੬. ਮਹਾਲਿਸੁਤ੍ਤਵਣ੍ਣਨਾ

ਬ੍ਰਾਹ੍ਮਣਦੂਤਵਤ੍ਥੁਵਣ੍ਣਨਾ

੩੫੯. ਪੁਨਪ੍ਪੁਨਂ ਵਿਸਾਲੀਭਾਵੂਪਗਮਨਤੋਤਿ ਪੁਬ੍ਬੇ ਕਿਰ ਪੁਤ੍ਤਧੀਤੁਵਸੇਨ ਦ੍ਵੇ ਦ੍ਵੇ ਹੁਤ੍ਵਾ ਸੋਲ਼ਸਕ੍ਖਤ੍ਤੁਂ ਜਾਤਾਨਂ ਲਿਚ੍ਛਵੀਰਾਜਕੁਮਾਰਾਨਂ ਸਪਰਿਵਾਰਾਨਂ ਅਨੁਕ੍ਕਮੇਨੇਵ ਵਡ੍ਢਨ੍ਤਾਨਂ ਨਿਵਾਸਨਟ੍ਠਾਨਾਰਾਮੁਯ੍ਯਾਨਪੋਕ੍ਖਰਣੀਆਦੀਨਂ ਪਤਿਟ੍ਠਾਨਸ੍ਸ ਅਪ੍ਪਹੋਨਕਤਾਯ ਨਗਰਂ ਤਿਕ੍ਖਤ੍ਤੁਂ ਗਾਵੁਤਨ੍ਤਰੇਨ ਗਾਵੁਤਨ੍ਤਰੇਨ ਪਰਿਕ੍ਖਿਪਿਂਸੁ, ਤੇਨਸ੍ਸ ਪੁਨਪ੍ਪੁਨਂ ਵਿਸਾਲੀਭਾਵਂ ਗਤਤ੍ਤਾ ‘‘ਵੇਸਾਲੀ’’ ਤ੍ਵੇਵ ਨਾਮਂ ਜਾਤਂ, ਤੇਨ ਵੁਤ੍ਤਂ ‘‘ਪੁਨਪ੍ਪੁਨਂ ਵਿਸਾਲੀਭਾਵੂਪਗਮਨਤੋ ਵੇਸਾਲੀਤਿ ਲਦ੍ਧਨਾਮਕੇ ਨਗਰੇ’’ਤਿ. ਸਯਂਜਾਤਨ੍ਤਿ ਸਯਮੇਵ ਜਾਤਂ ਅਰੋਪਿਮਂ. ਮਹਨ੍ਤਭਾਵੇਨੇਵਾਤਿ ਰੁਕ੍ਖਗਚ੍ਛਾਨਂ, ਠਿਤੋਕਾਸਸ੍ਸ ਚ ਮਹਨ੍ਤਭਾਵੇਨ, ਤੇਨਾਹ ‘‘ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧਂ ਹੁਤ੍ਵਾ’’ਤਿ. ਕੂਟਾਗਾਰਸਾਲਾਸਙ੍ਖੇਪੇਨਾਤਿ ਹਂਸਵਟ੍ਟਕਚ੍ਛਨ੍ਨੇਨ ਕੂਟਾਗਾਰਸਾਲਾਨਿਯਾਮੇਨ. ਕੋਸਲੇਸੁ ਜਾਤਾ, ਭਵਾ ਵਾ, ਤਂ ਵਾ ਰਟ੍ਠਂ ਨਿਵਾਸੋ ਏਤੇਸਨ੍ਤਿ ਕੋਸਲਕਾ. ਏਵਂ ਮਾਗਧਕਾ ਵੇਦਿਤਬ੍ਬਾ. ਯਸ੍ਸ ਅਕਰਣੇ ਪੁਗ੍ਗਲੋ ਮਹਾਜਾਨਿਯੋ ਹੋਤਿ, ਤਂ ਕਰਣਂ ਅਰਹਤੀਤਿ ਕਰਣੀਯਂ ਤੇਨ ਕਰਣੀਯੇਨ, ਤੇਨਾਹ ‘‘ਅਵਸ੍ਸਂ ਕਤ੍ਤਬ੍ਬਕਮ੍ਮੇਨਾ’’ਤਿ. ਤਂ ਕਿਚ੍ਚਨ੍ਤਿ ਵੁਚ੍ਚਤਿ ਸਤਿ ਸਮਵਾਯੇ ਕਾਤਬ੍ਬਤੋ.

੩੬੦. ਯਾ ਬੁਦ੍ਧਾਨਂ ਉਪ੍ਪਜ੍ਜਨਾਰਹਾ ਨਾਨਤ੍ਤਸਞ੍ਞਾ, ਤਾਸਂ ਵਸੇਨ ਨਾਨਾਰਮ੍ਮਣਾਚਾਰਤੋ. ਸਮ੍ਭਵਨ੍ਤਸ੍ਸੇਵ ਪਟਿਸੇਧੋ. ਪਟਿਕ੍ਕਮ੍ਮਾਤਿ ਨਿਵਤ੍ਤਿਤ੍ਵਾ ਤਥਾ ਚਿਤ੍ਤਂ ਅਨੁਪ੍ਪਾਦੇਤ੍ਵਾ. ਸਲ੍ਲੀਨੋਤਿ ਝਾਨਸਮਾਪਤ੍ਤਿਯਾ ਏਕਤ੍ਤਾਰਮ੍ਮਣਂ ਅਲ੍ਲੀਨੋ.

ਓਟ੍ਠਦ੍ਧਲਿਚ੍ਛਵੀਵਤ੍ਥੁਵਣ੍ਣਨਾ

੩੬੧. ਅਦ੍ਧੋਟ੍ਠਤਾਯਾਤਿ ਤਸ੍ਸ ਕਿਰ ਉਤ੍ਤਰੋਟ੍ਠਂ ਅਪ੍ਪਕਤਾਯ ਤਿਰਿਯਂ ਫਾਲੇਤ੍ਵਾ ਅਪਨੀਤਦ੍ਧਂ ਵਿਯ ਖਾਯਤਿ ਚਤ੍ਤਾਰੋ ਦਨ੍ਤੇ, ਦ੍ਵੇ ਚ ਦਾਠਾ ਨ ਛਾਦੇਤਿ, ਤੇਨ ਨਂ ‘‘ਓਟ੍ਠਦ੍ਧੋ’’ਤਿ ਵੋਹਰਨ੍ਤਿ. ਅਯਂ ਕਿਰ ਉਪਾਸਕੋ ਸਦ੍ਧੋ ਪਸਨ੍ਨੋ ਦਾਯਕੋ ਦਾਨਪਤਿ ਬੁਦ੍ਧਮਾਮਕੋ ਧਮ੍ਮਮਾਮਕੋ ਸਙ੍ਘਮਾਮਕੋ, ਤੇਨਾਹ ਪੁਰੇਭਤ੍ਤਨ੍ਤਿਆਦਿ.

੩੬੨. ਸਾਸਨੇ ਯੁਤ੍ਤਪਯੁਤ੍ਤੋਤਿ ਭਾਵਨਂ ਅਨੁਯੁਤ੍ਤੋ. ਸਬ੍ਬਤ੍ਥ ਸੀਹਸਮਾਨਵੁਤ੍ਤਿਨੋਪਿ ਭਗਵਤੋ ਪਰਿਸਾਯ ਮਹਨ੍ਤੇ ਸਤਿ ਤਦਜ੍ਝਾਸਯਾਨੁਰੂਪਂ ਪਵਤ੍ਤਿਯਮਾਨਾਯ ਧਮ੍ਮਦੇਸਨਾਯ ਵਿਸੇਸੋ ਹੋਤੀਤਿ ਆਹ ‘‘ਮਹਨ੍ਤੇਨ ਉਸ੍ਸਾਹੇਨ ਧਮ੍ਮਂ ਦੇਸੇਸ੍ਸਤੀ’’ਤਿ.

‘‘ਵਿਸ੍ਸਾਸਿਕੋ’’ਤਿ ਵਤ੍ਵਾ ਤਮਸ੍ਸ ਵਿਸ੍ਸਾਸਿਕਭਾਵਂ ਵਿਭਾਵੇਤੁਂ ‘‘ਅਯਞ੍ਹੀ’’ਤਿਆਦਿ ਵੁਤ੍ਤਂ. ਥੇਰਸ੍ਸ ਖੀਣਾ ਸਵਸ੍ਸਸਤੋ ਆਲਸਿਯਭਾਵੋ ‘‘ਅਪ੍ਪਹੀਨੋ’’ਤਿ ਨ ਵਤ੍ਤਬ੍ਬੋ, ਵਾਸਨਾਲੇਸਂ ਪਨ ਉਪਾਦਾਯਾਹ ‘‘ਈਸਕਂ ਅਪ੍ਪਹੀਨੋ ਵਿਯ ਹੋਤੀ’’ਤਿ. ਨ ਹਿ ਸਾਵਕਾਨਂ ਸਵਾਸਨਾ ਕਿਲੇਸਾ ਪਹੀਯਨ੍ਤਿ.

੩੬੩. ਵਿਨੇਯ੍ਯਜਨਾਨੁਰੋਧੇਨ ਬੁਦ੍ਧਾਨਂ ਪਾਟਿਹਾਰਿਯਵਿਜਮ੍ਭਨਂ ਹੋਤੀਤਿ ਵੁਤ੍ਤਂ ‘‘ਅਥ ਖੋ ਭਗਵਾ’’ਤਿਆਦਿ, ਤੇਨੇਵਾਹ ‘‘ਸਂਸੂਚਿਤਨਿਕ੍ਖਮਨੋ’’ਤਿ. ਗਨ੍ਧਕੁਟਿਤੋ ਨਿਕ੍ਖਮਨਵੇਲਾਯਞ੍ਹਿ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਆਵੇਲ਼ਾਵੇਲ਼ਾਯਮਲਾਯਮਲਾ ਹੁਤ੍ਵਾ ਸਵਿਸੇਸਾ ਪਭਸ੍ਸਰਾ ਵਿਨਿਚ੍ਛਰਿਂਸੁ.

੩੬੪. ਤਤੋ ਪਰਨ੍ਤਿ ‘‘ਹਿਯ੍ਯੋ’’ਤਿ ਵੁਤ੍ਤਦਿਵਸਤੋ ਅਨਨ੍ਤਰਂ ਪਰਂ ਪੁਰਿਮਤਰਂ ਅਤਿਸਯੇਨ ਪੁਰਿਮਤ੍ਤਾ. ਇਤਿ ਇਮੇਸੁ ਦ੍ਵੀਸੁ ਵਵਤ੍ਥਿਤੋ ਯਥਾਕ੍ਕਮਂ ਪੁਰਿਮਪੁਰਿਮਤਰਭਾਵੋ. ਏਵਂ ਸਨ੍ਤੇਪਿ ਯਦੇਤ੍ਥ ‘‘ਪੁਰਿਮਤਰ’’ਨ੍ਤਿ ਵੁਤ੍ਤਂ, ਤਤੋ ਪਭੁਤਿ ਯਂ ਯਂ ਓਰਂ, ਤਂ ਤਂ ਪੁਰਿਮਂ, ਯਂ ਯਂ ਪਰਂ, ਤਂ ਤਂ ਪੁਰਿਮਤਰਂ, ਓਰਪਾਰਭਾਵਸ੍ਸ ਵਿਯ ਪੁਰਿਮਪੁਰਿਮਤਰਭਾਵਸ੍ਸ ਚ ਅਪੇਕ੍ਖਾਸਿਦ੍ਧਿਤੋ, ਤੇਨਾਹ ‘‘ਤਤੋ ਪਟ੍ਠਾਯਾ’’ਤਿਆਦਿ. ਮੂਲਦਿਵਸਤੋ ਪਟ੍ਠਾਯਾਤਿਆਦਿਦਿਵਸਤੋ ਪਟ੍ਠਾਯ. ਅਗ੍ਗਨ੍ਤਿ ਪਠਮਂ. ਤਂ ਪਨੇਤ੍ਥ ਪਰਾ ਅਤੀਤਾ ਕੋਟਿ ਹੋਤੀਤਿ ਆਹ ‘‘ਪਰਕੋਟਿਂ ਕਤ੍ਵਾ’’ਤਿ. ਯਂ-ਸਦ੍ਦਯੋਗੇਨ ਚਾਯਂ ‘‘ਵਿਹਰਾਮੀ’’ਤਿ ਵਤ੍ਤਮਾਨਪ੍ਪਯੋਗੋ, ਅਤ੍ਥੋ ਪਨ ਅਤੀਤਕਾਲਵਸੇਨੇਵ ਵੇਦਿਤਬ੍ਬੋ, ਤੇਨਾਹ ‘‘ਵਿਹਾਸਿਨ੍ਤਿ ਵੁਤ੍ਤਂ ਹੋਤੀ’’ਤਿ. ਪਠਮਵਿਕਪ੍ਪੇ ‘‘ਵਿਹਰਾਮੀ’’ਤਿ ਪਦਸ੍ਸ ‘‘ਯਦਗ੍ਗੇ’’ਤਿ ਇਮਿਨਾ ਉਜੁਕਂ ਸਮ੍ਬਨ੍ਧੋ ਦਸ੍ਸਿਤੋ, ਦੁਤਿਯਵਿਕਪ੍ਪੇ ਪਨ ‘‘ਤੀਣਿ ਵਸ੍ਸਾਨੀ’’ਤਿ ਇਮਿਨਾਪਿ.

ਪਿਯਜਾਤਿਕਾਨੀਤਿ ਇਟ੍ਠਸਭਾਵਾਨਿ. ਸਾਤਜਾਤਿਕਾਨੀਤਿ ਮਧੁਰਸਭਾਵਾਨਿ. ਮਧੁਰਂ ਵਿਯਾਤਿ ਹਿ ‘‘ਮਧੁਰ’’ਨ੍ਤਿ ਵੁਚ੍ਚਤਿ ਮਨੋਰਮਂ ਯਂ ਕਿਞ੍ਚਿ. ਕਾਮੂਪਸਞ੍ਹਿਤਾਨੀਤਿ ਆਰਮ੍ਮਣਂ ਕਰੋਨ੍ਤੇਨ ਕਾਮੇਨ ਉਪਸਂਹਿਤਾਨਿ, ਕਾਮਨੀਯਾਨੀਤਿ ਅਤ੍ਥੋ, ਤੇਨਾਹ ‘‘ਕਾਮਸ੍ਸਾਦਯੁਤ੍ਤਾਨੀ’’ਤਿ, ਕਾਮਸ੍ਸਾਦਸ੍ਸ ਯੁਤ੍ਤਾਨਿ ਯੋਗ੍ਯਾਨੀਤਿ ਅਤ੍ਥੋ. ਸਰੀਰਸਣ੍ਠਾਨੇਤਿ ਸਰੀਰਬਿਮ੍ਬੇ, ਆਧਾਰੇ ਚੇਤਂ ਭੁਮ੍ਮਂ. ਤਸ੍ਮਾ ਸਦ੍ਦੇਨਾਤਿ ਤਂ ਨਿਸ੍ਸਾਯ ਤਤੋ ਉਪ੍ਪਨ੍ਨੇਨ ਸਦ੍ਦੇਨਾਤਿ ਅਤ੍ਥੋ. ਮਧੁਰੇਨਾਤਿ ਇਟ੍ਠੇਨ. ਏਤ੍ਤਾਵਤਾਤਿ ਦਿਬ੍ਬਸੋਤਞਾਣਸ੍ਸ ਪਰਿਕਮ੍ਮਾਕਥਨਮਤ੍ਤੇਨ. ‘‘ਅਤ੍ਤਨਾ ਞਾਤਮ੍ਪਿ ਨ ਕਥੇਤਿ, ਕਿਮਸ੍ਸ ਸਾਸਨੇ ਅਧਿਟ੍ਠਾਨੇਨਾ’’ਤਿ ਕੁਜ੍ਝਨ੍ਤੋ ਆਘਾਤਂ ਬਨ੍ਧਿਤ੍ਵਾ ਸਹ ਕੁਜ੍ਝਨੇਨੇਵ ਝਾਨਾਭਿਞ੍ਞਾਹਿ ਪਰਿਹਾਯਿ. ਚਿਨ੍ਤੇਸੀਤਿ ‘‘ਕਸ੍ਮਾ ਨੁ ਖੋ ਮਯ੍ਹਂ ਤਂ ਪਰਿਕਮ੍ਮਂ ਨ ਕਥੇਸੀ’’ਤਿ ਪਰਿਵਿਤਕ੍ਕੇਨ੍ਤੋ ਅਯੋਨਿਸੋ ਉਮ੍ਮੁਜ੍ਜਨਵਸੇਨ ਚਿਨ੍ਤੇਸਿ. ਅਨੁਕ੍ਕਮੇਨਾਤਿ ਪਾਥਿਕਸੁਤ੍ਤੇ ਆਗਤਨਯੇਨ ਤਂ ਤਂ ਅਯੁਤ੍ਤਮੇਵ ਚਿਨ੍ਤੇਨ੍ਤੋ, ਭਾਸਨ੍ਤੋ, ਕਰੋਨ੍ਤੋ ਚ ਅਨੁਕ੍ਕਮੇਨ. ਭਗਵਤਿ ਬਦ੍ਧਾਘਾਤਤਾਯ ਸਾਸਨੇ ਪਤਿਟ੍ਠਂ ਅਲਭਨ੍ਤੋ ਗਿਹਿਭਾਵਂ ਪਤ੍ਵਾ.

ਏਕਂਸਭਾਵਿਤਸਮਾਧਿਵਣ੍ਣਨਾ

੩੬੬-੩੭੧. ਏਕਂਸਾਯਾਤਿ ਤਦਤ੍ਥੇਯੇਵ ਚਤੁਤ੍ਥੀ, ਤਸ੍ਮਾ ਏਕਂਸਤ੍ਥਨ੍ਤਿ ਅਤ੍ਥੋ. ਅਂਸ-ਸਦ੍ਦੋ ਚੇਤ੍ਥ ਕੋਟ੍ਠਾਸਪਰਿਯਾਯੋ, ਸੋ ਚ ਅਧਿਕਾਰਤੋ ਦਿਬ੍ਬਰੂਪਦਸ੍ਸਨਦਿਬ੍ਬਸਦ੍ਦਸ੍ਸਵਨਵਸੇਨ ਵੇਦਿਤਬ੍ਬੋਤਿ ਆਹ ‘‘ਏਕਕੋਟ੍ਠਾਸਾਯਾ’’ਤਿਆਦਿ. ਅਨੁਦਿਸਾਯਾਤਿ ਪੁਰਤ੍ਥਿਮਦਕ੍ਖਿਣਾਦਿਭੇਦਾਯ ਚਤੁਬ੍ਬਿਧਾਯ ਅਨੁਦਿਸਾਯ. ਉਭਯਕੋਟ੍ਠਾਸਾਯਾਤਿ ਦਿਬ੍ਬਰੂਪਦਸ੍ਸਨਤ੍ਥਾਯ, ਦਿਬ੍ਬਸਦ੍ਦਸ੍ਸਵਨਤ੍ਥਾਯ ਚ. ਭਾਵਿਤੋਤਿ ਯਥਾ ਦਿਬ੍ਬਚਕ੍ਖੁਞਾਣਂ, ਦਿਬ੍ਬਸੋਤਞਾਣਞ੍ਚ ਸਮਧਿਗਤਂ ਹੋਤਿ, ਏਵਂ ਭਾਵਿਤੋ. ਤਯਿਦਂ ਵਿਸੁਂ ਵਿਸੁਂ ਪਰਿਕਮ੍ਮਕਰਣੇਨ ਇਜ੍ਝਨ੍ਤੀਸੁ ਵਤ੍ਤਬ੍ਬਂ ਨਤ੍ਥਿ, ਏਕਜ੍ਝਂ ਇਜ੍ਝਨ੍ਤੀਸੁਪਿ ਕਮੇਨੇਵ ਕਿਚ੍ਚਸਿਦ੍ਧਿ ਏਕਜ੍ਝਂ ਕਿਚ੍ਚਸਿਦ੍ਧਿਯਾ ਅਸਮ੍ਭਵਤੋ. ਪਾਲ਼ਿਯਮ੍ਪਿ ਏਕਸ੍ਸ ਉਭਯਸਮਤ੍ਥਤਾਸਨ੍ਦਸ੍ਸਨਤ੍ਥਮੇਵ ‘‘ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ, ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯਾ’’ਤਿ ਵੁਤ੍ਤਂ, ਨ ਏਕਜ੍ਝਂ ਕਿਚ੍ਚਸਿਦ੍ਧਿਸਮ੍ਭਵਤੋ. ‘‘ਏਕਂਸਭਾਵਿਤੋ ਸਮਾਧਿਹੇਤੂ’’ਤਿ ਇਮਿਨਾ ਸੁਨਕ੍ਖਤ੍ਤੋ ਦਿਬ੍ਬਚਕ੍ਖੁਞਾਣਾਯ ਏਵ ਪਰਿਕਮ੍ਮਸ੍ਸ ਕਤਤ੍ਤਾ ਵਿਜ੍ਜਮਾਨਮ੍ਪਿ ਦਿਬ੍ਬਸਦ੍ਦਂ ਨਾਸ੍ਸੋਸ੍ਸੀਤਿ ਦਸ੍ਸੇਤਿ. ਅਪਣ੍ਣਕਨ੍ਤਿ ਅਵਿਰਜ੍ਝਨਕਂ, ਅਨਵਜ੍ਜਨ੍ਤਿ ਵਾ ਅਤ੍ਥੋ.

੩੭੨. ‘‘ਸਮਾਧਿ ਏਵ’’ ਭਾਵੇਤਬ੍ਬਟ੍ਠੇਨ ਸਮਾਧਿਭਾਵਨਾ. ‘‘ਦਿਬ੍ਬਸੋਤਞਾਣਂ ਸੇਟ੍ਠ’’ਨ੍ਤਿ ਮਞ੍ਞਮਾਨੇਨਾਪਿ ਮਹਾਲਿਨਾ ਦਿਬ੍ਬਚਕ੍ਖੁਞਾਣਮ੍ਪਿ ਤੇਨ ਸਹ ਗਹੇਤ੍ਵਾ ‘‘ਏਤਾਸਂ ਨੂਨ ਭਨ੍ਤੇ’’ਤਿਆਦਿਨਾ ਪੁਚ੍ਛਿਤਨ੍ਤਿ ‘‘ਉਭਯਂਸਭਾਵਿਤਾਨਂ ਸਮਾਧੀਨਨ੍ਤਿ ਅਤ੍ਥੋ’’ਤਿ ਵੁਤ੍ਤਂ. ਬਾਹਿਰਾ ਏਤਾ ਸਮਾਧਿਭਾਵਨਾ ਅਨਿਯ੍ਯਾਨਿਕਤ੍ਤਾ. ਤਾ ਹਿ ਇਤੋ ਬਾਹਿਰਕਾਨਮ੍ਪਿ ਇਜ੍ਝਨ੍ਤਿ. ਨ ਅਜ੍ਝਤ੍ਤਿਕਾ ਭਗਵਤੋ ਸਾਮੁਕ੍ਕਂਸਿਕਭਾਵੇਨ ਅਪ੍ਪਵੇਦਿਤਤ੍ਤਾ. ਯਦਤ੍ਥਨ੍ਤਿ ਯੇਸਂ ਅਤ੍ਥਾਯ. ਤੇਤਿ ਤੇ ਅਰਿਯਫਲਧਮ੍ਮੇ. ਤੇ ਹਿ ਸਚ੍ਛਿਕਾਤਬ੍ਬਾਤਿ.

ਚਤੁਅਰਿਯਫਲਵਣ੍ਣਨਾ

੩੭੩. ਤਸ੍ਮਾਤਿ ਵਟ੍ਟਦੁਕ੍ਖੇ ਸਂਯੋਜਨਤੋ. ‘‘ਮਗ੍ਗਸੋਤਂ ਆਪਨ੍ਨੋ’’ਤਿ ਫਲਟ੍ਠਸ੍ਸ ਵਸੇਨ ਵੁਤ੍ਤਂ. ਮਗ੍ਗਟ੍ਠੋ ਹਿ ਮਗ੍ਗਸੋਤਂ ਆਪਜ੍ਜਤਿ. ਤੇਨੇਵਾਹ ‘‘ਸੋਤਾਪਨ੍ਨੇ’’ਤਿ, ‘‘ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ’’ਤਿ (ਮ. ਨਿ. ੩.੩੭੯) ਚ. ਅਪਤਨਧਮ੍ਮੋਤਿ ਅਨੁਪ੍ਪਜ੍ਜਨ- (ਮ. ਨਿ. ੩.੩੭੯) ਸਭਾਵੋ. ਧਮ੍ਮਨਿਯਾਮੇਨਾਤਿ ਮਗ੍ਗਧਮ੍ਮਨਿਯਾਮੇਨ. ਹੇਟ੍ਠਿਮਨ੍ਤਤੋ ਸਤ੍ਤਮਭਵਤੋ ਉਪਰਿ ਅਨੁਪ੍ਪਜ੍ਜਨਧਮ੍ਮਤਾਯ ਵਾ ਨਿਯਤੋ. ਪਰਂ ਅਯਨਂ ਪਰਾਗਤਿ.

ਤਨੁਤ੍ਤਂ ਨਾਮ ਪਵਤ੍ਤਿਯਾ ਮਨ੍ਦਤਾ, ਵਿਰਲ਼ਤਾ ਚਾਤਿ ਆਹ ‘‘ਤਨੁਤ੍ਤਾ’’ਤਿਆਦਿ. ਹੇਟ੍ਠਾਭਾਗਿਯਾਨਨ੍ਤਿ ਹੇਟ੍ਠਾਭਾਗਸ੍ਸ ਕਾਮਭਵਸ੍ਸਪਚ੍ਚਯਭਾਵੇਨ ਹਿਤਾਨਂ. ਓਪਪਾਤਿਕੋਤਿ ਉਪਪਾਤਿਕੋ ਉਪਪਤਨੇ ਸਾਧੁਕਾਰੀਤਿ ਕਤ੍ਵਾ. ਵਿਮੁਚ੍ਚਤੀਤਿ ਵਿਮੁਤ੍ਤਿ, ਚਿਤ੍ਤਮੇਵ ਵਿਮੁਤ੍ਤਿ ਚੇਤੋਵਿਮੁਤ੍ਤੀਤਿ ਆਹ ‘‘ਸਬ੍ਬਕਿਲੇਸ…ਪੇ… ਅਧਿਵਚਨ’’ਨ੍ਤਿ. ਚਿਤ੍ਤਸੀਸੇਨ ਚੇਤ੍ਥ ਸਮਾਧਿ ਗਹਿਤੋ ‘‘ਚਿਤ੍ਤਂ ਪਞ੍ਞਞ੍ਚ ਭਾਵਯ’’ਨ੍ਤਿ. ਆਦੀਸੁ (ਸਂ. ਨਿ. ੧.੨੩; ਪੇਟਕੋ. ੨੨; ਮਿ. ਪ. ੨.੯) ਵਿਯ. ਪਞ੍ਞਾਵਿਮੁਤ੍ਤੀਤਿ ਏਤ੍ਥਾਪਿ ਏਸੇਵ ਨਯੋ, ਤੇਨਾਹ ‘‘ਪਞ੍ਞਾਵ ਪਞ੍ਞਾਵਿਮੁਤ੍ਤੀ’’ਤਿ. ਸਾਮਨ੍ਤਿ ਅਤ੍ਤਨਾਵ, ਅਪਰਪ੍ਪਚ੍ਚਯੇਨਾਤਿ ਅਤ੍ਥੋ. ਅਭਿਞ੍ਞਾਤਿ ਯ-ਕਾਰਲੋਪੇਨ ਨਿਦ੍ਦੇਸੋਤਿ ਆਹ ‘‘ਅਭਿਜਾਨਿਤ੍ਵਾ’’ਤਿ.

ਅਰਿਯਅਟ੍ਠਙ੍ਗਿਕਮਗ੍ਗਵਣ੍ਣਨਾ

੩੭੪-੫. ਅਰਿਯਸਾਵਕੋ ਨਿਬ੍ਬਾਨਂ, ਅਰਿਯਫਲਞ੍ਚ ਪਟਿਪਜ੍ਜਤਿ ਏਤਾਯਾਤਿ ਪਟਿਪਦਾ, ਸਾ ਚ ਤਸ੍ਸ ਪੁਬ੍ਬਭਾਗੋ ਏਵਾਤਿ ਇਧ ‘‘ਪੁਬ੍ਬਭਾਗਪਟਿਪਦਾਯਾ’’ਤਿ ਅਰਿਯਮਗ੍ਗਮਾਹ. ‘‘ਅਟ੍ਠ ਅਙ੍ਗਾਨਿ ਅਸ੍ਸਾ’’ਤਿ ਅਞ੍ਞਪਦਤ੍ਥਸਮਾਸਂ ਅਕਤ੍ਵਾ ਅਟ੍ਠਙ੍ਗਾਨਿ ਅਸ੍ਸ ਸਨ੍ਤੀਤਿ ਅਟ੍ਠਙ੍ਗਿਕੋਤਿ ਪਦਸਿਦ੍ਧਿ ਦਟ੍ਠਬ੍ਬਾ.

ਸਮ੍ਮਾ ਅਵਿਪਰੀਤਂ ਯਾਥਾਵਤੋ ਚਤੁਨ੍ਨਂ ਅਰਿਯਸਚ੍ਚਾਨਂ ਪਚ੍ਚਕ੍ਖਤੋ ਦਸ੍ਸਨਸਭਾਵਾ ਸਮ੍ਮਾ ਦਸ੍ਸਨਲਕ੍ਖਣਾ. ਸਮ੍ਮਦੇਵ ਨਿਬ੍ਬਾਨਾਰਮ੍ਮਣੇ ਚਿਤ੍ਤਸ੍ਸ ਅਭਿਨਿਰੋਪਨਸਭਾਵੋ ਸਮ੍ਮਾ ਅਭਿਨਿਰੋਪਨਲਕ੍ਖਣੋ. ਚਤੁਰਙ੍ਗਸਮਨ੍ਨਾਗਤਾ ਵਾਚਾ ਜਨਂ ਸਙ੍ਗਣ੍ਹਾਤੀਤਿ ਤਬ੍ਬਿਪਕ੍ਖਵਿਰਤਿਸਭਾਵਾ ਸਮ੍ਮਾਵਾਚਾ ਭੇਦਕਰਮਿਚ੍ਛਾਵਾਚਾਪਹਾਨੇਨ ਜਨੇ ਸਮ੍ਪਯੁਤ੍ਤੇ ਚ ਪਰਿਗ੍ਗਣ੍ਹਨਕਿਚ੍ਚਵਤੀ ਹੋਤੀਤਿ ਸਮ੍ਮਾ ਪਰਿਗ੍ਗਹਣਲਕ੍ਖਣਾ. ਯਥਾ ਚੀਵਰਕਮ੍ਮਾਦਿਕੋ ਕਮ੍ਮਨ੍ਤੋ ਏਕਂ ਕਾਤਬ੍ਬਂ ਸਮੁਟ੍ਠਾਪੇਤਿ, ਤਂ ਤਂ ਕਿਰਿਯਾਨਿਪ੍ਫਾਦਕੋ ਵਾ ਚੇਤਨਾਸਙ੍ਖਾਤੋ ਕਮ੍ਮਨ੍ਤੋ ਹਤ੍ਥਪਾਦਚਲਨਾਦਿਕਂ ਕਿਰਿਯਂ ਸਮੁਟ੍ਠਾਪੇਤਿ, ਏਵਂ ਸਾਵਜ੍ਜਕਤ੍ਤਬ੍ਬਕਿਰਿਯਾਸਮੁਟ੍ਠਾਪਕਮਿਚ੍ਛਾਕਮ੍ਮਨ੍ਤਪ੍ਪਹਾਨੇਨ ਸਮ੍ਮਾਕਮ੍ਮਨ੍ਤੋ ਨਿਰਵਜ੍ਜਸਮੁਟ੍ਠਾਪਨਕਿਚ੍ਚਵਾ ਹੋਤਿ, ਸਮ੍ਪਯੁਤ੍ਤੇ ਚ ਸਮੁਟ੍ਠਾਪੇਨ੍ਤੋ ਏਵ ਪਵਤ੍ਤਤੀਤਿ ਸਮ੍ਮਾ ਸਮੁਟ੍ਠਾਪਨਲਕ੍ਖਣੋ ਸਮ੍ਮਾਕਮ੍ਮਨ੍ਤੋ. ਕਾਯਵਾਚਾਨਂ, ਖਨ੍ਧਸਨ੍ਤਾਨਸ੍ਸ ਚ ਸਂਕਿਲੇਸਭੂਤਮਿਚ੍ਛਾਜੀਵਪ੍ਪਹਾਨੇਨ ਸਮ੍ਮਾ ਵੋਦਾਪਨਲਕ੍ਖਣੋ ਸਮ੍ਮਾਆਜੀਵੋ. ਕੋਸਜ੍ਜਪਕ੍ਖਤੋ ਪਤਿਤੁਂ ਅਦਤ੍ਵਾ ਸਮ੍ਪਯੁਤ੍ਤਧਮ੍ਮਾਨਂ ਪਗ੍ਗਣ੍ਹਨਸਭਾਵੋਤਿ ਸਮ੍ਮਾ ਪਗ੍ਗਾਹਲਕ੍ਖਣੋ ਸਮ੍ਮਾਵਾਯਾਮੋ. ਸਮ੍ਮਦੇਵ ਉਪਟ੍ਠਾਨਸਭਾਵਾਤਿ ਸਮ੍ਮਾ ਉਪਟ੍ਠਾਨਲਕ੍ਖਣਾ ਸਮ੍ਮਾਸਤਿ. ਵਿਕ੍ਖੇਪਵਿਦ੍ਧਂਸਨੇਨ ਸਮ੍ਮਦੇਵ ਚਿਤ੍ਤਸ੍ਸ ਸਮਾਦਹਨਸਭਾਵੋਤਿ ਸਮ੍ਮਾ ਸਮਾਧਾਨਲਕ੍ਖਣੋ ਸਮ੍ਮਾਸਮਾਧਿ.

ਅਤ੍ਤਨੋ ਪਚ੍ਚਨੀਕਕਿਲੇਸਾ ਦਿਟ੍ਠੇਕਟ੍ਠਾ ਅਵਿਜ੍ਜਾਦਯੋ. ਪਸ੍ਸਤੀਤਿ ਪਕਾਸੇਤਿ ਕਿਚ੍ਚਪਟਿਵੇਧੇਨ ਪਟਿਵਿਜ੍ਝਤਿ, ਤੇਨਾਹ ‘‘ਤਪ੍ਪਟਿਚ੍ਛਾਦਕ…ਪੇ… ਅਸਮ੍ਮੋਹਤੋ’’ਤਿ. ਤੇਨੇਵ ਹਿ ਸਮ੍ਮਾਦਿਟ੍ਠਿਸਙ੍ਖਾਤੇਨ ਅਙ੍ਗੇਨ ਤਤ੍ਥ ਪਚ੍ਚਵੇਕ੍ਖਣਾ ਪਵਤ੍ਤਤੀਤਿ ਤਥੇਵਾਤਿ ਅਤ੍ਤਨੋ ਪਚ੍ਚਨੀਕਕਿਲੇਸੇਹਿ ਸਦ੍ਧਿਨ੍ਤਿ ਅਤ੍ਥੋ.

ਕਿਚ੍ਚਤੋਤਿ ਪੁਬ੍ਬਭਾਗੇਹਿ ਦੁਕ੍ਖਾਦਿਞਾਣੇਹਿ ਕਾਤਬ੍ਬਸ੍ਸ ਕਿਚ੍ਚਸ੍ਸ ਇਧ ਸਾਤਿਸਯਂ ਨਿਪ੍ਫਤ੍ਤਿਤੋ ਇਮਸ੍ਸੇਵ ਵਾ ਞਾਣਸ੍ਸ ਦੁਕ੍ਖਾਦਿਪ੍ਪਕਾਸਨਕਿਚ੍ਚਤੋ. ਚਤ੍ਤਾਰਿ ਨਾਮਾਨਿ ਲਭਤਿ ਚਤੂਸੁ ਸਚ੍ਚੇਸੁ ਕਾਤਬ੍ਬਕਿਚ੍ਚਨਿਪ੍ਫਤ੍ਤਿਤੋ. ਤੀਣਿ ਨਾਮਾਨਿ ਲਭਤਿ ਕਾਮਸਙ੍ਕਪ੍ਪਾਦਿਪ੍ਪਹਾਨਕਿਚ੍ਚਨਿਪ੍ਫਤ੍ਤਿਤੋ. ਸਿਕ੍ਖਾਪਦਵਿਭਙ੍ਗੇ (ਵਿਭ. ੭੦੩) ‘‘ਵਿਰਤਿਚੇਤਨਾ, ਸਬ੍ਬੇ ਸਮ੍ਪਯੁਤ੍ਤਧਮ੍ਮਾ ਚ ਸਿਕ੍ਖਾਪਦਾਨੀ’’ਤਿ ਵੁਚ੍ਚਨ੍ਤੀਤਿ ਤਤ੍ਥ ਪਧਾਨਾਨਂ ਵਿਰਤਿਚੇਤਨਾਨਂ ਵਸੇਨ ‘‘ਵਿਰਤਿਯੋਪਿ ਹੋਨ੍ਤਿ ਚੇਤਨਾਯੋਪੀ’’ਤਿ ਆਹ. ਮੁਸਾਵਾਦਾਦੀਹਿ ਵਿਰਮਣਕਾਲੇ ਵਾ ਵਿਰਤਿਯੋ, ਸੁਭਾਸਿਤਾਦਿਵਾਚਾਭਾਸਨਾਦਿਕਾਲੇ ਚ ਚੇਤਨਾਯੋ ਯੋਜੇਤਬ੍ਬਾ. ਮਗ੍ਗਕ੍ਖਣੇ ਵਿਰਤਿਯੋਵ ਚੇਤਨਾਨਂ ਅਮਗ੍ਗਙ੍ਗਤ੍ਤਾ ਏਕਸ੍ਸ ਞਾਣਸ੍ਸ ਦੁਕ੍ਖਾਦਿਞਾਣਤਾ ਵਿਯ, ਏਕਾਯ ਵਿਰਤਿਯਾ ਮੁਸਾਵਾਦਾਦਿਵਿਰਤਿਭਾਵੋ ਵਿਯ ਚ ਏਕਾਯ ਚੇਤਨਾਯ ਸਮ੍ਮਾਵਾਚਾਦਿਕਿਚ੍ਚਤ੍ਤਯਸਾਧਨਸਭਾਵਾਭਾਵਾ ਸਮ੍ਮਾਵਾਚਾਦਿਭਾਵਾਸਿਦ੍ਧਿਤੋ, ਤਂਸਿਦ੍ਧਿਯਞ੍ਚ ਅਙ੍ਗਤ੍ਤਯਤ੍ਤਾਸਿਦ੍ਧਿਤੋ ਚ. ਸਮ੍ਮਪ੍ਪਧਾਨਸਤਿਪਟ੍ਠਾਨਵਸੇਨਾਤਿ ਚਤੁਸਮ੍ਮਪ੍ਪਧਾਨਚਤੁਸਤਿਪਟ੍ਠਾਨਭਾਵਵਸੇਨ.

ਪੁਬ੍ਬਭਾਗੇਪਿ ਮਗ੍ਗਕ੍ਖਣੇਪਿ ਸਮ੍ਮਾਸਮਾਧਿਯੇਵਾਤਿ. ਯਦਿਪਿ ਸਮਾਧਿਉਪਕਾਰਕਾਨਂ ਅਭਿਨਿਰੋਪਨਾਨੁਮਜ੍ਜਨਸਮ੍ਪਿਯਾਯਨਬ੍ਰੂਹਨਸਨ੍ਤਸੁਖਾਨਂ ਵਿਤਕ੍ਕਾਦੀਨਂ ਵਸੇਨ ਚਤੂਹਿ ਝਾਨੇਹਿ ਸਮ੍ਮਾਸਮਾਧਿ ਵਿਭਤ੍ਤੋ, ਤਥਾਪਿ ਵਾਯਾਮੋ ਵਿਯ ਅਨੁਪ੍ਪਨ੍ਨਾਕੁਸਲਾਨੁਪ੍ਪਾਦਨਾਦਿਚਤੁਵਾਯਾਮਕਿਚ੍ਚਂ, ਸਤਿ ਵਿਯ ਚ ਅਸੁਭਾਸੁਖਾਨਿਚ੍ਚਾਨਤ੍ਤੇਸੁ ਕਾਯਾਦੀਸੁ ਸੁਭਾਦਿਸਞ੍ਞਾਪਹਾਨਚਤੁਸਤਿਕਿਚ੍ਚਂ ਏਕੋ ਸਮਾਧਿ ਚਤੁਕ੍ਕਜ੍ਝਾਨਸਮਾਧਿਕਿਚ੍ਚਂ ਨ ਸਾਧੇਤੀਤਿ ਪੁਬ੍ਬਭਾਗੇਪਿ ਪਠਮਜ੍ਝਾਨਸਮਾਧਿ ਪਠਮਜ੍ਝਾਨਸਮਾਧਿ ਏਵ ਮਗ੍ਗਕ੍ਖਣੇਪਿ, ਤਥਾ ਪੁਬ੍ਬਭਾਗੇਪਿ ਚਤੁਤ੍ਥਜ੍ਝਾਨਸਮਾਧਿ ਚਤੁਤ੍ਥਜ੍ਝਾਨਸਮਾਧਿ ਏਵ ਮਗ੍ਗਕ੍ਖਣੇਪੀਤਿ ਅਤ੍ਥੋ.

ਤਸ੍ਮਾਤਿ ਪਞ੍ਞਾਪਜ੍ਜੋਤਤ੍ਤਾ ਅਵਿਜ੍ਜਨ੍ਧਕਾਰਂ ਵਿਧਮਿਤ੍ਵਾ ਪਞ੍ਞਾਸਤ੍ਥਤ੍ਤਾ ਕਿਲੇਸਚੋਰੇ ਘਾਤੇਨ੍ਤੋ. ਬਹੁਕਾਰਤ੍ਤਾਤਿ ਯ੍ਵਾਯਂ ਅਨਾਦਿਮਤਿ ਸਂਸਾਰੇ ਇਮਿਨਾ ਕਦਾਚਿਪਿ ਅਸਮੁਗ੍ਘਾਟਿਤਪੁਬ੍ਬੋ ਕਿਲੇਸਗਣੋ ਤਸ੍ਸ ਸਮੁਗ੍ਘਾਟਕੋ ਅਰਿਯਮਗ੍ਗੋ. ਤਤ੍ਥ ਚਾਯਂ ਸਮ੍ਮਾਦਿਟ੍ਠਿ ਪਰਿਞ੍ਞਾਭਿਸਮਯਾਦਿਵਸੇਨ ਪਵਤ੍ਤਿਯਾ ਪੁਬ੍ਬਙ੍ਗਮਾ ਹੋਤੀਤਿ ਬਹੁਕਾਰਾ, ਤਸ੍ਮਾ ਬਹੁਕਾਰਤ੍ਤਾ.

ਤਸ੍ਸਾਤਿ ਸਮ੍ਮਾਦਿਟ੍ਠਿਯਾ. ‘‘ਬਹੁਕਾਰੋ’’ਤਿ ਵਤ੍ਵਾ ਤਂ ਬਹੁਕਾਰਤਂ ਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ‘‘ਅਯਂ’’ ਤਮ੍ਬਕਂਸਾਦਿਮਯਤ੍ਤਾ ਕੂਟੋ. ਅਯਂ ਸਮਸਾਰਤਾਯ ਮਹਾਸਾਰਤਾਯ ਛੇਕੋ. ਏਵਨ੍ਤਿ ਯਥਾ ਹੇਰਞ੍ਞਿਕਸ੍ਸ ਚਕ੍ਖੁਨਾ ਦਿਸ੍ਵਾ ਕਹਾਪਣਵਿਭਾਗਜਾਨਨੇ ਕਰਣਨ੍ਤਰਂ ਬਹੁਕਾਰਂ ਯਦਿਦਂ ਹਤ੍ਥੋ, ਏਵਂ ਯੋਗਾਵਚਰਸ੍ਸ ਪਞ੍ਞਾਯ ਓਲੋਕੇਤ੍ਵਾ ਧਮ੍ਮਵਿਭਾਗਜਾਨਨੇ ਧਮ੍ਮਨ੍ਤਰਂ ਬਹੁਕਾਰਂ ਯਦਿਦਂ ਵਿਤਕ੍ਕੋ ਵਿਤਕ੍ਕੇਤ੍ਵਾ ਤਦਵਬੋਧਤੋ, ਤਸ੍ਮਾ ਸਮ੍ਮਾਸਙ੍ਕਪ੍ਪੋ ਸਮ੍ਮਾਦਿਟ੍ਠਿਯਾ ਬਹੁਕਾਰੋਤਿ ਅਧਿਪ੍ਪਾਯੋ. ਦੁਤਿਯਉਪਮਾਯਂ ਏਵਨ੍ਤਿ ਯਥਾ ਤਚ੍ਛਕੋ ਪਰੇਨ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਦਿਨ੍ਨਂ ਦਬ੍ਬਸਮ੍ਭਾਰਂ ਵਾਸਿਯਾ ਤਚ੍ਛੇਤ੍ਵਾ ਗੇਹਕਰਣਕਮ੍ਮੇ ਉਪਨੇਤਿ, ਏਵਂ ਯੋਗਾਵਚਰੋ ਵਿਤਕ੍ਕੇਨ ਲਕ੍ਖਣਾਦਿਤੋ ਵਿਤਕ੍ਕੇਤ੍ਵਾ ਦਿਨ੍ਨਧਮ੍ਮੇ ਯਾਥਾਵਤੋ ਪਰਿਚ੍ਛਿਨ੍ਦਿਤ੍ਵਾ ਪਰਿਞ੍ਞਾਭਿਸਮਯਾਦਿਕਮ੍ਮੇ ਉਪਨੇਤੀਤਿ ਯੋਜਨਾ. ਵਚੀਭੇਦਸ੍ਸ ਉਪਕਾਰਕੋ ਵਿਤਕ੍ਕੋ ਸਾਵਜ੍ਜਾਨਵਜ੍ਜਵਚੀਭੇਦਨਿਵਤ੍ਤਨਪਵਤ੍ਤਨਕਰਾਯ ਸਮ੍ਮਾਵਾਚਾਯਪਿ ਉਪਕਾਰਕੋ ਏਵਾਤਿ ‘‘ਸ੍ਵਾਯ’’ਨ੍ਤਿਆਦਿ ਵੁਤ੍ਤਂ.

ਵਚੀਭੇਦਸ੍ਸ ਨਿਯਾਮਿਕਾ ਵਾਚਾ ਕਾਯਿਕਕਿਰਿਯਾਨਿਯਾਮਕਸ੍ਸ ਕਮ੍ਮਨ੍ਤਸ੍ਸ ਉਪਕਾਰਿਕਾ. ਤਦੁਭਯਾਨਨ੍ਤਰਨ੍ਤਿ ਦੁਚ੍ਚਰਿਤਦ੍ਵਯਪਹਾਯਕਸ੍ਸ ਸੁਚਰਿਤਦ੍ਵਯਪਾਰਿਪੂਰਿਹੇਤੁਭੂਤਸ੍ਸ ਸਮ੍ਮਾਵਾਚਾਸਮ੍ਮਾਕਮ੍ਮਨ੍ਤਦ੍ਵਯਸ੍ਸ ਅਨਨ੍ਤਰਂ. ਇਦਂ ਵੀਰਿਯਨ੍ਤਿ ਚਤੁਬ੍ਬਿਧਂ ਸਮ੍ਮਪ੍ਪਧਾਨਵੀਰਿਯਂ. ਇਨ੍ਦ੍ਰਿਯਸਮਤਾਦਯੋ ਸਮਾਧਿਸ੍ਸ ਉਪਕਾਰਧਮ੍ਮਾ. ਤਬ੍ਬਿਪਰਿਯਾਯਤੋ ਅਪਕਾਰਧਮ੍ਮਾ ਵੇਦਿਤਬ੍ਬਾ. ਗਤਿਯੋਤਿ ਨਿਪ੍ਫਤ੍ਤਿਯੋ, ਕਿਚ੍ਚਾਦਿਸਭਾਵੇ ਵਾ. ਸਮਨ੍ਨੇਸਿਤ੍ਵਾਤਿ ਉਪਧਾਰੇਤ੍ਵਾ.

ਦ੍ਵੇਪਬ੍ਬਜਿਤਵਤ੍ਥੁਵਣ੍ਣਨਾ

੩੭੬-੭. ‘‘ਕਸ੍ਮਾ ਆਰਦ੍ਧ’’ਨ੍ਤਿ ਅਨੁਸਨ੍ਧਿਕਾਰਣਂ ਪੁਚ੍ਛਿਤ੍ਵਾ ਤਂ ਵਿਭਾਵੇਤੁਂ ‘‘ਅਯਂ ਕਿਰਾ’’ਤਿਆਦਿ ਵੁਤ੍ਤਂ, ਤੇਨ ਅਜ੍ਝਾਸਯਾਨੁਸਨ੍ਧਿਵਸੇਨ ਉਪਰਿ ਦੇਸਨਾ ਪਵਤ੍ਤਾਤਿ ਦਸ੍ਸੇਤਿ. ਤੇਨਾਤਿ ਤਥਾਲਦ੍ਧਿਕਤ੍ਤਾ. ਅਸ੍ਸਾਤਿ ਲਿਚ੍ਛਵੀਰਞ੍ਞੋ. ਦੇਸਨਾਯਾਤਿ ਸਣ੍ਹਸੁਖੁਮਾਯਂ ਸੁਞ੍ਞਤਪਟਿਸਂਯੁਤ੍ਤਾਯਂ ਯਥਾਦੇਸਿਤਦੇਸਨਾਯਂ. ਨਾਧਿਮੁਚ੍ਚਤੀਤਿ ਨ ਸਦ੍ਦਹਤਿ ਨ ਪਸੀਦਤਿ. ਤਨ੍ਤਿਧਮ੍ਮਂ ਨਾਮ ਕਥੇਨ੍ਤੋਤਿ ਯੇਸਂ ਅਤ੍ਥਾਯ ਧਮ੍ਮੋ ਕਥੀਯਤਿ, ਤਸ੍ਮਿਂ ਤੇਸਂ ਅਸਤਿਪਿ ਮਗ੍ਗਪਟਿਵੇਧੇ ਕੇਵਲਂ ਸਾਸਨੇ ਤਨ੍ਤਿਧਮ੍ਮਂ ਕਤ੍ਵਾ ਕਥੇਨ੍ਤੋ. ਏਵਰੂਪਸ੍ਸਾਤਿ ਸਮ੍ਮਾਸਮ੍ਬੁਦ੍ਧਤ੍ਤਾ ਅਵਿਪਰੀਤਧਮ੍ਮਦੇਸਨਤਾਯ ਏਵਂਪਾਕਟਧਮ੍ਮਕਾਯਸ੍ਸ ਸਤ੍ਥੁ. ਯੁਤ੍ਤਂ ਨੁ ਖੋ ਏਤਂ ਅਸ੍ਸਾਤਿ ਅਸ੍ਸ ਪਠਮਜ੍ਝਾਨਾਦਿਸਮਧਿਗਮੇਨ ਸਮਾਹਿਤਚਿਤ੍ਤਸ੍ਸ ਕੁਲਪੁਤ੍ਤਸ੍ਸ ਏਤਂ ‘‘ਤਂ ਜੀਵ’’ਨ੍ਤਿਆਦਿਨਾ ਉਚ੍ਛੇਦਾਦਿਗਾਹਗਹਣਂ ਅਪਿ ਨੁ ਯੁਤ੍ਤਨ੍ਤਿ ਪੁਚ੍ਛਤਿ. ਲਦ੍ਧਿਯਾ ਪਨ ਝਾਨਾਧਿਗਮਮਤ੍ਤੇਨ ਨ ਤਾਵ ਵਿਵੇਚਿਤਤ੍ਤਾ ‘‘ਤੇਹਿ ਯੁਤ੍ਤ’’ਨ੍ਤਿ ਵੁਤ੍ਤਂ ਤਂ ਵਾਦਂ ਪਟਿਕ੍ਖਿਪਿਤ੍ਵਾਤਿ ਝਾਨਲਾਭਿਨੋਪਿ ਤਂ ਗਹਣਂ ‘‘ਅਯੁਤ੍ਤਮੇਵਾ’’ਤਿ ਤਂ ਉਚ੍ਛੇਦਵਾਦਂ ਸਸ੍ਸਤਵਾਦਂ ਵਾ ਪਟਿਕ੍ਖਿਪਿਤ੍ਵਾ. ਅਤ੍ਤਮਨਾ ਅਹੇਸੁਨ੍ਤਿ ਯਸ੍ਮਾ ਖੀਣਾਸਵੋ ਵਿਗਤਸਮ੍ਮੋਹੋ ਤਿਣ੍ਣਵਿਚਿਕਿਚ੍ਛੋ, ‘‘ਤਸ੍ਮਾ ਤਸ੍ਸ ਤਥਾ ਵਤ੍ਤੁਂ ਨ ਯੁਤ੍ਤ’’ਨ੍ਤਿ ਉਪ੍ਪਨ੍ਨਨਿਚ੍ਛਯਤਾਯ ਤਂ ਮਮ ਵਚਨਂ ਸੁਤ੍ਵਾ ਅਤ੍ਤਮਨਾ ਅਹੇਸੁਨ੍ਤਿ ਅਤ੍ਥੋ. ਸੋਪਿ ਲਿਚ੍ਛਵੀ ਰਾਜਾ ਤੇ ਵਿਯ ਸਞ੍ਜਾਤਨਿਚ੍ਛਯਤ੍ਤਾ ਅਤ੍ਤਮਨੋ ਅਹੋਸਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਮਹਾਲਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.