੭. ਜਾਲਿਯਸੁਤ੍ਤਵਣ੍ਣਨਾ

ਦ੍ਵੇਪਬ੍ਬਜਿਤਵਤ੍ਥੁਵਣ੍ਣਨਾ

੩੭੮. ‘‘ਘੋਸਿਤੇਨ ਸੇਟ੍ਠਿਨਾ ਕਤੇ ਆਰਾਮੇ’’ਤਿ ਵਤ੍ਵਾ ਤਤ੍ਥ ਕੋਯਂ ਘੋਸਿਤਸੇਟ੍ਠਿ ਨਾਮ, ਕਥਞ੍ਚਾਨੇਨ ਆਰਾਮੋ ਕਾਰਿਤੋ, ਕਥਂ ਵਾ ਤਤ੍ਥ ਭਗਵਾ ਵਿਹਾਸੀਤਿ ਤਂ ਸਬ੍ਬਂ ਸਮੁਦਾਗਮਤੋ ਪਟ੍ਠਾਯ ਸਙ੍ਖੇਪਤੋਵ ਦਸ੍ਸੇਤੁਂ ‘‘ਪੁਬ੍ਬੇ ਕਿਰਾ’’ਤਿਆਦਿ ਵੁਤ੍ਤਂ. ਤਤੋਤਿ ਅਲ੍ਲਕਪ੍ਪਰਟ੍ਠਤੋ. ਤਦਾਤਿ ਤੇਸਂ ਤਂ ਗਾਮਂ ਪਵਿਟ੍ਠਦਿਵਸੇ. ਬਲਵਪਾਯਾਸਨ੍ਤਿ ਗਰੁਤਰਂ ਬਹੁਪਾਯਾਸਂ. ਅਸਨ੍ਨਿਹਿਤੇਤਿ ਗੇਹਤੋ ਬਹਿ ਗਤੇ. ਭੁਸ੍ਸਤੀਤਿ ਰਵਤਿ. ਘੋਸਕਦੇਵਪੁਤ੍ਤੋਤ੍ਵੇਵ ਨਾਮਂ ਅਹੋਸਿ ਸਰਘੋਸਸਮ੍ਪਤ੍ਤਿਯਾ. ਵੇਯ੍ਯਤ੍ਤਿਯੇਨਾਤਿ ਪਞ੍ਞਾਵੇਯ੍ਯਤ੍ਤਿਯੇਨ. ਘੋਸਿਤਸੇਟ੍ਠਿ ਨਾਮ ਜਾਤੋ ਤਾਯ ਏਵ ਚਸ੍ਸ ਸਰਸਮ੍ਪਤ੍ਤਿਯਾ ਘੋਸਿਤਨਾਮਤਾ.

ਸਰੀਰਸਨ੍ਤਪ੍ਪਨਤ੍ਥਨ੍ਤਿ ਹਿਮਵਨ੍ਤੇ ਫਲਮੂਲਾਹਾਰਤਾਯ ਕਿਲਨ੍ਤਸਰੀਰਾ ਲੋਣਮ੍ਬਿਲਸੇਵਨੇਨ ਤਸ੍ਸ ਸਨ੍ਤਪ੍ਪਨਤ੍ਥਂ ਪੀਨਨਤ੍ਥਂ. ਤਸਿਤਾਤਿ ਪਿਪਾਸਿਤਾ. ਕਿਲਨ੍ਤਾਤਿ ਪਰਿਸ੍ਸਨ੍ਤਕਾਯਾ. ਤੇ ਕਿਰ ਤਂ ਵਟਰੁਕ੍ਖਂ ਪਤ੍ਵਾ ਤਸ੍ਸ ਸੋਭਾਸਮ੍ਪਤ੍ਤਿਂ ਦਿਸ੍ਵਾ ਮਹਾਨੁਭਾਵਾ ਮਞ੍ਞੇ ਏਤ੍ਥ ਅਧਿਵਤ੍ਥਾ ਦੇਵਤਾ, ‘‘ਸਾਧੁ ਵਤਾਯਂ ਦੇਵਤਾ ਅਮ੍ਹਾਕਂ ਅਦ੍ਧਾਨਪਰਿਸ੍ਸਮਂ ਵਿਨੋਦੇਯ੍ਯਾ’’ਤਿ ਚਿਨ੍ਤੇਸੁਂ, ਤੇਨ ਵੁਤ੍ਤਂ ‘‘ਤਤ੍ਥ ਅਧਿਵਤ੍ਥਾ…ਪੇ… ਨਿਸੀਦਿਂਸੂ’’ਤਿ. ਸੋਤਿ ਅਨਾਥਪਿਣ੍ਡਿਕੋ ਗਹਪਤਿ. ਭਤਕਾਨਨ੍ਤਿ ਭਤਿਯਾ ਵੇਯ੍ਯਾਵਚ੍ਚਂ ਕਰੋਨ੍ਤਾਨਂ ਦਾਸਪੇਸਕਮ੍ਮਕਰਾਨਂ. ਪਕਤਿਭਤ੍ਤਵੇਤਨਨ੍ਤਿ ਪਕਤਿਯਾ ਦਾਤਬ੍ਬਭਤ੍ਤਵੇਤਨਂ, ਤਦਾ ਉਪੋਸਥਿਕਤ੍ਤਾ ਕਮ੍ਮਂ ਅਕਰੋਨ੍ਤਾਨਮ੍ਪਿ ਕਮ੍ਮਕਰਣਦਿਵਸੇਨ ਦਾਤਬ੍ਬਭਤ੍ਤਵੇਤਨਮੇਵਾਤਿ ਅਤ੍ਥੋ. ਕਞ੍ਚੀਤਿ ਕਞ੍ਚਿਪਿ ਭਤਕਂ.

ਉਪੇਚ੍ਚ ਪਰਸ੍ਸ ਵਾਚਾਯ ਆਰਮ੍ਭਨਂ ਬਾਧਨਂ ਉਪਾਰਮ੍ਭੋ, ਦੋਸਦਸ੍ਸਨਵਸੇਨ ਘਟ੍ਟਨਨ੍ਤਿ ਅਤ੍ਥੋ, ਤੇਨਾਹ ‘‘ਉਪਾਰਮ੍ਭਾਧਿਪ੍ਪਾਯੇਨ ਵਾਦਂ ਆਰੋਪੇਤੁਕਾਮਾ ਹੁਤ੍ਵਾ’’ਤਿ. ਵਦਨ੍ਤਿ ਨਿਨ੍ਦਨਵਸੇਨ ਕਥੇਨ੍ਤਿ ਏਤੇਨਾਤਿ ਹਿ ਵਾਦੋ, ਦੋਸੋ. ਤਂ ਆਰੋਪੇਤੁਕਾਮਾ, ਪਤਿਟ੍ਠਾਪੇਤੁਕਾਮਾ ਹੁਤ੍ਵਾਤਿ ਅਤ੍ਥੋ. ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿ, ਇਧ ਯਂ ਵਤ੍ਥੁਂ ਜੀਵਸਞ੍ਞਿਤਂ, ਤਦੇਵ ਸਰੀਰਸਞ੍ਞਿਤਨ੍ਤਿ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿ ਵਾਦਂ ਗਹੇਤ੍ਵਾ ਵਦਨ੍ਤਿ. ਰੂਪਞ੍ਚ ਅਤ੍ਤਾਨਞ੍ਚ ਅਦ੍ਵਯਂ ਕਤ੍ਵਾ ਸਮਨੁਪਸ੍ਸਨਵਸੇਨ ‘‘ਸਤ੍ਤੋ’’ਤਿ ਵਾ ਬਾਹਿਰਕਪਰਿਕਪ੍ਪਿਤਂ ਅਤ੍ਤਾਨਂ ਸਨ੍ਧਾਯ ਵਦਨ੍ਤਿ. ਭਿਜ੍ਜਤੀਤਿ ਨਿਰੁਦਯਵਿਨਾਸਵਸੇਨ ਵਿਨਸ੍ਸਤਿ. ਤੇਨ ਜੀਵਸਰੀਰਾਨਂ ਅਨਞ੍ਞਤ੍ਤਾਨੁਜਾਨਨਤੋ, ਸਰੀਰਸ੍ਸ ਚ ਭੇਦਦਸ੍ਸਨਤੋ. ਨ ਹੇਤ੍ਥ ਯਥਾ ਭੇਦਵਤਾ ਸਰੀਰਤੋ ਅਨਞ੍ਞਤ੍ਤਾ ਅਦਿਟ੍ਠੋਪਿ ਜੀਵਸ੍ਸ ਭੇਦੋ ਵੁਤ੍ਤੋ, ਏਵਂ ਅਦਿਟ੍ਠਭੇਦਤੋ ਅਨਞ੍ਞਤ੍ਤਾ ਸਰੀਰਸ੍ਸਾਪਿ ਅਭੇਦੋਤਿ ਸਕ੍ਕਾ ਵਿਞ੍ਞਾਤੁਂ ਤਸ੍ਸ ਭੇਦਸ੍ਸ ਪਚ੍ਚਕ੍ਖਸਿਦ੍ਧਤ੍ਤਾ, ਭੂਤੁਪਾਦਾਯਰੂਪਵਿਨਿਮੁਤ੍ਤਸ੍ਸ ਚ ਸਰੀਰਸ੍ਸ ਅਭਾਵਤੋਤਿ ਆਹ ‘‘ਉਚ੍ਛੇਦਵਾਦੋ ਹੋਤੀ’’ਤਿ.

‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’’ਨ੍ਤਿ ਅਞ੍ਞਦੇਵ ਵਤ੍ਥੁਂ ਜੀਵਸਞ੍ਞਿਤਂ, ਅਞ੍ਞਂ ਵਤ੍ਥੁਂ ਸਰੀਰਸਞ੍ਞਿਤਨ੍ਤਿ ‘‘ਰੂਪਵਨ੍ਤਂ ਅਤ੍ਤਾਨਂ ਸਮਨੁਪਸ੍ਸਤੀ’’ਤਿਆਦਿਨਯਪ੍ਪਵਤ੍ਤਂ ਵਾਦਂ ਗਹੇਤ੍ਵਾ ਵਦਨ੍ਤਿ. ਰੂਪੇ ਭੇਦਸ੍ਸ ਦਿਟ੍ਠਤ੍ਤਾ, ਅਤ੍ਤਨਿ ਚ ਤਦਭਾਵਤੋ ਅਤ੍ਤਾ ਨਿਚ੍ਚੋਤਿ ਆਪਨ੍ਨਮੇਵਾਤਿ ਆਹ ‘‘ਤੁਮ੍ਹਾਕਂ…ਪੇ… ਆਪਜ੍ਜਤੀ’’ਤਿ.

੩੭੯-੩੮੦. ਤਯਿਦਂ ਨੇਸਂ ਵਞ੍ਝਾਸੁਤਸ੍ਸ ਦੀਘਰਸ੍ਸਤਾਪਰਿਕਪ੍ਪਨਸਦਿਸਨ੍ਤਿ ਕਤ੍ਵਾ ਠਪਨੀਯੋਯਂ ਪਞ੍ਹੋਤਿ ਤਤ੍ਥ ਰਾਜਨਿਮੀਲਨਂ ਕਤ੍ਵਾ ਸਤ੍ਥਾ ਉਪਰਿ ਨੇਸਂ ‘‘ਤੇਨ ਹਾਵੁਸੋ ਸੁਣਾਥਾ’’ਤਿਆਦਿਨਾ ਧਮ੍ਮਦੇਸਨਂ ਆਰਭੀਤਿ ਆਹ ‘‘ਅਥ ਭਗਵਾ’’ਤਿਆਦਿ. ਤਸ੍ਸਾ ਯੇਵਾਤਿ ਮਜ੍ਝਿਮਾਯ ਪਟਿਪਦਾਯ.

ਸਦ੍ਧਾਪਬ੍ਬਜਿਤਸ੍ਸਾਤਿ ਸਦ੍ਧਾਯ ਪਬ੍ਬਜਿਤਸ੍ਸ ‘‘ਏਵਮਹਂ ਇਤੋ ਵਟ੍ਟਦੁਕ੍ਖਤੋ ਨਿਸ੍ਸਰਿਸ੍ਸਾਮੀ’’ਤਿ ਏਵਂ ਪਬ੍ਬਜ੍ਜਂ ਉਪਗਤਸ੍ਸ ਤਦਨੁਰੂਪਞ੍ਚ ਸੀਲਂ ਪੂਰੇਤ੍ਵਾ ਪਠਮਜ੍ਝਾਨੇਨ ਸਮਾਹਿਤਚਿਤ੍ਤਸ੍ਸ. ਏਤਂ ਵਤ੍ਤੁਨ੍ਤਿ ਏਤਂ ਕਿਲੇਸਵਟ੍ਟਪਰਿਬੁਦ੍ਧਿਦੀਪਨਂ ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿਆਦਿਕਂ ਦਿਟ੍ਠਿਸਂਕਿਲੇਸਨਿਸ੍ਸਿਤਂ ਵਚਨਂ ਵਤ੍ਤੁਨ੍ਤਿ ਅਤ੍ਥੋ. ਨਿਬ੍ਬਿਚਿਕਿਚ੍ਛੋ ਨ ਹੋਤੀਤਿ ਧਮ੍ਮੇਸੁ ਤਿਣ੍ਣਵਿਚਿਕਿਚ੍ਛੋ ਨ ਹੋਤਿ, ਤਤ੍ਥ ਤਤ੍ਥ ਆਸਪ੍ਪਨਪਰਿਸਪ੍ਪਨਵਸੇਨ ਪਵਤ੍ਤਤੀਤਿ ਅਤ੍ਥੋ.

ਏਤਮੇਵਂ ਜਾਨਾਮੀਤਿ ਯੇਨ ਸੋ ਭਿਕ੍ਖੁ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਏਤਂ ਸਸਮ੍ਪਯੁਤ੍ਤਧਮ੍ਮਂ ਚਿਤ੍ਤਨ੍ਤਿ ਏਵਂ ਜਾਨਾਮਿ. ਨੋ ਚ ਏਵਂ ਵਦਾਮੀਤਿ ਯਥਾ ਦਿਟ੍ਠਿਗਤਿਕਾ ਤਂ ਧਮ੍ਮਜਾਤਂ ਸਨਿਸ੍ਸਯਂ ਅਭੇਦਤੋ ਗਣ੍ਹਨ੍ਤਾ ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿ ਵਾ ਤਦੁਭਯਂ ਭੇਦਤੋ ਗਣ੍ਹਨ੍ਤਾ ‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’’ਨ੍ਤਿ ਵਾ ਅਤ੍ਤਨੋ ਮਿਚ੍ਛਾਗਾਹਂ ਪਵੇਦੇਨ੍ਤਿ, ਅਹਂ ਪਨ ਨ ਏਵਂ ਵਦਾਮਿ ਤਸ੍ਸ ਧਮ੍ਮਸ੍ਸ ਸੁਪਰਿਞ੍ਞਾਤਤ੍ਤਾ, ਤੇਨਾਹ ‘‘ਅਥ ਖੋ’’ਤਿਆਦਿ. ਬਾਹਿਰਕਾ ਯੇਭੁਯ੍ਯੇਨ ਕਸਿਣਜ੍ਝਾਨਾਨਿ ਏਵ ਨਿਬ੍ਬਤ੍ਤੇਨ੍ਤੀਤਿ ਆਹ ‘‘ਕਸਿਣਪਰਿਕਮ੍ਮਂ ਭਾਵਨ੍ਤੇਸ੍ਸਾ’’ਤਿ. ਯਸ੍ਮਾ ਭਾਵਨਾਨੁਭਾਵੇਨ ਝਾਨਾਧਿਗਮੋ, ਭਾਵਨਾ ਚ ਪਥਵੀਕਸਿਣਾਦਿਸਞ੍ਜਾਨਨਮੁਖੇਨ ਹੋਤੀਤਿ ਸਞ੍ਞਾਸੀਸੇਨ ਨਿਦ੍ਦਿਸੀਯਤਿ, ਤਸ੍ਮਾ ਆਹ ‘‘ਸਞ੍ਞਾਬਲੇਨ ਉਪ੍ਪਨ੍ਨ’’ਨ੍ਤਿ. ਤੇਨਾਹ – ‘‘ਪਥਵੀਕਸਿਣਮੇਕੋ ਸਞ੍ਜਾਨਾਤੀ’’ਤਿਆਦਿ. ‘‘ਨ ਕਲ੍ਲਂ ਤਸ੍ਸੇਤ’’ਨ੍ਤਿ ਇਦਂ ਯਸ੍ਮਾ ਭਗਵਤਾ ਤਤ੍ਥ ਤਤ੍ਥ ‘‘ਅਥ ਚ ਪਨਾਹਂ ਨ ਵਦਾਮੀ’’ਤਿ ਵੁਤ੍ਤਂ, ਤਸ੍ਮਾ ਨ ਵਤ੍ਤਬ੍ਬਂ ਕਿਰੇਤਂ ਕੇਵਲਿਨਾ ਉਤ੍ਤਮਪੁਰਿਸੇਨਾਤਿ ਅਧਿਪ੍ਪਾਯੇਨਾਹ, ਤੇਨ ਵੁਤ੍ਤਂ ‘‘ਮਞ੍ਞਮਾਨਾ ਵਦਨ੍ਤੀ’’ਤਿ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵ.

ਜਾਲਿਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.