੮. ਮਹਾਸੀਹਨਾਦਸੁਤ੍ਤਵਣ੍ਣਨਾ

ਅਚੇਲਕਸ੍ਸਪਵਤ੍ਥੁਵਣ੍ਣਨਾ

੩੮੧. ਯਸ੍ਮਿਂ ਰਟ੍ਠੇ ਤਂ ਨਗਰਂ, ਤਸ੍ਸ ਰਟ੍ਠਸ੍ਸਪਿ ਯਸ੍ਮਿਂ ਨਗਰੇ ਤਦਾ ਭਗਵਾ ਵਿਹਾਸਿ, ਤਸ੍ਸ ਨਗਰਸ੍ਸਪਿ ਏਤਦੇਵ ਨਾਮਂ, ਤਸ੍ਮਾ ਉਰੁਞ੍ਞਾਯਨ੍ਤਿ ਉਰੁਞ੍ਞਾਜਨਪਦੇ ਉਰੁਞ੍ਞਾਸਙ੍ਖਾਤੇ ਨਗਰੇਤਿ ਅਤ੍ਥੋ. ਰਮਣੀਯੋਤਿ ਮਨੋਹਰਭੂਮਿਭਾਗਤਾਯ ਛਾਯੂਦਕਸਮ੍ਪਤ੍ਤਿਯਾ, ਜਨਵਿਵਿਤ੍ਤਤਾਯ ਚ ਮਨੋਰਮੋ. ਨਾਮਨ੍ਤਿ ਗੋਤ੍ਤਨਾਮਂ. ਤਪਨਂ ਸਨ੍ਤਪਨਂ ਕਾਯਸ੍ਸ ਖੇਦਨਂ ਤਪੋ, ਸੋ ਏਤਸ੍ਸ ਅਤ੍ਥੀਤਿ ਤਪਸ੍ਸੀ, ਤਂ ਤਪਸ੍ਸਿਂ. ਯਸ੍ਮਾ ਤਥਾਭੂਤੋ ਤਪਂ ਨਿਸ੍ਸਿਤੋ, ਤਪੋ ਵਾ ਤਂ ਨਿਸ੍ਸਿਤੋ, ਤਸ੍ਮਾ ਆਹ ‘‘ਤਪਨਿਸ੍ਸਿਤਕ’’ਨ੍ਤਿ. ਲੂਖਂ ਵਾ ਫਰੁਸਂ ਸਾਧੁਸਮ੍ਮਤਾਚਾਰਵਿਰਹਤੋ ਨਪਸਾਦਨੀਯਂ ਆਜੀਵਤਿ ਵਤ੍ਤਤੀਤਿ ਲੂਖਾਜੀਵੀ, ਤਂ ਲੂਖਾਜੀਵਿਂ. ਮੁਤ੍ਤਾਚਾਰਾਦੀਤਿ ਆਦਿ-ਸਦ੍ਦੇਨ ਪਰਤੋ ਪਾਲ਼ਿਯਂ (ਦੀ. ਨਿ. ੧.੩੯੭) ਆਗਤਾ ਹਤ੍ਥਾਪਲੇਖਨਾਦਯੋ ਸਙ੍ਗਹਿਤਾ. ਉਪ੍ਪਣ੍ਡੇਤੀਤਿ ਉਹਸਨਵਸੇਨ ਪਰਿਭਾਸਤਿ. ਉਪਵਦਤੀਤਿ ਅਵਞ੍ਞਾਪੁਬ੍ਬਕਂ ਅਪਵਦਤਿ, ਤੇਨਾਹ ‘‘ਹੀਲ਼ੇਤਿ ਵਮ੍ਭੇਤੀ’’ਤਿ. ਧਮ੍ਮਸ੍ਸ ਚ ਅਨੁਧਮ੍ਮਂਤਿ ਏਤ੍ਥ ਧਮ੍ਮੋ ਨਾਮ ਹੇਤੁ ‘‘ਹੇਤੁਮ੍ਹਿ ਞਾਣਂ ਧਮ੍ਮਪਟਿਸਮ੍ਭਿਦਾ’’ਤਿਆਦੀਸੁ (ਵਿਭ. ੭੨੦) ਵਿਯਾਤਿ ਆਹ ‘‘ਕਾਰਣਸ੍ਸ ਅਨੁਕਾਰਣ’’ਨ੍ਤਿ. ਕਾਰਣਨ੍ਤਿ ਚੇਤ੍ਥ ਤਥਾਪਵਤ੍ਤਸ੍ਸ ਸਦ੍ਦਸ੍ਸ ਅਤ੍ਥੋ ਅਧਿਪ੍ਪੇਤੋ ਤਸ੍ਸ ਪਵਤ੍ਤਿਹੇਤੁਭਾਵਤੋ. ਅਤ੍ਥਪ੍ਪਯੁਤ੍ਤੋ ਹਿ ਸਦ੍ਦਪ੍ਪਯੋਗੋ. ਅਨੁਕਾਰਣਨ੍ਤਿ ਚ ਸੋ ਏਵ ਪਰੇਹਿ ਤਥਾ ਵੁਚ੍ਚਮਾਨੋ. ਪਰੇਹੀਤਿ ‘‘ਯੇ ਤੇ’’ਤਿ ਵੁਤ੍ਤਸਤ੍ਤੇਹਿ ਪਰੇਹਿ. ਵੁਤ੍ਤਕਾਰਣੇਨਾਤਿ ਯਥਾ ਤੇਹਿ ਵੁਤ੍ਤਂ, ਤਥਾ ਚੇ ਤੁਮ੍ਹੇਹਿ ਨ ਵੁਤ੍ਤਂ, ਏਵਂ ਸਤਿ ਤੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਤਤੋ ਪਰਂ ਤਸ੍ਸ ਅਨੁਵਾਦੋ ਕੋਚਿ ਅਪ੍ਪਮਤ੍ਤਕੋਪਿ ਵਿਞ੍ਞੂਹਿ ਗਰਹਿਤਬ੍ਬਂ ਠਾਨਂ ਕਾਰਣਂ ਨਾਗਚ੍ਛੇਯ੍ਯ, ਕਿਮੇਵਂ ਨਾਗਚ੍ਛਤੀਤਿ ਯੋਜਨਾ. ‘‘ਇਦਂ ਵੁਤ੍ਤਂ ਹੋਤੀ’’ਤਿਆਦਿਨਾ ਤਮੇਵਤ੍ਥਂ ਸਙ੍ਖੇਪਤੋ ਦਸ੍ਸੇਤਿ.

੩੮੨. ਇਦਾਨਿ ਯਂ ਵਿਭਜ੍ਜਵਾਦਂ ਸਨ੍ਧਾਯ ਭਗਵਤਾ ‘‘ਨ ਮੇ ਤੇ ਵੁਤ੍ਤਵਾਦਿਨੋ’’ਤਿ ਸਙ੍ਖੇਪਤੋ ਵਤ੍ਵਾ ਤਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਇਧਾਹਂ ਕਸ੍ਸਪਾ’’ਤਿਆਦਿ ਵੁਤ੍ਤਂ, ਤਂ ਵਿਭਾਗੇਨ ਦਸ੍ਸੇਨ੍ਤੋ ‘‘ਇਧੇਕਚ੍ਚੋ’’ਤਿਆਦਿਮਾਹ. ਭਗਵਾ ਹਿ ਨਿਰਤ੍ਥਕਂ ਅਨੁਪਸਮਸਂਵਤ੍ਤਨਿਕਂ ਕਾਯਕਿਲਮਥਂ ‘‘ਅਤ੍ਤਕਿਲਮਥਾਨੁਯੋਗੋ ਦੁਕ੍ਖੋ ਅਨਰਿਯੋ ਅਨਤ੍ਥਸਂਹਿਤੋ’’ਤਿਆਦਿਨਾ (ਸਂ. ਨਿ. ੩.੧੦੮੧; ਮਹਾਵ. ੧੩; ਪਟਿ. ਮ. ੨.੩੦) ਗਰਹਤਿ. ਸਾਤ੍ਥਕਂ ਪਨ ਉਪਸਮਸਂਵਤ੍ਤਨਿਕਂ ‘‘ਆਰਞ੍ਞਿਕੋ ਹੋਤਿ, ਪਂਸੁਕੂਲਿਕੋ ਹੋਤੀ’’ਤਿਆਦਿਨਾ ਵਣ੍ਣੇਤਿ. ਅਪ੍ਪਪੁਞ੍ਞਤਾਯਾਤਿ ਅਪੁਞ੍ਞਤਾਯ. ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾਤਿ ਮਿਚ੍ਛਾਦਿਟ੍ਠਿਭਾਵਤੋ ਕਮ੍ਮਫਲਂ ਪਟਿਕ੍ਖਿਪਨ੍ਤੋ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ (ਦੀ. ਨਿ. ੧.੧੭੧; ਮ. ਨਿ. ੧.੪੪੫; ੨.੯੪, ੯੫, ੨੨੫; ੩.੯੧, ੧੧੫; ਸਂ. ਨਿ. ੩.੨੧੦; ਧ. ਸ. ੧੨੨੧; ਵਿਭ. ੯੩੮) ਮਿਚ੍ਛਾਦਿਟ੍ਠਿਂ ਪੁਰਕ੍ਖਤ੍ਵਾ ਤਥਾ ਤਥਾ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ. ਅਨੇਸਨਵਸੇਨਾਤਿ ਕੋਹਞ੍ਞੇ ਠਤ੍ਵਾ ਅਸਨ੍ਤਗੁਣਸਮ੍ਭਾਵਨਿਚ੍ਛਾਯ ਮਿਚ੍ਛਾਜੀਵਵਸੇਨ. ਇਮੇ ਦ੍ਵੇਤਿ ‘‘ਅਪ੍ਪਪੁਞ੍ਞੋ ਪੁਞ੍ਞਵਾ’’ਤਿ ਚ ਵੁਤ੍ਤੇ ਦੁਚ੍ਚਰਿਤਕਾਰਿਨੋ ਦ੍ਵੇ ਪੁਗ੍ਗਲੇ ਸਨ੍ਧਾਯ.

‘‘ਇਮੇ ਦ੍ਵੇ ਸਨ੍ਧਾਯਾ’’ਤਿ ਏਤ੍ਥ ਪਨ ਦੁਤਿਯਨਯੇ ‘‘ਅਪ੍ਪਪੁਞ੍ਞੋ, ਪੁਞ੍ਞਵਾ’’ਤਿ ਚ ਵੁਤ੍ਤੇ ਸੁਚਰਿਤਕਾਰਿਨੋਤਿ ਆਦਿਨਾ ਯੋਜੇਤਬ੍ਬਂ. ਕਮ੍ਮਕਿਰਿਯਵਾਦਿਨੋ ਹਿ ਇਮੇ ਦ੍ਵੇ ਪੁਗ੍ਗਲਾ. ਇਤਿ ਪਠਮਦੁਤਿਯਨਯੇਸੁ ਵੁਤ੍ਤਨਯੇਨੇਵ ਤਤਿਯਚਤੁਤ੍ਥਨਯੇਸੁ ਯੋਜਨਾ ਵੇਦਿਤਬ੍ਬਾ.

ਬਾਹਿਰਕਾਚਾਰਯੁਤ੍ਤੋ ਤਿਤ੍ਥਿਯਾਚਾਰਯੁਤ੍ਤੋ, ਨ ਵਿਮੁਤ੍ਤਾਚਾਰੋ. ਅਤ੍ਤਾਨਂ ਸੁਖੇਤ੍ਵਾਤਿ ਅਧਮ੍ਮਿਕੇਨ ਸੁਖੇਨ ਅਤ੍ਤਾਨਂ ਸੁਖੇਤ੍ਵਾ, ਤੇਨਾਹ ‘‘ਦੁਚ੍ਚਰਿਤਾਨਿ ਪੂਰੇਤ੍ਵਾ’’ਤਿ. ‘‘ਨ ਦਾਨਿ ਮਯਾ ਸਦਿਸੋ ਅਤ੍ਥੀ’’ਤਿਆਦਿਨਾ ਤਿਸ੍ਸਨ੍ਨਂ ਮਞ੍ਞਨਾਨਂ ਵਸੇਨ ਦੁਚ੍ਚਰਿਤਪੂਰਣਮਾਹ. ਮਿਚ੍ਛਾਦਿਟ੍ਠਿਵਸੇਨਾਤਿ ‘‘ਨਤ੍ਥਿ ਕਾਮੇਸੁ ਦੋਸੋ’’ਤਿ ਏਵਂ ਪਵਤ੍ਤਮਿਚ੍ਛਾਦਿਟ੍ਠਿਵਸੇਨ. ਪਰਿਬ੍ਬਾਜਿਕਾਯਾਤਿ ਪਬ੍ਬਜ੍ਜਂ ਉਪਗਤਾਯ ਤਾਪਸਦਾਰਿਕਾਯ. ਦਹਰਾਯਾਤਿ ਤਰੁਣਾਯ. ਮੁਦੁਕਾਯਾਤਿ ਸੁਖੁਮਾਲਾਯ. ਲੋਮਸਾਯਾਤਿ ਤਨੁਤਮ੍ਬਲੋਮਤਾਯ ਅਪ੍ਪਲੋਮਾਯ. ਕਾਮੇਸੂਤਿ ਵਤ੍ਥੁਕਾਮੇਸੁ. ਪਾਤਬ੍ਯਤਨ੍ਤਿ ਪਰਿਭੁਞ੍ਜਿਤਬ੍ਬਂ, ਪਾਤਬ੍ਯਤਨ੍ਤਿ ਵਾ ਪਰਿਭੁਞ੍ਜਨਕਤਂ. ਆਪਜ੍ਜਨ੍ਤੋਤਿ ਉਪਗਚ੍ਛਨ੍ਤੋ. ਪਰਿਭੋਗਤ੍ਥੋ ਹਿ ਅਯਂ ਪਾ-ਸਦ੍ਦੋ, ਕਤ੍ਤੁਸਾਧਨੋ ਚ ਤਬ੍ਬ-ਸਦ੍ਦੋ, ਯਥਾਰੁਚਿ ਪਰਿਭੁਞ੍ਜਨ੍ਤੋਤਿ ਅਤ੍ਥੋ. ਕਿਲੇਸਕਾਮੋਪਿ ਹਿ ਅਸ੍ਸਾਦਿਯਮਾਨੋ ਵਤ੍ਥੁਕਾਮਨ੍ਤੋਗਧੋਯੇਵ.

ਇਦਨ੍ਤਿ ਯਥਾਵੁਤ੍ਤਂ ਅਤ੍ਥਪ੍ਪਭੇਦਂ ਵਿਭਜ੍ਜਨਂ. ਤਿਤ੍ਥਿਯਵਸੇਨ ਆਗਤਂ ਅਟ੍ਠਕਥਾਯਂ ਤਥਾ ਵਿਭਤ੍ਤਤ੍ਤਾ. ਸਾਸਨੇਪੀਤਿ ਇਮਸ੍ਮਿਂ ਸਾਸਨੇਪਿ.

ਅਰਹਤ੍ਤਂ ਵਾ ਅਤ੍ਤਨਿ ਅਸਨ੍ਤਂ ‘‘ਅਤ੍ਥੀ’’ਤਿ ਵਿਪ੍ਪਟਿਜਾਨਿਤ੍ਵਾ. ਸਾਮਨ੍ਤਜਪ੍ਪਨਂ, ਪਚ੍ਚਯਪਟਿਸੇਵਨਂ, ਇਰਿਯਾਪਥਨਿਸ੍ਸਿਤਨ੍ਤਿ ਇਮਾਨਿ ਤੀਣਿ ਵਾ ਕੁਹਨਵਤ੍ਥੂਨਿ. ਤਾਦਿਸੋ ਵਾਤਿ ਧੁਤਙ੍ਗ- (ਮਿ. ਪ. ੪.੨; ਵਿਸੁਦ੍ਧਿ. ੧.੨੨) ਸਮਾਦਾਨਵਸੇਨ ਲੂਖਾਜੀਵੀ ਏਵ. ਦੁਲ੍ਲਭਸੁਖੋ ਭਵਿਸ੍ਸਾਮਿ ਦੁਗ੍ਗਤੀਸੁ ਉਪਪਤ੍ਤਿਯਾਤਿ ਅਧਿਪ੍ਪਾਯੋ.

੩੮੩. ਅਸੁਕਟ੍ਠਾਨਤੋਤਿ ਅਸੁਕਭਵਤੋ. ਆਗਤਾਤਿ ਨਿਬ੍ਬਤ੍ਤਨਵਸੇਨ ਇਧਾਗਤਾ. ਇਦਾਨਿ ਗਨ੍ਤਬ੍ਬਟ੍ਠਾਨਨ੍ਤਿ ਆਯਤਿਂ ਨਿਬ੍ਬਤ੍ਤਨਟ੍ਠਾਨਂ. ਪੁਨ ਉਪਪਤ੍ਤਿਨ੍ਤਿ ਆਯਤਿਂ ਅਨਨ੍ਤਰਭਵਤੋ ਤਤਿਯਂ ਉਪਪਤ੍ਤਿਂ, ਪੁਨ ਉਪਪਤ੍ਤੀਤਿ ਪੁਨਪ੍ਪੁਨਂ ਨਿਬ੍ਬਤ੍ਤਿ. ਕੇਨ ਕਾਰਣੇਨਾਤਿ ਯਥਾਭੂਤਂ ਅਜਾਨਨ੍ਤੋ ਹਿ ਇਚ੍ਛਾਦੋਸਵਸੇਨ ਯਂ ਕਿਞ੍ਚਿ ਗਰਹੇਯ੍ਯ, ਅਹਂ ਪਨ ਯਥਾਭੂਤਂ ਜਾਨਨ੍ਤੋ ਸਬ੍ਬਂ ਤਂ ਕੇਨ ਕਾਰਣੇਨ ਗਰਹਿਸ੍ਸਾਮਿ, ਤਂ ਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ, ਤੇਨਾਹ ‘‘ਗਰਹਿਤਬ੍ਬਮੇਵਾ’’ਤਿਆਦਿ. ਤਮਤ੍ਥਨ੍ਤਿ ਗਰਹਿਤਬ੍ਬਸ੍ਸੇਵ ਗਰਹਣਂ, ਪਸਂਸਿਤਬ੍ਬਸ੍ਸ ਚ ਪਸਂਸਨਂ.

ਨ ਕੋਚਿ ‘‘ਨ ਸਾਧੂ’’ਤਿ ਵਦਤਿ ਦਿਟ੍ਠਧਮ੍ਮਿਕਸ੍ਸ, ਸਮ੍ਪਰਾਯਿਕਸ੍ਸ ਚ ਅਤ੍ਥਸ੍ਸ ਸਾਧਨਵਸੇਨੇਵ ਪਵਤ੍ਤਿਯਾ ਭਦ੍ਦਕਤ੍ਤਾ. ਪਞ੍ਚਵਿਧਂ ਵੇਰਨ੍ਤਿ ਪਾਣਾਤਿਪਾਤਾਦਿਪਞ੍ਚਵਿਧਂ ਵੇਰਂ. ਤਞ੍ਹਿ ਪਞ੍ਚਵਿਧਸ੍ਸ ਸੀਲਸ੍ਸ ਪਟਿਸਤ੍ਤੁਭਾਵਤੋ, ਸਤ੍ਤਾਨਂ ਵੇਰਹੇਤੁਤਾਯ ਚ ‘‘ਵੇਰ’’ਨ੍ਤਿ ਵੁਚ੍ਚਤਿ. ਤਤੋ ਏਵ ਤਂ ਨ ਕੋਚਿ ‘‘ਸਾਧੂ’’ਤਿ ਵਦਤਿ, ਤਥਾ ਦਿਟ੍ਠਧਮ੍ਮਿਕਾਦਿਅਤ੍ਥਾਨਂ ਅਸਾਧਨਤੋ, ਸਤ੍ਤਾਨਂ ਸਾਧੁਭਾਵਸ੍ਸ ਚ ਦੂਸਨਤੋ. ਨ ਨਿਰੁਨ੍ਧਿਤਬ੍ਬਨ੍ਤਿ ਰੂਪਗ੍ਗਹਣੇ ਨ ਨਿਵਾਰੇਤਬ੍ਬਂ. ਦਸ੍ਸਨੀਯਦਸ੍ਸਨਤ੍ਥੋ ਹਿ ਚਕ੍ਖੁਪਟਿਲਾਭੋਤਿ ਤੇਸਂ ਅਧਿਪ੍ਪਾਯੋ. ਯਦਗ੍ਗੇਨ ਤੇਸਂ ਪਞ੍ਚਦ੍ਵਾਰੇ ਅਸਂਵਰੋ ਸਾਧੁ, ਤਦਗ੍ਗੇਨ ਤਤ੍ਥ ਸਂਵਰੋ ਨ ਸਾਧੂਤਿ ਆਹ ‘‘ਪੁਨ ਯਂ ਤੇ ਏਕਚ੍ਚਨ੍ਤਿ ਪਞ੍ਚਦ੍ਵਾਰੇ ਸਂਵਰ’’ਨ੍ਤਿ.

ਅਥ ਵਾ ਯਂ ਤੇ ਏਕਚ੍ਚਂ ਵਦਨ੍ਤਿ ‘‘ਸਾਧੂ’’ਤਿ ਤੇ ‘‘ਏਕੇ ਸਮਣਬ੍ਰਾਹ੍ਮਣਾ’’ਤਿ ਵੁਤ੍ਤਾ ਤਿਤ੍ਥਿਯਾ ਯਂ ਅਤ੍ਤਕਿਲਮਥਾਨੁਯੋਗਾਦਿਂ ‘‘ਸਾਧੂ’’ਤਿ ਵਦਨ੍ਤਿ, ਮਯਂ ਤਂ ਨ ‘‘ਸਾਧੂ’’ਤਿ ਵਦਾਮ. ਯਂ ਤੇ ਏਕਚ੍ਚਂ ਵਦਨ੍ਤਿ ‘‘ਨ ਸਾਧੂ’’ਤਿ ਯਂ ਪਨ ਤੇ ਅਨਵਜ੍ਜਪਚ੍ਚਯਪਰਿਭੋਗਂ, ਸੁਨਿਵਤ੍ਥਸੁਪਾਰੁਪਨਾਦਿਸਮ੍ਮਾਪਟਿਪਤ੍ਤਿਞ੍ਚ ‘‘ਨ ਸਾਧੂ’’ਤਿ ਵਦਨ੍ਤਿ, ਤਂ ਮਯਂ ‘‘ਸਾਧੂ’’ਤਿ ਵਦਾਮਾਤਿ ਏਵਂ ਪੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਏਵਂ ਯਂ ਪਰਵਾਦਮੂਲਕਂ ਚਤੁਕ੍ਕਂ ਦਸ੍ਸਿਤਂ, ਤਦੇਵ ਪੁਨ ਸਕਵਾਦਮੂਲਕਂ ਕਤ੍ਵਾ ਦਸ੍ਸਿਤਨ੍ਤਿ ਪਕਾਸੇਨ੍ਤੋ ‘‘ਏਵ’’ਨ੍ਤਿਆਦਿਮਾਹ. ਯਞ੍ਹਿ ਕਿਞ੍ਚਿ ਕੇਨਚਿ ਸਮਾਨਂ, ਤੇਨਪਿ ਤਂ ਸਮਾਨਮੇਵ, ਤਥਾ ਅਸਮਾਨਂ ਪੀਤਿ. ਸਮਾਨਾਸਮਾਨਤਨ੍ਤਿ ਸਮਾਨਾਸਮਾਨਤਾਮਤ੍ਤਂ. ਅਨਵਸੇਸਤੋ ਹਿ ਪਹਾਤਬ੍ਬਾਨਂ ਧਮ੍ਮਾਨਂ ਪਹਾਨਂ ਸਕਵਾਦੇ ਦਿਸ੍ਸਤਿ, ਨ ਪਰਵਾਦੇ. ਤਥਾ ਪਰਿਪੁਣ੍ਣਮੇਵ ਚ ਉਪਸਮ੍ਪਾਦੇਤਬ੍ਬਧਮ੍ਮਾਨਂ ਉਪਸਮ੍ਪਾਦਨਂ ਸਕਵਾਦੇ, ਨ ਪਰਵਾਦੇ. ਤੇਨ ਵੁਤ੍ਤਂ ‘‘ਤ੍ਯਾਹ’’ਨ੍ਤਿਆਦਿ.

ਸਮਨੁਯੁਞ੍ਜਾਪਨਕਥਾਵਣ੍ਣਨਾ

੩੮੫. ਲਦ੍ਧਿਂ ਪੁਚ੍ਛਨ੍ਤੋਤਿ ‘‘ਕਿਂ ਸਮਣੋ ਗੋਤਮੋ ਸਂਕਿਲੇਸਧਮ੍ਮੇ ਅਨਵਸੇਸਂ ਪਹਾਯ ਵਤ੍ਤਤਿ, ਉਦਾਹੁ ਪਰੇ ਗਣਾਚਰਿਯਾ. ਏਤ੍ਥ ਤਾਵ ਅਤ੍ਤਨੋ ਲਦ੍ਧਿਂ ਵਦਾ’’ਤਿ ਲਦ੍ਧਿਂ ਪੁਚ੍ਛਨ੍ਤੋ. ਕਾਰਣਂ ਪੁਚ੍ਛਨ੍ਤੋਤਿ ‘‘ਸਮਣੋ ਗੋਤਮੋ ਸਂਕਿਲੇਸਧਮ੍ਮੇ ਅਨਵਸੇਸਂ ਪਹਾਯ ਵਤ੍ਤਤੀ’’ਤਿ ਵੁਤ੍ਤੇ ‘‘ਕੇਨ ਕਾਰਣੇਨ ਏਵਮਤ੍ਥਂ ਗਾਹਯਾ’’ਤਿ ਕਾਰਣਂ ਪੁਚ੍ਛਨ੍ਤੋ. ਉਭਯਂ ਪੁਚ੍ਛਨ੍ਤੋਤਿ ‘‘ਇਦਂ ਨਾਮੇਤ੍ਥ ਕਾਰਣ’’ਨ੍ਤਿ ਕਾਰਣਂ ਵਤ੍ਵਾ ਪਟਿਞ੍ਞਾਤੇ ਅਤ੍ਥੇ ਸਾਧਿਯਮਾਨੇ ਅਨ੍ਵਯਤੋ, ਬ੍ਯਤਿਰੇਕਤੋ ਚ ਕਾਰਣਂ ਸਮਤ੍ਥੇਤੁਂ ਸਦਿਸਾਸਦਿਸਭੇਦਂ ਉਪਮੋਦਾਹਰਣਦ੍ਵਯਂ ਪੁਚ੍ਛਨ੍ਤੋ, ਉਭਯਂ ਪੁਚ੍ਛਨ੍ਤੋ ਕਾਰਣਸ੍ਸ ਚ ਤਿਲਕ੍ਖਣਸਮ੍ਪਤ੍ਤਿਯਾ ਯਥਾਪਟਿਞ੍ਞਾਤੇ ਅਤ੍ਥੇ ਸਾਧਿਤੇ ਸਮ੍ਮਦੇਵ ਅਨੁਪਚ੍ਛਾ ਭਾਸਨ੍ਤੋ ਨਿਗਮੇਨ੍ਤੋ ਸਮਨੁਭਾਸਤਿ ਨਾਮ. ਉਪਸਂਹਰਿਤ੍ਵਾਤਿ ਉਪਨੇਤ੍ਵਾ. ‘‘ਕਿਂ ਤੇ’’ਤਿਆਦਿ ਉਪਸਂਹਰਣਾਕਾਰਦਸ੍ਸਨਂ. ਦੁਤਿਯਪਦੇਤਿ ‘‘ਸਙ੍ਘੇਨ ਵਾ ਸਙ੍ਘ’’ਨ੍ਤਿ ਇਮਸ੍ਮਿਂ ਪਦੇ.

ਤਮਤ੍ਥਨ੍ਤਿ ਤਂ ਪਹਾਤਬ੍ਬਧਮ੍ਮਾਨਂ ਅਨਵਸੇਸਂ ਪਹਾਯ ਵਤ੍ਤਨਸਙ੍ਖਾਤਞ੍ਚ ਸਮਾਦਾਤਬ੍ਬਧਮ੍ਮਾਨਂ ਅਨਵਸੇਸਂ ਸਮਾਦਾਯ ਵਤ੍ਤਨਸਙ੍ਖਾਤਞ੍ਚ ਅਤ੍ਥਂ. ਯੋਜੇਤ੍ਵਾਤਿ ਅਕੁਸਲਾਦਿਪਦੇਹਿ ਯੋਜੇਤ੍ਵਾ. ਅਕੋਸਲ੍ਲਸਮ੍ਭੂਤਟ੍ਠੇਨ ਅਕੁਸਲਾ ਚੇਵ ਤਤੋਯੇਵ ਅਕੁਸਲਾਤਿ ਚ ਸਙ੍ਖਂ ਗਤਾਤਿ ਸਙ੍ਖਾਤਾ ਤਤ੍ਥ ਪੁਰਿਮਪਦੇਨ ਏਕਨ੍ਤਾਕੁਸਲੇ ਵਦਤਿ, ਦੁਤਿਯਪਦੇਨ ਤਂਸਹਗਤੇ, ਤਂਪਕ੍ਖਿਯੇ ਚ, ਤੇਨਾਹ ‘‘ਕੋਟ੍ਠਾਸਂ ਵਾ ਕਤ੍ਵਾ ਠਪਿਤਾ’’ਤਿ, ਅਕੁਸਲਪਕ੍ਖਿਯਭਾਵੇਨ ਵਵਤ੍ਥਾਪਿਤਾਤਿ ਅਤ੍ਥੋ. ਅਵਜ੍ਜਟ੍ਠੋ ਦੋਸਟ੍ਠੋ ਗਾਰਯ੍ਹਪਰਿਯਾਯਤ੍ਤਾਤਿ ਆਹ ‘‘ਸਾਵਜ੍ਜਾਤਿ ਸਦੋਸਾ’’ਤਿ. ਅਰਿਯਾ ਨਾਮ ਨਿਦ੍ਦੋਸਾ, ਇਮੇ ਪਨ ਕਤ੍ਥਚਿਪਿ ਨਿਦ੍ਦੋਸਾ ਨ ਹੋਨ੍ਤੀਤਿ ਨਿਦ੍ਦੋਸਟ੍ਠੇਨ ਅਰਿਯਾ ਭਵਿਤੁਂ ਨਾਲਂ ਅਸਮਤ੍ਥਾ.

੩੮੬-੩੯੨. ਯਨ੍ਤਿ ਕਾਰਣੇ ਏਤਂ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਯੇਨ ਵਿਞ੍ਞੂ’’ਤਿ. ਯਂ ਵਾ ਪਨਾਤਿ ‘‘ਯਂ ਪਨ ਕਿਞ੍ਚੀ’’ਤਿ ਅਸਮ੍ਭਾਵਨਵਚਨਮੇਤਨ੍ਤਿ ਆਹ ‘‘ਯਂ ਵਾ ਤਂ ਵਾ ਅਪ੍ਪਮਤ੍ਤਕ’’ਨ੍ਤਿ. ਗਣਾਚਰਿਯਾ ਪੂਰਣਾਦਯੋ. ਸਤ੍ਥੁਪ੍ਪਭਵਤ੍ਤਾ ਸਙ੍ਘਸ੍ਸ ਸਙ੍ਘਸਮ੍ਪਤ੍ਤਿਯਾਪਿ ਸਤ੍ਥੁਸਮ੍ਪਤ੍ਤਿ ਵਿਭਾਵੀਯਤੀਤਿ ਆਹ ‘‘ਸਙ੍ਘਪਸਂਸਾਯਪਿ ਸਤ੍ਥੁਯੇਵ ਪਸਂਸਾਸਿਦ੍ਧਿਤੋ’’ਤਿ. ਸਾ ਪਨ ਪਸਂਸਾ ਪਸਾਦਹੇਤੁਕਾਤਿ ਪਸਾਦਮੁਖੇਨ ਤਂ ਦਸ੍ਸੇਤੁਂ ‘‘ਪਸੀਦਮਾਨਾਪਿ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਿ-ਸਦ੍ਦੇਨ ਯਥਾ ਅਨ੍ਵਯਤੋ ਪਸਂਸਾ ਸਮੁਚ੍ਚੀਯਤਿ, ਏਵਂ ਸਤ੍ਥੁਵਿਪ੍ਪਟਿਪਤ੍ਤਿਯਾ ਸਾਵਕੇਸੁ, ਸਾਵਕਵਿਪ੍ਪਟਿਪਤ੍ਤਿਯਾ ਚ ਸਤ੍ਥਰਿ ਅਪ੍ਪਸਾਦੋ ਸਮੁਚ੍ਚੀਯਤੀਤਿ ਦਟ੍ਠਬ੍ਬਂ. ਸਰੀਰਸਮ੍ਪਤ੍ਤਿਨ੍ਤਿ ਰੂਪਸਮ੍ਪਤ੍ਤਿਂ, ਰੂਪਕਾਯਪਾਰਿਪੂਰਿਨ੍ਤਿ ਅਤ੍ਥੋ. ਭਵਨ੍ਤਿ ਵਤ੍ਤਾਰੋ ਰੂਪਪ੍ਪਮਾਣਾ, ਘੋਸਧਮ੍ਮਪ੍ਪਮਾਣਾ ਚ. ਪੁਨ ਭਵਨ੍ਤਿ ਵਤ੍ਤਾਰੋਤਿ ਧਮ੍ਮਪ੍ਪਮਾਣਵਸੇਨੇਵ ਯੋਜੇਤਬ੍ਬਂ. ਯਾ ਸਙ੍ਘਸ੍ਸ ਪਸਂਸਾਤਿ ਆਨੇਤ੍ਵਾ ਸਮ੍ਬਨ੍ਧੋ.

ਤਤ੍ਥ ਯਾ ਬੁਦ੍ਧਾਨਂ, ਬੁਦ੍ਧਸਾਵਕਾਨਂਯੇਵ ਚ ਪਾਸਂਸਤਾ, ਅਞ੍ਞੇਸਞ੍ਚ ਤਦਭਾਵੋ ਜੋਤਿਤੋ, ਤਂ ਵਿਰਤਿਪ੍ਪਹਾਨਸਂਵਰੁਦ੍ਦੇਸਵਸੇਨ ਨੀਹਰਿਤ੍ਵਾ ਦਸ੍ਸੇਤੁਂ ‘‘ਅਯਮਧਿਪ੍ਪਾਯੋ’’ਤਿਆਦਿ ਵੁਤ੍ਤਂ. ਤਤ੍ਥ ਸੇਤੁਘਾਤਵਿਰਤਿ ਨਾਮ ਅਰਿਯਮਗ੍ਗਵਿਰਤਿ. ਵਿਪਸ੍ਸਨਾਮਤ੍ਤਵਸੇਨਾਤਿ ‘‘ਅਨਿਚ੍ਚ’’ਨ੍ਤਿ ਵਾ ‘‘ਦੁਕ੍ਖ’’ਨ੍ਤਿ ਵਾ ਵਿਵਿਧਂ ਦਸ੍ਸਨਮਤ੍ਤਵਸੇਨ, ਨ ਪਨ ਨਾਮਰੂਪਵਵਤ੍ਥਾਨਪਚ੍ਚਯਪਰਿਗ੍ਗਣ੍ਹਨਪੁਬ੍ਬਕਂ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਸਙ੍ਖਾਰਾਨਂ ਸਮ੍ਮਸਨਵਸੇਨ. ਇਤਰਾਨੀਤਿ ਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਨਿਸ੍ਸਰਣਪ੍ਪਹਾਨਾਨਿ. ‘‘ਸੇਸ’’ਨ੍ਤਿ ਪਞ੍ਚਸੀਲਤੋ ਅਞ੍ਞੋ ਸਬ੍ਬੋ ਸੀਲਸਂਵਰੋ, ‘‘ਖਮੋ ਹੋਤੀ’’ਤਿਆਦਿਨਾ (ਮ. ਨਿ. ੧.੨੪; ੩.੧੫੯; ਅ. ਨਿ. ੪.੧੧੪) ਵੁਤ੍ਤੋ ਸੁਪਰਿਸੁਦ੍ਧੋ ਖਨ੍ਤਿਸਂਵਰੋ, ‘‘ਪਞ੍ਞਾਯੇਤੇ ਪਿਧਿਯ੍ਯਰੇ’’ਤਿ (ਸੁ. ਨਿ. ੧੦੪੧; ਚੂਲ਼ਨਿ. ੬੦) ਏਵਂ ਵੁਤ੍ਤੋ ਕਿਲੇਸਾਨਂ ਸਮੁਚ੍ਛੇਦਕੋ ਮਗ੍ਗਞਾਣਸਙ੍ਖਾਤੋ ਞਾਣਸਂਵਰੋ, ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਪਿਦਹਨਵਸੇਨ ਪਵਤ੍ਤੋ ਪਰਿਸੁਦ੍ਧੋ ਇਨ੍ਦ੍ਰਿਯਸਂਵਰੋ, ‘‘ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯਾ’’ਤਿਆਦਿਨਾ (ਦੀ. ਨਿ. ੨.੪੦੨; ਮ. ਨਿ. ੧.੧੩੫; ਸਂ. ਨਿ. ੫.੮; ਵਿਭ. ੨੦੫) ਵੁਤ੍ਤੋ ਸਮ੍ਮਪ੍ਪਧਾਨਸਙ੍ਖਾਤੋ ਵੀਰਿਯਸਂਵਰੋਤਿ ਇਮਂ ਸਂਵਰਪਞ੍ਚਕਂ ਸਨ੍ਧਾਯਾਹ. ਪਞ੍ਚ ਖੋ ਪਨਿਮੇ ਪਾਤਿਮੋਕ੍ਖੁਦ੍ਦੇਸਾਤਿਆਦਿ ਸਾਸਨੇ ਸੀਲਸ੍ਸ ਬਹੁਭਾਵਂ ਦਸ੍ਸੇਤ੍ਵਾ ਤਦੇਕਦੇਸੇ ਏਵ ਪਰੇਸਂ ਅਵਟ੍ਠਾਨਦਸ੍ਸਨਤ੍ਥਂ ਯਥਾਵੁਤ੍ਤਸੀਲਸਂਵਰਸ੍ਸੇਵ ਪੁਨ ਗਹਣਂ.

ਅਰਿਯਅਟ੍ਠਙ੍ਗਿਕਮਗ੍ਗਵਣ੍ਣਨਾ

੩੯੩. ਸੀਹਨਾਦਨ੍ਤਿ ਸੇਟ੍ਠਨਾਦਂ, ਅਭੀਤਨਾਦਂ ਕੇਨਚਿ ਅਪ੍ਪਟਿਵਤ੍ਤਿਯਨਾਦਨ੍ਤਿ ਅਤ੍ਥੋ. ‘‘ਅਯਂ ਯਥਾਵੁਤ੍ਤੋ ਮਮ ਵਾਦੋ ਅਵਿਪਰੀਤੋ, ਤਸ੍ਸ ਅਵਿਪਰੀਤਭਾਵੋ ਇਮਂ ਮਗ੍ਗਂ ਪਟਿਪਜ੍ਜਿਤ੍ਵਾ ਅਪਰਪ੍ਪਚ੍ਚਯਤੋ ਜਾਨਿਤਬ੍ਬੋ’’ਤਿ ਏਵਂ ਅਵਿਪਰੀਤਭਾਵਾਵਬੋਧਨਤ੍ਥਂ. ‘‘ਅਤ੍ਥਿ ਕਸ੍ਸਪਾ’’ਤਿਆਦੀਸੁ ਯਂ ਮਗ੍ਗਂ ਪਟਿਪਨ੍ਨੋ ਸਮਣੋ ਗੋਤਮੋ ਵਦਨ੍ਤੋ ਯੁਤ੍ਤਪਤ੍ਤਕਾਲੇ, ਤਥਭਾਵਤੋ ਭੂਤਂ, ਏਕਂਸਤੋ ਹਿਤਾਵਿਹਭਾਵੇਨ ਅਤ੍ਥਂ, ਧਮ੍ਮਤੋ ਅਨਪੇਤਤ੍ਤਾ ਧਮ੍ਮਂ, ਵਿਨਯਯੋਗਤੋ ਪਰੇਸਂ ਵਿਨਯਨਤੋ ਚ ਵਿਨਯਂ ਵਦਤੀਤਿ ਸਾਮਂਯੇਵ ਅਤ੍ਤਪਚ੍ਚਕ੍ਖਤੋਵ ਜਾਨਿਸ੍ਸਤਿ, ਸੋ ਮਯਾ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦਿਤੋ ਸਕਲਵਟ੍ਟਦੁਕ੍ਖਨਿਸ੍ਸਰਣਭੂਤੋ ਅਤ੍ਥਿ ਕਸ੍ਸਪ ਮਗ੍ਗੋ, ਤਸ੍ਸ ਚ ਅਧਿਗਮੂਪਾਯਭੂਤਾ ਪੁਬ੍ਬਭਾਗਪਟਿਪਦਾਤਿ ਅਯਮੇਤ੍ਥ ਯੋਜਨਾ. ਤੇਨ ‘‘ਸਮਣੋ ਗੋਤਮੋ ਇਮੇ ਧਮ੍ਮੇ’’ਤਿਆਦਿਨਯਪ੍ਪਵਤ੍ਤੋ ਵਾਦੋ ਕੇਨਚਿ ਅਸਂਕਮ੍ਪਿਯੋ ਯਥਾਭੂਤਸੀਹਨਾਦੋਤਿ ਦਸ੍ਸੇਤਿ.

‘‘ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੀ’’ਤਿਆਦੀਸੁ (ਅ. ਨਿ. ੩.੧੩੪) ਵਿਯ ਮਗ੍ਗਞ੍ਚ ਪਟਿਪਦਞ੍ਚ ਏਕਤੋ ਕਤ੍ਵਾ ਦਸ੍ਸੇਨ੍ਤੋ. ‘‘ਅਯਮੇਵਾ’’ਤਿ ਵਚਨਂ ਮਗ੍ਗਸ੍ਸ ਪੁਥੁਭਾਵਪਟਿਕ੍ਖੇਪਨਤ੍ਥਂ, ਸਬ੍ਬਅਰਿਯਸਾਧਾਰਣਭਾਵਦਸ੍ਸਨਤ੍ਥਂ, ਸਾਸਨੇ ਪਾਕਟਭਾਵਦਸ੍ਸਨਤ੍ਥਞ੍ਚ. ਤੇਨਾਹ ‘‘ਏਕਾਯਨੋ ਅਯਂ ਭਿਕ੍ਖਵੇ ਮਗ੍ਗੋ’’ਤਿ, (ਦੀ. ਨਿ. ੨.੩੭੩; ਮ. ਨਿ. ੧.੧੦੬; ਸਂ. ਨਿ. ੫.੩੬੭, ੩੮੪, ੪੦੯)‘‘ਏਸੇਵ ਮਗ੍ਗੋ ਨਤ੍ਥਞ੍ਞੋ ਦਸ੍ਸਨਸ੍ਸ ਵਿਸੁਦ੍ਧਿਯਾ’’ਤਿ (ਧ. ਪ. ੨੭੪),

‘‘ਏਕਾਯਨਂ ਜਾਤਿਖਯਨ੍ਤਦਸ੍ਸੀ,

ਮਗ੍ਗਂ ਪਜਾਨਾਤਿ ਹਿਤਾਨੁਕਮ੍ਪੀ;

ਏਤੇਨ ਮਗ੍ਗੇਨ ਤਰਿਂਸੁ ਪੁਬ੍ਬੇ,

ਤਰਿਸ੍ਸਨ੍ਤਿ ਯੇ ਚ ਤਰਨ੍ਤਿ ਓਘ’’ਨ੍ਤਿ. (ਸਂ. ਨਿ. ੫.੩੮੪, ੪੦੯; ਮਹਾਨਿ. ੧੯੧; ਚੂਲ਼ਨਿ. ੧੦੭, ੧੨੧; ਨੇਤ੍ਤਿ. ੧੭੦);

ਸਬ੍ਬੇਸੁ ਸੁਤ੍ਤਪਦੇਸੇਸੁ ਅਭਿਧਮ੍ਮਪਦੇਸੇਸੁ ਚ ਏਕੋਵਾਯਂ ਮਗ੍ਗੋ ਪਾਕਟੋ ਪਞ੍ਞਾਤੋ ਆਗਤੋ ਚਾਤਿ.

ਤਪੋਪਕ੍ਕਮਕਥਾਵਣ੍ਣਨਾ

੩੯੪. ਤਪੋਯੇਵ ਉਪਕ੍ਕਮਿਤਬ੍ਬਤੋ ਆਰਭਿਤਬ੍ਬਤੋ ਤਪੋਪਕ੍ਕਮੋਤਿ ਆਹ ‘‘ਤਪਾਰਮ੍ਭਾ’’ਤਿ. ਆਰਮ੍ਭਨਞ੍ਚੇਤ੍ਥ ਕਰਣਮੇਵਾਤਿ ਆਹ ‘‘ਤਪੋਕਮ੍ਮਾਨੀਤਿ ਅਤ੍ਥੋ’’ਤਿ. ਸਮਣਕਮ੍ਮਸਙ੍ਖਾਤਾਤਿ ਸਮਣੇਹਿ ਕਤ੍ਤਬ੍ਬਕਮ੍ਮਸਞ੍ਞਿਤਾ. ਨਿਚ੍ਚੋਲੋਤਿ ਨਿਸ੍ਸਟ੍ਠਚੇਲੋ ਸਬ੍ਬੇਨ ਸਬ੍ਬਂ ਪਟਿਕ੍ਖਿਤ੍ਤਚੇਲੋ. ਨਗ੍ਗਿਯਵਤਸਮਾਦਾਨੇਨ ਨਗ੍ਗੋ. ‘‘ਠਿਤਕੋਵ ਉਚ੍ਚਾਰਂ ਕਰੋਤੀ’’ਤਿਆਦਿ ਨਿਦਸ੍ਸਨਮਤ੍ਤਂ, ਵਮਿਤ੍ਵਾ ਮੁਖਵਿਕ੍ਖਾਲਨਾਦਿਆਚਾਰਸ੍ਸਪਿ ਤੇਨ ਵਿਸ੍ਸਟ੍ਠਤ੍ਤਾ. ਜਿਵ੍ਹਾਯ ਹਤ੍ਥਂ ਅਪਲਿਖਤਿ ਅਪਲਿਹਤਿ ਉਦਕੇਨ ਅਧੋਵਨਤੋ. ਦੁਤਿਯਵਿਕਪ੍ਪੇਪਿ ਏਸੇਵ ਨਯੋ. ‘‘ਏਹਿ ਭਦ੍ਦਨ੍ਤੇ’’ਤਿ ਵੁਤ੍ਤੇ ਉਪਗਮਨਸਙ੍ਖਾਤੋ ਵਿਧਿ ਏਹਿਭਦ੍ਦਨ੍ਤੋ, ਤਂ ਚਰਤੀਤਿ ਏਹਿਭਦ੍ਦਨ੍ਤਿਕੋ, ਤਪ੍ਪਟਿਕ੍ਖੇਪੇਨ ਨ ਏਹਿਭਦ੍ਦਨ੍ਤਿਕੋ. ਨ ਕਰੋਤਿ ਸਮਣੇਨ ਨਾਮ ਪਰਸ੍ਸ ਵਚਨਕਰੇਨ ਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੇਨ. ਪੁਰੇਤਰਨ੍ਤਿ ਤਂ ਠਾਨਂ ਅਤ੍ਤਨੋ ਉਪਗਮਨਤੋ ਪੁਰੇਤਰਂ. ਤਂ ਕਿਰ ਸੋ ‘‘ਭਿਕ੍ਖੁਨਾ ਨਾਮ ਯਾਦਿਚ੍ਛਕੀ ਏਵ ਭਿਕ੍ਖਾ ਗਹੇਤਬ੍ਬਾ’’ਤਿ ਅਧਿਪ੍ਪਾਯੇਨ ਨ ਗਣ੍ਹਾਤਿ. ਉਦ੍ਦਿਸ੍ਸਕਤਂ ‘‘ਮਮ ਨਿਮਿਤ੍ਤਭਾਵੇਨ ਬਹੂ ਖੁਦ੍ਦਕਾ ਪਾਣਾ ਸਙ੍ਘਾਤਂ ਆਪਾਦਿਤਾ’’ਤਿ ਨ ਗਣ੍ਹਾਤਿ. ਨਿਮਨ੍ਤਨਂ ਨ ਸਾਦਿਯਤਿ ‘‘ਏਵਂ ਤੇਸਂ ਵਚਨਂ ਕਤਂ ਭਵਿਸ੍ਸਤੀ’’ਤਿ. ਕੁਮ੍ਭੀਆਦੀਸੁਪਿ ਸੋ ਸਤ੍ਤਸਞ੍ਞੀਤਿ ਆਹ ‘‘ਕੁਮ੍ਭੀਕਲ਼ੋਪਿਯੋ’’ਤਿਆਦਿ.

ਕਬਲ਼ਨ੍ਤਰਾਯੋਤਿ ਕਬਲ਼ਸ੍ਸ ਅਨ੍ਤਰਾਯੋ ਹੋਤੀਤਿ. ਗਾਮਸਭਾਗਾਦਿਵਸੇਨ ਸਙ੍ਗਮ੍ਮ ਕਿਤ੍ਤੇਨ੍ਤਿ ਏਤਿਸ੍ਸਾਤਿ ਸਙ੍ਕਿਤ੍ਤਿ, ਤਥਾ ਸਂਹਟਤਣ੍ਡੁਲਾਦਿਸਞ੍ਚਯੋ. ਮਨੁਸ੍ਸਾਤਿ ਵੇਯ੍ਯਾਵਚ੍ਚਕਰਮਨੁਸ੍ਸਾ.

ਸੁਰਾਪਾਨਮੇਵਾਤਿ ਮਜ੍ਜਲਕ੍ਖਣਪ੍ਪਤ੍ਤਾਯ ਸੁਰਾਯ ਪਾਨਮੇਵ ਸੁਰਾਗ੍ਗਹਣੇਨ ਚੇਤ੍ਥ ਮੇਰਯਮ੍ਪਿ ਸਙ੍ਗਹਿਤਂ. ਏਕਾਗਾਰਮੇਵ ਉਞ੍ਛਤੀਤਿ ਏਕਾਗਾਰਿਕੋ. ਏਕਾਲੋਪੇਨੇਵ ਵਤ੍ਤਤੀਤਿ ਏਕਾਲੋਪਿਕੋ. ਦੀਯਤਿ ਏਤਾਯਾਤਿ ਦਤ੍ਤਿ, ਦ੍ਵਤ੍ਤਿਆਲੋਪਮਤ੍ਤਗਾਹਿ ਖੁਦ੍ਦਕਂ ਭਿਕ੍ਖਾਦਾਨਭਾਜਨਂ, ਤੇਨਾਹ ‘‘ਖੁਦ੍ਦਕਪਾਤੀ’’ਤਿ. ਅਭੁਞ੍ਜਨਵਸੇਨ ਏਕੋ ਅਹੋ ਏਤਸ੍ਸ ਅਤ੍ਥੀਤਿ ਏਕਾਹਿਕੋ, ਆਹਾਰੋ. ਤਂ ਏਕਾਹਿਕਂ, ਸੋ ਪਨ ਅਤ੍ਥਤੋ ਏਕਦਿਵਸਲਙ੍ਘਕੋਤਿ ਆਹ ‘‘ਏਕਦਿਵਸਨ੍ਤਰਿਕ’’ਨ੍ਤਿ. ‘‘ਦ੍ਵੀਹਿਕ’’ਨ੍ਤਿਆਦੀਸੁਪਿ ਏਸੇਵ ਨਯੋ. ਏਕਾਹਂ ਅਭੁਞ੍ਜਿਤ੍ਵਾ ਏਕਾਹਂ ਭੁਞ੍ਜਨਂ ਏਕਾਹਵਾਰੋ, ਤਂ ਏਕਾਹਿਕਮੇਵ ਅਤ੍ਥਤੋ. ਦ੍ਵੀਹਂ ਅਭੁਞ੍ਜਿਤ੍ਵਾ ਦ੍ਵੀਹਂ ਭੁਞ੍ਜਨਂ ਦ੍ਵੀਹਵਾਰੋ. ਸੇਸਦ੍ਵਯੇਪਿ ਏਸੇਵ ਨਯੋ. ਉਕ੍ਕਟ੍ਠੋ ਪਨ ਪਰਿਯਾਯਭਤ੍ਤਭੋਜਨਿਕੋ ਦ੍ਵੀਹਂ ਅਭੁਞ੍ਜਿਤ੍ਵਾ ਏਕਾਹਮੇਵ ਭੁਞ੍ਜਤਿ. ਸੇਸਦ੍ਵਯੇਪਿ ਏਸੇਵ ਨਯੋ.

੩੯੫. ਕੁਣ੍ਡਕਨ੍ਤਿ ਤਨੁਤਰਂ ਤਣ੍ਡੁਲਸਕਲਂ.

੩੯੬. ਸਣੇਹਿ ਸਣਵਾਕੇਹਿ ਨਿਬ੍ਬਤ੍ਤਵਤ੍ਥਾਨਿ ਸਾਣਾਨਿ. ਮਿਸ੍ਸਸਾਣਾਨਿ ਮਸਾਣਾਨਿ, ਨ ਭਙ੍ਗਾਨਿ. ਏਰਕਤਿਣਾਦੀਨੀਤਿ ਆਦਿ-ਸਦ੍ਦੇਨ ਅਕ੍ਕਮਕਚਿਕਦਲੀਵਾਕਾਦੀਨਂ ਸਙ੍ਗਹੋ. ਏਰਕਾਦੀਹਿ ਕਤਾਨਿ ਹਿ ਛਵਾਨਿ ਲਾਮਕਾਨਿ ਦੁਸ੍ਸਾਨੀਤਿ ਵਤ੍ਤਬ੍ਬਤਂ ਲਭਨ੍ਤਿ.

ਮਿਚ੍ਛਾਵਾਯਾਮਵਸੇਨੇਵ ਉਕ੍ਕੁਟਿਕਵਤਾਨੁਯੋਗੋਤਿ ਆਹ ‘‘ਉਕ੍ਕੁਟਿਕਵੀਰਿਯਂ ਅਨੁਯੁਤ੍ਤੋ’’ਤਿ. ਥਣ੍ਡਿਲਨ੍ਤਿ ਵਾ ਸਮਾ ਪਕਤਿਭੂਮਿ ਵੁਚ੍ਚਤਿ ‘‘ਪਤ੍ਥਣ੍ਡਿਲੇ ਪਾਤੁਰਹੋਸੀ’’ਤਿਆਦੀਸੁ (ਮ. ਨਿ. ੪.੧੦) ਵਿਯ, ਤਸ੍ਮਾ ਥਣ੍ਡਿਲਸੇਯ੍ਯਨ੍ਤਿ ਅਨਨ੍ਤਰਹਿਤਾਯ ਪਕਤਿਭੂਮਿਯਂ ਸੇਯ੍ਯਨ੍ਤਿ ਵੁਤ੍ਤਂ ਹੋਤਿ. ਲਦ੍ਧਂ ਆਸਨਨ੍ਤਿ ਨਿਸੀਦਿਤੁਂ ਯਥਾਲਦ੍ਧਂ ਆਸਨਂ. ਅਕੋਪੇਤ੍ਵਾਤਿ ਅਞ੍ਞਤ੍ਥ ਅਨੁਪਗਨ੍ਤ੍ਵਾ, ਤੇਨਾਹ ‘‘ਤਤ੍ਥੇਵ ਨਿਸੀਦਨਸੀਲੋ’’ਤਿ. ਸੋ ਹਿ ਤਂ ਅਛਡ੍ਡੇਨ੍ਤੋ ਅਪਰਿਚ੍ਚਜਨ੍ਤੋ ਅਕੋਪੇਨ੍ਤੋ ਨਾਮ ਹੋਤਿ. ਵਿਕਟਨ੍ਤਿ ਗੂਥਂ ਵੁਚ੍ਚਤਿ ਆਸਯਵਸੇਨ ਵਿਰੂਪਂ ਜਾਤਨ੍ਤਿ ਕਤ੍ਵਾ.

ਏਤ੍ਥ ਚ ‘‘ਅਚੇਲਕੋ ਹੋਤੀ’’ਤਿਆਦੀਨਿ ਵਤਪਦਾਨਿ ਯਾਵ ‘‘ਨ ਥੁਸੋਦਕਂ ਪਿਵਤੀ’’ਤਿ ਏਤਾਨਿ ਏਕਵਾਰਾਨਿ. ‘‘ਏਕਾਗਾਰਿਕੋ ਵਾ’’ਤਿਆਦੀਨਿ ਨਾਨਾਵਾਰਾਨਿ, ਨਾਨਾਕਾਲਿਕਾਨਿ ਵਾ. ਤਥਾ ‘‘ਸਾਕਭਕ੍ਖੋ ਵਾ’’ਤਿਆਦੀਨਿ, ‘‘ਸਾਣਾਨਿਪਿ ਧਾਰੇਤੀ’’ਤਿਆਦੀਨਿ ਚ. ਤਥਾ ਹੇਤ੍ਥ ਵਾ-ਸਦ੍ਦਗ੍ਗਹਣਂ, ਪਿ-ਸਦ੍ਦਗ੍ਗਹਣਞ੍ਚ ਕਤਂ. ਪਿ-ਸਦ੍ਦੋਪਿ ਵਿਕਪ੍ਪਤ੍ਥੋ ਏਵ ਦਟ੍ਠਬ੍ਬੋ. ਪੁਰਿਮੇਸੁ ਪਨ ਨ ਕਤਂ. ਏਵਞ੍ਚ ਕਤ੍ਵਾ ‘‘ਅਚੇਲਕੋ ਹੋਤੀ’’ਤਿ ਵਤ੍ਵਾ ‘‘ਸਾਣਾਨਿਪਿ ਧਾਰੇਤੀ’’ਤਿਆਦਿ ਵਚਨਸ੍ਸ, ‘‘ਰਜੋਜਲ੍ਲਧਰੋ ਹੋਤੀ’’ਤਿ ਵਤ੍ਵਾ ‘‘ਉਦਕੋਰੋਹਨਾਨੁਯੋਗਂ ਅਨੁਯੁਤ੍ਤੋ’’ਤਿ ਵਚਨਸ੍ਸ ਚ ਅਵਿਰੋਧੋ ਸਿਦ੍ਧੋ ਹੋਤਿ. ਅਥ ਵਾ ਕਿਮੇਤ੍ਥ ਅਵਿਰੋਧਚਿਨ੍ਤਾਯ. ਉਮ੍ਮਤ੍ਤਕਪਚ੍ਛਿਸਦਿਸੋ ਹਿ ਤਿਤ੍ਥਿਯਵਾਦੋ. ਅਥ ਵਾ ‘‘ਅਚੇਲਕੋ ਹੋਤੀ’’ਤਿ ਆਰਭਿਤ੍ਵਾ ਤਪ੍ਪਸਙ੍ਗੇਨ ਸਬ੍ਬਮ੍ਪਿ ਅਤ੍ਤਕਿਲਮਥਾਨੁਯੋਗਂ ਦਸ੍ਸੇਨ੍ਤੇਨ ‘‘ਸਾਣਾਨਿਪਿ ਧਾਰੇਤੀ’’ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਤਪੋਪਕ੍ਕਮਨਿਰਤ੍ਥਕਥਾਵਣ੍ਣਨਾ

੩੯੭. ਸੀਲਸਮ੍ਪਦਾਦੀਹਿ ਵਿਨਾਤਿ ਸੀਲਸਮ੍ਪਦਾ, ਸਮਾਧਿਸਮ੍ਪਦਾ, ਪਞ੍ਞਾਸਮ੍ਪਦਾਤਿ ਇਮਾਹਿ ਲੋਕੁਤ੍ਤਰਾਹਿ ਸਮ੍ਪਦਾਹਿ ਵਿਨਾ ਨ ਕਦਾਚਿ ਸਾਮਞ੍ਞਂ ਵਾ ਬ੍ਰਹ੍ਮਞ੍ਞਂ ਵਾ ਸਮ੍ਭਵਤਿ, ਯਸ੍ਮਾ ਚ ਤਦੇਵਂ, ਤਸ੍ਮਾ ਤੇਸਂ ਤਪੋਪਕ੍ਕਮਾਨਂ ਨਿਰਤ੍ਥਕਤਂ ਦਸ੍ਸੇਨ੍ਤੋਤਿ ਯੋਜਨਾ. ‘‘ਦੋਸਵੇਰਵਿਰਹਿਤ’’ਨ੍ਤਿ ਇਦਂ ਦੋਸਸ੍ਸ ਮੇਤ੍ਤਾਯ ਉਜੁਪਟਿਪਕ੍ਖਤਾਯ ਵੁਤ੍ਤਂ. ਦੋਸ-ਗ੍ਗਹਣੇਨ ਵਾ ਸਬ੍ਬੇਪਿ ਝਾਨਪਟਿਪਕ੍ਖਾ ਸਂਕਿਲੇਸਧਮ੍ਮਾ ਗਹਿਤਾ, ਵੇਰ-ਗ੍ਗਹਣੇਨ ਪਚ੍ਚਤ੍ਥਿਕਭੂਤਾ ਸਤ੍ਤਾ. ਯਦਗ੍ਗੇਨ ਹਿ ਦੋਸਰਹਿਤਂ, ਤਦਗ੍ਗੇਨ ਵੇਰਰਹਿਤਨ੍ਤਿ.

੩੯੮. ਪਾਕਟਭਾਵੇਨ ਕਾਯਤਿ ਗਮੇਤੀਤਿ ਪਕਤਿ, ਲੋਕਸਿਦ੍ਧਵਾਦੋ, ਤੇਨਾਹ ‘‘ਪਕਤਿ ਖੋ ਏਸਾਤਿ ਪਕਤਿਕਥਾ ਏਸਾ’’ਤਿ. ਮਤ੍ਤਾਯਾਤਿ ਮਤ੍ਤਾ-ਸਦ੍ਦੋ ‘‘ਮਤ੍ਤਾ ਸੁਖਪਰਿਚ੍ਚਾਗਾ’’ਤਿਆਦੀਸੁ (ਧ. ਪ. ੨੯੦) ਵਿਯ ਅਪ੍ਪਤ੍ਥਂ ਅਨ੍ਤੋਨੀਤਂ ਕਤ੍ਵਾ ਪਮਾਣਵਾਚਕੋਤਿ ਆਹ ‘‘ਇਮਿਨਾ ਪਮਾਣੇਨ ਏਵਂ ਪਰਿਤ੍ਤਕੇਨਾ’’ਤਿ. ਤੇਨ ਪਨ ਪਮਾਣੇਨ ਪਹਾਤਬ੍ਬੋ ਪਕਰਣਪ੍ਪਤ੍ਤੋ ਪਟਿਪਤ੍ਤਿਕ੍ਕਮੋਤਿ ਆਹ ‘‘ਪਟਿਪਤ੍ਤਿਕ੍ਕਮੇਨਾ’’ਤਿ. ਸਬ੍ਬਤ੍ਥਾਤਿ ਸਬ੍ਬਵਾਰੇਸੁ.

੩੯੯. ਅਞ੍ਞਥਾ ਵਦਥਾਤਿ ਯਦਿ ਅਚੇਲਕਭਾਵਾਦਿਨਾ ਸਾਮਞ੍ਞਂ ਵਾ ਬ੍ਰਹ੍ਮਞ੍ਞਂ ਵਾ ਅਭਵਿਸ੍ਸ, ਸੁਵਿਜਾਨੋਵ ਸਮਣੋ ਸੁਵਿਜਾਨੋ ਬ੍ਰਾਹ੍ਮਣੋ. ਯਸ੍ਮਾ ਪਨ ਤੁਮ੍ਹੇ ਇਤੋ ਅਞ੍ਞਥਾਵ ਸਾਮਞ੍ਞਂ ਬ੍ਰਹ੍ਮਞ੍ਞਞ੍ਚ ਵਦਥ, ਤਸ੍ਮਾ ਦੁਜ੍ਜਾਨੋਵ ਸਮਣੋ ਦੁਜ੍ਜਾਨੋ ਬ੍ਰਾਹ੍ਮਣੋ, ਤੇਨਾਹ ‘‘ਇਦਂ ਸਨ੍ਧਾਯਾਹਾ’’ਤਿ. ਤਂ ਪਕਤਿਵਾਦਂ ਪਟਿਕ੍ਖਿਪਿਤ੍ਵਾਤਿ ਪੁਬ੍ਬੇ ਯਂ ਪਾਕਤਿਕਂ ਸਾਮਞ੍ਞਂ ਬ੍ਰਹ੍ਮਞ੍ਞਞ੍ਚ ਹਦਯੇ ਠਪੇਤ੍ਵਾ ਤੇਨ ‘‘ਦੁਕ੍ਕਰ’’ਨ੍ਤਿਆਦਿ ਵੁਤ੍ਤਂ, ਤਮੇਵ ਸਨ੍ਧਾਯ ਭਗਵਤਾਪਿ ‘‘ਪਕਤਿ ਖੋ ਏਸਾ’’ਤਿਆਦਿ ਵੁਤ੍ਤਂ. ਇਧ ਪਨ ਤਂ ਪਕਤਿਵਾਦਂ ਪਾਕਤਿਕਸਮਣਬ੍ਰਾਹ੍ਮਣਵਿਸਯਂ ਕਥਂ ਪਟਿਕ੍ਖਿਪਿਤ੍ਵਾ ਪਟਿਸਂਹਰਿਤ੍ਵਾ ਸਭਾਵਤੋਵ ਪਰਮਤ੍ਥਤੋਵ ਸਮਣਸ੍ਸ ਬ੍ਰਾਹ੍ਮਣਸ੍ਸ ਚ ਦੁਜ੍ਜਾਨਭਾਵਂ ਆਵਿਕਰੋਨ੍ਤੋ ਪਕਾਸੇਨ੍ਤੋ. ਤਤ੍ਰਾਪੀਤਿ ਸਮਣਬ੍ਰਾਹ੍ਮਣਵਾਦੇਪਿ ਵੁਤ੍ਤਨਯੇਨੇਵ.

ਸੀਲਸਮਾਧਿਪਞ੍ਞਾਸਮ੍ਪਦਾਵਣ੍ਣਨਾ

੪੦੦-੧. ਪਣ੍ਡਿਤੋਤਿ ਹੇਤੁਸਮ੍ਪਤ੍ਤਿਸਿਦ੍ਧੇਨ ਪਣ੍ਡਿਚ੍ਚੇਨ ਸਮਨ੍ਨਾਗਤੋ, ਕਥਂ ਉਗ੍ਗਹੇਸਿ ਪਰਿਪਕ੍ਕਞਾਣਤ੍ਤਾ ਘਟੇ ਪਦੀਪੇਨ ਵਿਯ ਅਬ੍ਭਨ੍ਤਰੇ ਸਮੁਜ੍ਜਲਨ੍ਤੇਨ ਪਞ੍ਞਾਵੇਯ੍ਯਤ੍ਤਿਯੇਨ ਤਤ੍ਥ ਤਤ੍ਥ ਭਗਵਤਾ ਦੇਸਿਤਮਤ੍ਥਂ ਪਰਿਗ੍ਗਣ੍ਹਨ੍ਤੋ ਤਮ੍ਪਿ ਦੇਸਨਂ ਉਪਧਾਰੇਸਿ. ਤਸ੍ਸ ਚਾਤਿ ਯੋ ਅਚੇਲਕੋ ਹੋਤਿ ਯਾਵ ਉਦਕੋਰੋਹਨਾਨੁਯੋਗਂ ਅਨੁਯੁਤ੍ਤੋ ਵਿਹਰਤਿ, ਤਸ੍ਸ ਚ. ਤਾ ਸਮ੍ਪਤ੍ਤਿਯੋ ਪੁਚ੍ਛਾਮਿ, ਯਾਹਿ ਸਮਣੋ ਚ ਹੋਤੀਤਿ ਅਧਿਪ੍ਪਾਯੋ. ਸੀਲਸਮ੍ਪਦਾਯਾਤਿ ਇਤਿ-ਸਦ੍ਦੋ ਆਦਿਅਤ੍ਥੋ, ਤੇਨ ‘‘ਚਿਤ੍ਤਸਮ੍ਪਦਾਯ ਪਞ੍ਞਾਸਮ੍ਪਦਾਯਾ’’ਤਿ ਪਦਦ੍ਵਯਂ ਸਙ੍ਗਣ੍ਹਾਤਿ ਅਸੇਕ੍ਖਸੀਲਾਦਿਖਨ੍ਧਤ੍ਤਯਸਙ੍ਗਹਿਤਞ੍ਹਿ ਅਰਹਤ੍ਤਂ, ਤੇਨਾਹ ‘‘ਅਰਹਤ੍ਤਫਲਮੇਵ ਸਨ੍ਧਾਯ ਵੁਤ੍ਤ’’ਨ੍ਤਿਆਦਿ. ਤਤ੍ਥ ਇਦਨ੍ਤਿ ਇਦਂ ਵਚਨਂ.

ਸੀਹਨਾਦਕਥਾਵਣ੍ਣਨਾ

੪੦੨. ਅਨਞ੍ਞਸਾਧਾਰਣਤਾਯ, ਅਨਞ੍ਞਸਾਧਾਰਣਤ੍ਥਵਿਸਯਤਾਯ ਚ ਅਨੁਤ੍ਤਰਂ ਬੁਦ੍ਧਸੀਹਨਾਦਂ ਨਦਨ੍ਤੋ. ਅਤਿਵਿਯ ਅਚ੍ਚਨ੍ਤਵਿਸੁਦ੍ਧਤਾਯ ਪਰਮਵਿਸੁਦ੍ਧਂ. ਪਰਮਨ੍ਤਿ ਉਕ੍ਕਟ੍ਠਂ, ਤੇਨਾਹ ‘‘ਉਤ੍ਤਮ’’ਨ੍ਤਿ. ਸੀਲਮੇਵ ਲੋਕਿਯਸੀਲਤ੍ਤਾ. ਯਥਾ ਅਨਞ੍ਞਸਾਧਾਰਣਂ ਭਗਵਤੋ ਲੋਕੁਤ੍ਤਰਸੀਲਂ ਸਵਾਸਨਂ ਪਟਿਪਕ੍ਖਵਿਦ੍ਧਂਸਨਤੋ, ਏਵਂ ਲੋਕਿਯਸੀਲਮ੍ਪਿ ਤਸ੍ਸ ਅਨੁਚ੍ਛਵਿਕਭਾਵੇਨ ਸਮ੍ਭੂਤਤ੍ਤਾ, ਸਮੇਨ ਸਮਨ੍ਤਿ ਸਮਸਮਨ੍ਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਮਮ ਸੀਲਸਮੇਨ ਸੀਲੇਨ ਮਯਾ ਸਮ’’ਨ੍ਤਿ. ‘‘ਯਦਿਦਂ ਅਧਿਸੀਲ’’ਨ੍ਤਿ ਲੋਕਿਯਂ, ਲੋਕੁਤ੍ਤਰਞ੍ਚਾਤਿ ਦੁਵਿਧਮ੍ਪਿ ਬੁਦ੍ਧਸੀਲਂ ਏਕਜ੍ਝਂ ਕਤ੍ਵਾ ਵੁਤ੍ਤਂ. ਤੇਨਾਹ ‘‘ਸੀਲੇਪੀ’’ਤਿ. ਇਤਿ ਇਮਨ੍ਤਿ ਏਵਂ ਇਮਂ ਸੀਲਵਿਸਯਂ. ਪਠਮਂ ਪਵਤ੍ਤਤ੍ਤਾ ਪਠਮਂ.

ਤਪਤੀਤਿ ਸਨ੍ਤਪ੍ਪਤਿ, ਵਿਧਮਤੀਤਿ ਅਤ੍ਥੋ. ਜਿਗੁਚ੍ਛਤੀਤਿ ਹੀਲ਼ੇਤਿ ਲਾਮਕਤੋ ਠਪੇਤਿ. ਨਿਦ੍ਦੋਸਤ੍ਤਾ ਅਰਿਯਾ ਆਰਕਾ ਕਿਲੇਸੇਹੀਤਿ. ਮਗ੍ਗਫਲਸਮ੍ਪਯੁਤ੍ਤਾ ਵੀਰਿਯਸਙ੍ਖਾਤਾ ਤਪੋਜਿਗੁਚ੍ਛਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਪਰਮਾ ਨਾਮ ਸਬ੍ਬੁਕ੍ਕਟ੍ਠਭਾਵਤੋ. ਯਥਾ ਯੁਵਿਨੋ ਭਾਵੋ ਯੋਬ੍ਬਨਂ, ਏਵਂ ਜਿਗੁਚ੍ਛਿਨੋ ਭਾਵੋ ਜੇਗੁਚ੍ਛਂ. ਕਿਲੇਸਾਨਂ ਸਮੁਚ੍ਛਿਨ੍ਦਨਪਟਿਪ੍ਪਸ੍ਸਮ੍ਭਨਾਨਿ ਸਮੁਚ੍ਛੇਦਪਟਿਪਸ੍ਸਦ੍ਧਿਵਿਮੁਤ੍ਤਿਯੋ. ਨਿਸ੍ਸਰਣਵਿਮੁਤ੍ਤਿ ਨਿਬ੍ਬਾਨਂ. ਅਥ ਵਾ ਸਮ੍ਮਾਵਾਚਾਦੀਨਂ ਅਧਿਸੀਲਗ੍ਗਹਣੇਨ, ਸਮ੍ਮਾਵਾਯਾਮਸ੍ਸ ਅਧਿਜੇਗੁਚ੍ਛਗ੍ਗਹਣੇਨ, ਸਮ੍ਮਾਦਿਟ੍ਠਿਯਾ ਅਧਿਪਞ੍ਞਾਗ੍ਗਹਣੇਨ ਗਹਿਤਤ੍ਤਾ ਅਗ੍ਗਹਿਤਗ੍ਗਹਣੇਨ ਸਮ੍ਮਾਸਙ੍ਕਪ੍ਪਸਤਿਸਮਾਧਯੋ ਮਗ੍ਗਫਲਪਰਿਯਾਪਨ੍ਨਾ ਸਮੁਚ੍ਛੇਦਪਟਿਪਸ੍ਸਦ੍ਧਿਵਿਮੁਤ੍ਤਿਯੋ ਦਟ੍ਠਬ੍ਬਾ. ਨਿਸ੍ਸਰਣਵਿਮੁਤ੍ਤਿ ਪਨ ਨਿਬ੍ਬਾਨਮੇਵ.

੪੦੩. ਯਂ ਕਿਞ੍ਚਿ ਜਨਵਿਵਿਤ੍ਤਂ ਠਾਨਂ ਇਧ ‘‘ਸੁਞ੍ਞਾਗਾਰ’’ਨ੍ਤਿ ਅਧਿਪ੍ਪੇਤਂ. ਤਤ੍ਥ ਨਦਨ੍ਤੇਨ ਵਿਨਾ ਨਾਦੋ ਨਤ੍ਥੀਤਿ ਆਹ ‘‘ਏਕਤੋਵ ਨਿਸੀਦਿਤ੍ਵਾ’’ਤਿ. ਅਟ੍ਠਸੁ ਪਰਿਸਾਸੂਤਿ ਖਤ੍ਤਿਯਪਰਿਸਾ, ਬ੍ਰਾਹ੍ਮਣਪਰਿਸਾ, ਗਹਪਤਿਪਰਿਸਾ, ਸਮਣਪਰਿਸਾ, ਚਾਤੁਮਹਾਰਾਜਿਕਪਰਿਸਾ, ਤਾਵਤਿਂਸਪਰਿਸਾ, ਮਾਰਪਰਿਸਾ, ਬ੍ਰਹ੍ਮਪਰਿਸਾਤਿ ਇਮਾਸੁ ਅਟ੍ਠਸੁ ਪਰਿਸਾਸੁ.

ਵੇਸਾਰਜ੍ਜਾਨੀਤਿ ਵਿਸਾਰਦਭਾਵਾ ਞਾਣਪ੍ਪਹਾਨਸਮ੍ਪਦਾਨਿਮਿਤ੍ਤਂ ਕੁਤੋਚਿ ਅਸਨ੍ਤਸ੍ਸਨਭਾਵਾ ਨਿਬ੍ਭਯਭਾਵਾਤਿ ਅਤ੍ਥੋ. ਆਸਭਂ ਠਾਨਨ੍ਤਿ ਸੇਟ੍ਠਂ ਠਾਨਂ, ਉਤ੍ਤਮਂ ਠਾਨਨ੍ਤਿ ਅਤ੍ਥੋ. ਆਸਭਾ ਵਾ ਪੁਬ੍ਬਬੁਦ੍ਧਾ, ਤੇਸਂ ਠਾਨਨ੍ਤਿ ਅਤ੍ਥੋ.

ਅਪਿਚ ਉਸਭਸ੍ਸ ਇਦਨ੍ਤਿ ਆਸਭਂ, ਆਸਭਂ ਵਿਯਾਤਿ ਆਸਭਂ. ਯਥਾ ਹਿ ਨਿਸਭਸਙ੍ਖਾਤੋ ਉਸਭੋ ਅਤ੍ਤਨੋ ਉਸਭਬਲੇਨ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਅਚਲਟ੍ਠਾਨੇਨ ਤਿਟ੍ਠਤਿ, ਏਵਂ ਤਥਾਗਤੋਪਿ ਦਸਹਿ ਤਥਾਗਤਬਲੇਹਿ ਸਮਨ੍ਨਾਗਤੋ ਚਤੂਹਿ ਵੇਸਾਰਜ੍ਜਪਾਦੇਹਿ ਅਟ੍ਠਪਰਿਸਾਪਥਵਿਂ ਉਪ੍ਪੀਲ਼ੇਤ੍ਵਾ ਸਦੇਵਕੇ ਲੋਕੇ ਕੇਨਚਿ ਪਚ੍ਚਤ੍ਥਿਕੇਨ ਅਕਮ੍ਪਿਯੋ ਅਚਲੇਨ ਠਾਨੇਨ ਤਿਟ੍ਠਤਿ. ਏਵਂ ਤਿਟ੍ਠਮਾਨੋਵ ਤਂ ਆਸਭਂ ਠਾਨਂ ਪਟਿਜਾਨਾਤਿ ਉਪਗਚ੍ਛਤਿ ਨ ਪਚ੍ਚਕ੍ਖਾਤਿ ਅਤ੍ਤਨਿ ਆਰੋਪੇਤਿ. ਤੇਨ ਵੁਤ੍ਤਂ ‘‘ਆਸਭਂ ਠਾਨਂ ਪਟਿਜਾਨਾਤੀ’’ਤਿ.

ਸੀਹਨਾਦਂ ਨਦਤੀਤਿ ਯਥਾ ਮਿਗਰਾਜਾ ਪਰਿਸ੍ਸਯਾਨਂ ਸਹਨਤੋ, ਵਨਮਹਿਂਸਮਤ੍ਤਵਾਰਣਾਦੀਨਂ ਹਨਨਤੋ ਚ ‘‘ਸੀਹੋ’’ਤਿ ਵੁਚ੍ਚਤਿ, ਏਵਂ ਤਥਾਗਤੋ ਲੋਕਧਮ੍ਮਾਨਂ ਸਹਨਤੋ, ਪਰਪ੍ਪਵਾਦਾਨਂ ਹਨਨਤੋ ਚ ‘‘ਸੀਹੋ’’ਤਿ ਵੁਚ੍ਚਤਿ. ਏਵਂ ਵੁਤ੍ਤਸ੍ਸ ਸੀਹਸ੍ਸ ਨਾਦਂ ਸੀਹਨਾਦਂ. ਤਤ੍ਥ ਯਥਾ ਸੀਹੋ ਸੀਹਬਲੇਨ ਸਮਨ੍ਨਾਗਤੋ ਸਬ੍ਬਤ੍ਥ ਵਿਸਾਰਦੋ ਵਿਗਤਲੋਮਹਂਸੋ ਸੀਹਨਾਦਂ ਨਦਤਿ, ਏਵਂ ਤਥਾਗਤਸੀਹੋਪਿ ਦਸਹਿ ਤਥਾਗਤਬਲੇਹਿ ਸਮਨ੍ਨਾਗਤੋ ਅਟ੍ਠਸੁ ਪਰਿਸਾਸੁ ਵਿਸਾਰਦੋ ਵਿਗਤਲੋਮਹਂਸੋ ‘‘ਇਤਿ ਰੂਪ’’ਨ੍ਤਿਆਦਿਨਾ (ਸਂ. ਨਿ. ੩.੭੮; ਅ. ਨਿ. ੮.੨) ਨਯੇਨ ਨਾਨਾਵਿਲਾਸਸਮ੍ਪਨ੍ਨਂ ਸੀਹਨਾਦਂ ਨਦਤਿ.

ਪਞ੍ਹਂ ਅਭਿਸਙ੍ਖਰਿਤ੍ਵਾਤਿ ਞਾਤੁਂ ਇਚ੍ਛਿਤਮਤ੍ਥਂ ਅਤ੍ਤਨੋ ਞਾਣਬਲਾਨੁਰੂਪਂ ਅਭਿਰਚਿਤ੍ਵਾ ਤਙ੍ਖਣਂਯੇਵਾਤਿ ਪੁਚ੍ਛਿਤਕ੍ਖਣੇਯੇਵ ਠਾਨੁਪ੍ਪਤ੍ਤਿਕਪਟਿਭਾਨੇਨ ਵਿਸ੍ਸਜ੍ਜੇਤਿ. ਚਿਤ੍ਤਂ ਪਰਿਤੋਸੇਤਿਯੇਵ ਅਜ੍ਝਾਸਯਾਨੁਰੂਪਂ ਵਿਸ੍ਸਜ੍ਜਨਤੋ. ਸੋਤਬ੍ਬਞ੍ਚਸ੍ਸ ਮਞ੍ਞਨ੍ਤਿ ਅਟ੍ਠਕ੍ਖਣਵਜ੍ਜਿਤੇਨ ਨਵਮੇਨ ਖਣੇਨ ਲਬ੍ਭਮਾਨਤ੍ਤਾ. ‘‘ਯਂ ਨੋ ਸਤ੍ਥਾ ਭਾਸਤਿ, ਤਂ ਨੋ ਸੋਸ੍ਸਾਮਾ’’ਤਿ ਆਦਰਗਾਰਵਜਾਤਾ ਮਹਨ੍ਤੇਨ ਉਸ੍ਸਾਹੇਨ ਸੋਤਬ੍ਬਂ ਸਮ੍ਪਟਿਚ੍ਛਿਤਬ੍ਬਂ ਮਞ੍ਞਨ੍ਤਿ. ਸੁਪ੍ਪਸਨ੍ਨਾ ਪਸਾਦਾਭਿਬੁਦ੍ਧਿਯਾ ਵਿਗਤੁਪਕ੍ਕਿਲੇਸਤਾਯ ਕਲ੍ਲਚਿਤ੍ਤਾ ਮੁਦੁਚਿਤ੍ਤਾ ਹੋਨ੍ਤਿ. ਪਸਨ੍ਨਕਾਰਨ੍ਤਿ ਪਸਨ੍ਨੇਹਿ ਕਾਤਬ੍ਬਸਕ੍ਕਾਰਂ, ਧਮ੍ਮਾਮਿਸਪੂਜਨ੍ਤਿ ਅਤ੍ਥੋ. ਤਤ੍ਥ ਆਮਿਸਪੂਜਂ ਦਸ੍ਸੇਨ੍ਤੋ ‘‘ਪਣੀਤਾਨੀ’’ਤਿਆਦਿਮਾਹ. ਧਮ੍ਮਪੂਜਾ ਪਨ ‘‘ਤਥਤ੍ਤਾਯਾ’’ਤਿ ਇਮਿਨਾ ਦਸ੍ਸਿਤਾ. ਤਥਾਭਾਵਾਯਾਤਿ ਯਥਤ੍ਤਾਯ ਯਸ੍ਸ ਵਟ੍ਟਦੁਕ੍ਖਨਿਸ੍ਸਰਣਤ੍ਥਾਯ ਧਮ੍ਮੋ ਦੇਸਿਤੋ, ਤਥਾਭਾਵਾਯ, ਤੇਨਾਹ ‘‘ਧਮ੍ਮਾਨੁਧਮ੍ਮਪਟਿਪਤ੍ਤਿਪੂਰਣਤ੍ਥਾਯਾ’’ਤਿ. ਸਾ ਚ ਧਮ੍ਮਾਨੁਧਮ੍ਮਪਟਿਪਤ੍ਤਿ ਯਾਯ ਅਨੁਪੁਬ੍ਬਿਯਾ ਪਟਿਪਜ੍ਜਿਤਬ੍ਬਾ, ਪਟਿਪਜ੍ਜਨ੍ਤਾਨਞ੍ਚ ਸਤਿ ਅਜ੍ਝਤ੍ਤਿਕਙ੍ਗਸਮਵਾਯੇ ਏਕਂਸਿਕਾ ਤਸ੍ਸਾ ਪਾਰਿਪੂਰੀਤਿ ਤਂ ਅਨੁਪੁਬ੍ਬਿਂ ਦਸ੍ਸੇਤੁਂ ‘‘ਕੇਚਿ ਸਰਣੇਸੂ’’ਤਿਆਦਿ ਵੁਤ੍ਤਂ.

ਇਮਸ੍ਮਿਂ ਪਨੋਕਾਸੇ ਠਤ੍ਵਾਤਿ ‘‘ਪਟਿਪਨ੍ਨਾ ਚ ਆਰਾਧੇਨ੍ਤੀ’’ਤਿ ਏਤਸ੍ਮਿਂ ਸੀਹਨਾਦਕਿਚ੍ਚਪਾਰਿਪੂਰਿਦੀਪਨੇ ਪਾਲ਼ਿਪਦੇਸੇ ਠਤ੍ਵਾ. ਸਮੋਧਾਨੇਤਬ੍ਬਾਤਿ ਸਙ੍ਕਲਿਤਬ੍ਬਾ. ਏਕੋ ਸੀਹਨਾਦੋ ਅਸਾਧਾਰਣੋ ਅਞ੍ਞੇਹਿ ਅਪ੍ਪਟਿਵਤ੍ਤਿਯੋ ਸੇਟ੍ਠਨਾਦੋ ਅਭੀਤਨਾਦੋਤਿ ਕਤ੍ਵਾ. ਏਸ ਨਯੋ ਸੇਸੇਸੁਪਿ. ਪੁਰਿਮਾਨਂ ਦਸਨ੍ਨਨ੍ਤਿਆਦਿਤੋ ਪਟ੍ਠਾਯ ਯਾਵ ‘‘ਵਿਮੁਤ੍ਤਿਯਾ ਮਯ੍ਹਂ ਸਦਿਸੋ ਨਤ੍ਥੀ’’ਤਿ ਏਤੇਸਂ ਪੁਰਿਮਾਨਂ ਦਸਨ੍ਨਂ ਸੀਹਨਾਦਾਨਂ, ਨਿਦ੍ਧਾਰਣੇ ਚੇਤ੍ਥ ਸਾਮਿਵਚਨਂ, ਤੇਨਾਹ ‘‘ਏਕੇਕਸ੍ਸਾ’’ਤਿ. ‘‘ਪਰਿਸਾਸੁ ਚ ਨਦਤੀ’’ਤਿ ਆਦਯੋ ਪਰਿਵਾਰਾ ‘‘ਏਕਚ੍ਚਂ ਤਪਸ੍ਸਿਂ ਨਿਰਯੇ ਨਿਬ੍ਬਤ੍ਤਂ ਪਸ੍ਸਾਮੀ’’ਤਿ ਸੀਹਨਾਦਂ ਨਦਨ੍ਤੋ ਭਗਵਾ ਪਰਿਸਾਯਂ ਨਦਤਿ ਵਿਸਾਰਦੋ ਨਦਤਿ ਯਾਵ ‘‘ਪਟਿਪਨ੍ਨਾ ਆਰਾਧੇਨ੍ਤੀ’’ਤਿ ਅਤ੍ਥਯੋਜਨਾਯ ਸਮ੍ਭਵਤੋ. ਤਥਾ ਸੇਸੇਸੁਪਿ ਨਵਸੁ.

‘‘ਏਵ’’ਨ੍ਤਿਆਦਿ ਯਥਾਵੁਤ੍ਤਾਨਂ ਤੇਸਂ ਸਙ੍ਕਲੇਤ੍ਵਾ ਦਸ੍ਸਨਂ. ਤੇ ਦਸਾਤਿ ਤੇ ‘‘ਪਰਿਸਾਸੁ ਚ ਨਦਤੀ’’ਤਿ ਆਦਯੋ ਸੀਹਨਾਦਾ. ਪੁਰਿਮਾਨਂ ਦਸਨ੍ਨਨ੍ਤਿ ਯਥਾਵੁਤ੍ਤਾਨਂ ਪੁਰਿਮਾਨਂ ਦਸਨ੍ਨਂ. ਪਰਿਵਾਰਵਸੇਨਾਤਿ ਪਚ੍ਚੇਕਂ ਪਰਿਵਾਰਵਸੇਨ ਯੋਜਿਯਮਾਨਾ ਸਤਂ ਸੀਹਨਾਦਾ. ਪੁਰਿਮਾ ਚ ਦਸਾਤਿ ਤਥਾ ਅਯੋਜਿਯਮਾਨਾ ਪੁਰਿਮਾ ਚ ਦਸਾਤਿ ਏਵਂ ਦਸਾਧਿਕਂ ਸੀਹਨਾਦਸਤਂ ਹੋਤਿ. ਏਵਂ ਵਾਦੀਨਂ ਵਾਦਨ੍ਤਿ ਏਵਂ ਪਵਤ੍ਤਵਾਦਾਨਂ ਤਿਤ੍ਥਿਯਾਨਂ ਵਾਦਂ. ਪਟਿਸੇਧੇਤ੍ਵਾਤਿ ਤਥਾਭਾਵਾਭਾਵਦਸ੍ਸਨੇਨ ਪਟਿਕ੍ਖਿਪਿਤ੍ਵਾ. ਯਂ ਭਗਵਾ ਉਦੁਮ੍ਬਰਿਕਸੁਤ੍ਤੇ ‘‘ਇਧ ਨਿਗ੍ਰੋਧ ਤਪਸ੍ਸੀ’’ਤਿਆਦਿਨਾ (ਦੀ. ਨਿ. ੩.੩੩) ਉਪਕ੍ਕਿਲੇਸਵਿਭਾਗਂ, ਪਾਰਿਸੁਦ੍ਧਿਵਿਭਾਗਞ੍ਚ ਦਸ੍ਸੇਨ੍ਤੋ ਸਪਰਿਸਸ੍ਸ ਨਿਗ੍ਰੋਧਸ੍ਸ ਪਰਿਬ੍ਬਾਜਕਸ੍ਸ ਪੁਰਤੋ ਸੀਹਨਾਦਂ ਨਦਿ, ਤਂ ਦਸ੍ਸੇਤੁਂ ‘‘ਇਦਾਨਿ ਪਰਿਸਤਿ ਨਦਿਤਪੁਬ੍ਬਂ ਸੀਹਨਾਦਂ ਦਸ੍ਸੇਨ੍ਤੋ’’ਤਿਆਦਿ ਵੁਤ੍ਤਂ.

ਤਿਤ੍ਥਿਯਪਰਿਵਾਸਕਥਾਵਣ੍ਣਨਾ

੪੦੪. ਇਦਨ੍ਤਿ ‘‘ਰਾਜਗਹੇ ਗਿਜ੍ਝਕੂਟੇ ਪਬ੍ਬਤੇ ਵਿਹਰਨ੍ਤਂ ਮਂ…ਪੇ… ਪਞ੍ਹਂ ਪੁਚ੍ਛੀ’’ਤਿ ਇਦਂ ਵਚਨਂ. ਕਾਮਂ ਯਦਾ ਨਿਗ੍ਰੋਧੋ ਪਞ੍ਹਂ ਪੁਚ੍ਛਿ, ਭਗਵਾ ਚਸ੍ਸ ਵਿਸ੍ਸਜ੍ਜੇਸਿ, ਨ ਤਦਾ ਗਿਜ੍ਝਕੂਟੇ ਪਬ੍ਬਤੇ ਵਿਹਰਤਿ, ਰਾਜਗਹਸਮੀਪੇ ਪਨ ਵਿਹਰਤੀਤਿ ਕਤ੍ਵਾ ‘‘ਰਾਜਗਹੇ ਗਿਜ੍ਝਕੂਟੇ ਪਬ੍ਬਤੇ ਵਿਹਰਨ੍ਤਂ ਮ’’ਨ੍ਤਿ ਵੁਤ੍ਤਂ, ਗਿਜ੍ਝਕੂਟੇ ਵਿਹਰਣਞ੍ਚਸ੍ਸ ਤਦਾ ਅਵਿਚ੍ਛਿਨ੍ਨਨ੍ਤਿ, ਤੇਨਾਹ ‘‘ਯਂ ਤਂ ਭਗਵਾ’’ਤਿਆਦਿ. ਯੋਗੇਤਿ ਨਯੇ, ਦੁਕ੍ਖਨਿਸ੍ਸਰਣੂਪਾਯੇਤਿ ਅਤ੍ਥੋ.

੪੦੫. ਯਂ ਪਰਿਵਾਸਂ ਸਾਮਣੇਰਭੂਮਿਯਂ ਠਿਤੋ ਪਰਿਵਸਤੀਤਿ ਯੋਜਨਾ. ਯਸ੍ਮਾ ਸਾਮਣੇਰਭੂਮਿਯਂ ਠਿਤੇਨ ਪਰਿਵਸਿਤਬ੍ਬਂ, ਨ ਗਿਹਿਭੂਤੇਨ, ਤਸ੍ਮਾ ਅਪਰਿਵਸਿਤ੍ਵਾਯੇਵ ਪਬ੍ਬਜ੍ਜਂ ਲਭਤਿ. ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਨ੍ਤਿ ਏਤ੍ਥ ਪਨ ਪਬ੍ਬਜ੍ਜਾ-ਗ੍ਗਹਣਂ ਵਚਨਸਿਲਿਟ੍ਠਤਾਵਸੇਨੇਵ ‘‘ਦਿਰਤ੍ਤਤਿਰਤ੍ਤਂ ਸਹਸੇਯ੍ਯ’’ਨ੍ਤਿ (ਪਾਚਿ. ੫੦) ਏਤ੍ਥ ਦਿਰਤ੍ਤਗ੍ਗਹਣਂ ਵਿਯ. ਗਾਮਪ੍ਪਵੇਸਨਾਦੀਨੀਤਿ ਆਦਿ-ਸਦ੍ਦੇਨ ਵੇਸਿਯਾਵਿਧਵਾਥੁਲ੍ਲਕੁਮਾਰਿਪਣ੍ਡਕਭਿਕ੍ਖੁਨਿਗੋਚਰਤਾ, ਸਬ੍ਰਹ੍ਮਚਾਰੀਨਂ ਉਚ੍ਚਾਵਚੇਸੁ ਕਿਂਕਰਣੀਯੇਸੁ ਦਕ੍ਖਾਨਲਸਾਦਿਤਾ, ਉਦ੍ਦੇਸਪਰਿਪੁਚ੍ਛਾਦੀਸੁ ਤਿਬ੍ਬਛਨ੍ਦਤਾ, ਯਸ੍ਸ ਤਿਤ੍ਥਾਯਤਨਤੋ ਇਧਾਗਤੋ, ਤਸ੍ਸ ਅਵਣ੍ਣੇ, ਰਤਨਤ੍ਤਯਸ੍ਸ ਚ ਵਣ੍ਣੇ ਅਨਤ੍ਤਮਨਤਾ, ਤਦੁਭਯਂ ਯਥਾਕ੍ਕਮਂ ਵਣ੍ਣੇ ਚ ਅਵਣ੍ਣੇ ਚ ਅਤ੍ਤਮਨਤਾਤਿ ਇਮੇਸਂ ਸਙ੍ਗਹੋ ਵੇਦਿਤਬ੍ਬੋ, ਤੇਨਾਹ ‘‘ਅਟ੍ਠ ਵਤ੍ਤਾਨਿ ਪੂਰੇਨ੍ਤੇਨਾ’’ਤਿ. ਘਂਸਿਤ੍ਵਾ ਕੋਟ੍ਟੇਤ੍ਵਾਤਿ ਅਜ੍ਝਾਸਯਸ੍ਸ ਵੀਮਂਸਨਵਸੇਨ ਸੁਵਣ੍ਣਂ ਵਿਯ ਘਂਸਿਤ੍ਵਾ ਕੋਟ੍ਟੇਤ੍ਵਾ.

ਗਣਮਜ੍ਝੇ ਨਿਸੀਦਿਤ੍ਵਾਤਿ ਉਪਸਮ੍ਪਦਾਕਮ੍ਮਸ੍ਸ ਗਣਪ੍ਪਹੋਨਕਾਨਂ ਭਿਕ੍ਖੂਨਂ ਮਜ੍ਝੇ ਸਙ੍ਘਤ੍ਥੇਰੋ ਵਿਯ ਤਸ੍ਸ ਅਨੁਗ੍ਗਹਤ੍ਥਂ ਨਿਸੀਦਿਤ੍ਵਾ. ਵੂਪਕਟ੍ਠੋਤਿ ਵਿਵਿਤ੍ਤੋ. ਤਾਦਿਸਸ੍ਸ ਸੀਲਵਿਸੋਧਨੇ ਅਪ੍ਪਮਾਦੋ ਅਵੁਤ੍ਤਸਿਦ੍ਧੋਤਿ ਆਹ ‘‘ਕਮ੍ਮਟ੍ਠਾਨੇ ਸਤਿਂ ਅਵਿਜਹਨ੍ਤੋ’’ਤਿ. ਪੇਸਿਤਚਿਤ੍ਤੋਤਿ ਨਿਬ੍ਬਾਨਂ ਪਤਿ ਪੇਸਿਤਚਿਤ੍ਤੋ ਤਂਨਿਨ੍ਨੋ ਤਪ੍ਪੋਣੋ ਤਪ੍ਪਬ੍ਭਾਰੋ. ਜਾਤਿਕੁਲਪੁਤ੍ਤਾਪਿ ਆਚਾਰਸਮ੍ਪਨ੍ਨਾ ਏਵ ਅਰਹਤ੍ਤਾਧਿਗਮਾਯ ਪਬ੍ਬਜ੍ਜਾਪੇਕ੍ਖਾ ਹੋਨ੍ਤੀਤਿ ਤੇਪਿ ਤੇਹਿ ਏਕਸਙ੍ਗਹੇ ਕਰੋਨ੍ਤੋ ਆਹ ‘‘ਕੁਲਪੁਤ੍ਤਾਤਿ ਆਚਾਰਕੁਲਪੁਤ੍ਤਾ’’ਤਿ, ਤੇਨਾਹ ‘‘ਸਮ੍ਮਦੇਵਾਤਿ ਹੇਤੁਨਾਵ ਕਾਰਣੇਨੇਵਾ’’ਤਿ. ‘‘ਓਤਿਣ੍ਣੋਮ੍ਹਿ ਜਾਤਿਯਾ’’ਤਿਆਦਿਨਾ ਨਯੇਨ ਹਿ ਸਂਵੇਗਪੁਬ੍ਬਿਕਂ ਯਥਾਨੁਸਿਟ੍ਠਂ ਪਬ੍ਬਜ੍ਜਂ ਸਨ੍ਧਾਯ ਇਧ ‘‘ਸਮ੍ਮਦੇਵਾ’’ਤਿ ਵੁਤ੍ਤਂ. ਹੇਤੁਨਾਤਿ ਞਾਯੇਨ. ਪਾਪੁਣਿਤ੍ਵਾਤਿ ਪਤ੍ਵਾ ਅਧਿਗਨ੍ਤ੍ਵਾ. ਸਮ੍ਪਾਦੇਤ੍ਵਾਤਿ ਅਸੇਕ੍ਖਾ ਸੀਲਸਮਾਧਿਪਞ੍ਞਾ ਨਿਪ੍ਫਾਦੇਤ੍ਵਾ, ਪਰਿਪੂਰੇਤ੍ਵਾ ਵਾਤਿ ਅਤ੍ਥੋ.

ਨਿਟ੍ਠਾਪੇਤੁਨ੍ਤਿ ਨਿਗਮਨਵਸੇਨ ਪਰਿਯੋਸਾਪੇਤੁਂ. ‘‘ਬ੍ਰਹ੍ਮਚਰਿਯਪਰਿਯੋਸਾਨਂ…ਪੇ… ਵਿਹਾਸੀ’’ਤਿ ਇਮਿਨਾ ਏਵ ਹਿ ਅਰਹਤ੍ਤਨਿਕੂਟੇਨ ਦੇਸਨਾ ਪਰਿਯੋਸਾਪਿਤਾ. ਤਂ ਪਨ ਨਿਗਮੇਨ੍ਤੋ ‘‘ਅਞ੍ਞਤਰੋ ਖੋ ਪਨਾ…ਪੇ… ਅਹੋਸੀ’’ਤਿ ਵੁਤ੍ਤਂ ਧਮ੍ਮਸਙ੍ਗਾਹਕੇਹਿ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਮਹਾਸੀਹਨਾਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.