ਏਕਭਿਕ੍ਖੁਨਿਯਾ ਪਰਿਚ੍ਚਤ੍ਤੇਨ. ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨ ਚ. ਅਞ੍ਞਂ ਚੇਤਾਪੇਯ੍ਯਾਤਿ ਯਂ ਉਦ੍ਦਿਸਿਤ੍ਵਾ ਦਿਨ੍ਨਂ, ਤਤੋ ਅਞ੍ਞਂ ਚੇਤਾਪੇਨ੍ਤਿਯਾ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਤਾਦਿਸੇਨ ਪਰਿਕ੍ਖਾਰੇਨ ਅਞ੍ਞਂ ਚੇਤਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਛਟ੍ਠਸਦਿਸਮੇਵਾਤਿ.
ਪੁਗ੍ਗਲਿਕਚੇਤਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਪਤ੍ਤਵਗ੍ਗੋ ਪਠਮੋ.
੧੧. ਗਰੁਪਾਵੁਰਣਸਿਕ੍ਖਾਪਦਵਣ੍ਣਨਾ
ਦੁਤਿਯਸ੍ਸ ਪਠਮੇ ਗਰੁਪਾਵੁਰਣਨ੍ਤਿ ਸੀਤਕਾਲੇ ਪਾਵੁਰਣਂ. ਚਤੁਕ੍ਕਂਸਪਰਮਨ੍ਤਿ ਕਂਸੋ ਨਾਮ ਚਤੁਕ੍ਕਹਾਪਣਿਕੋ ਹੋਤਿ, ਤਸ੍ਮਾ ਸੋਲ਼ਸਕਹਾਪਣਗ੍ਘਨਕਂ. ਚੇਤਾਪੇਤਬ੍ਬਨ੍ਤਿ ਠਪੇਤ੍ਵਾ ਸਹਧਮ੍ਮਿਕੇ ਚ ਞਾਤਕਪ੍ਪਵਾਰਿਤੇ ਚ ਅਞ੍ਞੇਨ ਕਿਸ੍ਮਿਞ੍ਚਿਦੇਵ ਗੁਣੇ ਪਰਿਤੁਟ੍ਠੇਨ ‘‘ਵਦੇਥਾਯ੍ਯੇ, ਯੇਨਤ੍ਥੋ’’ਤਿ ਵੁਤ੍ਤਾਯ ਵਿਞ੍ਞਾਪੇਤਬ੍ਬਂ. ਤਤੋ ਚੇ ਉਤ੍ਤਰੀਤਿ ਤਤੁਤ੍ਤਰਿ ਵਿਞ੍ਞਾਪੇਨ੍ਤਿਯਾ ਦੁਕ੍ਕਟਂ, ਪਟਿਲਦ੍ਧਂ ਨਿਸ੍ਸਗ੍ਗਿਯਂ ਹੋਤਿ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਰਾਜਾਨਂ ਕਮ੍ਬਲਂ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਊਨਕਚਤੁਕ੍ਕਂਸੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਊਨਕਸਞ੍ਞਾਯ, ਚਤੁਕ੍ਕਂਸਪਰਮਂ ਚੇਤਾਪੇਨ੍ਤਿਯਾ, ਞਾਤਕਪ੍ਪਵਾਰਿਤੇ ਵਾ, ਅਞ੍ਞਸ੍ਸ ਵਾ ਅਤ੍ਥਾਯ, ਅਤ੍ਤਨੋ ਵਾ ਧਨੇਨ, ਮਹਗ੍ਘਂ ਚੇਤਾਪੇਨ੍ਤਂ ਅਪ੍ਪਗ੍ਘਂ ਚੇਤਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਗਰੁਪਾਵੁਰਣਤਾ, ਅਤਿਰੇਕਚਤੁਕ੍ਕਂਸਤਾ, ਅਨਨੁਞ੍ਞਾਤਟ੍ਠਾਨੇ ਵਿਞ੍ਞਤ੍ਤਿ, ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.
ਗਰੁਪਾਵੁਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੨. ਲਹੁਪਾਵੁਰਣਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਲਹੁਪਾਵੁਰਣਨ੍ਤਿ ਉਣ੍ਹਕਾਲੇ ਪਾਵੁਰਣਂ. ਅਡ੍ਢਤੇਯ੍ਯਕਂਸਪਰਮਨ੍ਤਿ ਦਸਕਹਾਪਣਗ੍ਘਨਕਂ, ਸੇਸਂ ਪਠਮਸਦਿਸਮੇਵਾਤਿ.
ਲਹੁਪਾਵੁਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਇਤੋ ਪਰਾਨਿ ਇਮਸ੍ਮਿਂ ਵਗ੍ਗੇ ਅਟ੍ਠ, ਤਤਿਯਵਗ੍ਗੇ ਦਸਾਤਿ ਇਮਾਨਿ ਅਟ੍ਠਾਰਸ ਸਿਕ੍ਖਾਪਦਾਨਿ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀਤਿ.
ਜਾਤਰੂਪਵਗ੍ਗੋ ਤਤਿਯੋ.
ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾ ਧਮ੍ਮਾਤਿ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾ ਸਾਧਾਰਣਾ ਅਟ੍ਠਾਰਸ, ਅਸਾਧਾਰਣਾ ਦ੍ਵਾਦਸਾਤਿ ਏਵਂ ਤਿਂਸ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ ਭਿਕ੍ਖੁਨਿਪਾਤਿਮੋਕ੍ਖੇ
ਨਿਸ੍ਸਗ੍ਗਿਯਪਾਚਿਤ੍ਤਿਯਵਣ੍ਣਨਾ ਨਿਟ੍ਠਿਤਾ.