ਸਙ੍ਘਾਦਿਸੇਸਕਣ੍ਡੋ

੧. ਉਸ੍ਸਯਵਾਦਿਕਾਸਿਕ੍ਖਾਪਦਵਣ੍ਣਨਾ

ਸਙ੍ਘਾਦਿਸੇਸੇਸੁ ਪਠਮੇ ਉਸ੍ਸਯਵਾਦਿਕਾਤਿ ਮਾਨੁਸ੍ਸਯਵਸੇਨ ਕੋਧੁਸ੍ਸਯਵਸੇਨ ਅਡ੍ਡਕਰਣਤ੍ਥਾਯ ਵਿਨਿਚ੍ਛਯਮਹਾਮਤ੍ਤਾਨਂ ਸਨ੍ਤਿਕੇ ਵਿਵਦਮਾਨਾ. ਗਹਪਤਿਨਾ ਵਾਤਿਆਦੀਹਿ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਅਵਸੇਸਾ ਗਹਟ੍ਠਪਬ੍ਬਜਿਤਾ ਸਙ੍ਗਹਿਤਾ. ਅਯਂ ਭਿਕ੍ਖੁਨੀ ਪਠਮਾਪਤ੍ਤਿਕਨ੍ਤਿ ਆਦਿਮ੍ਹਿ ਪਠਮਂ ਆਪਤ੍ਤਿ ਏਤਸ੍ਸਾਤਿ ਪਠਮਾਪਤ੍ਤਿਕੋ, ਵੀਤਿਕ੍ਕਮਕ੍ਖਣੇਯੇਵ ਆਪਜ੍ਜਿਤਬ੍ਬੋਤਿ ਅਤ੍ਥੋ, ਤਂ ਪਠਮਾਪਤ੍ਤਿਕਂ. ਆਪਨ੍ਨਾਤਿ ਅਡ੍ਡਪਰਿਯੋਸਾਨੇ ਆਪਨ੍ਨਾ. ਭਿਕ੍ਖੁਨਿਂ ਸਙ੍ਘਤੋ ਨਿਸ੍ਸਾਰੇਤੀਤਿ ਨਿਸ੍ਸਾਰਣੀਯੋ, ਤਂ ਨਿਸ੍ਸਾਰਣੀਯਂ. ਸਙ੍ਘਾਦਿਸੇਸਨ੍ਤਿ ਏਵਂਨਾਮਕਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਉਸ੍ਸਯਵਾਦਿਕਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ‘‘ਅਡ੍ਡਂ ਕਰਿਸ੍ਸਾਮੀ’’ਤਿ ਯਂਕਿਞ੍ਚਿ ਦੁਤਿਯਿਕਂ ਵਾ ਸਕ੍ਖਿਂ ਵਾ ਸਹਾਯਂ ਵਾ ਪਰਿਯੇਸਨ੍ਤਿਯਾ ਪਰਿਯੇਸਨੇ ਦੁਕ੍ਕਟਂ, ਯਤ੍ਥ ਠਿਤਾਯ ‘‘ਅਡ੍ਡਂ ਕਾਤੁਂ ਗਚ੍ਛਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਤਤੋ ਪਟ੍ਠਾਯ ਗਚ੍ਛਨ੍ਤਿਯਾ ਪਦੇ ਪਦੇ ਦੁਕ੍ਕਟਂ, ਯਤ੍ਥਕਤ੍ਥਚਿ ਅਨ੍ਤਮਸੋ ਭਿਕ੍ਖੁਨੁਪਸ੍ਸਯਂ ਆਗਤੇਪਿ ਵੋਹਾਰਿਕੇ ਦਿਸ੍ਵਾ ਅਤ੍ਤਨੋ ਕਥਂ ਆਰੋਚੇਨ੍ਤਿਯਾ ਦੁਕ੍ਕਟਂ. ਇਤਰੇਨ ਅਤ੍ਤਨੋ ਕਥਾਯ ਆਰੋਚਿਤਾਯ ਭਿਕ੍ਖੁਨਿਯਾ ਥੁਲ੍ਲਚ੍ਚਯਂ, ਪਠਮਂ ਇਤਰੇਨ ਪਚ੍ਛਾ ਭਿਕ੍ਖੁਨਿਯਾ ਆਰੋਚਨੇਪਿ ਏਸੇਵ ਨਯੋ. ਸਚੇ ਪਨ ਭਿਕ੍ਖੁਨੀ ਤਂ ਵਦਤਿ ‘‘ਮਮ ਚ ਤਵ ਚ ਕਥਂ ਤ੍ਵਂਯੇਵ ਆਰੋਚੇਹੀ’’ਤਿ, ਸੋ ਅਤ੍ਤਨੋ ਵਾ ਕਥਂ ਪਠਮਂ ਆਰੋਚੇਤੁ, ਤਸ੍ਸਾ ਵਾ, ਪਠਮਾਰੋਚਨੇ ਭਿਕ੍ਖੁਨਿਯਾ ਦੁਕ੍ਕਟਂ, ਦੁਤਿਯੇ ਥੁਲ੍ਲਚ੍ਚਯਂ, ਤੇਨ ਏਵਂ ਵੁਤ੍ਤਾਯ ਭਿਕ੍ਖੁਨਿਯਾ ਆਰੋਚਨੇਪਿ ਏਸੇਵ ਨਯੋ. ਸਚੇ ਪਨ ਭਿਕ੍ਖੁਨੀ ਅਞ੍ਞੇਨ ਕਥਾਪੇਤਿ, ਤਤ੍ਰਾਪਿ ਏਸੇਵ ਨਯੋ. ਯਥਾ ਵਾ ਤਥਾ ਵਾ ਹਿ ਆਰੋਚਿਯਮਾਨੇ ਪਠਮਾਰੋਚਨੇ ਭਿਕ੍ਖੁਨਿਯਾ ਦੁਕ੍ਕਟਂ, ਦੁਤਿਯੇ ਥੁਲ੍ਲਚ੍ਚਯਂ. ਉਭਿਨ੍ਨਂ ਪਨ ਕਥਂ ਸੁਤ੍ਵਾ ਵੋਹਾਰਿਕੇਹਿ ਵਿਨਿਚ੍ਛਯੇ ਕਤੇ ਅਡ੍ਡਪਰਿਯੋਸਾਨਂ ਨਾਮ ਹੋਤਿ, ਤਸ੍ਮਿਂ ਅਡ੍ਡਪਰਿਯੋਸਾਨੇ ਭਿਕ੍ਖੁਨਿਯਾ ਜਯੇਪਿ ਪਰਾਜਯੇਪਿ ਸਙ੍ਘਾਦਿਸੇਸੋ.

ਯਾ ਪਨ ਪਚ੍ਚਤ੍ਥਿਕਮਨੁਸ੍ਸੇਹਿ ਦੂਤਂ ਵਾ ਪਹਿਣਿਤ੍ਵਾ, ਸਯਂ ਵਾ ਆਗਨ੍ਤ੍ਵਾ ‘‘ਏਹਿ, ਅਯ੍ਯੇ’’ਤਿ ਆਕਡ੍ਢਿਯਮਾਨਾ ਗਚ੍ਛਤਿ, ਯਾ ਵਾ ਉਪਸ੍ਸਯੇ ਅਞ੍ਞੇਹਿ ਕਤਂ ਅਨਾਚਾਰਂ ਅਨੋਦਿਸ੍ਸ ਆਚਿਕ੍ਖਨ੍ਤੀ ਰਕ੍ਖਂ ਯਾਚਤਿ, ਯਾਯ ਚ ਕਿਞ੍ਚਿ ਅਵੁਤ੍ਤਾ ਵੋਹਾਰਿਕਾ ਅਞ੍ਞਤੋ ਸੁਤ੍ਵਾ ਸਯਮੇਵ ਅਡ੍ਡਂ ਪਰਿਯੋਸਾਪੇਨ੍ਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਞ੍ਞੇਹਿ ਅਨਾਕਡ੍ਢਿਤਾਯ ਅਡ੍ਡਕਰਣਂ, ਅਡ੍ਡਪਰਿਯੋਸਾਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਮੇਵਾਤਿ.

ਉਸ੍ਸਯਵਾਦਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਚੋਰਿਵੁਟ੍ਠਾਪਿਕਾਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਯਾਯ ਪਞ੍ਚਮਾਸਗ੍ਘਨਕਤੋ ਪਟ੍ਠਾਯ ਯਂਕਿਞ੍ਚਿ ਪਰਸਨ੍ਤਕਂ ਅਵਹਰਿਤਂ, ਅਯਂ ਚੋਰੀ ਨਾਮ, ਤਂ ਚੋਰਿਂ. ਵਜ੍ਝਂ ਵਿਦਿਤਨ੍ਤਿ ਤੇਨ ਕਮ੍ਮੇਨ ‘‘ਵਧਾਰਹਾ ਅਯ’’ਨ੍ਤਿ ਏਵਂ ਵਿਦਿਤਂ. ਅਨਪਲੋਕੇਤ੍ਵਾਤਿ ਅਨਾਪੁਚ੍ਛਾ. ਗਣਨ੍ਤਿ ਮਲ੍ਲਗਣਭਟਿਪੁਤ੍ਤਗਣਾਦਿਕਂ. ਪੂਗਨ੍ਤਿ ਧਮ੍ਮਗਣਂ. ਸੇਣਿਨ੍ਤਿ ਗਨ੍ਧਿਕਸੇਣਿਦੁਸ੍ਸਿਕਸੇਣਿਆਦਿਕਂ. ਯਤ੍ਥ ਯਤ੍ਥ ਹਿ ਰਾਜਾਨੋ ਗਣਾਦੀਨਂ ਗਾਮਨਿਗਮੇ ਨਿਯ੍ਯਾਤੇਨ੍ਤਿ ‘‘ਤੁਮ੍ਹੇਵ ਏਤ੍ਥ ਅਨੁਸਾਸਥਾ’’ਤਿ, ਤਤ੍ਥ ਤਤ੍ਥ ਤੇਯੇਵ ਇਸ੍ਸਰਾ ਹੋਨ੍ਤਿ, ਤਸ੍ਮਾ ਤੇ ਸਨ੍ਧਾਯ ਇਦਂ ਵੁਤ੍ਤਂ. ਏਤ੍ਥ ਚ ਰਾਜਾਨਂ ਵਾ ਗਣਾਦਿਕੇ ਵਾ ਅਪਲੋਕੇਤ੍ਵਾਪਿ ਭਿਕ੍ਖੁਨਿਸਙ੍ਘੋ ਅਪਲੋਕੇਤਬ੍ਬੋਵ. ਅਞ੍ਞਤ੍ਰ ਕਪ੍ਪਾਤਿ ਤਿਤ੍ਥਿਯੇਸੁ ਵਾ ਅਞ੍ਞਭਿਕ੍ਖੁਨੀਸੁ ਵਾ ਪਬ੍ਬਜਿਤਪੁਬ੍ਬਾ ਕਪ੍ਪਾ ਨਾਮ, ਤਂ ਠਪੇਤ੍ਵਾ ਅਞ੍ਞਂ ਉਪਸਮ੍ਪਾਦੇਨ੍ਤਿਯਾ ਗਣਆਚਰਿਨੀ ਪਤ੍ਤਚੀਵਰਪਰਿਯੇਸਨੇਸੁ ਸੀਮਾਸਮ੍ਮੁਤਿਯਾ ਞਤ੍ਤਿਯਾ ਚ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਂ, ਕਮ੍ਮਵਾਚਾਪਰਿਯੋਸਾਨੇ ਸਙ੍ਘਾਦਿਸੇਸੋ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਚੋਰਿਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਚੋਰਿਯਾ ਵੇਮਤਿਕਾਯ ਦੁਕ੍ਕਟਂ, ਤਥਾ ਅਚੋਰਿਯਾ ਚੋਰਿਸਞ੍ਞਾਯ ਚੇਵ ਵੇਮਤਿਕਾਯ ਚ. ਅਚੋਰਿਸਞ੍ਞਾਯ, ਅਜਾਨਨ੍ਤਿਯਾ, ਅਪਲੋਕੇਤ੍ਵਾ ਵੁਟ੍ਠਾਪੇਨ੍ਤਿਯਾ, ਕਪ੍ਪਂ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਚੋਰਿਤਾ, ਚੋਰਿਸਞ੍ਞਿਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਵੁਟ੍ਠਾਪਨਨ੍ਤਿ, ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਚੋਰਿਵੁਟ੍ਠਾਪਨਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਚੋਰਿਵੁਟ੍ਠਾਪਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਏਕਗਾਮਨ੍ਤਰਗਮਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਗਾਮਨ੍ਤਰਨ੍ਤਿਆਦੀਸੁ ਸਕਗਾਮਤੋ ਤਾਵ ਨਿਕ੍ਖਮਨ੍ਤਿਯਾ ਅਨਾਪਤ੍ਤਿ, ਨਿਕ੍ਖਮਿਤ੍ਵਾ ਪਨ ਅਞ੍ਞਂ ਗਾਮਂ ਗਚ੍ਛਨ੍ਤਿਯਾ ਪਦੇ ਪਦੇ ਦੁਕ੍ਕਟਂ, ਏਕੇਨ ਪਾਦੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਉਪਚਾਰੇ ਵਾ ਅਤਿਕ੍ਕਨ੍ਤੇ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ, ਤਤੋ ਨਿਕ੍ਖਮਿਤ੍ਵਾ ਪੁਨ ਸਕਗਾਮਂ ਪਵਿਸਨ੍ਤਿਯਾਪਿ ਏਸੇਵ ਨਯੋ. ਸਚੇ ਪਨ ਖਣ੍ਡਪਾਕਾਰੇਨ ਵਾ ਵਤਿਚ੍ਛਿਦ੍ਦੇਨ ਵਾ ਭਿਕ੍ਖੁਨਿਵਿਹਾਰਭੂਮਿਂਯੇਵ ਸਕ੍ਕਾ ਹੋਤਿ ਪਵਿਸਿਤੁਂ, ਏਵਂ ਪਵਿਸਮਾਨਾਯ ਕਪ੍ਪਿਯਭੂਮਿਯਾ ਪਵਿਟ੍ਠਾ ਨਾਮ ਹੋਤਿ, ਤਸ੍ਮਾ ਵਟ੍ਟਤਿ. ਬਹਿਗਾਮੇ ਠਤ੍ਵਾ ਯਂਕਿਞ੍ਚਿ ਸਕਗਾਮਂ ਵਾ ਪਰਗਾਮਂ ਵਾ ਅਕਪ੍ਪਿਯਭੂਮਿਂ ਪਦਸਾ ਪਵਿਸਨ੍ਤਿਯਾ ਆਪਤ੍ਤੀਤਿ ਅਯਮੇਤ੍ਥ ਸਙ੍ਖੇਪੋ.

ਨਦਿਪਾਰਗਮਨੇ ਵੁਤ੍ਤਲਕ੍ਖਣਾਯ ਨਦਿਯਾ ਦੁਤਿਯਿਕਂ ਵਿਨਾ ਪਰਤੀਰਂ ਗਚ੍ਛਨ੍ਤਿਯਾ ਵਾ ਅਨ੍ਤਰਾਨਦਿਯਂ ਦੁਤਿਯਿਕਾਯ ਸਦ੍ਧਿਂ ਭਣ੍ਡਿਤ੍ਵਾ ਪੁਨ ਓਰਿਮਤੀਰਮੇਵ ਪਚ੍ਚੁਤ੍ਤਰਨ੍ਤਿਯਾ ਵਾ ਪਠਮਪਾਦਂ ਉਦ੍ਧਰਿਤ੍ਵਾ ਤੀਰੇ ਠਪਿਤਕ੍ਖਣੇ ਥੁਲ੍ਲਚ੍ਚਯਂ, ਦੁਤਿਯਪਾਦੁਦ੍ਧਾਰੇ ਸਙ੍ਘਾਦਿਸੇਸੋ. ਇਦ੍ਧਿਸੇਤੁਯਾਨਨਾਵਾਹਿ ਪਨ ਪਰਤੀਰਂ ਓਤਰਿਤੁਂ, ਨਹਾਨਾਦਿਕਾਰਣੇਨ ਚ ਓਤਿਣ੍ਣਾਯ ਓਰਿਮਤੀਰਂ ਪਦਸਾਪਿ ਪਚ੍ਚੁਤ੍ਤਰਿਤੁਂ ਵਟ੍ਟਤਿ.

ਰਤ੍ਤਿਵਿਪ੍ਪਵਾਸੇ ‘‘ਪੁਰੇਅਰੁਣੇਯੇਵ ਦੁਤਿਯਿਕਾਯ ਹਤ੍ਥਪਾਸਂ ਓਕ੍ਕਮਿਸ੍ਸਾਮੀ’’ਤਿ ਆਭੋਗਂ ਵਿਨਾ ਏਕਗਬ੍ਭੇਪਿ ਦੁਤਿਯਿਕਾਯ ਹਤ੍ਥਪਾਸਾਤਿਕ੍ਕਮੇ ਠਤ੍ਵਾ ਅਰੁਣਂ ਉਟ੍ਠਾਪੇਨ੍ਤਿਯਾ ਆਪਤ੍ਤਿ.

ਏਕਾ ਵਾ ਗਣਮ੍ਹਾਤਿ ਏਤ੍ਥ ਪਨ ਏਕਾ ਭਿਕ੍ਖੁਨੀਪਿ ਗਣੋਯੇਵ. ਓਹੀਯੇਯ੍ਯਾਤਿ ਅਵਹੀਯੇਯ੍ਯ, ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ ਵਿਜਹੇਯ੍ਯਾਤਿ ਅਤ੍ਥੋ. ਤਸ੍ਮਾ ਇਨ੍ਦਖੀਲਾਤਿਕ੍ਕਮਤੋ ਪਟ੍ਠਾਯ ਬਹਿਗਾਮੇ ਰੁਕ੍ਖਥਮ੍ਭਸਾਣਿਪਾਕਾਰਾਦਿਅਨ੍ਤਰਿਤਭਾਵੇਨਾਪਿ ਦੁਤਿਯਿਕਾਯ ਦਸ੍ਸਨੂਪਚਾਰੇ ਵਿਜਹਿਤੇ ਸਚੇਪਿ ਸਵਨੂਪਚਾਰੋ ਅਤ੍ਥਿ, ਆਪਤ੍ਤਿਯੇਵ. ਅਜ੍ਝੋਕਾਸੇ ਪਨ ਦੂਰੇਪਿ ਦਸ੍ਸਨੂਪਚਾਰੋ ਹੋਤਿ, ਤਤ੍ਥ ਮਗ੍ਗਮੂਲ਼੍ਹਸਦ੍ਦੇਨ ਵਿਯ ਧਮ੍ਮਸ੍ਸਵਨਾਰੋਚਨਸਦ੍ਦੇਨ ਵਿਯ ਚ ‘ਅਯ੍ਯੇ’ਤਿ ਸਦ੍ਦਾਯਨ੍ਤਿਯਾ ਸਦ੍ਦਸ੍ਸਵਨਾਤਿਕ੍ਕਮੇ ਆਪਤ੍ਤਿਯੇਵ. ਸਚੇ ਪਨ ਮਗ੍ਗਂ ਗਚ੍ਛਨ੍ਤੀ ਓਹੀਯਿਤ੍ਵਾ ‘‘ਇਦਾਨਿ ਪਾਪੁਣਿਸ੍ਸਾਮੀ’’ਤਿ ਸਉਸ੍ਸਾਹਾ ਅਨੁਬਨ੍ਧਤਿ, ਵਟ੍ਟਤਿ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਗਾਮਨ੍ਤਰਗਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਏਕਾ ਵਾ ਨਦਿਪਾਰ’’ਨ੍ਤਿਆਦਿਕਾ ਏਤ੍ਥ ਤਿਵਿਧਾ ਅਨੁਪਞ੍ਞਤ੍ਤਿ, ਪੁਰੇ ਅਰੁਣੇ ਸਕਗਾਮਤੋ ਨਿਕ੍ਖਮਿਤ੍ਵਾ ਅਰੁਣੁਗ੍ਗਮਨਕਾਲੇ ਗਾਮਨ੍ਤਰਪਰਿਯਾਪਨ੍ਨਂ ਨਦਿਪਾਰਂ ਓਕ੍ਕਮਨਨ੍ਤਿਯਾ ਪਨ ਚਤਸ੍ਸੋਪਿ ਆਪਤ੍ਤਿਯੋ ਏਕਕ੍ਖਣੇਯੇਵ ਹੋਨ੍ਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਿਕ੍ਖਾਪਦਾ ਬੁਦ੍ਧਵਰੇਨ ਵਣ੍ਣਿਤਾ;

ਸਙ੍ਘਾਦਿਸੇਸਾ ਚਤੁਰੋ ਭਵੇਯ੍ਯੁਂ;

ਆਪਜ੍ਜੇਯ੍ਯ ਏਕਪਯੋਗੇਨ ਸਬ੍ਬਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯);

ਏਤੇਨੁਪਾਯੇਨ ਤਿਣ੍ਣਂ, ਦ੍ਵਿਨ੍ਨਞ੍ਚ ਏਕਤੋਭਾਵੋ ਵੇਦਿਤਬ੍ਬੋ. ਦੁਤਿਯਿਕਾਯ ਪਨ ਪਕ੍ਕਨ੍ਤਾਯ ਵਾ ਵਿਬ੍ਭਨ੍ਤਾਯ ਵਾ ਕਾਲਙ੍ਕਤਾਯ ਵਾ ਪਕ੍ਖਸਙ੍ਕਨ੍ਤਾਯ ਵਾ ਆਪਦਾਸੁ ਵਾ ਗਾਮਨ੍ਤਰਗਮਨਾਦੀਨਿ ਕਰੋਨ੍ਤਿਯਾ ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਨ੍ਤਰਾਯੇਨ ਏਕਤੋਭਾਵੋ, ਗਾਮਨ੍ਤਰਗਮਨਾਦੀਸੁ ਅਞ੍ਞਤਰਤਾਪਜ੍ਜਨਂ, ਆਪਦਾਯ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਪਣ੍ਣਤ੍ਤਿਵਜ੍ਜਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਏਕਗਾਮਨ੍ਤਰਗਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਉਕ੍ਖਿਤ੍ਤਕਓਸਾਰਣਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਉਕ੍ਖਿਤ੍ਤਨ੍ਤਿ ਆਪਤ੍ਤਿਯਾ ਅਦਸ੍ਸਨਾਦੀਸੁ ਉਕ੍ਖਿਤ੍ਤਂ. ਅਨਞ੍ਞਾਯ ਗਣਸ੍ਸ ਛਨ੍ਦਨ੍ਤਿ ਤਸ੍ਸੇਵ ਕਾਰਕਸਙ੍ਘਸ੍ਸ ਛਨ੍ਦਂ ਅਜਾਨਿਤ੍ਵਾ. ਓਸਾਰੇਯ੍ਯਾਤਿ ਓਸਾਰਣਕਮ੍ਮਂ ਕਰੇਯ੍ਯ. ਤਸ੍ਸਾ ਏਵਂ ਕਰੋਨ੍ਤਿਯਾ, ਗਣਪਰਿਯੇਸਨੇ ਸੀਮਾਸਮ੍ਮੁਤਿਯਾ ਞਤ੍ਤਿਯਾ ਚ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਂ, ਕਮ੍ਮਵਾਚਾਪਰਿਯੋਸਾਨੇ ਸਙ੍ਘਾਦਿਸੇਸੋ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਵਂ ਓਸਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਸਙ੍ਘਾਦਿਸੇਸਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਕਾਰਕਸਙ੍ਘਂ ਵਾ ਆਪੁਚ੍ਛਿਤ੍ਵਾ, ਗਣਸ੍ਸ ਵਾ ਛਨ੍ਦਂ ਜਾਨਿਤ੍ਵਾ, ਵਤ੍ਤੇ ਵਾ ਵਤ੍ਤਨ੍ਤਿਂ, ਅਸਨ੍ਤੇ ਕਾਰਕਸਙ੍ਘੇ ਓਸਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਧਮ੍ਮਕਮ੍ਮੇਨ ਉਕ੍ਖਿਤ੍ਤਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਓਸਾਰਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਙ੍ਘਭੇਦਸਿਕ੍ਖਾਪਦੇ ਵੁਤ੍ਤਨਯਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਉਕ੍ਖਿਤ੍ਤਕਓਸਾਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਭੋਜਨਪ੍ਪਟਿਗ੍ਗਹਣਪਠਮਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਅਵਸ੍ਸੁਤਾਤਿ ਛਨ੍ਦਰਾਗੇਨ ਤਿਨ੍ਤਾ. ਅਵਸ੍ਸੁਤਸ੍ਸਾਤਿ ਤਾਦਿਸਸ੍ਸੇਵ. ਖਾਦੇਯ੍ਯ ਵਾ ਭੁਞ੍ਜੇਯ੍ਯ ਵਾਤਿ ਏਤ੍ਥ ਪਟਿਗ੍ਗਹਣੇ ਥੁਲ੍ਲਚ੍ਚਯਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਸਙ੍ਘਾਦਿਸੇਸੋ.

ਸਾਵਤ੍ਥਿਯਂ ਸੁਨ੍ਦਰੀਨਨ੍ਦਂ ਆਰਬ੍ਭ ਅਵਸ੍ਸੁਤਾਯ ਅਵਸ੍ਸੁਤਸ੍ਸ ਹਤ੍ਥਤੋ ਆਮਿਸਪ੍ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਏਕਤੋਅਵਸ੍ਸੁਤੇ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਥੁਲ੍ਲਚ੍ਚਯਂ, ਯਕ੍ਖਪੇਤਪਣ੍ਡਕਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਾਨਂ ਹਤ੍ਥਤੋ ਉਭਤੋਅਵਸ੍ਸੁਤੇਪਿ ਸਤਿ ਏਸੇਵ ਨਯੋ. ਤਤ੍ਥ ਪਨ ਏਕਤੋਅਵਸ੍ਸੁਤੇ ਸਤਿ ਦੁਕ੍ਕਟਂ, ਸਬ੍ਬਤ੍ਥ ਉਦਕਦਨ੍ਤਪੋਨਗ੍ਗਹਣੇਪਿ ਪਰਿਭੋਗੇਪਿ ਦੁਕ੍ਕਟਮੇਵ. ਉਭੋਸੁ ਅਨਵਸ੍ਸੁਤੇਸੁ, ‘‘ਅਨਵਸ੍ਸੁਤੋ’’ਤਿ ਵਾ ਞਤ੍ਵਾ ਗਣ੍ਹਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਦਕਦਨ੍ਤਪੋਨਤੋ ਅਞ੍ਞਂ ਅਜ੍ਝੋਹਰਣੀਯਂ, ਉਭਤੋਅਵਸ੍ਸੁਤਤਾ, ਸਹਤ੍ਥਾ ਗਹਣਂ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ.

ਭੋਜਨਪ੍ਪਟਿਗ੍ਗਹਣਪਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਭੋਜਨਪ੍ਪਟਿਗ੍ਗਹਣਦੁਤਿਯਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਯਤੋ ਤ੍ਵਨ੍ਤਿ ਯਸ੍ਮਾ ਤ੍ਵਂ. ਇਙ੍ਘਾਤਿ ਉਯ੍ਯੋਜਨਤ੍ਥੇ ਨਿਪਾਤੋ. ਅਯਮ੍ਪੀਤਿ ਯਾ ਏਵਂ ਉਯ੍ਯੋਜੇਤਿ, ਸਾ ਏਵਂ ਉਯ੍ਯੋਜਨੇਨ ਚ ਤੇਨ ਵਚਨੇਨ ਇਤਰਿਸ੍ਸਾ ਪਟਿਗ੍ਗਹਣੇਨ ਚ ਦੁਕ੍ਕਟਾਨਿ, ਅਜ੍ਝੋਹਾਰਗਣਨਾਯ ਥੁਲ੍ਲਚ੍ਚਯਾਨਿ ਚ ਆਪਜ੍ਜਿਤ੍ਵਾ ਭੋਜਨਪਰਿਯੋਸਾਨੇ ਸਙ੍ਘਾਦਿਸੇਸਂ ਆਪਜ੍ਜਤਿ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਏਵਂ ਉਯ੍ਯੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਮੇਵ, ਪੁਰਿਸਸ੍ਸ ਵਾ ਯਕ੍ਖਾਦੀਨਂ ਵਾ ਹਤ੍ਥਤੋ ਉਦਕਦਨ੍ਤਪੋਨਪ੍ਪਟਿਗ੍ਗਹਣੁਯ੍ਯੋਜਨੇ ਚ ਤੇਸਂ ਪਰਿਭੋਗੇ ਚ ਦੁਕ੍ਕਟਂ, ਏਸ ਨਯੋ ਯਕ੍ਖਾਦੀਨਂ ਹਤ੍ਥਤੋ ਅਵਸੇਸਗ੍ਗਹਣਤ੍ਥਂ ਉਯ੍ਯੋਜਨੇ, ਤੇਸਂ ਗਹਣੇ, ਅਜ੍ਝੋਹਾਰੇ ਚ. ਭੋਜਨਪਰਿਯੋਸਾਨੇ ਪਨ ਥੁਲ੍ਲਚ੍ਚਯਂ. ‘‘ਅਨਵਸ੍ਸੁਤੋ’’ਤਿ ਞਤ੍ਵਾ ਵਾ, ‘‘ਕੁਪਿਤਾ ਨ ਪਟਿਗ੍ਗਣ੍ਹਤੀ’’ਤਿ ਵਾ, ‘‘ਕੁਲਾਨੁਦ੍ਦਯਤਾਯ ਨ ਪਟਿਗ੍ਗਣ੍ਹਤੀ’’ਤਿ ਵਾ ਉਯ੍ਯੋਜੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਮਨੁਸ੍ਸਪੁਰਿਸਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ, ‘‘ਖਾਦਨੀਯਂ ਭੋਜਨੀਯਂ ਗਹੇਤ੍ਵਾ ਭੁਞ੍ਜਾ’’ਤਿ ਉਯ੍ਯੋਜਨਾ, ਤੇਨ ਵਚਨੇਨ ਗਹੇਤ੍ਵਾ ਇਤਰਿਸ੍ਸਾ ਭੋਜਨਪਰਿਯੋਸਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.

ਭੋਜਨਪ੍ਪਟਿਗ੍ਗਹਣਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭-੮-੯. ਸਞ੍ਚਰਿਤ੍ਤਾਦਿਸਿਕ੍ਖਾਪਦਵਣ੍ਣਨਾ

ਸਤ੍ਤਮਅਟ੍ਠਮਨਵਮਸਿਕ੍ਖਾਪਦਾਨਂ ਸਞ੍ਚਰਿਤ੍ਤਾਦਿਤ੍ਤਯੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

ਸਞ੍ਚਰਿਤ੍ਤਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਸਿਕ੍ਖਂਪਚ੍ਚਾਚਿਕ੍ਖਣਸਿਕ੍ਖਾਪਦਵਣ੍ਣਨਾ

ਦਸਮੇ ਕਿਂਨੁਮਾਵ ਸਮਣਿਯੋਤਿ ਕਿਂਨੁ ਇਮਾ ਏਵ ਸਮਣਿਯੋ. ਤਾਸਾਹਨ੍ਤਿ ਤਾਸਂ ਅਹਂ. ਯਾਵਤਤਿਯਕਪਦਤ੍ਥੋ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ (ਕਙ੍ਖਾ. ਅਟ੍ਠ. ਨਿਗਮਨਵਣ੍ਣਨਾ), ਅਵਸੇਸਵਿਨਿਚ੍ਛਯੋ ਚ ਤਤ੍ਥੇਵ ਸਙ੍ਘਭੇਦਸਿਕ੍ਖਾਪਦਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ, ਇਦਂ ਪਨ ਸਾਵਤ੍ਥਿਯਂ ਚਣ੍ਡਕਾਲ਼ਿਭਿਕ੍ਖੁਨਿਂ (ਪਾਚਿ. ੭੦੯) ਆਰਬ੍ਭ ‘‘ਬੁਦ੍ਧਂ ਪਚ੍ਚਾਚਿਕ੍ਖਾਮੀ’’ਤਿਆਦਿਵਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਏਵਂ ਵਚਨਮੇਵ ਚੇਤ੍ਥ ਚਤੂਸੁ ਅਙ੍ਗੇਸੁ ਪਠਮਂ ਅਙ੍ਗਨ੍ਤਿ ਅਯਂ ਵਿਸੇਸੋ, ਸੇਸਂ ਤਾਦਿਸਮੇਵਾਤਿ.

ਸਿਕ੍ਖਂਪਚ੍ਚਾਚਿਕ੍ਖਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੧. ਅਧਿਕਰਣਕੁਪਿਤਸਿਕ੍ਖਾਪਦਵਣ੍ਣਨਾ

ਏਕਾਦਸਮੇ ਕਿਸ੍ਮਿਞ੍ਚਿਦੇਵ ਅਧਿਕਰਣੇਤਿ ਚਤੁਨ੍ਨਂ ਅਞ੍ਞਤਰਸ੍ਮਿਂ. ਪਚ੍ਚਾਕਤਾਤਿ ਪਰਾਜਿਤਾ. ਇਦਮ੍ਪਿ ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ‘‘ਛਨ੍ਦਗਾਮਿਨਿਯੋ ਚ ਭਿਕ੍ਖੁਨਿਯੋ’’ਤਿਆਦਿਵਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਦਸਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਅਧਿਕਰਣਕੁਪਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੨. ਪਾਪਸਮਾਚਾਰਪਠਮਸਿਕ੍ਖਾਪਦਵਣ੍ਣਨਾ

ਦ੍ਵਾਦਸਮੇ ਸਂਸਟ੍ਠਾਤਿ ਪਬ੍ਬਜਿਤਾਨਂ ਅਨਨੁਲੋਮੇਨ ਗਿਹੀਨਂ ਕੋਟ੍ਟਨਪਚਨਸਾਸਨਹਰਣਾਦਿਨਾ ਕਾਯਿਕਵਾਚਸਿਕੇਨ ਮਿਸ੍ਸੀਭੂਤਾ. ਪਾਪੋ ਕਾਯਿਕਵਾਚਸਿਕੋ ਆਚਾਰੋ ਏਤਾਸਨ੍ਤਿ ਪਾਪਾਚਾਰਾ. ਪਾਪੋ ਕਿਤ੍ਤਿਸਦ੍ਦੋ ਏਤਾਸਨ੍ਤਿ ਪਾਪਸਦ੍ਦਾ. ਪਾਪੋ ਆਜੀਵਸਙ੍ਖਾਤੋ ਸਿਲੋਕੋ ਏਤਾਸਨ੍ਤਿ ਪਾਪਸਿਲੋਕਾ. ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾਤਿ ਅਞ੍ਞਮਞ੍ਞਿਸ੍ਸਾ ਕਮ੍ਮੇ ਕਰਿਯਮਾਨੇ ਪਟਿਕ੍ਕੋਸਨੇਨ ਵਿਹੇਸਿਕਾ. ਵਜ੍ਜਪ੍ਪਟਿਚ੍ਛਾਦਿਕਾਤਿ ਖੁਦ੍ਦਾਨੁਖੁਦ੍ਦਕਸ੍ਸ ਵਜ੍ਜਸ੍ਸ ਪਟਿਚ੍ਛਾਦਿਕਾ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਸਂਸਟ੍ਠਵਿਹਾਰਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥਾਪਿ ਦਸਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਸਮਨੁਭਾਸਨਕਮ੍ਮਕਾਲੇ ਪਨ ਦ੍ਵੇਤਿਸ੍ਸੋ ਏਕਤੋ ਸਮਨੁਭਾਸਿਤਬ੍ਬਾਤਿ.

ਪਾਪਸਮਾਚਾਰਪਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੩. ਪਾਪਸਮਾਚਾਰਦੁਤਿਯਸਿਕ੍ਖਾਪਦਵਣ੍ਣਨਾ

ਤੇਰਸਮੇ ਏਵਂ ਵਦੇਯ੍ਯਾਤਿ ਤਾ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਦੇਯ੍ਯ. ਏਵਾਚਾਰਾਤਿ ਏਵਂਆਚਾਰਾ, ਯਾਦਿਸੋ ਤੁਮ੍ਹਾਕਂ ਆਚਾਰੋ, ਤਾਦਿਸੋ ਆਚਾਰੋਤਿ ਅਤ੍ਥੋ, ਏਸ ਨਯੋ ਸਬ੍ਬਤ੍ਥ. ਉਞ੍ਞਾਯਾਤਿ ਅਵਞ੍ਞਾਯ ਨੀਚਂ ਕਤ੍ਵਾ ਜਾਨਨਾਯ. ਪਰਿਭਵੇਨਾਤਿ ‘‘ਕਿਂ ਇਮਾ ਕਰਿਸ੍ਸਨ੍ਤੀ’’ਤਿ ਏਵਂ ਪਰਿਭਵਿਤ੍ਵਾ ਜਾਨਨੇਨ. ਅਕ੍ਖਨ੍ਤਿਯਾਤਿ ਅਸਹਨਤਾਯ, ਕੋਧੇਨਾਤਿ ਅਤ੍ਥੋ. ਵੇਭਸ੍ਸਿਯਾਤਿ ਬਲਵਨ੍ਤਸ੍ਸ ਭਾਵੇਨ, ਅਤ੍ਤਨੋ ਬਲਪ੍ਪਕਾਸਨੇਨ ਸਮੁਤ੍ਰਾਸੇਨਾਤਿ ਅਤ੍ਥੋ. ਦੁਬ੍ਬਲ੍ਯਾਤਿ ਤੁਮ੍ਹਾਕਂ ਦੁਬ੍ਬਲਭਾਵੇਨ, ਸਬ੍ਬਤ੍ਥ ਉਞ੍ਞਾਯ ਚ ਪਰਿਭਵੇਨ ਚਾਤਿ ਏਵਂ ਸਮੁਚ੍ਚਯਤ੍ਥੋ ਦਟ੍ਠਬ੍ਬੋ. ਵਿਵਿਚ੍ਚਥਾਤਿ ਨਾਨਾ ਹੋਥ, ਅਨਨੁਲੋਮਿਕਂ ਕਾਯਿਕਵਾਚਸਿਕਸਂਸਗ੍ਗਂ ਪਜਹਥਾਤਿ ਅਤ੍ਥੋ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ‘‘ਸਂਸਟ੍ਠਾਵ, ਅਯ੍ਯੇ, ਤੁਮ੍ਹੇ ਵਿਹਰਥ, ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥਾ’’ਤਿ ਉਯ੍ਯੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥਾਪਿ ਦਸਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਪਾਪਸਮਾਚਾਰਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੪. ਸਙ੍ਘਭੇਦਕਾਦਿਸਿਕ੍ਖਾਪਦਵਣ੍ਣਨਾ

ਸਙ੍ਘਭੇਦਾਦੀਸੁ ਚਤੂਸੁ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਕੇਵਲਞ੍ਹਿ ਭਿਕ੍ਖੁਨੀ ਸਙ੍ਘਂ ਨ ਭਿਨ੍ਦਤਿ, ਭੇਦਾਯ ਪਨ ਪਰਕ੍ਕਮਤਿ ਚੇਵ ਅਨੁਵਤ੍ਤਤਿ ਚ. ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਸਤ੍ਤਰਸ ਸਙ੍ਘਾਦਿਸੇਸਾ ਧਮ੍ਮਾਤਿ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾ ਸਾਧਾਰਣਾ ਸਤ੍ਤ, ਅਸਾਧਾਰਣਾ ਦਸਾਤਿ ਏਵਂ ਸਤ੍ਤਰਸ. ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬਨ੍ਤਿ ਭਿਕ੍ਖੁਨਿਯਾ ਹਿ ਆਪਤ੍ਤਿਂ ਛਾਦੇਨ੍ਤਿਯਾਪਿ ਪਰਿਵਾਸੋ ਨਾਮ ਨਤ੍ਥਿ, ਛਾਦਨਪਚ੍ਚਯਾਪਿ ਨ ਦੁਕ੍ਕਟਂ ਆਪਜ੍ਜਤਿ, ਤਸ੍ਮਾ ਛਾਦੇਤ੍ਵਾਪਿ ਅਛਾਦੇਤ੍ਵਾਪਿ ਏਕਂ ਪਕ੍ਖਮਾਨਤ੍ਤਮੇਵ ਚਰਿਤਬ੍ਬਂ. ਤਂ ਭਿਕ੍ਖੁਨੀਹਿ ਅਤ੍ਤਨੋ ਸੀਮਂ ਸੋਧੇਤ੍ਵਾ ਵਿਹਾਰਸੀਮਾਯ ਵਾ, ਸੋਧੇਤੁਂ ਅਸਕ੍ਕੋਨ੍ਤੀਹਿ ਖਣ੍ਡਸੀਮਾਯ ਵਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੁਵਗ੍ਗਂ ਗਣਂ ਸਨ੍ਨਿਪਾਤਾਪੇਤ੍ਵਾ ਦਾਤਬ੍ਬਂ. ਸਚੇ ਏਕਾ ਆਪਤ੍ਤਿ ਹੋਤਿ, ਏਕਿਸ੍ਸਾ ਵਸੇਨ, ਸਚੇ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਏਕਵਤ੍ਥੁਕਾ ਵਾ ਨਾਨਾਵਤ੍ਥੁਕਾ ਵਾ, ਤਾਸਂ ਤਾਸਂ ਵਸੇਨ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਵਤ੍ਥੁਗੋਤ੍ਤਨਾਮਆਪਤ੍ਤਿਭੇਦੇਸੁ ਯਂ ਯਂ ਇਚ੍ਛਤਿ, ਤਂ ਤਂ ਆਦਾਯ ਯੋਜਨਾ ਕਾਤਬ੍ਬਾ.

ਤਤ੍ਰਿਦਂ ਪਠਮਾਪਤ੍ਤਿਵਸੇਨ ਮੁਖਮਤ੍ਤਨਿਦਸ੍ਸਨਂ – ਤਾਯ ਆਪਨ੍ਨਾਯ ਭਿਕ੍ਖੁਨਿਯਾ ਭਿਕ੍ਖੁਨਿਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੁਨੀਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸਵਚਨੀਯੋ ‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਉਸ੍ਸਯਵਾਦਂ, ਸਾਹਂ, ਅਯ੍ਯੇ, ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ ਯਾਚਾਮੀ’’ਤਿ, ਏਵਂ ਤਿਕ੍ਖਤ੍ਤੁਂ ਯਾਚਾਪੇਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਏਕਂ ਆਪਤ੍ਤਿਂ ਆਪਜ੍ਜਿਂ ਉਸ੍ਸਯਵਾਦਂ, ਸਾ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ ਯਾਚਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ ਦਦੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ…ਪੇ… ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ, ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ…ਪੇ… ਸਾ ਭਾਸੇਯ੍ਯ. ਦਿਨ੍ਨਂ ਸਙ੍ਘੇਨ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਕਮ੍ਮਵਾਚਾਪਰਿਯੋਸਾਨੇ ‘‘ਵਤ੍ਤਂ ਸਮਾਦਿਯਾਮਿ, ਮਾਨਤ੍ਤਂ ਸਮਾਦਿਯਾਮੀ’’ਤਿ ਸਮਾਦਿਯਿਤ੍ਵਾ ਸਙ੍ਘਸ੍ਸ ਆਰੋਚੇਤ੍ਵਾ ਨਿਕ੍ਖਿਤ੍ਤਵਤ੍ਤੇਨ ਤਾਵ ਵਸਿਤੁਕਾਮਾਯ ਤਤ੍ਥੇਵ ਸਙ੍ਘਮਜ੍ਝੇ ਵਾ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਏਕਭਿਕ੍ਖੁਨਿਯਾ ਵਾ ਦੁਤਿਯਿਕਾਯ ਵਾ ਸਨ੍ਤਿਕੇ ‘‘ਵਤ੍ਤਂ ਨਿਕ੍ਖਿਪਾਮਿ, ਮਾਨਤ੍ਤਂ ਨਿਕ੍ਖਿਪਾਮੀ’’ਤਿ ਨਿਕ੍ਖਿਪਿਤਬ੍ਬਂ. ਅਞ੍ਞਿਸ੍ਸਾ ਪਨ ਆਗਨ੍ਤੁਕਾਯ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ, ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ, ਤਤੋ ਪੁਰੇਅਰੁਣੇਯੇਵ ਚਤੂਹਿ ਭਿਕ੍ਖੁਨੀਹਿ ਤਂ ਭਿਕ੍ਖੁਨਿਂ ਗਹੇਤ੍ਵਾ ਗਾਮੂਪਚਾਰਤੋ ਚ ਭਿਕ੍ਖੂਨਂ ਵਿਹਾਰੂਪਚਾਰਤੋ ਚ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਾ ਓਕ੍ਕਮ੍ਮ ਗੁਮ੍ਬਵਤਿਆਦੀਹਿ ਪਟਿਚ੍ਛਨ੍ਨੇ ਓਕਾਸੇ ਨਿਸੀਦਿਤਬ੍ਬਂ. ਚਤੂਹਿ ਭਿਕ੍ਖੂਹਿਪਿ ਤਤ੍ਥ ਗਨ੍ਤਬ੍ਬਂ, ਗਨ੍ਤ੍ਵਾ ਭਿਕ੍ਖੁਨੀਨਂ ਅਵਿਦੂਰੇ ਵਿਸੁਂ ਨਿਸੀਦਿਤਬ੍ਬਂ. ਅਥ ਤਾਯ ਭਿਕ੍ਖੁਨਿਯਾ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ ਭਿਕ੍ਖੁਨਿਸਙ੍ਘਸ੍ਸ ਤਾਵ ਏਵਂ ਆਰੋਚੇਤਬ੍ਬਂ –

‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਉਸ੍ਸਯਵਾਦਂ, ਸਾਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ ਯਾਚਿਂ, ਤਸ੍ਸਾ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਉਸ੍ਸਯਵਾਦਾਯ ਪਕ੍ਖਮਾਨਤ੍ਤਂ ਅਦਾਸਿ, ਸਾਹਂ ਮਾਨਤ੍ਤਂ ਚਰਾਮਿ, ਵੇਦਯਾਮਹਂ, ਅਯ੍ਯੇ, ‘ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ.

ਤਤੋ ਭਿਕ੍ਖੁਸਙ੍ਘਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਆਰੋਚੇਤਬ੍ਬਂ ‘‘ਅਹਂ, ਅਯ੍ਯਾ, ਏਕਂ ਆਪਤ੍ਤਿਂ ਆਪਜ੍ਜਿਂ…ਪੇ… ਵੇਦਯਾਮਹਂ, ਅਯ੍ਯਾ, ‘ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ. ਆਰੋਚੇਤ੍ਵਾ ਭਿਕ੍ਖੁਨਿਸਙ੍ਘਸ੍ਸੇਵ ਸਨ੍ਤਿਕੇ ਨਿਸੀਦਿਤਬ੍ਬਂ, ਤਤੋ ਪਟ੍ਠਾਯ ਭਿਕ੍ਖੂਸੁ ਵਾ, ਦੁਤਿਯਿਕਂ ਠਪੇਤ੍ਵਾ ਭਿਕ੍ਖੁਨੀਸੁ ਵਾ ਪਕ੍ਕਨ੍ਤਾਸੁਪਿ ਉਭਤੋਸਙ੍ਘੇ ਮਾਨਤ੍ਤਂ ਚਿਣ੍ਣਮੇਵ ਹੋਤਿ. ਯਾਵ ਅਰੁਣਂ ਨ ਉਟ੍ਠਹਤਿ, ਤਾਵ ਯਂ ਪਠਮਂ ਪਸ੍ਸਤਿ ਭਿਕ੍ਖੁਂ ਵਾ ਭਿਕ੍ਖੁਨਿਂ ਵਾ, ਤਸ੍ਸਾ ਆਰੋਚੇਤਬ੍ਬਂ. ਉਟ੍ਠਿਤੇ ਅਰੁਣੇ ਵਤ੍ਤਂ ਨਿਕ੍ਖਿਪਿਤ੍ਵਾ ਉਪਸ੍ਸਯਂ ਗਨ੍ਤਬ੍ਬਂ, ਏਵਂ ਪਞ੍ਚਦਸ ਅਰੁਣਾ ਗਹੇਤਬ੍ਬਾ.

ਅਨਿਕ੍ਖਿਤ੍ਤਵਤ੍ਤਾਯ ਪਨ ਆਗਨ੍ਤੁਕੇਸੁ ਅਸਤਿ ਚਤੁਨ੍ਨਂ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦੇਵਸਿਕਂ ਆਰੋਚੇਤ੍ਵਾ, ਆਗਨ੍ਤੁਕੇਸੁ ਸਤਿ ਸਬ੍ਬੇਸਮ੍ਪਿ ਆਗਨ੍ਤੁਕਾਨਂ ਆਰੋਚੇਨ੍ਤਿਯਾ ਪਞ੍ਚਦਸ ਦਿਵਸਾਨਿ ਪਾਰਿਵਾਸਿਕਕ੍ਖਨ੍ਧਕੇ (ਚੂਲ਼ਵ. ੭੫ ਆਦਯੋ) ਵੁਤ੍ਤਨਯੇਨੇਵ ਸਮ੍ਮਾ ਵਤ੍ਤਿਤਬ੍ਬਨ੍ਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੭੫ ਆਦਯੋ) ਵੁਤ੍ਤੋ, ਚਿਣ੍ਣਮਾਨਤ੍ਤਾਯ ਭਿਕ੍ਖੁਨਿਯਾਤਿ ਯਦਾ ਏਵਂ ਚਿਣ੍ਣਮਾਨਤ੍ਤਾ ਭਿਕ੍ਖੁਨੀ ਹੋਤਿ, ਅਥਸ੍ਸਾ ਯਤ੍ਥ ਸਿਯਾ ਵੀਸਤਿਗਣੋ ਭਿਕ੍ਖੁਨਿਸਙ੍ਘੋਤਿ ਵੁਤ੍ਤਨਯੇਨੇਵ ਅਬ੍ਭਾਨਕਮ੍ਮਂ ਕਾਤਬ੍ਬਂ, ਸੇਸਂ ਉਤ੍ਤਾਨਮੇਵਾਤਿ.

ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਭਿਕ੍ਖੁਨਿਪਾਤਿਮੋਕ੍ਖੇ

ਸਙ੍ਘਾਦਿਸੇਸਵਣ੍ਣਨਾ ਨਿਟ੍ਠਿਤਾ.