ਪਾਰਾਜਿਕਕਣ੍ਡੋ

ਭਿਕ੍ਖੁਨੀਨਂ ਹਿਤਤ੍ਥਾਯ, ਪਾਤਿਮੋਕ੍ਖਂ ਪਕਾਸਯਿ;

ਯਂ ਨਾਥੋ, ਤਸ੍ਸ ਦਾਨੇਸੋ, ਸਮ੍ਪਤ੍ਤੋ ਵਣ੍ਣਨਾਕ੍ਕਮੋ.

ਸਾਧਾਰਣਪਾਰਾਜਿਕਂ

੧…ਪੇ…੪. ਮੇਥੁਨਧਮ੍ਮਸਿਕ੍ਖਾਪਦਵਣ੍ਣਨਾ

ਤਤ੍ਥ ਸੁਣਾਤੁ ਮੇਤਿਆਦੀਨਂ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਕੇਵਲਞ੍ਹਿ, ਭਨ੍ਤੇ, ਅਯ੍ਯੇਤਿਆਦਿਵਸੇਨ ਤਸ੍ਮਿਞ੍ਚ ਇਧ ਚ ਅਭਿਲਾਪਮਤ੍ਤਮੇਵ ਲਿਙ੍ਗਭੇਦਮਤ੍ਤਞ੍ਚ ਵਿਸੇਸੋ. ਯਸ੍ਮਾ ਚ ਭਿਕ੍ਖੁਨਿਯਾ ਸਿਕ੍ਖਾਪਚ੍ਚਕ੍ਖਾਨਂ ਨਾਮ ਨਤ੍ਥਿ, ਤਸ੍ਮਾ ਭਿਕ੍ਖੁਨੀਨਂ ‘‘ਸਿਕ੍ਖਾਸਾਜੀਵਸਮਾਪਨ੍ਨਾ ਸਿਕ੍ਖਂ ਅਪਚ੍ਚਕ੍ਖਾਯ ਦੁਬ੍ਬਲ੍ਯਂ ਅਨਾਵਿਕਤ੍ਵਾ’’ਤਿ ਅਵਤ੍ਵਾ ਯਾ ਪਨ ਭਿਕ੍ਖੁਨੀ ਛਨ੍ਦਸੋ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯਾਤਿ ਵੁਤ੍ਤਂ. ਤਤ੍ਥ ਛਨ੍ਦਸੋਤਿ ਮੇਥੁਨਰਾਗਪ੍ਪਟਿਸਂਯੁਤ੍ਤੇਨ ਛਨ੍ਦੇਨ ਚੇਵ ਰੁਚਿਯਾ ਚ. ਛਨ੍ਦੇ ਪਨ ਅਸਤਿ ਬਲਕ੍ਕਾਰੇਨ ਪਧਂਸਿਤਾਯ ਅਨਾਪਤ੍ਤਿ, ਤਸ੍ਮਾ ਯਾ ਪਰਿਪੁਣ੍ਣੂਪਸਮ੍ਪਦਾ ਭਿਕ੍ਖੁਨੀ ਮਨੁਸ੍ਸਾਮਨੁਸ੍ਸਤਿਰਚ੍ਛਾਨਜਾਤੀਸੁ ਪੁਰਿਸਉਭਤੋਬ੍ਯਞ੍ਜਨਕਪਣ੍ਡਕਾਨਂ ਯਸ੍ਸ ਕਸ੍ਸਚਿ ਸਜੀਵਸ੍ਸ ਵਾ ਨਿਜ੍ਜੀਵਸ੍ਸ ਵਾ ਸਨ੍ਥਤਸ੍ਸ ਵਾ ਅਸਨ੍ਥਤਸ੍ਸ ਵਾ ਅਕ੍ਖਾਯਿਤਸ੍ਸ ਵਾ ਯੇਭੁਯ੍ਯੇਨ ਅਕ੍ਖਾਯਿਤਸ੍ਸ ਵਾ ਅਙ੍ਗਜਾਤਸ੍ਸ ਅਤ੍ਤਨੋ ਵਚ੍ਚਮਗ੍ਗਪਸ੍ਸਾਵਮਗ੍ਗਮੁਖੇਸੁ ਤੀਸੁ ਯਤ੍ਥਕਤ੍ਥਚਿ ਸਨ੍ਥਤੇ ਵਾ ਅਸਨ੍ਥਤੇ ਵਾ ਪਕਤਿਵਾਤੇਨ ਅਸਂਫੁਟ੍ਠੇ ਅਲ੍ਲੋਕਾਸੇ ਅਨ੍ਤਮਸੋ ਤਿਲਫਲਮਤ੍ਤਮ੍ਪਿ ਪਦੇਸਂ ਛਨ੍ਦਸੋ ਪਵੇਸੇਤਿ, ਪਰੇਨ ਵਾ ਪਵੇਸਿਯਮਾਨਾ ਪਵੇਸਨਪਵਿਟ੍ਠਟ੍ਠਿਤਉਦ੍ਧਰਣੇਸੁ ਯਂਕਿਞ੍ਚਿ ਸਾਦਿਯਤਿ, ਅਯਂ ਪਾਰਾਜਿਕਾ ਹੋਤਿ. ਸੇਸਮੇਤ੍ਥ ਇਤੋ ਪਰੇਸੁ ਚ ਸਾਧਾਰਣਸਿਕ੍ਖਾਪਦੇਸੁ ਵੁਤ੍ਤਨਯਾਨੁਸਾਰੇਨੇਵ ਵੇਦਿਤਬ੍ਬਂ.

ਅਸਾਧਾਰਣਪਾਰਾਜਿਕਂ

੫. ਉਬ੍ਭਜਾਣੁਮਣ੍ਡਲਿਕਾਸਿਕ੍ਖਾਪਦਵਣ੍ਣਨਾ

ਅਸਾਧਾਰਣੇਸੁ ਪਨ ਚਤੁਨ੍ਨਂ ਤਾਵ ਪਾਰਾਜਿਕਾਨਂ ਪਠਮੇ ਅਵਸ੍ਸੁਤਾਤਿ ਕਾਯਸਂਸਗ੍ਗਰਾਗੇਨ ਤਿਨ੍ਤਾ, ਕਿਲਿਨ੍ਨਾਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਪੁਰਿਸਪੁਗ੍ਗਲਸ੍ਸਾਤਿ ਕਾਯਸਂਸਗ੍ਗਂ ਸਮਾਪਜ੍ਜਿਤੁਂ ਵਿਞ੍ਞੁਸ੍ਸ ਮਨੁਸ੍ਸਜਾਤਿਕਸ੍ਸ ਪੁਰਿਸਸਙ੍ਖਾਤਸ੍ਸ ਪੁਗ੍ਗਲਸ੍ਸ. ਅਧਕ੍ਖਕਨ੍ਤਿ ਅਤ੍ਤਨੋ ਅਕ੍ਖਕਾਨਂ ਅਧੋ. ਉਬ੍ਭਜਾਣੁਮਣ੍ਡਲਨ੍ਤਿ ਜਾਣੁਮਣ੍ਡਲਾਨਂ ਉਪਰਿ, ਏਤ੍ਥ ਚ ਉਬ੍ਭਕਪ੍ਪਰਮ੍ਪਿ ਉਬ੍ਭਜਾਣੁਮਣ੍ਡਲੇਨੇਵ ਸਙ੍ਗਹਿਤਂ. ਆਮਸਨਨ੍ਤਿ ਆਮਜ੍ਜਨਂ ਫੁਟ੍ਠੋਕਾਸਂ ਅਨਤਿਕ੍ਕਮਿਤ੍ਵਾ ਤਤ੍ਥੇਵ ਸਙ੍ਘਟ੍ਟਨਂ. ਪਰਾਮਸਨਨ੍ਤਿ ਇਤੋ ਚਿਤੋ ਚ ਸਞ੍ਚਰਣਂ. ਗਹਣਨ੍ਤਿ ਗਹਿਤਮਤ੍ਤਂ. ਛੁਪਨਨ੍ਤਿ ਅਸਙ੍ਘਟ੍ਟੇਤ੍ਵਾ ਫੁਟ੍ਠਮਤ੍ਤਂ. ਪਟਿਪੀਲ਼ਨਨ੍ਤਿ ਅਙ੍ਗੇ ਗਹੇਤ੍ਵਾ ਨਿਪ੍ਪੀਲ਼ਨਂ. ਸਾਦਿਯੇਯ੍ਯਾਤਿ ਯਾ ਭਿਕ੍ਖੁਨੀ ਅਤ੍ਤਨੋ ਯਥਾਪਰਿਚ੍ਛਿਨ੍ਨੇ ਕਾਯੇ ਪੁਰਿਸਸ੍ਸ ਏਤਂ ਆਮਸਨਾਦਿਂ ਸਾਦਿਯਤਿ, ਸਯਂ ਵਾ ਪਨ ਤੇਨ ਕਾਯੇਨ ਪੁਰਿਸਸ੍ਸ ਯਂਕਿਞ੍ਚਿ ਕਾਯਪ੍ਪਦੇਸਂ ਸਾਦਯਮਾਨਾ ਛੁਪਤਿ, ਅਯਂ ਉਬ੍ਭਜਾਣੁਮਣ੍ਡਲਿਕਾ ਨਾਮ ਪਾਰਾਜਿਕਾਤਿ ਅਯਮੇਤ੍ਥ ਸਙ੍ਖੇਪੋ.

‘‘ਨਿਦਾਨਂ ਪੁਗ੍ਗਲਂ ਵਤ੍ਥੁ’’ਨ੍ਤਿਆਦਿਕੇ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਤੇਨ ਵਿਤ੍ਥਾਰਵਿਨਿਚ੍ਛਯੇ ਯਸ੍ਮਾ ਸਬ੍ਬਾਨੇਵ ਅਸਾਧਾਰਣਪਞ੍ਞਤ੍ਤਿਯੋ ਹੋਨ੍ਤਿ, ਤਸ੍ਮਾ ਇਤੋ ਪਟ੍ਠਾਯ ਸਨ੍ਤਿਂ ਅਨੁਪਞ੍ਞਤ੍ਤਿਂ ਵਤ੍ਵਾ ਸਾਧਾਰਣਪਞ੍ਞਤ੍ਤੀਤਿ ਵਾ ਅਸਾਧਾਰਣਪਞ੍ਞਤ੍ਤੀਤਿ ਵਾ ਨ ਵਕ੍ਖਾਮ, ਆਣਤ੍ਤਿਯਂ ਯਤ੍ਥ ਆਣਤ੍ਤਿ ਨਤ੍ਥਿ, ਤਤ੍ਥ ਕਿਞ੍ਚਿ ਅਵਤ੍ਵਾ ਯਤ੍ਥ ਅਤ੍ਥਿ, ਤਤ੍ਥੇਵ ਵਕ੍ਖਾਮ, ਵਿਪਤ੍ਤਿਵਿਚਾਰਣਾ ਵੁਤ੍ਤਾਯੇਵ.

ਅਵਸੇਸਂ ਪਨ ਸਬ੍ਬਤ੍ਥ ਵਤ੍ਤਬ੍ਬਂ, ਤਯਿਦਂ ਵੁਚ੍ਚਤਿ, ਇਦਂ ਤਾਵ ਸਿਕ੍ਖਾਪਦਂ ਸਾਵਤ੍ਥਿਯਂ ਸੁਨ੍ਦਰੀਨਨ੍ਦਂ ਆਰਬ੍ਭ ਕਾਯਸਂਸਗ੍ਗਂ ਸਮਾਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਏਕਤੋਅਵਸ੍ਸੁਤੇ ਯਥਾਪਰਿਚ੍ਛਿਨ੍ਨੇਨ ਕਾਯੇਨ ਪੁਰਿਸਸ੍ਸ ਕਾਯਂ, ਉਭਤੋਅਵਸ੍ਸੁਤੇਪਿ ਕਾਯੇਨ ਕਾਯਪ੍ਪਟਿਬਦ੍ਧਂ, ਯਥਾਪਰਿਚ੍ਛਿਨ੍ਨਕਾਯਪ੍ਪਟਿਬਦ੍ਧੇਨ ਵਾ ਅਵਸੇਸਕਾਯੇਨ ਵਾ ਤਸ੍ਸ ਕਾਯਂ ਆਮਸਨ੍ਤਿਯਾ ਥੁਲ੍ਲਚ੍ਚਯਂ, ਯਕ੍ਖਪੇਤਪਣ੍ਡਕਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਾਨਂ ਉਭਤੋਅਵਸ੍ਸੁਤੇ ਯਥਾਪਰਿਚ੍ਛਿਨ੍ਨੇਨ ਕਾਯੇਨ ਕਾਯਂ ਆਮਸਨ੍ਤਿਯਾਪਿ ਥੁਲ੍ਲਚ੍ਚਯਂ, ਸਚੇ ਪਨ ਪੁਰਿਸਸ੍ਸ ਕਾਯਸਂਸਗ੍ਗਰਾਗੋ ਨਤ੍ਥਿ, ਪਾਰਾਜਿਕਕ੍ਖੇਤ੍ਤੇਪਿ ਥੁਲ੍ਲਚ੍ਚਯਮੇਵ. ਅਵਸੇਸੇ ਪਨ ਕਾਯਪ੍ਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧਾਦਿਭੇਦੇ, ਮੇਥੁਨਰਾਗਗੇਹਸਿਤਪੇਮੇਸੁ ਚ ਸਬ੍ਬਤ੍ਥ ਦੁਕ੍ਕਟਂ. ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਿਯਾ, ਅਸਾਦਿਯਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਙ੍ਗਾਨਿ ਸਮੁਟ੍ਠਾਨਾਦੀਨਿ ਚ ਭਿਕ੍ਖੁਪਾਤਿਮੋਕ੍ਖੇ ਕਾਯਸਂਸਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀਤਿ.

ਉਬ੍ਭਜਾਣੁਮਣ੍ਡਲਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਵਜ੍ਜਪ੍ਪਟਿਚ੍ਛਾਦਿਕਾਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਗਣਸ੍ਸਾਤਿ ਅਞ੍ਞਾਸਂ ਭਿਕ੍ਖੁਨੀਨਂ. ਠਿਤਾਤਿ ਸਲਿਙ੍ਗੇ ਠਿਤਾ. ਚੁਤਾਤਿ ਕਾਲਙ੍ਕਤਾ. ਨਾਸਿਤਾਤਿ ਲਿਙ੍ਗਨਾਸਨਾਯ ਸਯਂ ਵਾ ਨਟ੍ਠਾ, ਅਞ੍ਞੇਹਿ ਵਾ ਨਾਸਿਤਾ. ਅਵਸ੍ਸਟਾਤਿ ਤਿਤ੍ਥਾਯਤਨਂ ਸਙ੍ਕਨ੍ਤਾ. ਪੁਬ੍ਬੇਵਾਹਂ ਅਯ੍ਯੇ ਅਞ੍ਞਾਸਿਨ੍ਤਿ ਇਦਂ ਤਸ੍ਸਾ ਵਚਨਕਾਲਦਸ੍ਸਨਂ, ਸਲਿਙ੍ਗੇ ਠਿਤਾਯ ਪਨ ਪਾਰਾਜਿਕਭਾਵਂ ਞਤ੍ਵਾ ‘‘ਨ ਦਾਨਿ ਨਂ ਕਸ੍ਸਚਿ ਆਰੋਚੇਸ੍ਸਾਮੀ’’ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇਯੇਵ ਅਯਂ ਵਜ੍ਜਪ੍ਪਟਿਚ੍ਛਾਦਿਕਾ ਨਾਮ ਪਾਰਾਜਿਕਾ ਹੋਤੀਤਿ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਨੇਵਅਤ੍ਤਨਾਪਟਿਚੋਦਨਾ ਨਗਣਸ੍ਸ ਆਰੋਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਸਪ੍ਪਾਣਕਵਗ੍ਗਮ੍ਹਿ ਦੁਟ੍ਠੁਲ੍ਲਾਪਤ੍ਤਿਪ੍ਪਟਿਚ੍ਛਾਦਨਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤਤ੍ਰ ਹਿ ਪਾਚਿਤ੍ਤਿਯਂ, ਇਧ ਪਾਰਾਜਿਕਨ੍ਤਿ ਅਯਮੇਵ ਵਿਸੇਸੋ, ਸੇਸਂ ਤਾਦਿਸਮੇਵਾਤਿ.

ਵਜ੍ਜਪ੍ਪਟਿਚ੍ਛਾਦਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਉਕ੍ਖਿਤ੍ਤਾਨੁਵਤ੍ਤਿਕਾਸਿਕ੍ਖਾਪਦਵਣ੍ਣਨਾ

ਤਤਿਯੇ ਉਕ੍ਖਿਤ੍ਤਨ੍ਤਿ ਆਪਤ੍ਤਿਯਾ ਅਦਸ੍ਸਨਾਦੀਸੁ ਉਕ੍ਖਿਤ੍ਤਂ. ਧਮ੍ਮੇਨਾਤਿ ਭੂਤੇਨ ਵਤ੍ਥੁਨਾ. ਵਿਨਯੇਨਾਤਿ ਚੋਦੇਤ੍ਵਾ ਸਾਰੇਤ੍ਵਾ. ਸਤ੍ਥੁਸਾਸਨੇਨਾਤਿ ਇਧਾਪਿ ਚੋਦੇਤ੍ਵਾ ਸਾਰੇਤ੍ਵਾ ਕਰਣਮੇਵ ਸਤ੍ਥੁਸਾਸਨਂ ਨਾਮ. ਅਨਾਦਰਨ੍ਤਿ ਯੇਨ ਸਙ੍ਘੇਨ ਉਕ੍ਖੇਪਨਿਯਕਮ੍ਮਂ ਕਤਂ, ਤਸ੍ਮਿਂ ਵਾ, ਤਤ੍ਥ ਪਰਿਯਾਪਨ੍ਨਗਣੇ ਵਾ ਏਕਪੁਗ੍ਗਲੇ ਵਾ ਤਸ੍ਮਿਂ ਵਾ ਕਮ੍ਮੇ ਆਦਰਵਿਰਹਿਤਂ, ਸਮ੍ਮਾਵਤ੍ਤਨਾਯ ਅਵਤ੍ਤਮਾਨਨ੍ਤਿ ਅਤ੍ਥੋ. ਅਪ੍ਪਟਿਕਾਰਨ੍ਤਿ ਪਟਿਕਾਰਰਹਿਤਂ, ਅਨੋਸਾਰਿਤਨ੍ਤਿ ਅਤ੍ਥੋ. ਅਕਤਸਹਾਯਨ੍ਤਿ ਏਕਕਮ੍ਮਾਦਿਕੇ ਸਂਵਾਸੇ ਸਹ ਅਯਨਭਾਵੇਨ ਸਮਾਨਸਂਵਾਸਕਾ ਭਿਕ੍ਖੂ ਸਹਾਯਾ ਨਾਮ, ਯਸ੍ਸ ਪਨ ਸੋ ਸਂਵਾਸੋ ਤੇਹਿ ਸਦ੍ਧਿਂ ਨਤ੍ਥਿ ਨ ਤੇਨ ਤੇ ਸਹਾਯਾ ਕਤਾ ਹੋਨ੍ਤਿ, ਇਤਿ ਸੋ ਅਕਤਸਹਾਯੋ ਨਾਮ, ਤਂ ਅਕਤਸਹਾਯਂ, ਸਮਾਨਸਂਵਾਸਕਭਾਵਂ ਅਨੁਪਗਤਨ੍ਤਿ ਅਤ੍ਥੋ. ਤਮਨੁਵਤ੍ਤੇਯ੍ਯਾਤਿ ਤਂ ਉਕ੍ਖਿਤ੍ਤਕਂ ਉਕ੍ਖਿਤ੍ਤਕਭਾਵੇਯੇਵ ਠਿਤਂ ਭਿਕ੍ਖੁਂ ਯਾ ਭਿਕ੍ਖੁਨੀ ਯਂਦਿਟ੍ਠਿਕੋ ਸੋ ਹੋਤਿ, ਤਾਯ ਦਿਟ੍ਠਿਯਾ ਗਹਣਭਾਵੇਨ ਅਨੁਵਤ੍ਤੇਯ੍ਯ. ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਸਙ੍ਘਭੇਦਸਿਕ੍ਖਾਪਦਾਦੀਸੁ ਵੁਤ੍ਤਨਯੇਨ ਵਿਸੁਂ ਸਙ੍ਘਮਜ੍ਝੇ ਚ ਵੁਚ੍ਚਮਾਨਾ ਤਂ ਵਤ੍ਥੁਂ ਅਪ੍ਪਟਿਨਿਸ੍ਸਜ੍ਜਨ੍ਤੀ ਸਮਨੁਭਾਸਨਕਮ੍ਮਪਰਿਯੋਸਾਨੇ ਉਕ੍ਖਿਤ੍ਤਾਨੁਵਤ੍ਤਿਕਾ ਨਾਮ ਪਾਰਾਜਿਕਾ ਹੋਤੀਤਿ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਉਕ੍ਖਿਤ੍ਤਾਨੁਵਤ੍ਤਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਦ੍ਵੇ ਥੁਲ੍ਲਚ੍ਚਯਾ, ‘‘ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯਾ’’ਤਿ ਏਵਂ ਯ੍ਯ-ਕਾਰਪ੍ਪਤ੍ਤਾਯ ਤਤਿਯਕਮ੍ਮਵਾਚਾਯ ਪਾਰਾਜਿਕਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਸੇਸਂ ਸਙ੍ਘਭੇਦਸਿਕ੍ਖਾਪਦਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਉਕ੍ਖਿਤ੍ਤਾਨੁਵਤ੍ਤਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਅਟ੍ਠਵਤ੍ਥੁਕਾਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਅਵਸ੍ਸੁਤਾਤਿ ਲੋਕਸ੍ਸਾਦਮਿਤ੍ਤਸਨ੍ਥਵਵਸੇਨ ਕਾਯਸਂਸਗ੍ਗਰਾਗੇਨ ਤਿਨ੍ਤਾ. ਅਯਮੇਵ ਹਿ ਅਤ੍ਥੋ ਸੀਹਲ਼ਮਾਤਿਕਾਟ੍ਠਕਥਾਯਂ ਵੁਤ੍ਤੋ, ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੬੭੫) ਪਨਸ੍ਸ ਵਿਚਾਰਣਾ ਕਤਾ, ਦੁਤਿਯਪਦੇਪਿ ਏਸੇਵ ਨਯੋ. ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਂ ਵਾਤਿਆਦੀਸੁ ਪਨ ਯਂ ਪੁਰਿਸਪੁਗ੍ਗਲੇਨ ਹਤ੍ਥੇ ਗਹਣਂ ਕਤਂ, ਤਂ ‘‘ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣ’’ਨ੍ਤਿ ਵੁਤ੍ਤਂ, ਏਸੇਵ ਨਯੋ ਸਙ੍ਘਾਟਿਕਣ੍ਣਗ੍ਗਹਣੇਪਿ. ਹਤ੍ਥਗ੍ਗਹਣਨ੍ਤਿ ਏਤ੍ਥ ਚ ਯਸ੍ਸ ਕਸ੍ਸਚਿ ਅਪਾਰਾਜਿਕਕ੍ਖੇਤ੍ਤਭੂਤਸ੍ਸ ਅਙ੍ਗਸ੍ਸ ਗਹਣਂ ਹਤ੍ਥਗ੍ਗਹਣਂ, ਯਸ੍ਸ ਕਸ੍ਸਚਿ ਨਿਵਤ੍ਥਸ੍ਸ ਵਾ ਪਾਰੁਤਸ੍ਸ ਵਾ ਗਹਣਂ ਸਙ੍ਘਾਟਿਕਣ੍ਣਗ੍ਗਹਣਂ. ਸਨ੍ਤਿਟ੍ਠੇਯ੍ਯ ਵਾਤਿਆਦੀਸੁ ਕਾਯਸਂਸਗ੍ਗਸਙ੍ਖਾਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਸਨ੍ਤਿਟ੍ਠੇਯ੍ਯ ਵਾ, ਤਤ੍ਥ ਠਿਤਾ ਸਲ੍ਲਪੇਯ੍ਯ ਵਾ, ਪੁਰਿਸੇਨ ਵਾ ‘‘ਇਤ੍ਥਨ੍ਨਾਮਂ ਠਾਨਂ ਆਗਚ੍ਛਾ’’ਤਿ ਵੁਤ੍ਤਾ ਤਂ ਸਙ੍ਕੇਤਂ ਗਚ੍ਛੇਯ੍ਯ, ਤਸ੍ਸ ਵਾ ਪੁਰਿਸਸ੍ਸ ਅਬ੍ਭਾਗਮਨਂ ਸਾਦਿਯੇਯ੍ਯ, ਯੇਨ ਕੇਨਚਿ ਵਾ ਪਟਿਚ੍ਛਨ੍ਨਂ ਓਕਾਸਂ ਪਵਿਸੇਯ੍ਯ, ਪੁਰਿਸਸ੍ਸ ਹਤ੍ਥਪਾਸੇ ਠਤ੍ਵਾ ਕਾਯਂ ਉਪਸਂਹਰੇਯ੍ਯਾਤਿ ਏਵਮਤ੍ਥੋ ਦਟ੍ਠਬ੍ਬੋ. ਅਯਮ੍ਪਿ ਪਾਰਾਜਿਕਾਤਿ ਯਥਾ ਪੁਰਿਮਾਯੋ, ਏਵਂ ਅਯਮ੍ਪਿ ਭਿਕ੍ਖੁਨੀ ਏਤਸ੍ਸ ਕਾਯਸਂਸਗ੍ਗਸਙ੍ਖਾਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਏਤਾਨਿ ਅਟ੍ਠ ਵਤ੍ਥੂਨਿ ਪਟਿਪਾਟਿਯਾ ਵਾ ਉਪ੍ਪਟਿਪਾਟਿਯਾ ਵਾ ਪੂਰੇਤ੍ਵਾ ਅਟ੍ਠਵਤ੍ਥੁਕਾ ਨਾਮ ਪਾਰਾਜਿਕਾ ਹੋਤੀਤਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਅਟ੍ਠਮਂ ਵਤ੍ਥੁਂ ਪਰਿਪੂਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਙ੍ਕੇਤਗਮਨੇ ਪਦੇ ਪਦੇ ਦੁਕ੍ਕਟਂ, ਪੁਰਿਸਸ੍ਸ ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਥੁਲ੍ਲਚ੍ਚਯਂ, ਪੁਰਿਸਸ੍ਸ ਅਬ੍ਭਾਗਮਨਸਾਦਯਮਾਨੇਪਿ ਦੁਕ੍ਕਟਂ. ਹਤ੍ਥਪਾਸੋਕ੍ਕਮਨੇ ਥੁਲ੍ਲਚ੍ਚਯਂ, ਸੇਸੇਸੁ ਏਕੇਕਸ੍ਮਿਂ ਥੁਲ੍ਲਚ੍ਚਯਮੇਵ, ਅਟ੍ਠਮੇ ਪਰਿਪੁਣ੍ਣੇ ਪਾਰਾਜਿਕਂ. ਏਕੇਕਸ੍ਮਿਂ ਪਨ ਵਤ੍ਥੁਸ੍ਮਿਂ ਸਤਕ੍ਖਤ੍ਤੁਮ੍ਪਿ ਵੀਤਿਕ੍ਕਨ੍ਤੇ ਤਾ ਆਪਤ੍ਤਿਯੋ ਦੇਸੇਤ੍ਵਾ ਮੁਚ੍ਚਤਿ, ਅਪਿਚੇਤ੍ਥ ਗਣਨੂਪਿਕਾ ਆਪਤ੍ਤਿ ਵੇਦਿਤਬ੍ਬਾ, ‘‘ਇਦਾਨਿ ਨਾਪਜ੍ਜਿਸ੍ਸਾਮੀ’’ਤਿ ਹਿ ਧੁਰਨਿਕ੍ਖੇਪਂ ਕਤ੍ਵਾ ਦੇਸਿਤਾ ਗਣਨੂਪਿਕਾ, ਦੇਸਿਤਗਣਨਂ ਉਪੇਤਿ, ਪਾਰਾਜਿਕਸ੍ਸ ਅਙ੍ਗਂ ਨ ਹੋਤਿ. ਤਸ੍ਮਾ ਯਾ ਏਕਂ ਆਪਨ੍ਨਾ ਧੁਰਨਿਕ੍ਖੇਪਂ ਕਤ੍ਵਾ ਦੇਸੇਤ੍ਵਾ ਪੁਨ ਕਿਲੇਸਵਸੇਨ ਆਪਜ੍ਜਤਿ, ਪੁਨਪਿ ਦੇਸੇਤਿ, ਏਵਂ ਅਟ੍ਠਮਂ ਪਰਿਪੂਰੇਨ੍ਤੀਪਿ ਪਾਰਾਜਿਕਾ ਨ ਹੋਤਿ. ਯਾ ਪਨ ਆਪਜ੍ਜਿਤ੍ਵਾ ‘‘ਪੁਨਪਿ ਅਞ੍ਞਂ ਵਤ੍ਥੁਂ ਆਪਜ੍ਜਿਸ੍ਸਾਮੀ’’ਤਿ ਸਉਸ੍ਸਾਹਾਵ ਦੇਸੇਤਿ, ਤਸ੍ਸਾ ਸਾ ਆਪਤ੍ਤਿ ਅਗਣਨੂਪਿਕਾ, ਦੇਸਿਤਾਪਿ ਅਦੇਸਿਤਾ ਹੋਤਿ, ਪਾਰਾਜਿਕਸ੍ਸ ਅਙ੍ਗਂ ਹੋਤਿ. ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਿਯਾ ਅਸਾਦਿਯਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਕਾਯਸਂਸਗ੍ਗਰਾਗੋ, ਸਉਸ੍ਸਾਹਤਾ, ਅਟ੍ਠਮਸ੍ਸ ਵਤ੍ਥੁਸ੍ਸ ਪੂਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮਨੁਭਾਸਨਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.

ਅਟ੍ਠਵਤ੍ਥੁਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਅਟ੍ਠ ਪਾਰਾਜਿਕਾ ਧਮ੍ਮਾਤਿ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾ ਸਾਧਾਰਣਾ ਚਤ੍ਤਾਰੋ, ਇਮੇ ਚਤ੍ਤਾਰੋਤਿ ਏਵਂ ਪਾਤਿਮੋਕ੍ਖੁਦ੍ਦੇਸਮਗ੍ਗੇਨ ਅਟ੍ਠ ਪਾਰਾਜਿਕਾ ਧਮ੍ਮਾ ਉਦ੍ਦਿਟ੍ਠਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ, ਸੇਸਂ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯਮੇਵਾਤਿ.

ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਭਿਕ੍ਖੁਨਿਪਾਤਿਮੋਕ੍ਖੇ

ਪਾਰਾਜਿਕਵਣ੍ਣਨਾ ਨਿਟ੍ਠਿਤਾ.